គម្រោងអភិវឌ្ឍន៍ធំៗរបស់រដ្ឋាភិបាលដែលនៅបន្តមានសកម្មភាពក្នុងឆ្នាំ២០២១នឹងជំរុញអចលនទ្រព្យរីកចំរើននៅឆ្នាំបន្ទាប់

ដោយៈ រ៉ាណេត

ភ្នំពេញៈ បន្ថែមពីលើគម្រោងអភិវឌ្ឍន៍របស់រាជរដ្ឋាភិបាល ទៅលើហេដ្ឋារចនាសម្ព័ន្ធនាពេលបច្ចុប្បន្ន សកម្មភាពសាងសង់សំណង់ធំៗរបស់វិស័យឯកជន ដែលកំពុងបន្តដំណើរការនៅក្នុងឆ្នាំ២០២១នេះ នឹងក្លាយជាចលករដ៏មានប្រសិទ្ធភាព ក្នុងការជួយជំរុញឱ្យមានភាពរីកចំរើន លើវិស័យអចលនទ្រព្យកម្ពុជានៅឆ្នាំបន្ទាប់ ខណៈដែលការប្រើប្រាស់វ៉ាក់សាំងទប់ស្កាត់ និងឈានទៅលុបបំបាត់ជំងឺកូវីដ១៩ កំពុងចែកចាយលើសាកលលោក។

អគ្គនាយកក្រុមហ៊ុន Century21 Advance លោកឡុង គឹមសួគ៌ បានប្រាប់ឱ្យដឹងកាលពីល្ងាចថ្ងៃទី២៣ ខែមីនា ឆ្នាំ២០២១ថា នៅក្នុងមួយរយៈចុងក្រោយនេះ ទោះជាកម្ពុជាកំពុងប្រឈមនឹងវិបត្តិជំងឺកូវីដ ប៉ុន្តែគម្រោងសាងសង់ហេដ្ឋារចនាសម្ព័ន្ធរបស់រាជរដ្ឋាភិបាលមិនត្រូវបានផ្អាកសកម្មភាពនោះឡើយ។

លោកថ្លែងថា “គម្រោងធំៗរបស់រាជរដ្ឋាភិបាល ដូចជាព្រលានយន្តហោះអន្តរជាតិភ្នំពេញថ្មី ព្រលាយន្តហោះអន្តរជាតិខេត្តសៀមរាប គម្រោងផ្លូវក្រវ៉ាត់ក្រុង គម្រោងផ្លូវល្បឿលឿនភ្នំពេញ-ព្រះសីហនុ ជាដើមមិនត្រូវបានបង្អាកដោយជំងឺកូវីដ១៩ នោះទេ” ។ លោកបន្តថា “ក្រៅពីនេះ នៅមានដូចជាគម្រោងផ្លូវជាតិលេខ២ គម្រោងផ្លូវជាតិលេខ៣ គម្រោងផ្លូវទាំង៣៨ខ្សែនៅទូទាំងក្រុងសៀមរាប និងគម្រោងអភិវឌ្ឍន៍ជាច្រើនទីតាំងផ្សេងៗទៀត ដែលទាំងនេះ គឺជាចលករយ៉ាងសំខាន់ ក្នុងការជួយជំរុញដល់វិស័យអចលនទ្រព្យឱ្យមានភាពរីកចំរើន ជាពិសេសតម្រូវការប្រើប្រាស់ដីធ្លី” ។

លោកបញ្ជាក់ថា អ្វីដែលសំខាន់ជាងនេះ គឺរាជរដ្ឋាភិបាលបានដាក់ចេញនូវយុទ្ធសាស្ត្រច្បាស់លាស់ និងមានការប្តេជ្ញាចិត្តខ្ពស់ ចំពោះការអភិវឌ្ឍន៍ប្រទេសឱ្យរីកចំរើន ដែលជាគំរូមាន ដូចជា គម្រោងអភិវឌ្ឍន៍នៅទីក្រុងភ្នំពេញ គម្រោងអភិវឌ្ឍន៍នៅខេត្តព្រះសីហនុ គម្រោងនៅសៀមរាប ខេត្តកំពត-កែបជាដើម ក៏នឹងជួយឱ្យវិស័យអចលនទ្រព្យរីកចំរើនដែរ។

លោកបណ្ឌិតគី សិរីវឌ្ឍន៍ ប្រធានមជ្ឈមណ្ឌលសិក្សាចិននៃរាជបណ្ឌិត្យសភាកម្ពុជាក៏ធ្លាប់បានទទួលស្គាល់ដែរថា ទោះស្ថិតនៅក្នុងវិបត្តិដែលកំពុងប្រឈម ទៅនឹងជំងឺកូវីដ១៩នៅក្នុងប្រទេស ក៏វិស័យអចលនទ្រព្យនៅកម្ពុជា មិនមានការធ្លាក់ចុះខ្លាំងដល់កម្រិតសូន្យនោះដែរ ប៉ុន្តែវានឹងអាចមានដំណើរការឡើងវិញបន្តិចម្ដងៗ ក្រោយពេលជាបណ្តើរៗ ក្រោយពេលវិបត្តិត្រូវបានទប់ស្កាត់បានជាសាកល។

លោកបណ្ឌិតបន្តថា “វិស័យនេះ ក៏នឹងជួយឱ្យប្រជាពលរដ្ឋទិញបន្ថែមទៀត ដូចជា ផ្ទះល្វែង ខុនដូ និងដីធ្លីក្នុងតម្លៃដែលមានការគ្រោងទុក អ៊ីចឹង កាលណាតម្លៃអចលនទ្រព្យមិនទាន់បានឡើង និងមិនទាន់មានសន្ទុះឡើងលឿន” ។ លោកបន្តថា “ដូច្នេះការទិញលក់អចលនទ្រព្យនៅក្នុងរដូវកាលមួយនោះ នឹងក្លាយជាឱកាសចំណេញបន្ថែមសម្រាប់ពួកគាត់។ ប៉ុន្តែអ្វីដែលសំខាន់នៅពេលនេះ គឺការចូលរួមទាំងអស់គ្នាក្នុងទប់ស្កាត់ការរាតត្បាតក្នុងសហគមន៍ដែលកំពុងព្រួយបារម្ភ” ៕

ចំណេះដឹងថ្មីៈ មុនទិញផ្ទះបង់រំលស់ ត្រូវពិចារណាចំណុចទាំងនេះជាមុនសិន

ដោយៈ រ៉ាណេត

ភ្នំពេញៈ ក្នុងរយៈពេលប៉ុន្មានឆ្នាំចុងក្រោយនេះ តម្រូវការលំនៅឋានរបស់ពលរដ្ឋកម្ពុជាមានសន្ទុះយ៉ាងខ្លាំង ជាពិសេសគូស្វាមី ភរិយា ដែលទើបរៀបអាពាហ៍ពិពាហ៍ហើយថ្មីថ្មោង ដែលចាំបាច់ត្រូវតែបំពេញតម្រូវការស្នាក់នៅឱ្យបានសមរម្យ។

ប្រការនេះហើយបានធ្វើឲ្យហ៊ុនជាច្រើន បានចាប់ផ្តើមសាងសង់លំនៅឋាន ដូចជាជាបុរី បណ្តុំលំនៅឋានជាផ្ទះល្វែង និងខុនដូរជាដើម ដើម្បីផ្គត់ផ្គង់តម្រូវការទីផ្សារ ប៉ុន្តែការសាងសង់មួយចំនួន ហាក់មិនស្របទៅតាមលក្ខណ្ឌ និងទីតាំងដែលបង្ករផលអាក្រក់ដល់អ្នកទិញយកទៅរស់នៅបន្ត។

ដើម្បីជៀសវាងនូវចំណុចអវិជ្ជមានខាងលើនេះ អ្នកទិញត្រូវគិតពិចារណា និងយល់ទៅលើចំណុចសំខាន់ៗមួយចំនួន មុននឹងឈានដល់ការសម្រេចចិត្តទិញ មិនថាចំពោះការទិញដោយបង់លុយផ្ដាច់ ឬទិញដោយការបង់រំលោះដ៏ដោយ ។ ចំណុចសំខាន់ទាំងអស់នោះរួមមានដូចជា

១)លំនៅឋាននៅជិតផ្សារ និងសាលារៀន

លោក-អ្នកទិញលំនៅឋាន ត្រូវគិតដល់ទីតាំងនៅឋានដែលជិតផ្សារ និងសាលារៀនដើម្បីមានភាពងាយស្រួលក្នុង ធ្វើដំណើរទៅផ្សារទិញរបស់របផ្សេងៗ និងមានភាពងាយស្រួលជូនកូន ទៅសាលារៀនកុំឲ្យមានហានិភ័យទៅថ្ងៃក្រោយ។

២)លំនៅឋាននៅជិតកន្លែងធ្វើការ

លោក-អ្នកទិញលំនៅដ្ឋាន ត្រូវគិតដល់ទីតាំងនៅឋាន ដែលនៅជិតកន្លែងធ្វើការរបស់អស់លោកអ្នក ដើម្បីមានភាពងាយស្រួលក្នុងការធ្វើដំណើរដំណើរ និងចំណាយពេលតិច ព្រោះថា បច្ចុប្បន្នបញ្ហាកកស្ទះចរាចរណ៍ បង្កឲ្យអស់លោកអ្នកខាតពេល និងចំណាយច្រើនជាដើម។

៣)លំនៅឋាននៅជាប់នឹងផ្លូវធំ

លំនៅឋាននៅជាប់នឹងផ្លូវធំ មានភាពងាយស្រួល ក្នុងបង្កើតមុខរបរអាជីវកម្មផ្សេងៗ ព្រោះមានមនុស្សចេញចូល និងធ្វើដំណើរឆ្លងកាត់ច្រើន។

៤) លំនៅឋានមានសុវត្ថិភាព

បញ្ហាសុវត្ថិភាព គឺជារឿងចម្បងរបស់មនុស្ស ចឹងទេលោកអ្នកត្រូវពិនិត្យមើលឲ្យបានល្អិតល្អន់ ទៅលើការសាងសង់លំនៅឋាន មានលក្ខណៈគ្រប់គ្រាន់ និងបច្ចេកទេសត្រឹមត្រូវតាមស្តង់ស្តារ រួមទាំងប្រព័ន្ធលូ ទឹកនិងភ្លើងដែរឬទេ? ម្យ៉ាងទៀតត្រូវមើលជុំហ្នឹងមានបញ្ហាចោរកម្ម និងបញ្ហាផ្សេងៗទៀត ដែលបង្ករឪ្យមានហានិភ័យទៅថ្ងៃក្រោយ។

៥) បរិយាកាសគួរអោយចង់រស់នៅ និង មានតំលៃសមរម្យ

ចំណុចក្រោយនេះ ពិតជាមានសារៈសំខាន់ណាស់ សម្រាប់អស់លោកអ្នកមានបំណងក្នុងការទិញលំនៅឋាន ត្រូវគិតពីបរិយាកាស និងបរិស្ថានជុំវិញល្អ គួរឲ្យចង់រស់នៅដែរទេ?។ សម្រាប់តម្លៃលំនៅឋានវិញ សាកសមជាមួយនឹងលទ្ធភាពនៃចំណូលរបស់យើងដែរឬទេ?៕

រដ្ឋាភិបាលច្រានចោលគំរោងអភិវឌ្ឍន៍តម្លៃ ៣៥០លានដុល្លាររបស់ក្រុមហ៊ុន Naga Corp ក្នុងក្រុងសៀមរាប

ដោយៈ គង់ សូរិយា

ភ្នំពេញៈ រដ្ឋាភិបាលតាមរយៈក្រសួងវប្បធ៌ម និងវិចិត្រសិល្បៈបានសម្រេចច្រានចោលសំណើរវិនិយោគបឹងអច្ឆរិយៈរបស់ក្រុមហ៊ុន Naga Corp ដែលមានតម្លៃរហូតដល់៣៥០លានដុល្លារអាមេរិក។

នៅដើមខែវិច្ឆិកា ឆ្នាំ២០២០ ក្រុមហ៊ុនណាហ្គា ដែលគេស្គាល់ថាជាក្រុមហ៊ុនកាស៊ីណូដ៏ធំជាងគេនៅកម្ពុជា បានប្រកាសពីគម្រោងអភិវឌ្ឍន៍ថ្មីមួយ នៅលើទឹកដីខេត្តសៀមរាប គឺគម្រោង Angkor Lake of Wonder ដែលមានន័យថា «បឹងអច្ឆរិយៈអង្គរ»។ ដ្បិតក្រុមហ៊ុនប្រកាសថា គម្រោងនេះពុំមានបញ្ចូលល្បែងក៏ពិតមែន តែមហាជនមួយចំនួនបារម្ភថា វានឹងអាចប៉ះពាល់ដល់រមណីយដ្ឋានអង្គរ ដែលនៅមិនឆ្ងាយប៉ុន្មានពីគម្រោងដ៏ធំនេះ។

ក្រសួងវប្បធម៌ និងវិចិត្រសិល្បៈ បានចេញសេចក្ដីប្រកាសព័ត៌មានស្ដីពីគម្រោងអភិវឌ្ឍន៍ បឹងអច្ឆរិយៈអង្គរនៅថ្ងៃទី២៣ មិនានេះ។

ក្រសួងវប្បធម៌បានបញ្ជាក់ក្នុងសេចក្ដីប្រកាសព័ត៌មានខាងលើថា គម្រោងរបស់ក្រុមហ៊ុនណាហ្គាខប ពុំអាចអនុវត្តបានទេនៅក្នុងបរិបទនេះ។

ការប្រកាសបដិសេធនេះ គឺក្រោយពេលដែលក្រសួងវប្បធម៌បានប្រជុំ និងស្ដាប់យោបល់ពីគណៈកម្មាធិការអន្ដរជាតិ អាយស៊ីស៊ី-អង្គរ ក៏ដូចជាអ្នកជំនាញការ «Ad Hoc» និងអង្គការយូណេស្កូ ដោយយល់ថាគម្រោងនេះ អាចមានផលប៉ះពាល់ដល់តំបន់រមណីយដ្ឋានអង្គរ។

ក្រុមហ៊ុនណាហ្គា បានប្រកាសពីគម្រោងអភិវឌ្ឍន៍ឈ្មោះថា «បឹងអច្ឆរិយៈអង្គរ» ក្នុងទំហំទឹកប្រាក់៣៥០លានដុល្លារ នៅលើផ្ទៃដី៧៥ហិកតា ដែលមានចម្ងាយប្រមាណ៥០០ម៉ែត្រ ពីតំបន់រមណីយដ្ឋានអង្គរ។

ក្រុមហ៊ុនបញ្ជាក់ថា គម្រោងនេះមានការរៀបចំជាសួនទឹក ផ្សាររាត្រី សណ្ឋាគារ ភោជនីយដ្ឋានជាដើម ដែលគ្រោងនឹងរួមចំណែកអភិវឌ្ឍន៍វិស័យទេសចរណ៍ ក្នុងខេត្តសៀមរាបឱ្យកាន់តែប្រសើរឡើង៕

កំណើនទុនវិនិយោគក្នុងវិស័យសំណង់នៅកម្ពុជា អាចកម្រើកឡើងវិញនៅចុងឆមាសី២ឆ្នាំ២០២១

ដោយ ៖ រ៉ាណេត

ភ្នំពេញ ៖ គម្រោងសាងសង់ និងទុនវិនិយោគក្នុងវិស័យសំណង់នៅកម្ពុជា ដែលស្ថិតនៅក្នុងសភាពស្ងប់ស្ងាត់ក្រោមឥទ្ធិពលនៃវិបត្តិសេដ្ឋកិច្ចបណ្តាលមកពីជំងឺឆ្លងចាប់តាំងពីដើមឆ្នាំ២០២០មកនោះ អាចនឹងចាប់ផ្តើមមានកម្រើកឡើងវិញនៅក្នុងអំឡុងចុងឆមាសទី២ ឬដើមឆ្នាំ២០២២ ក្រោយការទប់ស្កាត់ការរាលដាលជំងឺឆ្លងទទួលបានប្រសិទ្ធភាពខ្ពស់ជាសាកល។

តាមការព្យាករណ៍របស់នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យ CBRE Cambodia លោកស្រីអាន សុធីតា កាលបីពេលថ្មីៗនេះបានឱ្យដឹងថា ប្រសិនបើបញ្ហានៃការរីករាលដាលនៃជំងឺឆ្លងត្រូវបានធ្វើការទប់ស្កាត់ យ៉ាងហោចណាស់អាចពន្យាពេលរហូតដល់ចុងឆ្នាំ២០២១នេះ ឬដើមឆ្នាំក្រោយទើបសកម្មភាពវិនិយោគទៅលើគម្រោងថ្មីចាប់ផ្តើមមាននៅកម្ពុជាឡើងវិញ។

លោកស្រីអាន សុធីតា បានមានប្រសាសន៍ថា “សកម្មភាពសាងសង់នៅពេលបច្ចុប្បន្នភាគច្រើនជាគម្រោងដែលបន្សល់ទុកតាំងពីឆ្នាំចាស់ ហើយមួយចំណែកទៀតជាគម្រោងដែលផ្តួចផ្តើមឡើងដោយអ្នកអភិវឌ្ឍន៍ក្នុងស្រុកប៉ុណ្ណោះ ដោយឡែកគម្រោងថ្មីមកពីក្រៅស្រុកបន្ថែមដូចជានៅមិនទាន់មាននៅឡើយនោះទេ។ សម្រាប់ទុនវិនិយោគក្នុងស្រុកដែលវាមានកំណើនទុនក្នុងវិស័យសំណងតិចភាគរយណាស់បើប្រៀបទៅនឹងទុនវិនិយោគដែលទទួលបានពីក្រៅប្រទេស”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម ធ្លាប់បានលើកឡើងថា ចាប់តាំងពីឆ្នាំ២០២០ និងបន្តមកដល់ឆ្នាំ២០២១នេះ សកម្មភាពវិនិយោគក្នុងវិស័យសំណង់ភាគច្រើនជាសកម្មភាពរបស់អ្នកក្នុងស្រុក ដោយឡែកសម្រាប់លំហូរទុនចូលពីក្រៅស្រុកគឺមានតិចតួចបំផុត។

លោកបានបន្តថា “វិបត្តិសេដ្ឋកិច្ចដែលកំពុងកើតមាននៅពេលនេះ គឺជះឥទ្ធិពលគ្រប់ប្រទេស ដែលបណ្តាលឱ្យប៉ះពាល់ដល់គម្រោងវិនិយោគទាំងអស់។ ប៉ុន្តែក្រោយពេលវិបត្តិនេះត្រូវបានទប់ស្កាត់ ដោយការប្រើប្រាស់វ៉ាក់សាំងមានប្រសិទ្ធភាពខ្ពស់ គម្រោងវិនិយោគនានានឹងចាប់ផ្តើមរៀបចំឡើងវិញ ហើយតាមខ្ញុំគិត ប្រសិនបើវិបត្តិជំងឺដែលកំពុងរាលដាលនេះត្រូវបានបញ្ចប់នៅត្រឹមពាក់កណ្តាលឆ្នាំនេះ នោះសកម្មភាពវិនិយោគនៅក្នុងវិស័យសំណង់អាចនឹងចាប់ផ្តើមនៅដើមឆ្នាំបន្ទាប់”៕

គម្រោង “ភូមិកីឡា” ក្នុងពហុកីឡដ្ឋានជាតិមរតកតេជោ នឹងបម្រើដល់អត្តពលិករាប់ពាន់នាក់នៅស៊ីហ្គេមឆ្នាំ២០២៣

ដោយៈ ប៊ី

ភ្នំពេញៈ គម្រោងសាងសង់ភូមិកីឡា ដែលត្រូវសាងសង់ក្នុងពហុកីឡដ្ឋានជាតិមរតកតេជោ នឹងជាកន្លែងស្នាក់នៅ ហូបចុករបស់កីឡាករ-កីឡាការិនី រាបពាន់នាក់ ក្នុងពេលកម្ពុជាធ្វើជាម្ចាស់ផ្ទះស៊ីហ្គេមនៅឆ្នាំ២០២៣។

ភូមិកីឡា ឬដែលគេនិយមហៅថា បុរីកីឡា ជាតម្រូវការក្នុងការសាងសង់ក្នុងកីឡដ្ឋានជាតិមរតកតេជោ ខណៈវាគឺជាកន្លែងស្នាក់នៅ ហូបចុករបស់កីឡាករ-កីឡាការិនី ក្នុងអំឡុងពេលប្រកួតស៊ីហ្គេម ឆ្នាំ២០២៣។

តាមការបញ្ជាក់នៅលើទំព័រ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ (CAMSOC) គម្រោងសាងសង់ភូមិកីឡា ឬបុរីកីឡា គឺជាការសហការជាមួយក្រុមហ៊ុនឯកជន World Bridge Sport Village ដោយនៅក្នុងគម្រោងសាងសង់ភូមិកីឡានេះ ឃើញថាមានសោភ័ណ្ឌភាព រចនាបទល្អ និងគោរពទៅតាមបទដ្ឋាននិយាមនៃពហុកីឡដ្ឋានជាតិមរតកតេជោ ត្រូវសាងសង់លើផ្ទៃដីទំហំប្រមាណ ៨ហិកតា ស្ថិតនៅផ្នែកខាងក្រោយពហុកីឡដ្ឋានជាតិមរតកតេជោ។

ភូមិកីឡា គឺជាកន្លែងស្នាក់នៅ ហូបចុករបស់កីឡាករ-កីឡាការិនី ក្នុងពេលស៊ីហ្គេម ដែលអាចរក្សានូវសុវត្ថិភាព ការគ្រប់គ្រងជាដើម។ ភូមិកីឡានេះ ត្រូវបានរាជរដ្ឋាភិបាលកម្ពុជាប្រគល់ឲ្យក្រុមហ៊ុន World Bridge Sport Village ដែលជាក្រុមហ៊ុនធ្លាប់មានស្នាដៃកសាងអគារខ្ពស់ៗ ក្នុងរាជធានីភ្នំពេញ។

នៅក្នុងភូមិកីឡានេះ នឹងរៀបចំឲ្យមានសារមន្ទីរស៊ីហ្គេម ដែលនឹងអាចផ្ទុកអនុស្សាវរីយ៍ទាំងឡាយនៅក្នុងសារមន្ទីរស៊ីហ្គេម សម្រាប់ការសិក្សាស្រាវជ្រាវរបស់សិស្សានុសិស្ស និស្សិត ក៏ដូជាមហាជនទូទៅជំនាន់ក្រោយៗ អាចស្វែងរកការស្រាវជ្រាវនៅទីនោះបាន។

ភូមិកីឡានេះ នឹងត្រូវប្រគល់ជូន CAMSOC នាចុងឆ្នាំ២០២២ សម្រាប់ការរៀបចំប្រើប្រាស់ក្នុងស៊ីហ្គេម ឆ្នាំ២០២៣ ដែលតាមការគ្រោងទុក នឹងអាចមានអត្តពលិកប្រមាណ ៧០០០នាក់ រួមទាំងប្រតិភូ មន្ត្រី គ្រូបង្វឹក ប្រមាណ ៣០០០នាក់ទៀត សរុបប្រមាណ១ម៉ឺននាក់ នៅក្នុងភូមិកីឡាតែមួយនេះ ដើម្បីងាយស្រួលក្នុងការគ្រប់គ្រង ថែរក្សាសុវត្ថិភាព ក៏ដូចជាអាចហូបចុក ស្នាក់នៅជុំគ្នា ព្រមទាំងងាយស្រួលក្នុងការដឹកជញ្ជូនផងដែរ។

ព្រឹត្តិការណ៍កីឡាអាស៊ីអាគ្នេយ៍ (ស៊ីហ្គេម – SEA Games) លើកទី៣២ ដែលកម្ពុជា ត្រៀមទទួលរៀបចំធ្វើជាម្ចាស់ផ្ទះនៅឆ្នាំ២០២៣ នឹងធ្វើឡើងនៅចន្លោះថ្ងៃទី០៥ ដល់ថ្ងៃទី១៦ ខែឧសភា ឆ្នាំ២០២៣៕

ពហុកីឡដ្ឋានមរតកតេជោនឹងបញ្ចប់ការបំពាក់កៅអីអង្គុយទស្សនានៅត្រឹម ខែមេសាខាងមុខនេះ

ដោយៈ រ៉ាណេត

ភ្នំពេញៈ ជាមួយនឹងការពន្លឿនល្បឿននៃការសាងសង់ ដើម្បីអាចបញ្ចប់ទៅតាមការគ្រោងទុក និងត្រៀមស្វាគមន៍កីឡាស៊ីហ្គេមលើកទី៣២ នៅឆ្នាំ២០២៣ពេលខាងមុខនេះ។

ពហុកីឡដ្ឋានមរតកតេជោដ៏ធំប្រចាំប្រទេស ដែលស្ថិតនៅខណ្ឌជ្រោយចង្វារ ក្នុងបរិវេណទីក្រុងរណបលីយ៉ុងផាត់ បច្ចុប្បន្នកំពុងរៀបចំ និងបំពាក់សម្ភារៈអង្គុយទស្សនាដែលរួមមានកៅអីសុវត្ថិភាពជាដើម គ្រោងនឹងបញ្ចប់ការបំពាក់នៅត្រឹមអំឡុងខែមេសាខាងមុខនេះ ខណៈដែលគម្រោងទាំងអស់សម្រេចបានជាង៩០ភាគរយ។

គិតត្រឹមថ្ងៃទី២៣ ខែមីនា ឆ្នាំ២០២១នេះ ការបំពាក់កៅអីសម្រេចបានចំនួន១២០០០កៅអី ខណៈកៅអៅអង្គុយសម្រាប់កីឡដ្ឋានធំ(Main Stadium) គឺនៅសល់ ៤០.០០០កៅអីទៀត ដោយក្នុង១ថ្ងៃៗសម្រេចបានប្រមាណ៨០០កៅអី ហើយការបំពាក់កៅអីនេះ នឹងអាចហើយរួចរាល់ជាស្ថាពរនៅក្នុងខែមេសា ឆ្នាំ២០២១។

អគ្គលេខាធិការនៃគណៈកម្មការជាតិអូឡាំពិកកម្ពុជាបានឱ្យដឹងថា ពហុកីឡដ្ឋានដ៏ទំនើបនេះ ជាជំនួយឥតសំណងរបស់រដ្ឋាភិបាលចិន គ្រោងចំណាយថវិកា១៥៨លានដុល្លារ ដែលអាចផ្ទុកអ្នកទស្សនាបានប្រមាណ៦ម៉ឺននាក់ និងអាចជម្លៀសទស្សនិកជនត្រឹមរយៈពេល៧នាទី ក្នុងករណីមានហេតុការណ៍មិនប្រក្រតីកើតឡើង។

ចំពោះការដាំស្មៅលើទីលានបាល់ទាត់ គឺបានដាំពេញទីលានរួចរាល់ហើយ នៅសល់តែផ្លូវរត់អត្តពលកម្ម អមជុំវិញទីលានបាល់ទាត់ប៉ុណ្ណោះ ដែលតាមផែនការរៀបចំតុបតែងនានា កំពុងពន្លឿនឱ្យបានឆាប់រហ័សផងដែរ។

លោកអគ្គលេខាធិការបន្ថែមថា ខាងភាគីចិនកំពុងពន្លឿនផែនការសាងសង់នេះឱ្យបានឆាប់រហ័ស ដោយទាំងវិស្វករ កម្មករចិន-ខ្មែរទាំងអស់ ត្រូវបានអនុវត្តវិធានការបង្ការជំងឺកូវីដ-១៩ ដោយមិនអនុញ្ញាតឱ្យចេញចូលនោះទេ ពោលគឺអ្នកធ្វើការសាងសង់កីឡ ដ្ឋានធំនេះ ស្នាក់នៅ ហូបចុក នៅទីនេះតែម្តង។

ពហុកីឡដ្ឋានជាតិមរតកតេជោ គឺជាកន្លែងរៀបចំពិធីបើក-បិទព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ហើយក៏ជាកន្លែងប្រកួតកីឡាមួយភាគធំ នៅទៅនោះដែរ ដែលកម្ពុជា ទទួលធ្វើម្ចាស់ផ្ទះការប្រកួតកីឡា ថ្នាក់តំបន់អាស៊ីអាគ្នេយ៍មួយនេះ ជាលើកដំបូងជាប្រវត្តិសាស្ត្ររបស់ខ្លួន។

កីឡដ្ឋាននេះ បានបើកការដ្ឋានសាងសង់ ចាប់តាំងពីថ្ងៃទី៤ មេសា ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕

ធនាគារ ហត្ថា អនុវត្តវិធានការការពារជំងឺកូវីដ១៩ យ៉ាងម៉ឺងម៉ាត់ដើម្បីការពារសុវត្ថិភាពអតិថិជន និងបុគ្គលិក

ក្នុងនាមជាស្ថាប័នមួយដែលតែងតែផ្តោតយកចិត្តទុកដាក់ខ្ពស់លើសុខុមាលភាពអតិថិជន និងបុគ្គលិករបស់ខ្លួន ធនាគារ ហត្ថា បានធ្វើការអនុវត្តវិធានការការពារជំងឺកូវីដ១៩ តាមអនុសាសន៍របស់រាជរដ្ឋាភិបាល ក៏ដូចជាសេចក្តីណែនាំរបស់ក្រសួងសុខាភិបាលយ៉ាងម៉ឺងម៉ាត់បំផុត។ ការអនុវត្តវិធានការនេះគឺមិនមែនទើបតែចាប់ផ្តើមធ្វើនោះទេ ធនាគារ ហត្ថាបានអនុវត្តចាប់តាំងពីមានការរកឃើញវត្តមានជំងឺកូវីដ១៩ ដំបូងនៅក្នុងប្រទេសកម្ពុជាមកម្ល៉េះ។

ជាការឆ្លើយតបទៅនឹងការឆ្លងចូលសហគមន៍ក្នុងព្រឹត្តិការណ៍២០កុម្ភៈ ដែលការចម្លងហាក់ដូចជាមានសភាពធ្ងន់ធ្ងរជាងព្រឹត្តិការណ៍មុនៗ ធនាគារ ហត្ថា បានចាត់វិធានការភ្លាមៗ ដើម្បីការពារសុវត្ថិភាពអតិថិជន និងបុគ្គលិករបស់ខ្លួន ដែលសកម្មភាពទាំងនោះរួមមាន៖

១. ធ្វើការផ្សព្វផ្សាយវិធានការការពារ ៣កុំ និង៣ការពារ ដែលបានដាក់ចេញដោយរាជរដ្ឋាភិបាល និងក្រសួងសុខាភិបាលទៅកាន់បុគ្គលិកទាំងអស់ ព្រមទាំងអតិថិជន។

២. បិទ QR code “ទប់ស្កាត់កូវីដ១៩-Stop COVID-19” នៅគ្រប់ការិយាល័យសាខាទាំងអស់ និងតម្រូវឱ្យអតិថិជន ព្រមទាំងបុគ្គលិកទាំងអស់ធ្វើការស្កេន រាល់ពេលចូលការិយាល័យនីមួយៗ។

៣. ធ្វើការវាស់កំដៅ និងបាញ់អាកុលបុគ្គលិកមុនពេលចូលការិយាល័យម្តងៗ (ពេលព្រឹក និងពេលថ្ងៃ) និងតម្រូវឱ្យបុគ្គលិកពាក់ម៉ាស់ និងរបាំងមុខជាប់ជានិច្ចនៅក្នុងបរិវេណការិយាល័យធានាគារ។

៤. អតិថិជនដែលចូលការិយាល័យត្រូវធ្វើការវាស់កំដៅ និងបាញ់អាកុលជាមុន ព្រមទាំងតម្រូវឱ្យពាក់ម៉ាស់។

៥. កំណត់គម្លាតដល់អតិថិជនដែលត្រូវអង្គុយចាំធ្វើប្រតិបត្តិការបានត្រឹមត្រូវ។

៦. ផ្លាស់ប្តូរការប្រជុំ និងវគ្គបណ្តុះបណ្តាលផ្សេងៗពីការជួបផ្ទាល់ទៅជាអនឡាញ (Online) វិញ។

៧. រៀបចំចាត់ចែងបុគ្គលិកមួយចំនួនឱ្យធ្វើការពីផ្ទះ ដើម្បីកាត់បន្ថយការជួបផ្ទាល់ និងរក្សាគម្លាតសង្គមឱ្យបានល្អក្នុងការិយាល័យ។

៨. បាញ់ថ្នាំសម្លាប់មេរោគនៅក្នុងការិយាល័យជាទៀងទាត់។

សកម្មភាពទាំងនេះបានបង្ហាញយ៉ាងច្បាស់ពីការយកចិត្តទុកដាក់ចូលរួមទប់ស្កាត់ការរីករាលដាលជំងឺកូវីដ១៩ នៅប្រទេសកម្ពុជា។ បន្ថែមពីលើនេះ ធនាគារ ហត្ថាក៏ធ្លាប់បានបរិច្ចាគថវិការចំនួន២០០,០០០,០០០រៀលដើម្បីចូលរួមជាមួយរាជរដ្ឋាភិបាល ទិញវ៉ាក់សាំងការពារជំងឺកូវីដ១៩ ចាក់ជូនប្រជាជនកម្ពុជាដោយឥតគិតថ្លៃ។

ការចូលរួមទប់ស្កាត់ជំងឺកូវីដ១៩ គឺជាការជួយខ្លួនឯង ជួយក្រុមគ្រួសារ និងជួយសង្គមជាតិយើងទាំងមូល។ ទាំងអស់គ្នាអនុវត្ត ៣កុំ និង៣ការពារ ដើម្បីកម្ពុជាជៀសផុតពីការចម្លងជំងឺកូវីដ។

Le Condé BKK1 ចូលរួមអបអរសាទរទិវាព្រៃឈើអន្តរជាតិ ២១ មីនា ឆ្នាំ២០២១

ដោយ ៖ គង់ ម៉ាលីន

ភ្នំពេញ ៖

ក្នុងឱកាសប្រារព្វទិវាពញរៃឈើអន្តរជាតិ ២១មីនា ឆ្នាំ២០២១ ដែលត្រូវបានប្រារព្ធទូទាំងសកលលោក ក្រុមការងារ Le Condé BKK1 បានចូលរួមផងដែរតាមរយៈការប្រើប្រាស់ពាក្យស្លោកផ្សេងៗនៅតាមដើមឈើក្នុងតំបន់បឹងកេងកង១ ដើម្បីជួយផ្សព្វផ្សាយបន្ថែមក្នុងគោលបំណងលើកកម្ពស់ការយល់ដឹងអំពីសារៈសំខាន់នៃព្រៃឈើ ដែលអាចគាំពារ និងធ្វើឲ្យយើងគ្រប់គ្នារស់នៅប្រកបដោយនិរន្តរភាព។

តំណាងក្រុមការងារ Le Condé BKK1 បានប្រាប់ឱ្យដឹងថា ព្រៃឈើពិតជាមានសារៈសំខាន់ណាស់សម្រាប់ជីវិតមនុស្សសត្វ និងជីវៈចម្រុះផ្សេងៗទៀត ដូចនេះយើងត្រូវរួបរួមគ្នាស្រឡាញ់ និងការពារធនធានធម្មជាតិដែលយើងមានឲ្យបានគង់វង្សសម្រាប់មនុស្សជំនាន់ក្រោយ។

ប៉ុន្មានឆ្នាំចុងក្រោយនេះស្ថានភាពសត្វព្រៃនៅក្នុងតំបន់ការពារធម្មជាតិត្រូវបានអ្នកជំនាញវាយតម្លៃថា មានភាពប្រសើរឡើងមួយកម្រិត។ វត្តមានសត្វព្រៃនៅក្នុងតំបន់ការពារធម្មជាតិមានការកើនឡើង នេះក៏ដោយសារតែលទ្ធផលនៃការការពារ និងអភិរក្សធនធានធម្មជាតិ ព្រៃឈើដែលជាជម្រករបស់ពពួកសត្វព្រៃមានភាពប្រសើរឡើង ការអនុវត្តច្បាប់កាន់តែមានប្រសិទ្ធភាព។
ចំនុចវិជ្ជមានទាំងនេះ កើតឡោះងដោយសារតែមានការខិតខំប្រឹងប្រែងរួមគ្នារវាងមន្ត្រីជំនាញ អង្គការដៃគូ និងសហគមន៍តំបន់ការពារធម្មជាតិក្នុងការគ្រប់គ្រង និងអភិរក្សតំបន់ធម្មជាតិ។

កាលពីឆ្នាំមុន ក្រុមការងារ Le Condé BKK1 ក៏បានចូលរួមនៅក្នុងសកម្មភាពអបអរសាទរទិវាព្រៃឈើអន្តរជាតិផងដែរ តាមរយៈការរប្រើប្រាស់ពាក្យស្លោកផ្សេងៗ ដាក់នៅតាមដើមឈើក្នុងតំបន់រាជធានីភ្នំពេញ រួមជាមួយនឹងសកម្មភាព ដាំដើមឈើនៅតាមសហគមន៍នានាដែលអាចចុះទៅដល់ ហើយក៏មានការចែកអំណោយដល់ប្រជាជនដែលក្រីក្រផងដែរ។

មួយវិញទៀត ក្នុងនាមជាអ្នកអភិវឌ្ឍន៍គម្រោងអចលនទ្រព្យ ដោយមើលឃើញពីតម្រូវការពិតប្រាកដនៃពិភពបៃតងនេះ គម្រោងអភិវឌ្ឍន៍ Le Condé BKK1 ក៏បានរចនាជាមួយសួនច្បារបៃតងនៅជាន់ទី៣២ ដែលមានទំហំដល់ទៅជាង១០០០ម៉ែត្រការ៉េ ដើម្បីផ្គត់ផ្គង់តម្រូវការនេះដល់អ្នករស់នៅទាំងអស់ប្រកបដោយភាពស្រស់ស្រាយបែបធម្មជាតិ។

ជាចុងក្រោយ យើងទាំងអស់គ្នាត្រូវការពារ និងថែរក្សាធនធានធម្មជាតិ និងព្រៃឈើឲ្យបានស្ថិតស្ថេរសម្រាប់អនាគត ដែលទាំងអស់នេះនឹងផ្តល់ផលវិជ្ជមានទាំងសុខភាព និងសោភ័ណភាព ព្រមទាំងបរិស្ថានទាំងអស់ដែលនៅជុំវិញខ្លួន។ សូមរួបរួមគ្នាការពារ និងអភិរក្សព្រៃឈើ ដើម្បីសហគមន៍ និងមនុស្សជំនាន់ក្រោយ!

ជាចុងក្រោយ យើងទាំងអស់គ្នាត្រូវការពារ និងថែរក្សាធនធានធម្មជាតិ និងព្រៃឈើឲ្យបានស្ថិតស្ថេរសម្រាប់អនាគតយើង។ ទាំងអស់នេះនឹងផ្តល់ផលវិជ្ជមានដល់យើងផងដែរទាំងសុខភាព សោភ័ណ្ឌភាព ព្រមទាំងបរិស្ថានទាំងអស់នៅជុំវិញយើងផងដែរ។

រួមគ្នាការពារ និងអភិរក្សព្រៃឈើ ដើម្បីសហគមន៍យើង និងមនុស្សជំនាន់ក្រោយ!

ប្រតិបត្តិករ ៖ ទីផ្សារដីធ្លីតំបន់ផ្លូវជាតិលេខ៥១ និង៤១ ស្ថិតនៅក្នុងសភាពស្ងប់ស្ងាត់ក្នុងដំណាក់កាលនេះ

ដោយ ៖ រ៉ាណេត

ភ្នំពេញ ៖ មិនខុសគ្នាពីទីផ្សារដីធ្លីនៅតាមបណ្តាខេត្តក្រុងមួយចំនួនទៀតនោះឡើយ សម្រាប់សកម្មភាពទិញលក់ដីធ្លីនៅសងខាងផ្លូវជាតិលេខ៥១ និងផ្លូវជាតិលេខ៤១ ដែលធ្លាប់តែមានភាពផុសផុលនោះពេលនេះកំពុងស្ថិតនៅក្នុងសភាពស្ងប់ស្ងាត់ មានតែអ្នកចង់លក់ ប៉ុន្តែគ្មានអ្នកចង់ទិញ ខណៈដែលតម្លៃបានឡើងថ្លៃខ្ពស់រួចទៅហើយ។

លោកសុខ ចន្ថានាយកគ្រប់គ្រងទីផ្សារ និងផ្នែកលក់ក្រុមហ៊ុនភ្នាក់ងារអចលនទ្រព្យ Cham Roen Realty ដែលមានគម្រោងដីឡូតិ៍ចំនួន៣ទីតាំងនៅតាមបណ្តោយផ្លូវជាតិលេខ៤១ បានមានប្រសាសន៍ប្រាប់តាមទូរស័ព្ទនៅរសៀលថ្ងៃទី២៣ ខែមីនា ឆ្នាំ២០២១នេះថា ក្នុងរយៈពេលជាង១ខែកន្លងមកនេះ ការទិញលក់នៅក្នុងទីផ្សារដីធ្លីគឺមានភាពស្ងប់ស្ងាត់រហូតមិនអាចលក់ចេញសូម្បីមួយឡូតិ៍ ខុសប្លែកកាលពីដើមខែមករា ដែលក្នុងមួយខែអាចលក់បានមិនក្រោម១០ -១៥ឡូតិ៍។

លោកបញ្ជាក់ថា “ខ្ញុំជឿថា មិនមែនមានតែផ្លូវ៤១ ដែលខ្ញុំកំពុងកាន់គម្រោងលក់នេះទេដែលស្ងាត់ នៅតំបន់ផ្សេងទៀតក៏ស្ងាត់ដូចគ្នា ព្រោះក្នុងដំណាក់នេះគេមិនសូវចេញដើរក្រៅនោះទេ គេបារម្ភពីសុវត្ថិភាព។ ការឆ្លងលើកនេះ ខ្លាំងជាងពេលមុនៗ ដូច្នេះមិនសូវមានភ្ញៀវមកមើលគម្រោងទេ ដែលសូម្បីតែបុគ្គលិកខ្ញុំមួយចំនួនក៏ធ្វើការផ្សព្វផ្សាយតាមអនឡាញដែរ ទាល់តែមានភ្ញៀវណាត់ជួបទើបជូនមកមើល ប៉ុន្តែជាងមួយខែនេះស្ទើរតែគ្មានភ្ញៀវនោះទេ”។

យ៉ាងណាក៏ដោយលោកសុខ ចន្ថាបានបញ្ជាក់ថា ទោះជាមិនមានភ្ញៀវ និងលក់មានការធ្លាក់ចុះ ប៉ុន្តែតម្លៃមិនធ្លាក់ចុះនោះ ជាក់ស្ដែងដីឡូតិ៍ដែលលោកកំពុងកាន់លក់នៅពេលបច្ចុប្បន្នស្ថិតនៅក្បែរស្ពានគុណគ្រូ ក្បែរផ្លូវជាតិ៤១តែម្ដង នៅតែរក្សាតម្លៃចាប់ពី១៦០០០-២០០០០ដុល្លារក្នុងមួយឡូតិ៍ដដែល ហើយគម្រោងដីឡូតិ៍ដែលចុះពីផ្លូវជាតិ៤១ចូលទៅក្នុងភូមិចម្ងាយជាង៧០០ម៉ែត្រក៏ត្រូវដាក់លក់ជាង៩០០០-១២០០០ដុល្លារក្នុងមួយឡូតិ៍ដែរ។

អគ្គនាយកក្រុមហ៊ុនភ្នាក់ងារអចលនទ្រព្យ Chailin Sear Realty Co,.Ltd លោក ស៊ា ឆៃលីន បានមានប្រសាសន៍ថា ស្ថិតនៅក្នុងដំណាក់កាលដែលកំពុងប្រឈមនឹងការរាតត្បាតនៃជំងឺកូវីដ១៩ នាពេលបច្ចុប្បន្ននេះ ស្ថានភាពនៃទីផ្សារដីធ្លីដែលស្ថិតនៅតំបន់ផ្លូវ៥១ មិនមានសកម្មភាពរស់រវើកដូចឆ្នាំ២០១៩នោះទេ។

លោកបានបន្តថា “ទាំងប្រភេទដីទំហំធំសម្រាប់គម្រោងអភិវឌ្ឍន៍ឧស្សាហកម្ម បណ្តុំលំនៅដ្ឋាន និងទំហំតូចសម្រាប់គម្រោងសាងសង់លំនៅដ្ឋានដាច់ដោយឡែក គឺមិនមានសកម្មភាពទិញលក់គួរឱ្យចាប់អារម្មណ៍នោះទេ ពោលគឺនៅតែរក្សាភាពស្ងប់ស្ងាត់ដូចគ្រាពាក់កណ្តាលឆ្នាំ២០២០ដូច្នោះដែរ”។

លោកបញ្ជាក់ថា “ក្រៅតែមិនមានសកម្មភាពទិញលក់ សម្រាប់តម្លៃដីធ្លីនៅទីតាំងខ្លះថែមទាំងមានការធ្លាក់ចុះខ្លាំងបើប្រៀបធៀបទៅនឹងឆ្នាំ២០១៩ រហូតមានម្ចាស់ដីខ្លះដែលមានតម្រូវការលុយប្រញាប់បានដាក់លក់ដោយការបញ្ចុះតម្លៃរហូតដល់ជិត៥០ភាគរយក៏មានដែរ ប៉ុន្តែអ្វីដែលសំខាន់គឺមានតែអ្នកលក់ មិនមានអ្នកទិញ”។

លោកថា “យើងទទួលស្គាល់ថាវិស័យដីធ្លីនៅតំបន់ផ្លូវ៥១ នឹងមានគម្រោងអភិវឌ្ឍន៍ច្រើនជាពិសេសវិស័យឧស្សាហកម្ម ដែលនឹងមានការសាងសង់ជាឃ្លាំង ជារោងចក្រជាដើម ប៉ុន្តែដោយសារតែបញ្ហានៃជំងឺកូវីដបានអូសបន្លាយពេលវេលារបស់គម្រោងមួយចំនួនមិនអាចចាប់ដំណើរការបាន ជាពិសេសគម្រោងរបស់ក្រុមហ៊ុនដែលមានជនជាតិបរទេស ដូចជាជនជាតិចិនជាម្ចាស់ទុនតែម្ដង”៕

លោកបណ្ឌិតគីម ហ៊ាងលើកឡើងពីការប្រកាសរបស់រដ្ឋាភិបាលអំពាវនាវឲ្យអ្នកអភិវឌ្ឍន៍អចលនទ្រព្យជួយសម្រួលលក្ខខ័ណ្ឌបង់ប្រាក់ដល់អតិថិជន

ដោយៈលក្ខិណា

ភ្នំពេញៈ កាលពីថ្ងៃទី២២មីនា ២០២១ ក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជា បានចេញសេចក្តីប្រកាសរួមស្ដីពីលទ្ធផលកិច្ចប្រជុំ លើបញ្ហាអចលនវត្ថុនៅកម្ពុជា ដោយបានអំពាវនាវ និងលើកទឹកចិត្តដល់ក្រុមហ៊ុនអភិវឌ្ឍអចលនវត្ថុនៅកម្ពុជា បន្ធូរបន្ថយលក្ខខណ្ឌបង់រំលស់ និងការលើកលែងមួយចំនួនទៀត។

នៅព្រឹកថ្ងៃទី២៣ មីនា ២០២១ លោកឧកញ៉ាបណ្ឌិត គីម ហ៊ាងបប្រធានKW Cambodia បានសរសេរលើបណ្ដាញសង្គមរបស់លោក ពាក់ព័ន្ធនឹងបញ្ហាដោយលើកឡើងក្នុងនាមជាអ្នកទិញផង អ្នកអភិវឌ្ឍន៍ផង ជាម្ចាស់ក្រុមហ៊ុនសំណង់ អ្នកម៉ៅការសំណង់ផង។

លោកបណ្ឌិត គីមហ៊ាងបានបន្តថា ក្នុងនាមអ្នកទិញផ្ទះ និងខុនដូ គឺពិតជាគាំទ្រ ១០០% តែបើក្នុងនាមអ្នកអភិវឌ្ឍន៌បុរីឬខុនដូ គឺពិតជាពិបាកទទូលយកណាស់ ដោយសារលុយសម្រាប់សាងសង់អោយចប់គំរោងនីមួយៗ គឺបានមកពីម្ចាស់គំរោងផ្ទាល់ខ្លួនខ្លះ បានមកពីកម្ចីធនាគារខ្លះ និងបានមកពីអ្នកទិញបង់ជាប្រចាំខែខ្លះ ហើយបើសិនជាការបង់ប្រចាំខែរបស់អ្នកទិញមានបញ្ហានោះ ម្ចាស់គំរោងជាច្រើន នឹងមិនមានលុយគ្រប់គ្រាន់ដើម្បីបញ្ចប់ការសាងសង់តាមការកំណត់ទេ។

លោកឧកញ៉ាបណ្ឌិតបន្តថា ក្នុងនាមធនាគារ អ្នកលក់សម្ភារៈសំណង់ អ្នកម៉ៅការសាងសង់ និងកម្មករសាងសង់ ពិតជាមានការព្រួយបារម្មខ្លាំងណាស់ ព្រោះបើសិនជាអ្នកអភិវឌ្ឍន៌បុរី ឬខុនដូ មិនបានទទូលការបង់ប្រចាំខែពីអ្នកទិញទេ នោះពួកគាត់ក៏នឹងខ្វះលុយបង្វិលក្នុងការសងត្រលប់ទៅធនាគារ សងថ្លៃសម្ភារៈសំណង់ សងថ្លៃពលកម្ម និងការចំណាយផ្សេងទៀត ដោយពួកគាត់អាចបញ្ឈប់ការសាងសង់ ឬពន្យារពេលការសាងសង់ ហើយអាចធ្វើអោយចរន្តលុយសងធនាគារ ការប្រើប្រាស់សម្ភារៈសំណង់ និងការប្រើប្រាស់កំលាំងពលកម្មធ្លាក់ចុះ ដោយមនុស្សកាន់តែច្រើននឹងបាត់បង់ការងារ និងមុខរបរ ។

លោកបន្ថែម ក្នុងនាមពលរដ្ឋកម្ពុជាម្នាក់ មានការសប្បាយចិត្ត ដែលថ្នាក់ដឹកនាំប្រទេស យកចិត្តទុកដាក់ចំពោះជីវភាពប្រចាំថ្ងៃរបស់ប្រជាជន ពិសេសក្នុងស្ថានភាពលំបាក នៃCovid19 ។

លោកគីម ហ៊ាងបញ្ជាក់ថា ក្នុងនាមលោកជាអ្នកសិក្សារៀនសូត្រម្នាក់ យល់ឃើញថា ប្រកាសនេះគឺពិតជាសំខាន់ និងត្រឹមត្រូវ តែខុសពេល ព្រោះអ្វីដែលឧស្សាហកម្មដីធ្លី និងសេដ្ឋជាតិជាតិកម្ពុជា ត្រូវការពិតប្រាកដ គឺសេវាកម្មរដ្ឋបាលសាធារណៈ ដែលមានលឿន រហ័ស ត្រឹមត្រូវ ប្រកបដោយតម្លាភាព និងមានការទទូលខុសត្រូវ ដោយត្រូវមានការចូលរួមពីគ្រប់ភាគីទាំងអស់ ពិសេសគឺការចូលរួមពីផ្នែកឯកជនផ្ទាល់តែម្តង។

ការរីករាលដាលនៃជំងឺកូវីដ១៩ ក្នុងសហគមន៍ ដែលជារលកទី៣នៅក្នុងប្រទេសកម្ពុជាបានបង្ហាញសញ្ញាកាន់តែធ្ងន់ធ្ងរ ដោយរកឃើញអ្នកឆ្លងរៀងរាល់ថ្ងៃ និងមានចំនួនច្រើន ព្រមទាំងមានអ្នកស្លាប់ជាបន្តបន្ទាប់ ហើយក៏បានធ្វើឱ្យប៉ះពាល់ដល់សេដ្ឋកិច្ច ប្រាក់ចំណូលប្រជាពលរដ្ឋកម្ពុជាជាច្រើនផងដែរ៕

1...2,0072,0082,009...3,260 Page 2,008 of 3,260