ដោយៈប៊ី

ភ្នំពេញៈ ប្រទេសថៃគ្រោងចំណាយប្រាក់២៣០០លានដុល្លារ ដើម្បីសាងសង់គម្រោងសាងសង់ដំណាក់កាលទី២ នៃប្រព័ន្ធផ្លូវដែកល្បឿនលឿនរបស់ខ្លួន ដែលជាប់នឹងខេត្តចំនួន៤ របស់កម្ពុជាគ្រោងនឹងចំណាយប្រាក់៣,២ពាន់លានដុល្លារ​។

គម្រោងនេះត្រូវបានរំពឹងថា នឹងចំណាយទឹកប្រាក់៣,២ ពាន់លានដុល្លារ)។ នេះបើយោងតាមការចុះផ្សាយរបស់គេហទំព័រAsia News Network។

ការពង្រីកខ្សែរថភ្លើង ដែលមានប្រវែង១៩០គីឡូម៉ែត្រ ពីរ៉ាក់យ៉ង-ចន្ថាបូរី-ត្រាត នេះ នឹងដំណើរការនៅជិតនឹងព្រំដែនប្រទេសកម្ពុជា។ ខេត្តចន្ថាបុរីមានព្រំប្រទល់ជាប់ខេត្តបាត់ដំបង និងប៉ៃលិនរបស់ប្រទេសកម្ពុជា រីឯខេត្តត្រាតមានព្រំប្រទល់ប៉ៃលិន បាត់ដំបង ខេត្តពោធិ៍សាត់ និងខេត្តកោះកុង។

នាយដ្ឋានផ្លូវដែករដ្ឋរបស់ថៃ (SRT)) បានជួលអ្នកពិគ្រោះយោបល់ ដើម្បីធ្វើការសិក្សាលទ្ធភាព លើផែនការសាងសង់ដំណាក់កាលទី២ នៃប្រព័ន្ធផ្លូវដែកល្បឿនលឿនដែលភ្ជាប់ព្រលានយន្តហោះអន្តរជាតិចំនួន៣នៅថៃ។ នេះបើយោងតាមការលើកឡើងរបស់ប្រធានគម្រោងពិសេស SRT លោក Sucheep Sooksawang។

លោកបន្តថា “គម្រោងដំណាក់កាលទី២នេះ គ្របដណ្តប់លើការពង្រីកផ្លូវដែក ១៩០គីឡូម៉ែត្ររ៉ៃយ៉ង់-ចន្ថាបូរី -ត្រាត”។

ការសាងសង់នេះក៏ធ្វើឡើងតាមជម្រើសផងដែរ ដោយគំរោងនេះមានការបែងចែកដូចជាជម្រើសទី១នៃការចេញថ្លៃ ក្រុមហ៊ុនឯកជននឹងវិនិយោគលើការសាងសង់ ប្រព័ន្ធរថភ្លើង រថភ្លើង ប្រតិបត្ដិការ និងថែទាំ រីឯ SRT នឹងដោះស្រាយបញ្ហាដីធ្លី។

ជម្រើសទី២ ក្រុមហ៊ុនឯកជនមួយ នឹងវិនិយោគលើប្រព័ន្ធរថភ្លើង រថភ្លើង ប្រតិបត្ដិការ និងថែទាំ រីឯ SRT ដោះស្រាយដីធ្លី និងទទួលខុសត្រូវលើការសាងសង់។

ជំរើសទី៣ ក្រុមហ៊ុនឯកជននឹងទទួលខុស ត្រូវលើប្រតិបត្តិការនិងថែទាំដោយអេស។ ធី។ ឌីថែរក្សានៅសល់៕

ដោយៈ ប៊ី

ភ្នំពេញៈ មូលនិធិរូបិយវត្ថុអន្តរជាតិ (IMF) បានព្យាករណ៍ថា ប្រទេសអាស៊ានចំនួន៣ ត្រូវបានវាយតម្លៃថា នឹងមានកំណើនសេដ្ឋកិច្ចជាង៦ភាគរយ នៅឆ្នាំ២០២១នេះ ខណៈទស្សនវិស័យសេដ្ឋកិច្ចអាស៊ាន នៅតែប្រឈមនឹងភាពផុយស្រួល ដោយសារវិបត្តិកូវីដ១៩។

យោងតាមរបាយការណ៍ចុងក្រោយរបស់ IMF បានឱ្យដឹងថា ក្នុងឆ្នាំ២០២១នេះ សេដ្ឋកិច្ចប្រទេសអាស៊ានចំនួន៣ ត្រូវបានព្យាករណ៍ថា នឹងមានកំណើនសេដ្ឋកិច្ចជាង៦ភាគរយ ក្នុងនោះរួមមាន ប្រទេសហ្វីលីពីននឹងមានកំណើន៦,៩ភាគរយ ម៉ាឡេស៊ី៦,៥ភាគរយ និងប្រទេសវៀតណាម៦,៥ភាគរយ ខណៈសិង្ហបុរីនឹងមានកំណើនសេ៥,២ ភាគរយ ឡាវ៤,៦ ភាគរយ និងឥណ្ឌូណេស៊ី៤,៣ ភាគរយ។

សម្រាប់ឆ្នាំ២០២១ ការព្យាករណ៍កំណើនបានឱ្យដឹថា សេដ្ឋកិច្ចកម្ពុជានឹងខ្ពស់ជាងប្រទេសថៃ២,៦ភាគរយ និងខ្ពស់ជាងព្រុយណេ១,៦ភាគរយ ខណៈសេដ្ឋកិច្ចមីយ៉ាន់ម៉ានឹងធ្លាក់ចុះ៨,៩ភាគរយ។

ប្រធានសេដ្ឋវិទូរបស់មូលនិធិរូបិយវត្ថុអន្តរជាតិ លោកស្រី Gita Gopinathបានថ្លែងថា “យើងព្យាករណ៍ថា នឹងមានការងើបឡើងវិញខ្លាំងជាង មុននៅឆ្នាំ២០២១ និង២០២២ សម្រាប់សេដ្ឋកិច្ចពិភពលោក បើប្រៀបធៀបនឹងការព្យាករពីមុនរបស់យើង”។

លោកស្រីបានថ្លែងថា “ទោះយ៉ាងណាទស្សនវិស័យ បង្ហាញពីបញ្ហាប្រឈមដែលគួរឱ្យព្រួយបារម្ភ ទាក់ទងនឹងភាពផ្ទុយគ្នា ក្នុងល្បឿននៃការងើបឡើងវិញ និងសក្តានុពលនៃការខូចខាតខាងសេដ្ឋកិច្ចពីវិបត្តិនេះ”។

នៅក្នុងសន្និសីទកាសែតលោកស្រី Gopinath បាននិយាយថា ការធ្វើឱ្យប្រសើរឡើងនៃកំណើនសេដ្ឋកិច្ចសក លសម្រាប់ឆ្នាំ២០២១ និង២០២២ភាគច្រើន គឺដោយសារតែការធ្វើឱ្យប្រសើរឡើង សម្រាប់សេដ្ឋកិច្ចជឿនលឿន ជាពិសេសសហរដ្ឋអាមេរិក។

លោកស្រីបាននិយាយថា “នេះធ្វើឱ្យសហរដ្ឋអាមេរិក ជាប្រទេសមានសេដ្ឋកិច្ចធំតែមួយគត់ ដែលបានព្យាករថានឹងកើនលើសកម្រិតGDP ដែលខ្លួនបានព្យាករណ៍ថាសម្រាប់ឆ្នាំ ២០២២ ក្នុងករណីដែលគ្មានការរីករាលដាលនៃជំងឺកូវីដ១៩”។លោកស្រី ថ្លែងថា “ប្រទេសមានសេដ្ឋកិច្ចជឿនលឿនផ្សេងទៀត រួមទាំងតំបន់អឺរ៉ូ នឹងស្ទុះងើបឡើងវិញនៅឆ្នាំនេះ តែក្នុងល្បឿនយឺតជាងនេះ”៕

ដោយៈឧត្តម

វ៉ាស៊ីនតោន: ប្រធានាធិបតីសហរដ្ឋអាមេរិក លោក ចូ បៃឌិន នឹងដាក់ចេញផែនការប្រមូលពន្ធលើពលរដ្ឋអាមេរិក ដែលជាអ្នកមានទ្រព្យស្ដុកស្ដម្ភ ដោយរាប់បញ្ចូលទាំងការដំឡើងពន្ធខ្ពស់បំផុតមិនធ្លាប់មាន លើប្រាក់ចំណេញពីការវិនិយោគផងដែរ។

យោងតាមទីភ្នាក់ងារព័ត៌មាន Reuters ចុះផ្សាយនៅថ្ងៃទី២៣ មេសា នេះឱ្យដឹងថា ផែនការប្រមូលពន្ធនេះ គឺធ្វើឡើងដើម្បីប្រមូលថវិកា ឱ្យបានប្រមាណ១ទ្រីលានដុល្លារសម្រាប់សេវាថែទាំកុមារ ការអប់រំមុនមត្តេយ្យសិក្សាជាសកល និងការឈប់សម្រាកមានប្រាក់បៀវត្សរ៍សម្រាប់កម្មករ។

ផែនការនេះ ជាផ្នែកមួយនៃការជំរុញរបស់សេតវិមាន ឱ្យមានការកែសម្រួលប្រព័ន្ធពន្ធរបស់សហរដ្ឋអាមេរិក ដើម្បីតម្រូវឱ្យអ្នកមាន និងក្រុមហ៊ុនធំៗចំណាយបន្ថែម និងជួយចេញថ្លៃចំណាយ សម្រាប់របៀបវារៈសេដ្ឋកិច្ច ប្រកបដោយមហិច្ឆតារបស់លោក ចូ បៃឌិន។

ប្រភពដដែលបានទម្លាយនៅសប្តាហ៍នេះថា សំណើនេះអំពាវនាវឱ្យមានការដំឡើ​ងអត្រាពន្ធលើប្រាក់ចំណូលខ្ពស់បំផុត ពី៣៧%ដល់៣៩,៦%។ សំណើនេះក៏នឹងបង្កើនពន្ធជិតទ្វេដងផងដែរ លើប្រាក់ចំណេញមូលធន (Capital Gains) សម្រាប់អ្នកដែលរកចំណូលបានច្រើនជាង១លានដុល្លារក្នុងមួយឆ្នាំផងដែរ។

នោះជាអត្រាពន្ធខ្ពស់បំផុត លើប្រាក់ចំណេញពីការវិនិយោគ ដែលពលរដ្ឋអាមេរិក មានស្ដុកស្ដម្ភភាគច្រើន បានបង់តាំងពីទសវត្សរ៍ឆ្នាំ១៩២០។ អត្រានេះមិនដែលលើសពី៣៣,៨%នោះឡើយ នៅក្នុងសម័យក្រោយសង្គ្រាមលោកលើកទី២។

ដំណឹងអំពីសំណើនេះ បានធ្វើឱ្យសង្កាត់ផ្សារភាគហ៊ុនដ៏ល្បីល្បាញ Wall Street ដាំក្បាលចុះយ៉ាងខ្លាំង ដោយសន្ទស្សន៍ផ្សារហ៊ុន S&P 500 Index បានដាំក្បាលចុះ១%នៅពេលរសៀល ដែលជាការធ្លាក់ចុះខ្លាំងបំផុតក្នុងរយៈពេលជាង១ខែមកនេះ។

ប្រភពដដែលនិយាយថា សេចក្ដីលម្អិតនៃសំណើនេះ នឹងត្រូវបញ្ចេញនៅសប្តាហ៍ក្រោយ មុនពេលលោកចូ បៃឌិន ថ្លៃងទៅកាន់សភានៅថ្ងៃពុធ ទី២៨ មេសា។ ប្រភពដដែលបានបញ្ជាក់ថា លោកចូ បៃឌិន បានសន្យាថានឹងមិនដំឡើងពន្ធលើគ្រួសារ ដែលមានប្រាក់ចំណូលតិចជាង៤០ម៉ឺនដុល្លារក្នុងមួយឆ្នាំនោះឡើយ។

លោកស្រី Jen Psaki លេខាទទួលបន្ទុកផ្នែកសារព័ត៌មាននៅសេតវិមាន បានថ្លែងថា លោកប្រធានាធិបតីនឹងពិភាក្សាអំពី “ផែនការគ្រួសារពលរដ្ឋអាមេរិក” (American Families Plan) របស់លោកអំឡុងពេលថ្លែងទៅកាន់សភា ប៉ុន្តែបានបដិសេធមិនបញ្ចេ​ញសេចក្ដីលម្អិតនោះទេ។

លោកស្រីបានគូសបញ្ជាក់ថា “លោកចូ បៃឌិន និងក្រុមការងារសេដ្ឋកិច្ចរបស់លោ​កជឿជាក់យ៉ាងមុតមាំថា វិធានការទាំងនឹងមិនជះផលអវិជ្ជមាន ដល់ការវិនិយោគនៅសហរដ្ឋអាមេរិកនោះឡើយ”៕

          ដោយៈស៊ីវ ម៉េង

          ភ្នំពេញៈ ស្របពេលកំនើននៃការរស់នៅរបស់ប្រជាពលរដ្ឋ និងការរីកចម្រើនលើតំបន់នេះ ផ្លូវជាតិលេខ១បាននិងកំពុងរីកចម្រើន ដោយមានផ្សារទំនើបបែបសហគមន៍ដាក់ដំណើរការ និងត្រៀមបង្ហាញខ្លួននាពេលខាងមុខនេះ។

បច្ចុប្បន្នThe Park Community Mall, បឹងស្នោរ Food Palaceបាននិងកំពុងបើកដំណើរការបណ្តើរ ខណៈផ្សារទំនើបលំដាប់អន្តរជាតិធំមួយPeng Huort Diamond Mallបាននិងកំពុងសាងសង់យ៉ាងសកម្ម នៅលើផ្លូវជាតិនេះផងដែរ។ លើសពីនេះ ស្រុកកៀ​នស្វាយក៏ត្រៀមបង្ហាញនូវផ្សារទំនើប KIen Svay Plaza ដែលអភិវឌ្ឍន៍ដោយក្រុមហ៊ុនKFA ក៏កំពុងសាងសង់ផងដែរ។

យោងតាមរបាយការណ៍របស់ក្រុមហ៊ុនCBRE Cambodiaដែលបានចេញផ្សាយកាលពីចុងឆ្នាំមុនបានបង្ហាញថា ទំហំផ្សារទំនើបនៅកម្ពុជា នឹងកើនដល់៨០ម៉ឺនម៉ែត្រការ៉េ ដែលធ្វើឲ្យទីផ្សារលក់រាយនៅកម្ពុជាកើនឡើងខ្ពស់ លើសការរំពឹងទុក។ ជាមួយគ្នានេះ តម្លៃជួលនៅតាមផ្សារទំនើបធំៗបានធ្លាក់ចុះ ប៉ុន្តែការជួលនៅតាមផ្សារបែបសហគមន៍បានកើនតម្លៃទៅវិញ។

លោកស្រីអាន សុធីតាអ្នកជំនាញអចលនទ្រព្យលំដាប់អន្តរជាតិ និងជាអតីតនាយិកាប្រចាំប្រទេសនៃក្រុមហ៊ុនCBRE Cambodiaបានព្រមានកាលពីពេលថ្មីៗនេះថា ការផ្គត់ផ្គង់ផ្សារទំនើបកំពុងកើនឡើងខ្ពស់ ដែលប្រឈមមុខនឹងការលើសតម្រូវការ ខណៈទីផ្សារនេះកំពុងមានភាពប្រកួតប្រជែងកាន់តែខ្ពស់។

លោកស្រីបន្តថា “ការវិនិយោគលើផ្សារទំនើប ផ្សារបែបសហគមន៍ទទួលបានផលចំណេញខ្ពស់ ប៉ុន្តែទាមទារឲ្យអ្នកអភិវឌ្ឍន៍ធ្វើការកែលំអរ៥ឆ្នាំម្តង ដើម្បីឲ្យផ្សាររបស់ខ្លួនវិវត្តន៍តាមការរីកចម្រើនរបស់សង្គម”។ លោកស្រីបន្តថា “កំនើននៃផ្សារទំនើប និងផ្សារសហគមន៍ នឹងធ្វើឲ្យគំរោងផ្សារ ដែលត្រៀមបើកដំណើរការឆ្នាំនេះ អាចពន្យាពេលបើកដំណើរការ”។

លោកស្រីអាន សុធីតាបានបន្តថា ផ្សារទំនើ់បនានាក៏ប្រឈមមុខនឹងបញ្ហាប្រកួតប្រជែងពីការលក់ទំនិញតាមអនឡាញ ដែលកំពុងមា​នប្រជាប្រិយភាព និងកើនឡើងនៅកម្ពុជាផងដែរនាពេលបច្ចុប្បន្ននេះ៕