វិស័យសំណង់នៅកំពតនៅតែមានសន្ទុះខ្លាំង ទោះស្ថិតក្នុងបរិបទកូវីដ១៩

ដោយៈ ប៊ី

ភ្នំពេញៈ ការវិនិយោគលើវិស័យសំណង់នៅខេត្តកំពត ត្រូវបានមើលឃើញថានៅតែបន្តមានការចម្រើនទៅមុខជាលំដាប់ពីមួយឆ្នាំទៅមួយឆ្នាំ ហើយការវិនិយោគលើវិស័យនេះនៅតែមានកំណើន ទោះស្ថិតនៅក្នុងវិបត្តិកូវិដ១៩ ក៏ដោយ។

លោកស៊ឹម សុខជាអនុប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តកំពត បានឱ្យដឹងនៅថ្ងៃទី៨ ខែមិថុនា ឆ្នាំ២០២១ថា វិស័យសំណង់ក្នុងខេត្តនៅតែបន្តដំណើរទៅមុខជានិច្ច ទោះស្ថិតក្នុងបរិបទកូវីដ១៩ ដោយសារអ្នកវិនិយោគបានមកធ្វើការអភិវឌ្ឍន៍លើផ្នែកនេះជាហូរហែ។

លោកបានបន្តថា បច្ចុប្បន្នទោះស្ថានភាពកូវីដ១៩ហាក់មានសណ្ឋានធ្ងន់ធ្ងរក៏ពិតមែនប៉ុន្តែការដ្ឋានសំណង់ទាំងអស់ក្នុងខេត្ត នៅតែបន្តដំណើរការជាធម្មតា គ្មានការបិទផ្អាកទេ ប៉ុន្តែពិបាករកកម្លាំងពលកម្មបន្តិច ខណៈដែលការរដ្ឋានថ្មីៗបានចាប់ផ្តើមបើកដំណើរកាសាងសង់ជាហូរហែ និងមានចំនួនច្រើនជាងឆ្នាំមុនៗ។

លោកបានបញ្ជាក់ថា កាលពីឆ្នាំ២០១៩ ការដ្ឋានសំណង់មាន២១៦ការដ្ឋាន អត់ច្បាប់២០ការដ្ឋានតម្លៃវិនិយោគសរុប ជាង៣៦លានដុល្លា។ ឆ្នាំ២០២០ ការដ្ឋានសំណង់កើនដល់២៩៩កន្លែង អត់ច្បាប់៤៧ តម្លៃវិនិយោគសរុបជាង៣៧លានដុល្លា។ ដោយឡែក ក្នុងរយៈពេលប្រាំខែដើមឆ្នាំឆ្នាំ២០២១នេះ មានការដ្ឋានសរុបជាងមួយរយការដ្ឋាន ដែលមានតម្លៃវិនិយោគសរុបជាងពាក់កណ្តាលនៃតម្លៃវិនិយោគក្នុងឆ្នាំ២០២០កន្លងទៅ។

លោកបានបញ្ជាក់ថា វិស័យសំណង់ខេត្តកំពតនៅតែមានកំណើនដោយសារ ៖១- ការយកចិត្តទុកដាក់ ដឹកនាំរបស់រដ្ឋបាលខេត្តកំពត, ២-ហេដ្ឋារចនាសម្ព័ន្ធក្នុងខេត្តកំពតអភិវឌ្ឍន៍ច្រើនជាងមុន ៣- សំបូរតំបន់ទេសចរណ៍ ៤-សំបូរភោគផលធម្មជាតិ និង វប្បធម៌ ៥- វិស័យអចលនទ្រព្យនៅតែបន្តសកម្មភាព និងទី៦.ជាខេត្តជាប់នឹងមាត់សមុទ្រផង។

ការផ្តល់សេវាលើវិស័យសំណង់មានបីសមត្ថកិច្ច ១- សមត្ថកិច្ចរដ្ឋបាលក្រុង/ ស្រុក ទំហំផ្ទៃក្រោម ៥០០ម៉ែត្រការ៉េ, ២- សមត្ថកិច្ចរដ្ឋបាលខេត្ត ចាប់ពីទំហំលើស៥០០ ដល់ ៣០០០ ម៉ែការ៉េ និង ៣-សមត្ថកិច្ចក្រសួងចាប់ពីទំហំផ្ទៃលើស ៣០០០ ម៉ែត្រការ៉េឡើងទៅ៕

វិស័យសំណង់នៅកំពតនៅតែមានសន្ទុះខ្លាំង ទោះស្ថិតក្នុងបរិបទកូវីដ១៩

ដោយៈ ប៊ី

ភ្នំពេញៈ ការវិនិយោគលើវិស័យសំណង់នៅខេត្តកំពត ត្រូវបានមើលឃើញថានៅតែបន្តមានការចម្រើនទៅមុខជាលំដាប់ពីមួយឆ្នាំទៅមួយឆ្នាំ ហើយការវិនិយោគលើវិស័យនេះនៅតែមានកំណើន ទោះស្ថិតនៅក្នុងវិបត្តិកូវិដ១៩ ក៏ដោយ។

លោកស៊ឹម សុខជាអនុប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តកំពត បានឱ្យដឹងនៅថ្ងៃទី៨ ខែមិថុនា ឆ្នាំ២០២១ថា វិស័យសំណង់ក្នុងខេត្តនៅតែបន្តដំណើរទៅមុខជានិច្ច ទោះស្ថិតក្នុងបរិបទកូវីដ១៩ ដោយសារអ្នកវិនិយោគបានមកធ្វើការអភិវឌ្ឍន៍លើផ្នែកនេះជាហូរហែ។

លោកបានបន្តថា បច្ចុប្បន្នទោះស្ថានភាពកូវីដ១៩ហាក់មានសណ្ឋានធ្ងន់ធ្ងរក៏ពិតមែនប៉ុន្តែការដ្ឋានសំណង់ទាំងអស់ក្នុងខេត្ត នៅតែបន្តដំណើរការជាធម្មតា គ្មានការបិទផ្អាកទេ ប៉ុន្តែពិបាករកកម្លាំងពលកម្មបន្តិច ខណៈដែលការរដ្ឋានថ្មីៗបានចាប់ផ្តើមបើកដំណើរកាសាងសង់ជាហូរហែ និងមានចំនួនច្រើនជាងឆ្នាំមុនៗ។

លោកបានបញ្ជាក់ថា កាលពីឆ្នាំ២០១៩ ការដ្ឋានសំណង់មាន២១៦ការដ្ឋាន អត់ច្បាប់២០ការដ្ឋានតម្លៃវិនិយោគសរុប ជាង៣៦លានដុល្លា។ ឆ្នាំ២០២០ ការដ្ឋានសំណង់កើនដល់២៩៩កន្លែង អត់ច្បាប់៤៧ តម្លៃវិនិយោគសរុបជាង៣៧លានដុល្លា។ ដោយឡែក ក្នុងរយៈពេលប្រាំខែដើមឆ្នាំឆ្នាំ២០២១នេះ មានការដ្ឋានសរុបជាងមួយរយការដ្ឋាន ដែលមានតម្លៃវិនិយោគសរុបជាងពាក់កណ្តាលនៃតម្លៃវិនិយោគក្នុងឆ្នាំ២០២០កន្លងទៅ។

លោកបានបញ្ជាក់ថា វិស័យសំណង់ខេត្តកំពតនៅតែមានកំណើនដោយសារ ៖១- ការយកចិត្តទុកដាក់ ដឹកនាំរបស់រដ្ឋបាលខេត្តកំពត, ២-ហេដ្ឋារចនាសម្ព័ន្ធក្នុងខេត្តកំពតអភិវឌ្ឍន៍ច្រើនជាងមុន ៣- សំបូរតំបន់ទេសចរណ៍ ៤-សំបូរភោគផលធម្មជាតិ និង វប្បធម៌ ៥- វិស័យអចលនទ្រព្យនៅតែបន្តសកម្មភាព និងទី៦.ជាខេត្តជាប់នឹងមាត់សមុទ្រផង។

ការផ្តល់សេវាលើវិស័យសំណង់មានបីសមត្ថកិច្ច ១- សមត្ថកិច្ចរដ្ឋបាលក្រុង/ ស្រុក ទំហំផ្ទៃក្រោម ៥០០ម៉ែត្រការ៉េ, ២- សមត្ថកិច្ចរដ្ឋបាលខេត្ត ចាប់ពីទំហំលើស៥០០ ដល់ ៣០០០ ម៉ែការ៉េ និង ៣-សមត្ថកិច្ចក្រសួងចាប់ពីទំហំផ្ទៃលើស ៣០០០ ម៉ែត្រការ៉េឡើងទៅ៕

លោកច្រឹក សុខនីមៈប្រាប់ចំណុចគន្លឹះចំនួន៤មុនពេលទិញលំនៅឋានសំរាប់ ការស្នាក់នៅអោយបានល្អ

ដោយៈវឌ្ឈនៈ

ភ្នំពេញៈ មនុស្សមួយចំនួនធំហាក់មានការរារែក ក្នុងការសម្រេចចិត្តទិញផ្ទះ ដើម្បីស្នាក់នៅបានសមរម្យ ហើយត្រូវការពេលវេលាយូរមុននឹងសម្រេចផ្ទះនោះ ហើយពេលខ្លះផ្ទះនោះ ក៏ត្រូវឡើងថ្លៃលើសពីតម្លៃដែលខ្លួនបានស៊ើបសួរដំបូងៗ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានបង្ហាញនូវគន្លឹះចំនួន៤ចំនុច អាចជាដើមទុនក្នុងការគិតពិចារណា មុនសម្រេចចិត្តទិញផ្ទះត្រូវនឹងក្ដីប្រាថ្នារបស់ខ្លួន។

យោងតាមការបង្ហោះលើបណ្ដាញសង្គមរបស់លោកច្រឹក សុខនីមប្រធានសមាគមបានឱ្យដឹងថា មុនពេលទិញលំនៅឋានចំនុចដែលគួរគិតនោះរួមមាន ទី១ ទិញផ្ទះក្នុងក្តីស្រមៃរបស់អ្នក ដែលបំពេញចិត្តរបស់លោកអ្នក ( តំបន់ភ្នំ ជាប់មាត់ទឹក តំបន់ពានិជ្ជកម្ម និងឬ សក្តានុពលនានា ) ទី២ បរិយាកាស អ្នកជិតខាងផ្ទះរបស់លោកអ្នក ( អ្នកភូមិផងរបងជាមួយ ភាពងាយស្រួលក្នុងធ្វើដំណើរ និងអាជីវកម្មផងដែរ) ទី៣ គុណភាពសំណង់ និងកេរ្តិ៍ឈ្មោះ របស់ស្ថាបត្យករ និងវិស្វករផងដែរ និងទី៤ មានអាកាសធាតុល្អ ឬហៅជាភាសាទំនើបថា ផ្ទះមានហ៊ុងស៊ុយល្អ ។

យ៉ាងណាក្ដី នៅក្នុងពេលចប្ចុប្បន្ននេះ មានមនុស្សជាច្រើនដែលទិញផ្ទះ ដោយការបង់រំលស់ ហើយមិនបានគិតពី ស្ថានភាពហិរញ្ញវត្ថុរបស់ខ្លួននោះទេ ជាក់ស្ដេងនៅតាមគម្រោងអភិវឌ្ឍន៍លំនៅឋានជាលក្ខណៈបុរីមួយចំនួន មានផ្ទះតែអត់មានមនុស្សនៅ ឬដាក់ផ្លាកប្រកាសលក់ចេញវិញ ព្រោះតែមិនមានលទ្ធភាព ក្នុងការបង់រំលស់បន្តជាពិសេសនៅក្នុងវិបត្តិនៃជំងឺកូវីដ១៩នេះ។

ផ្ទះក្នុងបុរីជាច្រើនក៏បានលក់ជូនទៅក្រុមហ៊ុន ដោយសុខចិត្តខាតពាក់កណ្ដាលនៃប្រាក់ ដែលបានបង់ទៅក្រុមហ៊ុនព្រោះថា ខ្លួនអស់លទ្ធភាព ក្នុងការបង់បន្ត ដែលទាំងនេះគឺជាអ្វីដែលអ្នកទិញផ្ទះ មិនបានគិតពីស្ថិរភាពហិរញ្ញវត្ថុ ឬមិនបានសិក្សាពីប្រាក់ចំណូលរបស់ខ្លួនច្បាស់លាស់ មុននឹងសម្រេចចិត្តទិញផ្ទះដោយបង់រំលស់៕

ដំណឹងល្អៈសហរដ្ឋអាមេរិកអនុម័តប្រើប្រាស់ឱសថថ្មីសំរាប់អ្នកជំងឺភ្លេចភ្លាំងច្រើន

ដោយៈគង់ សូរិយា

សហរដ្ឋអាមេរិកៈ រដ្ឋបាលចំណីអាហារ និងឱសថអាមេរិក (FDA) បានអនុម័ត ឲ្យប្រើថ្នាំថ្មីសម្រាប់ព្យាបាលជំងឺភ្លេចភ្លាំង (Alzheimer) ដែលAducanumab នេះគឺជាថ្នាំព្យាបាលថ្មីដំបូងគេ សម្រាប់ជំងឺនេះក្នុងរយៈពេល១៨ឆ្នាំ។

ឱសថនេះ ត្រូវបានបង្កើតឡើងដោយក្រុមហ៊ុនអាមេរិក Biogen និងក្រុមហ៊ុនជប៉ុន Eisai ហើយវាផ្តោតលើសេរីរាង្គនៅក្នុងខួរក្បាល ដែលអ្នកស្រាវជ្រាវជឿថា អាចប៉ះពាល់ដល់ការគិត ។

ឱសថឈ្មោះ Aducanumab គឺជាថ្នាំសម្រាប់ព្យាបាលមូលហេតុចម្បង ដែលបណ្តាលឲ្យកើតមានជំងឺវង្វេងវង្វាន់ ដែលជាទម្រង់ទូទៅបំផុត នៃជំងឺវង្វេងស្មារតី ជាជាងព្យាបាលរោគសញ្ញារបស់វា។

ដំបូងឡើយនិយ័តកររបស់ FDA បានឲ្យដឹងថា ការសាកល្បងព្យាបាល បានបន្សល់ទុកនូវភាពមិនច្បាស់លាស់ ទាក់ទងនឹងគុណប្រយោជន៍នៃការព្យាបាល។

ពួកគេក៏បានស្នើសុំឲ្យក្រុមហ៊ុន Biogen ធ្វើការសាកល្បងមួយទៀត ខណៈដំណើរការនោះ ត្រូវបានគេរំពឹងថា នឹងចំណាយពេលច្រើនឆ្នាំ។

ប៉ុន្តែក្រោយមក ក្រុមហ៊ុនអាមេរិក Biogen បានវិភាគបន្ថែមលើទិន្នន័យ ហើយបានសន្និដ្ឋានថា ថ្នាំ Aducanumab មានកម្រិតខ្ពស់ អាចកាត់បន្ថយបញ្ហាចងចាំរបស់មនុស្ស យ៉ាងគួរឲ្យកត់សម្គាល់ ។

ទីបំផុត អ្នកជំងឺនឹងអាចប្រើថ្នាំនេះបាន ខណៈជនជាតិអាមេរិកជាង៦លាននាក់ រស់នៅជាមួយជំងឺវង្វេងស្មារតី៕

 

អ្នកជំនាញៈ ការវិនិយោគលើខុនដូនៅកម្ពុជានាពេលបច្ចុប្បន្ននឹងផ្តល់ផលចំណេញ ខ្ពស់នាពេលអនាគត

ដោយៈ ម៉ាណេត

ភ្នំពេញៈ អ្នកជំនាញបានអះអាងថា ការវិនិយោគលើខុនដូនៅកម្ពុជា ពិសេសទីក្រុងភ្នំពេញ នឹងផ្តល់ផលចំណេញខ្ពស់នាពេលអនាគត ខណៈប្រជាជនស្រុកចាប់ផ្តើមមានិន្នាការក្នុងការការវិនិយោគលើខុនដូ សម្រាប់ទាំងការរស់នៅផ្ទាល់ និងសម្រាប់ទុកចំណេញនាពេលអនាគត។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ ERA លោកខន គង្គាបានប្រាប់កាលពីថ្មីៗនេះថា បច្ចុប្បន្ន ការវិនិយោគលើខុនដូនាពេលនេះ នឹងទទួលបានផលត្រឡប់មកវិញខ្ពស់នៅពេលអនាគត ដោយសារមូលហេតុទី១ ដោយសារតម្លៃខុនដូមិនទាន់មានការកើនឡើងទេ ដូច្នេះតម្លៃស្ថិតនៅសភាពនៅទ្រឹង ហើយអនាគតតម្លៃខុនដូនឹងកើនឡើង។

លោកបានថ្លែងថា ក្នុងពេលបច្ចុប្បន្ននេះ លក្ខខណ្ឌក្នុងការបង់ប្រាក់នាពេលបច្ចុប្បន្នមានភាពបត់បែនច្រើន ហើយអ្នកអភិវឌ្ឍន៍បច្ចុប្បន្ន កំពុងបំពេញចិត្តអ្នកវិនិយោគ ដូច្នេះការលក្ខខណ្ឌ ក្នុងការបង់ប្រាក់មានភាពងាយស្រួលជាងមុន។ ការវិនិយោគអចលនទ្រព្យ ពិសេសខុនដូ គឺសំខាន់ ទី១ ផ្តោតលើតម្លៃ ទី២ ទីតាំង ទី៣លក្ខខណ្ឌក្នុងការបង់ប្រាក់។

លោកគង្គាបានឱ្យដឹងថា ដូច្នេះស្ថិតក្នុងលក្ខខណ្ឌនេះ តម្លៃល្អ ទីតាំងល្អ ហើយលក្ខខណ្ឌក្នុងការបង់ប្រាក់ល្អទៀត ជាមួយការបញ្ចុះតម្លៃផ្សេងៗ វាជាល្អដ៏បំផុតសម្រាប់វិនិយោគក្នុងវិស័យខុនដូ។ កំណើនចំណូលរបស់ប្រជាជនក្នុងស្រុក មានការកើនឡើងក្នុងរយៈពេលប៉ុន្មានឆ្នាំចុងក្រោយនេះ។ ឧទាហរណ៍ ប្រឡេកមើលតែរថយន្ត ម៉ូតូ និងសម្ភារៈប្រើប្រាស់ផ្សេងៗ ហើយយើងអាចប៉ាន់ប្រមាណដឹងហើយ។

លោកខន គង្គាបានឱ្យដឹងថា “នៅពេលប្រជាជនមានចំណូលកាន់តែច្រើន ពួកគាត់ធ្វើការឱ្យជីវិតរស់នៅ របស់ពួកគាត់កាន់តែប្រសើរឡើង ដូច្នេះជម្រើសល្អរបស់ពួកគាត់ផ្ទះសម្បែង”។ លោកបន្តថា “បើសិនជាពួកគាត់ជារស់នៅកណ្តាលទីក្រុងភ្នំពេញ ហើយគាត់ចង់បានផ្ទះមួយសម្រាប់ការរស់នៅល្អ គាត់មិនអាចផ្ទះល្វែងនៅកណ្តាលទីក្រុងបានទេ ហើយក៏គ្មានអ្នកអភិវឌ្ឍន៍សាងសង់ផ្ទះល្វែងនៅកណ្តាលដែរ ដូច្នេះជម្រើសល្អគឺវិស័យខុនដូ ហើយតម្រូវពិតជាមានការកើនឡើងនាពេលអនាគត”។

ពីមួយឆ្នាំទៅមួយឆ្នាំ លំហូរប្រជាជនចូលមកទីក្រុងកើនឡើង ដែលជាកត្តាធ្វើឱ្យទីក្រុងមានភាពកាន់តែចង្អៀតបន្តិចម្តងៗ ហើយចំណូលប្រជាជនក៏មានកំណើន។ កត្តាទាំងនេះធ្វើឱ្យតម្រូវការខុនដូកាន់តែមានកំណើននាពេលអនាគត។

លោកបានថ្លែងបន្តថា “បច្ចុប្បន្ន យើងសង្កតឃើញមិនត្រឹមតែយុវជននោះទេ ប៉ុន្តែប្រជាជនវ័យចំណាស់ ក៏បាននិងកំពុងចាប់ផ្តើមផា្លស់ប្តូរការរស់នៅនៅខុនដូ ព្រោះខុនដូមានសុវត្តិ ឯកជនភាព និងភាពស៊ីវីល័យ”៕

តើនរណាជាម្ចាស់ម៉ាកយីហោសណ្ឋាគារ InterContinental ដ៏ល្បីល្បាញ និងមានប្រវត្តិបែបណា?

ដោយៈសុខុម

ភ្នំពេញ: ទាំងអស់គ្នាប្រាកដជាស្គាល់ច្បាស់ នូវសណ្ឋាគារអាំងទែកង់ទីណង់តាល់ (InterContinental) លំដាប់ផ្កាយ5 ដ៏ល្បីល្បាញដែលស្ថិតនៅប៉ែកខាងត្បូង នៃផ្សារដើមគ ក្នុងរាជធានីភ្នំពេញ។

ប៉ុន្តែតើអ្នកដឹងទេថា ម៉ាកយីហោ (Brand) នៃសណ្ឋាគារនេះ មានប្រភពដើមចេញពីណា ហើយនរណាជាម្ចាស់ម៉ាកយីហោសណ្ឋាគារ ដ៏ល្បីល្បាញមួយនេះ និងមានប្រវត្តិបែបណា? បើចង់ជ្រាបច្បាស់ សូមមកស្វែងយល់ទាំងអស់គ្នា!។

InterContinental Hotels Group plc ឬ IHG Hotels & Resorts គឺជាក្រុមហ៊ុនបដិសណ្ឋារកិច្ចរបស់អង់គ្លេស ដែលមានទីស្នាក់ការកណ្ដាលនៅ Denham តំបន់ Buckinghamshire ក្នុងប្រទេសអង់គ្លេស។ ក្រុមហ៊ុននេះ ត្រូវបានចុះបញ្ជីនៅលើផ្សារភាគហ៊ុនទីក្រុងឡុងដ៍ London Stock Exchange និងផ្សារភាគហ៊ុន FTSE 100 Index។

*ប្រវត្តិ
តាមពិតទៅ ប្រភពដើមនៃអាជីវកម្មនេះ មានតាំងពីឆ្នាំ១៧៧៧ មកម៉្លេះដោយមានឈ្មោះថា Bass Hotels នៅពេលលោក William Bass ដែលជាសហគ្រិនជនជាតិអង់គ្លេស បានបង្កើតក្រុមហ៊ុនផលិតស្រាបៀរមានឈ្មោះថា Bass Brewery នៅ Burton-upon-Trent តំបន់ Staffordshire។

ក្នុងឆ្នាំ១៨៧៥ ឡូហ្គោ (Logo) រាងត្រីកោណរបស់ក្រុមហ៊ុននេះ បានក្លាយជាម៉ាកយីហោដំបូងបង្អស់ ដែលត្រូវបានចុះបញ្ជីនៅប្រទេសអង់គ្លេស។

ក្រោយមកក្រុមហ៊ុននេះ បានប្ដូរឈ្មោះថ្មី ហើយនៅឆ្នាំ១៩៦៩ លោក Bass Charrington បានបង្កើតម៉ាកយីហោសណ្ឋាគារ Crest Hotels។

ក្នុងឆ្នាំ១៩៨៨ រដ្ឋាភិបាលអង់គ្លេស បានកំណត់ចំនួន Pub (ត្រៀមស្រា) ដែលមានតែអ្នកបិតស្រាប៉ុណ្ណោះ ដែលអាចបើកតៀមស្រាបាន។ កត្តានេះ បានជំរុញឱ្យលោក Bass Charrington បោះទុនវិនិយោគបន្ថែម ដើម្បីពង្រីកអាជីវកម្មសណ្ឋាគាររបស់ខ្លួន ហើយពេលនោះឯង ដែលក្រុមហ៊ុនរបស់លោក បានទិញយកម៉ាកយីហោសណ្ឋាគារ Holiday Inn International ពីបណ្ដាភាហ៊ុនិក។

*InterContinental
បុរសជនជាតិអាមេរិក ម្នាក់ឈ្មោះJuan Trippe ដែលជាស្ថាបនិកក្រុមហ៊ុនអាកា​សចរណ៍អាមេរិក Pan American Airways ឬ Pan Am បានបង្កើតខ្សែសង្វាក់សណ្ឋាគារ American Intercontinental Hotels ជាបុត្រសម្ព័ន្ធមួយរបស់ Pan Am ហើយបានបើកសណ្ឋាគារដំបូងនៅ Belém ប្រទេសប្រេស៊ីល ក្នុងឆ្នាំ១៩៤៦។

នៅថ្ងៃទី១៩ ខែសីហា ឆ្នាំ១៩៨១ ក្រុមហ៊ុន Pan Am បានលក់ក្រុមហ៊ុន Inter-Continental Hotels Corporation (IHC) ឱ្យទៅក្រុមហ៊ុន Grand Metropolitan ដែលមានមូលដ្ឋាន នៅប្រទេសអង់គ្លេស ក្នុងតម្លៃ៥០០លានដុល្លារ។

នៅពេលក្រុមហ៊ុន Grand Metropolitan ផ្ដោតលើអាជីវកម្មស្នូលរបស់ខ្លួន ហើយបានពង្រីកចូល ក្នុងវិស័យអាហារសម្រន់ឆាប់រហ័ស(Fast Food) តាមរយៈការទិញយកក្រុមហ៊ុន Burger King ក្រុមហ៊ុននេះក៏បានលក់ក្រុមហ៊ុន Inter-Continental Hotels Corporation (IHC) ឱ្យទៅក្រុមហ៊ុន Saison Group ដែលមានមូលដ្ឋាននៅប្រទេសជប៉ុនក្នុងឆ្នាំ១៩៨៨។

នៅខែមីនា ឆ្នាំ១៩៩៨ ក្រុមហ៊ុន Saison Group បានលក់ក្រុមហ៊ុន Inter-Continental Hotels Corporation (IHC) ឱ្យទៅក្រុមហ៊ុនផលិតស្រាបៀរអង់គ្លេស Bass Brewery។ ក្នុងឆ្នាំ២០០០ ក្រុមហ៊ុនBass Brewery ក៏បានលក់ទ្រព្យសកម្មផលិតស្រាបៀររបស់ខ្លួន (និងសិទ្ធិប្រើឈ្មោះ Bass) ឱ្យទៅក្រុមហ៊ុនផលិតស្រាបៀរបែលហ្ស៊ិក ក្នុងតម្លៃ៣,២៦ពាន់លានដុល្លារ ហើយបានប្ដូរឈ្មោះថា Six Continents។

ក្នុងឆ្នាំ២០០៣ ក្រុមហ៊ុនឯករាជ្យ InterContinental Hotels Group (IHG) ត្រូវបានបង្កើតឡើង ក្រោយពីក្រុមហ៊ុនSix Continents បានបំបែកជា២គឺ៖ ក្រុមហ៊ុន Mitchells & Butlers គ្រប់គ្រងទ្រព្យសកម្មភោជនីយដ្ឋាន។ ចំណែកឯក្រុមហ៊ុន InterContinental Hotels Group (IHG) គ្រប់គ្រងសណ្ឋាគារ និងភេសជ្ជៈ។

នៅខែមេសា ឆ្នាំ២០១៧ ក្រុមហ៊ុននេះបានប្រកាសថា ខ្លួនបានរងការវាយប្រហារពីក្រុមហ៊ែគឃើ (Hacker) ដែលបានលួចយកព័ត៌មានលម្អិត អំពីប័ណ្ណឥណទាន (Credit Card) របស់ខ្លួន។

នៅខែកុម្ភៈ ឆ្នាំ២០២១ ក្រុមហ៊ុន InterContinental Hotels Group (IHG) បានប្រកាសការខាតបង់ប្រចាំឆ្នាំចំនួន១៥៣លានដុល្លារ ដោយសារវិធានការរឹតបន្តឹង ដើម្បីទប់ស្កាត់ការឆ្លងរាតត្បាតវីរុសកូវីដ-១៩។

*ប្រតិបត្តិការ
ក្រុមហ៊ុន InterContinental Hotels Group (IHG) មានការិយាល័យក្នុងប្រទេសជាច្រើនទូទាំងពិភពលោក។ គិតត្រឹមឆ្នាំ២០២១ ក្រុមហ៊ុន InterContinental Hotels Group (IHG) មានសណ្ឋាគារជាង៥.៤០០កន្លែង ដោយក្នុងនោះសណ្ឋាគារចំនួន៤.៤៣៣កន្លែង ត្រូវបានដំណើរការក្រោមកិច្ចព្រមព្រង Franchise (លក់សិទ្ធិអាជីវកម្ម) ហើយសណ្ឋាគារចំនួន៩០៧កន្លែង ត្រូវបានគ្រប់គ្រងដោយក្រុមហ៊ុននេះ។

គិតត្រឹមថ្ងៃទី៣១ មីនា ឆ្នាំ២០១៩ ក្រុមហ៊ុន InterContinental Hotels Group (IHG) មានសណ្ឋាគារសរុបចំនួន៥.៦៥៦កន្លែង គិតជាបន្ទប់ទទួលភ្ញៀវមានចំនួនរហូតដល់៨៤២.៧៥៩បន្ទប់នៅក្នុងប្រទេសជិត១០០ទូទាំងពិភពលោក៕

រោងចក្រផលិតបេតុងកៅស៊ូទី២នឹងអាចលេចរូបរាងនៅក្នុងខេត្តបាត់ដំបង

ដោយៈ ម៉ាណេត

ភ្នំពេញៈ ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន លោកស៊ុន ចាន់ថុលបានប្រកាសថា ក្រសួងនឹងអាចរៀបចំរោងចក្រផលិតបេតុងកៅស៊ូ នៅក្នុងខេត្តបាត់ដំបង ដើម្បីបំរើដល់ការជួសជុលផ្លូវពី DBST ទៅជាផ្លូវកៅស៊ូ AC។

លោកទេសរដ្ឋមន្ត្រី បានបញ្ជាក់ថា “នៅឆ្នាំក្រោយនេះដែរ ក្រុមហ៊ុនចិន នឹងបន្ថែមគ្រឿងចក្រផលិតបេតុងកៅស៊ូនេះ មួយឈុតទៀត (រោងចក្រទី២) ហើយក្រសួងនឹងរៀប​ចំដំឡើងនៅក្នុងខេត្តបាត់ដំបង ដើម្បីបំរើដល់ការជួសជុលផ្លូវនៅខេត្តបាត់ដំបង បន្ទាយមានជ័យ ព្រះវិហារ ដើម្បីធ្វើយ៉ាងណាកែរប្រែផ្លូវនៅតំបន់នោះ ពីប្រភេទផ្លួបDBST ទៅជាផ្លូវកៅស៊ូ AC”។

លោកស៊ុន ចាន់ថុល បានឱ្យដឹងថា រោងចក្រផលិតបេតុងកៅស៊ូនេះ មានសមត្ថភាពផលិតបាន រហូតដល់១២០តោនក្នុងមួយម៉ោង។ ម៉ាស៊ីនសម្រាប់ផលិតបេតុង កៅស៊ូនេះដែរ ក្នុងមួយឈុត មានតម្លៃរហូតដល់១លាន១០ម៉ឺនដុល្លារអាមេរិក ដោយមិនទាន់រាប់បញ្ជូលតម្លៃរៀបចំកន្លែងដំឡើងនៅឡើយទេ។

ជាមួយគ្នានេះដែរ ក្នុងពេលឆាប់ៗខាងមុខនេះ កន្លែងផលិតបេតុងកៅស៊ូជាលើកដំបូងនៅក្នុងប្រទេសកម្ពុជា នឹងលេចចេញរូបរាងជាផ្លូវការ នៅក្នុងទឹកដីខេត្តកំពត កែប ដើម្បីបម្រើដល់ការសាងសង់ផ្លូវប្រភេទបេតុងកៅស៊ូ AC។

លោកទេសរដ្ឋមន្ត្រី បានបញ្ជាក់ដូចនេះ ក្នុងឱកាសដឹកនាំក្រុមការងារ និងមន្ត្រីជំនាញ ចុះពិនិត្យមើលទីតាំងដាក់តម្លើងគ្រឿងចក្រ ផលិតបេតុងកៅស៊ូ នៅព្រំប្រទល់ខេត្តកែប និងខេត្តកំពត។

លោកទេសរដ្ឋមន្ត្រី បន្ថែមថា កន្លែងផលិតបេតុងកៅស៊ូដំបូងបំផុតនេះ នឹងជួយធ្វើឱ្យដំណើរការសាងសង់ផ្លូវនៅកម្ពុជា ប្រភេទ AC (ផ្លូវមានកម្រាស់កៅស៊ូក្រាស់) កាន់តែមានភាពឆាប់រហ័ស និងមានគុណភាពខ្ពស់ កាត់បន្ថយការចំណាយបានច្រើន ក្នុងការទិញបេតុងកៅស៊ូ មកពីក្រៅប្រទេស ។

លោកស៊ុន ចាន់ថុល បានបន្ថែមទៀតថា ការដំឡើងរោងចក្រផលិតបេតុងកៅស៊ូនៅក្នុងខេត្តកែបនេះ ដើម្បីយកបេតុងកៅស៊ូ ទៅសាងសង់ផ្លូវជាតិលេខ៣១ ផ្លូវ៤១ និងផ្លូវ៣៣ ដែលនឹងត្រៀមធ្វើការជួលជុល កែរប្រែឱ្យទៅជាផ្លូវបេតុងកៅស៊ូ AC ក្នុងពេលឆាប់ៗខាងមុខនេះ។ សម្រាប់កន្លែងផលិតបេតុងកៅស៊ូនេះដែរ ក្រសួងសាធារណការ ក៏នឹងត្រៀមធ្វើជាកន្លែងស្វ័យ័តមួយ ដើម្បីផលិតបេតុងកៅស៊ូលក់ឱ្យខាងវិស័យឯកជន ដែលត្រូវការផងដែរ៕

ក្រុមហ៊ុនដ៏ធំមួយរបស់ចិនត្រៀមបោះទុន២៣៥លានដុល្លារសាងសង់រោងចក្រសំបកកង់រថយន្តថ្មីមួយនៅកម្ពុជា

ដោយៈ ម៉ាណេត

ភ្នំពេញៈ ក្រុមហ៊ុនផលិតកង់ឡានចិន General Science Technology បានប្រកាសដើមខែមិថុនានេះថា ក្រុមហ៊ុននឹងសាងសង់រោងចក្រមួយ ដែលមានទឹកប្រាក់១៦៦លានផោន (១,៣ ពាន់លានយ័ន ឬជាង២៣៥លានដុល្លារ) នៅក្នុងប្រទេសកម្ពុជា ដែលមានសមត្ថភាព ផលិតសំបកកង់រថយន្តបាន៦លានសំបកក្នុងមួយឆ្នាំ។
នេះបើយោ​ងតាមការចេញផ្សាយរបស់គេទំព័រ European Rubber Journal នៅថ្ងៃទី៧ ខែមិថុនា ឆ្នាំ២០២១។

រោងចក្រផលិតសំបកកង់ថ្មីនេះ នឹងមានទីតាំងនៅតំបន់សេដ្ឋកិច្ចពិសេសក្រុងព្រះសីហនុ ហើយរំពឹងថានឹងចាប់ផ្តើមដំណើរការនៅខែកញ្ញា ឆ្នាំ២០២២។ ក្រុមហ៊ុន General Science Technology គឺជាក្រុមហ៊ុនដែលមានមូលដ្ឋាននៅប្រទេសចិន ដែលបានចូលរួមយ៉ាងសំខាន់ក្នុងការស្រាវជ្រាវ និងការអភិវឌ្ឍន៍ការផលិត និងលក់សំបកកង់រថយន្ត។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ ឲ្យដឹងកាលពីពេលថ្មីៗនេះថា បច្ចុប្បន្នមានក្រុមហ៊ុនចិនជាច្រើនបាន និងកំពុងចូលមកកម្ពុជាហើយ ប៉ុន្តែការចូលមករបស់អ្នកវិនិយោគធំៗ អាចធ្វើឡើងនៅពេលឆាប់ៗនេះ ដោយវ៉ាក់សាំងកូវីដ១៩ ប្រកាសប្រើប្រាស់ជាផ្លូវការ ព្រោះអ្នកវិនិយោគធំៗពួកគេ ក៏លំបាកផងដែរ ប្រសិនជាពួកគាត់ចូលមក ត្រូវធ្វើចត្តាឡីស័ក្តិរយៈពេល១៤ថ្ងៃ។

លោកបានថ្លែងបន្តថា “ហេតុនេះការចូលមករបស់អ្នកវិនិយោគធំៗបាន និងកំពុងចាប់ផ្តើមបណ្តើរៗ និងមកកាន់តែច្រើនបន្ថែមទៀតក្រោយវិបត្តិ Covid-19”។

លោកបន្តថា “ការចូលជាធរមាន នៃកិច្ចព្រមព្រៀងពាណិជ្ជកម្មសេរី (FTA) នៅថ្ងៃទី១មករា ឆ្នាំ២០២១ កម្ពុជានឹងក្លាយជាទីតាំងផលិត និងចែកចាយទំនិញចិនសំរាប់តំបន់អាស៊ាន ហើយយើងនឹងរីកចម្រើនមិនចាញ់សឹង្ហបុរីនោះឡើយ”៕

ប្រធាន CVEA អះអាងថា សកម្មភាពទិញលក់ដីធ្លីកំពុងកើនឡើងខ្លាំងនៅខេត្តចំនួនពីរ

ដោយៈស៊ីវ ម៉េង

ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោ កច្រឹក សុខនីមបានអះអាងថា សកម្មភាពទិញលក់ដីធ្លី បានចាប់ផ្តើមកំរើកឡើងវិញខ្លាំង នៅពេលនេះ ប៉ុន្តែតម្លៃមិនទាន់កើនឡើងនោះទេ។

លោកបានមានប្រសាសន៍ឲ្យដឹងតាមទូរស័ព្ទនារសៀកថ្ងៃទី៧ មិថុនាកន្លងមកថា សកម្មភាពទិញលក់ដីធ្លី មានសកម្មភាពរសរវើ់កជាងគេ ក្នុងចំណោមផ្នែកអចលនទ្រព្យដទៃទៀត ដែលសកម្មភាពបែបនេះភាគច្រើន ធ្វើឡើងដោយវិនិយោគិនក្នុងស្រុក ជាជាងជនបរទេស ដោយសារពួកគេមិនទាន់អាចត្រលប់មកកម្ពុជាវិញបាន ព្រោះបញ្ហាជំងឺកូវីដ។

លោកបន្តថា “ខេត្តដែលមានសកម្មភាពទិញលក់ដីធ្លី ច្រើនជាងគេនាពេលបច្ចុប្ប​ន្ននេះ គឺខេត្តកណ្តាល​ និងខេត្តកំពង់ស្ពឺ”។ លោកបន្តថា “មូលហេតុដែលខេត្តទាំងពីរមានសកម្មភាពទិញលក់ដីធ្លីច្រើន ដោយសារកត្តាហេដ្ឋារចនាសម្ព័ន្ឋ គោលនយោបាយរបស់​រដ្ឋាភិបាល និងកំនើននៃការវិនិយោគពីអ្នកវិនិយោគក្នុងស្រុក”។

លោកច្រឹក សុខនីមបានបន្តថា ទោះជាយ៉ាងណាតម្លៃដីធ្លីនៅតំបន់ភាគច្រើន មិនទាន់ឡើងថ្លៃនោះទេ បើឡើងថ្លៃក៏មានកម្រិតតិចតួចប៉ុណ្ណោះ ដោយសារអ្នកវិនិយោគដីធ្លីនាពេលបច្ចុប្បន្ននេះ នៅមានកម្រិតនៅឡើយ បើធៀបនឹងមុនពេលមានវិបត្តិជំងឺកូវីដ។លោកបន្តថា អ្នកវិនិយោគភាគច្រើន ជាអ្នកមានធនធានដែលស្វែងរកប្រមូលទិញដី ដែ​ល​មានតម្លៃល្អ ឬតម្លៃទាបជាងទីផ្សារ ជាជងតម្លៃដែលមានភាពប្រកួតប្រជែង៕

វិភាគៈតើទំនាក់ទំនងអាមរិកនិងរុស្ស៊ីអាចស្តារឡើងវិញបានឬទេ ក្រោមរដ្ឋបាលលោកចូ បៃឌិន

ដោយៈសុខុម

សេអ៊ូល: ជាមួយនឹងភាពល្អក់កករលើទំនាក់ទំនង ដែលម្តងក្តៅ ម្តងត្រជាក់ ទំនាក់ទំនងរវាងអាមេរិក និងរុស្ស៊ីភាគច្រើនមិនសុវសមប្រកបនោះទេ​ ដោយសារអំណាចកើនឡើងរបស់រុស្ស៊ីក្រោមការដឹកនាំរបស់លោកពូទីន។

ប៉ុន្តែបុរសខ្លាំងរុស្ស៊ីរូបនេះ ហាក់បន្ទន់ឥរិយាបទ ប្រធានាធិបតីលោក វ្ល៉ាឌីមៀ ពូទីន បាននិយាយកាលពីថ្ងៃសុក្រសប្ដាហ៍មុនថា លោកសង្ឃឹមថានឹងអាចស្ដារទំនាក់ទំនងដែលខូចខាតយ៉ាងធ្ងន់ធ្ងរ ជាមួយសហរដ្ឋអាមេរិក នៅពេលលោកជួបជាលើកដំបូងជាមួ​យប្រធានាធិបតី ចូ បៃឌិន នៅចុងខែនេះ។ នេះបើយោងតាមសារព័ត៌មាន Korea Times ចុះផ្សាយកាលពីថ្ងៃទី៦ មិថុនា។

ជំនួបកំពូលទល់មុខគ្នា នៅទីក្រុងហ្សឺណែវ នាថ្ងៃទី១៦ ខែមិថុនា ដ៏ខ្លីខាងមុខនេះនឹងធ្វើឡើង ចំពេលមានវិបត្តិដ៏ធំបំផុត ក្នុងទំនាក់ទំនងរវាងប្រទេសទាំងពីរ ក្នុងរយៈពេលជាច្រើនឆ្នាំមកនេះ ដោយភាពតានតឹងបានកើនឡើងខ្ពស់ ជុំវិញបញ្ហាជាច្រើនរួមមានទាំងការចោទប្រកាន់អំពីការលួចហ៊ែគ (Hack) ការរំលោភសិទ្ធិមនុស្ស និងការអះអាងអំពីការជ្រៀតជ្រែក ចូលក្នុងកិច្ចការបោះឆ្នោតរបស់សហរដ្ឋអាមេរិកផងដែរ។

លោកវ្លាឌីមៀ ពូទីន បានថ្លែងក្នុងវេទិកាសេដ្ឋកិច្ចអន្តរជាតិក្រុង Saint Petersburg (Saint Petersburg International Economic Forum) ដែលធ្វើឡើងតាម Videolink ថា “យើងចាំបាច់ត្រូវរកវិធីស្ដារទំនាក់ទំនងទាំងនេះ ឱ្យវិលមករកសភាពប្រក្រតីឡើងវិញ”។ លោកបានបន្ថែមថា ទំនាក់ទំនងទ្វេភាគីរវាងប្រទេសទាំង២ នាពេលបច្ចុប្បន្នស្ថិតនៅ “កម្រិតទាប”។

លោក ពូទីន បានគូសបញ្ជាក់ថា “យើងគ្មានការខ្វែងគំនិតគ្នា ជាមួយសហរដ្ឋអាមេរិកនោះទេ គឺពួកគេទេដែលមានការខ្វែងគំនិតតែម្នាក់ឯង ដោយចង់រារាំងការអភិវឌ្ឍរបស់យើង។ ពួកគេនិយាយអំពីរឿងនេះជាសាធារណៈ”។

ថ្លែងជាក្រោយតាមទូរទស្សន៍រុស្ស៊ី Channel One ក្នុងថ្ងៃដដែល លោក ពូទីន លើកឡើងថា លោកមិនរំពឹងថានឹងទទួលបានលទ្ធផលដុំកំភួន ក្នុងជំនួបនៅទីក្រុងហ្សឺណែវ នៅពេលខាងមុខនេះឡើយ ប៉ុន្តែថាវាជាឱកាសដ៏ល្អ ដើម្បីពិភាក្សាអំពីប្រធានបទផលប្រយោជន៍ទៅវិញទៅមក។

លោក ពូទីន ដែលមានវ័យ៦៨ឆ្នាំទៅហើយ បានធ្វើការកត់សម្គាល់ថា “ខ្ញុំរំពឹងថានឹងមានលទ្ធផលវិជ្ជមាន”។
លោកពូទីន និងលោកចូ បៃឌិន ធ្លាប់បានជួបគ្នាម្ដងរួចមកហើយកាលពីឆ្នាំ២០១១ ដែលកាលនោះលោក ចូ បៃឌិន កាន់តំណែងជាអនុប្រធានាធិបតី។ ចំណែកឯលោក ពូទីន កាន់តំណែងជានាយករដ្ឋមន្ត្រី។

លោកពូទីន និយាយថា លោកនៅចាំបានពីជំនួបកាលនោះ ដោយលោកបានសរសើរលោកចូ បៃឌិន ដែលមានវ័យ៧៨ឆ្នាំថា ជាអ្នកនយោបាយជើងចាស់ “ដ៏មានបទពិសោធន៍” និង “មានការប្រយ័ត្នប្រយែងខ្ពស់”។

ចាប់តាំងពីចូលកាន់តំណែងក្នុងខែមករា ដើមឆ្នាំ២០២១ លោកចូ បៃឌិនបានបង្កើ​នការដាក់សម្ពាធលើវិមានក្រឹមឡាំង (រុស្ស៊ី) ហើយការអត្ថាធិប្បាយរបស់លោក ដែលប្រៀបធៀបលោក ពូទីន ទៅនឹង “ឃាតករ” បានទទួលរងការរិះគន់យ៉ាងខ្លាំង នៅទីក្រុងម៉ូស្គូ។

*ការចោទប្រកាន់ដោយគ្មានមូលដ្ឋាន
រដ្ឋការលោក ចូ បៃឌិន បានដាក់ទណ្ឌកម្មថ្មីៗទៅលើប្រទេសរុស្ស៊ី ដោយសារសហរដ្ឋអាមេរិកបាននិយាយថា ប្រទេសរុស្ស៊ី ជាអ្នកនៅពីក្រោយការហ៊ែគ ចូលលួចទិន្នន័យរបស់ក្រុមហ៊ុនអភិវឌ្ឍន៍សូហ្វវែរអាមេរិក SolarWinds និងការជ្រៀតជ្រែកចូលក្នុងកិច្ចការបោះឆ្នោតប្រធានាធិបតីសហរដ្ឋអាមេរិក ក្នុងឆ្នាំ២០២០។

លោកចូ បៃឌិន បានលើកឡើងថា លោកក៏ “កំពុងសម្លឹងរកឱកាស” សងសឹកវិញផងដែរ ក្រោយពីសេតវិមានបានភ្ជាប់ប្រទេសរុស្ស៊ី ទៅនឹងសកម្មភាពវាយប្រហារតាមប្រព័ន្ធអ៊ីនធឺណិតលើក្រុមហ៊ុន JBS ដែលជាក្រុមហ៊ុនកែច្នៃសាច់ខ្នាតយក្ស របស់សហរដ្ឋអាមេរិក។

លោកពូទីន បាននិយាយកាលពីថ្ងៃសុក្រ សប្ដាហ៍មុនថា ការអះអាងទាំងនោះ “គួរឱ្យអស់សំណើច”។ លោកថ្លែងថា “ខ្ញុំក៏បានឮអំពីរោងចក្រកែច្នៃសាច់មួយចំនួនដែរ”។ លោកបានបន្ថែមថា “ខ្ញុំយល់ថាទីភ្នាក់ងារសន្តិសុខរបស់សហរដ្ឋអាមេរិក គួរតែកំណត់មុខសញ្ញាឱ្យបានច្បាស់ថា តើជនលួចហ៊ែគនោះជាអ្នកណា។ ច្បាស់ណាស់ នោះមិនមែនជាស្នាដៃរបស់រុស្ស៊ីឡើយ”។

រដ្ឋាភិបាលក្រុងវ៉ាស៊ីនតោន ក៏បានរិះគន់យ៉ាងខ្លាំង ចំពោះរដ្ឋាភិបាលក្រុងមូស្គូផងដែរ ចំពោះការដាក់ថ្នាំបំពុលដែលប៊ិះនឹងផ្ដាច់ជីវិតមនុស្ស និងការឃុំខ្លួនបុរសឈ្មោះ Alexei Navalny ដែលជាអ្នកប្រឆាំងនឹងវិមានក្រឹមឡាំង។

កាលពីថ្ងៃសុក្រដដែល លោក ពូទីន បានចុះហត្ថលេខាលើច្បាប់មួយ ដែលរារាំងក្រុមជ្រុលនិយម មិនឱ្យចូលរួមក្នុងដំណើរការបោះឆ្នោតសភា។

ក្រុមអ្នករិះគន់បានថ្កោលទោសចំពោះច្បាប់នេះថា ជាឧបករណ៍ចុងក្រោយមួយ ដើម្បីបង្ក្រាបក្រុមប្រឆាំងនៅក្នុងប្រទេសរុស្ស៊ី មុនការបោះឆ្នោតសភាជាន់ទាបនៅខែកញ្ញា ខាងមុខនេះ។

វិបត្តិការទូតជាមួយសហរដ្ឋអាមេរិក បានបណ្តាលឱ្យមានការបណ្តេញ មន្ត្រីការទូតទៅវិញទៅមក ដោយរដ្ឋាភិបាលក្រុងមូស្គូ ហាមប្រាមស្ថានទូតអាមេរិក មិនឱ្យជួលជនជាតិបរទេសធ្វើការ ជាហេតុបណ្ដាលឱ្យសេវាកម្មស្ថានកុងស៊ុល របស់សហរដ្ឋអាមេរិក ជាប់គាំង។

ក្នុងវេទិកានោះ លោក ពូទីន បានលើកឡើងថា គម្រោងខ្សែទី១នៃបំពង់បង្ហូរឧស្ម័នហ្គាស Nord Stream 2 ដ៏ចម្រូងចម្រាសភ្ជាប់ទៅដល់ប្រទេសអាល្លឺម៉ង់ ត្រូវបានបញ្ចប់ជាស្ថាពរ ទោះបីមានការប្រឆាំងយ៉ាងខ្លាំងក្លាពីសហរដ្ឋអាមេរិកយ៉ាងណាក្ដី។

សហរដ្ឋអាមេរិក និងប្រទេសមួយចំនួននៅអឺរ៉ុប បានជំទាស់ដាច់ខាតចំពោះការសាងសង់បំពង់បង្ហូរឧស្ម័នហ្គាសនេះ ដោយលើកហេតុផលថា វានឹងធ្វើឱ្យអឺរ៉ុប ពឹងផ្អែកលើប្រទេសរុស្ស៊ីកាន់តែខ្លាំង សម្រាប់ការផ្គត់ផ្គង់ហ្គាសដ៏សំខាន់ និងធ្វើឱ្យរដ្ឋាភិបាលក្រុងមូស្គូ មានឥទ្ធិពលកាន់តែខ្លាំងផ្នែកភូមិសាស្ត្រនយោបាយ។

*ចំណុចដ៏លំបាក
លោក ពូទីន ក៏បានលើកឡើងដែរថា បណ្តាប្រទេសនៅអឺរ៉ុប គួរតែបង់ថ្លៃឧស្ម័ន ហ្គាសរុស្ស៊ី ជាប្រាក់អឺរ៉ូ ជាជាងប្រាក់ដុល្លារ ដោយនិយាយថា នេះជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលក្រុងមូស្គូ ដើម្បីកាត់បន្ថយការពឹងផ្អែករបស់ខ្លួន លើប្រាក់ដុល្លារ។

លោក Markus Ederer ឯកអគ្គរដ្ឋទូតសហភាពអឺរ៉ុប ប្រចាំនៅប្រទេសរុស្ស៊ី បានថ្លែងក្នុងវេទិកានោះកាលពីថ្ងៃព្រហស្បតិ៍ថា ទំនាក់ទំនងរបស់រដ្ឋាភិបាលក្រុងមូស្គូ ជាមួយសហភាពអឺរ៉ុប ក៏ស្ថិតក្នុង “ចំណុចដ៏លំបាកបំផុត” ដែរចាប់តាំងពីសង្គ្រាមត្រជាក់មក។

មន្ត្រីការទូតអាល្លឺម៉ង់រូបនេះ បានលើកឡើងដោយសំដៅដល់ រដ្ឋមន្រ្តីក្រសួងការបរទេសរុស្ស៊ីថា “ប្រសិនអស់លោកស្តាប់អ្វីដែលលោកSergei Lavrov និយាយ អស់លោ​កអាចសន្និដ្ឋានបានថា ប្រទេសរុស្ស៊ី មិនឱ្យតម្លៃចំពោះទំនាក់ទំនង ជាមួយសហភាពអឺរ៉ុប ឡើយ”។

វេទិកាអន្តរជាតិក្រុងSaint Petersburg គឺជាព្រឹត្តិការណ៍ដ៏សំខាន់មួយ សម្រាប់បណ្ដាវិនិយោគិន និងជាឱកាសជួបជុំសម្រាប់ថ្នាក់ដឹកនាំផ្នែកពាណិជ្ជកម្ម និងនយោបាយ។

វាជាព្រឹត្តិការណ៍ដ៏ធំបំផុតមួយ ដែលធ្វើឡើងនៅក្នុងប្រទេសរុស្ស៊ី និងពិភពលោក ចាប់តាំងពីផ្ទុះការឆ្លងរាតត្បាតវីរុសកូវីដ-១៩ បើទោះបីជាចំនួនអ្នកចូលរួមត្រូវបានកំណត់មកនៅត្រឹម៥.០០០រូបយ៉ាងណាក្ដី។ ព្រឹត្តិការណ៍លើកចុងក្រោយ ដែលរៀបចំឡើងក្នុងឆ្នាំ២០១៩ មានអ្នកចូលរួមច្រើនជាងនេះដល់ទៅប្រមាណ៤ដង នៃចំនួនកំណត់ដែល​បានគ្រោងទុកឯណោះ៕