ក្រុមហ៊ុនLSCGចុះកិច្ចព្រមព្រៀងជាមួយក្រុមហ៊ុនធំមួយរបស់ចិនលើទឹកប្រាក់ប្រមាណ២០លានដុល្លារ ដើម្បីដេញថ្លៃគំរោងធំៗនៅកម្ពុជា

ដោយស៊ីវ ម៉េង
ភ្នំពេញៈ ក្រុមហ៊ុនក្នុងស្រុកដ៏ធំមួយ បានសម្រេចចុះកិច្ចព្រមព្រៀងជាមួយក្រុមហ៊ុនរបស់រដ្ឋាភិបាលចិន ដើម្បីដេញថ្លៃគំរោងធំនៅកម្ពុជា ជាប្រទេសដែលកំពុងទាក់ទាញការវិនិយោគ និងមានការរីកចម្រើនយ៉ាងលឿននេះ។

លោកលី សុខឆាយអគ្គនាយក្រុមហ៊ុនLSCG បានមានប្រសាសន៍ឲ្យដឹងនាព្រឹកថ្ងៃទី៨ មិនានេះថា កិច្ចព្រមព្រៀងនេះមានទំហំទឹកប្រាក់ចន្លោះពី២០ ទៅ៣០លានដុល្លារអាមេរិក ដែលនឹងត្រូវប្រើប្រាស់លើការដេញថ្លៃគំរោងសាងសង់ធំៗ ក៏ដូចជាគម្រោងអាគារសំណង់នានានៅទីក្រុងភ្នំពេញ និងតាមបណ្តាខេត្តមានសក្តានុពលសេដ្ឋកិច្ច។

លោកបន្តថា “ការវិនិយោគដេញថ្លៃគម្រោងធំៗនៅកម្ពុជា ដែលកំពុងជួបការលំបាកដោយសារCovid ជាផ្នែកមួយនៃការផ្តល់ទំនុកចិត្ត និងលើកកំពស់វិស័យអចលនទ្រព្យនៅកម្ពុជា”។លោកបន្តថា “វិស័យសំណង់ និងអចលនទ្រព្យកម្ពុជា ទោះបីឆ្លងកាត់ពេលវេលាដ៏លំបាកដោយសារជំងឺកូវីដ១៩ក្តី ប៉ុន្តែយើងមិនរងផលប៉ះពាល់ធ្ងន់ធ្ងរនោះទេ ដោយសារកត្តាដឹកនាំដ៏ឈ្លាសវៃ របស់ប្រមុខរដ្ឋាភិបាលកម្ពុជា គឺសម្តេចតេជោហ៊ុន សែននាយករដ្ឋមន្រ្តីនៃកម្ពុជា”។

ជាមួយនឹងការពង្រីកការសហការ ជាមួយក្រុមហ៊ុនជាតិ អន្តរជាតិ ពិសេសក្រុមហ៊ុនមកពីប្រទេសចិន បានធ្វើឲ្យក្រុមហ៊ុនLSCG ពង្រីកខ្លួនចាប់យកចំណែកទីផ្សារអចលនទ្រពន្យនៅកម្ពុជាយ៉ាងលឿន និងជាក្រុមហ៊ុនដែលកំពុងលេចធ្លោមួយ ដែលនឹងរួមចំណែកដល់ការលើកស្ទួយសេដ្ឋកិច្ច សង្គមកម្ពុជាឲ្យមានការរីកចម្រើនលឿនថែមទៀត។

លោកលី សុខឆាយបានបន្តទៀតថា លោកជឿថាវិស័យសំណង់ និងអចលនទ្រព្យនៅកម្ពុជានឹងងើបឡើងវិញ យ៉ាងលឿននាពេលឆាប់ៗខាងមុខនេះ បន្ទាប់ពីបញ្ចប់ព្រឹត្តិការណ៍៍២០កុម្ភៈកន្លងមកនេះ។លោកបន្តដោយសុទិដ្ឋិនិយមថា ប្រមុខរដ្ឋាភិបាលកម្ពុជានឹងអាចគ្រប់គ្រងជំងឺនេះបានលឿន និងឆាប់ចប់ ហើយសេដ្ឋកិច្ចកម្ពុជានឹងមានកំនើនឆាប់រហ័សឡើងវិញនាពេលឆាប់ៗខាងមុខនេះ៕

តើគួរចាប់ផ្ដើមពីចំណុចណាមុនដើម្បីក្លាយជាអ្នកវិនិយោគអចលនទ្រព្យមានជំនាញច្បាស់លាស់?

ដោយៈ លក្ខិណា

ភ្នំពេញៈ នាពេលបច្ចុប្បន្ន ការវិនិយោគអចលនទ្រព្យមានច្រើនបែប និងច្រើនសណ្ឋាន អ្នកខ្លះមានទុនច្រើនក៏ចាប់ផ្ដើមវិនិយោគធំ ហើយអ្នកខ្លះទៀត ដែលមានទ្រព្យធនតិចតួច ក៏មិនដឹងថា វិនិយោគអ្វីឱ្យទទួលបានផលចំណេញនៅពេលអនាគត។

ដូច្នេះដើម្បីឱ្យក្លាយជាអ្នកវិនិយោគអចលនទ្រព្យដែលអាចរកប្រាក់ចំណាញ និងក្លាយជាអ្នកវិនិយោគ ដែលមានជំនាញច្បាស់លាស់ តើគួរចាប់ផ្ដើមពីចំណុចណាមុន?

លោកង៉ែត ជូសេដ្ឋវិទូមួយរូបនៅក្នុងប្រទេសកម្ពុជាបានមានប្រសាសន៍ឱ្យដឹងថា សម្រាប់អ្នកដែលមានទុនតិចតួច ហើយគ្រាន់តែចង់បានផ្ទះនៅនិងមិនចង់បានបិទពិសោធន៍ប ឬការវិនិយោគច្បាស់លាស់នៅពេលអនាគតទេ គឺអាចទិញផ្ទះនៅតែម្ដងទៅ ប៉ុន្តែសម្រាប់ដែលមានបំណងចង់អភិវឌ្ឍខ្លួន និងយកការវិនិយោគអចលនទ្រព្យជាវិជ្ជាជីវៈ មុខរបរនៅពេលអនាគត គួរតែវិនិយោគទៅលើដី។

លោកបានថ្លែងថា ការវិនិយោគដីធ្លីនេះ វាមិនខុសពីការវិនិយោគទៅលើវិស័យផ្សេងៗនោះទេ គឺត្រូវវិនិយោគលើខ្លួនឯងជាមុនសិន ដែលសំដៅទៅលើការវិនិយោគលើចំណេះដឹង។

លោកបន្តថា ការវិនិយោគដីធ្លី គឺត្រូវមើលទៅលើទីតាំង ទើបអាចទទួលបានផលចំណេញ។ ជាក់ស្ដែងបើសិនជាគម្រោងវិនិយោគដីធ្លីរបស់យើង មានបំណងផ្ដោតទៅលើអ្នកដែលមានជីវភាពមធ្យមឬក្រោមមធ្យម គួរមើលទៅលើតំបន់ទើបកកើតថ្មីៗ ព្រោះតំបន់នោះ តម្លៃដីនៅមានតម្លៃទាប និងអាចលក់ចេញវិញនៅពេលអនាកត ក្នុងតម្លៃមួយខ្ពស់ជាង ជាពិសេសទៅលើតំបន់ណាដែលនៅជិតរោងចក្រកកើតថ្មីឬរោងចក្រដែលនឹងកកើតនៅពេលអនាគត។

លោកបន្ថែមថា ការវិនិយោគដីធ្លីក៏មើលទៅលើពីតម្រូវការជាក់ស្ដែងដែរ ហើយលោកបានផ្ដល់ជាមតិថា ដីនៅតាមបណ្ដាខេត្ត បើនិយាយពីតម្រូវការគឺនៅមានតិចតួចជាងតម្រូវការនៅក្នុងភ្នំពេញ ដូចជាតម្រូវការសាងសង់លំនៅឋានតម្រូវការសាងសង់រោងចក្រជាដើម ។ ដូច្នេះអ្នកវិនិយោគដីធ្លីដែលមានទុនតិចតួនហ្នឹងគួរតែងាកមកភ្នំពេញ ដើម្បីសម្លឹងមើលការវិនិយោគរបស់ខ្លួន ។

លោកបណ្ឌិតគីម ហ៊ាងប្រធានក្រុមហ៊ុនអចលនទ្រព្យ KW Cambodia បានលើកឡើងថា ការអភិវឌ្ឍដ៏ធ្លី នៅក្នុងប្រទេសកម្ពុជាបើប្រៀបធៀបនឹងប្រទេសមួយចំនួន ឃើញថា កម្ពុជាដើរក្រោយគេ១០ឆ្នាំ ២០ឆ្នាំ និងខ្លះមានដល់ទៅ៣០ឆ្នាំផងដែរ ដូច្នេះសក្ដានុពលក្នុងការវិនិយោគដីធ្លីនៅតែមានឱកាសខ្ពស់និងអាចរកប្រាក់ចំណេញបាននៅពេលអនាគត គ្រាន់តែទីតាំងដីដែលត្រូវវិនិយោគវានឹងកាន់តែឆ្ងាយពីរាជធានីភ្នំពេញ ឬឆ្ងាយពីទីប្រជុំជនបន្តិច៕

លំហូរទុនវិនិយោគលើវិស័យសំណង់នឹងងើបឡើងវិញនៅត្រីមាសទី៣ចុងឆ្នាំនេះ

ដោយ ៖ រ៉ាណេត

ភ្នំពេញ ៖ គម្រោងសាងសង់ និងទុនវិនិយោគក្នុងវិស័យសំណង់នៅកម្ពុជា ដែលស្ថិតនៅក្នុងសភាពស្ងប់ស្ងាត់ក្រោមឥទ្ធិពលនៃវិបត្តិសេដ្ឋកិច្ចបណ្តាលមកពីជំងឺឆ្លងចាប់តាំងពីដើមឆ្នាំ២០២០មកនោះ ត្រូវបានអ្នកជំនាញនៅក្នុងវិស័យមួយនេះធ្វើការព្យាករថា អាចនឹងនឹងកម្រើកឡើងវិញនៅក្នុងត្រីមាសទី៣ ឬចុងឆ្នាំ២០២១ ប្រសិនបើការប្រើប្រាស់វ៉ាក់សាំងការពារជំងឺកូវីដ១៩បានកាន់តែទូលាយ និងមានប្រសិទ្ធភាពទាំងនៅតាមបណ្តាប្រទេសនានា ក៏ដូចជានៅក្នុងប្រទេសកម្ពុជា ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យ CBRE Cambodia លោកស្រី អាន សុធីតា បានមានប្រសាសន៍នៅព្រឹក៨ ខែមីនា ឆ្នាំ២០២១នេះថា ប្រសិនបើបញ្ហានៃការរីករាលដាលនៃជំងឺឆ្លងត្រូវបានធ្វើការទប់ស្កាត់ ជាពិសេសប្រសិទ្ធភាពនៃការប្រើប្រាស់វ៉ាក់សាំងកាន់តែមានភាពទូលាយ នោះសកម្មភាពវិនិយោគក្នុងវិស័យសំណង់នៅកម្ពុជាអាចនឹងមានកំណើនឡើងវិញបន្តិចម្ដងៗនៅត្រឹមចុងឆ្នាំ២០២១ ហើយភាគច្រើនផ្តើមចេញពីវិនិយោគិន និងអ្នកអភិវឌ្ឍន៍ក្នុងស្រុក។

លោកស្រីបានបញ្ជាក់ថា “សកម្មភាពអភិវឌ្ឍន៍ និងសាងសង់ទាំងអស់ដែលអាចនឹងបង្ហាញនៅចុងឆ្នាំ២០២១ភាគច្រើនជាគម្រោង និងទុនវិនិយោគដែលបានស្នើចូលមកកាន់កម្ពុជាតាំងពីឆ្នាំចាស់ ដែលមិនមែនទើបតែកើតមាននៅក្នុងឆ្នាំ២០២១នោះទេ។ យើងទទួលស្គាល់ថា សកម្មភាព និងទុនវិនិយោគថ្មីអាចកើតមាននៅក្នុងឆ្នាំ២០២១ខ្លះពិតមែន ប៉ុន្តែគម្រោងថ្មីទាំងនេះ ភាគច្រើនជាសកម្មភាពរបស់អ្នកវិនិយោគក្នុងស្រុកដែលវាមានកំណើនទុនក្នុងវិស័យសំណងតិចភាគរយបើប្រៀបទៅនឹងទុនវិនិយោគដែលទទួលបានពីក្រៅប្រទេស”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម ធ្លាប់បានមានប្រសាសន៍កាលពីពេលកន្លងទៅថ្មីៗនេះថា នៅក្នុងឆ្នាំ២០២១នេះ សកម្មភាពវិនិយោគក្នុងវិស័យសំណង់ភាគច្រើនជាសកម្មភាពរបស់អ្នកក្នុងស្រុក ដោយឡែកសម្រាប់រំហូរទុនចូលពីក្រៅស្រុកគឺមានតិចតួចបំផុត។ លោកបានបន្តថា “វិបត្តិសេដ្ឋកិច្ចដែលកំពុងកើតមាននៅពេលនេះ គឺជះឥទ្ធិពលគ្រប់ប្រទេស ដែលបណ្តាលឱ្យប៉ះពាល់ដល់គម្រោងវិនិយោគទាំងអស់។ ប៉ុន្តែក្រោយពេលវិបត្តិនេះត្រូវបានទប់ស្កាត់ គម្រោងវិនិយោគនានានឹងចាប់ផ្តើមរៀបចំឡើងវិញ ហើយតាមខ្ញុំគិត ប្រសិនបើវិបត្តិជំងឺដែលកំពុងរាលដាលនេះត្រូវបានបញ្ចប់នៅត្រឹមចុងឆ្នាំនេះ នោះសកម្មភាពវិនិយោគនៅក្នុងវិស័យសំណង់អាចនឹងចាប់ផ្តើមនៅដើមឆ្នាំ ឬនៅត្រឹមពាក់កណ្តាលឆ្នាំ២០២២ខាងមុខនេះ”៕

ហេដ្ឋាចរនាសម្ព័ន្ធថ្មីនៅតំបន់អភិវឌ្ឍន៍ធម្មជាតិរុនតាឯក ស្រុកបន្ទាយស្រី ខេត្តសៀមរាបចាប់ដំណើរការអនុវត្តជាបណ្តើរៗ

ដោយ ៖ រ៉ាណេត

សៀមរាប ៖ អនុវត្តតាមការណែនាំពីសំណាក់លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ទៅលើការរៀបចំ និងដោះស្រាយផលប៉ះពាល់គម្រោងរៀបចំហេដ្ឋារចនាសម្ព័ន្ធនៅទូទាំងក្រុងសៀមរាប ក៏ដូចជាការរៀបចំស្ទឹងសៀមរាប បច្ចុប្បន្នរដ្ឋបាលខេត្តបាន និងកំពុងរៀបចំហេដ្ឋារចនាសម្ព័ន្ធថ្មីនៅតំបន់អភិវឌ្ឍន៍ធម្មជាតិរុនតាឯក ដែលជាទីតាំងដោះដូរថ្មីសម្រាប់ប្រជាពលរដ្ឋដែលរងផលប៉ះពាល់ពីគម្រោង។

លោកទៀ សីហា អភិបាលខេត្តសៀមរាបបានមានប្រសាសន៍នៅថ្ងៃទី៧ ខែមីនា ឆ្នាំ២០២១ថា រាជរដ្ឋាភិបាលក្រោមការដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានយកចិត្តទុកដាក់យ៉ាងខ្លាំងទៅលើសុខទុក្ខរបស់ប្រជាជនទូទាំងប្រទេសស្របពេលដែលកម្ពុជាក៏កំពុងព្យាយាមបង្កើននូវកំណើនសេដ្ឋកិច្ចជាតិឱ្យកាន់តែល្អប្រសើរ។

លោកបានបន្ថែមថា ជាក់ស្ដែង ស្ថិតនៅក្នុងគម្រោងរៀបចំស្ថាបនា និងស្ដារហេដ្ឋារចនាសម្ព័ន្ធនៅទូទាំងក្រុងសៀមរាប ដែលមានប្រជាពលរដ្ឋប្រមាណ៤០០គ្រួសាររងផលប៉ះពាល់ពីគម្រោងអភិវឌ្ឍន៍នៅស្ទឹងសៀមរាប រដ្ឋាភិបាលបានរៀបចំ និងដោះដូរទីតាំងសម្រាប់លំនៅដ្ឋានជូនប្រជាពលរដ្ឋទាំងអស់មកកាន់តំបន់អភិវឌ្ឍន៍ថ្មីដែលស្ថិតនៅភូមិអភិវឌ្ឍន៍ធម្មជាតិរុនតាឯក ក្នុងស្រុកបន្ទាយស្រី ជាមួយនឹងការរៀបចំហេដ្ឋារចនាសម្ព័ន្ធបន្ថែមយ៉ាងល្អប្រសើរ។

លោកឃឹម ហ្វីណង់ អភិបាលស្រុកបន្ទាយស្រីបានឱ្យដឹងថា ក្នុងចំណោមប្រជាពលរដ្ឋប្រមាណ៤០០គ្រួសារដែលត្រូវផ្លាស់ប្តូរទីតាំងរស់នៅពីមាត់ស្ទឹងសៀមរាប មកនៅភូមិធម្មជាតិរុនតាឯកនេះ មានប្រមាណ២០០គ្រួសារហើយបានមកធ្វើផ្ទះរស់នៅ និងបានដាំបន្លែចិញ្ចឹមសត្វ ព្រមទាំងបើកមុខរបរលក្ខណៈគ្រួសារ ខណ:ពេលនេះ រដ្ឋបាលស្រុកបានកំពុងរៀបចំរចនាសម្ព័ន្ធគ្រប់គ្រងឱ្យកាន់តែមានភាពល្អប្រសើរ ដោយបច្ចុប្បន្ននេះយើងមានមេភូមិ និងប្រជាការពារភូមិដូចភូមិចាស់ៗផងដែរ។

លោកអភិបាលស្រុកបានបន្តទៀតថា អាជ្ញាធរស្រុក ក៏មានគម្រោងជួយរៀបចំផ្ទះប្រជាពលរដ្ឋណាដែលឧស្សាហ៍ព្យាយមឱ្យក្លាយទៅផ្ទះគំរូ គឺផ្ទះមានសោភ័ណភាពស្អាត មានដាំផ្កាលម្អ ដាំបន្លែ ចិញ្ចឹមសត្វ មានអនាម័យ និងភាពបៃតងដែលបច្ចុប្បន្ននេះ អាជ្ញាធរស្រុកកំពុងតែធ្វើការសិក្សាទៅលើប្រជាពលរដ្ឋណាដែលមករស់នៅជាប់លាប់ និងមានចិត្តចង់ធ្វើ ហើយក្រៅពីនេះរដ្ឋបាលស្រុកក៏មានគោលដៅរៀបចំភូមិនេះឱ្យមានការអភិវឌ្ឍន៍រីកចម្រើនផងដែរ។

បច្ចុប្បន្ននៅក្នុងភូមិអភិវឌ្ឍន៍ធម្មជាតិរុនតាឯក អាជ្ញាធរបានរៀបចំឱ្យមានប្រព័ន្ធភ្លើង និងអណ្តូងទឹកស្អាតសម្រាប់ប្រជាពលរដ្ឋក្នុងតំបន់ប្រើប្រាស់យ៉ាងស្រួល ព្រមទាំងបង្កើតឱ្យមានហេដ្ឋារចនាសម្ព័ន្ធដូចជាផ្លូវថ្នល់ថ្មីសម្រាប់សម្រួលដល់ការធ្វើដំណើរ និងដឹកជញ្ជូនរបស់ប្រជាពលរដ្ឋផងដែរ៕

ផ្លូវសំខាន់ៗចំនួន៣បានក្លាយជាកន្លែងទាក់ទាញរោងចក្រឧស្សាហកម្មនិងលំនៅដ្ឋាន

ដោយ៖ ប៊ី

ភ្នំពេញ៖ តម្រូវការដីជួលបែបឧស្សាហកម្មត្រូវបានមើលឃើញថាមានការកើនឡើងក្នុងរយៈពេលប៉ុន្មានឆ្នាំចុងនេះ ដែលធ្វើឱ្យផ្លូវចំនួន៣ ប្រែក្លាយទៅជាបណ្តុំមជ្ឈមណ្ឌលសម្រាប់ការវិនិយោគអចលនទ្រព្យបែបឧស្សាហកម្ម និងដឹកជញ្ជួន និងលំនៅដ្ឋាន។

តម្លៃដីបាននិងកំពុងកើនឡើងក្នុងទីក្រុងរយៈពេល៦ឆ្នាំចុងក្រោយនេះ។ តម្លៃដីនៅដងផ្លូវ២០០៤ និងវេងស្រេងមានកើនឡើងខ្លាំងពេក សម្រាប់ការសាងសង់រោចចក្រសម្រាប់ជួល។ នេះបើយោងតាមរបាយការចុងក្រោយរបស់ក្រុមហ៊ុន CBRE Cambodia។

ដូច្នេះ ទីតាំងឧស្សាហកម្មត្រូវបានផ្លាស់ប្តូរទៅខាងក្រៅក្រុងវិញ ខណៈការអភិវឌ្ឍលំនៅដ្ឋានក៏ត្រូវបានមើលឃើញថា បង្វែទិសទៅតាមផ្លូវសំខាន់ៗចំនួន៣នេះផងដែរ។

របាយការណ៍ បានឱ្យដឹងថា “ទីតាំង ដូចជាផ្លូវជាតិលេខ៣ ផ្លូវជាតិលេខ៤ និងផ្លូវក្រវ៉ាត់ទី៣ បានក្លាយជាមជ្ឈមណ្ឌលសម្រាប់ការវិនិយោគអចលនទ្រព្យបែបឧស្សាហកម្ម និងដឹកជញ្ជួន។ ផ្លូវទាំងនេះផ្តល់ការតភ្ជាប់យ៉ាងល្អទៅកាន់មជ្ឈមណ្ឌលនាំចេញ និងនាំចូលក្នុងប្រទេស”។

ជាមួយគ្នានេះដែរ អ្នកជំនាញបានលើកឡើងថា តម្លៃជួលខ្ពស់បំផុតនៅតំបន់សេដ្ឋកិច្ចពិសេស ដែលតម្លៃចាប់ពី២.៨០ដុល្លារ ទៅ៥ដុល្លារក្នុងមួយម៉ែត្រការ៉េក្នុងមួយខែ ខណៈតម្លៃជួលទាបបំផុតអាចរកជួលបានចាប់១.៨០ ទៅ២.៥០ដុល្លារក្នុងមួយម៉ែត្រការ៉េ។

តម្លៃឃ្លាំងជួលអាចរកជួលបានក្នុងតម្លៃ១.៨០ដុល្លារក្នុងមួយម៉ែត្រការ៉េ ខណៈតម្លៃជួលរោចចក្រ ដែលមានគុណភាពលក្ខណៈអន្តរជាតិ អាចរកបានក្នុងតម្លៃ៥ដុល្លារក្នុងមួយម៉ែត្រការ៉េ។
សរុបមក តម្លៃដីនៅទីក្រុងភ្នំពេញនៅតែមានតម្លៃថេរក្នុងត្រីមាសដើមឆ្នាំនេះ ខណៈការទិញលក់ដីធ្លីនៅក្នុងត្រីមាសនេះ មិនសូវមានជាចលនា ដោយសារកង្វះខាតនៃទីទំនេរនៅទីក្រុង៕

ឧកញ៉ាកាង សុធី បង្ហើបពីដីស្ថិតនៅទីតាំងចំនួន៥ ដែលមិនគួរវិនិយោគ

ដោយៈស៊ីវ ម៉េង

ភ្នំពេញ៖ អ្នកជនាញផ្នែកអចលនទ្រព្យ ពិសេសជាអ្នកជំនាញផ្នែកទិញលក់ដីធ្លីបានប្រាប់ពីលក្ខខ័ណ្ឌដីចំនួន៥ប្រភេទ ដែលអ្នកវិនិយោគមិនគួរទិញនោះទេ ដោយសារវាពិបាកក្នុងការលក់ចេញ។

លោកឧកញ៉ា កាង សុធី អគ្គនាយអគ្គនាយកនៃក្រុមហ៊ុន Century21 Land Station Real Estate បានមានប្រសាសន៍ ឲ្យដឹងតាមទូរស័ព្ទកាលពីពេលថ្មីៗនេះថា ការវិនិយោគដីធ្លី អ្នកណាក៏ចង់លក់ឆាប់ដាច់ និងទទួលបានផលចំណេញលឿនដែរ ប៉ុន្តែលក្ខខ័ណ្ឌទីតាំង សណ្ឋានដីពិតជាកត្តាសំខាន់ ដើម្បីឲ្យដីរបស់ខ្លួនលក់ឆាប់ដាច់ និងទទួលបានផលចំណេញខ្ពស់។

ទី១ ដីមានទីតាំងនៅជុំវិញវត្តអារ៉ាម

លោកឧកញ៉ាលោក កាង សុធី បានឲ្យដឹងថា ទោះជាប្រជាជនខ្មែរនិយមទៅធ្វើបុណ្យនៅវត្តអារ៉ាមក្តី តែទីតាំងដីដែលនៅក្បែរវត្តអារ៉ាម ទាំងខាងមុខខាងក្រោយ និងជាប់របងវត្ត ពិតជាដីមិនងាយលក់ចេញនោះទេ ទោះជាដីនោះមានតម្លៃទាបជាងទីផ្សារក៏ដោយ។ លោកបន្តថា ដីនៅតាមជុំវិញវត្តអារ៉ាម ពិតជាមិនងាយទាក់ទាញការចាប់អារម្មណ៍ច្រើននោះទេ និងមិនងាយលក់ចេញបានឡើយ។

ប្រហែលពួកគេមិនចង់មានសម្លេងរំខាន នៅពេលមានកម្មវិធីបុណ្យទាននានា ក៏ដូចជាបញ្ហាហុងស៊ុយផងដែរ។

ទី២ដីមានផ្នូរឬម៉ុងខ្មោចនៅក្បែរ
ជាទូទៅមនុស្សណាក៏ស្លាប់ដែរ តែពេលស្លាប់ពួកគេនឹងក្លាយជាខ្មោច ហេតុនេះទីតាំងដីដែលនៅក្បែរផ្នូរខ្មោច ឬចេតិយ មិនគួរទិញនោះទេ ដោយសារមនុស្សមិនចូលចិត្តផ្នូរ ឬម៉ុងខ្មោចនោះឡើយ។

ការទិញដីមានទីតាំងបែបនេះ ពិតជាពិបាកលក់ចេញ និងមិនងាយបានផលចំណេញ។

ទី៣ រាងឬសណ្ឋានដី

រាងឬសណ្ឋានដីក៏មានសារៈសំខាន់ ដើម្បីទាក់ទាញអ្នកទិញបន្ត ឬអ្នកវិនិយោគផងដែរ ព្រោះបើរាងដីមិនសមស្រប និងមានសណ្ឋានវៀច ពិតជាមិនធ្វើឲ្យដីនោះងាយលក់នោះទេ ហើយវាក៏មិនឡើងថ្លៃលឿនដែរ។

លោកឧកញ៉ាកាង សុធីបានឲ្យដឹងថា ដើម្បីដឹងពីរាងឬសណ្ឋានដីណាមួយ សូមកុំមើលនឹងភ្នែកទទេ តែត្រូវសុំប្លង់ម្ចាស់ដីយកមកមើល ទើបយើងអាចដឹងថារាងឬសណ្ឋានដីនោះមានលក្ខណៈដូចម្តេច។

ទី៤ ការខ្ចីប្រាក់ពីធនាគារ

ការខ្ចីប្រាក់ឬឥណទានពីធនាគារ ជារឿងគួរឲ្យប្រុងប្រយ័ត្នមួយ ព្រោះអ្នកវិនិយោគឬទិញដីធ្លី ត្រូវសិក្សាលំហូរសាច់ប្រាក់របស់ខ្លួនឲ្យបានច្បាស់លាស់ ដើម្បីកុំឲ្យមានបញ្ហាហិរញ្ញវត្ថុនៅពេលដីជាប់គាំង ឬលក់មិនចេញ។

លោកឧកញ៉ាកាង សុធី បានបញ្ជាក់ថា ដីធ្លីនៅតំបន់ណាមួយអាចជាប់គាំងមួយរយៈ និងកញ្ជ្រោលតម្លៃឡើងខ្ពស់ភ្លាមៗ ហើយតម្លៃដីធ្លីមិនកើនឡើងគ្រប់តំបន់នោះទេ ហេតុនេះការសិក្សាពីចរន្តសាច់ប្រាក់របស់យើង បើសិនជារកឃើញថា លំហូរសាច់ប្រាក់របស់យើងមិនរលូន និងមិនធានាបាននូវការជាប់គាំងណាមួយ មិនគួរប្រើប្រាស់ឥណទានពីធនាគារដើម្បីវិនិយោគទិញដីធ្លីនោះទេ។

ទី៥ ដីមានប្រវត្តិមិនច្បាស់លាស់

ដីមានប្រវត្តិមិនសូវច្បាស់លាស់ ច្រើនជាដីនៅខេត្តទើបមានការរីកចម្រើន និងទាក់ទាញការវិនិយោគ ដែលបច្ចុប្បន្នដីប្រភេទនេះច្រើនមាននៅខេត្តមណ្ឌលគិរី កំពង់ស្ពឺជាដើម ដោយសារមានមន្ត្រីខិលខូចមួយចំនួន បានចេញប្លង់ដីត្រួតលើគ្នា ដែលដីខ្លះមានប្លង់កាន់កាប់រហូតដល់៤ទៅ៥នាក់ក៏មាន។

បញ្ហានេះកើតមានមួយផ្នែក ដោយសារការចុះដីធ្លីជាលក្ខណៈប្រព័ន្ឋមិនទាន់បានបញ្ចប់ ប៉ុន្តែយ៉ាងណាបញ្ហាចម្បងជាងគេ គឺមន្ត្រីខិលខូចបានដឹងរឿងហើយ នៅតែបន្តបំពាន និងឃុបខិតគ្នាចេញប្លង់ជាន់លើគ្នា ជាថ្នូរនឹងផលប្រយោជន៍៕

តើតម្លៃអចលនទ្រព្យនៅទីក្រុងណា ដែលត្រូវបានព្យាករណ៍ថាមានតម្លៃកើនឡើងខ្ពស់ជាងគេ

ដោយៈសហការី

ពិភពលោកៈ តំលៃអចលនទ្រព្យនៅក្នុងទីក្រុងចំនួន២ គឺទីក្រុងក្រុង Cape Town និងទីក្រុង Shanghai នឹងកើនឡើង៥ដងនៅក្នុងឆ្នាំ ២០២១ខាងមុខនេះ ព្រោះតម្រូវការ លំនៅឋានមានការកើនឡើងខ្ពស់ ប៉ុន្តែការផ្គត់ផ្គង់នឹងស្ថិតនៅក្នុងសភាពទ្រឹងក្នុងទីក្រុងCape Town និងធ្លាក់ចុះបន្តិចនៅសៀងហៃ។

យោងតាមការព្យាករណ៍ពិភពលោកចុងក្រោយ ដែលបានចេញផ្សាយកាលពីថ្ងៃច័ន្ទដោយក្រុមហ៊ុន Knight Frank បានអោយដឹងថា នៅឆ្នាំក្រោយនេះ ទីក្រុងចំនួន២០ ក្នុងចំណោមទីក្រុង២២ ត្រូវបានគេរំពឹងថាតម្លៃនៅតែមានស្ថានភាពដដែល ឬកើន២ ភាគរយ។

ទោះបីជាមានភាពចលាចលផ្នែកហិរញ្ញវត្ថុ ដែលបណ្តាលមកពីការឆ្លងរាលដាលនៃជំងឺឆ្លងកូវីដ១៩ក៏ដោយ ក៏ទីផ្សារអចលនទ្រព្យមានភាពរឹងមុំាង និងគាំទ្រដោយកម្ចីដែលមានតម្លៃទាប។

របាយការណ៍ដដែលន្តថា នៅក្នុងទីក្រុងឡុងដ៍នាពេលបច្ចុប្បន្ននេះ អ្នកទិញកំពុងទទួលបានអត្ថប្រយោជន៍ពីថ្ងៃឈប់សម្រាក ពន្ធត្រា ដែលកាត់បន្ថយពន្ធលើការលក់លំនៅឋានរហូតដល់ ៥០០,០០០ផោន (៦៦៦,៤២៧ ដុល្លារអាមេរិក) មានការកើនកើនឡើង ៤ភាគរយ ដែលជួយដល់ការកាត់បន្ថយពន្ធបន្ថែមលើតម្រូវការ និងមូលដ្ឋានគ្រឹះទីផ្សារក្រុមហ៊ុន។

លោក Tom Bill ប្រធានផ្នែកស្រាវជ្រាវលំនៅដ្ឋាននៅទីក្រុងឡុងដ៍ នៃក្រុមហ៊ុន Knight Frank បានឱ្យដឹងថា ទីក្រុងនេះហួសរយៈពេលនៃការកើនឡើង តម្លៃអចលនទ្រព្យ និងជាពិសេសទីក្រុងនេះ នឹងទទួលបានអត្ថប្រយោជន៍ពីរលក នៃតម្រូវការពីអ្នកវិនិយោគអន្តរជាតិផងដែរ ដោយសារការធ្វើដំណើរ និងការដាក់ឲ្យនៅដាច់ពីគេត្រូវបានបន្ធូរបន្ថយ។

ដោយឡែក នៅក្នុងទីក្រុង Vancouver និងទីក្រុង Miami ការកើនឡើងនៃសកម្មភាពលក់ ដែលមើលទៅដូចជាត្រៀមខ្លួនជាស្រេច ក្នុងការធ្វើឱ្យតតម្លៃអចលនទ្រព្យកើន ៣ភាគរយ និង ៤ភាគរយនៅឆ្នាំ២០២១ នៃទីក្រុងនីមួយ។

នៅក្នុងទីក្រុង Monaco នឹងកើនឡើង៣ភាគរយនៅឆ្នាំក្រោយនេះ ព្រោះមានការចាប់អារម្មណ៍ពីអ្នកទិញ ប៉ុន្តែនៅក្នុងរយៈពេលចុងក្រោយនេះ នៃទីផ្សារត្រូវបានរងផលប៉ះពាល់ដោយអ្នកទិញអន្តរជាតិជាច្រើន មិនអាចធ្វើដំណើរបាន ខណៈតម្លៃអចលនទ្រព្យនៅទីក្រុងញូវយ៉ក ដែលនៅពេលនេះត្រូវបានគេព្យាករណ៍ថា នឹងធ្លាក់ចុះ៣ភាគរយ និងបន្តធ្លាក់ចុះនៅឆ្នាំ២០២១ ៕

សញ្ញវិជ្ជមាន! ពាណិជ្ជកម្មកម្ពុជា-អាមេរិក សម្រេចបានទំហំទឹកប្រាក់ ៦១៥លានដុល្លារនៅដើមឆ្នាំនេះ

ដោយៈ ម៉ាណេត

ភ្នំពេញៈ ពាណិជ្ជកម្មទ្វេភាគីរវាងកម្ពុជា និងអាមេរិក សម្រេចបានទំហំទឹកប្រាក់៦១៥លានដុល្លារក្នុងខែមករា ឆ្នាំ២០២១ កើនឡើងជិត៥% ធៀបនឹងរយៈពេលដូចគ្នាកាលពីឆ្នាំមុន។ នេះបើតាមទិន្នន័យពីការិយាល័យជំរឿនរបស់សហរដ្ឋអាមេរិក ចេញផ្សាយកាលពីពេលថ្មីៗនេះ។

ការនាំចេញទៅសហរដ្ឋអាមេរិក ខែមករាឆ្នាំ២០២១នេះ មានទំហំជាទឹកប្រាក់ ៥៨០.៦លានដុល្លារ និងការនាំទំនិញពីអាមេរិកមកកម្ពុជាវិញ មានទំហំប្រមាណ ៣៣.៩លានដុល្លារ។

កំណើននៃការដោះដូរពាណិជ្ជកម្មនេះ ត្រូវបានគេមើលឃើញថា ជាឱកាសសម្រា ប់ជំរុញកំណើនវិនិយោគ មកកាន់កម្ពុជាឲ្យកាន់តែច្រើន ដើម្បីផលិតនាំចេញទៅសហរដ្ឋអាមេរិក។

លោក ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្មបានថ្លែងថា ទោះជាប្រឈមនឹងវិបត្តិជំងឺកូវីដ-១៩ ដែលកំពុងបង្កផលប៉ះពាល់ដល់ការធ្វើពាណិជ្ជកម្ម និងរបៀបរបបរស់នៅរបស់ប្រទេសទាំងអស់នៅលើពិភពលោក ទំហំពាណិជ្ជកម្មរវាងប្រទេសទាំងពីរនៅតែមានការកើនឡើងកាលពីឆ្នាំកន្លងទៅ។

លោកបន្តថា “កម្ពុជាបានចូលនិងកំពុងសិក្សា ចូលជាសមាជិកនៃសន្ធិសញ្ញាអន្តរជាតិ ពាក់ព័ន្ធនឹងកម្មសិទ្ធិបញ្ញាសំខាន់ៗជាច្រើនទៀត ក៏ដូចជាកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការបន្តកិច្ចសម្រួលពាណិជ្ជកម្ម ដែលថ្មីៗនេះបានដាក់ឱ្យដំណើរការនូវប្រព័ន្ធចុះបញ្ជីអាជីវកម្ម តាមប្រព័ន្ធព័ត៌មាន (CamDX) សំដៅសម្រួលការចុះបញ្ជីពអាជីវកម្ម និងទាក់ទាញវិនិយោគបន្ថែមទៀត” ។

លោកប៉ាន សូរស័ក្តិបានបន្តថា កម្ពុជា និងអាមេរិកក៏បានពិភាក្សាផងដែរអំពីលទ្ធភាព ក្នុងការពង្រីកទំហំពាណិជ្ជកម្ម រវាងប្រទេសទាំងពីរបន្ថែមទៀត ការរៀបចំច្បាប់ និងលិខិតបទដ្ឋានគតិយុត្តិ ពាក់ព័ន្ធនឹងវិស័យឌីជីថល ការងារអាទិភាពផ្សេងទៀតពាក់ព័ន្ធនឹងការត្រៀមខ្លួន ធ្វើជាប្រធានអាស៊ានឆ្នាំ២០២២ និងបញ្ជាក់ជាថ្មីអំពីការបន្តកិច្ចសហប្រតិបត្តិការជិតស្និទ្ធបន្ថែមទៀត។

លោក Patrick Murphy ឯកអគ្គរដ្ឋទូតសហរដ្ឋអាមេរិក ប្រចាំកម្ពុជាបានថ្លែងថា កម្ពុជាអនុវត្តបានយ៉ាងល្អ ក្នុងការចូលរួមធានានូវនិរន្តភាព នៃដំណើរការអាជីវកម្ម ផលិតកម្ម និងពាណិជ្ជកម្ម តាមរយៈការដាក់ចេញនូវវិធានការ សេចក្តីណែនាំ និងតាមដានត្រួតពិនិត្យមើលការអនុវត្តរបស់រោងចក្រ និងសហគ្រាស៕

ការរៀបចំហេដ្ឋារចនាសម្ព័ន្ឋទីក្រុងកោះនរា តម្លៃ ២០០០លានដុល្លារសម្រេចបានជាង ៣០ភាគរយហើយ

ដោយស៊ីវ ម៉េង

ភ្នំពេញៈ ការរៀបចំហេដ្ឋារចនាសម្ព័ន្ឋទីក្រុងថ្មីកោះនរា ដែលបាននិងកំពុងចាក់ខ្សាច់ និងថ្មដើម្បីបំពេញគ្រឹះរបស់ទីក្រុងនេះ សម្រេចបានចន្លោះ ៣០ទៅ ៣៥ភាគរយហើយគិតរហូតមកទល់ពេលនេះ។

អគ្គនាយករងក្រុមហ៊ុន OCIC លោកទូច សំណាង បានមានប្រសាសន៍ឲ្យដឹងតាមទូរស័ព្ទឲ្យដឹងកាលពីពេលថ្មីៗនេះថា សកម្មភាពកសាងមូលដ្ឋានគ្រឹះ នៃហេដ្ឋារចនាសម្ព័ន្ឋនានាសំរាប់ទីក្រុងកោះនរា កំពុងឆ្ពោះទៅមុខយ៉ាងសកម្ម ដោយមិនមានចំណុចណារអាក់រអួលនោះទេ ដោយគិតពីពេលចាប់ផ្តើមរហូតមកទល់ពេលនេះ ការសាងសង់ហេដ្ឋារចនាសម្ព័ន្ឋបានសម្រេចតាមផែនការ។

លោកបន្តថា “ផែនការមេនៃការអភិវឌ្ឍទីក្រុងនេះបាន និងកំពុងដំណើរការ តាមផែនការ ប៉ុន្តែដោយសារវិបត្តិនៃជំងឺ Covid-19 បានធ្វើឲ្យអ្នកវិនិយោគជាតិ អន្តរជាតិកំពុងផ្អាកសកម្មភាពេរបស់ពួកគេ” ។ លោកបន្តថា “ទស្សនទាននៃការអភិវឌ្ឍទីក្រុងកោះនរា មានភាពស្រដៀងគ្នា នឹងទីក្រុងកោះពេជ្រនាពេលបច្ចុប្បន្ននេះ ដោយវានឹងក្លាយជាទីក្រុងរណបមួយ ដែលនឹងរួចចំណែកអភិវឌ្ឍន៍សេដ្ឋកិច្ចកម្ពុជា” ។

ក្នុងកំឡុងពិធីបើកការដ្ឋានសម្ភោធការដ្ឋាន សាងសង់ស្ពានតភ្ជាប់ពីទីក្រុងកោះពេជ្រ និងទីក្រុងកោះនរា និងស្ពានតភ្ជាប់ជាមួយផ្លូវជាតិលេខ១ អ្នកឧកញ៉ា ពុង ឃាវសែប្រធានក្រុមប្រឹក្សាភិបាល ក្រុមហ៊ុន OCIC បានមានប្រសាសន៍ថា ការអភិវឌ្ឍទីក្រុងកោះនរា នឹងផ្តល់ចំណូលចូលដល់សេដ្ឋកិច្ចជាតិជាង ២០០លានដុល្លារ សហរដ្ឋអាមេរិកក្នុងមួយឆ្នាំ៕

អាមេរិក និងអឺរ៉ុបបន្ឋូរបន្ថយភាពតានតឹងផ្នែកពាណិជ្ជកម្ម ខណៈចិននាំមុខអាមររិកលើទំហំពាណិជ្ជកម្មជាមួយអឺរ៉ុប

ដោយៈ ប៊ី

ភ្នំពេញៈសហរដ្ឋអាមេរិក និងសហភាពអឺរ៉ុប បានយល់ព្រមពន្យាពេលរយៈពេល៤ខែលើពន្ធគយទាំងអស់ ដែលទាក់ទងទៅនឹងជម្លោះដ៏រ៉ាំរ៉ៃ លើការឧបត្ថម្ភធនដល់ក្រុមហ៊ុន Boeing របស់សហរដ្ឋអាមេរិក និងក្រុមហ៊ុន Airbus របស់អឺរ៉ុប។ នេះបើយោងតាមការចេញផ្សាយផ្សាយរបស់សាវព័ត៌មាន CNN នៅថ្ងៃទី៦ ខែមីនា ឆ្នាំ២០២១ ។

ពន្ធគយ ដែលត្រូវបានផ្អាកនេះ ជាជំហានដំបូងឆ្ពោះទៅរកការផ្សះផ្សាភាពជាដៃគូពាណិជ្ជកម្មឆ្លងមហាសមុទ្រអាត្លង់ទិក ដែលមានភាពតានតឹងជិត១៧ឆ្នាំ ដោយពាក្យបណ្តឹងទាំងសងខាង អំពីការឧបត្ថម្ភធនដល់ក្រុមហ៊ុនផលិតយន្តហោះពាណិជ្ជកម្ម ឈានមុខគេនៅលើពិភពលោកទាំងពីរ។

ការដាក់ពន្ធគយនេះ បានប៉ះពាល់ដល់ការនាំចេញរបស់អឺរ៉ុបទៅអាមេរិក ដែលមានទំហំទឹកប្រាក់ ៧,៥ពាន់លានដុល្លារ និងការនាំចេញរបស់សហរដ្ឋអាមេរិកទៅកាន់អឺរ៉ុបមានតម្លៃ ៤ពាន់លានដុល្លារ។

លោក Valdis Dombrovskis ប្រធានផ្នែកពាណិជ្ជកម្មនៃគណៈកម្មការអឺរ៉ុបបាននិយាយនៅក្នុងសេចក្តីថ្លែងការណ៍មួយថា “នេះគឺជាការចាប់ផ្តើមឡើងវិញនូវទំនាក់ទំនងរបស់យើងជាមួយដៃគូដ៏សំខាន់ និងសេដ្ឋកិច្ចរបស់យើង” ។

លោកបានថ្លែងថា “ការលុបចោលពន្ធគយទាំងនេះ គឺនយោបាយឈ្នះ-ឈ្នះ សម្រាប់ភាគីទាំងពីរ នៅពេលដែលជំងឺរាតត្បាតសកល កំពុងធ្វើឱ្យប៉ះពាល់ដល់អ្នកធ្វើការ និងសេដ្ឋកិច្ចរបស់យើង” ។

កិច្ចព្រមព្រៀងនេះធ្វើឡើងមួយថ្ងៃ បន្ទាប់ពីសហរដ្ឋអាមេរិក បានចុះកិច្ចព្រមព្រៀងស្រដៀងគ្នា ជាមួយចក្រភពអង់គ្លេស ដើម្បីព្យួរពន្ធលើផលិតផលអង់គ្លេស រួមទាំងស្រា Scotch whisky ។

ជម្លោះក្រុមហ៊ុនផលិតយន្តហោះធំបំផុតទាំងពីរ លើពិភពលោកនេះកើតតាំងពីឆ្នាំ២០០៤ នៅពេលដែលអាជ្ញាធរសហភាពអឺរ៉ុបបានអះអាងថា ក្រុមហ៊ុន Boeing បានទទួលឧបត្ថម្ភធនចំនួន ១៩ពាន់លានដុល្លារពីរដ្ឋាភិបាល ហើយនេះគឺជាឧបត្ថម្ភធនមិនភាពស្មោះត្រង់ សម្រាប់ការប្រកួតប្រជែងលើទីផ្សារអន្តរជាតិ។

រដ្ឋាភិបាលសហរដ្ឋអាមេរិក បានដាក់ពាក្យបណ្តឹងស្រដៀងគ្នានេះដែរ នៅឆ្នាំនោះ ជុំវិញការឧបត្ថម្ភធនរបស់អឺរ៉ុបទៅក្រុមហ៊ុន Airbus ៕