ស្ថាបត្យកម្មនិងជីវិតជះឥទ្ឋិពលបែបណាក្នុងសង្គមសេដ្ឋកិច្ច និងបែបផែននៃការរស់នៅ

ដោយៈស៊ីវ ម៉េង

ភ្នំពេញៈ វិស័យអចលនទ្រព្យនៅកម្ពុជា បាននាំឲ្យមានការផ្លាស់ប្តូរយ៉ាងខ្លាំងនៅរាជធានីភ្នំពេញ សៀមរាប និងខេត្តព្រះសីហនុ ក្នុងរយៈពេលប្រមាណមួយទសវត្សចុងក្រោយនេះ។

អគារចាស់ៗមួយចំនួន ត្រូវបានកែលម្អនិងជួលសារជាថ្មីឡើងវិញ ខណៈដែលអគារខ្លះទៀតត្រូវបានបំផ្លាញទាំងស្រុងដើម្បីទុកកន្លែងទំនេរថ្មីៗ។

ប៉ុន្តែទាំងនេះ មិនមែនជារឿងងាយស្រួលនោះទេ ក្នុងការរចនាម៉ូតស័ក្តិសមជាព្រះរាជាណាចក្រអច្ឆរិយៈទេ។

ខណៈដែលឥទ្ធិពលរបស់បស្ចិមប្រទេស កំពុងបញ្ចេញនូវទស្សនវិជ្ជារចនាលើគម្រោងថ្មីៗ ក៏បានមានការលេចទ្បើងទន្ទឹមគ្នា ដែលមានការទាក់ទាញ និងបំផុសគំនិតប្រវត្តិសាស្រ្តដ៏យូរលង់ និងសំបូរបែបរបស់ប្រទេសកម្ពុជា ដែលបានគេឲ្យឈ្មោះថាជា គឺស្ថាបត្យកម្មបែបថ្មី។

ស្ថាបត្យកម្មបែបថ្មីនេះ គឺជាទស្សនៈនៃការរចនាដែលបង្កើតឡើងដោយលោកស្រី Helen Grant Ross និងលោក Darryl Leon Collins នៅក្នុងសៀវភៅរបស់ពួកគាត់ “Building Cambodia: the New Khmer Architecture” ដែលបានបោះពុម្ពនៅឆ្នាំ២០០២។

បំល្លាស់ប្តូរនេះត្រូវបានពិពណ៌នាថា ជាការរួមបញ្ចូលគ្នានូវគោលការណ៍ទំនើប ដែលបានបង្កើតឡើងនៅភាគខាងលិច ជាមួយនឹងការរចនាបែបបុរាណរបស់ខ្មែរ ដែលមានតាំងពីបុរាណកាល រហូតដល់ស្ថាបត្យកម្មសម័យអង្គរ (ឧទាហរណ៍ប្រាសាទអង្គរវត្ត) ។

ការចាប់ផ្ដើមនៃស្ថាបត្យកម្មបែបថ្មី
បើទោះបីជាគំហើញនេះ មិនទាន់ហៅឈ្មោះជាផ្លូវការថាជា ស្ថាបត្យកម្មបែបថ្មី ក៏ដោយ ប៉ុន្តែវាត្រូវបានគេមើលឃើញថា បានចាប់ផ្ដើមតាំងពីកំឡុងឆ្នាំ១៩៥០មកម្ល៉េះ ក្រោយពេលប្រទេសកម្ពុជា ទទួលបានឯករាជ្យពីបារាំង រហូតដល់កំឡុងឆ្នាំ១៩៧០ មុនពេលសង្គ្រាមស៊ីវិលចាប់ផ្ដើម។

ស្ថិតនៅក្រោមការឧបត្ថម្ភ និងចក្ខុវិស័យរបស់អតីតសម្តេចព្រះនរោត្តម សីហនុ ដែលបានចាប់ផ្តើម ក្នុងការអភិវឌ្ឍទីក្រុងរបស់ប្រទេសកម្ពុជា ក្នុងទសវត្សឆ្នាំ១៩៥០ ។ បញ្ញវន្តខ្មែរជាច្រើន ជាពិសេសអ្នកដែលបានសិក្សា នៅបរទេសបានមកយកបទពិសោធន៍ និងចំណេះដឹងអំពីបេតិកភណ្ឌខ្មែរ ដើម្បីជួយអភិវឌ្ឍន៍ប្រទេសកម្ពុជា។

ជាពិសេសស្ថាបត្យករ បានក្លាយជាមនុស្សសំខាន់ ក្នុងការសម្រេចចក្ខុវិស័យរបស់ព្រះមហាក្សត្រ។

ចំនុចនេះហើយដែលបានបញ្ជាក់ថា លោក វណ្ណ ម៉ូលីវណ្ណ ជាបុរសដែលកំណត់ និងរៀបចំប្លង់មេ នៃរាជធានីភ្នំពេញ សម្រាប់ពាក់កណ្តាលសតវត្សបន្ទាប់។

លោក វណ្ណ ម៉ូលីវណ្ណ គឺជាសសរស្តម្ភមួយ នៅក្នុងប្រវត្តិសាស្ត្រស្ថាបត្យកម្មរបស់ព្រះរាជាណាចក្រកម្ពុជា។ គាត់ជាបុគ្គលមួយរូបដែលលេចធ្លោបំផុត ក្នុងនាមជាស្ថាបត្យកររដ្ឋក្រោមការ ដឹកនាំរបស់ព្រះមហាក្សត្រ។

លោក ម៉ូលីវណ្ណ បានរៀបចំប្លង់រចនាសម្ពន្ធ័ជាច្រើននៅក្នុង ប្រទេសកម្ពុជា រួមមានអគារពហុកីឡាជាតិ សាលសន្និសិទចតុមុខ និងវិមានឯករាជ្យ និងស្នាដៃសំណង់ជាច្រើនទៀត រហូតទទួលបានងារជាស្ថាបត្យករលេចធ្លោជាងគេនៅកម្ពុជា។

ស្ថាបត្យកម្មបែបថ្មីនាបច្ចុប្បន្ន
យោងតាមអត្ថបទ គម្រោងលោកវណ្ណ ម៉ូលីវណ្ណ ដែលជាឯកសារ និងអត្ថបទសិក្សាអំពីស្នាដៃរបស់លោកវណ្ណម៉ូលីវណ្ណ និងស្ថាបត្យកម្មបែបទំនើបដទៃទៀត ស្ថាបត្យកម្មបែបថ្មីអាចត្រូវបានកំណត់លក្ខណៈ ដូចជា ការប្រើប្រាស់បេតុង។ ឯកសារយោងទាក់ទងទៅនឹង បច្ចេកទេសសំណង់នៅកម្ពុជាដែលមានស្រាប់។ ការបង្កើតលំហូរខ្យល់ធម្មជាតិ និងការដាក់ស្រមោលស្រប តាមអាកាសធាតុត្រូពិករបស់ប្រទេសកម្ពុជា។ ការប្រើគ្រឿងលំអ ដោយបំផុសគំនិតនៃការតុបតែងបែបប្រាសាទអង្គរ។

បច្ចុប្បន្ននេះ ស្ថាបត្យកម្មបែបថ្មីនេះ កំពុងបង្ហាញខ្លួនសារជាថ្មីម្ដងទៀតនៅក្នុងវិស័យ ស្ថាបត្យកម្ម និងសំណង់របស់ប្រទេសកម្ពុជា។ ក្រុមហ៊ុន The Room Design Studio ដែលត្រូវបានគែស្គាល់ថាជាក្រុមហ៊ុនស្ថាបត្យកម្ម និងរចនាផ្នែកខាងក្នុង ដែលនាំយកនូវគំនិតនៃការរចនាម៉ូដឈានមុខគេនិងលក្ខណៈទំនើបមកប្រទេសកម្ពុជា៕

លោកសាស្រ្តាចារ្យទួស សាភឿនស្ថាបត្យករអាស៊ាន និងជាអគ្គលេខាធិការរងគណៈស្ថាបត្យករកម្ពជាបានមានប្រសាសន៍ថា ការរីកចម្រើននៃសេដ្ឋកិច្ចសង្គម បានផ្លាស់ប្តូរបែបផែននៃការរស់នៅរបស់ប្រជាជនកម្ពុជា ពិសេសការកើនឡើងនូវកំដៅផែនដី ដែលបណ្តាលមកពីការផ្លាស់ប្តូរអាកាសធាតុ បានធ្វើឲ្យស្ថាបត្យករចាប់ផ្តើមគិតគូពីលំនៅដ្ឋានបែបបៃតង មានន័យថាសាងសង់លំនៅដ្ឋានផ្សារភ្ជាប់ជាមួយធម្មជាតិ។

លោកបន្តថា “ការសាងសង់លំនៅដ្ឋាននាពេលបច្ចុប្បន្ន ដែលផ្សារភ្ជាប់ជាមួយធម្មជាតិ ជាលំនៅដ្ឋានបែបបៃតង កាត់បន្ថយការប្រើប្រាស់អគ្គិសនី ជាបែបផែននៃស្ថាបត្យកម្មសម័យថ្មី និងជារសនិយមថ្មីមួយ”៕

 

ក្រសួងសាធារណការកំពុងត្រៀមអនុវត្តន៍ប្រព័ន្ឋបច្ចេកវិទ្យាដើម្បីគ្រប់គ្រង រថយន្តដឹកលើសទម្ងន់

ដោយៈសុខហេង

ភ្នំពេញៈ ក្រសួងសាធារណការ និងដឹកជញ្ជូនបាននិងកំពុងដាក់ចេញនូវការអនុវត្តគំរោងបច្ចេកវិទ្យាទំនើប ដើម្បីគ្រប់គ្រងយានយន្តដឹកលើសទម្ងន់កំណត់ នៃផ្លូវជាតិលេខ៥ ដែលបាននិងកំពុងស្ថាបនា។

កិច្ចប្រជុំនេះដឹកនាំដោយលោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាប្រធានក្រុមការងារបច្ចេកទេស ដើម្បីដឹកនាំអនុវត្តគម្រោងទំនើបកម្មប្រព័ន្ធបច្ចេកវិទ្យា គ្រប់គ្រងយានយន្តដឹកជញ្ជូនលើសទម្ងន់កម្រិតកំណត់ លោកឈឹម ផល្លា ប្រធាននាយកដ្ឋានផ្លូវថ្នល់ និងលោកMakoto Usami ប្រធានគម្រោងនៃក្រុមហ៊ុន P.E.Jp (Civil Engineering) នៃគម្រោងធ្វើឱ្យប្រសើរឡើងផ្លូវជាតិលេខ៥។

កិច្ចពិភាក្សានេះ បានផ្តោតសំខាន់លើការប្រើប្រាស់ ប្រព័ន្ធបច្ចេកវិទ្យាសម្រាប់សម្រួល ដល់ការគ្រប់គ្រងយានយន្តដឹកជញ្ជូនលើសទម្ងន់កម្រិតកំណត់។

នេះជាគំនិតផ្តួចផ្តើម ក្រោមការចង្អុលបង្ហាញរបស់ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដើម្បីសម្រួលដល់ក្រុមការងារត្រួតពិនិត្យ ងាយស្រួលតាមដាន រីឯប្រជាពលរដ្ឋ និងក្រុមហ៊ុនដឹកជញ្ជូន ក៏មានភាពងាយស្រួល ក្នុងការទទួលបានដំណឹង ពីទម្ងន់យានយន្តរបស់ខ្លួននៅតាមដងផ្លូវភ្លាមៗផងដែរ។

លោកឈឹម ផល្លាបានធ្វើការសាទរចំពោះការរៀបចំ ជ្រោមជ្រែងទៅលើចក្ខុវិស័យផ្តល់គុណតម្លៃ ដល់ការធានាអាយុកាលយូរអង្វែង ដល់ផ្លូវថ្នល់សាធារណៈជាប្រយោជន៍សាធារណៈ និងសេដ្ឋកិច្ចជាតិ ដែលផ្លូវនីមួយៗ ទំរាំធ្វើការស្ថាបនាឡើងបាន ពិជាត្រូវឆ្លងកាត់ដំណាក់កាលលំបាកៗជាច្រើន និងចំណាយធនធានថវិកាដ៏សន្ធឹកសន្ធាប់។

ជាមួយគ្នានេះ លោក Makoto Usami ក៏បានវាយតម្លៃខ្ពស់លើបច្ចេកថ្មីរបស់ក្រសួងសាធារណការ និងដឹកជញ្ជូន ដោយប្រើប្រាស់ជញ្ជីង និងកាមេរ៉ាស្វ័យប្រវត្តិ (AI Camera and Weigh in Motion Sensor) ហើយលោកក៏បានចែករំលែកបទពិសោធន៍ នៃការប្រើប្រាស់ជញ្ជីងស្វ័យប្រវត្តិកន្លងមក។

លោក Makoto Usami នឹងលើកយកប្រើប្រាស់បច្ចេកវិទ្យា គ្រប់គ្រងយានយន្តដឹកជញ្ជូនលើសទម្ងន់កម្រិតកំណត់ AI Camera and Weigh in Motion Sensor Centralized Database Solution System របស់ក្រសួងសាធារណការ និងដឹកជញ្ជូន ពិភាក្សាជាមួយភាគីពាក់ព័ន្ធ លើគម្រោងធ្វើឱ្យប្រសើរឡើងផ្លូវជាតិលេខ៥៕

ការសិក្សាៈ ខ័ណ្ឌច្បារអំពៅឈរលំដាប់២ក្នុងការផ្គត់ផ្គង់លំនៅហដ្ឋានផ្ទាល់ដី

ដោយៈ ម៉ាណេត

ភ្នំពេញៈ ខ័ណ្ឌច្បារអំពៅ ដែលស្ថិតនៅម្ខាងទៀតនៃទីក្រុងភ្នំពេញ ឈរនៅលេខរៀងទី២ សម្រាប់ការផ្គត់ផ្គង់លំនៅហដ្ឋានផ្ទាល់ដីនាពេលបច្ចុប្បន្ន បន្ទាបពីខ័ណ្ឌសែនសុខ ជាជម្រើសទី១ សម្រាប់គម្រោងអភិវឌ្ឍលំនៅដ្ឋានផ្ទាល់ដីជាច្រើន។ នេះបើយោងតាមការសិក្សារបស់ក្រុមហ៊ុន CBRE Cambodia ចេញផ្សាយកាលពីថ្មីៗនេះ។

ខ័ណ្ឌដែលមានលក្ខណៈជ្រោយកោះមួយនេះ ជាទីដៅប្រកបដោយភាពពេញនិយម សម្រាប់អ្នកអភិវឌ្ឍបុរី។ ទោះបីជាយ៉ាងណាក៏ដោយ ខ័ណ្ឌដង្កោរ នឹងវ៉ាដាច់ខ័ណ្ឌច្បារអំពៅ សម្រាប់ការផ្គត់ផ្គង់លំនៅដ្ឋាន បើសិនជារាល់គម្រោងដែលត្រូវបានចុះបញ្ជីរទាំងអស់ក្នុងខ័ណ្ឌមួយនេះ ត្រូវបានបញ្ចប់។

អ្នកជំនាញបាលើកឡើងថា ចំណូលចិត្តសម្រាប់គេហដ្ឋានផ្ទាល់ដី ក្នុងចំណោមប្រជាជនកម្ពុជា កំពុងធ្វើឱ្យមានប្រជាប្រិយភាព សម្រាប់ការរស់នៅឯជាយក្រុង ហើយប្រជាប្រិយភាពនេះ នឹងនៅតែបន្តរហូតដល់អនាគតកាល ដែលគេអាចសម្លឹងមើលឃើញ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងកាលពីពេលថ្មីៗនេះថា ទីផ្សារលំនៅដ្ឋាននៅតែមានសក្តានុពលនៅឡើយ ទោះបីវិបត្តិជំងឺកូវីដក្តី ប៉ុន្តែចរន្តនៃការទិញលក់នៅតែមានភាពល្អប្រសើរ បើទោះជាមិនមានកំនើនខ្ពស់ដូចកំឡុងមុនវិបត្តិកូវីដ១៩ក្តី។

លោកបន្តថា “ដោយឡែកបញ្ហាហេដ្ឋារចនាសម្ព័ន្ឋ ដែលងាយស្រួលតភ្ជាប់មកនាន់រាជធានី បានធ្វើឲ្យតំបន់ច្បារអំពៅ មានភាពររីកចម្រើនទាំងលំនៅដ្ឋាន មជ្ឈមណ្ឌលពាណិជ្ជកម្ម ផ្សារទំនើប ស្របពេលកំណើនប្រជាសាស្ត្រកើនឡើង ជាប្រចាំនៅតំបន់នេះ។ លោកបន្តថា “កំនើននៃការទិញលក់បុរី ដោយសារលក្ខខ័ណ្ឌបង់ប្រាក់កាន់តែងាយស្រួល ពិសេសមានការគាំទ្រពីធនាគារកាន់តែច្រើន” ។

ជាមួយគ្នានេះ លោកស្រីតាំង ហួរអគ្គនាយិការក្រុមហ៊ុនភ្នាក់ងារអចលនទ្រព្យAMATAK Property Srevice បានមានប្រសាសន៍ថា តំបន់ផ្លូវជាតិលេខ១ រាប់ចាប់គិតពីចំណុចគល់ស្ពានព្រះមុនីវង្ស (ស្ពានច្បារអំពៅ) រហូតដល់តំបន់ផ្សារព្រែកឯងស្ទើរតែមិនមែនជាតំបន់ជាយក្រុងទៀតនោះទេ ហើយក៏បានក្លាយជាផ្លូវក្រវ៉ាត់ក្រុង យ៉ាងសំខាន់ ដែលមានកំណើនប្រជាជន កម្រិតមធ្យមរស់នៅច្រើន និងជម្រុញឱ្យចរន្តសេដ្ឋកិច្ចនៅក្នុងតំបន់កាន់តែល្អប្រសើរជាងមុន។

លោកស្រីបន្តថា “គម្រោងសំណង់ធំៗ នៅតំបន់នេះភាគច្រើនជាប្រភេទ គម្រោងអភិវឌ្ឍន៍លំនៅដ្ឋានដែលមានតម្លៃមធ្យម និងកំពុងមានតម្រូវការទីផ្សារខ្ពស់ នៅពេលបច្ចុប្បន្ន និងបន្តទៅថ្ងៃអនាគត”។

ក្នុងរយៈពេល៦ខែ ឈានទៅឆមាសទី១ឆ្នាំ២០២១នេះ គម្រោងចំនួន២១ហើយ បានចាប់ផ្ដើមសម្ភោធ នៅក្នុងខ័ណ្ឌចំនួន៩ផ្សេងៗគ្នា សម្រាប់វិស័យអចលនទ្រព្យផ្ទាល់ដីនៅឯទីក្រុងភ្នំពេញ។

របាយការណ៍របស់CBRE ក៏បានប៉ាន់ប្រមាណដែរថា គម្រោងទាំង២១នេះនឹងបង្កើតគេហដ្ឋានចំនួន១៥ ៥០០យូនីធ ក្នុងការផ្គត់ផ្គង់អចលនទ្រព្យផ្ទាល់ដី នៅឯទីក្រុងភ្នំពេញ។

ចាប់តាំងពីត្រីមាសទី៣ឆ្នាំ២០២០ វីឡាទោលមានការធ្លាក់ថ្លៃរហូតដល់២០.១% តាមពីក្រោយដោយផ្ទះ ជាប់ជាមួយនឹងការធ្លាក់ថ្លៃរហូតដល់១៩.៥%។ ប្រភេទអចលនទ្រព្យផ្ទាល់ដីផ្សេងទៀត ក៏ស្ថិតនៅក្នុងការប្រែប្រួល នៃការធ្លាក់តម្លៃផងដែរ ជាមួយនឹង១៦.៧%នៃផ្ទះហាង, ១៥.៤% នៃផ្ទះល្វែង និង១៣.៥%នៃវីឡាភ្លោះ៕

ADB សន្យានឹងផ្ដល់ការគាំទ្រដល់កម្ពុជាបន្ថែមពេលប្រទេសនេះងើបចេញពី ជំងឺរាតត្បាតកូវីដដ១៩

ដោយៈវឌ្ឈនៈ

ភ្នំពេញៈ ធនាគារអភិវឌ្ឍន៍អាស៊ីហៅកាត់ថា ADB បានឱ្យដឹងថា ខ្លននឹងបន្តផ្ដល់ការគាំទ្របែបយុទ្ធសាស្ត្រ ដល់ប្រទេសកម្ពុជាបន្ថែមទៀត ពេលដែលកម្ពុជាងើបចេញពីជំងឺរាតត្បាតសកល កូវីដ១៩ ។ នេះបើតាមព្រឹត្តិបត្ររបស់ធនាគារអភិវឌ្ឍន៍អាស៊ីចេញផ្សាយនៅថ្ងៃទី២៨ឧសភា ២០២១ ។

យោងតាមព្រឹត្តិបត្រដដែលនេះ បានឱ្យដឹងទៀតថា យុទ្ធសាស្ត្រចតុកោណភាពជាដៃគូប្រចាំប្រទេសរបស់ធនាគារ សម្រាប់ឆ្នាំ២០១៩-២០២៣ មានភាពស្របគ្នានឹងយុទ្ធសាស្ត្រជាតិសំខាន់ៗ រួមទាំងផែនការអភិវឌ្ឍឧស្សាហកម្មឆ្នាំ ២០១៦-២០២៥ និងយុទ្ធសាស្ត្រចតុកោណដំណាក់កាលទី៤ ឆ្នាំ២០១៩-២០២៣ផងដែរ ។

យុទ្ធសាស្ត្រភាពជាដៃគូនេះត្រូវបានអនុវត្តន៍ តាមរយៈផែនការការងារសម្រាប់ប្រតិបត្តិការប្រចាំប្រទេសឆ្នាំ ២០២១-២០២៣ ដែលរួមបញ្ចូលទឹកប្រាក់ជិត១,៣ពាន់លានដុល្លារអាមេរិក នៅក្នុងការវិនិយោគ ដែលផ្ដល់ហិរញ្ញប្បទានសម្បទាន និងកម្មវិធីគ្រប់ជ្រុងជ្រោយមួយ នៃជំនួយបច្ចេកទេសនិងការគាំទ្រផ្នែកចំណេះដឹង។

ក្នុងទិសដៅនៅថ្ងៃអនាគតរបស់ធនាគារអភិវឌ្ឍន៍អាស៊ីថា កម្មវិធីចង្អុលបង្ហាញអំពីឥណទានសម្បទានរបស់ខ្លួន សម្រាប់ឆ្នាំ ២០២១-២០២៣ រួមបញ្ចូលការវិនិយោគ ដើម្បីការផ្លាស់ប្តូរនៅក្នុងវិស័យកសិកម្ម និងធនធានមនុស្ស ធម្មជាតិ ទឹក និងហេដ្ឋារចនាសម្ព័ន្ធទីប្រជុំជន ការអប់រំ និងជំនាញថាមពលស្អាត សន្តិសុខសុខាភិបាលសម្រាប់ជំងឺកូវីដ១៩ និងការគ្រប់គ្រងវិស័យសាធារណៈ ។

 

ការវិនិយោគរបស់ធនាគារអភិវឌ្ឍន៍អាស៊ី នឹងលើកកម្ពស់ការប្រើប្រាស់បច្ចេកវិទ្យាប្រកបដោយនវានុវត្តន៍កាន់កាន់ខ្លាំង និងសង្កត់ធ្ងន់លើការអភិវឌ្ឍសមត្ថភាព នៅក្នុងមូលដ្ឋាន ដើម្បីសុខមាលភាពដ៏ល្អបំផុតរបស់ប្រជាជនកម្ពុជា។

យោងតាមរបាយការណ៍របស់ធនាគារអភិវឌ្ឍន៍អាស៊ីថា នៅក្នុងឆ្នាំ២០២០ ធនាគារអភិវឌ្ឍន៍អាស៊ី បានកៀរគរទឹកប្រាក់ចំនួន១,៩ពាន់លានដុល្លារអាមេរិក នៃការផ្ដល់សហហិរញ្ញប្បទាន ដល់គម្រោងរយៈពេលវែង និង៣,៣ពាន់លានដុល្លារ នៃការផ្ដល់សហហិរញ្ញប្បទាន តាមរយៈកម្មវិធីហិរញ្ញវត្ថុផ្នែកពាណិជ្ជកម្ម និងខ្សែច្រវ៉ាក់ផ្គត់ផ្គង់និងកម្មវិធីមីក្រូហិរញ្ញវត្ថុរបស់ខ្លួន។

សមតុល្យដែលនៅសល់ និងជំនួយបានអនុម័តលើគម្រោង មិនមែនរដ្ឋដែលមានប្រភពពីធនធានផ្ទាល់របស់ABD មានចំនួនសរុប១៤,៣ពាន់លានដុល្លារអាមេរិក គិតត្រឹមដំណាច់ឆ្នាំ២០២០កន្លងទៅ៕

ទោះបីហែលឆ្លងវិបត្តិកូវីដរយៈពេល៥ខែ ធនាគារហត្ថានៅតែមានសុខភាពរ៉ឹងមាំ

ដោយៈគង់ សូរិយា

ភ្នំពេញៈ ទោះបីកម្ពុជាកំពុងប្រឈមនឹងវិបត្តិកូវីដ១៩ អស់រយៈពេល៥ខែក្តី ប៉ុន្តែធនាគារហត្ថានៅតែមានសុខភាពរ៉ឹងមាំ ទាំងប្រាក់បញ្ញើរ ការផ្តល់ឥណទាន និងប្រាក់ចំណេញ។

លោកឧកញ៉ាហួត អៀងតុងប្រធានអគ្គនាយកធនាគារហត្ថា បានមានប្រសាសន៍ឲ្យដឹងក្នុងប្រព័ន្ឋតេឡេក្រាមកាលពីថ្ងៃទី២៨ ឧសភាកន្លងមកថា សុខភាពក្នុងវិស័យធនាគារនៅតែមានភាពរ៉ឹងមាំ ទាំងឥណទាននិងការដាក់ប្រាក់បញ្ញើរ បើទោះបីជាមិនទាន់បានធ្វើសវនកម្មក្តី។

ដោយឡែកធនាគារហត្ថានៅតែមានសុខភាពល្អប្រសើរ ហើយយើងបាននិងកំពុងត្រៀមខ្លួន ដាក់ចេញនូវសេវាកម្មថ្មីៗបន្ថែមទៀត នៅពេលបញ្ចប់វិបត្តិកូវីដ១៩នាពេលខាងមុខនេះ។

លោកឧកញ៉ាបន្តថា “យើងបានត្រៀមខ្លួនរួចហើយ ក្នុងការធ្វើបច្ចុប្បន្នភាពប្រព័ន្ឋធនាគារស្នូលរបស់យើង។ យើងធ្វើបច្ចុប្បន្នភាពឌឌីជីថលរបស់យើង និងដំឡើងបន្ថែមនូវសេវាកម្មឌីជីថលរបស់យើងផងដែរ”។

លោកបន្តថា “យើងបាននិងកំពុងវិនិយោគលើការធ្វើបច្ចុប្បន្នភាព ប្រព័ន្ឋបច្ចេកវិទ្យាទាំងអស់របស់យើង និងធ្វើយ៉ាងណាឲ្យរួចរាល់នៅពេលចប់វិបត្តិកូវីដ ដើម្បីបំរើ និងផ្តល់សេវាកម្មឲ្យបានឆាប់រហ័ស ដល់អតិថិជនរបស់យើង”។

លោកឧកញ៉ាហួត អៀងតុងបានបន្តថា ដូចបានជ្រាបស្រាប់ហើយ ទោះបីមានវិបត្តិកូវីដ១៩ក្តី ប៉ុន្តែធនាគារហត្ថារបស់យើង បានដំឡើងដើមទុនបន្ថែមទៀត ដែលការដំឡើង ទុននេះ គឺយើងចង់ពង្រីកទំហំសាច់ប្រាក់របស់យើង ចង់ពង្រីកការផ្តល់កម្ចីរបស់យើងដល់សហគ្រាសខ្នាតតូច និងមធ្យមក្នុងប្រទេសកម្ពុជា ធ្វើយ៉ាងណាឲ្យឲ្យគាត់អាចងើបឡើងវិញពីវិបត្តិនេះ ឲ្យបានលឿនតាមដែលអាចធ្វើទៅបាន។

កាលពីពេលថ្មីៗនេះ ធនាគារជាតិនៃកម្ពុជាបានអនុម័ត ឲ្យធនាគារហត្ថាពង្រីកទុន២៥លានដុល្លារបន្ថែមទៀត ដើម្បីអាចឲ្យធនាគារនេះមានលទ្ឋភាពកាន់តែច្រើន ក្នុងការផ្តល់ឥណទាន ដើម្បីចូលរួចអភិវឌ្ឍន៍សេដ្ឋកិច្ចជាតិ ជាមួយរាជរដ្ឋាភិបាលកម្ពុជា៕

 

ការស្រាវជ្រាវរ៉ុករករ៉ែនៅខេត្តរតនគិរីកើនឡើងដល់ជាង៨០កន្លែងហើយ

ដោយៈសិរី ម៉ាលីនណា

ភ្នំពេញៈ ការុករករ៉ែមាស នៅខេត្តរតនគិរីកំពុងមានវឌ្ឍនភាព ដោយបច្ចុប្បន្នចំនួនរណ្តៅ ដែលបានស្រាវជ្រាវកើនដល់ជាង៨០ទីតាំងហើយ ខណៈក្រុមហ៊ុនកាណាដា Angkor Resources Corp បានបង្ហាញថា ការរុករករ៉ែនៅកម្ពុជាដើរបានមួយជំហានធំរួចហើយ។

ក្រុមការងារជំនាញរបស់ក្រុមហ៊ុននេះ បានរកឃើញគ្រាប់មាសក្នុងរណ្ដៅ និងបណ្តុំខ្សែក្រោមដីដែលសំបូរទៅដោយរ៉ែច្រើនប្រភេទ។

ជាលទ្ធផលវិជ្ជមាននេះត្រូវបានបង្ហាញ បន្ទាប់ពីក្រុមហ៊ុនបញ្ចប់ការជីករណ្តៅចំនួន៨០ កន្លែង និងបានគូសស្ទង់លើផ្ទៃដីនៅក្នុងតំបន់Wild Boar ដែលទីតាំងអាជ្ញាបណ្ណអណ្តូងមាសរបស់ខ្លួន ក្នុងខេត្តរតនគិរី។

យោងតាមសេចក្ដីប្រកាសរបស់ក្រុមហ៊ុន កាលពីសប្តាហ៍មុនបានឲ្យដឹងថា រណ្តៅរ៉ែមាសមួយចំនួនមានផ្ទុកគ្រាប់មាស។ ដោយឡែកការគូសស្ទង់លើផ្ទៃដី ក៏បង្ហាញថា មានបណ្តុំខ្សែក្រោមដីជាច្រើន ដែលសំបូរទៅដោយរ៉ែច្រើនប្រភេទ។

លោក Dennis Ouellette អនុប្រធានផ្នែករុករករបស់ក្រុមហ៊ុនបានមានប្រសាសន៍ឲ្យដឹងថា “Angkor Resources ទទួលបានអាជ្ញាប័ណ្ណរុករករ៉ែជាច្រើន ដែលមានសក្តានុពលក្នុងការធ្វើជាកន្លែងផលិតស្ពាន់ធ័រ រ៉ែមាស និងថ្មមានតម្លៃ។

លោកបន្តថា “យើងជឿជាក់ថា អាជ្ញាប័ណ្ណអណ្តូងមាសនេះ ក៏នឹងបង្ហាញសក្តានុពលសម្រាប់រ៉ែទាំងបីប្រភេទនេះនាពេលខាងមុខ”៕

តើផែនការប្រើប្រាស់ដីធ្លីមានសារៈសំខាន់ដូចម្តេចក្នុងការអភិវឌ្ឍន៍ដោយចីរភាព

ដោយគង់ សូរិយា

ភ្នំពេញៈ ប្លង់គោលអភិវឌឌ្ឍន៍ ដែលចែងលំអិតពីផែនការប្រើប្រាស់ដីធ្លីមានសារៈសំខាន់ណាស់ ដើម្បីធ្វើឲ្យការអភិវឌ្ឍន៍នៅទីក្រុងណាមួយ ខេត្តណាមួយមានរបៀបរៀប រយ និងផ្តល់សុខមាលភាពដល់សង្គមជាតិ។

លោកបណ្ឌិតវ៉ាន់ វ៉ាតអ្នកឯកទេសផ្នែកនគរូបនីយកម្មបានមានប្រសាសន៍ឲ្យដឹងថា នៅប្រទេសរីកចម្រើននានាតែងតែគិតគូជាចម្បង លើផែនការអភិវឌ្ឍន៍ប្រកដដោយចក្ខុវិស័យ ដែលផែនការនេះធ្វើឡើង ដើម្បីបញ្ចៀសបញ្ហានាពេលអនាគត ឧទារហរណ៍ដូចជា ការកកស្ទះចរាចរណ៍ ការកសាងហេដ្ឋារចនាសម្ព័ន្ឋក្នុងទីក្រុង ព្រោះបើយើងគ្មានផែនការច្បាស់លាស់ វានឹងធ្វើឲ្យរដ្ឋាភិបាលប្រទេសនោះ ដោះស្រាយបញ្ហាដដែលៗ និងដោះស្រាយមិនចប់នោះទេ។

លោកបន្តថា “ហេតុនេះផែនការប្រើប្រាស់ដី មានសារៈសំខាន់ណាស់ ដើម្បីកំណត់តំបន់មួយថាត្រូវកសាងអ្វី អភិវឌឌ្ឍន៍អ្វី និងប្រើប្រាស់ដីបែបណា”។លោកបន្តថា “ការរៀបចំផែនការមេអភិវឌ្ឍន៍ ហេដ្ឋារចនាសម្ព័ន្ឋជារឿងចាំបាច់ផងដែរ ព្រោះកាលណាយើងមានផែនការជាក់លាក់ និងចក្ខុវិស័យច្បាស់លាស់ ការអភិវឌ្ឈន៍នឹងសម្រេចបានតាមចក្ខុវិស័យចង់បានរបស់រដ្ឋាភិបាល”។

បច្ចុប្បន្នមានតែខេត្តកណ្តាលមួយប៉ុណ្ណោះ បានបញ្ចប់ការរៀបចំប្លង់គោលអភិវឌ្ឍន៍ ប្រើប្រាស់ដីធ្លី និងផែនការហេដ្ឋារចនាសម្ព័ន្ឋ សម្រាប់បច្ចុប្បន្នដល់ឆ្នាំ២០២៥ខាងមុខ។

ជាមួយគ្នានេះ រដ្ឋាភិបាលក៏បានអនុម័តប្លង់គោលអភិវឌ្ឍនន៍ទីក្រុងភ្នំពេញ និងកំពុងរៀបចំប្លង់គោលអអភិវឌ្ឍន៍ខេត្តព្រះសីហនុ និងទីក្រុងមួយចំនួនទៀតផងដែរ។

លោកស្រីអាន សុធីតាអ្នកជំនាញអចលនទ្រព្យលំដាប់អន្តរជាតិ បានមានប្រសាសន៍ថា ទីក្រុងភ្នំពេញទោះបីជាមានផែនការអភិវឌ្ឍន៍ ឬប្លង់គោលប្រើប្រាស់រហូតដល់ឆ្នាំ២០៣៥ក្តី ប៉ុន្តែសកម្មភាពអភិវឌ្ឍន៍បច្ចុប្បន្ន មិនមានសណ្តាប់ធ្នាប់របៀបរៀបរយនោះទេ ពិសេសការសាងសង់អាគារខ្ពស់ៗ មិនបានគោរពដល់ការរក្សាគម្លាតឲ្យបានត្រឹមត្រូវ ធ្វើឲ្យបរិស្ថាន និងខ្យល់ចេញចូលបានល្អនោះទេ។

លោកស្រីបានស្នើឲ្យអ្នកជំនាញ ក៏ដូចជារដ្ឋាភិបាលគួរបែងចែកZone នៃការអភិវឌ្ឍន៍ឲ្យបានត្រឹមត្រូវ ដើម្បីបញ្ចៀសបញ្ហា និងជួយធ្វើឲ្យសុខមាលភាពសង្គមកាន់តែល្អប្រសើរនាពេលអនាគត។

លោកស្រីបន្តថា “បច្ចុប្បន្នការសាងសង់អាគារខ្ពស់ៗនៅទីក្រុងភ្នំពេញ មានរាប់រយកន្លែង ប៉ុន្តែអាគារមានលក្ខណៈជាអាគារបៃតង មានប្រមាណ២០គំរោងប៉ុណ្ណោះ”៕

ដំណឹងរីករាយៈទីបំផុតព្រលានយន្តហោះអន្តរជាតិភ្នំពេញថ្មីសម្រេច បាន៤០ភាគរយហើយ

ដោយៈគង់ ម៉ាលីន

ភ្នំពេញៈ ជាមួយនឹងល្បឿននៃការសាងសង់យ៉ាងសកម្ម ទីបំផុតព្រលានយន្តហោះអន្តតរជាតិភ្នំពេញថ្មីសម្រេចបាន៤០ភាគរយហើយ គិតត្រឹមតែឧសភានេះ។

ការសាងសង់តាមផ្នែកសំខាន់នីមួយៗ អនុវត្តន៍បានលទ្ឋផលតាមផែនការគ្រោងទុក។ នេះបើយោងតាមតាមមន្រ្តីជំនាញនៃអាកាសយានដ្ឋានអន្តរជាតិភ្នំពេញថ្មី កាលពីថ្ងៃសុក្រ កន្លងមកនេះ។តាមការគ្រោងទុក អាកាសយានថ្មីនេះនឹងសាងសង់ចប់រួចរាល់ និងដាក់ឱ្យដំណើរការនៅឆ្នាំ២០២៣ បើទោះប្រទេសកំពុងមានវិបត្តិកូវីដ១៩ ក្ដី។

ការសាងសង់មាន៣ផ្នែកសំខាន់ៗ គឺ ការសាងសង់ស្ថានីយអ្នកដំណើរ ការសាងសង់អាគារត្រួតពិនិត្យ រការគ្រប់គ្រងចរាចរណ៍យន្តហោះ និងការសាងសង់ផ្លូវយន្តហោះ (Airfield)។

ជាមួយគ្នានេះ ការសាងសង់ស្ថានីយអ្នកដំណើរ រួមមានការសាងសង់អាគារ Check-in ស្ថានីយចេញដំណើរ ស្ថានីយមកដល់អ្នកដំណើរ និងហេដ្ឋារចនាសម្ព័ន្ធគាំទ្រផ្សេងទៀតដូចជា ចំណតឡាន និងផ្លូវស្ពានចូលស្ថានីយជាដើម។

រីឯផ្នែកផ្លូវរត់របស់យន្តហោះ គឺមានការសាងសង់ដូចជាផ្លូវរត់ (Run way and Taxi Way) និងចំណតយន្តហោះ (Air Prone)។ ដោយឡែក សម្រាប់ការសាងសង់អាគារត្រួតពិនិត្យចរាចរណ៍យន្តហោះ (Traffic Control Center) គឺនឹងសាងសង់ជាអគារកម្ពស់ជាង១០០ម៉ែត្រផងដែរ។

ក្រុមហ៊ុន OCIC ក៏បាននឹងកំពុងពន្លឿនការងារជីកប្រព័ន្ធប្រឡាយ ដើម្បីរំដោះទឹក ចូលទៅក្នុងបឹងធម្មជាតិ ក៏ដូចជាការងារទូទាត់សំណងជូនពលរដ្ឋ ដែលរងផលប៉ះពាល់ពីគម្រោងផងដែរ។ ជាក់ស្ដែងកាលពីថ្មីៗនេះ ក៏ទើបតែផ្ដល់ផ្ទះជូន ១៧១ គ្រួសារ នៅទីតាំងថ្មី។

អ្នកឧកញ៉ាពុង ឃាវសែ ប្រធានក្រុមហ៊ុន OCIC ធ្លាប់បានឱ្យដឹងថា ការដ្ឋានសាងសង់ព្រលានយន្តហោះភ្នំពេញថ្មី គ្រោងនឹងសម្រេចឱ្យបាន៥០% នៅចុងឆ្នាំ ២០២១ នេះ។

គម្រោងអាកាសយានដ្ឋានអន្តរជាតិភ្នំពេញថ្មី ត្រូវបានប្រកាសឡើងកាលពីឆ្នាំ២០១៨ ជាមួយនឹងទុនវិនិយោគ១,៥ពាន់លានដុល្លារ។ បច្ចុប្បន្ន កំពុងសាងសង់នៅលើផ្ទៃដី ២ ៦០០ ហិកតា នៅខេត្តកណ្ដាល។

តាមផែនការគម្រោងនេះ បែងចែកការអភិវឌ្ឍន៍ជា៣ដំណាក់កាល ដោយដំណាក់កាលទី១ ចាប់ពីឆ្នាំ២០១៨ ដល់ ឆ្នាំ២០២០៣ ដំណាក់កាលពីទី២ ពីឆ្នាំ២០២៤ ដល់ ឆ្នាំ២០៣០ និងដំណាក់កាលទី៣ គឺដល់ឆ្នាំ២០៥០ខាងមុខនេះ៕

 

តម្លៃផ្ទះមួយទឹកនៅក្រុងហុងកុង អាចហក់ឡើងដល់កម្រិតខ្ពស់បំផុត មិនធ្លាប់មាន

សុខុម

ហុងកុង: តម្លៃផ្ទះមួយទឹកក្នុងក្រុងហុងកុង នៅពេលនេះបានឈានដល់កម្រិតប្រហាក់ប្រហែលនឹងកម្រិត ក្នុងសម័យមុនពេលផ្ទុះមហាបាតុកម្ម ហើយអាចនឹងហក់ឡើងខ្ពស់បំផុតមិនធ្លាប់មាន នៅរយៈពេល២ខែក្រោយ។ នេះបើយោងតាមទិន្នន័យដែលត្រូវបានបញ្ចេញកាលពីថ្ងៃព្រហស្បតិ៍ ទី២៧ ឧសភា។

សារព័ត៌មាន South China Morning Post បានចុះផ្សាយក្នុងថ្ងៃដដែលថា តម្លៃផ្ទះមួយទឹកបានហក់ឡើងខែទី៤ ជាប់គ្នាកាលពីខែមេសា ក្នុងអត្រាខ្ពស់បំផុតចាប់តាំងពីខែកក្កដា ឆ្នាំ២០១៩ ហើយនេះឆ្លុះបញ្ចាំងពីការងើបឡើងវិញ នៅក្នុងទីផ្សារលំនៅដ្ឋាន និងសេដ្ឋកិច្ចរបស់ក្រុងនេះ។

ការហក់ឡើងនេះ ស្ថិតក្នុងអត្រាប្រមាណ១,៥% នៃអត្រាខ្ពស់ជាប្រវត្តិសាស្ត្រ ដែលត្រូវបានកត់ត្រាក្នុងខែឧសភា ឆ្នាំ២០១៩ មុនពេលផ្ទុះមហាតុកម្មប្រឆាំងរដ្ឋាភិបាល។

លោក Derek Chan ប្រធានផ្នែកស្រាវជ្រាវនៅក្រុមហ៊ុនអចលនទ្រព្យ Ricacorp Properties បានលើកឡើងថា “ប្រសិនបើការហក់ឡើងក្នុងខែឧសភា លើសពី១,៥% [សន្ទស្សន៍តម្លៃផ្ទះមួយទឹក] ពិតជាអាចបំបែកកំណត់ត្រានោះបាន”។ លោកបន្ថែមទៀតថា “ការហក់ឡើងនៅខែមិថុនា ដ៏ខ្លីខាងមុខនេះ ពិតជាអាចបំបែកបំណត់ត្រានោះបាន “ប្រសិនបើសន្ទុះនេះនៅដដែលដោយមិនផ្លាស់ប្តូរ”។

ប្រធានផ្នែកស្រាវជ្រាវរូបនេះមានសុទិដ្ឋិនិយម ដោយសារកត្តាមួយចំនួនដូចជា ក្រុងហុងកុង មានសមត្ថភាពអាចគ្រប់គ្រងការឆ្លងរាតត្បាតវីរុសកូវីដ-១៩ សេដ្ឋកិច្ចរបស់ក្រុងនេះកំពុងងើបឡើងជាលំដាប់ កំណើនផលិតផលសរុបក្នុងស្រុក (GDP) របស់ក្រុងនេះមានសន្ទុះលឿន ហើយអត្រាគ្មានការងារធ្វើ បានធ្លាក់ចុះរយៈពេល២ខែជាប់គ្នា។ ការឆ្លើយតបទៅនឹងគម្រោងថ្មីៗក្នុងខែនេះ ក៏ទទួលបានលទ្ធផលគួរឱ្យពេញចិត្តផងដែរ។

សន្ទស្សន៍តម្លៃផ្ទះមួយទឹកបានកើនឡើង០,៤% ដល់៣៩០,៨ពិន្ទុក្នុងខែមេសា បើធៀបនឹង៣៨៩,១ពិន្ទុក្នុងខែមីនា និងប្រមាណ១.៥%ដែលត្រូវបានកត់ត្រា ក្នុងខែឧសភា ឆ្នាំ២០១៩។

លោកDerek Chan គូសបញ្ជាក់ថា លោករំពឹងថា ការឡើងថ្លៃក្នុងខែនេះនឹងឈានដល់១,៥% ឬ១,៦%ដែលមានន័យថា សន្ទស្សន៍នេះស្ទើរតែបំបែកកំណត់ត្រា បានទៅហើយ។ ហើយប្រសិនបើសន្ទស្សន៍នេះ កើនឡើងប្រហែល១%ក្នុងខែមិថុនា វានឹងឡើងដល់៤០០ពិន្ទុដែលជាកម្រិតខ្ពស់បំផុតមិនធ្លាប់មាន។

ការអត្ថាធិប្បាយរបស់លោក Derek Chan បានបន្ទរតាមការព្យាករមួយមុននេះដោយទីភ្នាក់ងារអចលនទ្រព្យ Centaline Property Agency ដែលនិយាយថា តម្លៃផ្ទះអាចនឹងបំបែកកំណត់ត្រានៅពាក់កណ្តាលឆ្នាំ២០២១ នេះ។

លោក Louis Chan នាយកប្រតិបត្តិផ្នែកលំនៅដ្ឋាន និងជាអនុប្រធានទីភ្នាក់ងារអចលនទ្រព្យ Centaline Property Agency ប្រចាំតំបន់អាស៊ី-ប៉ាស៊ីហ្វិក បានលើកឡើងថា “ទីផ្សារលំនៅដ្ឋាន បានឈានចូលដល់ដំណាក់កាលឡើងថ្លៃឥតឈប់ឈរ ក្នុងត្រីមាសទី២ ដោយតម្លៃផ្ទះអាចនឹងបំបែកកំណត់ត្រានៅខែក្រោយ”។ ទីភ្នាក់ងារនេះរំពឹងថា តម្លៃផ្ទះនឹងកើនឡើង១៥%នៅឆ្នាំនេះ៕

វិបត្តិកូវីត១៩បានធ្វើឱ្យការប្រើប្រាស់បច្ចេកវិទ្យាក្នុងវិស័យអចលនទ្រព្យមានការរីកចម្រើនខ្លាំង

ដោយៈ រតនៈ

ភ្នំពេញៈ វិបត្តិកូវីត១៩ បានធ្វើឲ្យប៉ះពាល់ដល់សេដ្ឋកិច្ច សង្គមកិច្ច និងការអភិវឌ្ឍជាច្រើនមែន តែទោះជាយ៉ាងណាវិបត្តិមួយនេះ បានបង្រៀនប្រជាពលរដ្ឋខ្មែរឱ្យចេះរស់នៅតាមបែបសម័យទំនើប ដោយប្រើប្រាស់បច្ចេកវិទ្យា ខណៈវិស័យអចលនទ្រព្យក៏បាននិងកំពុងប្រើប្រាស់បច្ចេកវិទ្យាដើម្បីបម្រើឱ្យវិស័យខ្លួនផងដែរ។

ក្នុងកិច្ចសម្ភាសន៍ជាមួយ គេហទំព័រ Propertyarea កាលពីថ្ងៃទី២៧ ខែឧសភានេះលោកសំ សុខនឿនប្រធានសមាគមអចលនទ្រព្យសកលហៅកាត់ (GRA) មានប្រសាសន៍ថា មកដល់ពេលនេះអាជីវកម្មប្រមាណ៨០ភាគរយបានបើកដំណើរការឡើងវិញ ប៉ុន្តែអាជីវកម្ម២០ភាគរយផ្សេងទៀតគឹបានបិទទ្វា។

លោកបន្តថា ក្នុងអំឡុងពេលការបិទខ្ទប់ក៏ដូចជាមុននោះ ក៏រងផលប៉ះពាល់ដោយសារវិបត្តិកូវីត១៩រាតត្បាតនៅកម្ពុជា។ ទោះជាយ៉ាងណាលោកថា អាជីវកម្មដែលនៅឈរជើងបាន គឺបង្ហាញពីភាពរឹងមាំរបស់ខ្លួនដោយប្រើយុទ្ធសាស្ត្រផ្សេងៗ។

លោកបានបន្តថា ពីដើមមកគឺការប្រាស្រ័យទាក់ទងគ្នា មិនថាតែការទាក់ទងគ្នាឯកជន ឬក៏ការរកស៊ីអ្វីនោះទេ ប្រជាពលរដ្ឋខ្មែរចូលចិត្តទាក់ទងគ្នា ដោយជួបផ្ទាល់នៅកន្លែងណាមួយ បើការបញ្ជាទិញវិញគឺភាគច្រើនវេចខ្ចប់ និងទៅដល់កន្លែងតែម្ដង ពោលគឺមិនសូវមានការបញ្ជាទិញតាមអនឡាញនោះទេ ប៉ុន្តែក្នុងអំឡុងវិបត្តិកូវីតនេះ គឺប្រជាពលរដ្ឋខ្មែរចាប់ផ្ដើមទទួលស្គាល់ការលក់ ឬទិញ តាមប្រព័ន្ធអ៊ីនធើណេត ឬ ហៅថា Digital Marketing ។ ការណ៍នេះធ្វើឲ្យក្រុមហ៊ុនមួយ ឬអាជីវករមួយចំនួន បើទោះជាខ្លួនមិនចេះធ្វើទីផ្សាតាមប្រព័ន្ធនេះក្តី ក៏ត្រូវតែរៀន និងធ្វើជាបណ្ដើរៗរហូតក្រុមហ៊ុន ឬអាជីវករមួយចំនួនមានភាពល្បីល្បាញតាមប្រព័ន្ធអនឡាននេះ។

លោកបានបន្ថែមថា មិនថាតែអាជីវករឬ ក្រុមហ៊ុននោះទេដែលចាប់ផ្ដើមធ្វើការ និងជួញដូរផ្សេងៗតាមប្រព័ន្ធអនឡាញ សូមបីតែអ្នកធ្វើការជាមន្ត្រីរាជការ ឬបុគ្គលិកក្រុមហ៊ុនមួយចំនួនធំក៏ងាកមកធ្វើការតាមប្រព័ន្ធDigital នេះផងដែរ។

លោកសៀង ថៃអ្នកនាំពាក្យក្រសួងពាណិជ្ជកម្ម មានប្រសាសន៍ថា ក្នុងកំឡុងពេលនៃជំងឺកូវីដ-១៩ ការធ្វើអាជីវកម្មតាមអនឡាញមានការរីកចម្រើនគួរឲ្យកត់សម្គាល់។

លោកបានថ្លែងថា នៅពេលអាជីវកម្មតាមអនឡាញកាន់តែរីកចម្រើន វានឹងជួយសម្រួលដល់ប្រតិបត្តិការអាជីវកម្មបានឆាប់រហ័សជាង កាត់បន្ថយនូវចំណាយផ្សេងៗ។ល។ និងជួយរុញកំណើនសេដ្ឋកិច្ចជាតិផងដែរ។ ដើម្បីគ្រប់គ្រងប្រតិបត្តិការអាជីវកម្មតាមអនឡាញ កម្ពុជាមានច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក មានអនុក្រឹត្យ និងប្រកាសរបស់ក្រសួងទទួលបន្ទុកអនុវត្ត។

ថ្មីៗនេះ ក្រសួងពាណិជ្ជកម្មបានប្រកាសជូនដំណឹងស្ដីពី ការផ្ដល់លិខិតអនុញ្ញាត ឬអាជ្ញាប័ណ្ណតាមប្រព័ន្ធអេឡិចត្រូនិក សំដៅគ្រប់គ្រងសកម្មភាពអាជីវកម្មអនឡាញ និងការពារផលប្រយោជន៍អ្នកប្រើប្រាស់៕