IMF: សេដ្ឋកិច្ចកម្ពុជានឹងស្ទុះងើបឡើងលឿនជាងគេនៅតំបន់អាស៊ានក្នុងរយៈពេលមធ្យមខាងមុខ

ដោយៈ ម៉ាណេត

ភ្នំពេញៈ មូលនិធិរូបិយវត្ថុអន្តរជាតិ (IMF) បានព្យាករថា កំណើនផលិតផលសរុបក្នុងស្រុក (GDP) របស់កម្ពុជានឹងកើនឡើង៤,២ភាគរយនៅឆ្នាំនេះ និងកើនដល់៦,០ភាគរយនៅឆ្នាំ២០២២ ដែលនឹងធ្វើឲ្យប្រទេសកម្ពុជា ស្ថិតក្នុងចំណោមប្រទេសអាស៊ាន ដែលមានកំណើនសេដ្ឋកិច្ចលឿនបំផុតនៅឆ្នាំក្រោយ។

នៅក្នុងចក្ខុវិស័យសេដ្ឋកិច្ចពិភពលោករបស់ IMF ដែលបានចេញផ្សាយនៅទីក្រុងវ៉ាស៊ីនតោនកាលពីថ្ងៃអង្គារ (ត្រូវនឹងថ្ងៃពុធនៅកម្ពុជា) IMF បានព្យាករថា ប្រទេសកម្ពុជានឹងមានសេដ្ឋកិច្ចរីកចម្រើនយ៉ាងឆាប់រហ័ស បំផុតនៅក្នុងតំបន់ រហូតដល់ឆ្នាំ២០២៦ ។

ដោយសារផលប៉ះពាល់នៃវិបត្តិកូវីដ១៩ IMF បានឱ្យដឹងថា GDP របស់កម្ពុជាបានធ្លាក់ចុះ៣,៥ភាគរយកាលពីឆ្នាំមុន។ ប៉ុន្តែការធ្លាក់ចុះរបស់កម្ពុជា មិនដាំក្បាលចុះខ្លាំង ដូចGDP របស់ហ្វីលីពីនធ្លាក់ចុះ៩,៥ភាគរយ ថៃធ្លាក់ចុះ៦,១ភាគរយ ម៉ាឡេស៊ីធ្លាក់ចុះ៥,៦ភាគរយ និងសិង្ហបុរីធ្លាក់ចុះ៥,៤ ភាគរយ។

បើប្រៀបធៀបជាមួយប្រទេសកម្ពុជា សេដ្ឋកិច្ចឥណ្ឌូនេស៊ី ធ្លាក់ចុះតិចជាង២,១ភាគរ ខណៈសេដ្ឋកិច្ចឡាវធ្លាក់ចុះ០.៤ ភាគរយ។

IMF បាននិយាយថា “សេដ្ឋកិច្ចប្រទេសអាស៊ានចំនួនបីប៉ុណ្ណោះ មានកំណើនកាលពីឆ្នាំមុន ដោយមីយ៉ាន់ម៉ា មានកំណើន៣,២ភាគរយ វៀតណាមមានកំណើន២,៩ភាគរយ និងព្រុយណេមានកំណើន១,២ភាគរយ” ។

សម្រាប់ឆ្នាំ២០២១ ការព្យាករណ៍កំណើន GDP កម្ពុជាខ្ពស់ជាងប្រទេសថៃ២,៦ ភាគរយ និងខ្ពស់ជាងព្រុយណេ១,៦ភាគរយ ហើយប្រៀបធៀបជាមួយការព្យាករណ៍សម្រាប់ការធ្លាក់ចុះដ៏ខ្លាំង នៅប្រទេសមីយ៉ាន់ម៉ា ជាមួយនឹងសេដ្ឋកិច្ចរបស់ខ្លួនបានធ្លាក់ចុះ៨,៩ភាគរយ។

សេដ្ឋកិច្ចប្រទេសអាស៊ានចំនួន៦ ត្រូវបានព្យាករណ៍ថានឹងខ្ពស់ជាងកម្ពុជា ដែលដឹកនាំដោយហ្វីលីពីន នឹងមានកំណើន៦,៩ ភាគរយ ម៉ាឡេស៊ី៦,៥ភាគរយ និងវៀតណាម៦,៥ ភាគរយ សិង្ហបុរី៥,២ ភាគរយ ឡាវ៤,៦ ភាគរយ និងឥណ្ឌូណេស៊ី៤,៣ ភាគរយ។

ទោះយ៉ាងណា នៅឆ្នាំ២០២២ កម្ពុជាត្រូវបានព្យាករណ៍ថា នឹងស្ថិតក្នុងចំណោមប្រទេស ដែលមានកំណើនសេដ្ឋកិច្ចលឿនបំផុតក្នុងតំបន់ ដោយស្ថិតនៅលំដាប់ទី៣ ស្មើគ្នាជាមួយប្រទេសម៉ាឡេស៊ី ជាមួយនឹងកំណើន៦.០ភាគរយ បន្ទាប់ពីប្រទេសវៀតណាមនឹងមានកំណើន៧,២ភាគរយ និងហ្វីលីពីន៦,៥ ភាគរយ។

កំណើនសេដ្ឋកិច្ចទាប ត្រូវបានព្យាករណ៍សម្រាប់ឥណ្ឌូនេស៊ី ដែលនឹងមានកំណើន៥,៨ភាគរយ ឡាវ និងថៃនឹងមានកំណើន៥,៦ ភាគរយដូចគ្នា សិង្ហបុរី៣,២ភាគរយ ព្រុយណេ២,៥ ភាគរយ និងមីយ៉ាន់ម៉ា១,៤ភាគរយ។

តាមការព្យាករណ៍រយៈពេលមធ្យមរបស់ខ្លួន IMF បានព្យាករថា ប្រទេសកម្ពុជានឹងមានកំណើនលឿនបំផុតក្នុងតំបន់ ដោយសេដ្ឋកិច្ចនឹងកើនឡើង៦,៨ភាគរយ នៅក្នុងឆ្នាំ២០២៦ ។

IMF ក៏បានព្យាករផងដែរថា កំណើនសេដ្ឋកិច្ចរយៈពេលមធ្យម រឹងមាំសម្រាប់ប្រទេសវៀតណាម ដែលនឹងកំណើន៦,៦ភាគរយ ហ្វីលីពីន៦,៥ ភាគរយ និងប្រទេសឡាវ៦,០ ភាគរយ។

កំណើនសេដ្ឋកិច្ចទាប ត្រូវបានព្យាករសម្រាប់ប្រទេសឥណ្ឌូនេស៊ី ដែលនឹងមានកំណើន៥,២ភាគរយ មីយ៉ាន់ម៉ា៥,១ ភាគរយ និងម៉ាឡេស៊ី៥ ភាគរយ ថៃ៣,៦ភាគរយ សិង្ហបុរី២,៥ ភាគរយ និងព្រុយណេ២,០ ភាគរយ។

IMF បានឲ្យដឹងថា សេដ្ឋកិច្ចពិភពលោកត្រូវបានព្យាករថា នឹងស្ទុះងើបឡើងវិញ៦,០ភាគរយនៅឆ្នាំនេះ បន្ទាប់ពីធ្លាក់ចុះ៣,៣ភាគរយកាលពីឆ្នាំមុន។ ប៉ុន្តែកំណើនសេដ្ឋកិច្ចពិភពលោក ត្រូវបានព្យាករណ៍ថា នឹងមានកម្រិតមធ្យមដល់៤,៤ភាគរយ នៅឆ្នាំក្រោយ និង៣,៣ភាគរយនៅឆ្នាំ២០២៦ ។

លោកស្រីGita Gopinath ប្រធានសេដ្ឋវិទូរបស់មូលនិធិរូបិយវត្ថុអន្តរជាតិ បានមានប្រសាសន៍ថា “យើងព្យាករថា នឹងមានការងើបឡើងវិញខ្លាំងជាងមុននៅឆ្នាំ២០២១ និង២០២២ សម្រាប់សេដ្ឋកិច្ចពិភពលោក បើប្រៀបធៀបនឹងការព្យាករពីមុនរបស់យើង” ។

លោកស្រីបានថ្លែងថា “ទោះយ៉ាងណាទស្សនវិស័យ បង្ហាញពីបញ្ហាប្រឈម ដែលគួរឱ្យព្រួយបារម្ភ ទាក់ទងនឹងភាពផ្ទុយគ្នាក្នុងល្បឿននៃការងើបឡើងវិញ និងសក្តានុពលនៃការខូចខាតខាងសេដ្ឋកិច្ចពីវិបត្តិនេះ” ។

នៅក្នុងសន្និសីទកាសែតលោកស្រី Gopinath បាននិយាយថា ការធ្វើឱ្យប្រសើរឡើង នៃកំណើនសេដ្ឋកិច្ចសកល សម្រាប់ឆ្នាំ២០២១ និងឆ្នាំ២០២២ភាគច្រើន គឺដោយសារតែការធ្វើឱ្យប្រសើរឡើង សម្រាប់សេដ្ឋកិច្ចជឿនលឿន ជាពិសេសសហរដ្ឋអាមេរិក។

លោកស្រីបាននិយាយថា “នេះធ្វើឱ្យសហរដ្ឋអាមេរិក ជាប្រទេសមានសេដ្ឋកិច្ចធំតែមួយគត់ ដែលបានព្យាករថានឹងកើនលើសកម្រិតGDP ដែលខ្លួនបានព្យាករណ៍ថាសម្រាប់ឆ្នាំ ២០២២ ក្នុងករណីដែលគ្មានការរីករាលដាលនៃជំងឺកូវីដ១៩” ។

លោកស្រីបានថ្លែងថា “ប្រទេសមានសេដ្ឋកិច្ចជឿនលឿនផ្សេងទៀត រួមទាំងតំបន់អឺរ៉ូ នឹងស្ទុះងើបឡើងវិញនៅឆ្នាំនេះ តែក្នុងល្បឿនយឺតជាងនេះ” ៕

ខណ្ឌកូនពៅ កំបូល កំពុងទាក់ទាញការអភិវឌ្ឍលំនៅឋាននិងតំបន់ឧស្សាហកម្ម

ដោយៈវឌ្ឈនៈ

ភ្នំពេញៈ ជាខណ្ឌកូនពៅ កំបូល ដែលកាត់ចេញពីផ្នែកខ្លះនៃខេត្តកណ្ដាល និងផ្នែកខ្លះនៃខណ្ឌពោធិ៍សែនជ័យ ។ ខណ្ឌនេះបាន និងកំពុងទាក់ទាញការវិនិយោគលំនៅឋាន ពីសំនាក់វិនិយោគិនក្នុងស្រុកជាច្រើន ដោយមានក្រុមហ៊ុន និងម្ចាស់បុរីជាច្រើនបានបណ្ដាក់ទុនវិនិយោគ ជាបន្តបន្ទាប់លើលំនៅឋាន សម្រាប់ផ្ដល់ជូនពលរដ្ឋដែលមានតម្រូវការ។

នៅក្នុងទឹកដីខណ្ឌមួយនេះ គេមានឃើញគម្រោងវិនិយោគ លើបុរីរបស់មហាសេដ្ឋីអចលនទ្រព្យ នៃក្រុមហ៊ុនបុរីពិភពថ្មីរបស់អ្នកឧកញ៉ាហុងពីវ គម្រោងអភិវឌ្ឍន៍បុរីរបស់អ្នកឧកញ៉ាពុង ឃាវសេ និងមានក្រុមហ៊ុនអភិវឌ្ឍន៍លំនៅឋាន ឯកជនជាច្រើនទៀតនៅក្នុងទឹកដីនៃខណ្ឌកំបូល។

បើទោះបីជាស្ថិតនៅក្នុងវិបត្តិនៃជំងឺកូវីដ១៩តាំងពីឆ្នាំ ២០២០មកក្ដី តែការអភិវឌ្ឍលំនៅឋាននៅក្នុងទឹកដីខណ្ឌកំបូល ប៉ែកខាងលិចរាជធានីភ្នំពេញ នៅតែទទួលបានកំណើនជាបន្តបន្ទាប់ ដោយមើលឃើញថាម្ចាស់បុរី នៅតែបន្តសាងសង់និងពង្រីកគម្រោងលំនៅឋានជាលំដាប់ និងមានការទិញពីសំណាក់ពលរដ្ឋ ដែលមានតម្រូវការជាក់ស្ដែង។

តាមអ្នកជំនាញ នៃវិស័យអចលនទ្រព្យជាច្រើនបានលើកឡើងថា មានតម្រូវការទើបមានការផ្គត់ផ្គង់ មានការទិញទើបមានការលក់ ហើយការអភិវឌ្ឍលំនៅឋានគឺត្រូវមើលទៅលើទិសដៅនិងទិសខ្យល់ ដែលវិនិយោគកំពុងសម្លឹងមើល។ នៅតំបន់ប៉ែកខាងលិច ក៏មានការអភិវឌ្ឍទៅលើហេដ្ឋារចនាសម្ព័ន្ធផ្លូវ ភ្លើងជាច្រើនផងដែរ។

លោកឌឹត ចណ្ណា ប្រធានក្រុមហ៊ុនឡាក់គី រៀលធី បានលើកឡើងថា តំបន់ដែលមានតម្លៃដីនៅទាប វិនិយោគិនអាចទិញដើម្បីអភិវឌ្ឍន៍ យកប្រាក់ចំណេញនៅពេលខាងមុខ ។ ដីធ្លីនៅតំបន់ដែលឆ្ងាយពីទីក្រុង ពីកណ្ដាលក្រុងអាចមានតម្លៃទាប ហើយវាស័ក្តិសមសម្រាប់ការអភិវឌ្ឍទៅលើលំនៅឋានជាផ្ទះជាប់ដីលក្ខណៈបុរី។

លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើងថា បច្ចុប្បន្នវិនិយោគិន ដែលចង់អភិវឌ្ឍន៍លំនៅឋានជាផ្ទះជាប់ដី មិនអាចអភិវឌ្ឍនៅតំបន់កណ្ដាលក្រុងបានទេ ដោយសារតែដីនៅកណ្ដាលក្រុងបានឡើងថ្លៃជាបន្តបន្ទាប់ ដូច្នេះពួកគេអាចទៅរកតំបន់នៅជាយក្រុងដើម្បីអភិវឌ្ឍវិញ។

ដោយឡែកដីធ្លីតំបន់កណ្ដាលក្រុង គឺសម្រាប់ទុកអភិវឌ្ឍជាអគារខ្ពស់ៗដូចជាអគារពាណិជ្ជកម្ម ខុនដូ អាផាត់មិនជាដើម ដែលអាចរកចំណូលបានច្រើន។

ប្រធានសមាគម អចលនទ្រព្យសក លោកសំ សុខនឿនបាននិយាយថាការផ្គត់ផ្គត់លំនៅឋានបច្ចុប្បន្ននេះ ដូចជាចង់លើសពីតម្រូវការជាក់ស្ដែង ។

លោកថា “អ្នកអភិវឌ្ឍន៍លំនៅឋានកាន់តែច្រើន តែសួរថាអ្នកដែលមានលុយទិញផ្ទះពិតប្រាកដមានប៉ុន្មាននាក់” ៕

ការកសាងទីក្រុងរណបច្រើននឹងជួយជំរុញជម្រុញការរីកចម្រើនអចលនទ្រព្យ និងលំហូរមនុស្សចូលទីក្រុង

ដោយៈសហការី

ភ្នំពេញៈ នៅរាជធានីភ្នំពេញ មានក្រុងរណបប្រមាណ១០ ដែលបាននិងកំពុងសាងសង់និងក្រុងរណបមួយចំនួនហាក់បានជាប់គាំង ដោយសារវិបត្តិសេដ្ឋកិច្ចរបស់ក្រុមហ៊ុនផ្ទាល់ ប៉ុន្តែបើនិយាយពីគុណប្រយោជន៍ ក្រុងរណបដើរតួនាទីសំខាន់ណាស់ ក្នុងការជម្រុញការអភិវឌ្ឍសេដ្ឋកិច្ច សង្គម និងកាត់បន្ថយលំហូតមនុស្សចូលទីក្រុង។

អ្នកជំនាញបានអះអាងថា ការអភិវឌ្ឍន៍ទីក្រុងរណបកាន់តែច្រើន នឹងជួយជំរុញឱ្យមានកំណើនសេដ្ឋកិច្ច និងរីកចំរើនលើវិស័យសំណង់ នៅក្នុងប្រទេស ខណៈរដ្ឋាភិបាល បាននិងកំពុងអភិវឌ្ឍន៍ទីក្រុងរណប (Satellite City) ស្រមតាមផែនការ និងប្លង់គោលអភិវឌ្ឍន៍ទីក្រុងនាពេលបច្ចុប្បន្ននេះ។

ប្រធានក្រុមប្រឹក្សាអភិបាល នៃសមាគមអ្នកជំនាញអចលនទ្រព្យកម្ពុជា លោកឃាង ពុទ្ធី បានឱ្យដឹងកាលពីពេលថ្មីៗនេះថា មិនថានៅក្នុងប្រទេសកម្ពុជា ឬនៅតាមបណ្តាប្រទេសនៅលើពិភពលោកនេះ គឺគេបង្កើតតំបន់អភិវឌ្ឍន៍័ថ្មីៗ ដែលហៅទីក្រុងរណប ដើម្បីជំរុញកំណើនសេដ្ឋកិច្ច និងសំណង់ឱ្យមានការរីកចំរើន ។

លោកបន្តថា “នៅក្នុងទីក្រុងភ្នំពេញមានការរីកចំរើន និងមានកំណើនប្រជាជន អីចឹងហើយ បានគេអភិវឌ្ឍន៍ទីក្រុងរណបបន្ថែមទៀត ដើម្បីជំរុញការអភិវឌ្ឍន៍គម្រោងខុនដូ ផ្សារទំនើប និងអគារផ្សេងទៅកាន់ទីនោះ” ។ លោកបន្ថែមថា “ម្យ៉ាងទៀត ការបង្កើតឱ្យមានទីក្រុងរណបនេះ ឆ្លើយតបទៅនឹងកំណើនតម្រូវការ សេដ្ឋកិច្ច និងរស់នៅ” ។

លោកបន្ថែមទៀតថា នៅពេលដែលបង្កើតឱ្យមានតំបន់អភិវឌ្ឍន៍ថ្មីៗបែបនេះ ក៏នឹងជួយវិស័យអចលនទ្រព្យ ជាពិសេសសំណង់កើនឡើង ព្រោះថាតំបន់ថ្មីត្រូវការសាងសង់សំណង់ផ្សេងៗ ប៉ុន្តែបញ្ហាតែមួយប៉ុណ្ណោះ គឺរដ្ឋាភិបាលមិនទាន់បានកំណត់ឱ្យបានច្បាស់លាស់ចំពោះការបែងចែកតំបន់អភិវឌ្ឍន៍ ដោយពេលខ្លះអនុញ្ញាតឱ្យសាងសង់រោងចក្រ ក្បែរនឹងសណ្ឋាគារជាដើម។

ចំណែកលោក ឡុង គឹមសួគ៌ អគ្គនាយក្រុមហ៊ុន Century21 Advance បានឱ្យដឹងដែរថា ការអភិវឌ្ឍន៍តំបន់ទីក្រុងរណប កាន់តែច្រើននឹងជួយជំរុញកំណើតសេដ្ឋកិច្ច តាមរយៈការផ្លាស់ប្តូរពាណិជ្ជកម្មនានា ឱ្យកាន់តែមានភាពងាយស្រួល និងធ្វើឱ្យវិស័យកាន់តែមានតម្លៃខ្ពស់ផងដែរ។

លោកបន្តថា “ជាពិសេសនោះ នៅពេលមានការអភិវឌ្ឍន៍ហេដ្ឋារចនា សម្ព័ន្ធជុំវិញក្រុង (តំបន់អភិវឌ្ឍន៍ទីក្រុងរណប) បានធ្វើឱ្យសេដ្ឋកិច្ចនៅជុំវិញក្រុង មានការរីកចំរើន ជាមួយគ្នានេះ វិស័យសំណង់ និងអចលនទ្រព្យ ក៏នឹងមានការកើនឡើងផងដែរ” ។

លោកគឹមសួគ៌បានបញ្ជាក់ថា “នៅពេលដែលមានតំបន់ណាមួយ កំពុងមានការអភិវឌ្ឍន៍ថ្មីដូចជាតំបន់ទីក្រុងរណបនេះ នឹងជួយជំរុញឱ្យវិស័យអចលនទ្រព្យឡើងថ្លៃ ព្រោះថា មនុស្សទាំងអស់នឹងទៅទិញ ឬធ្វើអាជីកម្មផ្សេងៗ នៅក្នុងតំបន់នេះ” ។

អ្នកឧកញ៉ា ពុង ឃាវសែ អគ្គនាយកក្រុមហ៊ុន OCIC ធ្លាប់បានឡើងកាលពីពេលថ្មីៗនេះដែរថា គ្រាន់តែការអភិវឌ្ឍន៍ទីក្រុងរណបថ្មីមួយ កោះនរានៅលើទំហំផ្ទៃដី១០០ហិកតា នឹងចូលរួមបង្កើនចំណូលថវិកាជាតិ ប្រមាណ ២៥០លានដុល្លារក្នុងមួយឆ្នាំ។

អ្នកឧកញ៉ាថ្លែងថា “គម្រោងអភិវឌ្ឍន៍កោះនរានេះ នឹងផ្តល់អត្ថប្រយោជន៍ដល់សង្គមជាតិ និងសេដ្ឋកិច្ចកម្ពុជាយ៉ាងច្រើន ជាពិសេសនៅក្នុងកាលៈទេសៈ ដែលកំពុងជួបវិបត្តិនាពេលនេះ ដែលកម្ពុជាកំពុងត្រូវការគម្រោងវិនិយោគបន្ថែមទៀត ដើម្បីជួយទ្រទ្រង់សកម្មភាពសេដ្ឋកិច្ចជាតិឱ្យបានរឹងមាំ” ។

លោកពុង ឃាវសែបន្តថា “តាមរយៈគម្រោងមួយនេះ នឹងអនុគ្រោះដល់មនុស្សរស់នៅប្រមាណ៥ម៉ឺននាក់ ហើយអាចនឹងចូលរួមចំណែកដល់ផលិតផលក្នុងស្រុក (GDP) ប្រមាណ២២៥លានដុល្លារក្នុងមួយឆ្នាំៗ ស្មើនឹងប្រមាណ០,៩ភាគរយនៃចំនួន GDPនាពេលបច្ចុប្បន្ននេះ” ។

រាជរដ្ឋាភិបាលកាលពីកន្លងមកនេះ បានដាក់ចេញផែនការអភិវឌ្ឍទីក្រុងរណប តាមរយៈផ្តល់ឱកាសដល់ក្រុមហ៊ុនទាំងនៅក្នុងស្រុក និងក្រៅចូលរួមអភិវឌ្ឍន៍ នៅតាមជាយរាជធានីភ្នំពេញ។ ជាក់ស្តែង ស្ទើរតែគ្រប់ទិសនៃរាជធានីភ្នំពេញ មានការចូលរួមអភិវឌ្ឍន៍ទីក្រុងរណបពិក្រុមហ៊ុនផ្សេងៗជាច្រើន៕

តើតម្លៃលំនៅដ្ឋាននៅកម្ពុជាពិតជាខ្ពស់ជាងចំណូលរបស់ប្រជាជននឹងបង្កជាវិបត្តិឬទេ?

ដោយៈ ប៊ី

ភ្នំពេញៈ ការសិក្សាថ្មីមួយ បានរកឃើញថថា តម្លៃអចលនទ្រព្យ បើប្រៀបធៀបនឹងប្រាក់ចំណូល គិតជាមធ្យមនៅកម្ពុជា និងទីក្រុងហុងកុង បានធ្លាក់ចុះច្រើនជាងប្រទេសដទៃទៀត ចាប់តាំងពីមានវិបត្តិនៃជំងឺរាតត្បាត។ នេះបើយោងតាមការសិក្សាស្រាវជ្រាវរបស់ក្រុមហ៊ុន Aetna ចេញផ្សាយកាលពីថ្មីៗនេះ។

តម្លៃអចលនទ្រព្យនៅកម្ពុជា បានធ្លាក់ចុះពី -៦.៥៨ ឬថ្លៃជាង៣៩.៨៩ដង ប្រៀបធៀបនឹងប្រាក់ចំណូល ជាមធ្យមរបស់ប្រជាជនកម្ពុជា នៅចន្លោះឆ្នាំ២០១៩ និង២០២០ ហើយនៅហុងកុងធ្លាក់ចុះ៥,៨៦ ឬស្មើនឹង៤៣.៥២ដឹង ខណៈទីផ្សារអាស៊ីទាំងពីរនេះនៅតែមានតម្លៃថ្លៃជាងគេនៅលើពិភពលោក។

តម្លៃអចលនទ្រព្យនៅកម្ពុជាស្មើនឹង៤៦ដង បើធៀបនឹងប្រាក់ចំណូលរបស់ប្រជាជនជាមធ្យម នៅឆ្នាំ២០១៩ ហើយធ្លាក់ចុះ៦.៥៨ភាគរយ មកនៅត្រឹម៣៩.៨៩ដងនៅឆ្នាំ២០២០ ។

តម្លៃអចលនទ្រព្យ ដែលសំដៅទៅលើលំនៅដ្ឋាន (ផ្ទះ) ធ្លាក់ចុះនេះ មានន័យថា លំនៅដ្ឋានមានតម្លៃទាប ធៀបនឹងចំណូលរបស់ប្រជាជន។

គិតត្រឹមឆ្នាំ២០២១ ចំណូលរបស់ប្រជាជនម្នាក់ៗ គិតជាមធ្យមមាន១..៦៨០,០២ដុល្លារ ខណៈតម្លៃលំនៅដ្ឋានគិតជាមធម្យម៧ម៉ឺនដុល្លារ នៅតំបន់ជាយក្រុង និងតម្លៃលំនៅដ្ឋានទាប ឬខ្ពស់អាស្រ័យទៅលើទីតាំង និងគម្រោងអភិវឌ្ឍន៍។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា ក្នុងឆ្នាំ២០២០កន្លងទៅ កម្ពុជាទទួលបានគម្រោងសាងសង់សំណង់ទូទាំងប្រទេសចំនួន៤.៨៤១គម្រោង មានផ្ទៃក្រឡាកម្រាលសំណង់សរុប ចំនួនជាង២៩លានម៉ែត្រក្រឡា និងមានតម្លៃប៉ាន់ស្មានប្រមាណ៧,៧៥ពាន់លានដុល្លារអាមេរិក ថយចុះប្រមាណ៣២,២១ភាគរយ បើធៀបនឹងឆ្នាំ២០១៩ ។

អ្នកតាមដានការវិតវត្តន៍សេដ្ឋកិច្ច សង្គម និងអចលនទ្រព្យ លោកយិន លាងគង់បានមានប្រសាសន៍ថា មានការលើកឡើងពីអ្នកជំនាញជាច្រើន ពីតម្លៃអចលនទ្រព្យនៅកម្ពុជាមានតម្លៃទាប បើធៀបជាមួយប្រទេសជិតខាងកម្ពុជា ឬប្រទេសក្នុងតំបន់ ប៉ុន្តែពួកគេមិនបានធៀបប្រាក់ចំណូលរបស់ប្រជាជនកម្ពុជា និងចំណូលរបស់ប្រជាជនប្រទេសជិតខាង និងទំហំសេដ្ឋកិច្ចរបស់ប្រទេសទាំងនោះនៅឡើយទេ។

លោកបន្តថា “ការកើនឡើងតម្លៃដីធ្លី ផ្ទះសម្បែងជារៀងរាល់ឆ្នាំ មិនអាចបង្កជាវិបត្តិលំនៅដ្ឋាននោះទេ ដោយសាររដ្ឋាភិបាលបានគិតគូររួចហើយ ពីការលើកទឹកចិត្តអ្នកវិនិយោគ ឲ្យគិតពីលំនៅដ្ឋានតម្លៃសមរម្យ សម្រាប់ប្រជាជនមានជីវភាពមធ្យមនិងក្រោមមធ្យម” ។ លោកបន្តថា”ការរីកចម្រើនសេដ្ឋកិច្ច និងការកសាងហេដ្ឋារចនាសម្ព័ន្ឋរបស់រដ្ឋាភិបាល បានធ្វើឲ្យតម្លៃដីធ្លីកើនឡើង ដែលធ្វើឲ្យប្រជាពលរដ្ឋទទួលបានផលប្រយោជន៍” ។

លោកយិន លាងគង់បានបន្តថា ហេតុនេះកំនើនតម្លៃអចលនទ្រព្យ ពិសេសលំនៅដ្ឋាន មិនបង្កជាវិបត្តិនោះទេ ព្រោះប្រជាពលរដ្ឋមានចំណូលសមរម្យ ពិសេសពីអចលនទ្រព្យរបស់ខ្លួន ដែលធ្វើឲ្យពួកគាត់មានលទ្ឋភាពកាន់តែច្រើន ក្នុងការទិញលំនៅដ្ឋានសំរាប់រស់នៅ និងសាងសង់លំនៅដ្ឋានលើដីរបស់ពួកគេ” ។

លោកបន្តថា “អ្នកអភិវឌ្ឍន៍បុរី លំនៅដ្ឋាននានានៅតែកើនឡើង ដោយសារពួកគេបានសិក្សារួចហើយ ពីតម្រូវការ ព្រោះបើគ្មានតម្រូវការជាមូលដ្ឋានទេ មិនមានការផ្គត់ផ្គង់នោះឡើយ” ៕

ផ្សារទំនើបថ្មីចំនួន៤ បានដាក់ដំណើរការក្នុងត្រីមាសទី១ឆ្នាំនេះ ខណៈដែលតម្រូវការជួលកំពុងដាំក្បាលចុះ

ដោយៈ រ៉ាណេត

ភ្នំពេញៈ បើទោះជាវិស័យផ្សារទំនើបនៅកម្ពុជា កំពុងតែជួបនឹងបញ្ហាធ្លាក់ចុះតម្រូវការស្ទើរគ្រប់ទីតាំង ប៉ុន្តែនៅត្រឹមត្រីមាសទី១ ដើមឆ្នាំ២០២១នេះ វត្តមានផ្សារទំនើបចំនួន៤ផ្សេងទៀត រាប់ទាំងប្រភេទផ្សារសហគមន៍បានបញ្ចប់ការសាងសង់ និងដាក់ដំណើរការជាបន្តបន្ទាប់។

តាមរបាយការណ៍សិក្សាដោយក្រុមហ៊ុន CBRE Cambodia បានបញ្ជាក់ថា ផ្សារទំនើបចំនួន ដែលត្រូវបានដាក់ដំណើរការ នៅក្នុងត្រីមាសដំបូងដើមឆ្នាំ២០២១នេះ រួមមានផ្សារ TK Central មានទំហំ៣៥៤០ម៉ែត្រការ៉េ រួមជាមួនឹងគម្រោងផ្សារ Boeung Snor Food Village គម្រោង The Green Avenue និងគម្រោងផ្សារ View Park Mall ដែលមានទំហំសរុបចំនួន២៤,៣៤៩ ម៉ែត្រការ៉េ។

បើតាមការលើកឡើងនៅក្នុងរបាយការណ៍ដែលសិក្សា និងស្រាវជ្រាវដោយក្រុមហ៊ុនជំនាញខាងលើនេះបានព្យាការណ៍ថា នៅក្នុងដំណាច់ឆ្នាំ២០២១នេះ បើមិនមានអ្វីប្រែប្រួល ឬជាឧបសគ្គនោះទេ ផ្សារំនើបតូច ធំ រាប់ទាំងប្រភេទផ្សារសហគមន៍មានសរុបរហូតប្រមាណ១៩គម្រោង ដែលអាចនឹងត្រូវបញ្ចប់ការសាងសង់ និងត្រៀមដាក់ដំណើរការ។

ទោះជាយ៉ាងណា ទំហំនៃការផ្គត់ផ្គង់នៅក្នុងវិស័យផ្សារទំនើប ឆ្នាំ២០២១នេះអាចនឹងលើសតម្រូវការ ខណៈគ្មានគម្រោងណាមួយត្រូវអាក់ខាន ឬពន្យាពេលសាងសង់បញ្ចប់គម្រោងនោះទេ។

អ្នកជំនាញផ្នែកអចលនទ្រព្យ និងការវាយតម្លៃ លោកស្រីអាន សុធីតា ធ្លាប់បានមានប្រសាសន៍កាលពីពេលថ្មីៗនេះថា បច្ចុប្បន្ន ការដាក់បញ្ចូលទីតាំងលក់រាយ នៅក្នុងផ្សារទំនើបនៅកម្ពុជា កំពុងតែមានការកើនឡើងជាបន្តបន្ទាប់ ជាពិសេសប្រភេទផ្សារទំនើបបែបសហគមន៍ នៅតាមតំបន់ទីប្រជុំជនមួយចំនួនក្នុងរាជធានីភ្នំពេញ ក៏ដូចជានៅក្នុងអគារពាណិជ្ជកម្មផងដែរ” ។

លោកស្រីបន្តថា “កំណើនៃការដាក់បញ្ចូលថ្មីបន្ថែមទាំងនេះ កំពុងតែប្រឈមទៅនឹងវិបត្តិ នៃការផ្គត់ផ្គង់លើសពីតម្រូវការ ខណៈដែលបច្ចុប្បន្នអតិថិជនមួយចំនួន ដែលនិយមទិញសម្ភារៈប្រើប្រាស់ ឬចំណីអាហារនៅតាមបណ្តាផ្សារទំនើប បានផ្លាស់ប្ដូរបែបបទ និងទម្លាប់របស់ខ្លួនដោយការទិញតាមអនឡាញ” ។ លោកស្រីបន្តថា “ការទិញតាមអនឡាញ មានសេវាដឹកជញ្ជូនដល់លំនៅដ្ឋាន។ សកម្មភាពទាំងនេះ គឺជាចំណែកមួយដែលអាចជះឥទ្ធិពលអវិជ្ជមាន ដល់វិស័យផ្សារទំនើប បន្ថែមពីលើអ្វីដែលកំពុងកើតមាននាពេលបច្ចុប្បន្ន” ។

លោកស្រីអាន សុធីតាបានបញ្ជាក់ថា ផ្អែកតាមស្ថានភាព ដែលកំពុងមាននាពេលបច្ចុប្បន្ននេះ អ្នកអភិវឌ្ឍន៍ក្នុងវិស័យនេះ គួរតែមានការសម្រេចចិត្តជាថ្មី ក្នុងការដាក់បញ្ចូលចំណែកថ្មីនៃទីតាំងលក់រាយ ដែលស្ថិតនៅក្នុងគម្រោងរបស់ខ្លួន ជៀសវាងជួបហានិភ័យ ដែលអាចកើតមានក្នុងអត្រាខ្ពស់នៅចុងឆ្នាំ២០២១ ៕

ការរីកចម្រើននៃស្ថាបត្យកម្មនៅកម្ពុជាជះឥទ្ឋិពលដល់បែបផែនជីវិតយ៉ាងដូចម្តេច?

ដោយៈស៊ីវ ម៉េង

ភ្នំពេញៈ វិស័យអចលនទ្រព្យនៅកម្ពុជា បាននាំឲ្យមានការផ្លាស់ប្តូរយ៉ាងខ្លាំងនៅរាជធានីភ្នំពេញ សៀមរាប និងខេត្តព្រះសីហនុ ក្នុងរយៈពេលប្រមាណមួយទសវត្សចុងក្រោយនេះ។

អគារចាស់ៗមួយចំនួន ត្រូវបានកែលម្អនិងជួលសារជាថ្មីឡើងវិញ ខណៈដែលអគារខ្លះទៀតត្រូវបានបំផ្លាញទាំងស្រុងដើម្បីទុកកន្លែងទំនេរថ្មី។

ប៉ុន្តែទាំងនេះ មិនមែនជារឿងងាយស្រួលនោះទេ ក្នុងការរចនាម៉ូតស័ក្តិសមជាព្រះរាជាណាចក្រអច្ឆរិយៈទេ។

ខណៈដែលឥទ្ធិពលរបស់បស្ចិមប្រទេស កំពុងបញ្ចេញនូវទស្សនវិជ្ជារចនាលើគម្រោងថ្មីៗ ក៏បានមានការលេចទ្បើងទន្ទឹមគ្នា ដែលមានការទាក់ទាញ និងបំផុសគំនិតប្រវត្តិសាស្ត្រដ៏យូរលង់ និងសំបូរបែបរបស់ប្រទេសកម្ពុជា ដែលបានគេឲ្យឈ្មោះថាជា គឺស្ថាបត្យកម្មបែបថ្មី។

ស្ថាបត្យកម្មបែបថ្មីនេះ គឺជាទស្សនៈនៃការរចនាដែលបង្កើតឡើងដោយលោកស្រី Helen Grant Ross និងលោក Darryl Leon Collins នៅក្នុងសៀវភៅរបស់ពួកគាត់ “Building Cambodia: the New Khmer Architecture” ដែលបានបោះពុម្ពនៅឆ្នាំ២០០២ ។

បំល្លាស់ប្តូរនេះត្រូវបានពិពណ៌នាថា ជាការរួមបញ្ចូលគ្នានូវគោលការណ៍ទំនើប ដែលបានបង្កើតឡើងនៅភាគខាងលិច ជាមួយនឹងការរចនាបែបបុរាណរបស់ខ្មែរ ដែលមានតាំងពីបុរាណកាល រហូតដល់ស្ថាបត្យកម្មសម័យអង្គរ (ឧទាហរណ៍ប្រាសាទអង្គរវត្ត) ។

ការចាប់ផ្ដើមនៃស្ថាបត្យកម្មបែបថ្មី

បើទោះបីជាគំហើញនេះ មិនទាន់ហៅឈ្មោះជាផ្លូវការថាជា ស្ថាបត្យកម្មបែបថ្មី ក៏ដោយ ប៉ុន្តែវាត្រូវបានគេមើលឃើញថា បានចាប់ផ្ដើមតាំងពីកំឡុងឆ្នាំ១៩៥០មកម្ល៉េះ ក្រោយពេលប្រទេសកម្ពុជា ទទួលបានឯករាជ្យពីបារាំង រហូតដល់កំឡុងឆ្នាំ១៩៧០ មុនពេលសង្គ្រាមស៊ីវិលចាប់ផ្ដើម។

ស្ថិតនៅក្រោមការឧបត្ថម្ភ និងចក្ខុវិស័យរបស់អតីតសម្តេចព្រះនរោត្តម សីហនុ ដែលបានចាប់ផ្តើម ក្នុងការអភិវឌ្ឍទីក្រុងរបស់ប្រទេសកម្ពុជា ក្នុងទសវត្សឆ្នាំ១៩៥០ ។ បញ្ញវន្តខ្មែរជាច្រើន ជាពិសេសអ្នកដែលបានសិក្សា នៅបរទេសបានមកយកបទពិសោធន៍ និងចំណេះដឹងអំពីបេតិកភណ្ឌខ្មែរ ដើម្បីជួយអភិវឌ្ឍន៍ប្រទេសកម្ពុជា។

ជាពិសេសស្ថាបត្យករ បានក្លាយជាមនុស្សសំខាន់ ក្នុងការសម្រេចចក្ខុវិស័យរបស់ព្រះមហាក្សត្រ។

ចំនុចនេះហើយដែលបានបញ្ជាក់ថា លោក វណ្ណ ម៉ូលីវណ្ណ ជាបុរសដែលកំណត់ និងរៀបចំប្លង់មេ នៃរាជធានីភ្នំពេញ សម្រាប់ពាក់កណ្តាលសតវត្សបន្ទាប់។

លោក វណ្ណ ម៉ូលីវណ្ណ គឺជាសសរស្តម្ភមួយ នៅក្នុងប្រវត្តិសាស្ត្រស្ថាបត្យកម្មរបស់ព្រះរាជាណាចក្រកម្ពុជា។ គាត់ជាបុគ្គលមួយរូបដែលលេចធ្លោបំផុត ក្នុងនាមជាស្ថាបត្យកររដ្ឋក្រោមការ ដឹកនាំរបស់ព្រះមហាក្សត្រ។

លោក ម៉ូលីវណ្ណ បានរៀបចំប្លង់រចនាសម្ពន្ធ័ជាច្រើននៅក្នុង ប្រទេសកម្ពុជា រួមមានអគារពហុកីឡាជាតិ សាលសន្និសិទចតុមុខ និងវិមានឯករាជ្យ និងស្នាដៃសំណង់ជាច្រើនទៀត រហូតទទួលបានងារជាស្ថាបត្យករលេចធ្លោជាងគេនៅកម្ពុជា។

ស្ថាបត្យកម្មបែបថ្មីនាបច្ចុប្បន្ន

យោងតាមអត្ថបទ គម្រោងលោកវណ្ណ ម៉ូលីវណ្ណ ដែលជាឯកសារ និងអត្ថបទសិក្សាអំពីស្នាដៃរបស់លោកវណ្ណម៉ូលីវណ្ណ និងស្ថាបត្យកម្មបែបទំនើបដទៃទៀត ស្ថាបត្យកម្មបែបថ្មីអាចត្រូវបានកំណត់លក្ខណៈ ដូចជា ការប្រើប្រាស់បេតុង។ ឯកសារយោងទាក់ទងទៅនឹង បច្ចេកទេសសំណង់នៅកម្ពុជាដែលមានស្រាប់។ ការបង្កើតលំហូរខ្យល់ធម្មជាតិ និងការដាក់ស្រមោលស្រប តាមអាកាសធាតុត្រូពិករបស់ប្រទេសកម្ពុជា។ ការប្រើគ្រឿងលំអ ដោយបំផុសគំនិតនៃការតុបតែងបែបប្រាសាទអង្គរ។

បច្ចុប្បន្ននេះ ស្ថាបត្យកម្មបែបថ្មីនេះ កំពុងបង្ហាញខ្លួនសារជាថ្មីម្ដងទៀតនៅក្នុងវិស័យ ស្ថាបត្យកម្ម និងសំណង់របស់ប្រទេសកម្ពុជា។ ក្រុមហ៊ុន The Room Design Studio ដែលត្រូវបានគែស្គាល់ថាជាក្រុមហ៊ុនស្ថាបត្យកម្ម និងរចនាផ្នែកខាងក្នុង ដែលនាំយកនូវគំនិតនៃការរចនាម៉ូដឈានមុខគេនិងលក្ខណៈទំនើបមកប្រទេសកម្ពុជា។

លោកសាស្ត្រាចារ្យទួស សាភឿនស្ថាបត្យករអាស៊ាន និងជាអគ្គលេខាធិការរងគណៈស្ថាបត្យករកម្ពជាបានមានប្រសាសន៍ថា ការរីកចម្រើននៃសេដ្ឋកិច្ចសង្គម បានផ្លាស់ប្តូរបែបផែននៃការរស់នៅរបស់ប្រជាជនកម្ពុជា ពិសេសការកើនឡើងនូវកំដៅផែនដី ដែលបណ្តាលមកពីការផ្លាស់ប្តូរអាកាសធាតុ បានធ្វើឲ្យស្ថាបត្យករចាប់ផ្តើមគិតគូពីលំនៅដ្ឋានបែបបៃតង មានន័យថាសាងសង់លំនៅដ្ឋានផ្សារភ្ជាប់ជាមួយធម្មជាតិ។

លោកបន្តថា “ការសាងសង់លំនៅដ្ឋាននាពេលបច្ចុប្បន្ន ដែលផ្សារភ្ជាប់ជាមួយធម្មជាតិ ជាលំនៅដ្ឋានបែបបៃតង កាត់បន្ថយការប្រើប្រាស់អគ្គិសនី ជាបែបផែននៃស្ថាបត្យកម្មសម័យថ្មី និងជារសនិយមថ្មីមួយ” ៕

លោកឡោ វិចិត្រ បង្ហើបពីវិធីសាស្ត្រក្នុងការលក់អចលនទ្រព្យក្នុងសម័យកូវីដដល់ភ្នាក់ងារថ្មីកំពុងជួបឧបសគ្គ

ដោយៈ រ៉ាណេត

ភ្នំពេញៈ ស្ថិតនៅក្នុងបរិបទនៃសម័យកាលកូវីដ ដែលកំពុងរាតត្បាតគួរឱ្យព្រួយបារម្ភនៅពេលបច្ចុប្បន្ន បានជះឥទ្ធិពលអាក្រក់ទៅលើស្ទើរគ្រប់វិស័យ ជាពិសេសទីផ្សារអចលនទ្រព្យ ដែលកំពុងមានភាពស្ងប់ស្ងាត់ ខណៈដែលសកម្មភាពរបស់មនុស្សពាក់ព័ន្ធនៅក្នុងវិស័យនេះត្រូវបានកាត់បន្ថយ។

អនុប្រធានសមាគមអចលនទ្រព្យសកលប្រចាំរាជធានីភ្នំពេញ លោកឡោ វិចិត្រ ដែលជាអ្នកមានជំនាញ និងបទពិសោធន៍ នៅក្នុងការជំរុញការលក់អចលនទ្រព្យបានចែករំលែកថា មិនថាទោះជាស្ថិតនៅក្នុងកាលៈទេសៈណានោះទេ សម្រាប់អ្នកលក់ដែលឆ្លាតវៃនៅតែអាចអាចបាន ប្រៀបដូចអ្នកជំនួញដែលពូកែ ទោះស្ថិតក្នុងស្ថានភាពលំបាក សេដ្ឋកិច្ចធ្លាក់ចុះ ក៏គេនៅតែអាចរកប្រាក់ចំណេញបាន។

លោកបន្តថា “យើងទទួលស្គាល់ថា នៅក្នុងស្ថានភាពនាពេលបច្ចុប្បន្នពិតជាបានធ្វើឱ្យប៉ះពាល់ដល់ទីផ្សារអចលនទ្រព្យជាខ្លាំង” ។ លោកបន្តថា “មានបងប្អូនខ្លះដែលជាភ្នាក់ងារលក់លើកឡើងថា ដោយសារតែមនុស្សភាគច្រើន មិនសូវហ៊ានចេញដើរក្រៅច្រើន ទើបពិបាកណាត់ភ្ញៀវទៅមើលគម្រោង បើទោះជាដឹងថាភ្ញៀវមានចំណាប់អារម្មណ៍ចង់ទិញដី ក៏ភ្ញៀវមិនទាន់ទៅមើលដល់ទីតាំង ក៏ដូចជាអ្នកលក់ខុនដូ ក៏ពិបាកក្នុងការណាត់ភ្ញៀវដូចគ្នា” ។

លោកឡោ វិចិត្របានបន្តថា ដើម្បីឱ្យយើងអាចទទួលបានលទ្ធផលល្អប្រសើរពីការលក់ ដំបូងភ្នាក់ងារដែលជាអ្នកលក់ គប្បីស្វែងយល់ពីប្រភេទអចលនទ្រព្យ ដែលខ្លួនទទួលលក់ឱ្យបានច្បាស់សិន បន្ទាប់មកត្រូវស្វែងរកដៃគូ ដែលមានបទពិសោធន៍ច្បាស់ មានការយល់ដឹងពីទីផ្សារអចលនទ្រព្យ ដើម្បីជួយជ្រោមជ្រែង និងជាជំនួយអាចឈានទៅដល់ការសម្រេចផែនការលក់របស់ខ្លួន។

ជាមួយនឹងការលើកឡើងខាងលើនេះ លោកឡោ វិចិត្រ ក៏បានបញ្ជាក់ផងដែរថា សម្រាប់អ្នកដែលមានបទពិសោធន៍ លើការលក់អចលនទ្រព្យ អាចមិនសូវមានបញ្ហាចោទនោះទេ ប៉ុន្តែសម្រាប់ភ្នាក់ងារ ដែលទើបចូលប្រឡូកក្នុងវិស័យនេះថ្មីថ្មោង គប្បីមានការស្វែងយល់បន្ថែមពាក់ព័ន្ធទៅនឹងរបៀប និងវិធីសាស្ត្រជំរុញការលក់ តាមរយៈការអានសៀវភៅចំណេះដឹងផ្នែកអចលនទ្រព្យ ឬអាចតាមរយៈការចុះឈ្មោះ ចូលរៀននៅក្នុងវគ្គបណ្តុះបណ្តាលផ្សេងៗជាច្រើន។

ដោយឡែកពាក់ព័ន្ធទៅនឹងការលក់អចលនទ្រព្យ នៅក្នុងសម័យកូវីដនៅពេលនេះ លោកឡោ វិចិត្របានមានប្រសាសន៍ថា ពេលនេះគឺជាឱកាសមួយដ៏ល្អ ក្នុងការស្វែងយល់បន្ថែមពីចំណេះដឹងពាក់ព័ន្ធ ជាពិសេសការចេះប្រើបច្ចេកវិទ្យាជាជំនួញ ក្នុងការលក់។ លោកបន្តថា មិនថាពេលនេះ ឬពេលបន្តិចទៀតនោះទេ ការលក់អចលនទ្រព្យអាចធ្វើឡើង តាមរយៈបច្ចេកវិទ្យាបែបទំនើបទាំងនេះបាន ដោយមិនចាំបាច់អញ្ជើញភ្ញៀវមកដល់ទីតាំងគម្រោងផ្ទាល់ទៀតនោះទេ។

ដូច្នេះបងប្អូន ត្រូវតែធ្វើការស្វែងយល់ និងបង្កើនចំណេះដឹងផ្នែកនេះ ជាក់ស្តែងបច្ចុប្បន្នអ្នកលក់ដែលជោគជ័យ ក្នុងសម័យកាលនេះមួយចំនួន ក៏ត្រូវបានជ្រើសយកប្រព័ន្ធបច្ចេកវិទ្យាធ្វើជាជំនួញនៃការលក់ដែរ៕

រដ្ឋាភិបាលគ្រោងបង្កើតមជ្ឈមណ្ឌលពាណិជ្ជកម្មកម្ពុជា ចិនបន្ថែមដើម្បីពង្រឹកទំំហំពាណិជ្ជកម្ម និងទាក់ទាញវិនិយោគ

អត្ថបទៈ រតនៈ

ភ្នំពេញៈ ខណៈដែលទីតាំងមជ្ឈមណ្ឌលពាណិជ្ជកម្ម កម្ពុជា ចិន នៅប្រទេសចិនមានជាង១០កន្លែងហើយនោះ កម្ពុជានៅតែមានគម្រោងបង្កើតបន្ថែម ដើម្បីបង្រីកទំហំពាណិជ្ជកម្មរវាងប្រទេសទាំងពីរ។

ក្នុងកិច្ចប្រជុំពិនិត្យលទ្ធផលការងារនៅឆ្នាំ ២០២០ និងកំណត់ទិសដៅសម្រាប់ឆ្នាំ ២០២១ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មមានប្រសាសន៍ថា គម្រោងនេះគឺជាការធ្វើសមាហរណកម្ម ទីផ្សារសម្រាប់ផលិតផលរបស់ប្រទេសកម្ពុជា ទៅក្រៅប្រទេសជាពិសេសគឺប្រទេសចិន។

ចំនួនមជ្ឈមណ្ឌលពាណិជ្ជកម្មកម្ពុជា នៅប្រទេសចិនកើនដល់១១ទីតាំង ខណៈដែលបច្ចុប្បន្ន ទីតាំងចំនួន ៦ កំពុងដំណើរការ ដែលមានដូចជា មជ្ឍមណ្ឌលពាណិជ្ជកម្មកម្ពុជាប្រចាំនៅទីក្រុងក្វាងចូវ មជ្ឍមណ្ឌលពាណិជ្ជកម្មកម្ពុជាប្រចាំ ទីក្រុងហាយនីង មជ្ឍមណ្ឌលពាណិជ្ជកម្មកម្ពុជា ប្រចាំនៅទីក្រុងស៊ីអាន មជ្ឍមណ្ឌលពាណិជ្ជកម្មកម្ពុជាប្រចាំនៅទីក្រុងហុងកុង។

មជ្ឈមណ្ឌលពាណិជ្ជកម្មទាំងអស់នោះ ជាទីតាំងសម្រាប់ដាក់តាំងបង្ហាញ និងផ្សព្វផ្សាយរកទីផ្សារ សម្រាប់ផលិតផលសក្តានុពលកម្ពុជា ដូចជា អង្ករ ម្រេច ស្ករត្នោត អំបិល កាហ្វេ ទឹកផ្លែឈើ ស្រាបៀរ គ្រាប់ស្វាយចន្ទី ដំណាប់ផ្លែឈើ ក្រមា វត្ថុអនុស្សាវរីយ៍ និងសៀវភៅផ្សព្វផ្សាយអំពីវិនិយោគ និងទេសចរណ៍។

រដ្ឋាភិបាលកម្ពុជា បានសម្រេចជោគជ័យ ក្នុងការចរចាកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសចិន ហើយកម្ពុជារំពឹងថា ការនាំចេញពីកម្ពុជាទៅចិន នឹងមានការកើនឡើងប្រមាណ ២៥% បន្ទាប់ពីកិច្ចព្រមព្រៀងនេះចុះហត្ថលេខារួចរាល់។

ក្រសួងពាណិជ្ជកម្មកម្ពុជាបានអះអាងថា ទំនិញកម្ពុជាជាង៣០០មុខអាចនាំទៅចិន ដោយមិនគិតពន្ធនៅពេលកិច្ចព្រមព្រៀងពាណិជ្ជកម្មសេរីទ្វេ ភាគីកម្ពុជាចិន(FTA)ចូលជាធរមាននៅដើមឆ្នាំ២០២១។ នៅក្នុងចំណោមមុខទំនិញជាង៣០០មុខនេះ គឺផលិតផលកសិកម្ម៩៥ភាគរយ ត្រូវរួចពន្ធសម្រាប់ការនាំចេញទៅចិន។ ប៉ុន្តែផលិតផលគ្រឿងចក្រ និងយានយន្តផ្សេងៗវិញ ចិននៅតែបន្តយកពន្ធនាំចូលដដែល៕

ខុនដូតែលទស្សនទាននៃការអភិវឌ្ឍន៍ថ្មីនៅកម្ពុជា និងចាប់ផ្តើមពេញនិយមឬ?

ដោយៈ រ៉ាណេត

ភ្នំពេញៈ ខុនដូតែល គឺជាផ្នែកមួយនៅក្នុងវិស័យអចលនទ្រព្យ សម្រាប់ការស្នាក់នៅ ដែលមានលក្ខណៈស្រដៀងគ្នាទៅនឹងសេវាសណ្ឋាគារ ប៉ុន្តែស្ថិតនៅក្នុងអគារខុនដូ។ ទីផ្សារមួយនេះ សម្រាប់កម្ពុជាអាចនិយាយបានថា វាជាប្រភេទផលិតផលថ្មីក្នុងវិស័យអចលនទ្រព្យ ខណៈដែលនៅតាមបណ្តាប្រទេសជិតខាងមួយចំនួន ដូចជាប្រទេសថៃ វៀតណាម និងសិង្ហបុរីបានដើរមុនមួយជំហានរួចទៅហើយ។

នាយកក្រុមហ៊ុនភ្នាក់ងារអចលនទ្រព្យ ERA Cambodia លោកខន គង្គា ដែលកំពុងកាន់គម្រោងខុនដូជាច្រើន នៅក្នុងដៃបានមានប្រសាសន៍ប្រាប់នៅល្ងាចថ្ងៃទី៧ ខែមេសា ឆ្នាំ២០២១ថា ខុនដូតែល ជាប្រភេទផលិតផលថ្មី នៅក្នុងវិស័យអចលនទ្រព្យ ដែលមានលក្ខណៈស្រដៀងគ្នា ទៅនឹងបន្ទប់សណ្ឋាគារ ប៉ុន្តែស្ថិតនៅក្នុងអគារខុនដូដែលមានម្ចាស់ច្រើន។

លោកបន្តថា “ទីផ្សារមួយនេះនៅតាមបណ្តាប្រទេសជិតខាង បានដើររួចទៅហើយ ដោយឡែកសម្រាប់តែកម្ពុជា អាចនិយាយបានថាជាទីផ្សារថ្មីមួយ ហើយទើបតែមានមួយរយៈពេលចុងក្រោយនេះតែប៉ុណ្ណោះ”។ លោកបន្តថា “បច្ចុប្បន្នមានអ្នកវិនិយោគក្នុងស្រុកមួយចំនួន ចាប់ផ្តើមចាប់អារម្មណ៍ នឹងការទិញចំណែកខុនដូយកជាខុនដូតែល ជាជាន់តែម្ដង”។

លោកបន្តថា Condotel គេធ្វើជាបន្ទប់តូចល្មម សម្រាប់ទុកវិនិយោគបន្តដោយការជួល ដែលមានលក្ខណៈស្រដៀងគ្នាទៅនឹងសណ្ឋាគារដែរ។ ការវិនិយោគបែបនេះពួកគាត់អាចមានឱកាសចំណេញច្រើន ព្រោះបច្ចុប្បន្នទីផ្សារមួយនេះ នៅមិនទាន់ទូលាយនៅឡើយនោះទេ ហើយអ្វីដែលសំខាន់គឺពួកគាត់ អាចមានជម្រើសច្រើនក្នុងការទិញដែលទទួលបានតម្លៃល្អ ឬទាបជាងទីផ្សារ ខណៈដែលពេលនេះ ក្រុមហ៊ុនអភិវឌ្ឍន៍បានផ្តល់នូវលក្ខខណ្ឌងាយស្រួលជាច្រើនដល់ពួក ដែលវាសុទ្ធតែជាឱកាសចំណេញលើការវិនិយោគ”។

នាយកក្រុមហ៊ុនអចលនទ្រព្យ TOWN CITY លោកវន ចាន់ថនបានមានប្រសាសន៍ថា ការចាប់ផ្តើមវិនិយោគនៅក្នុងទីផ្សារខុនដូតែលនៅពេលនេះ វាអាចជាឱកាសល្អ ព្រោះតែជាទីផ្សារថ្មី និងអាចមានការចាប់អារម្មណ៍។

លោកបន្តថា “នៅប្រទេសគេដូចជាប្រទេសថៃ សិង្ហបុរី ជាដើមគឺមានការពេញនិយម ដោយសារតែវាមានតម្លៃថោក ជាងការទិញខុនដូស្ទើរពាក់កណ្តាល”។ លោកបន្តថា “ខុនដូតែលវាមានលក្ខណៈស្រដៀងគ្នា ទៅនឹងបន្ទប់សណ្ឋាគារដែរ វាគ្មានបន្ទប់បាយ គ្មានបន្ទប់ទទួលភ្ញៀវ ដូចជា ខុនដូដែលអាចរស់នៅបែបជាលក្ខណៈគ្រួសារនោះទេ”។

លោកចាន់ថនបានបន្តថា “វាអាចជាជម្រើសល្អទាំងការទិញសម្រាប់រស់នៅ ល្អទាំងសម្រាប់អ្នកទិញទុកសម្រាប់ជួល។ ព្រោះវាមានទំហំតូចតម្លៃថោក មិនដូចខុនដូមានទំហំធំតម្លៃថ្លៃនោះទេ”។

ទីផ្សារបែបនេះភាគច្រើន មានតម្រូវការពីសំណាក់ភ្ញៀវបរទេស ដែលមិនមានគ្រួសាររស់នៅជាមួយ ហើយអាចជួលបន្តក្រោយពេលពួកចាកចេញទៅប្រទេសកំណើត ក្នុងរយៈពេលវែងណាមួយ ដោយប្រគល់ឱ្យអ្នកគ្រប់គ្រងអគាររកភ្ញៀវថ្មី ជំនួសពួកគេបាន ហើយពេលវិលត្រឡប់មកវិញ ក៏អាចស្នាក់នៅក្នុងនាមជាម្ចាសកម្មសិទ្ធិដូចដើម គ្រាន់តែត្រូវការជូនដំណឹងមុនមកកាន់អ្នកគ្រប់គ្រងអគារតែប៉ុណ្ណោះ៕

មហាសេដ្ឋីអចលនទ្រព្យចិនឈរនៅលំដាប់កំពូល ខណៈពេលទ្រព្យសម្បត្តិសរុបកើនឡើង១៥១ពាន់ពាន់លានដុល្លារ

ដោយៈសុខុម

អាមេរិក: យោងតាមការដាក់ចំណាត់ថ្នាក់ មហាសេដ្ឋីពាន់លានដុល្លាររបស់ទស្សនាវដ្ដី Forbes របស់សហរដ្ឋអាមេរិក ប្រចាំឆ្នាំ២០២១ បង្ហាញថា ទ្រព្យសម្បត្តិរបស់មហាសេដ្ឋីអចលនទ្រព្យទូទាំងពិភពលោក បានកើនឡើង១៥១ពាន់លានដុល្លារក្នុងឆ្នាំ២០២០។

ក្នុងនោះទ្រព្យសម្បត្តិរបស់មហាសេដ្ឋីនៅអាស៊ី កើនឡើងច្រើនជាងគេ ពិសេសមហាសេដ្ឋីអចលនទ្រព្យពាន់លានដុល្លារទាំង២១៥រូប មានទ្រព្យសម្បត្តិរួមបញ្ចូលគ្នាជាង៨០០ពាន់លានដុល្លារ ហើយមានតែ៣០រូបប៉ុណ្ណោះ ដែលទ្រព្យសម្បត្តិរបស់ខ្លួនបានធ្លាក់ចុះក្នុងឆ្នាំកន្លងទៅ។

មហាសេដ្ឋីអចលនទ្រព្យមានទ្រព្យ ដែលមានទ្រព្យសម្បត្តិច្រើនបំផុតចំនួន៦រូបជាពលរដ្ឋចិនដីគោក ឬចិនហុងកុង ដោយក្នុងនោះរួមមានទាំងលោក Lee Shau-kee វ័យ៩៣ឆ្នាំមកពីក្រុងហុងកុង ដែលជាមហាសេដ្ឋីអចលនទ្រព្យ មានជាងគេបំផុតនៅលើពិភពលោក ជាមួយទ្រព្យសម្បត្តិ៣១,៧ពាន់លានដុល្លារផងដែរ។

លោក Lee Shau-kee ជាម្ចាស់ហ៊ុនអភិវឌ្ឍន៍ Henderson Land Development ដែលទទួលសាងសង់គម្រោងលំនៅដ្ឋាន និងគម្រោងពាណិជ្ជកម្មនានាដូចជាអគារមជ្ឈមណ្ឌលហិរញ្ញវត្ថុពិភពលោក (World Financial Center) នៅក្រុងប៉េកាំង និងអគារមជ្ឈមណ្ឌលហិរញ្ញវត្ថុអន្តរជាតិ (International Finance Centre) នៅក្រុងហុងកុង ជាដើម។

ទ្រព្យសម្បត្តិរបស់មហាសេដ្ឋីអចលនទ្រព្យចិនដីគោក លោក Zuo Hui បានកើនឡើងច្រើនបំផុតកាលពីឆ្នាំមុន ក្នុងចំនួន១៣,៣ពាន់លានដុល្លារ។ គាត់មានទ្រព្យសម្បត្តិសរុប១៥,៥ពាន់លានដុល្លារគិតត្រឹមថ្ងៃទី៦ ខែមីនា នៅពេលការចំណាត់ថ្នាក់ប្រចាំឆ្នាំត្រូវបានបញ្ចប់។

លោក Zuo Hui ជាប្រធានក្រុមហ៊ុន KE Holdings ដែលជាក្រុមហ៊ុនមេរបស់ក្រុមហ៊ុនបុត្រសម្ព័ន្ធ Lianjia ដែលលោកបានបង្កើតឡើងក្នុងឆ្នាំ២០០១ ហើយលោកបានបង្កើតក្រុមហ៊ុនកម្រៃជើងសារ អចលនទ្រព្យធំជាងគេបំផុតនៅប្រទេសចិន ដោយធ្វើប្រតិបត្តិការនៅក្នុងទីក្រុងចំនួន២៨ និងមានភ្នាក់ងារកម្រៃជើងសារអចលនទ្រព្យ (អ្នកគួកជេ) ជិត១៥០.០០០នាក់។

លោក Zuo Hui គឺឈានមុខគេក្នុងចំណោមមហាសេដ្ឋី អចលនទ្រព្យនៅអាស៊ី ដែលដណ្ដើមបានចំណាត់ថ្នាក់លេខ១៥ នៃចំណាត់ថ្នាក់កំពូលទាំង២០ នៅក្នុងការដាក់ចំណាត់ថ្នាក់របស់ទស្សនាវដ្ដី Forbes។

លោក Donald Bren ប្រធានក្រុមហ៊ុន Irvine Co. ស្ថិតក្នុងចំណោមមហាសេដ្ឋីអចលនទ្រព្យអាមេរិក២រូប ដែលជាប់ក្នុងចំណោមមហាសេដ្ឋី មានទ្រព្យច្រើនបំផុតទាំង២០ក្នុងវិស័យអចលនទ្រព្យ។ ទ្រព្យសម្បត្តិ១៥,៣ពាន់លានដុល្លាររបស់លោក Donald Bren បានខាតបង់២០០លានដុល្លារក្នុងឆ្នាំ២០២០ ដោយសារការឆ្លងរាតត្បាតវីរុសកូវីដ-១៩។

ទ្រព្យសម្បត្តិរបស់មហាសេដ្ឋីអាមេរិក មួយរូបទៀតគឺលោកSun Hongbin ដែលបានបង្កើតក្រុមហ៊ុនអភិវឌ្ឍន៍ចិន Sunac China Holdings បានកើនឡើង១០០លានដុល្លារដល់៩,៣ពាន់លានដុល្លារ។

មហាសេដ្ឋីអចលនទ្រព្យអាល្លឺម៉ង់ Alexander Otto គឺជាមហាសេដ្ឋីលំដាប់កំពូលរបស់អឺរ៉ុប ដែលជាប់ចំណាត់ថ្នាក់លេខ២០។ ទ្រព្យសម្បត្តិរបស់គាត់បានកើនឡើងជិត៧ពាន់លានដុល្លារកាលពីឆ្នាំមុន៕