ទំនាក់ទំនងពាណិជ្ជកម្មរវាងអាមេរិកនិងប្រទេសចិនកំពុងវិវត្តន៍ល្អប្រសើរ

ដោយៈគង់ ម៉ាលីនណា

ភ្នំពេញៈ ភាពតានតឹងនៃការធ្វើពាណិជ្ជកម្ម រវាងមហាអំណាចទាំងពីរទំនងជាធូរស្រាល និងអាចឈានទៅបញ្ចប់សង្រ្គាមពាណិជ្ជកម្ម ដែលបានបង្កឡើងក្នុងរដ្ឋបាលលោកប្រធានាធិបតីដូណាល់ ត្រាំ។

ក្រសួងពាណិជ្ជកម្មរបស់ចិន បាននិយាយកាលពីថ្ងៃព្រហស្បតិ៍នេះថា មន្ត្រីពាណិជ្ជកម្មមកពីសហរដ្ឋអាមេរិក និងចិនបានបើកកិច្ចពិភាក្សាដោយចំហ និងជាក់ស្តែង ដែលជាកិច្ចពិភាក្សាលើកដំបូង ក្រោមអាណត្តិរបស់លោកប្រធានាធិបតី បៃដិន ពេលដែលទីក្រុងវ៉ាស៊ីនតោនបានតាមដានថា តើទីក្រុងប៉េកាំង កំពុងបញ្ចប់កិច្ចព្រមព្រៀងកតិកាសញ្ញាពាណិជ្ជកម្មរបស់ខ្លួនឬយ៉ាងណា។

សង្គ្រាមពាណិជ្ជកម្មដែលរាលដាល ក្រោមអាណត្តិរបស់អតីតប្រធានាធិបតី ដូណាល់ ត្រាំ បណ្តាលឲ្យមានតារាងពន្ធគយដាក់ទណ្ឌកម្ម លើទំនិញមួយចំនួនដែលត្រូវលក់រវាងប្រទេស ដែលមានសេដ្ឋកិច្ចធំជាងគេទាំង២ នៅលើពិភពលោករងផលប៉ះពាល់យ៉ាងខ្លាំង។

ប្រទេសទាំងពីរបានចុះហត្ថលេខាលើកិច្ចព្រមព្រៀង ដែលគេស្គាល់ថា “ដំណាក់កាលទី១” កាលពីខែមករាឆ្នាំ២០២០ ដែលទីក្រុងប៉េកាំងសន្យា បង្កើននូវការទិញរបស់ខ្លួនចំពោះផលិតផល និងសេវាកម្មរបស់ប្រទេសអាមេរិក យ៉ាងហោចណាស់តម្លៃ២០០ពាន់លានដុល្លារនៅឆ្នាំ ២០២០ និង២០២១។

អ្នកដឹកនាំការចរចាពាណិជ្ជកម្មជាន់ខ្ពស់អាមេរិក អ្នកស្រី Katherine Tai បានមានប្រសាសន៍៍ថា អ្នកស្រីកំពុងវិភាគថា តើលក្ខខណ្ឌនៃកតិកាសញ្ញាត្រូវបានបំពេញ ដោយភាគីចិនឬទេ ដោយអ្នកជំនាញខ្លះបាននិយាយថា ទីក្រុងប៉េកាំងខកខានបំពេញរហូតដល់ទៅ ៤០ភាគរយ លើកិច្ចព្រមព្រៀង ដើម្បីទិញទំនិញអាមេរិក។

នៅថ្ងៃព្រហស្បតិ៍នេះ សេចក្តីថ្លែងការណ៍ក្រសួងពាណិជ្ជកម្មចិន បានលើកឡើងថា ឧបនាយករដ្ឋមន្ត្រី ចិន លោក Liu He និង អ្នកស្រី Tai បានមានប្រសាសន៍ក្នុងការជជែកប្រកបដោយការស្ថាបនា ក្នុងឥរិយាបថស្មើភាព និងការគោរពគ្នាទៅវិញទៅមក។

កិច្ចព្រមព្រៀងដំណាក់កាលទី១ មានបំណងដើម្បីបញ្ចប់ នូវសង្គ្រាមពាណិជ្ជកម្ម រយៈពេលពីរឆ្នាំដែលបែកបាក់ បង្ហាញឡើងដោយអតីតប្រធានាធិបតី ត្រាំ ដែលធ្វើឲ្យស្រាំ ទំនាក់ទំនងរវាងប្រទេសទាំងពីរ។

រដ្ឋបាលរបស់លោកប្រធានាធិបតី ចូ បៃដិន មិនបានដើរតាមវោហារសាស្ត្រពាណិជ្ជកម្មដ៏តឹងរឹងនោះទេ ដោយទទូចថាខ្លួននឹងរក្សាពន្ធគយនៅពេលនេះ។

ទីក្រុងវ៉ាស៊ីនតោន បានរក្សាតារាងពន្ធគយលើប្រភេទទំនិញចិន និងសម្ភារៈឧស្សាហកម្មមានតម្លៃ២៥០ពាន់លានប្រចាំឆ្នាំ។

នៅលើភាគីរបស់ខ្លួន ប្រទេសចិនរក្សាអត្រាពន្ធលើផលិតផល នាំចូលពីអាមេរិកដដែល៕

 

ក្រុមហ៊ុនOCICនឹងសាងសង់គម្រោងដ៏អស្ចារ្យមួយនៅលើទីក្រុងកោះនរា នាពេលខាងមុខ

ដោយៈស៊ីវ ម៉េង

ភ្នំពេញៈ ថ្នាក់ដឹកនាំជាន់ខ្ពស់នៃក្រុមហ៊ុនOCICបានឲ្យដឹងថា ក្រុមហ៊ុននឹងសាងសង់គម្រោងមានភាពទាក់ទាញ និងអស្ចារ្យមួយនៅទីក្រុងកោះនរា ដែលកំពុងរៀបចំហេដ្ឋារចនាសម្ព័ន្ឋយ៉ាងសកម្មនាពេលនេះ។

អគ្គនាយករងក្រុមហ៊ុនOCIC លោកទូច សំណាងបានមានប្រសាសន៍ឲ្យដឹងថា គម្រោងត្រៀមនឹងសាងសង់នាពេលខាងមុខ វាជាគម្រោងដែលមានភាពទាក់ទាញដ៏ខ្លាំងមួយ សម្រាប់លើកស្ទួយមុខមាត់ទីក្រុងកោះនរា ដែលទស្សនទាននៃការអភិវឌ្ឍន៍មានភាពស្រដៀងគ្នានឹងទីក្រុងកោះពេជ្រផងដែរ។

ទោះជាយ៉ាងណាលោកមិនទាន់បង្ហើបឲ្យដឹងពីគំរោងនេះ មានទំហំបែបណា ជាគំរោងអ្វី និងបោញទុនវិនិយោគប៉ុន្មានរយលានដុល្លារនៅឡើយទេ។

លោកបន្តថា “ដើមឡើយគំរោងនេះ គ្រោងប្រកាសនិងបើកការដ្ឋានសាងសង់នៅខែមិថុនាឆ្នាំនេះ ប៉ុន្តែដោយសារជំងឺកូវីដ១៩ យើងបានពន្យាពេលគំរោងនេះ ហើយការងារជាក់ស្តែងរបស់ក្រុមហ៊ុន បានថមថយសកម្មភាពប្រមាណ៥០ភាគរយ ដោយសារបញ្ហាកង្វះកម្មករ និងបញ្ហាមួយចំនួនបណ្តាលមកពីជំងឺកូវីដ១៩។

លោកទូច សំណាងបានបន្តថា ទីក្រុងកោះនរា ដែលមានទំហំ១២៥ហហិកតានេះ បាននិងកំពុងសាងសង់ហេដ្ឋារចនាសម្ព័ន្ឋ ដែលគ្រោងចំណាយទឹកប្រាក់២០០០លានដុល្លារអាមេរិក និងគ្រោងបញ្ចប់ហេដ្ឋារចនាសម្ព័ន្ឋទាំងអស់ នៅឆ្នាំ២០២៣ខាងមុខនេះ។

អ្នកឧកញ៉ាពុង ឃាវសែអគ្គនាយកក្រុមហ៊ុនOCIC និងក្រុមហ៊ុនជាច្រើនទៀតបានថ្លែងក្នុងពិធីបើកការដ្ឋានសាងសង់ ស្ពានតភ្ជាប់ពីទីក្រុងកោះពេជ្រ ទៅកាន់ទីក្រុងកោះនរាក្រោមអធិបតីសម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា គម្រោងអភិវឌ្ឈន៍កោះនរា នឹងចូលររួមចំណែកក្នុងការលើកស្ទួយ សេដ្ឋកិច្ចកម្ពុជាយ៉ាងច្រើន ដោយមួយឆ្នាំទីក្រុងនេះ អាចផ្តល់ផលចំណូលដល់រដ្ឋាភិបាល លើទឹកប្រាក់ចំនួន២៥០លានដុល្លារអាមេរិក៕

ក្រុមហ៊ុនដ៏ធំOffspring Inc របស់ម៉ាឡេស៊ីប្រកាសឈានចូលទីផ្សារកម្ពុជា

ដោយៈ ម៉ាណេត

ភ្នំពេញៈ ក្រុមហ៊ុនដ៏ធំ Offspring Inc របស់ម៉ាឡេស៊ី បានប្រកាសឈានជើងចូលទីផ្សារកម្ពុជា និងហ្វាំងឡង់ តាមរយៈការដាក់ចេញនូវផលិតផលរបស់ខ្លួន នៅប្រទេសទាំងពីរ។ នេះបើយោងតាមការចេញផ្សាយរបស់គេហទំព័រ Scandasia នៅថ្ងៃទី២៧ ខែឧសភា ឆ្នាំ២០២១។

ក្រុមហ៊ុន Offspring Inc ដែលមានភាគហ៊ុន៥១% គ្រប់គ្រងដោយក្រុមហ៊ុនបច្ចេកវិទ្យាម៉ាឡេស៊ី Sedania ដែលជាក្រុមហ៊ុនបច្ចេកវិទ្យាសុខភាព គឺផ្តោតលើផលិតផលសម្រាប់កុមារ ដែលក្នុងនោះក៏មានផលិតផលទារក សរីរាង្គគុណភាពខ្ពស់ផងដែរ។

យោងតាមសេចក្តីថ្លែងការណ៍នាពេលថ្មីៗនេះក្រុមហ៊ុន Sedania បានឱ្យដឹងថា ផលិតសម្រាប់ថែទាំកុមារ ដំបូងរបស់Offspring បច្ចុប្បន្នត្រូវបាននាំចេញទៅកាន់ប្រទេសសិង្ហបុរី ហ្វីលីពីន សហរដ្ឋអាមេរិក ប្រ៊ុយណេនិងរុស្ស៊ី ហើយផលិតផលរបស់ក្រុមហ៊ុននឹងត្រូវបានដាក់លក់នៅតាមបណ្តាញអនឡាញ សម្រាប់ប្រទេសទាំង៤ ប្រទេស រួមមានកម្ពុជា ហ្វាំងឡង់ អេស្បាញ និងកូរ៉េខាងត្បូង។

លោកAzrin Mohd Noor នាយកគ្រប់គ្រងក្រុមហ៊ុនSedania បានពន្យល់ថា ហាងលក់តាមប្រព័ន្ធអនឡាញ ត្រូវបានត្រួតពិនិត្យច្បាស់លាស់ ដោយក្រុមទីស្នាក់ការរបស់ពួកគេ ដែលជាផ្នែកមួយនៃកម្មវិធីចែកចាយអន្តរជាតិ ដ៏ទូលំទូលាយរបស់ក្រុមហ៊ុន។

លោក Azrin Mohd Noor បានបន្ថែមទៀតថា ប្រទេសមួយចំនួននេះ ក៏កំពុងប្រើប្រាស់វេទិកាទិញទំនិញ តាមគេហទំព័រល្បីៗ ដូចជា Lazada, Shopee និង Amazon ដើម្បីពង្រីកទីផ្សាររបស់ខ្លួនបន្ថែមទៀត៕

ដំណឹងល្អៈក្រុមហ៊ុនរុករករ៉ែមាសនឹងចាប់ផ្តើមទាញយកធនធានរ៉ែមាស នៅចុងឆ្នាំនេះ ក្នុងខេត្តមណ្ឌលគិរី

ដោយៈ គង់ សូរិយា

មណ្ឌលគិរីៈ ទីបំផុតដំណឹងល្អបានមកដល់ហើយ ស្របពេលដែលក្រុមហ៊ុនស្រាវជ្រាវរ៉ុករករ៉ែមាស បានប្រកាសពីវឌ្ឈនភាពរបស់ខ្លួន ដោយអាចទាញយករ៉ែមាសពីខេត្តមណ្ឌកគិរីនៅចុងឆ្នាំនេះ។

ក្រុមហ៊ុន Renaissance Minerals (Cambodia) គ្រោងនឹងចាប់ផ្តើមជីករ៉ែមាស ក្នុងតំបន់អាជ្ញាបណ្ណរបស់ខ្លួន នៅខេត្តមណ្ឌលគីរី ចុងឆ្នាំ២០២១នេះ ខណៈបច្ចុប្បន្នក្រុមហ៊ុនកំពុងពន្លឿនរៀបចំការងារត្រៀមជីក។

អគ្គនាយករ៉ែ នៃក្រសួងរ៉ែ និងថាមពល លោកយស់ មុន្នីរ៉ាត់ បានមានប្រសាសន៍ ឱ្យដឹងនៅក្នុងសប្តាហ៍នេះថា ការជីកយករ៉ែមាសនេះ នឹងធ្វើឡើងនៅលើអណ្តូងចំនួនមួយ ដែលមានជម្រៅប្រមាណ១០០ម៉ែត្រ។លោកបន្តថា ក្រោយពេលជីកបានហើយ ក្រុមហ៊ុននឹងនាំចេញទៅកែច្នៃនៅក្រៅប្រទេស ដោយសារតែកម្ពុជាមិនមានសេវាកម្មធ្វើបន្សុទ្ធមាសនោះទេ។

លោកបន្តថា “តាមផែនការទន្និផលមាស ដែលជីករំពឹងថានឹងមានបរិមាណ១០ម៉ឺនសអោន ក្នុងមួយឆ្នាំ ហើយរ៉ែមាសនឹងត្រូវនាំចេញ ទៅកាន់ប្រទេសទទួលស្គាល់គុណភាពរ៉ែមាស ដូចជាប្រទេសសឹង្ហបុរី និងអូស្រ្តាលី ដើម្បីបន្សុទ្ធមាសទឹក៩៩,៩ភាគរយ”។

លោកយស់ មុន្នីរ៉ាត់បានមានប្រសាសន៍ឲ្យដឹងទៀតថា ក្នុងបរិមាណដីទម្ងន់មួយតោន ក្នុងអណ្តូងរ៉ែមាសរបស់ក្រុមហ៊ុន មានបរិមាណរ៉ែមាសជាមធ្យម២,២ក្រាម៕

 

រដ្ឋាភិបាលអនុម័តទុនវិនិយោគលក្នុងទឹកប្រាក់ជាង១១៥លានដុល្លារសម្រាប់ខែឧសភា

ដោយៈ វឌ្ឈនៈ
ភ្នំពេញៈ ក្នុងខែឧសភាឆ្នាំ២០២១នេះ ក្នុងរយៈពេល៤សប្ដាហ៍កន្លង ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន៩គម្រោង គិតជាទឹកប្រាក់ចំនួន ១១៥,៥លានដុល្លារអាមេរិក និងបង្កើតការងារប្រមាណជាង៤០០០កន្លែង។

យោងតាមសេចក្តីប្រកាសរបស់ក្រុមប្រឹក្សាអភិវឌ្ឍន៍កម្ពុជា បានឲ្យដឹងថា តាំងពីដើមខែឧសភា២០២១ គម្រោងទាំង៩ដែលស្ថាប័ននេះបានអនុម័តឱ្យវិនិយោគ រួមមាន ១.គម្រោងបង្កើតរោងចក្រកែច្នៃម្ហូបអាហារ ដែលមានទីតាំងវិនិយោគស្ថិតនៅភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ មានទុនវិនិយោគប្រមាណ ២,៩លានដុល្លារអាមេរិក និងអាចបង្កើតការងារបានចំនួន ២១០កន្លែង។

២. គម្រោងបង្កើតរោងចក្របោកគក់ ជ្រលក់ពណ៌ និងបោះពុម្ព ដែលមានទីតាំងវិនិយោគស្ថិតនៅភូមិក្រាំងទ្រា ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ៣,១លានដុល្លារអាមេរិក និងអាចបង្កើតការងារបានចំនួន ២១៨កន្លែង។

៣. គម្រោងបង្កើតរោងចក្រផលិតបំពង់ទីប ទុយោជ័រ និងបរិក្ខារបំពង់ជ័រ (PVC pipe fittings) គ្រប់ប្រភេទ ដែលមានទីតាំងវិនិយោគ ស្ថិតនៅភូមិព្រៃរកា និងភូមិត្រពាំងជូន ឃុំឆក់ឈើនាង ស្រុកអង្គស្នួល ខេត្តកណ្តាល មានទុនវិនិយោគប្រមាណ ៩,៤លានដុល្លារអាមេរិក និងអាចបង្កើតការងារបានចំនួន ២០១កន្លែង។

៤ គម្រោងបង្កើតរោងចក្រផលិតឱសថ ដែលមានទីតាំងវិនិយោគស្ថិតនៅភូមិសន្លុង ឃុំសន្លុង ស្រុកខ្សាច់កណ្តាល ខេត្តកណ្តាល មានទុនវិនិយោគចំនួន១២,៥លានដុល្លារអាមេរិក និងអាចបង្កើតការងារបានចំនួន២១៥កន្លែង។
៥. គម្រោងបង្កើតរោងចក្រផ្គុំដំឡើង គ្រឿងអេឡិចត្រូនិកគ្រប់ប្រភេទ គ្រឿងបន្លាស់អេឡិចត្រូនិក ម៉ាស់អេឡិចត្រូនិក និងឧបករណ៍បន្សុទ្ធខ្យល់ គ្រប់ប្រភេទ ដែលមានទីតាំងវិនិយោគស្ថិតនៅភូមិចមពល ឃុំពពេល ស្រុកត្រាំកក់ ខេត្តតាកែវ មានទុនវិនិយោគប្រមាណ ២៩,៧លានដុល្លារអាមេរិក និងអាចបង្កើតការងារបានចំនួន ៦២៨កន្លែង។

៦ គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន១៩៥បន្ទប់ ដែលមានទីតាំងវិនិយោគស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ៤៨,៧លានដុល្លារអាមេរិក និងបង្កើតការងារបានចំនួន៣៨០នាក់ ។

៧. គម្រោងបង្កើតរោងចក្រផលិតជីវគីមី ដែលមានទីតាំងវិនិយោគស្ថិតនៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង មានទុនវិនិយោគប្រមាណ ២,៣លានដុល្លារអាមេរិក និងអាចបង្កើតការងារបានចំនួន២១៣កន្លែង។

៨. គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិព្រៃស្តេច ឃុំវាល ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ២,៤លានដុល្លារអាមេរិក និងអាចបង្កើតការងារបានចំនួន ៣៨៨នាក់ ។

៩. គម្រោងរោងចក្រកាត់ដេរសម្លៀកបំពាក់ ដែលមានទីតាំងនៅភូមិសំរោងសង្កាត់ឃ្មួញ ខណ្ឌសែនសុខ ភ្នំពេញ មានទុនវិនិយោគប្រមាណ៤,៥លានដុល្លារនិងបង្កើតការងារបានចំនួន១.៩២៩កន្លែង។
តាមការបង្កើតអនុម័តរបស់ក្រុមប្រឹក្សាអភិវឌ្ឍន៍កម្ពុជា ទៅលើគម្រោងវិនិយោគជាបន្តបន្ទាប់នេះ សបញ្ជាក់ថា កម្ពុជានៅតែទទួលបានការវិនិយោគជាហូរហែ ក្នុងបរិបទនៃវិបត្តិជំងឺកូវីដ១៩នេះ៕

ក្រុមមហាសេដ្ឋីអចលនទ្រព្យនៅសិង្ហបុរី សម្រុកដេញថ្លៃដីសាងសង់ ខណៈតម្រូវការលំនៅដ្ឋានមានសន្ទុះកើនឡើង

សុខុម

សិង្ហបុរី: មហាសេដ្ឋី Kwek Leng Beng និងមហាសេដ្ឋី Wee Cho Yaw ស្ថិតក្នុងចំណោមមហាសេដ្ឋីអចលនទ្រព្យមានជាងគេបំផុតនៅប្រទេសសិង្ហបុរី ដែលកំពុងសម្រុកដេញថ្លៃជួលដីរដ្ឋដើម្បីក្ដោបក្ដាប់ទីផ្សារអចលនទ្រព្យ ខណៈតម្រូវការលំនៅដ្ឋានក្នុងរដ្ឋបុរី (ប្រទេសមានតែក្រុង) នេះកំពុងមានសន្ទុះកើនឡើង។ នេះបើយោងតាមទស្សនាវដ្ឋី Forbes ចុះផ្សាយកាលពីថ្ងៃទី២៦ ឧសភា។

ក្រុមហ៊ុន Wee’s UOL Group របស់លោក Wee Cho Yaw បានដាក់សំណើដេញថ្លៃខ្ពស់បំផុតរហូតដល់២៨៨,២លានដុល្លារអាមេរិក សម្រាប់ទីតាំងដីជួល៩៩ឆ្នាំសម្រាប់សង់លំនៅដ្ឋាននៅតំបន់ Ang Mo Kio ប្រទេសសិង្ហបុរី ភាគខាងជើង។ ការដេញថ្លៃរបស់ក្រុមហ៊ុន UOL Group នេះធ្វើឡើងដោយចាប់ដៃគូសហការជាមួយក្រុមហ៊ុន City Developments របស់លោក Kwek Leng Beng ក្រុមហ៊ុន MCL Land ព្រមទាំងការវិនិយោគរួមគ្នារវាងក្រុមហ៊ុនឯកជន Far East Organization ដែលគ្រប់គ្រងដោយមហាសេដ្ឋីពីរនាក់បងប្អូន Robert និង Phillip Ng និងក្រុមហ៊ុនជប៉ុន Sekisui House ផងដែរ។

យោងតាមអាជ្ញាធរអភិវឌ្ឍន៍ទីក្រុងដែលគ្រប់គ្រងការដេញថ្លៃនេះឱ្យដឹងថា ទីតាំងដីខាងលើទាញបានការដេញថ្លៃសរុបចំនួន១៥។ ជាមួយនឹងផ្ទៃសរុប១២.៦៧៩ម៉ែត្រការ៉េ ទីតាំងនេះអាចអភិវឌ្ឍទៅជាអគារដែលមានផ្ទៃបាតសរុប៣១.៦៩៩ម៉ែត្រការ៉េ។

*ការដេញថ្លៃមួយទៀត

ទីតាំងលំនៅដ្ឋានរបស់រដ្ឋមួយកន្លែងផ្សេងទៀតនៅ Tengah Garden Walk ក្នុងតំបន់ Clementi បានទាក់ទាញចំណាប់អារម្មណ៍ខ្លាំងពីអ្នកដេញថ្លៃចំនួន៧នាក់។ នេះបើយោងតាមក្រុមប្រឹក្សាអភិវឌ្ឍន៍លំនៅដ្ឋានដែលគ្រប់គ្រងការដេញថ្លៃនោះ។ ក្រុមហ៊ុន Taurus Properties ដែលជាក្រុមហ៊ុនបណ្តាក់ទុនរួមគ្នារវាងក្រុមហ៊ុន City Developments និង MCL បានដាក់សំណើដេញថ្លៃខ្ពស់បំផុតចំនួន៣០២លានដុល្លារអាមេរិក។

ក្រុមហ៊ុន Taurus Properties បានចេញសេចក្តីថ្លែងការណ៍ថា ជាមួយនឹងផ្ទៃដីសរុប២២.០២០ម៉ែត្រការ៉េ ខ្លួនគ្រោងសាងសង់លំនៅដ្ឋានប្រមាណ៦២០យូនីតនៅលើទីតាំងដីជួល៩៩ឆ្នាំនៅតំបន់ Tengah Garden នេះ។

លោក Song Seng Wun អ្នកជំនាញសេដ្ឋកិច្ចនៅធនាគារឯកជន CIMB បានថ្លែងថា ចំណាប់អារម្មណ៍ខ្លាំងនៅក្នុងការដេញថ្លៃទីតាំងដីលំនៅដ្ឋានទាំងនេះ ឆ្លុះបញ្ចាំងពីទំនុកចិត្តលើសេដ្ឋកិច្ចរបស់ប្រទេសសិង្ហបុរី ដោយសារវិធានការស្ដារសេដ្ឋកិច្ចរបស់រដ្ឋាភិបាល។ រដ្ឋាភិបាលរំពឹងថា សេដ្ឋកិច្ចនឹងទទួលបានកំណើនចន្លោះពី៤%ទៅ៦%ក្នុងឆ្នាំ២០២១នេះ។

ទំនុកចិត្តបែបនេះ បានជំរុញឱ្យមានការសម្រុកដេញថ្លៃជួលទីតាំងដីលំនៅដ្ឋានក្នុងប្រទេសនេះ។ កាលពីដើមខែនេះ ក្រុមហ៊ុន City Developments ដេញថ្លៃឈ្នះក្រុមហ៊ុនអភិវឌ្ឍន៍ចំនួន៩ផ្សេងទៀតសម្រាប់ទីតាំងដីលំនៅដ្ឋាន និងពាណិជ្ជកម្មចម្រុះគ្នានៅតាមបណ្ដោយផ្លូវ Northumberland Road ក្នុងប្រទេសនេះ៕

តើកត្តាអ្វីខ្លះដែលវិស័យអចលនទ្រព្យកម្ពុជានៅតែមានសក្តានុពលក្នុងការវិនិយោគ ធៀបជាមួយបណ្តាប្រទេសក្នុងតំបន់អាស៊ាន

ដោយៈសាវុធ

ភ្នំពេញៈ អ្នកជំនាញក្នុងវិស័យអចលនទ្រព្យបានលើកឡើងថា វិស័យអចលនទ្រព្យនៅកម្ពុជា នៅតែមានភាពល្អប្រសើរជាងគេ ធៀបជាមួយបណ្តាប្រទេស នៅក្នុងតំបន់អាស៊ាន ទាក់ទងនឹងឱកាសវិនិយោគ និងការទាញយកផលចំណេញពីការវិនិយោគ ខណៈចិនឈរ នៅលំដាប់កំពូលមួយក្នុងការវិនិយោគតំបន់អាស៊ាន។

ប្រធានក្រុមប្រឹក្សាភិបាលប្រតិបត្តិសមាគមអ្នកវាយតម្លៃ និងភ្នាក់ងាអចលនវត្ថុកម្ពុជា (CVEA) លោកលឹម សុជាតិបានលើកឡើងកាលពីថ្មីៗនេះថា បច្ចុប្បន្នមានអ្នកវិនិយោគិនច្រើន មកវិនិយោគនៅកម្ពុជាក៏ពិតមែន ប៉ុន្ដែកម្ពុជាមិនស្ថិតក្នុងលំដាប់ថ្នាក់ (Top4) នៃការវិនិយោគរបស់ចិនឡើយ ក្នុងចំណោមលំដាប់ថ្នាក់ទាំង៤នេះ មានតែក្នុងប្រទេសថៃ សឹង្ហបុរី វៀតណាម និងម៉ាឡេស៊ីប៉ុណ្ណោះ។

ទោះបីជាយ៉ាងនេះក្តី លោកបានថ្លែងថា “និយាយចំពោះអចលនទ្រព្យនៅកម្ពុជា មានភាពល្អជាងបណ្ដាប្រទេសផ្សេងៗ ដោយសារតែតម្លៃធូរ ហើយមានការលក្ខខណ្ឌអនុ គ្រោះច្រើន”។

 

លោកបន្ថែមថា និយាយជារួមចំពោះតំបន់អាស៊ាន ពិសេសប្រទេសកម្ពុជា វិនិយោគិនចិន ជាកម្លាំងទិញដ៏ធំមួយ មូលហេតុដែលចិនជាកម្លាំងទិញដ៏ធំ ដោយសារតែ ៧៨ភាគរយនៃប្រជាជនចិន ដែលមានអាយុចន្លោះ៣០-៤៩ ជាវ័យធ្វើការវិនិយោគរកប្រាក់ចំនេញ ហើយមួយវិញទៀត៦៧ភាគរយ នៃប្រជាជនចិនជាប្រជាជនដែលមានជីវភាពធូរធាខ្លាំងដែរ។

លោកលឹម សុជាតិបានបញ្ជាក់ថា “ផ្អែកលើកត្តាខាងលើនេះកម្ពុជា ខ្ញុំនៅតែមានសុទ្ធនិយមថា នៅពេលស្ថានភាពល្អប្រសើរឡើងវិញ ទោះល្អតែបន្ដិចក្ដីក៏កម្ពុជា នៅតែអាចទាក់ទាញវិនិយោគិន ពីក្រៅប្រទេសមកវិនិយោគនៅកម្ពុជា ពិសេសការវិនិយោគពីប្រទេសចិននេះតែម្ដង”។

ជាមួយគ្នានេះ លោកសន សៀបអនុប្រធានប្រតិបត្តិ CVEA បានលើកឡើងថា បន្ទាប់ពីជំងឺកូវីដ១៩ បានធូរស្បើយ ចិននឹងក្លាយជាប្រទេសទី១ ក្នុងការចូលមកវិនិយោគនៅកម្ពុជា។

លោកបានថ្លែងថា “ខ្ញុំជឿជាក់ថា បន្ទាប់ពីជំងឺកូវីដបានថមថយនៅកម្ពុជា ចិននឹងឈរលំដាប់ថ្នាក់ទី១ ក្នុងការវិនិយោគនៅកម្ពុជា។ និយាយជារួមក្រៅអំពីចិន ក៏មានប្រទេ សផ្សេងៗដូចជា កូរ៉េ តៃវ៉ាន់ ជប៉ុន ម៉ាឡេស៊ី សឹង្ហបុរី និងថៃជាដើមផងដែរ”។

លោកបន្ដថា វិស័យអចលនទ្រព្យ ជាវិស័យមួយដែលកម្ពុជា ទទួលបានផលដោយផ្ទាល់ ពីការវិនិយោគរបស់ចិន ជាក់ស្ដែងក្នុងក្រុងព្រះសីហនុ និងរាជធានីភ្នំពេញ។ កាលពីឆ្នាំ២០២០ ការវិនិយោគផ្ទាល់របស់ចិន មកតំបន់អាស៊ានកើន៥១ភាគរយ ហើយចំពោះកម្ពុជាការវិនិយោគរបស់ចិនកើនដល់៧០ភាគរយ៕

ប្រធានGRA: អ្នកទិញអចលនទ្រព្យមានឱកាសច្រើន អំឡុងពេលមានវិបត្តិ

ដោយៈ រតនៈ

ភ្នំពេញៈ ក្នុងអំឡុងសម័យកាល កូវីត១៩ ដែលបានអូសបន្លាយជាង២ឆ្នាំមកហើយនោះ អ្វីថ្មីបានកើតឡើង ហើយឱកាសថ្មីៗក៏បានកើតឡើងផងដែរដូចជាការធ្វើការតាមប្រព័ន្ធអនឡាញ ឬ ការលក់ដូរផ្សេងៗ ខណៈអ្នកជំនាញផ្នែកអចលនទ្រព្យក៏មើលឃើញថាឱកាសទិញអចលនទ្រព្យបានក្នុងតម្លៃល្អក៏មានច្រើនផងដែរសម្រាប់វិស័យមួយនេះ។

លោកសំ សុខនឿនប្រធានសមាគមអចលនទ្រព្យសកល (GRA) មានប្រសាសន៍ក្នុងកិច្ចសំភាសន៍ជាមួយPropertyarea នៅថ្ងៃទី ២៧ ខែឧសភានេះថា ក្នុងបញ្ហាគឺតែងតែមានឱកាស ក្នុងនោះសម្រាប់ការទិញ ដូរអចលនទ្រព្យក៏ដូចគ្នាអ្នកទិញអចលនទ្រព្យមានឱកាសច្រើនក្នុងការទិញក្នុងតម្លៃមួយសមរម្យ មិនថាតែអ្នកទិញសម្រាប់ធ្វើអាជីវកម្មទិញលក់ ឬទិញសម្រាប់ ស្នាក់នៅនោះទេ។

លោកបន្តថា អ្នកទិញអចលនទ្រព្យដែលមានឱកាសបំផុតគឺអ្នកដែលមានលុយហើយទិញដីឬផ្ទះទុកសម្រាប់ចំណេញ។

លោកសំ សុខនឿនបានបន្ថែមថា ក្នុងអំឡុងពេលមានជំងឺកូវីតនេះ គឺចំនួនអ្នកទិញអចលនទ្រព្យគឺថយចុះ ហើយការលក់វិញគឺមានមួយចំនួនតូចបញ្ចុះតម្លៃដោយសារតែអ្នកលក់ទាំងនោះមានបញ្ហាហិរញ្ញវត្ថុ និងខ្លះលក់នៅថេរ ដែលនេះជាឱកាសសម្រាប់អ្នកទិញ។

ជាមួយគ្នានេះ លោកមើលឃើញថាក្នុងអំឡុងកូវីតនេះប្រសិនបើអតិថិជនមិនអាចទិញអចលនទ្រព្យដោយប្រាក់សុទ្ធទេនោះគឺអាចបង់រំលស់ដោយប្រើរយៈពេលយូរ បើនិយាយជារួមគឺអ្នកទិញមានអំណាចក្នុងចរចារជាមួយអ្នកលក់ជាងពេលធម្មតា។

លោកក៏មើលឃើញផងដែរថា ប្រជាពលរដ្ឋហាក់យល់ច្រឡំ ដោយអ្នកខ្លះគាត់មានប្រាក់តែមិនចង់បញ្ចេញដោយគិតថាមិនគួរបញ្ចេញប្រាក់ក្នុងសម័យកូវីត ប៉ុន្តែអ្វីដែលលោក សំ សុខនឿនមើលឃើញគឺជាឱកាសល្អដែលគួរតែទិញព្រោះបើគាត់ចាំបាត់កូវីតគឺមិនមានតម្លៃល្អៗនោះទេ៕

អាជ្ញាធររាជធានីភ្នំពេញបន្ថែមតំបន់លឿងទុំក្នុងសង្កាត់ចំនួន២ បន្ទាប់ពីចំនួនអ្នកឆ្លងកើនឡើង

ដោយៈ រតនៈ

ភ្នំពេញៈ រដ្ឋបាលរាជធានីភ្នំពេញកំណត់ផ្នែកខ្លះ នៃភូមិផ្សារតូច នៃសង្កាត់ទួលសង្កែទី១ ខណ្ឌឫស្សីកែវ និងផ្នែកខ្លះនៃភូមិព្រៃទា១ នៃសង្កាត់ចោមចៅទី៣ ខណ្ឌពោធិ៍សែនជ័យ ដែលមានអត្រាការឆ្លងកើនឡើងថ្មី ជា “តំបន់លឿងទុំ” សម្រាប់រយៈពេល ១៤ថ្ងៃ គិតចាប់ពីម៉ោងសូន្យ នាថ្ងៃទី២៧ ខែឧសភា រហូតដល់ថ្ងៃទី០៩ ខែមិថុនា ឆ្នាំ២០២១។

ការកំណត់ “តំបន់លឿងទុំ” នេះគឺដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ដោយមានអត្រាការឆ្លងកើនឡើងជាថ្មី។

សេចក្ដីសម្រេចរបស់រដ្ឋបាលរាជធានីភ្នំពេញ ចេញនៅយប់ថ្ងៃទី២៦ ខែឧសភានេះ បានឱ្យដឹងថា ផ្នែកខ្លះ នៃភូមិផ្សារតូច នៃសង្កាត់ទួលសង្កែទី១ ខណ្ឌឫស្សីកែវ និងផ្នែកខ្លះ នៃភូមិព្រៃទា១ នៃសង្កាត់ចោមចៅទី៣ ខណ្ឌពោធិ៍សែនជ័យ ដែលមានអត្រាការឆ្លងកើនឡើងជាថ្មី ត្រូវកំណត់ទៅជាតំបន់លឿងទុំ សម្រាប់រយៈពេល១៤ថ្ងៃ គិតចាប់ពីម៉ោងសូន្យ ថ្ងៃទី២៧ ខែឧសភា ឆ្នាំ២០២១ រហូតដល់ថ្ងៃទី៩ ខែមិថុនា ឆ្នាំ២០២១ ដើម្បីទប់ស្កាត់ការឆ្លងរាលដាលជំងឺកូវីដ១៩។

របាយការណ៍របស់អគ្គស្នងការដ្ឋាននគរបាលជាតិបានឱ្យដឹងថា បន្ទាប់ពីមានការផ្ទុះរាលដាលនៃវីរុសកូវីដ១៩ នៅក្នុងរោងចក្រ H7 នៅម្តុំផ្សារព្រៃទា គិតត្រឹមយប់ថ្ងៃទី ២៥ ខែឧសភា មានកម្មករប្រមាណជាង ២០០ នាក់ហើយបានឆ្លងជំងឺកូវីដ ១៩ ក្នុងចំណោមកម្មករ និងប្រជាពលរដ្ឋជាង ២ ០០០ នាក់ ហើយអ្នកពាក់ព័ន្ធបាននិងកំពុងបន្តយកសំណាកធ្វើតេស្ត៕

លំនៅឋានលំហែកាយនឹងក្លាយជាផ្នែកមួយពេញនិយមនៅពេលពលរដ្ឋកាន់តែមានជីវភាពធូរធា

ភ្នំពេញ ៖ គោលដៅរបស់មនុស្សម្នាក់ៗ គឺបំណងចង់បានលំនៅឋានផ្ទាល់ខ្លួនមួយសមរម្យ ហើយនៅពេលមានលំនៅឋានមួយអចិន្ត្រៃយ៍រួចហើយ ពួកគេនឹងស្វែងរកលំនៅឋានសម្រាប់លំហែកាយនៅចុងសប្ដាហ៍ឬថ្ងៃឈប់សម្រាកពេលបុណ្យទានម្ដងៗ ជាក់ស្ដែងក្នុងពេលនេះ សកម្មភាពនៃការអភិវឌ្ឍតំបន់លំហែកាយក៏ចាប់ផ្ដើមមានសកម្មភាពបន្តបន្ទាប់ផងដែរ ។

លោកច្រឹកសុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាបានមានប្រសាសន៍ថានៅពេលមានពលរដ្ឋកាន់តែមានជីវភាពធូរធា តម្រូវការលំនៅឋានសម្រាប់លំហែកាយនឹងមានកំណើនឡើង ដោយសារតែមនុស្សចង់សម្រាកលំហែកជួបជុំគ្រួសារពេលទំនេរពីការងារ ។

លោកបន្តថា សម្រាប់តំបន់ដែលមានសក្ដានុពលក្នុងការអភិវឌ្ឍលំនៅឋានលំហែកាយនេះគឺតំបន់ដែលមានសក្ដានុពលទេសចរណ៍បែបធម្មជាតិ ដូចជាកំពត កែប មណ្ឌលគីរី រតនគីរី តែសម្រាប់តំបន់ដែលមានសក្ដានុពលខ្លាំងគឺកំពតនិងកែបតែម្ដងព្រោះវានៅមិនឆ្ងាយពីភ្នំពេញ ។

ម្យ៉ាងវិញទៀត ហេដ្ឋារចនាសម្ព័ន្ធតភ្ជាប់ពីភ្នំពេញទៅកាន់តំបន់ទាំងនោះក៏ស្រួល គេអាចធ្វើដំណើរទៅមកបានលឿននិងពេលខ្លះត្រលប់វិលល្ងាចបានស្រួលទៀតផង ។លោកថា៖« ពេលនេះមានវិនិយោគិនក្នុងនិងក្រៅស្រុកជាច្រើនក៏បានចាប់ផ្ដើមវិនិយោគលើចំការលំហែកាយ និងផ្ទះលំលែកាយជាបន្តបន្ទាប់ផងដែរ ហើយក៏មានអ្នកគាំទ្រជាច្រើន » ។

លោកបន្ថែមការអភិវឌ្ឍអចលនទ្រព្យប្រភេទនេះ នឹងកាន់តែពេញនិយមនៅពេលអនាគត នៅពេលពរលដ្ឋកម្ពុជាកាន់តែមានជីវភាពធូរធា និងចង់សម្រាកលហែជាលក្ខណៈគ្រួសារ ដោយមិនចង់ស្នាក់នៅផ្ទះសំណាក់ ឬសណ្ឋាគារ ដែលមានមនុស្សអ៊ូអរច្រើន ។

បើតាមលោកជិន ណារិន ភ្នាក់ងារអចលនទ្រព្យប្រចាំកំពតនិងកែបក៏បានឱ្យដឹងថា ពេលនេះអ្នកអភិវឌ្ឍន៍ដីធ្លីក៏បានបង្វែពីការអភិវឌ្ឍដីឡូត៏ ដែលមានទំហំ៥ម៉ែត្រគុណ២០ម៉ែត្រដូចមុនទៅជាអភិវឌ្ឍដីធ្លីមានទំហំធំៗ ដែលផ្ដោតលើលំនៅឋានលំហែកាយនៅតាមជើងភ្នំ ។ ការងារបែបនេះក៏ឃើញថាកំពុងទទួលបានការគាំទ្រពីសំណាក់ពលរដ្ឋជាពិសេសពលរដ្ឋរស់នៅរាជធានីភ្នំពេញនិងខេត្តផ្សេងៗ ។

លោកបន្តថា បើទោះបីជាមានបញ្ហាដោយសារតែកូវីដ១៩ក្ដី តែសកម្មភាពនៃការទិញលក់ដីធ្លីប្រភេទនិងដីធ្លីផ្សេងៗទៀតនៅតែសកម្មភាពជាហូរហែ ព្រោះតែការជឿជាក់លើរដ្ឋាភិបាលក្នុងការទប់ស្កាត់ជំងឺឆ្លងនេះ និងសក្ដានុពលនៃតំបន់សម្រាប់ការអភិវឌ្ឍនៅពេលឆាប់ៗនេះផងដែរ ៕