ដោយៈ ម៉ាណេត

ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ ជំរុញឱ្យទីភ្នាក់ងារបារាំងសម្រាប់ការអភិវឌ្ឍន៍ (AFD) ធ្វើការអនុម័តឲ្យបានឆាប់នូវគម្រោងពីរ ដែលកំពុងស្ថិតក្នុងធ្វើការវាយតម្លៃ ដើម្បីផ្តល់ហិរញ្ញប្បទាននៅក្នុងឆ្នាំ២០២១ និងរជួយទ្រទ្រង់សេដ្ឋកិច្ចគ្រួសារ ឱកាសការងារ និងសន្តិសុខស្បៀង។

ការជំរុញនេះត្រូវបានធ្វើឡើងនៅព្រឹកថ្ងៃទី៧ ខែមេសា ឆ្នាំ២០២១ ក្នុងជំនួបប្រជុំមួយរវាងលោកវេង សាខុនរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោកស្រី Ophelie Bourhis នាយិកាទីភ្នាក់ងារ AFD ប្រចាំក្រកម្ពុជា។

យោងតាមក្រសួងកសិកម្មបានឱ្យដឹងថា មានគម្រោងពីរទៀត កំពុងធ្វើការវាយតម្លៃ ដើម្បីផ្តល់ហិរញ្ញប្បទាននៅក្នុងឆ្នាំ២០២១ នេះ ដែលទីមួយ ជាគម្រោងកម្មវិធីស្តីពី “ការអភិវឌ្ឍន៍បច្ចេកវិទ្យាកសិកម្មដោយពឹងលើទឹកភ្លៀង រួមមាន កៅស៊ូ ដំណាំចំណីសត្វ និងបន្លែ” ដែលភាគី AFD និងចូលរួមផ្តល់ហិរញ្ញប្បទានចំនួន៥០លានអ៊ឺរ៉ូ និងគម្រោងកម្មវិធីទីពីរ ដែលមានឈ្មោះថា “ការគ្រប់គ្រងជលផលនៅតំបន់ឆ្នេ និងសមុទ្រ ប្រកបដោយនិរន្តភាព” ដែលត្រូវចូលរួមសហហិរញ្ញប្បទាន ជាមួយធនាគារអភិវឌ្ឍន៍អាស៊ី ចំនួន៣០លានអ៊ឺរ៉ូ។

ក្រសួងបានឱ្យដឹងទៀតថា ក្នុងកិច្ចពិភាក្សានេះ លោករដ្ឋមន្ត្រីបានគាំទ្រ និងជំរុញឲ្យ AFD ធ្វើការអនុម័តឲ្យបានឆាប់ ដែលអាចធ្វើទៅបានដើម្បីអនុវត្តន៍ ឲ្យស្របតាមស្ថានភាពបច្ចុប្បន្ននៃផលិតកម្មសត្វ និងបន្លែកំពុងតែចូលរួមយ៉ាងសកម្ម ក្នុងការជួយទ្រទ្រង់សេដ្ឋកិច្ចគ្រួសារ ឱកាសការងារ និងសន្តិសុខស្បៀង។

លោកស្រី Ophelie Bourhis បានឱ្យដឹងថា ដោយឡែកគម្រោងពីរទៀតនេះ មួយគ្រោងនឹងអនុវត្តក្នុងឆ្នាំនេះ និងមួយទៀតកំពុងពិនិត្យ និងវាយតម្លៃ ហើយអាចធ្វើការអនុម័តក្នុងឆ្នាំ២០២១ នេះដែរ។

លោកស្រីសង្ឃឹម និងជឿជាក់ថា គម្រោងនឹងចូលរួមចំណែងធ្វើឲ្យខ្សែច្រវាក់តម្លៃផលិតកម្មកសិកម្មមានលក្ខណល្អប្រសើរ រួមទាំងងផលិតកម្មសត្វ និងបន្លែផងដែរ ដែលនឹងចូលរួមលើកកម្ពស់តម្លៃ បន្ថែមទីផ្សារ និងការប្រកួតប្រជែងទាំងបរិមាណ គុណភាព និងសុវត្ថិភាព តាមរយ:ការអនុវត្តបច្ចេកវិទ្យាកសិកម្មទំនើប សមស្រប ធន់នឹងការប្រែប្រួ​លអាកាសធាតុ បរិយាប័ន្ន និងនវានុវត្តន៍៕

ដោយៈគង់ សូរិយា

ភ្នំពេញៈ  ក្រសួងទេសចរណ៍ បានណែនាំដល់មន្ទីរទេសចរណ៍រាជធានី ខេត្ត ឲ្យសហការជាមួយរដ្ឋបាលរាជធានី ខេត្ត និងអាជ្ញាធរមូលដ្ឋាន ធ្វើការបិទរមណីយដ្ឋាន គោលដៅទេសចរណ៍ ជាបណ្តោះអាសន្នរយៈពេល២សប្តាហ៍ ចាប់ពីថ្ងៃទី៧ ដល់ទី២០ ខែមេសា។

ការបិទរមណីដ្ឋាននិងគោលដៅទេសចរណ៍នេះ អនុវត្តតាមសេចក្តីសម្រេចរាជរដ្ឋាភិបាលស្តីពីការហាមឃាត់ការធ្វើដំណើរ និងការបិទរមណីយដ្ឋានទេសចរណ៍ទូទាំង ប្រទេសជាបណ្តោះអាសន្ន ដើម្បីទប់ស្កាត់ការឆ្លងរាលដាលនៃជម្ងឺកូវីដ-១៩។

ទន្ទឹមនឹងនេះ មន្ទីរទេសចរណ៍រាជធានី ខេត្ត ត្រូវចាត់តាំងក្រុមការងារ ដើម្បីតាមដានត្រួតពិនិត្យកិច្ចការ នេះឲ្យបានម៉ត់ចត់ដោយមិន ត្រូវអនុញ្ញាតឲ្យមានសកម្មភាពទេសចរណ៍ណាមួយនៅតាមរមណីយដ្ឋានទេសចរណ៍ គោលដៅទេសចរណ៍ សហគមន៍ទេសចរណ៍ និងកន្លែងដែលមានសក្តានុពលទេសចរណ៍ ដែលមាននៅក្នុងមូលដ្ឋាន របស់ខ្លួនក្នុងរយៈពេលនៃការបិទជាបណ្តោះអាសន្ននេះ ជាដាច់ខាត៕

ដោយៈសុខុម

សិង្ហបុរី:  ក្រុមហ៊ុនផ្គត់ផ្គង់ទឹក ភ្លើង និងហ្គាសSP Group ទឹកបានប្រកាសកាលពីថ្ងៃអង្គារ ទី៦ ខែមេសាកន្លងមកថា ខ្លួននឹងដំណើរការសាងសង់ អនុស្ថានីយអគ្គិសនីក្រោមដីខ្នាតយក្សដំបូងបង្អស់ប្រចាំអាស៊ីអាគ្នេយ៍ នៅតំបន់ការពារធម្មជាតិ Labrador Nature Reserve ក្នុងចំណាត់ការមួយ ដើម្បីសន្សំទីធ្លាទុកសម្រាប់ការអភិវឌ្ឍទីក្រុងនៅក្នុងសិង្ហបុរី ដែលក្សត់ដី។ នេះបើយោងតាមការចុះផ្សាយរបស់សារព័ត៌មាន CNA។

ជាមួយនឹងគម្រោងសាងសង់បញ្ចប់ជាស្ថាពរ នៅឆ្នាំ២០២៤ អនុស្ថានីយអគ្គិសនីក្រោមដីនេះ នឹងផ្គត់ផ្គង់តម្រូវការអគ្គិសនី ក្នុងតំបន់ក្បែរខាងជាច្រើន ដូចជា តំបន់ Alexandra តំបន់ Clementi តំបន់ Keppel តំបន់ Pasir Panjang និងសង្កាត់ Science Park ជាដើម។

ក្រុមហ៊ុន SP Group បានចេញសេចក្ដីប្រកាសព័ត៌មានថា ការសាងសង់អនុស្ថា​នីយអគ្គិសនីក្រោមដីនេះ នឹងចំណេញដីដែលមានហាងឆេងខ្ពស់ រហូតដល់ទៅ៣ហិកតា ដែលស្មើនឹងតារាងបាល់ទាត់ដល់ទៅ៤ឯណោះ។

លោក Stanley Huang នាយកប្រតិបត្តិក្រុមហ៊ុននេះ បានគូសបញ្ជាក់ថា នៅពីលើអនុស្ថានីយនេះ នឹងមានការសាងសង់អគារពាណិជ្ជកម្ម មួយកម្ពស់៣៤ជាន់ ដែលគ្រោងសាងសង់បញ្ចប់ជាស្ថាពរនៅឆ្នាំ២០២៤ដូចគ្នា។

លោកថ្លែងថា “ការអភិវឌ្ឍនេះ គឺស្របគ្នាទៅនឹងផែនការកែលម្អ ទីក្រុងរបស់ប្រទេសសិង្ហបុរី និងគោលដៅអភិវឌ្ឍន៍ប្រកប ដោយនិរន្តរភាពរបស់អង្គការសហប្រជាជាតិ ដើម្បីធានាបាននូវការប្រើប្រាស់ “ថាមពលដែលអាចជឿទុកចិត្តបាន ប្រកបដោយនិរន្តរភាព និងទំនើបសម្រាប់គ្រប់គ្នា” និងការកសាងហេដ្ឋារចនាសម្ព័ន្ធប្រកបដោយនិរន្តរភាព”។

ក្រុមហ៊ុន SP Group និយាយថា អនុស្ថានីយអគ្គិសនី ជាផ្នែកនៃហេដ្ឋារចនាសម្ព័ន្ធដ៏សំខាន់មួយ ដែលផ្គត់ផ្គង់ថាមពលដល់លំនៅដ្ឋាន ការិយាល័យ ឧស្សាហកម្ម និងសេវាកម្មសាធារណៈ។

ក្រុមហ៊ុននេះបានគូសបញ្ជាក់ថា អនុស្ថានីយអគ្គិសនីក្រោមដីនេះ នឹងមានអគ្គិសនីកម្លាំង២៣០គីឡូវ៉ាត់ សម្រាប់ផ្គត់ផ្គង់ដល់តំបន់រហូតដល់ទៅ៨៕

        ដោយៈសហការី

ភ្នំពេញៈ អភិបាលរាជធានីភ្នំពេញ លោក ឃួង ស្រេង បានលើកទឹកចិត្ត និងអំពាវនាវដល់ម្ចាស់ភោជនីយដ្ឋាន ហាងកាហ្វេ និងកន្លែងលក់គ្រឿងហូបទាំងអស់នៅទូទាំងរាជធានីភ្នំពេញ គួរបម្រើសេវាដោយខ្ចប់ជូនអតិថិជន ប្រសើរជាការអង្គុយទទួលទាននៅក្នុងហាង។

លោកឃួង ស្រេងបានមានប្រសាសន៍ប្រាប់សារព៌តមានFreshnewsនាព្រឹកថ្ងៃទី៧ មេសានេះថា ចំនួនអ្នកឆ្លងជំងឺកូវីដ១៩ នៅក្នុងរាជធានីភ្នំពេញ ហាក់មិនមានការថមថយ ហើយភាគីច្រើនកើតឡើងនៅតាមភោជនីយដ្ឋាន ហាងកាហ្វេ ដោយសារតែមនុស្សជាច្រើន នៅតែបន្ដទៅជួបជុំទទួលទានអាហារ ដោយមិនបានរក្សាគម្លាតត្រឹមត្រូវតាមការណែនាំរបស់ក្រសួងសុខាភិបាល។

លោកឃួង ស្រេង បានថ្លែងយ៉ាងដូច្នេះថា “ក្នុងនាមរដ្ឋបាលរាជធានីភ្នំពេញ សូមធ្វើការអំពាវនាវដល់ម្ចាស់ភោជនីយដ្ឋាន ហាងកាហ្វេ និងកន្លែងលក់គ្រឿងហូបទាំងអស់ នៅក្នុងរាជធានីភ្នំពេញ បន្ដអនុវត្តន៍ឲ្យបានខ្ជាប់ខ្ជួននូវវិធានសុខាភិបាល ពិសេសកាត់បន្ថយចំនួនភ្ញៀវដែលអង្គុយនៅក្នុងហាង ហើយបើល្អបំផុតសូមបម្រើអតិថិជនដោយការខ្ចប់”។

លោកឃួង ស្រេង បានគូសបញ្ជាក់ថា ក្នុងករណីម្ចាស់ភោជនីយដ្ឋាន ឬហាងកាហ្វេ ចង់ឲ្យអតិថិជនបន្ដទទួលទាននៅក្នុងទីតាំងរបស់ខ្លួន ត្រូវតែអនុវត្តឲ្យបានខ្ជាប់ខ្ជួនតាមវិធានសុខាភិបាល ដោយរក្សាគម្លាតសុវត្ថិភាពបុគ្គលចាប់ពី១ម៉ែត្រកន្លះ ឬកាត់បន្ថយចំនួនកៅអីដែលអង្គុយនៅតាមតុដែលមានការប្រមូលផ្ដុំ។

បើតាមអភិបាលរាជធានីភ្នំពេញ ក្នុងករណីម្ចាស់ទីតាំងភោជនីយដ្ឋាន ហាងកាហ្វេ នៅតែអនុវត្តមិនបានត្រឹមត្រូវ តាមការណែនាំរបស់អាជ្ញាធរមានសមត្ថកិច្ច និងវិធានរបស់ក្រសួងសុខាភិបាលទេនោះ អាជ្ញាធរនឹងចាត់វិធានការតាមផ្លូវច្បាប់ជាធរមាន ដើម្បីចូលរួមការពារ និងទប់ស្កាត់ការឆ្លងរីករាលដាលជំងឺកូវីដ១៩ ក្នុងសហគមន៍។

មន្ដ្រីសុខាភិបាលបានឲ្យដឹងផងដែរថា ករណីឆ្លងជាច្រើននៅក្នុងរាជធានីភ្នំពេញ នៅពេលសួរនាំទៅកាន់ប្រជាពលរដ្ឋដែលឆ្លងនោះ គឺមានប្រភពចេញពីកន្លែងហូបចុក ជួបជុំ នៅតាមភោជនីយដ្ឋាន ឬហាងកាហ្វេជាដើម។ លើសពីនេះទៅទៀត ក៏មានការឆ្លងចេញពីកន្លែងហូបបាយជុំគ្នានៅកន្លែងធ្វើការផងដែរ។

ជាក់ស្ដែងបុគ្គលិកធនាគារមួយ ពេលធ្វើការមានការពាក់ម៉ាស់ត្រឹមត្រូវ ហើយខ្ចប់បាយផ្ទះទៅដើម្បីហូប ប៉ុន្ដែបែរជាត្រូវឆ្លងចេញពីកន្លែងហូបបាយជុំគ្នានៅកន្លែងធ្វើការទៅវិញ។ យ៉ាងណាមិញ ទីតាំងភោជនីយដ្ឋាន និងហាងកាហ្វេ ដែលត្រូវបានរកឃើញថា មានការពាក់ព័ន្ធអ្នកកើតជំងឺកូវីដ១៩ ត្រូវបានបិទទ្វារបណ្ដោះអាសន្នជាបន្ដបន្ទាប់ផងដែរ៕

ដោយៈ ប៊ី

ភ្នំពេញៈ គម្រោងហេដ្ឋរចនាសម្ព័ន្ធ និងគម្រោងអភិវឌ្ឍន៍ធំៗចំនួន៥ នឹងលើកកម្ពស់វិស័យអចលនទ្រព្យនៅកម្ពុជា ខណៈគម្រោងទាំង៥នេះបាន និងកំពុងដំណើរសាសង់ទៅតាមការគ្រោងទុក បើទោះបីមានវិបត្តិកូវីដ១៩ក៏ដោយ។

តំបន់បាក់ខែង បានក្លាយជាទីតាំងសម្រាប់ព្រឹត្តិការណ៍ដ៏សំខាន់មួយ ដើម្បីស្វា​គមន៍ព្រឹត្តិការណ៍ស៊ីហ្គេមឆ្នាំ២០២៣។ ពហុកីឡដ្ឋានមរតកតេជោ បានបញ្ចប់ការដំឡើងកៅអីចំនួន១២.០០០ ក្នុងចំណោមកៅអីចំនួន៤០.០០០ ហើយដំណើរការសាងសង់នឹងបញ្ចប់នៅខែឧសភា ឆ្នាំ២០២១។

ផ្លូវ៣០ម៉ែត្រថ្មីក្នុងខណ្ឌសែនសុខ ដែលតភ្ជាប់ពីវិថីឈ្នះ-ឈ្នះ និងផ្លូវ Aeon Sen Sok បានទទួលជោគជ័យក្នុងការសាងសង់ ដោយនៅសល់តែការតុបតែងចុងក្រោយ និងភ្លើងបំភ្លឺតាមដងផ្លូវ។

ផ្លូវល្បឿនលឿនភ្នំពេញ -ក្រុងព្រះសីហនុ នៅតែបន្តដំណើរការសាងសង់ ទោះបីស្ថិតក្នុងវិបត្តិជំងឺរាតត្បាតកូវិដ១៩ ក៏ដោយ។ នៅថ្ងៃទី២ ខែមីនា ឆ្នាំ២០២១ ការក្រាលកៅស៊ូលើផ្នែកគំរូនៃផ្លូវត្រូវបានបញ្ចប់ ហើយគម្រោងសាងសង់ សម្រេចបាន៤០%ហើយ។ គម្រោងនេះគ្រោងនឹងបញ្ចប់ជាស្ថាពរនៅចុងឆ្នាំ២០២៣។

គម្រោងកាស៊ីណូ និងសណ្ឋាគារណាហ្គា៣ ត្រូវបានរាយការណ៍ថា បានបើកការ   ​ដ្ឋាន ហើយបានចាប់ផ្តើមដំណើរការការងារសាសង់។

គម្រោងនេះត្រូវបានរំពឹងថា នឹងបញ្ចប់នៅឆ្នាំ២០២៤ និងរួមមានកន្លែងកម្សាន្តចម្រុះ ខុនដូបែបសណ្ឋាការ ឧទ្យានបែបឌីជីថល និងកន្លែងកម្សាន្តផ្សេងៗទៀត។

ក្រុមហ៊ុនOCIC បានរាយការណ៍នៅខែកុម្ភៈ ឆ្នាំ២០២១ ថា ការសាងសង់នៅអាកាសយានដ្ឋានអន្តរជាតិភ្នំពេញថ្មី ត្រូវបានរំពឹងថានឹងសម្រេចបាន៥០ភាគរយ គិតត្រឹមចុងឆ្នាំ២០២១។ អាកាសយានដ្ឋាននេះ នឹងលាតសន្ធឹងលើផ្ទៃដី២,៦០០ហិកតា ដែលមានទីតាំងស្ថិតនៅខេត្តកណ្តាល នៅខាងត្បូងរាជធានីភ្នំពេញហើយគ្រោងនឹងបញ្ចប់ទាំងស្រុងនៅឆ្នាំ២០២៣។

អ្នកជំនាញក្នុងវិស័យអចលនទ្រព្យបានលើកឡើងថា ជាធម្មតា គម្រោងអភិវឌ្ឍន៍ហេដ្ឋារចនាសម្ព័ន្ធ និងគម្រោងអភិវឌ្ឍន៍ធំៗ នឹងលើកកម្ពស់មុខមាត់នៅតំបន់ ពិសេសជួយបង្កើនតម្លៃអចលនទ្រព្យនៅជុំវិញតំបន់នោះ៕