World Bank បាននិងកំពុងជួយកម្ពុជានិងបណ្តាប្រទេសEAPដើម្បីស្តារសេដ្ឋកិច្ចឱ្យងើបឡើងវិញបានឆាប់រហ័ស

ដោយៈ ប៊ី

ភ្នំពេញៈ ជំងឺកូវីដ១៩ បានចម្លងដល់មនុស្សយ៉ាងច្រើន ហើយបានឱ្យមានផលប៉ះពាល់ដលសេដ្ឋកិច្ច និងសង្គមនៅទូទាំងពិភពលោក។ នៅពេលដែលបណ្តាប្រទេសនៅជុំវិញពិភពលោក កំពុងទប់ស្កាត់ការរីករាលដាល និងផលប៉ះពាល់នៃកូវីដ១៩ ធនាគារពិភពលោកបានឆ្លើយតបយ៉ាងឆាប់រហ័ស និងធំបំផុតនៅក្នុងប្រវត្តិសាស្រ្តរបស់ខ្លួន ដើម្បីជួយប្រទេសកំពុងអភិវឌ្ឍន៍ពង្រឹងប្រព័ន្ធឆ្លើយតប និងប្រព័ន្ធថែទាំសុខភាពរបស់ពួកគេ។ នេះបើយោងតាមធនាគារពិភពលោក (World Bank) កាលពីសប្តាហ៍មុន។

ជាមួយនឹងការរីករាលដាលយ៉ាងឆាប់រហ័ស នៃជំងឺរាតត្បាតទៅកាន់ប្រទេសកំពុងអភិវឌ្ឍន៍ ធនាគារពិភពលោកកំពុងផ្តល់កម្រិតគាំទ្រ ក្នុងប្រវត្តិសាស្ត្រដល់អតិថិជន។ ទំហំទឹកប្រាក់គាំទ្រ អាចរកបានរហូតដល់១៦០ពាន់លានដុល្លារ ក្នុងរយៈពេល១៥ខែ គិតត្រឹមខែមិថុនា ឆ្នាំ២០២១ ដើម្បីជួយប្រទេសជាង១០០ក្នុងការការពារជនក្រីក្រ និងងាយរងគ្រោះ ជួយទ្រទ្រង់អាជីវកម្ម និងជំរុញកំណើនសេដ្ឋកិច្ចឡើងវិញ។

នៅក្នុងតំបន់អាស៊ីបូព៌ានិងប៉ាស៊ីហ្វិក (EAP) ដែលជាកន្លែងមានការរីករាលដាលនៃជំងឺរាតត្បាតដំបូង ប្រតិបត្ដិការបន្ទាន់ត្រូវបានអនុម័តរួចរាល់ ហើយក្រោមការតាមដានកូវី១៩រហ័ស សម្រាប់ប្រទេសកម្ពុជា ហ្វីជី ឥណ្ឌូនេស៊ី គីរីបាទី ឡាវ កោះ Marshal ម៉ុង ហ្គោលី មីយ៉ាន់ម៉ា ប្រទេសប៉ាពួញូហ្គីណេ ហ្វីលីពីន សាម៉ៅ កោះសូឡូម៉ុន ទីម័រ និងវៀតណាម។

ប្រតិបត្ដិការទាំងនេះផ្តល់នូវហិរញ្ញប្បទានបន្ទាន់ សម្រាប់ការទិញសម្ភារៈវេជ្ជសាស្ត្រ និងមន្ទីរពិសោធន៍ ការបណ្តុះបណ្តាលបុគ្គលិកពេទ្យ និងពង្រឹងប្រព័ន្ធសុខាភិបាលសាធារណៈជាតិ។ ប្រតិបត្ដិការនៅតាមប្រទេសនីមួយៗ ត្រូវបានរៀបចំឡើងស្របតាមបរិបទជាក់លាក់ និងស្ថានភាពរាតត្បាតរបស់ប្រទេស។

ធនាគារពិភពលោក ក៏កំពុងធ្វើការជាមួយបណ្តាប្រទេសជាច្រើន ដើម្បីរៀបចំគម្រោង ដែលមានស្រាប់ឡើងវិញ ដើម្បីប្រយុទ្ធប្រឆាំងនឹងជំងឺរាតកូវីដ១៩ តាមរយៈការបែងចែកមូលនិធិការផ្លាស់ប្តូរ សមាសធាតុបន្ទាន់នៃគម្រោងដែលមានស្រាប់។ រហូតមកដល់ពេលនេះ កិច្ចការនេះត្រូវបានធ្វើនៅប្រទេសកម្ពុជា សហព័ន្ធរដ្ឋម៉ៃក្រូណី ម៉ុងហ្គោលី ហ្វីលីពីន តុងហ្គា ទូវ៉ាលូ សាម៉ៅ និងវ៉ានូអាទូ។

នៅដំណាក់កាលទី២នៃការឆ្លើយតបនឹងជំងឺកូវីដ១៩ ដើម្បីជួយប្រទេសនានាដោះស្រាយផលប៉ះពាល់ខាងសេដ្ឋកិច្ចសង្គម និងភាពក្រីក្រធ្ងន់ធ្ងរ ធនាគារកំពុងធ្វើការជាមួយបណ្តាប្រទេសនានា ដើម្បីពង្រឹងវិធានការការពារសង្គម សម្រាប់ជនក្រីក្រ និងងាយរងគ្រោះជួយគាំទ្រដល់អាជីវកម្ម និងការងារការពារ និងឈានដល់ការកំណែទម្រង់ដែលត្រូវការ ដើម្បីកាត់បន្ថយពេលវេលា ដើម្បីស្តារឡើងវិញ និងបង្កើតលក្ខខណ្ឌ សម្រាប់កំណើនដែលមានមូលដ្ឋានទូលំទូលាយ និងប្រកបដោយចីរភាព។

ដើម្បីផ្តល់ជំនួយសង្គ្រោះបន្ទាន់ សម្រាប់ប្រជាជនងាយរងគ្រោះ ប្រទេសដែលមានប្រាក់ចំណូលទាប និងមធ្យមត្រូវការការទទួលបានវ៉ាក់សាំងត្រឹមត្រូវ និងទូលំទូលាយនិងរហ័ស។ នោះហើយជាមូលហេតុ ដែលធនាគារពិភពលោកកំពុងបង្កើតការឆ្លើយតបដំបូងរបស់ខ្លួន ដែលមានទំហំទឹកប្រាក់១២ពាន់ដុល្លារ ដើម្បីជួយប្រទេសក្រីក្រទិញ និងចែកចាយវ៉ាក់សាំង ការធ្វើតេស្ត និងការព្យាបាល៕

ចេញរកស៊ីដំបូងលោកលី សុខឆាយខាតបង់ប្រាក់អស់ ៣០ម៉ឺនដុល្លារ កាលពី10ឆ្នាំមុន!

ដោយ: ស៊ីវ ម៉េង
ភ្នំពេញៈ មានស្រុកកំណើតនៅសង្កាត់ស្វាយប៉ោ ក្រុងបាត់ដំបង លោកលី សុខឆាយ បានចាប់កំណើតក្នុងគ្រួសារអ្នកជំនួញ មានឥទ្ឋិពលមួយរូប ក្នុងទឹកដីដងស្ទឹងសង្កែឬទឹកដីតាដំបងគ្រញូង។

ក្នុងបឋមវ័យ លោកលី សុខឆាយបានការចាប់ផ្តើមការសិក្សាផ្តោតខ្លាំង ភាសាចិនតាំងពីតូច ដែលធ្វើឲ្យលោកអាចនិយាយភាសាចិន យ៉ាងស្ទាត់ជំនាញ មុនពេលលោកបានមកសិក្សា នៅនៅវិទ្យាល័យជម្ពូរវ័ន្ត រាជធានីភ្នំពេញ ហើយបន្តសិក្សានៅវិទ្យាស្ថានភាសាបរទេស(IFL)នៃសាកលវិទ្យាល័យភូមិន្ទភ្នំពេញ និង ផ្នែកច្បាប់ នៃសាកលវិទ្យាល័យ នីតិសាស្រ្ត វិទ្យាសាស្រ្ត និងសេដ្ឋកិច្ច (RULE)។

ចាប់កំណើត នៅខែមេសា ឆ្នាំ១៩៨៧ ក្នុងក្រុងបាត់ដំបង លោកលី សុខឆាយត្រូវបានគេមើលឃើញថា ជាមនុស្សរៀនសូត្រពូកែ តែងតែជាប់លេខ 1 ឬលេខ 2 ក្នុងថ្នាក់ និងមានចារឹក សុភាពរាបសារ រួសរាយ រាក់ទាក់ គោរពរចាស់ទុំ ប៉ុន្តែម៉ត់ចត់ក្នុងការងារ ហ៊ានប្រថុយ (រកស៊ីត្រូវតែហ៊ានប្រថុយ) ប្រសិនជាពេលវេលាសមស្រប។
ជាភ័ព្វសំណាងមួយ សម្រាប់លោកលី សុខឆាយ ព្រោះលោកបានចាប់កំណើតក្នុងគ្រួសារអ្នកជំនួញឆ្នើម ដែលធ្លាប់មានប្រវត្តិធ្វើការជាមួយអ្នកឧកញ៉ាថៃ ប៊ុនម៉ា អគ្គនាយកក្រុមហ៊ុន Thai Boonrong Group និងបច្ចុប្បន្ន កំពុងសហការធ្វើជំនួញជាមួយ អ្នកឧកញ៉ា ពុង ឃាវសែ ប្រធានសមាគមអ្នកសាងសង់ និងជាអគ្គនាយកក្រុមហ៊ុន OCIC ព្រមទាំងប្រធានអគ្គនាយកធនាគារកាណាឌីយ៉ាជាដើម លោកគឺជាបុគ្គលទី 1 ដែលសរសេរ និងបង្កើត ផែនការអាជីវកម្ម (Business Plan) ចំនួន 40 ទំព័រ ដែលទទួលបានការអនុម័តពីអ្នកឧកញ៉ា ពុង ឃែសែ លើគម្រោងអាជីវកម្មរបស់ខ្លួន!
ដោយសារមានឈាមជ័រ ជាអ្នរកស៊ីបែបនេះហើយ ទើបលោក លី សុខឆាយ មាននិស្ស័យជាអ្នកជំនួញតាំងពីក្មេង ហើយលោកបានចាប់ផ្តើមប្រឡូកជំនួញ ដោយខ្លួនឯង នៅពេលលោកចាប់ផ្តើមសិក្សាភាសាអង់គ្លេស នៅវិទ្យាស្ថានភាសាបរទេស (IFL) នៃសាកលវិទ្យាល័យភូមិន្ទភ្នំពេញ និងផ្នែកច្បាប់ នៃសាកលវិទ្យាល័យ នីតិសាស្រ្ត វិទ្យាសាស្រ្ត និងសេដ្ឋកិច្ច (RULE)។
ចំណង់ចំណូលចិត្តជាអ្នកជំនួញ ស្ថិតនៅពេញក្នុងចិត្តរបស់លោកសុខឆាយ រហូតមក ទើបនៅពេលមួយនោះ លោកបានខាតបង់ប្រាក់ ប្រមាណ៣០ម៉ឺនដុល្លារអាមេរិក ក្នុងការប្រឡូកលើមុខជំនួញទាំងបទពិសោធន៍នៅក្មេងខ្ចី
មុខជំនួញដំបូង ដែលធ្វើឲ្យលោកខាតបង់ធ្ងន់ធ្ងរនោះ គឺលោកបានបើកអាជីវកម្មផ្នែកដឹកជញ្ជូន ( Logistics) ការដេញគម្រោងផ្គត់ផ្គង់ និងការទទួលការកុំម៉ងអីវ៉ាន់ ការដែលគេជំពាក់មិនសង និងខាតបង់ទៅលើប្រាក់ខែបុគ្គលិក ជាពិសេសគាត់ជាប់មើលថែឱពុករបស់គាត់ពេលឈឺ និងត្រូវព្យាបាលនៅប្រទេសថៃអស់រយៈពេល 7 ខែ (ឡើងចុះ) ទើបលុយចំនួន ៣០ម៉ឺនដុល្លារ ត្រូវបានបាត់បង់គួរឲ្យសោកស្តាយ។
លោកលី សុខឆាយបានបញ្ជាក់ថា “ទោះជារងការខាតបង់ធ្ងន់ធ្ងរក្តី ប៉ុន្តែខ្ញុំមិនបានជាប់បំណុល ឬមិនសងប្រាក់ខែបុគ្គលិក និងប្រាក់របស់អាជីវករណាមួយឡើយ គឺបានធ្វើការទូទាត់រួចយ៉ាងល្អ”។ លោកបន្តថា “ជាមួយនឹងបទពិសោធន៍បរាជ័យ បានធ្វើឲ្យខ្ញុំមិនរាងចាលនោះទេ ហើយខ្ញុំនៅតែបន្តរកស៊ីលើផ្នែកដទៃទៀត ជីវិតឈានឡើងជាមួយចក្ចុវិស័យច្បាស់លាស់
ជាបញ្ញវ័ន្តមួយរូប និងជាមនុស្សមានការប្តេជ្ញាចិត្តខ្ពស់ តស៊ូមិនបោះបង់ បានធ្វើឲ្យមុខជំនួញរបស់លោកលី សុខឆាយ ឈានឡើងជាមួយនឹងភាពច្បាស់លាស់ ព្រោះលោកឈរលើមូលដ្ឋានចំណេះដឹង ជំនាញ និងរៀនពីបទពិសោធន៍ធ្លាប់បរាជ័យកន្លងមក ដើម្បីកុំឲ្យកើតមានជាថ្មី។
ការដួលមិនមែនជាបញ្ហានោះទេ ប៉ុន្តែអ្វីសំខាន់គឺដួលហើយចេះក្រោក និងអាចឆ្ពោះទៅមុខដោយស្វាហាប់។
នៅពេលសួរថា តើអ្វីជាមួលដ្ឋាននៃភាពជោគជ័យរបស់លោក លោកលី សុខឆាយបានបង្ហើបឲ្យដឹងថា លោកតែងតែចូលចិត្តរៀនសូត្រជាប្រចាំ ជាមួយមនុស្សជុំវិញខ្លួនទាំងក្មេង ទាំងចាស់ ដោយផ្តោតលើការបង្កើតមិត្ត កសាងទំនាក់ទំនងល្អជាមួយចាស់ទុំ និងអ្នកប្រឡូកក្នុងមុខជំនួញនានា ដើម្បីអាចសិក្សាបាននូវបទពិសោធន៍ថ្មីៗលើមុខជំនួញ ក៏ដូចជាកសាង បណ្តាញមមិត្តភ័ក្តក្នុងអាជីវកម្ម ពិសេសក្នុងវិស័យអចលនទ្រព្យ ព្រោះអចលនទ្រព្យជាវិស័យមួយ ដែលធ្វើការងារជាបណ្តាញ ឬជាក្រុម។
ជាមួយនឹងឥរិយាបទ គោរពចាស់ទុំ និងដាក់ខ្លួនតាមកាលៈទេសៈ លោកលី សុខឆាយ បានទទួលការសហការពីក្រុមហ៊ុនដៃគូជាច្រើន ដើម្បីជម្រុញភាពរីកចម្រើនរបស់LSCG ជាក់ស្តែងកាលពីពេលថ្មីៗនេះលោកបានចុះMOU សហការជាដៃគូជាមួយក្រុមហ៊ុនចិន ក្នុងតម្លៃប្រមាណ២០លានដុល្លារអាមេរិក ដើម្បីម៉ៅការលើគំរោងអចលនទ្រព្យនានា។ ដោយសារតែកេរ្ត៍ឈ្មោះរបស់លោក និងគ្រួសារ ពិសេសការមានទំនាក់ទំនងល្អជាមួយអ្នកឧកញ៉ាធំៗ ដែលមានឥទ្ឋិពលលើមុខជំនួញ និងសេដ្ឋកិច្ចនៅកម្ពុជា៕

អ្នកវិភាគលើកឡើងពីកត្តាដែលជម្រុញឲ្យប្រជាពលរដ្ឋខ្មែររស់នៅខុនដូកាន់តែច្រើន

ដោយស៊ីវ ម៉េង

ភ្នំពេញៈ មានកត្តាសំខាន់ៗជាច្រើនបាននិងកំពុងធ្វើឲ្យមានការផ្លាស់ប្តូរបែបផែនជីវិតរបស់ប្រជាពលរដ្ឋកម្ពុជា ខណៈពួកគេកាន់តែច្រើនបានសម្រេចចិត្តវិនិយោគលើខុនដូ និងទិញសំរាប់ការរស់នៅ។

សហស្ថាបនិក និងជាអគ្គនាយកនៃ Propertyarea.asia ដែលបានតាមដានកាវិវត្ត នៃវិស័យអចលនទ្រព្យនៅកម្ពុជា លោកយិន លាងគង់ បានមានប្រសាសន៍ថា ពិតណាស់ការរីកចម្រើននៃវិស័យបច្ចេកវិទ្យា ការកើនឡើងនូវការយល់ដឹងរបស់ប្រជាពលរដ្ឋ និងការរីកចម្រើននៃសេដ្ឋកិច្ចសង្គម ពិតជាបាននិងកំពុងផ្លាស់ប្តូររបៀប នៃការគិតរបស់ប្រជាពលរដ្ឋ។

លោកបន្តថា “ការស្នាក់នៅតាមខុនដូ បានផ្តល់ភាពងាយស្រួលច្រើនដោយសារគំរោងខ្លះបានផ្តល់សេវាកម្ម ជាកញ្ចប់នៅក្នុងគម្រោងរបស់ពួកគេ ដូចជា មានអាហែងទឹក មាន Sky Bar មាន Mini Mart សេវាកម្មហាត់ប្រាណ និងកន្លែងកំសាន្តនៅលើដំបូលដទៃទៀត” ។

លោកយិន លាងគង់ បានបន្តទៀតថា បទពិសោធន៍បែបនេះ បានធ្លាប់កើតមាននៅប្រទេសថៃ ម៉ាឡេស៊ី វៀតណាមជាដើម ដែលប្រជាពលរដ្ឋដំបូងឡើយពួកគេមិនចង់រស់នៅតាមខុនដូនោះទេ ប៉ុន្តែការរីកចម្រើនផ្នែកនគរូបនីយកម្ម បានផ្លាស់ប្តូរប្រព័ន្ឋនៃការគិតរបស់ពួកគេយ៉ាងឆាប់រហ័ស ហើយប្រជាជនខ្មែរបាននិងកំពុងទទួលឥទ្ឋិពលនេះ។

លោកសំ សុខនឿន ប្រធានសមាគមគមអចលនទ្រព្យសកលបានមានប្រសាសន៍ថា ការរីកចម្រើនសេដ្ឋកិច្ចសង្គម កំនើនតម្លៃអចលនទ្រព្យក្នុងទីក្រុង កម្រិតជីវភាពនិងការយល់ដឹងរបស់ប្រជាពលរដ្ឋកាន់តែប្រសើរឡើង បាននិងកំពុងធ្វើឲ្យនិន្នាការរស់នៅតាមខុនដូរបស់ប្រជាពលរដ្ឋខ្មែរកើនឡើងជាស្វ័យប្រវត្តិ។

លោកបន្តថា “វាមិនមែនជារឿងចម្លែកទេ តែនេះជានិន្នាការវិវត្តន៍របស់សង្គម ដែលនឹងធ្វើឲ្យផ្នត់គំនិតរបស់ប្រជាពលរដ្ឋផ្លាស់ប្តូរជាស្វ័យប្រវត្តិ” ។

យោងតាមការសិក្សារបស់ក្រុមហ៊ុន Urban Living Solution បានរកឃើញថា ទីក្រុងភ្នំពេញនឹងមានប្រជាពលរដ្ឋ រស់នៅប្រមាណ ៥លាននាក់នៅឆ្នាំ២០៣០ខាងមុខ ដែលកំនើនប្រជាសាស្ត្រនេះបាន និងកំពុងជះឥទ្ឋិពលដល់ការផ្លាស់ប្តូរបែបផែនជីវិត ការផ្លាស់ប្តូរផ្នែកនគររូបនីយកម្មទីក្រុង។ ការសិក្សានេះបានរកឃើញកត្តាសំខាន់ៗចំនួន៣ ដូចជា ទី១ កំនើនតម្លៃអចលនទ្រព្យពិសេសលំនៅដ្ឋាន នឹងធ្វើឲ្យប្រជាជនរស់នៅតាមខុនដូ ទី២ ការកកស្ទះចរាចរណ៍នឹងកើនឡើងកាន់តែខ្លាំង ហេតុនេះ ប្រជាពលរដ្ឋនឹងស្វែងរកកន្លែងរស់នៅជិតកន្លែងធ្វើការរបស់ពូកគេ។

ទី៣ ការផ្លាស់ប្តូរគុណភាពជីវិត មានន័យថាគុណភាពជីវិតកាន់តែប្រសើរឡើង ដោយសារការរីកចម្រើននៃបច្ចេកវិទ្យា ដោយពួកគេអាចកុំម៉ង់អាហារញុំាបានតាមការចង់បាន និងមានសេវាកម្មដឹកដល់ផ្ទះរបស់ពួកគេ៕

ស្ថាបត្យកម្មកំពូលថ្មីមួយទៀតរបស់មហាយក្សចិន កំពស់ ៣៣៩ម៉ែត្រ បានសាងសង់បញ្ចប់ជាផ្លូវការ

ដោយៈសុខុម

ប្រទេសចិន: ក្រុមហ៊ុនស្ថាបត្យកម្មអន្តរជាតិ Aedas បានសាងសង់បញ្ចប់ជាស្ថាពរកាលពីពេលថ្មីៗនេះនូវអគារ “មជ្ឈមណ្ឌលហិរញ្ញវត្ថុអន្តរជាតិហេងឈីន” (Hengqin International Financial Centre) កម្ពស់ ៣៣៩ម៉ែត្រ ដែលស្ថិតនៅមាត់ទន្លេគជ់ខ្យង (Pearl River) និងដែលមើលឃើញទេសភាពកោះម៉ាកាវ នៅត្រើយម្ខាង។ នេះបើយោងតាមការចុះផ្សាយរបស់គេហទំព័រ ArchDaily ។

Aedas គឺជាក្រុមហ៊ុនអន្តរជាតិ ដែលផ្ដល់សេវាកម្មផ្នែកស្ថាបត្យកម្ម ការឌីហ្សាញផ្ទៃខាងក្នុង ការឌីហ្សាញសួនឧទ្យាន ការឌីហ្សាញប្លង់ទីក្រុង ការធ្វើផែនការមេ និងក្រាហ្វិក។ ក្រុមហ៊ុននេះ ត្រូវបានបង្កើតឡើងក្នុងឆ្នាំ២០០២ ជាសម្ព័ន្ធរវាងក្រុមហ៊ុនមានស្រាប់ចំនួន៣ នៅប្រទេសអង់គ្លេស ក្រុងហុងកុង និងប្រទេសអូស្ត្រាលី។

គម្រោងអគារមជ្ឈមណ្ឌលហិរញ្ញវត្ថុនេះ មានទីតាំងស្ថិតនៅលើកោះហេងឈីន (Hengqin Island) ក្រុងជូហាយ (Zhuhai) ប្រទេសចិន ហើយថ្ងៃអនាគតដ៏ខ្លីវានឹងក្លាយជាសង្កាត់ហិរញ្ញវត្ថុ ដែលភ្ជាប់ក្រុងហុងកុង កោះម៉ាកាវ និងទីក្រុងធំៗផ្សេងទៀតក្នុងតំបន់ Greater Bay Area (ខេត្តគ័ងតុង-ហុងកុង-ម៉ាកាវ)។

កោះដែលហ៊ុមព័ទ្ធជុំវិញដោយទឹកសមុទ្រ និងជួរភ្នំ និងស្ថិតនៅចំកណ្តាលនៃចង្កោមទីក្រុងលំដាប់ពិភពលោកមួយនេះ កំពុងតែវិវឌ្ឍន៍ខ្លួនក្លាយជាកម្លាំងចលករដ៏សំខាន់ ក្នុងការជំរុញកំណើនសេដ្ឋកិច្ច ដូចបានបង្ហាញនៅក្នុងផែនការយុទ្ធសាស្ត្រ អភិវឌ្ឍន៍ថ្នាក់ជាតិចុងក្រោយរបស់ប្រទេសចិន។

បណ្ឌិត Andy Wen នាយកផ្នែកឌីហ្សាញជាអន្តរជាតិ នៃក្រុមហ៊ុន Aedas បានបញ្ជាក់ថា អគារមជ្ឈមណ្ឌលនេះ រួមមាន ការិយាល័យលំដាប់A សាលសន្និសីទ និងសាលតាំងពិព័រណ៍ អាផាតម៉ិន និងទីធ្លាសម្រាប់អាជីវកម្មលក់រាយ។ កន្លែងលក់រាយស្ថិតនៅជាន់ខាងក្រោមនៃអគារ ការិយាល័យស្ថិតនៅជាន់កណ្ដាល ហើយអាផាតម៉ិនស្ថិតនៅជាន់លើ។

អគារកញ្ចក់នេះ ត្រូវបានឌីហ្សាញយ៉ាងពិសេស ដើម្បីកាត់បន្ថយកម្លាំងខ្យល់ខ្លាំង ធ្វើឱ្យអ្នកថ្មើរជើងទទួលបានបទពិសោធន៍កាន់តែប្រសើរ។ នៅផ្នែកខាងក្រោម ការឌី ហ្សាញមាន លក្ខណៈរមួលគួរឱ្យចាប់អារម្មណ៍ និងស្រស់ស្អាតប្លែក។

នេះសរបង្ហាញពីសមិទ្ធផលដ៏ធំធេងមួយទៀត ដែលជួយលើកមុខមាត់មហាយក្សចិន មួយកម្រិតទៀតនៅលើឆាកអន្តរជាតិ ទោះបីជាប្រទេសមហាអំណាចសេដ្ឋកិច្ចនៅអាស៊ីមួយនេះ រងផលប៉ះពាល់ធ្ងន់ធ្ងរ ដោយសារការឆ្លងរាតត្បាតវីរុសកូវីដ-១៩ យ៉ាងណាក្ដី។

ទោះជាយ៉ាងណា គ្មានការបញ្ជាក់ពីទំហំទុនវិនិយោគសរុប លើគម្រោងអគារដ៏ធំ នេះឡើយ៕

រដ្ឋបាលសាលារាជធានីភ្នំពេញ កំពុងចាក់ដីរៀបចំបង្កើតឧទ្យានជាតិ ទំហំ ៧៥ហិកតានៅបឹងតាមោក

ដោយៈ រ៉ាណេត

ភ្នំពេញៈ រដ្ឋបាលសាលារាជធានីភ្នំពេញបាន និងកំពុងចាក់ដីលុបបឹងតាមោកទំហំ៧៥ហិកតាដើម្បីរៀបចំ និងបង្កើតជាឧទ្យានជាតិរាជធានីភ្នំពេញ ក្រោមការទទួលបានការអនុញ្ញាតពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា រួមជាមួយនឹងបង្កើតឱ្យមានពិភពបៃតង ដោយការត្រៀមកូនឈើដាំរហូតដល់ប្រមាណ ១០ម៉ឺនដើម។

អភិបាលរាជធានីភ្នំពេញ លោកឃួង ស្រេង បានបញ្ជាក់ឲ្យដឹងនៅរសៀលថ្ងៃទី១៤ ខែមីនា ឆ្នាំ២០២១កន្លងមកថា រាជរដ្ឋាភិបាលកម្ពុជាកាលពីខែមីនា ឆ្នាំ២០២០កន្លងទៅ បានសម្រេចយល់ព្រម ផ្តល់ផ្ទៃបឹងតាមោកទំហំ៧៥ហិកតា ស្ថិតនៅខណ្ឌព្រែកព្នៅ រាជធានីភ្នំពេញ ប្រគល់ឱ្យសាលារាជធានីភ្នំពេញ ដើម្បីរៀបចំបង្កើតជាសួន និងឧទ្យានធម្មជាតិសាធារណៈនៅក្នុងរាជធានីភ្នំពេញ។

លោកបានបន្តថា “ពេលនេះយើងបានចាក់ដីលុបបំពេញ និងព័ទ្ធទីតាំងគម្រោងដែលនឹងត្រូវរៀបចំបង្កើតឧទ្យានជាតិ រាជធានីភ្នំពេញ ដែលមានទំហំ៧៥ហិកតាបានជិតរួចរាល់ហើយ” ។ លោកបន្តថា “ប៉ុន្តែនៅមិនទាន់អាចកំណត់ពេលវេលាជាក់លាក់ ក្នុងការចាប់បើកការដ្ឋាននៅឡើយនោះទេ ដោយសារតែបញ្ហានៃជំងឺកូវីដកំពុងរាតត្បាត។ ពេលនេះត្រូវប្រយុទ្ធជាមួយកូវីដ ហើយត្រៀមថវិកាសម្រាប់ប្រើប្រាស់បន្ទាន់ ក្នុងការអនុវត្តជាក់ស្ដែងទប់ស្កាត់ការរាលដាលនៃជំងឺឆ្លងកូវីដសិន” ។

លោកឃួង ស្រេង បញ្ជាក់ឱ្យដឹងថា នៅក្នុងការរៀបចំបង្កើតជាឧទ្យានជាតិដ៏ធំប្រចាំរាជធានីភ្នំពេញមួយនេះ ក៏មានការរៀបចំបង្កើតជាសួនច្បារ នៃពិភពបៃតងផងដែរ ដោយមានការត្រៀមកូនឈើ សម្រាប់ដាំនៅក្នុងបរិវេណចំនួន១០ម៉ឺនដើម ហើយបច្ចុប្បន្នកូនឈើ ដែលត្រៀមដាក់ដាំក៏ដុះលូតលាស់ល្អធំៗរួចរាល់ហើយដែរ ពោលគឺនៅរង់ចាំតែពេលចាប់អនុវត្តន៍តែប៉ុណ្ណោះ៕

រដ្ឋាភិបាលគ្រោងចុះបញ្ជីដីធ្លីឲ្យបាន ៧លានក្បាលដី ជូនប្រជាពលរដ្ឋនៅទូទាំងប្រទេស

ដោយៈគង់ សូរិយា

ភ្នំពេញៈ ជាការធានាដល់សុវត្ថិភាព និងភាពសុខរបស់ប្រជាពលរដ្ឋ ក្នុងការកាន់កាប់ដីធ្លីជាកម្មសិទ្ធិស្របច្បាប់ នៅត្រឹមឆ្នាំ២០២១ ខាងមុខនេះ ក្រសួងរៀបចំដែនដី នគរូបនីយកម្ម និងសំណង់ នឹងធ្វើការចុះបញ្ជីចំនួន៧លានក្បាលដី ជូនដល់ប្រជាពលរដ្ឋ។

លោកឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជា សុផារ៉ា បានមានប្រសាសន៍កាលពីពេលថ្មីៗនេះថា នៅឆ្នាំ២០២១ ខាងមុខនេះ ក្រសួងរៀបចំដែនដី នឹងចុះបញ្ជីក្បាលដី៧លានក្បាលដី ជូនដល់ប្រជាពលរដ្ឋ ។

លោកបន្តថា “សូមឱ្យទាំងអស់គ្នា ទាំងរដ្ឋបាលថ្នាក់ក្រោមជាតិ បន្តពុះពារនៅក្នុងការចុះបញ្ជីដីធ្លី ព្រោះការចុះបញ្ជីដីធ្លីនេះ គោលដៅដ៏ចម្បង យើងត្រូវជំរុញឱ្យបាន៩៤ភាគរយ នៅឆ្នាំ២០២០ ហើយត្រូវចប់នៅខែធ្នូ ពេលសន្និបាតឆ្នាំ២០២១ គឺត្រូវបញ្ចប់ការចុះបញ្ជីក្បាលដី ជូនដល់ប្រជាពលរដ្ឋនៅទូទាំងប្រទេស ដែលប៉ាន់ស្មានមានជាង៧លានក្បាលដី” ។

លោកជា សុផារ៉ាបានសង្កត់ធ្ងន់ថា ការចុះបញ្ជីក្បាលជូនប្រជាពលរដ្ឋឱ្យអស់នៅឆ្នាំ២០២១ ខាងមុខនេះ គឺជាការងារដ៏សំខាន់បំផុត ដើម្បីឱ្យការគ្រប់គ្រងដីមានសុវត្ថិភាព មានបណ្ណសម្គាល់អចលវត្ថុ ជូនដល់ប្រជាពលរដ្ឋខ្មែរគ្រប់ៗរូប ព្រមទាំងធ្វើឱ្យមានស្ថិរភាព ហើយបណ្ណនេះក្លាយទៅជាទុន ដែលរាជរដ្ឋាភិបាលកម្ពុជា ក្រោមការដឹកនាំដោយសម្តេចតេជោ ហ៊ុន សែនបានខិតខំធ្វើការបែងចែកជូនដល់ប្រជាពលរដ្ឋ មាន៥ដំណាក់កាលកន្លងផុតទៅហើយ។

ចាប់ពីឆ្នាំ១៩៧៩ រហូតមកដល់បច្ចុប្បន្ននេះ រាជរដ្ឋាភិបាលបានផ្តល់បណ្ណកម្មសិទ្ធិ ទទួលស្គាល់សិទ្ធិ កាន់កាប់ដីធ្លីជូនប្រជាពលរដ្ឋបាន៥ដំណាក់កាល ដូច្នេះការផ្តល់បណ្ណកម្មសិទ្ធិទាំង៥ដំណាក់កាល បានក្លាយជាទុនដែលរដ្ឋបានផ្តល់ជូន ដល់ប្រជាពលរដ្ឋទាំងអស់។ ការផ្តល់ជូនបណ្ណកម្មសិទ្ធិលើដីធ្លីនេះហើយ បាននាំមកនូវសក្តានុពលលើផ្នែកសេដ្ឋកិច្ចនៅក្នុងក្រុមគ្រួសារ និងអាចស្វែងរកដៃគូរអភិវឌ្ឍនានា មកធ្វើការអភិវឌ្ឍទៅលើដីធ្លីរបស់ពួកគាត់ជាដើម។ និយាយម្យ៉ាងទៀត វាបានក្លាយទៅជាការជំរុញអនុវត្តន៍ការដោះស្រាយវិវាទដីធ្លីផងដែរ៕

ប្រធាន GRA : ក្រោយបញ្ចប់វិបត្តិកូវីដ19 តម្លៃអចលនទ្រព្យក្រុងសៀមរាបនឹងឡើងថ្លៃខ្ពស់

ដោយៈ រ៉ាណេត

សៀមរាបៈ ស្ថិតនៅក្នុងស្ថានភាពដែលកំពុងប្រឈម នឹងវិបត្តិសាកលនៅពេលបច្ចុប្បន្ន រាជរដ្ឋាភិបាលកម្ពុជាបានយកចិត្តដាក់ ក្នុងការទប់ស្កាត់ស្ថានការណ៍លំបាក ហើយព្យាយាមអភិវឌ្ឍហេដ្ឋារចនាសម្ព័ន្ធនានា នៅទូទាំងក្រុងសៀមរាប ដើម្បីបង្កើនសោភ័ណភាព ទាក់ទាញការវិនិយោគ ដែលអំណោយផលដល់វិស័យអចលនទ្រព្យ ជាពិសេសនឹងឡើងថ្លៃខ្ពស់ក្រោយពេលវិបត្តិកូវីដត្រូវបានបញ្ចប់។

ប្រធានសមាគមអចលនទ្រព្យសកល (GRA) លោកសំ សុខនឿន បានមានប្រសាសន៍នៅល្ងាចថ្ងៃទី១៤ ខែមីនា ឆ្នាំ២០២១ថា ការដាក់ចេញលើការអភិវឌ្ឍហេដ្ឋារចនាសម្ព័ន្ធរបស់រដ្ឋាភិបាលនាពេលកន្លងមកនេះ គឺសញ្ញាមួយល្អដែលជំរុញឱ្យមានស័យនានាឱ្យមានការរីកចំរើន រួមជាមួយនឹងវិស័យអចលនទ្រព្យផងដែរ។

លោកបន្តថា “ការអភិវឌ្ឍន៍ហេដ្ឋារចនាសម្ព័ន្ធនៅក្នុងក្រុងសៀម វានឹងជួយជំរុញឱ្យវិស័យអលចនទ្រព្យរីកចំរើន ជាពិសេសអចលនទ្រព្យប្រភេទសណ្ឋាគារ ផ្ទះសំណាក់ និងបឹងហ្គាឡូងផងដែរ” ។ លោកបន្តថា “ការអះអាងបែបនេះ ស្របពេលមានគម្រោងអភិវឌ្ឍន៍ធំៗជាច្រើន ជាពិសេសគម្រោងបង្កើតមជ្ឈមណ្ឌលកម្សាន្ត ដ៏ធំរបស់ក្រុមហ៊ុន Naga Corp រួមជាមួយគម្រោងបង្កើតទីក្រុងរណបរបស់ក្រុមហ៊ុនចិន និងគម្រោងទីក្រុងឆ្លាតវៃ ដែលស្ថិតនៅក្នុងក្រុងសៀមរាប” ។

ភ្ជាប់ជាមួយគម្រោងអភិវឌ្ឍន៍របស់រាជរដ្ឋាភិបាលកម្ពុជា នៅទូទាំងក្រុងសៀមរាប ដែលមានហេដ្ឋារចនាសម្ព័ន្ធល្អច្រើន ហើយមានបន្ថែមផ្លូវថ្មី វាពិតជាជួយលើកស្ទួយតម្លៃដីធ្លីឱ្យមានការកើនឡើង ព្រមគ្នាជាមួយនឹងគម្រោងវិនិយោគថ្មីៗផ្សេងទៀត ក៏នឹងកើនឡើងផងដែរ ខណៈបច្ចុប្បន្ននេះ តម្លៃដីនៅតាមតំបន់មួយចំនួននៅក្នុងក្រុងសៀមរាបមានតម្លៃចាប់ពី ១៨០០ ទៅជាង ២០០០ ដុល្លារអាមេរិកក្នុងមួយម៉ែត្រការ៉េ។នេះបើតាមលោកសំ សុខនឿន។

លោកបានបញ្ជាក់ទៀតថា “មានហេតុផលសំខាន់ៗជាច្រើន ដែលនឹងជំរុញឱ្យទីផ្សារអចលនទ្រព្យក្នុងក្រុងសៀមរាប ងើបឡើងវិញម្តងទៀត ក្រោយសម័យកាលកូវីដ១៩ ដែលក្នុងនោះរួមមាន ផ្លូវ៣៨ខ្សែក្នុងក្រុងសៀមរាប ត្រូវបានសាងសង់រួចរាល់ គម្រោងវិនិយោគធំៗកំពុងតែចូលក្នុងក្រុងសៀមរាប ហើយអ្នកវិនិយោគជាតិ និងអន្តរជាតិ ជាពិសេសអ្នកវិនិយោគចិននឹងមកវិនិយោគ អភិវឌ្ឍអចលនទ្រព្យកាន់តែច្រើនជាងមុន” ។

លោកសុខនឿន បានបន្តទៀតថា សៀមរាប ជាទឹកដីអច្ឆរិយៈដែលទាក់ទាញភ្ញៀវទេសចរមកពីទូរទាំងសកលលោក ដូច្នេះវាក៏ជាចលករមួយយ៉ាងសំខាន់ ក្នុងការទាក់ទាញឱ្យមានការវិនិយោគគំរោង ដែលបម្រើដល់វិស័យទេសចរណ៍ ជាពិសេសការចិត្តទុកដាក់ពីសំណាក់រាជរដ្ឋាភិបាលចំពោះខេត្តសៀមរាប ដែលជាប៉ូលសេដ្ឋកិច្ចជាតិ តាមរយៈគោលនយោបាយបើកចំហ និងសម្រួលដល់ជនបរទេស ដែលជាអ្នកវិនិយោគជាតិ អន្តរជាតិ ឲ្យមកបោះទុនវិនិយោគដើម្បីចូលរួមអភិវឌ្ឍន៍សេដ្ឋកិច្ច និងសង្គមកម្ពុជា៕

ទីក្រុងរណបធំមួយCoastal Cityនឹងលេចរូបរាងនៅខេត្តកោះកុង

ដោយគង់ សូរិយា

ភ្នំពេញៈ ក្រុមហ៊ុនអភិវឌ្ឍន៍អចលនទ្រព្យធំមួយ កំពុងរៀបចំអភិវឌ្ឍន៍ទីក្រុងរណបCoastal City ជាគំរោងដែលស្ថិតនៅចំកណ្តាលបេះដូងនៃខេត្តកោះកុង ជាខេត្តដែលមានសក្តានុពលដ៏សម្បើមលើវិស័យទេសចរណ៍។

យោងតាមបណ្តាញព៌តមានរបស់ក្រុមហ៊ុននេះ ដែលបានបង្ហាញលើទំនាក់ទំនងសង្គមរបស់ខ្លួនបានឲ្យដឹងថា គំរោងនេះនឹងជារមណីយដ្ឋាន និងអភិវឌ្ឍន៍អចលនទ្រព្យដ៏ធំមួយនៅខេត្តជាប់តំបន់ឆ្នេរមួយនេះ។ គំរោងនេះព័ទ្ឋជុំវិញដោយឧទ្យានជាតិបុទុមសាគរ និងគិរីសាគរ ជាមួយធម្មជាតិព៌ណខៀវស្រងាត់ ឆ្នេរខ្សាច់សក្បុស ជាមួយទឹកសមុទ្រខៀវស្រងាត់ និងព្រៃកោងកាងធំបំផុតនៅលើពិភពលោក។

ទីក្រុងCoastal City បញ្ជាក់ពីអត្ថន័យឲ្យសម្រស់ធម្មជាតិ ជាកន្លែងដែលលេចធ្លោ ដែលធ្វើឲ្យមនុស្សគ្រប់គ្នាមិនអាចបំភ្លេចបាន។

គំរោងនេះត្រូវបានពិធីចុះហត្ថលេខា លើកិច្ចព្រមព្រៀងសហប្រតិបត្តិការ រវាងក្រុមហ៊ុនខូសថល ស៊ីធី ឌីវេឡុបម៉ិន គ្រុប ឯ.ក និងវិទ្យាស្ថានទេសចរណ៍គួយលីនកាលពីថ្ងៃទី21 មករា2021 នៅតារាសាគរ ខេត្តកោះកុងកន្លងមកនេះ។

កច្ចព្រមព្រៀងនេះ ផ្តោតសំខាន់លើការជំរុញ និងពង្រឹងកិច្ចសហប្រតិបត្តិការភាពជាដៃគូ ក្នុងការជំរុញការបណ្តុះបណ្តាលជំនាញវិជ្ជាជីវៈទេសចរណ៍ ការអភិវឌ្ឍធនធានមនុស្ស និងការសិក្សាស្រាវជ្រាវក្នុងវិស័យទេសចរណ៍ នឹងមានការរៀបចំឱ្យមានកម្មវិធីហ្វឹកហ្វាត់ការងារសម្រាប់សិស្ស និស្សិត និងបុគ្គលិក ព្រមទាំងការបង្កើតឱ្យមានមជ្ឈមណ្ឌលផ្លាស់ប្តូរ និងស្រាវជ្រាវនវានុវត្តន៍ទេសចរណ៍-វប្បធម៍កម្ពុជា-ចិន ដែលចូលរួមជំរុញការអភិវឌ្ឍវិស័យទេសចរណ៍ និងប្រែក្លាយកម្ពុជាឲ្យក្លាយជាគោលដៅទេសចរណ៍ដ៏ទាក់ទាញលំដាប់ថ្នាក់ពិភពលោក និងផ្តល់ភាពកក់ក្តៅដល់ភ្ញៀវទេសចរ។

ពិធីចុះហត្ថលេខាកន្លងមក មានការចូលរួមពីលោកជា បូរ៉ា រដ្ឋលេខាធិការក្រសួងទេសចរណ៍ និងលោកសោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ នាយកដ្ឋានអភិវឌ្ឍន៍ឧស្សាហកម្ម នៃការិយាល័យវប្បធម៌ និងទេសចរណ៍ក្រុងធានជីនលោកZhu Yi Hai, អនុប្រធានផ្នែកផ្លាស់ប្តូរ និងសហប្រតិបត្តិការអន្តរជាតិនាយកដ្ឋានវប្បធម៌ និងទេសចរណ៍នៃខេត្តគួនស៊ីជួង តំបន់ស្វយ័ត លោកស្រីTan Juan លោកLi Meng Chenប្រធានក្រុមហ៊ុនខូសថល ស៊ីធី ឌីវេឡុបម៉ិន គ្រុប ឯ.ក, លេខាធិការគណៈកម្មាធិការបក្សសាស្រ្តាចារ្យអ្នកស្រីLin Na មកពីសាកលវិទ្យាល័យទេសចរណ៍ហ្គីលីន និង លោកនាយកសាលាសាកលវិទ្យាល័យទេសចរណ៍ គួយលីងសាស្រ្តាចារ្យCheng Dao Pin។

អភិបាលខេត្តកោះកុង លោកជំទាវមិថុនា ភូថងបានមានប្រសាសន៍ឲ្យដឹងកាលពីពេលថ្មីៗនេះថា ខេត្តកោះកុងបានទាក់ទាញគំរោងវិនិយោគច្រើនកំឡុងឆ្នាំមុន បើទោះជាខេត្តដទៃទៀតមានបញ្ហាក្តី តែការវិនិយោគនៅខេត្តកោះកុងកើនឡើង ដែលភាគច្រើនជាគម្រោងអចលនទ្រព្យ សណ្ឋាគារ និងផ្ទះសំណាក់។

លោកជំទាវបន្តថា “អ្នកវិនិយោគភាគច្រើន ជាអ្នកក្នុងស្រុក ប៉ុន្តែអ្នកវិនិយោគអន្តរជាតិមានចំនួនតិចជាង ប៉ុន្តែទំហំទុនមានច្រើនជាងអ្នកវិនិយោគក្នុងស្រុក”៕

ធនាគារតូចធំជាច្រើនកំពុងបង្ហាញខ្លួននៅលើកំណាត់ផ្លូវជាតិលេខ១ ក្នុងខណ្ឌច្បារអំពៅ

ដោយ ៖ រ៉ាណេត

ភ្នំពេញ ៖ ធ្លាប់តែជាតំបន់ដែលប្រមូលផ្តុំទៅដោយកន្លែងលក់សម្ភារៈប្រើប្រាស់ប្រចាំថ្ងៃក្នុងរូបភាពជាអាជីវកម្មខ្នាតតូច ប៉ុន្តែបច្ចុប្បន្នតំបន់ដែលស្ថិតលើកំណាត់ផ្លូវជាតិលេខ១ ក្នុងសង្កាត់ច្បារអំពៅ ខណ្ឌច្បារអំពៅបានប្រែរូបរាងជាអគារពាណិជ្ជកម្មចម្រុះធំៗ ជាពិសេសគ្រឹះស្ថានហិរញ្ញវត្ថុ និងធនាគារកំពុងប្រមូលផ្តុំគ្នាមិនក្រោម២០ស្ថាប័ននោះទេ។

គិតចាប់ពីចំណុចភ្លើងស្តុបទីមួយនៃផ្សារច្បារអំពៅរហូតដល់ចំណុចភ្លើងស្តុបទី៣មុខវត្តនិរោធ ដែលមានចម្ងាយត្រឹមប្រមាណ៣០០ម៉ែត្រប៉ុណ្ណោះ នៅស្របតាមបណ្តោយផ្លូវជាតិលេខ១ គេសង្កេតឃើញមានអគារពាណិជ្ជកម្មជាច្រើន ដែលក្នុងនោះអ្វីដែលជាការគួរឱ្យកត់សម្គាល់គឺមានស្ថានប័នធនាគារ និងគ្រឹះស្ថានហិរញ្ញវត្ថុឯកជនជាច្រើនកំពុងបង្ហាញវត្តមានក្នុងតំបន់ដែលកំពុងមានសក្ដានុពលមួយនេះ។

លោកម៉ម សិរីបញ្ញា អគ្គនាយកក្រុមហ៊ុនអចលនទ្រព្យ EASY Property Investment បានមានប្រសាសន៍នៅព្រឹកថ្ងៃទី១៣ ខែមីនា ឆ្នាំ២០២១នេះថា ខណ្ឌច្បារអំពៅនៅពេលបច្ចុប្បន្នកំពុងក្លាយជាគោលដៅវិនិយោគនៅក្នុងវិស័យសំណង់ ដែលក្នុងនោះរួមទាំងផ្នែកលំនៅដ្ឋានកម្រិតសមរម្យ លំនៅដ្ឋានកម្រិតខ្ពស់ លំនៅដ្ឋានសហកម្មសិទ្ធិ និងអគារពាណិជ្ជកម្មផ្សេងៗទៀត។

លោកបានបន្តថា “ហេតុផលដែលធ្វើឱ្យអ្នកវិនិយោគ ក៏ដូចជាអ្នកអភិវឌ្ឍន៍ជាតិ អន្តរជាតិសម្រេចចូលទៅកាន់តំបន់នេះ ព្រោះខណ្ឌច្បារអំពៅបច្ចុប្បន្នលែងជាតំបន់ជាយក្រុងដូចកាលពី៥ឆ្នាំមុនទៀតហើយ ជាក់ស្ដែងយើងមានគម្រោងអភិវឌ្ឍន៍ធំមួយចំនួនបានធ្វើរួច ហើយមួយចំនួនកំពុងបន្តសកម្មភាពសាងសង់ស្របពេលដែលកំណើនប្រជាសាស្ត្រចូលមករស់នៅកាន់តែច្រើនឡើងៗ ហើយតម្លៃនៃទីផ្សារអចលនទ្រព្យក៏កាន់តែកើនឡើងដូចគ្នា”។

ជាមួយគ្នានលោក ម៉ម សិរីបញ្ញា ក៏បានលើកឡើងផងដែរថា ជាធម្មតានៅតំពន់ណាដែលមានកំណើនប្រជាជនចូលទៅរស់នៅច្រើន មានហេដ្ឋារចនាសម្ព័ន្ធល្អផ្តល់ភាពងាយស្រួលដល់ការរស់នៅ ក៏ដូចជាការប្រកបអាជីវកម្ម និងធ្វើពាណិជ្ជកម្ម វានឹងក្លាយជាចលករសំខាន់ក្នុងការទាក់ទាញគម្រោងវិនិយោគបន្ថែម។

ពាកព័ន្ធទៅនឹងរំហូរនៃកំណើនអគារពាណិជ្ជកម្ម ជាពិសេសស្ថាប័នធនាគារ និងហិរញ្ញវត្ថុជាច្រើននៅក្នុងតំបន់ច្បារអំពៅត្រូវបានលោកស្រី អាន សុធីតា នាយិកាប្រចាំប្រទេសក្រុមហ៊ុន CBRE Cambodia មានប្រសាសន៍ថា ច្បារអំពៅជាតំបន់ដែលមានប្រជាជនរស់នៅច្រើនស្រាប់ បន្តែបន្ថែមពីលើដោយការអភិវឌ្ឍន៍ថ្មីៗ ដោយគ្រាន់តែគម្រោងអភិវឌ្ឍន៍លំនៅដ្ឋានកម្រិតមធ្យម និងកម្រិតខ្ពស់របស់ក្រុមហ៊ុនប៉េងហួតមានវិសាលភាពរហូតដល់ប្រមាណ៤០០ហិកតា រួមទាំងគម្រោងបុរីផ្សេងៗជាច្រើនទៀត ដែលបំពេញទៅដោយលំនៅដ្ឋានសរុបម៉ឺនខ្នង មនុស្សរស់នៅរាប់សែននាក់។ ដូច្នេះផ្តើមចេញពីកំណើននៃចំនួនប្រជាសាស្ត្រ និងមានការអភិវឌ្ឍផ្នែកពាណិជ្ជកម្មកាន់តែច្រើន វានឹងជំរុញឱ្យវិស័យធនាគារ ក៏ដូចជាហិរញ្ញាវត្ថុនានាចូលទៅជាក់ជាមិនខាន។

លោកស្រីបានបញ្ជាក់ថា “បើប្រៀបធៀបជាមួយតំបន់ចាក់អង្រែ និងតំបន់ផ្លូវព្រះនរោត្តមគឺមានភាពខុសគ្នា ព្រោះនៅតំបន់ចាក់អង្រែក៏មានមនុស្សរស់នៅច្រើន ប៉ុន្តែមានតែម្ខាងនៃផ្លូវ ហើយមួយចំហៀងទៀតជាទន្លេ ដូច្នេះដង់ស៊ីតេប្រជាជនគឺមានកម្រិត ដោយឡែកនៅតំបន់ផ្លូវព្រះនរោត្តមគឺមានមជ្ឈមណ្ឌលពាណិជ្ជកម្មធំៗ ប៉ុន្តែផ្តោតសំខាន់ទៅលើកម្រិតខ្ពស់ដែលមិនសមស្របទៅនឹងប្រភេទគ្រឹះស្ថានហិរញ្ញវត្ថុទាំងអស់ដែលស្ថិតនៅក្នុងខណ្ឌច្បារអំពៅនោះទេ”៕

អ្នកជំនាញៈ ការអភិវឌ្ឍន៍អចលនទ្រព្យនៅតែមានសកម្មភាពយ៉ាងមមាញឹកនៅប៉ែកខាងត្បូង និងលិចទីក្រុង

ដោយៈ ប៊ី

ភ្នំពេញៈ អ្នកជំនាញក្នុងវិស័យអចលនទ្រព្យបានលើកឡើងថា ទោះបីជាមានវិបត្តិកូវិដ១៩ បាននិងកំពុងរីរាលដាលខ្លាំងនៅកម្ពុជា សកម្មភាពអភិវឌ្ឍន៍គម្រោងអចលនទ្រព្យនៅតំបន់ជាយក្រុងរាជធានីភ្នំពេញ ពិសេសតំបន់ប៉ែកខាងត្បូង និងខាងលិចរាជធានីភ្នំពេញ មានសកម្មភាពយ៉ាងមមាញឹកនៅដើមឆ្នាំនេះ។

លោកប៉ូ អ៊ាវគង់អគ្គនាយកក្រុមហ៊ុន Advance Real Estate Company បានប្រាប់ក្នុងសប្តាហ៍នេះថា វិស័យអចលនទ្រព្យ ត្រូវបានមើលឃើញថា ការអភិវឌ្ឍគម្រោងអចលនទ្រព្យ តម្រូវការលំនៅដ្ឋាន និងការវិនិយោគ នៅតែមានសកម្មភាពនៅតំបន់ជាយក្រុងភ្នំពេញ ព្រោះការវិនិយោគលំនៅដ្ឋាន និងធ្លីគឺការវិនិយោគរយៈពេលវែង។

លោកបានថ្លែងបន្តថា តំបន់ប៉ែកខាងត្បូង និងខាងលិច មានខាងទំនប់កប់ស្រួវ ផ្លូវជាតិលេខ៤ លេខ៣ លេខ២សព្វថ្ងៃនេះ វាមានសន្ទុះជាងតំបន់ជាយក្រុងផ្សេងៗ ដូចជា ប៉ែកខាងកើត និងខាងជើង ដោយសារប៉ែកខាងកើត និងខាងជើងមានភាពល្អប្រសើរស្រាប់ហើយ។ ក៏មានអ្នកអភិវឌ្ឍន៍មួយចំនួន បានចុះទៅមើលទីតាំង ដើម្បីអភិវឌ្ឍន៍ជាបុរីតម្លៃជាមធ្យម ឬឃ្លាំងជាដើម នៅតាមផ្លូវក្រវ៉ាត់ក្រុង។

លោកបានបន្តទៀតថា នៅតាមបណ្តោយផ្លូវក្រវ៉ាត់ក្រុងទី៣មានសន្ទុះ ដោយសារតែមានតម្រូវការច្រើននៅតំបន់បន់នោះ ដូចជាលំនៅដ្ខាន ការសាងសង់ឃ្លាំងសម្រាប់ផ្ទុកទំនិញ និងទីតាំងរោងចក្រជាដើម។ ចំពោះតម្លៃដីនៅតំបន់ដូចជាខាងកប់ស្រូវ និយាយជារួមសម្រាប់ដីអភិវឌ្ឍធំៗ កន្លែងខ្លះមានតម្លៃចន្លោះពី៣០០ ទៅ៥០០ដុល្លា។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីមធ្លាប់ថ្លែងប្រាប់ថា ការរីកសាយនៃការអភិវឌ្ឍន៍លំនៅឋានតម្លៃថ្លៃ ទៅកាន់ជាយរាជធានី ដោយសារតែតម្លៃដីនៅក្បែរៗ ឬកណ្ដាលរាជធានីមានការឡើងថ្លៃខ្ពស់ ដែលធ្វើឱ្យអ្នកវិនិយោគមិនអាចរកប្រាក់ចំណេញបាន។

លោកបានថ្លែងថា “ដូច្នេះពួកគេត្រូវការតម្លៃដីទាប ល្មមដែលអាចឱ្យពួកគេចំនេញពីការវិនិយោគ។ ម្យ៉ាងទៀតនៅក្បែរ ឬកណ្ដាលរាជធានីក៏មិនមានដីទូលាយសម្រាប់អភិវឌ្ឍន៍ជាបុរីបានស្រួលនោះដែរ” ។ លោកបន្តថា “នៅតំបន់ជាយរាជធានីភ្នំពេញ នាពេលបច្ចុប្បន្ននេះ ក៏មានការអភិវឌ្ឍហេដ្ឋារចនាសម្ព័ន្ធបានច្រើនផងដែរ ដែលជំរុញអោយវិនិយោគិនងាកទៅរកតំបន់ជាយៗក្រុង សម្រាប់អភិវឌ្ឍន៍គម្រោងរបស់ខ្លួន” ។

លោកច្រឹក សុខនីមបានថ្លែងថា តាមផែនការមេរបស់រាជរដ្ឋាភិបាល ក៏បានកំណត់ការអភិវឌ្ឍជុំវិញរាជធានីជាមុំ៣៦០ដឺក្រេ ដូច្នេះហើយគ្រប់ទិសនៃរាជធានី គឺត្រូវមានការអភិវឌ្ឍជាបន្តបន្ទាប់៕

1...2,0732,0742,075...3,313 Page 2,074 of 3,313