ហ្វ្រី ហ្វ្រី ! ប្រាសាក់ ផ្ដល់សេវាបញ្ចូលកាតទូរស័ព្ទរបស់ក្រុមហ៊ុនមិត្តហ្វូន

ដោយ ប្រាសាក់

ភ្នំពេញ៖ ប្រាសាក់ ដែលជាគ្រឹះស្ថានហិរញ្ញវត្ថុធំជាងគេនៅកម្ពុជា បានសហការជាមួយក្រុមហ៊ុនមិត្តហ្វូនក្នុងការដាក់ឱ្យប្រើប្រាស់សេវាទិញកាតទូរស័ព្ទប្រព័ន្ធមិត្តហ្វូន ដោយអតិថិជនអាចបញ្ចូលទឹកប្រាក់ក្នុងទូរស័ព្ទរបស់ពួកគាត់ ឬ ទូរស័ព្ទរបស់ញាតិមិត្តបានដោយ ស្វ័យប្រវត្តិតាមរយៈសេវាធនាគារចល័ត ( PRASAC Mobile Banking ឬ ប្រាសាក់ម៉ូបាលប៊ែងឃីង ឬ PRASAC Internet Banking) និងម៉ាស៊ីនអេធីអឹមប្រាសាក់ គ្រប់ពេលវេលា គ្រប់ទីកន្លែង ដោយមិនអស់កម្រៃសេវា។

លោក សាយ សូនី អនុប្រធាននាយកប្រតិបត្តិរបស់ប្រាសាក់ បានមានប្រសាសន៍ថា «យើងមានសេចក្តីរីករាយយ៉ាងខ្លាំង ចំពោះភាពជាដៃគូសម្រាប់ការផ្តល់សេវាទិញកាតទូរស័ព្ទនេះ ដែលនឹងនាំមកនូវភាពងាយស្រួលជូនដល់អតិថិជនរបស់យើង។ ឥឡូវនេះ អតិថិជនមិនចាំបាច់ធ្វើដំណើរ ឬ រកតូបលក់កាតទូរស័ព្ទមិត្តហ្វូននោះទេ។ ជាមួយនឹងសេវាធនាគារចល័ត (ប្រាសាក់ម៉ូបាលប៊ែងឃីង) និងអេធីអឹមរបស់ប្រាសាក់ លោកអ្នកអាចបញ្ចូលទឹកប្រាក់ក្នុងទូរស័ព្ទដៃរបស់លោកអ្នកដោយស្វ័យប្រវត្តិដោយមិនបាច់កោសកាត បានយ៉ាងងាយស្រួលនិងលឿនរហ័ស។ ហើយអ្វីដែលកាន់តែពិសេសនោះគឺសេវាទិញកាតទូរស័ព្ទនេះមិនអស់កម្រៃសេវានោះឡើយ»។

លោក សាយ សូនី បានបន្តទៀតថា នេះគឺជាភាពជាដៃគូដ៏មានសារៈសំខាន់មួយដែលនឹងផ្តល់នូវដំណោះស្រាយបន្ថែមលើសេវាធនាគារដែលប្រកបដោយភាពងាយស្រួលនិងច្នៃប្រឌិតថ្មីសម្រាប់អតិថិជនដែប្រើប្រព័ន្ធ Metfone ទាំងអស់។ ពួកគាត់អាចបើកគណនីសន្សំនិងចុះឈ្មោះប្រើប្រាស់សេវាធនាគារចល័តប្រាសាក់ និងទទួលបានប័ណ្ណអេធីអឹមដ៏ស្រស់ស្អាតនៅតាមសាខាណាមួយរបស់ប្រាសាក់នៅទូទាំងប្រទេស។ ជាមួយសេវានេះ លោកអ្នកអាចបញ្ចូលទឹកប្រាក់ក្នុងទូរស័ព្ទដោយផ្ទាល់ពីគណនីសន្សំរបស់លោកអ្នកបានគ្រប់ពេលវេលា ដែលធានាថាទូរស័ព្ទលោកអ្នកនឹងមិនអស់សមតុល្យទឹកប្រាក់នៅក្នុងទូរស័ព្ទហើយដើររកទិញកាតទូរស័ព្ទទៀតឡើយ»។

សូមបញ្ជាក់ផងដែរថា ប្រាសាក់ផ្តល់សេវាហិរញ្ញវត្ថុដ៏សម្បូរបែបជូនអតិថិជនរួមមាន៖ សេវាធនាគារចល័ត ឬ ប្រាសាក់ម៉ូប៊ាលប៊ែងឃីង សេវាប្រាក់បញ្ញើសន្សំ សេវាឥណទាន ផ្ទេរប្រាក់ឆ្លងធនាគារតាមប្រព័ន្ធបាគង និងរីធែលផេ ទូទាត់វិក្កយបត្រទឹក ទូទាត់វិក្កយបត្រភ្លើង ទូទាត់វិក្កយបត្រថ្លៃប្រមូលសំរាម ទូទាត់វិក្កយបត្រថ្លៃសិក្សា ដាក់ប្រាក់តាមម៉ាស៊ីនអេធីអឹម ផ្ទេរប្រាក់តាមលេខសម្ងាត់ ប្តូរប្រាក់ ទិញកាតទូរស័ព្ទ បើកប្រាក់បៀវត្ស សេវាទូទាត់រហ័ស អេធីអឹម សេវា CSS (ប្រើប័ណ្ណអេធីអឹមប្រាសាក់ដកប្រាក់តាមម៉ាស៊ីនអេធីអឹមជាសមាជិក CSS) និងសេវាផ្សេងៗទៀត។

សម្រាប់ព័ត៌មានបន្ថែម សូមចូលទៅកាន់វេបសាយត៍ www.prasac.com.kh ឬ សូមទាក់ទងតាមទូរស័ព្ទលេខ 023 999 911 ឬ 086 999 911 ៕

ក្រុមហ៊ុនធំៗជាច្រើនរបស់ថៃត្រៀមពង្រីកប្រតិបត្តិការធុរកិច្ចមកកាន់កម្ពុជាបន្ទាប់ពីវិបត្តិជំងឺកូវីដ១៩ត្រូវបានបញ្ចប់

ដោយៈ ប៊ី

ភ្នំពេញៈ ក្រុមហ៊ុនសាជីវកម្មធំៗជាច្រើនរបស់ថៃត្រៀមពង្រីកប្រតិបត្តិការធុរកិច្ចមកកាន់ប្រទេសកម្ពុជា ក្រោយពីវិបត្តិជំងឺកូវីដ-១៩បានបញ្ចប់។ នេះបើយោងតាមលើកឡើងរបស់ស្ថានទូតកម្ពុជាប្រចាំប្រទេសថៃនៅថ្ងៃទី៥ ខែមីនា ឆ្នាំ២០២១។

ស្ថានទូតកម្ពុជាបានធ្វើទស្សនកិច្ចទៅកាន់ក្រុមហ៊ុនសាជីវកម្មធំៗដូចជា BJC (ប្រតិបត្តិករផ្សារទំនើប BigC) ក្រុមហ៊ុន CP ALL (ប្រតិបត្តិករហាងលក់ទំនិញរាយ 7-Eleven) ក្រុមហ៊ុន KTIS Group (ប្រតិបត្តិកររោងចក្រស្ករសធំជាងគេលើពិភពលោក) ក្រុមហ៊ុន Betagro Group (ប្រតិបត្តិកររោងចក្រអាហារកែច្នៃធំទី២ បន្ទាប់ពីក្រុមហ៊ុន CP)។

ស្ថានទូតក៏បានធ្វើទស្សនកិច្ចទៅកាន់ក្រុមហ៊ុន P.P.J. Engineering (ប្រតិបត្តិកររោងចក្រម៉ាស៊ីនត្រជាក់ធំជាងគេ) ព្រមទាំងក្រុមហ៊ុនជាច្រើនទៀត ដើម្បីស្វែងយល់ពីប្រតិបត្តិការធុរកិច្ចទូទៅ និងផ្សព្វផ្សាយគោលនយោបាយវិនិយោគ កាលានុវត្តភាពធុរកិច្ច ព្រមទាំងសក្តានុពលវិស័យកសិកម្ម និងកសិ-ឧស្សាហកម្មនៅកម្ពុជា។

ស្ថានទូតបានឱ្យដឹងថា “ជាលទ្ធផល ក្រុមហ៊ុនភាគច្រើនសុទ្ធតែបានសន្យាពង្រីកប្រតិបត្តិការធុរកិច្ចមកកាន់ប្រទេសកម្ពុជា ក្រោយពីវិបត្តិជំងឺកូវីដ-១៩ បានបញ្ចប់”។

នៅក្នុងរយៈពេលពេញមួយឆ្នាំ២០២០ បើទោះបីជារងសម្ពាធពីវិបត្តិជំងឺកូវីដ១៩ ដែលបានកំពុងរាតត្បាតទូទាំងសាកលលោក ស្ថានទូតកម្ពុជាប្រចាំប្រទេសថៃ ក្រោមការដឹកនាំរបស់លោក អ៊ូក សោភ័ណជាឯកអគ្គរាជទូត បានធ្វើសកម្មភាពជាច្រើន ដោយសម្រេចបានលទ្ធផលធំៗគួរជាទីមោទនៈសម្រាប់រាជរដ្ឋាភិបាល និងប្រទេសកម្ពុជា។

ជាមួយគ្នានេះដែរ ស្ថានទូតបានទទួលជួបពិភាក្សា និងផ្តល់សេវាប្រឹក្សាយោបល់ផ្នែកធុរកិច្ចឥតគិតថ្លៃ ជូនប្រតិភូធុរជនថៃ និងបរទេស ដោយក្នុងនោះបានជម្រាបជូនពីកំណើនសេដ្ឋកិច្ចកម្ពុជា កាលានុវត្តភាពធុរកិច្ច គោលនយោបាយវិនិយោគ និងលើកទឹកចិត្តរបស់រាជរដ្ឋាភិបាល ព្រមទាំងកំណែទម្រង់ស៊ីជម្រៅ ដើម្បីលើកស្ទួយបរិយាកាសវិនិយោគ និងឧត្តមភាពប្រកួតប្រជែងរបស់កម្ពុជា នៅលើឆាកអន្តរជាតិ។

ជាលទ្ធផល ក្រុមហ៊ុនភាគច្រើនមិនត្រឹមតែកោតសរសើរពីវឌ្ឍនភាពរបស់កម្ពុជា ប៉ុន្តែសម្តែងការពេញចិត្តចំពោះទីផ្សាររបស់កម្ពុជា ព្រមទាំងកម្មវវិធីនយោបាយរបស់រាជរដ្ឋាភិបាលផងដែរ។

មហាយក្សចិនដាក់ចេញចក្ខុវិស័យ និងផែនការយុទ្ធសាស្ត្រថ្មី ដើម្បីពន្លឿនកំណើនសេដ្ឋកិច្ចរបស់ខ្លួនបន្ថែមទៀត

ដោយៈ សុខុម

ប៉េកាំងៈ មហាយក្សចិន នៅថ្ងៃសុក្រ ទី៥ ខែមីនានេះ បានដំឡើងគោលដៅកំណើនផលិតផលក្នុងស្រុកសរុប (GDP) សាជាថ្មី ក្រោយសេដ្ឋកិច្ចរបស់ខ្លួនចាប់ផ្ដើមងើបឡើងវិញ។ នេះបើយោងតាមសារព័ត៌មាន CNA ក្នុងថ្ងៃដដែល។

មហាអំណាចសេដ្ឋកិច្ចធំបំផុតទី២ របស់ពិភពលោកមួយនេះបានកំណត់គោលដៅGDP លើស៦% ហើយបានសន្យាបង្កើតការងារបន្ថែមទៀតនៅក្នុងទីក្រុងនានាឱ្យបានច្រើនជាងឆ្នាំមុន ខណៈខ្លួនចាប់ផ្ដើមងើបពីវិបត្តិឆ្លងរាតត្បាតវីរុសកូវីដ-១៩ ជាបណ្ដើរៗ។

ក្នុងឆ្នាំ២០២០ ប្រទេសចិន បានបន្ទាបគោលដៅកំណើន GDP របស់ខ្លួននៅក្នុងរបាយការណ៍ការងាររបស់នាយករដ្ឋមន្រ្តីជាលើកដំបូងចាប់តាំងពីឆ្នាំ២០០២មក ក្រោយការឆ្លងរាតត្បាតវីរុសកូវីដ-១៩ បានជះផលប៉ះពាល់ខ្លាំងដល់សេដ្ឋកិច្ចរបស់ខ្លួន។

នាយករដ្ឋមន្ត្រីលី ខឹឈាង (Li Keqiang) បានលើកឡើងតាមរយៈរបាយការណ៍ការងារឆ្នាំ២០២១ របស់លោកថា “ជាគោលដៅទូទៅ អត្រាកំណើនរបស់ប្រទេសចិន ត្រូវបានកំណត់លើស៦% សម្រាប់ឆ្នាំនេះ។ នៅក្នុងការកំណត់គោលដៅនេះ យើងបានគិតគូរដល់ការងើបឡើងវិញនៃសកម្មភាពសេដ្ឋកិច្ច”។

ជាការកត់សម្គាល់ បើទោះបីជាទទួលរងផលប៉ះពាល់ដោយសារការឆ្លងរាតត្បាតវីរុសកូវីដ-១៩ យ៉ាងណាក្ដី ក៏ GDP របស់ប្រទេសចិន នៅតែអាចទទួលបានកំណើន២,៣% កាលពីឆ្នាំមុន ហើយចិនគឺជាមហាអំណាចសេដ្ឋកិច្ចតែមួយគត់ដែលទទួលបានកំណើន។

លោកលី ខឹឈាងបានថ្លែងក្នុងកិច្ចប្រជុំសភានៅឆ្នាំនេះថា ប្រទេសចិន នឹងកំណត់គោលដៅបង្កើតការងារថ្មីៗឱ្យបានជាង១១លានកន្លែងនៅក្នុងទីក្រុង បើធៀបនឹងគោលដៅបង្កើតការងារថ្មីៗជាង៩លាន់កន្លែងក្នុងឆ្នាំ២០២០។

ស្របនឹងការងើបឡើងនៃសេដ្ឋកិច្ច រដ្ឋាភិបាលចិន កំពុងកំណត់គោលដៅឱនភាពថវិកាសម្រាប់ឆ្នាំ២០២១ ប្រមាណ៣,២% នៃ GDP ដែលតិចជាងគោលដៅលើស៣,៦% កាលពីឆ្នាំមុន៕

ក្រុមហ៊ុនប៊ឺហ្គឺរអាមេរិកដ៏ធំមួយប្រកាសបន្តពង្រីកការវិនិយោគនៅទីផ្សារកម្ពុជា

ដោយៈ ប៊ី

ភ្នំពេញ៖ ក្រុមហ៊ុន The Habit Burger Grill ដែលមានបទពិសោធន៍ជាង៥០ឆ្នាំ លើប៊ឺហ្គឺររសជាតិឆ្ងាញ់បំផុតរបស់អាមេរិក នឹងបើកសាខាថ្មីបន្ថែមនៅអង្គស្នួល ខេត្តកណ្តាលនៅថ្ងៃទី៧ ខែមីនាខាងមុខនេះ បើទោះបីជាពិភពលោកកំពុងជួបវិបត្តិ។

ក្រុមហ៊ុនភោជនីយដ្ឋាន ដែលមានមូលដ្ឋាននៅរដ្ឋកាលីហ្វ័រញ៉ាល្បីឈ្មោះ បានប្រកាសថា នឹងបើកដំណើរការភោជនីយដ្ឋានទី៣របស់ខ្លួន នៅខេត្តកណ្តាល ដោយមានការដៃគូសហការជាមួយនឹងក្រុមហ៊ុនកម្ពុជាតេលា។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុននៅថ្ងៃទី៥ ខែមីនា ឆ្នាំ២០២១។

ក្រុមហ៊ុន The Habit Burger Grill ទទួលបានពានរង្វាន់ផ្តោតលើអាហារផ្សេងៗគ្នានៅសហរដ្ឋអាមេរិក។ The Habit បានបម្រើនូវប៊ឺហ្គឺររសជាតិឆ្ញាញ់បំផុតនៅអាមេរិកតាំងពីឆ្នាំ ១៩៦៩ ។

លោក Iwona Alter ប្រធានក្រុមហ៊ុន The Habit Burger Grill បានថ្លែងថា “យើងរីករាយនឹងបន្តការពង្រីកវត្តមាននៅទីផ្សារអន្ដរជាតិ ដោយចូលរួមសហការជាមួយដៃគូថ្មីរបស់យើងគឺក្រុមហ៊ុន Kampuchea Tela Company ដើម្បីពង្រីកទីតាំងរបស់យើងនៅកម្ពុជា”។

លោក បានបន្តថា “យើងទន្ទឹងរង់ចាំបង្កើតអ្នកគាំទ្រ Habit ថ្មីដោយអញ្ជើញពួកគេឱ្យរីករាយនឹងម្ហូបដែលធ្វើដោយដៃរបស់យើង និងទទួលបានបដិសណ្ឋារកិច្ចល្អបំផុត ហើយនិងប្រកបដោយបរិយាកាសស្វាគមន៍ដូចនៅកាលីហ្វ័រញ៉ាខាងត្បូង”។

The Habit កំពុងចាប់ដៃគូជាមួយក្រុមហ៊ុន Kampuchea Tela Company ដើម្បីអភិវឌ្ឍ និងដំណើរការភោជនីយដ្ឋាននៅទូទាំងព្រះរាជាណាចក្រកម្ពុជា៕

ក្រុមហ៊ុន Las Vegas Sands Corp នឹងលក់កាស៊ីណូរបស់ខ្លួនក្នុងតម្លៃ ៦,២៥ពាន់លានដុល្លារ

ដោយ សុខុម

ញូវយ៉កៈ ក្រុមហ៊ុនរីសត និងកាស៊ីណូដំដាប់ខ្ពស់ Las Vegas Sands Corp ដ៏ធំមួយបានលក់ក្នុងតម្លៃ ៦,២៥ពាន់លានដុល្លារ។ នេះបើយោងតាមសារព័ត៌មាន CNN ចុះផ្សាយកាលពីថ្ងៃទី៣ មីនា។

ក្រុមហ៊ុនគ្រប់គ្រងមូលធន Apollo Global Management និងក្រុមហ៊ុនអចលនទ្រព្យ Vici Properties កំពុងចាប់ដៃគូសហការ ដើម្បីទិញយកសណ្ឋាគារប្រណីត និងរីសតកាស៊ីណូ The Venetian Las Vegas ដែលមាន ៧.០០០បន្ទប់ នៅតាមបណ្ដាយកំណាត់មហាវិថី Las Vegas Strip ជិតមជ្ឈមណ្ឌលពិព័រណ៍ និងសន្និបាត Sands Expo and Convention Center។

ក្រុមហ៊ុន Apollo នឹងចេញលុយ ២,២៥ពាន់លានដុល្លារ ទិញយកក្រុមហ៊ុនប្រតិបត្តិការរបស់Venetian ហើយក្រុមហ៊ុន Vici នឹងចំណាយលុយ ៤ពាន់លានដុល្លារ ដើម្បីទិញយកដី និងទ្រព្យសកម្មផ្សេង។

ក្រុមហ៊ុន Apollo និយាយថា ការទិញនេះគឺជាការប្រថុយប្រថានដ៏ធំ ខណៈចំនួនភ្ញៀវទេសចរ និងអាជីវកម្មសន្និបាតនៅឡាសវេហ្គាស បានដាំក្បាលចុះខ្លាំងក្នុងរយៈពេលមួយឆ្នាំកន្លងមកនេះ ដោយសារការឆ្លងរាតត្បាតវីរុសកូវីដ-១៩ ។

ក្រុមហ៊ុននេះបានបន្ថែមទៀតថា “ការវិនិយោគនេះ ក៏ឆ្លុះបញ្ចាំងផងដែរពីការជឿជាក់យ៉ាងមុតមាំរបស់យើងថា សេដ្ឋកិច្ចនៅឡាស វេហ្គាស នឹងងើបឡើងវិញខ្លាំង ខណៈវ៉ាក់សាំងជំរុញឱ្យវិស័យកម្សាន្ដ និងទេសចរណ៍បើកដំណើរឡើងវិញ នៅសហរដ្ឋអាមេរិក និងទូទាំងពិភពលោក” ។

ក្រុមហ៊ុន Las Vegas Sands បានបង្រួមឈ្មោះរបស់ខ្លួនមកនៅត្រឹម Sands ដោយសារត្រូវផ្លាស់ចេញពីក្រុងឡាស វេហ្គាស។ ក្រុមហ៊ុននេះ បានចេញសេចក្តីប្រកាសព័ត៌មានថា ការផ្លាស់ប្តូរនេះគឺ “សប្បាយលាយក្រៀមក្រំ” ហើយនឹងជួយឱ្យខ្លួនងាកមក ផ្តោតលើទីផ្សារ ដែលកំពុងរីកចម្រើនលឿនដូចជាតំបន់អាស៊ីជាដើម។

លោក Robert Goldstein នាយកប្រតិបត្តិនៃក្រុមហ៊ុន Sands បានលើកឡើងថា “Venetian បានផ្លាស់ប្តូរមុខមាត់ នៃការអភិវឌ្ឍកាស៊ីណូនាពេលអនាគត ហើយនឹងពង្រឹងកេរដំណែលរបស់លោក Sheldon Adelson ក្នុងនាមជាបុគ្គលម្នាក់ ក្នុងចំណោមបុគ្គលមានឥទ្ធិពលបំផុត នៅក្នុងប្រវត្តិសាស្ត្រនៃឧស្សាហកម្មល្បែង និងបដិសណ្ឋារកិច្ច។ សណ្ឋាគារប្រណីត និងរីសតកាស៊ីណូ Venetian បានបើកដំណើរការក្នុងឆ្នាំ១៩៩៩ ដែលជួយជំរុញឱ្យ Sands ក្លាយជាក្រុមហ៊ុនកាស៊ីណូធំបំផុតក្នុងពិភពលោក។

សារព័ត៌មានជាច្រើនបានចុះផ្សាយថា កាលពីនៅមានជីវិត លោក Sheldon Adelson ធ្លាប់បានពិចារណាលក់កាស៊ីណូ របស់លោកនៅឡាស វេហ្គាសផងដែរ មុនពេលលោកទទួលមរណភាព នៅថ្ងៃទី១១ ខែមករា ដើមឆ្នាំ២០២១ នេះក្នុងវ័យ៨៧ ឆ្នាំ៕

ពិចារណា៖ តើដំណាក់កាលនេះគួរបន្តវិនិយោគអចលនទ្រព្យ ឬផ្អាកសិន ?

ដោយៈ វឌ្ឍនៈ

ភ្នំពេញៈ នៅក្នុងពេលកម្ពុជា កំពុងជួបប្រទះនឹងរលកទី៣ នៃការឆ្លងជាសហគមន៍នៃជំងឺកូវីដ១៩ និងកាន់តែមានទ្រង់ទ្រាយធំជាងពេលមុននៗនោះ វិនិយោគិនខ្លះនៅតែបន្តគម្រោងអភិវឌ្ឍន៍របស់ខ្លួន ហើយវិនិយោគិនខ្លះទៀត ក៏កំពុងសិក្សាលើការវិនិយោគបន្ត។

តើក្នុងដំណាក់នេះ វិនិយោគិនអចលនទ្រព្យគួរផ្អាក ឬបន្តគម្រោងបន្តទៀត?។

បើតាមលោកង៉ែត ជូ សេដ្ឋវិទូមួយរូប និងវិនិយោគិនអចលនទ្រព្យមួយរូបផងដែរនោះ បានមានប្រសាសន៍នៅក្នុងវេទិកាមួយ កាលពីពេលថ្មីៗនេះឱ្យដឹងថា នៅក្នុងដំណាក់កាលនៃវិបត្តិកូវីដ១៩ វាបានធ្វើឱ្យប៉ះពាល់ដល់ដំណើរការនៃការវិនិយោគ ប៉ុន្តែមានវិនិយោគិនមួយចំនួន នៅតែបន្តការអភិវឌ្ឍរបស់ខ្លួនដដែល ទោះស្ថិតនៅក្នុងវិបត្តិយ៉ាងណាក្ដី ។

លោកបន្តថា “សម្រាប់អ្នកដែលវិនិយោគ ក្នុងរយៈពេលយូរអង្វែងមិនគួរផ្អាកគម្រោងសាងសង់ ឬអភិវឌ្ឍន៍នោះទេ ព្រោះថានៅក្នុងរយៈពេលខាងមុខទៀត វិបត្តិនឹងត្រូវបានបញ្ចប់” ។ លោកបន្តថា “ដំណើរការនៃការសាងសង់ក៏នឹងត្រូវបានបញ្ចប់ ពេលនោះវិនិយោគិន អាចទទួលបានផលចំណេញ ត្រលប់មកវិញពីការវិនិយោគរបស់ខ្លួន” ។

លោកង៉ែត ជូ បានបន្តទៀតថា សម្រាប់អ្នកដែលចង់វិនិយោគ យកចំណេញក្នុងពេលខ្លី ឬភ្លាមៗមិនគួរធ្វើនោះទេក្នុងពេលនេះ ព្រោះវាពិបាកនឹងធ្វើឱ្យពួកគេទទួលបានផលចំណេញណាស់ ក្នុងពេលដែលសេដ្ឋកិច្ចកំពុងមានបញ្ហាយ៉ាងដូចនេះ។

លោកបន្ថែមថា រូបលោកក៏ជាអ្នកវិនិយោគមួយរូបផងដែរ តែក្នុងពេលមានវិបត្តិនេះ រូបលោកមិនបានផ្អាក ឬពន្យារការអភិវឌ្ឍនោះឡើយ គឺនៅតែបន្តទៅមុខ ដោយសារតែគម្រោងរបស់លោក ជាគម្រោងសម្រាប់ទទួលយកប្រាក់ចំណេញ នៅពេលអនាគតខាងមុខ ដោយមិនមែនភ្លាមៗក្នុងឆ្នាំ២០២០ ឬ២០២១នោះទេ ។

ជាមួយគ្នានេះ លោកលីម រដ្ឋា ភ្នាក់ងារអចលនទ្រព្យមួយរូបប្រចាំខេត្តកំពត និងកែបក៏បានឱ្យដឹងថា ទោះស្ថិតនៅក្នុងវិបត្តិនៃជំងឺកូវីដ១៩នេះ តែអ្នកស្វែងរកទិញអចលនទ្រព្យក៏មានច្រើនដែរ។ អ្នកស្វែងរកទិញអចលនទ្រព្យ ជាអ្នកដល់សល់លុយពីការផ្គត់ផ្គង់ជីវភាព ហើយពួកគេក៏អាចរកបាននូវទីតាំងអចលនទ្រព្យល្អៗ ជាមួយនឹងតម្លៃទាបជាងទីផ្សារផងដែរ ពីព្រោះតែអ្នកលក់នៅក្នុងសម័យនេះ គឺជាអ្នកទល់ច្រក មានបញ្ហាហិរញ្ញវត្ថុដូច្នេះទើបដាក់លក់ក្នុងតម្លៃទាបជាងទីផ្សារទើបមានអ្នកទិញ ។

លោកបន្តថា “អ្នកទិញខ្លះសម្រាប់ទុកលក់ចំនេញវិញ នៅពេលចប់វិបត្តិ ហើយអ្នកទិញខ្លះទៀតក៏ប្រាប់ថា ទុកអភិវឌ្ឍខ្លួនឯងនៅពេលចប់វិបត្តិ ឬអភិវឌ្ឍនៅពេលឆាប់ៗនេះ ដើម្បីទុកបម្រើឱ្យវិស័យអចលនទ្រព្យ ពេលដែលចប់វិបត្តិនៃជំងឺកូវីដ១៩ ៕

ឧកញ៉ាម៉ន សុខា៖ ទិញដីឡូត៍គឺជាការសន្សំទ្រព្យដោយមិនដឹងខ្លួន

ដោយៈ រ៉ាណេត

ភ្នំពេញៈ ទោះជានៅក្នុងបរិការណ៍ ដែលកំពុងជួបនាពេលបច្ចុប្បន្ននេះ ទីផ្សារដីឡូត៍នៅតាមតំបន់ជាយក្រុង និងក្បែរទីប្រជុំជនមួយចំនួនជុំវិញក្រុង នៅតែមានសកម្មភាព ខណៈដែលការទិញឡូត៍ បានផ្តល់ផលចំណេញទាំងអតិថិជន ដែលមានចំណូលមធ្យម ចំណេញទាំងអ្នកលក់ ចំណេញទាំងសេដ្ឋកិច្ចជាតិ។

ប្រធានសមាគមអ្នកអភិវឌ្ឍន៍ដីឡូត៍កម្ពុជា ឧកញ៉ាម៉ន សុខា បានមានប្រសាសន៍ឲ្យដឹងកាលពីពេលថ្មីៗថា ទីផ្សារដីឡូត៍នៅតែមានប្រជាប្រិយភាព ព្រោះអ្នកមានតម្រូវការដីសម្រាប់សាងសង់លំនៅដ្ឋានជាកម្មសិទ្ធិផ្ទាល់ខ្លួន នៅមានកម្រិតច្រើន ហើយម្ចាស់អភិវឌ្ឍន៍គម្រោងដីឡូត៍ ក៏បានផ្តល់ឱកាសដល់អ្នកដែលមានចំណូលតិច ឬមធ្យម ដែលគ្មានលទ្ធភាពទិញដី ទំហំដោយការបង់ផ្ដាច់នោះ អាចធ្វើការទិញតាមរយៈវិធីសាស្ត្រនៃការបង់រំលោះប្រចាំខែបានយ៉ាងសុវត្ថិភាព។

លោកឧកញ៉ាបានបន្តថា “មិនថាពេលនេះ ឬបន្តទៅមុខ៥-១០ឆ្នាំទៀតនោះទេ ទីផ្សារដីឡូត៍ នៅតែមានប្រជាប្រិយភាពខ្ពស់ ព្រោះអ្នកដែលមានតម្រូវការនៅមានកម្រិតច្រើន ហើយអ្នកអភិវឌ្ឍន៍មិនសូវពិបាកក្នុងការរកទីផ្សារនោះទេ” ។ លោកបន្តថា “លើសពីនេះ តាមរយៈការពុះគម្រោងដីឡូត៍ លក់ជូនដល់អ្នកមានចំណូលតិ និងចំណូលដែលចង់បានដីកម្មសិទ្ធិស្របច្បា ប់សម្រាប់សាងសង់លំនៅដ្ឋាននេះ អ្នកអភិវឌ្ឍន៍បានសប្បាយចិត្តក្នុងការចូលរួមជួយលើកកម្ពស់សង្គមផងដែរ” ។

លោកម៉ន សុខា បានបញ្ជាក់ថា តាមការពិតទីផ្សារដីឡូតិ៍បានចូលរួមជួយសង្គមជាតិដោយប្រយោល ដែលមនុស្សមួយចំនួនមើលមិនឃើញ។ គម្រោងដីឡូត៍ស្របច្បាប់ បានជួយសម្រួលដល់បងប្អូនប្រជាពលរដ្ឋ ដែលចំណូលតិចគ្មានលទ្ធភាពទិញដីទំហំធំដោយការបង់ផ្តាច់រាប់ម៉ឺនដុល្លារ ឱ្យមានលទ្ធភាពគ្រប់គ្រាន់ ក្នុងមានដីជាកម្មសិទ្ធិស្របច្បាប់សម្រាប់សាងសង់លំនៅដ្ឋានស្នាក់ ដោយការលក់ក្នុងតម្លៃទាប ជួយសម្រួលដល់លក្ខខណ្ឌនៃការបង់ប្រាក់ ឬបង់រំលោះប្រចាំខែ។

លោកឧកញ៉ាម៉ន សុខាបានបន្តថា “ទោះជាពួកគាត់មិនទិញ សម្រាប់សាងសង់លំនៅដ្ឋាន ដែលជាតម្រូវការជាក់ស្ដែង ប៉ុន្តែក្រោយពេលបង់រំលស់អស់ ពួកគាត់នឹងសល់ជាទ្រព្យ ប្រៀបដូចគាត់សន្សំប្រាក់យ៉ាងដូច្នោះ” ។ លោកបន្ថែមថា “បន្ថែមពីនេះ តម្លៃដីពីមួយឆ្នាំទៅមួយឆ្នាំតែងមានកំណើន ដូច្នេះពួកគាត់ក្រៅពីជាការសន្សំប្រាក់ថែមទាំងអាចទទួលបានចំណេញថែមទៀត” ៕

ហេតុអ្វីបានវិនិយោគិនក្នុងស្រុកកាន់តែដើរតួនាទីយ៉ាងសំខាន់ក្នុងវិស័យអចលនទ្រព្យកំឡុងពេលមានវិបត្តិ

ដោយៈ ម៉ាណេត

ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានថ្លែងថា អ្នកវិនិយោគក្នុងស្រុកមានសារៈសំខាន់ ក្នុងការជំរុញកំណើនអចលនទ្រព្យ និងសេដ្ឋកិច្ចនៅកម្ពុជា ក្នុងអំឡុងវវិបត្តិកូវីដ១៩ ។

លោកបន្តថា វិនិយោគិនក្នុងស្រុកនៅតែសំខាន់បំផុត ក្នុងការជំរុញកំណើនវិស័យអចលនទ្រព្យ និងសេដ្ឋកិច្ចកម្ពុជា ហើយជាក់ស្ដែងសម្រាប់វិស័យអចលនទ្រព្យ ទោះបីស្ថិតក្នុងវិបត្តិកូវីដ១៩ ដែលធ្វើឱ្យវិនិយោគិនក្រៅស្រុកមានផលលំបាក ក្នុងការមកវិនិយោគកម្ពុជា ប៉ុន្ដែសកម្មភាពវិនិយោគិនក្នុងស្រុកនៅដំណើរការ។

លោកបន្តថា “បន្ទាប់ពីឆ្លងកាត់វិបត្តិនេះ នឹងធ្វើឱ្យប្រជាជនកម្ពុជាមានភាពរឹងមាំ ចាស់ទុំ និងអាចដោះស្រាយនៅពេលមានវិបត្តិ នៅពេលក្រោយៗទៀត” ។ លោកបន្ថែមថា “អ្នកវិនិយោគក្នុងស្រុកនៅតែដើរតួនាទីសំខាន់ ក្នុងការជំរុញកំណើនអចលនទ្រព្យ និងសេដ្ឋកិច្ចនៅកម្ពុជាបានមួយភាគធំ” ។

លោកច្រឹក សុខនីមបានថ្លែងថា វិបត្តិកូវីដ១៩នេះ ក៏ជាការផ្ដល់ឱកាសក្នុងការរៀនសូត្រអំពីភាពប្រឈម ក្នុងវិបត្តិបញ្ហាលើពិភពលោកផងដែរ។ បន្ទាប់ពីឆ្លងកាត់វិបត្តិនេះ នឹងធ្វើឲ្យប្រជាជនកម្ពុជា មានភាពរឹងមាំ ចាស់ទុំ និងអាចដោះស្រាយនៅពេលមានវិបត្តិ នៅពេលក្រោយៗទៀត។

លោកបញ្ជាក់ទៀតថា អ្នកវិនិយោគនឹងចាប់ផ្ដើមធ្វើដំណើរ នៅពេលទទួលបានវ៉ាក់សាំងកូវីដ១៩ និងប្រទេសដែលត្រូវទៅវិនិយោគ មានវ៉ាក់សាំងដូចគ្នា។ បច្ចុប្បន្នទោះបីកម្ពុជា ទទួលបានវ៉ាក់សាំងកូវីដ១៩រួចរាល់ក្ដី ប៉ុន្ដែប្រទេសដទៃទៀតមិនទាន់ ទទួលបានពេញលេញ។

លោកបន្ដថា “បើជំងឺកូវីដ១៩ នៅតែបន្ដអូសបន្លាយ លោកមើលឃើញថា អចលនវត្ថុកម្ពុជា អាចប្រឈមនឹងការថមថយខ្លះ ប៉ុន្ដែរហូតមកដល់ពេលនេះ មិនទាន់មានសញ្ញាថមថយណាមួយឡើយ ដោយសារតែវិស័យធនាគារ នៅតែបន្ដប្រាក់កម្ចីលើវិស័យនេះ ដូច្នេះវិស័យអចលនទ្រព្យ នៅបន្ដភាពរឹងមាំដដែល” ។

ទាក់ទងនឹងវិស័យអចលនទ្រព្យ មន្ដ្រីជាន់ខ្ពស់រាជរដ្ឋាភិបាលបានលើកឡើងកាលពីថ្មីៗនេះថា វិស័យអចលនទ្រព្យ និងសំណង់ជាជន្ទល់យ៉ាងរឹងមាំ ក្នុងការលើកស្ទួយសេដ្ឋកិច្ចជាតិ ក្នុងអំឡុងពេលនៃការរីករាលដាន នៃជំងឺកូវីដ១៩ ផងដែរ៕

ពេលណា ដែលអ្នកគួរលក់ដីធ្លី ឬអចលនទ្រព្យរបស់អ្នកចេញដើម្បីកុំឲ្យជាប់គាំង

ដោយៈ ស៊ីវ ម៉េង

ភ្នំពេញៈ អ្នកវិនិយោគភាគច្រើន ពិសេសអ្នកវិនិយោគផ្នែកដីធ្លី តែងតែលោភលន់ ដោយមិនលក់អចលនទ្រព្យរបសខ្លូននោះទេ នៅពេលវាកំពុងមានតម្លៃកើនឡើងខ្ពស់ ដែលការសម្រេចចិត្តបែបនេះ មានចំណុចល្អ និងប្រឈមនឹងហានិភ័យខ្ពស់ផងដែរ។

ទីប្រឹក្សាសមាគមអចលនទ្រព្យសកល និងជាអ្នកវិនិយោគអចលនទ្រព្យមួយរូប ដែលធ្លាប់មានបទពិសោធន៍ជាប់គាំង លើការទិញលក់អចលនទ្រព្យមួយចំនួន បានលើកយកបទពិសោធន៍ និងទស្សនរបស់ខ្លួនលើចំណុច ដែលគួរវិភាគពិចារណាចំនួន៤ចំណុចយកមកចែករំលែក ដែលចំណុចទាំងនោះរួមមាន។

ឡើងថ្លៃសមល្មម

តាមធម្មតាតម្លៃដីធ្លី ឬអចលនទ្រព្យដទៃទៀត តែងតែឡើងថ្លៃនៅពេលកាលៈទេសៈមកដល់ ប៉ុន្តែវាមិនឡើងថ្លៃរហូតនោះទេ ហេតុនេះអ្នកវិនិយោគគួរតែដោះដូរដីរបស់ខ្លួន ប្រសិនជាទទួលបានផលចំណេញ ចាប់ពី៥០ភាគរយឡើងទៅ។ នៅពេលអ្នកលក់ដី នោះភ្លាម អ្នកនឹងចំណេញ ហើយសប្បាយចិត្ត ប៉ុន្តែសូមយកទុននោះទៅទិញដីបន្ថែមនៅទីតាំងល្អ មានសក្តានុពលចំណេញខ្ពស់។

នៅពេលការទិញលក់ញឹកញាប់កើតឡើង អ្នកអាចសល់ដី២ទៅ៣កន្លែង និងកើនឡើងបន្ថែមទៀត ដែលធ្វើឲ្យអចលនទ្រព្យរបស់អ្នក កាន់តែទទួលបានផលចំណេញ និងមានទីតាំងច្រើន លើសពីពីរកន្លែង។ អ្នកអាចលក់ចេញ១ ដើម្បីយកលុយមកចាយ ដើរលេងសប្បាយផងដែរ ដែលនេះជាវិធីសាស្ត្រផ្តល់កំលាំងចិត្តដល់ខ្លួនឯង ហើយរិះរកទុន យកមកវិនិយោគបន្ថែមទៀត។

កាលៈទេសៈមកដល់

តាមធម្មតានៅពេលរដ្ឋាភិបាល អភិវឌ្ឍន៍ផ្លូវនៅតំបន់ណាមួយ ដីតំបន់នោះតែងតែកញ្ជ្រោលឡើងថ្លៃខ្ពស់ ប៉ុន្តែតម្លៃរបស់វានៅពេលសាងសង់ផ្លូវរួចអាចនៅទ្រឹង ឬធ្លាក់ចុះបន្តិចមកវិញ បើសិនជាសកម្មភាពសេដ្ឋកិច្ចតំបន់នោះមិនសូវដំណើរការល្អ។

ឧទាហរណ៍ ដីនៅតាមបណ្តោយផ្លូវល្បឿនលឿនភ្នំពេញ ព្រះសីហនុ បានឡើងថ្លៃ ប៉ុន្តែក្រោយមកបានធ្លាក់ចុះមកវិញ ដោយសារតែផ្លូវនេះធ្វើរួចនឹងមានការសាងសង់របង សងខាង មិនអាចឲ្យគោ ក្របី ឬអ្នកដំណើរឆ្លងកាត់បាន ដែលបង្កការកកស្ទះចរាចរណ៍។

បញ្ហាការសាងសង់ស្ពានអាកាស ក៏បានធ្វើឲ្យតម្លៃផ្ទះ និងដីធ្លីជាប់នឹងស្ពានធ្លាក់ថ្លៃផងដែរ ដោយសារមិនមានចរាចរណ៍ងាយស្រួល ឆ្លងកាត់ ដែលបច្ចុប្បន្នយើងឃើញមានឧទាហរណ៍ស្រាប់។

ពេលសេដ្ឋកិច្ចងើបឡើងខ្ពស់

តាមធម្មតាសេដ្ឋកិច្ចកម្ពុជា ក៏ដូចជា សេដ្ឋកិច្ចបណ្តាប្រទេសផ្សេងៗទៀត តែងតែកើនឡើងខ្ពស់ ប៉ុន្តែក៏មានរយៈពេលកំណត់ផងដែរ។ ពេលសេដ្ឋកិច្ចកើនឡើងខ្ពស់រយៈពេល៥ទៅ៧ឆ្នាំជាប់គ្នា វាជាពេលដែលធ្វើឲ្យតម្លៃដីធ្លីលំនៅដ្ឋានរបស់អ្នក កើនឡើង ដែលនេះវាជាពេលវេលាល្អបំផុត ដែលលោក អ្នកគួរបញ្ចេញឬលក់ចេញនូវអចលនទ្រព្យរបស់អ្នក ដើម្បីយកទៅវិនិយោគនៅតំបន់ដទៃទៀត។

ប្រសិនជាសេដ្ឋកិច្ចកើនឡើង៣ ទៅ៤ឆ្នាំជាប់គ្នា វាជាពេលវេលាដ៏ល្អ ដែលអ្នកគួរលក់ដីធ្លីឬអចលនទ្រព្យរបស់អ្នក ដើម្បីលោក អ្នកអាចដកលុយទុកខ្លះ និងយកទៅវិនិយោគលើគំរោងអ្វីមួយផ្សេង ឬយកទៅវិនិយោគលើអចលនទ្រព្យដដែល តាមធនធាននិងអ្វីដែលលោក អ្នកចង់បាន។

ជិតដល់វដ្តនៃវិបត្តិសេដ្ឋកិច្ច

វាជាចំណុចពិសេស ដែលអ្នកបានរៀនសូត្រ និងដឹងបណ្តើរៗហើយថា សេដ្ឋកិច្ចពិភពលោកនឹងធ្លាក់ចុះ រៀងរាល់១០ឆ្នាំម្តង ដូចជា វិបត្តិសេដ្ឋកិច្ចអាស៊ីឆ្នាំ១៩៩៧ វិបត្តិសេដ្ឋកិច្ច និងហិរញ្ញវត្ថុ២០០៨ វិបត្តិសេដ្ឋកិច្ចដែលបណ្តាលមកពីជំងឺកូវីដ១៩ នៅឆ្នាំ២០២០ជាដើម។

តាមពិតវិបត្តិនេះ មិនមែនកើតឡើងដោយខ្លួនឯងនោះទេ តែវាជាការបង្កឡើងដោយប្រទេសមហាអំណាចធំៗលើពិភពលោក ដើម្បីកុំឲ្យសេដ្ឋកិច្ចរបស់ប្រទេសទើបងើបឡើង មានកំនើនខ្ពស់ពេក ឬវាជាហ្គេមមួយរបស់មហាអំណាច ដើម្បីប្រជែងឥទ្ឋិពលគ្នាលើពិភពលោក។

ហេតុនេះ បើដឹងដូច្នេះ តើលោក អ្នកគួរតែលក់អចលនទ្រព្យរបស់អ្នកឬទេ? នៅពេលវដ្តនៃវិបត្តិសេដ្ឋកិច្ចជិតចូលមកដល់?៕

អ្នកជំនាញអន្តរជាតិ៖ យុទ្ធសាស្ត្រការទូតផ្តោតលើសេដ្ឋកិច្ចនឹងផ្ដល់ប្រយោជន៍ច្រើនសម្រាប់កម្ពុជា

ដោយៈ សាវុធ

ភ្នំពេញៈ ការទូតសេដ្ឋកិច្ចអាចផ្ដល់ប្រយោជន៍ ចម្បងចំនួនបីសម្រាប់កម្ពុជា ដោយជំរុញឲ្យកម្ពុជា លើកកម្ពស់ទំនាក់ទំនងសេដ្ឋកិច្ច ជាមួយបណ្ដាប្រទេសផ្សេងៗ ដែលមានសេដ្ឋកិច្ចរីកចម្រើនខ្ពស់ និងធ្វើឲ្យកម្ពុជាសម្រេចបាននូវចក្ខុវិស័យ ក្នុងការប្រែក្លាយជាប្រទេសដែលមានចំណូលកំរិតខ្ពស់នៅឆ្នាំ២០៥០ ។

អ្នកស្រាវជ្រាវនៃវិទ្យាស្ថានចក្ខុវិស័យអាស៊ី (AVI) លោកសុវណ្ណ ពិសីរតនៈបានថ្លែងនៅក្នុងកម្មវិធី AVI VOICE កាលពីដើមសប្តាហ៍នេះថា នៅចំពោះមុខបញ្ហាប្រឈមមួយចំនួន ដែលបង្កឡើងដោយការរីករាលដាល នៃជម្ងឺរាតត្បាតសាកលកូវីដ១៩ ឥទ្ធិពល នៃការប្រកួតប្រជែងរបស់ប្រទេសមហាអំណាច ផលប៉ះពាល់នៃសភាពាណិជ្ជកម្ម និងបច្ចេកវិទ្យារវាងសហរដ្ឋអាមេរិក និងចិន រួមទាំងការដកផ្នែកខ្លះ នៃប្រព័ន្ធអនុគ្រោះពន្ធ EBA ដោយសហភាពអឺរ៉ុប ការដាក់ចេញនូវយុទ្ឋសាស្ត្ររបស់រដ្ឋាភិបាល “ការទូតសេដ្ឋកិច្ច” អាចផ្ដល់ប្រយោជន៍ចំបងចំនួនបីសម្រាប់កម្ពុជា។

លោកបានថ្លែងថា អត្ថប្រយោជន៍ទី ១ គឺការទូតសេដ្ឋកិច្ច នឹងជំរុញឲ្យកម្ពុជាលើកកម្ពស់ ទំនាក់ទំនងសេដ្ឋកិច្ចកម្ពុជា ជាមួយបណ្ដាប្រទេសផ្សេងៗ ដែលមានសេដ្ឋកិច្ចរីកចម្រើនខ្ពស់ ដូចដែលយើងបានដឹងហើយថា កាលពីខែតុលាឆ្នាំ២០២០កន្លងទៅ កម្ពុជាបានចុះកិច្ចព្រមព្រៀង ពាណិជ្ជកម្មសេរីទ្វេភាគីជាមួយប្រទេសចិន ដែលនេះជាយុទ្ធសាស្ត្រមួយ ក្នុងការលក់ផលិតផលលើទីផ្សារ ក៏ដូចជា កាត់បន្ថយការពឹងផ្អែកលើការនាំចេញទៅកាន់ទីផ្សារសហរដ្ឋអាមេរិកនិងសហភាពអ៊ឺរ៉ុប។

កិច្ចព្រមព្រៀងនេះ អាចនឹងផ្ដល់នូវកាលានុវត្តភាពជាច្រើន តាមរយៈការពង្រីកទីផ្សារផលិតផលខ្មែរ ឆ្ពោះទៅកាន់ទីផ្សាររបស់ចិន ដែលជាទីផ្សារធំជាងគេបំផុតនៅលើពិភពលោក ជាពិសេសគឺផលិតផលកសិកម្មនិងជលផលរបស់កម្ពុជា។

ក្រៅពីប្រទេសចិន កាលពីពេលថ្មីៗនេះ កម្ពុជាក៏បាននិងកំពុងសិក្សាពីលទ្ធភាព ដើម្បីបង្កើតកិច្ចព្រមព្រៀង ពាណិជ្ជកម្មសេរីទាំងទ្វេភាគី និងពហុភាគីបន្ថែមទៀត ជាមួយនឹងប្រទេសកូរ៉េខាងត្បូង ចក្រភពអង់គ្លេស ជប៉ុន ឥណ្ឌា ម៉ុងហ្គោលីនិងសហភាពសេដ្ឋកិច្ចអ៊ឺរ៉ុបអាស៊ី។

ប្រសិនបើសម្រេចបានកិច្ចព្រមព្រៀងទាំងនេះ អាចជំរុញការនាំចេញរបស់កម្ពុជាព្រមទាំងបង្កើតអោយមានទំនើបកម្មឧស្សាហកម្ម នៃផលិតកម្មរបស់កម្ពុជាផងដែរ។ ការទូតសេដ្ឋកិច្ចនេះ ក៏អាចទាក់ទាញក្រុមហ៊ុនបរទេសនានា មកដាក់ទីតាំងផលិតនៅកម្ពុជាបន្ថែមទៀត។

លោកសុវណ្ណ ពិសីរតនៈថ្លែងបន្តថា អត្ថប្រយោជន៍ទី ២ គឺការទូតសេដ្ឋកិច្ច នឹងជួយលើកស្ទួយមុខមាត់ ក៏ដូចជាកេរ្ត៍ឈ្មោះកម្ពុជាជាសកល ការទូតសេដ្ឋកិច្ចនឹងជំរុញអោយកម្ពុជា ផលិតព្រមទាំងនាំចេញម៉ាកផលិតផលរបស់ខ្មែរ ទៅកាន់ទីផ្សារអន្តរជាតិកាន់តែច្រើន។

ជាក់ស្ដែង ផលិតផលម្រេចកំពត ដែលត្រូវបានសហភាពអ៊ឺរ៉ុប ទទួលស្គាល់ថាជាទំនិញសម្គាល់ភូមិសាស្ត្ររបស់កម្ពុជា ព្រមទាំងផលិតផលថ្មីៗរបស់ខ្មែរយើងផ្សេងៗទៀត នឹងត្រូវបានផ្សព្វផ្សាយលក់កាន់តែទូលំទូលាយ នៅលើទីផ្សារអន្តរជាតិ។

លើសពីនេះទៅទៀត កម្ពុជាអាចលើកស្ទួយវប្បធម៌ និងប្រពៃណីខ្មែរយើងតាមរយៈសកម្មភាពការទូតសេដ្ឋកិច្ចនេះផងដែរ ជាឧទាហរណ៍ ការផ្សព្វផ្សាយអំពីម្ហូបល្បីរបស់ខ្មែរ ក៏ដូចជាសម្បត្តិបេតិកភណ្ឌពិភពលោក រួមមានប្រាសាទអង្គរវត្ត និងប្រាសាទព្រះវិហារ និងកាន់តែទទួលបានកិត្យានុភាពក្នុងតំបន់និងនៅលើឆាកអន្តរជាតិ។

អត្ថប្រយោជន៍ទី៣ ការទូតសេដ្ឋកិច្ច នឹងជួយឲ្យកម្ពុជាសម្រេចបាននូវចក្ខុវិស័យក្នុងការប្រែក្លាយជាប្រទេស ដែលមានចំណូលកំរិតខ្ពស់នៅឆ្នាំ២០៥០ ។

នៅក្នុងឆ្នាំ២០១៥ កម្ពុជាបានក្លាយជាប្រទេស ដែលមានចំណូលមធ្យមកំរិតទាបហើយបើយើងក្រឡេក ទៅមើលប្រាក់ចំណូលជាតិសរុប ក្នុងមនុស្សម្នាក់នៅក្នុងឆ្នាំ ១៩៩៨ មានត្រឹមតែ$២៩០សហរដ្ឋអាមេរិកតែប៉ុណ្ណោះ ប៉ុន្តែតួលេខនេះបានកើនមកដល់ប្រមាណ $១៤០០នៅក្នុងឆ្នាំ២០១៨ ។

ជាមួយនឹងគោលនយោបាយការទូតសេដ្ឋកិច្ច កម្ពុជានឹងអនុវត្តកំណែទម្រង់រចនាសម្ព័ន្ធគ្រប់ជ្រុងជ្រោយ រួមទាំងការធ្វើពិពិធកម្មសេដ្ឋកិច្ច ដែលអាចជួយធានានូវកំណើនសេដ្ឋកិច្ចសមភាព និងវិបុលភាពរបស់កម្ពុជា។ កត្តាទាំងនេះហើយ ដែលចូលរួមជំរុញឲ្យយើងសម្រេចបាននូវចក្ខុវិស័យ ដែលបានកំណត់ទុក គឺក្លាយជាប្រទេសដែលមានប្រាក់ចំណូលមធ្យមកំរិតខ្ពស់ក្នុងឆ្នាំ២០៣០ និងប្រាក់ចំណូលកំរិតខ្ពស់នៅឆ្នាំ២០៥០ ខាងមុខនេះ៕