អ្នកជំនាញៈ ការបង្កើតរំហូរសាច់ប្រាក់ក្នុងវិស័យអចលនទ្រព្យនឹងជួយឱ្យវិស័យនេះងាកចេញពីវិបត្តិបានលឿន

ដោយៈ ម៉ាណេត

ភ្នំពេញៈ វិបត្តិកូវីដ១៩បាននិងកំពុងបង្កផលប៉ះពាល់ ដល់វិស័យជាច្រើនលើពិភពលោក ហើយវិស័យអចលនទ្រព្យកម្ពុជា ក៏គេចមិនរួចពីផលប៉ះពាល់ ពីវិបត្តិជំងឺរាតត្បាតមួយនេះដែរ ប៉ុន្តែអ្នកជំនាញបានលើកឡើងបានថា អ្នកវិនិយោគ អ្នកអភិវឌ្ឍន៍គួរបង្កើត ឱ្យមានដំណើរការចរន្ត ឬរំហូរសាច់ប្រាក់ក្នុងវិស័យអចលនទ្រព្យ ដើម្បីអាចឱ្យវិស័យមួយនេះងើបឡើងវិញបានលឿន។

ប្រធាននាយកប្រតិបត្តិក្រុមហ៊ុន Easy Property Investment លោក ម៉ម សេរីបញ្ញា បានថ្លែងប្រាប់ក្នុងសប្តាហ៍នេះថា ក្នុងស្ថានការណ៍បច្ចុប្បន្ននេះ ពិភពលោកកំពុងជួបប្រទះនឹងបញ្ហា ហើយយើងក៏ជួបនឹងបញ្ហាដូចគ្នា ដោយសារវិបត្តិកូវីដ១៩ ។

លោកបានថ្លែងបន្តថា “ខ្ញុំអាចនិយាយបានថា វាមានផលប៉ះពាល់ ប៉ុន្តែយើងមិនអាចអង្គុយកាប់បំពង់ រង់ចាំទឹកភ្លៀងនោះទេ ឬនៅក្នុងរណ្តៅមួយ ដោយមិនប្រឹងវារឡើងនោះទេ ព្រោះបើយើងមិនធ្វើសកម្មភាពអ្វីសោះ យើងនឹងដួលទាំងអស់គ្នា” ។

លោកបានថ្លែងទៀតថា “ដូច្នេះយើងត្រូវបានធ្វើយ៉ាងម៉េច ឱ្យមានដំណើរការចរន្តសាច់ប្រាក់ (cash flow) ហើយយើងឃើញថា អ្នកវិនិយោគមួយចំនួន នៅប្រឹងប្រែងធ្វើ និងអ្នកទិញនៅបន្តទិញ ដែលជាឱកាសមួយល្អ ក្នុងការទទួលបានតម្លៃល្អ” ។

លោកអំនាវពាវដល់វិនិយោគិនទាំងអស់ កុំឱ្យមានការភិតភ័យ សម្រាប់ការវិនិយោគនាពេលបច្ចុប្បន្ន និងបន្តអភិវឌ្ឍន៍ និងវិនិយោគទៅតាមគម្រោង និងផែនការរបស់ខ្លួន ប៉ុន្តែត្រូវគោរពតាមការណែនាំរបស់រដ្ឋភិបាល តាមរយៈការដាក់គោលការណ៍ណែនាំរបស់ក្រសួងសុខាភិបាល។

ជាមួយគ្នានេះលោកសំ សុខនឿនប្រធានសមាគមអចលនទ្រព្យសកលបានឱ្យដឹងកាលថ្មីៗថា ការរីករាលដាលនៃជំងឺកូវីដ១៩ ជាសហគមន៍ជាថ្មីនៅក្នុប្រទេសកម្ពុជា នាពេលនេះ គឺជារឿងមិននឹកស្មានមួយ ក៏ប៉ុន្តែលោកជំរុញឱ្យវិនិយោគិននានា ក្នុងវិស័យនេះ គួរតែបន្តគម្រោងអភិវឌ្ឍន៍របស់ខ្លួនបន្ត ដោយសារតែកូវីដសហគមន៍នេះ នឹងត្រូវទប់ស្កាត់បាន។

លោកបានថ្លែងទៀតថា “ជាបទពិសោធន៍កន្លងមក កម្ពុជាបានទប់ស្កាត់ការរីករាលនិងគ្រប់គ្រងបានល្អ លើការឆ្លងរាលដាលនៃជំងឺនេះ ហើយសម្រាប់ការឆ្លងសហគមន៍លើកនេះ លោកក៏ជឿថាអាចទប់ស្កាត់បានដូចគ្នា ជាមួយនឹងវត្តមានវ៉ាក់សាំងនៃកូវីដ១៩ ដែលកំពុងចាក់ជូនពលរដ្ឋបណ្ដើរៗផងដែរ” ។

លោកសំ សុខនឿន បានបន្តថា សម្រាប់ពេលនេះ ប្រជាពលរដ្ឋទាំងសូមស្ដាប់តាមការណែនាំរបស់ក្រសួងសុខាភិបាល ក៏ដូចជាប្រមុខរាជរដ្ឋាភិបាល ដើម្បីទប់ស្កាត់ការឆ្លងកាន់តែធំ ដើម្បីឱ្យការឆ្លងសហគមន៍នេះ បានបញ្ចប់នៅពេលឆាប់ៗ និងអាចស្ដារសេដ្ឋកិច្ចកម្ពុជាបានប្រសើរឡើងវិញ៕

វិបត្តកូវីដ១៩ បានធ្វើឲ្យទីក្រុងនៅកម្ពុជាចំនួនពីរស្ងប់ស្ងាត់ដូចចោរលួចសេះ

ដោយស៊ីវ ម៉េង

ភ្នំពេញៈ ការរីករាលដាលជំងឺកូវីដ១៩ បាននិងកំពុងធ្វើឲ្យទីក្រុងចំនួនពីរស្ងប់ស្ងាត់ដូចចោរលួចសេះអញ្ចឹង វាពិតជាគួរឲ្យស្រណោះ ប៉ុន្តែគេហទំព័រ Propertyarea.asia សង្ឃឹម និងជឿជាក់លើចំណាត់ការរបស់រដ្ឋាភិបាលថា នឹងគ្រប់គ្រងការរីករាលដាលជំងឺនេះ និងធ្វើឲ្យស្ថានការណ៍វិលមកកាន់ភាពប្រក្រតីវិញ។

ទីក្រុងដែលមានសភាពដូចទីក្រុងខ្មោច នាអតីតកាល បានមកលងបន្លាចជដថ្មី នោះគឺក្រុងព្រះសីហនុ ដែលមិនមានអ្នកធ្វើដំណើរឆ្លងកាត់ ទោះបីផ្លូរលោងស្អាត ទើបបញ្ចប់ការសាងសង់នៅពេលថ្មីៗនេះក្តី។

ទីក្រុងមួយទៀត គឺក្រុងបាវិត ក៏មានសភាពស្ងប់ស្ងាត់ផងដែរ ដែលនៅលើដងផ្លូវនៃទីក្រុងទាំងពីរនេះ ពិតជាមិនសូវមានចរាចរណ៍ឆ្លងកាត់ និងស្ងប់ស្ងាត់មិនធ្លាប់មានចាប់តាំងពីកម្ពុជាបានបញ្ចប់សង្គ្រាម ក្នុងរយៈពេលជាង៣០ឆ្នាំមកនេះ។

សម្តេចតេជោ ហ៊ុន សែន កាលពីដើមសប្តាហ៍នេះ បានជម្រុញឲ្យអាជ្ញាធរក្រុងព្រះសីហនុ ត្រូវបិទមិនឲ្យប្រជាពលរដ្ឋចេញចូលក្រុងព្រះសីហនុ ក្នុងករណីមិនចាំបាច់ ដោយមិនឲ្យឆ្លងទៅកាន់ខេត្តដទៃ លើកលែងតែអ្នកបើករថយន្តដឹកទំនិញ។

ជាមួយគ្នានេះ ប្រមុខរដ្ឋាភិបាល ក៏បន្តប្រកាសផ្អាកសាលារៀននៅរាជធានីភ្នំពេញ និងខេត្តកណ្តាលរយៈពេលពីរសប្តាហ៍បន្ថែមទៀត ខណៈជំងឺនេះរីករាលដាល និងទីតាំងរ៉ុរកកាន់តតែធំ និងមានសភាពស្មុគ្រស្មាញ។

លោកស្រីតាំ ង ហួរ នាយិកាក្រុមហ៊ុន AMATAK Property Service Co, Ltd បានមានប្រសាសន៍ថា វិបត្តិនៃព្រឹត្តិការណ៍២០កុម្ភៈ បាននិងកំពុងធ្វើឲ្យចរន្តទិញលក់អចលនទ្រព្យមានសភាពស្ងប់ស្ងាត់ ប៉ុន្តែលោកស្រីបានបង្ហាញជំនឿចិត្តថា ប្រមុខរដ្ឋាភិបាលកម្ពុជានឹងអាចគ្រប់គ្រងជំងឺនេះបានឆាប់ៗ ដើម្បីឲ្យស្ថានភាពវិលមករកភាពប្រក្រតីវិញ។

លោកស្រីបន្តថា “ខ្ញុំជឿលើប្រមុខរដ្ឋាភិបាល ពិសេសសម្តេចតេជោ ដែលលោកមានសមត្ថភាពនឹងដោះស្រាយបញ្ហានេះបាន” ។

ជាមួយគ្នានេះ លោក សំ សុខនឿន ប្រធានសមាគមអចលនទ្រព្យសកល បានមានប្រសាសន៍ថា ការរីករាលដាលជំងឺកូវីដ១៩ ក្នុងព្រឹត្តិការណ៍២០កុម្ភៈ ជារឿងមិននឹងស្មានដល់ ខណៈដែលវាកំពុងរីករាលដាលនេះ លោកជឿថា ប្រមុខរដ្ឋាភិបាលនឹងអាចគ្រប់គ្រងជំងឺនេះបាន ព្រោះព្រឹត្តិការណ៍៣វិច្ឆិកា និង២៨ វិច្ឆិកាកន្លងមក រដ្ឋាភិបាលបានគ្រប់គ្រងជំងឺនេះបានល្អ៕

អ្នកជំនាញបង្ហើបពីវិធីសាស្ត្រងាយៗទិញដីវិនិយោគបានចំណេញក្នុងសម័យកូវីដ១៩

ដោយៈ រ៉ាណេត

ភ្នំពេញៈ នៅក្នុងបរិបទដែលកំពុងញាំញី ដោយការរាតត្បាតនៃជំងឺឆ្លងកូវីដ១៩ បង្កឱ្យមានផលប៉ះពាល់ដល់សេដ្ឋកិច្ច ស្ទើរគ្រប់បណ្តាប្រទេសនោះ មានមនុស្សជាច្រើនសម្ងំទុកលុយមិនហ៊ានចំណាយ ទៅលើការវិនិយោគនោះឡើយ សូម្បីតែវិស័យអចលនទ្រព្យ និងទីផ្សារដីធ្លីនៅតំបន់ខ្លះក៏ត្រូវជាប់គាំង។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានទទួលស្គាល់នូវឱនភាព នៃវិស័យអចលនទ្រព្យនៅកម្ពុជា ប៉ុន្តែមិនមែនធ្លាក់ចុះ ឬនៅទ្រឹងទាំងអស់នោះទេ ព្រោះផ្នែកខ្លះនៅក្នុងវិស័យមួយនេះ នៅតែអាចបន្តដំណើរបានយ៉ាងរលូន ជាពិសេសមានអ្នកជំនួញខ្លះ អាចទទួលបានផលចំណេញ ពីវិបត្តិមួយនេះយ៉ាងច្រើនថែមទៀតផង។

លោកបញ្ជាក់ថា “ខ្ញុំនិយាយតែផ្នែកមួយ ដែលស្ថិតនៅក្នុងវិស័យអចលនទ្រព្យ នោះគឺទីផ្សារដីធ្លី។ ទីផ្សារដីធ្លីទោះជាមានវិបត្តិជំងឺកូវីដ ក៏ផ្នែកមួយនេះនៅតែមានសកម្មភាពទិញលក់ ដូចជាទីផ្សារលំនៅដ្ឋានតម្លៃសមរម្យដែរ ហើយអាចមានឱកាសទទួលបានចំណេញពីការវិនិយោគយ៉ាងច្រើនថែមទៀតផង” ។

លោកបន្តថា “សម្រាប់អ្នកចេះវិនិយោគដីធ្លី នៅក្នុងកាលៈទេសៈនេះ គឺមានឱកាសចំណេញច្រើន នោះគឺការចេះវាយតម្លៃ និងស្គាល់ពីស្ថានភាពទីតាំង។ ការវាយតម្លៃមុនពេលសម្រេចចិត្តគឺសំខាន់បំផុត។ អ្នកត្រូវដឹងឱ្យច្បាស់ពីតម្លៃដីធ្លី នៅលើទីផ្សារឱ្យបានច្បាស់លាស់” ។ លោកបន្តថា “បើមិនចេះវាយតម្លៃ គួរប្រឹក្សាជាមួយភ្នាក់ងារជំនាញ ដែលមានក្រមសីលធម៌ និងវិជ្ជាជីវ ហើយធ្វើការប្រៀបធៀបរវាងតម្លៃ ដែលម្ចាស់ដីបានកាត់លក់ និងតម្លៃទូទៅនៅលើទីផ្សារ ជាពិសេសនៅក្នុងកំឡុងពេល ដែលកំពុងប្រឈមនឹងវិបត្តិកូវីដនេះតែម្ដង។ ពេលនោះអ្នកនឹងបានដឹងថា ដីដែលអ្នកចង់ទិញទុកវិនិយោគអាចផ្តល់ឱកាសចំណេញដល់មានអត្រាប៉ុន្មានភាគរយ” ។

លោកច្រឹក សុខនីម បានប្រាប់ឱ្យដឹងផងដែរថា នៅក្នុងបរិបទនៃសម័យកូវីដនេះ ប្រសិនបើជាអ្នកមានលុយគ្រប់គ្រាន់ មិនពាក់ព័ន្ធទៅនឹងបំណុលរបស់ធនាគារ នឹងអាចមានឱកាសចំណេញបានច្រើន ដោយសារតែរង់ចាំទិញដីទាំងឡាយ ដែលម្ចាស់ត្រូវការលុយបង្វិល ហើយបង្ខំចិត្តលក់ដីក្នុងតម្លៃថោក ឬទាបជាងទីផ្សារ លុះពេលស្ថានការទៅជាល្អវិញក្រោយវិបត្តិត្រូវបានបញ្ចប់ នោះតម្លៃដីនឹងឡោះងថ្លៃវិញជាក់ជាមិខាន។

លោកបន្តថា “ដូច្នេះ សម្រាប់អ្នកមានលុយ គួរទិញដីទុកវិនិយោគនៅក្នុងពេលនេះអាចមានឱកាសទទួលបានចំណេញច្រើន” ៕

ចំណេះដឹងវិនិយោគៈតើអ្វីទៅជាការវិនិយោគសកម្ម និងការវិនិយោគអកម្ម

ដោយៈវឌ្ឍនៈ

ភ្នំពេញៈ ក្នុងពេលបច្ចុប្បន្នគេមើលឃើញថា ការវិនិយោគលើទិញមូលបត្រ និងការវិនិយោគអចលនទ្រព្យនៅក្នុងប្រទេសកម្ពុជា ចាប់ផ្ដើមកើនឡើងជាបន្តបន្ទាប់ ដោយមានក្រុមហ៊ុនជាតិ និងអន្តរជាតិជាច្រើនចូលក្នុងវិស័យទាំងពីរ។

នៅក្នុងការវិនិយោគនេះដែរ គេបានបែងចែកជាពីរ គឺការវិនិយោគសកម្ម និងការវិនិយោគសកម្ម ។ អ្វីទៅជាការវិនិយោគសកម្មនិងការវិនិយោគអកម្ម?។

ការវិនិយោគគឺជាសកម្មភាពនៃការទិញនូវប្រភេទមូលប័ត្រផ្សេងៗ និងអចលនទ្រព្យជាដើម ដើម្បីអាចទទួលបាននូវផលចំណេញត្រឡប់មកវិញ ក្នុងពេលវេលាណាមួយ។ ដើម្បីអាចវិនិយោគបាន គឺទាមទារឱ្យយើងមាននូវចំណេះដឹង និងវិធីសាស្រ្ដនានានៃការវិនិយោគនោះ។ ដែលថ្ងៃនេះ យើងនឹងស្វែងយល់ពីប្រភេទនៃការវិនិយោគចំនួនពីរ គឺការវិនិយោគសកម្ម (Active Investing) ជាសកម្មភាពដែលវិនិយោគិនទិញលក់ ឬជួញដូរនៅក្នុងទីផ្សារជាប្រចាំ រីឯការវិនិយោគអកម្ម (Passive Investing) ជាសកម្មភាពដែលវិនិយោគិនទិញលក់ ឬជួញដូរនៅក្នុងទីផ្សារដែរ ប៉ុន្ដែមិនសូវមានសកម្មភាពញឹកញាប់នោះទេ ។

មានកត្តាសំខាន់ៗ៥យ៉ាង ដែលបង្ហាញពីភាពខុសគ្នានៃការវិនិយោគសកម្ម និងការវិនិយោគអកម្មនេះ ដូចជា

ទី១ រយៈពេលនៃការវិនិយោគ

ការវិនិយោគអកម្ម គឺវិនិយោគិនទិញ និងរក្សាទុក (buy and hold) ដើម្បីទទួលបានប្រាក់ចំណេញនៅក្នុងរយៈពេលវែង។ ឧទាហរណ៍ វិនិយោគិនទិញភាគហ៊ុន និងរក្សាទុកក្នុងរយៈពេលវែង ដើម្បីទទួលបានប្រាក់ចំណេញឬភាគលាភរបស់ក្រុមហ៊ុន តាមរយៈការឡើងថ្លៃនៃភាគហ៊ុនដែលបានទិញនោះ។ ចំពោះការវិនិយោគសកម្ម វិនិយោគិនផ្ដោតទៅលើការវិនិយោគក្នុងរយៈពេលខ្លី ពោលគឺពួកគេអាចទទួលបានប្រាក់ចំនេញ ពីការប្រែប្រួលតម្លៃនៅក្នុងទីផ្សារក្នុងពេលដ៏ខ្លីនោះ។

ទី២ ផលចំណេញ កំហាត និងហានិភ័យ

ការវិនិយោគអកម្មអាចទទួលបានផលចំណេញខ្ពស់ ប្រសិនបើអ្នកសម្រេចចិត្តវិនិយោគត្រូវ។ ប៉ុន្ដែប្រសិនបើមានការប្រែប្រួលថ្លៃក្នុងរយៈពេលវែង នោះវាក៏នាំឱ្យកើតមាននូវហានិភ័យផងដែរ ដូចនេះដើម្បីបញ្ចៀសនូវហានិភ័យនេះ។ វិនិយោគិនប្រភេទនេះគួរជ្រើសរើសវិធីពិពិធកម្មផលបត្រ រីឯការវិនិយោគសកម្ម ទទួលបានការចំណេញខ្ពស់នៅពេលដែលតម្លៃទីផ្សារកើនក្នុងរយៈពេលខ្លី ប៉ុន្ដែក៏មានហានិភ័យខ្ពស់ ប្រសិនបើមានការធ្វេសប្រហែស ឬគិតខុសមួយពេល។

ទី៣ ការចំណាយផ្សេងៗ

ការវិនិយោគអកម្ម មិនទាមទារឱ្យមានការចំណាយច្រើនដង លើឈ្មួញជើងសារក្នុងការធ្វើប្រតិបត្តិការនោះទេ ព្រោះថាវិនិយោគិនបែបអកម្មនេះ មិនសូវមានសកម្មភាពច្រើនក្នុងទីផ្សារ។ រីឯការវិនិយោគសកម្ម ទាមទារឱ្យមានការចាយវាយ លើថ្លៃប្រតិបត្តិការនានា ដូចជាចំណាយលើឈ្មួញជើងសារជាដើម ដោយសារវិនិយោគិនត្រូវធ្វើសកម្មភាពប្រតិបត្តិការនៅលើទីផ្សារជាញឹកញាប់។

៤ ភាពបត់បែនក្នុងការវិនិយោគ

ការវិនិយោគអកម្ម មិនសូវមានភាពបត់បែនច្រើននោះទេ ដោយសារការទិញនិងលក់ផ្អែកលើការប្រែប្រួលថ្លៃ ក្នុងរយៈពេលវែងមួយ ខណៈពេលដែលការវិនិយោគសកម្ម តម្រូវឱ្យមានភាពបត់បែនខ្ពស់ ដោយវិនិយោគិនសម្រេចចិត្ត ក្នុងការវិនិយោគដើម្បីទទួលបានផលចំណេញក្នុងរយៈពេលខ្លី ដូចជា ការជួញដូររូបិយប័ណ្ណបរទេស (FOREX) ដែលវិនិយោគិនត្រូវសម្រេចចិត្តទិញ និងលក់វិញភ្លាមៗទៅការតាមឡើងចុះ នៃតម្លៃរូបិយប័ណ្ណនោះ។

ទី៥ តម្រូវការជំនាញ

ការវិនិយោគអកម្ម វិនិយោគិនអាចនឹងមិនទាមទារពេលវេលា ដិតដល់ច្រើនលើជំនាញបច្ចេកទេស ដ្បិតថាវិនិយោគិនបែបអកម្មនេះកម្រ នឹងចូលធ្វើប្រតិបត្តិការវិនិយោគ និងមិនសូវតាមដាន ពីស្ថានភាពទីផ្សារជាប្រចាំទេ។ ពួកគេតែងតែមានឈ្មួញជើងសារ ឬអ្នកជំនាញហិរញ្ញវត្ថុ ជួយសម្រេចចិត្តក្នុងការវិនិយោគរបស់ពួកគេ។ រីឯការវិនិយោគសកម្ម តម្រូវឱ្យវិនិយោគិនមានជំនាញ ក្នុងការវិភាគពីទីផ្សារ តម្លៃ និងការវិភាគបច្ចេកទេសផ្សេងៗទៀត ដើម្បីអាចទទួលបានផលចំណេញច្រើន ក្នុងរយៈពេលខ្លី និងជៀសផុតពីហានិភ័យនានា។

សរុបសេចក្តីមក ការវិនិយោគសកម្ម និងការវិនិយោគអកម្មគឺសុទ្ធតែជាវិធីសាស្រ្ដដ៏ពេញនិយម ដែលត្រូវបានគេប្រើប្រាស់ដើម្បីវិនិយោគ។ ប្រសិនបើអ្នកចង់សម្រេចចិត្តវិនិយោគ អ្នកគួរស្វែងយល់ពីវិធីសាស្រ្ដទាំងពីរនេះ ឱ្យបានស៊ីជម្រៅ ឬក៏ប្រឹក្សាជាមួយអ្នកជំនាញ និងពិចារណាលើសមត្ថភាព ក៏ដូចជាពេលវេលាផ្ទាល់ខ្លួន និងការត្រៀមខ្លួនក្នុងការប្រឈមនឹងហានិភ័យនានាជាមុនសិន ដើម្បីឱ្យសម្រេចចិត្តវិនិយោគដោយត្រឹមត្រូវ៕

ការនាំចេញដំឡូងមីកម្ពុជាកំពុងមានទីផ្សារល្អប្រសើរ ខណៈទំហំនាំចេញកសិផលសរុបកើនដល់១,៦លានតោន

ដោយ: គង់ សូរិយា

ភ្នំពេញ: ក្រៅពីផលិតផលអង្ករ ការនាំចេញផលិតផលកសិកម្មរបស់កម្ពុជាគិតត្រឹមរយៈពេល២ខែ ដើមឆ្នាំ២០២១ មានទំហំប្រមាណជិត១,៦លានតោន កើនឡើងជាង ៥៦ម៉ឺនតោន ស្មើប្រមាណជាង៥៥ភាគរយ ក្នុងនោះទីផ្សារនាំចេញ ដំឡូងមីទាំងស្រស់និងក្រៀមក៏មានភាពល្អប្រសើរផងដែរ។

យោងតាមរបាយការណ៍របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ផលិតផលដែលបានទទួលការបញ្ជាទិញច្រើនជាងគេ រួមមាន៖ ដំឡូងមីក្រៀមចំនួនប្រមាណជាង៨០ម៉ឺនតោន ដំឡូងមីស្រស់ជាង១៥ម៉ឺនតោនស្រូវជាង២៨ម៉ឺនតោន ក្នុងនោះមិនបានឆ្លងកាត់ច្រកភូតគាមអនាម័យ មានចំនួនជិត៥៦ម៉ឺនតោន គ្រាប់ស្វាយចន្ទីជាង៧៩ពាន់តោន គ្រាប់ពោតក្រហមជាង៧៨ពាន់តោន ផ្លែចេកស្រស់ជាង៧៥ពាន់តោន ផ្លែស្វាយស្រស់ជាង ៤៣ពាន់តោនជាដើម។

លោក នី កាណ ប្រធានសម្ព័ន្ធសមាគមដំឡូងមីខេត្តបាត់ដំបង នៅព្រឹកថ្ងៃទី៤ ខែមីនា ឆ្នាំ២០២១កន្លងមកបានឱ្យដឹងថា កាលពីចុងឆ្នាំ២០២០ ប្រជាកសិករបានជួបបញ្ហាដោយសារទឹកជំនន់ ធ្វើឲ្យផលដំណាំជាពិសេសដំឡូងមី ខូចខាតក្នុងរង្វង់ប្រមាណ៣០ទៅ៤០ភាគរយ ប៉ុន្តែអ្វីដែលជាលទ្ធផលការនាំចេញ ដំឡូងមីឆ្នាំនេះមានទីផ្សារល្អ។ ជាក់ស្តែងការនាំចេញដំឡូងមីក្រៀម ក្នុងខេត្តបាត់ដំបង មានប្រមាណ៣០ម៉ឺនតោន ក្នុងមួយគីឡូក្រាមទទួលបានជិត៦បាត។

លោកមានសុទិដ្ឋិនិយមថា “តម្លៃនេះនឹងកើនឡើងថែមទៀត ខណៈដែលបរិមាណដំឡូងមីឆ្នាំនេះ ទទួលបានផលតិចជាងឆ្នាំមុនៗ និងកំពុងស្ថិតនៅចុងដៃនៃការប្រមូលផល”។ លោកបញ្ជាក់ទៀតថា “ទីផ្សារនាំចេញ ផលិតផលកសិកម្មរបស់កម្ពុជា និងមានទីផ្សារកាន់តែល្អប្រសើរ ខណៈដែលរាជរដ្ឋាភិបាល បានខិតខំប្រឹងប្រែងស្វែងរកទីផ្សារថ្មីៗបន្ថែមចូលជា ការចុះកិច្ចព្រមព្រៀងពាណិជ្ជកម្មសេរីជាមួយចិន និងកូរ៉េជាដើម”។

លោកបន្តថា សម្ព័ន្ធសមាគមដំឡូងមី បានរៀបចំឯកសារដាក់បញ្ចូលទៅក្នុងក្រមខណ្ឌពាណិជ្ជកម្មសេរីជាមួយចិន -កម្ពុជា ដើម្បីនាំចេញទៅកាន់ខេត្តក្វាងទុង និងខេត្តសាន់ស៊ី ក្រោមការសម្របសម្រួលដោយក្រសួងពាណិជ្ជកម្ម។

គិតត្រឹមរយះពេល២ខែ ដើមឆ្នាំ២០២១នេះ ការនាំចេញផលិតផលកសិកម្មក្រៅពីអង្ករ ដោយផ្អែកលើប្រព័ន្ធទិន្នន័យគ្រឹះភូតគាមអនាម័យ ក្នុងនោះការនាំចេញផលិតផលកសិកម្មក្រៅពីអង្ករ ដែលបាននាំចេញទៅកាន់គោលដៅចំនួន២៥ប្រទេស មានចំនួនជិត១,៦តោន កើនឡើងចំនួនជាង៥៦ម៉ឺនតោន ស្មើជាង៥៥ភាគរយ ប្រៀបធៀបរយះពេលដូចគ្នានិងឆ្នាំមុន៕

ក្រុមហ៊ុនអន្តជាតិកាន់តែច្រើននឹងចូលមកវិនិយោគនៅកម្ពុជាក្រោមការផ្តល់លក្ខខណ្ឌពិសេស

ដោយៈ រ៉ាណេត

ភ្នំពេញៈ ក្រោមការជួយសម្របសម្រួលពីសំណាក់រាជរដ្ឋាភិបាល និងការអនុវត្តច្បាប់វិនិយោគថ្មី កម្ពុជានឹងកាន់តែទាក់ទាញបណ្តាក្រុមហ៊ុនអន្តរជាតិ ក៏ដូចជាជនបរទេសនានាចូលមកវិនិយោគ បន្ថែមនៅកម្ពុជាកាន់តែច្រើនទៀត ខណៈដែលនៅតាមបណ្តាប្រទេសជិតខាងក្នុងតំបន់មួយចំនួន មិនបានការផ្តល់ជូនលក្ខខណ្ឌពិសេស សម្រាប់ជនបរទេសនោះឡើយ។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍នៅថ្ងៃទី៥ ខែមីនា ឆ្នាំ២០២១នេះថា ភាពទាក់ទាញលើការវិនិយោគពីសំណាក់ក្រុមហ៊ុនអន្តរជាតិ ក៏ដូចជាបណ្តាជនបរទេសនានាមកកម្ពុជា នឹងកាន់តែមានកំណើនជាបន្តបន្ទាប់ ខណៈដែលទទួលបានការជួយសម្របសម្រួល និងលើកទឹកចិត្តពីសំណាក់រាជរដ្ឋាភិបាលកម្ពុជា ជាពិសេសការអនុវត្តនូវច្បាប់វិនិយោគថ្មី ដែលកាន់តែផ្តល់នូវអត្ថប្រយោជន៍ជាច្រើនដល់ពួកគេ។

លោកឧកញ៉ាបញ្ជាក់ថា “បច្ចុប្បន្នកម្ពុជាបានធ្វើកំណែទម្រង់ និងដាក់ឱ្យអនុវត្តនូវច្បាប់វិនិយោគថ្មី ដែលកាន់តែផ្តល់ភាពងាយស្រួល ដល់បណ្តាក្រុមហ៊ុនអន្តរជាតិ ក៏ដូចជាបណ្តាជនបរទេសនានាផងដែរ”។ លោកបន្តថា “នៅក្នុងប្រទេសកម្ពុជា ជនបរទេសអាចមានសិទ្ធិវិនិយោគផ្ទាល់១០០ភាគរយ ដោយមិនចាំបាច់សហការកម្មសិទ្ធិជាមួយអ្នកវិនិយោគក្នុងស្រុក(៥១%+៤៩%) ដូចជាបណ្តាប្រទេសជិតខាង ក្នុងតំបន់មួយចំនួននោះឡើយ មានន័យថា ជនបរទេសមានសិទ្ធិធ្វើជាម្ចាស់អាជីវកម្ម ឬម្ចាស់ក្រុមហ៊ុនដោយឯកតោភាគី១០០ភាគរយ”។

អ្វីដែលកាន់តែពិសេស គឺកម្ពុជាបានក្លាយជាប្រទេសផ្តល់សេវាកម្ម ក្នុងនាមជាភ្នាក់ងារចែកចាយទំនិញ ផលិតផលចម្រុះ ទៅកាន់ទៅផ្សារដ៏ធំរបស់ប្រទេសចិន ដែលជាង១៤០០លាននាក់ រួមជាមួយនឹងទីផ្សារនៃបណ្តាប្រទេសមួយចំនួនទៀត ដែលនឹងចុះកិច្ចព្រមព្រៀងពាណិជ្ជកម្មសេរីជាមួយកម្ពុជា ដូចជាប្រទេសកូរ៉េ ជប៉ុន ឥណ្ឌា ហុងកុង ជាដើម។ បន្ថែមពីនេះ ជនបរទេសក៏មានសិទ្ធិក្លាយជាម្ចាស់អចលនវត្ថុផងដែរ ដោយអាចទិញអាគារធ្វើជាកម្មសិទ្ធិចាប់ជាន់ទី១ឡើងទៅ។

ពាក់ព័ន្ធទៅនឹងការអនុគ្រោះដល់បណ្តាជនបរទេសមានសិទ្ធិក្លាយជាម្ចាស់អចលនវត្ថុនៅកម្ពុជា លោកឧកញ៉ាបណ្ឌិតគីម ហ៊ាង ប្រធានKw Cambodia ធ្លាប់បានមានប្រសាសន៍កាលពីពេលកន្លងទៅថ្មីៗនេះថា ការផ្តល់សិទ្ធិដល់ជនបរទេសក្លាយជាម្ចាស់អចលនវត្ថុចាប់ពីជាន់ទី១ឡើង វាគឺជារឿងមួយដែលលើកទឹកចិត្តដល់ជនបរទេសដែលចូលមករស់នៅ និងប្រអាជីវកម្មនៅក្នុងកម្ពុជា។ ប៉ុន្តែប្រសិនបើរាជរដ្ឋាភិបាលកម្ពុជា មានបង្កើត និងបែងចែកទីតាំងនៅតំបន់ណាមួយ ដែលអាចអនុញ្ញាតឱ្យជនបរទេសទិញអចលនទ្រព្យជាន់ផ្ទាល់ដី ធ្វើជាកម្មសិទ្ធិបានគឺកាន់តែល្អជាងនេះទៅទៀត។

លោកឧកញ៉ាបញ្ជាក់ថា “កម្ពុជាគួរបង្កើតតំបន់អចលនទ្រព្យពិសេស សម្រាប់ជនបរទេស។ នៅពេលដែលមានការបង្កើត តំបន់អចលនទ្រព្យពិសេសណាមួយ ដែលអនុញ្ញាតឱ្យជនបរទេសមានសិទ្ធិក្នុងការទិញដី និងកាន់កាប់ជាកម្មសិទ្ធិស្របច្បាប់ ដើម្បីធ្វើការអភិវឌ្ឍផ្សេងៗ វានឹងជះឥទ្ធិពលល្អដល់តំបន់ដែលស្ថិតនៅក្បែរ ដែលយ៉ាងហោចណាស់ក៏ស្ថិតនៅក្នុងរង្វង់១០គីឡូម៉ែត្រជុំតំបន់អភិវឌ្ឍន៍នោះដែរ”។

លោកបន្តថា ជាធម្មតាជនបរទេសដែលមកទិញដី ទិញអចលនទ្រព្យនៅប្រទេសណាមួយគឺជាអ្នកមានលុយ ដូច្នេះនៅពេលប្រទេសណាមួយ មានអ្នកមានរស់នៅច្រើន កំណើននៃការអភិវឌ្ឍន៍នឹងកើតមាន ហើយការអភិវឌ្ឍនេះទៀតសោត គឺជាចលករមួយដែលជំរុញឱ្យមានតម្រូវការអចលនទ្រព្យ ដែលនឹងធ្វើឱ្យតម្លៃនៅលើទីផ្សារឡើងថ្លៃ ដោយស្វ័យប្រវត្តិ៕

ក្រុមហ៊ុនCentury21 Cambodia តំរង់ទិសចាប់យកទីផ្សារចិន ដើម្បីចាប់ចំណែកទីផ្សារអចលនទ្រព្យកាន់តែធំ

ដោយៈ ស៊ីវ ម៉េង

ភ្នំពេញៈ ក្រុមហ៊ុន Century 21 Allwin Realty ដែលជាសមាជិកមួយរបស់ Century 21 Cambodia ផ្តោតលើទីផ្សារវិនិយោគិនចិន បានសម្រេចចុះកិច្ចព្រមព្រៀងពង្រីកប្រតិបត្តិការរបស់ខ្លួននៅកម្ពុជា ដើម្បីចាប់យកចំណែកទីផ្សារកាន់តែធំ ដោយជឿជាក់ថាស្ថានភាពទីផ្សារអចលនទ្រព្យកម្ពុជា នឹងល្អប្រសើរឡើងនៅឆ្នាំនេះ។

លោកGao Shan នាយកប្រតិបត្តិក្រុមហ៊ុន Century 21 Allwin Realty បានមានប្រសាសន៍ថា កម្ពុជាគឺជាទីតាំងសក្តានុពលសម្រាប់វិនិយោគិនចិន ដាក់ទុនវិនិយោគដោយសារស្ថិរភាពនយោបាយ និងសេដ្ឋកិច្ច និងអំណោយផលនៃទំនាក់ទំនងល្អរវាងរដ្ឋាភិបាលនៃប្រទេសទាំងពីរ។ លោកបន្តថា ភាពងាយស្រួលនៃការធ្វើដំណើរ ដោយមានការតភ្ជាប់ជើងហោះហើរផ្ទាល់ពីកម្ពុជា ទៅស្ទើរគ្រប់ទីក្រុងសំខាន់ៗនៃប្រទេសចិន ក៏ជាអំណោយផលយ៉ាងសំខាន់ ហើយកត្តានេះធ្វើឲ្យការធ្វើដំណើរ តភ្ជាប់ប្រទេសទាំងពីរចំណាយត្រឹមចន្លោះពី២ ទៅ៥ម៉ោងប៉ុណ្ណោះ នៅពេលដែលស្ថានភាពជំងឺឆ្លងគ្រប់គ្រងបាន និងសុវត្ថិភាពត្រូវបានធានា។

លោកបន្តថា “វិនិយោគិនចិននៅកម្ពុជា មានការកើនឡើងយ៉ាងខ្លាំងនៅប៉ុន្មានឆ្នាំចុងក្រោយនេះ ហើយនឹងបន្តកើនឡើងនាពេលខាងមុខ។ កន្លងមកវិនិយោគិនទាំងនោះតែងមានបញ្ហាប្រឈមទាក់ទង នឹងការរកទីតាំងវិនិយោគនិងការទិញដី សម្រាប់ធ្វើប្រតិបត្តិការអាជីវកម្ម”។

លោកបន្តថា ពេលនេះក្រុមហ៊ុន Century 21 Allwin Realty គឺជាសមាជិកមួយរបស់ក្រុមហ៊ុនCentury 21 Cambodia ដែលជាក្រុមហ៊ុនអចលនទ្រព្យមានបណ្តាញធំទូលាយនៅកម្ពុជា ហើយប្រតិបត្តិការក្រុមហ៊ុនលោក នឹងជួយសម្រួលដោះស្រាយបញ្ហាប្រឈមដែលវិនិយោគិនចិនធ្លាប់ជួបប្រទះកន្លងមក។

ការពង្រីកខ្លួនរបស់ក្រុមហ៊ុន Century 21 Allwin Realty នាពេលនេះក៏សមស្របតាមការលើកឡើងរបស់ ជំនាញក្នុងវិស័យអចលនទ្រព្យ ដែលបានអះអាងថាទីផ្សារក្នុងវិស័យនេះ កំពុងមានសញ្ញាវិជ្ជមានឡើងវិញ នៅដើមឆ្នាំ២០២១នេះ បន្ទាប់ពីវត្តមានវ៉ាក់សាំងការពារជំងឺCovid19 ចាប់ផ្តើមមានហើយកំពុងចាក់ជូនក្រុមអទិភាព ដែលជួយបង្កើនទំនុកចិត្តវិនិយោគិន ជាពិសេសក្នុងចំណោមពាណិជ្ជករចិន ដែលជាវិនិយោគិនសក្តានុពល។

អ្នកស្រីGrace Rachny Fong នាយិកាក្រុមហ៊ុន Century 21 Cambodia បានឲ្យដឹងថា វិស័យអចលនទ្រព្យកម្ពុជា និងលំហូរវិនិយោគិនចិននៅកម្ពុជា នឹងស្ទុះឡើងប្រកប ដោយភាពវិជ្ជមាននៅឆ្នាំ ២០២១នេះ ដោយសារការរួមចំណែកនៃជំនួយវ៉ាកសាំង Covid 19 រហូតទៅដល់១លានដូសពីរដ្ឋាភិបាលចិនមកកម្ពុជា។

អ្នកស្រីថ្លែងថា #ឆ្នាំ ២០២១លំហូរវិនិយោគិនចិននៅកម្ពុជា នឹងបង្កើន ហើយការពង្រីកខ្លួនរបស់ក្រុមហ៊ុន Century 21 Allwin Realty ដែលជាក្រុមហ៊ុនផ្តោតសំខាន់លើទីផ្សារចិននាពេលនេះ នឹងជួយឲ្យពាណិជ្ជករចិនវិនិយោគនៅកម្ពុជា ទទួលបានផលចំណេ ញ និងវិនិយោគដោយសុវត្ថិភាព”។

គិតមកទល់ពេលនេះ ក្រុមហ៊ុនCentury 21 Cambodia កំពុងដំណើរការដោយមានការិយាល័យ២៣នៅភ្នំពេញ និង៣៨សាខានៅគ្រប់បណ្តាខេត្តនៅកម្ពុជា ហើយមានភ្នាក់ងារអចលនទ្រព្យប្រកបដោយជំនាញ និងវិជ្ជាជីវៈសរុបដល់ទៅជិត៧០០នាក់៕

វិថីឆ្ពោះទៅកាន់តំណែងប្រធានអាស៊ានឆ្នាំ២០២២ កម្ពុជាបានត្រៀមខ្លួនដូចម្តេច?

ដោយ ស៊ឹម វីរៈ ទីប្រឹក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ី (AVI)

ភ្នំពេញៈ នៅសល់រយៈពេលជាង៩ខែទៀតប៉ុណ្ណោះ ឆ្នាំ២០២២ នឹងចូលមកដល់ហើយ ហើយប្រទេសកម្ពុជា ក៏នឹងទទួលតួនាទីជាប្រធានអាស៊ានជាលើកទី៣។ តួនាទីនេះអាចជាមោទនភាពផង ហើយក៏អាចជាសម្ពាធផងដែរ។

អាស៊ានតែងតែជាផ្នែកដ៏សំខាន់មួយ នៃគោលនយោបាយការបរទេសរបស់កម្ពុជា។ ទោះបីជាកម្ពុជា ជាអ្នកមកយឺតក្នុងកិច្ចការអាស៊ានក្តី កម្ពុជាតែងតែបានបង្ហាញថា ខ្លួនជាអ្នកគាំទ្រដ៏សកម្ម និងមានលក្ខណៈស្ថាបនា សម្រាប់ការកសាងសហគមន៍អាស៊ាន។ ភាពក្លាហានរបស់កម្ពុជា ក្នុងការទទួលធ្វើជាប្រធានអាស៊ាន ជាលើកដំបូងក្នុងឆ្នាំ២០០២ បន្ទាប់ពីចូលជាសមាជិកបានរយៈពេល៣ឆ្នាំ ទៅក្នុងសមាគមតំបន់មួយនេះបានបង្ហាញនូវឆន្ទៈនយោបាយដ៏រឹងមាំ និងការប្តេជ្ញាចិត្តឥតងាករេ របស់ថ្នាក់ដឹកនាំកំពូលរបស់កម្ពុជាចំពោះសមាហរណកម្មតំបន់ និងពហុភាគីនិយម។ ការប្តេជ្ញាចិត្តទាំងនេះនៅតែស្ថិតស្ថេរជានិច្ច ហើយកាន់តែខ្លាំងក្លាជាងមុន។

យើងមានមោទនភាព ដែលបានក្លាយជាតួអង្គសកម្មម្នាក់ នៅក្នុងសហគមន៍អាស៊ានដែលជាស្ថាប័នដែលមានការពាក់ព័ន្ធ និងចូលរួមខ្លាំងនៅក្នុងសហគមន៍អន្តរជាតិ។ ទោះបីមានការរិះគន់ថា អាស៊ានគ្រាន់តែជា “វេទិកាព្រោកប្រាជ្ញ” ក្តី ក៏ប្រទេសនៅក្រៅតំបន់ជារឿយៗ តែងតែចង់ប្រើប្រាស់វេទិកាអាស៊ាន ដើម្បីដោះស្រាយបញ្ហាដែលជាកង្វល់នៅក្នុងតំបន់ ស្វែងរកគោលដៅវិនិយោគ និងដៃគូពាណិជ្ជកម្ម និងផលប្រយោជន៍ផ្សេងទៀតដែលវេទិកាពហុភាគីនិយមអាចផ្តល់ជូន។

ជាការពិតចំពោះមុខ នៃបញ្ហាប្រឈមពីការរីករាលដាល នៃជំងឺកូវីដ១៩ អាស៊ានប្រហែលជាស្ថាប័នតំបន់ដែលសកម្មបំផុតមួយ ដែលកំពុងខិតខំប្រឹងប្រែង ដើម្បីផ្តល់នូវដំណោះស្រាយ ដែលមានការច្នៃប្រឌិត និងជំរុញការសម្របសម្រួលក្នុងតំបន់ ដើម្បីឆ្លើយតបចំពោះបញ្ហាប្រឈមដែលមិនធ្លាប់មាន។

ការបង្កើតមូលនិធិអាស៊ាន សម្រាប់ការឆ្លើយតបចំពោះកូវីដ១៩ ក្របខ័ណ្ឌការស្តារឡើងវិញគ្រប់ជ្រុងជ្រោយរបស់អាស៊ាន (ACRF), ក្របខ័ណ្ឌការរៀបចំច្រកធ្វើដំណើរអាស៊ាន (TCAF) និងការស្នើបង្កើតឱ្យមានមជ្ឈមណ្ឌលអាស៊ាន សម្រាប់ភាពបន្ទាន់សុខភាពសាធារណៈ និងជំងឺដែលកំពុងកើតមាន (ACPHEED) និងការអភិវឌ្ឍប្រព័ន្ធសម្របសម្រួលបន្ទាន់ ផ្នែកសុខភាពសាធារណៈអាស៊ាន (APHECS) ជាដើម គឺជាភ័ស្តុតាងសំខាន់ ដែលបញ្ជាក់ពីការងារសម្របសម្រួលគោលនយោបាយ ដែលមានលក្ខណៈបុរេសកម្មរបស់អាស៊ាន ហើយដែលសកម្មភាពសម្របសម្រួល ជាលក្ខណៈតំបន់បែបនេះ យើងស្ទើរតែពុំឃើញមាន នៅក្នុងតំបន់ផ្សេងទៀតទូទាំងពិភពលោក។

ក្នុងនាមជាពលរដ្ឋអាស៊ាន យើងគួរតែមានមោទនភាពចំពោះស្នាដៃទាំងនេះ ជាជាងការទទួលយកការដាក់ឈ្មោះថា “អាស៊ានជាវេទិកាព្រោកប្រាជ្ញ”។

តើអ្វីទៅដែលនឹងក្លាយជាកិច្ចការសំខាន់ សម្រាប់ការធ្វើជាប្រធានអាស៊ានរបស់កម្ពុជានៅក្នុងឆ្នាំ ២០២២?

ជាដំបូង និងសំខាន់ជាងគេ គឺយើងត្រូវកំណត់និន្នាការសកលសំខាន់ៗ (mega trends) ដែលមានឥទ្ធិពលលើតំបន់។

បញ្ហាជំងឺរាតត្បាតកូវីដ១៩ នឹងនៅតែជាបញ្ហាប្រឈម សម្រាប់គ្រប់ប្រទេសនៅជុំវិញពិភពលោក ដែលកំពុងតែស្វិតស្វាញស្វែងរកវិធីសាស្ត្រស្តារសេដ្ឋកិច្ច និងធុរកិច្ចដែលស្ទើរតែដួលរលំ។ យើងដឹងថា លទ្ធភាពនៃការធ្វើដំណើរមកចូលរួមប្រជុំ ដោយផ្ទាល់នៅកម្ពុជា នៅតែមានបញ្ហានៅឡើយ ទោះបីជាកម្ពុជាមានបំណងរៀបចំកិច្ចប្រជុំ នៅក្នុងឆ្នាំ ២០២២ ដោយមានវត្តមានផ្ទាល់ក៏ដោយ។

ការប្រកួតប្រជែងរវាងមហាអំណាច នឹងនៅតែបន្តមានភាពតានតឹង ហើយការបែងចែកពិភពលោកជា២ ទាំងលើទិដ្ឋភាពនយោបាយ សេដ្ឋកិច្ច ពាណិជ្ជកម្ម លម្ហឌីជីថល និងបច្ចេកវិទ្យាគឺជាសេចក្តីកង្វល់ដ៏ធំមួយ។

នៅក្នុងតំបន់របស់យើង សេចក្តីកង្វល់អំពីសន្តិសុខជាប្រពៃណី ដូចជា ការកើតមាននូវជម្លោះផ្ទៃក្នុងរបស់ប្រទេសសមាជិក បញ្ហាដ៏ស្មុគស្មាញនៃព្រំដែនគោក និងព្រំដែន

សមុទ្រជាដើមនឹងនៅតែបន្តមាន។ ចំពោះបញ្ហាសន្តិសុខមិនប្រពៃណី មានដូចជាគ្រោះមហន្តរាយធម្មជាតិ ឧក្រិដ្ឋកម្មតាមអ៊ីនធឺណិត ឧក្រិដ្ឋកម្មឆ្លងដែន ការជួញដូរមនុស្ស ជនបាត់បង់ទីលំនៅក្នុងស្រុក ការផ្លាស់ប្តូរអាកាសធាតុ ជាដើមនឹងបន្តក្លាយជាបញ្ហាប្រឈមដែលកាន់តែស្មុគស្មាញឡើង។

ជាការពិតប្រទេសកម្ពុជាមិនអាចសម្តែងថា យើងនឹងមានលទ្ធភាពទទួលជោគជ័យក្នុងការផ្លាស់ប្តូររបត់ សម្រាប់និន្នាការសកលធំៗទាំងនោះទេ នៅពេលដែលតួនាទីជាប្រធានរបស់យើងនឹងបញ្ចប់។ យើងដឹងច្បាស់ថា អ្វីទៅគឺជាការអនុវត្តប្រកបដោយភាពប្រាកដនិយម និងសេចក្តីស្រមៃដែលយើងចង់បាន។

កម្ពុជានឹងបោះជំហានឆ្ពោះទៅរកសេចក្តីស្រមៃ ប្រកបដោយភាពប្រាកដនិយម

កម្ពុជាដឹងថា ភាពជាប្រធានអាស៊ានប្តូរវេនរបស់កម្ពុជា មិនមែនជាជោគជ័យឬបរាជ័យ ដាច់ដោយឡែកសម្រាប់កម្ពុជានោះទេ។ ភាពជាប្រធានរបស់កម្ពុជា គឺជាការប្តូរវេនជាមួយនឹងប្រធានមុនៗ ដូច្នេះរាល់សមិទ្ធផល ឬវឌ្ឍនភាពទាំងឡាយគឺជាស្នាដៃរួមរបស់សមាជិកអាស៊ានទាំង១០។

នេះគឺជាសារៈសំខាន់នៃ “មាគ៌ាអាស៊ាន” ក្នុងការថែរក្សាមជ្ឈភាពអាស៊ាន និងសារៈសំខាន់របស់អាស៊ាន នៅពេលប្រឈមនឹងនិន្នាការសកលដែលលំបាក និងប្រកបដោយការរើសអើងបែងចែក។

ការណ៍ដែលស្ថាប័នអាស៊ាន នៅតែមានភាពស្អិតល្មួតផ្ទៃក្នុងមិនប្រេះឆា គឺដោយសារតែយើងរក្សាបាននូវគោលការណ៍ ប្រតិបត្តិមូលដ្ឋានដែលជា“មាគ៌ាអាស៊ាន” ដែលផ្តល់តម្លៃ ទៅលើការឯកភាពគ្នានៅក្នុងភាពចម្រុះ ការគោរពគោលការណ៍កុងសង់ស៊ីស ការខិតខំជំរុញការសន្ទនា និងពិគ្រោះយោបល់ ដែលមានលក្ខណៈស្ងាត់ស្ងៀម ដែលគោរពអធិបតេយ្យ និងគោលការណ៍មិនជ្រៀតជ្រែកកិច្ចការផ្ទៃក្នុង របស់ប្រទេសសមាជិកនៅរាល់ពេលដែលយើងជួបប្រទះបញ្ហាលំបាក ពីព្រោះថាអាស៊ានតែងតែលើកកម្ពស់ការឯកភាពគ្នាដើម្បីសន្តិភាព កិច្ចសហប្រតិបត្តិការ និងការអភិវឌ្ឍ ប៉ុន្តែអាស៊ានមិនជំរុញឱ្យមានការឯកភាពគ្នា ដើម្បីជំរុញការប្រឈមមុខដាក់គ្នានោះទេ។

ជាមួយនឹងនិន្នាការសកលធំៗខាងលើ អាទិភាពសំខាន់បំផុតរបស់កម្ពុជា ក្នុងឆ្នាំ ២០២២ គឺយើងត្រូវបន្តរក្សា និងគ្រប់គ្រងស្ថានភាព/បរិស្ថាន ដែលអំណោយផលដល់សន្តិភាព និងស្ថិរភាពដើម្បីទ្រទ្រង់ការជំរុញវិបុលភាពក្នុងតំបន់។

ដូចប្រធានអាស៊ានទាំងអស់ផ្សេងទៀតដែរ កម្ពុជានឹងខិតខំជំរុញរបៀបវារៈទាំងឡាយណា ដែលចងភ្ជាប់យើងទាំងអស់គ្នា ជាជាងបញ្ហាដែលបែងចែកយើងទាំងអស់គ្នា។ នេះមិនមែនមានន័យថា អាស៊ានកំពុងគេចវេះពីបញ្ហានោះទេ ប៉ុន្តែអាស៊ានតែងតែប្រកាន់ជំហរជាក់ស្តែងនិយម នៅពេលដែលយើងជួបប្រទះ នូវបញ្ហាប្រឈមណាមួយ។

ឧទាហរណ៍ ជាការអនុវត្តជាក់ស្តែង អាស៊ានពុំអាចធ្វើអ្វីបានច្រើនឡើយ ចំពោះបញ្ហាការប្រកួតប្រជែងរវាងមហាអំណាច។

ដូច្នេះ ប្រសិនបើមហាអំណាចទាំង២អាចស្វែងរក ឬជួយអាស៊ានក្នុងការស្វែងរករបៀបវារៈទាំងឡាយណា ដែលជំរុញកិច្ចសហប្រតិបត្តិការ រវាងមហាអំណាចទាំង២ ជំនួសឱ្យការចោទប្រកាន់ និងការលាបពណ៌ដាក់គ្នាឥតឈប់ឈរ នោះប្រហែលជាប្រធានអាស៊ានទាំងអស់ នឹងមានភាពធូរស្រាលក្នុងចិត្ត។ ប៉ុន្តែនេះប្រហែលបានត្រឹមតែជាក្តីស្រមៃប៉ុណ្ណោះ។

អ្វីដែលសំខាន់ដែរនោះ គឺយើងត្រូវព្យាយាមលើកកម្ពស់ “ភាពជាក់ស្តែង”(tangibility) នៃផលប្រយោជន៍សម្រាប់ប្រជាជន។

នេះគឺជាការខិតខំប្រឹងប្រែង ដើម្បីឆ្លើយតបទៅនឹងសំណួរដែលសាមញ្ញ ប៉ុន្តែ ពិបាកឆ្លើយចំពោះពលរដ្ឋអាស៊ានថា តើសហគមន៍អាស៊ានមានផលប្រយោជន៍អ្វីខ្លះ សម្រាប់ពួកគេ?។

ក្នុងការកំណត់អាទិភាព សម្រាប់ការធ្វើជាប្រធានឆ្នាំ២០២២ យើងព្យាយាមផ្តោតលើវិធីសាស្ត្រ ដែលយើងអាចផ្តល់នូវផលប្រយោជន៍ ជាក់ស្តែងសម្រាប់ពលរដ្ឋអាស៊ាន។ ផលប្រយោជន៍ដែលអាចប៉ះបាន និងអាចដឹងឮបាន ដើម្បីឱ្យយើងអាចផ្តល់ឱ្យពលរដ្ឋអាស៊ាននូវមោទនភាព និងក្តីសង្ឃឹមសម្រាប់អនាគត និងទំនុកចិត្តសម្រាប់សុខុមាលភាពរបស់មនុស្សជំនាន់ក្រោយរបស់អាស៊ាន ដោយគ្មានបោះបង់នរណាម្នាក់ឡើយ។

ក្នុងស្មារតីនេះ យើងកំពុងព្យាយាមពិនិត្យមើលវិធី ដែលយើងអាចលើកកម្ពស់ “ភាពជាក់ស្តែង” នៃផលប្រយោជន៍សម្រាប់ប្រជាជន តាមរយៈសកម្មភាពរបស់យើងទៅលើជំងឺកូវីដ១៩ កិច្ចព្រមព្រៀងភាពជាដៃគូសេដ្ឋកិច្ច គ្រប់ជ្រុងជ្រោយតំបន់(RCEP) កិច្ចព្រមព្រៀងពាណិជ្ជកម្មសេរីផ្សេងៗទៀត ពាណិជ្ជកម្មរវាងប្រទេសសមាជិកអាស៊ាន សេដ្ឋកិច្ចឌីជីថល ការពង្រឹងការការពារពលករចំណាកស្រុក ការពង្រឹងសមត្ថភាពគ្រប់គ្រងគ្រោះមហន្តរាយ ការផ្លាស់ប្តូរអាកាសធាតុ ការតភ្ជាប់ផ្លូវដែក ការតភ្ជាប់រវាងតំបន់ឧស្សាហកម្មជាដើម។

បន្ថែមទៅលើអត្ថប្រយោជន៍ជាក់ស្តែង ដែលកំពុងមានស្រាប់ ដូចជាការធ្វើដំណើរដោយគ្មានទិដ្ឋាការរវាងសមាជិកអាស៊ាន ការតភ្ជាប់ផ្លូវហាយវ៉េអាស៊ាន ឱកាសផ្លាស់ប្តូរយុវជន និងអាហារូបករណ៍ ការអភិវឌ្ឍហេដ្ឋារចនាសម្ព័ន្ធ ការវិនិយោគដោយផ្ទាល់ពីបរទេស,ជំនួយបច្ចេកទេស និងកិច្ចសហប្រតិបត្តិការអភិវឌ្ឍន៍ពីដៃគូជាដើម។ល។

យើងក៏ព្យាយាមធ្វើឱ្យមានតុល្យភាពផងដែរ រវាងសសរស្តម្ភទាំង៣របស់អាស៊ាន នោះគឺសហគមន៍សន្តិសុខ នយោបាយ សហគមន៍សេដ្ឋកិច្ច និងសហគមន៍សង្គមវប្បធម៌។ ជាទិដ្ឋភាពក្នុងប្រទេស យើងមានបំណងធានាថា យើងមានការចូលរួមពីគ្រប់ស្ថាប័នពាក់ព័ន្ធទាំងអស់ ដើម្បីគាំទ្រដល់ការទទួលធ្វើជាប្រធានអាស៊ាន ជាប្រវត្តិសាស្ត្រនេះ។

ជាទិដ្ឋភាពក្នុងតំបន់ យើងចង់ធានាថា រាល់អត្ថប្រយោជន៍ទាំងអស់ ពីកិច្ចខិតខំប្រឹងប្រែង ក្នុងការកសាងសហគមន៍ ត្រូវបានចែករំលែកដល់គ្រប់កម្រិត និងគ្រប់វិស័យ និងជាពិសេសបានទៅផ្ទាល់ដល់ប្រជាជនអាស៊ាន ដែលយើងមានកាតព្វកិច្ចបម្រើ៕

តម្លៃអចលនទ្រព្យនៅរក្សាតម្លៃថេរ ទោះស្ថិតនៅក្នុងវិបត្តិយ៉ាងណាក្ដី

ដោយៈ វឌ្ឍនៈ

ភ្នំពេញៈ តម្លៃអចលនទ្រព្យនៅក្នុងប្រទេសកម្ពុជា ត្រូវបានមើលឃើញថានៅតែរក្សាតម្លៃថេរ ទាំងដីធ្លី និងលំនៅឋាន បើទោះបីជាឆ្នាំ២០២០ និង២០២១នេះកម្ពុជានៅតែបន្តជួបវិបត្តិដោយសារតែកូវីដ១៩ និងមានលក្ខណៈទ្រង់ទ្រាយធំក៏ដោយ។

លោកលឹម រដ្ឋា ភ្នាក់ងារអចលនទ្រព្យមួយរូបប្រចាំខេត្តកំពត បានមានប្រសាសន៍ឱ្យដឹងតាមទូរស័ព្ទនាព្រឹកថ្ងៃទី៥ មិនានេះថា ទោះបីជាកម្ពុជាយើងជួបវិបត្តិដោយសារតែកូវីដ១៩ក្នុងឆ្នាំ ២០២១នេះបន្តទៀតក្ដី តែតម្លៃដីធ្លី និងលំនៅឋាន ក្នុងខេត្តជាប់មាត់សមុទ្រដូចជាកំពត និងកែបជាទូទៅមិនមានការធ្លាក់ចុះនោះទេ គឺនៅរក្សាតម្លៃដដែល។ ដោយឡែក សម្រាប់ដីធ្លីមួយចំនួនដែលពលរដ្ឋ ប្រញ៉ាប់លុយដោះស្រាយជីវភាពនិងបញ្ហាហិរញ្ញវត្ថុ ក៏បានលក់ចេញក្រោមតម្លៃទីផ្សារបន្តិច។

លោកបន្តថា “ដីដែលល្អ ដីដែលមានសក្ដានុពល នៅតែលក់នៅក្នុងតម្លៃទីផ្សារ ដោយអត់មានការចុះថ្លៃនោះទេ ហើយទោះបីស្ថិតនៅក្នុងដំណាក់កាលនេះក្ដី ក៏មានភ្ញៀវជាច្រើនបានមកស្វែងរកដីធ្លីនៅកំពតនិងកែប និងមានការទិញលក់ជាហូរហែផងដែរ មិនស្ងប់ស្ងាត់នោះឡើយ”។លោកថា “អ្នកមានលុយ គឺមានឱកាសនៅក្នុងដំណាក់នេះ គឺឱកាសក្នុងការរកទីតាំងដីតំបន់ល្អៗ និងមានតម្លៃទាបជាងទីផ្សារផងដែរ បើសិនជាទិញប៉ះចំម្ចាស់ដីដែលមានបញ្ហាហិរញ្ញវត្ថុ”។

ចំណែកលោកងិន ភីរម្យ ជាភ្នាក់ងារអចលនទ្រព្យម្នាក់នៅខេត្តកែបក៏បានឱ្យដឹងផងដែរថាការទិញលក់ដីធ្លីតូចធំនៅតែមាន ជាក់ស្ដែងក្រុមលោកបានទទួលភ្ញៀវមកមើលដីនិងសម្រេចចិត្តទិញភ្លាមៗ ដោយរំពឹងថានឹងអភិវឌ្ឍជាគម្រោងសម្រាប់ វិស័យទេសចរណ៍នៅពេលអនាគត ជាពិសេសក្រោយចប់វិបត្តិកូវីដ១៩ ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានលើកឡើងថា ជាទូទៅតម្លៃអចលនទ្រព្យមិនមានការចុះថ្លៃទេ នៅក្នុងពេលដែលកម្ពុជាមានវិបត្តិដោយសារជំងឺកូវីដ១៩ តែអចលនទ្រព្យមួយចំនួនក៏មានការថមថយ ដោយសារតែម្ចាស់អចលនទ្រព្យត្រូវការលក់បន្ទាន់ ដូច្នេះហើយទើបមានការធ្លាក់ចុះនៃតម្លៃ តែក៏មិនមែនធ្លាក់ចុះខ្លាំងនោះដែរ ៕

ក្រុងច្បារមន ខេត្តកំពង់ស្ពឺ កំពុងអូសទាញការវិនិយោគវិស័យសំណង់

ដោយ ៖ រ៉ាណេត

កំពង់ស្ពឺ ៖ បច្ចុប្បន្ន ខេត្តកំពង់ស្ពឺ បាន និងកែប្រែមុខមាត់យ៉ាងប្រសើរជាមួយនឹងសន្ទុះនៃការអភិវឌ្ឍវិស័យហេដ្ឋារចនាសម្ព័ន្ធ និងវិស័យឧស្សាហកម្មចំរុះយ៉ាង សម្បូរបែប ជាពិសេស គម្រោងសាងសង់សំណង់អគារមជ្ឈមណ្ឌលពាណិជ្ជកម្មកម្ពស់ខ្ពស់ៗ រួមជាមួយនឹងគម្រោងអភិវឌ្ឍន៍វិស័យលំនៅដ្ឋានតម្លៃមធ្យម ដែលកំពុងតែមានសកម្មភាព។

ជាមួយនឹងគម្រោងអភិវឌ្ឍន៍ធំៗជាច្រើននៅក្នុងខេត្តកំពង់ស្ពឺ បានធ្វើឱ្យបណ្តាអ្នកវិនិយោគផ្នែកវិស័យអចលនទ្រព្យទាំងក្នុង និងក្រៅស្រុក ចាប់ផ្តើមសកម្មភាពបោះទុនវិនិយោគទៅលើវិស័យសំណង់ ជាពិសេសក្រោយពេលដែលរដ្ឋាភិបាលបង្ហាញពីគម្រោងបង្កើតតំបន់ឧស្សាហកម្មនៅតាមបណ្តាយផ្លូវជាតិលេខ៤ ឆ្ពោះទៅក្រុងព្រះសីហនុ ។

អភិបាលខេត្តកំពង់ស្ពឺ លោកវ៉ី សំណាងបានមានប្រសាសន៍ប្រាប់តាមទូរស័ព្ទកាលពីថ្ងៃទី៥ ខែមីនា ឆ្នាំ២០២១ថា បច្ចុប្បន្ន ខេត្តកំពង់ស្ពឺ បាន និងកំពុងតែមានសកម្មភាពអភិវឌ្ឍលើគ្រប់វិស័យ ដែលធ្វើឱ្យសេដ្ឋកិច្ចនៅក្នុងខេត្ត ក៏ដូចជាកម្រិតជីវភាពរបស់ប្រជាពលរដ្ឋក្នុងតំបន់មានភាពល្អប្រសើរជាងមុន។

លោកបានមានប្រសាសន៍ប្រាប់ឱ្យដឹងថា ជាមួយនឹងកំណើនសេដ្ឋកិច្ចនៅក្នុងតំបន់ទាំងមូល វិស័យឧស្សាហកម្មបាន និងកំពុងតែដើរឈានមុខគេ ដោយចំនួនរោងចក្រ សហគ្រាសតូចធំសរុបច្រើនជាង ២៧០គម្រោង ដែលបានផ្តល់ឱកាសការងារជូនប្រជាពលរដ្ឋទូទៅជាង១២ម៉ឺននាក់ ខណៈខេត្តនេះមានប្រជាជនសរុបមានចំនួនជាង៨៧ម៉ឺននាក់ ហើយនៅគម្រោងប្រមាណ ១០០ទៀត ដែលភាគច្រើនជាការវិនិយោគរបស់ក្រុមហ៊ុនចិន កំពុងតែរៀបចំឯកសារស្នើសុំដំណើរការក្នុងពេលខាងមុខនេះ ខណៈដែលគម្រោងស្ដារហេដ្ឋារចនាសម្ព័ន្ធនៅក្នុងក្រុងច្បារកំពុងបន្តដំណើរការដ្ឋានដែលគ្រោងនឹងបញ្ចប់ក្នុងពេលឆាប់ៗខាងមុខនេះ។

លោក វ៉ី សំណាង បានបញ្ជាក់ថា “ក្រៅពីគម្រោងទាំងនេះ នៅមានគម្រោងធំៗជាច្រើនទៀតដែលកំពុងដំណើរការនីតិវិធី ដូចជាគម្រោងសាងសង់មជ្ឈមណ្ឌលពាណិជ្ជកម្ម និងគម្រោងបង្កើតទីក្រុងវៃឆ្លាតលើដីទំហំ ១០០ហិកតា រួមជាមួយការសាងសង់មជ្ឈមណ្ឌលវប្បធម៌ព្រះពុទ្ធសាសនា លើដីទំហំ១២៦ហិកតា ក្នុងទឹកប្រាក់វិនិយោគប្រមាណ១០លានដុល្លារ ស្ថិតក្នុងស្រុកភ្នំស្រួច ដែលរហូតមកដល់ពេលនេះសាងសង់បានប្រមាណ២០ភាគរយ”។

ងាកមកចាប់អារម្មណ៍ជាមួយនឹងការវិនិយោគ និងអភិវឌ្ឍន៍លើវិស័យលំនៅដ្ឋានវិញត្រូវបានគេកត់សម្គាល់ឃើញថា មានសកម្មភាពគួរឱ្យកត់សម្គាល់ផងដែរ ជាពិសេសនៅក្នុងក្រុងច្បារមន ដែលជាប្រភេទលំនៅដ្ឋានតម្លៃមធ្យមក្នុងចន្លោះចាប់ពី៥-១២ម៉ឺនដុល្លារ៕