ដោយៈម៉ាណេត

សឹង្ហបុរីៈ ក្រុមហ៊ុនCapitaLand Retail ដែលជាក្រុមហ៊ុនបុត្រសម្ព័ន្ធរបស់ Capital Land មានមូលដ្ឋាននៅប្រទេសសិង្ហបុរី បានដំណើរការផ្សារទំនើបជាច្រើននៅតំបន់ផ្សេងៗទៀត នៅអាស៊ី ដូចជាប្រទេសចិន សិង្ហបុរី ជប៉ុន ម៉ាឡេស៊ី វៀតណាម និងឥណ្ឌា។

ក្រុមហ៊ុន CapitaLand Limited (CapitaLand) គឺជាក្រុមអចលនទ្រព្យចម្រុះដ៏ធំបំផុតមួយនៅអាស៊ី។ ដោយមានការិយាល័យកណ្តាល និងបានចុះបញ្ជីនៅប្រទេសសិង្ហបុរី ក្រុមហ៊ុនជាម្ចាស់ និងគ្រប់គ្រងផលប័ត្រសកលតម្លៃ ប្រមាណ១៣៣,៣ពាន់លានដុល្លារសិង្ហបុរី គិតត្រឹមថ្ងៃទី៣០ ខែកញ្ញា ឆ្នាំ២០២០។

ផលប័ត្ររបស់ក្រុមហ៊ុន CapitaLand មានអចលនទ្រព្យចម្រុះ ដូចជា អចលនទ្រព្យបែបពាណិជ្ជកម្ម ផ្សារទំនើប ឧស្សាហកម្ម និងភស្តុភារ ការអភិវឌ្ឍចំរុះ ការអភិវឌ្ឍទីក្រុង ក៏ដូចជាកន្លែងស្នាក់នៅ និងលំនៅដ្ឋាន។

ដោយមានវត្តមាននៅទូទាំងទីក្រុងចំនួន២២០ ក្នុងប្រទេសជាង៣០ ក្រុមហ៊ុននេះផ្តោតសំខាន់លើសិង្ហបុរី និងចិន ដែលជាទីផ្សារស្នូលរបស់ខ្លួន ខណៈក្រុមហ៊ុនេះនៅតែបន្តពង្រីកទីផ្សារដូចជាប្រទេសឥណ្ឌា វៀតណាម អូស្ត្រាលី អឺរ៉ុប និងសហរដ្ឋអាមេរិក។

ក្រុមហ៊ុនCapitaLand មានអាជីវកម្មគ្រប់គ្រងអចលនទ្រព្យធំជាងគេបំផុតមួយនៅទូទាំងពិភពលោក។ ក្រុមហ៊ុន គ្រប់គ្រងការវិនិយោគលើអចលនទ្រព្យចំនួន៦ (REITs) ដែលបានចុះបញ្ជី និងអាជីវកម្មជាច្រើនទៀត របស់មូលនិធិឯកជនជាង២០ផងដែរ។

ក្រុមហ៊ុន CapitaLand បានបើកដំណើរការ REIT ដំបូងនៅសិង្ហបុរីក្នុងឆ្នាំ២០០២ ហើយបច្ចុប្បន្ន ក្រុមហ៊ុនCapitaLand មានក្រុមហ៊ុនបុត្រសម្ព័ន្ធដូចក្រុមហ៊ុនCommercial​Trust ក្រុមហ៊ុន Ascendas Real Estate Investment Trust ក្រុមហ៊ុន Ascott Residence Trust ក្រុមហ៊ុន CapitaLand Retail China Trust ក្រុមហ៊ុន Ascendas India Trust និងក្រុមហ៊ុន CapitaLand Malaysia Mall Trust។

ក្នុងនាមជាក្រុមហ៊ុនអភិវឌ្ឈន៍អចលនទ្រព្យ ប្រកបដោយការទទួលខុសត្រូវ ក្រុមហ៊ុនCapitaLand ចូលរួមចំណែកដល់ការជួយបរិស្ថាន និងសុខុមាលភាពសង្គមរបស់សហគមន៍ ដែលខ្លួនធ្វើប្រតិបត្តិការ ព្រោះវាផ្តល់តម្លៃសេដ្ឋកិច្ចរយៈពេលវែងដល់ម្ចាស់ភាគហ៊ុនរបស់ខ្លួន។

កន្លងមកនេះ CapitaLand Retail ក៏ធ្លាប់ជាក្រុមហ៊ុនទទួលបានការតែងតាំងជាអ្នកគ្រប់គ្រងផ្សារទំនើបរបស់ក្រុមហ៊ុនសម្ព័ន្ធ ដែលមានទីតាំងស្ថិតនៅអគារ The Peak នៃរាជធានីភ្នំពេញ។

ប៉ុន្តែក្រុមហ៊ុន Oxley Gem (Cambodia) Co. , Ltd និងក្រុមហ៊ុន CapitaLand Retail បានបញ្ចប់ជាស្ថាពរ តាមរយៈការព្រមព្រៀងទ្វេរភាគីនាថ្ងៃទី១០ ខែតុលា ឆ្នាំ២០២០ កន្លងទៅនេះ៕

ដោយៈ រ៉ាណេត

ភ្នំពេញៈ សហភាពអឺរ៉ុប និងដៃគូអឺរ៉ុបដែលមានសមាជិកចំនួន១០ប្រទេស ព្រមទាំងសហព័ន្ធស្វីស បានផ្តល់ហិរញ្ញប្បទានសរុបចំនួន៤២០០លានដុល្លារ ដល់កម្ពុជាសម្រាប់ការអភិវឌ្ឍន៍ប្រទេស។

រដ្ឋមន្ត្រីប្រតិភូអមនាយករដ្ឋមន្ត្រី លោក ឈៀង យ៉ាណារ៉ា អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជាបានមានប្រសាសន៍នៅរសៀលថ្ងៃទី១១ ខែមករា ឆ្នាំ២០២១ថា សហភាពអឺរ៉ុប និងប្រទេសដៃគូអឺរ៉ុប គឺជាដៃគូអភិវឌ្ឍន៍ដ៏សំខាន់ ហើយក៏ជាទីផ្សារយ៉ាងសំខាន់របស់កម្ពុជាផងដែរ។

ចន្លោះឆ្នាំ១៩៩២-២០២០ ដៃគូអឺរ៉ុប (សហភាពអឺរ៉ុប និងប្រទេសសមាជិកចំនួន ១០ ព្រមទាំងសហព័ន្ធស្វីស ) បានផ្តល់ហិរញ្ញប្បទាន សហប្រតិបត្តិការសរុបប្រមាណ៤ ២០០លានដុល្លារ សមមូលនឹង១៩នៃហិរញ្ញប្បទានសរុប ដែលផ្តល់ដោយដៃគូអភិវឌ្ឍន៍ទាំងអស់បានផ្តល់ដល់កម្ពុជា។

ដោយឡែក សម្រាប់ផែនការយុទ្ធសាស្ត្រ សម្រាប់សហប្រតិបត្តិការនៃសហភាពអឺរ៉ុប និងដៃគូអឺរ៉ុបនៅកម្ពុជា សម្រាប់កិច្ចអភិវឌ្ឍន៍នៅកម្ពុជាឆ្នាំ២០២១-២០២៧ ក៏ត្រូវបានលើកយកមកពិភាក្សា និងអនុវត្តបន្តផងដែរ។

ភាគីពាក់ព័ន្ធបានឯកភាពជាគោលការណ៍ លើអាទិភាពសម្រាប់យុទ្ធសាស្ត្ររួមរបស់អឺរ៉ុបស្តីពី កិច្ចសហប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០២១-២០២៧ ដូចមានចែង ក្នុងយុទ្ធសាស្ត្រចតុកោណដំណាក់កាលទី៤ គឺការអភិវឌ្ឍធនធានមនុស្ស ការធ្វើពិពិធកម្មសេដ្ឋកិច្ច ការលើកស្ទួយវិស័យឯកជន និងការងារ និងការអភិវឌ្ឍប្រកប​ដោ​យចីរភាព និងបរិយាប័ន្ន។

លោកឈៀង យ៉ាណារ៉ាបានបញ្ជាក់ថា “ការអនុវត្តនូវយុទ្ធសាស្ត្ររួមគ្នារបស់អឺរ៉ុបស្ដីពី កិច្ចសហប្រតិបត្តិការអភិវឌ្ឍន៍សម្រាប់កម្ពុជាឆ្នាំ២០១៤-២០២០ និងកម្មវិធីណែនាំពហុឆ្នាំរបស់សហភាពអឺរ៉ុបឆ្នាំ២០១៤-២០២០ ក៏ដូចជាកិច្ចសហប្រតិបត្តិការអភិវឌ្ឍន៍កម្ពុជាគឺប្រព្រឹត្តទៅបានដោយរលូន ជាមួយនឹងការទទួលបានលទ្ធផល គួរឱ្យកត់សម្គា​ល់”។

តំណាងដៃគូអឺរ៉ុបដែលមានចំនួន៥ប្រទេសដូចជា ឆែក បារាំង អាល្លឺម៉ង់ ស៊ុយអ៊ែត និងស្វីស បានវាយតម្លៃយ៉ាងខ្ពស់ចំពោះវឌ្ឍនភាពដ៏ល្អប្រសើរ និងសម្រេចបានតាមរយៈវឌ្ឍនាភាពវិស័យអាទិភាពចំនួន៤រួមមាន ទី១ ការអភិវឌ្ឍវិស័យសង្គមកិច្ច ទី២ ការជំរុញកំណើនសេដ្ឋកិច្ចប្រកបដោយសមធម៌ និងចីរភាព ទី៣ ការអភិវឌ្ឍហេដ្ឋារចនាសម្ព័ន្ធនៅទីក្រុង និងជនបទ និងទី៤ អភិបាលកិច្ច និងអន្តរវិស័យ។

សមិទ្ធផលទាំងនេះ គឺជាសក្ខីភាពនៃការប្តេជ្ញាបន្តគាំទ្ររបស់សហភាពអឺរ៉ុប និងប្រទេសជាសមាជិកសហភាពអឺរ៉ុប ក៏ដូចជាសហព័ន្ធស្វីស សម្រាប់ដំណើរការនៃកិច្ចអភិវឌ្ឍន៍នៅកម្ពុជា។ តំណាងដៃគូអឺរ៉ុបក៏បានកោតសរសើរ និងវាយតម្លៃខ្ពស់ចំពោះភាពជាដៃគូ និងកិច្ចសហប្រតិបត្តិការដ៏ល្អប្រសើរ រវាងគ្រប់ដៃគូអឺរ៉ុបទាំងអស់ប្រចាំនៅកម្ពុជា និងក្រុមប្រឹក្សាអភិវឌ្ឍន៍កម្ពុជា៕

ដោយៈម៉ាណេត

ភ្នំពេញៈ អ្នកជំនាញបានអះអាងថា ការប្រែប្រួលអាកាសធាតុលើពិភពលោក មិនបានបង្កប៉ះពាល់ដល់ការសាងសង់សំណង់ ឬសំណង់គ្រឹះនៅកម្ពុជានោះទេ ដោយសារតែកម្ពុជាមានភាពអំណោយផលចំពោះអាកាសធាតុ និងមានសណ្ឋានដីល្អសម្រាប់ការសាងសង់។

លោកសាស្ត្រាចារ្យទួស សាភឿន អគ្គលេខាធិការរងនៃគណៈស្ថាបត្យករកម្ពុជាបានថ្លែងប្រាប់Propertyarea.asia នៅថ្ងៃទី១២ ខែមករា ឆ្នាំ២០២០នេះថា ប្រទេសកម្ពុជាមានភាពអំណោយផលលើការអាកាសធាតុ ដោយសារកម្ពុជាមានប្រព័ន្ធអេកូឡូស៊ី និងមានដើមឈើច្រើន ហើយបានលក់កាបូនជាច្រើន ដើម្បីរក្សាព្រៃឈើ ដែលធ្វើឱ្យមានលំនឹងអាកាសធាតុ។

លោកបានថ្លែងថា “ការប្រែប្រួលអាកាសធាតុនេះ កើតឡើងនៅប្រទេសគេ ដូច្នេះវាមិនបង្កផលប៉ះពាល់ដល់ការសាងសង់សំណង់ ឬគ្រឹះសំណង់នៅកម្ពុជានោះទេ”។លោកបានថ្លែងថា “ខ្ញុំមើលឃើញថា ស្រទាប់ដីនៅក្នុងទីផ្សារក្រុងភ្នំពេញ ដូចជាព្រះប្រទានពរឱ្យ ព្រោះស្រទាប់ដីចាប់៣០ម៉ែត្រចុះទៅក្រោម គឺរឹងល្អសម្រាប់ការសាងសង់ ហើយចាប់ពី៤០ទៅ៥០ម៉ែត្រកាន់តែល្អ ដូច្នេះការសាងសង់កាន់តែខ្ពស់ គឺត្រូវខួងឱ្យចំណុច៤០ ទៅ៥០ម៉ែត្រ ដោយសារដីមានភាពរឹងមុំាល្អ ដូច្នេះការសាងសង់គ្រឹះអាគារនៅទីក្រុងភ្នំពេញមិនធ្វើឱ្យមានការព្រួយបារម្ភទេ”។

ជប៉ុនធ្លាប់ធ្វើការសិក្សាពីតំបន់បន្ទុះភ្នំភ្លើងនៅតំបន់អាស៊ី ក្នុងនោះ ថៃ ឡាវ និងមីយ៉ានម៉ាធ្លាប់ប្រវត្តិផ្ទុះភ្នំភ្លើង និងរញ្ជួយដី ហើយចាប់ពីឆ្នាំ១៩៣០ ដល់បច្ចុប្បន្ន បន្ទាត់ភ្នំភ្លើងគឺស្ថិតនៅជំវុញប្រទេសកម្ពុជា ប៉ុន្តែប្រទេសកម្ពុជាមិនស្ថិតនៅលើបន្ទាប់នោះទេ។

លោកសាស្ត្រាចារ្យបានថ្លែងថា “ទោះបីជាយ៉ាងណាក៏ដោយ អាគារខ្ពស់ៗរបស់យើងបច្ចុប្បន្ននេះ ក៏ត្រូវបានយកចិត្តទុកខ្ពស់ដែរក្នុងការសាងសង់ ហើយអាគារនិមួយៗត្រូវការទប់លំនឹងនៃអាគារខ្លួនឯង ដែលគេហៅថា “បន្ទុករស់ បន្ទុកងាប់”។

លោកបានពន្យល់ថា បន្ទុករស់ បន្ទុកងាប់ មានន័យថា បើគណនាពីរឿងគ្រឹះ គ្រឹះត្រូវសាងសង់ ដើម្បីទ្រទម្ងន់អាគារខ្លួន ដែលគេហៅបន្ទុករស់ ហើយទម្ងន់អាគារខ្លួនឯងនេះ គេហៅថា បន្ទុកងាប់។

លោកសាស្រ្តាចារ្យទួស សាភឿនបានពន្យល់ថា ឧទាហរណ៍ អាគារមានកម្ពស់៥០ជាន់ ស្មើនឹង៥០ម៉ឺនតោន ដែលជាបន្ទុកងាប់ ដូច្នេះគ្រឹះ (បន្ទុករស់) ត្រូវសាងសង់ដើម្បីទ្របានលើស៣០ភាគរយ នៃបន្ទុកងាប់ (អាគារទាំងមូល)៕

ដោយ ៖ រ៉ាណេត

ភ្នំពេញ ៖ រដ្ឋបាលរាជធានីភ្នំពេញកំពុងសិក្សាពីគម្រោងសាងសង់ស្ពានឆ្លងកាត់ទន្លេបាសាក់ថ្មីបន្ថែមទៀតដើម្បីកាត់បន្ថយជំនន់នៃការកក់ស្ទះចរាចរណ៍ដែលកើតមានជារៀងរាល់ថ្ងៃនៅផ្លូវជាតិលេខ១ និងតំបន់ទីប្រជុំជនច្បារអំពៅចូលមករាជធានីភ្នំពេញ។

មន្ត្រីរដ្ឋបាលរាជធានីភ្នំពេញបានបង្ហើបប្រាប់នៅព្រឹកថ្ងៃទី១២ ខែមករា ឆ្នាំ២០២១នេះថា រដ្ឋបាលរាជធានីភ្នំពេញ ក្រោមការគ្រប់គ្រង និងដឹកនាំដោយលោក ឃួង ស្រេងអភិបាលរាជធានីភ្នំពេញបានបង្កើតគណៈកម្មការសិក្សាពីគម្រោងនៃការសាងសង់ស្ពានឆ្លងកាត់ទន្លេបាសាក់ថ្មីមួយទៀត ដែលនឹងត្រូវធ្វើការតភ្ជាប់ពីតំបន់ព្រែកប្រាខណ្ឌច្បារអំពៅ មកកាន់ត្រើយម្ខាងស្ថិតនៅក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

មន្ត្រីដដែលបានបញ្ជាក់ថា “បើតាមគម្រោងក្នុងជំហានបឋមរដ្ឋបាលរាជធានីភ្នំពេញបានសម្រេចបង្កើតគណកម្មការសិក្សាពីគម្រោងសាងសង់ស្ពាននេះតាមរយៈសេចក្ដីប្រកាសលេខ ៣៨១/១៩ សសរ.រ ចុះហត្ថលេខាដោយលោកអភិបាលរាជធានីភ្នំពេញតាំងពីអំឡុងខែធ្នូ ឆ្នាំ២០១៩ ដោយមានសមាសភាពចំនួន២១នាក់ដែលជាមន្ត្រីជំនាញ និងមន្ត្រីអជ្ញាធរដែលពាក់ព័ន្ធ ប៉ុន្តែរហូតមកដល់ពេលនេះអាចនឹងមានការកែប្រែ និងបន្ថែមសមាសភាពមន្ត្រីជំនាញខ្លះទៀតតាមភាពជាក់ស្ដែងនៃតម្រូវ”។

គម្រោងសាងសង់ស្ពាននេះអាចនឹងដាក់គល់ស្ពាននៅក្បែរតំបន់សិប្បកម្មផលិតទឹកកកក្នុងសង្កាត់ព្រែកប្រា ខណ្ឌច្បារអំពៅ ហើយត្រៀងម្ខាងនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដោយភ្ជាប់មកកាន់ផ្លូវ៦០ម៉ែត្រ ប៉ុន្តែនៅតំបន់នេះមានឧបសគ្គច្រើនដែលត្រូវដោះស្រាយផលប៉ះពាល់ជាមួយប្រជាពលរដ្ឋច្រើនគ្រួសារ។

ដោយឡែក គណៈកម្មការដែលចុះសិក្សាត្រូវកំណត់ពីទីតាំងដែលត្រូវសាងសង់ ចុះស្រង់ស្ថិតិប្រជាជនដែលរងនូវផលប៉ះពាល់ទៅនឹងគម្រោងសាងសង់ស្ពានឆ្លងកាត់ទន្លេបាសាក់មួយនេះរួមជាមួយនឹងការធ្វើរបាយការណ៍សំខាន់ដែលពាក់ព័ន្ធផងដែរ៕

ដោយៈ​សុខុម

ញូវយ៉ក:  នៅពេល​ធនាគារ​អាមេរិកធំៗ បានចាប់ផ្ដើម​បញ្ចេញ​របាយការណ៍​រប​ស់​ខ្លួន​សម្រាប់​ត្រីមាស​ទី៤ កាលពី​ថ្ងៃ​សុក្រ សប្ដាហ៍​មុន ជា​លទ្ធផល​មួយចំនួន​បង្ហាញថា ប្រាក់ចំណេញ​របស់ខ្លួន បាន​ធ្លាក់ចុះ​រហូតដល់​ទៅ៤០% គិត​ចាប់តាំងពី​ឆ្នាំ២០១៨ មុនពេល​ផ្ទុះ​ការឆ្លង​រាតត្បាត​វីរុស​កូ​វីដ-១៩ ។ នេះ​បើ​យោងតាម​ទីភ្នាក់ងារ​ព័ត៌មាន Reuters ចុះផ្សាយ​កាលពី​ថ្ងៃទី១១ មករា។

ទោះជា​យ៉ាងណា បណ្ដា​វិនិយោគិន​នឹង​ផ្តោត លើ​ការស្វែងរក​វិធី​ធ្វើយ៉ាងណា​ឱ្យប្រាក់​ចំណេញ​កើនឡើង​វិញ​ក្នុង​ឆ្នាំ២០២១ ។

លោក Jason Goldberg អ្នកវិភាគ​ប្រចាំ​ធនាគារ​វិនិយោគ ពហុ​ជាតិ​សាសន៍​អង់គ្លេស Barclays បាន​លើកឡើងថា គួរ​ចាត់ទុក​ត្រីមាស​ទី៤ ជា​ត្រីមាស​អន្តរកាល ហើយ​សម្លឹង​ឆ្ពោះទៅរក​ស្ថានភាព​ប្រសើរឡើង​ក្នុង​ឆ្នាំ២០២១ ។

អ្នកវិភាគ​រូបនេះ​បន្ថែមទៀតថា “ការឆ្លង​រាតត្បាត​វីរុស​កូ​វីដ-១៩ បានធ្វើឱ្យ​អត្រា​ការប្រាក់ និង​ប្រាក់ចំណេញ​ធ្លាក់ចុះ​ខ្លាំង​មិន​ធ្លាប់មាន” ។ លោក​បន្តថា “ការឆ្លង​រាតត្បាត​វីរុស​កូ​វីដ-១៩ ក៏បាន​ជំរុញ​ឱ្យ​ធនាគារ​អាមេរិកធំៗ បាន​លៃ​ទុក​ថវិកា​ជាង៦៥ពាន់​លាន​ដុល្លារ សម្រាប់​ការខាតបង់​ឥណទាន​រំពឹងទុក​ផងដែរ។

យោងតាម​ការព្យាករណ៍​របស់​ក្រុមហ៊ុន​ផ្ដល់​ទិន្នន័យ និង​ហេដ្ឋារចនាសម្ព័ន្ធ​ទីផ្សារ​ហិរញ្ញវត្ថុ​ពិភពលោក Refinitiv ប្រាក់ចំណេញ​របស់​ធនា​គារ​នានា នឹង​កើនឡើង​លើស​ទ្វេដង​ក្នុង​ត្រីមាស​ទី១ និង​ត្រីមាស​ទី២ ដើមឆ្នាំ២០២១ ។

ភាគហ៊ុន​របស់​ធនាគា​រ​បាន​ហក់​ឡើង៣៥% គិត​ចាប់​តាំងពីដើម​ខែវិច្ឆិកា ចុងឆ្នាំ២០២។ ចាប់តាំងពី​ពេលនោះ​មក វ៉ាក់សាំង​កូ​វីដ-១៩ ដែលមាន​ប្រសិទ្ធភាព​ត្រូវបាន​ចាប់ផ្តើម​ចែកចាយ ហើយ​ពួក​គណបក្ស​ប្រជាធិបតេយ្យ ក៏បាន​ឈ្នះ​ការបោះឆ្នោត​ប្រធានាធិបតី​នៅ​សហរដ្ឋអាមេរិក ដោយ​គណបក្ស​ឈ្នះឆ្នោត បាន​សន្យា​បញ្ចេញ​កញ្ចប់​ថវិកា​ស្ដារ​សេដ្ឋកិច្ច​បន្ថែមទៀត។

ធនាគារកណ្ដាល​អាមេរិក​Federal Reserve និយាយថា ខ្លួន​នឹង​អនុញ្ញាតឱ្យ​ធនាគារ​នានា ទិញយក​ភាគហ៊ុន​ឡើងវិញ​ជាថ្មី​ម្តងទៀត ដែល​នឹង​ធ្វើឱ្យ​ប្រាក់ចំណូល​ក្នុង​មួយភាគហ៊ុនៗកើនឡើង។

គិត​ត្រឹម​ថ្ងៃ​សុក្រ សប្ដាហ៍​មុន របាយការណ៍​របស់​ធ​នាគារ​Citigroup Inc បង្ហាញថា ប្រាក់ចំណេញ​របស់ខ្លួន ប្រចាំត្រីមាស​ទី៤ បាន​ធ្លាក់ចុះ៤២% ហើយ​ប្រាក់ចំណេញ​របស់​ធនាគា​រ Wells Fargo & Co បាន​ធ្លាក់ចុះ ៣៩% ចំណែកឯ​ប្រាក់ចំណេញ​របស់​ធនាគា​រ JPMorgan Chase & Co បាន​ធ្លាក់ចុះ​ត្រឹមតែ​ជាង៥% ប៉ុណ្ណោះ។

ធនាគារ​ទាំងបី​នេះ បាន​បញ្ចេញ​របាយការណ៍​របស់ខ្លួន​កាលពី​ថ្ងៃ​សុក្រ សប្ដាហ៍​មុន។ នៅ​សប្តាហ៍​បន្ទាប់ ប្រាក់ចំណេញ​ប្រចាំត្រីមាស​របស់​ធនាគារ Bank of America Corp ត្រូវបាន​រំពឹងថា​នឹង​ធ្លាក់ចុះ៣៣% ។

តាម​រំពឹងទុក​ថា ប្រាក់ចំណេញ​របស់​ធនា​គារ Morgan Stanley នឹង​កើនឡើង ១% ហើយ​ប្រាក់ចំណេញ​របស់​ធនាគា​រ Goldman Sachs Group Inc នឹង​កើនឡើង​រហូតដល់៤៣% ដោយសារ​ការឡើង​ថ្លៃ​ភាគហ៊ុន​ក្នុង​ទីផ្សារ​មូលធន៕