ដោយៈ រ៉ាណេត
ភ្នំពេញៈ បន្ទាប់ពីទទួលបានដំណឹងស្ដីពីការបិទច្រកព្រំដែន និងផ្អាកមិនឱ្យប្រជាពលរដ្ឋកម្ពុជាដឹកទំនិញ ចូលទៅកាន់ប្រទេសថៃតាមច្រកព្រំដែនប៉ៃលិន ពីសំណាក់អគ្គនាយកដ្ឋានអន្តោរប្រវេសន៍ សម្ដេចតេជោហ៊ុន សែន បានបញ្ជាឱ្យដកបទបញ្ជាលើការហាមឃាត់វិញជាបន្ទាន់ ហើយត្រូវជួយសម្រួលដល់ការដឹកជញ្ជូនទំនិញ របស់ពលរដ្ឋកម្ពុជាចេញទៅកាន់ប្រទេសជិតខាង ឱ្យបានកាន់តែប្រសើរ ក្រោមការទទួលខុសត្រូវរបស់ខេត្ត។
តាមរយៈសារជាសម្លេងរយៈពេលជាង៦នាទី នៅរសៀលថ្ងៃទី២៤ ខែកុម្ភៈ ឆ្នាំ២០២១នេះ សម្ដេចតេជោ ហ៊ុន សែនបានមានប្រសាសន៍ថា “ខ្ញុំសុំឱ្យក្រសួងមហាផ្ទៃ សម្ដេចក្រឡាហោម ស ខេង ក៏ដូចជាអគ្គនាយកដ្ឋានអន្តោប្រវេសន៍ ដកនូវបទបញ្ជានេះចេញវិញដើម្បីសម្រួលឱ្យប្រជាជននៅតាមព្រំដែនរកស៊ីធម្មតា”។សម្តេចបន្តថា “មិនត្រឹមតែរកស៊ីធម្មតានោះទេ ខែនេះជាខែប្រមូលផលត្រូវខិតខំ ឱ្យប្រជាជនអាចនាំចេញទៅបានកាន់តែច្រើនកាន់តែល្អ មិនអាចឱ្យខាងថៃដឹកទំនិញចូល មកក្នុងប្រទេសយើងបាន ប៉ុន្តែមិនឱ្យប្រជានខ្មែរយើងដឹកទំនិញចេញទៅប្រទេសថៃនោះទេ”។
សម្តេចបានបន្តថា “ជាមួយវៀតណាមក៏ដូចគ្នាដែរ ខ្ញុំសូមបញ្ជាក់ឡើងវិញ អ្វីដែលជាគោលបំណងរបស់យើង គឺគ្រប់គ្រងប្រជាពលរដ្ឋ ដើម្បីការធ្វើចត្តាឡីស័ក ក៏ប៉ុន្តែការធ្វើពាណិជ្ជកម្មតាមព្រំដែននៅតែធ្វើធម្មតា”។ សម្តេចបន្តថា “ខ្ញុំសុំឱ្យបណ្តាខេត្តនៅតាមព្រំដែនទាំងអស់ យកចិត្តទុកដាក់ការទទួលខុសត្រូវ ដើម្បីនឹងចាត់វិធានការធ្វើយ៉ាងណាឱ្យប្រជាជន នៅតែអាចបន្តរកស៊ីជាមួយប្រទេសជិតខាងបាន ហើយដែលមានការជួយសម្រួលពីអាជ្ញាធររបស់យើងផង”។
នៅក្នុងសារសម្លេងដដែលសម្ដេចតេជោបានបន្តថា “កូវីដវាបានបំផ្លាញយើងហើយ មិនអាចឱ្យមានការបំផ្លាញ ខាងផ្នែកសេដ្ឋកិច្ចបន្ថែមទៀតទេ ខ្ញុំសុំស្នើឱ្យសម្ដេចក្រឡាហោមបញ្ជាក់ឱ្យខ្ញុំ តើអគ្គនាយកដ្ឋានអន្តោរប្រវេសន៍ បានចេញបញ្ជាបែបនេះទៅកាន់កន្លែងណាខ្លះ សូមឱ្យដកថយនូវបទបញ្ជានេះវិញ”។
សម្តេចបន្តថា ទំនិញវាអត់មានជំងឺកូវីដទេ ទំនិញយើងដឹកចូលទៅប្រទេសថៃ ឬដឹកទៅវៀតណាម ឬវៀតណាមដឹកមកកម្ពុជា ថៃដឹកមកកម្ពុជា វាអត់មានជំងឺកូវីដនៅនឹងទំនិញនោះទេ បញ្ហាសំខាន់របស់យើង គឺយើងខិតខំពង្រឹងគ្រប់គ្រងការធ្វើចត្តាឡីស័កតែប៉ុណ្ណោះ។ ចឹងទេ សូមឱ្យយកចិត្តទុកដាក់ ទៅលើការពង្រឹងនូវការធ្វើចត្តាឡីស័កប្រជាពលរដ្ឋ ប៉ុន្តែត្រូវបង្កលក្ខណៈសម្បត្តិ ឱ្យប្រជាពលរដ្ឋបានទទួលការរកស៊ី នៅតាមព្រំដែនកាន់តែធំទៅៗ ព្រោះការរកស៊ីរបស់យើង ក៏ត្រូវពឹងពាក់ទៅលើទីផ្សារជិតខាង ហើយខាងមិត្តជិតខាង ក៏មានការពឹងពាក់នាំមកកាន់ទីផ្សារយើងក៏ច្រើន ដូច្នេះសូមបន្តលើបញ្ហានេះឱ្យបានច្បាស់លាស់ជៀសវាងភ័ន្តច្រឡំ។
សម្តេចបញ្ជាក់ថា “ការចេញបទបញ្ជាណាមួយទាក់ទង នឹងព្រំដែនសូមមេត្តាឱ្យខ្ញុំ បានដឹងផង ព្រោះខ្ញុំជាអ្នកទទួលខុសត្រូវ លើបញ្ហាកិច្ចការនយោបាយក្នុងប្រទេស និង នយោបាយក្រៅប្រទេស”។
សម្ដេចតេជោហ៊ុន សែនបានបន្តថា កន្លងទៅយើងក៏បានឆកល្វែងដែរ មានការចេញបទបញ្ជារទប់ស្កាត់ មិនឱ្យនាំចូលត្រីពីខាងក្រៅ ដែលអាចថាខុសទៅនឹងបទដ្ឋានអង្គការពាណិជ្ជកម្មពិភពលោក និងក្របខណ្ឌអាស្តា គឺតំបន់ពាណិជ្ជកម្មសេរីអាស៊ាន ដូច្នេះយើងបានកែតម្រូវទៅខាងក្រសួងកសិកម្ម ជាមួយនឹងការហាមឃាត់ការនាំត្រីចូលពីខាងវៀតណាម ដែលធ្វើឱ្យមានបញ្ហា ហើយនេះជារឿងដែលត្រូវចាត់ការបន្ទាន់។
សម្តេចបញ្ជាក់ថា “ខ្ញុំទទូចឱ្យខេត្តនៅតាមព្រំដែន យកការទទួលខុសត្រូវ ហើយសុំឱ្យរាការណ៍ឱ្យត្រង់មកខ្ញុំតែម្ដង បើសិនជាមានបញ្ហាទាក់ទិន ជាមួយការរអាក់រអួលទៅលើបញ្ហាពាណិជ្ជកម្មនៅតាមព្រំដែនកម្ពុជា-ថៃ”៕
