ដោយ: គង់ សូរិយា

ភ្នំពេញ: ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ចាប់ផ្តើមទទួលពាក្យស្នើសុំបញ្ជាក់គុណភាព សុវត្ថិភាពផលិតផលរបស់ម្ចាស់រោងចក្រ សហគ្រាស សិប្ប​កម្ម ចាប់ពីពេលនេះតទៅដោយមិនគិតថ្លៃសេវា។

យោងតាមសេចក្តីជូនដំណឹងស្តីពី ការដាក់ឱ្យប្រើប្រាស់សញ្ញាផលិតផលកម្ពុជាមានគុណភាព ចុះថ្ងៃទី១៥ ខែកុម្ភះ ឆ្នាំ២០២១នេះ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ធ្វើការជម្រាបដល់ម្ចាស់រោងចក្រ សហគ្រាស និងសិប្បកម្មនៅទូទាំងប្រទេសកម្ពុជាថា ដើម្បីជំរុញលើកកម្ពស់ផលិតផលក្នុងស្រុក តាមរយះការពង្រឹងគុណភាព សុវត្ថិភាពផលិតផលអនុលោមតាមស្តង់ដារ ក្នុងគោលបំណងការជ្រៀតចូលទីផ្សារទំនើប ផ្តល់ទំនុកចិត្តដល់អ្នកប្រើប្រាស់ និងអតិថជន។

សេចក្តីប្រកាសដដែលបានបន្តថា ពាក្យស្នើសុំ និងឯកសារភ្ជាប់ មានចែកជូនម្ចាស់រោងចក្រ សហគ្រាស សិប្បកម្ម នៅច្រកចេញ ចូលតែមួយរបស់ក្រសួងឧស្សាហកម្ម ដែលមានទីតាំងស្ថិតនៅបណ្តោយផ្លូវព្រះនរោត្តម ខណ្ឌដូនពេញ រាជធានីភ្នំពេញ។ ហើ​យការស្នើសុំបញ្ជាក់ផលិតផលកម្ពុជា មានគុណភាព និងសុវត្ថិភាព ជាសេវាស្ម័គ្រចិត្ត។

ក្រសួងឧស្សាហកម្ម បានស្នើរម្ចាស់រោងចក្រ សហគ្រាស សិប្បកម្មទាំងអស់មេត្តារួសរាន់មកដាក់ពាក្យសុំ សញ្ញាផលិតផលកម្ពុជាមានគុណភាព ដើម្បីក្រសួងពិនិត្យសម្រេចផ្តល់និមិត្តសញ្ញានិតិវិធី ដូចបានជូនភ្ជាប់មកជាមួយ សម្រាប់យកទៅបោះពុម្ពលើសំបកវេចខ្ចប់ផលិតផល និងចរាចរផលិតផលនៅលើទីផ្សារទំនើប ដើម្បីបម្រើសេចក្តីត្រូវការរបស់អតិថិជន និងអ្នកប្រើប្រាស់៕

ដោយៈ លក្ខិណា

ភ្នំពេញៈ យោងតាមអនុក្រឹត្យមួយ ស្តីពីការកែសម្រួលអត្រាអាករពិសេសលើមុខទំនិញរថយន្តមួយចំនួន របស់រាជរដ្ឋាភិបាលកម្ពុជាសម្រាប់អនុវត្តន៍ ក្នុងឆ្នាំ២០២១នេះ ឃើញរដ្ឋាភិបាលសម្រេចបន្ធូរបន្ថយ អត្រាអាករពិពេសលើប្រភេទរថយន្តមួយចំនួន។

នេះគឺជាការចង់បានរបស់អ្នកនាំចូលរថយន្តថ្មីៗ មកកាន់ទីផ្សារកម្ពុជា ហើយរំពឹងថា ការនាំចូលរថយន្តថ្មីៗមកកាន់ទីផ្សារប្រទេសកម្ពុជា នឹងកើនឡើងមួយកម្រិត ក្នុងឆ្នាំ២០២១។

លោកងន សាំងអគ្គនាយកក្រុមហ៊ុនអ អិម អេខេមបូឌា បានថ្លែងប្រាប់នៅថ្ងៃទី១៥ ខែកុម្ភៈ ឆ្នាំ២០២១នេះថា យោងតាមការប្រកាស របស់រដ្ឋាភិបាលក្នុងការបន្ធូបន្ថយពន្ធ អាករពិសេសនេះ នឹងធ្វើឱ្យតម្លៃរថយន្តលក់លើទីផ្សារ ក្នុងប្រទេសនឹងធ្លាក់ចុះបានមួយកម្រិត ហើយនឹងធ្វើឱ្យប្រជាជនកម្ពុជា មានលទ្ធភាពទិញរថយន្តថ្មីៗកាន់តែច្រើន ដូច្នេះក្នុងឆ្នាំ២០២១នេះ ទីផ្សាររថយន្តថ្មីនៅក្នុងប្រទេសកម្ពុជារំពឹងថា នឹងមានកំណើនឡើងវិញ បន្ទាប់ពីធ្លាក់ចុះក្នុងឆ្នាំ២០២០កន្លងទៅ ដោយសារតែកូវីដ១៩។

លោកបន្តថា “ថ្វីត្បិតតែរដ្ឋាភិបាលមិនបានបន្ធូបន្ថយពន្ធ លើរថយន្តគ្រប់ប្រភេទក្ដី តែក៏បានត្រឹមរថយន្តលក្ខណៈគ្រួសារ ( រថយន្ត SUV) ក៏វានឹងជួយដល់វិស័យឧស្សាហកម្មយានយន្តមួយកម្រិតផងដែរ ដែលនឹងជំរុញឱ្យការប្រើប្រាស់រថយន្តថ្មី នៅក្នុងប្រទេសកម្ពុជា បានកើនឡើងមួយកម្រិតទៀតដែរ”។

លោកងន សាំងបានថ្លែងថា យើងចង់ប្រជាពលរដ្ឋកម្ពុជាកាន់តែច្រើន មានលទ្ធភាពក្នុងការប្រើប្រាស់រថយន្តថ្មី ព្រោះរថយន្តថ្មីៗ វាមានសុវត្ថិភាព មិនបង្កគ្រោះថ្នាក់ និងមិនចំណាយច្រើនក្នុងការថែទាំ ឬក៏ជួសជុល ដូច្នេះបើសិនជាពន្ធត្រូវបានកាត់បន្ថយ នោះតម្លៃរថយន្តថ្មីនឹងធ្លាក់ចុះ ហើយពលរដ្ឋនឹងមានលទ្ធភាព ទិញរថយន្តប្រើប្រាស់កាន់តែច្រើន។

លោកបន្តថា កាលពីប៉ុន្មានឆ្នាំមុន ទីផ្សាររថយន្តថ្មី នៅកម្ពុជា មានប្រមាណតែជាង១០ភាគរយប៉ុណ្ណោះ តែចូលដល់ឆ្នាំ២០២០កន្លងទៅ ទីផ្សាររថយន្តថ្មីៗ មានប្រមាណជាង២០ភាគរយ ដែលជាសញ្ញាវិជ្ជមានមួយ សម្រាប់វិស័យរថយន្តថ្មីនៅកម្ពុជា ហើយយើងអាចរំពឹងថាអត្រានៃអ្នកប្រើប្រាស់រថយន្តថ្មីៗ នឹងមានកំណើនថែមទៀតនៅឆ្នាំបន្តបន្ទាប់។

យោងតាមអនុក្រឹត្យរបស់រាជរដ្ឋាភិបាលបានឱ្យដឹងថា មុខទំនិញរថយន្ត រថយន្តគ្រួសារ ដែលជារថយន្តប្រើថាមពលប្រេងសាំង ឬហ្គាសនិងរថយន្តប្រភេទ Hybrid ចំនួនបន្ទាត់ ត្រូវបានបន្ធូបន្ធយអត្រាអាករពិសេសពី៣០ភាគរយ មកនៅត្រឹម២០ភាគរយ បញ្ចុះអត្រាអាករពិសេស ពី៦០ភាគរយនៅត្រឹម៥០ភាគរយ លើមុខំនិញរថយន្តប្រើថាមពលប្រេងសាំង ឬហ្គាសឬប្រេងម៉ាស៊ូត និងរថយន្តប្រភេទHybrid ចំនួន២៣១បន្ទាត់ពន្ធ បញ្ចុះពី៦៥ភាគរយ មក៥០ភាគរយ លើមុខទំនិញជារថយន្តប្រភេទHybrid ចំនួន២០បន្ទាត់ពន្ធនិងពី៧០ភាគរយ មកនៅ៥៥ភាគរយលើមុខទំនិញ ជារថយន្តប្រើថាម​ពលប្រេងសាំង ហ្គាសឬប្រេងម៉ាស៊ូត ចំនួន៣០បន្ទាត់ពន្ធ និងបញ្ចុះជាច្រើនបន្ទាត់ពន្ធទៀតផងដែរ៕

ដោយ: គង់ សូរិយា

ភ្នំពេញ: ដើម្បីជំរុញកំណើនផលិតកម្មកសិកម្មឲ្យរីកចម្រើន និងឆ្លើយតបតម្រូវការទីផ្សារតំណាងក្រុមហ៊ុនចំនួន១០ និងសហគមន៍កសិកម្មចំនួន២ នឹងចុះហត្ថលេខាលើកិច្ចសន្យាជាមួយកសិករ តំណាងបណ្តុំអាជីវកម្មចំនួន១៦ និងចុះ MoU ចំនួន២ សម្រាប់ការទិញលក់កសិផលជិត៣៤០០តោន ដែលមានតម្លៃសរុបប្រមាណ១,៤ លានដុល្លារ។

យោងតាមសេចក្តីប្រកាសព៌តមានរបស់ក្រសួងកសិកម្ម រុក្ខាប្រមាញ់ និងនេសាទ ក្រោយចប់ពិធីចុះហត្ថលេខាលើកិច្ចសន្យាចំនួន១៦ និងអនុស្សរណៈនៃការយោគយល់គ្នា(MoU)ចំនួន២ស្តីពីការផ្គត់ផ្គង់បន្លែសុវត្ថិភាព ដំឡូងមី ផ្លែស្វាយ ផ្លែឱឡឹកសាច់លឿង និងមាន់សាច់ កាលពីព្រឹកថ្ងៃទី១៥ ខែកុម្ភ: ឆ្នាំ២០២១នេះបានឱ្យដឹងថា ការចុះហត្ថលេខាសម្រាប់ការទិញ លក់កសិផលខាងលើ រួមមាន កិច្ចសន្យាចំនួន១៦ (បន្លែ១២ មាន់សាច់២ ស្វាយ១ និងឱឡឹក១។

ផលិតផលទាំងនោះរួមមាន ១.ក្រុមហ៊ុនអាគ្រីអន និងបណ្តុំអាជីវកម្មបន្លែទួលត្រពាំងស្រស់បំព្រង បន្លែ៧២០តោន ថ្លៃ៣៦០,០០០ដុល្លារ។ ២.ក្រុមហ៊ុន Green Fresh Market និងបណ្តុំអាជីវកម្មបន្លែសុវត្ថិភាពស្វាយប្រទាល បន្លែ ១៨,៧តោន ថ្លៃ១៦ ៣០០ដុល្លារ។៣.ក្រុមហ៊ុន Bio Market និងបណ្តុំអាជីវកម្មបន្លែសុវត្ថិភាពស្វាយប្រទាល បន្លែ ៣,៨តោន ថ្លៃ ៣ ១៥០ដុល្លារ។ ៤.ក្រុមហ៊ុន Natural Garden និងបណ្តុំអាជីវកម្មបន្លែសុវត្ថិភាពពោធិ៍តាប៉ាង បន្លែ ១៩តោន ថ្លៃ ១៦ ៧០០ដុល្លារ។

៥.ក្រុមហ៊ុនGreen Garden និងបណ្តុំអាជីវកម្មបន្លែចំប៉ាព្រៃផ្តៅ បន្លែ ៦៤,៣តោន ថ្លៃ ៦២ ៥០០ដុល្លារ។ ៦.ក្រុមហ៊ុនកសិ-សុវត្ថិភាព និងបណ្តុំអាជីវកម្មបន្លែសុវត្ថិភាព ក្រចាប់មានជ័យ បន្លែ១៨,៦តោន ថ្លៃ១៨ ៦០០ដុល្លារ។ ៧.ក្រុមហ៊ុនកសិ-សុវត្ថិភាព និងបណ្តុំអាជីវកម្មបន្លែសុវត្ថិភាព សាមគ្គី ភូមិថ្មីវាលវង់ បន្លែ១២,៦ តោន ថ្លៃ១២ ៦០០ដុល្លារ។ ៨.ក្រុមហ៊ុនកសិ-សុវត្ថិភាព និងបណ្តុំអាជីវកម្មបន្លែបៃតងពង្រកងវ៉ា បន្លែ ៦តោន ថ្លៃ៣ ០០០ដុល្លារ។ ៩.ក្រុមហ៊ុនបន្លែសុវត្ថិភាពខ្មែរ និងបណ្តុំអាជីវកម្មបន្លែបៃតង គោកស្រុក បន្លែ ២៩តោន ថ្លៃ ៧ ២៥០ដុល្លារ។

១០.ក្រុមហ៊ុនមាសបៃតង និងបណ្តុំអាជីវកម្មបន្លែសុវត្ថិភាព ក្រុងសែនមនោរម្យ បន្លែ ១៦៤ តោន ថ្លៃ ២០៥ ២៥០ដុល្លារ។ ១១.សហគមន៍កសិកម្ម អមលាំង និងបណ្តុំអាជីវកម្មបន្លែ ភូមិដូនទិព្វ បន្លែ ៣៦៥ តោន ថ្លៃ ២៧៣ ៨៦០ដុល្លារ។ ១២.សហគមន៍បន្លែចម្រុះជាយក្រុងកំពង់ស្ពឺ និងបណ្តុំអាជីវកម្មបន្លែ ភូមិទំពូង បន្លែ ៥០,២ តោន ថ្លៃ ៣៧ ៦៨០ដុល្លារ។ ១៣.ក្រុមហ៊ុន Green Fresh Market ជាមួយបណ្តុំអាជីវកម្មមាន់ស្រែល្ងៀងមានជ័យ មាន់សាច់ ១តោន ថ្លៃ ៦ ៥០០ដុល្លារ។

១៤.ក្រុមហ៊ុន Green Garden និងបណ្តុំអាជីវកម្មមាន់ មរតករុងរឿង មាន់សាច់ទម្ងន់ ១៨,៩ តោន ថ្លៃ១៣៥ ០០០ដុល្លារ។ ១៥. ក្រុមហ៊ុនបន្លែសុវត្ថិភាពខ្មែរ និងបណ្តុំអាជីវកម្មបន្លែសុវត្ថិភាព អូរស្វាយ ផ្លែឪឡឹកសាច់លឿង ១៨០តោន ថ្លៃ ៨១ ០០០ដុល្លារ។ ១៦. ក្រុមហ៊ុនអង្គរ Green និងបណ្តុំអាជីវកម្មស្វាយកែវរមៀតសាមគ្គីតំបែរ ស្វាយ ៩៧តោន ថ្លៃ ៣០ ៣០០ដុល្លារ។ ដោយឡែក MoU ២ផ្សេងទៀត គឺក្រុមហ៊ុន Green Feed និងបណ្តុំអាជីវកម្មដំឡូងមីសូភាស ដំឡូងមី ១ ០៧៥តោន ថ្លៃ ៩៤ ០០០ដុល្លារ និងក្រុមហ៊ុន Green Feed និងបណ្តុំអាជីវកម្មដំឡូងមី ល្វាលើ ដំឡូងមី ៥៥០តោន ថ្លៃ ៤៨ ០០០ដុល្លារ។

ដើម្បីជំរុញកំណើនផលិតកម្មកសិកម្ម បន្លែ ដំឡូងមី ឱឡឹកលឿង ស្វាយ និងមាន់សាច់) ធានាបានសន្តិសុខស្បៀង និងធានាដល់ការផ្គត់ផ្គង់តាមតម្រូវការទីផ្សារ ក្រសួងកសិកម្ម រុក្ខាប្រមាញ់ និងនេសាទ បាននិងកំពុងអនុវត្តកម្មវិធីមួយឈ្មោះថា “ការផ្សព្វផ្សា យបច្ចេកវិទ្យាកសិកម្មថ្មី ដែលធន់នឹងការប្រែប្រួលអាកាសធាតុ” ហៅកាត់ថា ASPIRE។ASPIRE បានដើរតួនាទីយ៉ាងសំខាន់ ជាអ្នកជួយសម្របសម្រួល រៀបចំចងក្រងកសិករ អ្នកផ្គត់ផ្គង់ធាតុចូលកសិកម្ម និងអ្នកប្រមូលទិញកសិផល ជាបណ្តុំអាជីវកម្មសរុបមានចំនួន១ ៩២០ មានសមាជិកចំនួន ៦១ ៧៣៥គ្រួសារ នៅទូទាំង ២៤រាជធានី-ខេត្ត។

មិនតែប៉ុណ្ណោះ ASPIRE ក៏បានជួយគាំទ្រទាំងបច្ចេកទេស និងសម្ភារដើម្បីធ្វើឲ្យបណ្តុំទាំងនោះ ប្រកបអាជីវកម្មរបស់ខ្លួនពោរពេញ ទៅដោយវិបុលភាព ប្រសិទ្ធភាពសេដ្ឋកិច្ច ធានាបាននូវនិរន្តរភាពផលិតកម្ម៕

ដោយ:គង់ សូរិយា

ភ្នំពេញៈ ក្រសួងសាធារណៈការ និងដឹកជញ្ជូនកំពុងរៀបចំបង្កើតប្រព័ន្ឋផ្លាស់ប្តូរទិន្នន័យអេឡិកត្រូនិកតាមកំពង់ផែនានា ដើម្បីរួមចំណែកក្នុងការពង្រឹងការគ្រប់គ្រងការប្រមូលចំណូលជាតិ ជួយពន្លឿននីតិវិធីចេញ-ចូលនាវានៅតាមកំពង់ផែ។

ប្រព័ន្ធផ្លាស់ប្ដូរទិន្នន័យអេឡិចត្រូនិចនៅកំពង់ផែ(Port EDI)នឹងចូលរួមចំណែកក្នុងការពង្រឹងការគ្រប់គ្រងការប្រមូល ចំណូលជាតិប្រកបដោយតម្លាភាព និងប្រសិទ្ធភាព ជួយពន្លឿននីតិវិធីចេញ-ចូលនាវានៅតាមកំពង់ផែនិងកាត់ បន្ថយថ្លៃដើមដឹកជញ្ជូនទំនិញតាមផ្លូវសមុទ្រផងដែរ។

លោក រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូនបានបានមានប្រសាសន៍ថា កិច្ចប្រជុំនេះធ្វើឡើងដើម្បីពិនិត្យមើលរបាយការណ៍វឌ្ឍនភាព នៃការរៀបចំគម្រោងដំណើរការ ប្រព័ន្ធផ្លាស់ប្ដូរទិន្នន័យអេឡិចត្រូនិក នៅកំពង់ផែក្រោមកិច្ចសហការប្រកបយ៉ាងជិតស្និទ្ធរវាងក្រសួងសាធារណការ និងដឹកជញ្ជូន និងទីភ្នាក់ងារសហប្រតិបត្តិការអន្តរជាតិជប៉ុន(JICA)ក៏ដូចជា ដើម្បីជំរុញលើកទឹកចិត្តឱ្យក្រុមការងារជំនាញពាក់ព័ន្ធទាំងអស់ខិតខំប្រឹងបំពេញការងាររបស់ខ្លួន ឱ្យទទួលបានលទ្ធផលផ្លែផ្កាតាមការគ្រោងទុក។

បច្ចុប្បន្ននេះ ក្រសួងកំពុងរៀបចំបង្កើតប្រព័ន្ធផ្លាស់ប្ដូរទិន្នន័យ អេឡិចត្រូនិកនៅកំពង់ផែ (Electronic Data Interchange)  ដែលនឹងជួយសម្រួលដល់នីតិវិធីផ្លូវការនៃកប៉ាល់ចេញ-ចូលកំពង់ផែកម្ពុជា ក្នុងគោលបំណងពន្លឿននីតិវិធី និងកាត់បន្ថយថ្លៃដើមដឹកជញ្ជូនទំនិញតាមផ្លូវសមុទ្រ។

លោកបន្តថា “ឧត្ដមភាពនៃការប្រកួតប្រជែង នៅក្នុងវិស័យដឹកជញ្ជូន និងភ័ស្តុភារកម្ម មិនមែនអាស្រ័យតែទៅលើហេដ្ឋារចនាសម្ព័ន្ធ កំពង់ផែដ៏ល្អប្រសើរតែមួយមុខប៉ុណ្ណោះទេ ក៏ប៉ុន្តែវាក៏អាស្រ័យទៅលើប្រព័ន្ធគ្រប់គ្រងតាមប្រព័ន្ធឌីជីថលផងដែរ”។

លោកបន្តថា នៅពេលដាក់ឲ្យដំណើរការប្រព័ន្ធនេះ ត្រូវជំរុញលើកទឹកចិត្តឱ្យអ្នកប្រើប្រាស់ប្រព័ន្ធ ជាពិសេសសមត្ថកិច្ចពាក់ព័ន្ធទាំងអស់ ត្រូវចូលរួមសិក្សាស្វែងយល់ប្រព័ន្ធនេះឲ្យបានស៊ីជម្រៅ ដើម្បីបង្កើនប្រសិទ្ធភាពនៃការប្រើប្រាស់ និងចៀសវាងនូវភាពមិនច្បាស់លាស់ធា នាដល់ការគ្រប់គ្រងការប្រមូលចំណូលជាតិ ប្រកបដោយតម្លាភាព ប្រសិទ្ធភាព និងជាប្រយោជន៍ជូនសង្គមជាតិផងដែរ៕