ដោយៈ រ៉ាណេត
ភ្នំពេញៈ តម្លៃដីធ្លីនៅតំបន់តាមផ្លូវក្រវ៉ាត់ក្រុងទី៣ ឬ ផ្លូវ៣០ម៉ែត្រ ដែលកំពុងត្រូវបានស្ថាបនានា ពេលបច្ចុប្បន្ននេះ មានតម្លៃចន្លោះពី២០០ ទៅ ២៥០ ដុល្លារអាមេរិក ក្នុងមួយម៉ែត្រការ៉េ ដែលកាលពីមុនប្រកាសសាងសង់ផ្លូវនេះ ដីនៅតំបន់ដដែលមានតម្លៃប្រមាណ ២០ ទៅ ២៥ ដុល្លារក្នុងមួយម៉ែត្រការ៉េប៉ុណ្ណោះ។
លោក គាម សៀកឡុង អគ្គនាយកក្រុមហ៊ុន Century21 Dream Property បានឱ្យដឹងកាលពីពេលថ្មីៗនេះថា តំបន់ផ្លូវក្រវ៉ាត់ក្រុងទី៣ នៅក្នុងតំបន់មួយចំនួនកាលពីមុនជាប្រភទដីស្រែ ហើយម្លៃវិញគឺមិនសូវថ្លៃប៉ុន្មានទេ ប៉ុន្តែចាប់តាំងពីមានការស្ថាបនាផ្លូវ បានធ្វើឱ្យដីនៅតំបននេះ មានតម្លៃចាប់ពី២០០ ទៅ ២៥០ ដុល្លារក្នុងមួយម៉ែត្រការ៉េ។
លោកថ្លែងថា “នៅពេលដែលមិនទាន់មានផ្លូវ ដីវានៅជាដីស្រែនៅឡើយទេ តម្លៃប្រមាណតែ២០ ទៅ២៥ដុល្លារអាមេរិកក្នុងមួយម៉ែត្រការ៉េ ប៉ុន្តែពេលផ្លូវក្រវ៉ាត់ក្រុងទៅដល់ ដីនៅទីនោះមានតម្លៃបច្ចុប្បន្ន មានតម្លៃ២០០ ទៅ២៥០ ដុល្លារអាមេរិក” ។
លោកសៀកឡុងបន្តថា ការវិនិយោគលើវិស័យដីធ្លី គឺមានឱកាសចំណេញខ្ពស់បែបនេះ ប៉ុន្តែត្រូវវិនិយោគនៅតំបន់ណា ដែលមានការអភិវឌ្ឍន៍ ដូចជាដីនៅតាមផ្លូវក្រវ៉ាត់ក្រុងទី៣នេះជាដើម។ លោកបន្ថែមថា នៅពេលទិញទុកកាន់តែយូរ នឹងធ្វើឱ្យតម្លៃកាន់តែមានតម្លៃខ្ពស់ ព្រោះយើងមើលឃើញមានការអភិវឌ្ឍនៅក្នុងតំបន់នោះ។
ជាមួយគ្នានេះ លោក ឌឹត ចណ្ណា អគ្គនាយកក្រុមហ៊ុន ឡាក់គី រៀលធី បានឱ្យដឹងដែរដែរថា តម្លៃដីនៅតាមបណ្តោយផលូវក្រវ៉ាត់ក្រុងទី៣នេះ មានការកើនឡើងប្រមាណ១៥ ទៅ ២០ ភាគរយកាលពីឆ្នាំ ២០២០នេះ បើទោះកម្ពុជាជួបបញ្ហាប្រឈមទៅនឹងវិបត្តិនៃជំងឺកូវីដ ១៩ យ៉ាងណាក្តី។
លោកបន្តថា នៅតាមបណ្តោយផ្លូវនេះ គម្រោងជាច្រើនបាន និងកំពុងចាប់ផ្តើមអភិវឌ្ឍន៍ដូចកន្លែងលក់ទំនិញ រោងចក្រ តំបន់ឧស្សាហកម្ម ឃ្លាំងស្តុកទំនិញ និងលំនៅឋានជាដើម ដែលធ្វើឱ្យតម្លៃដីនៅទីនោះមានការើនឡើង បន្ទាប់ពីមានគម្រោងទាំងអស់នេះកំពុងចេញរូបរាងបណ្តើរ។
បើតាមលោក ចណ្ណា ដីនៅតាមផ្លូវក្រវាត់ក្រុងទី៣ ត្រូវបានចែកជា ៤ តំបន់ គឺតំបន់នៅចន្លោះពីស្ពានព្រែកព្នៅ ទៅដល់ផ្លូវជាតិលេខ៤ ដីមានតម្លៃជាមធ្យមចន្លោះពី ២០០-២៥០ ដុល្លារក្នុង១ម៉ែត្រការ៉េ។ តំបន់ចន្លោះផ្លូវជាតិលេខ៣ និងលេខ៤ ដីមានតម្លៃពី ១៥០-២០០ ដុល្លារ។ តំបន់ចាប់ពីផ្លូវជាតិលេខ៣ ទៅផ្លូវជាតិលេខ២១ ដីមានតម្លៃពី ១០០-១៥០ដុល្លារ និងចាប់ពីផ្លូវជាតិលេខ២១ ទៅផ្លូវជាតិលេខ១ មានតម្លៃចន្លោះពី ៥០-១០០ ដុល្លារ។
លោកបន្តទៀតថា ដោយសារក្រុងភ្នំពេញកាន់តែរីកធំនោះ ដូច្នេះតម្លៃដីនៅតាមបណ្តោយផ្លូវក្រវាត់ក្រុងទី៣ ក៏នឹងកើនឡើងទៅតាមនោះដែរ។
ផ្លូវក្រវាត់ក្រុងផ្លូវជាតិលេខទី៣ មានប្រវែង៥៣គីឡូម៉ែត្រ តភ្ជាប់ពីផ្លូវជាតិលេខ៦ ឆ្ពោះទៅកាន់ផ្លូវជាតិលេខ៤ លេខ៣ លេខ២១ មុននឹងឆ្លងទន្លេបាសាក់ តភ្ជាប់ទៅកាន់ផ្លូវជាតិលេខ១ ត្រូវបានកសាងឡើងជា ៤គន្លង ដែលមានទទឹងផ្លូវ២៥ម៉ែត្រ និងចំណាយថវិកា ប្រមាណ ២៧៣លានដុល្លារ ជាហិរញ្ញប្បទាន សម្បទានរបស់ប្រទេសចិន និងថវិការ បដិភាគរបស់រាជរដ្ឋាភិបាលកម្ពុជា។ ផ្លូវនេះបានបើកការដ្ឋានសាងសង់ កាលពីថ្ងៃទៅ ១៤ ខែមករា ឆ្នាំ២០១៩ ដោយគ្រោងនឹងបញ្ជប់នៅចុងឆ្នាំ២០២១ ។
ផ្លូវក្រវាត់ក្រុងខ្សែទី៣ គឺជាផ្លូវដ៏សំខាន់ ក្នុងការជួយកាត់បន្ថយការកកស្ទះ និងជួយសម្រួលចរាចរណ៍ក្នុងរាជធានីភ្នំពេញ។ ម្យ៉ាងទៀតគឺជាការតភ្ជាប់ផ្ទៃក្នុង និងសមាហរណកម្មតំបន់ ពិសេសតភ្ជាប់ផ្លូវអាស៊ានហាយវ៉េ និងផ្លូវរបៀងសេដ្ឋកិច្ចសំខាន់ៗរបស់មហាអនុតំបន់មេគង្គ រួមចំណែកក្នុងការសម្រួលការដឹកជញ្ជូនឆ្លងកាត់ព្រំដែន ជំរុញពាណិជ្ជកម្មអន្តរជាតិ និងប្រែក្លាយទឹកដី ដែលនៅសងខាងផ្លូវខ្សែក្រវាត់ក្រុងនេះ ទៅជាតំបន់អភិវឌ្ឍន៍ថែមទៀតផង៕
