ដោយ ៖ វុត្ថា
ភ្នំពេញ ៖ ខណៈពេលដែលលទ្ធផលនៃការសាងសង់បានសម្រេចប្រមាណ៩០ភាគរយ ក្រសួងប្រៃសណីយ៍ និងទូរគមនាគមន៍គ្រោងនឹងរៀបចំធ្វើការតភ្ជាប់បណ្តាញទូរគមនាគមន៍ទៅកាន់ពហុកីឡដ្ឋានជាតិមរកតតេជោក្នុងពេលឆាប់ៗខាងមុខនេះ ដើម្បីត្រៀមការប្រកួត SEA Games លើកទី៣២ នៅឆ្នាំ២០២៣។

រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត នៅថ្ងៃទី២៩ ខែធ្នូ ឆ្នាំ២០២០បានដឹកនាំមន្ត្រី និងអ្នកបច្ចេកទេសក្រសួងទៅទស្សនកិច្ចនៅការដ្ឋានសាងសង់ពហុកីឡដ្ឋានជាតិមរតកតេជោ ដែលស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។

លោកបានបញ្ជាក់ថា “ក្រុមមន្ត្រីជំនាញកំពុងសិក្សា និងស្វែងយល់បន្ថែមពីតម្រូវការនៃការតភ្ជាប់បណ្តាញទូរគមនាគមន៍នៅទីតាំងពហុកីឡដ្ឋាន អគាររដ្ឋបាល ភូមិកីឡា និងបរិវេណជុំវិញ ហើយក្រសួងប្រៃសណីយ៍ និងទូរគមនាគមន៍ នឹងសិក្សារួមគ្នាជាមួយគណៈកម្មាធិការជាតិអូឡាំពិក និងគណៈកម្មាធិការសាងសង់ ដើម្បីតភ្ជាប់ខ្សែកាប្លិ៍អុបទិក ប្រព័ន្ធចែកចាយ សេវាអ៊ីនធឺណិត សេវាទូរសព្ទ បំពាក់កាម៉េរាសុវត្ថិភាព និងបច្ចេកវិទ្យាឌីជីថលផ្សេងៗឱ្យគ្រប់គ្រាន់”។

លោកបញ្ជាក់ថា “គ្រប់ការតភ្ជាប់ និងបំពាក់បណ្តាញសម្ភារៈទូរគមនាគមន៍គឺសម្រាប់បម្រើ និងផ្តល់ភាពងាយស្រួលដល់អ្នកទស្សនា និងផ្សព្វផ្សាយការប្រកួតកីឡាអាស៊ីអាគ្នេយ៍(SEA Games)លើកទី៣២ ដែលកម្ពុជានឹងធ្វើជាម្ចាស់ផ្ទះនៅឆ្នាំ២០២៣ខាងមុខនេះ”។

ពហុកីឡាដ្ឋានជាតិមរតកតេជោគ្រោងចំណាយការសាងសង់សរុបទាំងអស់ជិត១៦០លានដុល្លារអាមេរិក គឺជាជំនួយឥតសំណងទាំងស្រុងរបស់សាធារណរដ្ឋប្រជាមានិតចិនដែលអាចផ្ទុកអ្នកទស្សនាប្រមាណ៦ម៉ឺននាក់ក្រោយពេលសាងសង់រួចរាល់។

បន្ទាប់ពីសាងសង់សំណង់រឹងស្ទើររួចរាល់ ១០០% បច្ចុប្បន្នក្រុមការងារសាងសង់ កំពុងមមាញឹកក្នុងការបំពាក់ដំបូល ដោយសម្រេចបានលទ្ធផលប្រមាណ ៧០% និងជញ្ជាំង ដែលរំលេចនូវផ្ការំដួល បានសម្រេចលទ្ធផលប្រមាណជាង ៩០%។ រីឯការតុបតែងបន្ទប់ និងការសាងសង់ទីលានស្មៅធម្មជាតិ ក៏ដូចជាទីលានរត់អត្តពលកម្មវិញ ក៏កំពុងដំណើរការសាងសង់ជាបន្ដបន្ទាប់ផងដែរ។

កីឡដ្ឋានធំនៃពហុកីឡដ្ឋានជាតិមរតកតេជោនេះ បានបើកការដ្ឋានសាងសង់តាំងពីថ្ងៃទី០៤ ខែមេសា ឆ្នាំ២០១៧ ក្រោមអធិបតីភាពសម្ដេចតេជោ ហ៊ុន សែន ដែលជាជំនួយឥតសំណងរបស់រដ្ឋាភិបាល និងប្រជាជនចិន ក្នុងរង្វង់ទឹកប្រាក់ប្រមាណ ១៦០លានដុល្លារ។ សមិទ្ធផលដ៏ធំសម្បើម ដែលអាចផ្ទុកអ្នកទស្សនាបានប្រមាណ ៦ម៉ឺននាក់នេះ គឺសាងសង់ឡើង ដើម្បីត្រៀមស្វាគមន៍ព្រឹត្តិការណ៍ស៊ីហ្គេម ឆ្នាំ២០២៣ នៅកម្ពុជា៕

        ដោយគង់ ម៉ាលីន

ព្រះសីហនុៈលោកឧបនាយករដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការគ្រប់គ្រង និងអភិវឌ្ឍតំបន់ឆ្នេរ សមុទ្រកម្ពុជា (គ.អ.ឆ.ក)និងមន្រ្តីពាក់ព័ន្ឋ បានចុះពិនិត្យវឌ្ឍនភាពនៃការស្ថាបនាផ្លូវក្រុង ៣៤ខ្សែ នៅខេត្តព្រះសីហនុ។

ការចុះពិនិត្យវឌ្ឍនភាពការងារ ស្ថាបនាផ្លូវក្រុងចំនួន៣៤ខ្សែ របស់លោកឧបនា​យករដ្ឋមន្រ្តី នៅខេត្តព្រះសីហនុ បានធ្វើឡើងនាព្រឹកថ្ងៃទី៣០ ធ្នូនេះ។

គិតមកដល់បច្ចុប្បន្ន ការងារចាក់បេតុងផ្លូវសម្រេចបាន១០០ភាគរយហើយ និងឈានដល់ដំណាក់កាលអ៊ុតកៅស៊ូបេទីម កម្រាស់៧០មីលីម៉ែត្របានប្រមាណ២១% និង​​បន្តបង្ហើយការងារស្ថាបនាស្ថានីយ៍ ប្រព្រឹត្តកម្មទឹកកខ្វក់ចំនួន២ទីតាំង ការងារក្រាលកម្រា​លថ្មក្រានីត ការងារដំឡើងស្លាកសញ្ញាចរាចរណ៍ ដំឡើងកាមេរ៉ាសុវត្ថិភាព ភ្លើងស្តុបចរា​ចរណ៍ បន្ទប់ទឹកសាធារណៈ ដាំដើមឈើ និងពិនិត្យលទ្ធភាព តភ្ជាប់ផ្លូវប្របឆ្នេរអូរឈើទា​លកាត់តាមពយតាមូង។

គម្រោងស្ថាបនាហេដ្ឋារចនាសម្ព័ន្ធផ្លូវ ក្នុងក្រុងចំនួន៣៤ខ្សែ នៅខេត្តព្រះសីហនុ ជាគម្រោងរបស់រាជរដ្ឋាភិបាលកម្ពុជា ដែលអនុវត្តដោយគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា និងត្រូវបានធ្វើពិធីបើកការដ្ឋានក្រោមអធិបតីភាពដ៏ខ្ពង់ខ្ពស់ សម្តេចតេជោហ៊ុន សែន នាយករដ្ឋមន្រ្តីនៃកម្ពុជា កាលពីថ្ងៃទី១៦ ខែវិច្ឆិកា ឆ្នាំ២០១៩។

ការសាងសង់ផ្លូវនេះ គឺមានក្រុមហ៊ុនចំនួន៨ទទួលសាងសង់ ដោយត្រូវចំណាយទុនប្រមាណ២៩៤លានដុល្លារអាមេរិក ហើយផ្លូវនេះគឺជាផ្លូវដ៏ប្រណីត ដោយចែកចេញជា ៣ប្រភេទគឺ ទី១ ប្រភេទមហាវិថី ទី២ ផ្លូវប្រភេទវិថី និងទី៣ អនុវិថី។ ចំពោះមហាវិថីមានចំនួន៣ខ្សែ គឺមានទទឹងផ្លូវរហូតដល់ទៅ៥០ម៉ែត្រ។ វិថីវិញ គឺមានទទឹងពី២០ ទៅ៤០ម៉ែត្រ រីឯប្រភេទបែបអនុវិថីវិញ គឺមានទទឹងពី៨ទៅ៤០ម៉ែត្រ ហើយផ្លូវទាំងអស់គឺមានទ្រូងផ្លូវ ចិញ្ចើមផ្លូវ(សម្រាប់អ្នកដើរ សម្រាប់កង់ ម៉ូតូ) គំនូសចរាចរណ៍ត្រឹមត្រូវ បង្គោលភ្លើងបំភ្លឺផ្លូវ និងមានបំពាក់កាមេរ៉ាសុវត្តិភាពតាមដងផ្លូវផងដែរ។

គម្រោងនេះ នឹងចូលរួមអនុវត្តផែនការរៀបចំដែនដី ខេត្តព្រះសីហនុ ចក្ខុវិស័យឆ្នាំ២០៣០ ដែលត្រូវបានដាក់ឱ្យប្រើប្រាស់ដោយអនុក្រឹត្យលេខ៨១ អនក្រ.បក ចុះថ្ងៃទី១៣ ខែមិថុនា ឆ្នាំ២០១៨ ក្នុងគោលបំណងធ្វើឱ្យខេត្តព្រះសីហនុ ក្លាយទៅជាប៉ូលអភិវឌ្ឍជាតិប្រកបដោយចីរភាព តាមរយៈការអភិវឌ្ឍទីក្រុងទំនើប និងការរៀបចំជាតំបន់សេដ្ឋកិច្ច ពិសេសគំរូពហុបំណង មជ្ឈមណ្ឌលកំណើនជាតិ មជ្ឈមណ្ឌលភស្តុភារកម្មជាតិ និងជាមជ្ឈមណ្ឌលឧស្សាហកម្មបច្ចេកវិទ្យាទំនើប៕

ដោយៈ រ៉ាណេត

កំពង់ស្ពឺៈ ក្រោមការយកចិត្តទុកដាក់ ពីសំណាក់រាជរដ្ឋាភិបាលកម្ពុជា ក្នុងការ អភិវឌ្ឍលើវិស័យហេដ្ឋារចនាសម្ព័ន្ធនានា ឱ្យកាន់តែមានភាពល្អប្រសើរ សម្រាប់តែខេត្តកំពង់ស្ពឺ កំពុងត្រៀមខ្លួនទទួលយកនូវសមិទ្ធផលថ្មី នៃហេដ្ឋារចនាសម្ព័ន្ធចំនួន៥ ដែលជាកត្តាសំខាន់ ជួយជំរុញឱ្យការអភិវឌ្ឍនៅក្នុងខេត្តមានភាពល្អប្រសើរ និងបង្កើនសក្ដានុពលកាន់តែខ្លាំងជាងបណ្តាខេត្តមួយចំនួន។

សមិទ្ធផលថ្មីនៃហេដ្ឋារចនាសម្ព័ន្ធ ដែលវិនិយោគដោយរាជរដ្ឋាភិបាលកម្ពុជាសំខាន់ៗប្រចាំនៅក្នុងខេត្តកំពង់ស្ពឺរួមមានចំនួន៥ ដូចជា គម្រោងសាងសង់ផ្លូវល្បឿនលឿនភ្នំពេញ-ព្រះសីហនុ គម្រោងស្ដារនិងស្ថាបនាផ្លូវជាតិ៤១ គម្រោងអភិវឌ្ឍផ្លូវជាតិលេខ៤៤ គម្រោងពង្រីកផ្លូវជាតិលេខ៤ រួមជាមួយនឹងភាពល្អប្រសើរនៃសក្ដានុពល ក្នុងការវិនិយោគវិស័យអចលនទ្រព្យនៅផ្លូវជាតិលេខ៥១ គំរោងសាងសង់ និងពង្រីកផ្លូវជាតិលេខ៣ និងបណ្តាផ្លូវជាតិសំខាន់ៗមួយចំនួនទៀត។

គម្រោងសាងសង់ផ្លូវល្បឿនលឿនភ្នំពេញ-ព្រះសីហនុ

គម្រោងសាងសង់ហេដ្ឋារចនាសម្ព័ន្ធផ្លូវល្បឿនលឿន ភ្នំពេញ-ក្រុងព្រះសីហនុ មានប្រវែង១៨៧គីឡូម៉ែត្រ ជាគម្រោងដែលផ្តល់អត្ថប្រយោជន៍យ៉ាងច្រើន ទាំងផ្នែកសង្គម សេដ្ឋកិច្ច និងនយោបាយរបស់រាជរដ្ឋាភិបាលកម្ពុជា ត្រូវអនុវត្តន៍ក្នុងក្របខ័ណ្ឌភាពជាដៃគូរវាងរដ្ឋ និងឯកជន ដែលរដ្ឋនៅតែជាម្ចាស់កម្មសិទ្ធិ លើទីតាំងដីទាំងអស់ដែលបានធ្វើលទ្ធកម្មសម្រាប់គម្រោង ហើយក្រុមហ៊ុននឹងត្រូវប្រគល់ហេដ្ឋារចនាសម្ព័ន្ធទាំងអស់នេះ មកឱ្យជាកម្មសិទ្ធិទាំងស្រុងរបស់រដ្ឋ ក្រោយផុតរយៈពេលប្រតិបត្តិការ ដែលបានកំណត់ក្នុងកិច្ចព្រមព្រៀងសម្បទាន។

ការសាងសង់ផ្លូវល្បឿន លឿនសម្រេចបាន២៧ភាគរយហើយ ដោយការសាងសង់កំពុងមានដំណើរទៅមុខជាប្រចាំ ទោះបីមានវិបត្តិសកលអូសបន្លាយពេលយ៉ាងណាក្តី។

ការពង្រីកផ្លូវជាតិលេខ៣

        ផ្លូវជាតិលេខ៣ បាននិងកំពុងពង្រីកជាពីរគន្លង ប្រវែង១៤៨គីឡូម៉ែត្រ ដែលតភ្ជាប់់រវាងរាជធានីភ្នំពេញ ខេត្តកណ្តាល កំពង់ស្ពឺ និងខេត្តកំពត ដែលផ្លូវនេះកំពុងស្ថាបនាយ៉ាងសកម្ម ដោយគ្រោងបញ្ចប់នៅដើមឆ្នាំ២០២២ខាងមុខនេះ។

ផ្លូវនេះស្ថាបនាឡើងវិញក្រោមហិរញ្ញប្បទានរបស់សាធារណៈរដ្ឋកូរ៉េ ដែលផ្លូវនេះនឹងត្រូវពង្រីកជាពីរគន្លង និងមានសួនច្បារនៅចំកណ្តាល ចាប់ពីតំបន់ចោមចៅរហូតដល់តំបន់បាយគូស(ផ្លូវបំបែករវាងខេត្តកំពង និងខេត្តកែប) និងចាប់ពីចំណុចផ្លូវបំបែកបាយគូសទៅកាន់ខេត្តកំពត គឺត្រូវពង្រីកទំហំ១១ម៉ែត្រប៉ុណ្ណោះ។

គម្រោងស្ថាបនានិងលើកកំពស់ផ្លូវជាតិលេខ៤៤

កំណាត់ផ្លូវជាតិលេខ៤៤ មានប្រវែង១៣៩,៦១គឺឡូម៉ែត្រ។ ផ្លូវនេះកាត់ក្រុងច្បារមន និងស្រុកចំនួន៤ផ្សេងទៀតរួមមាន ស្រុកសំរោងទង ស្រុកឱរ៉ាល់ ស្រុកថ្ពង និងស្រុកឧត្តុង្គ។ ការស្ដារកំណាត់ផ្លូវជាតិលេខ៤៤នេះ បានចំណាយអស់៨០,៣០លានដុល្លារជាថវិកាកម្ចីឥណទានពីចិន និងប្រាក់បដិភាគរបស់រដ្ឋាភិបាលជាង៥,២លានដុល្លារអាមេរិក។ បច្ចុប្បន្ននៅតំបន់ផ្លូវជាតិលេខ៤៤ កំពុងតែមានភាពទាក់ទាញការវិនិយោគ និងសាងសង់សំណង់បម្រើឱ្យវិស័យឧស្សាហកម្ម រួមជាមួយនឹងសកម្មភាពនៃការអភិវឌ្ឍន៍ជាដីឡូតិ៍សម្រាប់លំនៅដ្ឋានដាច់ដោយឡែកផងដែរ ខណៈដែលគម្រោងបង្កើតតំបន់សេដ្ឋកិច្ចពិសេសក៏ចាប់ផ្តើមបង្ហាញខ្លួន។

គម្រោងពង្រីកផ្លូវជាតិលេខ៤

តាមផែនការ ក្រសួងសាធារណការ និងដឹកជញ្ជូន នឹងលើកម្ពស់ផ្លូវជាតិលេខ៤នេះ ចាប់ពីភ្នំពេញទៅកាន់ខេត្តព្រះសីហនុ ដោយពង្រីកឱ្យដល់១១ម៉ែត្រ បន្ថែមទៀត ដែលទទួលបានហិរញ្ញប្បទាន ពីធនាគារពិភពលោកក្នុងទឹកប្រាក់១០០លានដុល្លារអាមេរិក ដើម្បីសម្រួលដល់ការធ្វើដំណើរ និងដឹកជញ្ជូនទំនិញ។

គម្រោងស្ថាបនាផ្លូវជាតិលេខ៥១

ផ្លូវជាតិលេខ៥១តភ្ជាប់ពីផ្លូវជាតិលេខ៤ ត្រង់ចំនុចថ្នល់ទទឹងទៅផ្លូវជាតិលេខ៥ត្រង់ចំនុចផ្សារឧដុង្គ ដែលមានប្រវែង៣៧.៩៥គីឡូម៉ែត្រ និងចំងាយប្រមាណជាង១៨គីឡូម៉ែត្រពីទីក្រុងភ្នំពេញ។ បច្ចុប្បន្ន ផ្លូវជាតិមួយខ្សែនេះ កំពុងផ្លាស់ប្តូរមុខមាត់ថ្មីក្នុងវិស័យអចលនទ្រព្យ ជាពិសេសគឺវិស័យដីធ្លី។

កំណើននៃទិញលក់ក្នុងវិស័យអចលនទ្រព្យ នៅក្នុងតំបន់នេះដោយសារផ្លូវនេះនឹងក្លាយជាផ្លូវយុទ្ធសាស្ត្រមួយ សម្រាប់ជួយសម្រួលដល់ការធ្វើដំណើរ និងការដឹកជញ្ជូនទំនិញឆ្ពោះទៅកាន់កំពង់ផែស្វយ័តក្រុងព្រះសីហនុ៕

ដោយៈ រ៉ាណេត

ភ្នំពេញៈ ទំហំពាណិជ្ជកម្មទ្វេភាគីរវាងកម្ពុជា -ថៃនៅក្នុងរយៈពេល១១ខែឆ្នាំ២០២០កន្លងទៅនេះ សម្រេចបានប្រមាណ៦,៦ពាន់លានដុល្លារ ធ្លាក់ចុះ២២ភាគរយធៀបទៅនឹងរយៈពេលដូចគ្នាកាលពីឆ្នាំមុន។

យោងតាមរបាយការណ៍ក្រសួងពាណិជ្ជកម្ម នៅព្រឹកថ្ងៃទី៣០ ខែធ្នូ ឆ្នាំ២០២០នេះបានបង្ហាញថា ចាប់ពីខែមករា ដល់ខែវិច្ឆិកា ឆ្នាំ២០២០កន្លងទៅនេះ ទំហំពាណិជ្ជកម្មរវាងកម្ពុជា ថៃមានទំហំ៦,៦ពាន់លានដុល្លារ ក្នុងនោះកម្ពុជាបានធ្វើការនាំទំនិញចេញទៅប្រទេសថៃ មានទំហំទឹកប្រាក់សរុប១០៧១លានដុល្លារ ថយចុះ៥១ភាគរយធៀបនឹងរយៈពេល១១ខែកាលពីឆ្នាំ២០១៩។

ដោយឡែកសម្រាប់ទំនិញ ដែលត្រូវបាននាំចូលពីប្រទេសថៃ មកកាន់កម្ពុជាមានទំហំ៥៥៨០លានដុល្លារ ធ្លាក់ចុះ១២ភាគរយ បើធៀបទៅនឹងរយៈពេលដូចគ្នាកាលពីឆ្នាំ២០១៩ ដែលការធ្លាក់ចុះនូវទំហំពាណិជ្ជកម្មទាំងនេះ បណ្តាលមកពីការទទួលរងនូវផលប៉ះពាល់ដោយការរីករាលដាលជំងឺកូវីដ១៩ ខណៈដែលទំហំពាណិជ្ជកម្មពេញមួយឆ្នាំ២០១៩មានចំនួន៩,៤១ពាន់លានដុល្លារ កើន១២ភាគរយបើធៀបទៅនឹងឆ្នាំ២០១៨ ដែលមានត្រឹម៨,៣៨ពាន់លានដុល្លារ។

ផលិតផល និងទំនិញ ដែលកម្ពុជាធ្វើការនាំចូលមកពីប្រទេសថៃភាគច្រើនជាប្រភេទទំនិញ មានតម្រូវការចាំបាច់ ដូចជា ចំណីអាហារ សម្ភារៈប្រើប្រាស់ប្រចាំថ្ងៃ សម្លៀកបំពាក់ស្បែកជើង ផលិតផលគ្រឿងសំអាង គ្រឿងចក្រកសិកម្ម គ្រឿងអគ្គិសនី និងគ្រឿងសំណង់ជាដើម៕