ដោយៈ គង់ សូរិយា

ភ្នំពេញ: រដ្ឋាភិបាល ដែលមានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ គ្រោងបង្កើតក្រុមហ៊ុនថ្នាលទូរទស្សន៍ឌីជីថលថ្មីមួយ ដើម្បីដើម្បីស្វែងយល់ពីស្ថានភាពបច្ចុប្បន្ន វឌ្ឍនភាព និងបញ្ហាប្រឈមពាក់ព័ន្ធ នឹងការផ្លាស់ប្តូរការផ្សាយទូរទស្សន៍ ពីប្រព័ន្ធអាណាឡូកទៅជាប្រព័ន្ធឌីជីថល។

កិច្ចប្រជុំកាលពីថ្ងៃទី២៨ ខែ ធ្នូ ឆ្នាំ ២០២០កន្លងមក ក្រោមអធិបតីភាពលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការ គោលនយោបាយសេដ្ឋកិច្ច និងហិរញ្ញវត្ថុ (គ.ស.ហ) បានដឹកនាំកិច្ចប្រជុំអន្តរក្រសួង ដើម្បីពិនិត្យ និងពិភាក្សា លើសំណើសុំគោលការណ៍អនុញ្ញាត “បង្កើតក្រុមហ៊ុនថ្នាលទូរទស្សន៍ឌីជីថលថ្មី”។

អ្នកនាំពាក្យក្រសួងសេដ្ឋកិច្ចបានប្រាប់ថា ស្របតាមបរិបទនៃការវិវឌ្ឍជាក់ស្តែងនៃឌីជីថលូបនីយកម្មរបស់កម្ពុជា កិច្ចប្រជុំនេះ មានគោលបំណងប្រមូលធាតុចូលបន្ថែម និងផ្លាស់ប្តូរទស្សនទាន ដើម្បីស្វែងយល់ពីស្ថានភាពបច្ចុប្បន្ន វឌ្ឍនភាព និងបញ្ហាប្រឈមពាក់ព័ន្ធនឹងការផ្លាស់ប្តូរការផ្សាយទូរទស្សន៍ ពីប្រព័ន្ធអាណាឡូកទៅជាប្រព័ន្ធឌីជីថល។

កិច្ចប្រជុំក៏បានពិភាក្សាលើចំណុចសំខាន់ៗចំនួន៤ រួមមាន ទី១ ការអនុវត្តផែនការផ្លាស់ប្តូរ ការផ្សាយទូរទស្សន៍ពីប្រព័ន្ធអាណាឡូក ទៅជាប្រព័ន្ធឌីជីថលឱ្យបានមុនឆ្នាំ ២០២៣ ទី២ ការគ្រប់គ្រងនូវការប្រើប្រាស់បន្ទារហ្វ្រេកង់ស៍៧០០MHz ក្នុងវិស័យសោតទស្សន៍ រួមមានទូរទស្សន៍ឌីជីថល ប្រព័ន្ធអ៊ីនធើណេត និងទូរស័ព្ទចល័ត ទី៣ យន្តការគ្រប់គ្រង និងវិនិយោគ លើថ្នាលទូរទស្សន៍ឌីជីថលថ្មី និងទី៤ ការធ្វើបច្ចុប្បន្នកម្មលើវឌ្ឍនភាពពាក់ព័ន្ធនឹងការរៀបចំ និងការគ្រប់គ្រងហេដ្ឋា-រចនាសម្ព័ន្ធប្រព័ន្ធឌីជីថលក្នុង រយៈពេលមធ្យម និងវែង ក៏ដូចជាពិភាក្សាពីលទ្ធភាព នៃការបង្កើតគំរូពាណិជ្ជកម្មសម្រាប់ ការវិនិយោគក្នុងវិស័យពាក់ព័ន្ធនឹងប្រព័ន្ធឌីជីថល។

លទ្ធផលនៃកិច្ចប្រជុំនេះ បានសម្រេចលើយន្តការគ្រប់គ្រង និងការវិនិយោគលើថ្នាលទូរទស្សន៍ឌីជីថលថ្មី អង្គប្រជុំបានពិនិត្យ ពិភាក្សា និងប្រៀបធៀបនូវជម្រើសយន្តការចំនួន៣ផ្សេងគ្នា រួមមាន ទី១ យន្តការគ្រប់គ្រង និងវិនិយោគដោយវិស័យឯកជនទាំងស្រុង។យន្តការសហការចម្រុះរវាងវិស័យរដ្ឋ-ឯកជន និងយន្តការគ្រប់គ្រង និងវិនិយោគដោយរដ្ឋទាំងស្រុង។

លោកអូន ព័ន្ឋមុនីរ័ត្នបានមានប្រសាសន៍ថា ការអភិវឌ្ឍ និងការគ្រប់គ្រងប្រព័ន្ធសោតទស្សន៍ ប្រកបដោយជោគជ័យ គឺជាកិច្ចការដ៏មានសារ-សំខាន់សម្រាប់ការអភិវឌ្ឍប្រទេសកម្ពុជាទាំងមូល ដែលការណ៍នេះ មិនត្រឹមតែអាចជួយជំរុញវិស័យសេដ្ឋកិច្ចឱ្យមានភាពរីកចម្រើន តាមរយៈការបង្កើនភាពប្រកួតប្រជែង ដែលទ្រទ្រង់ដោយប្រព័ន្ធប     ច្ចេកវិទ្យាទំនើប និងការធ្វើពិពិធកម្មសេដ្ឋកិច្ចតែប៉ុណ្ណោះទេ ថែមទាំងអាចជួយលើកកម្ពស់យន្តការនៃការគ្រប់គ្រងទិន្នន័យ និងប្រព័ន្ធឃោសនាការក្នុងប្រទេស ក្នុងន័យធានាបាននូវសន្តិសុខជាតិ និងសុវត្ថិភាពសង្គម-សេដ្ឋកិច្ចប្រកបដោយប្រសិទ្ធភាពខ្ពស់៕

ដោយៈ រ៉ាណេត

ភ្នំពេញៈ រហូតមកដល់ដំណាច់ឆ្នាំ២០២០នេះ អាជីវកម្មនៅក្នុងវិស័យទេសចរណ៍ផ្នែកសេវាស្នាក់នៅរួមមានសណ្ឋាគារ និងផ្ទះសំណាក់តូចធំចំនួន១១៨ទីតាំង បានបន្តទទួលរងនូវផលប៉ះពាល់ដោយសារបញ្ហានៃវិបត្តិជំងឺកូវីដ១៩។

សម្ដេចតេជោហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍នៅក្នុងឱកាសថ្លែងសារផ្ញើជូនជនរួមជាតិកម្ពុជា ពាក់ព័ន្ធទៅនឹងការបិទបញ្ចប់ព្រឹត្តិការណ៍សហគមន៍២៨វិច្ឆិកា នៅព្រឹកថ្ងៃទី២៩ ខែធ្នូ ឆ្នាំ២០២០នេះថា ដោយសារតែបញ្ហានៃវិបត្តិជំងឺកូដជាសាកល រហូតមកដល់ពេលនេះសម្រាប់តែផ្នែកសណ្ឋាគារ និងផ្ទះសំណាក់ សរុបចំនួន១១៨ទីតាំងនៅបន្តព្យួរ ដែលប៉ះពាល់ដល់បុគ្គលិកសរុបប្រមាណ៩៤០៣នាក់។

សម្ដេចតេជោបានបញ្ជាក់ថា “ការផ្អាកអាជីវកម្មខាងលើនេះ បានប៉ះពាល់ដល់បុគ្គលិករហូតដល់៩៤០៣នាក់ ដូចដែលបានលើកឡើងខាងលើនេះ រាជរដ្ឋាភិបាលនៅបន្តជួយឧបត្ថម្ភថវិកាចំនួន៣ខែទៀត”។សម្តេចបន្តថា “សម្រាប់អ្នកដែលបាត់បង់ការងារនឹងទទួលបានថវិកា ពីរាជរដ្ឋាភិបាលកម្ពុជាចំនួន៤០ដុល្លារក្នុងម្នាក់ ដូចគ្នាទៅនឹងកម្មកររោងចក្រ សហគ្រាសដែលបាត់បង់ការងារដូចគ្នា ដោយចាប់អនុវត្តចាប់ពីខែមករា រហូតដល់ខែមីនា ឆ្នាំ២០២១”។

ជាមួយគ្នានេះ សម្ដេចក៏បានលើកឡើងផងដែរថា ទឹកប្រាក់ចំណាយរបស់រដ្ឋាភិបាលសម្រាប់ជួយដល់នយោជិក ដែលបាត់បង់ការងារក្នុងវិស័យខាងលើនេះ មានទំហំប្រមាណ២០,២០ពាន់លានដុល្លារ។

ដោយឡែកសម្រាប់កម្មករ និយោជិត ដែលបាត់បង់ការងារដោយសាររោងចក្រដែលបានព្យួរចំនួន៤៤ទីតាំង ស្មើនឹងចំនួន១៤៥៧៨នាក់ ក៏នឹងទទួលបានការឧបត្ថម្ភសាច់ប្រាក់រយៈពេល៣ខែទៀតដូចគ្នា ដោយរាជរដ្ឋាភិបាលត្រូវផ្តល់៤០ដុល្លារក្នុងម្នាក់ សម្រាប់អ្នកដែលបាត់បង់ការងារ ហើយម្ចាស់រោងចក្រសហគ្រាសចំនួន៣០ដុល្លារ ដែលសរុបកម្មករម្នាក់ត្រូវទទួលបាន៧០ដុល្លារក្នុងម្នាក់៕

ដោយស៊ីវ ម៉េង

        ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា ដំណក់ប្រេងដំបូងរបស់កម្ពជា ជាពរជ័យជូនចំពោះប្រជាជាតិកម្ពុជា ដែលលុយដែលបានមក នឹងប្រើប្រាស់ក្នុងវិស័យអាទិភាព២ គឺអប់រំ និងសុខាភិបាល។

សម្តេចតេជោបានមានប្រសាសន៍ ក្នុងការថ្លែងសារពិសេស ពីភូមិគ្រឹះសម្តេចនាព្រឹកថ្ងៃទី២៩ ធ្នូនេះថា ប្រកាសដំណឹងល្អរបស់កម្ពុជា ថ្ងៃនេះដំណក់ប្រេងលើកដំបូងរបស់ខ្មែរ ដែលត្រូវបានចាប់ផ្តើមហើយ។

សម្ដេចតេជោបានថ្លែងថា “បើគ្មានសន្តិភាព គឺគ្មានទេនូវអ្វីៗដូចសព្វថ្ងៃនេះរួមទាំងដំណក់ប្រេងលើកដំបូងផងដែរ”។ សម្តេចបន្ថែមថា “តំបន់ប្រេងនៅក្នុងសមុទ្ររបស់កម្ពុជា មិនមានការត្រួតស៊ីគ្នាជាមួយថៃទេ”។

ជាមួយគ្នានឹងដំណឹងដ៏វិសេសវិសាលនាថ្ងៃនេះ សម្ដេចតេជោ ហ៊ុន សែន ប្រកាសបន្តឧបត្ថម្ភដល់កម្មករនិយោជិត ដែលបាត់បង់ការងារធ្វើអំឡុងពេលកូវីដ១៩ រយៈពេល៣ខែទៀត ដោយរដ្ឋាភិបាលជួយ៣០ដុល្លារ ហើយថៅកែរោងចក្រចេញ៣០ដុល្លារក្នុងម្នាក់ៗក្នុង១ខែៗ

សម្តេចបានបន្តថា រាជរដ្ឋាភិបាលបានទទួលថវិការ លុយដុល្លារ៥៣ ៦៧៩ ៧១៤ដុល្លារ និងប្រាក់រៀល ៩ ៩៣៥ ៤៨៨ ៥០០រៀល ពីសប្បុរសជន ដើម្បីទិញវ៉ាក់សាំងប្រឆាំងកូវីដ១៩ ក្នុងនោះមានទាំងថវិកាប្រទានពីព្រះមហាក្សត្រ។

សម្តេចតេជោ ហ៊ុន សែន អំពាវនាវឱ្យរួមគ្នាទប់ស្កាត់ការឆ្លងជាសហគមន៍ជាថ្មីម្តងទៀត ក្រោយបិទបញ្ចប់ព្រឹត្តិការណ៍សហគមន៍២៨វិច្ឆិកា៕

ដោយគង់ សូរិយា

        ភ្នំពេញៈ ជាមួយនឹងការកោតសរសើរជាថ្មីដល់ក្រសួង ស្ថាប័នពាក់ព័ន្ឋសម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា កាលមុនកម្ពុជាចាប់លេខ១នៅអាស៊ី និងលេខ៣ នៅលើពិភពលោក ក្នុងការទប់ស្កាត់កូវីដ១៩ ប៉ុន្តែពេលនេះកម្ពុជាជាប់លេខ១លើពិភពលោក ក្នុងការទប់ស្កាត់កូវីដ១៩។

ជាមួយគ្នានេះសម្តេចតេជោបានកោតសរសើរ ដល់ក្រសួងសុខាភិបាល ក្រសួងការពារជាតិ កងយោធពលខេមរភូមិន្ទ ដែលបានផ្តល់រថយន្ត ដល់ការដឹកជញ្ជូនពលករ ដើម្បីធ្វើចត្តាឡីស័ក។

សម្តេចតេជោ ហ៊ុន សែន ថ្លែងថា ឆ្លងកាត់ព្រឹត្តិការណ៍សហគមន៍២៨វិច្ឆិកា យើងបានកំពុងប្រយុទ្ធនឹងសមរភូមិ៣ រួមមានទី១ គឺការនាំចូល ទី២ គឺការឆ្លងក្នុងសហគមន៍ដែលទើបនឹងឆ្លងកាលពីថ្ងៃទី២៨វិច្ឆិកា និង ទី៣ គឺការព្យាបាលឱ្យជាសះស្បើយ។

សម្តេចតេជោបានថ្លែងថា “មនុស្សមួយចំនួនបានដៀមដាមឱ្យយើងថា ពេទ្យខ្មែរពូកែណាស់ ហេតុអ្វីក៏ទៅរកពេទ្យបរទេស តែគេត្រូវដឹងថាខ្មែរព្យាបាលអ្នកជំងឺកូវីដ ៣៦០នាក់ហើយជាសះស្បើយ ដែលភាគច្រើនជាជនបរទេស”។

សម្តេចតេជោ ហ៊ុន សែន ថ្លែងថា យើងមិនរារាំងជនបរទេស ឬជនជាតិអង់គ្លេសចូលមកកម្ពុជាទេ ប៉ុន្តែយើងត្រូវគ្រប់គ្រងការធ្វើចត្តាឡីស័កឱ្យបានត្រឹមត្រូវ។ សម្តេចតេជោ ហ៊ុន សែន រិះគន់អ្នកនយោបាយដែលនិយាយថា «នាំកូវីដ១៩មកចម្លងដល់គណបក្សប្រជាជនកម្ពុជាឱ្យងាប់ទាំងអស់» តែពួកគេកុំភ្លេចថា នៅកម្ពុជាមិនមែនមានតែគណបក្សប្រជាជនទេ គឺគណបក្សផ្សេងៗ និងសាច់ញាតិរបស់គេដែរ។

សម្តេចតេជោហ៊ុន សែនបានថ្លែងរំលឹកថា ទោះជាទទួលបានចំណាត់ថ្នាក់ល្អ ប៉ុន្តែយើងមិនត្រូវត្រេកអរទេ ដោយសារតែបញ្ហាកូវីដ១៩ នៅលើពិភពលោកមិនទាន់បិទបញ្ច​ប់ទេ៕

ដោយៈសុខុម

ម៉ានីល:  ប្រធានាធិបតីហ្វីលីពីន លោកRodrigo Duterte កាលពីថ្ងៃច័ន្ទ ទី២៨ធ្នូ បានចុះហត្ថលេខាលើកញ្ចប់ថវិកាជាតិចំនួន៤,៥ទ្រីលានប៉េសូ (៩៣,៧ ពាន់លានដុល្លារអាមេរិក) សម្រាប់ឆ្នាំក្រោយ ដែលជាកញ្ចប់ថវិកាជាតិធំបំផុត មិនធ្លាប់មានរបស់ប្រទេសនេះ ដើម្បីស្ដារសេដ្ឋកិច្ចឱ្យងើបឡើងវិញ និងដើម្បីទិញវ៉ាក់សាំងកូវីដ-១៩ ជាច្រើនលានដូស។

ការអនុម័តកញ្ចប់ថវិកាជាតិ ដែលច្រើនជាងឆ្នាំ២០២០ ចំនួន១ភាគ១០នេះ ដើ​ម្បី​ស្វះស្វែងស្ដារសេដ្ឋកិច្ច ដែលធ្លាប់ស្ថិតក្នុងចំណោមប្រទេស មានសេដ្ឋកិច្ចរីកលូតលាស់លឿនបំផុតនៅអាស៊ីមួយនេះ ឱ្យទទួលបានកំណើនឡើងវិញ និងដើម្បីជួយទប់ការឆ្លងរាតត្បាតវីរុសកូវីដ-១៩។

ក្រោយពីចុះហត្ថលេខារួច លោកឌូទើតេបានថ្លែងថា “ឆ្នាំថ្មីដ៏ខ្លីខាងមុខនេះ សេដ្ឋកិច្ចរបស់យើងនឹងងើបឡើងវិញទូទាំងប្រទេស”។

ក្នុងចំណោមថវិកាដ៏ច្រើននេះ វិស័យអប់រំនឹងទទួលបាន៧៥២ពាន់លានប៉េសូ ផ្នែកកិច្ចការសាធារណៈ នឹងទទួលបាន៦៩៦ពាន់លានប៉េសូ ក្រសួងសុខាភិបាលនឹងទទួលបាន២១០ពាន់លានប៉េសូ។ ចំណែកឯក្រសួងការពារជាតិទទួលបាន២០៦ពាន់លានប៉េសូ។

កញ្ចប់ថវិកានេះក៏រួមបញ្ចូលចំនួន៧២,៥ ពាន់លានប៉េសូសម្រាប់ទិញ ស្តុកទុក និងចែកចាយវ៉ាក់សាំងកូវីដ-១៩ ផងដែរ ស្របតាមការសន្យារបស់លោកឌូទើតេថា នឹងចាក់វ៉ាក់សាំងដល់ប្រជាពលរដ្ឋហ្វីលីពីនទាំង១០៨ លាននាក់ដោយចាប់ផ្ដើមពីខែឧសភា ឆ្នាំ២០២១។

ដោយមានអ្នកឆ្លងកូវីដ-១៩ ប្រមាណ៤៧០.០០០ ករណី និងស្លាប់ជាង៩.០០០ ករណី ប្រទេសហ្វីលីពីន បានក្លាយជាប្រទេសដែលមានអ្នកឆ្លង និងស្លាប់ដោយសារកូវីដ-១៩ ខ្ពស់បំផុតទី២នៅអាស៊ីអាគ្នេយ៍ បន្ទាប់ពីប្រទេសឥណ្ឌូនេស៊ី។

ទោះបីជាមានការរឹតបន្តឹងខ្លាំង នៅក្នុងក្រុងម៉ានីល ចាប់តាំងពីពាក់កណ្ដាលខែមីនាយ៉ាងណាក្ដី ក៏ក្នុងមួយថ្ងៃៗនៅតែការរាយការណ៍ អំពីករណីឆ្លងថ្មីប្រមាណ១.០០០ ករណីជាប្រចាំ។

សេដ្ឋកិច្ចរបស់ហ្វីលីពីន ត្រូវបានកំណត់គោលដៅឱ្យទទួលបានកំណើនពី៦,៥% ទៅ ៧,៥% ក្នុងឆ្នាំ២០២១ និងពី៨% ទៅ១០% ក្នុងឆ្នាំ២០២២៕