ដោយ​វុត្ថា

ប្ររទេស​ជប៉ុនៈ ក្រុមហ៊ុន​ភាគហ៊ុន​ឯកជន​ដ៏​ធំ​មួយ របស់​សហរដ្ឋអាមេរិក Blackstone Group បានសម្រេច​ចំណាយ​ទុន​ប្រមាណ១១០ពាន់​លាន​យ៉េន​ដែល​ស្មើ១,០៥ពាន់​លាន​ដុល្លា​អាមេរិក ដើម្បី​ទិញ​អចលនទ្រព្យ​នៅក្នុង​ទីក្រុង​ធំ ៗរបស់​ប្រទេស​ជប៉ុន ។

សារព័ត៌មាន Nikei បាន​ចុះផ្សាយ​កាលពី​ថ្ងៃទី៣ ខែធ្នូ ថា ការទិញ​អ​ច​ចលនទ្រព្យ នៅក្នុង​ប្រទេស​ជប៉ុន​នេះ​រំពឹងថា នឹងមាន​តម្រូវ​ការជួល​រយៈពេល​វែង​នាពេល​ខាងមុខនេះ ខណៈ​ក្រុមហ៊ុន​របស់​មកពី​តំបន់​អាស៊ី បាន​ទិញ​អចលនទ្រព្យ​នៅក្នុង​ប្រទេស​ជប៉ុន​ចំនួន៨ ដែល​ភាគច្រើន​ត្រូវបាន​ទិញ អចលនទ្រព្យ​ដោយ​ក្រុមហ៊ុន General Electric។

សារព័ត៌មាន​ដដែល​បន្តថា លំហូរ​ទុនវិនិយោគ​បរទេស កំពុង​ជំរុញ​ការទិញ​លក់​អចលនទ្រព្យ​របស់​ជប៉ុន បន្ទាប់ពី​ការធ្លាក់ចុះ​យ៉ាងខ្លាំង ក្នុងពេល​មាន​ជំងឺ​រាតត្បាត​កូ​វីដ ១៩ ។ ក្រុមហ៊ុន Blackstone គឺជា​ក្រុមហ៊ុន​តែមួយគត់ ត្រូវបាន​គេ​ដឹងថា​នឹង​បោះទុន ក្នុង​ទំហំ​ទឹកប្រាក់​ចំនួន៦០០ ពាន់​លាន​យ៉េន​នៅក្នុង​វិស័យ​អចលនទ្រព្យ​របស់​ជប៉ុន​នៅ​ឆ្នាំនេះ។

ក្រុមហ៊ុន Blackstoneនេះ បាននិងកំពុង​ធ្វើឱ្យ​វិស័យ​អចលនទ្រព្យ​កាន់​តែមាន​ផលចំណេញ​នៅក្នុង​ប្រទេស​ជប៉ុន តាមរយៈ​ការជួសជុល និង​បង្កើន​តម្លៃ​មុនពេល​លក់​ទៅឱ្យ​វិនិយោគិន​ផ្សេងទៀត ក្នុង​រយៈពេល​វែង​ទៅឱ្យ​ក្រុមហ៊ុន​ធានារ៉ាប់រង ឬ​អ្នក​ដែលមាន​ធនធាន​ខ្ពស់។

វិនិយោគិន​បរទេស​បាន​ទិញ​អចលនទ្រព្យ នៅក្នុង​ប្រទេស​ជប៉ុន​កើនឡើង​ប្រមាណ៤០% នៃ​កិច្ចព្រមព្រៀង នៅក្នុង​រយៈពេល៣ត្រីមាស​ដំបូង​នៃ​ឆ្នាំ២០២០នេះ ។ បើ​យោងតាម​ក្រុមហ៊ុន​សេវាកម្ម អចលនទ្រព្យ​របស់​ប្រទេស​ជប៉ុន Jones Lang LaSalle  បាន​បញ្ជាក់ថា ការសម្រេចបាន​ក្នុង​ទំហំ​នេះ ដោយសារ​មាន​ផលប៉ះពាល់​តិចតួច នៃ​ជំងឺ​រាតត្បាត​នៅក្នុង​ប្រទេស​ជប៉ុន បើ​ប្រៀបធៀប​ជាមួយ​ប្រទេស​នៅក្នុង​តំបន់​អ៊ឺរ៉ុប និង​សហរដ្ឋអាមេរិក​ប។

ក្រុមហ៊ុន Blackstone បាន​បង្កើន​ការវិនិយោគ​នៅក្នុង​ប្រទេស​ជប៉ុន​ដោយ​ផ្តោតលើ​វិស័យ​ភ័ស្តុភារ ដឹកជញ្ជូន និង​អចលនទ្រព្យ​សម្រាប់​ការរស់នៅ។ កាលពី​ខែ​មុន​ក្រុមហ៊ុន​នវ បានសម្រេច​ចិត្ត​ទិញ​អាជីវកម្ម​អា​ផាត​មិន​ជួល​របស់​ប្រតិបត្តិ​ក​របស់​ក្រុម​ហ៊ុ Isetan Mitsukoshi Holdings ក្នុង​កិច្ចព្រមព្រៀង​ដែលរ​មានតម្លៃ​ជិត ២៩០ លាន​ដុល្លារ​អាមេរិក៕

ដោយគង់ សូរិយា

          ភ្នំពេញៈ តំបន់ជ្រោយចង្វារបាន និងកំពុងក្លាយជាតំបន់ដែលមានការរីកចម្រើនលឿន ដោយសារការវិនិយោគកើនឡើង ពីសំណាក់អ្នកវិនិយោគក្នុងស្រុក និងអន្តរជាតិ។

ហេតុផលជាច្រើន ដែលអ្នកវិនិយោគជាតិ អន្តរជាតិបាននិងកំពុងជ្រើសរើសតំបន់នេះ សំរាប់សាងសង់ខុនដូគឺមានច្រើនចំណុចដូចជា ទី១ មានទន្លេអមសងខាង ដែលផ្តល់បរិយាកាសរស់នៅ ប្រកបដោយផាសុខ​ភាព ទី២ មានទេសភាពស្រស់ស្អាត ដែលអាចគយគន់ដងទន្លេបានយ៉ាងស្រស់ស្រាយ ទី៣ ជាតំបន់ដែលមានការតភ្ជាប់ហេដ្ឋារចនាសម្ព័ន្ឋបានយ៉ាងល្អប្រសើរ និងទី៤ កត្តាហុង ស៊ុយ ដែលអ្នកមានជំនឿលើផ្នែកនេះ តែងតែគិតដល់ ព្រោះហុងស៊ុយគឺពាក់ព័ន្ឋដល់ជីវិត និងគុណភាពជីវិត។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសសន៍ឲ្យដឹងតាមទូរស័ព្ទ កាលពីរសៀលថ្ងៃទី៣ ធ្នូនេះថា តំបន់ជ្រោយចង្វារប្រៀបបីដូចជាមេដែកឆក់មួយ ដែលបាននិងកំពុងជំរុញឲ្យតម្លៃដីធ្លីនៅតំបន់នេះកើនឡើង ពិសេសគំរោងខុនដូមិនក្រោម២០គំរោងនោះទេ ដែលបានបញ្ចប់ និងកំពុងដំណើរកាេេសាងសង់នៅតំបន់នេះ។

លោកបន្តថា “វាជាតំបន់ស៊ីវិល័យមួយនាពេលអនាគត វាក៏នឹងជាតំប​ន់សំរាប់lifestyle មួយសំរាប់អនាគតផងដែរ ព្រោះបច្ចុប្បន្នគំរោងជាច្រើនបាននិងកំពុងផ្តល់នូវការរស់នៅកាន់តែសម្បូរបែបនៅតំបន់នេះ”។លោកបន្តថា “ផ្សារទំនើប Sky barនៅលើអាគារធំៗបាន និងកំពុងស្រូបយកការចាប់អារម្មណ៍ពីអ្នកមានជីវភាពធូរធារចូលទៅកាន់តំបន់នេះ”។

លោកយិន លាងគង់បានបន្តថា បរិយាកាសរស់នៅល្អប្រសើរ អាចស្រូបយកខ្សយល់អាកាសបរិសុទ្ឋ អាចគយគន់ទេសភាពពេលរាត្រី ក៏ដូចជា ពេលព្រះអាទិត្យរះនាព្រឹកព្រលឹម សុទ្ឋតែជាបំណងប្រាថ្នារបស់មនុស្សគ្រប់រូប ប៉ុន្តែលទ្ឋភាពទទួលបាននូវការរស់នៅប្រកបដោយស៊ីវិល័យ និងភាពថ្លៃថ្នូរជារឿងមួយទៀត។

យោងតាមការសិក្សារបស់ក្រុមហ៊ុនUrban Living Solutions បានឲ្យដឹងថា ទីក្រុង​ភ្នំពេញ នឹងមានមនុស្សរស់នៅដល់៤,៥ ទៅ៥លាននាក់ នៅឆ្នាំ២០៣០ខាងមុខ ដែលធ្វើឲ្យប្រជាជនកម្ពុជា សម្រេចចិត្តរស់នៅតាមខុនដូកាន់តែច្រើន ដោយសារកត្តាមួយចំនូនដូចជា ទី១ កំនើនតម្លៃអចលនទ្រព្យនៅក្នុងទីក្រុង ទី២ កម្រិតការកកស្ទះចរាចរណ៍កើនឡើង ទី៣ គុណភាពជីវិតកាន់តែល្អប្រសើរ ដោយសារការរីកចម្រើននៃបច្ចេកវិទ្យា និងទី៤ ការរស់នៅខុនដូមានភាពងាយស្រួល ដែលផ្តល់នូវកញ្ចប់សេវាស្ទើរទាំងស្រុងនៃតម្រូវការប្រចាំថ្ងៃរបស់ពួកគេ៕

ដោយ ៖ រ៉ាណេត

កំពង់ស្ពឺ ៖ រហូតមកដល់ពេលនេះ គម្រោងអភិវឌ្ឍន៍ និងបង្កើតសួនឧស្សាហកម្មតំបន់សេដ្ឋកិច្ចពិសេសនៅផ្លូវ៤៤ ខេត្តកំពង់ស្ពឺ កំពុងតែជំរុញការសាងសង់រោងចក្រយ៉ាងសកម្ម ខណៈដែលបច្ចុប្បន្នមានរោងចក្រចំនួន៤ត្រូវបានសាងសង់រួចរាល់ និងត្រៀមដំណើរការទាំងអស់។

អភិបាលខេត្តកំពង់ស្ពឺ លោក វ៉ី សំណាង បានមានប្រសាសន៍នៅព្រឹកថ្ងៃទី៣ ខែធ្នូ ឆ្នាំ២០២០នេះថា ត្បិតថាបច្ចុប្បន្នវិបត្តិកូវីដកំពុងបន្តការគំរាមកំហែង ប៉ុន្តែសម្រាប់ការសាងសង់ និងអភិវឌ្ឍន៍របស់សួនឧស្សាហកម្ម ឬតំបន់សេដ្ឋកិច្ចពិសេសនៅផ្លូវ៤៤ ស្រុកឱរ៉ាល់ មិនបានផ្អាកនោះទេ។

លោកអភិបាលបានបញ្ជាក់ថា “តាមខ្ញុំដឹងរហូតមកដល់ពេលនេះ មានរោងចក្រប្រមាណ៤ ឬ៥ ដែលបានបញ្ចប់ការសាងសង់រួចហើយ ហើយខាងក្រុមហ៊ុនគេនៅតែបន្តសាងសង់រោងចក្រថ្មីៗបន្ថែមទៀត ហើយនឹងត្រៀមដំណើរការទាំងអស់នៅពេលឆាប់ៗខាងមុខនេះ”។

លោកបានបន្តថា “វាជាការពិត នៅពេលដែលមានគម្រោងអភិវឌ្ឍន៍ ឬសាងសង់ជាតំបន់ឧស្សាហកម្ម ឬតំបន់សេដ្ឋកិច្ចពិសេស វានឹងជំរុញឱ្យមានតម្រូវការប្រើប្រាស់ដី ដែលប្រែក្លាយពីដីទំនេរ ដីស្រែ ដីព្រៃ ទៅជាទីតាំងគោលដៅសាងសង់សំណង់ផ្សេងៗ ដែលវាមានទាំងរោងចក្រ សហគ្រាស តំបន់សម្រាប់កម្មករស្នាក់នៅជាដើម ហើយទាំងអស់នឹងវានឹងជំរុញឱ្យតម្លៃដីទាំងក្នុងតំបន់អភិវឌ្ឍន៍ និងតំបន់ក្បែរខាងឡើងថ្លៃ វាជារឿងធម្មតា”។

បច្ចុប្បន្ននេះ ដោយសារតែភាពអំណោយផលនៃកត្តាភូមិសាស្ត្រ ដែលបង្កភាពងាយស្រួលក្នុងការដាក់ទីតាំងរោងចក្រ ជាពិសេសងាយស្រួលក្នុងការដឹកជញ្ជូន ខេត្តកំពង់ស្ពឺបានទាក់ទាញគម្រោងវិនិយោគរាប់រយគម្រោង ជាពិសេសស្ថិតនៅតាមតំបន់ផ្លូវជាតិលេខ៤ ផ្លូវលេខ៥១ ផ្លូវ៤១ និងផ្លូវ៤៤ ដែលកំពុងមានសកម្មភាពអភិវឌ្ឍន៍ និងសាងសង់សំណង់រោងចក្រជាច្រើន។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបញ្ជាក់ថា ផ្លូវជាតិលេខ ៤៤ កំពុងបង្ហាញភាពទាក់ទាញ ដល់រោងចក្រឧស្សាហកម្មជាច្រើន ដែលនឹងផ្តល់ផលប្រយោជន៍ដល់វិស័យនាពេលអនាគត។

លោកបន្តថា “ផ្លូវជាតិលេខ៤៤ នឹងក្លាយទៅជាតំបន់ឧស្សាហកម្មដ៏មមាញឹកនៅពេលអនាគត ដូច្នេះពេលក្លាយទៅជាតំបន់ឧស្សាហកម្ម វានឹងក្លាយកន្លែងបណ្តុំរោងចក្រ ហើយវិស័យអចលនទ្រព្យទទួលបានរីកម្រើន ដែលគាំទ្រដោយវិស័យឧស្សាហកម្ម” ។
លោកបន្តទៀតថា “តំបន់នេះ ពិសេសនៅប៉ែកខាងជើង ផ្លូវលេខ៤៤ នៅខាងស្តាំភាគច្រើនទទួលបានផលចំពេញពីការវិនិយោគ។ ដោយឡែកផ្លូវលេខ៤៤ ដែលភ្ជាប់ទៅឱរ៉ាល់ ផ្លូវ៥១ទៅកំពង់ឆ្នាំង និងពោធិ៍សាត់ គឺជាទីតាំងភូមិសាស្ត្រវិនិយោគ ដែលអ្នកជំនាញអចលនទ្រព្យមើលឃើញ ហើយតាមការវិភាគរបស់ខ្ញុំ ផ្លូវ៤៤ និងផ្លូវ៥១ នឹងរីកចម្រើននាពេលអនាគត”៕

ដោយៈ រ៉ាណេត

ត្បូងឃ្មុំៈ ជាមួយទីតាំងមានសក្តានុពល ដែលអាចប្រកបអាជីវកម្មបាន បានធ្វើឲ្យបុរីKrek City ទទួលបានការបញ្ជាទិញឆាប់រហ័ស ក្នុងពេលបើកលក់សាកល្បងក្នុងដំណាក់ដំបូង គម្រោងបុរីលំនៅដ្ឋានទាន់សម័យ Krek City ស្ថិតនៅក្នុងស្រុកពញាក្រែក ខេត្តត្បូងឃ្មុំសម្រេចបានជាង២០ភាគរយ។

បុរី ក្រែក ស៊ីធី ហ្គាឌិន (Borey Krek City Garden) គឺជាគម្រោងអភិវឌ្ឍន៍លំនៅដ្ឋានដ៏ធំជាងគេនៅក្នុងខេត្ត ជាពិសេសនៅក្នុងស្រុកពញាក្រែក លើផ្ទៃដីទំហំជាង១៦ហិកតា ស្មើនឹងប្រមាណ ៧០០ខ្នង ដោយមានការបែងចែកជាប្រភេទ ផ្ទះអាជីវកម្ម (ប្រភេទ២ជាន់ និង៣ជាន់) វីឡាទោល រួមជាមួយនឹងការអភិវឌ្ឍផ្សារសហគមន៍ បែបទំនើបដែលមានរហូតដល់ប្រមាណ៤០០ស្ដង់។

លោកបណ្ឌិត តេង រិទ្ធី ដែលជាម្ចាស់គម្រោងអភិវឌ្ឍន៍មួយនេះ បានមានប្រសា​សន៍ប្រាប់ភ្នាក់ងារគេហទំព័រ Propertyarea.asia នៅព្រឹកថ្ងៃទី៣ ខែធ្នូ ឆ្នាំ២០២០ នេះថា ទើបតែរយៈពេលមួយសប្ដាហ៍ នៃការបើកលក់សាកល្បងរបស់គម្រោង ទទួលបានការកក់ជាង២០ភាគរយនៃគម្រោងសរុប ដែលក្នុងនោះមានទាំងអតិថិជន ដែលទិញសម្រាប់ស្នាក់នៅផ្ទាល់ និងក្រុមហ៊ុនដែលជាភ្នាក់ងារជាដៃគូផងដែរ។

លោកបានបញ្ជាក់ថា “តាមគម្រោងយើងចង់បើកសម្ពោធការលក់ជាផ្លូវការ ប៉ុន្តែដោយសារតែព្រឹត្តិការណ៍ ភាពប្រឈមនឹងជំងឺឆ្លង ចេះតែកើតមានជាបន្តបន្ទាប់ ដូច្នេះក៏ ពន្យាពេលតាមការណែនាំរបស់ប្រមុខរាជរដ្ឋាភិបាលកម្ពុជា”។ លោកបន្តថា“ប៉ុន្តែទោះជាយ៉ាងណា គម្រោងមួយនេះគឺមានការគាំទ្រច្រើន ហើយសកម្មភាពនៃការសាងសង់ក៏ត្រូវបានចាប់ផ្តើមទៅតាមផែនការ”។

លោកបណ្ឌិតតេង រិទ្ធី បានមានប្រសាសន៍ថា សម្រាប់អតិថិជនដែលចង់ក្លាយខ្លួនជាម្ចាស់លំនៅដ្ឋាននៅក្នុងបុរី Krek City គឺមានភាពងាយស្រួល ដោយគ្រាន់តែធ្វើការកក់ចាប់ពី១០ភាគរយឡើងទៅតែប៉ុណ្ណោះ ក្រោយពេលសម្ពោធលក់ជាផ្លូវការ ប៉ុន្តែអ្វីដែលកាន់តែពិសេសជាងនេះ គឺសម្រាប់ការបើកលក់ក្នុងជំហានដំបូងនៅពេលនេះ គឺត្រូវកក់ត្រឹមតែ៥០០ដុល្លារ ក៏អាចក្លាយជាម្ចាស់លំនៅដ្ឋាន ក្នុងគម្រោងអភិវឌ្ឍន៍បុរីមួយនេះបានដែរ។

គម្រោងនេះស្ថិតនៅលើផ្លូវជាតិលខ៧ ដែលជាផ្លូវសេដ្ឋកិច្ចដ៏សំខាន់ គម្រោងសាងសង់បុរីលំនៅដ្ឋានបែបទាន់សម័យ និងធំជាងគេប្រចាំខេត្តត្បូងឃ្មុំ បុរី ក្រែក ស៊ីធី ហ្គាឌិន (Krek City Garden) នឹងជួយកែប្រែសោភ័ណភាព និងសេដ្ឋកិច្ចនៅក្នុងតំបន់ឱ្យកាន់តែមានភាពល្អប្រសើរ ស្ថិតនៅភូមិ ហួចលិច ឃុំក្រែក ស្រុក ពញាក្រែក ខេត្តត្បូងឃ្មុំ។

សម្រាប់ប្រភេទលំនៅដ្ឋានអាជីវកម្មដែលមានកម្ពស់២ជាន់ ត្រូវបានដាក់លក់ក្នុងតម្លៃចាប៣៨,០០០ដុល្លារឡើងទៅ ហើយប្រភេទផ្ទះអាជីវកម្ម៣ជាន់ មានតម្លៃចាប់ពីជាង៧ម៉ឺនដុល្លារឡើងទៅ។ ដោយឡែកប្រភេទផ្ទះវីឡាទោល ត្រូវបានដាក់លក់ត្រឹមតម្លៃជាង៥ម៉ឺនដុល្លារឡើងទៅតែប៉ុណ្ណោះ ដោយគ្រប់ប្រភេទលំនៅដ្ឋាន និងវីឡាសុទ្ធតែត្រូវបានសាងសង់ឡើងស្របតាមកម្រិតស្ដងដារ ទាំងទំហំផ្ទះ និងទំហំដីផងដែរ។

សម្រាប់ព័ត៌មានពាក់ព័ន្ធនឹងគម្រោង លោកអ្នកអាចទាក់ទងបានតាមរយៈទូរស័ព្ទលេខ ៖ ០៩៧ ៧០ ៥៤ ៨៨៨ / ០៩៧ ៧១ ៥៤ ៨៨៨៕

ដោយគង់ សូរិយា

        ភ្នំពេញៈ អ្នកវិនិយោគដដីធ្លីតែងតែមានឳកាសចំណេញ ប្រសិនជាជ្រើសរើសទីតតាំងបានល្អ និងតម្លៃសមរម្យ ពិសេសកំឡុងពេលសេដ្ឋកិច្ចកើនឡើងល្អប្រសើរ។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ឲ្យ​ដឹងនាព្រឹកថ្ងៃទី៣ ធ្នូនេះថា ប្រសិនជាអ្នកវិនិយោគដីធ្លី ដែលងាយស្រួលក់ចេញនិងងាយស្រួករកអ្នកទិញ លោក អ្នកគួរសិក្សាពីតម្លៃ និងលទ្ឋភាពរបស់ប្រជាជនកម្ពុជាភាគច្រើន ព្រោះប្រជាជនកម្ពុជាភាគច្រើនជាអ្នកមានចំណូលមធ្យម ហេតុនេះលទ្ឋភាពរបស់ពួកគេក៏មានកម្រិតផងដែរ។

លោកបន្តថា “បើលោក អ្នកមានលទ្ឋភាពទិញដីវិនិយោគតម្លៃត្រឹម៥ ទៅ១០ម៉ឺនដុល្លារ លោក អ្នកគួរទិញដីក្នុងតម្លៃចន្លោះពី១០ទៅ៣០ដុល្លាររក្នុងមួយម៉ែត្រការ៉េ ព្រោះដដីមានតម្លៃប៉ុណ្ណឹងងាយឡើងថ្លៃ ប្រសិនជាមានទីតាំងល្អ ពិសេសជាយក្រុងភ្នំពេញ”។​លោកបន្តថា “បើអ្នកមានលទ្ឋភាព២០ទៅ៣០ម៉ឺនដុល្លារ លោក អ្នកក៏គួរវិនិយោគដីមិនលើស១០០ដុល្លាររក្នុងមួយម៉ែត្រការ៉េដែរ ព្រោះដីមានតម្លៃប៉ុណ្ណឹងឡើង អាចពិបាករកអ្នកទិញ”។

លោកយិន លាងគង់បានបន្តថា យ៉ាងណាក៏ដោយដីមានតម្លៃថ្លៃ មិនមែនមិនមានផលចំណេញនោះទេ វាក៏មានផលចំណេញដែរ វាអាស្រ័យលើទីតាំងដែលមានភាពល្អប្រសើរឬអត់? ប៉ុន្តែការពិតលទ្ឋភាពរបស់ប្រជាជនកម្ពុជា ដែលមានប្រាក់ទិញដីតម្លៃចាប់ពី១០០ដុល្លារ ទៅ៥០០ដុល្លារ ឬ២០០០ដុល្លារ ទៅ៩០០០ដុល្លារក្នុងមួយម៉ែត្រការ៉េនៅមានកម្រិតនៅឡើយ។

លោកបន្តថា “ហេតុនេះការវិនិយោគលើដីធ្លី ដែលមានតម្លៃចន្លោះ៥ទៅ៣០ដុល្លារក្នុងមួយម៉ែត្រការ៉េ គឺជាតម្លៃសមរម្យ ដែលអ្នកមានជីវភាពមធ្យមអាចមានលទ្ឋភាពទិញបាន ហើយអ្នកមានលទ្ឋភាព ឬជីវភាពមធម្យមមានចំនួនច្រើនលើសលុបនៅកម្ពុជា៕