ទីផ្សារដីធ្លីនៅតំបន់ផ្លូវក្រវ៉ាត់ក្រុងសៀមរាបឡើងខ្ពស់ហួសការរំពឹងទុក

ដោយ ៖ រ៉ាណេត

សៀមរាប ៖ ខុសពីការរំពឹងរបស់បណ្តាអ្នកវិនិយោគមួយចំនួនចំពោះទីផ្សារដីធ្លីដែលស្ថិតនៅតំបន់ផ្លូវក្រវាត់ក្រុងខេត្តសៀមរាប ដោយតម្លៃមានការកើនឡើងខ្ពស់ហួសការរំពឹងទុករហូតដល់៣ដង ឬលើសពីនេះអាស្រ័យទៅតាមទីតាំងដែលមានគម្រោងអភិវឌ្ឍន៍ធំៗរបស់រាជរដ្ឋាភិបាល និងវិស័យឯកជន។

នាយិការក្រុមហ៊ុនអភិវឌ្ឍន៍ដីឡូតិ៍ និងអចលនទ្រព្យបន្ទាយស្រី លោកស្រីជិន លក្ខិណា បានមានប្រសាសន៍ប្រាប់ឱ្យដឹងនៅព្រឹកថ្ងៃទី១៨ ខែមករា ឆ្នាំ២០២១នេះថា តម្លៃទីផ្សារដីធ្លីនៅក្នុងខេត្តសៀមរាបនៅពេលបច្ចុប្បន្នមានការប្រែប្រួលមិនដូចគ្នាទេ ពោលគឺមានតំបន់ខ្លះនៅទ្រឹង តំបន់ខ្លះកើនឡើងខ្ពស់ហួសការរំពឹងទុក។

លោកស្រីបញ្ជាក់ថា “នៅក្នុងខេត្តសៀមរាបមានគម្រោងអភិវឌ្ឍន៍ធំៗជាច្រើន ហើយទីផ្សារអចលនទ្រព្យដែលស្ថិតនៅក្បែរគម្រោងទាំងនោះមានការកើនឡើងខ្ពស់ ជាពិសេសនៅក្បែរតំបន់អភិវឌ្ឍន៍ព្រលានយន្ដហោះអន្តរជាតិសៀមរាបថ្មីស្ថិតនៅស្រុកសូទ្រនិគម និងគម្រោងអភិវឌ្ឍន៍ហេដ្ឋារចនាសម្ព័ន្ធដែលបម្រើដល់វិស័យទេសចរណ៍ និងពាណិជ្ជកម្មស្ថិតនៅក្នុងស្រុកបន្ទាយស្រី”។

លោកស្រីបន្តថា “សន្ទុះនៃការកើនឡើងតម្លៃអចលនទ្រព្យមិនដូចគ្នាទេ ដូចជានៅក្នុងក្រុងសៀមរាបតម្លៃហាក់នៅទ្រឹងបើទោះជាមានគម្រោងអភិវឌ្ឍន៍ហេដ្ឋារចនាសម្ព័ន្ធថ្មីៗក៏ដោយ ប៉ុន្តែតម្លៃអចលនទ្រព្យដែលកើនឡើងជាពិសេសផ្នែកដីធ្លីគឺស្ថិតនៅតំបន់អភិវឌ្ឍន៍គម្រោងព្រលានយន្ដហោះអន្តរជាតិសៀមរាបថ្មី និងតំបន់ផ្លូវក្រវាត់ក្រុង។ សម្រាប់ដីនៅតំបន់ក្រវាត់ក្រុងផ្លូវហាយវេស្ថិតនៅក្នុងស្រុកបន្ទាយស្រីមានការកើនឡើង៣-៤ដង ឬលើសពីនេះបើប្រៀបធៀបទៅនឹងឆ្នាំកន្លងទៅ ពោលគឺមានឡើងពីតម្លៃ២ដុល្លាររហូតដល់១០ដុល្លារក្នុងមួយម៉ែត្រការ៉េ ដោយតម្លៃនេះគិតត្រឹមតែប្រភេទដីដែលត្រូវបានគេរៀបចំអភិវឌ្ឍន៍ជាគម្រោងដីឡូតិ៍តែប៉ុណ្ណោះ ប៉ុន្តែសម្រាប់តម្លៃដីគម្រោងអភិវឌ្ឍន៍លំនៅដ្ឋានគឺមានតម្លៃខ្ពស់ជាងនេះ”។

លោកស្រីបញ្ជាក់ថា “ចំពោះទីតាំងដែលស្ថិតនៅក្បែរគម្រោងអភិវឌ្ឍន៍ព្រលានយន្តហោះអន្តរជាតិថ្មីភាគច្រើនមិនសូវមានគម្រោងដីឡូតិ៍នោះទេ ប៉ុន្តែមានគម្រោអភិវឌ្ឍន៍ជាប្រភេទផ្ទះល្វែងដែលត្រូវបានដាក់លក់ក្នុងតម្លៃសមរម្យជាប់ពីជាង២ម៉ឺនដុល្លារឡើងទៅ ឬខ្ពស់ជាងនេះអាស្រ័យទៅតាមប្រភេទសំណង់ និងទីតាំងដែលមានសក្ដានុពល។ ដោយឡែកសម្រាប់ដីធ្លីនៅក្នុងស្រុកប្រាសាទបាគងគឺមិនសូវមានការទិញលក់នោះទេ ព្រោះភាគច្រើនស្ថិតនៅក្នុងដែនសមត្ថកិច្ចគ្រប់គ្រងដោយអាជ្ញាធរអប្សរា”។

លោកទៀ សីហា អភិបាលខេត្តសៀមរាបបានមានប្រសាសន៍ថា រដ្ឋាភិបាលបានយកចិត្តទុកខ្ពស់ក្នុងការអភិវឌ្ឍននៅទូទាំងខេត្តសៀមរាប ជាពិសេសនៅក្នុងក្រុង តាមរយៈការស្ដារ និងអភិវឌ្ឍហេដ្ឋារចនាសម្ព័ន្ធសំខាន់ទាំង៣៨ខ្សែ រួមជាមួយនឹងគម្រោងផ្សេងៗទៀតជាច្រើនដើម្បីបង្កើនភាពទាក់ទាញក្នុងវិស័យទេសចរណ៍ ក៏ដូចជាការវិនិយោគ និងពាណិជ្ជកម្ម។

លោកបន្តថា “ទន្ទឹមនឹងនេះ ខេត្តសៀមរាបក៏កំពុងតែមមាញឹកក្នុងការសាងសង់ហេដ្ឋារចនាសម្ព័ន្ធផ្លូវថ្នល់ចំនួន៣៨ខ្សែ និងកែលម្អមាត់ស្ទឹងសៀមរាប ក្នុងក្រុងសៀមរាប ហើយនៅពេលហេដ្ឋារចនាសម្ព័ន្ធទាំងនេះស្ថាបនារួចរាល់ និងជួយលើកកម្ពស់សោភ័ណភាពក្រុងសៀមរាប ក៏ដូចជាខេត្តសៀមរាប ពិសេសបានរួមចំណែកយ៉ាងខ្លាំងដល់សក្តានុពលទេសចរណ៍ និងអាជីវកម្ម ការវិនិយោគក្នុងខេត្តសៀមរាបឱ្យកាន់តែល្អប្រសើរថែមទៀត សម្រាប់ភ្ញៀវទេសចរ និងបងប្អូនប្រជាពលរដ្ឋ ដែលកំពុងរស់នៅក្នុងខេត្តសៀមរាបទាំងមូល”៕

ការដ្ឋានសំណង់ជាង១ពាន់ការដ្ឋានផ្អាកដំណើរការនៅខេត្តព្រះសីហនុក្នុងឆ្នាំ២០២០

        ដោយៈលក្ខិណា

ព្រះសីហនុៈ នៅក្នុងស្ថានភាពដែលកម្ពុជា និងពិភពលោកជួបវិបត្តិដោយសារតែកូវីដ១៩ វិស័យជាច្រើនរួមទាំងវិស័យសំណង់ក្នុងខេត្តព្រះសីហនុ ប្រមាណ១ពាន់ការដ្ឋានបានផ្អាកដំណើរការសាងសង់ក្នុងឆ្នាំ២០២០។

យោងតាមគេហទំព័រមួយប្រចាំខេត្តព្រះសីហនុ បានដកស្រង់សម្ដី លោកឃាង ភារម្យអ្នកនាំពាក្យសាលាខេត្តព្រះសីហនុឱ្យដឹងថា ខេត្តព្រះសីហនុក៏បានរងផលប៉ះពាល់ពីជំងឺកូវីដ១៩ដែរ ក្នុងឆ្នាំ២០២០ ដោយមានសំណង់ ដែលវិនិយោគដោយបរទេសជាង១ពាន់កន្លែងបានផ្អាកដំណើរការ តែសំណង់ប្រមាណ៩០កន្លែង ដែលជាការវិនិយោគរបស់ជនជាតិខ្មែរ គឺនៅដំណើរការធម្មតា ។

លោកបន្តថា “ក្នុងខេត្តព្រះសីហនុ មានផលប៉ះពាល់ខ្លាំងមែនទែន  ដោយភាគច្រើនប៉ះពាល់ជាមួយនឹងវិនិយោគិនបរទេស ដែលក្នុងនោះចិនច្រើនជាងគេ”។លោកបន្តថា “ប៉ុន្តែនៅពេលស្ថានភាពជំងងឺកូវីដ១៩ អាចគ្រប់គ្រងបាននៅទូទាំងពិភពលោក ដែល​ប្រជាពលរដ្ឋ ភ្ញៀវទេសចរណ៍អាចធ្វើដំណើរឡើងវិញ ខ្ញុំជឿថាសេដ្ឋកិច្ចខេត្តព្រះសីហនុនឹងមានភាពល្អប្រសើរឡើងវិញ”។

លោកឃាង ភារម្យបានបន្តថា ក្នុងបរិបទជំងឺកូវីដ១៩ វាជាវិបត្តិសកល ដែលមិនមែនមានតែកម្ពុជានោះទេ ហើយវិបត្តិនេះបានជះឥទ្ធិពលច្រើនលើគ្រប់វិស័យ។ ជាក់ស្ដែង ដូចជា វិស័យសំណង់ ក្នុងខេត្តព្រះសីហនុវិញ ឃើញថាក្នុងឆ្នាំ២០២០ សកម្មភាពនៃការសាងសង់ គឺមានការថយចុះ ដោយសំណង់ដែលបានសាងសង់ទាំងអស់មានចំនួន១,៥១៤ទីតាំង ក្នុងនោះមានសំណង់តែ៨៩ទីតាំងប៉ុណ្ណោះ កំពុងដំណើរការសាងសង់ ហើយក្រៅពីនេះ គឺមានការផ្អាកការសាងសង់ទាំងអស់ ។

លោកបញ្ជាក់ផងដែរថា រយៈពេល៤ឆ្នាំចុងក្រោមនេះ គិតចាប់ពីឆ្នាំ២០១៧ ដល់ខែធ្នូ ឆ្នាំ២០២០ ខេត្តព្រះសីហនុ មានសំណង់សរុបបានអនុញ្ញាតឱ្យសាងសង់ មានចំនួន១,៥១៤អគារ មានក្រឡាផ្ទៃសរុប១៤.៧៣៦.៥៥៩ម៉ែត្រការ៉េ និងទុនវិនិយោគសរុបជាង៨ពាន់លានដុល្លារអាមេរិក។

លោកប៉ូ អ៊ាវគង់ប្រធានក្រុមហ៊ុនអចលនទ្រព្យ Advance បានឱ្យដឹងផងដែរថា នៅក្នុងខេត្តព្រះសីហនុ វិស័យអចលនទ្រព្យហាក់មានកំនើនលឿនពេក កាលពីមុនប៉ុន្មានឆ្នាំមុន ដែលធ្វើឱ្យតម្លៃអចលនទ្រព្យនៅក្នុងខេត្តនេះ មានតម្លៃខ្ពស់ធៀបនឹងខេត្តផ្សេងទៀត ដោយភាគច្រើនអ្នកវិនិយោគគឺជាជនជាតិចិន។

លោកបន្តថា នៅពេលពិភពលោកជួបវិបត្តិនៃជំងឺកូវីដ១៩ ធ្វើឱ្យបរទេសមិនអាចចេញចូលប្រទេសដោយសេរី ដើម្បីស្វែងរកការវិនិយោគ ដូច្នេះទើបចំនួនជនបរទេសក៏ដូចជាវិនិយោគិនបរទេសចូលមកកម្ពុជា បានធ្លាក់ចុះបន្តបន្ទាប់ចាប់តាំងពីដើមឆ្នាំ២០២០មក៕

គម្រោងទីក្រុងពាណិជ្ជកម្មភ្នំតូចដ៏ធំកំពុងរីកចំរើនលឿនបំផុត

ដោយបញ្ញា

ភ្នំពេញៈ គម្រោងទីក្រុងពាណិជ្ជកម្មភ្នំតូច ដែលមានទំហំរហូតទៅដល់១០០ហិក​តា កំពុងអភិវឌ្ឍលឿនបំផុត ដែលធ្វើឱ្យគម្រោងទីក្រុងដ៏ធំមួយនេះ កាន់តែមានភាពទំនើបស៊ីវីល័យ និងមានកំណើនសេដ្ឋកិច្ចកាន់តែលឿនរហ័ស ថែមទាំងទាក់ទាញអតិថិជន​និងអ្នកវិនិយោគកាន់តែខ្លាំងទៀតផង។

​ក្រុមហ៊ុនខេអេចលែន បានអោយដឹងនាព្រឹកថ្ងៃទី១៨ មករានេះថា រហូតមកដល់ពេលនេះ គម្រោងទីក្រុងពាណិជ្ជកម្មភ្នំតូច កំពុងអភិវឌ្ឍជាច្រើនឥតឈប់ឈរ ដោយសម្រេចបានដូចជា ​​ដីឡូតិ៍ចំនួន៦០០០ឡូតិ៍ ការសាងសង់អគារហាងកាហ្វេ និងផាប់ ខណៈដែលកំពុងមានការបុកគ្រិះ ដំឡើងសសរផ្ទះអាជីវកម្ម និងរៀបចំដីរួចរាល់សម្រាប់ការសាងសង់ផ្ទះវីឡា។

គម្រោងទីក្រុងពាណិជ្ជកម្មភ្នំតូច មានការអភិវឌ្ឍដូចជា ​ដីឡូតិ៍ ផ្ទះអាជីវកម្ម វីឡាទោល ​មជ្ឍមណ្ឌលពាណិជ្ជកម្មទាំង១០ប្រភេទ រួមមាន ហាងកាហ្វេអារ៉ាប៊ីធា ផាប់ភូមិយើង ហាងលក់គ្រឿងអេឡិចត្រូនិក ហាងលក់ទូរស័ព្ទ ​ម៉ាត សាឡន ​ហាងលក់សម្លៀកបំពាក់ ហាងនំ ហាងស៊ុប និងហាងអាហារ ព្រមទាំងមាន ផ្សារធំទូលាយ ​និងទីធ្លារសម្រាប់រៀបចំកម្មវិធីនិងពិព័រណ៍ពាណិជ្ជកម្ម រួមជាមួយនិងហេដ្ឋារចនាសម្ព័ន្ធជាច្រើន ដូចជា ប្រព័ន្ធផ្លូវបេតុង ប្រព័ន្ធលូ ប្រព័ន្ធទឹកភ្លើងជាដើម។

ក្រុមហ៊ុនខេអេចលែន បានបញ្ជាក់ថា​ ការអភិវឌ្ឍទាំងអស់នេះ នឹងសម្រេចបានដូចផែនការកំណត់ ដែលធ្វើឱ្យ​អតិថិជន ទទួលបានទំនុកចិត្តខ្ពស់និងជឿងជាក់ទៅលើគម្រោ​ងនេះ រួមជាមួយនឹងការទទួលបានឱកាសចំណេញយ៉ាងច្រើនសន្ធឹកសន្ធាប់។

គម្រោងទីក្រុងពាណិជ្ជកម្មភ្នំតូចដ៏ប្រណិតនេះ ​មានទីតាំងស្ថិតនៅជិតផ្លូវក្រវាត់ក្រុង៥១ ជិតផ្លូវល្បឿនលឿនភ្នំពេញ-ព្រះសីហនុ និងជិតសួនឧស្សាកម្មកាណាឌីយ៉ាទំហំ៥០០ហិកតានិងមានកម្មការរាប់ម៉ឺននាក់ ដែល​តំបន់នេះ កំពុងមានការអភិវឌ្ឍដូចជា ​ផែស្ងួត​ រោងចក្រ សហគ្រាសធំៗ ឃ្លាំងផ្ទុកទំនិញនានា ក៏ដូចជាគម្រោងអភិវឌ្ឍលំនៅដ្ឋានជាដើម។ ដូចនេះ ក្នុងពេលអនាគតដ៏ខ្លី គម្រោងទីក្រុងពាណិជ្ជកម្មភ្នំតូច នឹងក្លាយជាតំបន់ដ៏មានសក្ដានុពលបំផុត ក្នុងការរស់នៅការប្រកបអាជីវកម្ម និងការវិនិយោគផ្សេងៗជាច្រើនទៀត៕

អ្នកជំនាញៈក្រុងភ្នំពេញនឹងបន្តរីកខ្លួនបន្ថែមទៀតដើម្បីឆ្លើយតបនឹងកំណើនប្រជាសាស្ត្រ និងតម្រូវការទីផ្សារ

ដោយៈ ប៊ី

ភ្នំពេញៈ អ្នកជំនាញបានអះអាងថា កំណើនសេដ្ឋកិច្ច កំណើនប្រជាសាស្ត្រ និងតម្រូវការទីផ្សារ នឹងធ្វើឱ្យទំហំទីក្រុងបន្តរីកកាន់តែធំបន្ថែមទៀត ខណៈទីក្រុងភ្នំពេញគឺជាបណ្តុំនៃសេដ្ឋកិច្ច ហើយជាចំណុចកណ្តាលមួយ ដែលទាក់ទាញការវិនិយោគ និងការធ្វើពាណិជ្ជកម្មខ្លាំងជាងគេនៅកម្ពុជា។

លោកសាស្ត្រាចារ្យទួស សាភឿនអគ្គលេខាធិការរងនៃគណៈស្ថាបត្យករកម្ពុជាបា​នថ្លែងប្រាប់Propertyarea.asia កាលពីសប្តាហ៍មុនថា ភ្នំពេញគឺជាបណ្តុំនៃសេដ្ឋកិច្ច ហើយជាចំណុចកណ្តាលមួយ ដែលមានការវិនិយោគ ការរស់នៅ និងការធ្វើពាណិជ្ជកម្មច្រើន ដូច្នេះនឹងមានតម្រូវការទីផ្សារខ្ពស់។

លោកបានថ្លែងថា “យើងគិតថា ទីក្រុងភ្នំពេញមានទំហំធំ ប៉ុន្តែសម្រាប់ខ្ញុំគិតថា វាមិនធំនោះទេ។ ពីមួយថ្ងៃទៅមួយថ្ងៃ ឥទ្ធិពលនៃទីក្រុងភ្នំពេញ បានរីកសាយទៅតំបន់ជិតខាង ដែលនឹងធ្វើឱ្យទីក្រុងភ្នំពេញ ត្រូវការពង្រីកខ្លួនបន្ថែម ដើម្បីឆ្លើយតបនឹងតម្រូវការទាំងអស់ទាំងនេះ”។

លោកលើកបែបនេះ សំដៅកាន់តម្រូវការទីផ្សារ កំណើនប្រជាជន និងកំណើនសេដ្ឋកិច្ច។

លោកបានថ្លែងទៀតថា ក្នុងរយៈពេលចុងក្រោយនេះ ការសាងសង់អាគារខ្ពស់ៗ បានកើតឡើងច្រើន ហើយទោះបីជាមានវិបត្តិកូវីដ១៩ ការសាងសង់អាគារខ្ពស់ៗ នៅតែកើតឡើង ប៉ុន្តែមិនច្រើនដូចមុនសម័យកូវីដនោះទេ។

អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជា លោកបណ្ឌិត ហុង វណ្ណៈ បានមានប្រសាសន៍ផងដែរថា សម្រាប់ផែនការនៃការបង្កើតខណ្ឌថ្មី បានផ្តល់ផលប្រយោជន៍សំខាន់ៗជាច្រើន ដែលក្នុងនោះរួមមានការពង្រីករដ្ឋបាលសាធារណៈ វិស័យសេដ្ឋកិច្ចនៅក្នុងតំបន់ ក៏ដូចជាវិស័យទេសចរណ៍ផងដែរ។

លោកបានបន្តទៀតថា “តំបន់ដែលស្ថិតនៅក្នុងគម្រោងអភិវឌ្ឍន៍ របស់រដ្ឋាភិបាល​នេះ ជាតំបន់ដែលមានសក្ដានុពលខ្លាំង ដែលអាចបម្រើនូវផលប្រយោជន៍ជាច្រើន”។ លោកបន្តថា “ក្រោយពេលមានស្ពានឆ្លងកាត់ ខណ្ឌថ្មីនេះនឹងមានសកម្មភាពលើវិស័យផ្សេងៗជាច្រើន ជាពិសេសបម្រើដល់វិស័យដឹកជញ្ជូនទាំងផ្លូវគោក និងផ្លូវទឹកផងដែរ”។

លោកបន្តទៀតថា នៅពេលមានការអភិវឌ្ឍ នឹងទាក់ទាញមនុស្សឱ្យចូលទៅរស់នៅកាន់តែច្រើន ដែលអាចនឹងអភិវឌ្ឍន៍ទៅជាទីក្រុងរណបថ្មីៗទៀត ស្របទៅនឹងគោលដៅរបស់រដ្ឋាភិបាល៕

រដ្ឋាភិបាលសម្រេចអនុម័តលើគម្រោងចំនួន៣ ដែលមានទុនវិនិយោគសរុបជិត៩លានដុល្លារ

ដោយ ៖ រ៉ាណេត

ភ្នំពេញ៖នៅដើមឆ្នាំ២០២១ដែលកម្ពុជាកំពុងត្រៀមអនុវត្តនូវកិច្ចព្រមព្រៀងពាណិជ្ជកម្មសេរីជាមួយប្រទេសមហាអំណាចសេដ្ឋកិច្ចចិន ក្រុមហ៊ុនថ្មីចំនួន៣ទៀតត្រូវបានរដ្ឋាភិបាលសម្រេចគាំទ្រ និងអនុម័តឱ្យដាក់ទីតាំងផលិតកម្ម និងដំណើរប្រតិបត្តិការនៅក្នុងខេត្តក្រុងចំនួន៣ផ្សេងគ្នាដោយមានទុនវិនិយោគសរុបជិត៩លានដុល្លារ បង្កើតឱកាសការងារបានជិត១៣០០កន្លែង។

តបតាមសំណើសុំវិនិយោគលើគម្រោង៣ចំនួនក្នុងវិស័យឧស្សាហកម្មដោយការបង្កើតរោងចក្រស្ថិតនៅក្នុងខេត្តក្រុងចំនួន៣ផ្សេងគ្នា កាលពីសប្ដាហ៍កន្លងទៅនេះ រដ្ឋាភិបាលតាមរយៈគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចគាំទ្រ និងសម្រេចចេញវិញ្ញាបនបត្រចុះបញ្ជីជាស្ថាពរជូនដល់ក្រុមហ៊ុនដូចខាងក្រោម ៖

ទី១- គម្រោងបង្កើតរោងចក្រផលិតកាបូបគ្រប់ប្រភេទរបស់ក្រុមហ៊ុន CHANGHUI (CAMBODIA) HANDBAG MFR. CO., LTD មានទីតាំងវិនិយោគស្ថិតនៅផ្លូវជាតិលេខ៥ ភូមិស្ពានពោធិ៍ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មានទុនវិនិយោគប្រមាណ២,៤លានដុល្លារអាមេរិក និងអាចបង្កើតការងារបានចំនួន៧១៨កន្លែង។

ទី២- គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន JIAN YUAN TONG GARMENT CO., LTD មានទីតាំងវិនិយោគស្ថិតនៅអគារ D12 សួនឧស្សាហកម្មកាណាឌីយ៉ា ផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ២,៤លានដុល្លារអាមេរិក និងអាចបង្កើតការងារបានចំនួន៣៦៤កន្លែង។

 

ទី៣- គម្រោងបង្កើតរោងចក្រផលិតធុងទឹកកករបស់ក្រុមហ៊ុន POLYMER PLASTIC PRODUCTS (CAMBODIA) CO., LTD មានទីតាំងវិនិយោគស្ថិតនៅភូមិជើងអក ឃុំលំហាច ស្រុកអង្គស្នួល ខេត្តកណ្តាល មានទុនវិនិយោគប្រមាណ៣,៩លានដុល្លារអាមេរិក និងអាចបង្កើតការងារបានចំនួន២០០កន្លែង៕

សភាពាណិជ្ជកម្មកម្ពុជា ៖ កម្ពុជានឹងក្លាយជាមជ្ឈមណ្ឌលបែងចែកទំនិញរបស់មហាអំណាចចិននៅតំបន់អាស៊ាន

ដោយ ៖ រ៉ាណេត

ភ្នំពេញ ៖ ក្រោមការអនុវត្តនូវកិច្ចព្រមព្រៀងពាណិជ្ជកម្មសេរីរវាងកម្ពុជា-ចិននៅត្រឹមឆ្នាំ២០២១នេះ ក្រៅពីអាចមានលទ្ធភាពក្នុងការនាំទំនិញចេញទៅកាន់ទីផ្សារដ៏ទូលាយរបស់ប្រទេសចិនដែលមានប្រជាជនជាង១៤០០លាននាក់នោះ កម្ពុជាក៏នឹងក្លាយទៅជាមជ្ឈមណ្ឌលចែកចាយបន្តនូវទំនិញរបស់មហាអំណាចចិនទៅកាន់ទីផ្សារក្នុងតំបន់អាស៊ាន។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានប្រសាសន៍ប្រាប់គេហទំព័រ www.propertyarea.asia នៅព្រឹកថ្ងៃទី១៨ ខែមករា ឆ្នាំ២០២១នេះថាស្ថិតក្រោមការអនុវត្តនវកិច្ចព្រមព្រៀងពាណិជ្ជកម្មរវាងកម្ពុជា-ចិន កម្ពុជាមិនមានការខាតបង់ដូចទស្សនៈមួយចំនួនតូចដែលបានលើកឡើងនោះទេ ផ្ទុយទៅវិញ កម្ពុជានឹងទទួលបានផលប្រយោជន៍យ៉ាងច្រើនពីប្រទេសមហាអំណាចសេដ្ខកិច្ចមួយនេះ។

លោកឧកញ៉ាបន្តថា “មានការព្រួយបារម្ភថា តាមរយៈកិច្ចព្រមព្រៀងមួយនេះ ចិននឹងនាំយកទំនិញមកកាន់ទីផ្សារកម្ពុជាកាន់តែច្រើនដែលអាចជះឥទ្ធិពលដល់ផលិតផលក្នុងស្រុកនោះហាក់មិនសមហេតុផលនោះទេ។ បច្ចុប្បន្ន ទំនិញចិនបានចូលមកកាន់ទីផ្សារកម្ពុជារួចទៅហើយ ក្រៅពីនេះក៏មានទំនិញមកពីបណ្តាប្រទេសនានានៅលើពិភពលោកដែរដូចជាទំនិញរបស់ថៃ កូរ៉េ វៀតណាម បារាំង អ៊ីតាលី និងបណ្តាប្រទេសជាច្រើនទៀតនៅប៉ែកអឺរ៉ុប ដូច្នេះនៅពេលដែលមានទំនិញកាន់តែច្រើនការប្រកួតប្រជែងនឹងកើតមាន”។

លោកបន្តថា “បើប្រៀបធៀបទីផ្សារកម្ពុជាជាមួយចិន និងអាស៊ាន គឺមានទំហំតូចណាស់ ដូច្នេះការនាំទំនិញរួចពន្ធពីប្រទេសចិនមកកាន់កម្ពុជាវាមិនមានបញ្ហាដែលអាចប៉ះពាល់ដល់សេដ្ឋកិច្ចកម្ពុជានោះទេ ផ្ទុយទៅវិញ កម្ពុជាត្រូវមានឱកាសក្នុងការពង្រីកទំហំសេដ្ឋកិច្ចជាតិតាមរយៈការបង្កើនលទ្ធភាពក្នុងការផលិតដើម្បីនាំចេញទៅកាន់ទីផ្សារប្រទេសចិន ហើយតាមរយៈឱកាសមួយនេះកម្ពុជាក៏អាចទាក់ទាញកំណើននៃចំនួនវិនិយោគថ្មីបន្ថែមពីបណ្តាប្រទេសនានាដោយសារតែការនាំទំនិញចេញពីប្រទេសកម្ពុជាទៅទីផ្សារដ៏ធំជាង១៤០០លាននាក់មិនជាប់ពន្ធ”។

លោកឧកញ៉ាលឹម ហេង ក៏បានលើកឡើងផងដែរថា ក្រៅពីផលប្រយោជន៍ខាងលើនេះ កម្ពុជាក៏អាចនឹងក្លាយជាមជ្ឈមណ្ឌលចែកចាយទំនិញរួចពន្ធរបស់ប្រទេសចិនទៅកាន់ទីផ្សារអាស៊ានដែលមានជាង៦០០លាននាក់ផងដែរ ដែលវាជាការបង្កើននូវចំណូលផ្ទៃក្នុងរបស់កម្ពុជា ព្រោះនៅពេលដែលមានការនាំចូលទំនិញច្រើនប្រភេទវានឹងទាមទារឱ្យមានតម្រូវការទីតាំងផ្ទុកទំនិញ មានតម្រូវការកម្លាំងពលកម្ម រួមជាមួយនឹងសេវានៃការដឹកជញ្ជូនផងដែរ ដែលទាំងអស់នេះសុទ្ធតែជាការបង្កើនចំណូលដល់សេដ្ឋកិច្ចជាតិទាំងអស់តាមរយៈការបង់ពន្ធផ្ទៃក្នុង៕

ហេតុអ្វី​រដ្ឋាភិបាល​អនុ​វត្ត​នីតិវិធី នៃ​ការវាស់វែង​ដី​ផ្ទេរសិទ្ធិ កាន់កាប់​អចលនទ្រព្យ ដែល​មិនទាន់​ចុះបញ្ជី?

ដោយ វល័ក្ខ

ភ្នំពេញ៖ បច្ចុប្បន្ន​ទីផ្សារ​ដីធ្លី មាន​សកម្ម​ភាពកើនឡើង​គួរ​ឲ្យ​កត់សម្គាល់ នៅក្នុង​ភូមិសាស្ត្រ​នានា​នៅ​ទូទាំងប្រទេស​កម្ពុជា ។ ការទិញ-លក់​ដី​ទាំងនោះ ភាគច្រើន​ធ្វើឡើង តាមរយៈ​លិខិត​ផ្ទេរសិទ្ធិ​កាន់កាប់​ដីធ្លី ដែល​មិនទាន់​ចុះបញ្ជី (ប្លង់​ទន់) វាស់វែង​ដោយ​គណៈកម្មការក្រុង-ស្រុក និង​មានភ្ជាប់​គំនូស​បង្ហាញ​ទីតាំង ដែល​បញ្ជាក់​ទទួលស្គាល់ ដោយ​រដ្ឋបាល​សុរិយោដី ដើម្បី​យកទៅ​បង់ពន្ធ​ប្រថាប់ត្រា។

យោង​លើ​ប្រការនេះ បានធ្វើឱ្យ​រដ្ឋាភិបាល​អ​នុ​វត្ត​ចំពោះ​ការអនុវត្ត​នីតិវិធី នៃ​ការវាស់វែង​ដី​ផ្ទេរសិទ្ធិ កាន់កាប់​អចលនទ្រព្យ ដែល​មិនទាន់​ចុះបញ្ជី (ប្លង់​ទន់) ដើម្បី​ចៀសវាង​បញ្ហា​វិវាទផ្សេងៗ ក្នុង​ការទិញ​លក់។

និតិ​វិធី​ដែល​រដ្ឋាភិបាល​ត្រូវអនុវត្ត​មាន​ដូចខាងក្រោម៖

ទី១៖ រាល់​ការស្នើសុំ​ផ្ទេរសិទ្ធិ ដីធ្លី​ដែល​មិនទាន់​ចុះបញ្ជី ត្រូវអនុវត្ត​នីតិវិធី​ដូច​ការស្នើសុំ​ចុះបញ្ជី​ដីធ្លី​មាន​លក្ខណៈ ដាច់​ដោយ​ដុំ​ដែរ ដោយ​ត្រូវធ្វើ​ការជូនដំណឹង​ស្តីពី​ការវាស់វែង​ដល់​អ្នកស្នើសុំ និង​អ្នក​ជាប់​ព្រំ​ឲ្យ​មក​ចូលរួម និង​ត្រូវធ្វើ​ការបិទ​ផ្សាយ​ជា​សាធារណៈ​យ៉ាងតិច ៧ថ្ងៃ។

ក្រោយពេល​ធ្វើការ​វាស់វែង ប្រមូល​ទិន្នន័យ​រួច ត្រូវ​ចេញ​លិខិត​ជូនដំណឹង នៃ​ការបិទ​ផ្សាយ​ទិន្ន័យ​ដែល​ប្រមូលបាន បិទ​ផ្សាយ​ជា​សាធារណៈ​នៅ​សាលាឃុំ-សង្កាត់ និង​នៅ​ការិយាល័យ​រៀបចំ​ដែនដី នគរូបនីយកម្ម សំណង់ និង​ភូមិបាល ក្រុង-ស្រុក រយៈពេល ១៥ថ្ងៃ ទៀត ដើម្បី​ឲ្យ​ស្របតាម​អនុក្រឹត្យ១២១ អនក្រ.បក ចុះ​ថ្ងៃទី០៩ ខែមិថុនា ឆ្នាំ២០១៦ ស្តីពី ការចុះបញ្ជី​ដី​មាន​លក្ខណៈ​ដាច់​ដោយ​ដុំ។

ទី២៖ ទម្រង់​ពាក្យ​ស្នើ សុំ​ផ្ទេរសិទ្ធិ​កាន់កាប់ ដីធ្លី​ដែល​មិនទាន់​ចុះបញ្ជី អនុវត្ត​គំរូ​ទម្រង់​លិខិត ដូច​ពាក្យស្នើសុំ​ចុះបញ្ជី​ដីធ្លី​មាន​លក្ខណៈ​ដាច់​ដោយ​ដុំ៕

ដីធ្លី​នៅក្នុង​តំបន់​អរិយ​ក្សត្រ​នៅតែមាន​តម្រូវការ​ខ្ពស់ ខណៈ​គម្រោង​សាងសង់​ស្ពាន​ឆ្លងកាត់​ទន្លេ​មិនទាន់​ចេញ​រូ​បរាង្គ

ដោយ៖ រ៉ា​ណេ​ត

ភ្នំពេញ៖ បើទោះបី​គម្រោង​សាងសង់​ស្ពាន​ឆ្ពោះទៅកាន់​តំបន់​អរិយ​ក្សត្រ​មិនទាន់​ចេញ​ជា​រូបរាង​ង្គ​ក៏ដោយ  ក៏​បច្ចុប្បន្ន​ដីធ្លី​នៅក្នុង​នៅ​ក្នុ​តំបន់​នេះ​នៅតែមាន​តម្រូវការ​ខ្ពស់​ពី​ក្រុម​អ្នក​អភិវឌ្ឍន៍​លំនៅឋាន បុរី និង​ឈ្មួញ​អចលនទ្រព្យផ្សេងៗជាច្រើន។

លោកស្រី​តាំង ហួរ នាយិកា​ក្រុមហ៊ុន​អចលនទ្រព្យ Amatak Property Service បានឱ្យដឹងថា តំបន់​អរិយ​ក្សត្រ​នាពេល​បច្ចុប្បន្ននេះ មាន​អ្នក​អភិវឌ្ឍន៍ និង​ឈ្មួញ​ដីធ្លី​ជាច្រើន​បាន​សម្រុក​ទៅកាន់​តំបន់​នេះ​ដើម្បី​ស្វែងរក​ទិញ​ដីធ្លី​សម្រាប់​អភិវឌ្ឍ និង​ទុក​លក់​យកចំណេញ ខណៈ​តម្លៃ​ដីធ្លី​នៅ​តំបន់​នេះ​មាន​ស្ថានភាព​ធូ​ថ្លៃ។

លោកស្រី​តាំង ហួរ​បន្តថា “ភាគច្រើន​ដែល​អ្នកស្វែងរក​ទិញ​ដី​នៅ​តំបន់​នេះ គឺ​សម្រាប់ធ្វើ​ការអភិវឌ្ឍន៍​បុរី និង​លំនៅឋាន និង​មួយចំនួនទៀត គេ​ទិញ​ទុក​លក់​យកចំណេញ ដោយសារ​គម្រោង​ស្ពាន​ឆ្លងកាត់​ទន្លេ និង​ផ្លូវ​ក្រវ៉ាត់​ក្រុង​បុក​ចូលទៅ​កាន់​តំបន់​នេះ​ដែលជា​ហេតុ​ធ្វើឱ្យមាន​ការទាក់ទាញ​កាន់តែខ្លាំង​លើ​ការវិនិយោគ​ដីធ្លី និង​ម្យ៉ាង​តំបន់​នេះ នៅ​ជិត​ក្រុងភ្នំពេញ” ។

លោកស្រី​បន្ថែមថា “សម្រាប់​ដីធ្លី​នៅ​តប​ន់​នេះ លែងមានទំហំៗហើយ មានតែតូចៗ ព្រោះ​គេ​ដើរ​ប្រមូល​ទិញ​អស់ហើយ  តែ​សម្រាប់​តម្លៃ​វិញ​គឺ​ទៅតាម​ទីតាំង និង​កន្លែង​ដែលមាន​សក្តានុពល និង ជាប់​គម្រោង តែ​យ៉ាង​បច្ចុប្បន្ននេះ មាន​ប្រជាជន​រស់នៅ​ច្រើន​នៅក្នុង​តំបន់​នេះ” ។

លោក​ឧកញ៉ា នួន រិទ្ធី អគ្គនាយក​ក្រុមហ៊ុន​អចលនទ្រព្យ Khmer Foundation Appraisal  បានឱ្យដឹង​ដែរ​ថា ដែនដី​អរិយ​ក្សត្រ​ដែល​ស្ថិតនៅ​ភាគ​ខាងកើត​នៃ​រាជធានី​ភ្នំពេញ គឺមាន​ភាពល្អប្រសើ​រដែ​ល​ទៅ​ថ្ងៃ​អនាគត​ខាងមុខនេះ អាច​ក្លាយទៅជា​ទីក្រុង​រណប​ថ្មី​មួយទៀត ។

លោក​ឧកញ៉ា បន្តថា បច្ចុប្បន្ន​មាន​ក្រុមហ៊ុន​អភិវឌ្ឍន៍​លំនៅឋាន កម្រិត​មធ្យម​មួយចំនួន​កំពុងតែ​ធ្វើក​សកម្មភាព​សាងសង់ នូវ​គម្រោង​របស់ខ្លួន​ដែល​សកម្មភាព​ទាំងអស់នេះ បាន​ជំរុញឱ្យមាន​តម្រូវការ​ប្រើប្រាស់​ដីធ្លី និង​តម្លៃ​កើន​ឡើងជា​បន្តបន្ទាប់ ជាពិសេស​នៅ​តំបន់​ទីប្រជុំជន។

លោក​បញ្ជាក់ថា ” អ្វី​ជា​ឧបសគ្គ​សម្រាប់​តំបន់​អរិយ​ក្សត្រ​គឺ​រង់ចាំ​វត្តមាន​ស្ពាន​ចម្លង​ត​ភ្ជាប់​ពី​តំបន់​ស្វាយជ្រុំ​មកកាន់​តំបន់​ជ្រោយចង្វារ​ប៉ុណ្ណោះ” ។

សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា កាលពី​កន្លងទៅនេះ បានប្រកាស​ពី​ការសាងសង់​ស្ពាន​ចំនួន ២កន្លែង ដើម្បី​ត​ភ្ជាប់​តំបន់​អរិយ​ក្សត្រ មកកាន់​រាជធានី​ភ្នំពេញ ហើយក៏​ជា​ផ្នែក​មួយ​នៃ​ការតភ្ជាប់​ផ្លូវ​ក្រវ៉ាត់​ក្រុង​ផងដែរ។

ស​ម្តេ​តេ​ជោ​ថ្លែងថា “ដើម្បី​សាងសង់​ផ្លូវ​ក្រវ៉ាត់​ក្រុង​ពិតប្រាកដ​មួយ យើង​ត្រូវ​សាងសង់​ស្ពាន​មួយ​ត​ភ្ជាប់​ពី​កំពង់ចម្លង​ជ្រោយចង្វារ ទៅ​ស្វាយជ្រំ ហើយ​មួយទៀត​ត្រូវ​សាងសង់​ស្ពាន​ឆ្លងកាត់​ទន្លេមេគង្គ​ក្រោម ដែល​ត​ភ្ជាប់​រវាង​តំបន់​អរិយ​ក្សត្រ និង​ក្តី​តា​កុយ” ។

ផែនការ​នៃ​ការសាងសង់​ស្ពាន​នេះ បាន​ក្លាយជា​ចលករ​មួយ​ក្នុងការ​រុញច្រាន​ទីផ្សារ​អចលនទ្រព្យ​ជាពិសេស​ដីធ្លី​នៅ​តំបន់​អរិ​ក្ស​ត្យ​នេះ​មាន​ភាពរស់រវើក បើទោះបី​មិនទាន់មាន​កាល​បរិ​ចេ្ច​ទ​ជាក់លាក់​ណាមួយ​ក្នុងការ​សាងសង់​ស្ពាន​ទាំងនោះ​នៅឡើយ៕

លោក សំ សុខ​នឿន ៖ សមាគម GRA មាន​បេសកកម្ម​ពិសេស​ជួយ​ជំរុញ និង​លើកកម្ពស់​វិស័យ​អចលនទ្រព្យ

ដោយ ៖ រ៉ា​ណេ​ត

ភ្នំពេញ ៖ គ្រប់ការ​បង្កើត​សមាគម​ទាំងអស់​សុទ្ធ​តែមាន​គោលបំណង និង​បេស​សកម្ម​ពិសេស​មួយ​ក្នុង​ការជួយ​ជំរុញ និង​រួមចំណែក​លើកកម្ពស់​វិស័យ​ដែល​ពាក់ព័ន្ធ​ក៏ដូចជា​ជួយ​បំពេញ​នូវ​ចន្លោះ​ខ្វះខាត​របស់​សមាជិក​ដែល​ចូលរួម​ទាំងអស់ ជាក់ស្ដែង​ដូចជា​សមាគម​អចលនទ្រព្យ​សកល​ដែល​កំពុង​តែមាន​ភាព​ម​មា​ញឹក​ក្នុង​ការជួយ​លើកកម្ពស់​វិស័យ​អចលនទ្រព្យ​នៅ​កម្ពុជា​ឱ្យ​កាន់តែ​ល្អប្រសើរ។

ប្រធាន​សមាគម​អចលនទ្រព្យ​សកល (GRA) លោក​សំ សុខ​នឿន បាន​មានប្រសាសន៍ប្រាប់​គេហទំព័រ www.propertyarae.asia កាលពី​ល្ងាច​ថ្ងៃទី១៧ ខែមករា ឆ្នាំ២០២១ថា សមាគម GRA ដែល​ត្រូវបាន​បង្កើតឡើង​ដោយមាន​ការទទួលស្គាល់​ពី​ក្រសួងមហាផ្ទៃ និង​ការចូលរួម​គាំទ្រ​ពី​សមាជិក​ដែលជា​ក្រុមហ៊ុន​ភ្នាក់ងារ​អចលនទ្រព្យ និង​ភ្នាក់ងារ​នីតិបុគ្គល​សរុប​ជិត ២០០នាក់​កំ ពុង​តែ​បន្ត​បេសកកម្ម​របស់ខ្លួន​យ៉ាងសកម្ម​ដូច​ទៅនឹង​អ្វីដែល​បានកំណត់​នៅក្នុង​គោល​ការ និង​ផែន​ការណ៍​ចម្បង​របស់​សមាគម។

លោក​បន្តថា “សមាគម GRA ត្រូវបាន​បង្កើតឡើង និង​ចុះបញ្ជី​នៅក្នុង​ក្រសួងមហាផ្ទៃ​កាលពី​ថ្ងៃទី៤ ខែកុម្ភៈ ឆ្នាំ២០២០ ក្រោម​គោលបំណង​ចែករំលែក​នូវ​ចំណេះដឹង និង​ផ្សព្វផ្សាយ​ព័ត៌មាន​នានា​ពាក់ព័ន្ធ​ទៅនឹង​វិស័យ​អចលនទ្រព្យ​ទៅដល់​ប្រជាពលរដ្ឋ​ខ្មែរ បណ្តា​ក្រុមហ៊ុន និង​ភ្នា​ក់​អចលនទ្រព្យ​ទាំងអស់​នៅ​កម្ពុជា ជាពិសេស​ផ្សព្វផ្សាយ​ទៅកាន់​ពិភពលោក ដើម្បី​ធ្វើយ៉ាងណា​ចូលរួម​លើកកម្ពស់់​វិស័យ​មួយ​នេះ​ឱ្យនៅតែ​បន្ត​វឌ្ឍនភាព​ទៅមុខទៀត” ។

ប្រធាន​សមាគម​រួប​នេះ​បាន​បន្តទៀតថា “សមាគម GRA មិន​មែនមាន​ចក្ខុវិស័យ​ត្រឹមតែ​ក្នុងប្រទេស​កម្ពុជា​នោះទេ ប៉ុន្តែ​យើង​នឹងធ្វើ​កិច្ចសហប្រតិបត្តិកា​រយ៉ា​ង​ជិតស្និទ្ធ​រួមគ្នា​ទាំង​អ្នកវិនិយោគ ទាំង​ភ្នាក់ងារ​ជា​លក្ខណៈ​ក្រុមហ៊ុន ជា​ក្រុម និង​ជា​នីតិបុគ្គល ជាពិសេស​បង្កើន​កិច្ច​សហប្រតិបត្តិ​ជាមួយ​បណ្តា​ក្រុមហ៊ុន និង​ភ្នាក់ងារ​អចលនទ្រព្យ​អន្តរជាតិធំៗនៅលើ​ទីផ្សារ​អន្តរជាតិ​ផងដែរ ពោលគឺ​ធ្វើយ៉ាងណា​អាច​ទាក់ទាញ​ការវិនិយោគ​ពី​បរទេស​កាន់តែច្រើន​ចូលមក​កាន់​ទីផ្សារ​កម្ពុ​ជា​បន្ថែម​ពីលើ​បច្ចុប្បន្ននេះ​ទៀត” ។

នៅក្នុង​វិស័យ​អចលនទ្រព្យ​គឺមាន​ផ្នែក​ជាច្រើន​ដែល​ត្រូវបាន​បែងចែក​ដាច់ដោយឡែក​ពីគ្នា ដែល​ក្នុងនោះ​រួមមាន​ដូចជា ផ្នែក​ភ្នាក់ងារ​វាយតម្លៃ​អចលនវត្ថុ ការគ្រប់គ្រង និង​ថែទាំ​អចលនវត្ថុ ការវិនិយោគ និង​ការអភិវឌ្ឍន៍​ជាដើម ដែល​ទាំងអស់នេះ​គឺ​ស្ថិតនៅក្នុង​វិស័យ​អចលនទ្រព្យ​ដែល​កំពុង​មានដំណើ​រយ៉ា​ង​សកម្ម​នៅលើ​ទីផ្សារ​កម្ពុជា​នាពេល​បច្ចុប្បន្ន។

លោក​សំ សុខ​នឿន បាន​មានប្រសាសន៍​ឱ្យដឹងថា នៅក្នុង​វិស័យ​អចលនទ្រព្យ​កម្ពុជា​នាពេល​បច្ចុប្បន្ន កំពុង​តែមាន​ភាព​ប្រឈម និង​ក្ដី​ព្រួយបារម្ភ​ជាខ្លាំង​ទៅលើ​ភ្នាក់ងារ​មួយចំនួន​ដែល​កំពុងមាន​សកម្មភាព​នៅក្នុង​ទីផ្សារ​រួម។ ភ្នាក់ងារ​មាន​តួនាទី​សំខាន់បំផុត​នៅក្នុង​វិស័យ​អចលនទ្រព្យ​ក្នុងការ​ផ្សព្វផ្សាយ​ពី​ព័ត៌មាន​អចលនវត្ថុ​នានា​នៅ​កាន់​ទីផ្សារ​ទាំង​ក្នុងស្រុក​ទាំង​ស​ក្រៅ​ក្រៅ​ស្រុក ហើយក៏​មាន​នាទី​ជា​អ្នក​កៀងគរ អូសទាញ​អ្នកវិនិយោគ និង​អ្នក​អភិវឌ្ឍន៍​អន្តរជាតិ​ឱ្យ​ចូលមក​កាន់តែ​ផ្សារ​ផងដែរ ដូច្នេះ​នាទី​ជា​ភ្នាក់ងារ​គឺមាន​សារសំខាន់​បំផុត។ ប៉ុន្តែ​អ្វី​ដែលជា​ភាព​ប្រឈម​នាពេល​បច្ចុប្បន្ន ដោយសារតែ​ការងារ​ជា​ភ្នាក់ងារ​នៅ​មិនទាន់មាន​ការកំណត់​ច្បាស់​ពី​ច្បាប់ ដែល​ជន​ណា​ក៏​អាច​មានឱកាស​ធ្វើបាន​មិន​ថា​អ្នកនោះ​មាន​ជំនាញ មានចំណេះដឹង​កម្រិតណា​នោះទេ រហូត​មាន​អ្នកខ្លះ​អនុវត្ត​ប្រាសចាក​ពី​ក្រមសីលធម៌ ដោយ​គ្មាន​វិជ្ជាជីវៈ​ក្រោម​គោលបំណង​ទទួលបាន​ផលប្រយោជន៍ ដែល​រូ​ម​ភាព​បែបនេះ​គឺអាច​ជះឥទ្ធិពល​អាក្រក់​ដល់​វិស័យ​អចលនទ្រព្យ។

លោក​បញ្ជាក់ថា “ដោយ​ក្ដីបារម្ភ​ទៅលើ​ចំណុច​ទាំងនេះ បច្ចុប្បន្ន GRA បាន​នឹង​កំពុង​ព្យាយាម​ធ្វើយ៉ាងណា​អាច​កាត់បន្ថយ​នូវ​រូប​អវិជ្ជមាន​ទាំងនេះ តាមរយៈ​ការបើក​យ៉ាង​ទូលាយ​សម្រាប់​បណ្តា​ភ្នាក់ងារ​ដែល​ចង់​អភិវឌ្ឍន៍​ខ្លួន​មានចំណេះដឹង និង​ជំនាញ​ទីផ្សារ​អចលនទ្រព្យ​ច្បាស់លាស់ ប្រកបដោយ​ក្រប​សីលធម៌ និង​វិជ្ជាជីវៈ ដោយ​ចូល​ជា​សមាជិក​នៅក្នុង​សមាគម” ។

លោក​បន្តថា “បន្ទាប់​ពួកគាត់​បាន​ចូលរួម​ជា​សមាជិក​ពេញសិទ្ធិ ក្រៅពី​មានឱកាស​ទទួលបាន​កា​រ​ប្រឹក្សា​យោបល់​ផ្តល់នូវ​ចំណេះដឹង​ពី​អ្នក​ដែលមាន​បទពិសោធន៍​នៅក្នុង​សមាគម ថែមទាំង​មានឱកាស​ធ្វើការ​ភ្ជាប់​ទំនាក់ទំនង បង្កើត​បណ្តាញ​រួមគ្នា​ជាមួយ​ភ្នាក់ងារ​ជាតិ និង​អន្តរជាតិ​ដែលមាន​ទីផ្សារ​យ៉ាង​ទូលាយ ដែល​ទាំងអស់នេះ​សុទ្ធតែជា​ឱកាស​អភិវឌ្ឍន៍​ខ្លួន អភិវឌ្ឍន៍​ក្រុមហ៊ុន​ឱ្យ​កាន់តែ​មាន​ភាព​រីកចម្រើន ស្រប​ពេលដែល​វិស័យ​អចលនទ្រព្យ​កម្ពុជា​នៅតែ​បន្ត​វឌ្ឍនភាព​ទៅក្នុង​រយៈពេល​យូរ​ឆ្នាំ​ទៀត” ៕

ទីផ្សារអចលនទ្រព្យក្រុងតាខ្មៅកាន់តែមានកំណើនស្របជាមួយនឹងគម្រោងអភិវឌ្ឍន៍របស់រដ្ឋបាលខេត្តកំពុងដំណើរការ

ដោយ ៖ រ៉ាណេត
តាខ្មៅ ៖ ក្រោមកិច្ចសហការិនិយោគ និងអភិវឌ្ឍន៍រវាងរដ្ឋបាលខេត្ត និងវិស័យឯកជនបានធ្វើឱ្យក្រុងតាខ្មៅនៃខេត្តកណ្តាលបង្កើនភាពទាក់ទាញលើការវិនិយោគក្នុងវិស័យអចលនទ្រព្យកាន់តែប្រសើរជាមួយនឹងការកើនឡើងនូវតម្លៃនៅលើទីផ្សារផងដែ។

អភិបាលខេត្តកណ្តាល លោកគង់ សោភ័ណ្ឌ បានមានប្រសាសន៍ប្រាប់ឱ្យដឹងនៅថ្ងៃចុងសប្ដាហ៍នេះថា ក្រុងតាខ្មៅនៅពេលបច្ចុប្បន្ននេះបើប្រៀបធៀបទៅនឹងរយៈ២-៣ ឆ្នាំមុនគឺមានភាពរីកចម្រើនក្រោមការចូលរួមវិនិយោគពីវិស័យឯកជនជាមួយរដ្ឋបាលក្រុង និងខេត្តកណ្តាល។

លោកថា “យើងឃើញថាពីមួយថ្ងៃទៅមួួយសកម្មភាពនៃការធ្វើអាជីវកម្ម ពាណិជ្ជកម្ម និងការវិនិយោគផ្សេងៗជាពិសេសលើវិស័យសំណង់គឺមានការកើនឡើងជាលំដាប់។ សំណង់ភាគច្រើនជាប្រភេទលំនៅដ្ឋានស្ថិតនៅក្នុង និងជាយក្រុងតាខ្មៅ ក្នុងរូបភាពជាប្រភេទលំនៅដ្ឋានតម្លៃសមរម្យ”។

លោកបន្តថា “ដោយឡែកនៅក្នុងក្រុងតាខ្មៅក៏កាន់តែមានភាពទាក់ទាញច្រើន នៅពេលប្រជាជនគាត់មានចំណូលច្រើនគាត់ចាយត្រឡប់ទៅវិញក៏ច្រើន ពួកគាត់ចាប់ផ្តើមគិតពីអ្វីដែលល្អសម្រាប់ការរស់នៅប្រចាំថ្ងៃរាប់ទាំងទីកន្លែងស្នាក់នៅ ចំណីអាហារ សុខភាព និងការកម្សាន្តផងដែរ ដែលទាំងអស់នេះសុទ្ធតែជាចំណុចសំខាន់ដែលជួយជំរុញឱ្យក្រុងតាខ្មៅមានការអភិវឌ្ឍន៍កាន់តែខ្លាំង”។

ស្ថានភាពជាក់ស្ដែងនៅក្នុងក្រុងតាខ្មៅនាពេលបច្ចុប្បន្ន បាន និងកំពុងដើរតាមគម្រោងផែនការមេ និងប្លង់គោលដែលបានរៀបចំទុក ដែលមានការបែងចែកដាច់ដោយឡែករវាងតំបន់លំនៅដ្ឋាន តំបន់សាធារណៈ និងផែនការនៃការអភិវឌ្ឍន៍។

លោកអភិបាលខេត្តបានមានប្រសាសន៍បន្តថា “នៅតំបន់ណាក៏ដោយ នៅពេលមានការអភិវឌ្ឍន៍លើផ្នែកហេដ្ឋារចនាសម្ព័ន្ធកាន់តែល្អ មានការរៀបចំសណ្ដាប់ធ្នាប់ល្អងាយស្រួលក្នុងការរស់នៅ នឹងជំរុញឱ្យមានមនុស្សកាន់តែច្រើន។ នៅពេលមានមនុស្សកាន់តែច្រើន មានកំណើនតម្រូវការកន្លែងស្នាក់នៅ និងការអភិវឌ្ឍន៍ក្នុងវិស័យសំណង់ វានឹងជំរុញឱ្យតម្លៃដីធ្លីឡើងថ្លៃផងដែរ។ យើងឃើញថា ទាំងនៅក្នុងក្រុង ជាពិសេសនៅតំបន់ជុំវិញក្រុងតាខ្មៅគឺមានគម្រោសាងសង់សំណង់លំនៅដ្ឋានជាច្រើន។ ខ្ញុំមិនច្បាស់ពីតម្លៃដីធ្លីនៅលើទីផ្សារនោះទេ ព្រោះខ្ញុំមិនបានសិក្សាលម្អិត ប៉ុន្តែគ្រាន់តែដឹងថា តម្លៃមានការឡើងថ្លៃជាងកាលពី១ឬ២ឆ្នាំមុន”។

នាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រីតាំង ហួរ បានទទួលស្គាល់ថាតម្រូវការដីធ្លីនៅក្នុងក្រុងតាខ្មៅ ក៏ដូចជានៅតាមតំបន់ជាយក្រុងតាខ្មៅផងដែរគឺពិតជាមានការកើនឡើង ហើយតម្លៃក៏ឡើងថ្លៃដែរ។

លោកស្រីបន្តថា “តម្លៃដីនៅកណ្តាលក្រុងតម្លៃទាប ឬខ្ពស់អាស្រ័យទៅតាមទីតាំងស្ថិតនៅក្បែរធំ ឬផ្លូវតូច និងទំហំដី។ ដីដែលមានទំហំស្ថិតនៅផ្លូវធំអាចមានតម្លៃស្ថិតនៅក្នុងចន្លោះ៧០០-៨០០ដុល្លារក្នុងមួយម៉ែត្រការ៉េ ហើយបើដីទំហំតូចសម្រាប់លំនៅដ្ឋានអាចស្ថិតនៅក្នុងចន្លោះ១០០០-១២០០ដុល្លារក្នុងមួយម៉ែត្រការ៉េ ប៉ុន្តែសម្រាប់ដីដែលស្ថិតនៅតាមផ្លូវតូចៗអាចស្ថិតនៅក្នុងចន្លោះពី៤០០-៥០០ដុល្លារក្នុងមួយម៉ែត្រការ៉េ”។

លោកបញ្ជាក់ទៀតថា “សម្រាប់តម្លៃដីដែលស្ថិតនៅជាយក្រុងតាខ្មៅដូចជានៅជាប់តំបន់ផ្លូវ២១B អាចមានតម្លៃចាប់ពី៣០០ដុល្លារក្នុងមួយម៉ែត្រការ៉េ ប៉ុន្តែបើងាកមកក្បែរតំបន់ផ្លូវ៦០ម៉ែត្រ តម្លៃដីស្ថិតនៅកម្រិតមធ្យម និងកម្រិតខ្ពស់ ចាប់ពី៥០០ដុល្លារ ឡើងរហូតដល់១០០០ដុល្លារក៏មាន ដែលអាស្រ័យទៅលើទីតាំង និងទំហំដីជាក់ស្ដែង”៕