ដោយ ហ្សូលី

ភ្នំពេញ៖ រដ្ឋាភិបាលជប៉ុនតាមរយៈកម្មវិធីអភិវឌ្ឍន៍សេដ្ឋកិច្ច និងសង្គម បានឧបត្ថម្ភជាគ្រឿងចក្រសាងសង់ផ្លូវដល់រាជរដ្ឋាភិបាលកម្ពុជាយកទៅប្រើប្រាស់ក្នុងគម្រោងសាងសង់ផ្លូវអាទិភាពនានា ពិសេសផ្លូវដែលទទួលរងនូវការខូចខាតខ្លាំងដោយកត្តាផ្សេងៗ រួមមានការដឹកលើសទម្ងន់កំណត់ និងគម្រោងស្ថាបនាផ្លូវ៣៨ខ្សែនៅខេត្តសៀមរាប។

ថ្លែងក្នុងពិធីប្រគល់ និងទទួលគ្រឿងចក្រសាងសង់ផ្លូវប្រភេទ stabilizer នៅព្រឹកថ្ងៃទី១២ ខែតុលា ឆ្នាំ២០២០នេះ ឯកឧត្តម MIKAMI Masahiro ឯកអគ្គរាជទូតជប៉ុនប្រចាំនៅកម្ពុជា សង្ឃឹមថា ការផ្តល់គ្រឿងចក្រនេះ នឹងចូលរួមចំណែកស្តារ និងអភិវឌ្ឍន៍នូវហេដ្ឋារចនាសម្ព័ន្ធ ផ្លូវ-ស្ពាន នៅកម្ពុជាឱ្យកាន់តែប្រសើរឡើង សំដៅរួមចំណែកជំរុញកំណើនសេដ្ឋកិច្ច អភិវឌ្ឍសង្គម និងកាត់បន្ថយភាពក្រីក្ររបស់ប្រជាជនកម្ពុជា។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា តាមរយៈឯកឧត្តមMIKAMI Masahiro ជូនចំពោះប្រជាពលរដ្ឋ និងរដ្ឋាភិបាលជប៉ុន បានជួយឧបត្ថម្ភគាំទ្រជាស្មារតី បច្ចេកទេស ឥណទានកម្ចីសម្បទាន និងបានផ្តល់នូវជំនួយឥតសំណងជាបន្តបន្ទាប់សម្រាប់ការសាងសង់ ស្ពារ និងអភិវឌ្ឍន៍នូវហេដ្ឋារចនាសម្ព័ន្ធ ផ្លូវ-ស្ពាន សំខាន់ៗជាច្រើនកន្លែង។

លោកបន្តថា បន្ថែមពីនេះ កំពង់ផែអន្តរជាតិសម្រាប់ជួយសម្រួលដល់ចរាចរដឹកជញ្ជូននៅទូទាំងប្រទេសកម្ពុជា សំដៅរួមចំណែកជំរុញកំណើនសេដ្ឋកិច្ច អភិវឌ្ឍសង្គម និងកាត់បន្ថយភាពក្រីក្ររបស់ប្រជាជនកម្ពុជា។

តាមការបញ្ជាក់របស់លោក ស៊ុន ចាន់ថុល បានឱ្យដឹងថា ចាប់ពីឆ្នាំ១៩៩៣ ដល់បច្ចុប្បន្ន ជប៉ុនបានផ្តល់ជំនួយឥតសំណង ព្រមទាំងហិរញ្ញប្បទានដ៏ច្រើនសន្ធឹកសន្ធាប់សម្រាប់ការស្តារ និងអភិវឌ្ឍន៍ហេដ្ឋារចនាសម្ព័ន្ធគន្លឹះជាច្រើននៅកម្ពុជា។

ចំពោះវិស័យសាធារណការ និងដឹកជញ្ជូន ជប៉ុនបានផ្តល់ហិរញ្ញប្បទានសម្បទានជាជំនួយឥតសំណងសម្រាប់ស្តារ និងសាងសង់ផ្លូវចំនួន៣ខ្សែ រួមមាន៖ ផ្លូវជាតិលេខ៦ ផ្លូវជាតិលេខ៧ និងផ្លូវជាតិលេខ១ ប្រវែងសរុបជាង២៥៤គីឡូម៉ែត្រ ដោយប្រើប្រាស់ថវិកាប្រមាណ១៨៩,១លានដុល្លារអាមេរិក។ ចំណែកស្ពានធំៗ មានដូចជា ស្ពានគីហ្សូណា ស្ពានត្សឹបាសា ប្រវែងសរុប៣.៥៧៥ម៉ែត្រ ចំណាយថវិកាប្រមាណ១៨៦លានដុល្លារ និងជួសជុលស្ពានជ្រោយចង្វារប្រវែងសរុប១.០៨០ម៉ែត្រ ចំណាយថវិកាប្រមាណ៣០លានដុល្លារ។

បច្ចុប្បន្ន ជប៉ុនកំពុងតែផ្តល់ជំនួយឥតសំណងសម្រាប់គម្រោងសាងសង់ស្ពានឡើងវិញបន្ទាន់នៅតំបន់ប្រឈមនឹងទឹកជំនន់ ដែលសាងសង់ស្ពានចំនួន៧ ស្ថិតក្នុងខេត្តព្រៃវែង និងខេត្តក្រចេះ ចំណាយថវិកាប្រមាណ៣៥លានដុល្លារអាមេរិក ខណៈផ្លូវជាតិលេខ៥ ដែលមានប្រវែង៣៦៦គីឡូម៉ែត្រ បាននិងកំពុងសាងសង់ ក្រោមឥណទានសម្បទានពីរដ្ឋាភិបាលជប៉ុនក្នុងទំហំថវិកាប្រមាណ៥០០លានដុល្លារ៕

ដោយ៖ ម៉ាណេត
ភ្នំពេញ៖ កិច្ចព្រមព្រៀងពាណិជ្ជកម្មសេរីកម្ពុជា-ចិន ត្រូវបានចុះហត្ថលេខាជាផ្លូវការនៅថ្ងៃនេះ នៅក្នុងដំណើរទស្សកិច្ចកិច្ចផ្លូវការរបស់ លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេស នៃសាធារណរដ្ឋប្រជាមានិតចិន មកកម្ពុជា នៅថ្ងៃទី១១-១២ ខែតុលា ឆ្នាំ២០២០ ខាងមុខនេះ។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងពាណិជ្ជកម្មសេរីកម្ពុជា-ចិននេះ និងឯកសារសំខាន់២ ទៀត រួមមាន លិខិតប្ដូរសារស្ដីពីការសិក្សាសមិទ្ធលទ្ធភាពគម្រោងធ្វើឱ្យប្រសើរឡើង មន្ទីរពេទ្យបង្អែកខេត្តព្រះសីហនុ និងលិខិតប្ដូរសារស្ដីពីការសិក្សាសមិទ្ធិលទ្ធភាពគម្រោងអភិវឌ្ឍន៍ហេដ្ឋារចនាសម្ព័ន្ធប្រព័ន្ធលូ និងប្រព្រឹត្តកម្មទឹកកខ្វក់នៅខេត្តព្រះសីហនុ។

ក្នុងអំឡុងពេលទស្សនកិច្ចនេះ លោក វ៉ាង យី បានអញ្ជើញចូលជួបសម្តែងការគួរសមចំពោះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជួបពិភាក្សាការងារ ជាមួយ លោកឧបនាយករដ្ឋមន្ត្រី ហោ ណាំហុង។
លោក វ៉ាង យី មានជំនួបប្រជុំផ្លូវការជាមួយ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃកម្ពុជា ដើម្បីពិភាក្សាលើកិច្ចសហប្រតិបត្តិការទ្វេភាគី ក្នុងវិស័យនានា ព្រមទាំងបញ្ហាតំបន់ និងអន្តរជាតិដែលជាប្រយោជន៍ និងកង្វល់រួម។

ដំណើរទស្សនកិច្ចផ្លូវការរបស់ លោក វ៉ាង យី មកកាន់កម្ពុជាលើកនេះ នឹងបន្តពង្រឹងបន្ថែមនូវចំណងមិត្តភាពជាប្រពៃណីដ៏យូរលង់ សាមគ្គីភាព ភាតរភាព និងកិច្ចសហប្រតិបត្តិការប្រកបដោយផ្លែផ្ការវាងកម្ពុជា និងចិន ក្នុងបរិបទនៃបញ្ហាប្រឈមជាសកលនៃជំងឺកូវីដ-១៩ ដែលពុំធ្លាប់មានពីមុន។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានឱ្យដឹងដែរថា តាមគោលការណ៍ដែលចរចានៃកិច្ចព្រមព្រៀងពាណិជ្ជកម្មសេរីរវាងកម្ពុជា -ចិន ភាគីកម្ពុជាអាចមានសិទ្ធិ ក្នុងការនាំយកទំនិញចេញទៅកាន់ទីផ្សារប្រទេសចិន ច្រើនជាង ១០៣០០មុខ ដែលមានភាគរយខ្ពស់ជាងភាគីចិន នាំទំនិញចូលមកកាន់ទីផ្សារកម្ពុជា។

លោកឧកញ៉ាបានបញ្ជាក់ថា “តាមរយៈនៃកិច្ចព្រមព្រៀងពាណិជ្ជកម្មសេរីជាប្រវត្តិសាស្ត្ររវាងកម្ពុជា និងប្រទេសយក្សចិនមួយនេះ យើងនឹងទទួលបានផលប្រយោជន៍ជាច្រើន ជាពិសេសការធ្វើពិពិធកម្ម នៃលទ្ធភាពក្នុងនាមជាអ្នកផលិត ដើម្បីនាំចេញទៅកាន់ទីផ្សារដ៏ធំនៃប្រទេសមហាអំណាចមួយនេះ និងកាន់តែធ្វើឱ្យបណ្តាប្រទេសផ្សេងទៀតស្គាល់នូវផលិតផលរបស់កម្ពុជា”។

លោកឧកញ៉ាបន្តថា “វាក៏ជាឱកាសទីផ្សារកម្ពុជានៅក្នុងតំបន់អាស៊ានដែរ ប្រសិនបើមានបណ្តាក្រុមហ៊ុនអន្តរជាតិនានា ចូលមកវិនិយោគនៅក្នុងកម្ពុជា នៅក្នុងការកែច្នៃផលិតផលកសិផលកម្ពុជា ហើយនាំចេញដែលក្រៅពីប្រទេសចិនក៏អាចនាំទៅកាន់ទីផ្សារដទៃទៀត ដែលទាំងអស់នេះ សុទ្ធតែជាការពង្រីកវិសាលភាពរបស់កម្ពុជាទៅកាន់ទីផ្សារពិភពលោក”។

លោកបន្ថែមថា “វាជាផលប្រយោជន៍ដ៏ធំធេង និងជាមោទនភាពសម្រាប់ប្រជាពលរដ្ឋកម្ពុជា ហើយត្រូវយកឱកាសនេះ សម្រាប់បង្កើនលទ្ធភាពក្នុងការផលិត ជាពិសេសក្នុងវិស័យកសិកម្ម ដូចជាដំណាំអាទិភាពរួមមាន អង្ករ ដំឡូងមី សណ្ដែក ពោត កៅស៊ូ ហើយយើងសង្ឃឹមថា អាចនឹងនាំចេញនូវផ្នែកបសុសត្វ និងប្រភេទវារីវប្បកម្មផងដែរ ដែលរាជរដ្ឋាភិបាលកំពុងផ្តោតការយកចិត្តទុកដាក់ ក្នុងការជម្រុញធ្វើពិពិធកម្មឱ្យកាន់តែរីកចម្រើន និងប្រកបដោយគុណភាពខ្ពស់”៕

ដោយវុត្ថា

កោះកុង៖ នាយឧត្តមសេនីយ៏ បណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអាកាសចរស៊ីវិលបានដឹកនាំមន្ត្រីជំនាញ ចុះពិនិត្យដើម្បីពន្លឿនការសាងសង់អាកាសយានដ្ឋានអន្តរជាតិតារាសាគរ ខេត្តកោះកុង ។

យោងតាមសេចក្តីជូនដំណឹងរបស់រដ្ឋលេខាធិការដ្ឋានអាកាសចរស៊ីវិលចេញផ្សាយនៅថ្ងៃទី ១២ ខែតុលា ឆ្នាំ ២០២០នេះ ឱក្យដឹងថា គោលបំណងនៃបេសកម្មចុះ ចុះពិនិត្យការសាងសង់អាកាសយានដ្ឋានអន្តរជាតិតារាសាគរ ខេត្តកោះកុងរួមមាន៖

១- ពិនិត្យលើរបាយការណ៍នៃការសាងសង់ រាយកាណ៍ដោយក្រុមហ៊ុន Union Development Group
២- ការចុះពិនិត្យទីតាំងគម្រោងសាងសង់
៣- ពិភាក្សា និងផ្លាស់ប្តូរព័ត៍មានរវាង រដ្ឋលេខាធិការដ្ឋានអាកាសចរស៊ីវិល និងក្រុមការងារអាកាសយានដ្ឋាន Union Development Group ស្តីពីវឌ្ឍនៈភាពគម្រោងសាងសង់អាកាសយានដ្ឋាន និង
៤-បញ្ហាផ្សេងៗ

សេចក្តីដំណឹងដដែលបន្តថា ដោយឡែក ការរៀបចំពេលវេលាសំខាន់ៗរបស់គម្រោងសាងសង់អាកាសយានដ្ឋានរួមមាន៖
– ការរៀបចំធ្វើ សុពលភាពហោះហើរ ( Flight Validation) នឹងគ្រោងបញ្ចប់នៅខែធ្នូ ឆ្នាំ ២០២០
– បញ្ចប់ សុពលភាពហោះហើរ ( Flight Validation)នឹងធ្វើនៅខែ កុម្ភះ ឆ្នាំ ២០២១
– ទទួលបញ្ចប់គម្រោងសាងសង់អាកាសយានដ្ឋាន មុនថ្ងៃទី២០ ខែមិនា ឆ្នាំ២០២១
– ការធ្វើការហោះហើរសាកល្បងនៅ មុនថ្ងៃទី៣១ ខែមិនា ឆ្នាំ២០២១
– បំពេញទទួលបញ្ចប់គម្រោងអាកាសយានដ្ឋាន ផ្សេងៗទៀត មុនថ្ងៃទី៣០ ខែមេសា ឆ្នាំ២០២១
– ទទួលគម្រោងអាកាសយានដ្ឋាន ដោយរដ្ឋលេខាធិការដ្ឋានអាកាសចរស៊ីវិល មុនថ្ងៃទី៣០ ខែឧសភា ឆ្នាំ២០២១
– ការបំពេញលក្ខខណ្ឌប្រតិបត្តិការអាកាសយានដ្ឋាន (សុំវិញ្ញាបនបត្រប្រតិបត្តិការអាកាសយានដ្ឋាន) និងចាប់ផ្តើមប្រតិបត្តិការអកាសយានដ្ឋាន នាពាក់កណ្តាលឆមាសទី០២ ឆ្នាំ២០២១៕

ដោយវុត្ថា

ភ្នំពេញ៖ អ្នកជំនាញមើលឃើញពីការរៀបចំនគរូបនីយកម្មទីក្រុងមិនទាន់បានល្អប្រសើរ បានជំរុញឱ្យមានការជន់លិចនៅតាមបណ្តាក្រុងមួយចំនួនរបស់ប្រទេសកម្ពុជា នៅក្នុងអំឡុងពេលមានបាតុភូតធម្មជាតិ ដោយមានភ្លៀងធ្លាក់ច្រើនក្នុងរយៈពេលប៉ុន្មាសប្តាហ៍កន្លមងកនេះ ។

លោកបណ្ឌិត វាន់ វ៉ាត អ្នកជំនាញផ្នែកនគរូបនីយកម្ម និងសំណងបានប្រាប់គេហទំព័រ propertyarea.asia នៅថ្ងៃទី ១២ ខែតុលា ឆ្នាំ ២០២០នេះ ឱ្យដឹងថា ការរៀបចំនគរូបនីយកម្មក្រុងរបស់ប្រទេសកម្ពុជានាពេលបច្ចុប្បន្ននេះមិនទាន់មានផែនការអនុវត្តនៅទូទាំងប្រទេសនៅឡើយទេ បើទោះបីមានការរៀបំហេដ្ឋារនាសម្ព័ន្ធក្រុងមួយចំនួនរួចហើយយ៉ាងក្តី ដែលការនេះជំរុញឱ្យមានការជួបប្រទះនូវជន់លិចនៅពេលមានភ្លៀងធ្លាក់ខ្លាំងម្តងៗ។

លោកបន្តថា កន្លងមកនេះ យើងបានរៀបចំហេដ្ឋារនាសម្ព័ន្ធក្រុងបានរួចហើយនៅតាមបណ្តាខេត្តមួយចំនួន ដូចជានៅក្នុងខេត្តកណ្តាល យើងក៏បានសិក្សានៅក្នុងកម្រិតតាមផែនការ ហើយចំពោះការអនុវត្តជាក់ស្តែងទៅលើគម្រោងមិនទាន់ចេញជាផែនជាក់ស្តែងដោយកង្វះខាតពាក់ព័ន្ធនឹងកញ្ចប់ថវិកា ។

លោកបន្តថា “ដូច្នេះរាល់បាតុភូតធម្មជាតិដែលមានការជន់លិច ដូចជាការអនុវត្តជាក់ស្តែង លើការងារផែនការអភិវឌ្ឍន៍ហេដ្ឋារចនាសម្ព័ន្ធក្រុង គឺយើងផ្អែកទៅលើផែនការរបស់ក្រសួងសាធារណការ និងដឹកជញ្ជូន ដែលមានគម្រោងអភវិឌ្ឍន៍ទាំងនៅក្នុងស្រុង និងក្រៅស្រុក ដែលមានការគាំទ្រថិកាពីក្រសួងសេដ្ឋកិច្ចនិងហិរញ្ញវត្ថុ តែមកដល់ពេលនេះ យើងឃើញថា មិនទាន់មានផែនការច្បាស់លាស់នៅឡើយទេ”។

លោកបណ្ឌិតបន្តថា “យើងនៅតែមានចំណុចខ្វះខាតមួយចំនួនពាក់ព័ន្ធទៅនឹងកញ្ចប់ថវិកា ដើម្បីយកមកអភិវឌ្ឍន៍ប្រព័ន្ធហេដ្ឋារនាសម្ព័ន្ធរំដោះទឹក” ។ លោកពន្យល់ថា “កន្លងមកនេះ យើងនៅមានចន្លោះខ្វះខាតហេដ្ឋារចនាសម្ព័ន្ធដែលបានគ្រោងលើកកម្រិតជាលក្ខណៈផ្លូវជាតិ ផ្លូវមហាវិថី វិថី ក៏ដូចជាផ្លូវបេតុ និងផ្លូវលំនៅតាមជនបទ ជាដើម ដែលយើងមិនបានយកចិត្តទុកដាក់លើប្រព័ន្ធហេដ្ឋារចនាសម្ព័ន្ធរំដោះទឹក ដូចជាប្រព័ន្ធលូ ប្រព័ន្ធព្រែកប្រឡាយមេ និងប្រឡាយផ្សេងៗជាដើម”។

លោកបណ្ឌិតពន្យល់ថា “ក្នុងរយៈពេល ២ សប្តាហ៍កន្លងមកនេះ កម្ពុជាបានទទួលរងនូវប្រព័ន្ធសម្ពាតទាប ហើយមានភ្លៀងធ្លាក់ខ្លាំង បានធ្វើ ឱ្យតំបន់មួយចំនួនទទួលរងនូវការលិចលង់ក្រុង ដោយសារនៅកន្លែងខ្លះ យើងកំពុងធ្វើការជុសជួល ហើយផ្លូវមួយចំនួនយើងបញ្ចប់ការសាងសង់ប៉ុន្តែ យើងមិនបានរៀបចំប្រឡាយរំដោះទឹកឱ្យបានល្អ(ឧទាហរណ៍ផ្លូវជាតិលេខ៤ ) ក្នុងទីប្រជុំជន។

លោកបន្ថែមទៀតថា “នៅកន្លែងខ្លះទៀត បើទោះបីធ្វើផ្លូវរួចហើយ តែយើងមិនបានរៀបចំប្រឡាយរំដោះទឹកឱ្យបានត្រឹមត្រូវតាមរយៈការតភ្ជាប់ទៅកាន់ប្រឡាយមេ (ធ្លាក់ចូលទន្លេ) ហើយបើតាមស្ថានភាពបច្ចុប្បន្ននេះ បើយើងមានប្រព័ន្ធបង្ហូររំដោះទឹកល្អ និងមានប្រព័ន្ធចែករំលែងទៅកាន់អូរ ឬប្រឡាយ ស្ទឹង បឹង ជាច្រើនផ្សេងទៀតជាលក្ខណៈស្បែកខ្លា នឹងមិនធ្វើឱ្យមានការជនលិចនោះទេ”។

លោកបញ្ជាក់ទៀតថា បើយើងមិនមានប្រព័ន្ធបង្ហូររំដោះច្រើនទេ យើងនិងមិនងាយរំដោះទឹកបានលឿនទេ ដូចនៅក្រុងពោធិ៍សាត់ចឹង មានតែស្ទឹងតែមួយ អ៊ីចឹងហើយបានធ្វើឱ្យមានការជនលិច ហើយការបែងចែកខ្នែងរំដោះទឹកកាន់តែច្រើន បើទោះបីមិនមានធំល្អ ហើយអាចនៅប្រើការបាន វាក៏នឹងជួយឱ្យជួយរំដោះទឹកកាន់តែបានលឿងនផងដែរ។

លោកបញ្ជាក់ទៀត “ដើម្បីឱ្យស្ថានភាពនេះ កាន់តែល្អប្រសើរនាពេលអនាគត (កុំឱ្យមានជនលិចបន្តទៀត) យើងត្រូវតែមានការគាំទ្រកញ្ចប់ថវិការដើម្បីរៀបចំហេដ្ឋារចនាសម្ព័ន្ធឱ្យបានល្អ និងការចូលរួមពីសំណាក់ប្រជាពលរដ្ឋ អជ្ញាធរមូលដ្ឋាន ដោយទុកដាក់សំរាមឱ្យបានត្រឹមត្រូវ និងកុំមានការចាក់ដីបំពេញនៅតាមប្រឡាយ ឬមាត់លូជាដើម”។

លោកបណ្ឌិត សុខ ទូត ប្រធានរាជបណ្ឌិត្យសភាពកម្ពុជា បានសរសេរនៅលើបណ្តាញសង្គមហ្វេសបុកផ្លូវការរបស់ខ្លួនឱ្យដឹងដែរថា ស្ថានភាពទឺកលិចលង់នៅតាមបណ្តាខេត្តក្រុងមួយចំនួនៅក្នុងប្រទេសកម្ពុជាដោយសារកត្តាសំខាន់មួយចំនួន។

លោកបណ្ឌិតបានសរសេរថា ពេលនេះ ទើបដឹងថាអ្វីទៅដែលមានសារសំខាន់ ក្នុងការកាត់បន្ថយទឹកជំនន់បណ្តាលមកពីទឹកភ្លៀង ដោយក្នុងនោះ ១. សូមកុំលុបបឹងបន្តទៅទៀត បើមិនបានបង្កើតថ្មីទេនោះ ២. ត្រូវស្ដារប្រឡាយ ស្ទឹង អូរ ដៃទន្លេឱ្យបានជ្រៅល្អ ៣. ស្រះត្រូវតែមានតាមភូមិក៏ដូចតាមវត្តដែរ ៤. កាត់បន្ថយមនុស្សទៅរស់តាមច្រាំងស្ទឹង ទន្លេ អូរ ព្រែក ដែលជាមូលហេតុធ្វើឱ្យស្ទះចរន្តទឹកក៏ដូចជាគ្មានអនាម័យ និងចោលកាកសំណល់គ្មានសណ្ដាប់ធ្នាប់។

លោកបន្តថា “សូមយើងទាំងអស់គ្នាជួយថែរក្សា សម្បត្តិទាំងនេះជារបស់យើងទាំងអស់គ្នា។ នា អាណាចក្រអង្គរដ៏ល្បីល្បាញត្រូវបានពិភពលោកទទួលស្គាល់ថាមានសេដ្ឋកិច្ចរុងរឿង ដោយសារវិស័យមួយគឺកសិកម្ម ដែលក្នុងនោះការរៀបចំប្រព័ន្ធធារាសាស្ត្រដោយការជីកបារាយណ៍ធំៗស្ដុកទឹក សម្រាប់បម្រើវិស័យកសិកម្ម”។

លោកបន្ថែមថា “បន្ថែមលើនេះទៀត អ្នកជំនាញបុរាណវត្ថុវិទ្យាក៏បានរកឃើញដែរថា អាណាចក្រនេះមិនត្រឹមជីកបារាយណ៍ធំៗប៉ុណ្ណោះទេ គេក៏ជីកត្រពាំងរាប់រយនៅតាមលំនៅ ភូមិដ្ឋានទៀតផង និង កុំចង់មានតែមួយជំនាន់ ហើយក្រតជំជាន់”។

គេហទំព័រ propertyarea.asia មិនអាចទាក់ទងសុំការអត្ថាធិប្បាយពីអ្នកនាំពាក្យរដ្ឋបាលរាជធានីភ្នំពេញបានទេ ដោយបានទូរស័ព្ទទៅមិនមានអ្នកលើក ៕