ដោយ គង់ សូរិយា

ភ្នំពេញៈ មន្រ្តីជាន់ខ្ពស់នៃក្រុមហ៊ុនOCICបានថ្លែងថា រដ្ឋបាលរាជធានីភ្នំពេញ បាននិងកំពុងជ្រើសរើសថ្ងៃល្អ សំរាប់បើកការដ្ឋានសាងសង់ស្ពានតភ្ជាប់ រវាងទីក្រុងកោះពេជ្រ និងទីក្រុងកោះនរា។

អគ្គនាយករងក្រុមហ៊ុនOCIC លោកទូច សំណាងបានមានប្រសាសន៍ឲ្យដឹងតាមទូរស័ព្ទកាលពីល្ងាចថ្ងៃទី២៨ កញ្ញានេះថា បច្ចុប្បន្នរដ្ឋបាលរាជធានីភ្នំពេញ បាននិងកំពុងជ្រើសរើសថ្ងៃបើកការដ្ឋានស្ថាបនា ស្ពានតភ្ជាប់រវាងទីក្រុងកោះពេជ្រ និងទីក្រុងកោះនរា ដែលនឹងចាប់ផ្តើមនៅកំឡុងខែតុលាខាងមុខនេះ។

លោកបន្តថា“ខ្ញុំមិនច្បាស់ថា តើរដ្ឋបាលក្រុងនឹងអញ្ជើញសម្តេចតេជោហ៊ុន សែននាយករដ្ឋមន្រ្តីនៃកម្ពុជា ជាអធិបតីដ៏ខ្ពង់ខ្ពស់ក្នុងពិធីនេះឬយ៉ាងណាទេ”។

ទោះជាយ៉ាងណាតាមទម្លាប់កន្លងមកសម្តេចតេជោហ៊ុនសែននាយករដ្ឋមន្រ្តីនៃកម្ពុជាតែងតែអញ្ជើញសម្ភោធបើកការដ្ឋានធំៗដែលជាសមិទ្ឋិផលរបស់ជាតិដើម្បីបង្ហា​ញពីការរីកចម្រើននៃសេដ្ឋកិច្ចសង្គមកម្ពុជា។

លោកទូចសំណាងបានបញ្ជាក់ឲ្យដឹងផងដែរថា “គម្រោងស្ពានឆ្លងកាត់ទន្លេ និងតភ្ជាប់ពីក្រុងរណបកោះពេជ្រ និងក្រុងរណបកោះនរាហ៍ មានទំហំធំជាងស្ពានដែលតភ្ជាប់ពីផ្លូវជាតិលេខ៥ ទៅក្រុងរណបជ្រោយចង្វារ”។ លោកបន្តថា “ស្ពាននេះជាប្រភេទស្ពានយោងដោយខ្សែកាបមានប្រវែងប្រមាណ៥០០ម៉ែត្រ និងទទឹង២៤,៥ម៉ែត្រ ដែលគ្រោងចំណាយពេលសាងសង់៣២ខែ ដោយប្រើថវិកាប្រមាណជាង៥០លានដុល្លារ ហើយស្ថាបត្យកម្មស្ពាននេះធ្វើឡើងតាមរចនាបថបែបខ្មែរ ”។

ស្ពាននេះក្រៅពីតភ្ជាប់រវាងទីក្រុងរណបទាំង២នេះ នឹងមានការតភ្ជាប់ជាមួយផ្លូវជាតិលេខ១ ដើម្បីអនុ​ញ្ញាតឱ្យប្រជាពលរដ្ឋធ្វើដំណើរឆ្លងកាត់ កាត់បន្ថយវិបត្តិកកស្ទះចរាចរណ៍ ដែលតែងកើតមាននៅលើផ្លូវជាតិលេខ១ ជាពិសេសចំណុចស្ពានព្រះមុនីវង្សច្បារអំពៅ។

ជាមួយនឹងការបង្ហើបប្រាប់ពីគម្រោង នៃការសាងសង់ស្ពានឆ្លងកាត់ទន្លេថ្មីមួយនេះ លោក ទូច សំណាង ក៏បានបញ្ជាក់ផងដែរថា សម្រាប់ការចរាចរណ៍ឆ្លងកាត់ស្ពានមួយនេះនឹងត្រូវបានកំណត់ប្រភេទរថយន្ត ដោយអាចនឹងមិនអនុញ្ញាតប្រភេទរថយន្តធុនធំ ឬដឹកទំនិញធ្ងន់ឆ្លងកាត់នោះឡើយ ប៉ុន្តែករណីនេះកំពុងសិក្សា។

លោកបន្តថា តាមផែនការពីដំបូង ក្រុមហ៊ុនមានជម្រើសពីរក្នុងការសាងសង់ស្ពានតភ្ជាប់រវាងទីក្រុងកោះពេជ្រ និងទីក្រុងកោះនរា ដោយជំរើសទី១សាងសង់ស្ពានក្រោមទន្លេ និងជម្រើសទី២សាងសង់ស្ពានលើទឹក ប៉ុន្តែការសម្រេចចុងក្រោយគឺជ្រើសរើសស្ពាន​នៅលើទឹកជំនួសវិញ ដែលស្ពាននេះមិនត្រឹមតែសម្រួលចរាចរណ៍នោះទេ តែក៏ជាផ្នែកមួយលើកកំពស់សោភ័ណភាពរាជធានីភ្នំពេញផងដែរ៕

ដោយ ៖ រ៉ាណេត

ភ្នំពេញ ៖ ចាប់តាំងពីពាក់កណ្តាលឆ្នាំ២០២០ ពោលគឺនៅត្រឹមដើមត្រីមាសទី៣ ទីផ្សារខុនដូដែលទទួលរងនូវផលប៉ះពាល់យ៉ាងខ្លាំងពីវិបត្តិសេដ្ឋកិច្ចនោះ បានចាប់ផ្តើមមានកំណើនឡើងវិញគួរឱ្យកត់សម្គាល់ ដោយក្នុងនោះមានគម្រោងជាច្រើនបានបង្ហាញពីលទ្ធផលល្អក្នុងការលក់ដូចគ្នា។

នាយិកាគ្រប់គ្រងផ្នែកលក់ក្រុមហ៊ុនភ្នាក់ងារអចលនទ្រព្យ CSA អ្នកស្រី លន់ ជូលីតា ដែលទទួលសិទ្ធិក្នុងការលក់គម្រោងខុនដូ AGILE SKY RESIDEN បានមានប្រសាសន៍នៅថ្ងៃទី២៨ ខែកញ្ញា ឆ្នាំ២០២០នេះថា ទីផ្សារខុនដូនៅកម្ពុជានៅពេលនេះបានចាប់ផ្តើមមានសន្ទុះឡើងវិញហើយ ប៉ុន្តែការកើនឡើងនេះ ស្ទើរតែ១០០ភាគរយ គឺជាតម្រូវការក្នុងស្រុក មិនមែនមកពីក្រៅប្រទេសដែលជាជនជាតិបរទេសនោះទេ។

អ្នកស្រីបន្ដថា “ត្រឹមតែរយៈពេលជាង២សប្ដាហ៍តែប៉ុណ្ណោះ ក្រុមហ៊ុនបានធ្វើការលក់ចេញប្រមាណជាង៨០យូនីត ហើយនៅក្នុងចំណោមនៃអតិថិជនទាំងអស់ភាគច្រើនជាជនជាតិខ្មែរ ដែលទិញសម្រាប់តម្រូវការស្នាក់នៅជាក់ស្ដែង ហើយអ្នកខ្លះទិញសម្រាប់វិនិយោគបន្តក្រោយគម្រោងសាងសង់ត្រូវបានបញ្ចប់១០០ភាគរយ។ ខ្ញុំជឿជាក់ថា ទីផ្សារខុនដូនឹងបន្តមានកំណើនល្អបន្ថែមទៀត ខណៈដែលវិស័យអចលនទ្រព្យនៅកម្ពុជានៅតែមានភាពល្អប្រសើរ ជាពិសេសប្រជាជនខ្មែរកាន់តែយល់ច្បាស់ពីទីផ្សារខុនដូ”។

នាយិកាប្រចាំប្រទេសក្រុមហ៊ុនអចលនទ្រព្យ CBRE Cambodia លោកស្រី អាន សុធីតា បានមានប្រសាសន៍ថា ខុនដូដែលមានតម្រូវការទីផ្សារនេពេល ជាប្រភេទខុនដូកម្រិតមធ្យម ដែលមានតម្លៃនៅលើទីផ្សារចាប់ពីជាង៧ម៉ឺនដុល្លារ ឬមានតម្លៃក្រោម២០០០ដុល្លារក្នុងមួយម៉ែត្រការ៉េតែប៉ុណ្ណោះ។

លោកស្រីបានបញ្ជាក់ថា “កំណើនទីផ្សារនៅពេលនេះ ក៏ព្រោះតែអ្នកអភិវឌ្ឍន៍បានប្ដូរនូវយុទ្ធសាស្ត្រនៃគម្រោងរបស់ខ្លួនដោយងាកមកចាប់ចំណែកទីផ្សារពីប្រជាជនខ្មែរវិញ រួមជាមួយនឹងការបង្កើតកម្មវិធីងាយស្រួលក្នុងការទិញ-លក់ ដែលក្រៅពីមានតម្លៃសមរម្យ ថែមមានផ្តល់ជូននូវភាពងាយស្រួលក្នុងការបង់ប្រាក់ផងដែរ”។

លោកស្រីបន្តថា “បន្តិចទៀត នៅពេលដែលសេដ្ឋកិច្ចកាន់តែរឹងមាំ និងរីកចម្រើន ការអភិវឌ្ឍកាន់តែធំជាងមុន កំណើនប្រជាជនក្នុងក្រុងកាន់តែកើនឡើងច្រើន នោះតម្រូវការនៃការទីផ្សារខុនដូនឹងកើនឡើងដោយស្វ័យប្រវត្តិ”។

លោក សំ សុខនឿន ប្រធានសមាគមអចលនទ្រព្យសកល (GRA) និងជាប្រធានក្រុមហ៊ុនភ្នាក់ងារអចលនទ្រព្យអន្តរជាតិ KW Sam SN Realty បានបញ្ជាក់ថា “ខុសពីកាលពីប៉ុន្មានឆ្នាំមុន មនុស្សភាគច្រើនចាប់អារម្មណ៍ទៅលើការទិញលំនៅដ្ឋានផ្ទាល់ដីនៅតាមបណ្តាតំបន់ជាយក្រុង ប៉ុន្តែបច្ចុប្បន្ននេះ មានអ្នកខ្លះបានងាកមកចាប់អារម្មណ៍នឹងការទិញខុនដូក្នុងក្រុងសម្រាប់រស់នៅវិញ។ កាលពី ២-៣ ឆ្នាំមុន លំនៅដ្ឋាននៅតាមតំបន់ជាយក្រុងភាគច្រើនមានតម្លៃមិនលើសពី ៥–៦ ម៉ឺនដុល្លារនោះទេ ប៉ុន្តែពេលនេះតម្លៃផ្ទះត្រឹម ៧–៨ ម៉ឺនដុល្លារស្ទើរតែរកមិនមាន ហើយបើមានគឺស្ថិតនៅឆ្ងាយពីក្រុងបន្តិច ប៉ុន្តែលុយត្រឹម ៧–៨ ម៉ឺនដុល្លារដដែលអាចទិញខុនដូនៅក្នុងតំបន់ក្រុងបានហើយមានជម្រើសច្រើនទៀត”។

លោក សំ សុខនឿន បញ្ជាក់ទៀតថា “ហេតុផលផ្សេងទៀត ដែលជម្រុញឱ្យកំណើននៃតម្រូវការខុនដូកើនឡើង ដែលក្រៅពីការប្រែប្រួលនៃតម្លៃលំនៅដ្ឋានកម្រិតមធ្យមនៅតាមតំបន់ជាយក្រុង គឺភាពងាយស្រួលក្នុងការរស់នៅក្នុងក្រុង ដែលគេចផុតពីភាពធុញទ្រាន់នៃការកកស្ទះចរាចរណ៍ ជាពិសេសការទទួលបានឱកាសចំណេញពីការវិនិយោគ ដែលជាធាតុដ៏សំខាន់មួយទៀតផងដែរ”៕

ដោយ ៖ វុត្ថា

ភ្នំពេញ ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអះអាងថា ក្រសួងនឹងផ្ដល់បណ្ណកម្មសិទ្ធិដីធ្លី ដែលគ្រោងនឹងសម្រេចឱ្យបាន ៧ លានក្បាលដី នៅឆ្នាំ ២០២៣ ខាងមុខនេះ ។

លោកឧបនាយករដ្ឋមន្ត្រី ជា សុផារ៉ា នៅក្នុងកិច្ចប្រជុំពិភាក្សាការងារជាមួយគណៈកម្មការទី៩ នៃរដ្ឋសភា ដើម្បីស្វែងយល់ពីការអនុវត្តច្បាប់ភូមិបាលឆ្នាំ ២០០១ និងគម្រោងបង្កើតច្បាប់ភូមិបាលថ្មី និងការស្វែងយល់អំពីផែនការចុះបញ្ជីកាលពីចុងសប្តាហ៍កន្លងមកនេះ បញ្ជាក់ថា ផ្អែកលើលទ្ធផលសរុបពីពេលចាប់ផ្ដើមអនុវត្តមកដល់ខែសីហាឆ្នាំ ២០២០ ក្រសួងបានចេញបណ្ណកម្មសិទ្ធិដីបានចំនួន ៥ ៨៦៦ ៣១៥ ប័ណ្ណថ្មើរហ្នឹង ៨៣,៨០ % នៃក្បាលដីប៉ាន់ស្មានពីដំបូងប្រមាណ ៧ លានក្បាលដី ។

លោកឧបនាយករដ្ឋមន្ត្រី ជា សុផារ៉ា ថ្លែងថា “ដូច្នេះ ផ្អែកលើលទ្ធផលនេះអាចសន្និដ្ឋានថា នៅដំណាច់ឆ្នាំ ២០២៣ ក្រសួងអាចសម្រេចការចុះបញ្ជីដីបាន ៧ លានក្បាលដី តាមផែនការ”។

លោកឧបនាយករដ្ឋមន្ត្រីពន្យល់ថា ការផ្តល់បណ្ណកម្មសិទ្ធិដីធ្លី (វិញ្ញាបនបត្រសម្គាល់អចលនវត្ថុ) ជូនប្រជាប្រជាពលរដ្ឋ នឹងចូលរួមធានាសុវត្ថិភាពនៃការកាន់កាប់ដីបញ្ចៀសវិវាទ លើកតម្លៃសេដ្ឋកិច្ចនៃដី និងបង្កើតជាទុនសម្រាប់ការអភិវឌ្ឍទៀតផង។

លោកឧបនាយករដ្ឋមន្ត្រីបន្ថែមថា បណ្ណកម្មសិទិ្ធដីធ្លី ក៏ចូលរួមចំណែកធ្វើឱ្យម្ចាស់ដីមានភាពនឹងនរចិត្ត និងអាចធ្វើការសម្រេចចិត្តក្នុងការប្រើប្រាស់ និង/ឬ អភិវឌ្ឍន៍ដីរបស់ខ្លួនបានច្បាស់លាស់ និងជឿជាក់ជាងមុន ។លើសពីនេះ ការចុះបញ្ជីដីក៏ជួយដល់រដ្ឋក្នុងការគ្រប់គ្រងការប្រមូលពន្ធប្រថាប់ត្រា និងពន្ធលើអចលនវត្ថុបង្កើនប្រាក់ចំណូលដល់ថវិកាជាតិផងដែរ៕

ដោយ ៖ រ៉ាណេត

ភ្នំពេញ ៖ គម្រោងខុនដូបែបប្រណីត និងលើកដំបូងនៅក្នុងខណ្ឌសែនសុខ រាជធានីភ្នំពេញ ដែលកំពុងដំណើរសាងសង់យ៉ាងសកម្មដើម្បីបំពេញតាមតម្រូវការទីផ្សារនាពេលបច្ចុប្បន្ននេះត្រូវបានគេមើលឃើញថា កំពុងតែទទួលបាននូវការចាប់អារម្មណ៍ និងគាំទ្រពីសំណាក់អតិថិជនយ៉ាងច្រើន។

ជាក់ស្ដែងនៅក្នុងកម្មវិធីជួបជុំជជែកពិភាក្សាទីផ្សារអចលនទ្រព្យនៅកម្ពុជា និងទទួលទានអាហារ កម្សាន្តជាមួយតន្ត្រីសម័យ “INVESTOR’S NIGHT ” ដែលរៀបចំឡើងក្រុមហ៊ុនអភិវឌ្ឍន៍ខុនដូប្រណីត Phnom Penh Galaxy Garden កាលពីរាត្រីថ្ងៃទី២៧ ខែកញ្ញា ឆ្នាំ២០២០ រាល់បណ្តាភ្ញៀវកិត្តិយសដែលបានចូលរួមសុទ្ធតែបង្ហាញពីការកោតសរសើរគម្រោង រួមជាមួយនឹងការកក់ ទិញ គម្រោងខុនដូ Phnom Penh Galaxy Garden សម្រាប់ការស្នាក់នៅផ្ទាល់ខ្លួន ក៏ដូចជាសម្រាប់វិនិយោគបន្តយកចំណេញផងដែរ។

លោក ប្រុស តូច ដែលជាអតិថិជនមួយរូបក្នុងចំណោមអតិថិជនជាច្រើននាក់ទៀតដែលបានចូលរួមនៅក្នុងកម្មជួបជុំខាងលើនេះបានបង្ហាញពីចំណាប់អារម្មណ៍ផ្ទាល់ខ្លួនថា “ទីផ្សារខុនដូនាពេលបច្ចុប្បន្ន បើប្រៀបធៀបទៅនឹងទីផ្សារលំនៅដ្ឋានដូចជាប្រភេទផ្ទះល្វែង ឬផ្ទះជាន់ផ្ទាល់ដី គឺនៅមានកម្រិតនៅឡើយ ដោយសារតែប្រជាជនខ្មែរភាគច្រើននៅមិនទាន់ស្គាល់ពីគុណប្រយោជន៍នៃការរស់នៅក្នុងខុនដូនៅឡើយ”។

លោកបានបន្តទៀតថា “មូលហេតុដែលខ្ញុំទិញខុនដូនៅក្នុងគម្រោង Phnom Penh Galaxy Garden ក៏ព្រោះតែគម្រោងមួយនេះមានភាពប្រសើរច្រើនជាងគម្រោងដទៃទៀត ទាំងការរចនាម៉ូដ ទាំងតម្លៃ ជាពិសេសស្ថិតនៅទីតាំងល្អ និងមានសក្ដានុពលជាងគេក្នុងខណ្ឌសែនសុខ។ នៅជុំវិញគម្រោងមានបណ្តាផ្សារទំនើប មជ្ឈមណ្ឌលពាណិជ្ជកម្ម ស្ថាប័នរដ្ឋ និងក្រុមហ៊ុនឯកជនជាច្រើន។ យូនីតដែលខ្ញុំទិញនេះនៅជាន់ទី១៦ ក្នុងតម្លៃពិសេសត្រឹមតែជាង៧ម៉ឺនដុល្លារ។ លុយប៉ុណ្នឹង យើងមិនអាចយកទៅទិញផ្ទះល្វែងនៅកណ្តាលក្រុងបាននោះទេ ប៉ុន្តែយើងអាចទិញខុនដូប្រណីតយ៉ាងស្រស់ស្អាតនៅក្នុងក្រុងបាន ហើយថ្ងៃក្រោយបើយើងមិនចង់ស្នាក់នៅទេ ក៏អាចដាក់ជួល ឬលក់បន្តយកចំណេញបានយ៉ាងងាយស្រួល”។

ប្រធានគ្រប់គ្រងផ្នែកទីផ្សារ និងការលក់គម្រោងខុនដូ Phnom Penh Galaxy Garden លោក អ៊ូ បូរីន បានមានប្រសាសន៍ប្រាប់ឱ្យដឹងថា គម្រោងខុនដូប្រណីតលើកដំបូង នៅក្នុងខណ្ឌសែនសុខ Phnom Penh Galaxy Garden មានលក្ខណៈពិសេសជាច្រើន ពោលគឺនៅក្នុងចំនួន៣៣ជាន់ ត្រូវបានបែងចែកដាច់ដើយឡែកពីគ្នា។ ចាប់ពីជាន់ទី៣ឡើងទៅជាតំបន់ស្នាក់នៅ និងមានផ្សារទំនើបក្រោមដី មានសួនបៃតងនៅលើអាគារកម្ពស់១០០ម៉ែត្រ មានស្កាយបារលើអាកាស អាងហែលទឹកលើអាកាស ការិយាល័យធ្វើការ កន្លែងហាត់ប្រាណ កន្លែងក្មេងលេង បណ្ណាល័យ ភោជនីយដ្ឋាន ហាងកាហ្វេ ចំណតយានយន្តស្វ័យប្រវត្តិក្រោមដី (ចាប់ពីជាន់ក្រោមដីដល់ជាន់ទី៣) ។ ដោយឡែកដែលចំពោះយូនីតនីមួយៗ មានទំហំពី៤៦ ទៅ១៤៨ម៉ែត្រការ៉េ។

លោកបានបន្តឱ្យដឹងទៀតថា ពេលនេះប្រជាជនខ្មែរភាគច្រើនបានស្វែងយល់ពីភាពងាយស្រួលក្នុងការរស់នៅរវាងផ្ទះល្វែង ឬផ្ទះផ្ទាល់ដីដែលស្ថិតនៅតំបន់ជាយក្រុង និងការរស់នៅក្នុងខុនដូតំបន់ក្រុង ដែលកាន់តែបង្ហាញពីភាពងាយស្រួល ទាន់សម័យដល់ជីវិតរបស់ពួកគាត់។ ការរស់នៅតាមខុនដូ មានភាពងាយស្រួលត្រង់ចំនុចសេវាកម្មនេះតែម្តង ដោយសារតែមានប្រព័ន្ធរក្សាសន្តិសុខដល់អ្នករស់នៅបាន ២៤ ម៉ោង និងជារៀងរាល់ថ្ងៃ។

នៅក្នុងខុនដូមានប្រព័ន្ធការពារសុវត្ថិភាពមានភាពទំនើប ដូចជាការដាក់កាមេរ៉ាគ្រប់ផ្លូវចេញចូល មានសេវាសម្អាតអនាម័យ ជួសជុលសម្ភាៈក្នុងខុនដូ និងមានក្លឹបហាត់ប្រាណ អាងហែលទឹក ស្ប៉ា អាហារដ្ឋា ជាពិសេសមានផ្សារទំនើបនៅក្នុងអគារស្រាប់ជាដើម។ បន្ថែមពីនេះនៅមានស្កាយបារ Skybar ទីតាំងសម្រាប់រៀបចំពិធីជួបជុំគ្នាជាដើម។ ម៉្យាងទៀត ប្រៀបធៀបរវាងតម្លៃខុនដូនៅក្នុងក្រុង និងលំនៅដ្ឋានក្នុងក្រុង ច្បាស់ណាស់ថាខុនដូមានតម្លៃទាបជាង។ ដូច្នេះសម្រាប់គ្រួសារតូច ដែលមានសមាជិកតិច អាចមានលទ្ធភាពផ្គត់ផ្គង់អចលនវត្ថុប្រភេទនេះបាន។ សូម្បីតែការបង់ពន្ធក៏មានតម្លៃទាបជាងដូចគ្នា បើប្រៀបធៀបជាមួយលំនៅដ្ឋាន។

ដូច្នេះការសម្រេចចិត្តទិញខុនដូជាមួយគម្រោង Phnom Penh Galaxy Garden គឺជារឿងដែលត្រឹមត្រូវជាទីបំផុត។ សម្រាប់ព័ត៌មានលម្អិតពីគម្រោងខុនដូ Phnom Penh Galaxy Garden សូមទាក់ទងតាមរយៈទូរស័ព្ទ ៖ ០៦៧ ៨៩ ៦៧ ៨៩ ៕