ដោយ៖ វុត្ថា

ភ្នំពេញ៖ រដ្ឋបាលខេត្តកែបបាននឹងកំពុងជំរុញប្រែក្លាយំបន់ភ្នំវល្លិ៍ ជាអតីតកន្លែងកាន់កាប់ដោយពួកខ្មែរក្រហមឱ្យក្លាយជាតំបន់ ទេសចរណ៍ធម្មជាតិ កសិទេសចរណ៍ និងឧស្សាហកម្មប្រចាំខេត្ត ដោយបាននឹងកំពុងកសាងហេដ្ឋារចនាសម្ព័ន្ធថ្មីៗឆ្ពោះទៅកាន់ទីនោះ។

លោក សោម ពិសិដ្ឋ អភិបាលខេត្តកែប បានឱ្យដឹងថា រដ្ឋបាលខេត្ត បានបើកការដ្ឋានសាងសង់ និងជួសជុលកំណាត់ផ្លូវខេត្ត ១៣៣៥ ចេញពីផ្លូវជាតិលេខ ៣៣ A ឆ្ពោះទៅតំបន់ភ្នំវល្លិ៍ ដែលមានប្រវែង ១៩០០ម៉ែត្រ ទទឹង ៧ម៉ែត្រ ក្រាលដោយកៅស៊ូ DBST ដើម្បីប្រែក្លាយ តំបន់នៅជុំវិញនោះឱ្យទៅជាទីកន្លែង ទេសចរណ៍ធម្មជាតិ កសិទេសចរណ៍ និងឧស្សាហកម្ម។

លោកថ្លែងថា “តំបន់ភ្នំវល្លិ៍នេះ គឺជាតំបន់ដែលខ្មែរក្រហមកាន់កាប់ដោយខ្មែរក្រហម ហើយជាទីតាំងបង្ហូរឈាមរវាងខ្មែរ និងខ្មែរ ដោយក្រោមនយោបាយឈ្នះឈ្នះ និងការលះបង់របស់ សម្តេចតេជោ ហ៊ុន សែន តំបន់នេះបានទទួលនូវសន្តិភាពពេញលេញនៅឆ្នាំ១៩៩៤ និងបាននឹងកំពុងប្រែក្លាយជាតំបន់កសិទេសចរណ៍ និងឧស្សាហកម្ម ។

លោកបន្តថា “កន្លែងហ្នឹង (ភ្នំវល្លិ៍)ជាកន្លែងទេសចរណ៍សម្រាប់ទទួលភ្ញៀវជាតិ និងអន្តរជាតិ ហើយ យើងបាននឹងកំពុងជំរុញឱ្យទៅជាតំបន់ឧស្សាហកម្ម មានផ្លូវ មានដំណាំប្រពៃណី ដំណាំម្រេច ដំណាំទុរ៉េន ដំណាំស្វាយ និងដំណាំផ្សេងៗ ទៀត ដើម្បីបំរើដល់វិស័យទេសចរណ៍ ដែលក្នុងន័យនេះ យើងប្រែក្លាយតំបន់សង្រ្គាមទៅជាតំបន់អភិវឌ្ឍន៍” ។

លោកបន្ថែមថា “ការស្ថាបនាផ្លូវមួយខ្សែនេះ និងធ្វើឱ្យតំបន់ភ្នំវល្លិ៍ ប្រែក្លាយពីទីតាំងដែលបង្ហូរឈាមគ្នាពីសម័យសង្រ្គាម ឱ្យក្លាយទៅជាតំបន់ទេសចរណ៍ធម្មជាតិ និងជាតំបន់កសិ-ឧស្សាហកម្ម ជាពិសេសដំណាំម្រេចតែម្តង”។

លោកបន្តថារដ្ឋបាលខេត្តបាននឹងកំពុងពង្រីកនិងសាងសង់ហេដ្ឋារចនាសម្ព័ន្ធនៅក្នុងខេត្តទាំងមូលដែលជាខេត្តទេសចរណ៍ ដើម្បីធានាបាននូវភាពងាយស្រួលសម្រាប់ប្រជាពលរដ្ឋធ្វើដំណើរ ក្នុងការមកលេងកម្សាន្តនៅខេត្តទេសចរណ៍មួយនេះ ជាពិសេសនាថ្ងៃឈប់សម្រាកនាពេលខាងមុខ៕

ដោយ វុទ្ធី

ភ្នំពេញ៖ អាងហែលទឹកស្ដង់ដារអន្ដរជាតិ នៃពហុកីឡដ្ឋានជាតិ(ស្ដាតអូឡាំពិក) ដែលចំណាយថវិកាអស់ប្រមាណជិត ៣លានដុល្លារ នឹងសម្ពោធដាក់ឲ្យប្រើប្រាស់ជាផ្លូវការនាល្ងាចថ្ងៃទី២៨ ខែកញ្ញា ឆ្នាំ២០២០ នេះ ក្រោយបញ្ចប់ការសាងសង់ និងជួសជុល កាលពីខែមេសាកន្លងទៅ។

លោក ស៊ុន ចាន់ថុល រដ្ឋមន្រ្តី ក្រសួងសាធារណកាលដឹកជញ្ជូន និង ជាប្រធានសហព័ន្ធខ្មែរកីឡាហែលទឹក បានមានប្រសាសន៍ថា អាងហែលទឹកពហុកីឡដ្ឋានជាតិនេះ មានទំហំ ២៥ម៉ែត្រ X ៥០ម៉ែត្រ ស្មើនឹង ១០ខ្សែបន្ទាត់ និងអាងលោតទឹក១ ខ្នាត ២០ម៉ែត្រ X ២៥ម៉ែត្រ។

លើសពីនេះ នៅមានការិយាល័យធ្វើការ គ្រឿងបរិក្ខាបច្ចេកទេស កន្លែងស្នាក់នៅ និងហ្វឹកហាត់សាច់ដុំ ពិសេសបំពាក់ទៅដោយកៅអីជាង ១,៦០០កៅអី ដែលចំណាយសរុបប្រមាណជិត ៣លានដុល្លារ។

ចំពោះពិធីសម្ពោធខាងលើនឹងធ្វើឡើងក្រោមអធិបតីភាពសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍(SEA Games) លើកទី៣២ ឆ្នាំ២០២៣ ឬហៅកាត់ថា CAMSOC ក៏ដូចជាតំណាងក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិផងដែរ។

លោក វ៉ាត់ ចំរើន អគ្គលេខាធិការ CAMSOC បានឲ្យដឹងដែរថា ទន្ទឹមជាមួយ ក្រោយបញ្ចប់ការសម្ពោធអាងហែលទឹកស្ដង់ដារអន្ដរជាតិនាល្ងាចនេះ សម្ដេចពិជ័យសេនា ទៀ បាញ់ ក៏នឹងមានដំណើរទស្សនកិច្ចពិនិត្យទីលាន និងសកម្មភាពហ្វឹកហាត់របស់សហព័ន្ធកីឡាជាតិជាង ២០ប្រភេទកីឡា ដែលមានមូលដ្ឋានក្នុងពហុកីឡដ្ឋានជាតិផងដែរ ដើម្បីវាយតម្លៃ កែលម្អ និងជំរុញការត្រៀមខ្លួន ឆ្ពោះទៅស៊ីហ្គេម ឆ្នាំ២០៣ នៅប្រទេសកម្ពុជា៕

ដោយវុត្ថា

ភ្នំពេញ៖ រដ្ឋបាលខេត្តសៀមរាបគគ្រោងដាក់ឱ្យដំណើរការផ្លូវមួយខ្សែចាប់ពីចំណុចផ្លូវជាតិលេខ៦ ឆ្ពោះទៅត្បូងរហូតដល់ផ្លូវ៧មករា នាពេលដ៏ខ្លីខាងមុខ បន្ទាប់ពីដោះស្រាយផលប៉ះពាល់មានចំនួន ៩៣ក្បាលដី និងសំណង់លើផ្លូវចំនួន ១០គ្រួសារ។

រដ្ឋបាលខេត្តសៀមរាបឱ្យដឹងនៅថ្ងៃទី ២៦ ខែកញ្ញា ឆ្នាំ ២០២០នេះ ឱ្យដឹងថា គិតមកដល់ថ្ងៃទី២៥ ខែកញ្ញា ឆ្នាំ២០២០នេះ ជាលទ្ធផលក្បាលដីដែលបានប៉ះពាល់មានចំនួន ៩៣ក្បាលដី និងសំណង់លើផ្លូវចំនួន ១០គ្រួសារ ត្រូវបានក្រុមការងាររដ្ឋបាលខេត្តសម្របសម្រួលជាមួយបងប្អូនប្រជាពលរដ្ឋបានមួយចំនួនធំ ដោយនៅសល់តែសំណង់ចំនួន ០៣គ្រួសារទៀតតែប៉ុណ្ណោះ ដែលមិនទាន់បានរុះរើ ហើយក្រុមការងារនឹងបន្តធ្វើការសម្របសម្រួលជាមួយម្ចាស់សំណង់ទាំងនេះបន្ថែមទៀត ដើម្បីឲ្យពួកគាត់យល់ព្រមរុះរើសំណង់របស់ស្របតាមសេចក្តីជូនដំណឹង និងតាមគម្រោងផែនការដែលបានកំណត់។

រដ្ឋបាលខេត្តសៀមរាបបន្តថា ការចុះអនុវត្តការសាងសង់ផ្លូវនេះ គឺ បន្ទាប់ពីរដ្ឋបាលខេត្តបានចេញសេចក្តីជូនដំណឹងកាលពីថ្ងៃទី២៤ ខែមិថុនា ឆ្នាំ២០២០រួចមក ហើយក្រុមការងារចម្រុះដែលមានរដ្ឋបាលខេត្ត រដ្ឋបាលក្រុង រដ្ឋបាលសង្កាត់ បានចុះពិនិត្យ និងជម្រាបជូនដល់បងប្អូនប្រជាពលរដ្ឋដែលរស់នៅតាមដងផ្លូវដែលគម្រោងនឹងបើកផ្លូវទំហំ ១៥ម៉ែត្រ ប្រវែង ១០៣០ម៉ែត្រ ចាប់ពីផ្លូវជាតិលេខ៦ រហូតដល់ផ្លូវ៧មករា។

ផ្លូវ១ខ្សែនេះ គឺមានតាំងពីសម័យសង្គមរាស្ត្រនិយម តែក្រោយថ្ងៃជ័យជម្នះ៧មករា ១៩៧៩ នៅពេលបងប្អូនបានវិលត្រឡប់ចូលមកកាន់ភូមិដ្ឋានវិញ បងប្អូនប្រជាពលរដ្ឋបាននាំគ្នាមករស់នៅធ្វើការសាងសង់លំនៅដ្ឋានពីលើទ្រូងផ្លូវទាំងមូល ដែលមានទទឹង ១៥ម៉ែត្រ បណ្តោយប្រវែង ១០៣០ម៉ែត្រ រដ្ឋបាលខេត្ត និងអាជ្ញារធរមូលដ្ឋានបាននឹងកំពុងរៀបចំសាងសង់ឡើងវិញ ដើមី្បបំពេញតម្រូវការរបស់ប្រជាពលរដ្ឋ ក្នុងការបញ្ជៀសនូវភាពកកស្ទះចរាចរណ៍ក្នុងក្រុង និងស្របតាមភាពរីកចម្រើនរបស់សង្គមជាតិ។

ជាមួយគ្នានេះ រដ្ឋបាលខេត្តក៏សូមថ្លែងនូវអំណរគុណយ៉ាងជ្រាលជ្រៅបំផុតចំពោះទឹកចិត្តរបស់បងប្អូនប្រជាពលរដ្ឋដែលរស់នៅតាមដងផ្លូវនេះមានស្មារតីចូលរួមសហការក្នុងការអនុវត្តបើកផ្លូវតាមទំហំដែលបានកំណត់ ដែលនេះជាសកម្មភាពគំរូក្នុងការចូលរួមគិតគូរពីផលប្រយោជន៍សាធារណៈ ក៏ដូចជាសង្គមជាតិរបស់យើង។ ម្យ៉ាងការចូលរួមដែលសម្រេចបានជាសមិទ្ធផលនេះ គឺជាការផ្តល់ភាពជាគំរូដល់បងប្អូនប្រជាពលរដ្ឋដែលត្រៀមនឹងចូលរួមអនុវត្តការបើកផ្លូវទាំង ៣៨ខ្សែខាងមុខ ដែលនឹងសម្រេចបើកការដ្ឋានសាងសង់នាពេលដ៏ខ្លីខាងមុខនេះ៕

ដោយវុត្ថា

ភ្នំពេញ៖រាជរដ្ឋាភិបាលកម្ពុជាបាន និងកំពុងរៀបចំច្បាប់វិនិយោគ និងប្រព័ន្ធលើកទឹកចិត្តថ្មីដែលមានលក្ខណៈគ្រប់ជ្រុងជ្រោយ និងមានភាពទាក់ទាញសម្រាប់ឧស្សាហកម្មប្រភេទ អេឡិចត្រូនិក គ្រឿងបង្គុំ កសិឧស្សាហកម្ម ឧស្សាហកម្មគាំទ្រ និងឧស្សាហកម្មផ្សេងៗទៀត សំដៅផ្ដល់ភាពងាយស្រួលដល់ការវិនិយោគរបស់ក្រុមហ៊ុនវិនិយោគបរទេស ជាពិសេសក្រុមហ៊ុនអាមេរិកដែលកំពុងស្វែងរកទីតាំងថ្មីនៅតំបន់អាស៊ីអាគ្នេយ៍។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងកិច្ចប្រជុំពិភាក្សាជាមួយគណៈប្រតិភូនៃក្រុមប្រឹក្សាធុរកិច្ចសហរដ្ឋអាមេរិក-អាស៊ាន(US-ASEAN Business Council) តាមរយៈប្រព័ន្ធវីដេអូពីចម្ងាយកាលពីថ្ងៃទី ២៥ ខែកញ្ញា ឆ្នាំ ២០២០ ឱ្យដឹងថ រាជរដ្ឋាភិបាលកម្ពុជាមានផែនការមេ ភស្តុភារកម្មជាតិ ដែលទាមទារឱ្យមានការវិនិយោគយ៉ាងច្រើនពីបណ្ដាប្រទេសផ្សេងៗ ដើម្បីអភិវឌ្ឍវិស័យភស្តុភារកម្មនៅកម្ពុជាឲ្យមានការរីកចម្រើន ហើយបច្ចុប្បន្ននេះ ក្រសួងបាននិងកំពុងធ្វើការ គិតគូររៀបចំ គម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញដោយសហការជាមួយក្រុមហ៊ុនឯកជនមួយរបស់ប្រទេសសឹង្ហបុរី។

លោកAlexander C. Feldman ប្រធាន និងជានាយកប្រតិបត្តិនៃក្រុមប្រឹក្សាធុរកិច្ចសហរដ្ឋអាមេរិក-អាស៊ានបានសម្តែងនូវការកោតសរសើរយ៉ាងជ្រាលជ្រៅ ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការបង្ការ និងទប់ស្កាត់ការរីករាលដាលជំងឺកូវីដ-១៩ ជាពិសេសវិធានការទប់ស្កាត់ផលប៉ះពាល់មួយចំនួនពីជំងឺកូវីដ-១៩ និងទោះបីកម្ពុជាស្ថិតក្នុងស្ថានភាពរងផលប៉ះពាល់ដោយសារជំងឺនេះក៏ដោយ ក៏កម្ពុជានៅមានការប្ដេជ្ញាចិត្តខ្ពស់ប្រកបដោយការទទួលខុសត្រូវក្នុងការបន្តជំរុញអភិវឌ្ឍហេដ្ឋារចនាសម្ព័ន្ធបន្តទៀតដែរ។

លោកបន្តថាក្រុមហ៊ុនទាំងអស់ដែលចូលរួម បានសម្ដែងនូវចំណាប់អារម្មណ៍ក្នុងការបណ្ដាក់ទុននៅព្រះរាជាណាចក្រម្ពុជា ព្រមទាំងបានសន្យាថានឹងផ្សព្វផ្សាយបន្តដល់ក្រុមហ៊ុនដៃគូដទៃ ទៀតឱ្យងាកមកស្វែងរកឱកាសវិនិយោគនៅកម្ពុជា ជាពិសេសការវិនិយោគលើវិស័យហេដ្ឋារចនាសម្ព័ន្ធដឹកជញ្ជូន និងភស្តុភារកម្ម។

លោកបន្តថា ក្រុមហ៊ុនមួយចំនួន បច្ចុប្បន្នភាពនៃប្រតិបត្តិការអាជីវកម្មរបស់ខ្លួន និងបានស្វែងរកកិច្ចសហប្រតិបត្តិការលើវិស័យមួយចំនួន ជាមួយកម្ពុជា ជាពិសេសវិស័យដឹកជញ្ជូន រួមទាំងការលើកកម្ពស់បញ្ហាសុវត្ថិភាពចរាចរណ៍ និងវិស័យភស្តុភារកម្ម ក្រោយវិបត្តិជំងឺកូវីដ-១៩ ដើម្បីជំរុញសកម្មភាពពាណិជ្ជកម្ម និងទំនាក់ទំនងពាណិជ្ជកម្មរវាងកម្ពុជា និងបណ្ដាក្រុមហ៊ុនអាមេរិកមួយចំនួនឲ្យកាន់តែ មានសភាពខ្លាំងក្លាឡើងថែមទៀត។

លោកទេសរដ្ឋមន្ត្រី ស៊ុន ចាន់ថុល ក៏បានជំរុញលើកទឹកចិត្តឱ្យក្រុមហ៊ុន Visa សហការជាមួយក្រសួង ក្នុងការផ្តល់សេវាទូទាត់តាមអនឡាញ និងជំរុញឱ្យក្រុមហ៊ុន Ford សិក្សាលទ្ធភាពរបស់ខ្លួនលើការផ្តល់សេវាត្រួតពិនិត្យលក្ខណៈបច្ចេកទេសយានយន្ត បន្ថែមលើមជ្ឈមណ្ឌលសេវាដែលខ្លួនមាននៅកម្ពុជា ដើម្បីបង្វិតសេវាឱ្យខិតជិតប្រជាពលរដ្ឋ ដោយ ហេតុថាបច្ចុប្បន្ននេះក្រុមហ៊ុនត្រួតពិនិត្យលក្ខណៈបច្ចេកទេសយានយន្តដែលកំពុងប្រតិបត្តិការនៅកម្ពុជា មានក្រុមហ៊ុនចំនួនតែពីរប៉ុណ្ណោះ៕