ដោយ ៖ រ៉ា​ណេ​ត

ភ្នំពេញ ៖ រាជរដ្ឋាភិបាល​តាមរ​យៈ​ក្រុមប្រឹក្សា​អភិវឌ្ឍន៍​កម្ពុជា​បានសម្រេច​ឆ្លើយតប​តាម​សំណើសុំ​វិនិយោគ​របស់​ក្រុមហ៊ុន​ចំនួន៧ ដែល​ស្ថិតនៅ​រាជធានី​ភ្នំពេញ​ចំនួន ៣គម្រោង និង​នៅ​ខេត្តស្វាយរៀង​ចំនួន ៤គម្រោង។

គណៈកម្មាធិការ​វិនិយោគ​កម្ពុជា​នៃ​ក្រុមប្រឹក្សា​អភិវឌ្ឍន៍​កម្ពុជា បានសម្រេច​ចេញ​វិញ្ញាបនបត្រ​ចុះបញ្ជី​ជា​ស្ថាពរ ជូន​ដល់​ក្រុមហ៊ុន​ចំនួន៧ ដែល​វិនិយោគ​នៅក្នុង​វិស័យ​ឧស្សាហកម្ម និង​កាត់ដេរ ដែលមាន​រាយ​ឈ្មោះ​ដូចខាងក្រោម ៖

១. GLOBAL ASIA APPAREL (CAMBODIA) CO., LTD គម្រោង​បង្កើត​រោងចក្រ​កាត់ដេរ​សម្លៀកបំពាក់​ដែលមាន​ទីតាំង​វិនិយោគ​ស្ថិតនៅ​ផ្លូវ​អន្លង់​គង ភូមិ​អន្លង់​គង​ចាស់ សង្កាត់​ព្រៃ​ស ខណ្ឌដង្កោ រាជធានី​ភ្នំពេញ មាន​ទុនវិនិយោគ​ប្រមាណ ៣លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ៩៤៨កន្លែង។

២. SINODEX GARMENT (CAMBODIA) CO., LTD គម្រោង​បង្កើត​រោងចក្រ​កាត់ដេរ​សម្លៀកបំពាក់ ដែលមាន​ទីតាំង​វិនិយោគ​ស្ថិតនៅ​ភូមិ​ជ្រៃ​កោង សង្កាត់​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ មាន​ទុនវិនិយោគ​ប្រមាណ ៣លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ៧២០កន្លែង។

៣. GOOD PLUS (CAMBODIA) MANUFACTURE CO., LTD គម្រោង​កាត់ដេរ​សម្លៀក​បំពាក់ និង​ផលិត​ម៉ាស់ ដែលមាន​ទីតាំង​វិនិយោគ​ស្ថិតនៅ​ផ្លូវជាតិ​លេខ៣ ភូមិ​ស្រែ​ញ័រ សង្កាត់​ពងទឹក ខណ្ឌដង្កោ រាជធានី​ភ្នំពេញ មាន​ទុនវិនិយោគ​ប្រមាណ ២,៧លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ៧៦៤កន្លែង។

៤- Biao Xin Sheng Packaging and Printing Co., Ltd.: គម្រោង​បង្កើត​រោងចក្រ​ផលិត​តែម​កង់ បោះពុម្ព​ក្រដាស់ និង​សម្ភារ:វេច​ខ្ចប់​គ្រប់​ប្រភេទ មាន​ទីតាំង​ស្ថិតនៅក្នុង​តំបន់​សេដ្ឋកិច្ច​ពិសេស តាយសេង បាវិត ខេត្តស្វាយរៀង, មាន​ទុនវិនិយោគ​ចំនួន ១លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ៣៩០កន្លែង។

៥- Leadone International  Co., Ltd.: គម្រោង​បង្កើត​រោងចក្រ​ផលិត​ផលិតផល​ផ្លា​ស្ទិ​ក គ្រាប់​ជ័រ និង​ស្បែក​សិប្បនិម្មិត​គ្រប់​ប្រភេទ, មាន​ទីតាំង​ស្ថិតនៅក្នុង​តំបន់​សេដ្ឋកិច្ច​ពិសេស ស្វាយរៀង ហ្គី​ហ្គា រី​ស៍ស ខេត្តស្វាយរៀង, មាន​ទុនវិនិយោគ​ចំនួន ២,៨លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ២១០កន្លែង។

៦- New Phoenix Development Industry Co., Ltd.: គម្រោង​បង្កើត​រោងចក្រ​ផលិត​អំពូល​ភ្លើង​គ្រឿង​បង្គុំ​អំពូល និង​ខ្សែភ្លើង, មាន​ទីតាំង​ស្ថិតនៅក្នុង​តំបន់​សេដ្ឋកិច្ច​ពិសេស តាយសេង បាវិត ខេត្តស្វាយរៀង, មាន​ទុនវិនិយោគ​ចំនួន ៩លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ៨៣០កន្លែង។

៧- Simple Packing Products Co., Ltd.: គម្រោង​បង្កើត​រោងចក្រ​ផលិត​កេស​កា​តុង និង​សម្ភា​រៈវេច​ខ្ចប់​គ្រប់​ប្រភេទ, មាន​ទីតាំង​ស្ថិតនៅក្នុង​តំបន់​សេដ្ឋកិច្ច​ពិសេស តាយសេង បាវិត ខេត្តស្វាយរៀង, មាន​ទុនវិនិយោគ​ចំនួន ២,១២លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ២២០កន្លែង៕

ដោយ ៖ គង់ ម៉ាលីន

មណ្ឌលគិរី ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា នាពេលថ្មីៗនេះ បានចេញអនុក្រឹត្យមួយ ដោយសម្រេចបញ្ចប់មុខតំណែងលោក ស៊ិន វណ្ណវុឌ្ឍ អភិបាលស្រុកកោះញែក ខេត្តមណ្ឌលគិរី ដោយអោយមកបម្រើការងារនៅទីស្តីការក្រសួងមហាផ្ទៃវិញ ។

នេះបើយោងតាមអនុក្រឹត្យ ដែល ទើបទទួលបាន នៅរសៀលថ្ងៃទី២៩ ខែកញ្ញា ឆ្នាំ២០២០ នេះ ។

ប្រភពព័ត៌មានច្បាស់ការណ៍ ទម្លាយអោយដឹងថា នៅមានមន្ត្រីគ្រាក់មួយចំនួនទៀត ក៏អាចប្រឈមនឹងការបញ្ចប់តំណែង ផងដែរ ។

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី២២ ខែកក្កដា ឆ្នាំ២០២០ កន្លងទៅ បានចេញសេចក្តីសម្រេចមួយ ស្តីពី «ការបង្កើតក្រុមការងារអន្តរក្រសួង ដើម្បីចុះសិក្សាស្រាវជ្រាវ លើករណីការកាប់រាន ទន្ទ្រានកាន់កាប់ដីព្រៃខុសច្បាប់ ក្នុងតំបន់ការពារធម្មជាតិ ស្ថិតក្នុងខេត្តមណ្ឌលគិរី» ។

តាមប្រភពព័ត៌មានច្បាស់ការណ៍ មួយ បានអោយដឹងថា ការស៊ើបអង្កេតបទល្មើសនេះ កំពុងដំណើរការយ៉ាងក្តៅគគុក ខណៈមន្ត្រីគ្រាក់ៗប្រមាណ១០នាក់ នៅខេត្តមណ្ឌលគិរី ប្រឈមនឹងការអស់តំណែង ។

មន្ត្រីគ្រាក់ៗប្រមាណ១០នាក់ នៅខេត្តមណ្ឌលគិរី ដែលប្រឈមនឹងការអស់តំណែង នោះ រួមមាន ៖
១,លោក ស្វាយ សំអ៊ាង អភិបាលខេត្តមណ្ឌលគិរី ។
២,លោក ណយ ស្រុន សមាជិកព្រឹទ្ធសភាភូមិភាគទី៨ ។
៣,លោក ស៊ិន វណ្ណវុឌ្ឈ អភិបាលស្រុកកោះញែក ។
៤,លោក សៀក មុន្នី អភិបាលស្រុកអូរាំង ។
៥,លោកស្រី ថ្ចាន់ ត្រែល ចៅសង្កាត់សែនមនោរម្យ ។
៦,លោក ប៊ុត សំអែល មេឃុំស្រែខ្ទុម ។
៧,លោក ពឿប ពេ មេឃុំស្រែព្រះ ។
៨,លោក សុក សេរ៉ា នាយករងរដ្ឋបាលសាលាខេត្តមណ្ឌលគិរី ។
៩,លោកឧត្តមសេនីយ៍ ជេត ហ៊ាង មេបញ្ជាការរងកងឯកភាពស្ថាបនាថ្នល់លេខ៧១៦ ជាប្រធានការដ្ឋានខ្សែក្រវាត់ព្រំដែន ។
១០,លោក ថាន ប៊ុនធឿន មេបញ្ជាការសឹករងស្រុកកោះញែក ។

នេះគ្រាន់តែជាបញ្ជីឈ្មោះមិនផ្លូវការ ដែលប្រភពព័ត៌មានបង្ហើបប្រាប់តែប៉ុណ្ណោះ ដោយការសម្រេចយ៉ាងណា នោះ នឹងដឹងពិតប្រាកដ នាពេលឆាប់ៗខាងមុខនេះ ។

យោងតាមសេចក្តីសម្រេច របស់សម្តេចក្រឡាហោម ស ខេង បានអោយដឹងថា ក្រុមការងារនេះ មានតួនាទី និង ភារកិច្ច ដូចខាងក្រោម ៖
-ចុះសិក្សាស្រាវជ្រាវលើករណីនីមួយៗនៃការកាប់រាន ទន្ទ្រានកាន់កាប់ដីព្រៃខុសច្បាប់ ក្នុងតំបន់ការពារធម្មជាតិ ស្ថិតក្នុងខេត្តមណ្ឌលគិរី តាមរបាយការណ៍របស់ទីស្តីការគណៈរដ្ឋមន្ត្រី ចុះថ្ងៃទី១២ ខែមិថុនា ឆ្នាំ២០២០ អោយបានជាក់ស្តែង និង ប្រមូលឯកសារ និង ភស្តុតាង នានា ពាក់ព័ន្ធជាមួយមន្ត្រី និង អ្នកពាក់ព័ន្ធសកម្មភាព ទាំងនោះ ។
-សហការជាមួយអាជ្ញាធរមានសមត្ថកិច្ចពាក់ព័ន្ធនៅរដ្ឋបាលថ្នាក់ក្រោមជាតិ ក្នុងដំណើរការចុះស្រាវជ្រាវនេះ ។
-សិក្សានិងលើកយោបល់អំពីវិធានការដោះស្រាយសមស្របនានាចំពោះករណីនីមួយៗ តាមការជាក់ស្តែង ។
-រៀបចំរបាយការណ៍អំពីលទ្ធផលនៃការចុះពិនិត្យសិក្សា និង វិធានការដោះស្រាយនានា ដើម្បីគោរពស្នើសុំគោលការណ៍ពិនិត្យ និង សម្រេចដ៏ខ្ពង់ខ្ពស់ពី សម្តេចក្រឡាហោម ។
-អនុវត្តភារកិច្ចផ្សេងទៀត តាមការប្រគល់ពី សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។

ជាការកត់សម្គាល់ សេចក្តីសម្រេចរបស់ សម្តេច ស ខេង នាពេលនេះ ធ្វើឡើងក្រោយពីសមត្ថកិច្ចអង្គភាពប្រឆាំងអំពើពុករលួយ បានចាប់ខ្លួនលោក សេង សុវណ្ណារ៉ា អតីតអនុរដ្ឋលេខាធិការក្រសួងយុត្តិធម៌ ពាក់ព័ន្ធករណីឈូសឆាយ និង ទន្ទ្រានយកដីព្រៃចំការស្រស់សាធារណៈរបស់រដ្ឋ ប្រមាណ១ពាន់ហិកតាធ្វើជាកម្មសិទ្ធិផ្ទាល់ខ្លួន នៅចំណុចភូមិអន្ត្រេះ ឃុំអរបួនលើ ស្រុកកោះញែក ខេត្តមណ្ឌលគិរី ។

ជាមួយគ្នានេះ ឯកសារមួយចំនួន ដែលពាក់ព័ន្ធគ្នា បង្ហាញពីការឃុបឃិតប្រព្រឹត្តអំពើពុករលួយជាប្រព័ន្ធ មានតាំងពីមេភូមិ មេឃុំ អភិបាលស្រុកកោះញែក និង លោក ស្វាយ សំអ៊ាង អភិបាលខេត្តមណ្ឌលគិរី ជាដើម ៕

ដោយ ៖ គង់ ម៉ាលីន

ភ្នំពេញ ៖ ប្រមុខការទូតកម្ពុជា លោកឧបនាយករដ្ឋមន្ត្រី ប្រាក់ សុខុន បានបង្ហាញពីការស្វាគមន៍ និងការគាំទ្រយ៉ាងពេញទំហឹងរបស់កម្ពុជា ចំពោះសំណើរបស់សាធារណរដ្ឋកូរ៉េ ក្នុងការតម្លើងកម្រិតនៃកិច្ចសហប្រតិបត្តិការមេគង្គ-សាធារណរដ្ឋកូរ៉េ ទៅជាភាពជាដៃគូយុទ្ធសាស្ត្រ ដែលនេះស្របទៅ នឹងគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន កាលពីឆ្នាំមុន ក្នុងការតម្លើង កម្រិតយន្តការនៃកិច្ចប្រជុំនេះ ទៅដល់កម្រិតកិច្ចប្រជុំកំពូល។

ការបង្ហាញជំហរនេះ បានធ្វើឡើងក្នុងកិច្ចប្រជុំរដ្ឋមន្ត្រីការបរទេសមេគង្គ-សាធារណរដ្ឋកូរ៉េលើកទី១០ តាម ប្រព័ន្ធវីដេអូ កាលពីថ្ងៃទី២៨ ខែកញ្ញា ឆ្នាំ២០២០។

លោកឧបនាយករដ្ឋមន្ត្រី ប្រាក់ សុខុន ក៏បានគូស បញ្ជាក់អំពីការបញ្ចប់ដោយជោគជ័យនៃគម្រោង «ការគ្រប់គ្រង និងការអភិវឌ្ឍធនធានទឹក នៅលើ
ដងទន្លេមេគង្គភ្ជាប់ទៅនឹងបឹងទន្លេសាប»។ បន្ថែមពីនេះ លោក ក៏បានថ្លែងអំណរគុណយ៉ាងជ្រាលជ្រៅចំពោះជំនួយមនុស្សធម៌របស់ សាធារណរដ្ឋកូរ៉េ ដែលមានទឹកប្រាក់ប្រមាណ ៣០០.០០០ដុល្លារអាមេរិក ក្នុងនោះ រួមមានបរិក្ខារវេជ្ជសាស្ត្រសម្រាប់ កម្ពុជាក្នុងការប្រយុទ្ធប្រឆាំងនឹងជំងឺរាតត្បាតកូវីដ-១៩។

លោកឧបនាយករដ្ឋមន្រ្តី បានថ្លែងនៅក្នុងអង្គប្រជុំថា «ផ្អែកលើលក្ខណៈសម្បត្តិយ៉ាងជាក់ស្តែង យើងសូមកោតសរសើរចំពោះការប្តេជ្ញាចិត្តរបស់សាធារណរដ្ឋកូរ៉េ ក្នុងការរួមចំណែក និងការយកចិត្តទុកដាក់ជាចម្បងលើការអភិវឌ្ឍនៅក្នុងតំបន់មេគង្គ និងការសម្រេចឱ្យបាននូវសហគមន៍អាស៊ាន ដែលជា វិសាលភាពដ៏ធំធេងនៅក្នុងក្របខ័ណ្ឌនេះ។ ដោយ ផ្តោតលើនិរន្តរភាពដ៏យូរអង្វែងនៃកិច្ចសហប្រតិបត្តិការរបស់យើង ខ្ញុំមានទស្សនៈថា ជំនួយអភិវឌ្ឍន៍ គ្រាន់តែជាផ្នែកមួយនៃរឿងប៉ុណ្ណោះ។ ក្នុងអំឡុងពេលនៃការស្តារឡើងវិញនូវសេដ្ឋកិច្ច ក្រោយការយកឈ្នះ ជំងឺរាតត្បាតកូវីដ-១៩ ភាពធន់នៃប្រជាជាតិរបស់យើង គឺពឹងផ្អែកលើសមត្ថភាព របស់រដ្ឋាភិបាល រៀងៗខ្លួន ដើម្បីជំរុញសេដ្ឋកិច្ចរបស់យើងតាមរយៈពាណិជ្ជកម្ម ការវិនិយោគ និងទេសចរណ៍។ នេះជាអ្វី ដែលខ្ញុំរំពឹងថា ការចូលរួមចំណែកយ៉ាងសកម្មរបស់វិស័យឯកជន នឹងជំរុញកាលានុវត្តភាពអាជីវកម្ម និងវិនិយោគថ្មីៗ ក្នុងការបង្កើតសក្ដានុពលការងារថ្មីៗ សមស្របទៅតាមបរិបទក្រោយការ យកឈ្នះ ជំងឺ រាតត្បាត កូវីដ-១៩»។

រដ្ឋមន្រ្តីនៃបណ្តាប្រទេសមេគង្គ បានសង្កត់ធ្ងន់ជាថ្មីម្តងទៀតពីការគាំទ្រយ៉ាងមុតមាំចំពោះ «គោល នយោបាយភាគខាងត្បូងថ្មី» របស់សាធារណរដ្ឋកូរ៉េ ដោយផ្អែកលើសសរស្តម្ភបី គឺ ប្រជាជន វិបុលភាព និងសន្តិភាព ដូចមានគូសបញ្ជាក់ក្នុងសេចក្ដីថ្លែងការណ៍ទន្លេមេគង្គ-ទន្លេហាន។ រដ្ឋមន្ត្រី ការបរទេសទាំងអស់ បានសង្កត់ធ្ងន់ពីសារសំខាន់នៃកិច្ចសហប្រតិបត្តិការកាន់តែរឹងមាំរវាងវិស័យ ឯកជន និងវិស័យ សាធារណៈ ដើម្បីការអភិវឌ្ឍប្រកបដោយបរិយាប័ន្ននិងចីរភាពនៅក្នុងតំបន់ និងបាន ចែក រំលែក នូវទស្សនៈថា វេទិកាធុរកិច្ចមេគង្គ-សាធារណរដ្ឋកូរ៉េ និងក្រុមប្រឹក្សាធុរកិច្ចមេគង្គ-សាធាណរដ្ឋកូរ៉េ បានពង្រឹងនូវចំណងទំនាក់ទំនងសេដ្ឋកិច្ច រវាងសាធារណរដ្ឋកូរ៉េ និងបណ្ដាប្រទេសមេគង្គ។ លើសពីនេះ លោកជំទាវ កាង ក្យុងវ៉ា បានប្រកាសនៅក្នុងកិច្ចប្រជុំ អំពីសំណើរបស់សាធារណរដ្ឋកូរ៉េក្នុងការតម្លើង កម្រិតនៃកិច្ចសហប្រតិបត្តិការមេគង្គ-សាធារណរដ្ឋកូរ៉េ ទៅជាភាពជាដៃគូយុទ្ធសាស្ត្រ។

កិច្ចប្រជុំបានគូសបញ្ជាក់សារជាថ្មីពីតួនាទីសំខាន់នៃភាពជាដៃគូមេគង្គ-សាធារណរដ្ឋកូរ៉េ ក្នុងការ កាត់បន្ថយគម្លាតអភិវឌ្ឍន៍នៅក្នុងចំណោមប្រទេសអាស៊ាន និងក្នុងការសម្រេចបាននូវ «ចក្ខុវិស័យ សហគមន៍ អាស៊ានឆ្នាំ២០២៥»។

កិច្ចប្រជុំនេះ បានអនុម័តលើឯកសារគោលចំនួន០២គឺ (១) «សេចក្ដីប្រកាសសហប្រធាននៃ កិច្ចប្រជុំរដ្ឋមន្ត្រី ការបរទេសមេគង្គ-សាធារណរដ្ឋកូរ៉េលើកទី១០» និង (២) «ផែនការសកម្មភាពឆ្នាំ ២០២១- ២០២៥ ស្ដីពីកិច្ច សហប្រតិបត្តិការមេគង្គ-សាធារណរដ្ឋកូរ៉េ សម្រាប់ការអនុវត្តនូវសេចក្ដី ថ្លែងការណ៍ទន្លេមេគង្គ-ទន្លេហាន» ៕

ដោយវុត្ថា

សៀងហៃ៖ ទីក្រុងសៀងហៃ នៃប្រទេសចិន នឹងចាប់ផ្តើមសាងសង់អគារការិយាល័យខ្ពស់លំដាប់ទី ៣ ដែលមានឈ្មោះថា North Bund ស្ថិតនៅក្នុងក្បែមាត់ស្ទឹងនៅក្នុងសង្កាត់ Hongkou នៅក្នុងឆ្នាំ ២០២១ ខាងមុខនេះ ។

តាមការចុះផ្សាយរបស់គេហទំព័រ www.shine.cn ឱ្យដឹងថា
រចនាសម្ព័ន្ធអគារការិយាល័យដែលគ្រោងនឹងសសាងសង់នេះ មានកំពស់ ៤៨០ ម៉ែត្រ ដែលនឹងលេចត្រដែតស្របទៅនឹងអគារផ្សេងទៀតនៅតាមដងទន្លេ Huangpu ។

អគារការិយាល័យថ្មីនេះនឹងក្លាយជាអគារខ្ពស់ជាងគេនៅទីក្រុងតំបន់ Puxi ខ្ពស់ជាងអគារ Sinar Mas Plaza tower ដែលមានកំពស់ ៣២០ ម៉ែត្រ និងជាអាគារខ្ពស់ជាងគេលំដាប់ទី ៣ នៅក្នុងទីក្រុង បន្ទាប់ពីអគារ Shanghai Tower ដែលមានកម្ពស់ ៦៣២ ម៉ែត្រនិងអគារមជ្ឈមណ្ឌលហិរញ្ញវត្ថុពិភពលោកសៀងហៃ (Shanghai World Financial Center) ដែលមានកំពស់ ៤៩២ ម៉ែត្រ។

លោក Liu Jun នាយកប្រតិបត្តិនៃការិយាល័យអភិវឌ្ឍន៍ North Bund Development Office បានឱ្យដឹងថា រហូតមដល់ពេលនេះ មានក្រុមហ៊ុនជាង ១០ ទាំងនៅក្នុងនិងក្រៅប្រទេសកំពុងចរចាជាមួយ North Bund ដើម្បីបោះទីស្នាក់ការកណ្តាលឬការិយាល័យនៅក្នុងអគារថ្មី។

លោកបន្ថែមថា នៅជុំវិញនៃអគារ North Bund ថ្មីនេះ មានគម្រោងអភិវឌ្ឍន៍ធំៗជាច្រើនដែលសាងសង់ជិតនឹងបញ្ចប់រួមមានផ្សារទំនើប Raffles City ទី ៣ និងរោងមហោស្រព Broadway ដែលបានចូលមកទីក្រុងសៀងហៃជាលើកដំបូង។ផ្សារទំនើបនឹងត្រូវបើកជាសាធារណៈនៅឆ្នាំក្រោយនឹងគ្របដណ្តប់លើផ្ទៃដី ១២០,០០០ ម៉ែត្រការ៉េដែលមាន ៣ ជាន់ពីលើដីនិងជាន់ក្រោមពីរជាន់៕

ដោយ៖ ប៊ី
ភ្នំពេញ៖ សកម្មភាពសេដ្ឋកិច្ចផ្ទៃក្នុងរបស់កម្ពុជាបានចាប់ផ្តើមកម្រើកបណ្តើរៗឆ្ពោះទៅរកប្រក្រតីភាពឡើងវិញហើយក្រោយពីមានការសម្រាលលើវិធានការរក្សាគម្លាតសុវត្ថិភាពសង្គម។ នេះបើយោងតាមការរបាយការណ៍ធនាគារពិភពលោក (World Bank) ដែលគេទំព័រ Propertyarea.asia ទទួលបាននៅថ្ងៃទី២៩ ខែកញ្ញា ឆ្នាំ២០២០នេះ។

ធនាគារពិភពលោក បានឱ្យដឹងថា តម្រូវការក្នុងស្រុករួមមានការធ្វើដំណើរនិងសកម្មភាពទេសចរណ៍ក្នុងស្រុកផងកំពុងតែងើបឡើងវិញ។ កម្ពុជានិងចិនបានប្រកាសបញ្ចប់ការចរចកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ (CCFTA)រួចហើយៗកិច្ចព្រមព្រៀងនេះទំនងជានឹងចូលជាធរមានក្នុងឆ្នាំ២០២១។

ធនាគារពិភពលោក បានឱ្យដឹងទៀតថា នៅក្នុងពាក់កណ្តាលឆ្នាំដំបូងនៃឆ្នាំ២០២០ គម្រោងវិនិយោគផ្ទាល់ពីបរទេសដែលទទួលការអនុម័តរួចមានតម្លៃសរុបកើនប្រហែល ៤០ភាគរយប្រៀបធៀបទៅនឹងរយៈកាលដូចគ្នាក្នុងឆ្នាំ២០១៩។
នៅមុនពេលមានវិបត្តិសកលកើតឡើងដោយសារការផ្ទុះរាលដាលជំងឺកូវីដ-១៩ កម្ពុជាមានសេដ្ឋកិច្ចដែលមានកំណើនដល់ទៅ ៧,១ភាគរយក្នុងឆ្នាំ២០១៩ ។

ទោះបីជាយ៉ាងណាក៏ដោយ នៅឆ្នាំ២០២០នេះ ការរាលដាលជំងឺនេះបានប៉ះពាល់យ៉ាងដំណំទៅលើក្បាលម៉ាស៊ីនកំណើនធំៗរបស់កម្ពុជា ពិសេសវិស័យសំណង់ ទេសចរណ៍ និងផ្នែកនាំចេញទំនិញ ដែលទាំងអស់នេះមានចំណែកជាង ៧០ភាគរយ
ក្នុងកំណើនសរុប និង ៣៩ភាគរយ នៃការងារមានប្រាក់កម្រៃទាំងអស់ ក្នុងឆ្នាំ២០១៩។ ប៉ុន្តែជំងឺកូវីដ-១៩ បានធ្វើឱ្យវិស័យសំណង់ និងអចលទ្រព្យនៅទ្រឹងដែលជាវិស័យមានការពឹងពាក់ខ្លាំងទៅលើការវិនិយោគពីបរទេស។

ការនាំចូលដែកនិងស៊ីម៉ង់ត៍ក្នុងកំឡុង៦ខែដំបូងនៃឆ្នាំ២០២០ បានធ្លាក់ចុះ៤៥,១ភាគរយ និង៨,២ភាគរយ រៀងៗខ្លួន ប្រៀបធៀបទៅនឹងឆ្នាំមុន ដោយគម្រោងសាងសង់ធំៗមួយចំនួនត្រូវផ្អាកសកម្មភាព។
ដូចគ្នានេះដែរ ការរាលដាលជំងឺទាញវិស័យនាំចេញធំៗរបស់កម្ពុជាឱ្យធ្លាក់ចុះ។ វិស័យទេសចរណ៍និងបដិសណ្ឋារកិច្ចរបស់កម្ពុជាបានដួលរលំ ដោយសារតែការរឹតត្បិតលើការធ្វើដំណើរនិងវិធានការរាំងខ្ទប់ឱ្យនៅមួយកន្លែង។ ចំនួនភ្ញៀវមកដល់បានធ្លាក់ចុះប្រហែល ៦៤,៦ភាគរយ ក្នុងកំឡុងពេល៦ខែដំបូងនៃឆ្នាំ២០២០។

ការធ្លាក់ចុះយ៉ាងគំហុកនូវតម្រូវការលើសកលលោក បានបណ្តាលឱ្យវិស័យកមន្តកម្មរបស់កម្ពុជាចុះខ្សោយ។

ការនាំចេញផលិតផលកាត់ដេរ, សម្ភារធ្វើដំណើរ, និងស្បែកជើង បានធ្លាក់ចុះ ៧,២ភាគរយក្នុងកំឡុងពេល៦ខែដំបូងនៃឆ្នាំ២០២០ ហើយទន្ទឹមគ្នានោះ ការនាំចូលក្រណាត់សម្រាប់យកមកកាត់ដេរ បានធ្លាក់ចុះ ៨៥,៤ភាគរយ៕