ដោយៈ រ៉ាណេត

មណ្ឌលគីរីៈ ក្រុមហ៊ុនចំនួន២ ក្នុងចំណោម១០ដែលទទួលបានអាជ្ញាប័ណ្ណសិក្សា និងរុករករ៉ែមាសនៅក្នុងខេត្តមណ្ឌលគីរី កាលពីពេលកន្លងទៅនោះបានបង្ហើបប្រាប់ថា យ៉ាងយូរនៅត្រឹមចុងឆ្នាំ២០២០ ឬដើមឆ្នាំ២០២១ លទ្ធភាពនៃការយកធនធានរ៉ែមាសនឹងត្រូវទទួលបានយ៉ាងប្រាកដ។

លោកអភិបាលខេត្តមណ្ឌលគីរី លោក ស្វាយ សំអ៊ាង បានមានប្រសាសន៍នៅក្នុងសន្និសីទសារព័ត៌មាន នៅទីស្ដីការគណរដ្ឋមន្ត្រីកាលពីព្រឹកថ្ងៃទី១៦ ខែកក្កដា ឆ្នាំ២០២០ បានឱ្យដឹងថា សម្រាប់ធនធានរ៉ែមាសនៅក្នុងខេត្តមណ្ឌលគីរី ដែលមានក្រុមហ៊ុនជាតិនិង​អន្តរជាតិជាច្រើនកំពុងសិក្សា នឹងត្រូវបង្ហាញលទ្ធផល និងអាចទាញយកបាននៅត្រឹមចុងឆ្នាំ២០២០ ឬយ៉ាងយូរនៅដើមឆ្នាំ២០២១។

លោកបានបញ្ជាក់ថា “នៅក្នុងចំណោមក្រុមហ៊ុនចំនួន១០ ដែលទទួលបានអជ្ញារបណ្ណក្នុងការសិក្សា និងរុករករ៉ែមាស មានក្រុមហ៊ុនអន្តរជាតិចំនួន២ ដែលអាចមានលទ្ធភាពក្នុងយកយលរ៉ែមាស រួមមានក្រុមហ៊ុន រឺនីសង់ របស់ប្រទេសអូស្ដ្រាលី និងក្រុមហ៊ុន រ៉ុងឆេង របស់ប្រទេសចិន ខណៈដែលបច្ចុប្បន្នក្រុមហ៊ុនទាំងនេះកំពុងតែរៀបចំខ្សែសង្វាក់ផលិតកម្មរបស់ខ្លួនយ៉ាងយកចិត្តទុកដាក់ និងប្រកបដោយសុវត្ថិភាពខ្ពស់”។

នៅខេត្តមណ្ឌលគិរី មានសក្ដានុពលរ៉ែ មានរ៉ែច្រើនប្រភេទដូចជា រ៉ែមាស សំណរ បុកស៊ីត។ល។ រហូតមកដល់បច្ចុប្បន្ននេះ មានក្រុមហ៊ុនសិក្សាជំរករ៉ែចំនួន ១០ក្រុមហ៊ុន ស្មើនឹង១១អាជ្ញាប័ណ្ណ។ តាមរយៈក្រុមហ៊ុនដែលកំពុងមានវត្តមាន និងដំណើរការរុករករ៉ែមាសទាំងអស់នេះ បាននាំមកនូវចំណូលដល់សេដ្ឋកិច្ចជាតិ និងនៅក្នុងតំបន់តាមរយៈការចូលរួមចំណែកអភិវឌ្ឍន៍ហេដ្ឋារចនាសម្ព័ន្ធ ដូចជាផ្លូវថ្នល់ ស្ពាន អណ្ដូងទឹក ការជីកប្រឡាយរំដោះទឹកភ្លៀង ដែលជាការជួយដោះស្រាយបញ្ហា នៅតាមមូលដ្ឋានមួយចំនួនផងដែរ៕

ដោយវុត្ថា

ភ្នំពេញៈប្រធានសមាគមនភ្នាក់ងារ និងវាយតម្លៃអចលនវត្ថុកម្ពុជាបានមើលឃើ​ញ​ពីឱកាសវិនិយោគលើវិស័យអចលនទ្រព្យ និងការអភិវឌ្ឍគម្រោងផ្សេងៗ នៅតំបន់កោះរ៉ុង បន្ទាប់ក្រុមហ៊ុន  Royal Group របស់អ្នកឧកញ៉ាគិត ម៉េង បានចុះហត្ថលេខាជាមួយក្រុមហ៊ុនចិនអភិវឌ្ឍន៍ហេដ្ឋារចនាសម្ព័ន្ធសំខាន់ៗនៅក្នុងតំបន់កោះនេះ។

លោកច្រឹក សុខនីម ប្រធានសមាគមនភ្នាក់ងារ និងវាយតម្លៃអចលនវត្ថុកម្ពុជាបា​ន​ប្រាប់គេហទំព័រPropertyarea.asia នៅថ្ងៃទី ១៦ ខែកក្កដា ឆ្នាំ ២០២០នេះ ឱ្យដឹងថា បន្ទាប់មានការចុះហត្ថលេខារវាងក្រុមហ៊ុន Royal Group និងក្រុមហ៊ុនចិនអភិវឌ្ឍន៍នៅតំបន់កោះរ៉ុងកាលពីពេលថ្មីៗនេះ គឹជាឱ្យឱកាសថ្មីមួយទៀត សម្រាប់វិនិយោគលើវិស័យអចលនទ្រព្យនៅទីនោះ។

លោកបន្តថា “តំបន់កោះរ៉ុងនាពេលបច្ចុប្បន្ននេះ ត្រូវបានគេអភិឌ្ឍន៍ឱ្យមានហេដ្ឋារចនាសម្ព័ន្ធផ្លូវថ្នល់ល្អ ដែលទើបត្រូវបានចុះអនុស្សារណៈថ្មីៗនេះ រវាងក្រុមហ៊ុនពីរកន្លងមកនេះ ហើយតំបន់នេះ នឹងក្លាយជាតំបន់សម្រាកលម្ហែកាយ ដ៏ទាក់ទាញបន្ថែមទៀត សម្រាប់ភ្ញៀវទេសចរនៅរៀងរាសល់ចុងសប្តាហ៍នីមួយៗ”។

លោកបន្ថែមថា តំបន់កោះរ៉ុងបច្ចុប្បន្នមានឆ្នេរច្រើន និងកោះក៏ច្រើនដែរ ដែលមានទេសភាពស្រស់ស្អាត ហើយនេះនឹងឆ្លុះបញ្ចាំងពីការទាក់ទាញ គម្រោងវិនិយោគលើវិស័យអចលនទ្រព្យ ទៅកាន់ទីនោះជាពិសេសនៅតំបន់កោះរ៉ុងនេះ  ហើយនឹងបន្តទាក់ទាញគម្រោងវិនិយោគបន្តិចម្តងៗចាប់ពីពេលនេះតទៅមុខ។

ក្រុមហ៊ុនរ៉ូយ៉ាល់គ្រុបកោះរ៉ុង និងក្រុមហ៊ុន ស៊ីណូ ហៃដ្រូ កាលពីពេលថ្មីៗនេះ បានចុះហត្ថលេខា លើកិច្ចព្រមព្រៀងសាងសង់ផ្លូវបេតុងប្រវែង៧០គីឡូម៉ែត្រ ទទឹង៨ម៉ែត្រ នៅលើតំបន់អភិវឌ្ឍន៍កោះរ៉ុង ក្រុងកោះរ៉ុង ខេត្តព្រះសីហនុ ក្រោមទុនវិនិយោគ៣៥លានដុល្លារអាមេរិក។

អភិបាលខេត្ដព្រះសីហនុ លោកគួច ចំរើនបានថ្លែងថា ការចុះហត្ថលេខា លើកិច្ចព្រមព្រៀងសាងសង់ផ្លូវបេតុងប្រវែង៧០គីឡូម៉ែត្រ នៅថ្ងៃនេះរវាងក្រុមហ៊ុនរ៉ូយ៉ាល់គ្រុបកោះរ៉ុង ឌីវេឡុបមេនខមភេនី និងនិងក្រុមហ៊ុនស៊ីណូ ហៃដ្រូខនស្ដ្រាក់សិន នឹងចូលចំណែ​កអភិវឌ្ឍកោះរ៉ុង ដើម្បីបង្កើនភាពទាក់ទាញបន្ថែមទៀត។

លោកបានថ្លែងថា “ក្រុមហ៊ុនស៊ីណូហៃដ្រូ ខនស្ដ្រាក់សិននឹងត្រូវការបទពិសោធន៍ពីរដ្ឋបាលខេត្ត ដែលសាងសង់ហេដ្ឋារចនាសម្ព័ន្ធលើនៅក្រុងព្រះសីហនុ ដើម្បីជំរុញការសាងសង់ផ្លូវនៅលើកោះរ៉ុង ហើយការសាងសង់ផ្លូវបេតុងប្រវែង៧០គីឡូម៉ែត្រ នឹងចំណា​យពេល១៦ខែដើម្បីបញ្ចប់”៕

ដោយៈ ប៊ី

អន្តរជាតិៈ ប្រធានាធិបតីកូរ៉េខាងត្បូងមូន ជេអ៊ីន(Moon Jae-in) បានដាក់ចេញផែនការលើកញ្ចប់ជំរុញសេដ្ឋកិច្ចថ្មីរបស់កូរ៉េ ដែលវិនិយោគទឹកប្រាក់ជាង១៦០ ពាន់ពាន់លានវ៉ុន (១៣៣ពាន់លានដុល្លារ) និងបង្កើតការងារ១,៩លានកន្លែង សម្រាប់រយៈពេល ៥ឆ្នាំខាងមុខ។

ប្រទេស ដែលមានសេដ្ឋកិច្ចធំលំដាប់ទីបួននៅអាស៊ីមួយនេះ បានបង្កើតកញ្ចប់ថវិកានេះ ដើម្បីងើបចេញពីវិបត្តិCovid-19 និងក៏ដូចជាចាកចេញពីកំណើនយឺតនៅទូទាំងពិភពលោក។

លោក Moon បាននិយាយនៅក្នុងកិច្ចប្រជុំជាមួយនៅក្នុងសប្តាស៍នេះថា “កញ្ចប់ថវិកាជំរុញសេដ្ឋកិច្ចរបស់កូរ៉េនេះ គឺជាផែនការគោលថ្មីមួយរបស់យើង ក៏ដូចជាការផ្លាស់ប្តូរគំរូ ដើម្បីឈានឆ្ពោះទៅរកគំរូសេដ្ឋកិច្ច ដែលមានល្បឿនលឿន”។លោកបានបន្តថា “ជាមួយនឹងជំងឺរាតត្បាត ដែលមានឥទ្ធិពលមកលើយើង យើងនឹងមិនអាចពន្យារពេលការផ្លាស់ប្តូរជាប្រវត្តិសាស្ត្រទាំងនេះទៀតបានទេ”។

លោកបានមានប្រសាសន៍ថា កញ្ចប់ជំរុញសេដ្ឋកិច្ចថ្មីមានសសរស្តម្ភពីរ គឺឌីជីថល និងគោលនយោបាយ Green New Deal ដែលគម្រោងរបស់លោក Moon ក្នុងជំរុញសេដ្ឋកិច្ចរបស់ខ្លួន។

ការផ្លាស់ប្តូរចុងក្រោយបានកើតឡើងជិត៣ខែ បន្ទាប់ពីលោកបានស្នើឱ្យមានក្រប​ខ័ណ្ឌគោលនយោបាយកិច្ចព្រមព្រៀងថ្មីរបស់កូរ៉េ ដើម្បីបង្កើតការងារ និងជំរុញកំណើនសេដ្ឋកិច្ច អំឡុងពេលការរីករាលដាលនៃជំងឺរាតត្បាត។

ដោយតាមដានលើផែនការរបស់ប្រធានាធិបតី ប្រធានគោលនយោបាយសារពើពន្ធមិនបង្ហាញពីបញ្ជីតួលេខគោលដៅលម្អិត និងផែនការសកម្មភាពទេ។

លោក Hong Nam-ki ឧបនាយករដ្ឋមន្រ្តី និងជារដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា “ផែនការថ្មីរបស់កូរ៉េគឺខុសគ្នាពីផែនការថ្មី របស់សហរដ្ឋអាមេរិក ដែលផ្តោតច្រើនលើការអភិវឌ្ឍន៍កំពង់ផែ និងគម្រោងសាងសង់ផ្សេងៗ”។

លោកបន្តថា “ផ្ទុយទៅវិញយើងនឹងផ្តោតលើការកសាង “ប្រព័ន្ធទិន្នន័យ”ដើម្បីប ង្កើ​តហេដ្ឋារចនាសម្ព័ន្ធ ដែលដឹកនាំដោយប្រព័ន្ធឌីជីថល ដែលងាយស្រួលនិងរៀបចំមូលដ្ឋានសម្រាប់ការរីកចម្រើនប្រកបដោយចីរភាព បន្ទាប់ពី Covid-19”៕ KOREA HERALD / ASIA News NETWORK៕

ដោយៈរ៉ាណេត

ព្រះសីហនុៈ ក្រសួងដែនដីនគរូបនីយកម្ម និងសំណង់ បានធ្វើការវិភាគទិន្នន័យ និងកំណត់សេណារីយូប្លង់ គោលប្រើប្រាស់ដីសម្រាប់ការអភិវឌ្ឍ និងការអភិរក្សតំបន់បឹងកង្កែប មានគម្រោងអភិវឌ្ឍន៍ធំៗចំនួន៣ នៅក្នុងខេត្តព្រះសីហនុ។

រដ្ឋលេខាធិការក្រសួងដែនដីនគរូបនីយកម្ម និងសំណង់ លោក ប៉ែន សុផល បានមានប្រសាសន៍នៅក្នុងបើកសិក្ខាសាលានាព្រឹកថ្ងៃទី១៦ ខែកក្កដា ឆ្នាំ២០២០ នៅខេត្តព្រះសីហនុថា គម្រោងអភិវឌ្ឍន៍ទាំង៣ទីតាំងរួមមាន ទី១ គម្រោងអភិវឌ្ឍព្រលានយន្តហោះអន្តរជាតិខេត្តព្រះសីហនុ ទី២ គម្រោងអភិវឌ្ឍតំបន់ទេសចរណ៍នាគរាជ និងទី៣គម្រោងអភិវឌ្ឍតំបន់បឹងកង្កែប ។

លោកបានបន្តថា “ការអភិវឌ្ឍបឹងបង្កែប អភិវឌ្ឍន៍ប្រកបដោយភាពឆ្លាតវៃ ដោយធ្វើការអភិវឌ្ឍត្រឹមត្រូវសម្រាប់កូនចៅជំនាន់ក្រោយ និងបរិយាបន្ន ការចូលរួមប្រកប​ដោ​យភាពរីកចម្រើនទាំងអស់គ្នានៅជុំវិញបឹងកង្កែប”។លោកបន្តថា “ការអភិវឌ្ឍបៃតង កិច្ចការពារធម្មជាតិ និងបរិស្ថាន ការពារសិទ្ធិ និងផលប្រយោជន៍សាធារណៈ និងឯកជនក្នុងការអភិវឌ្ឍ អភិរក្ស ការសាងសង់ ធានាតុល្យភាពនៃការអភិវឌ្ឍ និងអភិរក្សព្រមទាំងទំនាក់ទំនងរវាងបឹងកង្កែប និងតំបន់ជុំវិញ”។

ដោយផ្អែកលើកត្តាភូមិសាស្ត្រ និងលក្ខណៈពិសេសក្នុងតំបន់ លើកកម្ពស់គុណភាព និងប្រសិទ្ធភាពនៃការកែលម្អការអភិវឌ្ឍ និងការអភិរក្ស ការគ្រប់គ្រងហេដ្ឋារចនាសម្ព័ន្ធសាធារណៈក្នុងតំបន់ និងជុំវិញ ដោយកំណត់ទិសដៅច្បាស់លាស់អំពីការអភិវឌ្ឍ និងការអភិរក្ស តំបន់បឹងកង្កែបនៅពេលអនាគតប្រកបដោយភាពឆ្លាតវៃ ចីរភាព និងបរិយាបន្ន។

ជាមួយគ្នានេះ លោកគង់ វិតាណ: អភិបាលរងខេត្តព្រះសីហនុ បានមានប្រសាសន៍ថា នៅក្នុងសិក្ខាសាលាស្ដីពីការផ្ទៀងផ្ទាត់ទិន្នន័យ និងប្រមូលធាតុចូលសម្រាប់គម្រោងគាំទ្របច្ចេកទេសកសាងប្លង់គោលប្រើប្រាស់ដី និងផែនការប្រើប្រាស់ដីតំបន់បឹងកង្កែបមានទំហំ១៦១ហិកតា ស្ថិតនៅភូមិអុង ស្រុកព្រៃនប់ ខេត្តព្រះសីហនុ ស្របតាមគោលនយោបាយក្របខ័ណ្ឌគតិយុត្ត និងនីតិវិធីជាធរមាន ។

លោកថា “រាល់ការអនុវត្តនូវគម្រោងទាំងអស់ គឺត្រូវធានាបាននូវការគ្រប់គ្រងដី ការប្រើប្រាស់ដី ការអភិវឌ្ឍ និងអភិរក្សនគរូបនីយកម្មប្រកបដោយភាពឆ្លាតវៃ ចីរភាព និងបរិយាបន្ន”។

ចក្ខុវិស័យនៃការអភិវឌ្ឍខេត្តព្រះសីហនុ បានធ្វើសមាហរណកម្មជាមួយខេត្តដទៃទៀត មានដូចជា រាជធានីភ្នំពេញជាប៉ូលទី១ ខេត្តសៀមរាបជាប៉ូលទី២ ខេត្តព្រះសីហនុជាប៉ូលទី៣ និងប៉ូលទី៤ តំបន់ភូមិភាគឥសាន្ត និងការសិក្សាប្លង់គោលប្រើប្រាស់ដី ក្រុងព្រះសីហនុ៕

        ដោយគង់ សូរិយា

        ភ្នំពេញៈ ប្រធានាធិបតីចិនលោកស៊ី ជីនពីងបាននិយាយកាលពីថ្ងៃពុធម្សិលម៉ិញ​ថា ផែនការ និង កំណើនសេដ្ឋកិច្ចចិនក្នុងរយៈពេលវែង មិនមានការប្រែប្រួល ខណៈកោះតៃវ៉ាន់បានផ្គើនតាមរយៈការធ្វើសមយុទ្ឋបាញ់គ្រាប់ពិត។

យោងតាមទីភ្នាក់ងារព័ត៌មានស៊ីនហួរ ដែលបានចេញផ្សាយនៅរសៀលថ្ងៃព្រ​ហស្បតិ៍ ទី១៦ ខែកក្កដា ឆ្នាំ២០២០នេះបានឲ្យដឹងថា ប្រទេសចិននឹងបន្តធ្វើកំណែទម្រង់ស៊ីជម្រៅ និងពង្រីកការបើកទូលាយ ព្រមទាំងផ្តល់បរិយាកាសអាជីវកម្ម ល្អប្រសើរជាងនេះ សម្រាប់វិនិយោគិន និងការអភិវឌ្ឍសហគ្រាសចិន និងបរទេសផងដែរ។

លោកបន្តថា “នេះជាការឆ្លើយតបទៅកាន់ តំណាងសមាជិកក្រុមប្រឹក្សាCEOs សកល”។

បន្ថែមពីនេះលោកស៊ី ជិនពីង ក៏បានកោតសរសើរ ចំពោះទំនុកចិត្ត និងការប្តេជ្ញាចិត្តរបស់គ្រប់គ្នា ក្នុងការបន្តចាក់ឫសគល់អាជីវកម្មរបស់ពួកគេ នៅក្នុងប្រទេសចិន និងការផ្តល់យោបល់ដ៏មានតម្លៃក្នុងន័យស្ថាបនា ដើម្បីរុញច្រានឱ្យមានវឌ្ឍនភាពសេដ្ឋកិច្ច របស់ប្រទេសចិនតទៅមុខទៀត។ ប្រទេសចិននឹងបន្តអនុវត្ត គោលនយោបាយអាទិភាពចំនួន ០៦ រួមមាន បង្កើនឪកាសការងារ ជម្រុញជីវភាពរស់នៅរបស់ប្រជាជន ពង្រីកទីផ្សារ រក្សាសន្តិសុខស្បៀងនិងថាមពល រក្សាស្ថេរភាពនៃសង្វាក់ផលិតកម្ម នៅកម្រិតសហគមន៍ និងធានាឱ្យមានស្ថិរភាពក្នុងវិស័យហិរញ្ញវត្ថុ ពាណិជ្ជកម្ម ការវិនិយោគនៅបរទេស និងក្នុងស្រុកផងដែរ។

ប្រធានាធិបតីចិនលោកស៊ី ជីនពីងបានបញ្ជាក់ថា “សាកលភាវូបនីយកម្មនឹងផ្តល់
ផលប្រយោជន៍ដល់ប្រទេសទាំងអស់ ហើយកិច្ចសហប្រតិបត្តិការឈ្នះៗនេះទៀតសោត នឹងជួយជំរុញឱ្យអរិយធម៌មុនស្សជាតិ មានការរីកចម្រើនខ្លាំងជាងនេះទៅទៀត”។ លោកបន្តថា “ជុំវិញបញ្ហានេះដែរ ប្រទេសចិននឹងបន្តប្រកាន់ខ្ជាប់ខ្ជួន នូវមាគ៌ានៃការអភិវឌ្ឍដោយសន្តិភាព និងធ្វើឱ្យមានសមាហរណកម្មសេដ្ឋកិច្ចពិភពលោកកាន់តែបើកចំហ”។

ជាមួយនឹងការដាក់ចេញផែនការនេះ កោះតៃវ៉ាន់ ដែលមានទំនោរស្វែងរកឯករាជភាពហាក់ផ្គើននឹងអ្វីជាផែនការរបស់ប្រធានាធិបតីចិន ដោយកងទ័ពជើងគោក ជើងទឹក និងជើងអាកាសកោះតៃវ៉ាន់ នៅថ្ងៃព្រហស្បតិ៍នេះបានដឹកនាំការធ្វើសមយុទ្ធយោធាបាញ់គ្រាប់ពិត ដ៏ធំសម្បើមមួយ ដែលត្រូវបានលោកស្រីប្រធានាធិបតី ត្សៃ អ៉ីងវិន (Tsai Ing-wen)ចាត់ទុកថា ជាការបង្ហាញពីការប្ដេជ្ញាចិត្តការពារដែនកោះរបស់ខ្លួន ពីការឈ្លាន​ពានជាយថាហេតុណាមួយ ពីសំណាក់កងកម្លាំងខាងក្រៅ។

នេះបើតាមការចេញផ្សាយ ដោយសារព័ត៌មាន CNA នៅរសៀលថ្ងៃព្រហស្បតិ៍ ទី១៦ ខែកក្កដា ឆ្នាំ២០២០។

សមយុទ្ធយោធាខាងលើ មានឈ្មោះថា ហានគួង «Han Kuang» ត្រូវបានធ្វើឡើងនៅតំបន់ឆ្នេរក្បែរទីក្រុង តៃជុង (Taichung) ស្ថិតនៅចំកណ្ដាលកោះតៃវ៉ាន់ និងមានការចូលរួមពីកងទ័ព ៨,០០០នាក់ ព្រមទាំងយន្ដហោះចម្បាំង F-16 និងយន្ដហោះចម្បាំងផលិតនៅក្នុងស្រុក ឈីកូវ (Ching-kuo) រួមទាំងរថក្រោះជាច្រើនគ្រឿង ដែលបានបាញ់គ្រាប់ពិត កម្ទេចចំគោលដៅយ៉ាងល្អឥតខ្ចោះ។

លោកស្រីប្រធានាធិបតី Tsai Ing-wen ក៏បានថ្លែងទៅកាន់កងទ័ព ដូច្នេះថា”Han Kuang គឺជាសមយុទ្ធយោធាទ្រង់ទ្រាយធំប្រចាំឆ្នាំ ដែលផ្ដល់ឱកាសកងទ័ពទាំងអស់វាយតម្លៃ និងអភិវឌ្ឍសមត្ថភាប្រយុទ្ធរបស់ខ្លួន ក៏ដូចជាបង្ហាញការបង្ហាញពីការប្ដេជ្ញាចិត្ត ការពារដែនកោះរបស់ខ្លួន ពីការឈ្លានពានជាយថាហេតុណាមួយ ពីសំណាក់កងកម្លាំងខាងក្រៅ”។

ទោះបីជាមិនបានបញ្ជាក់ចំៗថា កងកម្លាំងខាងក្រៅគឺជានរណា តែគេដឹងថាលោក​ស្រីTsai ចង់និយាយសំដៅទៅលើចិន។

សមយុទ្ធយោធា Han Kuang របស់កោះតៃវ៉ាន់ នៅក្នុងឆ្នាំ២០២០នេះ កើតមានឡើងចំពេលទីក្រុងប៉េកាំង បាននិងកំពុងបង្កើនសកម្មភាពយោធា កាន់តែច្រើនឡើង នៅជុំវិញដែនកោះមួយនេះ ដែលចិនចាត់ទុកថាជាខេត្តមួយរបស់ខ្លួន ហើយថែមទាំងព្រមានជាច្រើនលើកផងដែរថា ចិននឹងប្រើប្រាស់កម្លាំងយោធាភ្លាមៗ ប្រសិនបើកោះតៃវ៉ាន់ប្រកាសឯករាជ្យ ឬមានកម្លាំងខាងក្រៅណាមួយ ព្យាយាមបំបែកតៃវ៉ាន់ចេញពីចិន៕

ដោយវុត្ថា

ភ្នំពេញ៖ រដ្ឋាភិបាលកម្ពុជា និងវិស័យឯកជនបានបើកិច្ចប្រជុំអន្តរក្រសួងត្រៀមសម្រាប់កិច្ចសន្ទនារាជរដ្ឋាភិបាល និងវិស័យឧស្សាហកម្ម មេគង្គ – ជប៉ុនលើកទី១៣ ដែលនឹងប្រព្រឹត្តទៅនាថ្ងៃទី១៧ ខែកក្កដា ឆ្នាំ២០២០ ស្អែកនេះ ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់គេហទំព័រ propertyarea.asia នៅថ្ងៃទី ១៦ ខែកក្កដា ឆ្នាំ ២០២០នេះ ឱ្យដឹងថា កិច្ចសន្ទនារាជរដ្ឋាភិបាល និងវិស័យឧស្សាហកម្ម មេគង្គ – ជប៉ុនលើកទី១៣ដែលនឹងប្រព្រឹត្តិទៅនៅថ្ងៃស្អែកនេះ នឹងផ្តោតសំខាន់លើការជំរុញពាណិជ្ជកម្ម និងវិនិយោគ ឱ្យមានដំណើរការឡើងវិញ បន្ទាប់ពីអាក់ខានដោយសារវិបត្តិនៃការផ្ទុះឡើងនូវជំងឺ Covid-19 ។

លោកឧកញ៉ាបន្តថា “ទាំងវិស័យឧស្សាហកម្ម ពាណិជ្ជកម្ម និងកសិកម្ម ព្រមទាំងការដឹកដញ្ជូន នឹងត្រូវលើក យកមកពិភាក្សានៅក្នុងកិច្ចសន្ទានានេះ ព្រោះថា កន្លមកនេះ យើងមានការតភ្ជាប់ដឹកជញ្ជូនខ្លះហើយ ។ ជាមួយគ្នានេះ ក៏នឹងពិភាក្សាលើការតភ្ជាប់ខ្សែរថភ្លើងផងដែរដែលកន្លងមកនេះ ខាងភាគីចិនក៏បានជួយខ្នះខ្នែង និងជប៉ុនក៏បានជួយលើបញ្ហានេះ យើងសង្ឃឹមថា នឹងមានការតភ្ជាប់ដឹកជញ្ជូនផ្លូវដែកនេះ”។

លោកឧកញ៉ាបន្ថែមថា “ម្យ៉ាងទៀត ក៏មានគម្រោងបង្កើតតំបន់ឧស្សាហកម្មផលិតផលកសិកម្មនៅក្នុងតំបន់មេគង្គនេះ សម្រាប់ធ្វើការនាំចេញទៅកាន់តំបន់ និងពិភពលោក ។ បន្ថែមពីនេះ កម្ពុជា នឹងទទួលបានផលប្រយោជន៍ច្រើនពីគម្រោងនេះ តាមរយៈការទិញវត្ថុធាតុដើមពីកម្ពុជា និងបោះទីតាំងរោងចក្រសហគ្រាសផ្សេងផងដែរ”។

មហាអនុតំបន់ទន្លេមេគង្គ ត្រូវបានបង្កើតឡើងក្រោមកម្មវិធីអភិវឌ្ឍន៍ឆ្នាំ១៩៩២ ដោយធនាគារអភិវឌ្ឍន៍អាស៊ី (ADB) ដោយបានប្រមូលផ្តុំរដ្ឋចំនួន៦ ជាធ្វើជាសមាជិក ក្នុងនោះមានប្រទេសកម្ពុជា ចិន ឡាវ មីយ៉ាន់ម៉ា ថៃ និងវៀតណាម។ តំបន់មេគង្គនេះ ក៏ត្រូវបង្កើតទំនាក់ទំនង មេគង្គ-កូរ៉េ មេគង្គ-ជប៉ុ និងមេគង្គ-អាមេរិក។

មហាអនុតំបន់ទន្លេមេគង្គបានអនុម័ត នូវយុទ្ធសាស្ត្រចំនួន ៣រួមមាន៖
១) ពង្រឹងការតភ្ជាប់តាមរយៈហេដ្ឋារចនាសម្ព័ន្ធរូបវ័ន្ត និងការអភិវឌ្ឍច្រករបៀងសេដ្ឋកិច្ច។
២) លើកកម្ពស់សមត្ថភាពប្រកួតប្រជែងតាមរយៈការធ្វើសមាហរណកម្មទីផ្សារ និងការសម្របសម្រួលពាណិជ្ជកម្ម រួមទាំងការធ្វើដំណើរឆ្លងកាត់ព្រំដែន។
៣) ការកសាងស្មារតីជាសហគមន៍មួយតាមរយៈការ ដោះស្រាយបញ្ហាសង្គម និងបរិសា្ថនរួមគ្នា៕