កម្ពុជាទទួលបានទេសចរអន្តរជាតិជាង ១០០សញ្ជាតិ ខណៈដែលកំពុងបង្កើនផលិតផលទេសចរណ៍ថ្មីបន្ថែម

ដោយ ៖ រ៉ាណេត

ភ្នំពេញ ៖ បើទោះជាកម្ពុជាកំពុងតែប្រឈមទៅនឹងវិបត្តិសេដ្ឋកិច្ចសាកលយ៉ាងណាក៏ដោយ ប៉ុន្តែលទ្ធភាពក្នុងការស្វាគមន៍ទេសចរចម្រុះជាតិសាសន៍នានានៅតែបន្ត ជាមួយនឹងការបង្កើននូវផលិតផលទេសចរណ៍ថ្មីៗបន្ថែមដើម្បីទាក់ទាញចំណាប់អារម្មណ៍ និងមកកម្សាន្តនៅក្នុងប្រទេស ជាពិសេសតំបន់កម្សាន្តធម្មជាតិ និងតំបន់ឆ្នេរ។

តាមរយៈរបាយការណ៍ដែលផ្សព្វផ្សាយដោយក្រសួងទេសចរណ៍បានឱ្យដឹងថា ទោះបីជាចំនួនភ្ញៀវទេសចរមានការធ្លាក់ចុះយ៉ាងគំហុកដោយសារតែវិបត្តិកូវីដ១៩ នេះក៏ដោយ ប៉ុន្តែបើនិយាយអំពីពលរដ្ឋនៅលើពិភពលោក ដែលមកកម្សាន្តនៅកម្ពុជាគឺនៅតែបន្តមានដដែល ពោលគឺនៅក្នុងចំណោមភ្ញៀវទេសចរបរទេសទាំងនោះ គឺមានរហូតដល់ជាង១០០ សញ្ជាតិ ។

របាយការណ៍ដដែលបានបង្ហាញថា ភ្ញៀវទេសចរបរទេសដែលមកលេងនៅកម្ពុជានៅរយៈពេល៩ខែ ឆ្នាំ២០២០ កន្លងទៅនេះ គឺធ្លាក់ចុះ៧៤,១ ភាគរយ ពោលគឺថយចុះមកនៅត្រឹមតែ ១ ២៤៧ ៦៨០ នាក់ប៉ុណ្ណោះ ។

សម្រាប់តែតំបន់អង្គរ នៅរយៈពេល១០ខែ ឆ្នាំ២០២០ កន្លងទៅនេះ ភ្ញៀវទេសចរបរទេសចំនួន ៣៩៨ ៤៨៥នាក់ បានទិញប័ណ្ណចូលទស្សនា និងទទួលបានចំណូល ១៨ ៥៤៩ ៩០៥ ដុល្លារ

បានធ្លាក់ចុះជាង៧៧ភាគរយ បើធៀបនឹងរយៈពេលដូចគ្នាឆ្នាំ២០១៩។ ដោយឡែកសម្រាប់ខែតុលា ឆ្នាំ២០២០ មានភ្ញៀវទេសចរបរទេស ចំនួន២ ២៤៤នាក់ បានទិញសំបុត្រចូលទស្សនារមណីយដ្ឋានអង្គរ បានចំនួន ៩៣ ៥៩៨ដុល្លារ៕

មេដឹកនាំនិងប្រជាជននៅលើពិភពលោកកំពុងរង់ចាំអ៊ុតមើលពីលទ្ធផលបោះឆ្នោតអាមេរិក

ដោយ ហ្សូលី

អន្តរជាតិ៖ ការបោះឆ្នោតជ្រើសរើសប្រធានាធិបតីទី ៤៦ កំពុងមានស្ថានភាពយ៉ាងក្តៅគគុក ខណៈមេដឹកនាំ និងប្រជាជនមកពីបណ្តារប្រទេសមួយចំនួន កំពុងរង់ចាំអ៊ុតមើលលទ្ធផលដែលនឹងចេញផ្សាយជាផ្លូវការនៅពេលបន្តិចទៀតនេះ។

បើតាមការចេញផ្សាយដោយសារព័ត៌មាន BBC នៅព្រឹកថ្ងៃពុធ ទី០៤ ខែវិច្ឆិកា ឆ្នាំ២០២០ មេដឹកនាំកំពូលអ៉ីរ៉ង់ លោក អាយ៉ាតូលឡាហ៍ អាលី ខាមេនី (Ayatollah Ali Khamenei) បាននិយាយថា លទ្ធផលបោះឆ្នោតប្រធានាធិបតីអាមេរិក នឹងមិនធ្វើឱ្យប៉ះពល់ដល់គោលនយោបាយរបស់ទីក្រុងតេអេរ៉ង់ ចំពោះទីក្រុងវ៉ាស៊ីនតោនឡើយ។

នៅក្នុងសុន្ទរកថាមួយ ចេញផ្សាយតាមកញ្ចក់ទូរទស្សន៍រដ្ឋអ៉ីរ៉ង់ មេដឹកនាំរូបនេះបានលើកឡើងថា គោលនយោបាយរបស់យើង… គឺត្រូវបានកំណត់យ៉ាងជាក់លាក់ ហើយវានឹងមិនផ្លាស់ប្ដូរដោយសារតែបុគ្គលណាម្នាក់នោះដែរ។ ពោលគឺវាគ្មានបញ្ហាឡើយ សម្រាប់ពួកយើង ទោះបីជានរណាជាប់ឆ្នោតជាប្រធានាធិបតីអាមេរិកក៏ដោយ។

នេះបើតាមការចេញផ្សាយដោយ CNA ថ្ងៃអង្គារ ទី០៣ ខែវិច្ឆិកា ឆ្នាំ២០២០ ក្រឡេកមកមើលប្រជាជននៅប្រទេសឥណ្ឌាវិញ ប្រជាជនឥណ្ឌាក្នុងភូមិមួយនៅភាគខាងត្បូងប្រទេស ដែលជាស្រុកកំណើតរបស់ក្រុមគ្រួសារលោកស្រី ខាម៉ាឡា ហារីស (Kamala Harris) បាននាំគ្នាបួងសួង សុំឲ្យបេក្ខជនអនុប្រធានាធិបតី នៃគណបក្សប្រជាធិបតេយ្យអាមេរិករូបនេះ បានសម្រេចដូចបំណង ខណៈក្រុមអ្នកកាន់សាសនាហិណ្ឌូមួយចំនួនទៀត នៅក្នុងរដ្ឋធានីញូដេលីឯណោះវិញ បានធ្វើពិធីបួងសួងតាមប្រពៃណី ដើម្បីជូនពរឲ្យលោក ដូណាល់ ត្រាំ ឈ្នះឆ្នោតមួយអាណត្តិទៀត។

ការបោះឆ្នោតនៅសហរដ្ឋអាមេរិកជ្រើសរើសប្រធានាធិបតីអាណត្តិថ្មី គឺពិតជាសំខាន់ណាស់សម្រាប់ប្រជាជាតិឥណ្ឌាទាំងមូល ហើយបើមើលតាមគោលនយោបាយរបស់ លោក ត្រាំ មួយរយៈចុងក្រោយនេះ ឥណ្ឌាបាននិងកំពុងប្រែក្លាយជាដៃគូ កាន់តែសំខាន់លើសពេលណាៗទាំងអស់ សម្រាប់សហរដ្ឋអាមេរិកប្រមូលផ្តុំកម្លាំង ទប់ទល់ជាមួយចិន ហើយឥណ្ឌាក៏នឹងអាចពង្រឹងខ្លួនឯងស្របពេលជាមួយគ្នា ដើម្បីទប់ទល់នឹងប៉ាគីស្ថានផងដែរ។

បើតាមការបង្ហោះនៅក្នុងទំព័រហ្វេសប៊ុកផ្លូវការរបស់លោក Donald Trump វិញ បានបង្ហាញពី ការគាំទ្ររបស់ប្រទេស Nigeria ស្ថិតក្នុងទ្វីបអាហ្វ្រិកខាងត្បូង បានប្រមូលផ្តុំគ្នារៀបចំព្យូហយាត្រាបង្ហាញពីការគាំទ្រនិងការពេញចិត្តចំពោះបេក្ខភាពប្រធានាធិបតីនេះ។ លោកត្រាំក៏បានសរសេរសារថ្លែងអំណរគុណដល់ទឹកចិត្តរបស់ប្រជាជននៅទីនោះដែលបានគោរពស្រលាញ់លោក។

លទ្ធផលបណ្តោះអាសន្ន

បេក្ខជនប្រធានាធិបតីអាមេរិក លោក ចូ បៃដិន (Joe Biden) បានកំពុងនាំមុខលោកប្រធានាធិបតី ដូណាល់ ត្រាំ (Donald Trump) ក្នុងសំឡេងអ្នកបោះឆ្នោតតំណាង 227 ទល់នឹង 210។ ប្រសិនបើបេក្ខជនណាមួយទទួលបានអ្នកបោះឆ្នោតតំណាង 270 នឹងទទួលបានជ័យជំនះនៅក្នុងការបោះឆ្នោតនេះហើយ!

ប្រា​សាក់ ផ្ដល់​សេវា​ទូទាត់​វិក្កយបត្រ អគ្គិសនី​កម្ពុជា ដោយ​មិន​គិត​កម្រៃ​សេវា

ដោយ ស្រី​នាង

ភ្នំពេញ៖ ប្រា​សាក់ ជា​គ្រឹះស្ថាន​មីក្រូហិរញ្ញវត្ថុ​ធំជាងគេ បានទទួល​ការសហការ​ពី អគ្គិសនី​កម្ពុជា ក្នុងការ​ដាក់ឱ្យ​ប្រើប្រាស់​សេវា​ទូទាត់​វិក្កយបត្រ​អគ្គិសនី ដោយ​អនុញ្ញាតឱ្យ​អតិថិជន​ប្រា​សាក់​ទាំងអស់ អាច​បង់ថ្លៃ​ភ្លើង តាមរយៈ Mobile Banking (ម៉ូ​បាល​ប៊ែ​ង​ឃី​ង) ឬ ម៉ាស៊ីន​អេ​ធី​អឹម​ប្រា​សាក់ ដោយ​មិន​គិត​កម្រៃ​សេវា។

បច្ចុប្បន្ននេះ ប្រា​សាក់ ផ្តល់​សេវា​ទូទាត់​វិក្កយបត្រ​អគ្គិសនី​កម្ពុជា នៅ​ទីតាំង​ជាច្រើន​រួមមាន៖ រាជធានី​ភ្នំពេញ និង​ខេត្តកណ្តាល ខេត្តរតនគិរី ស្រុក​លំផាត់ ស្រុក​វើ​ន​សៃ ស្រុក​តា​វែង  ខេត្តក្រចេះ ស្រុក​ស្នួល ខេត្តកំពត ស្រុក​កំពង់ត្រាច ខេត្តបន្ទាយមានជ័យ ខេត្តកំពង់ចាម ខេត្តស្ទឹងត្រែង ខេត្តកំពង់ស្ពឺ ខេត្តសៀមរាប ស្រុក​បន្ទាយស្រី ខេត្តព្រៃវែង ខេត្ត​ត្បូងឃ្មុំ និង​ក្រុងព្រះសីហនុ។

លោក សាយ សូ​នី អនុប្រធាន​នាយក​ប្រតិបត្តិ​របស់​ប្រា​សាក់ បាន​មានប្រសាសន៍ថា ប្រា​សាក់​មាន​ក្ដី​រីករាយ​ដែល​បាន​បម្រើសេវា​ទូទាត់​វិក្កយបត្រ​អគ្គិសនី​កម្ពុជា ដល់​អតិថិជន​ប្រកបដោយ​ភាពងាយស្រួល លឿន​រហ័ស និង​សុវត្ថិភាព។ អតិថិជន​អាច​អញ្ជើញ​មក​បើក​គណនី​សន្សំ​នៅ​ប្រា​សាក់​នៅថ្ងៃនេះ ដើម្បី​ទទួលបាន​ប័ណ្ណ​អេ​ធី​អឹម​ដ៏​ស្រស់ស្អាត និង​ការប្រើ​សេវា​ធនាគារ​ចល័ត​ប្រា​សាក់ ដើម្បី​ទូទាត់​វិក្កយបត្រ​បាន​យ៉ាង​ងាយស្រួល ៕

ការផ្គត់ផ្គង់ការិយាល័យបានកើនឡើងដល់ទំហំ៤៥ម៉ឺនម៉ែត្រការ៉េគិតត្រឹមដំណាច់ឆ្នាំនេះ

ដោយ ៖ រ៉ាណេត

ភ្នំពេញ ៖ នៅត្រឹមដំណាច់ឆ្នាំ២០២០ខាងមុខនេះ ការផ្គត់ផ្គង់អគារការិយាល័យនៅលើទីផ្សាររួមនឹងបន្តការកើនឡើងរហូតដល់ប្រមាណជាង៤៥ម៉ឺនម៉ែត្រ ខណៈដែលតម្រូវការជួលជាក់ស្ដែងសរុបមានត្រឹមប្រមាណ៧០ភាគរយ នៃការផ្គត់ផ្គង់តែប៉ុណ្ណោះ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍នៅព្រឹកថ្ងៃទី៤ ខែវិច្ឆិកា ឆ្នាំ២០២០នេះថា តម្រូវការជួលអគារការិយាល័យជាក់ស្ដែងនាពេលបច្ចុប្បន្ននេះ បើប្រៀបធៀបទៅនឹងឆ្នាំកន្លងទៅគឺមានភាពថមថយបន្តិច។

លោកស្រីបានបន្តថា “ដោយសារឆ្នាំនេះការដាក់បញ្ចូលថ្មីនៃការផ្គត់ផ្គង់ប្រមាណ៦ម៉ឺនម៉ែត្រការ៉េ ដែលធ្វើឱ្យមានការកើនឡើងនូវចំនួនសរុបរហូតដល់ប្រមាណ៤៥ម៉ឺនម៉ែត្រការ៉េនៅលើទីផ្សារ ខណៈដែលតម្រូវការនៃការប្រើប្រាស់មានការកើនឡើងតិចតួចបំផុត។ នៅពេលបច្ចុប្បន្ននេះ អ្វីដែលយើងមើលឃើញ គឺភាគច្រើននៅក្នុងអគារមួយអត្រានៃការជួលគឺមានប្រមាណជាង៨៦ភាគរយ ហើយនៅពេលដែលការផ្គត់ផ្គង់បន្តកើនឡើង វានឹងធ្វើឱ្យផ្ទៃទំនេរមានច្រើនបន្ថែមទៀត ជាពិសេសនៅដើមឆ្នាំក្រោយនេះតែម្ដង”។

លោកស្រី អាន សុធីតា បានមានប្រសាសន៍បន្តទៀតថា “សម្រាប់អគារមួយដែលបានបញ្ចប់ការសាងសង់ និងដាក់បញ្ចូលនៅក្នុងទីផ្សារជួល យ៉ាងហោចណាស់ប្រើពេលមិនតិចជាង១ឆ្នាំនោះទេ ដូច្នេះនៅពេលដែលតម្រូវការជួលស្ថិតនៅកម្រិតថេរ ហើយការផ្គត់ផ្គង់ដាក់បន្ថែមថ្មីនៅចុងឆ្នាំ២០២០ និងដើមឆ្នាំ២០២១ វានឹងធ្វើឱ្យអត្រាប្រើប្រាស់ពិតធ្លាក់មកនៅត្រឹមប្រមាណ៧០ភាគរយ បើធៀបទៅនឹងចំនួននៃការផ្គត់ផ្គង់សរុប ហើយអាចអូសបន្លាយពេលវេលារហូតដល់ឆ្នាំ២០២២ ខណៈដែលមានភាពធូស្រាលពីវិបត្តិ ដែលនឹងមានកំណើនក្រុមហ៊ុនហ៊ុនអន្តរជាតិចូលមកកាន់ទីផ្សារកម្ពុជា ក៏ដូចជាតម្រូវការបង្កើនបុគ្គលិកពីសំណាក់ក្រុមហ៊ុនក្នុងស្រុក ទើបជំរុញឱ្យការប្រើប្រាស់មានការកើនឡើងវិញ”៕

តើ Joe Biden អាចស្តារសេដ្ឋកិច្ចអាមេរិកបានដែរឬទេ ខណៈវិនិយោគិនធំៗកំពុងតែសម្តែងការគាំទ្រ?

ដោយ៖ ប៊ី

ភ្នំពេញ៖ វិនិយោគិនមិនមែនជាអ្នកវិភាគនយោបាយទេ។ ប៉ុន្តែចាប់ពីថ្ងៃអង្គារដល់ព្រឹកព្រលឹមនៃព្រឹកថ្ងៃពុធពួកគេនឹងមើលលទ្ធផលនៃការបោះឆ្នោតអាមេរិក ដែលជាព្រឹត្តិការណ៍ដ៏ធំមួយ ដែលអាចធ្វើឱ្យទីផ្សារហិរញ្ញវត្ថុរង្គោះរង្គើនិងបង្កើតប្រាក់ចំណេញច្រើន ឬខាតបង់ច្រើន។

តើមានអ្វីកំពុងកើតឡើង៖ Wall Street កំពុងត្រៀមរយៈពេល ២៤ ម៉ោង។ អ្នកយុទ្ធសាស្រ្តកំពូលៗ បានប្រាប់ ថា ពួកគេនឹងតាមដានទាំងទូរទស្សន៍ និងសារព័ត៌មានសេដ្ឋកិច្ច Bloomberg។ ពួកគេមានគម្រោងឃ្លាំមើលយ៉ាងយកចិត្តទុកដាក់ទាំងលទ្ធផលបោះឆ្នោត និងស្ថានភាពរតនាគារអាមេរិក ភាគហ៊ុនសកល និងប្រាក់ដុល្លារអាមេរិក។

មនុស្សភាគច្រើននៅ Wall Street ឥឡូវនេះកំពុងរំពឹងថានឹងមានរលកពណ៌ខៀវ ដែលអតីតអនុប្រធានាធិបតី Joe Biden កាន់កាប់សេតវិមាន និងគណបក្សប្រជាធិបតេយ្យឈ្នះការគ្រប់គ្រងព្រឹទ្ធសភា។ ខណៈពេលដែលវាអាចនាំឱ្យពន្ធសាជីវកម្មខ្ពស់ និងប៉ះពាល់ដល់ភាគហ៊ុន វិនិយោគិនភាគច្រើនចង់ឱ្យរដ្ឋាភិបាលអាមេរិកអនុម័តកញ្ចប់ថវិកាជំរុញសេដ្ឋកិច្ច។ ពួកគេសង្ឃឹមថា ជាមួយនឹងការកាន់តំណែងរបស់គណបក្សប្រជាធិបតេយ្យ កញ្ចប់កញ្ចប់ជំរុញសេដ្ឋកិច្ចដ៏ធំមួយក្នុងទឹកប្រាក់ ២ ទ្រីលានដុល្លារអាចត្រូវបានអនុម័តយ៉ាងឆាប់រហ័ស។

អ្នកយុទ្ធសាស្ត្រភាគច្រើនមិនរំពឹងថាលទ្ធផលនេះនឹងលេចចេញជារូបរាងពេញមួយយប់នោះទេ (ម៉ោងនៅអាមេរិកថ្ងៃនេះ)។

លោក Deepak Puri ប្រធានផ្នែកវិនិយោគនៅអាមេរិកប្រចាំក្រុមហ៊ុន Deutsche Bank Wealth Management បានថ្លែងថា “លទ្ធផលមិនទាន់ចេញនៅឡើយទេ ប៉ុន្តែយើងនឹងឃើញការពិតនៅនឹងកន្លែង”។

លោក Andy Lewin អនុប្រធានក្រុមហ៊ុន BGR Group ដែលផ្តល់ប្រឹក្សាដល់ក្រុមហ៊ុនសេវាកម្មហិរញ្ញវត្ថុនៅទីក្រុងវ៉ាស៊ីនតោន បាននិយាយថា លោកកំពុងប្រាប់អតិថិជនឱ្យពិនិត្យពិចារណាអំពីលទ្ធផលដំបូងពីរដ្ឋផ្លរីដា, North Carolina និង Georgia និង Arizona ។ រដ្ឋទាំង ៤ នោះបានទៅប្រធានាធិបតីដូណាល់ត្រាំក្នុងឆ្នាំ ២០១៦ ហើយជ័យជំនះរបស់ លោក Biden អាចជាសញ្ញាបង្ហាញថា ប្រធានាធិបតីបច្ចុប្បន្នកំពុងឈានទៅរកការបរាជ័យ។

លោក Lewin បានប្រាប់ខ្ញុំថា “ការឈ្នះរដ្ឋមួយ ឬច្រើននៃរដ្ឋទាំងនេះធ្វើឱ្យ Biden ឈ្នះ ហើយទីផ្សារនឹងមានប្រតិកម្មតបវិញ”។

បន្ទាប់មកការយកចិត្តទុកដាក់នឹងងាកទៅរករដ្ឋមីឈីហ្គែន រដ្ឋផេនស៊ីលវេនៀ និងរដ្ឋ Wisconsin ដែលត្រូវបានគេរំពឹងថានឹងចំណាយពេលយូរជាងមុនដើម្បីសរុបសំឡេងឆ្នោតសរុប ដោយចំនួនសន្លឹកឆ្នោតដែលបានផ្ញើតាមសំបុត្រ។

ក្រុមអ្នកវិភាគ Nomura បានព្រមានដល់អតិថិជនថា “ជាមួយរដ្ឋទាំងនោះដំណើរការសន្លឹកឆ្នោតតាមអ៊ីមែលយឺតណាស់ ការបញ្ចប់ការរាប់ជាផ្លូវការលើកដំបូងអាចមានរយៈពេលប៉ុន្មានថ្ងៃបន្ទាប់ពីការបោះឆ្នោត ដែលបណ្តាលឱ្យមានរយៈពេលមិនច្បាស់លាស់”។

ក្នុងឆ្នាំបោះឆ្នោតដ៏តានតឹង វិនិយោគិនជាច្រើនមានការព្រួយបារម្ភអំពីលទ្ធផល ហើយជ័យជំនះទៅខាងបក្សណាមួយនឹងមានសារៈសំខាន់ខ្លាំង។ នេះបើយោងតាមអ្នកយុទ្ធសាស្រ្តរបស់ JPMorgan ។

លោក Andy Laperriere និងលោក Don Schneider នៅឯក្រុមហ៊ុន Cornerstone Macro បាននិយាយដូចគ្នាថា “ប្រសិនបើការស្ទង់មតិពិតជាត្រឹមត្រូវ លោក Joe Biden នឹងឈ្នះការបោះឆ្នោតជាក់ជាមិនខាន ហើយយើងនឹងដឹងលទ្ធផល នៅមុនពាក់កណ្តាលអធ្រាត្រថ្ងៃស្អែក”។

ពួកគេបានបន្ថែមថា ទោះបីការបោះឆ្នោតមិនត្រឹមត្រូវក៏ដោយ ភស្តុតាងនៅតែចង្អុលទៅរកជ័យជម្នះរបស់ Biden ខណៈមានការព្យាករថា លោក Biden ឈ្នះ ៦៦%។

លទ្ធផលបណ្តោះអាសន្ន

បេក្ខជនប្រធានាធិបតីអាមេរិក លោក ចូ បៃដិន (Joe Biden) បានកំពុងនាំមុខក្នុងទទួលបានសំឡេងអ្នកបោះឆ្នោតតំណាង ១២២ ខណៈប្រធានាធិបតី ដូណាល់ ត្រាំ (Donald Trump) ទទួលបានសំឡេងអ្នកបោះឆ្នោត ៩២ គិតត្រឹមម៉ោង ៩៖៣០នាទីព្រឹកនេះ។ នេះបើយោងតាមលទ្ធផលបណ្តោះអាសន្នរបស់សារព័ត៌មាន AP។

បេក្ខជនណាមួយទទួលបានអ្នកបោះឆ្នោតតំណាង ២៧០ នឹងទទួលបានជ័យជំនះនៅក្នុងការបោះឆ្នោតនេះហើយ៕ CNN

កម្ពុជាទទួលបានចំណូលជាង៣៦៦លានដុល្លារពីការនាំអង្ករចេញទៅកាន់ទីផ្សារអន្តរជាតិ

ដោយ ៖ រ៉ាណេត

ភ្នំពេញ ៖ គិតត្រឹមរយៈពេល១០ខែ ឆ្នាំ២០២០ ប្រាក់ចំណូលដែលកម្ពុជា ទទួលបានពីការនាំចេញអង្ករ ទៅក្រៅប្រទេសមានការកើនឡើងជិត៤៧លានដុល្លារ ដែលកំណើននេះស្មើនឹង១៥ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ២០១៩។

ជារួមទឹកប្រាក់សរុប ដែលកម្ពុជាទទួលបានពីការនាំចេញអង្ករក្នុងរយៈពេល១០ខែ មានចំនួន ៣៦៦.៤៤លានដុល្លារ។

នៅក្នុងសេចក្ដីប្រកាសរបស់សហព័ន្ធស្រូវអង្ករកម្ពុជាដែលផ្សព្វផ្សាយនៅព្រឹកថ្ងៃទី៤ ខែវិច្ឆិកា ឆ្នាំ២០២០នេះបានបញ្ជាក់ថា នៅក្នុងរយៈពេល១០ខែ នៃឆ្នាំ២០២០នេះ បរិមាណអង្ករនាំចេញរបស់កម្ពុជា មានចំនួន ៥៣៦ ០៣៥ តោន ដែលមានការកើនឡើង១៧.១១ភាគរយ បើប្រៀបធៀបនឹងរយៈពេល១០ខែដូចគ្នា ឆ្នាំ២០១៩។

ចំពោះទីផ្សារចម្បងនៃការនាំចេញអង្កររបស់កម្ពុជា គឺទៅកាន់ប្រទេសចិន និងតំបន់ស្វយ័តរបស់ចិន (ហុងកុង ម៉ាកាវ តៃវ៉ាន់) មានចំណែក៣៦% បន្ទាប់មកគឺ បណ្តាប្រទេសចំនួន២៧នៅក្នុងទ្វីបអឺរ៉ុបមានចំណែក៣២% ហើយទីផ្សារបន្តបន្ទាប់ មានដូចជា បណ្តាប្រទេសជាសមាជិកអាស៊ានចំនួន៦ មានចំណែក១៣% បណ្តាប្រទេសនៅក្នុងទ្វីបអាហ្រិ្វកចំនួន១០ មានចំណែក៩% បណ្តាប្រទេសនៅក្នុងទ្វីបអាស៊ីនិងអូសេអានី ជាពិសេសគឺប្រទេសអូស្រ្តាលី និងញូហ្សេឡេន មានចំណែក៦% បណ្តាដែនកោះដែលស្ថិតនៅក្រោមការគ្រប់គ្រងរបស់ប្រទេសបារាំង និងអាមេរិក មានចំណែក២% និងចុងក្រោយគឺ បណ្តាប្រទេសនៅក្នុងទ្វីបអាមេរិកខាងជើង និងប្រទេសនៅក្នុងមជ្ឈឹមបូព៌ា មានចំណែក ២%។

ការនាំចេញអង្ករកម្ពុជាក្នុងរយៈពេល 10ខែ ឆ្នាំ2020ដូចគ្នាធៀបទៅនឹងឆ្នាំ 2019 មានកំណើននៅគ្រប់គោលដៅនាំចេញទាំងអស់៖ 1- ការនាំចេញទៅសហភាពអ៊ឺរ៉ុបមានចំនួន 24ប្រទេស មានបរិមាណសរុបចំនួន 174,391តោនកើនចំនួន 32.51%, 2- ប្រទេសចិនមាន បរិមាណ សរុបចំនួន 194,451 តោន កើនឡើងចំនួន 36.26% 3- បណ្តាប្រទេសសមាជិក អាស៊ានមាន បរិមាណ សរុបចំនួន 71,882 តោន កើនឡើងចំនួន 13.40%, និង 4- គោលដៅដ៏ទៃទៀត ចំនួន29 ប្រទេស មាន បរិមាណសរុបចំនួន 95,581 តោន បាន2020កើនឡើងចំនួន 17.83% ។ ដោយឡែក ការនាំចេញស្រូវទៅតាមបណ្តាច្រកនៃខេត្តជាប់ព្រំដែនប្រទេសវៀតណាម សម្រាប់រយៈពេល 9ខែ28ថ្ងៃ ឆ្នាំ2020 (មកទល់ថ្ងៃទី 28 ខែតុលា ឆ្នាំ2020) មានបរិមាណសរុបចំនួន 1,427,226 តោន៕

អ្នកជំនាញ៖ មនុស្ស​ភាគច្រើន​ផ្លាស់ប្តូរ​ផ្នត់គំនិត​ចង់​រស់នៅ​ខុន​ដូ​បន្ទាប់ពី​ទឹក​ជន់​លិច​នៅតាម​គម្រោង​លំនៅឋាន​មួយចំនួន

ដោយៈ​ជីវី

ភ្នំពេញៈ មនុស្ស​ភាគច្រើន​នៅក្នុង​ប្រទេស​កម្ពុជា រហូតមកដល់​ពេលបច្ចុប្បន្ន​នេះ បាន​ផ្លាស់ប្តូរ​ផ្នត់គំនិត​របស់ខ្លួន ចង់​រស់នៅក្នុង​អាគារ​ខុន​ដូ បន្ទាប់ពី​មើលឃើញ​ពី​គម្រោង​បុរី និង​ផ្ទះល្វែង​មួយចំនួន​ជន​លិច ដោយ​ជំនន់​ទឹកភ្លៀង​នាពេល​កន្លងមកថ្មីៗនេះ។

លោក​ខន គង្គារ អគ្គនាយក​ក្រុមហ៊ុន​ភ្នាក់ងារ​អចលនទ្រព្យ ERA ប្រចាំ​កម្ពុជា បានឱ្យដឹង​កាលពីពេលថ្មីៗនេះ​ថា  បើ​ពិនិត្យមើល​ជាទូទៅ គឺមាន​ផលប៉ះពាល់​ពី​គ្រោះទឹកជំនន់​កន្លងមក​នេះ ប៉ុន្តែ​បើ​និយាយ​ពី​វិស័យ​ខុន​ដូ​វិញ គឺមាន​ភាពល្អប្រសើរ  អ្នក​ដែល​លិចលង់ ភាគច្រើន​គាត់​រស់នៅក្នុង​ផ្ទះល្វែង។

លោក​បន្តថា “អ្នក​ដែល​រស់នៅ​ក្នុងផ្ទះ គឺមាន​ការលិចលង់ ប៉ុន្តែ​បើ​រស់នៅក្នុង​ខុន​ដូ​គឺ​មិន​មានការ​លិច​នោះទេ។ លោក​បន្តថា “បើ​គាត់​មាន​បញ្ហា  សម្រាប់​អ្នកលក់​ខុន​ដូ គឺមាន​ឱកាស​វិញ ដោយសារ​មនុស្ស​ភាគច្រើន​គិតថា បើ​រស់នៅ​ផ្ទះ​លិច​ទឹក ប៉ុន្តែ​បើ​រស់នៅក្នុង​ខុន​ដូ​គឺ​មិនមាន​ការលិចលង់​នោះទេ” ។

លោក​ខន គង្គា​បាន​បន្ថែមថា ពេលខ្លះ​មិនមែន​គ្រប់​បញ្ហា វា​ជា​បញ្ហា​នោះទេ តែ​វ​ជា​ឱកាស​ទៅវិញ​ទេ​សម្រាប់​ខ្ញុំ។

លោក​បញ្ជាក់ទៀតថា បន្ទាប់​ជំនន់​ទឹកភ្លៀង​ត្រូវបាន​ស្រក​ទៅវិញ មនុស្ស​ភាគច្រើន​បានចាប់ផ្តើម​ងាក​មក​រស់នៅក្នុង​ខុន​ដូ ព្រោះ​ពួកគេ​គិតថា ចុ​ម​រស់នៅ​ឆ្ងាយ ទឹក​លិច​ទៀត  ហើយ​ឥឡូវ​រស់នៅក្នុង​ខុន​ដូ​កណ្តាល​ក្រុង​ហើយ អត់​មានទឹក​លិច ហើយក៏​មិន​ពិបាក​ក្នុងការ​រស់​ឥ​វាន់​ផងដែរ។

លោក​បន្ថែមថា “ពួកគាត់​ឥឡូវ​គិត​ប្លែក ហើយ​ថ្មី ដែល​យើង​ក្នុងនាម​ជា​អ្នកទទួលបាន​ច្រើន ពី​ការបញ្ជាទិញ​គម្រោង​ខុន​ដូ​ក្នុង​រយៈ​កន្លង​កមនេះ។

យោងតាម​កា​របាយការណ៍​ចុងក្រោយ​របស់​ក្រុមហ៊ុន CBRE Cambodia បង្ហាញថា ការផ្គត់ផ្គង់​ខុន​ដូ​សរុប​នៅ​ទូទាំង​រាជធានី​ភ្នំពេញ មានការ​កើនឡើង៣,៩៧%ក្នុង​រយៈពេល​ត្រីមាស​ទី៣ ខណៈ​ការកើនឡើង​នេះ មានការ​ចូលរួម​តែមួយ ពី​ការបញ្ចប់​ដំណាក់កាល​ទី១របស់​គម្រោង​Urban Village ហើយ​បាន​បង្កើន​ការផ្គត់ផ្គង់​ខុន​ដូ​តម្លៃ​សមរម្យ ១៥.៦៧% ។

របាយការណ៍​ដដែល​ប​ន្ត​ថា អំឡុង​ត្រីមាស​ទី៣នេះ មិនមាន​គម្រោង​ថ្មី​ណាមួយ ត្រូវបាន​ដាក់ឱ្យ​ដំណើរការ​ទេ ប៉ុន្តែ​មាន​គម្រោង៣បានដាក់​ចេញ ការអភិវឌ្ឍ​នូវ​ដំណាក់កាលថ្មីៗ ទៅក្នុង​ទីផ្សារ​ផ្គត់ផ្គង់​ដែល​បង្ហាញថា អ្នក​អភិវឌ្ឍន៍​ដែល​ស្គា​ល់ពី​ទីផ្សារ​ក្រុងភ្នំពេញ នៅតែមាន​សុទិដ្ឋិនិយម​ចំពោះ​វិស័យនេះ។

របាយការណ៍​បានឱ្យដឹងថា គេ​រំពឹងថា​នៅ​ត្រីមាស​ទី៤ឆ្នាំនេះ នឹង​ឃើញ​ការបញ្ចប់​គម្រោង​ចំនួន៤បន្ថែមទៀត ដែល​នឹង​ចូលរួមចំណែក​ក្នុង​ទីផ្សារ ប្រមាណ២,៦០០យូ​នី​ត ។ ទោះយ៉ាងណា ការពន្យា​ពេល​នៃ​ការសាងសង់ នៅតែ​បន្ត​កើតមាន​នៅក្នុង​វិស័យនេះ ដោយ​បច្ចុប្បន្ន​មាន​គម្រោង​ចំនួន៦ ពន្យា​ពេល​បញ្ចប់​គម្រោង​ទៅ​ឆ្នាំ២០២១ ៕

អ្នកជំនាញ៖ ការអភិវឌ្ឍ​ទីក្រុង​រណប​កាន់តែច្រើន​នឹង​ជួយ​ជំរុញឱ្យមាន​ការរីកចំរើន វិស័យសេដ្ឋកិច្ច និង​សំណង់

ដោយ​វ​ឌ្ឈ​នៈ

ភ្នំពេញៈ អ្នកជំនាញ​បាន​អះអាងថា ការអភិវឌ្ឍន៍​ទីក្រុង​រណប​កាន់តែច្រើន នឹង​ជួយ​ជំរុញឱ្យមាន​កំណើនសេដ្ឋកិច្ច និង​រីកចំរើន​លើ​វិស័យ​សំណង់ នៅក្នុង​ប្រទេស ខណៈ​រដ្ឋាភិបាល បាននិងកំពុង​អភិវឌ្ឍន៍​ទីក្រុង​រណប (Satellite City) ស្រម​តាម​ផែនការ និង​ប្លង់គោល​អភិវឌ្ឍន៍​ទីក្រុង​នាពេល​បច្ចុប្បន្ននេះ។

លោក​ឃាង ពុ​ទ្ធី ប្រធាន​ក្រុមប្រឹក្សា​អភិបាល​នៃ​សមាគម​អ្នកជំនាញ​អចលនទ្រព្យ​កម្ពុជា​បានឱ្យដឹង​នៅ​ថ្ងៃទី៣ ខែវិច្ឆិកា​កន្លងមក​ថា មិន​ថា​នៅក្នុង​ប្រទេស​កម្ពុជា ឬ​នៅតាម​បណ្តា​ប្រទេស​នៅលើ​ពិភពលោក​នេះ គឺ​គេ​បង្កើត​តំបន់​អភិវឌ្ឍ​ន៍័ថ្មីៗ ដែល​ហៅ​ទីក្រុង​រណប ដើម្បី​ជំរុញ​កំណើនសេដ្ឋកិច្ច និង​សំណង់​ឱ្យមាន​ការរីកចំរើន ។

លោក​បន្តថា “នៅក្នុង​ទីក្រុង​ភ្នំពេញ​មានការ​រីកចំរើន និង​មាន​កំណើនប្រជាជន អីចឹង​ហើយ បាន​គេ​អភិវឌ្ឍន៍​ទីក្រុង​រណប​បន្ថែមទៀត ដើម្បី​ជំរុញ​ការអភិវឌ្ឍន៍​គម្រោង​ខុន​ដូ ផ្សារ​ទំនើប និង​អគារ​ផ្សេង​ទៅកាន់​ទីនោះ” ។ លោក​បន្ថែមថា “ម្យ៉ាងទៀត ការបង្កើតឱ្យមាន​ទីក្រុង​រណប​នេះ ឆ្លើយតប​ទៅនឹង​កំណើន​តម្រូវការ សេដ្ឋកិច្ច និង​រស់នៅ” ។

លោក​បន្ថែមទៀតថា នៅពេលដែល​បង្កើតឱ្យមាន​តំបន់​អភិវឌ្ឍន៍ថ្មីៗបែបនេះ ក៏​នឹង​ជួយ​វិស័យ​អចលនទ្រព្យ ជាពិសេស​សំណង់​កើនឡើង ព្រោះថា​តំបន់​ថ្មី​ត្រូវ​ការសាងសង់​សំណង់ផ្សេងៗ ប៉ុន្តែ​បញ្ហា​តែមួយ​ប៉ុណ្ណោះ គឺ​រដ្ឋាភិបាល​មិនទាន់​បានកំណត់​ឱ្យបាន​ច្បាស់លាស់​ចំពោះ​ការបែងចែក​តំបន់​អភិវឌ្ឍន៍ ដោយ​ពេលខ្លះ​អនុញ្ញាតឱ្យ​សាងសង់​រោងចក្រ ក្បែរ​នឹង​សណ្ឋាគារ​ជាដើម។

លោក ឡុង គឹមសួគ៌ អគ្គ​នាយ​ក្រុមហ៊ុន Century21 Advance បានឱ្យដឹង​ដែរ​ថា ការអភិវឌ្ឍន៍​តំបន់​ទីក្រុង​រណប កាន់តែច្រើន​នឹង​ជួយ​ជំរុញ​កំណើត​សេដ្ឋកិច្ច តាមរយៈ​ការផ្លាស់ប្តូរ​ពាណិជ្ជកម្ម​នានា ឱ្យ​កាន់​តែមាន​ភាពងាយស្រួល និង​ធ្វើឱ្យ​វិស័យ​កាន់តែ​មានតម្លៃ​ខ្ពស់​ផងដែរ។

លោក​បន្តថា “ជាពិសេស​នោះ នៅពេល​មានការ​អភិវឌ្ឍន៍​ហេ​ដ្ឋា​រចនា សម្ព័ន្ធ​ជុំវិញ​ក្រុង (តំបន់​អភិវឌ្ឍន៍​ទីក្រុង​រណប) បានធ្វើឱ្យ​សេដ្ឋកិច្ច​នៅ​ជុំវិញ​ក្រុង មានការ​រីកចំរើន ជាមួយគ្នានេះ វិស័យ​សំណង់ និង​អចលនទ្រព្យ ក៏​នឹងមាន​ការកើនឡើង​ផងដែរ” ។

លោក​គឹមសួគ៌​បាន​បញ្ជាក់ថា នៅពេល​ដែលមាន​តំបន់​ណាមួយ កំពុងមាន​ការអភិវឌ្ឍ​ន៍​ថ្មី​ដូចជា​តំបន់​ទីក្រុង​រណប​នេះ នឹង​ជួយ​ជំរុញ​ឱ្យ​វិស័យ​អចលនទ្រព្យ​ឡើងថ្លៃ ព្រោះថា មនុស្ស​ទាំងអស់​នឹង​ទៅ​ទិញ ឬ​ធ្វើ​អា​ជីក​ម្មផ្សេងៗ នៅក្នុង​តំបន់​នេះ” ។

អ្នកឧកញ៉ា ពុង ឃាវ​សែ អគ្គនាយក​ក្រុមហ៊ុន OCIC ធ្លាប់បាន​ឡើង​កាលពីពេលថ្មីៗនេះដែរ​ថា  គ្រាន់តែ​ការអភិវឌ្ឍន៍​ទីក្រុងរ​ណ​ម​ថ្មី​មួយ កោះនរា​នៅលើ​ទំហំ​ផ្ទៃដី១០០ហិកតា នឹងចូលរួម​បង្កើន​ចំណូល​ថវិកាជាតិ ប្រមាណ ២៥០លាន​ដុល្លារ​ក្នុងមួយឆ្នាំ។

អ្នកឧកញ៉ា​ថ្លែងថា “គម្រោង​អភិវឌ្ឍន៍​កោះនរា​នេះ នឹង​ផ្តល់​អត្ថប្រយោជន៍​ដល់​សង្គមជាតិ និង​សេដ្ឋកិច្ចកម្ពុជា​យ៉ាងច្រើន ជាពិសេស​នៅក្នុង​កាលៈទេសៈ ដែល​កំពុង​ជួប​វិបត្តិ​នាពេលនេះ ដែល​កម្ពុជា​កំពុង​ត្រូវការ​គម្រោង​វិនិយោគ​បន្ថែមទៀត ដើម្បី​ជួយ​ទ្រទ្រង់​សកម្មភាព​សេដ្ឋកិច្ចជាតិ​ឱ្យបាន​រឹងមាំ” ។

លោក​ពុង ឃាវ​សែ​បន្តថា “តាមរយៈ​គម្រោង​មួយ​នេះ នឹង​អនុគ្រោះ​ដល់​មនុស្ស​រស់នៅ​ប្រមាណ៥ម៉ឺន​នាក់ ហើយ​អាច​នឹង​ចូលរួមចំណែក​ដល់​ផលិតផល​ក្នុងស្រុក (GDP) ប្រមាណ២២៥លាន​ដុល្លារ​ក្នុងមួយឆ្នាំៗ ស្មើនឹង​ប្រមាណ០,៩ភាគរយ​នៃ​ចំនួន GDPនាពេល​បច្ចុប្បន្ននេះ” ។

រាជរដ្ឋាភិបាល​កាលពី​កន្លងមកនេះ បានដាក់​ចេញ​ផែនការ​អភិវឌ្ឍ​ទីក្រុង​រណប តាមរយៈ​ផ្តល់ឱកាស​ដល់​ក្រុមហ៊ុន​ទាំង​នៅក្នុង​ស្រុក និង​ក្រៅ​ចូលរួម​អភិវឌ្ឍន៍ នៅតាម​ជាយ​រាជធានី​ភ្នំពេញ។ ជាក់ស្តែង ស្ទើរតែ​គ្រប់​ទិស​នៃ​រាជធានី​ភ្នំពេញ មានការ​ចូលរួម​អភិវឌ្ឍន៍​ទីក្រុង​រណប​ពិ​ក្រុមហ៊ុនផ្សេងៗជាច្រើន៕

ចំណេះដឹង! អ​ជ្ញា​ប័ណ្ណ​សាងសង់​មាន​សុពលភាព​ប៉ុន្មាន​ឆ្នាំ?

ដោយៈ​វុត្ថា

ភ្នំពេញៈ រដ្ឋាភិបាល​កម្ពុជា តាមរយៈ​ក្រសួង​សេដ្ឋកិច្ច និង​ហិរញ្ញវត្ថុ បានសម្រេច​ចេញ​សេចក្តីប្រកាស​ស្តីពី ការផ្តល់​អាជ្ញាប័ណ្ណ​ជូន​ក្រុមហ៊ុន​វិស្វកម្ម​ឯករាជ្យ សម្រាប់​គ្រប់គ្រង​អាជីវកម្ម អភិវឌ្ឍ​អចលនវត្ថុ​អចលនទ្រព្យ​នៅក្នុង​ប្រទេស​កម្ពុជា។

ថ្លៃ​អាជ្ញាប័ណ្ណ

អ្នកដាក់ពាក្យ​ស្នើសុំ​អាជ្ញាប័ណ្ណ ប្រកប​សេវាកម្ម​ជា​ក្រុមហ៊ុន​វិស្វកម្ម​ឯករាជ្យ ត្រូវ​បង់ថ្លៃ​អាជ្ញាប័ណ្ណ​ចំ​មួន២.០០០.០០០ ៛ (ពីរលាន​រៀល) ។ ថ្លៃ​អាជ្ញាប័ណ្ណ​នេះ ត្រូវ​បង់​ទៅ​អគ្គនាយកដ្ឋាន​រតនាគា​រ​ជាតិ តាម​ដីកាអម​របស់​ក្រុមការងារ​អន្តរក្រសួង ដើម្បី​គ្រប់គ្រង​អាជីវកម្ម​អភិវឌ្ឍ​អ​ល​ច​នវ​ត្ថុ។

សុពលភាព​អាជ្ញាប័ណ្ណ

អាជ្ញាប័ណ្ណ​នេះ មាន​សុពលភាព​រយៈពេល៣ឆ្នាំ គិត​ចាប់​ពីថ្ងៃ​ចុះហត្ថលេខា​តទៅ។ អ្នក​កាន់​អាជ្ញាប័ណ្ណ ត្រូវដាក់​ពាក្យស្នើសុំ​បន្ត​សុពលភាព អាជ្ញាប័ណ្ណ​ឲ្យ​បាន៣០ថ្ងៃ មុនពេល​អាជ្ញាប័ណ្ណ​នោះ​អស់​សុពលភាព និង​ត្រូវ​បង់​ថ្ងៃ​បន្ត​ដូ​ការស្នើសុំ​លើកដំបូង​ដែរ។

ក្រុមការងារ​អន្តរក្រសួង​មាន​សិទ្ធិ​បន្ត​អាជ្ញាប័ណ្ណ ដោយមាន​ដាក់​ឬ​មិន​ដាក់​លក្ខខណ្ឌ ឬ​មិន​បន្ត​អាជ្ញាប័ណ្ណ​ជូន ប្រសិនបើ​អ្នក​កាន់​អាជ្ញាប័ណ្ណ មិនបាន​បំពេញ​ទៅតាម​លក្ខខណ្ឌ​តម្រូវ​ណាមួយ ដែល​ដែល​ក្រុមការងារ​អន្តរ​ជា​ក្រសួង​បានកំណត់។

នរណា​អាចដាក់​ពាក្យស្នើសុំ​អាជ្ញាប័ណ្ណ?

វិស្វករ​សំណង់​អាគារ​ដែល​បញ្ចប់​ការសិក្សា និង​បាន​ឆ្លងកាត់​បទពិសោធន៍​ការងារ​ជាក់ស្តែង​ក្នុង​មុខជំនាញ ដែលមាន​វិ​ញ្ញាប​ន​ប័ត្រ​អាជីវកម្ម​សាងសង់ ឬ​សិក្សា​គម្រោង​ប្លង់​ពី​ក្រសួង​រៀបចំ​ដែនដី នគរូបនីយកម្ម និង​សំណង់ ឬ​សមាជិក​គណៈ​វិស្វករ​កម្ពុជា ដែលមាន​ការទទួលស្គាល់ និង​មានការ​យល់ព្រម​ពី​ក្រសួង​រៀបចំ​ដែនដី នគរូបនីយកម្ម និង​សំណង់។

អាចដាក់​ពាក្យស្នើសុំ​អាជ្ញាប័ណ្ណ ប្រកបដោយ​សេវាកម្ម ជា​ក្រុមហ៊ុន​វិស្វកម្ម​ឯករាជ្យ​ទៅតាម​ទម្រង់ ដែល​បានរៀបចំ​ដោយ​ក្រុមការងារ​អន្តរក្រសួង នៅ​លេខាធិការដ្ឋាន​នៃ​ក្រុមការងារ​អន្តរក្រសួង ដើម្បី​គ្រប់គ្រង​អាជីវកម្ម​អភិវឌ្ឍ​អចលនវត្ថុ ដែលមាន​ទីតាំងនៅ​ការិយាល័យ​គ្រប់គ្រង ការជួញដូរ​អចលនវត្ថុ នៃ​នាយកដ្ឋាន​ឧស្សាហកម្ម​ហិរញ្ញវត្ថុ​នៃ​ក្រសួង​សេដ្ឋកិច្ច និង​ហិរញ្ញវត្ថុ៕

ចំណេះដឹង៖ ដឹង​ទេ​ថា​ការជួល​អចលនវត្ថុ​រួមមាន​ដី និង​អគារ​លំនៅឋាន​ត្រូវ​ជាប់កាតព្វកិច្ច​ពន្ធ ?

ដោយៈ វុត្ថា

ភ្នំពេញៈ​ពន្ធ​លើ​ឈ្នួល​ផ្ទះ និង​ដី​ត្រូវ​កំណត់​យក​លើ​ប្រាក់​ឈ្នួល ដែល​បានមកពី​ការជួល៖អាគារ​ដែល​សង់​លើដី​ដូចជាៈ ផ្ទះ រោងចក្រ ភណ្ឌាគារ ការិយាល័យ ។ល។

ហ​ត្ថូ​បក​រណ៍ ដែល​ជាប់​ជាមួយ​គ្រឹះស្ថាន​ឧស្សាហកម្ម ឋា​បន​ភ័​ណ្ឌ​ពាណិជ្ជកម្ម ឧស្សាហកម្ម ដែល​នៅ​នឹង​មួយកន្លែង​អាគារធំៗ ដែល​ទុកដាក់​ធាតុ​រាវ ឬ​ផលិតផលផ្សេងៗ ដូចជា ប្រេងឥន្ធនៈ កៅស៊ូ​ចាក់​ថ្នល់ គ្រាប់​ធញ្ញជាតិ​ផ្ទះ​អណ្តែត​ទឹក កប៉ាល់​សម្រាប់​ធ្វើជា​លំនៅដ្ឋាន ឬ​ដើម្បី​ប្រកប​អាជីវកម្មផ្សេងៗដីធ្លី ដែល​គ្មាន​សំណង់ ដោយ​រាប់បញ្ចូល​ទាំង​កន្លែង​យក​ថ្ម យក​រ៉ែ ធ្យូងថ្ម បឹង​បូរ ស្រែអំបិល។

ពន្ធ​នេះ​ត្រូវ​ប្រមូល​ពី​កម្មសិទ្ធិករ ឬ​សិទ្ធិវន្ត​របស់​កម្មសិទ្ធិ​ករ​អត្រាពន្ធ លើ​ឈ្នួល​ផ្ទះ និង​ដី​ត្រូវ​បានកំណត់​ស្មើនឹង១០%នៃ​ប្រាក់​ឈ្នួល​ដុល។ ប្រាក់​ឈ្នួល​ដុល គឺជា​ប្រាក់​ឈ្នួល ដែល​បាន​ចុះកិច្ចសន្យា ឬ​បាន​ព្រមព្រៀង​ជាមួយ​អ្នក​ជួល៕