ដោយ ៖ រ៉ាណេត

កំពង់ចាមៈ ស្ពានមិត្តភាពកម្ពុជា ចិន ឆ្លងកាត់ទន្លេមេគង្គរវាងស្រុកស្ទឹងត្រង់ខេត្តកំពង់ចាម និងស្រុកក្រូចឆ្មារ ខេត្តត្បូងឃ្មុំ សម្រេចបានប្រមាណជិត៩០ភាគរយហើយ នៅឡើយតែភ្ជាប់ផ្នែកកណ្តាលនៃតួស្ពានតែប៉ុណ្ណោះ។

អភិបាលរងខេត្តកំពង់ចាម លោក កែវ នាឬទ្ធិ បានប្រាប់ឱ្យដឹងថា គិតត្រឹមថ្ងៃទី១៦ ខែកក្កដា ឆ្នាំ២០២០ សំណង់ស្ពានមិត្តកម្ពុជា – ចិន ឆ្លងកាត់ទន្លេមេគង្គ តភ្ជាប់រវាងស្រុកស្ទឹងត្រង់ខេត្តកំពង់ចាម និងស្រុកក្រូចឆ្មារ ខេត្តត្បូងឃ្មុំ ដែលប្រើប្រាស់ថវិកាហិរញ្ញប្បទានរបស់សាធារណរដ្ឋប្រជាមានិតចិន សម្រេចបានសម្រេចបានជិត៩០ភាគរយ ហើយគ្រោងនឹងបញ្ចប់នៅត្រឹមដើមឆ្នាំ២០២១ខាងមុខនេះ។

ស្ពាននេះមានប្រវែងសរុប១១៣១ម៉ែត្រ និងទទឹង១៣.៥០ម៉ែត្រ មានកម្ពស់ពីផ្ទៃទឹក១៥ម៉ែត្រ ចំណាយថវិកាសរុបប្រមាណ៥៧លានដុល្លារ និងបានចាប់ផ្ដើមដំណើរការសាងសង់នៅក្នុងអំឡុងខែកុម្ភៈ ឆ្នាំ២០១៨ ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា។

លោកបន្តថា ស្ពានឆ្លងកាត់ទន្លេមេគង្គនេះ នៅត្រើយខាងលិចស្ថិតនៅក្នុងភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ដែលមានផ្លូវតភ្ជាប់ពីក្បាលស្ពាន ត្រូវបានពង្រីកធំទូលាយក្រាលកៅស៊ូ និងមានរង្វង់មូលតភ្ជាប់ដោយផ្លូវខ្វាត់ខ្វែងទៀតផង។ អាជ្ញាធរខេត្ត កំពុងតែយកចិត្តទុកដាក់ បានចុះដោះស្រាយពីផលប៉ះពាល់នានា នៅតាមដងផ្លូវ ជាមួយនឹងប្រជាពលរដ្ឋរួចរាល់ និងផ្លូវត្រូវពង្រីកឱ្យធំជាងមុន តភ្ជាប់មកផ្លូវលេខ៧១ រហូតដល់ស្រុកចំការលើ។

តាមរយៈវត្តមាននៃស្ពានមួយនេះ បានដើរតួយ៉ាងសំខាន់ក្នុងនាមជាដង្ហើមសេដ្ឋកិច្ចមួយរវាងខេត្តកំពង់ចាម និងត្បូងឃ្មុំ ក្នុងការដឹកកសិផល និងវិស័យផ្សេងៗ ឆ្លងកាត់ពីតំបន់មួយទៅតំបន់មួយកាន់តែប្រសើរឡើង ដោយក្នុងនោះប្រជាពលរដ្ឋដែលរស់នៅខេត្តស្ទឹងត្រែង និងខេត្តក្រចេះ ក៏អាចដឹកទំនិញឆ្លងកាត់ស្ពានមិត្តភាពកម្ពុជា-ចិននេះបែងចែកទៅតាមបណ្តាខេត្តដទៃទៀត ក៏ដូចជាឆ្ពោះមកកាន់រាជធានីភ្នំពេញ បានយ៉ាងស្រួល៕

ដោយវុត្ថា

ភ្នំពេញៈ របាយការណ៍ចុងក្រោយរបស់អគ្គនាយកដ្ឋាន អន្ដោប្រវេសន៍កម្ពុជា បានបង្ហាញថា  មកទល់ពេលនេះមានជនបរទេស ដែលស្នាក់នៅក្នុងប្រទេសកម្ពុជា បានចុះបញ្ជីតាមប្រព័ន្ធព័ត៌មានវិទ្យាមានជាង១៦ម៉ឺននាក់ ប៉ុន្ដែវត្តមានជាក់ស្តែង មានជនបរទេសស្នាក់នៅកម្ពុជាមានជាង១១ម៉ឺននាក់ប៉ុណ្ណោះ។

លោកនាយឧត្តមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្ដោប្រវេសន៍ នៅក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ និងទិសដៅឆមាសទី២ ឆ្នាំ២០២០បានឲ្យដឹងថា រយៈពេល៦ខែឆ្នាំ២០២០នេះ មានបញ្ហាជំងឺកូវីដ-១៩ បានធ្វើឲ្យ​ជនបរទេសមកកម្ពុជាមានការថយចុះ ហើយកម្ពុជាទទួលជនបរទេសជាង១លាននាក់ បើប្រៀបធៀបរយៈពេលដូចគ្នានេះ ឆ្នាំ២០១៩គឺទទួលបានជាង៣លាននាក់។

លោកថ្លែងថា “តាមប្រព័ន្ធព័ត៌មានវិទ្យា ដែលយើងបានបង្កើតឡើង ហើយយើងអនុញ្ញាតឲ្យម្ចាស់គោលដៅ និងម្ចាស់ទីតាំង ឬម្ចាស់លំនៅដ្ឋាន ឬអ្នកកាន់កាប់លំនៅដ្ឋាន នៅក្នុងព្រះរាជណាចក្រកម្ពុជា ចុះវត្តមានជនបរទេសស្នាក់នៅលំនៅដ្ឋានរបស់ខ្លួន”។​លោកបន្តថា “មកដល់ម៉ោងនេះ យើងទទួលបានជាង១៦ម៉ឺននាក់ ដែលបានចុះបញ្ជីនៅក្នុងប្រព័ន្ធយើង ប៉ុន្ដែប្រព័ន្ធក៏បានបញ្ជាក់ថាវត្តមានជាក់ស្ដែង ប្រហែលជាង១១ម៉ឺននាក់ប៉ុណ្ណោះ”។

លោកបបន្ថែមថា ប្រព័ន្ធព័ត៌មានវិទ្យាកំពុងតែតាមដានបន្ដទៀត ចំពោះជនបរទេ​សស្នាក់នៅកម្ពុជា ដូច្នេះជនបរទេសអាច នឹងមានការកើនឡើងបន្ថែមទៀត ដោយសារតែអគ្គនាយកដ្ឋានអន្ដោប្រវរសន៍ បានប្រកាសដាក់ឲ្យប្រើប្រាស់កម្មវិធីប្រព័ន្ធព័ត៌មានវិទ្យានេះ។

លោកបន្តថា ការចុះបញ្ជីជនបទេសតាមប្រព័ន្ធព័ត៌មានវិទ្យា នឹងកាន់តែល្អបន្ថែមទៀត ព្រោះការងារនេះក៏ជាជំហានដំបូងនៅកម្ពុជា ហើយការងារនេះក៏បានជួបបញ្ហាមួយចំនួនផងដែរ។ លោក៏បានស្នើ ដល់ម្ចាស់ទីតាំង ម្ចាស់លំនៅដ្ឋាន ម្ចាស់អគារ ជាដើម ត្រូវចូលរួមទាំងអស់គ្នា ដើម្បីឲ្យទទួលបានការងារប្រកបដោយប្រសិទ្ធភាព តម្លាភាព ព្រោះការងារទាំងនេះក៏បានកំណត់ដោយច្បាប់ផងដែរ។

លោកបគៀត ច័ន្ទថារិទ្ធ បញ្ជាក់ឡើងថា ប្រសិនបើមានម្ចាស់ទីតាំងណាមួយឲ្យជនបរទេសស្នាក់នៅ ហើយមិនសហការជាមួយសមត្ថកិច្ច នោះម្ចាស់ទីតាំងនឹងទទួលពិន័យតាមផ្លូវច្បាប់។

យោងតាមរបាយការណ៍លទ្ធផលការងារប្រចាំឆមាសទី១ និងទិសដៅការងារឆមា​សទី២ ឆ្នាំ២០២០របស់អគ្គនាយកដ្ឋានអន្ដោប្រវេសន៍បានឲ្យដឹងថា ជាទូទៅនៅលើពិភពលោក ចំពោះការរាតត្បាតនៃជំងឺរីកូរីដ-១៩ បានធ្វើឲ្យអាជ្ញាធរគ្រប់ប្រទេស ផ្អាកជាបណ្ដោះអាសន្នការចរាចរឆ្លងដែន ទាំងផ្លូវអាកាស ផ្លូវគោក និងផ្លូវទឹក ចាប់ពីខែមីនាមក បណ្ដាលឲ្យភ្ញៀវបរទេសចូលកម្ពុជាមានការថយចុះយ៉ាងគំហុក។

ជាក់ស្តែងក្នុងឆមាសទី១នេះ ភ្ញៀវថយចុះ៥៥,៦៨% ប្រៀបធៀបទៅឆមាសទី១ ឆ្នាំ២០១៩ ក្នុងនោះ ភ្ញៀវទេសចរថយចុះ៥៣,៨៦% អ្នកជំនួញ៦៦,១០%។ ជាមួយនោះ ប្រជាពលរដ្ឋខ្មែរដែលធ្វើដំណើរចេញទៅ បរទេសថយចុះ៦២,១៦% និងពលករខ្មែរទៅធ្វើការខុសច្បាប់នៅក្រៅប្រទេស ដែលត្រូវបានអាជ្ញាធរបរទេសចាប់បញ្ជូនមកវិញ ក៏ថយចុះ ៦០,៣៩%៕

ដោយៈ រ៉ាណេត

ព្រះសីហនុៈ គម្រោងសាងសង់ព្រលានយន្តថ្មីមួយទៀត ដែលស្ថិតនៅក្នុងផែនការមេអភិវឌ្ឍន៍ដែលវិនិយោគដោយវិស័យឯកជន គ្រោងនឹងបង្ហាញរូបរាងនៅពេលឆាប់ៗខាងមុខនេះ ស្របទៅតាមសេណារីយូដែលបានកំណត់របស់ក្រុមហ៊ុន។

តាមរយៈអ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យ បានបង្ហើបប្រាប់តាមប្រព័ន្ធសារអេឡិចត្រូនិកនៅថ្ងៃទី១៧ ខែកក្កដា ឆ្នាំ២០២០នេះថា គម្រោងអភិវឌ្ឍន៍ព្រលានយន្ដហោះថ្មីមួយនេះ ស្ថិតនៅក្នុងផែនការមេរបស់ក្រុមហ៊ុន Royal Group Koh Rong Development របស់អ្នកឧកញ៉ាគិត ម៉េង នៅលើកោះរ៉ុង ក្រុងកោះរ៉ុង ខេត្តព្រះសីហនុ។

លោកបន្តបញ្ជាក់ថា “គម្រោងនៃការសាងសង់ព្រលានយន្តហោះនេះ វាជាផ្នែកនៃគោលដៅអភិវឌ្ឍ ដែលស្ថិតនៅក្នុងMaster Planនៃការវិនិយោគរបស់ក្រុមហ៊ុន Royal Groupប៉ុន្តែអ្វីដែលជាអាទិភាព គឺការស្ថាបនាផ្លូវបេតុងដែលមានប្រវែង៧០គីឡូម៉ែត្រ និងទទឹង៨ម៉ែត្រ”។លោកបន្តថា“ការស្ថាបនាផ្លូវនេះ ត្រូវចំណាតទំហំទឹកប្រាក់ប្រមាណ៣៥លានដុល្លារ រួមជាមួយនឹងបណ្តាញហេដ្ឋារចនាសម្ព័ន្ធរណបគម្រោងផ្សេងទៀត ដែលត្រូវបញ្ចប់ឱ្យបានមុន ហើយគម្រោងព្រលានយន្តហោះចាប់ផ្តើមធ្វើបន្ទាប់”។

លោកបានបន្តថា ពាក់ព័ន្ធទៅនឹងគម្រោង នៃការសាងសង់ព្រលានយន្តហោះនេះផងដែរ បច្ចុប្បន្ននេះរដ្ឋបាលខេត្តកំពុងរង់ចាំការកែសម្រួល Master Plan ពីក្រុមហ៊ុន Royal Group Koh Rong Development ដែលទទួលបានសិទ្ធិក្នុងការវិនិយោគ និងអភិវឌ្ឍន៍ ដោយឡែកសម្រាប់ទំហំទុន នៃការសាងសង់ព្រលានយន្តហោះសម្រាប់ការដឹកជញ្ជូនក្នុងស្រុកមួយនេះ យើងនៅមិនទាន់បានដឹងច្បាស់នៅឡើយនោះទេ ហើយក៏មិនទាន់ទទួលបានការសម្រេច ពីក្រុមប្រឹក្សាអភិវឌ្ឍន៍កម្ពុជានោះដែរ។ ដូច្នេះគម្រោងនេះនៅមិនទាន់បានបង្ហាញជាផ្លូវការជាក់លាក់ថា នឹងត្រូវអភិវឌ្ឍន៍នៅលើផ្ទៃដីទំហំប៉ុន្មាន និងចំណាយទុនក្នុងការសាងសង់ក្នុងកម្រិតប៉ុណ្ណានោះដែរ។

ជាមួយនឹងគម្រោងអភិវឌ្ឍន៍ នៅលើកោះរ៉ុងក្រោមការវិនិយោគ ពីសំណាក់ក្រុមហ៊ុន Royal Group របស់អ្នកឧកញ៉ា គិត ម៉េងមួយនេះ ជាគម្រោងដ៏ធំលើកដំបូងនៃការអភិវឌ្ឍកោះនៅក្នុងខេត្តព្រះសីហនុឱ្យក្លាយជាទីក្រុងកម្សាន្ត និងទេសចរណ៍លំដាប់ពិភពលោក ដោយក្នុងនោះរួមមានសណ្ឋាគារលំដាប់ផ្កាយ៥ ទីលានវាយកូនហ្គោល កាស៊ីណូ តំបន់រីហ្សត ផែបណ្តែតទឹក ស្ពាន ប្រភេទផ្ទះវីឡាភ្ជាប់ជាមួយអាងហែលទឹក រួមជាមួយនឹងមណ្ឌលកម្សាន្តមួយចំនួនទៀត៕

ដោយ ៖ រ៉ាណេត

ភ្នំពេញ ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានដឹកនាំគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គ.អ.ឆ.ក.) ចុះពិនិត្យវឌ្ឍនភាពនៃការអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវក្រុងចំនួន ៣៤ ខ្សែ ប្រវែង ៨២,៥៧៤ គីឡូម៉ែត្រ នៅខេត្តព្រះសីហនុ។

គិតត្រឹមថ្ងៃទី១៧ ខែកក្កដា ឆ្នាំ២០២០នេះ គម្រោងបានសម្រេចចាក់បេតុងបាន ៩៩,៩២ភាគរយ ហើយនឹងកំពុងរៀបចំកែលម្អឆ្នេរសមុទ្រឡើងវិញ រួមទាំងសាងសង់អាងប្រព្រឹត្តកម្មទឹកកខ្វក់ចំនួន២ទីតាំង ដែលទី១នៅក្បែរសណ្ឋាគារ Sunshine Bay មានសមត្ថភាពច្រោះ ៥ ២០០ម៉ែត្រគូបក្នុងមួយថ្ងៃ សម្រេចបាន ២០ភាគរយ និងទី២នៅក្បែរសណ្ឋាគារសុខា មានសមត្ថភាពច្រោះ ៧ ២០០ម៉ែត្រគូប ក្នុងមួយថ្ងៃ សម្រេចបាន១០ភាគរយ។

គម្រោងស្ថាបនាហេដ្ឋារចនាសម្ព័ន្ធផ្លូវក្រុងចំនួន ៣៤ខ្សែ នៅខេត្តព្រះសីហនុ ជាគម្រោងរបស់រាជរដ្ឋាភិបាល ដែលអនុវត្តដោយគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា និងត្រូវបានធ្វើពិធីបើកការដ្ឋានក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា កាលពីថ្ងៃទី១៦ ខែវិច្ឆិកា ឆ្នាំ២០១៩ ។

គម្រោងនេះ នឹងចូលរួមអនុវត្តផែនការរៀបចំដែនដីខេត្តព្រះសីហនុ ចក្ខុវិស័យឆ្នាំ២០៣០ ដែលត្រូវបានដាក់ឱ្យប្រើប្រាស់ដោយអនុក្រឹត្យលេខ៨១ អនក្រ.បក ចុះថ្ងៃទី១៣ ខែមិថុនា ឆ្នាំ២០១៨ ក្នុងគោលបំណងធ្វើឱ្យខេត្តព្រះសីហនុក្លាយទៅជាប៉ូលអភិវឌ្ឍជាតិប្រកបដោយចីរភាព តាមរយៈការអភិវឌ្ឍទីក្រុងទំនើប និងការរៀបចំជាតំបន់សេដ្ឋកិច្ចពិសេសគំរូពហុបំណង មជ្ឈមណ្ឌលកំណើនជាតិ មជ្ឈមណ្ឌលភស្តុភារកម្មជាតិ និងជាមជ្ឈមណ្ឌលឧស្សាហកម្មបច្ចេកវិទ្យាទំនើប៕

ដោយ ប៊ី

ក្រុងវ៉ាស៊ីនតោនៈក្រុមប្រឹក្សានាយកប្រតិបត្តិនៃធនាគាពិភពលោក នៅថ្ងៃនេះបានអនុម័តផ្តល់ឥណទាន១០០លានដុល្លារអាមេរិក ពីសមាគមអភិវឌ្ឍន៍អន្តរជាតិ (IDA) សម្រាប់ជួយគាំទ្រ គម្រោងកែលម្អបណ្តាញផ្លូវគមនាគមន៍នៅប្រទេសកម្ពុជា (Cambodia Road Connectivity Improvement Project)។

យោងតាមសេចក្តីប្រកាសព័ត៌មានរបស់ធនាគារពិភពលោក (World Bank) ដែលគេហទំព័រ Propertyarea.asia ទទួលបាននៅថ្ងៃទី១៧ ខែកក្កដា ឆ្នាំ២០២០ ឱ្យដឹងថា គម្រោងនេះនឹងពង្រីកលទ្ធភាព សម្រាប់សហគមន៍ជនបទ ឱ្យទទួលបានសេវាចាំបាច់នានា ដូចជាមណ្ឌលសុខភាព មន្ទីរពេទ្យបង្អែក សាលារៀន និង ទីផ្សារ តាមរយៈការកែលម្អផ្លូវជនបទ ឱ្យកាន់តែមានភាពធន់ទៅនឹងកត្តាប្រែប្រួលរបស់អាកាសធាតុ។

ការកែលម្អនឹងត្រូវធ្វើទៅលើផ្នែកជាច្រើន នៃតាមផ្លូវជាតិ និងផ្លូវខេត្ត ដែលជាលទ្ធផលជួយកាត់បន្ថយថ្លៃចំណាយលើការដឹកជញ្ជូន និងហានិភ័យគ្រោះថ្នាក់ ដោយសារតែផ្លូវខូច និងជួយសម្រួលដល់ខ្សែចង្វាក់ផ្គត់ផ្គង់ក្នុងវិស័យកសិកម្ម និងការអភិវឌ្ឍវិស័យទេសចរណ៍ផងដែរ។

ការចំណាយលើការដឹកជញ្ជូននៅប្រទេសកម្ពុជា នៅតែមានកម្រិតខ្ពស់នៅឡើយ ទោះបីជាមានភាពប្រសើរច្រើន ក្នុងប៉ុន្មានឆ្នាំចុងក្រោយនេះហើយក្តី។ ផ្លូវថ្នល់គឺជាមធ្យោបាយដឹកជញ្ជូននាំមុខគេនៅក្នុងប្រទេស ហើយចាំបាច់ត្រូវមានការវិនិយោគច្រើន ជាពិសេសនៅតាមតំបន់ជនបទ។ ផ្លូវជនបទមានជាង៧៥ភាគរយ នៃបណ្តាញផ្លូវសរុបទូទាំងប្រទេស ប៉ុន្តែមានតែ៥ភាគរយប៉ុណ្ណោះដែលជាផ្លូវក្រាលកៅស៊ូ។ ការប្រែប្រួលអាកាសធាតុ បានធ្វើឱ្យមានភ្លៀងនិងទឹកជំនន់ធំៗ បង្កហានិភ័យខូចខាតកាន់តែខ្លាំងដល់ប្រព័ន្ធផ្លូវនៅជនបទ។

ការវិភាគអំពីស្ថានភាពប្រើប្រាស់របស់ផ្លូវជនបទ ដែលត្រូវបានធ្វើឡើងជាផ្នែកមួយនៃការរៀបចំគម្រោងនេះបង្ហាញថា ក្នុងរដូវទឹកជំនន់ជាង២៦ភាគរយ នៃប្រជាជនរស់នៅក្នុងតំបន់របស់គម្រោង ប្រឈមនឹងហានិភ័យគ្មានផ្លូវប្រើប្រាស់ សម្រាប់ទៅរកសេវាបន្ទាន់ផ្នែកសុខភិបាល និងសាលារៀន។

ក្រៅពីនោះប្រជាជន១៨ភាគរយទៀត ត្រូវចំណាយពេល៣០នាទី ឬច្រើនជាងនេះ សម្រាប់ធ្វើដំណើរទម្រាំទៅដល់មន្ទីរពេទ្យ ដែលជាស្ថានប្រឈមនឹងភាពស្លាប់រស់មួយ។ ការជ្រើសរើសផ្លូវ សម្រាប់ការវិនិយោគនៃគម្រោងនេះ ផ្តល់អាទិភាពដល់ផ្លូវទាំងឡាយណាដែលតភ្ជាប់ផ្ទះអ្នកស្រុកជាមួយមន្ទីរពេទ្យ សាលារៀន និងទីផ្សារ។ តំបន់គោលដៅរបស់គម្រោងនេះមាន ផ្លូវនៅក្នុងខេត្តកំពង់ចាម ត្បូងឃ្មុំ និងក្រចេះ ដែលគ្របដណ្តប់លើប្រជាជនជាង ២លាននាក់ ក្នុងនោះ៨០ភាគរយ រស់នៅតាមទីជនបទដាច់ស្រយាល។

លោកស្រី អ៊ីនហ្គូណា ដូប្រាចា ប្រធានគ្រប់គ្រងនៃធនាគារពិភពលោកប្រចាំកម្ពុជា មានប្រសាសន៍ថា “កង្វះលទ្ធភាពសម្រាប់ទទួលបានសេវាមន្ទីរពេទ្យ សាលារៀន និងសម្រាប់ដឹកទំនិញទៅកាន់ទីផ្សារ ជាពិសេសក្នុងរដូវវស្សា នៅតែចោទជាបញ្ហាប្រឈមធំមួយសម្រាប់ប្រជាជនកម្ពុជានៅតាមតំបន់ជនបទ”។

លោកបានបន្តថា “គម្រោងថ្មីនេះគឺជាការបន្តការប្តេជ្ញាចិត្តរបស់យើង ក្នុងការជួយដល់ការអភិវឌ្ឍហេដ្ឋារចនាសម្ព័ន្ធផ្លូវរបស់កម្ពុជា។ វានឹងតភ្ជាប់កាន់តែប្រសើរជាងមុនដោយបានភ្ជាប់ប្រជាជន ទៅនឹងការទទួលបានសេវា កាត់បន្ថយការដាច់ផ្លូវ និងបង្កើតការងារសម្រាប់សហគមន៍ មូលដ្ឋានក្នុងពេលសាងសង់ផ្លូវ ដែលរួមចំណែកធ្វើឱ្យសេដ្ឋកិច្ចងើបឡើងវិញទៀតផង”។

គម្រោងនេះ ក៏នឹងជួយក្រសួងសាធារណការនិងដឹកជញ្ជូន និងក្រសួងអភិវឌ្ឍន៍ជនបទ (ដែលក្រសួងទាំងពីរនេះជាភ្នាក់ងារអនុវត្តគម្រោង) ក្នុងការអភិវឌ្ឍផ្នែកស្ថាប័នផងដែរ។ ក្នុងនោះមាន ការរៀបចំយុទ្ធសាស្ត្រហិរញ្ញប្បទានផ្លូវធន់នឹងអាកាសធាតុ ការជួយដល់ក្រសួងទាំងពីរ ក្នុងការអនុវត្តផែនការសកម្មភាពបញ្ជ្រាបយេនឌ័រ របស់ក្រសួងទាំងពីរ និងការគ្រប់គ្រងកិច្ចសន្យាផ្អែកលើលទ្ធផលការងា រសម្រាប់ការថែទាំផ្លូវ ធ្វើឱ្យហេដ្ឋារចនាសម្ព័នកាន់តែមានចីរភាពល្អប្រសើរ៕

ដោយ ៖ វុត្ថា

ភ្នំពេញ ៖ សម្តេចតេជោ ហ៊ុន សែន នាយកដ្ឋមន្ត្រីនៃកម្ពុជា បានសម្រេចបង្កើតគណៈកម្មការអន្តរក្រសួង ដើម្បីជំរុញការអនុវត្តគម្រោងហេដ្ឋារចនាសម្ព័ន្ធផ្លូវល្បឿនលឿន (Expressway) តភ្ជាប់ពីភ្នំពេញ-បាវិត ដែលស្នើសុំវិនិយោគដោយក្រុមហ៊ុន China Railway International Group., Ltd ក្រោមក្របខណ្ឌសាងសង់-ធ្វើអាជីវកម្ម។

សេចក្តីសម្រេចនេះត្រូវបានចុះហត្ថលេខា ដោយសម្តេចតេជោ ហ៊ុន សែន កាលពីថ្ងៃទី១៥ ខែកក្កដា ឆ្នាំ ២០២០ ដែល មានសមាសភាព ១៧ រូប ដឹកនាំដោយលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ជាប្រធាន និងមន្ត្រីក្រសួងស្ថាប័ន និងអភិបាលខេត្តពាក់ព័ន្ធនឹងគម្រោងផ្លូវល្បឿនលឿនភ្នំពេញ-បាវិតនេះ ។

គណៈកម្មការនេះ មានភារកិច្ចពិនិត្យ និងផ្តល់យោបល់អំពីនិតិវិធីក្របខណ្ឌគតិយុត្ត និងរូបភាពនៃការវិនិយោគលើគម្រោងហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញ ទៅបាវិត ជំរុញគម្រោងហេដ្ឋារចនាសម្ព័ន្ធ ផ្លូវល្បឿនលឿននេះ ឱ្យសម្រេចជាស្ថាពរ ដើម្បីរួមចំណែកពន្លឿនការអភិវឌ្ឍច្រករបៀងរាជធានីភ្នំពេញ- ក្រុងបាវិត។

លោកទេសរដ្ឋមន្រ្តី ស៊ុន ចាន់ថុល ធ្លាប់បានលើកឡើងកាលពីពេលកន្លងមកនេះថា ក្រសួងបានចុះកិច្ចព្រមព្រៀង ក្របខណ្ឌរវាងរាជរដ្ឋាភិបាលកម្ពុជា ជាមួយក្រុមហ៊ុន China Railway International Group Co., Ltd ដើម្បីសិក្សាគម្រោងសាងសង់ផ្លូវល្បឿនលឿនភ្នំពេញ-បាវិត។

លោកបន្តថា “ក្រុមការងារកាលពីពេលថ្មីៗនេះ បានជួបពិភាក្សាជាមួយ លោក ងៀន វ៉ាន់ថេ រដ្ឋមន្រ្តីដឹកជញ្ជូនវៀតណាម ដើម្បីពិនិត្យលទ្ធភាពក្នុងការជំរុញការវិនិយោគលើការសាងសង់ និងតភ្ជាប់ផ្លូវល្បឿនលឿនភ្នំពេញ-បាវិត និងម៉ុកបៃ-ហូជីមិញ”។

គម្រោងផ្លូវល្បឿនលឿនភ្នំពេញ-បាវិត ក៏ធ្លាប់ត្រូវបានសិក្សាជំហានដំបូងដោយទីភ្នាក់ងារ JICA រួចហើយ ដោយគម្រោងនេះ គ្រោងចំណាយថវិកាប្រមាណ៣,៨ពាន់លានដុល្លារសហរដ្ឋអាមេរិក។

ផ្លូវល្បឿនលឿន ជាផ្លូវសម្រាប់យានយន្តធ្វើចរាចរណ៍ មានបរិក្ខារបែងចែកទ្រូងផ្លូវជាពីរចំណែកខុសទិសគ្នា ឬចែកជាគន្លងផ្លូវ គ្មានកន្លែងផ្លូវប្រសព្វលើផ្ទៃរាបមួយ ឬត្រូវមានផ្លូវប្រសព្វតិចបំផុត ក្នុងករណីចាំបាច់ និងបំពាក់គ្រប់គ្រាន់នូវបរិក្ខារផ្លូវថ្នល់ ដើម្បីធានាលំហូរចរាចរណ៍ សុវត្ថិភាព និងដើម្បីបន្ថយពេលវេលាធ្វើដំណើរ និងមានកន្លែងកំណត់សម្រាប់ឲ្យយានយន្តចេញនិងចូលផ្លូវល្បឿនលឿន។

គម្រោងសាងសង់បណ្តាញផ្លូវល្បឿនលឿន (Expressway) ជាកត្តាដ៏ធំជាងគេសម្រា ប់ពង្រឹងសមត្ថភាពបណ្តាញផ្លូវនៅកម្ពុជា ព្រោះផ្លូវល្បឿនលឿន អាចបម្រើសេវាកម្មដឹកជញ្ជូនល្អជាងផ្លូវធម្មតា និងត្រូវបានគេចាត់ទុកជាមូលដ្ឋាន សម្រាប់វិស័យឧស្សាហកម្មទំនើបៗ និងសកម្មភាពដឹកជញ្ជូនធនធ្ងន់៕

ដោយ ៖ វុត្ថា

ភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា នៅក្នុងរយៈពេល៦ខែនៅឆ្នាំ២០២០នេះ កម្ពុជា ទទួលបានអ្នកដំណើរចំនួន ១,៩៥ លាននាក់ ធ្លាក់ចុះ៦៨ភាគរយ និងទំនិញចំនួន២៥.០០០ តោន ធ្លាក់ចុះ៣០ភាគរយ ប្រៀបធៀបនឹងរយៈពេលដូចគ្នាក្នុងឆ្នាំ២០១៩។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍បែបនេះ នៅក្នុងកិច្ចប្រជុំរដ្ឋមន្ត្រីដឹកជញ្ជូនអាស៊ាន-ចិន តាមរយៈវីដេអូពីចម្ងាយទាក់ទងនឹងវិធានការប្រយុទ្ធប្រឆាំងមេរោគកូវីដ១៩ក្នុងវិស័យដឹកជញ្ជូន (the ASEAN-CHINA Transport Ministers’ meeting on COVID-19) កាលពីថ្ងៃទី១៦ ខែកក្កដា ឆ្នាំ ២០២០ ម្សិលមិញនេះ។

លោកទេសរដ្ឋមន្ត្រីបន្តថា មិនត្រឹមតែកម្ពុជាទទួលរងនូវផលប៉ះពាល់នោះទេ ជំងឺ Covid-19 បានជះឥទ្ធិពលអវិជ្ជមានដល់វិស័យដឹកជញ្ជូនទាំងផ្លូវគោក ផ្លូវទឹក និងផ្លូវអាកាសនៅទូទាំងពិភពលោក និងធ្វើឱ្យវិស័យនេះមានការធ្លាក់ចុះគួរឱ្យកត់សម្គាល់ ។

លោកបន្តថា ផលិតផលក្នុងស្រុកសរុបរបស់កម្ពុជាត្រូវបានគេប៉ាន់ប្រមាណថាមានកំណើនអវិជ្ជមាន ៥,៥ភាគរយ នៅឆ្នាំនេះធៀបនឹងកំណើនវិជ្ជមានជាមធ្យម៧ភាគរយក្នុងរយៈពេល២០ឆ្នាំចុងក្រោយនេះ ហើយវិស័យដែលរងផលប៉ះពាល់ច្រើនជាងគេគឺវិស័យទេសចរណ៍ និងវិស័យកាត់ដេរ។ ស្របពេលជាមួយគ្នានេះដែរ រាជរដ្ឋាភិបាលកម្ពុជាបានចាត់វិធានការមួយចំនួនដើម្បីជំរុញសេដ្ឋកិច្ច និងគាំទ្រដល់វិស័យឯកជនក្នុងកំឡុងពេលមានជំងឺរាតត្បាតនេះ ក្នុងនោះរួមមានការបង្កើតកម្មវិធីសង្គម ផ្សេងៗជាច្រើនដើម្បីចូលរួមកាត់បន្ថយការលំបាករបស់ប្រជាពលរដ្ឋដែលងាយរងគ្រោះបំផុត ហើយរំពឹងថាអត្រាកំណើនផលិតផលក្នុងស្រុកសរុបនឹងកើនឡើងដល់ប្រហែល៥ភាគរយនៅឆ្នាំក្រោយ។

លោកទេសរដ្ឋមន្ត្រី ស៊ុន ចាន់ថុល បន្ថែមថា ទោះបីជាមានឥទ្ធិពលអវិជ្ជមានពីមេរោគ Covid-19 ទៅលើសេដ្ឋកិច្ចរបស់កម្ពុជាក៏ដោយ ក៏រាជរដ្ឋាភិបាលនៅតែបន្តកសាងហេដ្ឋារចនាសម្ព័ន្ធដើម្បីជួយអភិវឌ្ឍសេដ្ឋកិច្ចសង្គម កាត់បន្ថយថ្លៃដើមនៃការដឹកជញ្ជូន និងភស្តុភារកម្មផងដែរ៕