ដោយ ៖ វុត្ថា
ភ្នំពេញ ៖ រាជរដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគរោងចក្រថ្មីមួយទៀតមានទំហំទឹកប្រាក់ ១០,៣ លានដុល្លារ ស្ថិតនៅតាមបណ្តោយផ្លូវជាតិលេខ៦ ភូមិឈើទាល ឃុំផ្តៅជុំ ស្រុកជើងព្រៃ ខេត្តកំពង់ចាម និងផ្តល់ឱកាសការងារជូនពលរដ្ឋរាប់ពាន់កន្លែង ។

ក្រុមប្រឹក្សាអភិវឌ្ឍន៍កម្ពុជា ចេញផ្សាយនៅថ្ងៃទី១៦ ខែកក្កដា ឆ្នាំ ២០២០នេះ ឱ្យដឹងថា តាមសំណើសុំវិនិយោគលើគម្រោងបង្កើតរោងចក្រផលិតស្បែកជើង របស់ក្រុមហ៊ុន MANN LONG SHOES CO., LTD. គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនខាងលើ ដែលមានទុនវិនិយោគប្រមាណ ១០,៣ លានដុល្លារអាមេរិក និងអាចបង្កើតការងារបានចំនួន ៣.៣៧៩កន្លែង។

លោកស្រី Grace Rachny Fong នាយិកាក្រុមហ៊ុនភ្នាក់ងារអចលនទ្រព្យអន្តរជាតិ Century21 Cambodia ធ្លាប់បានបដឹងតាមទូរស័ព្ទកន្លងមកនេះថា នៅតាមតំបន់ស្ថិតនៅតាមបណ្តោយផ្លូវជាតិលេខ៦នេះ បច្ចុប្បន្ននេះមានក្រុមហ៊ុនអន្តរជាតិជាច្រើនបាន និងកំពុងចាប់អារម្មណ៍ និងត្រៀមបោះទុនវិនិយោគនៅតំបន់នេះយ៉ាងច្រើន ដែលធ្វើឲ្យតំបន់ស្ថិតនៅជាប់ផ្លូវនេះកំពុងមានការរីកចម្រើន និងមានសក្តានុពលខ្លាំងនាពេលអនាគត។

លោកស្រីបន្តថា “តាមខ្ញុំដឹង គឺមានក្រុមហ៊ុនជាច្រើន កំពុងត្រៀមចូលវិនិយោគនៅតំបន់នេះបន្ថែមទៀត ហើយវាជាក្រុមហ៊ុនវិនិយោគធំៗមកពីក្រៅប្រទេស។តំបន់នេះមានភាពអំណោយផលបំផុតលើលក្ខខណ្ឌអាកាសធាតុ ដោយសារមានទន្លេ២ អមសងខាង និងមានហេដ្ឋារចនាសម្ព័ន្ឋតភ្ជាប់យ៉ាងល្អប្រសើរ”។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងពិធីបើកសម្ពោធផ្លូវជាតិលេខ ៦A កាលពីកន្លងមកនេះបានថ្លែង ថា ផ្លូវជាតិលេខ ៦នេះគឺជាផ្លូវដែលមមាញឹកបំផុតនៅក្នុងប្រទេសកម្ពុជា ហើយផ្នែកនៃផ្លូវនេះតភ្ជាប់រាជធានីភ្នំពេញទៅខេត្តនានា ហើយរដ្ឋាភិបាលបានសម្រេចចិត្តសាងសង់ផ្លូវនេះឡើងដើម្បីជួយដល់ការតាំងទីលំនៅរបស់ប្រជាជន និងបោះទីតាំងរោងចក្រសហគ្រាស៕

ដោយ ៖ រ៉ាណេត

មណ្ឌលគីរី ៖ នៅទូទាំងខេត្តមណ្ឌលគិរី មានធនធាន និងតំបន់ទាក់ទាញទេសចរណ៍ធម្មជាតិជាច្រើនរហូតដល់ចំនួន ៣៦កន្លែង ដោយក្នុងនោះ មានតំបន់រមណីយដ្ឋានទឹកធ្លាក់ តំបន់រមណីយដ្ឋានវប្បធម៌ជនជាតិដើមភាគតិច តំបន់ភ្នំ តំបន់ទេសភាព ភូមិជនជាតិ សមុទ្រឈើ សហគមន៍ទេសចរណ៍ ដែនជម្រកសត្វព្រៃ និងមានអាកាសធាតុត្រជាក់ជាដើម។

អភិបាលខេត្តមណ្ឌលគីរី លោក ស្វាយ សំអ៊ាង បានលើកឡើងនៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្តរបស់រដ្ឋបាលខេត្ត នាព្រឹកថ្ងៃទី១៦ ខែកក្កដា ឆ្នាំ២០២០ នៅទីស្ដីការគណរដ្ឋមន្ត្រី ថា នៅទូទាំងខេត្តគឺមានតំបន់ទេសចរណ៍កម្សាន្តជាច្រើនទីតាំង ដែលសុទ្ធតែមានភាពទាក់ទាញ និងមិនរីងស្ងួតនៅឡើយ។

លោក ស្វាយ សំអ៊ាង បានបញ្ជាក់ទៀតថា “ ក្រុមហ៊ុនវិនិយោគលើវិស័យទេសចរណ៍ដោយឯកជនសរុបមានចំនួន ១១ទីតាំង ក្នុងនោះ មាន ទឹកជ្រោះប៊ូស្រា, អូរផ្លាយ, រមនា១, រមនា២, ជ្រៃយស់, ចំការកាហ្វេ , អូររមីស , ជ្រៃធំ,ដំណាក់ស្តេច,ក្បាលព្រះ ដែលជារៀងរាល់ឆ្នាំ ចាប់គិតពីឆ្នាំ២០១៥ រហូតដល់ឆ្នាំ២០១៩ កំណើននៃចំនួនទេសចរជាតិ និងអន្តរជាតិមានការកើនឡើងជាបន្តបន្ទាប់”។

សេវាកម្មទេសចរណ៍ជាច្រើន ដែលក្នុងនោះ មានសណ្ឋាគារ ១១កន្លែង ស្មើនឹង ៤២៨ បន្ទប់, ផ្ទះសំណាក់ ៥១កន្លែង ស្មើនឹង ៧៣៥បន្ទប់, ម៉ូតែល ០២កន្លែង ស្មើនឹង ៦៧បន្ទប់ , បឹងកាឡូ ០១កន្លែង ស្មើនឹង ០៦បន្ទប់ ភោជនីយដ្ឋាន និងអាហារដ្ឋាន ៣៤កន្លែង ស្មើនឹង ៣២០តុ និង ១.៧០១កៅអី និងខារ៉ាអូខេ ១៣កន្លែង ស្នើនឹង ៥៧បន្ទប់ ម៉ាស្សា ០៤កន្លែង ស្មើនឹង ០៧បន្ទប់ និងមគ្គុទេសក៍ទេសចរណ៍សហគមន៍សរុប ៧៥នាក់។ ក្រៅពីនេះ នៅមានគម្រោងវិនិយោគអភិវឌ្ឍទេសចរណ៍ក្នុងតំបន់អភិរក្សធនធានធម្មជាតិ សរុបចំនួន ៤០គម្រោងទៀត ក្នុងនោះមាន ដែនជម្រកសត្វព្រៃកែវសីមា ១០គម្រោង, ដែនជម្រកសត្វព្រៃភ្នំណាមលៀរ ០២គម្រោង និងរបៀងអភិរក្សជីវៈចម្រុះ ប្រព័ន្ធតំបន់ការពារធនធានធម្មជាតិ ២៨គម្រោង។

ថ្មីៗនេះ រាជរដ្ឋាភិបាល តាមរយៈក្រសួងទេសចរណ៍ បានដាក់ចេញនូវគោលដៅ និងផែនការអភិវឌ្ឍន៍ខេត្តកែប និងខេត្តមណ្ឌលគិរី ផែនការនេះ ត្រូវបាន និងកំពុងសិក្សាដោយក្រុមការងារ ក្រសួងទេសចរណ៍ នឹងត្រូវបានអនុវត្តនាពេលខាងមុខនេះ៕

ដោយ ៖ រ៉ាណេត

ភ្នំពេញ ៖ រោងចក្រប្រព្រឹត្តិកម្មទឹកស្អាតចំការមន ដែលមានតម្លៃជាង១៥លានដុល្លារ ក្រោមជំនួយបដិភាគរបស់រដ្ឋាភិបាលបារាំង និងអង្គភាពរដ្ឋាករទឹកស្វយ័តក្រុងភ្នំពេញ ដែលបានកំណត់ជាគម្រោងក្នុងផែនការមេទី៣ របស់អង្គភាពរដ្ឋាករទឹកស្វយ័តក្រុងភ្នំពេញ បានដាក់ដំណើរការសាកល្បងនៅក្នុងខណ្ឌចំការមន ជាមួយបច្ចេកទេសបែបទំនើប។

លោកបណ្ឌិត ចម ប្រសិទ្ធ ទេសរដ្ឋមន្ត្រី និងជារដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងនៅក្នុងដំណើរចុះត្ួតពិនិត្យសកម្មភាពនៃដំណើរការរបស់រោងចក្រប្រព្រឹត្តកម្មទឹកស្អាតមួយនេះកាលពីថ្ងៃទី១៥ ខែកក្កដា ឆ្នាំ២០២០ ថា គម្រោងសាងសង់ពង្រីកសមត្ថភាពរោងចក្រប្រព្រឹត្តិកម្មទឹកស្អាតចំការមន គឺជាគម្រោងដែលបានកំណត់ក្នុងផែនការមេទី៣ របស់អង្គភាពរដ្ឋាករទឹកស្វយ័តក្រុងភ្នំពេញ ក្រោមគម្រោងហិរញ្ញប្បទានរួមគ្នា ដោយទីភ្នាក់ងារបារាំងសម្រាប់ការអភិវឌ្ឍន៌ (AFD) និងថវិកាបដិភាគដោយអង្គភាពរដ្ឋាករទឹកស្វយ័តក្រុងភ្នំពេញ មានទំហំទឹកប្រាក់ចំនួន ជាង១៥ លានដុល្លារសហរដ្ឋអាមេរិក និង ជិត ០៨ លានអឺរ៉ូ ។

គម្រោងនេះ បានចុះហត្ថលេខាជាផ្លូវការ នៅថ្ងៃទី០៨ ខែ សីហា ឆ្នាំ២០១៨ ដោយក្រុមហ៊ុន វ៉ាំង ស៊ី (VINCI) ជាអ្នកទទួលខុសត្រូវក្នុងការសាងសង់ និងស្ថិតក្រោមការត្រួតពិនិត្យដោយទីប្រឹក្សាបច្ចេកទេសក្រុមហ៊ុន សាហ្វេរ (Safage) ។ គម្រោងនេះ បានចាប់ផ្តើមបើកការដ្ឋានពង្រីកសមត្ថភាពអាងប្រព្រឹត្តិកម្មរបស់ខ្លួននាថ្ងៃទី១៨ ខែ តុលា ឆ្នាំ២០១៧ និងបានដាក់ឲ្យដំណើរការសាកល្បងកាលពីថ្ងៃទី១៨ ខែតុលា ឆ្នាំ២០១៩ ។

សមត្ថភាពរោងចក្រប្រព្រឹត្តិកម្មផលិតទឹកស្អាតបច្ចុប្បន្នរបស់រដ្ឋាករទឹកស្វយ័តក្រុងភ្នំពេញ សរុបចំនួន៦៣២.០០០ ម៉ែត្រត្រីគុណ គឺ៖ស្ថានីយ៌ភូមិព្រែក មានសមត្ថភាពផលិតបាន១៧ ម៉ឺនម៉ែត្រត្រីគុណក្នុងមួយថ្ងៃ-ស្ថានីយ៌ជ្រោយចង្វារមានសមត្ថភាពផលិត ១៥ម៉ឺនម៉ែត្រត្រីគុណក្នុងមួយថ្ងៃ-ស្ថានីយ៌និរោធមានសមត្ថភាពផលិតបាន ២៦ម៉ឺនម៉ែត្រត្រីគុណក្នុងមួយថ្ងៃ និងស្ថានីយ៌រោងចក្រចំការមននេះ មានសមត្ថភាពផលិតបាន ៥ម៉ឺន ២ពាន់ម៉ឺនម៉ែត្រត្រីគុណក្នុងមួយថ្ងៃ ។

ក្នុងដំណើចុះពិនិត្យស្វែងយល់នោះ ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានវាយតម្លៃខ្ពស់ចំពោះសមិទ្ធិផលនៃការពង្រីកសមត្ថភាពរោងចក្រប្រព្រឹត្តិកម្មទឹកស្អាតចំការមន ប្រកបដោយជោគជ័យនេះ ដែលជាជំនួយដ៏សំខាន់ក្នុងការផ្គត់ផ្គង់ទឹកក្នុងរាជធានីភ្នំពេញ ជាពិសេសក្នុងខ័ណ្ឌចំការមន ដែលកំពុងមានការរីកដុះដាលយ៉ាងព្រោងព្រាតនូវសំណង់អគារ ធំៗ ខ្ពស់ៗ ហើយនៅពេលខាងមុខឆាប់ៗ យើងនឹងអាចសម្ពោធដាក់ឲ្យប្រើប្រាស់ជាផ្លូវការបាន ៕

ដោយ ៖ ប៊ី
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំឱ្យគ្រប់ទីកន្លែងធ្វើអាជីវកម្មតូចធំទាំងអស់ ទាំងរបស់រដ្ឋ និងឯកជន ត្រូវតែអនុវត្តនូវវិធានការអនាម័យ ដើម្បីទប់ស្កាត់ការរីករាលដាលជំងឺ Covid-19 ។

សម្តេចតេជោ បានបង្ហោះសារបែបនេះលើបណ្តាញទំនាក់ទំនងសង្គមផ្លូវការរបស់នៅថ្ងៃទី១៦ ខែកក្កដា ឆ្នាំ២០២០នេះ ដោយជំរុញដល់បងប្អូនជនរួមជាតិ ត្រូវឧស្សាហ៍ដុសលាងសម្អាតដៃជាមួយសាប៊ូ ជែល សម្លាប់មេរោគ ឬទឹកអាល់កុល និងត្រូវពាក់ម៉ាសការពារឲ្យបានល្អ កុំធ្វេសប្រហែសចំពោះជំងឺ Covid-19 ឱ្យសោះ។
សម្តេចតេជោនាយករដ្ឋមន្ត្រីក៏បានណែនាំ ឱ្យគ្រប់ទីកន្លែងធ្វើអាជីវកម្មតូចធំទាំងរបស់រដ្ឋ និងឯកជន ហាងកាហ្វេ ភោជនីយដ្ឋាន ការដ្ឋានសំណង់ ទីកន្លែងកាត់សក់ ផ្ទះសំណាក់ សណ្ឋាគារ កាស៊ីណូដែលបានអនុញ្ញាត ធនាគារ និងកន្លែងប្តូរប្រាក់តូចធំ គ្លីនិកតូចធំ គ្លីនិកធ្មេញ មន្ទីរពេទ្យរដ្ឋ និងមន្ទីរពេទ្យឯកជន ត្រូវតែមានជែល ទឹកអាល់កុល និងម៉ាសសម្រាប់ផ្តល់ជូនអតិថិជន ឬក្រុមគ្រួសារអ្នកជំងឺ ដើម្បីទប់ស្កាត់ការរីករាលដាលជំងឺ Covid-19 ។

សម្តេចតេជោ ហ៊ុន សែន បានបញ្ជាក់ថា “សុខសប្បាយជាទេ បងប្អូនជនរួមជាតិ? ជំងឺឆ្លងរាតត្បាតកូវីដ១៩ មកទល់ថ្ងៃនេះ នៅក្នុងពិភពលោកបានកើនឡើង ១៣,១៥០,៦៤៥ នាក់ហើយ។ ចំនួនអ្នកស្លាប់ក៏បានកើនឡើងដល់ ៥៧៤,៤៦៤នាក់ រីករាលដាលលើ២១៦ប្រទេស រីឯថ្នាំព្យាបាលក៏មិនទាន់មានដែរ។ នៅក្នុងប្រទេសកម្ពុជាយើងវិញមកទល់ថ្ងៃនេះ មានអ្នកឆ្លងរោគសរុប ១៦៦នាក់ អ្នកដែលបានព្យាបាលជាសះស្បើយមាន ១៣៣នាក់ ប្រទេសយើងគ្មានអ្នកស្លាប់ដោយសារកូវីដ១៩ទេ”។
វិធីដែលចាំបាច់នឹងមានប្រសិទ្ធភាពបំផុត ចៀសវាងការឆ្លងរោគកូវីដ១៩ ដែលយើងមើលមិនឃើញដោយភ្នែកទទេរនេះ គឺត្រូវឧស្សាហ៍ដុសលាងសម្អាតដៃជាមួយសាប៊ូ ជែលសម្លាប់មេរោគ ឬទឹកអាល់កុល។ ត្រូវពាក់ម៉ាសការពារឲ្យបានល្អ ហើយកុំធ្វេសប្រហែសដោយគិតថា កំណើនឆ្លងរោគនៅប្រទេសយើងទាប ។
ទីកន្លែងធ្វើអាជីវកម្មតូចធំរួមទាំងផ្សាររដ្ឋ និងឯកជន តូបលក់ឥវ៉ាន់តូចធំ ដេប៉ូចែកចាយ ហាងកាហ្វេ ភោជនីយដ្ឋាន ការដ្ឋានសំណង់ ទីកន្លែងកាត់សក់ ផ្ទះសំណាក់ សណ្ឋាគារ កាស៊ីណូដែលបានអនុញ្ញាតធនាគារ និងកន្លែងប្តូរប្រាក់តូចធំ គ្លីនិកតូចធំ គ្លីនិកធ្មេញ មន្ទីរពេទ្យរដ្ឋ និងមន្ទីរពេទ្យឯកជន ត្រូវតែមានជែល ទឹកអាល់កុល និងម៉ាសសម្រាប់ផ្តល់ជូនអតិថិជន ឬក្រុមគ្រួសារអ្នកជំងឺ ដើម្បីទប់ស្កាត់ការរីករាលដាល ចម្លងរោគពីម្នាក់ទៅម្នាក់ ហើយត្រូវបន្តធ្វើតាមការណែនាំ របស់ក្រសួងសុខាភិបាលគ្រប់ពេល។ សូមជូនពរបងប្អូនបានចៀសផុត ពីជំងឺឆ្លងរលាកផ្លូវដង្ហើមកូវីដ១៩ ទាំងអស់គ្នា»។
ក្រសួងសុខាភិបាល នៅព្រឹកថ្ងៃទី១៦ ខែកក្កដា ឆ្នាំ២០២០នេះ បានចេញសេចក្តីប្រកាសព័ត៌មាន ស្តីពីការរកឃើញករណីវិជ្ជមានវីរុសកូវីដ-១៩ ថ្មី ចំនួន០១នាក់ទៀត លើបងប្អូនខ្មែរដែលធ្វើដំណើរត្រឡប់មកពីប្រទេសអារ៉ាប់ប៊ីសាអូឌី កាលពីថ្ងៃទី១០ ខែកក្កដា ឆ្នាំ២០២០កន្លងទៅ។
គិតត្រឹមម៉ោង០៧៖០០ព្រឹក ថ្ងៃទី១៦ ខែកក្កដា ឆ្នាំ២០២០ នៅកម្ពុជាបានរកឃើញអ្នកជំងឺកូវីដ១៩ សរុបចំនួន១៦៦នាក់ (ស្ត្រី ៤០នាក់ និងបុរស ១២៦នាក់) ចំនួនអ្នកព្យាបាលជាសះស្បើយ សរុបទូទាំងប្រទេសមានចំនួន ១៣៣នាក់ (ស្រី ៣៩នាក់ និងបុរស ៩៤នាក់) អ្នកសម្រាកព្យាបាលនៅក្នុងមន្ទីរពេទ្យរដ្ឋ មានចំនួន៣៣នាក់៕

ដោយ៖ ប៊ី

ភ្នំពេញ ៖ នៅឆមាសទី១ ឆ្នាំ២០២០នេះ តាមរយៈអគ្គនាយកដ្ឋានគយ និងរដ្ឋាករកម្ពុជា ទទួលបានចំណូលជាង ៥,១៥២.៦ប៊ីលានរៀល ស្មើនឹងប្រមាណជា១,២៧២.២លានដុល្លារអាមេរិក មានការថយចុះ ១៦.២ ភាគរយ បើធៀបរយៈពេលដូចគ្នាឆ្នាំ២០១៩។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានគយនៅព្រឹកថ្ងៃទី១៦ ខែកក្កដា ឆ្នាំ២០២០នេះ។

លោក គុណ ញឹម បានលើកឡើងថា “ក្នុងឆមាសទី១ ឆ្នាំ២០២០នេះ ចំណូលសរុបដែលប្រមូលដោយ អ.គ.រ មានជាង ៥,១៥២.៦ ប៊ីលានរៀល ឬប្រមាណជា ១,២៧២.២ លានដុល្លារអាមេរិក។ តួលេខចំណូលនេះត្រូវជា ៤៣.៩% នៃផែនការដែលកំណត់ដោយច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២០។ បើធៀបនឹងឆមាសទី១ ឆ្នាំ២០១៩ ចំណូលនេះថយចុះ ១៦.២% ដែលក្នុងនោះ ចំណូលពីមុខទំនិញយានយន្តថយចុះ ៣១.៧%, គ្រឿងសំណង់ថយចុះ ២៨.២%, នៅពេលដែលមុខទំនិញប្រេងឥន្ធនៈកើនឡើង ៥.៥% និងមុខទំនិញចម្រុះផ្សេងទៀតមានកំណើន ៣.១%”។

លោកអគ្គនាយក បញ្ជាក់ថា ការនាំចូលមុខទំនិញយានយន្ត ដែលជាប្រភពចំណូលគយដ៏សំខាន់ មានការធ្លាក់ចុះខ្លាំងជាបន្តបន្ទាប់ ជាពិសេសនៅក្នុងត្រីមាសទី២ ឆ្នាំ២០២០នេះ។ ប្រភេទពន្ធនិងអាករសំខាន់ៗ ដែលប្រមូលដោយគយមាន ពន្ធគយ (ពន្ធនាំចូល), អាករពិសេស និងអាករលើតម្លៃបន្ថែម (VAT)។ នៅក្នុងឆមាសទី១ ឆ្នាំ២០២០ នេះ បើប្រៀបធៀបនឹងឆមាសទី១ ឆ្នាំ២០១៩ លទ្ធផលចំណូលតាមប្រភេទពន្ធមានការប្រែប្រួលដូចតទៅ៖ ពន្ធគយថយចុះ ១៩.៨%, អាករពិសេសធ្លាក់ចុះ ២១.៦% ហើយ VAT ថយចុះ ៩.៦%។

តួលេខបណ្ដោះអាសន្ននៃទំហំពាណិជ្ជកម្មអន្តរជាតិក្នុងឆមាសទី១ ឆ្នាំ២០២០ ធៀបនឹងឆមាសទី១ ឆ្នាំ២០១៩ មានការប្រែប្រួលដូចតទៅ៖ តម្លៃនាំចូលសរុបថយចុះ ៩.៤% ហើយតម្លៃនាំចេញសរុបថយចុះ ០.៧% ក្នុងនោះ តម្លៃផលិតផលកាត់ដេរនាំចេញថយចុះ ៧.៥% ប៉ុន្តែតម្លៃផលិតផលស្រូវ អង្ករ កៅស៊ូ និងកសិផលផ្សេងទៀត សរុបកើនឡើង ១៤.៥%។
លោកបន្តថា ការធ្លាក់ចុះទំហំពាណិជ្ជកម្មអន្តរជាតិ និងចំណូលពន្ធ-អាករគយ ក្នុងឆមាសទី១ ឆ្នាំ២០២០នេះ គឺដោយសារកត្តាមួយចំនួន ដែលក្នុងនោះកត្តាសំខាន់គឺ ការផ្ទុះរីករាលដាលនៃជំងឺកូវីដ១៩ ដែលបានធ្វើឱ្យ ទីផ្សារក្នុងស្រុក ក៏ដូចជាទីផ្សារនាំចេញរបស់កម្ពុជា និងលំហូរពាណិជ្ជកម្មអន្តរជាតិ រងផលប៉ះពាល់ធ្ងន់ធ្ងរ។

ប្រភពចំណូលពន្ធ និងអាករសំខាន់ៗរួមមាន យានយន្តនិងគ្រឿងចក្រ (ដើរតួនាទីប្រមាណ ៤២.៤%នៃចំណូលសរុប), ប្រេងឥន្ធនៈ (ត្រូវជាប្រមាណ ២១.៦%នៃចំណូលសរុប) និងទំនិញចម្រះនិងគ្រឿងសំណង់ (ដើរតួនាទីប្រមាណជា ៣៤.៧% នៃចំណូលសរុប)៕

ដោយៈ រ៉ា​ណេ​ត

ភ្នំពេញៈ នៅពេល​និយាយ​ពី​ដើមទុន មនុស្ស​ភាគច្រើន​តែង​គិត និង​ផ្តោតអារម្មណ៍​ទៅនឹង​ប្រាក់កាស ដោយ​ភ្លេច​គិត​ទៅលើ​ធនធាន​មួយចំនួន ដែល​ខ្លួន​មាន​ជាប់​ប្រាណ និង​មានតម្លៃ​សមស្រប​នៅក្នុង​សង្គម។

អ្នកជំនាញ​ផ្នែក​វិភាគ​សេដ្ឋកិច្ច​ឯករាជ្យ លោក ង៉ែត ជូ និង​ជា​អ្នកជំនួញ​នៅក្នុង​វិស័យ​អចលនទ្រព្យ​នៅ​កម្ពុជា​បាន​លើកឡើងថា មនុស្ស​ស្ទើ​តែ​គ្រប់រូប សុទ្ធ​តែមាន​ដើមទុន៣ប្រភេទ ដោយ​មិន​មែនមាន​ត្រឹមតែ​បាតដៃ​ទទេ​នោះទេ។

នៅក្នុង​សំណេរ​ដែល​បង្ហាញ ពី​គោលបំណង​ជំនួយស្មារតី លោក ង៉ែត ជូ បាន​លើកឡើងថា ការដែល​គ្មាន​ប្រាក់​ចាប់ផ្តើម​អាជីវកម្ម​អ្វីមួយ មិនមែន​មានន័យថា គ្មាន​ដើមទុន​នោះទេ។ អ្នក​ត្រូវ​ដឹងថា ដើមទុន​គឺមាន​ចំនួន៣ប្រភេទ​រួមមាន ទី១) ដើមទុន​ផ្នែក​ហិរញ្ញវត្ថុ ឬ​សេដ្ឋកិច្ច (Economic or Financial Capital) ដូចជា​សាច់ប្រាក់ អចលនទ្រព្យ និង​ទ្រព្យសម្បត្តិ​ដទៃទៀត។

ទី២ ដើមទុន​ជា​ធនធានមនុស្ស (Human Capital) រូបអ្នក​ក៏​ជាដើម​ទុន​ដែរ អ្នក​អាច​យកចំណេះ-ជំនាញ ទៅ​បំរើ​ការឱ្យ​អ្នកដទៃ​ដោយ​ប្តូរ​យក​ជា​ប្រាក់ខែ ហើយ​សន្សំ ដើម្បី​ធ្វើជា​ដើមទុន​ចាប់ផ្តើម​អាជីវកម្ម ហើយ​បើ​ខ្វះ អ្នក​អាច​ខ្ចី​អ្នកដទៃ​បន្ថែម ដូចជា​ក្រុមគ្រួសារ ឬ​មិត្តភក្ដិ​ខ្លះទៅ។

ទី៣ ដើមទុន​សង្គម (Social Capital) ក្រុមគ្រួសារ មិត្តភក្ដិ និង​មនុស្ស​ដែល​អ្នក​រាប់អាន​ក៏​ជាដើម​ទុន​ដែរ។ ឧទាហរណ៍ ក្រុមគ្រួសារ​ផ្គត់ផ្គង់​ឱ្យ​អ្នក​បាន​រៀនសូត្រ ដើម្បី​សន្សំ​ចំណេះ-ជំនាញ រួច​ក្លាយខ្លួនជា​ធនធានមនុស្ស​ក្នុងសង្គម នោះ​ហើយ​គឺជា​ដើមទុន។

ដូច្នេះ នៅពេល​គ្មាន​ប្រាក់​ចាប់ផ្តើម​អាជីវកម្ម សូមកុំ​ទាន់​និយាយថា ខ្លួន​មាន​ត្រឹមតែ​បាតដៃ​ទទេ។ អ្នកមាន​ដើមទុន​ទី៣ (ដើមទុន​សង្គម) ដើម្បី​ឈានទៅ​កសាង​ដើមទុន​ទី២ (ដើមទុន​ជា​ធនធានមនុស្ស) និង​សន្សំ​ជាដើម​ទុន​ទី១ (ដើមទុន​ផ្នែក​ហិរញ្ញវត្ថុ)។ អ្នក​មិនមែន​បាត​ដៃទទេ​នោះទេ គ្រាន់តែ​អ្នកត្រូវការ​ការព្យាយាម ការខិតខំ និង​ប្រើ​ពេលវេលា​ឱ្យមាន​តម្លៃ​ប៉ុណ្ណោះ ៕

ដោយ៖ ប៊ី

ភ្នំពេញៈ សមាគម​ប្រជាជាតិ​អាស៊ីអាគ្នេយ៍ (អាស៊ាន) បាន​ក្លាយជា​ដៃគូ​ពាណិជ្ជកម្ម​ដ៏​ធំ​បំផុត​របស់​ចិន​នៅ​ឆមាស​ទីមួយ​នៃ​ឆ្នាំនេះ ដែល​ស្មើនឹង១៤,៧ភាគរយ នៃ​ទំហំ​ពាណិជ្ជកម្ម​បរទេស​សរុប​របស់​ប្រទេស​ចិន ចំពេល​មានការ​ធ្វើឱ្យ​ប្រសើរឡើង នូវ​ពិធីសារ​តំបន់​ពាណិជ្ជកម្ម​សេរី និង​កិច្ចសហប្រតិបត្តិការ​ខ្សែសង្វាក់​ផ្គត់ផ្គង់។

ពាណិជ្ជកម្ម​ចិន ជាមួយ​អាស៊ាន​មាន​ទំហំ​ទឹកប្រាក់​ចំនួន២,០៩ ពាន់​ពាន់​លាន​យន់ (ប្រហែល ២៩៩ ពាន់​លាន​ដុល្លារ​អាមេរិក) ក្នុង​រយៈពេល៦ខែ​ដំបូង កើនឡើង៥,៦ភាគរយ បើ​ធៀប​នឹង​រយៈ​ដូចគ្នា​កាលពី​ឆ្នាំមុន។ ទិន្នន័យ​ពី​រដ្ឋបាល​គយ​ទូទៅ (GAC) បានបង្ហាញ​កាលពីពេលថ្មីៗថា ការនាំចេញ​ទៅកាន់​អាស៊ាន​បាន​កើនឡើង៣,៤ ភាគរយ​ដល់ ១,១៥ ពាន់​ពាន់​លាន​យន់ ខណៈ​ការ​នាំចូល​បាន​កើនឡើង ៨,៥ ភាគរយ ឬ​មាន​ទំហំ​ទឹកប្រាក់៩៣៨,៥៧ ពាន់​លាន​យន់។

ការកើនឡើង​នេះ ត្រូវបាន​ជំរុញ​មួយផ្នែក ដោយសារ​ការធ្វើ​ពាណិជ្ជកម្ម​កសិផល​ជាមួយ​សមាជិក​អាស៊ាន ក្រោម​ពិធីសារ​ដែល​បានធ្វើឱ្យ​ប្រសើរឡើង នៃ​តំបន់​ពាណិជ្ជកម្ម​សេរី​ចិន – អាស៊ាន ដែល​បាន​ចូល​ជា​ធរមាន​ក្នុង​ខែតុលា ឆ្នាំ២០១។ នេះ​បើ​យោងតាម​អ្នកនាំពាក្យ​របស់ GAC លោក Li Kuiwen។ ពាណិជ្ជកម្ម​កសិផលរ​វាង​ភាគី​ទាំងពីរ​បាន​កើនឡើង ១៣,២ ភាគរយ​នៅក្នុង​ឆមាស​ទី១ ។

លោក Li បាន​មានប្រសាសន៍ថា ការជំរុញ​ពាណិជ្ជកម្ម​មួយទៀត រវាង​ភាគី​ទាំងពីរ​គឺ​ការទាក់ទង​គ្នា​ទៅវិញទៅមក នៅក្នុង​ផលិតកម្ម​អេឡិចត្រូនិក​រវាង​ចិន និង​បណ្តា​ប្រទេស ដូចជា​វៀតណាម ម៉ាឡេស៊ី និង​សិង្ហ​បុរី​តាម​បណ្តាញ​ផ្គត់ផ្គង់​ពិភពលោក។

ក្នុង​រយៈពេល​ដូចគ្នា ពាណិជ្ជកម្ម​ចិន​ជាមួយ​វៀតណាម​បាន​កើនឡើង១៨,១ ភាគរយ​ដែល​ជំរុញ​ឱ្យ​ទំហំ​ពាណិជ្ជកម្ម​ទ្វេភាគី ឈានដល់​ចំណុចកំពូល ក្នុងចំណោម​សមាជិក​អាស៊ាន ខណៈ​ពាណិជ្ជកម្ម​ជាមួយ​ថៃ​កើនឡើង៩,២ ភាគរយ៕