ឧកញ៉ា​គីម ហ៊ាង៖ ខេត្ត​មាន​សេដ្ឋកិច្ច​រិ​ក​ចម្រើន​ខ្លាំង​ទាមទារ​អភិបាលខេត្តមាន​ខួរក្បាល​ជា​អ្នកសេដ្ឋកិច្ច

ដោយ​គង់ សូរិយា

ភ្នំពេញៈ លោក​ឧកញ៉ា​បណ្ឌិត​គីម ហ៊ាង​ បាន​ថ្លែងថា ខេត្ត​ដែលមាន​ការរីកចម្រើន​លឿន ទាល់តែ​ខេត្ត​នោះ​មាន​អភិបាលខេត្ត ជា​អ្នកមាន​ជំនាញ​ខាង​សេដ្ឋកិច្ច និង​ការបង្កើត​លុយ។

ប្រធាន KW Cambodia រូបនេះ​បាន​ថ្លែង​ឲ្យ​ដឹង​តាម​ទូរស័ព្ទ នា​រសៀល​ថ្ងៃទី៣ វិច្ឆិកា​កន្លងមក​ថា តាម​ធម្មតា​អភិបាលខេត្ត គឺជា​អ្នកធំ​ប្រចាំខេត្ត ហេតុនេះ​ដើម្បី​ឲ្យ​សេដ្ឋកិច្ច​របស់​ខេត្ត​ណាមួយ​នោះ​មាន​ភាព​រីកចម្រើន ទាមទារ​ឲ្យ​អភិបាលខេត្ត​មាន​ជំនាញ​ខាង​សេដ្ឋកិច្ច។

លោក​បន្តថា “មិន​ថា​ខេត្ត​នោះ មាន​ទីតាំង​នៅតាម​ព្រំដែន​ឬ​មាត់សមុទ្រ​ទេ បើ​អភិបាលខេត្ត មិនមាន​ជំនាញ​ខាង​សេដ្ឋកិច្ច ខាង​រកលុយ​សំរាប់​អភិវឌ្ឍន៍​ខេត្ត​ទេ ខេត្ត​នោះ​មិន​ងាយ​រីក​ច​ម្រើ​មន​ឡើយ” ។ លោក​ឧកញ៉ា​បាន​បន្តថា “អភិបាលខេត្ត​ជា​អ្នកធំ ហេតុនេះ​គាត់​អាច​រៀបចំ​ដី​ពី១០០ទៅ១០០០ហិកតា​ឲ្យ​គេ​វិនិយោគ បង្កើត​រោងចក្រ សហគ្រាស​ឲ្យ​បាន​ច្រើន​ដោយ​មិន​យក​កម្រៃ ខេត្ត​នោះ​នឹង​ទាក់ទាញ​អ្នកវិនិយោគ និង​បង្កើត​ការងារ​ជូន​ប្រជាពលរដ្ឋ​ហើយ” ។

លោក​ឧកញ៉ា​គីម ហ៊ាង​ បាន​បន្តថា ហេតុនេះ​រាជរដ្ឋាភិបាល​គួរតែ​តែង​តាំង​អភិបាលខេត្តមួយៗ ដែលមាន​ជំនាញ​ខាង​សេដ្ឋកិច្ច ពូកែ​ទាក់ទាញ​អ្នកវិនិយោគ ទើប​ខេត្ត​នោះ​មាន​ភាព​រីកចម្រើន​លឿន ស្របតាម​ការចង់បាន​របស់​ប្រមុខ​រដ្ឋាភិបាល​កម្ពុជា។

តាម​ការសង្កេតមើល​ជាក់ស្តែង​នាពេល​បច្ចុប្បន្ននេះ ខេត្ត​មួយចំនួន​មាន​ភាព​លេចធ្លោ ដោយសារ​ថ្នាក់ដឹកនាំ​ខេត្ត​មាន​ជំនាញ​ខាង​សេដ្ឋកិច្ច និង​ការអភិវឌ្ឍ ហើយ​ខេត្ត​កំពុងមាន​ភាពលេច​ធ្លោ​មានដូចជា ខេត្ត​ព្រះសីហនុ ខេត្តកំពត និង​ខេត្តកំពង់ស្ពឺ​ជាដើម៕

សេដ្ឋកិច្ច​ប្រទេស​ថៃ​កាន់តែ​ដុនដាប​ចំពេល​ប្រទេស​កំពុង​ជួប​វិបត្តិផ្ទួនៗគ្នា

ដោយ ហ្សូ​លី

បាងកកៈ ប្រទេស​ជាច្រើន​នៅ​ជុំវិញ​ពិភពលោក កំពុង​ប្រយុទ្ធ​ប្រឆាំងនឹង​ជំងឺ​កូ​វីដ១៩ដោយ​ជំរុញ​កំណើនសេដ្ឋកិច្ច ប៉ុន្តែ​វា​មិនមែនជា​រឿង​សំខាន់​សម្រាប់​ប្រទេស​ថៃ​នោះឡើយ ព្រោះ​ប្រទេស​នេះ​ជួប​វិបត្តិ​មួយទៀត​គឺ​បាតុកម្ម។

កាលពី​ខែមករា​ប្រទេស​ថៃ​រងគ្រោះ​ធ្ងន់ធ្ងរ ដោយសារ COVID-19 ក្នុងនាម​ជា​ប្រទេស​ដំបូង នៅ​ខាងក្រៅ​ប្រទេស​ចិន​ដែល​បាន​រកឃើញ​វីរុស។ ជាមួយនឹង​ករណី​ជាង ៣៧០០ករណី រឿង​ជោគជ័យ​ឈានមុខ​គេ​របស់​ប្រទេស​ថៃ មាន​អ្នកស្លាប់​តិចតួច​បំផុត ទោះយ៉ាងណា​ឥទ្ធិពល នៃ​ជោគជ័យ​នោះ​លើ​សេដ្ឋកិច្ច​គឺជា​បញ្ហា​ខុសគ្នា។

លោក​បណ្ឌិត Kirida Bhaopichitr នាយក​ផ្នែក​សេវាកម្ម​ស៊ើបការណ៍​សេដ្ឋកិច្ច​នៃ​វិទ្យាស្ថាន​ស្រាវជ្រាវ​អភិវឌ្ឍន៍​ថៃ​បាន​មានប្រសាសន៍ថា នៅក្នុង​តំបន់​អាស៊ីអាគ្នេយ៍ ប្រទេស​ថៃ គឺជា​សេដ្ឋកិច្ច​ដែល​កំពុង​ធ្លាក់ចុះ​ខ្លាំង​បំផុត។  វា​ជា​រឿង​គួរឱ្យ​អស់សំណើច​ណាស់ ព្រោះ​ថៃ​អាច​គ្រប់គ្រង​អត្រា​ឆ្លង​មេរោគ​ច្រើនជាងគេ ប៉ុន្តែ​សេដ្ឋកិច្ច​ក៏​រង​ផលប៉ះពាល់​ផងដែរ។

សេដ្ឋកិច្ច​គឺ​អាក្រក់​រួចទៅហើយ ជាមួយ​ការធ្លាក់ចុះ១២,២ ភាគរយ​នៅក្នុង​ត្រីមាស​ទី២ ហើយ​វា​ជាការ​ធ្លាក់ចុះ​ដ៏​ធំ​បំផុត នៅក្នុង​សេដ្ឋកិច្ច​ធំជាងគេ​ទី២នៅ​អាស៊ីអាគ្នេយ៍ ចាប់តាំងពី​វិបត្តិ​អាស៊ី​ឆ្នាំ១៩៩៧ ។ ជាមួយគ្នា​ការនាំចេញ និង​ការមកដល់​នៃ​ភ្ញៀវទេសចរ​ធ្លាក់ចុះ​ជាង៧០ភាគរយ។

ការកើនឡើង​នៃ​កំដៅ​នយោបាយ​របស់​ប្រទេស​ថៃ នឹង​ជះឥទ្ធិពល​យ៉ាងខ្លាំង​ដល់​ប្រព័ន្ធ​សេដ្ឋកិច្ច ដែល​កំពុង​រង​ឥទ្ធិពល​ពី​ការរីក​រាលដាល​នៃ​ជំងឺ​រាតត្បាត។ អស់​រយៈពេល​ជាច្រើន​ខែ​នៅតាម​ដងផ្លូវក្មេងៗជំនាន់​ក្រោយ រាប់ពាន់នាក់​របស់​ប្រទេស​ថៃ​បាន​ប្រមូល​ផ្តុំគ្នា។  វា​ជា​ចលនា​មួយ​ដែល​ទទួលបាន​សន្ទុះ និង​ការគាំទ្រ​ជា​សាធារណៈ កាន់តែ​ទូលំទូលាយ មិនមែន​ដោយសារ​ទស្សនៈ​នយោបាយ ប៉ុន្តែ​ប្រហែលជា​ការមិន​ពេញចិត្ត​ខាង​សេដ្ឋកិច្ច​ច្រើនជាង។

លោក Somprawin Manprasert ប្រធាន​សេដ្ឋវិទូ​នៅ​ធនាគារ Bank of Ayudhya មានប្រសាសន៍ថា  មាន​ការងារ​ប្រហែល១៣លាន​កន្លែង ដែល​ប្រឈម​នឹង​ហានិភ័យ​និង​បាត់បង់​ចំណូល ដែល​ស្មើ១ភាគ៣នៃ​កម្លាំង​ពលកម្ម។ នៅពេល​សេដ្ឋកិច្ច​មិនល្អ​ប្រជាជន​អាច​នឹង​ចេញមក​តវ៉ា​បន្ថែមទៀត។ ប្រជាពលរដ្ឋ​នៅ​ទូទាំងប្រទេស បាន​កាត់បន្ថយ​យ៉ាងខ្លាំង​នូវ​ការចំណាយ ហើយ​អាជីវកម្ម​កំពុងមាន​ការលំបាក។

មជ្ឈមណ្ឌល​ស្រាវជ្រាវ​សេដ្ឋកិច្ច (EIC) ដែលជា​កន្លែង​ស្រាវជ្រាវ​មួយ ក្រោម​ធនាគារ​ពាណិជ្ជកម្ម​រាយការណ៍​ថា ការបិទ​អាជីវ​កម្មបាន​កើនឡើង​ជិត៤០ភាគរយ ពីមួយ​ឆ្នាំទៅ​មួយឆ្នាំ។

កម្ចី​ប្រាក់​ធ្លាប់មាន​ភាពងាយស្រួល ឥលូវ​នេះ​មានការ​រឹតត្បិត​ជាច្រើន​ដូចជា ប្រសិនបើ​អតិថិជន​មិនបាន​កាត់បន្ថយ​ប្រាក់ខែ​របស់​ពួកគេ ក្នុងកំឡុងពេល COVID បន្ទាប់មក​ធនាគារ​នឹងមិន​យល់ព្រម​លើ​ប្រាក់កម្ចី​នោះទេ ហើយ​ពួកគេ​ក៏​មិនអាច​ទិញ​ឬ​បង់​រំលស់​អ្វី​បានដែរ។

លោក​បណ្ឌិត​បាន​មានប្រសាសន៍ថា“ឥឡូវនេះ​ក្តីសង្ឃឹម​តែមួយគត់ គឺ​ការចំណាយ​របស់​រដ្ឋាភិបាល និង​ជួយ​ដល់​ផ្នែកផ្សេងៗនៃ​សេដ្ឋកិច្ច​ថៃ ហើយ​នោះ​នឹង​ពិបាក​ណាស់​នៅពេលនេះ” ៕ CGTN

កម្ពុជា​នឹងដាក់​ការិយាល័យ​សភាពាណិជ្ជកម្ម​នៅក្នុង​តំបន់​អឺរ៉ុប

ដោយៈ រ៉ា​ណេ​ត

ភ្នំពេញៈ នៅពេលឆាប់ៗខាងមុខនេះ សភាពាណិជ្ជកម្ម​កម្ពុជា នឹងដាក់​ការិយាល័យ​តំណាង​នៅតាម​បណ្តា​ប្រទេស និង​រដ្ឋ​នានា​នៅ​ប៉ែក​អឺរ៉ុប ជាពិសេស​នៅ​តំបន់​ដែលមាន​សមាគម​អ្នកវិនិយោគ​កម្ពុជា ដែល​អាចមាន​ប្រសិទ្ធភាព ក្នុងការ​ទាក់ទាញ​វិនិយោគិន​អន្តរជាតិ​មកកាន់​កម្ពុជា​បន្ថែមទៀត។

អនុប្រធាន​សភាពាណិជ្ជកម្ម​កម្ពុជា លោក​ឧកញ៉ា​លឹម ហេង​បាន​មានប្រសាសន៍ប្រាប់​តាម​ទូរស័ព្ទ​នៅ​ល្ងាច​ថ្ងៃទី៣ ខែវិច្ឆិកា ឆ្នាំ២០២០ថា គម្រោង និង​ផែនការ​នៃ​ការដាក់​ការិយាល័យ​តំណាង​សភាពាណិជ្ជកម្ម នៅតាម​បណ្តា​ប្រទេស និង​រដ្ឋ​មួយចំនួន​នៅ​ប៉ែក​ខាង​អឺរ៉ុប​គឺមាន​ជា​យូរ​មកហើយ ហើយក៏​នឹង​ត្រៀម​ដាក់​លើកដំបូង នៅក្នុង​ប្រទេស​កាណាដា ប៉ុន្តែ​ដោយសារតែ​ផ្ទុះឡើង​នូវ​ជំងឺឆ្លង Covid-19 ទើបត្រូវ​អាក់ខាន​វិញ។

លោក​ឧកញ៉ា បាន​មានប្រសាសន៍​បន្តថា “ជា​ជំ​ហ៊ាន​ដំបូង​យើង​បង្កើត​នៅ​ប្រទេស​កាណាដា ហើយនឹង​ពង្រាយ​នៅតាម​បណ្តា​រដ្ឋផ្សេងៗទៀត ដែលមាន​ពាណិជ្ជករ​ខ្មែរ​នៅ​ទីនោះ​ធ្វើជា​អ្នកតំណាង។ លោក​បន្ថែមថា “ក្រោយ​ពីនេះ​ទៀត យើង​នឹងដាក់​នៅតាម​បណ្តា​ប្រទេស​អភិវឌ្ឍន៍ និង​ប្រទេស​ដែលមាន​សេដ្ឋកិច្ចធំៗ ដូចជា​សហរដ្ឋអាមេរិក បារាំង និង​បណ្តា​ប្រទេស​ផ្សេងទៀត​ដែល​ស្ថិតនៅ​អឺរ៉ុប។

តាមរយៈ​គម្រោង និង​ផែនការ​នៃ​ការពង្រីក​វិសាលភាព របស់​សភាពាណិជ្ជកម្ម​កម្ពុជា​នេះ ក្រៅពី​អាចធ្វើ​ការផ្សព្វផ្សាយ​ពី​សក្ដានុពល និង​ឱកាស​វិនិយោគ​នៅ​កម្ពុជា​ទៅកាន់​ទីផ្សារ​អន្តរជាតិ ថែមទាំង​មានលទ្ធភាព​ខ្ពស់ ក្នុង​ទាក់ទាញ​វិនិយោគិន​អន្តរជាតិ ដែលមាន​ឥទ្ធិពលធំៗមក​ធ្វើជា​ដៃគូ​ជាមួយ​កម្ពុជា​យើង​បាន​ផងដែរ។

ពាក់ព័ន្ធ​ទៅនឹង​ការពង្រីក​វិសាលភាព និង​បង្កើត​ការិយាល័យ នៅតាម​បណ្តា​ប្រទេស និង​រដ្ឋ​នានា​នៅ​ប៉ែក​អឺរ៉ុប​នេះ លោក​ឧកញ៉ា​លឹម ហេង ក៏បាន​បញ្ជាក់ប្រាប់​ផងដែរ​ថា “យើង​ជឿជាក់ថា នឹង​ទទួលបាន​វិនិយោគិន​អន្តរជាតិ ចូលមក​កាន់​កម្ពុជា​កា​ន់​តែ​ច្រើន ជាពិសេស​បន្ទាប់ពី​ចាប់ផ្ដើម​អនុវត្តន៍ នូវ​លក្ខខណ្ឌ​នៃ​កិច្ចព្រមព្រៀង​ពាណិជ្ជកម្ម​សេរី​កម្ពុជា-ចិន។

លោក​បន្តថា គ្រប់​ការធ្វើ​ជំនួញ​រកស៊ី​ទាំងអស់ សុទ្ធតែ​ក្នុង​គោលបំណង​ទទួលយក​ផលចំណេញ​ទាំងអស់ ដូច្នេះ ស្ថិតនៅក្រោម​កិច្ចព្រមព្រៀង​ពិសេស​មួយ​នេះ តាមរយៈ​កម្ពុជា​នឹង​ផ្តល់​ផលប្រយោជន៍​យ៉ាងច្រើន ដល់​ពួកគេ​ក្រោម​ការនាំចេញ​ផលិតផល ពី​កម្ពុជា​អាច​រួច​ផុតពី​របាំង​ពន្ធ៕

វិភាគ៖ តើ​ហេតុអ្វី​បានជា​ធនាគារធំៗកំពុង​ប្រជែង​គ្នា​ចាប់យក​ទីផ្សារ​នៅ​កម្ពុជា?

ដោយៈ ម៉ា​ណេ​ត

ភ្នំពេញៈ ក្រុមហ៊ុន​ហិរញ្ញវត្ថុ (ធនាគារ) ជាច្រើន​បាន និង​កំពុង​ពង្រីក​វត្តមាន​របស់ខ្លួន​នៅ​កម្ពុជា ដោយ​ផ្តល់​សេវា​ហិរញ្ញវត្ថុខុសៗគ្នា​ដល់​អតិថិជន ហើយ​ធនាគារ​នានា​បាន​ប្រឹងប្រែង​អស់ពី​សមត្ថភាព​ក្នុងការ​អភិវឌ្ឍ និង​ជំរុញ​ឲ្យ​ខ្លួន​មានការ​លូតលាស់​ថ្មី នៅក្នុង​បណ្តា​ប្រទេស​អាស៊ីអាគ្នេយ៍​មួយ​នេះ។

បណ្តា​ធនាគារ​បរទេស​នានា បាន​ប្រកួតប្រជែង​គ្នា ដើម្បី​ដណ្តើមយក​ទីផ្សារ​ក្នុងស្រុក​របស​ប្រទេសមួយ​នេះ ដែល​កំពុង​ក្លាយជា​ទីក្រុង​មាស​របស់​ពួកគេ (ធនាគារ​កូរ៉េ) ដែល​ឆ្លុះបញ្ចាំង​ពី​កំណើន​សេដ្ឋកិច្ចកម្ពុជា បាននិងកំពុង​ឆ្ពោះទៅរក​កំនើន​យ៉ាង​ឆាប់រហ័ស​របស់ខ្លួន។

ធនាគារ និង​ស្ថាប័ន​មីក្រូហិរញ្ញវត្ថុ នៅតែ​មានឱកាស​ជាច្រើន ក្នុងនាម​ជា​អ្នកផ្តល់​សេវា​ហិរញ្ញវត្ថុ​នៅ​កម្ពុជា ព្រោះ​កម្ពុជា​មិនទាន់មាន​ការអភិវឌ្ឍ វិស័យ​ហិរញ្ញវត្ថុ​គ្រប់គ្រាន់​នៅឡើយ។

ជាមួយគ្នានេះដែរ វិស័យ​ធនាគារ​នៅ​កម្ពុជា​នៅតែ​បន្ត​មាន​វឌ្ឍនភាព ប្រកបដោយ​ទំនុកចិត្ត និង​បានរួម​ចំណែក​យ៉ាងសកម្ម គាំទ្រ​សកម្មភាព​សេដ្ឋកិច្ច ដែល​ធ្វើឱ្យមាន​កំនើន​វិនិយោគ​ក្នុង​ង​ការបង្កើត​ធនាគារ និង​គ្រឹះស្ថាន​ហិរញ្ញវត្ថុ​ជាច្រើន​នៅក្នុង​ប្រទេស។

ប្រទេស​កម្ពុ​ជាមាន​គ្រឹះស្ថាន​ធនាគារ​និង​ហិរញ្ញវត្ថុ រួមមាន ធនាគារពាណិជ្ជ​ចំនួន៥១ ធនាគារ​ឯកទេស​ចំនួន១៤ គ្រឹះស្ថាន​មីក្រូហិរញ្ញវត្ថុ​ទទួល​ប្រាក់​បញ្ញើរ ពី​សាធារណជន​ចំនួន៦ គ្រឹះស្ថាន​មីក្រូហិរញ្ញវត្ថុ​មិន​ទទួល​ប្រាក់​បញ្ញើ​ចំនួន៧៦ និង​គ្រឹះស្ថាន​ឥណទាន​ជនបទ​ចំនួន២៤៦រហូតមកដល់​បច្ចុប្បន្ន​នេះ។ នេះ​បើ​យោងតាម​របាយការណ៍រ​បស់​ធនាគារជាតិ​នៃ​កម្ពុជា។

បណ្តាញ​ប្រតិបត្តិការ និង​សេវា​ហិរញ្ញវត្ថុ​បាន​អភិវឌ្ឍ​ជា​បន្តបន្ទាប់ ដោយ​ចំនួន​ទីស្នាក់ការ និង​សាខា​គ្រឹះស្ថាន​ធនាគារ និង​ហិរញ្ញវត្ថុ​នៅ​ទូទាំងប្រទេស​បាន​កើន​ដល់២.៤៦៥ ហើយ​ម៉ាស៊ីន​ដក និង​ដាក់​ប្រាក់​ស្វ័យប្រវត្តិ(ATM) មាន​ចំនួន៣,០៨១ គណនី​ប្រាក់​បញ្ញើ​អតិថិជន កើន​ដល់៨.២លាន​គណនី និង​គណនី​ឥណទាន​កើន​ដល់៣.២ លាន​គណនី។

ធនាគារជាតិ​នៃ​កម្ពុជា​បានឱ្យដឹងថា ខ្លួន​បាន​ប្រឹងប្រែង​យ៉ាងខ្លាំង ក្នុងការ​ត្រួត​ពិ​និ ត្យ​សុខមាលភាព​របស់​គ្រឹះស្ថាន​ធនាគារ និង​ហិរញ្ញវត្ថុ និង​ការអនុវត្ត​ច្បាប់ និង​បទ​ប្បញ្ញត្តិ។ ជា​លទ្ធផល​វិស័យ​ធនាគារ និង​ហិរញ្ញវត្ថុ​ស្ថិតក្នុង​ស្ថាន​ភាពល្អ។

ការឆ្លើយតប​នឹង​វិបត្តិ​បច្ចុប្បន្ន

គ្រឹះស្ថាន​ធនាគារ និង​គ្រឹះស្ថាន​មីក្រូហិរញ្ញវត្ថុ បាន​បន្ធូរបន្ថយ និង​បញ្ចុះ​អត្រា​ការប្រាក់​កម្ចី​ទាប ដល់​អ្នកប្រើប្រាស់​កម្ចី ដើម្បី​ឆ្លើយតប​នឹង​វិបត្តិ ដែល​កំពុង​កើតមាន។

ការពន្យា​ដើមទុន​ត្រ​នប់ បន្ធូរបន្ថយ​ទុនបម្រុង ហើយ​ក្រសួង​សេដ្ឋកិច្ច តាមរយៈ​អគ្គនាយក​ពន្ធដារ បាន​បន្ធូរបន្ថយ​លើ​ពន្ធ​កាត់​ទុក​លើ​ប្រាក់កម្ចី​ពី​បរទេស ធ្វើឱ្យ​ប្រភព​ទុន​ក្នុងស្រុក​សម្បូរ ដែល​អាច​យកមកប្រើ​ប្រាស់​បាន ហើយ​កំណើន​ក្នុង​វិស័យ​ឥណទាន​ក៏​មិនសូវ​ខ្ពស់​ដែរ ដោយសារ​អាជីវកម្ម​ច្រើន​រង​ផលប៉ះពាល់​ដោយសារ​កូ​វីដ១៩ ។

ដូច្នេះហើយ បានជា​គ្រឹះស្ថាន​ធនាគារ និង​គ្រឹះស្ថាន​មីក្រូហិរញ្ញវត្ថុ​បាន​បញ្ចុះ​អត្រា​ការប្រាក់​កម្ចី​ទាប​មែនទែន យើង​និយាយ​ជាទូទៅ​ទាប​ក្រោម៧ភាគរយ​ទៀត ធ្វើឱ្យមាន​ការប្រកួតប្រជែង​ក្នុងតម្លៃ (price competition) ដូច្នេះហើយ​ផលប្រយោជន៍​នឹង​បាន​ទៅ​អ្នកប្រើប្រាស់​កម្ចី​ពី​ប្រកួតប្រជែង​នេះ ដូចជា ប្រភព​ទុន​ដែលមាន​អត្រា​ការប្រាក់​ទាប ហើយ​អ្នកប្រើប្រាស់​កម្ចី​អាច​ប្រើប្រាស់​បាន​រយៈពេល​វែង។

ធនាគារ និង​គ្រឹ​ស្ថាន​ហិរញ្ញវត្ថុ​ក៏មាន​ការយោគយល់ សម្រាប់​ការរួមរស់​រីកចម្រើន​ជាមួយនឹង​អតិថិជន។ស្រប​ពេលដែល រាជរដ្ឋាភិបាល​បាន​បន្ធូរបន្ថយ​អនុ​បាត​ខ្លះ​ដើម្បី​ឱ្យមាន​ប្រភព​ទុន​ទូលំទូលាយ ហើយ​ធនាគារ​ធ្វើជា​មួយ​អា​តិ​ថិ​ជន​យូរអង្វែង ហើយ​ធនាគារ​ផ្ទាល់ ក៏បាន​បន្ធូរបន្ថយ​ដែរ ដោយ​បន្ធូរបន្ថយ​ទាំង​អត្រា​ការប្រាក់​កម្ចី និង​រយៈពេល​សង​ដើម្បីឱ្យ​អតិថិជន​មាន​ពេល​គ្រប់គ្រាន់ ក្នុង​ការយក​មូលនិធិ​នេះ ទៅប្រើ​ប្រាស់​ឱ្យបាន​យូរអង្វែង​សម្រាប់​គ្រប់​វិស័យ​ទាំងអស់។

ជាទូទៅ​នៅពេល​ចលនា​សេដ្ឋកិច្ច​ខ្លាំង មូលនិធិ​របស់គាត់​យ​ក​ទៅ​វិនិយោគ​អស់ហើយ ប៉ុន្តែ​ពេល​មាន​ចលនា​សេដ្ឋកិច្ច​តិច គាត់​យក​មូលនិធិ​មក​ផ្ញើ​នៅ​ធនាគារ ធ្វើឱ្យ​ប្រភព​ទុន​នៅ​ស្រុក​មាន​ច្រើន ដូចជា​ប្រាក់​សន្សំ​ដែលមាន​កាលកំណត់។

ថ្វីត្បិតតែ​មាន​ប្រភព​ទុន​ក្នុងស្រុក​ក៏ដោយ ក៏​យើង​ទៅ​តែ​យក​ពី​បរទេស ដែល​កម្ចី​ពី​បរទេស​មាន​រយៈពេលរ​ហូត​ទៅ៥ ទៅ៧ឆ្នាំ ដើម្បី​យកមក​ឆ្លើយតប​ជាមួយនឹង​តម្រូវ​ឥណទាន​របស់ SME ដែល​គាត់​ត្រូវការ៥ ទៅ៧ឆ្នាំ​ដែរ ដើម្បី​ជៀសវាង​អតុល្យភាព​នៃ​មូលនិធិ ដូច្នេះ​បានជា​យើង​យកមក​ពី​ក្រៅ​មក​បន្ថែម។

ក្នុង​ប្រភព​ទុន​ដែល​ប្រើប្រាស់ ក្នុង​វិស័យ​ធនាគារ១៥ភាគរយ បានមកពី​ដើមទុន​របស់​ខ្លួនឯង១៥ភាគរយ​ទៀត បានមក​កម្ចី​ពី​បរទេស និង៧០ភាគរយ​គឺ​បានមកពី​ប្រាក់​បញ្ញើ​សន្សំ។

សេដ្ឋកិច្ច ដែល​រង​ផលប៉ះពាល់​ពី​ពិភពលោក មាន​រយៈពេល​មិន​ខ្លី​នោះទេ ហើយ​មិនមែន​មួយឆ្នាំ ដែល​បានគិត​ដូច​កាលពីមុន​នោះទេ។ ជំងឺ​កូ​វីដ១៩ មាន​រយៈពេល​ជិត​មួយឆ្នាំ​ហើយ​ចាប់តាំងពី​ខែ​ចុងឆ្នាំ២០១៩ ឬ​ដើមឆ្នាំ២០២០ ។

ប្រទេស​កម្ពុជា​គឺជា​ចំណែក​មួយ​នៃ​សេដ្ឋកិច្ច​សកល។ បើសិន​សេដ្ឋកិច្ច​សកល​មាន​ផលប៉ះពាល់​យូរ យើង​ក៏​ដូចគ្នា​ដែរ។ អាជ្ញាធរ​សំដៅទៅ​ធនាគារជាតិ និង​ក្រសួង​ពាក់ព័ន្ធ ដឹង​ពី​ស្ថានភាព​ដូចគ្នា ហើយ​កំណើនសេដ្ឋកិច្ច​វិល​មករក​ភាព​ធម្មតា​បន្តិចម្តងៗ ដូច្នេះ​ការណ៍ ដែល​យើង​សម្រួល​ដល់​អតិថិជន គឺមាន​រយៈពេល​វែង​ដូចគ្នា ដើម្បីឱ្យ​អតិថិជន​មាន​ពេល​គ្រប់គ្រាន់។

អ្នកប្រតិបត្តិ​ក្នុង​វិស័យនេះ បាន​លើកឡើងថា ឧទាហរណ៍ ឥណទាន​យើង​ឱ្យ​គាត់​មាន​រយៈពេល​វែង៧ឆ្នាំ ហើយ​ដល់ពេល​ស្ថានភាព​ស្រួល​ឡើងវិញ យើង​មិន​សុំឱ្យ​អតិថិជន​សង​ក្នុង​រយៈពេល៥ឆ្នាំ​នោះទេ។ យើង​នៅតែ​រក្សា​កិច្ចសន្យា​ជាមួយ​ពួកគាត់​ដដែល អត្រា​ប្រាក់​ដូចគ្នា​ចឹ​ង​ដែរ កាល​យើង​ព្រមព្រៀងគ្នា​ក្នុង​រយៈពេល ៧ឆ្នាំ គឺ​យើង​អត់​កែ​មកវិញ​នោះទេ។ យើង​រួមរស់​រីកចម្រើន​ចម្រើន​ជាមួយ​អតិថិ​របស់​យើង។

អតិថិជន​ជាង២៦ម៉ឺន​នាក់ បានស្នើ​រៀបចំ​ឥណទាន​ឡើងវិញ ជាមួយនឹង​ទំហំ​ទឹកប្រាក់​ប្រមាណ១២០០លាន​ដុល្លារ ចាប់តាំងពី​ខែមីនា​រហូតមក ដល់​ខែសីហា​កន្លងមកនេះ។  នៅក្នុង​រយៈពេល​នេះ សមាគម​មីក្រូហិរញ្ញវត្ថុ​កម្ពុជា​សង្កេតឃើញថា ការស្នើ​រៀបចំ​ឥណទាន​នេះ មាន​អត្រា​ធ្លាក់ចុះ​នៅ​ចន្លោះ​ខែមិថុនា មកដល់​ខែសីហា។

មន្ត្រីជាន់ខ្ពស់​របស់​ស​មា​គម​មីក្រូហិរញ្ញវត្ថុ​កម្ពុជា​បានឱ្យដឹងថា នេះ​ជាស​ញ្ញា​ល្អ​ដែល​ឆ្លុះបញ្ចាំង​ឱ្យឃើញថា ផលប៉ះពាល់ ដែល​បណ្ដាលមកពី​កូ​វីដ១៩ លើ​វិស័យ​មីក្រូហិរញ្ញវត្ថុ​បាន​ថមថយ។

វិស័យនេះ​ក្នុង​រយះពេល០២ខែ​ចុងក្រោយ គឺមាន​លក្ខណៈ​ល្អប្រសើរ​ជាង​កន្លងទៅ ដែល​រាប់​ពី​ខែមេសា ឧសភា ជា​ខែ​ដែល​លំបាក​ជាងគេ បន្ទាប់មក​ខែមិថុនា កក្កដា​និង​ខែសីហា អាច​និយាយបានថា វិស័យ​មួយ​នេះ​មាន​លក្ខណៈ​ប្រសើរ​ជាង តាំងពី​ឥណទាន(កម្ចី)មិនល្អ​ក៏​ថយចុះ ហើយ​ចំនួន​អតិថិ ជន​ដែល​ស្នើសុំ​ឥណទាន​ឡើងវិញ ក៏មាន​ការធ្លាក់ចុះ រីឯ​ចំនួន​អតិថិជន​ដែល​ត្រូវការ​ឥណទាន​ថ្មី​ក៏មាន​ការកើនឡើង។

ចំពោះ​អាជីវករ​ខ្នាតតូច​ក្នុងស្រុក មាន​ភាពល្អប្រសើរ​ជាង​មុន​ដែរ។ តែ​យ៉ាងណាក្តី ផលប៉ះពាល់​ពី​កូ​វីដ១៩ នៅតែមាន​សម្រាប់​វិស័យ​មួយចំនួន ដែល​មិនទាន់​អាច​ស្តារឡើងវិញ​បាន​នៅឡើយ​ទេ ទោះបីជា​បញ្ហា​កូ​វីដ១៩មាន​ភាព​ធូរស្បើយ​ក្តី។

សម្រាប់​ឆ្នាំ២០២០ទាំងមូល វិស័យ​ហិរញ្ញវត្ថុ​ក្នុងស្រុក​នៅតែ​វិជ្ជមាន ថ្វីត្បិតតែ​ជួប​ការលំបាក​ជួបប្រទះ​ក៏ដោយ និយាយ​ជារួម​រយះពេល០២ ទៅ៣ខែក្រោយ​នេះ បាន​ងើបឡើង។ ហើយ​ដោយសារ​ប្រទេស​កម្ពុជា រដ្ឋាភិបាល​បាន​គ្រប់គ្រង​បញ្ហា​កូ​វីដ១៩បានល្អ​ប្រសើរ មិនមាន​ការបិទ​ប្រទេស​ឬមួយ​ក៏​ត្រឡប់​ដើរ​វិញ ហើយ​ប្រជាជន​យើង​ក៏​នៅតែ​ប្រក​បរបរ​ធ្វើដំណើរ​ធម្មតា។

រាជរដ្ឋាភិបាល​ក៏បាន​ទម្លាក់​កញ្ចប់​ប្រាក់ ដើម្បី​សម្រួល​ស្ថានភាព​សេដ្ឋកិច្ច ដូច​ផ្តល់​កញ្ចប់​ថវិកា​ទៅដល់​ធនាគារ​អភិវឌ្ឍន៍ជនបទ និង​ធនាគារ SME ជាដើម និង​កញ្ចប់​ថវិកាផ្សេងៗ ដើម្បី​ឆ្លើ​ប​នឹង​នឹង​វិបត្តិ​កំពុង​កើតមាន។

ការប្រកួតប្រជែង​រប​ស់​ស្ថាប័នហិរញ្ញវត្ថុ​អន្តរជាតិ​នៅ​កម្ពុជា

យោងតាម​ស្ថានភាព​បច្ចុប្បន្ន ធនាគារ Shinhan និង​ធនាគារ KB Kookmin Bank បាន​ចូល​ទីផ្សារ​កម្ពុជា តាមរយៈ​ការបង្កើត​ស្ថាប័ន​សាជីវកម្ម ខណៈ​ធនាគារ Woori បាន​ទិញ​ធនាគារ​ក្នុងស្រុក និង​ក្រុមហ៊ុន​មីក្រូហិរញ្ញវត្ថុ​មួយ​នៅ​កម្ពុជា។

ធនាគារ Shinhan បាន​ចូលក្នុង​ទីផ្សារ​កម្ពុជា​នៅ​ឆ្នាំ២០០៧ ហើយ​ចាប់តាំងពី​ពេលនោះ មក​ធនាគារ​បាន​ពង្រីក​សាខា​របស់ខ្លួន យ៉ាងសកម្ម​នៅ​ទូទាំងប្រទេស​កម្ពុជា។ ធនាគារ​ឲ្យ​ដឹងថា បច្ចុប្បន្ននេះ​មាន​សាខា​ប្រាំមួយ​នៅ​ទីនោះ ប៉ុន្តែ​គ្រោង​នឹង​បន្ថែម​ពីរ​បន្ថែមទៀត​នៅ​ចុងឆ្នាំ​នេះ។

ប្រហែល៩០ភាគរយ នៃ​អតិថិជន​នៅ​កម្ពុជា​គឺជា​អ្នកស្រុក មិន​ដូច​ប្រទេស​វៀតណាម​ទេ ធនាគារ​កូរ៉េ​ផ្តោត​តែ​លើ​ការធ្វើ​អាជីវកម្ម​ជាមួយ​ក្រុមហ៊ុន​កូរ៉េ​ខ្លួន។ ការឆ្លុះបញ្ចាំង​ពី​អាង​អតិថិជន​របស់ខ្លួន​នៅ​កម្ពុជា ធនាគារ Shinhan បាន​ផ្តោតទៅលើ​ប្រាក់កម្ចី​រាយ​នៅ​កម្ពុ​ជាច្រើន​ឆ្នាំ​មកហើយ។ ទ្រព្យ​សរុប​របស់ Shinhan Bank Cambodia’s មានតម្លៃ​គិត​ជា​ទឹកប្រាក់១៨៨ លាន​ដុល្លារ​នៅក្នុង​ឆ្នាំ២០១៧ និង​កើន​ឡើងដល់២៥១ លាន​ដុល្លារ​កាលពី​ឆ្នាំ២០១៨។ រហូតមកដល់​ចុងខែ​មីនា​ទ្រព្យ​របស់ខ្លួន មានតម្លៃ​គិត​ជា​ទឹកប្រាក់ ៣១១លាន​ដុល្លារ។

ធនាគារ KB Kookmin Bank បាន​ប្រើប្រាស់​កម្មវិធី​ទូរស័ព្ទដៃ​Liiv  របស់ខ្លួន​យ៉ាងសកម្ម ដើម្បី​ទាក់ទាញ​អតិថិជន​នៅក្នុង​ប្រទេស​កម្ពុជា។ អ្នកប្រើប្រាស់​កម្មវិធី​មាន​ចំនួន​សរុប១១,៩០០នាក់ នៅពេលដែល​ធនាគារ​នេះ បាន​បើក​ដំណើរការ​នៅ​ឆ្នាំ២០១៦ ប៉ុន្តែ​ឥឡូវនេះ​វា​មាន​អ្នកប្រើប្រាស់ ៧៨,០០០ នាក់។

កម្មវិធី​នេះ ផ្តល់ជូន​នូវ​ការបញ្ចុះ​តម្លៃ​រហូតដល់៥០ភាគរយ អាស្រ័យ​លើ​ហាង​ដែល​បាន​សហការ​ជាមួយ​ខ្លួន នៅ​កម្ពុជា។ ដោយ​ឆ្លុះបញ្ចាំង​ពី​ការកើនឡើង​ចំនួន​ពលករ​កម្ពុជា​នៅក្នុង​ប្រទេស​កូរ៉េ​Liiv ក៏បានផ្តល់​សេវា​ផ្ទេរប្រាក់​អន្តរជាតិ រវាង​ប្រទេស​ទាំងពីរ​ផងដែរ។

ធនាគារ KB Cambodia ទទួលបាន​ប្រាក់កម្រៃ​ពី​សេវា​បង់ប្រាក់​បញ្ញើរ នៅក្រៅ​ប្រទេស​ចំនួន១៤៣,០០០ដុល្លារ តាមរយៈ​កម្មវិធី​នេះ​កាលពី​ឆ្នាំមុន។ ធនាគារ Woori បាន​ប្តូរ​ឈ្មោះ​ពីរ​សាខា​កម្ពុជា ដែល​ខ្លួន​បាន​ទិញ​នៅក្នុង​កម្ពុជា​ទៅជា​Woori Bank Finance និង​Woori Finance Cambodia ។

ធនាគារ Woori ឲ្យ​ដឹងថា វា​នឹងមាន​ការច្របាច់បញ្ចូល​គ្នា រវាង​ក្រុមហ៊ុន​ទាំងពីរ​នៅ​ដំណាច់​ឆ្នាំនេះ ខណៈ​ធនាគារ​ទទួលបាន​ការផ្តល់សេវា​មីក្រូហិរញ្ញវត្ថុ កាន់តែ​ល្អប្រសើរ​ឡើង។

មន្ត្រី​ធនាគារ​មួយរូប​បាន​និយាយថា “យើង​មិន​គ្រាន់តែ​ផ្តល់​សេវា​ប្រាក់កម្ចី​នៅតាម​សាខា​របស់​យើង​ទេ យើង​ថែមទាំង​ឆ្លើយតប​ជាមួយ​អតិថិជន តាម​សំណើ​របស់​ពួកគេ​ដើម្បី​ផ្តល់ប្រាក់​កម្ចី​ដល់​ពួកគេ”៕

រដ្ឋាភិបាល​ចំណាយ​ថវិកា​ចំនួន ១៩២លាន​ដុល្លារ​កែលម្អ​ហេដ្ឋារចនាសម្ព័ន្ធក្នុង​ខេត្ត​ចំនួន១០

ដោយ ហ្សូ​លី

ភ្នំពេញៈ ហេដ្ឋារចនាសម្ព័ន្ធ​ក្នុង​ខេត្ត​ចំនួន១០ ដែល​រង​ការខូចខាត ត្រូវបាន​រដ្ឋាភិបាល​គិតគូរ​កែលម្អ​ឡើងវិញ ដោយ​ចំណាយ​ទឹកប្រាក់​ប្រមាណ ១៩២លាន​ដុល្លារ​អាមេរិក។ នេះ​បើតាម​ការអះអាង​របស់​ក្រសួង​អភិវឌ្ឍ​ជនបទ។

រដ្ឋលេខាធិការ​នៃ​ក្រសួង​អភិវឌ្ឍ​ជនបទ លោក​សួស គង់​បាន​ថ្លែងប្រាប់​ឱ្យដឹងថា ក្រសួង​អភិវឌ្ឍន៍ជនបទ កំពុងដំណើរការ​សក​ម្ម​ភាព​កែលម្អ​ផ្លូវ​ជនបទ ពី​ក្រាល​ក្រួស​ក្រហម ឲ្យ​ទៅជា​ផ្លូវ​ក្រាល​កៅស៊ូ​ពីរ​ជាន់​ប្រភេទ DBST និង​ផ្លូវ​ក្រាល​បេតុង​ប្រវែង១.២០០ គ.ម នៅ​ខេត្ត​គោលដៅ​ចំនួន១០ ។

លោក​បន្តថា ខេត្ត​ទាំងនោះ​រួមមាន​ដូចជា ខេត្តកំពង់ចាម ខេត្ត​ត្បូងឃ្មុំ ខេត្តកំពង់ធំ ខេត្តសៀមរាប ខេត្តបន្ទាយមានជ័យ ខេត្តបាត់ដំបង ខេត្តពោធិសាត់ ខេត្តកំពង់ឆ្នាំង ខេត្តកំពង់ស្ពឺ និង​ខេត្តតាកែវ សម្រាប់​រយៈពេល​ពី​ឆ្នាំ២០១៥ ដល់​ឆ្នាំ២០២០ ។

បើតាម​ការបញ្ជា​ក់រប​ស់លោ​កសួស គង់ គម្រោង​នេះ ប្រើប្រាស់​ថវិកា​ប្រមាណ​ជាង ១៩២លាន​ដុល្លារ​អាមេរិក ដែលជា​ឥណទាន និង​ជំនួយឥតសំណង មាន​ប្រភព​មកពី ធនាគារអភិវឌ្ឍន៍អាស៊ី (ADB) សាធារណរដ្ឋ​កូរ៉េ ធនាគារ KEXIM BANK សាធារណរដ្ឋ​បារាំង (AFD), ប្រទេស​អូស្ត្រាលី (GOA) មូលនិធិ​ន័​រ​ឌិ​ក (NDF) SCF និង​ថវិកាបដិភាគ​របស់​រា​ជ​រដ្ឋាភិបាល​កម្ពុជា។

ក្រសួង​អភិវឌ្ឍន៍ជនបទ កំពុង​អនុវត្ត​គម្រោង​កែលម្អ​ផ្លូវ​ជនបទ ជំហាន​ទី២ (Rural Road Improvement Project II – RRIP II) ដោយ​កំពុងធ្វើការ​កែលម្អ​ផ្លូវ​ជនបទ​ប្រវែង ១២០០គីឡូម៉ែត្រ ក្នុង​ខេត្ត​ចំនួន១០ ដោយ​ប្រើប្រាស់​ថវិកា​ជាង១៩២ លាន​ដុល្លារ​អាមេរិក។

កាលពី​ថ្ងៃទី២ ខែ វិច្ឆិកា ឆ្នាំ ២០២០កន្លងទៅនេះ លោក សួស គង់ បាន​ដឹកនាំ​កិច្ចប្រជុំ​មួយ ដើម្បី​ត្រួតពិនិត្យ​វឌ្ឍនភាព នៃ​ការអនុវត្តន៍​គម្រោង​កែលម្អ​ផ្លូវ​ជនបទ ជំហាន​ទី២ (RRIP II) និង​លើក​វិធានការ​កែលម្អ​ដល់​អ្នកទទួល​ការសាងសង់​ដើម្បី​អនុវត្តន៍៕

កម្ពុជា-ហុងគ្រី គ្រោងភ្ជាប់ជើងហោះហើរត្រង់នាពេលខាងមុខ

ដោយ៖ ប៊ី

ភ្នំពេញ៖ កម្ពុជា និងហុងគ្រី បានចុះហត្ថលេខាលើកិច្ចព្រមព្រៀងសេវាកម្មដឹកជញ្ជូនតាមផ្លូវអាកាស ដើម្បីពង្រីកទំនាក់ទំនងវិស័យអាកាសចរស៊ីវិលនៃប្រទេសទាំងពីរ និងសម្រួលដល់ដំណើរការដឹកជញ្ជូនទំនិញ និងអ្នកដំណើរតាមផ្លូវអាកាស។

លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល តំណាងរាជរដ្ឋាភិបាលកម្ពុជាបានចុះហត្ថលេខាលើកិច្ចព្រមព្រៀងសេវាកម្មដឹកជញ្ជូនតាមផ្លូវអាកាស ជាមួយសមភាគី ហុងគ្រី តំណាងដោយ លោក ភីធឺ ស៊ីចាតូ Peter Szijjarto រដ្ឋមន្ត្រីការបរទេស និងពាណិជ្ជកម្មនៅថ្ងៃទី៣ ខែវិច្ឆិកា ឆ្នាំ២០២០ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

រដ្ឋលេខាធិការដ្ឋានអាកាសចរស៊ីវិល បានឱ្យដឹងថា “ការចុះហត្ថលេខាលើកិច្ចព្រមព្រៀងនេះគឺ សំដៅលើការពង្រឹង និងពង្រីកទំនាក់ទំនងវិស័យអាកាសចរស៊ីវិលនៃប្រទេសទាំងពីរ និងសម្រួលដល់ដំណើរការដឹកជញ្ជូនទំនិញ និងអ្នកដំណើរតាមផ្លូវអាកាស”។

ប្រទេសហុងគ្រីគឺជាប្រទេសសមាជិកសហគមន៍អឺរ៉ុបមួយដែលបានពង្រីកទំនាក់ទំនងវិស័យអាកាសចរស៊ីវិលជាមួយព្រះរាជាណាចក្រកម្ពុជា ជាលក្ខណៈទ្វេភាគី ក្រៅពីពហុភាគីជាមួយតំបន់អាស៊ាន។

នេះជាប្រទេសទី ៤៥ ហើយដែលបានសម្រេចនូវកិច្ចព្រមព្រៀងសេវាកម្មដឹកជញ្ជូនតាមផ្លូវអាកាសជាមួយព្រះរាជាណាចក្រកម្ពុជា។

លោក ម៉ៅ ហាវណ្ណាល់ សូមសម្តែងនូវការអរគុណនិងអំណសាទរចំពោះលទ្ធផលថ្មីមួយទៀត ក្រោមការដឹកនាំនូវនយោបាយ “ឈ្នះ ឈ្នះ” របស់សម្តេចតេជោ និង អរគុណសន្តិភាព តាមរយៈកិច្ចខិតខំប្រឹងប្រែងកន្លងមកលើការសន្ទនាជាមួយភាគីហុងគ្រីកាលពីឆ្នាំ២០១៥ ដើម្បីសម្រេចបាននូវកិច្ចព្រមព្រៀងនេះ ដែលផ្តល់អត្ថប្រយោជទៅវិញទៅមករវាងប្រទេសទាំងពីរ៕

ប្រា​សាក់ បើក​ដំណើរការ​សាខា​ថ្មី​មួយ​បន្ថែមទៀត​នៅ​ក្រុង​សៀមរាប

ដោយ ស្រី​ណា​ង

ភ្នំពេញ៖ ក្នុង​គោលបំណង​ផ្តល់​ភាពងាយស្រួល សេវា​លឿន​រហ័ស និង​កាន់តែ​ខិតជិត​ជាមួយ​អតិថិជន​របស់ខ្លួន ក៏ដូចជា​ឆ្លុះបញ្ចាំង​ពី​ភាព​រីកចម្រើន​ឥតឈប់ឈរ​ផងដែរ ប្រា​សាក់​ដែលជា​គ្រឹះស្ថាន​ហិរញ្ញវត្ថុ​ធំជាងគេ​នៅ​កម្ពុជា បាន​ពង្រីក​បណ្ដាញ​ការិយាល័យ​ថ្មី​មួយ​បន្ថែមទៀត  នៅ​ខេត្តសៀមរាប​គឺ «សាខា​ក្រុង​អង្គរ» ដែលមាន​អាសយដ្ឋាន៖ ផ្លូវជាតិ​លេខ 6 ភូមិ​គ្រួស សង្កាត់​ស្វាយដង្គំ ក្រុង​សៀមរាប ខេត្តសៀមរាប។

គិត​ត្រឹម​ដើមខែ​វិច្ឆិកា ឆ្នាំ 2020 នេះ ប្រា​សាក់ បាន​ពង្រីក​បណ្តាញ​ការិយាល័យ​របស់ខ្លួនរ​ហូត​ដល់ 182 សាខា​ទូទាំងប្រទេស និង​បាន​បម្រើសេវា​ធនាគារ​ជូន​អតិថិជន​របស់ខ្លួន​ស្របតាម​យុគ​ឌីជីថល និង​ភាព​ស៊ីវីល័យ​លើ​ការប្រើប្រាស់​សេវា​ហិរញ្ញវត្ថុ។ សមិទ្ធផល​ដ៏​ល្អ​នេះ គឺ​សបញ្ជាក់​ឱ្យឃើញ​នូវ​សក្តានុពល​របស់​ប្រា​សាក់ ក្នុង​ការផ្តល់​ដំណោះស្រាយ​ផ្នែក​ហិរញ្ញវត្ថុ​ដែល​ផ្ដល់នូវ​ភាព​រីកចម្រើន ហើយ​ប្រា​សាក់​មាន​ឆន្ទៈ​ដ៏​មោះមុត​ក្នុងការ​លើកកម្ពស់​ជីវ​ភាព​របស់​ប្រជាជន​កម្ពុជា​ឱ្យ​កាន់តែ​ប្រសើរឡើង។

ប្រា​សាក់ សាខា​ក្រុង​អង្គរ ជា​សាខា​ទី 3 ក្នុង​ក្រុង​សៀមរាប ហើយ​សព្វថ្ងៃនេះ ក្នុង​ក្រុង​សៀមរាប មាន​អេ​ធី​អឹម​ចំនួន 7 ទីតាំង ត្រូវបាន​ដំឡើង​ដើម្បី​បម្រើ​សេចក្ដីត្រូវការ​របស់​អតិថិជន​នៅក្នុង​ក្រុង​សៀមរាប។ លើសពីនេះ ចាប់ពី​ថ្ងៃនេះ​តទៅ ការធ្វើ​ប្រតិបត្តិ​ការដាក់ ដក និង​ផ្ទេរប្រាក់​ឆ្លង​ស្នាក់ការ​ទៅ-មករ​វាង​សាខា​សៀមរាប សាខា​ស្វាយដង្គំ និង​សាខា​ក្រុង​អង្គរ គឺ​ពុំ​គិត​កម្រៃ​សេវា​ឡើយ។

លោក សាយ សូ​នី អនុប្រធាន​នាយក​ប្រតិបត្តិ​របស់​ប្រា​សាក់ បាន​មានប្រសាសន៍ថា៖ «មកទល់នឹង​បច្ចុប្បន្ននេះ ប្រា​សាក់​មាន​សាខា​ចំនួន 9 នៅ​ទូទាំង​ខេត្តសៀមរាប​ដើម្បី​ផ្តល់​សេវា​ហិរញ្ញវត្ថុ​ដ៏​សម្បូរបែប​ជូន​អតិថិជន រួមមាន៖ សេវា​ប្រាក់​បញ្ញើ​សន្សំ សេវា​ឥណទាន ផ្ទេរប្រាក់ ទូទាត់​វិក្កយបត្រ​ទឹក ទូទាត់​វិក្កយបត្រ​ភ្លើង ដាក់​ប្រាក់​តាម​ម៉ាស៊ីន​អេ​ធី​អឹម ដក​ប្រាក់​តាម​ម៉ាស៊ីន​អេ​ធី​អឹម​ប្រា​សាក់​ទោះជា​គ្មាន​ប័ណ្ណ​អេ​ធី​អឹម ប្តូរប្រាក់ ទិញ​កាត​ទូរស័ព្ទ បើកប្រាក់​បៀវត្ស សេវា​ទូទាត់​រហ័ស អេ​ធី​អឹម សេវា​ធនាគារ​ចល័ត ម៉ាស៊ីន​ឆូត​កាត សេវា​ខេ​ម​បូ​ឌា​ន​ស៊ែរ​ស្វ៊ី​ច (CSS) សេវា​ទូទាត់​បាគង សេវា​ផ្ទេរ​មូលនិធិភ្លាមៗ ឬ ផ្ទេរប្រាក់​ឆ្លង​ធនាគារ និង​សេវាផ្សេងៗទៀត។ ហើយ​យើង​នៅតែ​ប្ដេជ្ញាចិត្ត​ខ្ពស់​ក្នុងការ​ផ្ដល់ជូន​បទពិសោធ​ន៍​បម្រើសេវា​អតិថិជន​ដ៏​ល្អ​បំផុត​និង​ពាំ​នាំមក​នូវ​សេវា​ហិរញ្ញវត្ថុ​កាន់តែ​ល្អប្រសើរ​ក្នុងការ​គាំទ្រ​ដល់​ការរីកចម្រើន​របស់​អតិថិជន​របស់​យើង»។

សូមបញ្ជាក់​ផងដែរ​ថា ការបើក​គណនី​សន្សំ នៅ​ប្រា​សាក់​នៅថ្ងៃនេះ អតិថិជន​នឹង​ទទួលបាន​ប័ណ្ណ​អេ​ធី​អឹមភ្លាមៗ ហើយ​អតិថិជន​អាច​ផ្ទេរប្រាក់ ទិញ​កាត​ទូរស័ព្ទ ផ្ទេរប្រាក់​តាម​លេខ​សម្ងាត់​ទៅ​អ្នក​គ្មាន​គណនី ពិនិត្យ​សមតុល្យ​គណនី និង​សេវាផ្សេងៗដោយ​មិន​អស់​កម្រៃ​សេវា។

អាស្រ័យហេតុនេះ សូម​អតិថិជន​ទាំងអស់​រីករាយ​ក្នុងការ​ទទួលបាន​សេវា​ហិរញ្ញវត្ថុ និង​ការផ្តល់សេវា​បម្រើ​ដោយ​ភាព​រួសរាយ​រាក់ទាក់​ពី​ប្រា​សាក់​សាខា​ក្រុង​អង្គរ។ លោកអ្នក​អាច​រក​ទីតាំង​សាខា​បាន​តាម https://bit.ly/31mKyod ។

សម្រាប់​ព័ត៌មាន​បន្ថែម ឬ ត្រូវការ​ប្រើប្រាស់​កម្ចី​ពី​ប្រា​សាក់ សូម​ទាក់ទង​តាម​ទូរស័ព្ទ​លេខ 086 999 911 ឬ 023 999 911 ឬ 096 9 999 911 ឬ ចូលទៅ​កាន់​វេ​ប​សាយ​ត៍ www.prasac.com.kh ៕

តើខេត្តព្រះសីហនុមានការវិវត្តន៍បែបណាក្នុងរយៈពេលចុងក្រោយនេះ ខណៈ ការមកដល់របស់អ្នកវិនិយោគចិនកើនឡើង

        ដោយគង់ សូរិយា

        ភ្នំពេញៈ មួយរយៈចុងក្រោយនេះ សកម្មភាពអាជីវកម្ម និងវិនិយោគនៅខេត្តព្រះសីហនុចាប់ផ្តើមមានសកម្មភាពប្រសើរឡើង ខណៈការមកដល់នៃអ្នកវិនិយោគចិន ភ្ញៀវទេសចរណ៍អន្តរជាតិបានបង្ហាញសញ្ញាប្រសើរឡើង។

          អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យបានមានប្រសាសន៍ឲ្យដឹងតាមទូរស័ព្ទនៅរសៀលថ្ងៃទី៣ វិច្ឆិកានេះថា នៅខេត្តព្រះសីហនុ សកម្មភាពភ្ញៀវទេសចរ​ណ៍ទៅលេងតាមបណ្តាកោះនានាបានកើនឡើង ទាំងភ្ញៀវជាតិ អន្តរជាតិ និងមានសកម្ម​ភាពវិនិយោគនៅពីអ្នកវិនិយោគជាច្រើនផងដែរ ទាំងអ្នកវិនិយោគក្នុងស្រុកនិងបរទេស។លោកបន្តថា ទោះជាយ៉ាងណាអ្នកវិនិយោគអន្តរជាតិធំៗខ្លះ បានត្រលប់មកកាន់ខេត្តព្រះសីហនុវិញ ខ្លះមិនទាន់ត្រលប់់មកនៅឡើយទេ ដោយសារបញ្ហាជំងឺCovid-19។

លោកបន្តថា “បច្ចុប្បន្ននេះអ្នកវិនិយោគចិន ភ្ញៀវទេសចរណ៍ចិន និងភ្ញៀវទេសច​រណ៍ដទៃទៀត បានមកកាន់ខេត្តព្រះសីហនុកើនឡើង ដោយមួយសប្តាហ៍គិតជាមធ្យម មានភ្ញៀវជាង១០,០០០នាក់បានមកកាន់ខេត្តព្រះសីហនុ”។លោកបន្តថា “ក្នុងមួយសប្តាហ៍ គិតជាមធ្យមមានជើងហោះហើរបីលើកមកកាន់ខេត្តនេះ ដែលភាគច្រើនអ្នកធ្វើដំណើ​រជាជនជាតិចិន ដែលជាអ្នកវិនិយោគ អ្នកធ្វើការងារផ្សេងៗ និងភ្ញៀវទេសចរណ៍”។

លោកឃាង ភារម្យបានបន្តថា បច្ចុប្បន្ននេះកាស៊ីណូមួយចំនួនបានបើកដំនើរការនៅក្រុងព្រះសីហនុ ប៉ុន្តែលោកមិនបញ្ជាក់ពីចំនួនប៉ុន្មាននៅឡើយទេ ដោយសារអាជ្ញាប័ណ្ណកាស៊ីណូ ដែលអាចបើកដំណើរការឡើងវិញ ស្ថិតក្រោមសមត្ថកិច្ចរបស់ក្រសួងសុខាភិបាល ដែលតម្រូវឲ្យម្ចាស់កាស៊ីណូបំពេញលក្ខខ័ណ្ឌមួយចំនួន។

លោកបន្តថា “យើងមិនអាចនិយាយថាពេលណាអ្វីៗ វិលមករកភាពប្រក្រតីវិញទេ ប៉ុន្តែតាមការបញ្ជាក់របស់រដ្ឋមន្រ្តីក្រសួងទេសចរណ៍ គឺត្រូវការរយៈពេលបីឆ្នាំទៀត ទើបស្ថានភាពវិលមករកភាពប្រក្រតីវិញ”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីមបានថ្លែងថា ស្ថានភាពនៅខេត្តព្រះសីហនុ នឹងរកភាពយ៉ាប់យឺនរយៈពេល៦ខែទៀត ហើ​យអ្វីៗដើម្បីវិលមករកភាពប្រសើរឡើង គឺត្រូវការរយៈពេល១ឆ្នាំឬ១ឆ្នាំកន្លះទៀត ខណៈវិស័យទេសចរណ៍រងផលប៉ះពាល់ខ្លាំងជាងគេ ប៉ុន្តែអាជីវកម្មផ្សេងៗទៀតនៅអាចដំណើរការធម្មតា។

លោកបន្តថា “ផ្នែកទីផ្សារជួលបាននិងកំពុងរងផលប៉ះពាល់ខ្លាំង ប៉ុន្តែតម្លៃនឹងវិលមករកតុល្យភាពជាមួយនឹងសេដ្ឋកិច្ចវិញ”។លោកបន្តថា “ពីមុនផ្ទះមួយល្វែងជួលបាន៨០០ដុល្លារ ប៉ុន្តែពេលពពុះសាប៊ូកើតឡើង ធ្វើឲ្យតម្លៃកើនដល់៧០០០ទៅ៨០០០ដុល្លារនោះជារឿងមិនគួរឲ្យជឿ”។

លោកច្រឹក សុខនីមបានបន្តថា ដើម្បីជំរុញឲ្យសកម្មភាពសេដ្ឋកិច្ច និងការវិនិយោគមានភាពប្រសើរឡើង ទាមទារនូវកត្តាមួយចំនួនដូចជា គោលនយោបាយលើកទឹកចិត្តរបស់រដ្ឋាភិបាល ដើម្បីលើកកំពស់វិស័យSME ហើយនៅពេលSMEចូលកាន់តែច្រើន សកម្មភាពវិនិយោគធំៗនឹងកើតមានឡើង ខណៈហេដ្ឋារចនាសម្ព័ន្ឋបានបញ្ចប់ហើយ។

លោកបន្តថា “ខេត្តព្រះសីហនុប្រៀបដូចកូនក្រមុំម្នាក់ ដែលតែងខ្លួនស្អាតហើយ រង់ចាំតែអ្នកចូលស្តីដណ្តឹងប៉ុណ្ណោះ”៕

ជាមួយគ្នានេះលោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រសាសន៍ថា ការរីកចម្រើនឬភាពប្រក្រតីឡើងវិញនៃខេត្តព្រះសីហនុ មិនអាចពឹងផ្អែកតែអ្នកវិនិយោគចិន ឬអឺរ៉ុបទេ សំខាន់ឲ្យប្រជាជន និងអ្នកវិនិយោគខ្មែរទៅឲ្យច្រើន អ្វីៗនឹងមានភាពល្អប្រសើរឡើង ហេតុនេះការពង្រឹកសន្តិសុខ សុវត្ថិភាពបន្ថែមជារឿងចាំបាច់៕

រដ្ឋាភិបាលហុងគ្រី មិនគាំទ្រចំពោះការដក EBAពីកម្ពុជា

ដោយ ៖ រ៉ាណេត

ភ្នំពេញ ៖ ប្រទេសហុងគ្រី គឺជាសមាជិកនៅក្នុងសហភាពអឺរ៉ុប ដែលមានវិសាលភាពតូចជាងគេ ប៉ុន្តែមានឆន្ទៈយ៉ាងមោះមុតជាមួយកម្ពុជា ដោយឈរនៅលើគោលការណ៍បដិសេធលើការសម្រេចដកប្រព័ន្ធអនុគ្រោះពន្ធ EBA ពីកម្ពុជាកាលពីពេលកន្លងទៅនេះ។

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា នៅក្នុងសន្នីសិទ្ធសារព័ត៌មាន នៅក្រសួងការបរទេស បន្ទាប់ពីបញ្ចប់ជំនួបពិភាក្សាជាមួយលោក ភីធ័រ ហ្សីយាតូ រដ្ឋមន្ត្រីការបរទេស និងពាណិជ្ជកម្មហុងគ្រី កាលពី ព្រឹកថ្ងៃទី០៣ ខែវិច្ឆិកានេះ បានមានប្រសាសន៍ថា រដ្ឋាភិបាលហុងគ្រី ពិតជាបានឆ្លុះបញ្ចាំងពីការប្តេជ្ញាចិត្តដ៏មុតមាំក្នុងការពង្រឹងបន្ថែមទៀតនូវចំណងមិត្តភាព និងកិច្ចសហប្រតិបត្តិការជិតស្និទ្ធរវាងប្រទេសទាំងពីរ ហើយកម្ពុជា ក៏មានការប្តេជ្ញាចិត្តដូចគ្នានេះដែរ។

លោកឧបនាយករដ្ឋមន្ត្រី ប្រាក់ សុខុន ថ្លែងថា ក្នុងរយៈពេលប៉ុន្មានឆ្នាំចុងក្រោយនេះ កម្ពុជា-ហុងគ្រី ពិតជាមានសេចក្ដីសោមនស្សរីករាយ ចំពោះទំនាក់ទំនងមិត្តភាពដ៏រឹងមាំ និងកិច្ចសហប្រតិបត្តិការដែលបន្តរីកចម្រើន ដោយផ្អែកលើមូលដ្ឋានគតិយុត្តិដ៏រឹងមាំ។ ជាមួយគ្នានោះ ក៏បានពិនិត្យឡើងវិញនូវការអនុវត្តកិច្ចព្រមព្រៀង និងអនុស្សរណៈដែលបានចុះហត្ថលេខា ក៏ដូចជាយន្តការនានា ដែលបានឯកភាពគ្នាកន្លងមក ដែលក្នុងនោះ រួមមាន គណៈកម្មការសេដ្ឋកិច្ចចម្រុះ កិច្ចពិគ្រោះយោបល់ទ្វេភាគី រវាងក្រសួងការបរទេសកម្ពុជា-ហុងគ្រី និងឯកសារមួយចំនួនទៀត ដើម្បីជួយពង្រឹងបន្ថែមនូវកិច្ចសហប្រតិបត្តិការរបស់យើង ក្នុងវិស័យគ្រប់គ្រងទឹក កសិកម្ម សេដ្ឋកិច្ច និងពាណិជ្ជកម្ម ទេសចរណ៍ និងអប់រំ។ ប្រទេសទាំងពីរ តែងឈរលើគោលការណ៍ច្បាប់អន្តរជាតិ ដែលមានចែងក្នុងធម្មនុញ្ញរបស់អង្គការសហប្រជាជាតិ ហើយតែងតែប្រកាន់យកជំហរ ក្នុងការពង្រឹងបន្ថែមនូវពហុភាគីនិយម ដោយគោរពអធិបតេយ្យរបស់រដ្ឋនីមួយៗ។

លោកឧបនាយករដ្ឋមន្ត្រី ប្រាក់ សុខុន បញ្ជាក់ថា ហុងគ្រី គឺជាមិត្តដ៏ជិតស្និទ្ធមួយរបស់កម្ពុជា។ ហុងគ្រី បានផ្តល់នូវជំនួយ និងការគាំទ្រមកដល់កម្ពុជា នៅពេលដែលប្រទេសកម្ពុជា កំពុងត្រូវការជំនួយជាចាំបាច់ បន្ទាប់ពីងើបផុតពីភ្លើងសង្គ្រាម នៃរបបខ្មែរក្រហម។ ទ័ពមួកខៀវ ហុងគ្រី បានបញ្ជូនមកកម្ពុជា ក្រោមឆត្រអាជ្ញាធរបណ្ដោះអាសន្នរបស់អង្គការ សហប្រជាជាតិ នៅកម្ពុជា (UNTAC)។ ជាមួយគ្នានេះ ជំហររបស់ហុងគ្រី លើការដកប្រព័ន្ធអនុគ្រោះពន្ធ EBA គឺជាឧទាហរណ៍មួយទៀត ដែលសរបញ្ជាក់អំពីមិត្តដែលយល់ពីស្ថានភាពរបស់កម្ពុជា ហើយក្លាហានក្នុងការគាំទ្រកម្ពុជា ឲ្យទទួលបានយុត្តិធម៌ ដើម្បីឆ្ពោះទៅរកលទ្ធិប្រជាធិបតេយ្យប្រកបដោយសន្តិភាព និងការអភិវឌ្ឍប្រកបដោយចីរភាព៕

បណ្តាញផ្លូវសំខាន់ៗជុំវិញរាជធានីភ្នំពេញ ចំនួន ២៩ ខ្សែ កំពុងជួសជុលយ៉ាងសកម្ម

ដោយ ៖ ហ្សូលី

ភ្នំពេញ៖ បណ្តាញផ្លូវសំខាន់ៗសរុបចំនួន ២៩ ខ្សែ ស្ថិតនៅតំបន់ជាយក្រុងជុំវិញរាជធានីភ្នំពេញ ដែលរងផលប៉ះពាល់ធ្ងន់ធ្ងរដោយសារគ្រោះទឹកជំនន់ បច្ចុប្បន្នត្រូវបានក្រុមការងារនៃក្រសួងសាធារណការចុះជួលជុល ស្ថាបនាឱ្យមកសភាពដើម និងមានស្ថានភាពល្អប្រសើរឡើងវិញ។

លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងនៅថ្ងៃទី៣ ខែវិច្ឆិកា ឆ្នាំ ២០២០នេះថា ផ្លូវមួយចំនួនកំពុងជួប្រទះការខូចខាត ក្រោយជំនន់ទឹកភ្លៀងបានវាយលុករាជធានីភ្នំពេញរួចមក។ បញ្ហានៅចំពោះមុខនេះ ក្រសួងសាធារណការនិងដឹកជញ្ជូន សហការជាមួយរដ្ឋបាលរាជធានីភ្នំពេញ បាននិងកំពុងជួសជុលជាបណ្ដោះអាសន្នសិន ដេីម្បីសម្រួលដល់ការធ្វើដំណើររបស់ប្រជាពលរដ្ឋ ។

លោកបន្តថា ចំពោះការខូចខាតមធ្យម និងតិចតួច រដ្ឋបាលរាជធានីភ្នំពេញ នឹងចាប់ផ្តេីមជួសជុលជាបន្តបន្ទាប់ ចំណែកផ្លូវទំនប់សណ្ត ស្ទឹងព្រែកត្នោត ក្រសួងបាននិងកំពុងជួសជុលហេីយ ។

មន្ត្រីជំនាញមន្ទីរសាធារណការរាជធានីភ្នំពេញបានអះអាងថា ផ្លូវចំនួន២៩ខ្សែក្នុងភូមិសាស្ត្ររាជធានីភ្នំពេញ ដែលទទួលរងការខូចខាតដោយជំនន់ទឹកភ្លៀងនាពេលកន្លងមក ជាក់ស្តែង ផ្លូវជាតិលេខ៤ បាននិងកំពុងជួសជុល ចំណែកផ្លូវជាតិលេខ ២០A ផ្លូវជាតិលេខ ៦A ក្រោយជួសជុលបណ្តោះអាសន្នរួចរាល់ និងដាក់ឱ្យ ដំណើរការបណ្តោះអាសន្នដែរ រីឯផ្លូវសំខាន់ផ្សេងៗទៀត ត្រូវបានក្រសួងសាធារណការនិងរដ្ឋបាលរាជធានីភ្នំពេញ បាន និងកំពុងដំណើរការជួសជុលកំពុងជួសជុលលុបសំបុកមាន់ ដើម្បីសម្រួលដល់ការធ្វើដំណើររបស់ប្រជាពលរដ្ឋ។

លោក សាំ ពិសិដ្ឋ បានឱ្យដឹងទៀតថា ក្រោយជំនន់ទឹកភ្លៀងបានស្រក ធ្វើឱ្យផ្លូវក្នុងរាជធានីភ្នំពេញចំនួន២៩ខ្សែទទួល រងការខូចខាត ផ្លូវខ្លះខូចខ្លាំង ខ្លះមធ្យម និងផ្លូវខ្លះទៀត ខូចតិចតួច ។ ចំពោះផ្លូវដែលខូចខាតខ្លាំងចាំបាច់ត្រូវមានការសិក្សា វាយតម្លៃពីក្រសួង មុននឹងអនុវត្តន៍ ប៉ុន្តែក្រសួងក៏បានជួសជុលបណ្តោះអាសន្នជាបន្តបន្ទាប់ដែរ កុំឱ្យមានគ្រោះថ្នាក់ដូចជា ផ្លូវជាតិលេខ ២។

លោក សាំ ពិសិដ្ឋ បានបញ្ជាក់ថា ផ្លូវលេខ២១៧ ឬផ្លូវចំការដូងមួយកំណាត់ ដែលលិចលង់ធ្ងន់ធ្ងរ ចាប់ពីស្ពានព្រែកជ្រៃ ដល់រង្វង់មូលកួរស្រូវ អាចអនុញ្ញាតឱ្យធ្វើចរាចររថយន្តតូចៗបាន ចំពោះរថយន្តធំ មិនទាន់ឱ្យធ្វើចរាចរណ៍ទេ ព្រោះខ្លាចខូចគ្រឹះផ្លូវ៕