វិស័យឯកជនកំពុងកែប្រែតំបន់សង្គ្រាមស្រុកឱរ៉ាល់ឱ្យក្លាយជាតំបន់ឧស្សាហកម្មពិសេស

ដោយ ៖ រ៉ាណេត

កំពង់ស្ពឺ ៖ ក្រៅពីតំបន់សំខាន់ៗមួយចំនួនដែលស្ថិតនៅផ្លូវសេដ្ឋកិច្ចពិសេសដូចជាផ្លូវជាតិលេខ៤ លេខ៥១ លេខ៤១ និង៤៤ បច្ចុប្បន្ននេះវិស័យឯកជន បាន និងកំពុងបោះទុនវិនិយោគជិត១០គម្រោងដែលមានទុនរាប់សិបលានដុល្លារ នៅក្នុងស្រុកឱរ៉ាល់ ដែលធ្លាប់តែជាតំបន់សង្គ្រាម មកជាតំបន់ឧស្សាហកម្មពិសេស។

អភិបាលខេត្តកំពង់ស្ពឺ លោក វ៉ី សំណាង បានបង្ហើបប្រាប់គេហទំព័រ www.properyarea.asia នៅរសៀលថ្ងៃទី៣ ខែវិច្ឆិកា ឆ្នាំ២០២០នេះថា បច្ចុប្បន្ននេះនៅក្នុងតំបន់ឱរ៉ាល់កំពុងមានក្រុមហ៊ុនជាតិ និងអន្តរជាតិកំពុងដំណើរការចង្វាក់ផលិតកម្មរបស់ខ្លួនចំនួន៧ ដែលក្នុងនោះផ្តោតសំខាន់ទៅលើវិស័យកសិ-ឧស្សាហកម្ម រួមមានរោងចក្រផលិតស្ករស រោងចក្រកែច្នៃផ្លែស្វាយសម្រាប់នាំចេញ និងរោងចក្រផលិតកេសគូតុង។

លោកអភិបាលបានមានប្រសាសន៍បន្តថា “បច្ចុប្បន្នគឺមានក្រុមហ៊ុនក្នុងស្រុក និងមកពីក្រៅប្រទេសរួមមានចិន និងកូរ៉េ កំពុងតែមានដំណើរការផលិតកម្មនៅក្នុងការផលិត និងកែច្នៃផលិតផលកសិកម្ម ដូចជាដំណាំស្វាយសម្រាប់ធ្វើការនាំចេញ ដំណាំអំពៅសម្រាប់ផលិតជាស្ករស ហើយក៏មានរោងចក្រផលិតកេសគូតុងសម្រាប់វេចខ្ចប់ផងដែរ”។

លោកបានបន្តថា “គ្រប់សកម្មភាពវិនិយោគទាំងអស់ គឺសុទ្ធតែជាចំណែកមួយយ៉ាងសំខាន់ក្នុងការចូលរួមជាមួយរាជរដ្ឋាភិបាលកម្ពុជាក្នុងការទ្រទ្រង់សេដ្ឋកិច្ចតាមរយៈការបង់ពន្ធ ការផ្តល់ឱកាសការងារជូនដល់ប្រជាពលរដ្ឋនៅក្នុងតំបន់ ក៏ដូចជាជំរុញឱ្យសេដ្ឋកិច្ចតំបន់មានការកើនឡើង ហើយអាចកែប្រែផ្ទៃដីដែលធ្លាប់តែជាព្រៃ ក្លាយជាតំបន់ដាំដុះ និងអភិវឌ្ឍន៍។ កាលពីមុន ស្រុកឱរ៉ាល់ជាតំបន់សង្គ្រាម ប៉ុន្តែក្រោយការដឹកនាំរបស់សម្ដេចតេជោ ហ៊ុន សែន ដែលក្រៅពីលុបបំបាត់នូវសង្គ្រាមក្រោមម្លប់នៃសន្តិភាព ថែមទាំងជំរុញឱ្យមានការអភិវឌ្ឍន៍នៅក្នុងតំបន់យ៉ាងខ្លាំងក្លា។ បន្តិចទៀតនឹងមានវត្តមានក្រុមហ៊ុនចិនដ៏ធំមួយបន្ថែមទៀតនឹងបង្ហាញខ្លួននៅក្នុងតំបន់នេះក្នុងនាមជារោងចក្រកែច្នៃផលិតផលកសិផល”។

ប្រធានក្រុមប្រឹក្សាភិបាលក្រុមហ៊ុនភ្នាក់ងារអចលនទ្រព្យ DEYTHMEY Real Estate លោក វិន ឈុនហ៊ាត ដែលជាឈ្មួញទិញ-លក់ដីនៅក្នុងតំបន់នេះបានមានប្រសាសន៍ថា វិស័យដីធ្លីនៅក្នុងស្រុកឱរ៉ាល់ដែលកំពុងមានគម្រោងវិនិយោគផ្នែកកសិឧស្សាហកម្មជាច្រើននេះ គឺនៅមានវិសាលភាពធំទូលាយនៅឡើយ ហើយតម្លៃក៏នៅទាបដែរ។

លោកបានបញ្ជាក់ថា “ដីនៅក្នុងស្រុកឱរ៉ាល់តាមផ្លូវជាតិលេខ៤៤ ចាប់ពីគីឡូម៉ែត្រ២២ តម្លៃគឺនៅទាបនៅឡើយ ដោយក្នុងមួយម៉ែត្រការ៉េប្រមាណ៥-៦ដុល្លារតែប៉ុណ្ណោះ (ប្រភេទចំការស្វាយដែលមានទំហំធំចាប់ពី១០០ហិកតាឡើង) ប៉ុន្តែក៏មានដីចំការខ្លះអាចខ្ពស់ជាងនេះបន្តិចដែលវាអាស្រ័យទៅតាមទំហំ និងស្ថានភាពជាក់ស្ដែងនៃដី”។
លោកបានបន្តឱ្យដឹងថា បច្ចុប្បន្ន ដីដែលមានតម្រូវការ និងទីផ្សារនៅពេលនេះភាគច្រើនស្ថិតនៅជាប់ផ្លូវជាតិលេខ៤៤ តែប៉ុណ្ណោះ ដោយឡែកដីដែលស្ថិតនៅខាងក្នុងជ្រៅនៅមិនទាន់មានតម្រូវការនោះទេ រហូតដីទំនេរខ្លះ និងមានព្រៃតូចៗត្រូវបានគេដាក់លក់ត្រឹមតែ១ដុល្លារក្នុងមួយម៉ែត្រការ៉េក៏មានដែរ៕

ខណ្ឌសែនសុខ កំពុងបញ្ចេញសក្តានុពលក្លាយជាតំបន់ពាណិជ្ជកម្ម CBD នាពេលអនាគត

ដោយ ហ្សូលី

ភ្នំពេញ៖ ខណ្ឌសែនសុខ ចាប់ផ្តើមមានសន្ទុះលើតម្រូវការអចលនទ្រព្យយ៉ាងឆាប់រហ័ស ទាំងការអភិវឌ្ឍលើវិស័យបុរីលំនៅដ្ឋាន អគារខ្ពស់ដូចជា គម្រោងអគារខុនដូ អគារពាណិជ្ជកម្ម និងផ្សារទំនើបជាដើម។ កត្តាទាំងនេះបានជម្រុញឱ្យខណ្ឌសែនសុខមានសក្តានុពលអាចក្លាយជាតំបន់ពាណិជ្ជកម្ម (CBD) នាពេលអនាគត។

លោក សោម កែវម៉ាលីដា (Andy) អ្នកជំនាញអចលនទ្រព្យអន្តរជាតិ បានថ្លែងប្រាប់គេហទំព័រ Propertyarea.asia ថា ខណ្ឌសែនសុខបច្ចុប្បន្នមានសន្ទុះខ្លាំងជាងកាលពីមុន គ្រាន់តែថាកាលពីមុនស្ទុះទៅលើប្រភេទលំនៅដ្ឋាន បុរីលំនៅដ្ឋាន Residential ជាដើម ហើយបុរីធំៗឃើញថាមានអស់ហើយ។ ប៉ុន្តែឥលូវនេះតំបន់នេះមានការកើនឡើងនូវតំបន់ពាណិជ្ជកម្ម CBD ដូចជាអគារខ្ពស់ មានផ្សារ Mall កើនឡើងច្រើន។

លោកបន្តថា ជាពិសេសមានអគារពាណិជ្ជកម្ម ការិយាល័យ និងគម្រោងអគារខុនដូ ឃើញថាមានសន្ទុះកើនឡើងខ្លាំង ហើយថ្មីៗក៏មានបន្ថែមនូវគម្រោងផ្សារឃ្លាំងរំសេវថ្មីសែនសុខផងដែរ។ ម្យ៉ាងខណ្ឌសែនសុខក៏មានទីតាំងព្រលានយន្តហោះចាស់ដែលនៅកៀកក្រុងផងដែរ ម្យ៉ាងក៏មានបណ្តាញផ្លូវខ្វែងខ្វាត់ដែលជាការសហការរវាងរដ្ឋាភិបាល និងវិស័យឯកជន។

ទន្ទឹមនេះ នាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរ បានលើកឡើងស្រដៀងគ្នាថា បច្ចុប្បន្នខណ្ឌសែនសុខបានអប្រែក្លាយជាតំបន់ពាណិជ្ជកម្មកម្រិតខ្ពស់រួចទៅហើយ ព្រោះតំបន់នេះបានបំពេញទៅដោយគម្រោងបុរីលំនៅដ្ឋានធំៗ ក៏ដូចជាបណ្តុំលំនៅដ្ឋានកម្រិតខ្ពស់ រួមជាមួយវត្តមាននៃអគារខ្ពស់ៗដែលបម្រើឱ្យវិស័យពាណិជ្ជកម្ម។

លោកស្រីបញ្ជាក់ថា កាលពីមុនតំបន់ខណ្ឌសែនសុខសម្បូរទៅនឹងការវិនិយោគលើគម្រោងលំនៅដ្ឋានកម្រិតមធ្យម និងក្រោមមធ្យម ប៉ុន្តែឥលូវខុសពីមុន។ ការវិនិយោគលើគម្រោងលំនៅដ្ឋានកម្រិតមធ្យមនៅតំបន់នេះលែងមានទៀតហើយ ប៉ុន្តែសម្រាប់គម្រោងមជ្ឈមណ្ឌលពាណិជ្ជកម្មគឺនៅមានឱកាស ជាពិសេសវិស័យខុនដូកម្រិតមធ្យម ដោយសារតែតម្លៃដីនៅតំបន់ខណ្ឌនេះបានឡើងខ្ពស់ផុតពីកម្រិតនៃការអភិវឌ្ឍវិស័យលំនៅដ្ឋានកម្រិតទាប ឬក្រោមមធ្យមនោះទៀតហើយ៕

ខេត្តកំពតបង្កើនភាពខ្លាំង និងបន្តរក្សាបាននូវលំហូរវិនិយោគក្នុងស្រុក

ដោយ ៖ ហ្សូលី

កំពត៖ នៅពេលដែលបណ្តាអាជីវកម្ម ក៏ដូចជាសហគ្រាសធុនតូច និងមធ្យម (SME) ជាច្រើនកំពុងជួបភាពប្រឈមយ៉ាងខ្លាំង ហើយវិស័យខ្លះកំពុងខិតខំស្វះស្វែងដើម្បីរក្សាគោលជំហរនោះ សម្រាប់តែគម្រោងវិនិយោគដែលស្ថិតនៅក្នុងខេត្តកំពត គឺនៅតែរក្សាបាននូវភាពវិជ្ជមាន ជាមួយនឹងការទទួលបានកំណើនវិនិយោគថ្មីបន្ថែម ដែលជាការបង្ហាញពីភាពខ្លាំងរបស់ខេត្តជាប់ឆ្នេរសមុទ្រមួយនេះ។

លោក នី ផល្លី អនុរដ្ឋលេខាធិការក្រសួងទេសចរណ៍បានថ្លែងថា ក្នុងអំឡុងពេលនៃការគ្របដណ្តប់ដោយវិបត្តិជំងឺរាតត្បាត វិស័យទេសចរណ៍បានផ្លាស់ប្តូរយ៉ាងច្រើន។ ភ្ញៀវទេសចរភាគច្រើនកំពុងស្វែងរកគោលដៅទេសចរណ៍ធម្មជាតិ ដែលក្នុងនោះ ខេត្តកំពតគឺ ជាខេត្តមានអំណោយផលល្អបំផុតសម្រាប់សកម្មភាពទេសចរណ៍ជាច្រើនទីតាំង និងផ្តល់ឱកាសដល់ការបង្កើតអាជីវកម្មថ្មីៗ ដើម្បីបំពេញតម្រូវការទេសចរណ៍ក្នុងស្រុក។

យោងតាមមន្ទីរទេសចរណ៍ខេត្តកំពតបានឱ្យដឹងថា គិត្រឹមដើមឆមាសទី២ ឆ្នាំ២០២០ ខេត្តកំពតបានទទួលភ្ញៀវទេសចរជាតិ និងអន្តរជាតិចំនួន ៨៣៨.០០០ នាក់ ខណៈដែលរយៈពេលដូចគ្នាកាលពីឆ្នាំមុនមានចំនួន ១,០៩ លាននាក់។ ចំនួននេះគឺជាការបង្ហាញយ៉ាងច្បាស់ថាខេត្តកំពតមិនមានឧបសគ្គច្រើនទេ បើប្រៀបធៀបជាមួគោលដៅទេសចរណ៍ផ្សេងទៀតដូចជា ខេត្តសៀមរាប។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនទ្រព្យ បានមានប្រសាសន៍ថា ខេត្តកំពតគឺជា ខេត្តដែលមានសក្តានុពលទេសចរធម្មជាតិ ដែលខេត្តដទៃទៀតមិនមាន ហើយក៏ជាទិសដៅនៃអ្នកទេសចរនៅក្នុងស្រុក ផងដែរ ព្រោះពួកគាត់មិនសូវចង់ទៅខេត្តផ្សេងប៉ុន្មានទេ ជាពិសេសទេសចរដែលមានលំនៅដ្ឋានក្នុងរាជធានីភ្នំពេញ។

លោកបន្តថា “មួយរយៈចុងក្រោយនេះ យើងឃើញមានអាជីវកម្មថ្មីៗបានដុះដាលនៅជុំវិញក្រុងកំពត រាប់ចាប់ពីបារ ភោជនីយដ្ឋាន ផ្ទះសំណាក់ និងសូម្បីតែក្រុមហ៊ុនទេសចរណ៍។ ទោះយ៉ាងណាការបណ្តាក់ទុនថ្មីៗទាំងនេះ ភាគច្រើនផ្តោតសំខាន់ទៅលើទីផ្សារក្នុងស្រុក ព្រោះទេសចរដែលមកពីក្រៅប្រទេសនៅមិនទាន់មាននោះទេ”។

ខេត្តកំពតត្រូវបានរាជរដ្ឋាភិបាលកម្្ពុជា កំណត់ជាគោលដៅទាក់ទាញភ្ញៀវទេសចរឱ្យបានរហូតដល់ ២,៥ លាននាក់នៅឆ្នាំ២០២៣ ហើយបច្ចុប្បន្ននេះ រដ្ឋបាលខេត្ត បាន និងកំពុងអភិវឌ្ឍន៍ទិសដៅទេសចរណ៍ថ្មីៗ ដើម្បីបង្កើតជាផលិតផលទេសចរណ៍ និងហេដ្ឋារចនាសម្ព័ន្ធធ្វើឱ្យប្រសើរឡើងដើម្បីគាំទ្រវិស័យនេះកាន់តែមានភាពរឹងមាំ៕

បុរី ខេស៊ី ក្លាយជាគម្រោងដែលមានភាពលេចធ្លោនៅក្នុងតំបន់ព្រែកព្នៅ

ភ្នំពេញ ៖ ស្ថិតនៅទីតាំងដ៏ល្អនៃតំបន់ទីប្រជុំជន ដែលមានការអភិវឌ្ឍស្រាប់ ក្នុងខណ្ឌព្រែកព្នៅ រាជធានីភ្នំពេញ បុរីលំនៅដ្ឋានដ៏ទំនើប និងទាន់សម័យ ខេស៊ី កំពុងតែទទួលបានការចាប់អារម្មណ៍ និងគាំទ្រពីសំណាក់អតិថិជនយ៉ាងច្រើន ជាមួយនឹងការផ្តល់ជូននូវតម្លៃទាប គុណភាពសំណង់ខ្ពស់ និងងាយស្រួលក្នុងការប្រកបអាជីវកម្មបានយ៉ាងប្រសើរ។

បុរី ខេស៊ី ស្ថិតនៅកណ្តាលទីប្រជុំជន ដោយនៅខាងក្រោយមានផ្សារព្រែកព្នៅចាស់ នៅខាងមុខជាប់ផ្លូវ មានផ្សារព្រែកព្នៅ សាលារៀនរដ្ឋ និងឯកជន មានមណ្ឌលសុខភាព គ្លីនិកឯកជន និងបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងជាច្រើន នៅជាប់ផ្លូវ៣០ម៉ែត្រ តភ្ជាប់ពីមហាវិថីឈ្នះ ឈ្នះ នៃទីក្រុងមរតកតេជោ ឆ្ពោះទៅផ្លូវជាតិលេខ៥ និងផ្លូវតភ្ជាប់ទៅផ្សារទំនើប AEON2ផងដែរ។ ក្រៅពីនេះ នៅមានគម្រោងអភិវឌ្ឍបឹងតាម៉ោក និងតំបន់អភិវឌ្ឍរមណីយដ្ឋានគំរូនៅតំបន់ជាយក្រុងនៃភ្នំប្រសិទ្ធិ ដែលជាគម្រោងអាទិភាពរបស់រដ្ឋបាល រាជធានីភ្នំពេញផងដែរ។

គម្រោងសំណង់លំនៅដ្ឋានបែបទំនើប និងទាន់សម័យនៅក្នុងបុរីដែលកំពុងតែមានភាពទាក់ទាញមួយនេះ បាន និងកំពុងតែសម្រុកសាងសង់យ៉ាងមមាញឹក ដើម្បីបញ្ចប់ទៅតាមគម្រោងទាំងស្រុងនៅត្រឹមឆ្នាំ២០២១ខាងមុខនេះ។ ចំពោះលក្ខខណ្ឌនៃការក្លាយខ្លួនជាម្ចាស់លំនៅដ្ឋាននៅក្នុងបុរី ខេស៊ី គឺកាន់តែមានភាពងាយស្រួលបំផុត ដោយលោកអ្នកគ្រាន់តែមានប្រាក់ដំបូងត្រឹមតែ១០០០ដុល្លារតែប៉ុណ្ណោះ រួមជាមួយនឹងការបង់បណ្តាក់ក្នុងរូបភាពជាបង់រំលស់ ជាបន្តបន្ទាប់ស្របទៅតាមគោលការណ៍ ដែលបានកំណត់ដោយក្រុមហ៊ុនអភិវឌ្ឍលំនៅដ្ឋានតែប៉ុណ្ណោះ។

ជាមួយនឹងការគិតពីផាសុកភាពដល់អ្នករស់នៅ ម្ចាស់បុរីនេះបានផ្តោតលើសំណង់់បែបបៃតង ដែលជាសន្សំសំចៃថាមពលអគ្គិសនី ដោយធ្វើឲ្យលំនៅដ្ឋានក្នុងគំរោងនេះទទួលពន្លឺ និងខ្យល់ធម្មជាតិចេញចូលគ្រប់គ្រាន់ រួមជាមួយនឹងការដាំដើមឈើបៃតងលម្អនៅពីមុខផ្ទះ ដែលកាន់តែជួយបន្ថែមភាពត្រជាក់ដល់លំនៅដ្ឋាន។

នៅក្នុងគម្រោងបុរី ខេស៊ី ត្រូវបានរៀបចំនូវហេដ្ឋារចនាសម្ព័ន្ធ ស្របតាមស្ដង់ដារសំណង់ ដូចជាផ្លូវបេតុងមេមានទំហំ១២ម៉ែត្រ ផ្លូវតូចមានទំហំ៨ម៉ែត្រ មានប្រព័ន្ធទឹកស្អាត និងបណ្តាញរំដោះទឹកយ៉ាងត្រឹមត្រូវ និងមានការរៀបចំសាងសង់ជាទីធ្លាសម្រាប់អង្គុយកម្សាន្ត ហាត់ប្រាណសាធារណៈ និងសួនច្បារ ដែលបំពាក់ទៅដោយចង្កៀងអគ្គិសនី LED យ៉ាងភ្លឺច្បាស់ត្រជាក់ភ្នែកផងដែរ។

ព័ត៌មានបន្ថែមសូមទំនាក់ទំនងទូរស័ព្ទលេខ ៖ ០៩៣ ៦៦១ ១៥០ / ០១៦ ៧៣ ១៦ ៦១ / ០៨៩ ៧៨ ៧៧ ២១៕

គម្រោងតារាសាគរតម្លៃ៤០០០លានដុល្លារនៅតែដំណើរការយ៉ាងសកម្ម ទោះបីជារងទ័ណ្ឌកម្មពីអាមេរិក

ដោយ ស៊ីវ ម៉េង

ភ្នំពេញៈ គំរោងតារាសាគរ ក្នុងខេត្តកោះកុង ដែលកំពុងបំពេញតម្លៃឲ្យខេត្តដាច់ស្រយាលនេះ កំពុងដំណើរការយ៉ាងសកម្ម ហើយបច្ចុប្បន្នក្រុមហ៊ុនកំពុងសិក្សាលើផែន​ការអភិវឌ្ឍន៍ដំណាក់កាលទី២។

ជាមួយគ្នានេះព្រលានយន្តហោះលំដាប់អន្តរជាតិនៃគម្រោងដ៏ធំនេះក៏បាននិងកំពុងដំណើរការនិងត្រៀមបញ្ចប់នៅពេលឆាប់ៗខាងមុខនេះផងដែរពិសេសកំពង់ផែទឹកជ្រៅក៏បាននិងកំពុងឈានទៅបញ្ចប់ការស្ថាបនានាពេលខាងមុខ។

ការកសាងកំពង់ផែទឹកជ្រៅព្រលានយន្តហោះអន្តរជាតិបានធ្វើឡើងដើម្បីគាំទ្រ​ដល់ផែនការអភិវឌ្ឍន៍សេដ្ឋកិច្ចរបស់រដ្ឋាភិបាល ដែលបាននិងកំពុងពង្រីកហេដ្ឋារចនាសម្ព័ន្ឋឆ្ពោះទៅតំបន់នេះ ពិសេសការស្ថាបនាផ្លុវជាតិលេខ១០ ដែលតភ្ជាប់ពីស្រុកសំឡូត ខេត្តបាត់ដំបង ឆ្លងកាត់ខេត្តពោធិសាត់ ភ្ជាប់ទៅកាន់ខេត្តកោះកុង។

ជាមួយគ្នានេះប្រមុខនៃរាជរដ្ឋាភិបាលកម្ពុជាសម្តេចតេជោហ៊ុនសែននាយករដ្ឋមន្រ្តីនៃកម្ពុជាក៏បានប្រកាសពីការពង្រីកនិងលើកកំពស់ផ្លូវជាតិលេខ៤៨ដែលចេញពីស្រុកស្រែអំបិលឆ្ពោះទៅកាន់ខេត្តកោះកុងជាពីរគន្លងរថយន្តទៅមកផងដែរ។

ប្រធានក្រុមហ៊ុនសាងសង់ដ៏ធំមួយប្រចាំកម្ពុជាបានថ្លែងឲ្យដឹងក្នុងលក្ខខ័ណ្ឌមិនបញ្ចេញឈ្មោះថាបច្ចុប្បន្នក្រុមហ៊ុនរបស់លោកបាននិងកំពុងសិក្សាលើផែនការមេដើម្បីអភិវឌ្ឍន៍គំរោងតារាសាគរក្នុងខេត្តកោះកុងនៅក្នុងដំណាក់កាលទី២ផងដែរ។

លោក​បន្តថា “គំរោងនេះមានការចូលរួមពីក្រុមហ៊ុនដ៏ធំមួយ មកពីទីក្រុងហុងកុង ដែលផែនការអភិវឌ្ឍន៍តំបន់នេះ នឹងប្រែក្លាយខេត្តកោះកុងជាតំបន់វិស្សមកាលធំជាងគេនៅតំបន់អាស៊ីអាគ្នេយ៍”។លោកបន្តថា “បន្ទាប់ពីរងទ័ណ្ឌកម្មពីអាមេរិក ក្រុមហ៊ុននេះបានប្តូរឈ្មោះ ហើយពួកគេមានទុនគ្រប់គ្រាន់ ដើម្បីពង្រីកផែនការអភិវឌ្ឍន៍ តាមចក្ខុវិស័យរបស់ពួកគេ”។

ក្រុមហ៊ុនTienjing Union Development Group បានទទួលដីសម្បទានពីរដ្ឋាភិបាលកម្ពុជាជាង៤០,០០០ហិកតា ដែលគ្របដណ្តប់ស្រុកតារាសាគរ បុទុមសាគរ និងស្រុកថ្មបាំង ក្នុងខេត្តកោះកុង។ គំរោងនេះបានប្រកាសទុនវិនិយោគលើកដំបូងតម្លៃ៤០០០លានដុល្លារអាមេរិក៕

សិង្ហបុរីបង្ហាញពីភាពរីករាយក្នុងការពង្រីកទំហំពាណិជ្ជកម្មជាមួយកម្ពុជា

ភ្នំពេញៈ ឯកអគ្គរដ្ឋទូតសឹង្ហុបុរីប្រចាំនៅកម្ពុជា បានបង្ហាញពីមោទនភាពចំពោះកិច្ចទំនាក់ទំនង់សហប្រតិបត្តិការយ៉ាងស៊ីជម្រៅជាមួយកម្ពុជា ជាពិសេសកិច្ចសហការជាដៃគូក្នុងការពង្រីកទំហំពាណិជ្ជកម្មរួមគ្នាកាលពីពេលកន្លងទៅថ្មីៗនេះ។

ឯកអគ្គរដ្ឋទូតសិង្ហបុរីប្រចាំនៅកម្ពុជា លោក ម៉ៃឃែល តាន់ (Michael Tan) នៅព្រឹកថ្ងៃទី៣ ខែវិច្ឆិកា ឆ្នាំ២០២០ ក្នុងឱកាសចូលជួបពិភាក្សាការងារជាមួយសម្ដេចតេជោ ហ៊ុន សែននាយករដ្ឋមន្ត្រីនៃកម្ពុជាបានលើកឡើងថា ក្នុងរយៈពេល៤ឆ្នាំកន្លះ នៃការបំពេញបេសកកម្មនៅកម្ពុជា លោកពិតជាមានមោទនភាពណាស់ ដែលបានធ្វើការយ៉ាងជិតស្និតជាមួយនឹងប្រជាពលរដ្ឋកម្ពុជា។

លោកបញ្ជាក់ថា “នៅក្នុងការបំពេញភារកិច្ចកន្លងទៅ គឺមានកិច្ចសហការយ៉ាងជិតស្និទ្ធជាមួយមន្ត្រីរាជការ ថ្នាក់ដឹកនាំ ជាពិសេសបានទទួលការគាំទ្រយ៉ាងល្អ ពីរាជរដ្ឋាភិបាលកម្ពុជា ដែលនាំឱ្យបេសកកម្មការទូតរបស់ខ្ញុំនៅកម្ពុជា ទទួលបាននូវភាពជោគជ័យយ៉ាងត្រចះត្រចង់”។លោកបន្ថែមថា “ទំហំពាណិជ្ជកម្មរវាងប្រទេសទាំងពីរ ក៏ដូចជាការវិនិយោគលើវិស័យទេសចរណ៍ និងការអភិវឌ្ឍធនធានមនុស្សមានការកើនឡើងខ្ពស់មួយកម្រិតថែមទៀត”។

កម្ពុជាគឺជាប្រទេស ដែលមានសុវត្ថិភាពបំផុតសម្រាប់ការរស់នៅ ដែលបានរួចផុតពីការឆ្លងនៃជំងឺកូវីដ-១៩នេះ។ លោកពិតជាមានមោទនភាព ដែលរដ្ឋាភិបាលនៃប្រទេសទាំងពីរ បានអនុញ្ញាតឲ្យឯកឧត្តមរៀបចំកម្មវិធី ដើម្បីអបអរសាទរខួបអនុស្សាវរីយ៍ នៃទំនាក់ទំនងការទូតរវាងកម្ពុជា និងសិង្ហបុរី ដោយយល់ឃើញថាកម្ពុជា គឺជាប្រទេសដែលមានសុវត្ថិភាព មិនមានការរីករាលដាលជំងឺកូវីដ-១៩ ក៏ប៉ុន្តែទោះជាយ៉ាងណាក៏ដោយ ការរៀបចំនោះប្រព្រឹត្តទៅបានជោគជ័យ ដោយអនុវត្តតាមគោលការណ៍របស់រាជរដ្ឋាភិបាល។

លោកបានបន្ថែមទៀតថា លោកពិតជាមានជំនឿជឿជាក់ថាកម្ពុជា និងសិង្ហបុរី នឹងអាចមានទំនាក់ទំនង កាន់តែល្អប្រសើរឡើងថែមទៀត ក្នុងការលើកកម្ពស់ទំនាក់ទំនង កិច្ចសហប្រតិបត្តិការល្អ ហើយទាំងអស់នេះ អាចធ្វើទៅបានដោយមានការគាំទ្រ ការសម្របសម្រួល និងកិច្ចសហប្រតិបត្តិការល្អប្រសើរ រវាងរដ្ឋាភិបាលនៃប្រទេសទាំងពីរស្ថាប័ន និងស្ថាប័ន ជាពិសេសរវាងមន្ត្រីរាជការនិងប្រជាពលរដ្ឋនៃប្រទេសទាំងពីរ”។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងអំណរគុណចំពោះរដ្ឋាភិបាលសិង្ហបុរី ដែលបានជួយគាំទ្រដល់ប្រទេសកម្ពុជា នារយៈពេលកន្លងមក។ សម្ដេចតេជោ ក៏បានយល់ស្របផងដែរ ចំពោះការលើកឡើងរបស់សិង្ហបុរី អំពីទំនាក់ទំនងរវាងប្រទេសទាំងពីរ។

ឆ្លៀតក្នុងឱកាសនោះ សម្តេចតេជោ ក៏បានថ្លែងអំណរគុណផងដែរ ចំពោះលោក ម៉ៃឃែល តាន់ (Michael Tan) ដែលបានប្រឹងប្រែងអស់ពីសមត្ថភាព ក្នុងការពង្រីកពង្រឹង លើកកម្ពស់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ នៅក្នុងបេសកកម្មកាទូតរបស់ឯកឧត្តមកន្លងមកនេះ។

ពាក់ព័ន្ធទៅនឹងបញ្ហាជំងឺកូវីដ-១៩ សម្ដេចតេជោបានមានប្រសាសន៍ថា រាជរដ្ឋាភិបាលកម្ពុជាបានមានយុទ្ធសាស្ត្រប្រយុទ្ធនឹងជំងឺកូវីដ-១៩ តាមរយៈសមរភូមិ៣ ដែលសម​រភូមិ ទី១ គឺធ្វើយ៉ាងណាប្រយុទ្ធទប់ស្កាត់ កុំឲ្យនាំចូលជំងឺនេះមកពីប្រទេសខាងក្រៅ សមរភូមិទី២ ធ្វើយ៉ាងណាគ្រប់គ្រងការរីករាលដាលជំងឺកូវីដ-១៩ ទៅកាន់សហគមន៍  និងសមរភូមិទី៣ ធ្វើយ៉ាងណាព្យាបាលអ្នកជំងឺដែលបានឆ្លងជំងឺកូវីដ-១៩នេះ ឱ្យជាសះស្បើយ៕

បច្ចុប្បន្នភាព ៖ វិស័យដឹកជញ្ជូន និងភស្តុភារកម្ម ចាប់ផ្តើមមានភាពល្អប្រសើរឡើងវិញ

ដោយ ៖ ហ្សូលី

ភ្នំពេញ៖ វិស័យភស្តុភារកម្ម រួមទាំងវិស័យសេវកម្មដឹកជញ្ជូន ហាក់មានសភាពល្អប្រសើរឡើងវិញ បន្ទាប់ពីឆ្លងកាត់ការធ្លាក់ចុះយ៉ាងគំហុក ក្នុងអំឡុងវិបត្តិសេដ្ឋកិច្ចសកលដោយសារមេរោគរាតត្បាត។ នេះបើតាមការឱ្យដឹងពីប្រធានសមាគមភស្តុភារកម្ម។

លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជាបានថ្លែងប្រាប់សារព័ត៌មានក្នុងស្រុកថា ស្ថិតនៅក្នុង ការរីករាលដាលដោយសារជំងឺកូវីដ១៩នេះ ការដឹកជញ្ជូនតាមផ្លូវអាកាសបានធ្លាក់ចុះស្ទើរស្មើសូន្យហើយការ ដឹកជញ្ជូនតាមផ្លូវទឹក និងផ្លូវគោកក៏បានរងផលប៉ះពាល់យ៉ាងធ្ងន់ធ្ងរផងដែរ ។

លោកឧកញ៉ាបន្តថា ដោយមានការបន្ទូរបន្ថយ និងរៀបចំឱ្យមានការដឹកជញ្ជូនឆ្លងកាត់ឡើងវិញរបស់រាជរដ្ឋាភិបាលកម្ពុជា ការដឹកជញ្ជូនតាមផ្លូវគោកបានងើបឡើងក្នុងរង្វង់ ១០% ទៅ ១៥%។ ការដឹកជញ្ជូននេះ នឹងមាន កំណើនកើនឡើងវិញជាបន្តបន្ទាប់ទៀត បន្ទាប់ពីស្ថានភាពជំងឺកូវីដ–១៩ បានធូរស្រាល និងត្រឡប់មកវិញជា ប្រក្រតីផងដែរ។

វិស័យសេវាកម្មដឹកជញ្ជូនទំនិញតាមផ្លូវគោកនៅប្រទេសកម្ពុជា ដែលបានធ្លាក់ចុះ ដោយសារការរឹតបន្តឹង ការឆ្លងកាត់ព្រំដែន ដើម្បីទប់ទល់នឹងការរាលដាលជំងឺកូវីដ១៩ បានចាប់ផ្តើមងើបឡើងវិញក្នុងរង្វង់ ១០% ទៅ ១៥% នៃការនាំចូលវត្ថុធាតុដើម។

គោលដៅក៏ដើម្បីបម្រើឲ្យវិស័យរោងចក្រ សហគ្រាស និងនាំចេញផលិតផលពីប្រទេសកម្ពុជាទៅកាន់ទីផ្សារអន្តរជាតិ ។

កាលពីពេលថ្មីៗនេះ ក្រុមប្រឹក្សាជាតិភស្តុភារកម្មបានរៀបចំគម្រោងស្តីពីការធ្វើឱ្យប្រសើរឡើងនូវច្រកទ្វារព្រំដែនអន្តរជាតិបាវិត-ម៉ុក បៃ ប៉ោយប៉ែត- អារញ្ញ ប្រាថេត ស្ទឹងបត់-បានណងអៀន និងព្រៃវល្លិ៍-ប៊ិញហៀប ដើម្បីបម្រើដល់ការផ្លាស់ប្តូរទំនិញ និងនាំចេញ-នាំចូលឲ្យបានទាន់ពេលវេលា៕

ផ្សារហ៊ុនបានហក់ឡើង បន្ទាប់ពីមានការរំពឹងថា Joe Biden នឹងជាប់ឆ្នោតជាប្រធានាធិបតីទី៤៦ របស់អាមេរិក

ដោយ៖ ប៊ី
អន្តរជាតិ៖ ផ្សារហ៊ុនអាមេរិកបានកើនឡើងខ្ពស់នៅថ្ងៃចន្ទ មួយថ្ងៃមុនថ្ងៃបោះឆ្នោតបន្ទាប់ ខណៈWall Street រំពឹងថាលោក Joe Biden នឹងឈ្នះតំណែងប្រធានាធិបតីជាប្រធានាធិបតីទី៤៦ របស់អាមេរិក ហើយបក្សប្រជាធិបតេយ្យនឹងដណ្តើមយកព្រឹទ្ធសភា និងគ្រប់គ្រងសភា។

 

ភាគហ៊ុនបានកើនឡើងខ្ពស់ មុនពេលមានការប្រែប្រួលមួយចំនួន។
ភាគហ៊ុនរបស់ក្រុមហ៊ុន Dow (INDU) បានបិទការជួញដូរដោយមានកំណើន ១,៦% ឬ ៤២៣ ពិន្ទុ ដោយទទួលបានច្រើនជាង ៥០០ ពិន្ទុ។ ភាគហ៊ុនក្រុមហ៊ុន S&P 500 បានកើនឡើង ១,២%។

ក្រុមហ៊ុន Nasdaq Composite (COMP) មានកំណើនភាគហ៊ុនក្នុងថ្ងៃជួញដូរ មុនមុនពេលប្តូរទៅបន្ទាត់ពណ៌ក្រហម ខណៈសន្ទស្សន៍ភាគហ៊ុនកើនឡើង ០,៤%។.

ក្រុមហ៊ុនទាំងបី ទទួលបានការរួចផុតពីការខាតបង់មួយចំនួនពីសប្តាហ៍ មុននៅក្រុមហ៊ុនទាំង បានកត់ត្រាសប្តាហ៍ដ៏អាក្រក់បំផុតចាប់តាំងពីខែមីនា។

ទោះបីភាគហ៊ុនជាធម្មតា មានទំនោរទៅកាន់គោលនយោបាយរបស់បក្សសាធារណរដ្ឋ អ្នកវិនិយោគចង់បានការជំរុញសកម្មភាពសារពើពន្ធបន្ថែមទៀត ដែលនឹងជំរុញកំណើនសេដ្ឋកិច្ចឡើងវិញជាថ្មីម្តងទៀត។

វិនិយោគិនជឿជាក់ថា ការឈ្នះឆ្នោតរបស់លោក Biden ក៏ទំនងជាមានន័យថាមានព័ត៌មានតិច និងហានិភ័យទាបសម្រាប់ភាគហ៊ុននាពេលខាងមុខ។

លោក Andy Laperriere និងលោក Don Schneider នៅឯក្រុមហ៊ុន Cornerstone Macro បាននិយាយស្រដៀងគ្នាថា “ប្រសិនបើការស្ទង់មតិពិតជាត្រឹមត្រូវ លោក Joe Biden នឹងឈ្នះការបោះឆ្នោតជាក់ជាមិនខាន ហើយយើងនឹងដឹងលទ្ធផល នៅមុនពាក់កណ្តាលអធ្រាត្រថ្ងៃស្អែក”។

ពួកគេបានបន្ថែមថា ទោះបីការបោះឆ្នោតមិនត្រឹមត្រូវក៏ដោយ ភស្តុតាងនៅតែចង្អុលទៅរកជ័យជម្នះរបស់ Biden ខណៈទស្សទាយ ព្យាករថា លោក Biden ឈ្នះ ៦៦%៕
លោក Andrew Hollenhorst សេដ្ឋវិទូនៅក្រុមហ៊ុន Citi មានប្រសាសន៍ថា “យើងបានសង្កត់ធ្ងន់ថា លទ្ធផលព្រឹទ្ធសភាមានសារសំខាន់សម្រាប់គន្លងនៃគោលនយោបាយសារពើពន្ធ”។

លោក Hollenhorst មានប្រសាសន៍ថា “នៅក្រោមសេណារីយ៉ូនៃការបោះឆ្នោតណាមួយ យើងរំពឹងថានឹងមានកញ្ចប់ថវិកាចំនួន ១,៥ ទ្រីលានដុល្លារ ដែលអាចនឹងកើតមាននៅពេលឆាប់ៗខាងមុខនេះ”៕ CNN

ខណ្ឌចំការមន នៅតែជាតំបន់ដែលមានភាពមមាញឹកក្នុងការអភិវឌ្ឍន៍វិស័យអចលនទ្រព្យ

ដោយ ៖ រ៉ាណេត

ភ្នំពេញ ៖ នៅក្នុងចំណោមខណ្ឌទាំង១៤ នៃរាជធានីភ្នំពេញ ខណ្ឌចំការមន ត្រូវបានអ្នកជំនាញនៅក្នុងវិស័យអចលនទ្រព្យអះអាងថានៅតែជាតំបន់ដែលមានភាពទាក់ទាញការវិនិយោគ និងអភិវឌ្ឍន៍វិស័យសំណង់យ៉ាងមមាញឹកនៅក្នុងឆ្នាំ២០២០នេះ។

នាយិកាក្រុមហ៊ុន AMATAK Property Service លោកស្រី តាំង ហួរ បានមានប្រសាសន៍នៅព្រឹកទី៣ ខែវិច្ឆិកា ឆ្នាំ២០២០នេះថា នៅក្នុងចំណោមខណ្ឌទាំង១៤ នៃរាជធានីភ្នំពេញនេះ ខណ្ឌចំការមន នៅតែជាតំបន់ដែលមានសក្ដានុពល និងភាពទាក់ទាញខ្លាំងក្នុងការអភិវឌ្ឍវិស័យសំណង់ និងអចលនទ្រព្យ។

លោកស្រីបានបញ្ជាក់ថា “កត្តាជាច្រើនដែលធ្វើឱ្យខណ្ឌមួយនេះ នៅតែមានភាពទាក់ទាញខ្លាំង ដោយសារតែក្រៅពីជាតំបន់នៅកណ្តាលក្រុង ដែលជាមជ្ឈមណ្ឌលពាណិជ្ជកម្មយ៉ាងមមាញឹក ថែមទាំងមានហេដ្ឋារចនាសម្ព័ន្ធច្រើនមិនចាញ់តំបន់បឹងកេងកងនោះទេ ហើយអ្វីដែលសំខាន់គឺកត្តាតម្លៃនៅធូថ្លៃ បើប្រៀបធៀបទៅនឹងតំបន់បឹងកេង”។ លោកស្រីបន្តថា “គម្រោងអភិវឌ្ឍន៍នៅក្នុងខណ្ឌមួយនេះភាគច្រើនជាប្រភេទអគារសណ្ឋាគារ អគារខុនដូ អាផាតមិន និងអគារពាណិជ្ជកម្មបម្រើដល់វិស័យការិយាល័យផងដែរ”។

លោក សៅ សាខុំ អនុប្រធានក្រុមប្រឹក្សាភិបាលក្រុមហ៊ុនអចលនទ្រព្យ Cambodian Estate Alliance (CEA) Co.,Ltd បានមានប្រសាសន៍ថា នៅក្នុងខណ្ឌនេះមានភាពទាក់ទាញខ្លាំងមិនចាញ់បឹងកេងកងនោះទេ ហើយបើចំពោះអ្នកវិនិយោគក្នុងវិស័យអចលនទ្រព្យនៅពេលនេះវិញគឺភាគច្រើនបាញ់ឆ្ពោះទៅតំបន់នេះ ដោយសារតែកត្តាសំខាន់ពាក់ព័ន្ធទៅនឹងតម្លៃដីនៅទាបជាងខណ្ឌបឹងកេងកង និងខណ្ឌដូនពេញ ដែលជាការផ្តល់ឱកាសចំណេញដល់ការវិនិយោគ។

លោកបញ្ជាក់ថា “នៅពេលដែលតម្លៃដីនៅធូរថ្លៃ ងាយស្រួលដល់ការអភិវឌ្ឍន៍ ហើយការដាក់លក់នៅលើទីផ្សារក៏ក្នុងតម្លៃសមរម្យ ដែលមានតម្រូវការខ្ពស់។ បច្ចុប្បន្នគម្រោងដែលកំពុងអភិវឌ្ឍន៍ធំរួមមានគម្រោងអគារខុនដូ អាផាតមិន និងអគាសម្រាប់ជួយដល់វិស័យការិយាល័ ឬហៅថា Office space ដែលទីផ្សារកំពុងចាប់ផ្តើមមានតម្រូវការជាបណ្តើរៗ”៕

លំនៅដ្ឋានជិត៣០០០ខ្នងនៅស្រុកបន្ទាយស្រី ខេត្តសៀមរាប ត្រូវបានបំពាក់ដោយអំពូលសូឡា

ដោយ ៖ រ៉ាណេត
សៀមរាប ៖ រហូតមកដល់ពេលនេះ ក្រោមយុទ្ធនាការផ្ទះ១ អំពូល១ របស់អភិបាលស្រុកបន្ទាយស្រី អំពូលសូឡាជិត៣០០០អំពូលត្រូវបានបំពាក់ ហើយអំពូលទាំងអស់នេះបានមកពីការចូលរួមឧបត្ថម្ភ និងថវិការៃអង្គាសពីសប្បុរសជនទាំងស្រុង។

លោក ឃឹម ហ្វីណង់ អភិបាលស្រុកបន្ទាយស្រី ខេត្តសៀមរាប បានឱ្យដឹងតាមរយៈបណ្តាញទំនាក់ទំនងអេឡិចត្រនិកនៅព្រឹកថ្ងៃទី៣ ខែវិច្ឆិកា ឆ្នាំ២០២០នេះថា មកដល់ពេលនេះ យុទ្ធនាការផ្ទះ១ អំពូល១ បានឈានដល់ទី១១ហើយ ខណៈដែលអំពូលសូឡាត្រូវបានប្រើអស់ជិត៣០០០ ទៅលើលំនៅដ្ឋានជិត៣០០០ខ្នងអំពូលរួចទៅហើយនោះ។

លោកបានបញ្ជាក់ថា “ភូមិទី១១នៃយុទ្ធនាការផ្ទះ១អំពូល១ ពិតមែនតែមិនភ្លឺស្មើនឹងភ្លើងបំភ្លឺសាធារណៈ តែសម្រាប់ទីជនបទដូចជាភូមិអូរទទឹងនេះ ពន្លឺតូចៗដែលលេចចេញដោយស្វ័យប្រវត្តិនៅតាមមុខផ្ទះនីមួយៗនៅរៀងរាល់ក្រោយពេលព្រះអាទិត្យអស្តង្គត បានប្រែក្លាយទីដែលធ្លាប់តែងងឹតសូន្យឈឹងនាពេលរាត្រី ឱ្យទៅជាភូមិដ្ឋានមួយដែលមានពន្លឺពេញមួយយប់ទល់ភ្លឺបាន”។

លោកបន្តថា “ប្រយោជន៍សំខាន់នៃពន្លឺទាំងនេះ មិនបានផ្តោតទៅលើសោភ័ណភាពនោះទេ បើទោះជាវាពិតជាបានបង្កើតភាពទាក់ទាញថ្មីក៏ដោយ។ ភាពប្រសើរឡើងនៃសុវត្ថិភាពនៅក្នុងភូមិ និងការកាត់បន្ថយគ្រោះថ្នាក់ចរាចរណ៍នាពេលយប់ ទើបជាគោលដៅពិតប្រាកដនៃយុទ្ធនាការនេះ។ អ្នកភូមិមុនៗធ្លាប់បានប្រៀបធៀបប្រាប់ខ្ញុំពីបទពិសោធន៍មុន និងក្រោយពេលមានយុទ្ធនាការផ្ទះ១អំពូល១ថា ឥឡូវនេះ ដើរក្នុងភូមិ ឆ្កែមិនសូវព្រុស លែងមានចោរលួចមាន់លួចទា ហើយក្មេងៗតូចៗដើរមកពីសាលានៅពេលយប់ក៏មិនសូវពិបាកដូចពីមុនដែរ ព្រោះទៅទីណាក៏ភ្លឺគ្រប់ផ្ទះ”។

ល្បឿននៃការអនុវត្តយុទ្ធនាការនេះយឺតជាងផែនការគ្រោងទុក ដោយហេតុតែរដ្ឋបាលស្រុកបានលុបចោលគម្រោងរៀបចំបុណ្យផ្កាទ្រង់ទ្រាយធំមួយដោយសារស្ថានភាពនៃកូវីដ១៩ និងជៀសវាងការរៃអង្គាសថវិកាក្នុងកាលៈទេសៈមិនអំណោយផលនៃការមានផលប៉ះពាល់ខាងផ្នែកសេដ្ឋកិច្ច។ ទោះជាយ៉ាងណាក៏ដោយ រដ្ឋបាលស្រុកក៏នៅបន្តទទួលបានការចូលរួមឧបត្ថម្ភដោយស្ម័គ្រចិត្តជាបន្តបន្ទាប់ ដែលអនុញ្ញាតឱ្យគម្រោងនេះនៅតែអាចបន្តនិរន្តភាពរបស់ខ្លួនជាប់ជានិច្ច។

ជួសមុខឱ្យប្រជាពលរដ្ឋទាំង៣០០០គ្រួសារ ដែលទទួលបានផលប្រយោជន៍ដោយផ្ទាល់ពីគម្រោងនេះ ខ្ញុំសូមថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ដែលបានចូលរួមយ៉ាងមានអត្ថន័យក្នុងការជួយផ្លាស់ប្តូរមុខមាត់ និងជីវភាពរបស់ប្រជាពលរដ្ឋនៅតាមជនបទនៃស្រុកបន្ទាយស្រី។ “សុខចិត្តយឺតបន្តិចតែមិនបោះបង់” ហើយក្នុងនាមអភិបាលស្រុក ខ្ញុំប្តេជ្ញានឹងបន្តខិតខំប្រឹងប្រែងរហូតដល់គ្រប់ផ្ទះទាំងអស់នៅក្នុងស្រុកបន្ទាយស្រីត្រូវបានបំពាក់អំពូលសូឡាជូន និងយុទ្ធនាការនេះត្រូវបានបញ្ចប់ទាំងស្រុង៕