ចំណេះដឹង៖ ប្រសិនបើ​ក្បាលដី​ជាប់​បន្ទុក​នៅ​ធនាគារ​តើ​ការ​បង្រួម​ក្បាលដី និង​បំបែក​ក្បាលដី​អាចធ្វើ​បានដែរ​ឬទេ?

ដោយ​វុត្ថា

ភ្នំពេញៈ ដើម្បី​ទទួលបាន​ថវិកា​យកមកប្រើ​ប្រាស់ ក្នុងករណី​ចាំបាច់​ណាមួយ ប្រជាពលរដ្ឋ តែងតែ​យក​ដី​ដែលជា​កម្មសិទ្ធិ​របស់ខ្លួន យកទៅដាក់​បញ្ចាំ​នៅ​ធនាគារ។ ក្នុងករណី ដែលមាន​ក្បាលដី​របស់គាត់​ជាប់​បន្ទុក​នៅ​ធនាគារ តើ​ការ​បង្រួម​ក្បាលដី និង​បំបែក​ក្បាលដី​អាចធ្វើ​បានដែរ​ឬទេ?។

ចម្លើយ​ទី១. ការចុះបញ្ជី​បង្រួម ឬ​បំបែក​ក្បាលដី ដែល​កំពុង​ជាប់​បន្ទុក អាច​ធ្វើបាន​លុះត្រាតែ ទី១ បំពេញបាន​នូវ លក្ខខណ្ឌ​ជា​ក្បាលដី​តែមួយ ដូច​មានចែង​ក្នុង​មាត្រា២២៧ នៃ​ច្បាប់​ភូមិបាល២០០១ (ករណី​បង្រួម​ក្បាលដី)។ ទី២ មានការ​យល់ព្រម​ពី​ម្ចាស់​សិទ្ធិ​ប្រាតិភោគ (ធនាគារ​ម្ចាស់បំណុល) ឱ្យ​បង្រួម​ឬ​បំបែក​ក្បាលដី កំពុង​ជាប់​បន្ទុក​នោះ។

ទី៣ ភាគី​ទាំងអស់​ដែលមាន​ផលប្រយោជន៍​ពាក់ព័ន្ធ ត្រូវ​ព្រមព្រៀងគ្នា​អំពី​លំដាប់​នៃ​ការចុះបញ្ជី ជាអាទិ៍ នៅពេល​ផ្ទេរ ការចុះបញ្ជី​សិទ្ធិ​ប្រាតិភោគ (ផ្ទេរ​បន្ទុក) ពី​ក្បាលដី​ចាស់ផ្សេងៗគ្នា ទៅ​ប្រមូលផ្តុំ​នៅលើ​ក្បាលដី​ថ្មី​តែមួយ (ករណី​បង្រួម​ក្បាលដី) ឬ​ពី​ក្បាលដី​ចាស់​តែមួយ ទៅ​ពង្រាយ​លើ​ក្បាលដី​ថ្មី​ជាច្រើន (ករណី​បំបែក​ក្បាលដី)។

សំណួរ​ទី២.  ប្រសិន​ជាការ​បង្រួម និង​បំបែក​ក្បាលដី ក្នុងករណី​ខាងលើ​អាចធ្វើ​ទៅបាន តើ​ត្រូវអនុវត្ត​នីតិវិធី​បែបណា?

ចម្លើយ​ទី២. ចំពោះ​នីតិវិធី​នៃ​ការចុះបញ្ជី​បង្រួម ឬ​បំបែក​ក្បាលដី ត្រូវអនុវត្ត​ទៅតាម​គោលការណ៍​ណែនាំ​ជា​ធរមាន (ដូច​មាន​ថត​ចម្លងជូន​ភ្ជាប់​មកជា​មួយ) ហើយ​នៅពេល​ចុះបញ្ជី​បង្រួម ឬ​បំបែក​ក្បាលដី​រួច ត្រូវ​ផ្ទេរ​ការចុះបញ្ជី​សិទ្ធិ​ប្រាតិភោគ (ផ្ទេរ​បន្ទុក) ពី​ក្បាលដី​ចាស់​ទៅ​ក្បាលដី​ថ្មី ទៅតាម​ការព្រមព្រៀងរ​បស់​ភាគី ដែលមាន​ប្រយោជន៍​ពាក់ព័ន្ធ៕

ប្រជាជន​ខ្មែរ​ចាប់ផ្តើម​ប្ដូរ​និន្នាកា​ពី​ការទិញ​ដីឡូត៍ មក​ទិញ​ខុន​ដូ​ដោយ​ការបង់​រំលស់

ដោយៈ រ៉ា​ណេ​ត

ភ្នំពេញៈ ដោយសារតែ​សម័យកាល​កាន់តែ​រីកចម្រើន និង​មានការ​អភិវឌ្ឍ​កាន់តែ​ល្អប្រសើរ ដែលនាំឱ្យ​មានការ​ផ្លាស់​ផ្តូ​រ​នៃ​ការគិត និង​តម្រូវការ​ជាក់ស្ដែង​នៃ​ការរស់នៅ ប្រជាជន​ខ្មែរ​មួយចំនួន​នឹង​ប្ដូរ​និន្នាការ ពី​ការទិញ​ដីឡូត៍​ដោយ​ការបង់​រំ​លោះ មក​ទិញ​ខុន​ដូ​ដោយ​ការបង់​រំ​លោះ​វិញ ជាមួយនឹង​ការ​សម្លឹង​ឃើញ​ពី​ឱកាស ទទួលបាន​ផលចំណេញ​ផងដែរ។ នេះ​បើតាម​ការលើកឡើង​រប​ស់​ប្រធាន​សមាគម​អចលនទ្រព្យ​សកល។

ប្រធាន​សមាគម​អចលនទ្រព្យ​សកល លោក​សំ សុខ​នឿន បាន​មានប្រសាសន៍​នៅ​ល្ងាច​ថ្ងៃ២ ខែវិច្ឆិកា ឆ្នាំ២០២០កន្លងមក​ថា ក្នុងពេល៣-៥ ឆ្នាំ​ខាង​មុននេះ ប្រជាជន​ខ្មែរ នឹងមាន​និន្នាកា​ប្រែប្រួល​ពី​ការទិញ​ដីឡូត៍ មក​ទិញ​ខុន​ដូច្រើនឡើងៗ ហើយ​អ្នក​អភិវឌ្ឍន៍​ដីឡូត៍​មួយចំនួន ក៏​នឹង​អាច​ងាក​មក​ចាប់អារម្មណ៍ លើ​ការអភិវឌ្ឍន៍​គម្រោង​ខុន​ដូ តម្លៃ​សមរម្យ ក្នុង​កម្រិត​ណាមួយ​ដើម្បី​ស្របតាម​តម្រូវការ​ទីផ្សារ​ជាក់ស្ដែង។

លោក​បាន​ពន្យល់ថា “ខ្ញុំ​សម្លឹង​មើលឃើញ​ទីផ្សារ​ខុន​ដូ នាពេល​អនាគត​បែបនេះ ហើយ​វា​ជាការ​ពិត​ដែល​ខ្ញុំ​ត្រូវតែ​និយាយ ការនិយាយ​បែបនេះ​អាចឱ្យ​បងប្អូន ដែលជា​អ្នកទិញ​ដីឡូត៍​នៅ​ឆ្ងាយ​ពី​ទីក្រុង​ពេក ឬ​អ្នក​អភិវឌ្ឍន៍​គម្រោង​ដីឡូត៍ អាចមាន​ការមិន​ពេញ​ចិ ត្ត” ។ លោក​បន្ថែមថា “ប៉ុន្តែ​វា​ជា​រឿង​ពិត ដែល​និន្នាកា​ប្រែប្រួល​នៃ​តម្រូវ​ខុន​ដូ​នឹង​កើនឡើង​ដោយសារតែ​ហេតុផល​ចាំបាច់​មួយចំនួន” ។

លោក​បញ្ជាក់ថា មាន​កត្តា​ជាច្រើន ដែល​ជំរុញ​ឱ្យ​ប្រជាជន​ខ្មែរ​ដែល​រស់នៅក្នុង និង​ជាយក្រុង​ងាក​មក​ទិញ​ខុន​ដូ​ដោយសារតែ ទី១កំណើនប្រជាជន​ក្នុង​ក្រុង​កាន់តែច្រើនឡើងៗ ដែល​បណ្តាល​ឲ្យ​ចរាចរ​ក្នុង​ក្រុង​កាន់តែ​មហា​ញឹក ស្ទះ​ចង្អៀត ពិបាក​ក្នុងការ​ធ្វើដំណើរ​ពី​កន្លែង​មួយ ទៅ​កន្លែង​មួយ ដែល​ធ្វើ​ឲ្យ​ចំណាយ​ពេលវេលា​យូរ​នៃ​ការធ្វើដំណើរ។ ទី២ ការអភិវឌ្ឍ​ដីឡូត៍ និង​ការអភិវឌ្ឍន​បុរី​កាន់តែ​ឆ្ងាយ ពី​ទីក្រុង​លើសពី៤០គីឡូម៉ែត្រ ដែល​ធ្វើឱ្យ​អ្នកទិញ សម្រាប់​សាងសង់​ផ្ទះ​ស្នាក់​មាន​ផល​ពិបាក ដែល​ក្រៅពី​ចំណាយ​ថវិកា​សាងសង់​លំនៅដ្ឋាន ថែមទាំង​ត្រូវ​ចំណាយ​ពេលវេលា​ច្រើន ក្នុងការ​ធ្វើដំណើ​ចេញចូល​ក្រុង​ដើម្បី​បំពេញការងារ និង​ប្រកប​អាជីវកម្ម​ប្រចាំថ្ងៃ។

បច្ចុប្បន្ន សម្រាប់​ទីផ្សារ និង​តម្រូវ​ការទិញ​ខុន​ដូ​តម្លៃ​សមរម្យ ក្នុង​រង្វង់​ចាប់ពី​ជាង៥ម៉ឺន​ដុល្លារ​ឡើងទៅ មាន​កើនឡើង​បើ​ធៀ​ម​ទៅនឹង​ឆ្នាំ​កន្លងទៅ ដោយសារ​អ្នក​អភិវឌ្ឍ ក៏ដូចជា​ក្រុមហ៊ុន​ភ្នាក់ងារ​ទទួល​លក់ ផ្តល់នូវ​លក្ខខណ្ឌ​ងាយស្រួល​ក្នុង​ការទិញ និង​មាន​កិច្ចសហការ​ពី​ធនាគា ដែល​ផ្តល់ជូន​នៃ​ការបង់ប្រាក់​រយៈពេល​វែង ឬ​កម្ចី​ពី​ធនាគា​ដែលមាន​ការប្រាក់​ទាប និង​អនុគ្រោះ​ដល់​អតិថិជន ក្នុងការ​បង់ប្រាក់​រំលស់​ប្រចាំខែ ក្នុង​កម្រិត​ទាប និង​សមរម្យ​ប្រហាក់ប្រហែល​ទៅនឹង​ការបង់​រំ​លោះ​ដី​ឡូ​តិ៍​ផងដែរ៕

រដ្ឋបាលខេត្ត​កែប​គ្រោង​ពង្រីក​តំបន់ឆ្នេរ និង​តូប​លក់ដូរ​របស់​អាជីវ​ករ​នៅ​ឆ្នាំ​ក្រោយនេះ

ដោយ​ ជីវី

ភ្នំពេញៈ អាជ្ញារ​ខេត្ត​កែប គ្រោង​នឹង​ពង្រីក​តំបន់ឆ្នេរ និង​ទីតាំង​លកដូរ​របស់​អាជីវក​រ​នៅក្នុង​ឆ្នាំ២០២១ខាងមុខនេះ ខណៈ​ទាំង​តំបន់ឆ្នេរ និង​តូប​របស់​ប្រជាពលរដ្ឋ​មាន​សភាព​តូច មិន​ឆ្លើយតប​ទៅនឹង​កំណើន​ភ្ញៀវទេសចរ​ជាតិ និង​អន្តរជាតិ​មានការ​កើនឡើង​ពីមួយថ្ងៃ​ទៅមួយថ្ងៃ។

លោក​សោម ពិសិដ្ឋ អភិបាលខេត្ត​កែប​បានឱ្យដឹង​នៅ​ថ្ងៃទី២ ខែវិច្ឆិកា​នេះ​ថា រដ្ឋបាលខេត្ត​មាន​ផែនការ​ពង្រីក​តំបន់ឆ្នេរ  និង​ទីតាំង​សម្រាប់​លក់ដូរ​របស់​ព​ល​រដ្ឋ ឱ្យមាន​ទំហំ​ជាង​បច្ចុប្បន្ននេះ សម្រាប់​ត្រៀម​ទទួលភ្ញៀវ​ទេសចរ​ជាតិ និង​អន្តរជាតិ​ឱ្យបាន​កាន់តែច្រើន​ថែមទៀត។

លោក​ថ្លែងថា “យើង​កំពុងមាន​គម្រោង​រៀបចំ​ទីតាំង និង​ជម្រើស ព្រោះ​ខ្ញុំ​ចូលចិត្ត​ធ្វើ​អ្វីមួយ​ដើម្បី​ឱ្យមាន​ជម្រើស បើ​មាន​ជម្រើស​ហើយ​មិន​ធ្វើតាម វា​គឺជា​រឿង​មួយ​ផ្សេង     ប៉ុន្តែ​បច្ចុប្បន្ន​ខេត្ត​គ្មាន​ទីតាំង​អោយ​ពលរដ្ឋ​ដាក់​លក់ដូរ​នោះទេ” ។ លោ​កន​បន្ថែមថា “យើង​កំពុងតែ​បង្កើត​នូវ​គម្រោង​ថ្មី ដើម្បី​ធ្វើ​យ៉ាងម៉ិច​នៅក្នុង​ឆ្នាំ២០២១ គឺ​ពង្រីក​នូវ​គោលដៅ​តំបន់ឆ្នេរ និង​ពង្រីក​តំបន់​លក់ដូរ​របស់​អា​ជីវ​ករ​ផងដែរ” ។

លោក​បញ្ជាក់​ទៀ​ថា រដ្ឋបាលខេត្ត ក៏​កំពុង​រុញ​ការកែលម្អ​សោភ័ណភាព នៅតាម​កន្លែង​ដែល​លក់ដូ​តាំងពី​ទសវត្សរ៍៨០  ដែល​កាលពីមុន​វា​សមស្រប ដែល​អាចឱ្យ​មនុស្ស​អង្គុយ​នៅតាម​ការ៉ូឡា ក្រោម​ដើមឈើ និង​កន្លែង​ឆ្នេរ គឺ​សមស្រប ប៉ុន្តែ​បច្ចុប្បន្ននេះ វា​មិន​សមស្រប​នោះទេ ដោយសារ​កត្តា​សោភណភាព និង​ជម្រើស យើង​ត្រូវតែ​គិតគូ​រៀបចំ​ធ្វើ​វា។

លោក​បញ្ជាក់ទៀតថា “ក្រៅពីនេះ​ក៏​យើង​មាន​គម្រោង​រៀបចំ ហេដ្ឋារចនាសម្ព័ន្ធ​ផ្លូវថ្នល់​ឱ្យបាន​ស្អាត នៅក្នុង​តំបន់ឆ្នេរ​នេះ​ឲ្យ​បាន២០០០ម៉ែត្រ ខណៈ​ខេត្ត​មាន​មាន​ឆ្នេ​ប្រវែង​ចំនួន ២៧គីឡូម៉ែត្រ ហើយ​មាន​កន្លែង​លេង​ប្រមាណ៥០០ ដោយ​ទៅមុខទៀត នឹង​ពង្រីក២០០ម៉ែត្រ ដោយ​ត្រូវ​ចាក់​ខ្សាច់​បន្ថែមទៀត។

យោងតាម​របាយការណ៍​របស់​រដ្ឋបាលខេត្ត​បង្ហាញថា នៅក្នុង​ឱកាស​ឈប់សំរាក​ប៉ុន្មាន​ថ្ងៃ​កន្លងមកនេះ មាន​ភ្ញៀវទេសចរ​ជាតិ និង​អន្តរជាតិ​ជិត៤ម៉ឺន​នាក់ ទៅ​ដើរលេង​កម្សាន្ត​នៅក្នុង​ខេត្ត​កែប៕

ទីផ្សារ​ខុន​ដូ​ក្នុង​ខេត្តសៀមរាប​កំពុងផ្តល់​ឱកាស​ដល់​អ្ន​ក​វិនិយោគ

ដោយៈ រ៉ា​ណេ​ត

ភ្នំពេញៈ ទីផ្សារ​ខុន​ដូ​នៅក្នុង​ខេត្តសៀមរាប នៅពេល​បច្ចុប្បន្ននេះ ត្រូវបាន​គេ​មើលឃើញថា​នៅមានកម្រិត​នៅឡើយ បើ​ប្រៀបធៀប​ទៅនឹង​ខេត្ត​ព្រះសីហនុ ហើយ​វា​ក៏​នៅតែ​ជា​ឱកាសល្អ​សម្រាប់​អ្នកវិនិយោគ និង​អភិវឌ្ឍន៍​នៅក្នុង​វិស័យ​មួយ​នេះ។

អ្នកជំនាញ និង​ជា​ប្រតិបត្តិ​ករ​ជាន់ខ្ពស់​ក្នុង​ទីផ្សារ​ខុន​ដូ លោក ខន គង្គារ នាយក​ក្រុមហ៊ុន​ភ្នាក់ងារ​អចលនទ្រព្យ​អន្តរជាតិ ERA Cambodia បាន​មានប្រសាសន៍​នៅ​ព្រឹក​ថ្ងៃទី២ ខែវិច្ឆិកា ឆ្នាំ២០២០កន្លងមក​ថា សៀមរាប គឺជា​ខេត្ត​គោលដៅ​ទេសចរណ៍ និង​ជា​ប៉ូល​សេដ្ឋកិច្ច​ប្រចាំ​ប្រទេស ដែលមាន​សក្ដានុពល​ខ្ពស់​ក្នុងការ​វិនិយោគ និង​អភិវឌ្ឍន៍​វិស័យ​អចលនទ្រព្យ។

លោក​បាន​បញ្ជាក់ថា “បច្ចុប្បន្ននេះ​ការ​ការវិនិយោគ និង​អភិវឌ្ឍន៍​ក្នុង​វិស័យ​សំណង់​នានា ភាគច្រើន​គឺមាន​តែ​បុរី​លំនៅដ្ឋាន សំណង់​សណ្ឋាគារ អា​ផាត​មិន ប៉ុន្តែ​ចំពោះ​អគារ​ខុន​ដូ​គឺ​នៅមានកម្រិត​នៅឡើយ” ។

លោក​ខន គង្គា​បាន​បន្តថា បើ​ប្រៀបធៀប​ទៅនឹង​ខេត្ត​ដទៃ ដែលមាន​សក្ដានុពល​ក្នុង​វិស័យ​អចលនទ្រព្យ ដូចជា​ខេត្ត​ព្រះសីហនុ គឺមាន​ភាពខុសគ្នា​ឆ្ងាយ ព្រោះ​នៅក្នុង​ខេត្តសៀមរាប​មាន​គម្រោង​អភិវឌ្ឍន៍​សំណង់​ខុន​ដូ ត្រឹមតែ២គម្រោង​តែប៉ុណ្ណោះ។ ដោយសារតែ ខេត្តសៀមរាប​ជា​គោលដៅ​ទេសចរណ៍ និង​ជា​ប៉ូល​សេដ្ឋកិច្ច​ប្រចាំ​ប្រទេស​ខណៈដែល​រាជរដ្ឋាភិបាល កំពុងធ្វើការ​វិនិយោគ​ទៅលើ​ហេដ្ឋារចនាសម្ព័ន្ធ តម្លៃ​រាប់លាន​ដុល្លារ​នោះ បន្តិចទៀត​នឹងមាន​កំណើនប្រជាជន​កាន់តែច្រើន ហើយ​វត្តមាន​ជនបរទេស​ក៏​កាន់តែ​កើនឡើង​ផងដែរ ដូច្នេះ​តម្រូវការ​អគារ​ស្នាក់នៅ​គឺ​ត្រូវតែមាន​កំណើន។

លោក​បន្តទៀតថា “ជនបរទេស ដែល​បន្ត​ស្នាក់​នៅក្នុង​ខេត្តសៀមរាប រយៈពេល​យូរ​នាពេល​បច្ចុប្បន្ន គឺ​ជួល​អគារ​លំនៅដ្ឋាន ឬ​ស្នាក់​នៅក្នុង​អា​ផាត​មិនជា​ដើម។ បន្តិចទៀត ជាពិសេស​ក្រោយពេល​បញ្ហា នៃ​វិបត្តិ​ជំងឺ​ត្រូវបាន​ទប់ស្កាត់​ជោគជ័យ កំណើន​ជនបរទេស​នឹង​ចូលមក​កាន់​កម្ពុជា​វិញ ហើយ​ខេត្តសៀមរាប នឹង​ក្លាយជា​គោលដៅ​វិនិយោគ និង​អភិវឌ្ឍន៍​វិស័យ​សំណង់​យ៉ាង​មាន​ប្រជាប្រិយភាព ជាពិសេស​ទីផ្សារ​ខុន​ដូ ដែល​ជនបរទេស​មក​បំពេញ​ការងារ ឬ​រកស៊ី​នៅក្នុង​ខេត្ត​មួយ​នេះ​ក្នុង​រយៈពេល​យូ អាច​ទិញ​ធ្វើជា​កម្មសិទ្ធិ​បាន ដូច្នេះ​ចង់​មិន​ចង់ ទីផ្សារ​មួយ​នេះ​នឹងមាន​កំណើន​ជាមិនខាន។

ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា លោក​ច្រឹ​ក សុខ​នី​ម ធ្លាប់បាន​មានប្រសាសន៍​កាលពីពេលថ្មីៗនេះ​ថា ខេត្តសៀមរាប គឺជា​ខេត្ត​ទេសចរណ៍វប្បធម៌​ដ៏​សំខាន់​បស់​កម្ពុជា ក្រោយពី​មាន​ហេដ្ឋារចនាសម្ព័ន្ធ​ល្អ​ហើយ​នោះ វិស័យ​អចលនទ្រព្យ​បែប​សណ្ឋាគារ ផ្ទះសំណាក់ និង​បឹង​ហ្គា​ឡូ​ជាដើម កាន់តែ​មានការ​រីកចំរើន ដើម្បី​ស្វាគមន៍​ភ្ញៀវ​ទេសចរណ៍​ជាតិ និង​អន្តរជាតិ។

លោក​បញ្ជាក់ថា “បន្ទាប់ពី​មាន​ហេដ្ឋារចនាសម្ព័ន្ធ​ល្អ​ច្រើន ហើយ​មាន​បន្ថែម​ផ្លូវ​ថ្មី ដែល​វិនិយោគ​ដោយ​រាជរដ្ឋាភិបាល វា​នឹង​ជួយ​លើកស្ទួយ​វិស័យ​អចលនទ្រព្យ ជាពិសេស​តម្លៃ​ដីធ្លី​នឹងមាន​ការកើនឡើង ហើយ​គម្រោងថ្មីៗ ក៏​នឹង​កើនឡើង​ផងដែរ”។ លោក​បន្តថា “បច្ចុប្បន្ននេះ តម្លៃ​ដី​នៅតាម​តំបន់​មួយចំនួន នៅក្នុង​ក្រុង​សៀមរាប មានតម្លៃ​ចាប់ពី ១៨០០ ទៅ​ជាង២០០០ ដុល្លារ​អាមេរិក​ក្នុង​មួយ​ម៉ែត្រការ៉េ ហើយ​ក្រោយពេល​មានការ​អភិវឌ្ឍន៍​ច្រើន​តម្លៃ​ទាំងនេះ​នឹង​បន្ត​កើនឡើង​បន្ថែមទៀត” ៕

ឥណ្ឌា​នឹង​វ៉ា​ជប៉ុន​ក្លាយជា​ប្រទេស​មាន​សេដ្ឋកិច្ច​ធំ​លំដាប់​ទី៣លើ​ពិភពលោកនៅ​ឆ្នាំ២០៥០

ដោយ ហ្សូ​លី

អន្តរជាតិៈ សេដ្ឋកិច្ច​ឥណ្ឌា​អាច​នឹង​កើនឡើង​ពី​លំដាប់​ទី៥ មកដល់​លំដាប់​ទី៣ នៅក្នុង​បញ្ជី​នៃ​សេដ្ឋកិច្ច​ធំ​បំផុត​របស់​ពិភពលោក ក្នុង​រយៈពេល៣ទសវត្ស​ខាងមុខនេះ។ នេះ​បើ​យោងតាម​ការស្រាវជ្រាវ ដែល​ត្រូវបាន​ចេញផ្សាយ​នៅក្នុង​ទស្សនា​វ​ដ្តី Lancet ។

ការស្រាវជ្រាវ​ដែល​ត្រូវបាន​ធ្វើឡើង​នៅ​ដើមឆ្នាំ​នេះ ផ្អែកលើ​ការផ្លាស់ប្តូរ​ទំហំ​ប្រជាជន អាយុ​ធ្វើការ​នៅក្នុង​ប្រទេស​ធំ​បំផុត​របស់​ពិភពលោក បន្ទាប់មក​ត្រូវបាន​បកប្រែ​ទៅជា​សេណា​រី​យ៉ូ​សម្រាប់​ផលិតផល​ក្នុងស្រុក​សរុប។

យោងតាម​ការព្យាករណ៍​របស់ Lancet ប្រទេស​ឥណ្ឌា នឹងមាន​ប្រជាជន​ដែលមាន​អាយុ​ធ្វើការ​ច្រើនជាងគេ នៅមុន​ឆ្នាំ២០៣០ ដែល​នឹង​បន្ត​កើន​ឡើងដល់​កម្រិត​ខ្ពស់បំផុត​មុន​ឆ្នាំ២០៥០ ។ ទោះបីជា​មានការ​ធ្លាក់ចុះ​នៅពេល​ក្រោយ​ក៏ដោយ ក៏​ប្រទេស​ឥណ្ឌា​នៅតែមាន​មនុស្សពេញវ័យ ដែលមាន​អាយុ​ធ្វើ​ការងារ​ច្រើនជាង​ប្រទេសណាៗទាំងអស់។

នៅ​ឆ្នាំ២០១៧ ឥណ្ឌា​ជា​ប្រទេស​មាន​សេដ្ឋកិច្ច​ធំ​ទី៧ នៅលើ​ពិភពលោក មុនពេល​ឡើងដល់​ចំណាត់ថ្នាក់​ទី៥ ។ ការផ្លាស់ប្តូរ​ប្រជាសាស្ត្រ នឹង​អនុញ្ញាតឱ្យ​ប្រទេស​អាស៊ី​ខាងត្បូង លេចចេញ​ជា​ប្រទេស​មាន​សេដ្ឋកិច្ច​ធំ​ទី​បួន​នៅ​ឆ្នាំ២០៣០ នៅ​ពីក្រោយ​សហរដ្ឋអាមេរិក ចិន និង​ជប៉ុន។

នៅ​ឆ្នាំ២០៥០ ប្រទេស​ឥណ្ឌា​នឹង​ឈានមុខ​គេ ដល់​ប្រទេស​ជប៉ុន​ដោយ​ដណ្តើមយក​ចំណាត់ថ្នាក់​ទី៣ ហើយនឹង​រក្សា​ជំហរ​នេះ​រហូតដល់​ឆ្នាំ២១០០ យោងតាម​ការព្យាករណ៍។ ការប្រកួតប្រជែង​ដ៏​យូរអង្វែង រវាង​ប្រទេស​មហាអំណាច​សេដ្ឋកិច្ច​ទាំងពីរ គឺ​សហរដ្ឋអាមេរិក និង​ប្រទេស​ចិន​ក៏ត្រូវ​បានកំណត់​ផងដែរ ដែល​ប្រឈមមុខ​នឹង​ការផ្លាស់ប្តូរ​គួរឱ្យ​ចាប់អារម្មណ៍​មួយចំនួន។

ការសិក្សា​បាន​និយាយថា ប្រទេស​ចិន​ត្រូវបាន​គេ​ព្យាករណ៍​ថា នឹង​វ៉ា​អាមេរិក​ក្នុង​ឆ្នាំ ២០៣៥ ។ យ៉ាងណាក៏ដោយ ប្រទេស​ទាំងពីរ​អាច​ផ្លាស់ប្តូរ​មុខតំណែង​ម្តងទៀត នៅ​ឆ្នាំ ២០៩៨ ដោយសារ​ការធ្លាក់ចុះ​នៃ​ចំនួន​ប្រជាជន​ចិន ត្រូវបាន​គេ​កំណត់ថា នឹង​កាត់បន្ថយ​កំណើនសេដ្ឋកិច្ច។

យោងតាម​ទិន្នន័យ​ពី​ទស្សនវិស័យ​សេដ្ឋកិច្ចពិភពលោក នា​ខែតុលា​របស់​មូលនិធិ​រូបិយវត្ថុ​អន្តរជាតិ IMF បានឱ្យដឹងថា ប្រទេស​ឥណ្ឌា បាន​ក្លាយជា​ប្រទេស​មាន​សេដ្ឋកិច្ច​ធំ​ទី៥លើ​ពិភពលោក ដោយ​ផលិតផល​ក្នុងស្រុក​សរុប កាលពី​ឆ្នាំមុន​ឈរ​នៅលើ​ប្រទេស​បារាំង​និង​ចក្រភព​អង់គ្លេស។

កំណើនសេដ្ឋកិច្ច​របស់​ប្រទេស​នេះ ស្ថិតក្នុង​ចំណោម​កម្រិត​ខ្ពស់បំផុត​នៅលើ​ពិភពលោក​ក្នុង​រយៈពេល​មួយ​ទសវត្សរ៍​ចុងក្រោយ​នេះ ហើយ​បាន​ឈានដល់​ចំនួន២,៩៤ទ្រី​លាន​ដុល្លារ​នៅ​ឆ្នាំ ២០១៩ ។ ឥណ្ឌា​មាន​មហិច្ឆតា ដើម្បី​ក្លាយជា​សេដ្ឋកិច្ច៥ទ្រី​លាន​ដុល្លារ​នៅ​ឆ្នាំ២០២៥ ខណៈដែល​កម្រិត​គោលដៅ ដែល​ទាមទារ​ស្ទើរតែ​ទ្វេដង​ទំហំ​ផលិតផល​ក្នុងស្រុក​របស់ខ្លួន ដែល​ដំបូង​ឡើយ​ត្រូវបាន​គេ​ចាត់ទុកថា ជា​បញ្ហា​ប្រឈម​ការ​ផ្ទុះឡើង​នៃ Covid-19 បានធ្វើឱ្យ​កិច្ចការ​ស្ទើរតែ​មិនអាច​ទៅរួច។

សេដ្ឋកិច្ច​របស់​ប្រទេស​នេះ បានទទួល​រង​នូវ​ការធ្លាក់ចុះ​យ៉ាងខ្លាំង ក្នុងអំឡុង​ត្រីមាស​ទី១ ដោយបាន​ធ្លាក់ចុះ២៣,៩ ភាគរយ។  ខណៈពេលដែល​ការបិទទ្វារ​យ៉ាង​តឹងរឹង​ត្រូវបាន​កំណត់ ដើម្បី​ផ្តល់នូវ​ការ​ធូរស្បើយ​ខ្លះ ផលិតផល​ក្នុងស្រុក​សរុប​របស់​ប្រទេស​ឥណ្ឌា​នៅតែ​ត្រូវបាន​គេ​ព្យាករណ៍​ថា នឹង​ធ្លាក់ចុះ​យ៉ាងហោចណាស់១០ភាគរយ៕ DHT News៕

ខុន​ដូ Garden One ផ្តោតលើ​ភាព​បៃតង​កំពុង​ទទួលបាន​ការចាប់​អារម្មណ៍​ដោយ​បង់ប្រាក់​ត្រឹម ៤០០ដុល្លារ​ប៉ុណ្ណោះ​ក្នុង​មួយខែ

ដោយៈ​ម៉ា​ណេ​ត

ភ្នំពេញៈ​ គម្រោង​ខុន​ដូ​ទំនើប Garden One កំពុង​ទទួល​បានការ​ចាប់អារម្មណ៍​យ៉ាងខ្លាំងបំផុត​ពី​សំណាក់​ប្រជាជន​ខ្មែរ ក៏ដូចជា​វិនិយោគិន​បរទេស ខណៈ​គម្រោង​នេះ​នឹង​បញ្ចប់​ការសាងសង់​ទាំងស្រុង​នៅ​ចុងឆ្នាំ២០២១ ។

អំពី​គម្រោង Garden One ស្ថិតនៅក្នុង​សង្កាត់​បឹងកក់២ គម្រោង Garden One មាន​ទីតាំងនៅ​ចន្លោះ​ផ្លូវ៥៧២ និង៥៧៤ ខាងក្រោយ​សាលា​ឥ​ទ្ទ្រ​ទេវី ជា​តំបន់​ទីប្រជុំជន ក្នុង​ខណ្ឌទួលគោក ដែលជា​តំបន់​សម្បូរ​ដោយ​មជ្ឈមណ្ឌល​ពាណិជ្ជកម្ម និង​ជា​តំបន់​មួយ​ក្នុងចំណោម​តំបន់ ដែល​កំពុងមាន​ការរីក​ចម្រើន​យ៉ាងខ្លាំងបំផុត​នៅ​រាជធានី ជាមួយ​វត្ត​មាននៃ​គម្រោង​អភិវឌ្ឍធំៗជាច្រើន ដែល​បាន​កំពុង​រីកដុះដាល​ស្ទើរ​គ្រប់​ទីកន្លែង ដូចជា សំណង់​លំនៅឋាន ផ្សារ​ទំនើប អគារ​ពាណិជ្ជកម្ម និង​គម្រោងផ្សេងៗជាច្រើន​ទៀត។

គម្រោង ខុន​ដូ​ទំនើប Garden One ដែល​បាន​បើក​ការដ្ឋាន​សាងសង់​ជា​ផ្លូវការ​កាលពី​ថ្ងៃទី១៨ ខែ​វិ​ច្ឆ​កា ឆ្នាំ២០១៩ នឹង​នាំមក​នូវ​ការរស់នៅ​ប្លែក និង​បទពិសោធន៍​ថ្មី​ជាមួយ​ការរួមបញ្ចូល​ធម្មជាតិ​ទៅក្នុង​ការរស់នៅ​ប្រចាំថ្ងៃ។

អគារ​ទាំងមូល​របស់​គម្រោង Garden One ត្រូវបាន​រចនា​ឡើង​ដោយ​ភ្ជាប់​ជាមួយ​រុក្ខជាតិ​បៃតង​នៅតាម​មាត់​បង្អួច ទ្វារ និង​រាល​ហាន​ខាងមុខ ដែល​នឹង​ជួយ​បង្កើត​នូវ​បរិយាកាស​ស្រស់ស្រាយ​បែប​ធម្មជាតិ​គ្រប់ពេលវេលា​ទាំងអស់។

កញ្ញា​ឆាយ ថង​ឌី​ប្រធាន​គ្រប់គ្រង​ផ្នែក​អភិវឌ្ឍន៍​ធុរកិច្ច ប្រចាំ​គម្រោង​ខុន​ដូ Garden One បាន​ប្រាប់ថា គម្រោង Garden One មាន​កម្ពស់២៩ជាន់ ហើយ​បច្ចុប្បន្ននេះ​ការសាងសង់​សម្រេចបាន១០ជាន់​ហើយ ដោយ​រំពឹងថា​នឹង​បញ្ចា​ប់​ការសាងសង់​នៅ​ចុងឆ្នាំ២០២១ ។

គម្រោង​មាន​ជាន់​ផ្ទាល់​ដី១ជាន់ ជា​កន្លែង​ទទួលភ្ញៀវ ដែលមាន​កន្លែង​កាហ្វេ និង​មី​នី​ម៉ា​ត។ ចាប់ពី​ជាន់​ទី១ ដល់​ជាន់​ទី៤ សម្រាប់​ចំណតរថយន្ត ហើយ​ចាប់ពី​ជាន់​ទី៥ ដល់​ជាន់​ទី១៦សម្រាប់ធ្វើ​សណ្ឋាគារ និង​ចាប់ពី​ជាន់​ទី១៧ដល់​ជាន់​ទី២៧ សម្រាប់ Residential (លំនៅឋាន) ។ ចំណែក​ក្នុង​ជាន់​ពី២៨ គឺជា​ជាន់​សម្រាប់​ក្រុមការងារ​បច្ចេកទេសរ​បស់​យើង និង​ជាន់​ទី២៩ សម្រាប់​អាង​ហែល​ទឹក ភោជនីយដ្ឋាន និង Sky Bar ជាដើម។

កញ្ញា បាន​លើកឡើងថា គម្រោង Garden One មាន​បន្ទប់ ២៧១ យូ​នី​ត​ខុន​ដូ ខណៈ​បច្ចុប្បន្ន​គម្រោង​បាន​លក់​ចេញ​ជាង៤០ភាគរយ​រួចហើយ ក្នុងនោះ​អតិថិជន​ទិញ​យូ​នី​ត​ខុន​ដូ ០ភាគរយ​គឺជា​អ្នកទិញ​ក្នុងស្រុក។

កញ្ញា​ឆាយ ថង​ឌី​បាន​ឲ្យ​ដឹង​ទៀតថា “គម្រោង​របស់​ពួកយើង ស្ថិតនៅ​តំបន់​វីឡា ដូច្នេះ​គម្រោង​ផ្តោតលើ​ផ្តល់​ជួន​អតិថិជន នូវ​ការរស់នៅ​បែប​ស្ងប់ស្ងាត់ ភាព​ប៉ៃ​តង​ព័ទ្ធជុំវិញ​ខាងក្រៅ​អគារ ព្រោះ​រុក្ខា​ជាតិ​ប៉ៃ​តង​ជួយ​ឱ្យ​រូបភាព​អគារ​ស្អាត​ប្លែក និង​ជួយ​កាត់បន្ថយ​កម្តៅ​នៅក្នុង​អគារ និង​ផ្តល់​ខ្យល់​បរិសុទ្ធ” ។

កញ្ញា​បាន​បន្ថែមថា អ្វីដែល​ពិសេស​គឺ​ក្នុង​មួយ​ជាន់ យើង​មាន​យូ​នី​ត​ខុន​ដូ​ចន្លោះ​ពី ១១ ទៅ១៣យូ​នី​ត​តែប៉ុណ្ណោះ ហើយ​គ្រប់​បន្ទប់​មាន​វេរ៉ងដា​ទាំងអស់។

នីតិវិធី​ក្នុង​ប្រា​ក់មាន ៣ជម្រើស ក្នុងនោះ​ទី១ បង់​ដាច់ ទី២ បង់​ជា​ដំណាក់កាល ដោយ​អត់​មាន​អត្រា​ការប្រាក់​រយៈ២០ខែ ហើយ​អ្វីដែល​ពិសេស​នៅ​ទី​គឺ​កម្ចី ដោយសារ​ភ្ញៀវ​នៅទីនេះ ត្រូវ​កក់១០០០ដុល្លារ ហើយ​បង់​មុន២០ភាគរយ ហើយ១០ភាគរយ​ត្រូវ​បង់​ដោយ​គ្មាន​អត្រា​ការប្រាក់​រយៈពេល២០ខែ និង៧០ភាគរយ​អាច​បង់​រំលស់​ជាមួយ​ធនាគា​របស់​ដៃគូ​របស់​ក្រុមហ៊ុន ក្នុង​រយៈពេល​ដល់២០ឆ្នាំ ក្នុង​អត្រា​ការប្រាក់​ច​ណ្លោះ​ពី៨ ទៅ១០ភាគរយ។

កញ្ញា​ឆាយ ថង​ឌី​បាន​និយាយថា “ខុន​ដូ​នេះ មាន​ភាពងាយស្រួល​មែនទែន​តែម្តង ដោយសារ​អតិថិជន​បង់ប្រាក់ ត្រឹមតែ​ពី៤០០ ទៅ៥០០ដុល្លារ​ក្នុង​មួយខែ​តែប៉ុណ្ណោះ” ។

កញ្ញា​បាន​បន្តទៀតថា ដោយសារ​ចាប់ពី​ជាន់​ទី៥ ដល់​ជាន់​ទី១៦ យើង​ធ្វើ​ជាស  ណ្ឋា​គារ ដូច្នេះ​ក្នុង​ជាន់​ទាំងនេះ ពេល​អតិថិជន​ទិញ​ហើយ គាត់​អាច​ទទួលបាន​ការជួល​ត្រឡប់មកវិញ​ក្នុង​រយៈ១០ឆ្នាំ ដោយមាន​អត្រា​ផលចំណេញ​ត្រឡប់មក ក្នុង​រយៈ​អត្រា៨ភាគរយ​ប្រចាំឆ្នាំ” ។ កញ្ញា​បាន​បន្តទៀតថា ក្នុងករណី​ការជួល​ផុត​រយៈពេល១០ឆ្នាំ​ហើយ គាត់​អត់​ចង់​បន្តកាន់កាប់​យូ​នី​ត​នេះ​ទេ គាត់​អាច​លក់​យូ​នី​ត​នេះ​ឱ្យ​ក្រុមហ៊ុន​វិញ​បាន ដូច្នេះ​ការវិនិយោគ​របស់គាត់​អត់​មាន​ហានិភ័យ​ទេ។

កញ្ញា​ឆាយ ថង​ឌី បា​ឱ្យដឹងថា តម្លៃ​យូ​នី​ត​ខុន​ដូ​នៅ​គម្រោង Garden One មាន​ចាប់ពី១៨០០ ដុល្លារ​ក្នុង​ម៉ែត្រការ៉េ ហើយ​ក្នុង​មួយ​យូ​នី​ត មានតម្លៃ​ចាប់ ៦៥,០០០ដុល្លារ​ឡើងទៅ គម្រោង​ទាំងមូល​នឹង​បញ្ចប់​ការសាងសង់​នៅ​ចុងឆ្នាំ២០២១ ។

គម្រោង Garden One ត្រូវបាន​អភិវឌ្ឍ​ដោយ​ក្រុមហ៊ុន​ល្បីឈ្មោះ និង​មាន​បទ​ពិ សោធន៍​ច្រើន​ឆ្នាំ​មកពី​ប្រទេស​ចិន​គឺ ក្រុមហ៊ុន JianZhong YuTong Co., Ltd ។ ខុន​ដូ​ប្រណីត Garden One មាន​កម្ពស់ ២៩ជាន់ ជាមួយ​យូ​នី​ត​សរុប ២៧១ ជា​ប្រភេទ ស្ទូ​ឌី​យ៉ូ និង យូ​នី​ត​ដែលមាន​បន្ទប់​គេង​ពីរ មាន​ទំហំ​ចាប់ពី ៤៤ដល់ ៩១ម៉ែត្រការ៉េ ។

ជាមួយ​ការគិតគូរ​ពិសេស​ដល់​អ្នករស់នៅ អ្នក​អភិវឌ្ឍន៍​គម្រោង Garden One បាន​បំពាក់​ដោយ​សម្ភារ​បរិក្ខាទំនើបៗមាន​គុណភាព​ខ្ពស់ ប្រព័ន្ធ​ប្រកាសអាសន្ន កាំ​មេ​រ៉ា​សុវត្ថិភាព និង​សេវាកម្ម​សន្ដិសុខ២៤ម៉ោង មាន​កន្លែង​សម្រាប់​ចត​រថយន្ដ​ជាច្រើន​កម្ពស់៥ជាន់ លាតសន្ធឹង​ចាប់ពី​ជាន់ B1 ដល់​ជាន់​ទី៤ ដំណើរការ​ដោយ​ប្រព័ន្ធ​ចំណត​ឆ្លាត​វៃ។

សម្រាប់​តម្លៃ​សមរម្យ ជាមួយ​ការ​រចនា​ដ៏​ល្អ​ឥត​ខ្ជោះ និង​ការផ្ដល់ជូន​ដ៏​សម្បូរបែប យូ​នី​ត​នៅក្នុង​គម្រោង Garden One មានតម្លៃ​ចាប់ផ្ដើម​ត្រឹមតែ៨ម៉ឺន​ដុល្លារ​ប៉ុណ្ណោះ។

ទំនាក់ទំនង​លេខ​ទូរស័ព្ទ​ទៅកាន់​ភ្នាក់ងារ​លក់ តាមរយៈ​លេខ 096 55 25 951, 011 444 647 ៕

តម្លៃអចលនទ្រព្យនៅក្នុងសង្កាត់មួយចំនួននៃក្រុងតាខ្មៅកំពុងឡើងថ្លៃ

ដោយៈរ៉ាណេត

កណ្តាលៈ ស្របទៅនឹងសន្ទុះនៃកំណើនទីផ្សារអចលនទ្រព្យ នៅក្នុងក្រុងតាខ្មៅ ខេត្ត​កណ្តាល ដែលកំពុងមានការកើនឡើង ដើម្បីបំពេញតាមតម្រូវការនោះ បានធ្វើឱ្យតម្លៃមានការកើនឡើងផងដែរ ជាពិសេសនៅតំបន់មួយចំនួន ដែលទើបតែត្រូវបានកាត់ចូលមកចំណុះរាជធានីភ្នំពេញកាលពីពេលថ្មីៗនេះ។

នាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រី តាំង ហួរ ដែលជាប្រតិបត្តិករផ្នែកទិញ-លក់ អចលនទ្រព្យយ៉ាងសកម្មបានប្រសាសន៍នៅល្ងាចថ្ងៃទី២ ខែវិច្ឆិកា ឆ្នាំ២០២០នេះថា បន្ទាប់ពីមានសេចក្ដីប្រកាសជាផ្លូវការ ស្ដីពីការកាត់យកតំបន់ខ្លះនៃក្រុងតាខ្មៅ ឱ្យស្ថិតនៅក្រោមរដ្ឋបាលរាជធានីភ្នំពេញ ក្នុងខណ្ឌដង្កោ ដែលមានភូមិចំនួន៥ បានធ្វើឱ្យទីផ្សារអចលនទ្រព្យនៅតំបន់ទាំងនោះ មានការកើនឡើងបើប្រៀបធៀបទៅនឹងកាលពីដើមឆ្នាំ២០២០។

លោកស្រីបានមានប្រសាសន៍ថា “តម្លៃដីនៅក្នុងតំបន់ខ្លះនៃក្រុងតាខ្មៅ ជាពិសេសតំបន់ ដែលទើបតែកាត់ចូលមកជាចំណុះរាជធានីភ្នំពេញ មានការកើនឡើង ហើយតំបន់ដែលកាន់តែស្ថិតនៅក្បែរផ្លូវ៦០ម៉ែត្រ គឺកាន់តែថ្លៃ ហើយមិនលើសពី៤-៥ឆ្នាំទៀត វាអាចនឹងក្លាយជាក្រុងរណបដ៏មានសក្ដានុពល អំណោយផលដល់សេដ្ឋកិច្ចជាក់ជាមិនខាន”។

លោកស្រីបានបន្តទៀតថា តម្លៃដីនៅក្នុងតំបន់ក្រុងតាខ្មៅ គឺអាស្រ័យទៅតាមទីតាំងរបស់ដី ក៏ដូចជាទំហំរបស់ដី ហេដ្ឋារចនាសម្ព័ន្ធ ផ្លូវតូច ផ្លូវធំ ជនបទ រឺក៏ទីប្រជុំជន ដែលតម្លៃនៅតំបន់ទីប្រជុំ អាចស្ថិតនៅក្នុងចន្លោះ ២០០-៣០០ដុល្លារជាង ក្នុងមួយម៉ែត្រការ៉េ ហើយប្រសិនបើដីមានផ្ទះគឺរឹតតែមានតម្លៃថ្លៃជាងនេះ ដោយឡែកតម្លៃដីនៅតំបន់ផ្លូវតូច អាចមានតម្លៃត្រឹម១០០ដុល្លារចុះក្រោមក្នុងមួយម៉ែត្រការ៉េ។ ចំណែកឯតម្លៃលំនៅដ្ឋានវិញ បើស្ថិតនៅលើផ្លូវធំអាចមានតម្លៃចាប់ពីជាង ១០-២០ម៉ឺនដុល្លារ សម្រាប់ប្រភេទផ្ទះល្វែង ដែលមានកម្ពស់ចាប់ពី៣ទៅ៤ជាន់ឡើងទៅ។

កាលពីថ្មីៗនេះរាជរដ្ឋាភិបាល បានសម្រេចកាត់តំបន់មួយចំនួននៃក្រុងតាខ្មៅ ខេត្ត​កណ្តាលទំហំ៣០២ហិកតា មកជាចំណុះរបស់រដ្ឋបាលរាជធានីភ្នំពេញ ដែលស្ថិតនៅក្នុងខណ្ឌដង្កោរ ដើម្បីដោះស្រាយ និងសម្រួលដល់ការអនុវត្តប្លង់មេ សម្រាប់អភិវឌ្ឍន៍ទីក្រុងរណបបឹងទំពុន និងបឹងជើងឯក ក៏ដូចជាសម្រួលដល់ការគ្រប់គ្រងរដ្ឋបាល និងការផ្តល់សេវាសាធារណៈ៕

មហាយក្សចិនបង្ហើបពីមហិច្ឆតាជំរុញកំណើនសេដ្ឋកិច្ចឱ្យរីកចម្រើនឆាប់រហ័ស នៅឆ្នាំ២០៣០

ដោយ ហ្សូលី

ភ្នំពេញៈ ចិនបានបង្ហើបផែនការអភិវឌ្ឍ កំណើនសេដ្ឋកិច្ចរបស់ខ្លួននៅរយៈពេល ៥ឆ្នាំ និង១៥ឆ្នាំទៅមុខទៀតរបស់ខ្លួន ទៅលើវិស័យសក្តានុពលមួយចំនួន ដែលមានភាពលេចធ្លោខ្លាំងជាងគេ ដូចជាការអភិវឌ្ឍឧស្សាហកម្មជាដើម។

គណបក្សកុម្មុយនិស្តចិនត្រូវបានគេរំពឹងថា នឹងចេញផ្សាយប្លង់គោលពីរនៅចុងបញ្ចប់នៃការប្រជុំរយៈពេល៤ ថ្ងៃនៅទីក្រុងប៉េកាំងៈ ផែនការ៥ ឆ្នាំធម្មតារបស់ពួកគេ និងឯកសារយុទ្ធសាស្ត្រវែងរហូតដល់ឆ្នាំ២០៣៥។ ចិនកំពុងប្រឈមមុខនឹងភាពតានតឹងកាន់​តែខ្លាំងឡើង ជាមួយសហរដ្ឋអាមេរិក ហើយមន្ត្រីសេដ្ឋកិច្ចនៅទីក្រុងប៉េកាំងត្រូវបានគេរំពឹងថា នឹងរៀបចំផែនការមួយ ដែលទាញយកធនធានក្នុងស្រុក និងការប្រើប្រាស់ដើម្បីធានាកំណើនសេដ្ឋកិច្ច។

ផែនការនេះ នឹងផ្តោតលើការច្នៃប្រឌិត បច្ចេកវិទ្យា ការប្រើប្រាស់ ការគ្រប់គ្រង ការបំពុលបរិស្ថាន និងការសន្យាជាច្រើនទៀត ដើម្បីបន្តបើកសេដ្ឋកិច្ចឆ្ពោះទៅការប្រកួតប្រ​ជែងបរទេស។

ផែនការរយៈពេល៥ឆ្នាំចុងក្រោយដែលបានស្វែងរក កំណើនសេដ្ឋកិច្ចពីមធ្យមទៅខ្ពស់ ដើម្បីកសាងសង្គមរុងរឿងមធ្យមនេះត្រូវបានគេរំពឹងថា ផ្តោតលើគុណភាពជាជាងល្បឿននៃកំណើន គោលដៅផលិតផលក្នុងស្រុកសរុប។  វិនិយោគិននិងអាជីវកម្មកំពុងឃ្លាំមើលសញ្ញាទាក់ទងនឹងគោលនយោបាយ ដែលអាចកំណត់ពីតម្រូវការពិភពលោក។

លោក Wang Huiyao ទីប្រឹក្សាខុទ្ទកាល័យនិងជាស្ថាបនិក នៃមជ្ឈមណ្ឌលចិននិងសកលភាវូបនីយកម្មចិនមានប្រសាសន៍ថា ចិនដឹងថាវាងាយរងគ្រោះដូច្នេះអ្នកដឹកនាំត្រូវ​តែត្រៀមសំរាប់អ្វីៗដូចជាការផ្លាស់ប្តូរបច្ចេកវិទ្យា។

លោកIris Pang ប្រធានសេដ្ឋវិទូចិននៅធនាគារ ING Bank NV បានមានប្រ​សាសន៍ថា ផែនការនេះនឹងត្រូវបានរៀបចំឡើង សម្រាប់វិធីដោះស្រាយនយោបាយការបរទេសដ៏ខ្លាំងក្លា ចំពោះប្រទេសចិននិងក្រុមហ៊ុនចិន។  មូលនិធិនឹងហូរចូលទៅក្នុងក្រុមហ៊ុនដែលអាចបង្ហាញពីសមត្ថភាពរបស់ពួកគេ ដើម្បីជំរុញបច្ចេកវិទ្យាកំពូលៗ។

ប្រទេសចិន ក៏អាចផ្តល់នូវគោលការណ៍ជាក់ស្តែងបន្ថែមទៀត ដើម្បីធ្វើឱ្យបានល្អតាមការសន្យារបស់រដ្ឋាភិបាល ក្នុងការកសាងប្រទេសសង្គមនិយមទំនើបដ៏អស្ចារ្យ នៅពាក់កណ្តាលសតវត្សរ៍ទី២១ ជាមួយនឹងឆ្នាំ២០៣៥ ដែលជាសញ្ញាពាក់កណ្តាលផ្លូវ។  គំនិតផ្តួចផ្តើមនៃផែនការរយៈពេល៥ឆ្នាំចុងក្រោយ គឺការកែទម្រង់ផ្នែកផ្គត់ផ្គង់ដែលធ្វើឱ្យមានសមត្ថភាពនៅក្នុងឧស្សាហកម្មដូចជា ដែកថែប និងធ្យូងថ្ម។

ផែនការនេះក៏បានកំណត់គោលដៅ ដើម្បីធ្វើឱ្យរបកគំឃើញនៃបច្ចេកវិទ្យាសំខាន់ៗ និងជួយប្រទេសចិនឱ្យក្លាយជាប្រទេស ដែលមានទេពកោសល្យសម្រាប់ការច្នៃប្រឌិត គំនិតផ្តួចផ្តើម ភូមិសាស្ត្រនយោបាយ។

លោកHelen Qiao ប្រធានសេដ្ឋវិទូចិននៅធនាគារ Bank of America បាននិយា​យថា ទិសដៅនៃការផ្លាស់ប្តូររចនាសម្ព័ន្ធផែនការរយៈពេល៥ឆ្នាំ និង១៥ឆ្នាំ កំណត់ថានឹងមានសារៈសំខាន់បំផុត ទោះបីសំណើជាក់លាក់ នៃគោលដៅជាវិធានការសារពើពន្ធ ពន្ធមរតក ពន្ធអចលនទ្រព្យ និងផ្សេងៗទៀតមិនអាចត្រូវបានអនុវត្តក្នុងពេលនោះ៕ Bloomberg៕

សភាពាណិជ្ជកម្មកម្ពុជា សាទរនឹងកំណើនវិនិយោគថ្មីជាង ៤១០លានដុល្លារ នៅដើមត្រីមាសទី៤ ឆ្នាំ២០២០

ដោយ ៖ រ៉ាណេត

ភ្នំពេញ ៖ គិតត្រឹមតែដើមត្រីមាសទី៤ ឆ្នាំ២០២០ ដែលមានរយៈពេល៣០ថ្ងៃ កម្ពុជាទទួលបានកំណើនទុនវិនិយោគបន្ថែមថ្មីៗសរុបជាង៤១០ លានដុល្ល្ារ ចាក់បញ្ចូលទៅក្នុងវិស័យឧស្សាហកម្ម និងវិស័យថាមពល ដែលកំពុងមានតម្រូវការប្រើប្រាស់នាពេលបច្ចុប្បន្ននេះ។

ជាមួយនឹងការទទួលបានទុនវិនិយោគបន្ថែមជាង៤១០លានដុល្លារខាងលើនេះ អនុប្រធានសភាពាណិជ្ជកម្មកម្ពុជា លោក ឧកញ៉ា លឹម ហេង បានមានប្រសាសន៍នៅរសៀលថ្ងៃទី២ ខែវិច្ឆិកា ឆ្នាំ២០២០នេះ ថា ចាប់ពីពេលនេះទៅ ជាពិសេសនៅដើមឆ្នាំ២០២១ខាងមុខនេះ កម្ពុជាចាប់ផ្តើមបង្ហាញពីសក្ដានុពលដែលប្រៀបវានទៅនឹងមេដែកឆក់ក្នុងការទាក់ទាញក្រុមហ៊ុនអន្តរជាតិឱ្យចូលមកកាន់កម្ពុជាដើម្បីធ្វើការវិនិយោគជាដៃគូ។

លោកឧកញ៉ា លឹម ហេង បានមានប្រសាសន៍បញ្ជាក់ថា “នេះគ្រាន់តែជាការចាប់ផ្តើមតែប៉ុណ្ណោះ ខណៈដែលការអនុវត្តលើកិច្ចព្រមព្រៀងពាណិជ្ជកម្មសេរីកម្ពុជា-ចិន នឹងត្រូវចាប់ផ្តើមនៅដើមខែមករា ឆ្នាំ២០២១ខាងមុខនេះ”។

លោកឧកញ៉ាបន្តថា “ក្រោយការអនុវត្តនូវកិច្ចព្រមព្រៀងពាណិជ្ជកម្មសេរីកម្ពុជា-ចិន ជាពិសេសក្រោយបញ្ចប់កូវីដ ខណៈដែលមហាអំណាចចិន និងអាមេរិកមិនទាន់បញ្ចប់សង្គ្រាមពាណិជ្ជកម្មជាមួយគ្នា កម្ពុជានឹងទទួលបានអត្ថប្រយោជន៍យ៉ាងច្រើន ដែលអាចស្រូបយកនូវបណ្ដាក្រុមហ៊ុនអន្តរជាតិនានាចូលមកដាក់ទីតាំងដើម្បីផលិតសម្រាប់នាំចេញទៅកាន់ទីផ្សារអាស៊ាន ទីផ្សារចិន អឺរ៉ុប រួមជាមួយនឹងទីផ្សារអាមេរិកផងដែរ ហើយកំណើននៃចំនួនលក្រុមហ៊ុននេះនៅតែបន្តកើនឡើងបន្ថែមទៀត”។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍បញ្ជាក់ថា “នៅពេលដែលមានដំណើរការឡើងវិញក្រោយវិបត្តិកូវីដនេះ ស្ទើរតែគ្រប់វិស័យនៅក្នុងប្រទេសកម្ពុជានឹងមានការវិវត្តឡើងវិញ ទាំងវិស័យឧស្សាហកម្ម កសិ-ឧស្សាហកម្ម ពាណិជ្ជកម្ម ការដឹកជញ្ជូន រួមទាំងវិស័យអចលនទ្រព្យផងដែរ ព្រោះនៅពេលដែលមានដំណើរការវិនិយោគ បង្កើតរោងចក្រ សហគ្រាសនានា គឺត្រូវតែមានតម្រូវការប្រើប្រាស់សំណង់អគារ ក៏ដូចជាការប្រើប្រាស់ដីធ្លី ដែលរឹតតែជួយជំរុញឱ្យតម្លៃឡើងថ្លៃជាងពេលបច្ចុប្បន្ន ជាពិសេសនៅក្នុងតំបន់ពាណិជ្ជកម្មសកម្មតែម្ដង” ៕

ទីក្រុងសៀមរាបថ្មីនឹងមានទីតាំងនៅក្បែរព្រលានយន្តហោះក្នុងស្រុកសូត្រនិគម

        ដោយគង់ ម៉ាលីន

        សៀមរាបៈ គំរោងបង្កើតក្រុងសៀមរាបថ្មី ដែលស្ថិតក្នុងផែនការមេអភិវឌ្ឍន៍ទេសចរណ៍ឆ្នាំ២០២០ ២០៣៥ នឹងមានទីតាំងស្ថិតនៅតំបន់ព្រលានយន្តហោះថ្មី ក្នុងស្រុកសូត្រនិគម ខេត្តសៀមរាប។

ព្រលានយន្តហោះថ្មីនេះ តាមគំរោងនឹងបញ្ចប់ការសាងសង់ដំណាក់កាលទី១នៅឆ្នាំ២០២៣ខាងមុខនេះ។

រដ្ឋមន្រ្តីក្រសួងទេសចរណ៍ លោកបណ្ឌិតថោង ខុនបានថ្លែងឲ្យដឹងកាលពីពេល    ថ្មីៗនេះថា គំរោង​បង្កើត «​ក្រុង​សៀមរាប​ថ្មី​» ដែល​ស្ថិតនៅក្នុង​ផែនការមេ​អភិវឌ្ឍ​ទេស​ចរណ៍​ខេត្តសៀមរាប​ក្នុង​ឆ្នាំ​២០២០-២០៣៥​នោះ គឺមាន​ទីតាំងនៅ​ម្តុំ​អាកាសយានដ្ឋាន​អន្តរជាតិ​សៀមរាប​ថ្មី​ក្នុងស្រុក​សូទ្រនិគម ខេត្តសៀមរាប​។

លោកបន្តថា “ការបង្កើត«ក្រុងសៀមរាបថ្មី» បានស្ថិតក្នុងផែនការមេអភិវឌ្ឍទេស​ចរណ៍ ឆ្នាំ២០២០-២០៣៥ ​ផែនការមេ ២០២០-២០៣៥ ដើម្បី​អភិវឌ្ឍ​ទេសចរណ៍​ខេត្តសៀមរាប​ទៅជា «​មាស​បៃតង​»”។

លោកបន្តថា ការបង្កើត «​ក្រុង​សៀមរាប​ថ្មី​» (Grand Siemreap) នេះជា​គោលដៅ​ថ្មី​មួយ ក្នុងចំណោម​គោលដៅ​ទេសចរណ៍​ទាំងថ្មី​ទាំងចាស់​ចំនួន​៦ ដែល​ស្ថិតនៅក្នុង​ផែនការមេ​អភិវឌ្ឍ​ទេសចរណ៍​ខេត្តសៀមរាប ដើម្បី​សម្រេច​ឱ្យបាន​នូវ​ប្រាក់ចំណូល​៥​ពា​ន់​​លាន​ដុ​លា្ល​រ ពី​ភ្ញៀវ​ទេស​ជាតិ​ជាង​១០​លាន​នាក់​និង​អន្តរជាតិ​៧​លាន​នាក់ ចាក់​ចូលក្នុង​ចរន្ត​សេដ្ឋកិច្ច​ខេត្តសៀមរាប ជាមួយនឹង​បង្កើត​កន្លែង​ការងារ​បាន​ជាង​៩០​ម៉ឺន​នាក់ ក្នុង​ឆ្នាំ​២០៣៥​។

លោកបន្តថា “​ទីក្រុង​សៀមរាប​ថ្មី មាន​ទីតាំងនៅ​ម្តុំ​ព្រលានយន្តហោះ​សៀមរាប​ថ្មី​។ ការបង្កើត​ទីក្រុង​សៀមរាប​ថ្មី​ ​ដើម្បី​ទ្រទ្រង់​ដល់ទី​ក្រុង​សៀមរាប​ចាស់ នាពេល​បច្ចុប្បន្ន”​។ ព្រោះ​ទីក្រុង​សៀមរាប​ចាស់ មិនអាច​ផ្ទុក​បានទេ​នូវ​ចំនួន​ភ្ញៀវទេសចរ​ដ៏​ធំ​មួយ​នេះ​។ ​ការបង្កើត​ក្រុង​សៀមរាប​ថ្មីឈ្មោះ Grand Siem Reap នេះ គឺអាច​ជាទី​ក្រុង​ទំនើប​ឬ​ជាទី​ក្រុង​វៃឆ្លាត ប៉ុន្តែ​រចនាប័ទ្ម​ឡើង​បែប​ទីក្រុង​បុរាណ​»​។

ទោះជាយ៉ាងណា លោកថោង ខុន មិនអាច​បញ្ជាក់បាន​ថាឡើយ​ថា ការបង្កើត​ទីក្រុង​សៀមរាប​ថ្មី​នោះ នឹងត្រូវ​អនុវត្ត​ឡើង​នៅពេលណា​ឱ្យ​ច្បាស់លាស់​ឡើយ ដោយ​ទាមទារ​ការសិក្សា​ឱ្យបាន​លម្អិត​។ តាម​គោលការណ៍ គម្រោង​តំបន់ ក្រុង​សៀមរាប​ថ្មី (Grand Siem Reap) ស្ថិតក្រោម​ទម្រង់​ជា​តំបន់​ទេសចរណ៍​ពិសេស ដោយ​អ្នក​អភិវឌ្ឍ​ក្រោម​ទម្រង់​ភាពជា​ដៃគូ​វិស័យ​សាធារណៈ និង​ឯកជន (PPP)​។

អភិបាលខេត្ត​សៀមរាបលោកទៀ សីហាបានមានប្រសាសន៍ឲ្យដឹងផងដែរថា ​ទីក្រុង​សៀមរាប​ថ្មី​ ប្រហែល​អាចជា​ទីក្រុង​វៃឆ្លាត​(Smart City) អាចមាន​ហេដ្ឋារចនាសម្ព័ន្ធ​ផ្លូវថ្នល់ ប្រព័ន្ធ​លូ ទឹកស្អាត អាគារ​ខ្ពស់ៗ ជាដើម​។

យោងតាម​ផែនការមេ​អភិវឌ្ឍ​ទេសចរណ៍ ​ក្នុង​ឆ្នាំ​២០២០-២០៣៥ ខេត្តសៀមរាប​នឹង​បង្កើត​គោលដៅ​ទេសចរណ៍​ចំនួន​៦​ទីតាំង ក្នុងនោះ​មាន​២​ទីតាំង ជា​គោលដៅ​ទេសច​រណ៍​មាន​ស្រាប់ គឺ តំបន់​ប្រាសាទ​អង្គរ និង​ក្រុង​សៀមរាប នាពេល​បច្ចុប្បន្ន​។

ចំណែក​គោលដៅ​ទេសចរណ៍​ថ្មី​ចំនួន​៤​ទៀត ក្រៅពី​ការបង្កើត​ទីក្រុង​សៀមរាប​ថ្មី គឺមាន​តំបន់​ជាប់​បឹង​ទន្លេសាប​ ភ្នំ​គូលែន និង​ស្រុក​បន្ទាយស្រី៕