ដោយ ៖ ប៊ី
ភ្នំពេញ ៖ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានណែនាំដល់មន្រ្តីពាក់ពន័្ធត្រូវបំពេញការងារឱ្យបានម៉ត់ចត់ក្នុងការអនុវត្តគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) ទៅតាមដំណាក់កាលនិមួយៗ ដើម្បីផ្តល់ផលប្រយោជន៍ជូនប្រជាពលរដ្ឋជាច្រើនពាន់គ្រួសារ ដែលត្រូវទទួលផលពីគម្រោងនេះ។

នាព្រឹកថ្ងៃទី១៤ ខែកក្កដា ឆ្នាំ២០២០នេះ នៅទីស្តីការក្រសួង លោកឧបនាយករដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានដឹកនាំកិច្ចប្រជុំពិភាក្សាស្តីពីការរៀបចំផែនការសកម្មភាព និងការកំណត់ទិសដៅអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) ។

លោកឧបនាយករដ្ឋមន្រ្តី បានឱ្យដឹងថា ក្នុងគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចដំណាក់កាលទី៣នេះ មាន៥សមាសធាតុដែលត្រូវអនុវត្តគឺការបែងចែកដីសង្គមកិច្ច បញ្ហាចុះបញ្ជី ការរៀបចំដី កសិកម្មចិញ្ចឹមសត្វដាំដុះដែលម្រោងនេះនឹងបញ្ចប់នៅឆ្នាំ២០២៦ និងតម្រូវឱ្យមានកម្មវិធីច្បាស់លាស់ ដើម្បីឱ្យការអនុវត្តគម្រោងមានប្រសិទ្ធិភាពឆាប់រហ័ស និងទាន់ពេលវេលា។

ក្នុងគោលដៅនេះលោកបានផ្តល់ការណែនាំដល់មន្រ្តីពាក់ពន័្ធត្រូវបំពេញការងារឱ្យបានម៉ត់ចត់ក្នុងការអនុវត្តគម្រោងទៅតាមដំណាក់កាលនិមួយៗ ស្របតាមនីតិវិធី និងរៀបចំផែនការឱ្យបានច្បាស់លាស់ ព្យាយាមកែប្រែរាល់ភាពខ្វះចន្លោះនានា ជាពិសេសលើការងារចុះបញ្ជីដី ការរៀបចំដី និងការចុះបញ្ជីសហគមន៍ជនជាតិដើមភាគតិចផងដែរ ដើម្បីផ្តល់ផលប្រយោជន៍ជូនប្រជាពលរដ្ឋជាច្រើនពាន់គ្រួសារដែលត្រូវទទួលផលពីគម្រោងនេះ។

ជាមួយនេះ លោកឧបនាយករដ្ឋមន្រ្តីបានលើកឡើងពីការងារជាច្រើនពាក់ព័ន្ធនឹងការអនុវត្តគម្រោង ដោយបានផ្តល់នូវគំនិតមតិយោបល់ដល់សមាជិកនៃអង្គប្រជុំនិងបានជំរុញឱ្យមន្រ្តីជំនាញត្រូវតែខិតខំប្រឹងប្រែងឱ្យអស់ពីកំលាំងកាយចិត្តដើម្បីអនុវត្តគម្រោងនេះឱ្យបានរួចរាល់ឆាប់រហ័សទាន់ពេលវេលា។ ក្នុងន័យនេះគឺដើម្បីចៀសវាងកុំឱ្យមានការអូសបន្លាយ ឬមិនយកចិត្តទុកដាក់ធ្វែសប្រហែសក្នុងការបំពេញភារកិច្ចដែលនាំអោយការងារមានភាពយឺតយ៉ាវ ឬអសកម្មនោះឡើយ ដើម្បីអោយការអនុវត្តគម្រោងមានប្រសិទ្ធភាព បានទទួលជោគជ័យ និងជាកិត្តិយសរបស់មន្រ្តីខ្លួនឯងផង ជាកិត្តិយសរបស់ក្រសួងស្ថាប័នផង និងជាការបង្កើននូវជំនឿជឿជាក់ដល់ប្រជាពលរដ្ឋក្នុងសង្គមជាតិផង សំដៅផ្តល់ផលប្រយោជន៍ និងបំពេញសេចក្តីត្រូវការរបស់ប្រជាពលរដ្ឋ។

កាលពីចុងខែមិថុនា ឆ្នាំ២០២០ ក្រុមប្រឹក្សាភិបាលនៃធនាគារពិភពលោក បានអនុម័តឥណទាន ៩៣លានដុល្លារអាមេរិក ពីសមាគមអភិវឌ្ឍន៍អន្តរជាតិ (IDA) សម្រាប់ «គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន៣» (LASED III) នៅប្រទេសកម្ពុជា។ គម្រោងនេះនឹងជួយបង្កើនសុវត្ថិភាពសិទ្ធិកាន់កាប់ដីធ្លី និងការទទួលបានហេដ្ឋារចនាសម្ព័ន្ធនិងសេវាកសិកម្ម និងសង្គមសម្រាប់ប្រជាជនក្រីក្រគ្មានដី និងសហគមន៍ជនជាតិដើមភាគតិចនៅកម្ពុជា។

គម្រោង LASED ជំហាន៣ នឹងគ្របដណ្តប់ទៅលើទីតាំងនិងសហគមន៍ចំនួន៧១ នៅក្នុងខេត្តទាំងអស់នៃប្រទេសកម្ពុជា លើកលែងតែរាជធានីភ្នំពេញ។ គម្រោងនេះនឹងជួយដល់ការកសាងផ្លូវលំជនបទ ប្រព័ន្ធធារាសាស្ត្រខ្នាតតូច សម្បទាផ្នែកផ្គត់ផ្គង់សេវទឹកស្អាត និងអនាម័យ អគារសាលារៀន ផ្ទះគ្រូបង្រៀន ប៉ុស្តិសុខភាព និងមណ្ឌលសហគមន៍។ អ្នកទទួលផលថ្មីពីកម្មវិធីដីសម្បទានសង្គមកិច្ច នឹងទទួលបានជំនួយសម្រាប់ការដាំដុះឆ្នាំដំបូងរបស់ខ្លួន ក្នុងនោះមានគ្រាប់ពូជផងដែរ។ គម្រោងនេះនឹងផ្តល់ជំនួយបច្ចេកទេសផងដែរដើម្បីអនុវត្តបច្ចេកទេសកសិកម្មវៃឆ្លាតផ្នែកអាកាសធាតុ បង្កើតសមាគមន៍កសិករសម្រាប់ជាប្រយោជន៍ដល់សកម្មភាពផលិតកម្មនិងទីផ្សារ និងដើម្បីគ្រប់គ្រងមូលនិធិសហគមន៍ សម្រាប់ពង្រីកសកម្មភាពសេដ្ឋកិច្ចនៅក្នុងមូលដ្ឋាន។

នាយកគ្រប់គ្រងធនាគារពិភពលោកប្រចាំនៅកម្ពុជា លោកស្រី អ៊ីនហ្គូណា ដូប្រាចា ធ្លាប់បានមានប្រសាសន៍ថា “លទ្ធភាពទទួលបានដីធ្លី និងការផ្តល់សេវានិងការបណ្តុះបណ្តាលបច្ចេកទេសកសិកម្មដើម្បីបង្កើនផលិតភាពកសិកម្ម ក៏ដូចជាការទទួលបានសេវាសាធារណៈល្អប្រសើរ គឺពិតជាមានសារៈសំខាន់ខ្លាំងណាស់សម្រាប់ប្រជាជនក្រីក្រដែលរស់នៅតាមទីជនបទ”។ លោកស្រី បានបន្តថា “គម្រោង LASED ជំហាន៣ នេះ នឹងបន្តជួយរដ្ឋាភិបាលក្នុងការផ្តល់ដីធ្លី និងសិទ្ធិកាន់កាប់ដីធ្លីដល់គ្រួសារគ្មានដីនិងគ្រួសារខ្វះដី និងធានាឱ្យមានសន្តិសុខផ្នែកសិទ្ធិកាន់កាប់ដីធ្លីសម្រាប់សហគមន៍ជនជាតិដើមភាគតិច នៅតាមតំបន់គោលដៅរបស់គម្រោងនេះ”។

ចាប់តាំងពីឆ្នាំ២០០៨ មក គម្រោង LASED ជំហាន១ និងជំហាន២ ដែលទទួលបានការឧបត្ថម្ភតាមរយៈធនាគារពិភពលោក បានគាំទ្រកម្មវិធីសម្បទានដីសង្គមកិច្ច ក្នុងគោលដៅជំរុញឱ្យមានការបែងចែកដីដល់ជនក្រីក្រ តាមដំណើរការមួយមានចីរភាព និងតម្លាភាពឈានទៅសម្រេចបានជោគជ័យ។ គម្រោងទាំងនេះបានជួយដល់ការអភិវឌ្ឍផ្លូវជនបទ ការកសាងប្រព័ន្ធធារាសាស្ត្រខ្នាតតូច ការសាងសង់សាលាបឋមសិក្សា ប៉ុស្តិសុខភាព ផ្តល់ការបណ្តុះបណ្តាលបច្ចេកទេសកែលម្អការដាំដុះ និងជួយគាំទ្រដល់ការបង្កើតឱ្យមានសេវាកាន់តែច្រើនទៀតសម្រាប់កសិករ។ តាមរយៈគម្រោងទាំងពីរដំណាក់កាលមកនេះ កម្ពុជាបានបែងចែកដីធ្លីចំនួន ១៧០០០ហិកតា សម្រាប់សង់លំនៅឋាននិងធ្វើការដាំដុះ ដល់គ្រួសារគ្មានដីនិងគ្រួសារខ្វះដី ចំនួនជាង ៥០០០គ្រួសារ ក្នុងនោះមានជាង ៣៣៦០គ្រួសារ ទទួលបានបណ្ណកម្មសិទ្ធិដីធ្លីរួចហើយ៕

ដោយ ៖ រ៉ាណេត

ភ្នំពេញ ៖ រដ្ឋាភិបាលបានសម្រេចគាំទ្រគម្រោងបង្កើត និងអភិរក្ស តំបន់បឹងស្នេហ៍- ទួលព័ន្ធតាឡី ដែលមានទំហំជាិត៤០០០ហិកតា នៅក្នុងខេត្តព្រៃវែងជាតំបន់ប្រើប្រាស់ច្រើនយ៉ាង ផ្តល់ផលប្រយោជន៍ដល់ប្រជាពលរដ្ឋក្នុងតំបន់ និងជិតខាង ជាពិសេសចូលរួមលើកកម្ពស់វិស័យទេសចរណ៍ធម្មជាតិប្រចាំខេត្ត។

ក្រោមការដឹកនាំប្រជុំអន្តរក្រសួង ក្រោមវត្តមានរបស់លោក ស៊្រុន ដារិទ្ធិ រដ្ឋលេខាធិកាក្រសួងបរិស្ថាន និងមន្ត្រីជំនាញបច្ចេកទេសតំណាងស្ថាប័នពាក់ព័ន្ធកាលពីល្ងាចថ្ងៃទី១៣ ខែកក្កដា ឆ្នាំ២០២០ បានសម្រេចគាំទ្រទៅលើគម្រោងនៃការបង្កើត និងកំណត់បែងចែកតំបន់គ្រប់គ្រង តំបន់ប្រើប្រាស់ច្រើនយ៉ាងបឹងស្នេហ៍-ទួលព័ន្ធតាឡី ស្ថិតនៅក្នុងភូមិសាស្រ្ត ស្រុកបាភ្នំ ខេត្តព្រៃវែង ដើម្បីជាប្រយោជន៍ដល់ប្រជាពលរដ្ឋក្នុងតំបន់ផ្ទាល់ និងតំបន់ក្បែរខាង រួមទាំងចូលរួមទ្រទ្រង់ដល់វិស័យទេសចរណ៍។

លោក ស៊្រុន ដារិទ្ធិ រដ្ឋលេខាធិការក្រសួងបរិស្ថាន បានបញ្ជាក់ថា កិច្ចប្រជុំខាងលើនេះ គឺដើម្បីបែងចែក និងគ្រប់គ្រងតំបន់ដែលមានសក្តានុពលដីសើមនៃបឹងស្នេហ៍-ទួលព័ន្ធតាឡី ក្នុងការដាក់ជាតំបន់ការពារធម្មជាតិដំបូងរបស់ខេត្តព្រៃវែង និងធ្វើការពិគ្រោះយោបល់ចុងក្រោយ អំពីការបង្កើត និងកំណត់បែងចែកតំបន់គ្រប់គ្រង ប្រើប្រាស់ច្រើនយ៉ាងនៃបឹងមួយនេះឱ្យបានជាប្រយោន៍យូរអង្វែង។

គម្រោងបង្កើតតំបន់ការពារធម្មជាតិ ដីសើមនៃបឹងស្នេហ៍-ទួលព័ន្ធតាឡី នេះ មានវិសាលភាពផ្ទៃដីចំនួន ៣៩២៤ ហិកតា ដែលក្រៅពីមានធនធានធម្មជាតិ ប្រមូលផ្តុំទៅដោយជីវចម្រុះ ថែមទាំងជាតំបន់ប្រមូលផ្តុំទៅដោយសត្វស្លាបទឹកកម្រជាច្រើនប្រភេទ ដែលទាញជាប្រយោជន៍បម្រើដល់វិស័យទេសចរណ៍ដ៏ទាក់ទាញសម្រាប់ខេត្តព្រៃវែងផងដែរ។

តំបន់ដីសើមបឹងស្នេហ៍ ជាជម្រកប្រភេទសត្វស្លាបជាច្រើនប្រភេទ ពិសេសសត្វស្លាបមួយចំនួនជិតផុតពូជ ដែលកំពុងរងការគំរាមកំហែងនៅលើពិភពលោកដូចជា ស្មោញ ទុងប្រផេះ រនាលណ៍ ត្រយ៉ងខ្លួនស ត្រដក់តូច ពិសេសចង្កៀលខ្យង ដែលកំពុងបន្តពូជពងកូនរាប់ពាន់កល្បាល នៅចំណុចទួលព័ន្ធតាឡី (ក្នុងតំបន់ដីសើមបឹងស្នេហ៍)៕

ដោយ ប៊ី
ព្រះសីហនុ៖ ក្រុមហ៊ុនរ៉ូយ៉ាល់គ្រុបកោះរ៉ុង និងក្រុមហ៊ុន ស៊ីណូ ហៃដ្រូ បានចុះហត្ថលេខា លើកិច្ចព្រមព្រៀងសាងសង់ផ្លូវបេតុងប្រវែង៧០គីឡូម៉ែត្រ ទទឹង៨ម៉ែត្រ នៅលើតំបន់អភិវឌ្ឍន៍កោះរ៉ុង ក្រុងកោះរ៉ុង ខេត្តព្រះសីហនុ ក្រោមទុនវិនិយោគ ៣៥ លានដុល្លារ។

ពិធីចុះហត្ថលេខានេះ ធ្វើឡើងរវាងក្រុមហ៊ុនរ៉ូយ៉ាល់គ្រុបកោះរ៉ុង ឌីវេឡុបមេនខមភេនី របស់អ្នកឧកញ៉ា គិត ម៉េង និងក្រុមហ៊ុន ស៊ីណូ ហៃដ្រូ ខនស្ដ្រាក់សិន ខូអិលធីឌី ក្រោមអធិបតីភាព លោក គួច ចំរើន អភិបាលខេត្ដព្រះសីហនុ នៅសណ្ឋាគារ Goddess of Liberty Hotel and Resort ភូមិ១ សង្កាត់ លេខ៣ ក្រុងព្រះសីហនុនៅព្រឹកថ្ងៃទី១៤ ខែកក្កដា ឆ្នាំ២០២០នេះ។

លោក គួច ចំរើន អភិបាលខេត្ដព្រះសីហនុ បានថ្លែងថា ការចុះហត្ថលេខា លើកិច្ចព្រមព្រៀងសាងសង់ផ្លូវបេតុងប្រវែង៧០គីឡូម៉ែត្រនៅថ្ងៃនេះរវាងក្រុមហ៊ុនរ៉ូយ៉ាល់គ្រុបកោះរ៉ុង ឌីវេឡុបមេនខមភេនី និងនិងក្រុមហ៊ុន ស៊ីណូ ហៃដ្រូ ខនស្ដ្រាក់សិន នឹងចូលចំណែកអភិវឌ្ឍកោះរ៉ុង ដើម្បីបង្កើនភាពទាក់ទាញបន្ថែមទៀត។

លោក បានថ្លែងថា “ក្រុមហ៊ុន ស៊ីណូ ហៃដ្រូ ខនស្ដ្រាក់សិននឹងត្រូវការបទពិសោធន៍ពីរដ្ឋបាលខេត្ត ដែលសាងសង់ហេដ្ឋារចនាសម្ព័ន្ធលើនៅក្រុងព្រះសីហនុ ដើម្បីជំរុញការសាងសង់ផ្លូវនៅលើកោះរ៉ុង ហើយការសាងសង់ផ្លូវបេតុងប្រវែង៧០គីឡូម៉ែត្រនឹងចំណាយពេល ១៦ ខែដើម្បីបញ្ចប់។

លោក បានបន្តថា “យើងខ្ញុំជាមួយនឹងមន្ត្រីជំនាញ និងអង្គភាពពាក់ព័ន្ធត្រៀមខ្លួនដើម្បីផ្តល់កិច្ចសហការទាំងបច្ចេកទេស និងកិច្ចសម្រួល ដើម្បីឱ្យក្រុមហ៊ុនទាំងពីបើកបានដំណើរការអនុវត្តនូវសកម្មភាពរបស់ខ្លួនឱ្យបានជោគជ័យ ទៅតាមពេលវាដែលបានកំណត់”។

លោក បានឱ្យដឹងទៀតថា “យើងខ្ញុំពិតជាចង់ឃើញសមិទ្ធផលនេះ កើតឡើងក្នុងរយៈពេល ១៦ ខែទៀតនៅលើកោះរ៉ុងរបស់យើង ហើយសកម្មភាពកសាងនេះក៏នឹងបានចូលរួមចំណែកផ្តល់ការងារទៅធ្វើការជាកម្មករ អ្នកបច្ចេកទេស និងវិស្វករនៅទីនោះ បានយ៉ាងច្រើននាក់ផងដែរ”។ លោក ថា “ខ្ញុំជឿជាក់ថា ដើម្បីបម្រើការអភិវឌ្ឍន៍លើកោះរ៉ុង យើងពិតជាមានសេចក្តីត្រូវការអភិវឌ្ឍន៍ធំធេងជាជាងនេះបន្ថែមទៀត ដើម្បីសោភ័ណភាពលើកោះរ៉ុងនេះ”។

លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានប្រាប់គេហទំព័រ propertyarea.asia កាលពីសប្តាហ៍មុននេះ ថា អភិបាលខេត្តព្រះសីហនុ លោក គួច ចំរើន និងក្រុមហ៊ុនរ៉ូយ៉ាល់គ្រុប រួមជាមួយអភិបាលក្រុងកោះរ៉ុង មន្ទីរ អង្គភាពពាក់ព័ន្ធ បានបើកិច្ចប្រជុំពិភាក្សាពីវឌ្ឍនភាពនៃការអភិវឌ្ឍកោះរ៉ុង។

លោកបន្តថា ក្រុមហ៊ុនបានចុះហត្ថលេខាលើកិច្ចសន្យាជួលតាំងពីថ្ងៃទី២៨ ខែកុម្ភៈ ឆ្នាំ ២០០៨ និងក្រុមប្រឹក្សាអភិវឌ្ឍន៍កម្ពុជា បានប្រគល់កោះរ៉ុងជាផ្លូវការនៅថ្ងៃទី៣ ខែតុលា ឆ្នាំ២០០៨ ដើម្បីធ្វើការអភិវឌ្ឍ ដូចជា ការសាងសង់សណ្ឋាគារ កាស៊ីណូ និងរីសតផ្សេងៗ ការសាងសង់ផ្លូវ ផែ ស្ពាន និងអគ្គិសនី អ៊ីនធើណេត និងទឹកស្អាត។ល។

លោកបន្ថែមថា ក្រុមហ៊ុនបានចាប់ផ្តើមស្ថាបនាប្រព័ន្ធផ្លូវថ្នល់តាមប្លង់មេ និងធ្វើការដឹកជញ្ជូនសម្ភារៈសាងសង់ នៅថ្ងៃទី៦ ខែកក្កដា ឆ្នាំ ២០០៩ ការសាងសង់ប្រព័ន្ធផ្លូវថ្នល់ចែកចេញជា៥ដំណាក់កាល ការចុះបញ្ជីដីរដ្ឋចំនួន៣៣ក្បាលដី នៅថ្ងៃទី១៩ ខែមិថុនា ឆ្នាំ ២០០៩ និងប្លង់មេក្នុងការអភិវឌ្ឍ អនុម័តនៅថ្ងៃទី៩ ខែតុលា ឆ្នាំ២០០៨ និង ក្នុងឆ្នាំ២០១៣ ក្រុមហ៊ុនមានការលំបាកក្នុងការអនុវត្តគម្រោងដោយសារទំនាស់ដីធ្លី។

លោកថា សណ្ឋាគារផ្កាយ ៥ The Royal Sands Koh Rong Hotel ក្នុងទឹកប្រាក់វិនិយោគចំនួន ៤០ លានដុល្លារសហរដ្ឋអាមេរិក ជារមណីយដ្ឋានប្រភេទផ្ទះវីឡា ភ្ជាប់ដោយអាងហែលទឹក មានចំនួន៦៧ វីឡា លើផ្ទៃដីទំហំ ៧.២ហិកតា ស្ថិតនៅក្បាលដីលេខ៨ នៃប្លង់មេ ក្នុងភូមិសុខសាន្ត បានសម្ពោធដាក់ឲ្យដំណើរការក្រោមអធិបតីភាពដ៏ខ្ពង់ខ្ពស់បំផុតនៃ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅថ្ងៃទី២៣ ខែមេសា ឆ្នាំ២០១៨។

លោកបន្ថែមថា មិនមានការរុះរើលំនៅដ្ឋានប្រជាពលរដ្ឋពីភូមិកោះតូច និងភូមិសុខសាន្ត ទៅភូមិព្រែកស្វាយនោះទេ គឺកាត់ឆ្វៀលជូនប្រជាពលរដ្ឋចំនួន គ្រួសារ ផ្អែកតាមអនុក្រឹត្យលេខ ៤៨ អនក្រ.បក ចុះថ្ងៃទី០៤ ខែមេសា ឆ្នាំ២០១៨។ សង់ផ្លូវគ្រួសក្រហមទទឹង ១២ម៉ែត្រ និងប្រព័ន្ធលូបានប្រវែងជាង ៤០គីឡូម៉ែត្រ នៃប្រព័ន្ធផ្លូវមេប្រវែង ៧០គីឡូម៉ែត្រ ដែលបានអនុម័ត តភ្ជាប់ចរាចរណ៍រវាងភូមិទាំង៤ នៅលើកោះរ៉ុង ដោយបច្ចុប្បន្ន បន្តសាងសង់ផ្លូវចាក់បេតុងលើផ្លូវធ្វើហើយជាបន្តទៀត។

អ្នកឧកញ៉ា គិត ម៉េង អគ្គនាយកក្រុមហ៊ុន Royal Group Koh Rong Development Company បានថ្លែងអំណរគុណដល់ស្ថាប័នពាក់ព័ន្ធទាំងអស់ ដែលបានចូលរួមចំណែកក្នុងការជម្រុញឱ្យការស្ថាបនាផ្លូវនៅលើតំបន់អភិវឌ្ឍន៍កោះរ៉ុងនេះ បានកើតឡើង។ អ្នកឧកញ៉ា គិត ម៉េង មានប្រសាសន៍ថា នៅខណៈនេះ ក្រុមហ៊ុនបានចាប់ផ្តើមសាងសង់ផ្លូវបេតុង ៧០គីឡូម៉ែត្រ ហើយតទៅមុខទៀតក្រុមហ៊ុន នឹងត្រូវសាងសង់រោងចក្រអគ្គិសនី កំពង់ផែ និងព្រលានយន្តហោះ នៅលើតំបន់អភិវឌ្ឍន៍កោះរ៉ុងបន្ថែមទៀត៕

ដោយៈប៊ី

តូក្យូៈ ជប៉ុនមានបំណងចាប់ផ្តើមពិភាក្សា នៅពាក់កណ្តាលខែកក្កដាស្តីពីការបន្តអាជីវកម្មជើងហោះហើរ ជាមួយប្រទេសចំនួន១០បន្ថែមទៀត រួមមាន ចិនដីគោក កូរ៉េខាងត្បូង និងតៃវ៉ាន់ដែលជាវិធានការមួយ ដែលនឹងត្រូវបានគាំទ្រដោយការបង្កើនសមត្ថភាពធ្វើតេស្តិ៍មេរោគកូរ៉ូណា។

ទីក្រុងតូក្យូក៏ស្វែងរកការពិភាក្សាការធ្វើដំណើរជាមួយសិង្ហបុរី ម៉ាឡេស៊ី ព្រុយណេ មីយ៉ាន់ម៉ា កម្ពុជា ឡាវ និងម៉ុងហ្គោលីផងដែរ។ នេះបើយោងតាមការចេញផ្សាយរបស់សារព័ត៌មានជប៉ុន Nikkei Asian Review នៅចុងសប្តាហ៍កន្លងមកនេះ។

នាយករដ្ឋមន្រ្តីជប៉ុន ស៊ីនហ្សូ អាបេ ត្រូវបានគេរំពឹងថា នឹងបង្ហាញផែនការសម្រាប់ការចរចារនាពេលឆាប់ៗនេះ។ ការផែនការនេះ បានកើតឡើងជាកិច្ចព្រមព្រៀងរវាងគោលដៅណា ដែលជំងឺរាតត្បាតត្រូវបានគ្រប់គ្រងនៅតំបន់អាស៊ី។

ប្រទេសជប៉ុន បានបើកកិច្ចពិភាក្សាស្រដៀងគ្នានេះរួចហើយ ជាមួយប្រទេសវៀតណាម ថៃ អូស្រ្តាលី និងនូវែលហ្សេឡង់។ ប្រទេសវៀតណាមបានស្វាគមន៍ អ្នកធ្វើជំនួញជនជាតិជប៉ុនប្រមាណ៤៤០នាក់នៅចុងខែមិថុនា។

ផែនការរបស់ទីក្រុងតូក្យូ សម្រាប់ការបើកឡើងវិញ ការធ្វើដំណើរតាមជើងហោះហើរទៅប្រទេស ដែលមានទំនាក់ទំនងយ៉ាងល្អជាមួយប្រទេសជប៉ុន និងបានគ្រប់គ្រងការរីករាលដាលនៃជំងឺកូវីដ១៩។ កោះតៃវ៉ាន់ត្រូវបានគេរំពឹងថា នឹងស្ថិតនៅក្នុងចំណោមប្រទេសដំបូង ដែលយល់ព្រមនឹងការហោះហើរជាមួយជប៉ុន។

ទោះបីជាទីក្រុងតូក្យូ នឹងជួបពិភាក្សាជាមួយទីក្រុងប៉េកាំង និងសេអ៊ូលក្នុងពេលតែមួយជាមួយតៃវ៉ាន់ក្តី ក៏មានក្តីបារម្ភថាចំនួនអ្នកដំណើរចិន និងកូរ៉េខាងត្បូងនឹងលើសសមត្ថភាពនៃតេស្តរកជំងឺរបស់ជប៉ុន។

អាកាសយានដ្ឋានជប៉ុនបច្ចុប្បន្ន មានសមត្ថភាពធ្វើតេស្តដល់មនុស្ស២,៣០០ នា​ក់​ក្នុងមួយថ្ងៃ។ ការពង្រីកមណ្ឌលតេស្តវិនិច្ឆ័យ និងការណែនាំតេស្តអង្គបដិប្រាណនឹងបង្កើនសមត្ថភាពប្រចាំថ្ងៃដល់មនុស្ស៤០០០នាក់នៅខែសីហា៕

ដោយៈ រ៉ាណេត

មណ្ឌលគីរីៈ អភិបាលខេត្តមណ្ឌលគីរី បានធ្វើការព្រមានធ្ងន់ៗទៅលើអភិបាលក្រុង និងស្រុកទូទាំងខេត្ត ដែលពាក់ព័ន្ធទៅនឹងការសម្រេចចេញលិខិត បញ្ជាក់ការទិញ-លក់ដីធ្លីទាំងឡាយណា ដែលប្រាស់ចាកពីច្បាប់ ឬជាដីកម្មសិទ្ធិរបស់រដ្ឋ និងប្រជាជន។

លោកស្វាយ សំអ៊ាង អភិបាលខេត្តមណ្ឌលគិរី នៅក្នុងកិច្ចប្រជុំ នៅរសៀលថ្ងៃទី១៣ ខែកក្កដា ឆ្នាំ២០២០ ដើម្បីផ្សព្វផ្សាយខ្លឹមសារលិខិតលេខ ១៩៦៣ សជណ របស់ក្រសួងមហាផ្ទៃបានបញ្ជាក់ថា បច្ចុប្បន្ននេះមានមន្រ្តីខិលខូចមួយចំនួន បានដើរចង្អុលដីព្រៃលក់ ហើយអ្នកទិញ ចេះតែទិញ អ្នកលក់ចេះតែលក់ ហើយបើសិនជាអភិបាលក្រុង/ស្រុក/ឃុំ/សង្កាត់ និងមន្រ្តីជំនាញ ទៅបញ្ជាក់លើលិខិតទិញ-លក់លើដីទាំងនោះ នេះជាការខុសធ្ងន់ ហើយនឹងត្រូវប្រឈមមុខចំពោះផ្លូវច្បាប់។

លោកបានសង្កត់ធ្ងន់ថា “បច្ចុប្បន្ននេះមានការទិញ-លក់ដីជាន់លើគ្នា ហើយមន្រ្តីយើងនៅតែបញ្ជាក់ឱ្យទៀត នេះជាការឃុបឃិតគ្នា ហើយក្លាយជាបញ្ហាស្មុគស្មាញនៅក្នុងខេត្ត”។លោកបន្តថា “ដូច្នេះសូមឱ្យអាជ្ញាធរក្រុង/ស្រុក និងមន្ទីរអង្គភាពជំនាញ ត្រូវហាមដាច់ខាត ការចូលកាប់ទន្រា្ទនដីថ្មី ទោះបីជាអ្នកធំក៏ដោយ ត្រូវចាត់វិធានការណ៍តាមនីតិវិធីច្បាប់”។

លោកស្វាយ សំអ៊ាងបានបនន្តថា អាជ្ញាធរក្រុង/ស្រុក/ឃុំ/សង្កាត់ និងមន្រ្តីជំនាញ ត្រូវយកចិត្តទុកដាក់សហការគ្នា ក្នុងការគ្រប់គ្រងទិន្នន័យ និងស្ថិតិប្រជាពលរដ្ឋ និងដីធ្លីដែលកំពុងកាន់កាន់ និងអាស្រ័យផលជាក់ស្តែងជាយូរឆ្នាំមកហើយ នៅតំបន់ការពារធម្មជាតិ និងគម្រប់ព្រៃឈើនៅក្នុងខេត្ត ដើម្បីចាត់ចែង និងឆ្វៀលដី និងផ្តល់កម្មសិទ្ធិដីជូនពួកគាត់ ព្រមទាំងត្រៀមបម្រុងដី១០ភាគរយ សម្រាប់ការប្រើប្រាស់រួមរបស់សហគមន៍។

ពាក់ព័ន្ធទៅនឹងបញ្ហា នៃការកាប់ទន្ទ្រានដីយកធ្វើជាកម្មសិទ្ធិ រួមជាមួយនឹងការចូលរួមខុបឃិតគ្នាពីសំណាក់អ្នកមានធនធាន និងអ្នកមានអំណាចនៅតាមមូលដ្ឋានមួយចំនួនបានកើតមានស្ទើរគ្រប់ខេត្តក្រុង ជាក់ស្ដែងដូចជាករណី ដែលទើបតែកើតមាននៅក្នុងខេត្តបាត់ដំបង រវាងលោកឧកញ៉ាម្នាក់ និងអភិបាលរងខេត្ត ដែលរាជរដ្ឋាភិបាលបានចាត់ការតាមនីតិវិធីច្បាប់យ៉ាងតឹងរឹង ស្របតាមការដាក់ចេញនូវវិធានការណ៍៍ របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា៕

ដោយៈរ៉ាណេត

ខេត្តព្រៃវែងៈ ខណៈដែលបណ្តាប្រទេសជាច្រើន នៅលើពិភពលោកកំពុងទទួលរងនូវផលប៉ះពាល់យ៉ាងធ្ងន់ធ្ងរទៅលើបញ្ហាសេដ្ឋកិច្ច ដែលកំពុងបន្តទៅដល់ផលប៉ះពាល់ទៅលើផ្នែកស្បៀងនៅពេលបច្ចុប្បន្ននេះ ប្រមុខរដ្ឋាភិបាលកម្ពុជាបានប្រកាសថា នឹងចូលរួមចំណែកនៅក្នុងសង្វាក់ផ្គត់ផ្គង់ស្បៀងក្នុងតំបន់ និងពិភពលោក។

សម្ដេចតេជោហ៊ុន សែននាយករដ្ឋមន្រ្តីនៃកម្ពុជាបានមានប្រសាសន៍នៅក្នុងពិធីចុះពិនិត្យមើលមជ្ឈមណ្ឌលស្រាវជ្រាវ និងអភិវឌ្ឍន៍ពូជត្រី និងជួបសំណេះសំណាលជាមួយបងប្អូនប្រជាកសិករ នៅស្រុកពាមរក៍ ខេត្តព្រៃវែង នៅព្រឹកថ្ងៃអង្គារ៍ ទី១៤ ខែកក្កដា ឆ្នាំ២០២០នេះបានប្រកាសថា ផ្ទុយពីបណ្តាប្រទេសជាច្រើន កំពុងជួបបញ្ហាប៉ះពាល់ដោ​យសារវិបត្តិជំងឺ Covid-19 រហូតប្រឈមនឹងផ្នែកស្បៀង សម្រាប់កម្ពុជាបែរជាអាចយកឱកាសនេះ បង្កើនលទ្ធភាពផលិតស្បៀងបានយ៉ាងល្អ។

សម្ដេចបានបញ្ជាក់ថា “ Covid-19 មិនអាចផ្តាច់ដង្ហើម ជីពចរសេដ្ឋកិច្ច ដែលចិញ្ចឹមប្រជាជនឱ្យរស់គឺវិស័យកសិកម្ម។ ពេលនេះកម្ពុជា មិនមានខ្វះខាតស្បៀងនោះទេ ហើយថែមទាំងមានលទ្ធភាព សម្រាប់ធ្វើការនាំចេញទៅកាន់ទីផ្សារក្រៅប្រទេសថែមទៀត”។សម្តេចបានបន្ថែមថថា “កម្ពុជាអាចចូលរួមក្នុងសង្វាក់ផ្គត់ផ្គង់ស្បៀងក្នុងតំបន់ និងពិភពលោក។ ក្នុង១ឆ្នាំៗ កម្ពុជាមានសមត្ថភាពសល់ស្រូវជាង៦លានតោន ដែលគិតជាអង្ករមានជាង៤លានតោន បន្ទាប់ពីផ្គត់ផ្គង់ក្នុងស្រុករួច”។

ក្រៅពីនេះ កម្ពុជាមានត្រី ដំឡូងមី គ្រាប់ស្វាយចន្ទី ពោត សណ្តែក ចែក ស្វាយ ដូងប្រេង ជាដើម សម្រាប់នាំចេញៗ។

សម្តេចតេជោ ហ៊ុន សែនបានលើកឡើងផងដែរថា នៅពេលបច្ចុប្បន្ននេះ ស្រូវអង្កររបស់យើង កំពុងនាំចូលទៅអឺរ៉ុបទោះបីជាត្រូវបង់ពន្ធក៏ដោយ។ ក្នុងរយៈពេល៦ខែក្នុងឆ្នាំ២០២០នេះ យើងបាននាំអង្ករ ( អង្ករក្រអូប ) ទៅទីផ្សារប្រទេសអឺរ៉ុបបានជាង១៣៨ ០០០តោន ស្មើនឹង៣៤ភាគរយនៃការនាំចេញសរុប។ នាំទៅចិនមានជាង១៤៨,០០០តោន នាំចេញទៅអាស៊ានជាង៥៤,០០០តោន។ នាំទៅកាន់ទិសដៅទីផ្សារផ្សេងៗបានជាង៦៣,០០០តោន សរុបក្នុងពេល៦ខែ ដើមឆ្នាំ២០២០នេះ កម្ពុជាបាននាំចេញអង្ករជាង៤០ម៉ឺនតោន៕

ដោយ ៖ រ៉ាណេត

ព្រៃវែង ៖ រហូតមកដល់ពេលបច្ចុប្បន្ននេះ គ្មានប្រទេសណាមួយគេចផុតពីវិបត្តិនៃជំងឺសាកលដែលកំពុងរាតត្បាតនោះទេ ដែលក្នុងនោះវិស័យដែលទទួលរងនូវផលប៉ះពាល់ធ្ងន់ធ្ងរជាងគេ គឺវិស័យសេវាកម្ម ជាពិសេសផ្នែកអាកាសចរណ៍។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍នៅក្នុងពិធីចុះត្រួតពិនិត្យអាងចិញ្ចឹមត្រី និងវារីវប្បកម្មនៅខេត្តព្រៃវែង នៅព្រឹកថ្ងៃទី១៤ ខែកក្កដា ឆ្នាំ២០២០នេះថា នៅពេលដែលបញ្ហា Covid-19 រាតត្បាត មានប្រទេសជាច្រើនដែលរងនូវផលប៉ះពាល់ស្ទើរគ្រប់វិស័យ ដែលក្នុងនោះវិស័យដែលធ្ងន់ធ្ងរជាងគេភាច្រើនគឺវិស័យសេវាកម្ម និងបន្តទៅដល់ផលប៉ះពាល់ផ្នែកស្បៀងអាហារ។

សម្ដេចតេជោ ហ៊ុន សែនបានមានប្រសាសន៍ថា “ឥឡូវនេះ ពិភពលោកមានការផ្លាស់ប្ដូរជ្រាលជ្រៅ ចំនួនមនុស្សស្លាប់ច្រើនណាស់ ដែលគេនៅមិនទាន់រកឃើញថ្នាំព្យាបាលនៅឡើយ ហើយឥឡូវទម្លាប់របស់ប្រជាពលរដ្ឋនៅលើពិភពលោករាប់ពាន់ឆ្នាំ ត្រូវបានបំផ្លាញដោយសារ Covid-19 ដែលពីដើមធ្លាប់តែចាប់ដៃគ្នា ប៉ុន្តែពេលនេះមិនអាចចាប់ដៃគ្នាបានទៀតទេ”។

សម្ដេចបានបន្តថា “ឥឡូវ និយាយជារួមពីបញ្ហាសេដ្ឋកិច្ច គ្មានប្រទេសណាមួយដែលមិនរងផលប៉ះពាល់អំពីបញ្ហាជំងឺនេះនោះទេ។ ផលប៉ះពាល់កើតមានចំពោះវិស័យឧស្សាហកម្ម កើតមានចំពោះវិស័យសេវា។ ដូចជាទេសចរ ឆ្នាំទៅយើងទទួលបាន ៦,៦លាននាក់ តែឆ្នាំនេះយើងទទួលតិចណាស់។ ប្រទេសនៅលើពិភពលោកសុទ្ធតែមានបញ្ហាហ្នឹងទាំងអស់ ចឹងសេវាសណ្ឋាគារអីហ្នឹងត្រូវបិទ…។ ដោយឡែកវិស័យឧស្សាហកម្មនៅលើពិភពលោកប៉ះពាល់ធ្ងន់ជាងកម្ពុជាយើងឆ្ងាយណាស់។ ឧទាហរណ៍ ដូចជាក្រុមហ៊ុនផលិតយន្តហោះនៅអាមេរិកប្រភេទប៊ូអ៊ីងនៅអាមេរិក នៅអឺរ៉ុបប្រភេទ អ៊ែរប៊ឺស សួរថាពួកគេផលិតបានទៀតទេ? គេផលិតបាន ប៉ុន្តែមិនដឹងផលិតលក់ឱ្យអ្នកណា”។

នៅក្នុងឱកាសនេះ សម្ដេចតេជោ បានមានប្រសាសន៍បន្តទៀតថា “សេវាដឹកជញ្ជូនតាមផ្លូវអាកាស យន្ដហោះដែលធ្លាប់តែបើកក្នុងមួយថ្ងៃប្រហែលជា២ម៉ឺនគ្រឿង ឥឡូវនៅសល់ប្រហែលជា២ពាន់គ្រឿងយ៉ាងច្រើន។ ប្រទេសរបស់យើងធ្លាប់ទទួលក្នុងមួយថ្ងៃ ៣-៤រយជើងក្នុងមួយថ្ងៃ ឥឡូវនៅសល់ត្រឹម៧-៨ជើង ឬ១០ជើងក្នុងមួយថ្ងៃតែប៉ុណ្ណោះ ដែលទទួលនៅព្រលានយន្ដហោះភ្នំពេញ និងព្រលានយន្តហោះកំពង់សោម ឯព្រលានយន្ដហោះសៀមរាប គឺសូន្យតែម្ដង។ ចឹងវិស័យឧស្សាហកម្ម និងវិស័យវេសាកម្មប៉ះពាល់ធំ”៕

ដោយ ៖ ប៊ី

ភ្នំពេញ ៖ មជ្ឈមណ្ឌលគ្រប់គ្រងស្ថានភាព Covid-19 ប្រទេសថៃ (CCSA) បានអនុញ្ញាតឱ្យគណៈកម្មាធិការគ្រប់គ្រងជំងឺឆ្លងរបស់ខេត្តស្រះកែវបានបើកច្រកព្រំដែន អារញ្ញប្រាថេត ឡើងវិញ ដើម្បីដឹកជញ្ជូនទំនិញរវាងប្រទេសថៃ និងកម្ពុជា។

ចាប់ផ្តើមពីថ្ងៃពុធខាងមុខនេះ យានយន្តចំនួន ៥០ គ្រឿងនឹងត្រូវអនុញ្ញាតឱ្យឆ្លងកាត់ព្រំដែនចន្លោះម៉ោង ៨ ព្រឹកដល់ម៉ោង ១ រសៀលជារៀងរាល់ថ្ងៃ។ ថយន្តនីមួយៗអាចដឹកអ្នកដំណើរបានតែ ២ នាក់ប៉ុណ្ណោះ ដែលត្រូវពិនិត្យរករោគសញ្ញា Covid-19 ស្របតាមការណែនាំស្តីពីការគ្រប់គ្រងជំងឺ ដែលមានស្រាប់ មុនពេលចូលប្រទេសថៃ។ នេះបើតាមកាសែតបាងកកប៉ុស្តិ៍ចុះផ្សាយនៅព្រឹកថ្ងៃទី១៤ ខែកក្កដា ឆ្នាំ២០២០។

លោក Sawanit Suriyakul Na Ayutthaya អភិបាលស្រុកអារញ្ញប្រាថេត បាននិយាយថា សម្រាប់ពេលនេះ ប្រជាជនកម្ពុជានឹងត្រូវបានអនុញ្ញាតឱ្យដឹកជញ្ជូនទំនិញឆ្លងកាត់ព្រំដែន តែមិនធ្វើជំនួញទេ។
លោកបានបន្តថា អាជីវករអាចយកទំនិញរបស់ពួកគេទៅកាន់ផ្សាររ៉ុងក្លឿបាន ប៉ុន្តែពួកគេនឹងត្រូវហាមឃាត់មិនឱ្យធ្វើដំណើរនៅខាងក្រៅតំបន់ ដែលមិនត្រូវបានអនុញ្ញាតទេ។

ដោយឡែក លោកឧត្តមសេនីយ៍ឯក Kongcheep Tantravanich អ្នកនាំពាក្យក្រសួងការពារជាតិថៃ បាននិយាយកាលពីម្សិលមិញថា លោក Prawit Wongsuwon ឧបនាយករដ្ឋមន្រ្តីបានណែនាំឱ្យអាជ្ញាធរពាក់ព័ន្ធធ្វើការសកម្មក្នុងការទប់ស្កាត់កម្មករពីការចូលប្រទេសដោយខុសច្បាប់ ដើម្បីការពារការឆ្លងឡើងវិញនៃជំងឺ Covid-19 ។ លោក Kongcheep បានថ្លែងថា “អាជ្ញាធរគួរតែធ្វើឱ្យអស់ពីសមត្ថភាព ដើម្បីអនុវត្តច្បាប់ប្រឆាំងនឹងអ្នកដែលនាំពលករបរទេសខុសច្បាប់”៕ Bangkok Post

ដោយៈ វុត្ថា

ភ្នំពេញៈ បន្ទាប់ពី​ទទួលបាន​ការណែនាំ​រប​ស់ស​ម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា អំពី​ការកំណត់​ជ្រើសរើស​ថ្ងៃ​ឈប់សម្រាក ជំនួស​ឱ្យ​ថ្ងៃបុណ្យ​ចូលឆ្នាំថ្មី​ប្រពៃណី​ខ្មែរ​កាលពីពេល​កន្លងទៅ គណៈកម្មការ​គោលនយោបាយ​សេដ្ឋកិច្ច និង​ហិរញ្ញវត្ថុ បានសម្រេច​កំណត់​យក​សប្តាហ៍​ទី៣ នៃ​ខែសីហា ឆ្នាំ២០២០ ក្រោម​ហេតុផលសំខាន់ៗចំនួន៤ ។

យោងតាម​លទ្ធផល​នៃ​កិច្ចប្រជុំ ដែល​បាន​ផ្សព្វផ្សាយ​នៅ​ថ្ងៃទី១៣ ខែកក្កដា ឆ្នាំ២០២០កន្លងមកនេះ តំណាង​មកពី​វិស័យ​ឯកជន បានស្នើ​សុំ​រាជរដ្ឋាភិបាល​កំណត់​យ​ក​ថ្ងៃ​ឈប់សម្រាក​ជំនួស ឱ្យ​ថ្ងៃបុណ្យ​ចូលឆ្នាំថ្មី​ប្រណី​ខ្មែរ​នៅ​ថ្ងៃទី ១៧-២១ ខែសីហា ឆ្នាំ ២០២០ ដោយ​ផ្អែកលើ​ហេតុផល និង​គោលបំណង​សំណងសំខាន់ៗ មួយចំនួន៤ដូច​ជាទី១ ផ្តល់​ពេលវេលា​គ្រប់គ្រាន់​ដល់​រោងចក្រ​សហគ្រាស ជាពិសេស​វិស័យ​កាត់ដេរ និង​ស្បែកជើង ក្នុងការ​បញ្ចប់​សង្វាក់​ផលិតកម្ម និង​ការនាំចេញ​ទំនិញ​តាម​ការបញ្ជាទិញ ដែលមាន​ស្រាប់​ឱ្យបាន​មុន​ថ្ងៃ១២ ខែសីហា ឆ្នាំ ២០២០ ដែលជា​កាលបរិច្ឆេទ​នៃ​ការចូល​ជាធរ​មាននៃ​ការព្យួរ​ប្រព័ន្ធ​អនុគ្រោះ​ពន្ធ លើ​ទំនិញ​គ្រប់យ៉ាង​លើកលែងតែ​សព្វាវុធ (EBA) របស់​សហភាព​អឺរ៉ុប។

ទី២ ជា​កាលបរិច្ឆេទ​មួយ​ដែលមាន​គម្លាត​សមរម្យ (មួយខែ) ពី​ធី​បុណ្យ​ភ្ជុំ​បិ​ណ្យ​ដែល​នឹង​ប្រព្រឹត្តទៅ​នៅ​ថ្ងៃទី ១៦-១៨ ខែកញ្ញា ឆ្នាំ២០២០ ដែល​នឹង​អនុញ្ញាតឱ្យ​ប្រជាជន​ចូលរួម​ជួយ​លើកស្ទួយ​វិស័យ​ទេសចរណ៍​ក្នុងស្រុក តាមរយៈ​ការចំណាយ២ដង​ក្នុងអំឡុងពេល​ឈប់សម្រាក​ដាច់ពីគ្នា។

ទី៣ អាច​អនុញ្ញាតឱ្យ​ម្ចាស់​សណ្ឋាគារ និង​ម្ចាស់ផ្ទះ​សំណាក់​នៅតាម​តំបន់​ទេសចរណ៍សំខាន់ៗ មាន​ពេលវេលា​គ្រប់គ្រាន់ ក្នុងការ​រៀបចំ​បើក​ដំណើរការ​អាជីវកម្មរ​បស់​ខ្លួន​ឡើងវិញ សម្រាប់​ទទួលភ្ញៀវ​ទេសច​រដែ​លម​ក​កម្សាន្ត ក្នុងអំឡុងពេល​ឈប់សម្រាក។ទី៤ កម្មករ និយោជិត​ទទួលបាន​ប្រាក់បៀវត្សរ៍ មុនពេល​ឈប់សម្រាក ដែលមាន​ភាពងាយស្រួល​ក្នុងការ​ធ្វើដំណើរ​កំសាន្ត និង​ចំណាយ​នានា៕