កម្ពុជានឹងរកបានចំណូលសរុបក្នុងទំហំទឹកប្រាក់ប្រមាណ ២៧,៥ ពាន់លានដុល្លារ នៅឆ្នាំនេះ

ដោយ ៖ ប៊ី

ភ្នំពេញ ៖ ផលិតផលសរុបក្នុងស្រុក តាមការប៉ាន់ស្មាន នឹងមានទំហំប្រាក់ជាង ១១០ ពាន់ប៊ីលានរៀល ស្មើនឹងប្រមាណ ២៧,៥ពាន់លានដុល្លារ នៅឆ្នាំ២០២០ ដែលអាចងើបឡើងខ្ពស់ជាងឆ្នាំ២០១៩ បន្តិចបន្តួច។ នេះបើយោងតាមរបាយការណ៍នៃស្ថានភាពក្របខ័ណ្ឌគោលនយោបាយម៉ាក្រូសេដ្ឋកិច្ច ឆ្នាំ២០២០ ដែលចេញផ្សាយកាលពីពេលថ្មីៗនេះ។

នៅក្នុងឆ្នាំ២០២០ នេះពាក់ព័ន្ធក្របខ័ណ្ឌគោលនយោបាយសេដ្ឋកិច្ច តាមការប៉ាន់ស្មាន នៃសូចនាករផលិតផលសរុបក្នុងស្រុក (ផសស) ថ្លៃបច្ចុប្បន្ន នឹងមានទំហំប្រមាណ ២៧,៥ពាន់លានដុល្លារ អាចខ្ពស់ជាងឆ្នាំ២០១៩ បន្តិចបន្តួច។

នៅក្នុងឆ្នាំ២០២១ ត្រូវបានព្យាករណ៍ថា នឹងអាចងើបឡើងដល់ប្រមាណ ២៩,២៥ពាន់លាន ដែលក្នុងនោះ ផសស សម្រាប់ប្រជាជនម្នាក់ អាចស្ថិតក្នុងរង្វង់ ១,៦៨៣ ដុល្លារ, ចំពោះនៅឆ្នាំ២០២១ ត្រូវបានព្យាករថា នឹងងើបដល់ ១,៧៧១ ដុល្លារ នឹងអាចមានកំណើន ផសស ពិត ក្នុងរង្វង់អវិជ្ជមាន ១,៩% ខណៈនៅឆ្នាំ២០២១ នឹងហក់ឡើងដល់ ៣,៥%។

ចំណែកអត្រាអតិផរណា ផសស (កំណើនប្រចាំឆ្នាំ) ក្នុងឆ្នាំ២០២០ នេះ នឹងអាចស្ថិតក្នុងរង្វង់ ២,៦% ខណៈនៅឆ្នាំ២០២១ ត្រូវបានព្យាករណ៍ថា នឹងស្ថិតក្នុង ៣,១%, ចំពោះអត្រាកំណើនជាមធ្យមប្រចាំឆ្នាំវិញ, នៅក្នុងឆ្នាំ២០២០ នេះ អាចស្ថិតក្នុងរង្វង់ ២,៨% នឹងនៅឆ្នាំ ២០២១ អត្រាកំណើននេះនឹងអាចឡើងដល់ ៣,១% ។ ដោយពាក់ព័ន្ធនឹងការនាំចេញ-ចូល, ក្នុងនោះបើគិតជាភាគរយ ផលិតផលសរុបនៃនាំចេញ គឺស្ថិតក្នុងរង្វង់កំណើនជិត ៥០% ដោយឡែកនៅក្នុងឆ្នាំ ២០២១ ត្រូវបានព្យាករណ៍ថា នឹងងើបឡើងជាង ៥០% ។

ចំណែកការនាំចូលវិញ បើគិតជាភាគរយនៃផលិតផលសរុបនៃការនាំចូល អាចមានកំណើនជាង ៧៨% ខណៈនៅឆ្នាំ២០២១ ត្រូវបានព្យាករណ៍ថា នឹងអាចថមថយមកនៅក្រោម ៧៨%, ក្នុងនោះចំពោះសមតុល្យ ពាណិជ្ជកម្ម គិតជាភាគរយនៃ ផសស មានប្រមាណ –២៨,៤% ។ ចំណែកទុនបម្រុងអន្តរជាតិវិញ មានជាង ១៦ ពាន់លានដុល្លារ ដែលអាចនឹងធ្វើការនាំចូលបាន ៨,៥% ខែ៕

តើខេត្តស្ទឹងត្រែងមានសក្តានុវិនិយោគអ្វីខ្លះ?

ដោយ ៖ វុត្ថា

ភ្នំពេញ ៖ ខេត្តស្ទឹងត្រែង ស្ថិតនៅភាគឦសាននៃប្រទេសកម្ពុជា មានចម្ងាយ ៤៥៥ គីឡូម៉ែត្រ ពីរាជធានីភ្នំពេញ មានព្រំប្រទល់ខាងជើងជាប់ខេត្តចាំប៉ាសាក់ និងខេត្តអត្តពឺ នៃប្រទេសឡាវ ខាងកើតជាប់ខេត្តរតនគិរី ខាងត្បូងជាប់ខេត្តក្រចេះ និងខេត្តមណ្ឌលគិរី ខាងលិខជាប់នឹងខេត្តព្រះវិហារ និងខេត្តកំពង់ធំ។

ខេត្តស្ទឹងត្រែងមានផ្ទៃដី ១២ ០១៦ គីឡូម៉ែត្រការ៉េ ចែកចេញជា ៦ ក្រុង / ស្រុក ៣៤ ឃុំ/សង្កាត់ និង ១២៨ ភូមិ មានស្រុកចំនួន ២ ជាប់ព្រំដែនឡាវ គឺស្រុកសៀមប៉ាង និងស្រុកបុរីអូរស្វាយ សែនជ័យ បច្ចុប្បន្នខេត្តមានប្រជាជន ១៥៩.៥៦៥ នាក់ ស្រី ៧៦.៤៧២ នាក់ ស្មើនឹង ៣៤.៦២៧ គ្រួសារ ក្នុងនោះ ប្រជាពលរដ្ឋអាយុ ១៨ ឆ្នាំ ឡើង ៨៥.៣៦៨ នាក់ គិតជាដង់ស៊ីតេ ប្រជាជនស្មើនឹង ១៣នាក់ ក្នុង១ គីឡូម៉ែត្រការ៉េ។

ប្រជាជនភាគច្រើន រស់នៅចិញ្ចឹមជីវភាព ដោយពឹងផ្អែកលើវិស័យកសិកម្ម ដែលមានស្រែ ចម្ការ ដាំដំណាំកសិឧស្សាហកម្ម ដំណាំរួមផ្សំ និងការនេសាទជាដើម។ ក្រៅពីវិស័យកសិកម្ម មានវិស័យពាណិជ្ជកម្ម ឧស្សាហកម្ម-សិប្បកម្ម សេវាកម្ម និងមន្ត្រីរាជការសាធារណៈដែលជាមូលដ្ឋានក្នុងការលើកកម្ពស់ជីវភាពរស់នៅប្រចាំថ្ងៃ។

កំណើនផលិតផលក្នុងស្រុកសរុបសម្រាប់ប្រជាជនម្នាក់ កើនឡើងពី ១១៥០ ដុល្លារក្នុងឆ្នាំ ២០១៦ ដល់ប្រមាណ ១៥០០ ដុល្លារក្នុងឆ្នាំ ២០១៩ និងអត្រាភាពក្រីក្រថយចុះពី ២៧ភាគរយ ក្នុងឆ្នាំ ២០១៦ មកត្រឹម ២៤ ភាគរយក្នុងឆ្នាំ ២០១៩។

សក្តានុពលវិនិយោគ

ខេត្តស្ទឹងត្រែងមានផ្ទៃដីធំទូលាយដែលអាចវិនិយោគលើវិស័យកសិឧស្សាហកម្ម និងផលិតផលកសិកម្ម ។ មានទន្លេ ៤ ហូកាត់ គឺទន្លេមេគង្គ ទន្លេកុង ទន្លេសាន និងទន្លេស្រែពក ដែលទន្លេទាំងនេះ ជាប្រភពធនធានធម្មជាតិជាតិសំបូរបែប ប្រភពទឹកប្រើប្រាស់ និងធ្វើកសិកម្ម ជាមូលដ្ឋានតំបន់អេកូទេសចរណ៍ ទីជម្រកសម្រាប់ការពងកូនរបស់ពពួកត្រីមេពូជ ជាតំបន់ផ្តល់ជីវិតនៃប្រព័ន្ធជីវៈចម្រុះទាំងឡាយ និងជាអាងស្តុកនៅធនធានមច្ឆាជាតិដ៏សំខាន់ សម្រាប់រួមចំណែកឆ្លើយតប នឹងបញ្ហាសន្តិសុខស្បៀង ក្នុងនោះ ជាមធ្យមផលនេសាទដែលប្រមូលបានប្រមាណ ៥ ០០០ តោនក្នុងមួយឆ្នាំៗ ។

សណ្ឋានដីខេត្តជាតំបន់ខ្ពង់រាប មានព្រៃភ្នំ ទន្លេស្ទឹង បឹងបួ អូរ និងដីកោះច្រើនកន្លែង ដោយបានកំណត់ជាបណ្តុំនៃប្រព័ន្ធអេកូឡូស៊ី ជីវៈចម្រុះ និងមានតំបន់ការពារធម្មជាតិច្រើន រួមានឧទ្យានជាតិវ៉ឺនសៃ-សៀងប៉ាង ឧទ្យានជាតិវីរៈជ័យ តំបន់រ៉ាមសារ ដែនជម្រកសត្វ “ព្រៃឡង់” និងដែនជម្រកសត្វព្រៃសៀមប៉ាង។

ខេត្តមានទំនប់ទំនប់វ៉ារីអគ្គិសនី ១ កន្លែង មានអនុភាព ៤០០ មេហ្គាវ៉ាត់ មានស្ពានឆ្លងកាត់ទន្លេចំនួន ៤កន្លែង និងមានផ្លូវជាតិសម្រាប់បម្រើការធ្វើចរាចរណ៍ភ្ជាប់ទៅកាន់រាជធានីភ្នំពេញ ប្រាសាទអង្គរវត្ត តំបន់មាត់សមុទ្រ និងទៅកាន់បណ្តាខេត្តផ្សេងៗទៀត ទូទាំងប្រទេស ជាពិសេសខ្សែផ្លូវជាតិឆ្លងកាត់ខេត្តសុទ្ធតែអាចធ្វើដំណើរទៅកាន់បណ្តាប្រទេសជិតខាង មានប្រទេសឡាវ ថៃ វៀតណាម ជាដើម៕

ខេត្តកំពង់ស្ពឺ គ្រោងបង្កើតផ្ទះស្នាក់លម្ហែរនៅរមណីយដ្ឋានទេទឹកពុះ

ដោយ ៖ រ៉ាណេត

កំពង់ស្ពឺ ៖ រដ្ឋបាលខេត្តកំពង់ស្ពឺ តាមរយៈមន្ទីរទេសចរណ៍ខេត្ត បានសិក្សាពីផលប៉ះពាល់លើការសាងសង់សំណង់ស្នាក់នៅបែបកម្សាន្តរយៈពេលខ្លីនៅតំបន់រមណីយដ្ឋានទេទឹកពុះ ដើម្បីផ្តល់ភាពងាយស្រួលដល់ទេសចរជាតិ និងអន្តរជាតិ អាចកម្សាន្តបានក្នុងរយៈពេលយូរ មានសុវត្ថភាពខ្ពស់។

អភិបាលខេត្តកំពង់ស្ពឺ លោក វ៉ី សំណាង បានទទួលស្គាល់ពីភាពទាក់ទាញ និងសក្ដានុពលរបស់រមណីយដ្ឋានទេទឹកពុះ ដែលស្ថិតនៅភូមិពុទ្រា ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ហើយក៏ស្ថិតនៅក្នុងគម្រោងរបស់រដ្ឋបាលខេត្ត ដែលនឹងធ្វើការអភិវឌ្ឍន៍ទៅជាតំបន់ទេសចរណ៍កម្សាន្តបែបធម្មជាតិដ៏ទាក់ទាញផងដែរ។

លោក វ៉ី សំណាង បានមានប្រសាសន៍ប្រាប់តាមទូរស័ព្ទ កាលពីដើមសប្ដាហ៍នេះថា បច្ចុប្បន្ននេះ រដ្ឋបាលខេត្តកំពុងតែធ្វើការសិក្សា ស្វែងយល់ពីសក្ដានុពលនៅក្នុងវិស័យទេសចរណ៍ជាជំហ៊ានដំបូង ដោយមានមន្ត្រីជំនាញរបស់ខេត្តមួយក្រុង ចុះធ្វើការបានមួយដំណាក់កាលរួចហើយ។ លោកបានបន្តថា “មុនពេលធ្វើការវិនិយោគ យើងត្រូវតែមានការសិក្សាឱ្យបានលម្អិតទៅលើភាពល្អប្រសើរនៃតំបន់ និងភាពរងផលប៉ះពាល់ពីការអភិវឌ្ឍ ដើម្បីមានវិធានការការពារជាមុន ហើយខេត្តក៏គាំទ្រទៅលើគម្រោងនេះផងដែរ”។

ប្រធានមន្ទីរទេសចរណ៍ខេត្តកំពង់ស្ពឺ លោក សៅ សារ៉ន បានមានប្រសាសន៍ថា ការរៀបចំឱ្យមានផ្ទះស្នាក់នៅនេះ គឺដើម្បីបង្កលក្ខណៈងាយស្រួលដល់ភ្ញៀវទេសចរដែលមានបំណងចង់ស្នាក់នៅកម្សាន្តក្នុងរមណីយដ្ឋាននេះ ដោយសាររមណីយដ្ឋានទេទឹកពុះ មានទឹកក្តៅបែបធម្មជាតិ និងមានអ្នកមានជំនឿខ្លះជឿថាដោយគ្រាន់តែត្រាំទឹក អាចព្យាបាលជំងឺជាច្រើនមុខ ដូចជាជំងឺសើស្បែក កន្តួលរមាស់ ជំងឺលើសឈាម ទឹកនោមផ្អែមជាដើម ដែលនេះជាជំនឿមានតាំងពីបុរាណមកម៉្លេះ ។

លោកបានបញ្ជាក់ថា “បច្ចុប្បន្ន រមណីយដ្ឋានទេទឹកពុះមានត្រឹមតែកញ្ចុះសម្រាប់អង្គុយលេងបរិភោគអាហារ និងទីតាំងទឹកក្តៅធម្មជាតិតែប៉ុណ្ណោះ ដែលធ្វើឱ្យចំនួនភ្ញៀវទេសចរនៅមានកម្រិតនៅឡើយ”។ លោកបានបន្តថា “គម្រោងនេះមានការចូលរួមសហការពីអាជ្ញាធរពាក់ព័ន្ធជុំវិញខេត្ត ដោយមានបែបចែកទៅមានជំនាញនីមួយៗ ។ មន្ទីរមានគម្រោងរៀបចំសហគមន៍នេះធ្វើឱ្យមាន Home stay ដែលហៅថាផ្ទះស្នាក់នៅ និងមានកន្លែងហូបឆ្ងាញ់ៗ ហើយការរៀបចំនេះ គឺយើងមានការសហការជាមួយមន្ទីរជាច្រើន ពាក់ព័ន្ធជាមួយនឹងមន្ទីរបរិស្ថាន មន្ទីរអភិវឌ្ឍន៍ជនបទ ដោយមន្ទីរអភិវឌ្ឍន៍ជនបទចូលរួមផងដែរ”៕

សម្ដេចតេជោ ៖ តាមរយៈព្រលានយន្តហោះអន្តរជាតិភ្នំពេញថ្មី នឹងជួយទាក់ទាញការវិនិយោគពីបរទេសបន្ថែមទៀត

ដោយ ៖ រ៉ាណេត

ភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានលើកឡើងថា កម្ពុជានឹងកាន់តែទាក់ទាញបានភ្ញៀវទេសចរ និងវិនិយោគិនបរទេសកាន់តែច្រើនថែមទៀត ក្រោយពីព្រលានយន្តហោះអន្តរជាតិភ្នំពេញថ្មីកសាងរួចរាល់នៅឆ្នាំ២០២៣ខាងមុខនេះ។

នៅក្នុងឱកាសអញ្ជើញពិនិត្យវឌ្ឍនភាពនៃការសាងសង់ព្រលានយន្តហោះអន្តរជាតិថ្មីនេះ កាលពីថ្ងៃទី២២ ខែមិថុនា ឆ្នាំ២០២០ សម្ដេចតេជោ ហ៊ុន សែន បានមានប្រសាសន៍ដោយបង្ហាញពីក្ដីរំពឹងប្រកបដោយភាពជឿជាក់ថា នឹងជួយបង្កើនកំណើនសេដ្ឋកិច្ចកម្ពុជាបានកាន់តែប្រសើរ និងផ្តល់ទំនុកចិត្តដល់បណ្តាអ្នកវិនិយោគអន្តរជាតិបានកាន់តែច្រើន។

សម្តេចតេជោ បានមានប្រសាសន៍សង្កត់ធ្ងន់ថា បន្ទាប់ពីគម្រោងសាងសង់ព្រលានយន្តហោះអន្តរជាតិថ្មីមួយនេះត្រូវបានបញ្ចប់ដាក់ឱ្យដំណើរជាផ្លូវការ ក្រៅពីអាចជួយសម្រួលដល់ការធ្វើដំណើរ និងដឹកជញ្ជូនតាមផ្លូវអាកាសទាំងក្នុង និងក្រៅស្រុក ថែមទាំងអាចមានលទ្ធភាពក្នុងការទាក់ទាញកំណើនទេសចរអន្តរជាតិ ជាពិសេសវិនិយោគិនមកពីបណ្តាប្រទេសនានាជុំវិញពិភពលោកផងដែរ ខណៈដែលបច្ចុប្បន្នលទ្ធផលនៃការសាងសង់បានប្រមាណជាង៣០ភាគរយ។

ជាមួយគ្នានេះ សម្ដេចតេជោ ក៏បានកោតសរសើរដល់គណៈកម្មការសាងសង់ដែលបានប្រឹងប្រែងសម្របសម្រួល ដោះស្រាយបញ្ហាផ្សេងៗ ដើម្បីសម្រួលដល់ការសាងសង់ព្រលានយន្តហោះថ្មីនេះ ហើយក៏ជាការរួមចំណែកផ្តល់ការងារដល់ប្រជាពលរដ្ឋដែលកំពុងជួបវិបត្តិការងារដោយសារជំងឺ Covid-19 ផងដែរ ហើយនេះក៏ជាគោលដៅមួយសំខាន់សម្រាប់ចក្ខុវិស័យកម្ពុជា ឆ្នាំ២០៥០ ក្នុងការបំពេញតម្រូវការ។

នៅក្នុងឱកាសជាមួយគ្នានេះ សម្តេចតេជោ ក៏បានបញ្ជាក់ថា ក្រោយពីការស្ថាបនាព្រលានយន្តហោះអន្តរជាតិភ្នំពេញថ្មីនៅខេត្តកណ្ដាលនេះរួចរាល់ ព្រលានយន្តហោះចាស់ ពោធិ៍ចិនតុង គឺរក្សាទុកនៅដដែល តែអាចប្រែក្លាយគោលដៅប្រើប្រាស់ ដូចជា ទី១) ជាព្រលានយន្ត ហោះសម្រាប់កងទ័ព ទី២) ប្រើសម្រាប់ការហោះហើរផ្ទៃក្នុង ទី៣) ប្រើសម្រាប់ការដឹកជញ្ជូន ទំនិញគ្រប់ប្រភេទ និងទី៤ ប្រើសម្រាប់ភ្ញៀវ និងថ្នាក់ដឹកនាំជាន់ខ្ពស់ផ្លូវការ។

ព្រលានយន្តហោះអន្តរជាតិភ្នំពេញថ្មី ដែលស្ថិតនៅព្រំប្រទល់ស្រុកកណ្តាលស្ទឹង ខេត្តកណ្ដាល និងស្រុកបាទី ខេត្តតាកែវ នេះគឺជាប្រភេទព្រលានយន្ដហោះ 4F ដែលអាចឱ្យយន្តហោះធំៗ ដូចជា Airbus A380-800 និង Boeing 747-800 ចុះចតបាន។ ព្រលានយន្តហោះថ្មីនេះ សាងសង់លើផ្ទៃដីទំហំ ប្រមាណ ២,៦០០ហិកតា ក្រោមការវិនិយោគដោយក្រុមហ៊ុន OCIC ក្នុងទំហំទឹកប្រាក់ប្រមាណ ១,៥០០លានដុល្លារអាម៉េរិក ។តាមរយៈវត្តមានព្រលានយន្តហោះអន្តរជាតិមួយនេះ អាចទទួលអ្នកដំណើរបានប្រមាណ១៣លាននាក់នៅឆ្នាំ២០៣០ ហើយអាចទទួលអ្នកដំណើរ៣០លាននាក់ នៅឆ្នាំ២០៥០ ៕

ផ្សារប្រវត្តិសាស្ត្រខ្មែរនៅទីក្រុងហូជីមិញកំពុងទាក់ទាញភ្ញៀវទេសចរណ៍

ដោយ ប៊ី

ភ្នំពេញ៖ មានអាយុកាលជាងកន្លះសតវត្ស ទីផ្សារប្រពៃណីរបស់កម្ពុជានៅទីក្រុងហូជីមិញបាននិងកំពុងទាក់ទាញភ្ញៀវទេសចរជាយូរមកហើយជាមួយនឹងតម្លៃសមរម្យ។

លាក់ខ្លួននៅខាងក្នុងអាឡី ៣៧៤/៥១ ផ្លូវ Le Hong Phong សង្កាត់ ១០នៅក្នុងប្រទេសវៀតណាម ផ្សារកម្ពុជា ដែលហៅថាផ្សារ Le Hong Phong គឺអាចចូលបានដោយថ្មើរជើង ឬម៉ូតូ។ មានណែនាំថា អ្នកចតយានយន្តរបស់អ្នកនៅជិតច្រកទ្វារក្នុងតម្លៃ ៥.០០០ ដុងដល់ ១០,០០០ ដុង (០,២ ឬ០,៤ ដុល្លារ) ។

អាជីវករខ្មែរ វៀតណាមបានស្នាក់នៅក្នុងប្រទេសវៀតណាមអស់ជាច្រើនទសវត្សមកហើយ ដោយបានភៀសខ្លួនទៅនៅទសវត្សឆ្នាំ ១៩៧០ ដោយសារសង្គ្រាមស៊ីវិល។

លោកស្រី Ngo Thi Bach Cuc អាយុ ៦៣ ឆ្នាំ នៅតែចាំពីថ្ងៃ ដែលលោកស្រីដើរតាមម្តាយ និងបងប្អូនស្រីរបស់លោកស្រី ឆ្លងកាត់ព្រំដែន ដើម្បីតាំងទីលំនៅក្នុងតំបន់ផ្សារ ដែលស្ងាត់ស្ងៀម។ លោកស្រីគឺជាអ្នកលក់ជំនាន់ទី ២ ម្នាក់នៅក្នុងទីផ្សារនេះ។

មុនឆ្នាំ ១៩៧៥ ផ្លូវ Le Hong Phong ត្រូវបានគេដាក់ឈ្មោះថា Pétrus Ký ។ នៅចុងទសវត្សឆ្នាំ ១៩៤០ ដល់ដើមទសវត្ស ១៩៥០ ឡានក្រុងពីទីក្រុងហូជីមីញទៅកាន់តំបន់ជាច្រើននៃប្រទេសវៀតណាមបានប្រមូលផ្តុំគ្នានៅទីនេះ មុនពេលចាប់ផ្តើមចេញដំណើរ។ ពាណិជ្ជកររកឃើញឱកាសល្អជួលផ្ទះនៅក្បែរៗនេះជាបន្តបន្ទាប់។

អ្នកស្រី Gai អាយុ ៥៧ ឆ្នាំដែលបើកតូបលក់ភេសជ្ជៈពេលយប់បាននិយាយថា “ផ្ទះខ្លះបម្រើជាកន្លែងស្តុកទុក។ ក្រោយមកផ្លូវ Ho Thi Ky មានភាពល្បីល្បាញដោយសារផ្កាដាឡាត់។ ផ្លូវ Ho Thi Ky ក៏មាននៅក្នុងស្រុក ១០ ដែរគឺជាមធ្យោបាយមួយផ្សេងទៀត ដើម្បីចូលមកទីផ្សារកម្ពុជា។

មានតែអាជីវកម្មខ្នាតតូចចំនួន ១០ ប៉ុណ្ណោះនៅទីនេះក្នុងទសវត្សឆ្នាំ ១៩៨០ ។ នៅឆ្នាំ ១៩៨៨ គ្រួសារជាង ៩០ គ្រួសារនៅជុំវិញផ្សារ Le Hong Phong លក់ផ្កា។ ចំនួននេះបានកើនឡើងដល់ជាង ១០០ គ្រួសារ។

ត្រីងៀតប្រពៃណី, គៅងៀត, នំបញ្ចុក (ទឹកសម្លខ្មែរ) ចេកដុតនំនិងស៊ុបផ្អែមរបស់កម្ពុជាគឺជាការទាក់ទាញទីផ្សារពេញនិយមនៅទីនេះ៕

តើក្រុមហ៊ុនអន្តរជាតិល្បីៗមកពីប្រទេសណាខ្លះចូលរួមសាងសង់ព្រលានយន្តហោះអន្តរភ្នំពេញថ្មី?

ដោយ វុត្ថា

ភ្នំពេញ៖ គម្រោងសាងសង់អាកាសយានដ្ឋានអន្តរជាតិភ្នំពេញថ្មី ដែលមានចម្ងាយពីភ្នំពេញ ២០ គីឡូម៉ែត្រដែលស្ថាបនាលើដីទំហំ ប្រមាណ ២ ៦០០ ហិកតា មានបណ្តោយ ប្រមាណ ៦ គីឡូម៉ែត្រ និងទទឹងប្រមាណ ៤ គីឡូម៉ែត្រ ។ គម្រោងសាងសង់នេះមាន ៣ដំណាក់កាល ដោយដំណាក់កាលទី ១ នឹងរួចរាល់នៅឆ្នាំ២០២៣ ខាងមុខនេះ។

លោក ពុង ឃាវសែ ជាម្ចាស់គម្រោងវិនិយោគលើអាសកាសយានដ្ឋានអន្តរជាតិភ្នំពេញថ្មីនេះបានឱ្យដឹងថា សម្រាប់ការរចនាប្លង់ ត្រូវបានគូរដោយក្រុមហ៊ុន Foster and Partners របស់ចក្រភពអង់គ្លេស ដោយប្រើប្រាស់ពេល ១ឆ្នាំ ២ ខែដោយបញ្ចប់នៅខែតុលាឆ្នាំ ២០១៩ ហើយក្រុមហ៊ុនដែលឈ្នះក្នុងការដេញថ្លៃសាងសងសង់គឺក្រុមហ៊ុនចិន China Construction Division 3 ក្នុងទំហំទឹកប្រាក់ ៥៩៥លានដុល្លារអាមេរិក ។

លោកបន្តថា ”តំបន់ហោះហើររបស់អាកាសយានដ្ឋានអន្តរជាតិភ្នំពេញថ្មីនេះ ត្រូវបានរចនាឡើងដោយក្រុមហ៊ុន Eric របស់ចិន និងបានបញ្ចប់នៅក្នុងខែមិថុនានេះ នឹងត្រូវដាក់ដេញថ្លៃ នៅខែសីហាខាងមុខ” ។

លោកបន្ថែមថា “កម្ពុជាបានអញ្ជើញក្រុមហ៊ុនល្បីៗជាច្រើនចូលរួមរចនា ពិគ្រោះ និងពិភាក្សាយោបល់ដើម្បីគាំទ្រនូវបច្ចុកទេសគម្រោងសាងសង់នូវអាកាសយានដ្ឋានអន្តរជាតិភ្នំពេញថ្មីនេះដែលរួមមានមកពីប្រទេសអង់គ្លេស ចិន សឹង្ហបុរី ហូរឡង់ និងកូរ៉េខាងត្បូងជាដើម ក្នុងការធ្វើនូវផែនការមេ គ្រប់គ្រងគម្រោង ត្រួតពិនិត្យបច្ចេកទេស ផែនការពាណិជ្ជកម្ម និងរចនាប៉មត្រួតពិនិត្យចរាចរណ៍តាមផ្លូវអាកាសចរណ៍” ។

អ្នកឧកញ៉ាពុង ឃាវសែ បញ្ជាក់ទៀតថា អាកាសយានដ្ឋានអន្តរភ្នំពេញថ្មីនេះ បន្ទាប់ពីសាងសង់រួច នឹងមានសមត្ថភាព នៅក្នុឆ្នាំ ២០២៣ អាចទទួលអ្នកដំណើរ ១៣លាននាក់ នៅឆ្នាំ២០៣០ អាចទទួលអ្នកដំណើរ ៣០លាននាក់ និងនៅឆ្នាំ២០៥០ អាចទទួលអ្នកដំណើរ ៥០លាននាក់។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា សង្ឃឹមថា កម្ពុជានឹងកាន់តែទាក់ទាញបានភ្ញៀវទេសចរ និងអ្នកវិនិយោគកាន់ តែច្រើន ថែមទៀត ក្រោយពីព្រលានយន្តហោះអន្តរជាតិភ្នំពេញថ្មីសាងសង់រួចរាល់នាពេលខាងមុខនេះ ខណៈព្រលានយន្តហោះនេះ ស្ថិតនៅខេត្តកណ្ដាល និងតាកែវដែលមានចម្ងាយប្រមាណជា២០គីឡូម៉ែត្រពីរាជធានីភ្នំពេញនោះ។

អាកាសយានដ្ឋានអន្តរជាតិភ្នំពេញនេះ វិនិយោគក្នុងទឹកប្រាក់ប្រមាណ ១៥០០លានដុល្លារ ដែលជាប្រភេទ 4F គឺប្រភេទព្រលានយន្តហោះធំ ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន។ ក្រុមហ៊ុនវិនិយោគមានមហិច្ឆិតា អភិវឌ្ឍន៍ជាព្រលានយន្ត ហោះថ្មីនេះឲ្យធំ និងទំនើបជាងគេនៅតំបន់អាស៊ី៕

ចំណេះដឹង! តើជនបរទេសត្រូវបំពេលលក្ខខណ្ឌអ្វីខ្លះដើម្បីស្នើសុំសញ្ជាតូបនីយកម្ម?

ដោយ វុត្ថា

ភ្នំពេញ៖ ជនបរទេសដែលអាចសុំសញ្ជាតូបនីយកម្មបាន ត្រូវបំពេញលក្ខខណ្ឌដូចតទៅ ៖ ត្រូវមានលិខិតបញ្ជាក់ថា មានគំនិតមារយាទនិងសីលធម៌ល្អ ត្រូវមានលិខិតថ្កោលទោសបញ្ជាក់ថា ពុំដែលមានទោសពីបទព្រហ្មទណ្ឌណាមួយជននោះមានទីលំនៅក្នុងព្រះរាជាណាចក្រកម្ពុជា ហើយស្នាក់នៅជាប់ចំនួន ៧ ឆ្នាំ ដោយគិតពីថ្ងៃដែលបានទទួលបណ្ណស្នាក់នៅ ចេញឲ្យក្នុងក្របខណ្ឌនៃច្បាប់ស្តីពីអន្តោប្រវេសន៍ត្រូវមានទីលំនៅក្នុងព្រះរាជាណាចក្រកម្ពុជា និងមានបណ្ណស្នាក់នៅដែលចេញឲ្យក្នុងក្របខ័ណ្ឌនៃច្បាប់ស្តីពីអន្តោប្រវេសន៍ នៅពេលដាក់ពាក្យសុំសញ្ជាតូបនីកម្ម ត្រូវចេះនិយាយភាសាខ្មែរ ចេះអក្សរខ្មែរ និងយល់ដឹងពីប្រវត្តិសាស្ត្រខ្មែរខ្លះ។

ជនបរទេសនោះត្រូវបង្ហាញភស្តុតាងច្បាស់ថា ខ្លួនអាចរស់នៅក្នុងសង្គមខ្មែរបានដោយសុខដុម ព្រមទាំងទទួលបាននូវទំនៀមទម្លាប់ និងប្រពៃណីល្អរបស់ខ្មែរត្រូវមានបញ្ញា និងកាយសម្បទាដែលមិននាំឲ្យមានគ្រោះថ្នាក់ ឬនាំឲ្យមានបន្ទុកដល់ជាតិ។

ចំពោះជនបរទេសដែល រស់នៅដោយស្របច្បាប់នៅលើទឹកដីនៃប្រទេសកម្ពុជាអស់រយៈពេល ៧ឆ្នាំ អាចដាក់ពាក្យចូលជាសញ្ជាតិខ្មែរបាន តាមរយៈសញ្ជាតូបនីយកម្ម ដោយថែមទាំងត្រូវបំពេញលក្ខខណ្ឌមួយចំនួនដែលច្បាប់តម្រូវទើបអាចទទួលសញ្ជាតិខ្មែរបាន។ បន្ថែមជាងនេះទៅទៀត ចំពោះជនបរទេសអន្តោប្រវេសន្តណាដែលកើតក្នុងព្រះរាជាណាចក្រកម្ពុជា រយៈពេលស្នាក់នៅជាប់ចំនួន ៧ឆ្នាំ ត្រូវបន្ថយមកនៅ ៣ឆ្នាំវិញ ។

រីឯ ជនបរទេសដែលបានទទួលលិខិតអនុញ្ញាតឲ្យវិនិយោគត្រឹមត្រូវតាមច្បាប់ ពីស្ថាប័នមានសមត្ថកិច្ច (ក្រុមប្រឹក្សាអភិវឌ្ឍកម្ពុជា) ហើយបានចំណាយទុនអនុវត្តគម្រោងវិនិយោគជាក់ស្តែងនៅក្នុងព្រះរាជាណាចក្រកម្ពុជា ជនបរទេសនោះអាចដាក់ពាក្យសុំចូលសញ្ជាតូបនីយកម្មបាន ក្នុងករណីជនបរទេសនោះបានបំពេញលក្ខខណ្ឌដូចមានចែងក្នុងចំណុចទី១ ទី២ ទី៤ ទី៥ និងទី៦ មាត្រា ១៩នៃច្បាប់នេះ និងបានស្នាក់នៅស្របច្បាប់យ៉ាងហោចរយៈពេល ១២ខែ ពេញលេញក្នុងព្រះរាជាណាចក្រកម្ពុជា។ ចំនួនទឹកប្រាក់ វិស័យអាទិភាព និងប្រភេទគម្រោង វិនិយោគ ព្រមទាំងលក្ខខណ្ឌផ្សេងទៀត ត្រូវកំណត់ដោយអនុក្រឹត្យ។

ជនបរទេសណា ដែលបានធ្វើអំណោយជាសាច់ប្រាក់ដល់ថវិកាជាតិ សម្រាប់ជាផលប្រយោជន៍ដល់ការអភិវឌ្ឍសេដ្ឋកិច្ច ឬវិស័យមនុស្សធម៌នៅព្រះរាជាណាចក្រកម្ពុជា ជនបរទេសនោះអាចដាក់ពាក្យសុំចូលសញ្ជាតិខ្មែរបាន ក្នុងករណីដែលជននោះបានបំពេញលក្ខខណ្ឌដូចមានចែងក្នុងចំណុចទី១ ទី២ ទី៤ និងទី៦ មាត្រា ១៩ នៃច្បាប់នេះ និងបានស្នាក់នៅស្របច្បាប់យ៉ាងហោចរយៈពេល ៦ខែពេញលេញ ក្នុងព្រះរាជាណាចក្រកម្ពុជា។ ចំនួនទឹកប្រាក់អំណោយជាសាច់ប្រាក់ដល់ថវិកាជាតិ ឬវិស័យមនុស្សធម៌ត្រូវកំណត់ដោយអនុក្រឹត្យ។

បន្ថែមជាងនេះទៅទៀត ចំពោះជនបរទេសដែលបានបង្ហាញនូវភស្តុតាងថា បានផ្តល់គុណសម្បត្តិពិសេស ឬថ្វីដៃពិសេសអ្វីមួយជាប្រយោជន៍ដល់ព្រះរាជាណាចក្រកម្ពុជា និងបានទទួលស្គាល់ដោយរាជរដ្ឋាភិបាលនៃព្រះរាជាណាចក្រកម្ពុជា អាចដាក់ពាក្យស្នើសុំចូលសញ្ជាតិខ្មែរដោយសញ្ជាតូបនីយកម្ម ៕

CBRE៖ អ្នកវិនិយោគអចលនទ្រព្យពាណិជ្ជកម្មគ្រោងចូលមកក្នុងទីផ្សារអាស៊ីប៉ាស៊ីហ្វិកវិញ

ដោយ ហ្សូលី

ភ្នំេពញ៖ ដោយសារតែការបិទទ្វារនៅក្នុងប្រទេសភាគច្រើននៅតំបន់អាស៊ីប៉ាស៊ីហ្វិកបានឈានដល់ទីបញ្ចប់ វិនិយោគិនអចលនទ្រព្យពាណិជ្ជកម្មកំពុងផ្លាស់ប្តូរបន្តិចម្តងៗ ពីការគ្រប់គ្រងទ្រព្យសម្បត្តិនិងការជួលរធ ដើម្បីធ្វើផែនការការចូលទីផ្សារម្តងទៀត។ នេះបើយោងតាមរបាយការណ៍ទស្សនៈទីផ្សារមូលធនរបស់ CBRE ដែលមានចំណងជើងថា“ ឱកាសទិញថ្មីដែលធ្វើឱ្យវិនិយោគិនមានផលចំណេញ” ។

ទោះយ៉ាងណា ទស្សនៈអចលនទ្រព្យត្រូវបានផ្លាស់ប្តូរក្នុងរយៈពេលដ៏ខ្លីដោយសារតែការរីករាលដាលនៃជំងឺ Covid-19 មូលដ្ឋានគ្រឹះទីផ្សារអចលនទ្រព្យដែលកំពុងកើនឡើង ការបង្កើនល្បឿននៃការផ្លាស់ប្តូររចនាសម្ព័ន្ធសំខាន់ៗមួយចំនួន និងការធ្លាក់ចុះសេដ្ឋកិច្ចដំបូងនៅក្នុងតំបន់ក្នុងរយៈពេល ៤០ ឆ្នាំ នឹងតម្រូវឱ្យវិនិយោគិនទទួលយកយុទ្ធសាស្រ្តខុសគ្នាខ្លាំង។

CBRE បានរកឃើញនូវចំណូលចិត្តរបស់អ្នកទិញរួចទៅហើយ សម្រាប់ទ្រព្យសម្បត្តិដែលមានគុណភាពខ្ពស់ ការវិនិយោគស្នូល និងភាពឧស្សាហ៍ព្យាយាម ដោយសារតែវិនិយោគិនសម្លឹងមើលការបង្កើតលំហូរសាច់ប្រាក់ប្រកបដោយស្ថេរភាពនិងអាចទុកចិត្តបាន។

វិនិយោគនឹងវិលមកវិញក្នុងរយៈពេល ៣ ទៅ ៦ ខែខាងមុខដែលបង្ហាញពីការកើនឡើងជាលំដាប់នៃចំនួនប្រតិបត្តិការនៅត្រីមាសខាងមុខ។ ទោះបីវិនិយោគិនប្រយ័ត្នប្រយែង ក៏បរិមាណវិនិយោគហាក់ដូចជាមិនវិលត្រឡប់ទៅរកកម្រិតធម្មតាមទេ រហូតដល់ពាក់កណ្តាលឆ្នាំ ២០២១។

នៅពេលតម្លៃកាន់តែមានភាពទាក់ទាញនិងការវាយតំលៃត្រូវបានធ្វើបច្ចុប្បន្នភាព CBRE រំពឹងថា អ្នកទិញនឹងស្វែងរកឱកាសធ្វើពាណិជ្ជកម្ម។ ខណៈដែលភាពមិនស៊ីគ្នានៃការរំពឹងតម្លៃអាចរារាំងដល់កិច្ចព្រមព្រៀងមួយចំនួន ក៏CBREរំពឹងថានឹងមានការកើនឡើងនៃអ្នកលក់ (ពាក់កណ្តាលនៃឆ្នាំ ២០២០) ដែលត្រូវបានជំរុញដោយតម្រូវការសាច់ប្រាក់ងាយ ការផុតកំណត់មូលនិធិ និងសម្ពាធនៃការរំដោះសាច់ប្រាក់។

ការរាតត្បាតនេះបានជះឥទ្ធិពលទៅលើការប្រកបការងារ និងផ្លាស់ប្តូរទម្លាប់នៃការទិញរបស់មនុស្ស ដែលនាំឱ្យមានការកើនឡើងនៃការកាន់កាប់ទ្រព្យសម្បត្តិជាក់លាក់។ វិនិយោគិនក៏នឹងប្រើប្រាស់ចិត្តសាស្រ្តនៅពេលអនាគត ដើម្បីមានឥទ្ធិពលនៅលើតម្រូវការផងដែរ៕

កម្ពុជា នឹងពិភាក្សាជាមួយថៃនៅថ្ងៃស្អែកដើម្បីបើកច្រកអន្តរជាតិប៉ោយប៉ែត

ដោយវុត្ថា

បន្ទាយមានជ័យ៖ អភិបាលខេត្តបន្ទាយមានជ័យ លោក អ៊ុំ រាត្រី នឹងជួបពិភាក្សាគ្នាជាមួយ អភិបាលខេត្តស្រះកែវ ប្រទេសថៃ នៅព្រឹកថ្ងៃទី២៣ ខែមិថុនា ឆ្នាំ២០២០ស្អែកនេះ ដើម្បីស្នើបើកច្រកអន្ដរជាតិប៉ោយប៉ែត-ខ្លងលឹក ឡើងវិញ បន្ទាប់ពីបិទការចេញចូលមួយរយៈពេលកន្លងមកនេះ ដោយសារព្រួយបារម្ភពីការឆ្លងជំងឺ Covid-19។

យោងតាមលិខិតរបស់រដ្ឋបាលខេត្តបន្ទាយមានជ័យ ដែលបានដាក់សំណើរទៅកាន់ភាគីថៃ កាលពីថ្ងៃទី១៧ ខែមិថុនា ឆ្នាំ២០២០កន្លងទៅ បានកំណត់ដើម្បីសុំជួបពិភាក្សាគ្នា នៅទីស្នាក់ការគយ ស្រុកអារញ្ញាប្រាថេត ខេត្តស្រះកែវ ដើម្បីបើកច្រកទ្វារព្រំដែនអន្ដរជាតិ ប៉ោយប៉ែត-ខ្លងលឹក។

ច្រកទ្វារអន្ដរជាតិប៉ោយប៉ែត ត្រូវភាគីកម្ពុជា-ថៃ សម្រេចរួមគ្នាបិទជាបណ្ដោះអាសន្ននូវការចេញចូល លើកលែងតែការចរាចរទំនិញរថយន្ដធុនធំប៉ុណ្ណោះ ដើម្បីទប់ស្កាត់ការឆ្លងរីករាលដាល នៃជំងឺ Covid-19។ អាជ្ញាធរខេត្តសាកែវបានសម្រេចបិទជាបណ្តោះអាសន្នចាប់ពីថ្ងៃទី ២៣ ខែមីនា នូវច្រកទ្វារព្រំដែនកម្ពុជា-ថៃគ្រប់កំរិតដែលស្ថិតក្នុងដែនដីខេត្តសាកែវ រួមមាន៖

ក-ច្រកទ្វារអន្តរជាតិចំនួន ២ ទីតាំង៖
១.ច្រកទ្វារអន្តរជាតិប៉ោយប៉ែត(ខេត្តបន្ទាយមានជ័យ)-ខ្លងលឹក(ខេត្តសាកែវ)៖ រាល់ចរាចរណ៍ឆ្លងកាត់ច្រកនេះនឹងត្រូវបានបិទជាបណ្តោះអាសន្ន លើកលែងតែទំនិញដែលទទួលបានការអនុញ្ញាត អ្នកបើកបររថយន្តដឹកទំនិញ ដែលទទួលបានការអនុញ្ញាតនិងបានឆ្លងកាត់ការត្រួតពិនិត្យសុខភាពដោយសមត្ថកិច្ចថៃត្រឹមត្រូវ។

២.ច្រកអន្តរជាតិភ្នំដី(ខេត្តបាត់ដំបង)-បានខៅឌីន(ខេត្តសាកែវ)៖ រាល់ចរាចរណ៍ឆ្លងកាត់ច្រកនេះនឹងត្រូវបានបិទជាបណ្តោះអាសន្នទាំងស្រុង។

ខ-ច្រកទ្វារតំបន់ចំនួន 2 ទីតាំង៖ ច្រកបឹងត្រកួន(ខេត្តបន្ទាយមានជ័យ)-តាប្រាយ៉ា(ខេត្តសាកែវ) និង ច្រកម៉ាឡៃ(ខេត្តបាត់ដំបង)-បានណងព្រឺ(ខេត្តសាកែវ)។ រាល់ចរាចរណ៍ឆ្លងកាត់ច្រកទាំងពីរនេះនឹងត្រូវបានបិទទាំងស្រុង។

គ-ច្រកទ្វារទ្វេភាគីចំនួន 15 ទីតាំង រវាងខេត្តសាកែវ-ខេត្តបន្ទាយមានជ័យ និងរវាងខេត្តសាកែវ-ខេត្តបាត់ដំបង នឹងត្រូវបានបិទទាំងស្រុង។

ជាមួយគ្នានេះ ក្នុងគោលដៅកាត់បន្ថយនិងរាំងខ្ទប់ការរីករាលដាលនៃជំងឺកូវីដ-១៩ នេះដែរ អាជ្ញាធរថៃនៃបណ្តាខេត្តដែលជាប់ព្រំដែនជាមួយកម្ពុជា រួមមាន ខេត្តឧប៊ុនរាជធានី ខេត្តស៊ីសាកេត ខេត្តបុរីរ៉ាំ ខេត្តច័ន្ទបុរី និងខេត្តត្រាត ក៏បានដាក់ចេញនូវវិធានការបិទជាបណ្តោះអាសន្នរាល់ចរាចរណ៍ឆ្លងកាត់ច្រកព្រំដែនកម្ពុជា-ថៃផងដែរ៕

គម្រោងបង្កើតតំបន់សេដ្ឋកិច្ចពិសេស៥០០ហិកតា របស់ក្រុមហ៊ុនកាណាឌីយ៉ា កំពុងជម្រុញឱ្យចរន្តដីធ្លីនៅផ្លូវ៥១ និងឧដុង្គ មានតម្រូវការខ្ពស់

ដោយ ៖ រ៉ាណេត

ភ្នំពេញ ៖ បន្ថែមពីលើគម្រោងអភិវឌ្ឍន៍ធំៗនៅក្នុងវិស័យឧស្សាហកម្ម ក្រោមគោលនយោបាយរបស់រាជរដ្ឋាភិបាលកម្ពុជា ជាមួយនឹងគម្រោងអភិវឌ្ឍន៍បណ្តុំលំនៅឋានបែបទាន់សម័យ បច្ចុប្បន្ន វិស័យដីធ្លីនៅតំបន់ផ្លូវ៥១ និងតំបន់ឧដុង្គ ត្រូវបានគេមើលឃើញថាកំពុងតែមានសកម្មភាពទិញ-លក់យ៉ាងសកម្ម ពិសេស ក្រោយមានគម្រោងបង្កើតតំបន់សេដ្ឋកិច្ចពិសេសលើទំហំដី ៥០០ហិកតា របស់អ្នកឧកញ៉ា ពុង ឃាវសែ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ប្រាប់ឱ្យដឹងថា តំបន់ប៉ែកខាងតំបន់ឧដុង្គ ភ្ជាប់ពីផ្លូវជាតិលេខ៥១ គឺមានគម្រោងអភិវឌ្ឍន៍ជាច្រើន ដែលស្ថិតនៅក្នុងប្លង់គោលរបស់រាជរដ្ឋាភិបាលលើផ្នែកហេដ្ឋារចនាសម្ព័ន្ធ បន្ថែមពីលើគម្រោងអភិវឌ្ឍន៍របស់វិស័យឯកជន។

លោកបានបញ្ជាក់ថា “គម្រោងអភិវឌ្ឍន៍ជាច្រើន នៅក្នុងប្លង់គោលរបស់រដ្ឋាភិបាលនៅផ្លូវជាតិ៥១ ឆ្ពោះទៅកាន់តំបន់ឧដុង្គ ភ្ជាប់ផ្លូវជាតិលេខ៥ នឹងចាប់ផ្ដើមបង្ហាញរូបរាងជាបណ្តើរៗ ជាពិសេសពាក់ព័ន្ធទៅនឹងវិស័យឧស្សាហកម្មរោងចក្រ ស្របទៅនឹងគោលនយោបាយរបស់រដ្ឋាភិបាល ដែលបានដាក់ចេញឱ្យអនុវត្តន៍”។ លោកបន្ថែមថា “តាមគោលការណ៍របស់រដ្ឋាភិបាល នឹងបង្វែររោងចក្រចេញពីក្រុងភ្នំពេញ ទៅតាំងនៅតំបន់ជាយក្រុងតាមលទ្ធភាព ដែលអាចធ្វើទៅបាន ដែលក្នុងនោះតំបន់ផ្លូវជាតិលេខ៥១ ប៉ែកខាងឧដុង្គ គឺស្ថិតនៅក្នុងតំបន់ដែលមានអាទិភាព និងមានសក្ដានុពលក្នុងរយៈពេលយូរ ដោយសារតែកត្តាភូមិសាស្ត្រ មានអំណោយផលលើការដឹកជញ្ជូន”។

អ្វីដែលកាន់តែបង្កលក្ខណៈពិសេសនៅប៉ែកខាងតំបន់ឧដុង្គ និងផ្លូវ៥១ ក្រុមហ៊ុនមហាសេដ្ឋីប្រចាំកម្ពុជា កាណាឌីយ៉ា ដែលមានអ្នកឧកញ៉ា ពុង ឃាវសែ ជាម្ចាស់ បានបង្ហាញពីគម្រោងបង្កើតតំបន់សេដ្ឋកិច្ចពិសេស នៅលើទំហំដី ៥០០ហិកតា ដែលកាន់តែជួយជម្រុញឱ្យតំបន់នេះមានសក្ដានុពលខ្ពស់ និងជះឥទ្ធិពលទៅលើវិស័យដីធ្លី និងលំនៅដ្ឋានផងដែរ។

ស្រដៀងគ្នានេះ អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century21 Fortuna Investment លោក វ៉ា វីរៈ បានមានប្រសាសន៍ថា បើប្រៀបធៀប តំបន់ផ្លូវ៥១រហូតដល់តំបន់ឧដុង្គ គឺមានភាពល្អប្រសើរជាងតំបន់ផ្លូវ៤១ ដោយសារតែប្រព័ន្ធហេដ្ឋារចនាសម្ព័ន្ធមានភាពល្អប្រសើរ និងមានប្រជាជនរស់នៅរួចទៅហើយ ហើយ ឧដុង្គ ក៏ជាតំបន់ទេសចរណ៍វប្បធម៌ ដែលមានកេរ្តិ៍ឈ្មោះប្រចាំតំបន់ស្រាប់។

លោកបានបញ្ជាក់ថា “នៅពេលមានគម្រោងអភិវឌ្ឍន៍កាន់តែច្រើន ជាពិសេសវិស័យឧស្សាហកម្ម វានឹងជម្រុញឱ្យការអភិវឌ្ឍលើវិស័យលំនៅដ្ឋានកើតមានឡើង ដែលជាកត្តាធ្វើឱ្យតម្រូវការនៃការប្រើប្រាស់ដីកើតមាន ហើយតម្លៃដីធ្លីក៏កើនឡើងខ្ពស់ផងដែរ”។ លោកបញ្ជាក់ថា “សម្រាប់ពេលនេះ វានៅតែជាឱកាសសម្រាប់អ្នកវិនិយោគក្នុងវិស័យដីធ្លី និងលំនៅដ្ឋានកម្រិតមធ្យម និងក្រោមមធ្យមនៅឡើយ ដោយសារតែតែតម្លៃដីនៅមានកម្រិតនៅឡើយ”។

នាយកគ្រប់គ្រងទីផ្សារក្រុមហ៊ុន វិមាន អចលនទ្រព្យ លោក សំ ថាវី បានមានប្រសាសន៍ឱ្យដឹងផងដែរថា បច្ចុប្បន្នមានក្រុមហ៊ុនអភិវឌ្ឍន៍ក្នុងស្រុកជាច្រើន បាន និងកំពុងមានសកម្មភាពយ៉ាងមមាញឹកទៅគម្រោងរបស់ខ្លួន ដែលនៅក្នុងរួមមានការអភិវឌ្ឍលំនៅដ្ឋានតម្លៃសមរម្យសម្រាប់ស្នាក់នៅ និងបង្កើតអាជីវកម្ម ការសាងសង់លំនៅដ្ឋានសម្រាប់ជួលដល់កម្មករ-កម្មការិនីរោងចក្រ ក៏ដូចជាគម្រោងអភិវឌ្ឍន៍ពុះដីឡូតិ៍ផងដែរ។

លោក សំ ថារី បានបញ្ជាក់ថា “ទាំងគម្រោងអភិវឌ្ឍន៍លំនៅដ្ឋាន ជាពិសេសគម្រោងដីឡូតិ៍ គឺមានសកម្មភាពទិញលក់យ៉ាងច្រើន។ ជាក់ស្ដែង គម្រោងរបស់ក្រុមហ៊ុន វិមាន អចលនទ្រព្យ ដែលខ្ញុំកំពុងកាន់សព្វថ្ងៃនេះ គឺមានអតិថិជនជាច្រើនគាំទ្រ ដោយសារតែទីតាំងរបស់គម្រោងស្ថិតកន្លែងមានសក្ដានុពល ដែលហ៊ុព័ទ្ធទៅដោយលំនៅឋានរបស់ប្រជាជន មានរោងចក្រ សហគ្រាស រួមជាមួយនឹងគម្រោងអភិវឌ្ឍន៍ជាច្រើនទៀត ដែលនឹងត្រូវសាងសង់ក្នុងពេលដ៏ខ្លីខាងមុខនេះ”។

លោកបន្តទៀតថា “ចំពោះអតិថិជនដែលគាំទ្រគម្រោង មានអ្នកខ្លះទិញសម្រាប់សាងសង់លំនៅដ្ឋានស្នាក់ជាកម្មសិទ្ធិ ហើយអ្នកខ្លះគាត់ទិញសម្រាប់ទុកវិនិយោគបន្តយកចំណេញនៅថ្ងៃខាងមុខ ដោយសារពួកគាត់បានដឹងពីគម្រោងអភិវឌ្ឍន៍នៅក្នុងតំបន់ និងជុំវិញតំបន់ឧដុង្គ។ ពេលនេះតម្លៃដី គឺទាបជាងទីផ្សារនៅឡើយ ដែលជាឱកាសសម្រាប់អតិថិជនដែលបំណង់ចង់ទិញទុកវិនិយោគយកចំណេញ ហើយបើរង់ចាំបន្តិចទៀត តម្លៃអាចនឹងបន្តឡើងថ្លៃ ជាពិសេសក្រោយពេលសំណង់លំនៅឋាន រោងចក្រ សហគ្រាសនានា បង្ហាញខ្លួន”។

សម្រាប់ព័ត៌មានលម្អិតពីគម្រោង វិមាន អចលនទ្រព្យ លោកអ្នកអាចទាក់ទងតាមរយៈទូរស័ព្ទ ៖ ០៣១ ២២ ២២ ០៧១

1...2,3562,3572,358...3,255 Page 2,357 of 3,255