ដោយៈ រ៉ាណេត

ភ្នំពេញៈ ថ្នាក់ដឹកនាំកំពូលប្រទេសកម្ពុជា និងសាធារណរដ្ឋប្រជាមានិតចិននឹងចុះហត្ថលេខាលើកិច្ចព្រមព្រៀងស្ដីពីមូលនិធិពិសេស សម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២០ ជាមួយទំហំទឹកប្រាក់ជាង៧លានដុល្លារ។

យោងតាមសេចក្ដីប្រកាសរបស់ក្រសួងការបរទេស និងសហប្រតិបត្តិការអន្តរជាតិ ដែលគេហទំព័រPropertyarea.asia ទើបទទួលបាននៅព្រឹកថ្ងៃទី២២ មិថុនា ឆ្នាំ២០២០នេះបានឱ្យដឹងថា នៅត្រឹមព្រឹកថ្ងៃទី២៣ ខែមិថុនា ឆ្នាំ២០២០ស្អែកនេះ ឧបនាយករដ្ឋម ន្ត្រីប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃកម្ពុជា និងលោក វ៉ាង វិនធាន ឯកអគ្គរដ្ឋទូតនៃសាធារណៈរដ្ឋប្រជាមានិកចិន ប្រចាំនៅកម្ពុជា នឹងអញ្ជើញចុះហត្ថលេខា លើកិច្ចព្រមព្រៀងស្ដីពីមូលនិធិពិសេស សម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២០។

នៅក្នុងក្របខណ្ឌមូលនិធិពិសេស នៃកិច្ចសហប្រតិបត្តិការមេគង្គ-ឡានឆាង ឆ្នាំ២០២០ខាងលើនេះ គម្រោងកម្ពុជាចំនួន២០ ត្រូវបានគាំទ្រ និងផ្ដល់មូលនិធិ ដែលមានទឹកប្រាក់ចំនួនជាង៧,២លានដុល្លារ ដែលភាគច្រើនគ្របដណ្ដប់ទៅលើសកម្មភាពនានាពាក់ព័ន្ធទៅនឹងការអភិវឌ្ឍវិស័យសេដ្ឋកិច្ច-សង្គម អភិវឌ្ឍន៍ធនធានមនុស្ស សន្ដិសុខតាមប្រព័ន្ធអ៊ីនធឺណែត ការកសាងសមត្ថភាពទេសចរណ៍ និងសេវាកម្ម បរិស្ថាន និងការការពារសម្បត្តិវប្បធម៌ ជាដើម ។

កិច្ចសហប្រតិបត្តិការ មេគង្គ-ឡានឆាង គឺជាយន្តការកិច្ចអនុតំបន់ថ្មី ដោយមានការប្រឹក្សាយោបល់ការចូលរួមចំណែក និងផលប្រយោជន៍រួមគ្នា រវាងបណ្តាប្រទេសនៅតាមបណ្តោយទន្លេមេគង្គ។ វាមានលក្ខណៈអំណោយផល ក្នុងការកាត់បន្ថយគម្លាតនៃការអភិវឌ្ឍនៅអាស៊ាន និងលើកកម្ពស់សមាហរណកម្មអាស៊ានជាទូទៅ៕

ដោយគង់ សូរិយា

        ភ្នំពេញៈ ផលិតផលម្សៅទឹកដោះគោម្សៅ Balactan Premium Goldជាផ​លិតផលប្រកបដោយគុណភាពខ្ពស់ ដែលផ្តល់ការលូតលាស់ដ៏ល្អសំរាប់ទារក និងកុមារបានឈានជើងចូលទីផ្សារកម្ពុជាហើយ។

លោកស្រីថេង សុខលី អគ្គនាយិកាក្រុមហ៊ុនMTSL Co, LtdដែលបាននាំចូលផលិតផលទឹកដោះគោBalactan បានមានប្រសាសន៍ឲ្យដឹងនាព្រឹកថ្ងៃទី២២ មិថុនានេះថា រោងចក្រផលិតម្សៅទឹកដោះគោនេះ បានផលិតឡើងដោយសំរិតសំរាំងបំផុត ដើម្បីផ្តល់ការលូតលាស់ដល់ទារក និងកុមារទាំងសតិបញ្ញាស្មារតី។ ផលិតផលនេះមានចំនួន៣ប្រភេទ សំរាប់ទារក និងកុមារដូចជា ទី១ ផលិតផលទឹកដោះគោ Balactan លេខ១ ប្រើប្រាស់សំរាប់កុមារចាប់ពី០ខែ រហូតដល់៦ខែ។ ទី២  Balactan លេខ2  ប្រើប្រាស់សំរាប់កុមារចាប់ពី៦ខែ រហូតដល់១២ខែ និងទី៣ Balactan លេខ៣ សំរាប់កុមារចាប់ពី ១២ខែ រហូតដល់៣៦ខែ។

លោកស្រីបន្តថា “ដោយសារខ្ញុំជាម្តាយ ដែលមានបុត្រចំនួន៤នាក់ ហេតុនេះការប្រើប្រាស់ផលិតផលអ្វីមួយ ខ្ញុំតែងតែយកចិត្តទុកដាក់បំផុត លើការលូតលាស់សុខភាព​ស្មារតីរបស់ពួកគេ ដូច្នេះហើយទើបខ្ញុំសម្រេចនាំចូលផលិតផលនេះមកកម្ពុជា ដើម្បីផ្តល់ជូនអ្នកម្តាយគ្រប់រូប នូវផលិតផលសំរាប់កូនចាទីស្រលាញ់របស់ពពួកគេ”។ លោកស្រីបន្តថា “ខ្ញុំក៏បានប្រើប្រាស់ផលិតផលBalactan Premium Gold ដើម្បីផ្តល់ការលូតលាស់ដល់កូនរបស់ខ្ញុំឲ្យមានសុខភាពល្អ ប្រាជ្ញាវាងវៃផងដែរ”។

លោកស្រីថេង សុខលីបានបន្តថា ផលិតផលដែលផលិតនៅក្នុងសហគមន៍៍អឺរ៉ុប តែងតែផលិតឡើងប្រកដោយស្តង់ដាអនាម័យខ្ពស់បំផុត និងតែងតែគិតគូសុខភាពទារក​និងកុមារជាចម្បង ទើបការសម្រេចចិត្តយកផលិតផលនេះនាំចូលមក ដើម្បីសេចក្តីស្រ​លាញ់ ក៏ដូចជាផ្តល់ឲ្យកុមារដែលជាទំពាំងស្នងឬស្សីរបស់ជាតិយើង មានប្រាជ្ញាស្មារតីវាងវៃ និងសុខភាពល្អបរិបូរណ៍។

ក្រុមហ៊ុនMTSL Co, Ltdមាន អសយដ្ឋានស្ថិតនៅផ្ទះលេខ៤២B ផ្លូវ01 ឧកញ៉ាម៉ុងរិទ្ធី សង្កាត់ប៉ាយ៉ាប ខណ្ឌសែនសុខ រាជធានីភ្នំពេញ។

អតិថិជន ក៏ដូចជាអ្នកប្រើប្រាស់ ពិសេសអ្នកម្តាយគ្រប់រូបដែលចង់បានបុត្រធីតាមានសុខភាពល្អ គួរឲ្យស្រលាញ់ សូមទំនាក់ទំនងលេខទូរស័ព្ទ៖ 087 924 777, 078 925 777៕

ដោយៈ រ៉ាណេត

ភ្នំពេញៈ សម្ដេចតេជោហ៊ុន សែន នាយករដ្ឋមន្ត្រីកម្ពុជាបានបញ្ជាក់ថា បើទោះជាព្រលានអន្តរជាតិភ្នំពេញថ្មី ត្រូវបានបញ្ចប់ការសាងសង់ជាស្ថាពរ និងដាក់ឱ្យដំណើរការជាផ្លូវការក៏ដោយ សម្រាប់ព្រលានយន្តហោះចាស់ពោធិ៍ចិនតុង នៅតែបន្តដំណើរការដដែលគ្មានគម្រោងវិនិយោគប្រែក្លាយជាទីក្រុងរណបនោះទេ។

ថ្មីៗនេះក្រោយដំណើរការបើកការដ្ឋានសាងសង់ ព្រលានយន្ដហោះអន្តរជាតិភ្នំ​ពេញថ្មី ដែលមានតម្លៃវិនិយោគ១៥០០លានដុល្លារនោះ មានការលើកឡើងដោយគ្មានប្រភពច្បាស់ការណ៍ថា ព្រលានយន្ដហោះចាស់ពោពិ៍ចិនតុង នឹងត្រូវបានធ្វើការអភិវឌ្ឍថ្មីជាមួយគម្រោងប្រែក្លាយ ទៅជាទីក្រុងរណបថ្មីមួយទៀតចំណុះរាជធានីភ្នំពេញ ដែលការលើកឡើងនេះ នៅព្រឹកថ្ងៃទី២២ ខែមិថុនា ឆ្នាំ២០២០នេះ សម្ដេចតេជោ ហ៊ុន សែន បានប្រកាសថា “មិនមែនជាការពិតនោះទេ”។

មានប្រសាសន៍នៅក្នុងពិធីចុះ ត្រួតពិនិត្យការដ្ឋានសាងសង់ព្រលានយន្តហោះអន្តរជាតិភ្នំពេញ នៅព្រឹកមិញនេះ សម្ដេចតេជោ ហ៊ុន សែន បានមានប្រសាសន៍ថា រដ្ឋាភិបាលគ្មានគម្រោងវិនិយោគ និងប្រែក្លាយព្រលានយន្តហោះចាស់ពោធិ៍ចិនតុង ទៅជាទីក្រុងរណបថ្មីមួយទៀត ចំណុះឱ្យរាជធានីភ្នំពេញ ដូចការលើកឡើងដោយគ្មានប្រភពច្បា​ស់លាស់នោះទេ។

សម្ដេចតេជោ បានមានប្រសាសន៍ថា “នៅក្នុងតំបន់របស់យើងគេមានយន្តហោះច្រើនណាស់តែខ្វះកន្លែងដាក់ យើងអាចរៀបចំមូលដ្ឋាន ដើម្បីឲ្យគេអាចយកយន្តហោះមកផ្ញើជាមួយយើង បើយើងមានមូលដ្ឋានល្អ ហើយសម្រាប់ការអញ្ជើញមកដល់នៃឥស្សរជនជាន់ខ្ពស់ ជាព្រះមហាក្សត្រ ជាប្រមុខរដ្ឋ ជានាយករដ្ឋមន្ត្រីមកទស្សនៈកិច្ចនៅកម្ពុជា គឺចុះនៅពោធិ៍ចិនតុងដដែល”។ សម្ដេចបានបញ្ជាក់ថា “អ្នកខ្លះគេថា ពោធិ៍ចិនតុងអាចក្លាយជាទីក្រុងរណបមួយថ្មី អត់ទេ អាហ្នឹងចាំដំណាក់កាលក្រោយខ្ញុំ អ្នកណាធ្វើនាយករដ្ឋមន្ត្រីពេលនោះ”៕

ដោយ ៖ ប៊ី

ភ្នំពេញ ៖ ក្រុមហ៊ុនរុករករ៉ែ Mesco Gold (ខេមបូឌា) ដែលគ្រប់គ្រងដោយវិនិយោគិន ឥណ្ឌា បានឱ្យដឹងកាលពីម្សិលមិញថា ក្រុមហ៊ុនរំពឹងថានឹងចាប់ផ្តើមតម្លើងរោងចក្រកែច្នៃមាសឡើងវិញក្នុងពេលឆាប់ៗនេះ ពីព្រោះការភ័យខ្លាចនៃជំងឺ COVID-19 បានធូរស្រាលបន្តិចម្តងៗ។

ក្រុមហ៊ុនបានបញ្ឈប់ការងារជាបណ្តោះអាសន្នលើការតម្លើងរោងចក្រកែច្នៃនៅតំបន់រ៉ែមាសភូមិស៊ីយ៉ារុន ឃុំយ៉ាតុង ខេត្តរតនគិរី ចាប់តាំងពីខែមីនា ដោយសារបញ្ហាជំងឺរាតត្បាត។

លោក អ៊ុន វិចិត្រ តំណាងក្រុមហ៊ុន Mesco Gold បានមានប្រសាសន៍ថា ក្រុមហ៊ុនបានរៀបចំខ្លួនបានល្អ ហើយនៅពេលដែលជំងឺ COVID-19 ត្រូវបានលុបបំបាត់ទាំងស្រុង រោងចក្រចម្រាញ់រ៉ែមាសនឹងចាប់ផ្តើមភ្លាមៗ។ លោក បានថ្លែងថា “យើងនឹងចាប់ផ្តើមវាឆាប់ៗនេះ។ ជម្លោះព្រំដែនរវាងចិន និងឥណ្ឌាក៏បានជះឥទ្ធិពលដល់វឌ្ឍនភាពនៃគម្រោងផងដែរ ពីព្រោះអ្នកគ្រប់គ្រងថ្នាក់កំពូលរបស់យើងនៅឥណ្ឌាមិនអាចហោះហើរបានទេ ទៅប្រទេសចិន ដើម្បីបញ្ជាទិញម៉ាស៊ីនចម្រាញ់រ៉ែមាសនៅទីនោះ។ ការហោះហើររវាងប្រទេសទាំងពីរមិនទាន់បានបើកដំណើរការនៅឡើយទេ”។ លោកបានបន្ថែមថា “ការសាងសង់រោងចក្រនេះគ្រោងនឹងចំណាយពេលក្នុងរយៈពេល ៦ ខែ ដើម្បីបញ្ចប់”។

ក្រុមហ៊ុន Mesco Gold បានទិញសិទ្ធិក្នុងការអភិវឌ្ឍ និងទាញយកផលិកម្ម Phum Syung ពីក្រុមហ៊ុនរុករករ៉ែ ដែលបានចុះបញ្ជីនៅកាណាដានៅឆ្នាំ ២០១៣ ដែលជាផ្នែកមួយនៃកិច្ចព្រមព្រៀងតម្លៃ ១,២ លានដុល្លារ។ ក្រុមហ៊ុននេះត្រូវបានផ្តល់អាជ្ញាប័ណ្ណពាណិជ្ជកម្មក្នុងឆ្នាំ ២០១៦។ ការងារលើការតម្លើងរោងចក្រត្រូវបានផ្អាកដែលបច្ចុប្បន្នបានបញ្ចប់ ២០ ភាគរយ។ ក្រុមហ៊ុនរំពឹងថា ផលិតកម្មមាសរបស់យើងនឹងអាចចាប់ផ្តើមនៅខែកុម្ភៈ ឬខែមីនាឆ្នាំក្រោយ”។

យោងតាម លោក វិចិត្រ បានឱ្យដឹងថា នៅពេលធ្វើការចាប់ផ្តើមឡើងវិញ រោងចក្រនេះនឹងអាចចម្រាញ់រ៉ែមាសពី ៣៥០ ទៅ ៥០០ តោនក្នុងមួយថ្ងៃ។ រ៉ែមាសមួយតោនអាចផលិតមាសបាន ០.០៥ ក្រាម។ មាសចម្រាញ់បាននឹងត្រូវផ្គត់ផ្គង់នៅលើទីផ្សារក្នុងស្រុក ក្រុមហ៊ុនក៏មានផែនការលក់វានៅប្រទេសសឹង្ហបុរី និងប្រទេសកំណើតរបស់ក្រុមហ៊ុនគឺឥណ្ឌា៕