ប័ណ្ណកម្មសិទ្ធិដីធ្លីសង្កាត់ពន្សាំង រាជធានីភ្នំពេញ នឹងអស់សុពលភាពត្រឹមដើមសប្ដាហ៍នេះ

ដោយៈ រ៉ាណេត

ភ្នំពេញៈ រដ្ឋបាលសាលារាជធានីភ្នំពេញ បានចេញសេចក្ដីជូនដំណឹងថា ប័ណ្ណកម្មសិទ្ធិដីធ្លី ដែលស្ថិតនៅក្នុងតំបន់វិនិច្ឆ័យ ក្នុងភូមិចុងថ្នល់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ នឹងអស់សុពលភាព ឬមោឃភាពនៃប័ណ្ណសម្គាល់សិទ្ធិ កាន់កាប់ប្រើប្រាស់ដីធ្លីនៅត្រឹមដើមសប្ដាហ៍នេះហើយ។

តាមរយៈសេចក្ដីជូនដំណឹង របស់រដ្ឋបាលសាលារាជធានីភ្នំពេញ នៅចុងសប្ដាហ៍នេះបានលើកឡើងថា បងប្អូនប្រជាពលរដ្ឋ ដែលមានក្បាលដីស្ថិតនៅក្នុងតំបន់វិនិច្ឆ័យ ភូមិចុងថ្នល់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញស្តីពី ការចែកវិញ្ញបនបត្រ សម្គាល់ម្ចាស់អចលវត្ថុ និងមោឃភាពនៃប័ណ្ណសំគាល់ សិទ្ធិកាន់កាប់ប្រើប្រាស់ដីធ្លី ឫប័ណ្ណសំគាល់សិទ្ទិកាន់កាប់អចលវត្ថុ នៅត្រឹមថ្ងៃទី២២ ខែមិថុនា ឆ្នាំ២០២០ ។

នៅក្នុងសេចក្ដីជូនដំណឹងដដែលបានបញ្ជាក់ថា យោងតាមអនុក្រឹត្យលេខ ៤៦ អនក្រ.បក ចុះថ្ងៃទី៣១ ខែឧសភា ឆ្នាំ២០០២ ស្ដីពីនីតិវិធីនៃការកសាងប្លង់សុរិយោដី និងសៀវភៅគោលបញ្ជីដីធ្លី ក្រោមដំណើរការនៃការចុះបញ្ជីដីធ្លីមានលក្ខណៈជាប្រព័ន្ធ មន្ទីររៀបចំដែនដីនគរូបនីយកម្ម និងសំណង់ និងសុរិយោដី រាជធានីភ្នំពេញ នឹងធ្វើការចែកវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ) ជូនដល់ម្ចាស់ក្បាលដី ដែលស្ថិតនៅក្នុងតំបន់វិនិច្ឆ័យខាងលើ ចាប់ពីថ្ងៃទី២២ ខែមិថុនា ឆ្នាំ២០២០ ។

ម្ចាស់ក្បាលដីទាំងអស់ដែលស្ថិតនៅក្នុងតំបន់ខាងលើ ត្រូវយកប័ណ្ណសម្គាល់កម្មសិទ្ធិកាន់កាប់ប្រើប្រាស់ដីធ្លី ឬប័ណ្ណសម្គាល់សិទ្ធិកាន់កាប់អចលនវត្ថុកន្លងមក ប្រគល់ឱ្យមន្ត្រីរដ្ឋបាលសុរិយោដីនៅភូមិចុងថ្នល់ សង្កាត់ពន្សាំង ខ័ណ្ឌព្រែកព្នៅ រាជធានីភ្នំពេញ ចាប់ពីថ្ងៃទី២២ រហូតដល់ថ្ងៃទី៣០ ខែមិថុនា ឆ្នាំ២០២០ ជាកំហិត។

ដោយឡែកសម្រាប់ ម្ចាស់បំណុលដែលបានទទួលបញ្ចាំ ឬដាក់ធានា ពាក់ព័ន្ធនឹងក្បាលដីក្នុងតំបន់វិនិច្ឆ័យខាងលើ សូមយកប័ណ្ណទាំងនោះ មកជូនមន្ត្រីរដ្ឋបាលសុរិយោដីធ្វើនិយ័តកម្ម ដើម្បីការធានាប្រាក់របស់លោកអ្នក៕

វិស័យឧស្សាហកម្មកម្ពុជាដាំក្បាលចុះក្នុងអត្រាដក ២,២ភាគរយក្នុងឆ្នាំនេះ

ដោយ ប៊ី

ភ្នំពេញៈ វិស័យឧស្សាហកម្មកម្ពុជារំពឹងទុកថា នឹងមានការដាំក្បាលចុះអត្រាអវិជ្ជមាន២,២ភាគរយ ក្នុងឆ្នាំ២០២០នេះ ដោយសារការធ្លាក់ចុះនៃអនុវិស័យកាត់ដេរ និងសំណង់ ខណៈដែលអនុវិស័យកម្មន្តសាល មិនមែនកាត់ដេរត្រូវបានរំពឹងថា នឹងនៅបន្តកំណើនខ្ពស់ ។

ពាក់ព័ន្ធនឹងវិស័យឧស្សាហកម្ម នៅក្នុងឆ្នាំ២០២០នេះ តាមការប៉ាន់ស្មានបានធ្លាក់នៅក្នុងអត្រាអវិជ្ជមាន ខណៈនៅឆ្នាំ២០២១ ត្រូវបានព្យាករថា វិស័យនេះនឹងងើបឡើងវិញក្នុងអត្រា៤,១% ដោយសារការកើនឡើងវិញ ក្នុងកម្រិតអនុវិស័យកាត់ដេរ និងអនុវិស័យសំណង់ ខណៈដែលអនុវិស័យកម្មន្តសាល មិនមែនកាត់ដេរ ត្រូវបានរំពឹងថានឹងនៅបន្តកំណើនខ្ពស់។ នេះបើយោងតាមសេចក្តីព្រាងច្បាប់ស្តីពី ហិរញ្ញវត្ថុសម្រាប់គ្រប់គ្រង ឆ្នាំ២០២១ សម្រាប់ការរៀបចំគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ។

អនុវិស័យកាត់ដេរត្រូវបានប៉ាន់ស្មានថា នឹងមានផលអវិជ្ជមាន៦,៧% នៅក្នុងឆ្នាំ២០២០ ប៉ុន្តែវិស័យនេះត្រូវបានរំពឹងថា នឹងងើបឡើងមកវិញក្នុងអត្រា១,៦% នៅក្នុងឆ្នាំ២០២១ ។ ចំណែកទាក់ទងនឹងមានផលអវិជ្ជមានក្នុងឆ្នាំ២០២០ នេះ បានឆ្លុះបញ្ចាំងនៃការធ្លាក់ចុះយ៉ាងគំហុក នៃតម្រូវការខាងក្រៅ គឺដោយសារការប៉ះពាល់យ៉ាងធ្ងន់ធ្ងរនៃការរីករាលដាលជំងឺកូវីដ១៩ ជាពិសេសប្រទេសដែលជាទីផ្សារនាំចេញរបស់កម្ពុជា និងការលុបចោលការបញ្ជាទិញ។

ចំណែកនៅឆ្នាំ២០២១វិញ អនុវិស័យត្រូវបានរំពឹងថា នឹងងើបឡើងវិញក្នុងអត្រា ១,៦% ដោយសារការរំពឹងទុកនៃការងើបឡើងយឺត នៃតម្រូវការខាងក្រៅ ហើយអនុវិស័យនេះ ក៏អាចប្រឈមប្រកួតប្រជែងកាន់តែខ្លាំងក្លា ពីការដណ្តើមទីផ្សារដែលទើបងើបឡើងវិញ រួមទាំងផលប៉ះពាល់នៃការដកប្រព័ន្ធអនុគ្រោះពនEBA លើមុខទំនិញមួយចំនួនជាពិសេសការចូលជាធរមាន នៃកិច្ចព្រមព្រៀងពាណិជ្ជកម្មសេរីរវាងវៀតណាម និងសហភាពអឺរ៉ុប ។

ចំណែកអនុវិស័យសំណង់ត្រូវបានប៉ានស្មានថា នឹងមានផលអវិជ្ជមាន៥,៣% ក្នុងឆ្នាំ២០២០ នឹងរំពឹងងើបឡើងវិញជាមួយកំណើនទាបក្នុងអត្រា៣,៣% ក្នុងឆ្នាំ២០២១ ។ តែទោះជាយ៉ាងណាក៏ដោយ នៅក្នុងឆ្នាំ២០២០ អនុវិស័យនេះ បានធ្លាក់ចុះយ៉ាងគំហុកដែលមិនធ្លាប់មាន ចាប់តាំងពីវិបត្តិហិរញ្ញវត្ថុសកលកំឡុងឆ្នាំ២០០៨–២០០៩ ដែលបណ្តាលមកពីការរំពឹងទុក នៃការធ្លាក់ចុះរំហូរទុនវិនិយោគបរទេស ជាពិសេសពីប្រទេសចិន និងតម្រូវការសាងសង់ នៃអគារបម្រើឲ្យវិស័យទេសចរណ៍ និងពាណិជ្ជកម្ម ព្រមទាំងការធ្លាក់ ចុះទំនុកចិត្តអ្នកវិនិយោគក្នុងស្រុកផងដែរ ។

របាយការណ៍ដដែលបានបន្តថា ដោយឡែកអនុវិស័យកម្មន្តសាល មិនមែនកាត់ដេរត្រូវបានព្យាករណ៍ថា នឹងបន្តកំណើនខ្ពស់ក្នុងអត្រា១៣,១% ក្នុងឆ្នាំ២០២០ និង ១០,១% ក្នុងឆ្នាំ២០២១ ។

ចំពោះក្នុងឆ្នាំ២០២១ អនុវិស័យទាំងនេះត្រូវបានរំពឹងថា នឹងបន្តកំណើនក្នុងអត្រា ១០,១% គឺដោយសារការពង្រីកមូលដ្ឋានផលិតកម្ម ផលិតផលមិនមែនកាត់ដេរនៃវិនិយោគដែលមានស្រាប់ ។ ដើម្បីជួយដល់វិស័យនេះ រាជរដ្ឋាភិបាលបានដាក់ចេញនូវគោនយោបាយជាបន្តបន្ទាប់ គាំទ្រវិស័យឯកជន ពិសេសការអវភិឌ្ឍសហគ្រាសធុនតូច និងមធ្យម និងការលើកកម្ពស់សហគ្រិនភាព ក្នុងការជំរុញធ្វើពិពិធកម្ម ក្នុងវិស័យឧស្សាហកម្មនេះ៕

ក្រសួងដែនដីគាំទ្រលើការវិនិយោគដីកសិកម្មលើទំហំដីរាប់ពាន់ហិកតា

ដោយ វុត្ថា

ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់ រហូតមដល់ពេលនេះ បានគាំទ្រចំពោះការប្រើប្រាសដីកសិកម្ម ដែលមានទំហំរាប់ពាន់ហិកតា ស្ទើតែទូទាំងប្រទេស ក្នុងការផ្តល់ជូនសហគមន៍ និងក្រុមហ៊ុនសម្រាប់ធ្វើការដាំដុះ នូវផលិតផលកកម្មសម្រាប់ផ្គត់ផ្គង់នៅក្នុងស្រុក និងការនាំចេញ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ដែលបានសផ្សព្វផ្សាយ កាលពីកន្លងមកថ្មីៗនេះបានឱ្យដឹងថា ក្រសួងបានគាំទ្រជោគជ័យ១០០%ដល់សហគមន៍ កសិកម្មទទួលបានវិញ្ញាបនបត្រ ស្តង់ដាសរីរាង្គសហគមន៍អឺរ៉ុប និង សហរដ្ឋអាមេរិក ដើម្បីទទួល បានវិញ្ញាបនបត្របញ្ជាក់ផលិតផលសរីរាង្គពីស្ថាប័នអន្តរជាតិ Control Union រួមមានដំឡូងមី សណ្តែកបាយ លូ ស្វាយចន្ទី ស្វាយ ដំឡូងជ្វា ចេក ខ្នុរ និងស្រូវ សរុបចំនួន ៤១៧គ្រសារ ស្មើនឹង ២៤៧, ៣៩ហិកតា ក្នុងខេត្តក្រចេះ ខេត្តកំពង់ធំ ខេត្តកំពង់ស្ពឺ និងខេត្តកំពង់ឆ្នាំង ។

របាយការណ៍ដដែលបន្តថា ក្រសួងក៏បានគាំទ្រ ជោគជ័យ១០០% ការប្រមូលផលដំឡូងសរីរាង្គតាមកិច្ចព្រមព្រៀង រវាងសហគមន៍កសិកម្ម និងក្រុមហ៊ុនសាជីវកម្មសហគមន៍កសិកម្មកម្ពុជា (CACC) មានចំនួន៧៣៩តោន ក្នុងឃុំ ដារ ស្រុកចិត្របុរី ខេត្តក្រចេះ ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ និងនៅឃុំទីពោ ស្រុកសន្ទុក ខេត្តកំពង់ធំ ។

ជាមួយគ្នានេះ ក្រសួងរៀបចំដែនដី នគរូបនីយកម្ម និងសំណង់ បានរៀបចំឯកសារដើម្បីទទួលបានវិញ្ញាបនប័ត្រ បញ្ជាក់ផលិតផលសរីរាង្គឆ្នាំ២០២០ រួមមានដំឡូងមី ចំនួន១៨៧គ្រសារ ស្មើនឹង២១៥,៤៥ហិកតា សណ្តែកបាយចំនួន៧៣គ្រសារ ស្មើនឹង៧៦,៧៤ហិកតា និងដ៏ណាំលូចំនួន៦៩គ្រសារ ស្មើនឹង៧៤, ៥ហិកតា ក្នុងស្រុក ចិត្របុរី ខេត្តក្រចេះ ស្រុកសន្ទុក ខេត្តកំពង់ធំ ស្រុកឱរ៉ាល់ ខេត្តកំពង់ស្ពឺ និងស្រុកសាមគ្គីមានជ័យ ។

សម្រាប់ ខេត្តកំពង់ឆ្នាំង បានជំរុញការសម្អាតដីកសិកម្ម ដើម្បីរៀបចំសម្រាប់ដាំដុះមានចំនួន ១៩៧គ្រសារ ស្មើនឹង ៣៥៤ ហិកតា នៅដីសម្បទានប្រម៉ា ឃុំឃីម ស្រុកស្នួល ខេត្តក្រចេះ និង បានបណ្តុះបណ្តាលពីបទដ្ឋានបច្ចេកទេស សម្អាតប្រឡាយទឹក (៤ម៉ែត្រ x១,២ម៉ែត្រx១,២ម៉ែត្រ) ដែល មានប្រវែងសរុប២ ០០០ម៉ែត្រ និងបានធ្វើការត្រួតពិនិត្យសក្តានុពលទឹកដែលអាចប្រើប្រាស់ សម្រាប់ស្រោចស្រពដំណាំក្នុងភូមិសែនអភិវឌ្ឍន៏២ ឃុំទីពោ ស្រុកសន្ទុក ខេត្តកំពង់ធំ ៕

កំណើនប្រជាជនមានជីវភាពមធ្យមនៅកម្ពុជាបាននិងកំពុងទាក់ទាញហាងលក់រាយល្បីៗ

ដោយ ប៊ី

ភ្នំពេញៈ ហាងទំនើបលក់រាយ 7-Eleven ដ៏ល្បីឈ្មោះ នឹងបើកសាខាដំបូងរបស់ខ្លួននៅទីក្រុងភ្នំពេញនៅឆ្នាំ២០២១ ខណៈនេះជាសញ្ញារបត់ថ្មី នៃវិស័យលក់រាយនៅកម្ពុជា។

ប្រទេសកម្ពុជានឹងក្លាយជាប្រទេសទី១៩ ដែលក្រុមហ៊ុន7-Eleven នឹងប្រតិបត្តិការ និងជាប្រទេសទី៦ នៅអាស៊ីអាគ្នេយ៍ (ប្រទេសម៉ាឡេស៊ី ថៃ សឹង្ហបុរី វៀតណាម និងហ្វីលីពីន)។ ក្រុមហ៊ុន7-Eleven មានហាងជាង៧ម៉ឺនកន្លែងនៅជុំវិញពិភពលោក។

7-Eleven មិនមែនជាហាងទំនើបដំបូងគេ ដែលចាប់ផ្តើមនៅកម្ពុជាទេ។ យីហោមួយនេះ នឹងត្រូវប្រកួតប្រជែងពីមីនីម៉ាតផ្សេងទៀត ដូចជា Circle K, Kiwi Mart, Aeon MaxValu Express, Smile Mini Mart និងច្រើនទៀត។ ប៉ុន្តែ 7-Eleven កម្ពុជាមានគុណប្រយោជន៍យ៉ាងធំធេង ក្នុងការក្លាយជាយីហោពិភពលោក ដែលត្រូវបានគេស្គាល់និងទុកចិត្ត។

មានការលើកឡើងថា ក្រុមហ៊ុនមួយនឹងបង្កើនការលើកកម្ពស់ ឧស្សាហកម្មលក់រាយ ដែលកំពុងកើនឡើងនៅកម្ពុជា។

ការធ្វើទំនើបកម្មទីផ្សារលក់រាយ

ទោះបីហាងលក់រាយបាន និងកំពុងរីកដុះដាលពាសពេញ តំបន់អាស៊ីអាគ្នេយ៍ក៏ដោយ ក៏ប្រទេសកម្ពុជាមិនទាន់សម្របខ្លួន បានពេញក្នុងការទទួលបានសេវកម្មលក់រាយទំនើបនៅឡើយទេ។ ប្រទេសនេះត្រូវបានគេពិពណ៌នាថា ទីផ្សារហាងលក់រាយទំនើបនៅមានឱកាសវិនិយោគ ដើម្បីទទួលបានផលចំណេញនៅអាស៊ីអាគ្នេយ៍។

នេះគឺជាផ្នែកមួយនៃបទដ្ឋាន ដែលការលក់រាយនៅកម្ពុជាបច្ចុប្បន្ន មានហាងតូចៗដែលគ្រប់គ្រងដោយគ្រួសារ។ ហាងលក់រាយបែបបុរាណទាំងនេះ លក់របស់របរ ដែលគុណភាពទាបក្នុងតម្លៃទាប ហើយបានបំពេញតម្រូវការរបស់អតិថិជន ដែលមានចំណូលទាប និងមធ្យម។

អ្វីៗបានចាប់ផ្តើមផ្លាស់ប្តូរនៅឆ្នាំ២០១៨ នៅពេលខ្សែសង្វាក់មីនីម៉ាតអាមេរិក-កាណាដា Circle K ចាប់ផ្តើមបើកសាខាដំបូងរបស់ខ្លួន នៅរាជធានីភ្នំពេញ។ បច្ចុប្បន្នវិស័យនេះនឹងមានហាងចំនួន៣០០បន្ថែមទៀត ក្នុងរយៈពេល១០ឆ្នាំខាងមុខ។ បច្ចុប្បន្ន មានគីវីម៉ាតដែលមាន២២ហាង Aeon MaxValu Express មាន៩ ហាង Smile Mini Mart មាន ១១ ហាង និងឡាក់គីអ៊ិចប្រេសមាន៥ហាងនៅកម្ពុជា។

អំណាចនៃការទិញនៅកម្ពុជា

អំណាចនៃការទិញ ត្រូវបានជំរុញដោយការរីកចម្រើនយ៉ាងឆាប់រហ័ស ដោយសារកំណើននៃប្រជាជនមានជីវភាពកម្រិតមធ្យមនៅប្រទេសកម្ពុជា។

ទីផ្សារហាងទំនើបលក់រាយ មានការរីកចំរើននៅប្រទេសកម្ពុជា ដោយសារកំណើនប្រជាជនមានជីវភាពកម្រិតមធ្យមនៅក្នុងប្រទេសនេះ។ ការផ្លាស់ប្តូរពីបែបប្រពៃណីទៅជាទីផ្សារលក់រាយបែបទំនើបកើតឡើង ដោយសារក្រុមហ៊ុនដោះស្រាយនូវតម្រូវការផ្លាស់ប្តូររបស់អ្នកប្រើប្រាស់។

ចំនួនប្រជាជនមានកម្រិតមធ្យម នៅក្នុងប្រទេសកម្ពុជា កំពុងតែរីកចម្រើនក្នុងអត្រាមួយ ដែលមិនធ្លាប់មានពីមុនមក ដោយទទួលបានប្រាក់ចំណូលខ្ពស់ជាងពេលមុន។ បច្ចុប្បន្ននេះ ប្រាក់ចំនូលមធ្យមសម្រាប់មនុស្សម្នាក់ៗក្នុងមួយឆ្នាំ បានឈានដល់កម្រិត ១.៧០០ដុល្លារ នៅពេលដែលសេដ្ឋកិច្ចរបស់ប្រទេសនេះ មុនពេលវិបត្តិ Covid-19 បានកើនឡើង៧ភាគរយ ក្នុងរយៈពេលមួយទសវត្សរ៍ចុងក្រោយនេះ។ នៅឆ្នាំ២០១៩ ប្រទេសនេះ ស្ថិតក្នុងចំណោមប្រទេសអាស៊ាន ដែលមានកំណើនសេដ្ឋកិច្ចលឿនបំផុត។

អ្នកវិភាគយល់ឃើញថា អ្នកប្រើប្រាស់នៅតាមទីក្រុង ដែលមានវ័យក្មេងនៅកម្ពុជាសព្វថ្ងៃ មានឆន្ទៈក្នុងការចំណាយ១០ ទៅ២០ភាគរយ សម្រាប់ហាងទំនើបលក់រាយ ជាមួយផលិតផល ដែលមានគុណភាពខ្ពស់ពីអន្តរជាតិ។ នេះគឺជាដំណឹងល្អសម្រាប់ 7-Eleven ដែលបានបង្កើតកេរ្តិ៍ឈ្មោះរបស់ពួកគេ លើលក្ខណៈជាក់លាក់បែបនេះ។

យោងតាមវិទ្យាស្ថាន Grocery Distribution ដែលមានមូលដ្ឋាននៅចក្រភពអង់គ្លេសបានឱ្យដឹងថា ហាងទំនើបរាយនៅអាស៊ី ត្រូវបានគេព្យាករណ៍ថានឹងកើនឡើង៦,៦ ភាគរយ ឬមានចំណូល៥,១ទ្រីលានដុល្លារអាមេរិកក្នុងឆ្នាំ២០២។ ចំនែកទីផ្សារទំនើបលក់រាយនៅកម្ពុជាត្រូវបានរំពឹងថា នឹងបង្កើតចំណូល៩,៣ពាន់លានដុល្លារ នៅឆ្នាំ២០២៣ ។

ការចូលរបស់ហាងទំនើប 7-Eleven នឹងបង្កើនការប្រកួតប្រជែងខ្លាំងដល់ឧស្សាហកម្មហាងលក់រាយក្នុងស្រុក ប៉ុន្តែនឹងបង្កើនការអភិវឌ្ឍកាន់តែប្រសើរ នៅក្នុងវិស័យលក់រាយនៅកម្ពុជា។ សហគ្រិនក្នុងស្រុកអាចមានឱកាសធ្វើជាម្ចាស់ និងគ្រប់គ្រងសិទ្ធិអាជីវកម្មយីហោ 7-Eleven ផ្ទាល់ខ្លួនរបស់ពួកគេ។ លើសពីនេះទៀត ខ្សែសង្វាក់នេះប្រាកដជាបង្កើតការងារថ្មីៗរាប់ពាន់នៅក្នុងប្រទេសនេះ។

ការមកដល់របស់ 7-Eleven នៅក្នុងប្រទេសកម្ពុជា នឹងដោះស្រាយនូវតម្រូវការនៃជីវិតកាន់តែទំនើបរបស់អ្នកប្រើប្រាស់ក្នុងស្រុក៕

វត្តមានក្រុមហ៊ុនលំដាប់ពិភពលោក Coldwell Banker Cambodia បង្ហាញពីភាពរឹងមាំនៃវិស័យអចលនទ្រព្យនៅកម្ពុជា

ដោយៈ រ៉ាណេត

ភ្នំពេញៈ ជាមួយនឹងសន្ទុះ នៃភាពរីកចម្រើនវិស័យអចលនទ្រព្យ និងសំណង់នៅកម្ពុជា ដែលកំពុងពង្រីកសក្តានុពល វត្តមានក្រុមហ៊ុនភ្នាក់ងារអចលនទ្រព្យដ៏ធំ និងល្បីឈ្មោះលំដាប់ពិភពលោក Coldwell Banker Cambodia ដែលបានដំណើរការកាលពីដើមឆ្នាំ២០២០កាន់តែជួយបង្ហាញពីភាពរឹងមាំ នៃវិស័យមួយនេះនៅកម្ពុជាបន្ថែមទៀត។

អគ្គនាយកក្រុមហ៊ុន Coldwell Banker Cambodia លោក Ken Lo បានមានប្រសាសន៍កាលពីថ្ងៃចុងសប្ដាហ៍កន្លងទៅនេះថា គ្រប់ក្រុមហ៊ុនអន្តរជាតិធំៗទាំងអស់ មុនពេលចូលមកចាប់ដំណើរប្រតិបត្តិការ របស់ខ្លួននៅក្នុងប្រទេសកម្ពុជា គឺសុទ្ធតែបានឆ្លងកាត់នូវការសិក្សាយ៉ាងលម្អិត និងស្គាល់ពីស្ថានភាព ស្ថិរភាពនយោបាយ សន្តិសុខសង្គម ជាពិសេស សក្ដានុពលនៃវិស័យអចលនទ្រព្យដែលកំពុង និងបន្តមានតម្រូវការទីផ្សារផងដែរ។

ខាងក្រោមនេះ ជាកិច្ចសម្ភាសន៍ផ្ទាល់រវាងអ្នកយកព័ត៌មានគេហទំព័រអចលនទ្រព្យ www.propertyarea.asia ជាមួយលោក Ken Lo អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Coldwell Banker Cambodia ពីការចាប់យកចំណែកទីផ្សារ ចក្ខុវិស័យរបស់ក្រុមហ៊ុននៅក្នុងប្រទេសកម្ពុជា។

Q: តើក្រុមហ៊ុនភ្នាក់ងារអចលនទ្រព្យអន្តរជាតិ Coldwell Banker ទីស្នាក់ការកណ្តាលនៅប្រទេសណា និងបង្កើតឡើងតាំងពីឆ្នាំណា? ហើយហេតុអ្វីបានជាលោកសម្រេចចិត្ត នាំយកក្រុមហ៊ុនលំដាប់ពិភពលោកមួយនេះ ចូលមកកាន់ទីផ្សារអចលនទ្រព្យនៅកម្ពុជា ?

A : ក្រុមហ៊ុនភ្នាក់ងារអចលនទ្រព្យអន្តរជាតិ Coldwell Banker ដែលទើបតែបង្ហាញវត្តមាននៅកម្ពុជា កាលពីដើមឆ្នាំ២០២០កន្លងទៅនេះ មានទីស្នាក់ការកណ្តាលនៅសហរដ្ឋអាមេរិក ដែលជាក្រុមហ៊ុនដ៏ធំ និងល្បីឈ្មោះលំដាប់ទី៣ជាសាកល ដែលរហូតមកដល់ពេលនេះ ក្រុមហ៊ុននេះមានអាយុកាល១១៣ឆ្នាំ និងបានបង្កើតការិយាល័យតំណាងចំនួន៤៥ប្រទេស ដែលក្នុងនោះរាប់ទាំងប្រទេសកម្ពុជាផងដែរ។ ឆ្លើយតបទៅនឹងសំណួរសួរថា ហេតុអ្វីបានជាខ្ញុំសម្រេចចិត្ត នាំយកក្រុមហ៊ុនលំដាប់ពិភពលោកមួយនេះចូលមកកាន់ទីផ្សារអចលនទ្រព្យនៅកម្ពុជា ព្រោះខ្ញុំបានស្គាល់ច្បាស់ពីស្ថានភាព និងសក្ដានុពលនៃវិស័យអចលនទ្រព្យនៅកម្ពុជា ដែលស័ក្ដិសមទៅនឹងវត្តមានក្រុមហ៊ុនធំៗ ខណៈដែលនៅកម្ពុជា មិនទាន់មានក្រុមហ៊ុនលំដាប់អន្តរជាតិបែបនេះច្រើននៅឡើយ។

Q : បច្ចុប្បន្ន នៅក្នុងទីផ្សារអចលនទ្រព្យ មានក្រុមហ៊ុនភ្នាក់ងារអចលនទ្រព្យជាតិ និងអន្តរជាតិជាច្រើនកំពុងតែធ្វើការប្រកួតប្រជែងគ្នា តើលោកមានទំនុកចិត្ត និងយុទ្ធសាស្ត្របែបណាដើម្បីអាចទទួលបានចំណែកទីផ្សារ?

A : ថ្វីដ្បិតយើងមកក្រោយគេ ប៉ុន្តែជំនឿចិត្តក្នុងការទទួលបានចំណែកទីផ្សារគឺយើងមានខ្ពស់ ព្រោះក្រុមហ៊ុនភាគច្រើន ដែលកំពុងដំណើរការនៅលើទីផ្សាររួម ភាគច្រើនមិនមែនជាដៃគូប្រកួតប្រជែងរបស់យើងនោះទេ។ ទីផ្សារគោលដៅរបស់យើងខុនពីគេ។ ក្រុមហ៊ុនភ្នាក់ងារជាច្រើន ដែលកំពុងដំណើរការសព្វថ្ងៃនេះ គឺពួកគេធ្វើសេវាកម្មចំរុះ បានន័យថា មិនថាអចលនវត្ថុនោះមានកម្រិតតូច ធំ ឬមធ្យមនោះទេ គឺធ្វើទាំងអស់ ប៉ុន្តែសម្រាប់ទីផ្សារគោលដៅ របស់ក្រុមហ៊ុនភ្នាក់ងារអចលនទ្រព្យអន្តរជាតិ ដែលមានប្រភពមកពីសហរដ្ឋអាមេរិក Coldwell Banker Cambodia គឺខុសពីគេ។

យើងទទួលបម្រើសេវា និងប្រឹក្សាតែចំពោះអចលនវត្ថុទាំងឡាយណា ដែលមានតម្លៃខ្ពស់អាចចាប់ពី៨០ម៉ឺនដុល្លា ឬ១លានដុល្លាររឡើងទៅ ក្នុងនោះមិនថាជាប្រភេទ អគារពាណិជ្ជកម្ម ខុនដូ លំនៅដ្ឋាន ទីតាំងជួលដូចជា Commercial Land, Commercial Industrial, Property Residence ឱ្យតែស្ថិតនៅក្នុងតម្លៃ ដែលបានកំណត់ទើបយើងទទួលធ្វើ។

Q : តើវិសាលភាពទីផ្សារអចលនទ្រព្យនៅកម្ពុជា ធំទូលាយសមស្របទៅគោលដៅរបស់ក្រុមហ៊ុន Coldwell Banker Cambodia ដែរឬទេ ហើយត្រូវចំណាយពេលប៉ុន្មានឆ្នាំដើម្បីទទួលបានចំណែកទីផ្សារ?

A : បើយើងសម្លឹងមើលតែមួយជ្រុង យើងឃើញថាទីផ្សារមានទំហំតូច ប៉ុន្តែយើងមើលឱ្យទូលាយជាងនេះ នោះនឹងឃើញច្បាស់ពីវិសាលភាព នៃទីផ្សារអចលនទ្រព្យនៅកម្ពុជា។ Coldwell Banker Cambodia បានសិក្សា និងស្គាល់ច្បាស់ពីទីផ្សារអចលនទ្រព្យនៅក្នុងប្រទេសមួយនេះ ហើយយើងក៏មិនធ្វើតែនៅក្នុប្រទេសកម្ពុជានោះដែរ។

តាមរយៈColdwell Banker Cambodia នឹងធ្វើការផ្សព្វផ្សាយបន្ថែម ពីទីផ្សារអចលនទ្រព្យកម្ពុជា ទៅកាន់បណ្តាប្រទេសនានានៅទូទាំងសាកលលោក ជាពិសេសប្រទេសគោលដៅ ដូចជាសហរដ្ឋអាមេរិក អូស្ត្រាលី ញ៉ូហ្សាលែន កាណាដា និងប្រទេសមួយចំនួនទៀតនៅប៉ែកអឺរ៉ុប។

យើងនឹងនាំយកអចលនទ្រព្យនៅកម្ពុជា ទៅលក់នៅលើទីផ្សារក្រៅប្រទេស ហើយក៏នាំយកអចលនទ្រព្យ នៅក្រៅប្រទេសមកលក់នៅប្រទេសកម្ពុជាវិញផងដែរ ដូចជាប្រទេសអូស្ត្រាលីជាដើម ដែលមានប្រជាជនខ្មែរទៅរស់នៅ និងសិក្សាបន្តនៅទីនោះច្រើន។ សម្រាប់អ្នកដែលមានកូនចៅរៀនចប់នៅក្នុងស្រុក ហើយត្រូវបញ្ជូនទៅសិក្សាបន្តនៅប្រទេសអូស្ត្រា ឬកាណាដា ពួកគាត់អាចទិញអចលនទ្រព្យ ឬលំនៅដ្ឋានតាមរយៈ Coldwell Banker Cambodia ដែលជាក្រុមហ៊ុន មានការទទួលស្គាល់លំដាប់ពិភពលោក។ ក្រោយពេលពួកគាត់ទិញ កូនរបស់ពួកគាត់មិនពិបាក ចំណាយប្រាក់បន្ថែមទៅលើការជួលទីតាំងស្នាក់នៅ ក៏ដូចជាផ្តល់ភាពងាយស្រួល ដល់ក្រុមគ្រួសារដែលទៅលេងម្ដងម្កាលផងដែរ។

យើងដឹងថា សម្រាប់ការចាប់យកចំណែកទីផ្សារនៅក្នុងប្រទេសកម្ពុជា អចលនវត្ថុដែលមានតម្លៃចាប់ពី១លានដុល្លារឡើង លើគឺត្រូវចំណាយពេលយូរ និងធនធានច្រើនបន្តិច ប៉ុន្តែបន្ទាប់ពីបានបញ្ជ្រាបខ្លួនបានគ្រប់គ្រាន់ អតិថិជន ក៏ដូចជាចំណែកទីផ្សារនៃវិស័យមួយនេះ នឹងរត់មកប្រើប្រាស់សេវាកម្មរបស់ក្រុមហ៊ុនយើង ដែលជាក្រុមហ៊ុនលំដាប់ពិភពលោកមួយនេះជាក់ជាមិនខាន។

យើងមានកេរ្តិ៍ឈ្មោះល្បីលើការផ្តល់ប្រឹក្សា ផ្តល់ជូនសេវាកម្មល្អប្រកបដោយទំនុកចិត្តខ្ពស់ ជាពិសេស ពួកយើងមានជំនាញច្បាស់លាស់ មានក្របសីលធម៌ វិជ្ជាជីវៈ ជាមួយនឹងភាពស្មោះត្រង់ជាមួយអតិថិជន ក៏ដូចជាក្រុមហ៊ុនដែលជាដៃគូផងដែរ៕

ចំណេះដឹង! តើជនបរទេសអាចសុំចូលសញ្ជាតិខ្មែរតាមរយៈអ្វីខ្លះ?

ដោយវុត្ថា

ភ្នំពេញៈ ជាធម្មតាជនជាតិខ្មែរតែងតែ ទទួលបានសញ្ជាតិខ្មែរដោយស្វ័យប្រវត្តិ។ ម្យ៉ាងវិញ ការចាប់កំណើតនៅក្នុងទឹកដឹកម្ពុជា ក៏ទទួលបានសញ្ជាតិខ្មែរដោយស្វ័យប្រវត្តិដូចគ្នា។

ដោយឡែកចំពោះជនបរទេសដែល ចង់បានជាសញ្ជាតិខ្មែរ គឺត្រូវគោរពតាមលក្ខខណ្ឌ និងវិធានផ្សេងៗ ដែលប្រទេសកម្ពុជាបានកំណត់ឡើង ដើម្បីអោយជនបរទេស អាចទទួលបានសញ្ជាតិជាខ្មែរ ដោយយោងទៅតាម ច្បាប់ស្តីពីសញ្ជាតិ និងអនុក្រឹត្យផ្សេងៗទៀតរបស់រាជរដ្ឋាភិបាល។

ដោយអនុលោមទៅតាមច្បាប់ស្តីពីសញ្ជាតិថ្មី នៃព្រះរាជាណាចក្រកម្ពុជា ដែលទើបនឹងអនុម័តកាលពីថ្ងៃទី២១ មិថុនា ឆ្នាំ២០១៨បានចែងថា ជនបរទេសដែលមានបំណងចង់សុំសញ្ជាតិខ្មែរ ត្រូវអនុវត្តទៅតាមរយៈ៖

១. ការទទួលបានសញ្ជាតិខ្មែរដោយការស្មុំកូនពេញលេញ

យោងតាមមាត្រា១០ នៃច្បាប់ស្តីពីសញ្ជាតិថ្មី បានចែងថា កូនជនបរទេសដែលត្រូវបានសុំជាកូនស្មុំពេញលេញ ដោយសហព័ទ្ធពលរដ្ឋខ្មែរ ត្រូវទទួលបានសញ្ជាតិខ្មែរ នៅពេលដែលស្មុំកូនពេញលេញ ត្រូវបានបង្កើតឡើងស្របតាមច្បាប់ជាធរមាន។

២. ការទទួលបានសញ្ជាតិខ្មែរដោយអាពាហ៍ពិពាហ៍

យោងតាមមាត្រា១១ នៃច្បាប់ស្តីពីសញ្ជាតិថ្មីបានចែងថា ស្ត្រី ឬបុរសដែលយកប្តី ឬប្រពន្ធពលរដ្ឋខ្មែរ ដោយបានរៀបអាពាហ៍ពិពាហ៍ ពួកអាចទាមទារសញ្ជាតិខ្មែរបាន លុះណាតែស្ត្រីឬបុរសនោះ បានរស់នៅជាមួយគ្នារយៈពេលបីឆ្នាំ ក្រោយចុះបញ្ជីអាពាហ៍ពិពាហ៍ និងបានស្នាក់នៅយ៉ាងហោចរយៈពេល១២ខែ ពេញលេញ ក្នុងព្រះរាជាណាចក្រកម្ពុជា។ ត្រូវបានអនុញ្ញាតឲ្យសុំទាមទារសញ្ជាតិខ្មែរ ជាចង្កោមគ្រួសារ ចំពោះជនបរទេសជាម្តាយ ឬឪពុកដែលមានកូនជាអនីតិជន។

យោងតាមមាត្រា១២ នៃច្បាប់សញ្ជាតិឆ្នាំ២០១៨ ជនបរទេសដែលអាចសុំទាមទារសញ្ជាតិខ្មែរ ដោយអាពាហ៍ពិពាហ៍បាន ត្រូវបំពេញលក្ខខណ្ឌដូចតទៅ៖ (១) មានគំនិត មាយាទ និងសីលធម៌ល្អ (២) ពុំដែលមានទោសពីបទឧក្រិដ្ឋ ឬបទមជ្ឈឹមណាមួយ (៣) មានទីលំនៅក្នុងព្រះរាជាណាចក្រកម្ពុជា នៅពេលដាក់ពាក្យសុំទាមទារសញ្ជាតិខ្មែរ ដោយអាពាហ៍ពិពាហ៍ (៤) ចេះនិយាយភាសាខ្មែរ ចេះអក្សរខ្មែរ និងយល់ដឹងប្រវត្តិសាស្ត្រខ្មែរខ្លះ (៥) មានបញ្ញា និងកាយសម្បទា ដែលមិននាំឲ្យមានគ្រោះថ្នាក់ ឬនាំឲ្យមានបន្ទុកដល់ជាតិ។

បែបបទនិងនីតិវិធីនៃការទាមទារសញ្ជាតិខ្មែរ ត្រូវកំណត់ដោយអនុក្រឹត្យ។ការផ្តល់សញ្ជាតិខ្មែរ តាមករណីទាមទារសញ្ជាតិ ត្រូវសម្រេចដោយព្រះរាជក្រឹត្យ។ ជាការកត់សម្គាល់ច្បាប់នេះបានបញ្ជាក់ថា នៅក្នុងករណីនេះ ប្រជាពលរដ្ឋខ្មែរមិនបាត់សញ្ជាតិខ្មែរ ដោយសារតែការរៀបអាពាហ៍ពិពាហ៍ជាមួយជនបរទេសឡើយ៕

អាស៊ានពិចារណាលើការជំរុញការធ្វើដំណើរក្នុងតំបន់ឡើងវិញ ដែលធានាបានសុវត្ថិភាពទេសចរណ៍

ដោយ ៖ រ៉ាណេត

ភ្នំពេញ ៖ ក្នុងចំណោមបណ្តាប្រទេសសមាជិកអាស៊ាន បាន និងកំពុងពិចារណាលើការជំរុញឱ្យមានការធ្វើដំណើរក្នុងតំបន់ឡើងវិញ ជាមួយនឹងការអនុវត្តនូវវិធានការនានាដែលអាចធានាបាននូវសុត្ថិភាពទេសចរណ៍រួមគ្នា។

ប្រទេសទាំងឡាយរបស់អាស៊ាន បានបើកកិច្ចប្រជុំរួមគ្នាក្នុងក្របខណ្ឌសហព័ន្ធសមាគមការធ្វើដំណើរអាស៊ី (FATA) តាមរយៈប្រព័ន្ធ Video Conference នាថ្ងៃទី១៩ ខែមិថុនា ឆ្នាំ២០២០ ម្សិលមិញនេះ ដើម្បីពិភាក្សាលើការបើកព្រំដែនឡើងវិញសម្រាប់ទេសចរក្នុងតំបន់អាស៊ាន ដើម្បីជំរុញការធ្វើដំណើររបស់ទេសចរ ក៏ដូចជាការលើកទឹកចិត្ត (Incentives) និងផែនការនានាជាប្រយោជន៍រួម។

អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ ក្រសួងទេសចរណ៍ លោក ថោង រដ្ឋសក្តិ បានបង្ហាញពីបច្ចុប្បន្នភាពជូនអង្គសន្និសីទអំពីស្ថានភាព Covid-19 នៅកម្ពុជា ដែលស្ថិតក្រោមការគ្រប់គ្រងយ៉ាងល្អប្រសើរ និងមានការយកចិត្តទុកដាក់ខ្ពស់ពីសំណាក់រាជរដ្ឋាភិបាល។ លោកថា រាជរដ្ឋាភិបាលបានដាក់ចេញនូវគោលនយោបាយថ្មីៗមួយចំនួន រួមមាន វិធានសុវត្ថិភាពទេសចរណ៍របស់ក្រសួងទេសចរណ៍ (New Normalization Protocols for Health and Safety) ដើម្បីចូលរួមទប់ស្កាត់ការរាលដាលជំងឺ Covid-19 ដល់សហគមន៍ ស្របពេលដែលទេសចរផ្ទៃក្នុងកំពុងមានការកើនឡើង។ ការអនុវត្តនូវវិធានការសុវត្ថិភាព និងអនាម័យសម្រាប់សេវាកម្មដឹកជញ្ជូនទេសចរណ៍តាមផ្លូវគោក និងផ្លូវទឹក ភោជនីយដ្ឋាន អាហារដ្ឋាន សណ្ឋាគារ រមណីយដ្ឋាន និងសហគមន៍ទេសចរណ៍សម្រាប់ជំហានទី១ ដោយមានការសហការពីអង្គការទេសចរណ៍ពិភពលោក ក្រសួងសុខាភិបាល និងក្រសួងទេសចរណ៍។

លោក ថោង រដ្ឋសក្តិ បានបញ្ជាក់ថា កម្ពុជាពុំដែលបិទព្រំដែនជាមួយប្រទេសជិតខាងឡើយ ដោយទេសចរអន្តរជាតិដែលមកកម្ពុជាតម្រូវឱ្យមានលិខិតធានារ៉ាប់រងសុខភាពយ៉ាងតិច ៥០,០០០ ដុល្លារអាមេរិក និងតម្កល់ប្រាក់ចំនួន ៣,០០០ ដុល្លារអាមេរិក សម្រាប់សេវាកម្មផ្សេងៗពាក់ព័ន្ធ Covid-19 និងលិខិតបញ្ជាក់អវិជ្ជមាន Covid-19 ពីសំណាក់អាជ្ញាធរសុខាភិបាលរបស់ប្រទេសខ្លួនដែលមានសុពលភាព ៧២ ម៉ោងមុនពេលធ្វើដំណើរមកកម្ពុជា។ តំណាងប្រទេសនីមួយៗបានលើកឡើងអំពីគោលនយោបាយ និងវិធានការពិសេសមួយចំនួនរបស់ប្រទេសខ្លួន។

លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍ (CATA) បានលើកឡើងអំពីស្ថានភាពទីភ្នាក់ងារទេសចរណ៍នៅកម្ពុជា ៩៥ ភាគរយ ប្រតិបត្តិករទេសចរណ៍បានផ្អាកអាជីវកម្ម ចំណែកប្រតិបត្តិករទេសចរណ៍ ៥ ភាគរយ ទៀតកំពុងខិតខំបង្កើតសកម្មភាព ផលិតផលថ្មី ដើម្បីទាក់ទាញទេសចរក្នុងស្រុក ក្នុងនោះទេសចរវ័យជំទង់កំពុងពេញនិយមក្នុងការឡើងភ្នំ និងបោះតង់។

សមាគម CATA បាន និងកំពុងអនុវត្តគោលនយោបាយរបស់រាជរដ្ឋាភិបាល ក្នុងការរក្សាសុវត្ថិភាពក្នុងសេវាកម្មទេសចរណ៍ រួមមាន សេវាកម្មស្នាក់នៅ ភោជនីយដ្ឋាន-អាហារដ្ឋាន រមណីយដ្ឋានទេសចរណ៍ សហគមន៍ទេសចរណ៍ សេវាកម្មដឹកជញ្ជូនទេសចរណ៍ផ្លូវគោក និងផ្លូវទឹក៕

បណ្ឌិត សុខ ទូច ៖ កម្ពុជាត្រូវតែជាប្រទេសផលិត ដើម្បីពង្រឹងសេដ្ឋកិច្ចរឹងមាំយូរអង្វែង

ដោយ ៖ វុត្ថា

ភ្នំពេញ ៖ លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា បានមានប្រសាសន៍ជំរុញដល់កម្ពុជាត្រូវតែខិតខំប្រឹងប្រែងអភិវឌ្ឍន៍ ដើម្បីប្រែក្លាយខ្លួនពីប្រទេសនាំចូលផលិតផលពីបរទេស ទៅជាប្រទេសអ្នកផលិតវិញ ដើម្បីពង្រឹងសេដ្ឋកិច្ចរឹងមាំយូរអង្វែង។

លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា នៅក្នុងកិច្ចពិភាក្សាតុមូលស្តីពី តើកម្ពុជាត្រៀមអ្វីខ្លះដើម្បីស្តារសេដ្ឋកិច្ចក្រោយ Covid-19 បញ្ចប់? កាលពីម្សិលមិញនេះ បានឱ្យពន្យល់ថា ដើម្បីប្រែក្លាយកម្ពុជាទៅជាប្រទេសអ្នកផលិតទៅថ្ងៃអនាគត កម្ពុជាត្រូវតែខិតខំកែច្នៃផលិតផលរបស់ខ្លួនឱ្យកាន់តែប្រសើរជាងពេលបច្ចុប្បន្ននេះថែមទៀត។

លោកបណ្ឌិតបន្តថា “បច្ចុប្បន្ននេះ ប្រទេសកម្ពុជាមានសក្តានុពលក្នុងវិស័យកសិកម្ម ជាពិសេសគឺស្រូវ ប៉ុន្តែកម្ពុជាពុំទាន់បានកែច្នៃស្រូវឱ្យទៅជាផលិតផលផ្សេងៗ ដើម្បីបំពេញតម្រូវការទីផ្សារនៅលើពិភពលោកនោះទេ។ លោកបបន្ថែមថា ប្រសិនបើកម្ពុជាអាចកែច្នៃស្រូវឱ្យទៅជាអាហារ ឬផលិតផលផ្សេងៗបាន១០ ទៅ២០មុខ កម្ពុជានឹងក្លាយប្រទេសអ្នកផលិត មានទីផ្សារច្រើន និងបង្កើនចំនួនពលកម្មការងារនៅក្នុងប្រទេស”។

លោកបណ្ឌិតថា “កម្ពុជាបាននាំចូលពីប្រទេសវៀតណាម ខណៈកម្ពុជាក៏អាចផលិតបន្លែទាំងនោះបានដូចគ្នា ដូចនេះលោកបណ្ឌិតសភាចារ្យបានជំរុញឱ្យមានកែច្នៃកសិកម្មរបស់ខ្លួនឱ្យទៅជាកសិទេសចរណ៍ ដើម្បីឱ្យកម្ពុជាខ្លាំង និងក្លាយទៅជាប្រទេសអ្នកផលិត”។

លោកបណ្ឌិត សុខ ទូច បានបង្ហាញ៤ចំណុចដែលកម្ពុជាត្រូវធ្វើក្រោយវិបត្តិជំងឺ Covid-19 ត្រូវបានបិទបញ្ចប់រួមមាន ៖ ១. បន្តផ្តោតការយកចិត្តទុកដាក់ និងពង្រឹងមូលដ្ឋានផលិតកម្ម ដូចជា ទឹក ភ្លើង ផ្លូវ ២. កំណែទម្រង់ធនធានមនុស្សចាប់ពីកម្រិតមតេ្តយ្យសិក្សា ដោយតម្រង់ទិសនៃការអភិវឌ្ឍសេដ្ឋកិច្ចដោយផ្អែកលើធនធានមនុស្ស និងបច្ចេកវិទ្យាថ្មីៗ (ឧស្សាហកម្ម៤.០)

៣. ធ្វើពិធីកម្មវិស័យសំខាន់ៗដែលជំរុញវឌ្ឍនភាពសេដ្ឋកិច្ចកម្ពុជា និងសម្រាប់គាំទ្រដល់វិស័យដទៃទៀតដូចជាកសិកម្ម ដើម្បីទេសចរណ៍ កសិកម្មដើម្បីឧស្សាហកម្ម និងកសិកម្មដើម្បីការនាំចេញទៅក្រៅប្រទេស និង៤.បន្តកិច្ចខិតខំប្រឹងប្រែងបណ្តុះបណ្តាលយុវជនដែលជាកម្លាំងស្នូលគ្រប់កម្រិតសិក្សា ជាពិសេសគឺចាប់ពីកម្រិតមតេ្តយ្យសិក្សារហូតដល់មធ្យមសិក្សា។

លោកបណ្ឌិតឯកទេសសេដ្ឋកិច្ច គី សេរីវឌ្ឍន៍ ឱ្យដឹងដែរថា សេដ្ឋកិច្ចរបស់កម្ពុជា ដែលរងផលប៉ះពាល់ដោយសារវិបត្តិជំងឺ Covid-19 ជាសកលអាចមានភាពប្រសើរឡើងវិញ ប្រសិនបើកម្ពុជាបានស្តារឡើងវិញនូវវិស័យសំខាន់ៗចំនួន៣ រួមមាន៖ វិស័យទេសចរណ៍ក្នុងស្រុក វិស័យកសិកម្ម និងជំរុញវិស័យសហគ្រាសធុនតូច និងធម្យម (SMEs)។

លោកបណ្ឌិតថា “សេដ្ឋកិច្ចកម្ពុជាអាចងើបឡើងវិញបាន គឺទី១៖ យើងត្រូវស្តារទេសចរណ៍ក្នុងស្រុក, ទី២៖ យើងត្រូវកែច្នៃកសិកម្មរបស់យើង ឲ្យទៅជាកសិកម្មគាំទ្រដល់វិស័យទេសចរណ៍ និងជាផលិតផលសិរីរាង្គ និងទី៣៖ កាត់បន្ថយថ្លៃដើមលើកការដឹកជញ្ជូន និងយកចិត្តទុកដាក់ ទៅលើឧស្សាហកម្មខ្នាតតូច (SMEs) ដែលជាឧស្សាហកម្មដ៏សំខាន់ ធ្វើយ៉ាង ណាឲ្យអាចមានការឱកាសរួមគ្នានាំចេញទៅក្រៅប្រទេសបាន”។

ចំពោះវិស័យទេសចរណ៍ក្នុងស្រុក លោកបណ្ឌិត គី សេរីវឌ្ឍន៍ បានចាត់ទុកថា ចំនួនភ្ញៀវទេសចរក្នុងស្រុកជាង ១១លាននាក់ គឺជាកូនសោគន្លឹះក្នុងការជំរុញឲ្យមានកំណើនសេដ្ឋកិច្ចឡើងវិញ។ ចំណែកវិស័យកសិកម្មវិញ លោកបណ្ឌិតបានឱ្យយោបល់ថា កម្ពុជាត្រូវតែប្តូរយុទ្ធសាស្ត្រផលិតនូវផលិតផលសិរីរាង្គ ដែលមានតម្រូវការទីផ្សារខ្ពស់ខុសពីប្រទេសនានា ដើម្បីផ្គត់ផ្គង់វិស័យទេសចរណ៍ ព្រមទាំងត្រូវរៀបចំចងក្រងជាសហគមន៍កសិកម្ម និងការពង្រឹងទីផ្សារកសិផល ដើម្បីជំរុញវិស័យកសិកម្ម។

ចំពោះវិស័យសហគ្រាសធុនតូច និងមធ្យម (SMEs) ដែលផ្តល់កម្លាំងពលកម្មប្រមាណជាង៧០ភាគរយ នៃវិស័យឧស្សាហកម្ម និងសិប្បកម្ម លោកបណ្ឌិតមើលឃើញថា កម្ពុជាមានចំណុចខ្វះខាតក្នុងវិស័យ SMEs មួយចំនួនដែលត្រូវកែលម្អដោះស្រាយ ក្នុងនោះរួមមាន៖ ខ្វះនូវបញ្ហាបច្ចេកទេស បច្ចេកវិទ្យា និងកម្លាំងពលកម្មជំនាញ ព្រមទាំងសីលធម៌ក្នុងការប្រកួតប្រជែងផងដែរ។

យោងតាមច្បាប់ថវិកាជាតិនៅឆ្នាំ២០២០ ដែលបានអនុម័តមុនពេលកើតមានជំងឺ Covid-19 នេះ កម្ពុជាគ្រោងចំណាយថវិកាជាតិប្រហែលជិត៨ពាន់លានដុល្លារ ប៉ុន្តែការចំណាយជាក់ស្តែងគឺត្រូវបានកាត់បន្ថយប្រហែលពាក់កណ្តាល ខណៈវិបត្តិ បានទាញទម្លាក់កំណើនសេដ្ឋកិច្ចកម្ពុជាចំនួន ១.៩ភាគរយ ក្នុងឆ្នាំ២០២០នេះ។ រាជរដ្ឋាភិបាលកម្ពុជាបានព្យាករណ៍កំណើនសេដ្ឋកិច្ចរបស់កម្ពុជានឹងកើនឡើងវិញក្នុងអត្រា ៣.៥ភាគរយនៅឆ្នាំ២០២១ ៕

តំបន់សេដ្ឋកិច្ចពិសេសនៅកម្ពុជាបង្ហាញសក្តានុពលដល់វិនិយោគិនអាមេរិក ដែលស្វែងរកការធ្វើពិពិធកម្មខ្សែសង្វាក់ផ្គត់ផ្គង់

ដោយ ៖ ប៊ី

ភ្នំពេញ ៖ តំបន់សេដ្ឋកិច្ចពិសេសរបស់ប្រទេសកម្ពុជាស្ថិតក្នុងចំណោមដៃគូអាស៊ានជាច្រើន ដែលមានសក្តានុពលសម្រាប់វិនិយោគិនអាមេរិក ដែលស្វែងរកការធ្វើពិពិធកម្មខ្សែសង្វាក់ផ្គត់ផ្គង់របស់ពួកគេ។ នេះបើយោងតាមរបាយការណ៍ថ្មីៗនេះដែលធ្វើឡើងដោយក្រុមហ៊ុនសេវាកម្មអន្តរជាតិមួយ។

ក្រុមហ៊ុន Dezan Shira & Associates ដែលជាក្រុមហ៊ុនផ្តល់សេវាកម្មជំនាញ ពន្ធ ច្បាប់ និងប្រតិបត្តិការដល់វិនិយោគិនក្រុមហ៊ុនអន្តរជាតិ បានឱ្យដឹងថា តំបន់សេដ្ឋកិច្ចពិសេសរបស់តំបន់កំពុងដើរតួនាទីយ៉ាងសំខាន់ក្នុងការសម្របសម្រួលពាណិជ្ជកម្មកាន់តែច្រើនរវាងតំបន់ និងសហរដ្ឋអាមេរិក តាមរយៈការលើកទឹកចិត្តផ្នែកសារពើពន្ធ និងមិនមែនសារពើពន្ធ។

ក្នុងគោលបំណងដើម្បីក្លាយជាប្លុកពាណិជ្ជកម្មដ៏មានឥទ្ធិពលនោះបណ្តាប្រទេសអាស៊ានបាន និងកំពុងជំរុញតំបន់សេដ្ឋកិច្ចពិសេស ដែលជាមូលដ្ឋានគ្រឹះមួយក្នុងការជំរុញលើកទឹកចិត្តការវិនិយោគផ្ទាល់ពីបរទេស (FDI) បន្ថែមទៀត។ តំបន់សេដ្ឋកិច្ចពិសេសបានទទួលនូវភាពលេចធ្លោកាន់តែខ្លាំងឡើង បន្ទាប់ពីការបង្កើតសហគមន៍សេដ្ឋកិច្ចអាស៊ាននៅឆ្នាំ ២០១៥ ហើយវាបានក្លាយជាឧបករណ៍សំខាន់ ដើម្បីទាក់ទាញវិនិយោគិនអាមេរិក ដែលកំពុងសម្លឹងរកមើលការធ្វើពិពិធកម្មខ្សែសង្វាក់ផ្គត់ផ្គង់របស់ពួកគេ។

ប្រទេសកម្ពុជាមានតំបន់សេដ្ឋកិច្ចពិសេសចំនួន ៣១ នៅទូទាំងប្រទេស ប៉ុន្តែមានតែតំបន់សេដ្ឋកិច្ចពិសេសចំនួន១៧ ប៉ុណ្ណោះ ដែលមានសកម្មភាពនៅក្នុងប្រទេស ដែលភាគច្រើននៅតាមព្រំដែនជាមួយប្រទេសវៀតណាម និងប្រទេសថៃ។

យោងតាមរបាយការណ៍ ការលើកទឹកចិត្តពន្ធផ្សេងៗអាចទទួលបាននៅក្រោមតំបន់ទាំងនេះរាប់ចាប់ពីការលើកលែងពន្ធលើប្រាក់ចំណូលក្រុមហ៊ុន ១០០ ភាគរយរហូតដល់ ៩ ឆ្នាំដើម្បីរួចផុតពីពន្ធនាំចូល និងនាំចេញ។

ក្រុមហ៊ុនអាមេរិកមួយចំនួន ដែលបានវិនិយោគនៅក្នុងតំបន់សេដ្ឋកិច្ចពិសេសនៅកម្ពុជារួមមានកូកាកូឡា ដែលបានបើករោងចក្រតម្លៃ ១០០ លានដុល្លារនៅឯតំបន់សេដ្ឋកិច្ចពិសេសភ្នំពេញ កាលពីឆ្នាំ ២០១៦ ចាប់តាំងពីពេលនោះមកមានម៉ាកផ្សេងទៀតដូចជា Apple Timberland Puma និងក្រុមហ៊ុន IBM បានបង្កើតវត្តមាននៅតំបន់សេដ្ឋកិច្ចពិសេសភ្នំពេញ។
តួលេខផ្លូវការពីការិយាល័យជំរឿនអាមេរិកបានបង្ហាញថា ពាណិជ្ជកម្មទ្វេភាគីរវាងប្រទេសទាំងពីរត្រូវបានកត់ត្រាក្នុងតម្លៃប្រមាណ ២ ពាន់លានដុល្លារក្នុងរយៈពេល ៤ ខែដំបូងនៃឆ្នាំនេះ កើនឡើង ២៩ ភាគរយ ធៀបនឹងរយៈពេលដូចគ្នាកាលពីឆ្នាំមុន។

យោងតាមរបាយការណ៍របស់ក្រុមហ៊ុន Dezan Shira & Associates ផលិតផលសំខាន់ៗរបស់កម្ពុជាដែលនាំចេញទៅទីផ្សារសហរដ្ឋអាមេរិកភាគច្រើនជាផលិតផលវាយនភណ្ឌ សម្លៀកបំពាក់ ស្បែក និងស្បែកជើងដែលគិតជាទឹកប្រាក់ជាង១ពាន់លានដុល្លារជារៀងរាល់ឆ្នាំ៕

រដ្ឋមន្ត្រីក្រសួងពាណិជ្ជកម្ម ៖ កិច្ចចរចាពាណិជ្ជកម្មសេរីកម្ពុជា-ចិនបានបញ្ចប់ ហើយការនាំចេញរបស់កម្ពុជាទៅចិននឹងកើន ២០ភាគរយ

ដោយ ៖ វុត្ថា

កែប ៖ រដ្ឋមន្ត្រី ក្រសួងពាណិជ្ជកម្ម លោក ប៉ាន សូរស័ក្តិ បានអះអាងថា ក្រុមការងារបច្ចេកទេសរបស់ក្រសួពាណិជ្ជកម្មទើបតែបញ្ចប់ដោយជោគជ័យលើកិច្ចចរចាពាណិជ្ជកម្មសេរីរវាងកម្ពុជា-ចិន កាលពីពេលថ្មីៗនេះ ហើយកម្ពុជារំពឹងថា នឹងមានកំណើននៃការនាំចេញទៅកាន់ទីផ្សារប្រទេសចិនប្រមាណជា ២០ភាគរយ។

ការថ្លែងបែបនេះ ធ្វើឡើងក្នុងឱកាសដែលលោករដ្ឋមន្ត្រី អញ្ជើញជាអធិបតីក្នុងពិធីសំណេះសំណាលជាមួយមន្ត្រីរាជការមន្ទីរពាណិជ្ជកម្ម និងមន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) ខេត្តកែប កាលពីរសៀលថ្ងៃទី១៩ ខែមិថុនា ឆ្នាំ២០២០ ដែលមានការចូលរួមពីមន្ត្រី ថ្នាក់ដឹកនាំក្រសួងពាណិជ្ជកម្ម មន្ត្រីមន្ទីរពាណិជ្ជកម្ម និងសាខា ក.ប.ប ជាច្រើនរូបទៀត។

លោក ប៉ាន សូរស័ក្តិ បានមានប្រសាសន៍ថា បន្ទាប់ពីទទួលបានជោគជ័យលើកិច្ចចរចានេះរួចមក ក្រុមការងារនឹងស្នើសុំគោលការណ៍ពីរដ្ឋាភិបាលទាំងសងខាង ដើម្បីផ្តល់ការយល់ព្រមលើអត្ថបទកិច្ចព្រមព្រៀង និងសំណើបើកច្រកទីផ្សារ និងឈានទៅចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគីនៅចុងឆ្នាំ២០២០នេះ ហើយវានឹងក្លាយជាកិច្ចព្រមព្រៀងពាណិជ្ជកម្មសេរីលើកដំបូងសម្រាប់កម្ពុជា។

លោកបន្តថា “ផ្អែកលើគោលការណ៍រួមដែលបានឯកភាពគ្នាដោយក្រុមចរចានោះ បន្ទាប់ពីរដ្ឋាភិបាលប្រទេសទាំងពីរឯកភាពលើកិច្ចព្រមព្រៀង និងការបើកច្រកទីផ្សារដែលបានស្នើឡើងនោះ កំណើននាំចេញពីកម្ពុជាត្រូវបានរំពឹងថានឹងកើនឡើងប្រមាណ ២០ភាគរយ”។

លោករដ្ឋមន្ត្រីបន្ថែមថា ការចរចាកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន ជាគំនិតផ្តួចផ្តើមរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងលោក លី គឺជាំង (Li Keqiang) នាយករដ្ឋមន្ត្រីចិន នៅក្នុងជំនួបទ្វេភាគីនាថ្ងៃទី២០-២៣ ខែមករា ឆ្នាំ២០១៩ នៅទីក្រុងប៉េកាំង។ ការផ្តួចផ្តើមបង្កើតនូវកិច្ចព្រមព្រៀងនេះ ក្នុងគោលដៅពង្រីកការធ្វើពាណិជ្ជកម្ម វិនិយោគ សេវា និងកិច្ចសហប្រតិបត្តិការឱ្យកាន់តែស៊ីជម្រៅ សម្រាប់ជាឧត្តមប្រយោជន៍នៃប្រជាជនរបស់ប្រទេសទាំងពីរ៕