ដោយវុត្ថា

ភ្នំពេញៈ រដ្ឋបាលខេត្តស្វាយរៀបាន នឹងកំពុងសាងសង់កំពង់ផែថ្មីមួយ ដើម្បីសម្រួ​លដល់ការដោះដូរទំនិញតាមផ្លូវទឹក ជាមួយខេត្តឡុងអាន នៃប្រទេសវៀតណាម ខណៈខេត្តជាប់ព្រំដែនមួយនេះ មានសក្តានុពលខ្ពស់លើវិស័យសេដ្ឋកិច្ច និងពាណិជ្ជកម្ម។

យោងតាមការផ្សព្វផ្សាយរបស់រដ្ឋបាលខេត្តស្វាយរៀង កាលពីពេលថ្មីៗនេះបាន ឱ្យដឹងថា បច្ចុប្បន្ននេះ វឌ្ឍនភាព នៃគម្រោងកសាងកំពង់ផែ និងការស្តារទន្លេវ៉ៃគោដោយនាយកដ្ឋានដឹកជញ្ជូនផ្លូវទឹក នៃក្រសួងសាធារណៈការ និងដឹកជញ្ជូនសហការជាមួយរដ្ឋបាលខេត្តស្វាយរៀង គិតមកដល់ថ្ងៃទី៨ ខែមិថុនា ឆ្នាំ២០២០នេះ ការងារបូមស្តារទន្លេវ៉ៃគោសម្រេចបានដូចខាងក្រោម៖

១-អ៊ិចស្កាវទ័រ ជីកស្តារចាប់ដីទន្លេបោះបានប្រវែង ៤,៥០០ម៉ែត្រ។ ២-ម៉ាស៊ីនបូមសំអាតបាតទន្លេ បានប្រវែង៥០០ម៉ែត្រចាប់ពីបង្គោល0+100 ពីកំពង់ផែតាស្អាងឆ្ពោះទៅច្រកទ្វាព្រំដែនយ៉ាំដូងខេត្តស្វាយរៀងកម្ពុជា- យិនហ៊ឹងខេត្តឡុងអានប្រទេសវៀតណាម។

រដ្ឋបាលខេត្តស្វាយរៀងបញ្ជាក់ថា ការកសាងកំពង់ផែ និងស្តារផ្លូវទឹក នៃទន្លេវ៉ៃគោនេះ មានទីតាំងកំពង់ផែស្ថិតនៅភូមិចុងព្រែក សង្កាត់ស្វាយរៀង ក្រុងស្វាយរៀង ខេត្តស្វាយរៀង ដែលកំពុងដំណើរការស្ថាបនានាពេលនេះ និងផ្តល់អត្ថប្រយោជន៍ជាច្រើន ក្នុងការសម្រួល ដល់ការដឹកជញ្ជូនទំនិញតាមផ្លូវទឹក ទៅមករវាងខេត្តស្វាយរៀងប្រទេសកម្ពុជានិងខេត្តឡុងអានប្រទេសវៀតណាមនៅថ្ងៃអនាគត។

ប្រភពដដែលបន្តទៀតថា កន្លងមកការដោះដូរទំនិញ តាមផ្លូវទឹក នៃផែតាស្អាងនេះ គឺមានច្រើនជាពិសេសស្រូវ ក៏ប៉ុន្តែដោយទន្លេវ៉ៃគោ គោករាក់ និងមានកំប្លោកច្រើនពិបាកក្នុងការធ្វើចរាចរណ៍ កាណូត ទើបរដ្ឋបាលខេត្តស្វាយរៀង លើកគម្រោងស្តារទន្លេវ៉ៃគោ ឲ្យបានជ្រៅ និងធំទូលាយងាយស្រួលធ្វើចរាចរណ៍ ទូកកាណូតចេញចូលបានងាយស្រួល និងកសាងកំពង់ផែរឲ្យបានល្អប្រសើរមានស្តង់ដា ដើម្បីអាជីវករចេញចូលរថយន្តដឹកទំនិញបានងាយស្រួល៕

ដោយៈ រ៉ាណេត

ភ្នំពេញៈ រដ្ឋាភិបាលកម្ពុជា គ្រោងនឹងត្រៀមរៀបចំកិច្ចប្រជុំ គណៈកម្មាធិការសម្របសម្រួលអន្ដររដ្ឋាភិបាលកម្ពុជា-ចិន នៅថ្ងៃទី១៦ ខែមិថុនា ឆ្នាំ២០២០ ខាងមុខនេះ ដើម្បីស្ដារសេដ្ឋកិច្ចកម្ពុជា ក្រោមបញ្ចប់វិបត្តិនៃជំងឺឆ្លង Covid-19 ដោយមានលោក វ៉ាង យី ទីប្រឹក្សារដ្ឋ និងជារដ្ឋមន្ដ្រីការបរទេសចិន និងជាសហប្រធានខាងភាគីចិនចូលរួមផងដែរ។

នេះបើតាមការបញ្ជាក់របស់លោកឧបនាយករដ្ឋមន្ត្រី ហោ ណាំហុង ក្នុងនាមជាសហប្រធាននៃកិច្ចប្រជុំ នៅព្រឹកថ្ងៃទី០៨ ខែមិថុនា ឆ្នាំ២០២០ ក្នុងឱកាសដែលលោកបានបញ្ចប់កិច្ច ប្រជុំផ្ទៃក្នុងគណៈកម្មាធិការ សម្របសម្រួលអន្តររដ្ឋាភិបាលកម្ពុជា-ចិនស្តីពីភាពជាដៃគូរយុទ្ធសាស្ត្រគ្រប់ជ្រុងជ្រោយ និងសហគមន៍វាសនាតែរួមកម្ពុជា-ចិន នៅទីស្តីការគណៈរដ្ឋមន្ត្រី។

លោកឧបនាយករដ្ឋមន្ត្រី ហោ ណាំហុងបានបញ្ជាក់ថា កិច្ចប្រជុំគណៈកម្មាធិការភាគីកម្ពុជា មានការអញ្ជើញចូលរួម ពីសមាជិក-សមាជិកាគណៈកម្មាធិការកម្ពុជា ដើម្បីត្រៀមចូលរួម កិច្ចប្រជុំតាមរយៈវីដេអូខនហ្វឺរេន (Video Conferrence) នៅថ្ងៃទី១៦ ខែមិថុនាខាងមុខ ជាកិច្ចប្រជុំធំជាមួយភាគីចិន ដែលនឹងមានការពិភាក្សាគ្នា លើរបៀបវីរៈថា តើកិច្ចសហការរវាងកម្ពុជា-ចិនកន្លងមក មានលក្ខណៈយ៉ាងណា ហើយទៅពេលអនាគត នឹងបន្តសហការគ្នាយ៉ាងណាបន្ថែមទៀត ដើម្បីស្តារសេដ្ឋកិច្ចរបស់កម្ពុជាឡើងវិញ ក្រោ​យពីវិបត្តិ Covid-19 ដោយសារតែជំងឺ Covid-19 នេះ បានប៉ះពាល់យ៉ាងខ្លាំង ដល់វិស័យសេដ្ឋកិច្ច មិនមែនតែក្នុងប្រទេសកម្ពុជានោះទេ ប៉ុន្តែគឺសកលលោកទាំងមូល។

ចាប់តាំងពីឆ្នាំ២០១០មក កម្ពុជា-ចិន បានបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយ ហើយនៅថ្ងៃទី២៨ ខែមេសា ឆ្នាំ២០១៩ កន្លងទៅ ក្រោមការអនុញ្ញាតពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក ស៊ី ជិនពីង ប្រធានាធិបតីចិន, ឧបនាយករដ្ឋមន្ត្រី ហោ ណាំហុង តំណាងកម្ពុជា និងលោក វ៉ាង យ៉ី ទីប្រឹក្សារដ្ឋ និងជារដ្ឋមន្ត្រីការបរទេសចិន បានចុះហត្ថលេខា លើផែនការ៥ឆ្នាំ ដើម្បីកសាងសហគមន៍វាសនារួម កម្ពុជា-ចិន ដូច្នេះ ហើយទំនាក់ទំនងរវាងកម្ពុជាជាមួយចិន ជាទំនាក់ទំនងពិសេសលើគ្រប់ជ្រុងជ្រោយទាំងអស់៕

ដោយវុត្ថា

ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់  បានសម្រេចចេញប្លង់គោលប្រើប្រាស់ដីបានចំនួន១០១  នៅទូទាំងប្រទេសដោយក្នុងនោះ ថ្នាក់រាជរាធានី-ខេត្តចំនួន៣ និង ថ្នាក់ក្រុង ស្រុក ខណ្ឌ និងទីប្រជុំជនចំនួន ១៤  និងឃុំ សង្កាត់ចំនួន៨៤នៅទូទាំងប្រទេស។

យោងតាមរបាយការណ៍របស់ក្រសួងរៀបចំដែនដី នគូរូបនីយកម្ម និងសំណង់ដែលផ្សព្វផ្សាយកាលពីខែឧសភា ថ្មីៗនេះបានបង្ហាញឱ្យដឹងថា ប្លង់គោលដែលប្រើប្រាស់ដីសម្រាប់ថ្នាក់រាជរាធានី-ខេត្តចំនួន ៣ រួមាន រាជធានីភ្នំពេញ ខេត្តបាត់ដំបង និងខេត្តព្រះសីហនុ។

សម្រាប់ថ្នាក់ក្រុង ស្រុក ខណ្ឌ និងទីប្រជុំជនចំនួន១៤ រួមមាន ទីរួមខេត្តត្បូងឃ្មុំ ក្រុងបាត់ដំបង ទីប្រជុំជកោះរ៉ុង ក្រុងតាខ្មៅ ក្រុងកំពត ក្រុងកែប ក្រុងសៀមរាប ក្រុងខែមរភូមិន្ទ ក្រុងបូកគោ ក្រុងបាវិត ក្រុងប៉ោយប៉ែត ក្រុងស្ទឹងត្រែង ទីប្រជុំជនជ្រៃធំនៃស្រុកកោះធំ និងទីប្រជុំស្វាយអន្ទរ និង ថ្នាក់ឃុំសង្កាត់មានចំនួន ៨៤នៅទូទាំងប្រទេស។

នាយិការក្រុមហ៊ុន CBRE Cambodia ប្រចាំកម្ពុជា លោកស្រី អាន សុធីតាបានមានប្រសាសន៍ឱ្យដឹងដែរថា ការរៀបចំឱ្យមានការប្លង់គោលប្រើប្រាស់ដី នៅគ្រប់ខេត្តក្រុងនៅក្នុងប្រទេសកម្ពុជា បានផ្តល់នូវភាពងាយស្រួល ក្នុងការអភិវឌ្ឍក្រុង  និងរៀបចំហេដ្ឋារចនាសម្ព័ន្ធក្នុងរយៈពេលវែងទៅមុខទៀត ។

លោកស្រីបន្តថា “ការដាក់ឱ្យអនុវត្តឱ្យបានត្រឹមត្រូវ និងមានប្រសិទ្ធភាពចំពោះប្លង់គោលប្រើប្រាស់ដីនេះ ដើម្បីបញ្ជៀសនូវហានិភ័យផ្សេងៗ ជាពិសេសលើការរៀបចំនគរូបនីយកម្ម និងសំណង់ក្នុងខេត្តក្រុងនានា”។

អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោកសេង ឡូត បានឱ្យដឹងកាលពីពេលថ្មីៗនេះដែរថា  ក្រសួងរៀបចំដែនដី នគរូបនីយកម្ម និងសំណង់ បានសម្រេចធ្វើការកំណត់ ការប្រើប្រាស់ដីតាមប្លង់គោល នៅតាមបណ្តាស្រុក-ក្រុងនៅទូទាំងប្រទេស និងជាផែនការយុទ្ធសាស្ត្រ សម្រាប់បែងចែកនៃការប្រើប្រាស់ដី ដើម្បីឈានទៅរកការអភិវឌ្ឍ។

ក្រសួងរៀបចំដែនដី នគរូបនីយកម្ម និងសំណង់បាននឹងកំពុងរៀបចំប្លង់គោលប្រើប្រាស់ដីនៅគ្រប់រាជធានី-ខេត្ត  និងរៀបចំទុកជាឯកសារយុទ្ធសាស្ត្រគោល បម្រើឱ្យមហិច្ឆិតារបស់រាជរដ្ឋាភិបាល និងគោលដៅ ទស្សនវិស័យដល់ឆ្នាំ២០៣៥ ក្នុងការគ្រប់គ្រងតំរង់ទិសការអភិវឌ្ឍសេដ្ឋកិច្ច ក្នុងព្រំប្រទល់រដ្ឋបាលរាជធានី ខេត្ត និងតំបន់ទីប្រជុំជនពាក់ព័ន្ធទាំងឡាយនៅជាប់ជុំវិញ ឆ្លើយតបបាននឹងកំណើននៃការវិនិយោគឯកជន និងចំនួនប្រជាជន តាមរយៈការតម្រង់ទិស និងជម្រុញការវិនិយោគសាធារណៈ ស្របតាមរបបសេដ្ឋកិច្ចទីផ្សារសេរី និងការអភិវឌ្ឍតាមបែបប្រជាធិបតេយ្យថ្នាក់ក្រោមជាតិ៕

ដោយ ហ្សូលី

កូឡាឡាំពួរៈ ប្រទេសម៉ាឡេស៊ីបានប្រកាសថា ប្រទេសខ្លួននឹងបើកឡើងវិញនូវរាល់សកម្មភាពសេដ្ឋកិច្ចទាំងអស់ និងអនុញ្ញាតឱ្យមានការធ្វើដំណើរអន្តររដ្ឋ ចាប់ពីថ្ងៃទី ១០ ខែមិថុនា ដោយដកការរឹតត្បិតការធ្វើដំណើរដោយសារមេរោគCovid-19 ដែលត្រូវបានដាក់ជិត៣ខែមកហើយ ខណៈដែលប្រទេសនេះសន្យាថា ធ្វើឱ្យសេដ្ឋកិច្ចមានភាពរ៉ឹងមាំឡើងវិញ។

នាយករដ្ឋមន្រ្តីនៃប្រទេសម៉ាឡេស៊ី Muhyiddin Yassin បានប្រកាសនៅក្នុងសុន្ទរកថា មួយតាមទូរទស្សន៍កាលពីថ្ងៃយប់ថ្ងៃអាទិត្យ ទី៧ ខែមិថុនា ឆ្នាំ ២០២០ ថា យើងទទួលបានជោគជ័យលើការគ្រប់គ្រង ការផ្ទុះវីរុស Covid-19 ហើយ។

លោកនាយករដ្ឋមន្ត្រី Yassin បានមានប្រសាសន៍បន្តថា“ ខ្ញុំដឹងថារដ្ឋាភិបាលមិនអាចគ្រប់គ្រងជីវិតរបស់អ្នកជារៀងរហូត ដើម្បីគ្រប់គ្រងវីរុសនោះទេ”។

រដ្ឋាភិបាលនឹងបន្ធូរបន្ថយការរឹតត្បិតលើសកម្មភាពសង្គម ការអប់រំ និងសាសនាតាមដំណាក់កាល ដែលមានគោលការណ៍ណែនាំសុខភាព ចំណែកឯអាជីវកម្ម និងមុខជំនួញនានាក្នុងប្រទេស នឹងត្រូវអនុញ្ញាតឱ្យត្រឡប់ទៅដំណើរការ តាមម៉ោងធម្មតាវិញសារជាថ្មី។

ប្រមុខដឹកនាំរូបនេះ បានលើកទឹកចិត្តឱ្យមានថ្ងៃឈប់សម្រាកក្នុងស្រុក ខណៈដែលការធ្វើដំណើររវាងរដ្ឋនានា នឹងត្រូវអនុញ្ញាត ប៉ុន្តែលោកបានបញ្ជាក់ថា ព្រំដែនអន្តរជាតិនឹងនៅតែបន្តបិទ។ មជ្ឈមណ្ឌលកម្សាន្តដូចជា សួនកម្សាន្ត និងក្លឹបរាត្រី កន្លែងកីឡាដែលពាក់ព័ន្ធនឹងការទាក់ទងជិតស្និទ្ធ រួមទាំងព្រឹត្តិការណ៍នានា ដែលពាក់ព័ន្ធនឹងការជួបជុំមនុស្សជាច្រើន ក៏នៅតែចាត់វិធានការមិនត្រូវបានអនុញ្ញាតដែរ។

ប្រទេសម៉ាឡេស៊ីបានបើកអាជីវកម្មឡើងវិញជាបណ្តើរៗ ក្នុងរយៈពេលមួយខែចុងក្រោយនេះ ជាមួយនឹងពិធីការផ្សេងៗនៅក្នុងសង្គម បន្ទាប់ពីបានបិទអាជីវកម្ម និងសាលារៀនទាំងអស់ ដោយហាមឃាត់ការជួបជុំសាធារណៈ និងការរឹតត្បិតការធ្វើដំណើរកាលពីថ្ងៃទី ១៨ ខែមីនា ឆ្នាំ ២០២០កន្លងទៅ។

ល្បឿននៃការឆ្លងវីរុសថ្មីនៅក្នុងប្រទេស ដែលស្ថិតក្នុងចំណោមអត្រាខ្ពស់បំផុតនៅអាស៊ីអាគ្នេយ៍ បានថយចុះក្នុងប៉ុន្មានសប្តាហ៍ថ្មីៗនេះ។

រដ្ឋមន្រ្តីក្រសួងហិរញ្ញវត្ថុ បានប្រាប់សារព័ត៌មានរ៉យទ័រកាលពីថ្មីៗនេះថា ឱនភាពសារពើពន្ធរបស់ប្រទេសម៉ាឡេស៊ី នឹងកើនឡើងជិតទ្វេដង ដែលមានទំហំប្រហែល៦ភាគរយ នៃទិន្នផលសេដ្ឋកិច្ចប្រចាំឆ្នាំនៅឆ្នាំនេះ ដោយសារតែការខិតខំប្រឹងប្រែងរបស់រដ្ឋាភិបាលនាពេលថ្មីៗនេះ ក្នុងគោលបំណងស្តារសេដ្ឋកិច្ចឡើងវិញ។

ប្រទេសដែលមានសេដ្ឋកិច្ចធំលំដាប់ទី៣ នៅអាស៊ីអាគ្នេយ៍មួយនេះ ធ្លាប់បានប្រ​កាសអំពីថវិកា លើកទឹកចិត្តដែលមានតម្លៃប្រមាណ៦៩ពាន់លានដុល្លារ ដើម្បីកាត់បន្ថយផលប៉ះពាល់នៃជំងឺរាតត្បាតនេះ ដោយរដ្ឋាភិបាលបានប្តេជ្ញាថា នឹងចាក់បញ្ចូលទឹកប្រាក់មួយចំនួននៃចំនួនសរុបក្នុងវិស័យសេដ្ឋកិច្ច៕

ដោយវុត្ថា

សៀមរាប៖ រដ្ឋបាលខេត្តបាន និងកំពុងដំណើរការកែលម្អសោភណភាព និងរៀបចំទីតាំងចំណតរថយន្តធុនតូចសងខាងផ្លូវជាតិលេខ៦ នៅមុខផ្សារលើធំថ្មី ភូមិបន្ទាយចាស់ សង្កាត់ស្លរក្រាម ក្រុងសៀមរាប ខេត្តសៀមរាប ក្នុងគោលបំណងរៀបចំសណ្តាប់ធ្នាប់សាធារណៈនៅក្នុងក្រុងឱ្យកាន់តែមានភាពទាក់ទាញ។

លោក លី សំរិទ្ធ អភិបាលរងខេត្តសៀមរាប បានឱ្យដឹងកាលពីកន្លងមកថ្មីៗនេះ ថា ការកែលម្អសោភណភាព និងរៀបចំទីតាំងចំណត់រថយន្តធុនតូចនៅផ្លូវផ្សារលើនេះ ជាគម្រោងរបស់រដ្ឋបាលខេត្ត ក្រោមការយកចិត្តទុក្ខដាក់ខ្ពស់របស់ ឯកឧត្តម ទៀ សីហា អភិបាល នៃគណៈអភិបាលខេត្ត លើការងារកសាង និងជួសជុលហេដ្ឋារចនាសម្ព័ន្ធ និងសោភ័ណភាពក្នុងក្រុងសៀមរាប។

លោកបន្តថា គម្រោងកែលម្អសោភ័ណ្ឌភាព និងរៀបចំទីតាំងចំណតរថយន្តធុនតូចនេះ នឹងរុះរើចិញ្ចើមផ្លូវក្រាលការ៉ូឡា ហើយជំនួសដោយកៅស៊ូបេទីមAC ព្រមទាំងមានគំនូសសញ្ញាសម្រាប់ចតរថយន្តនៅក្នុងប្រឡោះចតដោយមានសណ្ដាប់ធ្នាប់ និងរបៀបរៀបរយ។

លោកបញ្ជាក់ទៀតថា រដ្ឋបាលខេត្តសៀមរាប បាននឹងកំពុងយកចិត្តទុកដាក់ការរៀបចំសណ្តាប់ធ្លាប់ សនិ្តសុខ និងសុវត្ថិភាពសារធារណៈ ឱ្យកាន់តែប្រសើរឡើងមួយកម្រិតទៀត ដើម្បីឱ្យសាកសមជាទីក្រុងទេសចរណ៍ និងទាក់ទាញទេសចរណ៍ និងវិនិយោគឱ្យបានកាន់តែច្រើនថែមទៀត ៕

ដោយវុត្ថា

ភ្នំពេញ៖ លោក Ermenegildo “Kupa” Lopes ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាធិបតេយ្យទីម័រខាងកើត ប្រចាំនៅកម្ពុជា បានលើកឡើងថា ទីម័រខាងកើត ចង់ឃើញវត្តមានអ្នកវិនិយោគកម្ពុជាទៅបណ្តាក់ទុនវិនិយោគនៅក្នុងប្រទេសខ្លួនក្នុងពេលអនាគត ខណៈប្រទេសនេះ មានធនធានសម្បូរបែប។

លោក ឯកអគ្គរដ្ឋទូត នៅក្នុងឱកាសចូលជួបសម្តែងការគួរសមជាមួយ សម្តេច ហេង សំរិន ប្រធានរដ្ឋសភា នៅថ្ងៃទី ៨ ខែមិថុនា ឆ្នាំ ២០២០នេះ ឱ្យដឹងថា ទីម័រខាងកើតសម្បូរដោយធនធានធម្មជាតិ ដែលទាមទារឲ្យមានការវិនិយោគពីបរទេស ដែលបច្ចុប្បន្ននេះ មានអ្នកវិនិយោគមកពីឥណ្ឌូនេស៊ី សហរដ្ឋអាមេរិក និងប្រទេសជាច្រើនទៀត មិនទាន់មានអ្នកវិនិយោគពីកម្ពុជានោះទេ។

លោកបន្តថា ប្រជាពលរដ្ឋទីម័រខាងកើតបានគោរពស្រឡាញ់និងកោតសរសើរចំពោះវីរៈស្នេហា បម្រើប្រទេសជាតិនិងប្រជាជន ដូច្នេះ បានចង់ឃើញវត្តមានធុរជនកម្ពុជាទៅបណ្តាក់ទុននៅទីម័រខាងកើត ក្នុងពេលអនាគត។

សម្តេចពញាចក្រី ហេង សំរិន ប្រធានរដ្ឋសភា បានវាយតំលៃខ្ពស់អំពីវឌ្ឍនភាព នៃទំនាក់ទំនងការទូតល្អ រវាងប្រទេសទំាងពីរកម្ពុជានិងទីម័រខាងកើត។ កិច្ចសហប្រតិបត្តិការរវាងរដ្ឋាភិបាល នៃប្រទេសទាំងពីរ និងលើកទឹកចិត្តបន្តកិច្ចសហប្រតិបត្តិការអោយខ្លាំងក្លាថែមទៀតលើវិស័យទេសចរណ៍ កសិកម្ម និង ធនធានមនុស្ស សំដៅនាំមកនូវផលប្រយោជន៍ដល់ប្រជាជាតិទាំងសងខាង។

សម្តេចបន្តថា កន្លងមក រដ្ឋសភាកម្ពុជាធ្លាប់បានគាំទ្ររដ្ឋសភាទីម័រខាងកើត ជាប្រទេសសង្កេតការណ៍របស់អន្តរសភាអាស៊ាន(អាយប៉ា) ហើយនិងបន្តគាំទ្ររដ្ឋសភាទីម័រជាសមាជិកពេញសិទ្ធទី១១ របស់អាយប៉ា និងអាស៊ាន នៅថ្ងៃអនាគត ៕