អភិបាលខេត្តព្រះសីហនុ រំពឹងថា ផ្លូវល្បឿនលឿនពីភ្នំពេញ ទៅខេត្តព្រះសីហនុនឹងបញ្ចប់តាមផែនការ

ដោយ ៖ វុត្ថា

ភ្នំពេញ ៖ អភិបាលខេត្តព្រះសីហនុ បានអះអាងថា ផ្លូវល្បឿនលឿនពីភ្នំពេញទៅកាន់ខេត្តព្រះសីហនុ (Express Way ) នឹងបញ្ចប់ទៅតាមផែនការ ខណៈការស្ថាបនាបាននឹងធ្វើយ៉ាងសកម្ម និងសម្រេចបានប្រមាណ ២០ភាគរយ ។

លោក គួច ចំរើន នៅក្នងសន្និសទីសារព័ត៌មានស្តីពី «វឌ្ឍនភាព និងទិសដៅការងារបន្តរបស់រដ្ឋបាលខេត្តព្រះសីហនុ» នាថ្ងៃទី៩ ខែមិថុនា ឆ្នាំ ២០២០នេះ បញ្ជាក់ថា ផ្លូវល្បឿនលឿនពីភ្នំពេញ ទៅកាន់ខេត្តព្រះសីហនុ គឺមានសក្តានុពលខ្ពស់ក្នុងការដឹកញ្ជូនទំនិញ និងជាផ្លូវយុទ្ធសាស្ត្រអភិវឌ្ឍន៍សេដ្ឋកិច្ច ។

លោកបន្តថា តាមផែនការផ្លូវនេះ នឹងបញ្ចប់នៅក្នុងចុងឆ្នាំ ២០២២ ខាងមុខនេះ ដែលនឹងជំរុញឱ្យខេត្តព្រះសីហនុកាន់តែមានការរីកចំរើនទៅមុខ និង ស្របតាមការគិតគូររបស់រាជរដ្ឋាភិបាលប្រែក្លាយជាមជ្ឈមណ្ឌលហិរញ្ញវត្ថុអន្តរជាតិ និងជាតំបន់សេដ្ឋកិច្ចពហុបំណង។

តាមរយៈបទបង្ហាញពីក្រុមហ៊ុនសាងសង់ផ្លូវល្បឿនលឿនភ្នំពេញ-ខេត្តព្រះសីហនុ កាលពីកន្លងមកនេះ បានឱ្យដឹងថា បច្ចុប្បន្នការស្ថាបនាផ្លូវនេះ មានផលប៉ះពាល់ដូចជា បង្គោលភ្លើងចំនួន១២ដើម ដែលក្រុមការងារមិនអាចសាងសង់ផ្លូវទី២ ប៉ះនឹងតំបន់គ្រប់គ្រងដោយបរិស្ថាន ដែលមិនអាចយកគ្រឿងចក្រចូលបាន។

លោក គួច ចំរើន បានសន្យាថា បញ្ហាប្រឈមទៅនឹងបង្គោលភ្លើង រដ្ឋបាលខេត្តនឹងបញ្ជូនក្រុមការងារចុះពិនិត្យ និងសម្រួលការដ្ឋានសង់ផ្លូវបណ្តោះអាសន្ន ដើម្បីយកគ្រឿងចក្រចូល ត្រូវមាននិយាមការច្បាស់លាស់ ដើម្បីស្នើទៅក្រសួងសាម៉ី។ ជាមួយគ្នានេះ លោក គួច ចំរើន អភិបាលខេត្តព្រះសីហនុ បានស្នើសុំដល់ក្រុមហ៊ុន ឱ្យជួយពង្រីកស្ពានឱ្យបាន ១៧,២៥ម៉ែត្រផងដែរ។

ការសាងសង់ផ្លូវល្បឿនលឿនភ្នំពេញ-ព្រះសីហនុ ត្រូវបានសម្តេចតេជោ ហ៊ុន សែន អញ្ជើញបើកការដ្ឋានសាងសង់ជាផ្លូវការកាលពីថ្ងៃទី២២ ខែមីនា ឆ្នាំ២០១៩កន្លងទៅនេះ។

គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ មានប្រវែងសរុបជាង ១៩០គីឡូម៉ែត្រ។ ផ្លូវនេះឆ្លងកាត់រាជធានីភ្នំពេញប្រវែង ៨.៣០គីឡូម៉ែត្រ ខេត្តកណ្តាល ប្រវែង ៩.១០គីឡូម៉ែត្រ ខេត្តកំពង់ស្ពឺប្រវែង ៨០.៨០គីឡូម៉ែត្រ ខេត្តកោះកុងប្រវែង ១.៩២គីឡូម៉ែត្រ និងខេត្តព្រះសីហនុប្រវែង ៨៩.៨៩គីឡូម៉ែត្រ ដែលចំណាយថវិកាសាងសង់សរុបប្រមាណ ២,០០០លានដុល្លារអាមេរិក ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) តាមរយៈក្រុមហ៊ុន Cambodian PPSHV Expressway Co., Ltd៕

រដ្ឋាភិបាលសម្រេចបង្កើតច្រកទ្វារព្រំដែនថ្មដា ខេត្តពោធិ៍សាត់ ជាច្រកទ្វារព្រំដែនអន្តរជាតិ

ដោយ ៖ រ៉ាណេត

ភ្នំពេញ ៖ រាជរដ្ឋាភិបាលកម្ពុជាបានសម្រេចបង្កើត និងដំឡើងច្រកទ្វារតំបន់ព្រំដែនថ្មដា ខេត្តពោធិ៍សាត់ ទៅជាច្រកព្រំដែនអន្តរជាតិ ជាផ្លូវការណ៍ ដើម្បីសម្រួលដល់ការធ្វើពាណិជ្ជកម្ម រួមជាមួយបម្រើដល់ការដឹកជញ្ជូនលក្ខណៈអន្តរជាតិផងដែរ។

តាមរយៈសេចក្ដីប្រកាសរបស់ទីស្ដីការគណៈរដ្ឋមន្ត្រី ដែលគេហទំព័រ www.propertyarea.asia ទទួលបាននៅព្រឹកថ្ងៃទី៩ ខែមិថុនា ឆ្នាំ២០២០នេះ បានបញ្ជាក់ថា រាជរដ្ឋាភិបាលបានសម្រេចដំឡើងច្រកទ្វារព្រំដែនថ្មដា នៃខេត្តពោធិ៍សាត់ ទៅជាច្រកទ្វារអន្តរជាតិថ្មីមួយទៀត ដែលការសម្រេចបង្កើតច្រកព្រំដែនមួយនេះ គឺយោងតាមការណែនាំដ៏ខ្ពងខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវផ្លូវជាតិលេខ៥៥ និងពិធីបើកការដ្ឋានសាងសង់ផ្លូវជាតិលេខ១០ នៅថ្ងៃទី៩ ខែមីនា ឆ្នាំ២០២០ នៅស្រុកវាលវែង ខេត្តពោធិ៍សាត់។

នៅក្នុងសេចក្ដីប្រកាសដដែលនេះបានបញ្ជាក់ទៀតថា ពាក់ព័ន្ធទៅនឹងការដំឡើង និងបង្កើតច្រកទ្វារព្រំដែនថ្មដា ទៅជាច្រកទ្វារព្រំដែនអន្តរជាតិនេះ រាជរដ្ឋាភិបាលបានសម្រេចប្រគល់ភារកិច្ចឱ្យក្រសួងមហាផ្ទៃ ក្រសួងការពារជាតិ និងក្រសួងការបរទេស និងសហប្រតិបត្តិការអន្តរជាតិធ្វើការចរចាជាមួយភាគីថៃ ដើម្បីសហការដំឡើងច្រកទ្វារតំបន់ព្រំដែនថ្មដា ខេត្តពោធិ៍សាត់ ទៅជាច្រកទ្វារព្រំដែនអន្តរជាតិជាផ្លូវការ៕

World Bank អះអាងជាថ្មីថា សេដ្ឋកិច្ចកម្ពុជានឹងសម្រេចបានកំណើន៦ភាគរយនៅឆ្នាំក្រោយ

ដោយ ប៊ី

ភ្នំពេញ៖ សេដ្ឋកិច្ចកម្ពុជានឹងងើបឡើងវិញដល់៦ភាគរយនៅឆ្នាំ២០២១ ដោយសារសកម្មភាពសេដ្ឋកិច្ចនៅប្រទេសចិន និងនៅទីផ្សារធំៗនឹង ផ្សេងទៀតនឹងមានសកម្មភាពឡើងវិញក្នុងឆ្នាំ២០២១។ នេះបើយោងតាមការរបាយការណ៍របស់ធនាគារពិភពលោក ឬWorld Bank (2020 Global Economic Prospects) ដែលគេទំព័រPropertyarea.asiaទទួលបាននៅថ្ងៃទី៩ ខែមិថុនា ឆ្នាំ២០២០។

របាយការណ៍ 2020 Global Economic Prospects ដែលបោះពុម្ពផ្សាយកាលថ្ងៃទី៨ ខែមិថុនា ឆ្នាំ២០២០ បានឱ្យដឹងថា ការស្ទុះងើបឡើងវិញនៃសកម្មភាពសេដ្ឋកិច្ចនៅប្រទេសចិន និងនៅទីផ្សារធំៗផ្សេងទៀតក្នុងឆ្នាំ២០២១ នឹងធ្វើឱ្យចក្ខុវិស័យសេដ្ឋកិច្ចរបស់កម្ពុជា មានភាពប្រសើរឡើងវិញ នៅឆ្នាំក្រោយ។

ទោះបីជាយ៉ាងណាក៏ដោយ ការរាតត្បាតនៃជំងឺកូវីដ-១៩ កំពុងបង្កការប៉ះទង្គិចយ៉ាងដំណំទៅលើក្បាលម៉ាស៊ីនសំខាន់ៗសម្រាប់ជំរុញកំណើនសេដ្ឋកិច្ចរបស់កម្ពុជា ក្នុងនោះមាន វិស័យទេសចរណ៍, ឧស្សាហកម្មនាំចេញ និងផ្នែកសំណង់ ដែលទាំងអស់នេះតំណាងឱ្យជាង ៧០ភាគរយនៃកំណើនសេដ្ឋកិច្ច និងផ្តល់ការងារមានកម្រៃប្រមាណជា ៤០ភាគរយ នៃការងារសរុបរបស់ប្រទេស។

ដោយសារមូលហេតុនេះ នៅក្នុងឆ្នាំ២០២០ កំណើនសេដ្ឋកិច្ចត្រូវបានរំពឹងទុកថានឹងមានល្បឿនយឺតបំផុតមិនដែលធ្លាប់ជួបប្រទះតាំងពីឆ្នាំ១៩៩៤មក ដោយវានឹងថមថយរហូតដល់រវាង -១ និង -២,៩ ភាគរយ។

ជាការឆ្លើយតបទៅនឹងវិបត្តិកូវីដ-១៩នេះ របាយការណ៍បានស្នើឡើងនូវអនុសាសន៍គោលនយោបាយមួយចំនួន សំដៅជួយជាបន្ទាន់ជំនួយសេដ្ឋកិច្ចនិងការពារសុខភាពសាធារណៈ ស្តារឡើងសេដ្ឋកិច្ចឲ្យងើបឡើងវិញក្នុងរយៈពេលខ្លី និងជួយពង្រឹងភាពធន់នៃផ្នែកម៉ាក្រូសារពើពន្ធ និងសង្គម នៅក្នុងរយៈពេលមធ្យម។

លោកស្រី អ៊ីនហ្គូណា ដូប្រាចា ប្រធានគ្រប់គ្រងនៃធនាគារពិភពលោកប្រចាំកម្ពុជា មានប្រសាសន៍កាលពីថ្មីៗនេះថា “វិបត្តិជាសកលដែលបង្កដោយការរាលដាលនៃជំងឺកូវីដ-១៩នេះ បានធ្វើឱ្យមានការប៉ះទង្គិចយ៉ាងដំណំមកលើសេដ្ឋកិច្ចរបស់កម្ពុជាក្នុងឆ្នាំ២០២០”។

លោកស្រីមានប្រសាសន៍បន្ថែមទៀតថា “ធនាគារពិភពលោកប្តេជ្ញាចិត្តថានឹងជួយកម្ពុជាក្នុងការជួយដោះស្រាយឱ្យមានប្រសិទ្ធភាពជាមួយវិបត្តិកូវីដ-១៩នេះ និងក្នុងការពង្រឹងសេដ្ឋកិច្ចឱ្យឆាប់ងើបឡើងវិញ និងមានភាពធន់ នាពេលអនាគត”៕

រដ្ឋាភិបាលត្រៀមបញ្ចប់នូវការអភិវឌ្ឍប្រព័ន្ធស្វ័យប្រវត្តិកម្មនៃការផ្តល់លិខិតអនុញ្ញាតឱ្យនាវាកំពង់ផែ

ដោយ វុត្ថា

ភ្នំពេញៈ ក្រសួងសាធារណការ និងដឹកជញ្ជូន បាននឹងកំពុងត្រៀមបញ្ចប់នូវការអភិវឌ្ឍប្រព័ន្ធស្វ័យប្រវត្តិកម្ម នៃការផ្តល់លិខិតអនុញ្ញាត ឱ្យនាវាចូលតាមកំពង់ផែនៃព្រះរាជាណាចក្រកម្ពុជា គ្រោងស្នើសុំគោលការណ៍ ពីថ្នាក់ដឹកនាំដាក់ដំណើរការ ក្នុងពេលឆាប់ៗខាងមុខនេះ ដើម្បីចូលរួមធានាតម្លាភាព ប្រសិទ្ធភាព ចំណេញពេលវេលា និងភាពជឿជាក់ដល់វិនិយោគិន ក៏ដូចជាឆ្លើយតបនឹងស្ថានការនៃការរីករាលដាលនៃជម្ងឺ COVID-19 ។

លោក រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន នៅក្នុងកិច្ច ប្រជុំពិនិត្យវឌ្ឍនភាពការងារ ប្រព័ន្ធស្វ័យប្រវត្តិកម្មនៃការផ្តល់លិខិតអនុញ្ញាត ឱ្យនាវាចូលតាមកំពង់ផែ នៃកម្ពុជា នាថ្ងៃទី ៨ ខែមិថុនា ឆ្នាំ ២០២០កន្លងមកថា ប្រព័ន្ធស្វ័យប្រវត្តិកម្មនេះ ដើម្បីធានាបាននូវតម្លាភាព ប្រសិទ្ធភាព ចំណេញពេលវេលា ផ្ដល់ភាពជឿទុក ចិត្តដល់អ្នកផ្ដល់និងអ្នកប្រើប្រាស់សេវា ព្រមទាំងកាត់បន្ថយនីតិវិធីស្មុគស្មាញដែលធ្វើឱ្យយឺតយ៉ាវក្នុង ការចូលចតនាវា។

កិច្ចប្រជុំនេះធ្វើឡើង ដើម្បីស្ដាប់បទបង្ហាញអំពីវឌ្ឍនភាព ការងារពីភាគីពាក់ព័ន្ធដែលទទួលបន្ទុកក្នុងការ អភិវឌ្ឍប្រព័ន្ធស្វ័យប្រវត្តិកម្ម នៃការផ្តល់លិខិតអនុញ្ញាតឱ្យនាវាចូលតាមកំពង់ផែ ដូចជា ប្រតិបត្តិការ និងនីតិវិធីការបំពេញទម្រង់បែបបទចូលចតនាវា ក៏ដូចជានីតិវិធីនៃការទូទាត់ថ្លៃសេវា តាមប្រព័ន្ធអនឡាញ ជាមួយធនាគារឯកទេសវីង និងដើម្បីប្រមូលធាតុចូលបន្ថែមទៀត សំដៅឱ្យការរៀបចំប្រព័ន្ធនេះ កាត់តែមានសុក្រឹតភាព ព្រមទាំងពិភាក្សា ពីទិសដៅបន្ទាប់ចំនួន៥ចំណុច រហូតដល់ប្រព័ន្ធត្រូវបានដាក់ឱ្យដំណើរការជាផ្លូវការ។

លោកបន្តថា ក្នុងយុគសម័យឧស្សាហកម្មជំនាន់៤.០ នេះ បច្ចេកវិទ្យាព័ត៌មានវិទ្យាដើរតួយ៉ាងសំខាន់ ក្នុងការធ្វើទំនើបកម្ម ការផ្ដល់សេវាសាធារណៈ ការកសាង ទីក្រុងឆ្លាតវៃ (Smart City) ការលើកកម្ពស់និងប្ដូរទម្រង់ក្នុងការបំពេញការងារ ព្រមទាំងការលើកកម្ពស់ វប្បធម៌ អរិយធម៌របស់ជាតិសាសន៍យើងផងដែរ។លោកបន្ថែមទៀតថា ការរៀបចំប្រព័ន្ធបច្ចេកវិទ្យាសម្រាប់ធ្វើការដាក់ពាក្យ និងទូទាត់ប្រាក់ នេះក៏ជាការចូលរួមដើម្បីឆ្លើយតប ទៅនឹងការទប់ស្កាត់ការរីករាលដាលនៃជម្ងឺ COVID-19 ផងដែរ។

ប្រព័ន្ធស្វ័យប្រវត្តិកម្ម ចេញវិញ្ញាបនបត្រអនុញ្ញាតនាវាចូលកំពុងផែ នៃព្រះរាជាណាចក្រកម្ពុជា នេះគឺជាយន្តការផ្តល់សេវាបណ្តោះអាសន្នមួយ ដើម្បីសម្រួលនីតិវិធីខណៈដែលគម្រោង PORT EDI របស់ជប៉ុន កំពុងត្រូវបានបន្តនីតិវិធីរៀបចំរហូតដល់ដើមឆ្នាំ២០២៣ ទើបរួលរាល់សម្រាប់ដាក់ឱ្យដំណើរការប្រើប្រាស់៕

តើគួរទិញឬលក់អចលនទ្រព្យបានដែរឬទេក្នុងឆ្នាំ២០២០នេះ?

ដោយ ហ្សូលី

ភ្នំពេញៈ ក្នុងឆ្នាំ ២០២០នេះ វិស័យអចលនទ្រព្យ ហាក់បីដូចជាមានភាពស្រពេចស្រពិលលើចរន្តទិញ-លក់បន្តិច ប៉ុន្តែនៅតែមានចរាចរណ៍ដដែល។ ម្យ៉ាង សេដ្ឋកិច្ចពិភពលោកកំពុងជួបប្រទះ នឹងវិបត្តិសេដ្ឋកិច្ច ដែលជាហេតុនាំឱ្យមានសំណួរចោទថា តើឆ្នាំ ២០២០នេះ អាចទិញឬលក់អចលនទ្រព្យបានដែរឬទេ?។

អ្នកជំនាញអចលនទ្រព្យដែលាមានបទពិសោធន៍ច្រើនឆ្នាំ និងជានាយិកាក្រុមហ៊ុន Amatak Property Service លោកស្រី តាំង ហ៊ួរ ធ្លាប់បានមានប្រសាសន៍មកកាន់គេហទំព័រ Property Area Asia ថា មិនថាបុរីលំនៅដ្ឋាន លំនៅដ្ឋាន នៅតំបន់ណានោះទេ ជាយក្រុងក៏ដោយ ក្នុងក្រុងក៏ដោយសុទ្ធសឹងតែជាឱកាសទាំងអស់។ អ្វីដែលសំខាន់ឱ្យតែគម្រោងនោះមានភាពច្បាស់លាស់ មានក្រុមហ៊ុនអភិវឌ្ឍត្រឹមត្រូវ មានការទទួលស្គាល់ពីអាជ្ញាធរ ជាពិសេសលក់ក្នុងតម្លៃល្អ អ្នកវិនិយោគឬអ្នកចង់ជាវអចលនវត្ថុគួរតែចាប់យកឱកាសនេះ។

ទន្ទឹមនេះ នាយិការរូបនេះសង្កត់ធ្ងន់ថា បច្ចុប្បន្ននេះស្ថានភាព Covid-19 មានភាពប្រសើរក៏ពិតមែន ប៉ុន្តែវិស័យអចលនទ្រព្យ មិនទាន់វិលរកសភាពនៅឡើយទេ ដូចនេះមានគម្រោងជាច្រើន ដែលកំពុងធ្វើការបញ្ចុះតម្លៃទាបជាងទីផ្សារច្រើន។ មិនតែប៉ុណ្ណោះ លក្ខខណ្ឌបង់ប្រាក់ ក៏មានភាពងាយស្រួលផងដែរ ដោយសារក្រុមហ៊ុនយល់ចិត្តអតិថិជនដោយសម្រាលនូវការប្រាក់ និងរយៈពេលបង់ប្រាក់ផងដែរ។

ដោយឡែក បើតាមឱ្យដឹងតាមការចុះផ្សាយរបស់ទស្សនាវដ្តី Forbes ដែលបានចេញផ្សាយ កាលពីពេលកន្លងទៅបានឱ្យដឹងទៀតថា ទីផ្សារលក់រាយអចលនទ្រព្យក្នុងប្រទេសកម្ពុជា អាចនឹងមានការប្រែប្រួល សូម្បីតែការជួលអចលនទ្រព្យក៏ដោយ។ រដ្ឋាភិបាលកម្ពុជា មិនទាន់បានដាក់ចេញនូវច្បាប់ ដែលកំណត់ឲ្យម្ចាស់ជួលត្រូវបញ្ចុះតម្លៃដល់អ្នកជួលក្នុងអំឡុងវិបត្តិសេដ្ឋកិច្ចធ្លាក់ចុះជាផ្លូវការនៅឡើយទេ។ ជាក់ស្តែង ការបញ្ចុះតម្លៃទិញ-លក់គឺផ្តើមចេញពីការចរចារវាងម្ចាស់អចលនទ្រព្យនិងអ្នកទិញតែប៉ុណ្ណោះ

ជាមួយគ្នានេះ លោកឧកញ៉ា តេង ឬទ្ធី អគ្គនាយកក្រុមហ៊ុន R Investment Group បានលើកឡើងថា អ្នកវិនិយោគអចលនទ្រព្យមានច្រើនប្រភេទ ទី១ អ្នកវិនិយោគអចលនទ្រព្យពាក់ព័ន្ធវិស័យទេសចរណ៍ ដូចជាការអភិវឌ្ឍទៅជា លំនៅឋានលំហែកាយ សណ្ឋាគារនិងរមណីយដ្ឋានផ្សេង។ ទី ២ គឺអ្នកដែល ស្វែងរកទិញអចលនទ្រព្យទុកវិនិយោគបន្តយកចំណេញជាដើម។

ក្រៅពីការបង្កើតប្រភេទអចលនទ្រព្យ ដូចបានរៀបរាប់ខាងលើ អ្នកជំនាញមួយរូបក៏បានរៀបរាប់ថា អចលនទ្រព្យអាចផ្តល់ឱកាសជាច្រើន ប្រភេទមិនថាទៅជា ការវិនិយោគលើការសាងសង់លំនៅដ្ឋាន រោងចក្រ ផ្សេងៗផងដែរ។

យ៉ាងណាមិញ អ្នកជំនាញអចលនទ្រព្យ លោក ហៃ រ៉ាវី នាយកក្រុមហ៊ុនអចលនទ្រព្យ Daily Realty Group បានក្រើនរំលឹកថា មុននឹងទិញលំនៅដ្ឋាននៅតំបន់ណាមួយនោះ ត្រូវពិចារណាថា ទីនោះមានប្រជាពលរដ្ឋសម្រុកទៅច្រើនន អាចប្រកបអាជីវកម្ម មានរោងចក្រ សហគ្រាស នៅជុំវិញ ជាពិសេស ហេដ្ឋារចនាសម្ព័ន្ធមានភាពរលូនស្រួលដែរឬយ៉ាងណា៕

Capital Gate ស្ថាបត្យកម្មកំពូលមួយនៃសតវត្សរ៍ទី២របស់ប្រទេសអារ៉ាប់

ដោយ វុត្ថា

ភ្នំពេញ៖ ប្រទេសអារ៉ាបរួម អាចចាត់ទុកថាជាទឹកដីនៃភាពរំភើបនិងលន្លង់ លន្លោចមួយ ដែលប្រទេសនេះបានងើបឡើង ក្នុងភាពត្រចះត្រចង់នៅដើមសតវត្សរ៍ទី២១នេះ ដោយសារធនធានធម្មជាតិដ៏សម្បូរហូរហៀររបស់ខ្លួន។

ថ្ងៃនេះគេហទំព័រ Propertyarea.asia បានគាស់កកាយជាថ្មី នូវសំណង់ស្ថាត្យកម្មដ៏អស្ចារ្យរបស់ប្រទេសនេះ ជាប្រទេសសម្បូរទៅដោយអគារខ្ពស់កប់ពពកច្រើនម៉ូត ច្រើនប្រភេទ និងអស្ចារ្យ ព្រមទាំងប្លែកជាងគេនៅក្នុងពិភពលោក ដែលគ្មានប្រទេសណាមួយអាចប្រៀបផ្ទឹមបាន។

គេហទំព័រ propertyarea.asia និងបន្តលើកយកអគារខ្ពស់កប់ពពកមួយទៀតក្នុងប្រទេសនេះ មកបង្ហាញជូនគ្រាន់បានជាចំណេះដឹង ស្វែងយល់ចំពោះការវិវឌ្ឍន៍ថ្មីៗ នៃអគារខ្ពស់កប់ពករបស់ប្រទេសនីមួយៗ ក៏ដូចជាក្នុងពិភពលោក។

Capital Gate ជាអគារខ្ពស់កប់ពពកមួយស្ថិតនៅក្នុងទីក្រុង Abu Dhabi ប្រទេសអារ៉ាប់រួម ត្រូវបានគេរចនាឡើង ដើម្បីធ្វើជាមជ្ឈមណ្ឌលតាំងពិពរណ៌ ឈ្មោះថា Abu Dhabi Nationa Exhibition Center ជាមួយនឹងរូបរាងរបស់វាមានលក្ខណៈរសរវើកគួរឲ្យស្ញប់ស្ងែង។ អគាខ្ពស់កប់ពពកនេះ មានកំពស់១៦០ ម៉ែត្រ និង៣៥ ជាន់ ហើយវាគឺជាអគារខ្ពស់មួយ ក្នុងចំណោមអគារផ្សេងទៀតក្នុងទីក្រុងនេះ ។

ម្ចាស់នៃអចលទ្រព្យដ៏អស្ចារ្យនេះ គឺក្រុមហ៊ុនដែលមានលុយមហាសាល Abu Dhabi National Exhibitions Company។ អគារដ៏ចម្លែកមួយនេះ ត្រូវបានគេស្គាល់ជាទូទៅថា Leaning Tower of Abu Dhabi ដែលស្ថិតនៅចំណុចកណ្តាល នៃទីក្រុងទាំងមូល។

អគារមជ្ឈមណ្ឌលតាំងពិព័ណ៌ពាណិជ្ជកម្មនេះ ត្រូវបានចាប់ផ្តើមសាងសង់ក្នុងឆ្នាំ២០០៧ និងបញ្ចប់ហើយសម្ភោធដាក់ឲ្យប្រើប្រាស់ជាផ្លូវការក្នុងឆ្នាំ ២០១១ ។ អគារខ្ពស់កប់ពពកនេះ ត្រូវបានសាងសង់សម្រាប់ធ្វើជាកន្លែងការិយាល័យពាណិជ្ជកម្ម និងសណ្ឋាគារ។

វាត្រូវបានបំបែកឯកទគ្គកម្មពិភពលោក ដោយ Guinness World Records ក្នុងឆ្នាំ២០១០ ស័ក្កិសមជាអគារដែលមានរូបរាងទន់ភ្លន់ និងទាក់ទាញបំផុតក្នុងពិភពលោកដែលបានបង្កើតឡើងដោយមនុស្ស៕

កម្ពុជាកំពុងធ្វើពិពិធកម្មព្រលានយន្តហោះដើម្បីឆ្លើយតទៅនឹងការដឹកជញ្ជូនតាមផ្លូវអាកាស និងការប្រកួតប្រជែងក្នុងតំបន់

ដោយ វុត្ថា

ភ្នំពេញៈ រដ្ឋាភិបាលកម្ពុជាបាន នឹងកំពុងធ្វើពិពិធកម្មព្រលានយន្តហោះ នៅក្នុងប្រទេសដោយមានទាំងពង្រីកផ្លូវរត់ និងសាងសង់ព្រលានយន្តហោះខ្នាតអន្តរជាតិថ្មី ក្នុងទុនវិនិយោគរាប់ពាន់លានដុល្លារអាមេរិក ដើម្បីឆ្លើយតបទៅនឹងការដឹកជញ្ជូនតាមផ្លូវការអាកាស និងប្រកួតប្រជែងនៅក្នុងតំបន់ ព្រមទាំងលំហូវិនិយោគមកពីបណ្តាប្រទេសនានាលើសកលលោក។

លោក ហូ វណ្ឌី អគ្គលេខាធិការសម្ព័ន្ធទេសចរណ៍ជាតិកម្ពុជា បានប្រាប់គេហទំព័រ propertyarea.asia នៅថ្ងៃទី ៨ ខែមិថុនា ឆ្នាំ ២០២០កន្លងមកបានឱ្យដឹងថា ការធ្វើពិពិធកម្មព្រលានយន្តរបស់កម្ពុជា នាពេលបច្ចុប្បន្ននេះ គឺឆ្លើយតបទៅនឹងការដឹកជញ្ជូនតាមផ្លូវអាកាសនាពេលខាងមុខ និងសម្រាប់ធ្វើការប្រកួតប្រជែង ការដឹកជញ្ជូនតាមផ្លូវអាកាសនៅក្នុងតំបន់ និងនៅលើពិភពលោក។

លោកបន្តថា “វាជាចំណុចល្អខ្លាំងមែនទែន សម្រាប់ប្រទេសកម្ពុជា ព្រោះថាការដឹកជញ្ជូនតាមផ្លូវអាកាសនេះ គឺមានសារៈសំខាន់ណាស់ នៅក្នុងទសវត្សរ៍នេះ ពីព្រោះយើងដឹងហើយថា ការរីកចំរើននៅក្នុងប្រទេសនាមួយៗ វាមានការេប្រកួតប្រជែងគ្នាខ្លាំងណាស់” ។ លោកបន្ថែមថា “ការដឹកជញ្ជូនតាមផ្លូវការននេះ បាននឹងកំពុងមានការប្រកួតប្រជែងខ្ពស់ និងមានសក្តានុពលខ្លាំង ដោយមិនមែនប្រកួតប្រជែងឆ្នាំនោះទេ តែគេប្រកួតប្រជែងជាមួយនឹងពេលវេលា គេគិតខែ មកអាទិត្យ និងថ្ងៃ ហើយកន្លែងខ្លះគេគិតម៉ោងថែមទៀត” ។

លោកហូ វណ្ឌី បានបញ្ជាក់ថា ល្គឹកណាកម្ពុជា មិនជួបនូវវិបត្តិផ្សេងៗ ដូចជាវិបត្តិនយោបាយ វិបត្តិគ្រោះទុរភឹក្ស ឬ វិបត្តិជំងឺផ្សេងនោះទេ កម្ពុជានឹងទទួលបានការចាប់អារម្មណ៍ពីភ្ញៀវទេសចរ និងការវិនិយោគកាន់តែច្រើនថែមទៀត ពីព្រោះថា រាជរដ្ឋាភិបាលកម្ពុជា ចង់ឃើញនូវការអភិវឌ្ឍន៍ដ៏លេចធ្លោ និង ការប្រកួតប្រជែងខ្លាំងនៅក្នុងតំបន់ផងដែរ។

លោក ស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឱ្យដឹងដែរថា ការដែលរាជរដ្ឋាភិបាលបានដាក់ទុនវិនិយោគ រាប់ពាន់លានដុល្លារអាមេរិក លើការពង្រីក និងការសាងសង់ព្រលានយន្តហោះថ្មី នៅក្នុងប្រទេសនេះ មិនមែនជាគម្រោងដែលត្រូវបានធ្វើឡើងនៅថ្ងៃនេះនោះទេ ពោលគឺរាជរដ្ឋាភិបាលមានផែនការអភិវឌ្ឍតាំងពីយូរាប់ឆ្នាំណាស់មកហើយ។

លោកស្រីបន្តថា “ការធ្វើពិធកម្មព្រលានយន្តហោះនេះ គឺការឆ្លើយតបទៅនឹង ទំហំនៃការវិនិយោគ និងទេសចរណ៍ហូរចូលមកកម្ពុជាកាន់តែច្រើនឡើង ពីមួយឆ្នាំកាលពីកន្លងមកនេះ” ។ លោកស្រីបន្ថែមថា “នេះក៏ជាល្អសម្រាប់វិស័យដឹកជញ្ជូន តាមផ្លូវអាកាសរបស់កម្ពុជា ដែលមានសមត្ថភាពអាចទទួលចុះចតនូវយន្តហោះធំៗ និងទទួលជើងហោះហើរបានកាន់តែច្រើនថែមទៀត ខណៈដែលកម្ពុជានៅខ្វះខាតជើងហោះហើរត្រង់” ។

លោកស្រីបន្តថា យើងឃើញមានការហោះហើរច្រើនមែន តែអត់មានជើងហោះហើរត្រង់ពីប្រទេសឆ្ងាយៗនោះទេ ហើយនៅពេលយើងមានព្រលានយន្តហោះខ្នាតអន្តរជាតិនេះ កម្ពុជានឹងទទួលបានជើងហោះហើរត្រង់កាន់តែច្រើន ។ កន្លងមកនេះ យើងមិនទាន់ទទួលបានជើងហោះហើរត្រង់ពីអាមេរិក អឺរ៉ុបនោះទេ ដោយយើងពឹងពាក់ទៅលើប្រទេសជិតខាង។

លោកស៊ិនចាន់ សេរីវុត្ថា អ្នកនាំពាក្យរដ្ឋលេខាធិការអាកាសចរណ៍ស៊ីវិលកាលពីកន្លងមកនេះបានឱ្យដឹងថា រដ្ឋាភិបាលបានបោះទុនជាង ៣០០០លានដុល្លារអាមេរិក ក្នុងការពង្រីកនិងស្តារឡើងវិញ នូវព្រលានយន្តហោះទាំង៣របស់កម្ពុជា ដើម្បីជំរុញឱ្យវិស័យអាកាសចរណ៍កម្ពុជា កាន់តែការតែទំនើប និងអាចឱ្យយន្តហោធុនធំអាចចុះចតបាន។

លោកបន្ថែមថា “ទំហំទុននៃការវិយោគចំណាយលើព្រលានយន្ត នៅភ្នំពេញ សៀមរាប និងខេត្តព្រះសីហនុ រួមទាំងគម្រោងព្រលានយន្តហោះថ្មីៗផ្សេងទៀត អញ្ចឹងយើងគ្រោងចំណាយជាង៣០០០លានដុល្លារអាមេរិក” ។

រាជរដ្ឋាភិបាលបាន និងកំពុងតែដំណើរការអភិវឌ្ឍ ហេដ្ឋារចនាសម្ព័ន្ឋអាកាសយានដ្ឋានជាតិ-អន្តរជាតិចំនួន៣ គឺអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិសៀមរាប អាកាសយានដ្ឋានអន្តរជាតិខេត្តព្រះសីហនុ ដែលគ្រប់គ្រងនិងធ្វើទំនើបកម្មអាកាសយានដ្ឋានដោយក្រុមហ៊ុន (SCA)។

ក្រៅពីអាកាសយានដ្ឋានអន្តរជាតិកម្ពុជាក៏គ្រោងឱ្យមានអកាសយានដ្ឋានក្នុងស្រុកមួយចំនួនទៀតដូចជា អាកាសយានដ្ឋានបាត់ដំបង អាកាសយានដ្ឋានស្ទឹងត្រែង អាកាសយានដ្ឋានកោះកុង និងអាកាសយានដ្ឋានប៉ោយប៉ែតជាដើមនាពេលអានាគត៕

ចំណេះដឹង! អ្វីជា «យុទ្ធសាស្ត្រស្តីពីការកែទម្រង់ប្រព័ន្ធគ្រប់គ្រងការវិនិយោគសាធារណៈឆ្នាំ២០១៩-២០២៥»?

ដោយ វុត្ថា

ភ្នំពេញៈ រាជរដ្ឋាភិបាលបានអនុម័ត «យុទ្ធសាស្ត្រស្តីពីការកែទម្រង់ប្រព័ន្ធគ្រប់គ្រងការវិនិយោគសាធារណៈ២០១៩-២០២៥» កាលពីថ្ងៃទី២២ ខែតុលា ឆ្នាំ២០១៩ និងប្រកាសដាក់ឱ្យអនុវត្តន៍ជាផ្លូវការ នៅក្នុងកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី២៥ ខែតុលា ឆ្នាំ២០១៩ ។

យុទ្ធសាស្ត្រស្តីពី ការកែទម្រង់ប្រព័ន្ធគ្រប់គ្រង ការវិនិយោគសាធារណៈ២០១៩-២០២៥ គឺជាសមាសភាគដ៏សំខាន់មួយនៃ យុទ្ធសាស្ត្រនៃការកែទម្រង់ប្រព័ន្ធថវិកាឆ្នាំ២០១៨-២០២៥ ក្រោមក្របខ័ណ្ឌកម្មវិធីកែទម្រង់ ការគ្រប់គ្រងហិរញ្ញវត្ថុសាធារណៈ។

ឯកសារយុទ្ធសាស្ត្រនេះ បានកំណត់ក្របខ័ណ្ឌរួមមួយ ក្នុងការបង្កើតប្រព័ន្ធគ្រប់គ្រងការវិនិយោគសាធារណៈ ពីគ្រប់ប្រភពហិរញ្ញប្បទាន (ទាំងពីថវិកាជាតិ, ថវិកាហិរញ្ញប្បទានដោយដៃគូអភិវឌ្ឍន៍ និងទុនវិនិយោគឯកជន តាមយន្តការភាពជាដៃគូរវាងរដ្ឋនិងឯកជន), និងនៅគ្រប់កម្រិតរដ្ឋបាល (ទាំងថ្នាក់ជាតិ ទាំងរដ្ឋបាលថ្នាក់ក្រោមជាតិ គ្រឹះស្ថានសាធារណៈរដ្ឋបាល សហគ្រាសសាធារណៈ និងអង្គភាពសាធារណៈប្រហាក់ប្រហែល)។

ការអនុវត្តនូវយុទ្ធសាស្ត្រនេះ ចែកចែកជា២ដំណាក់កាល តាមរយៈការដាក់ចេញនូវវិធានការគោលនយោបាយសំខាន់ៗមួយចំនួន ទាំងនៅក្នុងរយៈពេលខ្លីបន្ទាន់ ចំពោះមុខ និងរយៈពេលមធ្យម ដោយក្នុងនោះក៏មានទាំងការរៀបចំសេចក្តីព្រាង «អនុក្រឹត្យស្តីពីការគ្រប់គ្រងការវិនិយោគសាធារណៈ» ផងដែរ ៕

ផ្សារទំនើបចំនួន២វិនិយោគលើទឹកប្រាក់ជាង២៤០លានដុល្លារនឹងដាក់ឱ្យដំណើរការនៅភាគខាងត្បូងរាជធានីភ្នំពេញ

ដោយៈ រ៉ាណេត

ភ្នំពេញៈ ជាមួយនឹងកំណើនផ្សារទំនើបជាច្រើន បាននិងកំពុងតែរីកដុះដាលជាបន្តបន្ទាប់នៅក្នុងរាជធានៅភ្នំពេញ និងនៅតាមតំបន់ជាយក្រុងនៅពេលខាងមុខនេះ ក្នុងនោះផ្សារទំនើបលំដាប់អន្តរជាតិធំៗចំនួន២ទៀត នឹងដាក់ដំណើរការនៅវិថីសម្ដេចតេជោ ហ៊ុន សែន ឬផ្លូវ៦០ម៉ែត្រ ខណៈដែលបច្ចុប្បន្នផ្សារទំនើប១ក្នុងចំណោម២ កំពុងសម្រុកការសាងសង់ដើម្បីបញ្ចប់ក្នុងពេលខាងមុខនេះ។

វិបត្តិនៃជំងឺសាកលលោកដែលកំពុងកើតមាន និងបន្តរាតត្បាតនៅតាមបណ្តាប្រទេសនានានៅពេលបច្ចុប្បន្ននេះ មិនមែនជាឧបសគ្គចម្បង ចំពោះសំណើរការសាងសង់ និងអភិវឌ្ឍន៍គម្រោងផ្សារទំនើប កម្រិតអន្តរជាតិដែលមានតម្លៃរាប់សិបលានដុល្លារ ចំនួន២ ស្ថិតនៅតាមដងវិថីសម្ដេចតេជោហ៊ុន សែន ឬផ្លូវ៦០ម៉ែត្រនោះទេ ។

គម្រោងសាងសងផ្សារទំនើបទាំងពីរខាងលើនេះ រួមមាន ផ្សារទំនើបលំដាប់អន្តរជាតិ PH Diamond Place ដែលមានទុនវិនិយោគប្រមាណ៦០លានដុល្លារ និងមណ្ឌលផ្សារទំនើប ជីបម៉ុង មេហ្គាម៉ល មានទុនវិនិយោគប្រមាណ១៨០លានដុល្លារ។

ទី១– គម្រោងផ្សារទំនើបលំដាប់អន្តរជាតិ PH Diamond Place ត្រូវបានអភិវឌ្ឍនៅលើផ្ទៃដី៦ហិកតា ស្ថិតនៅក្នុងគម្រោងបុរី ប៉េងហួតដឹ ស្តា ដាយមិន ស្ថិតនៅតាមបណ្តោយមហាវិថីសម្តេចតេជោហ៊ុនសែន ឬផ្លូវ៦០ម៉ែត្រនោះ។ សព្វថ្ងៃនេះ ក្រុមការងាររបស់ ប៉េង ហួត សំណង់ កំពុងតែមមាញឹកក្នុងការសាងសង់ ដើម្បីបញ្ចប់ឱ្យរួចរាល់ក្នុងឆ្នាំ២០២០ខាងមុខនេះ ជាមួយនឹងទុនវិនិយោគប្រមាណ៦០លានដុល្លារ ដែលអភិវឌ្ឍដោយក្រុមហ៊ុន ប៉េងហួត គ្រុប និងទទួលខុសត្រូវដោយប៉េងហួត រីថែល។

ផ្សារទំនើបមួយនេះមានកម្ពស់៥ជាន់ និងមានផ្ទៃក្រឡាសម្រាប់ជួលប្រមាណ ៤០,០០០ ម៉ែត្រការ៉េ ប្រមូលផ្តុំទៅដោយហាងល្បីៗជាង២០០ហាង ថែមទាំងមានវិសាលភាពទីចំណតធំទូលាយ អាចចតរថយន្តនិងម៉ូតូបាន២០០០គ្រឿង។ រឹតតែអស្ចារ្យ គម្រោងផ្សារទំនើបនេះ ក៏បានទទួលពានរង្វាន់ផ្នែកស្ថាបត្យកម្ម លក់រាយល្អជាងគេ (Best Retail Architectural Design) ពីកម្មវិធី Cambodia Property Award ដែលរៀបចំឡើងដោយក្រុមហ៊ុន Property Guru ផងដែរ។

ទី២ គម្រោងមណ្ឌលផ្សារទំនើបលំដាប់អន្តរជាតិ ជីបម៉ុង២៧១ មេហ្គាម៉ល របស់ក្រុមហ៊ុនជីប ម៉ុង រីថែល ដែលបានបញ្ចុះបឋមសីលាបើកការដ្ឋានសាងសង់ កាលពីខែសីហា ឆ្នាំ២០១៨កន្លងទៅ និងគ្រោងដាក់ឱ្យដំណើរការក្នុងឆ្នាំ២០២២។ វត្តមាននៃគម្រោងផ្សារទំនើបលំដាប់អន្តរជាតិមួយនេះ គឺជាផ្នែកមួយជួយធ្វើទំនើបកម្មឧស្សាកម្មលក់រាយនៅតំបន់ភាគខាងត្បូង នៃរាជធានីភ្នំពេញកាន់តែមានភាពអស្ចារ្យ។

រហូតមកដល់ពេលនេះ មណ្ឌលផ្សារទំនើបខ្នាតអន្តរជាតិមួយ ដែលបានបណ្តាក់ទុនវិនិយោគប្រមាណ១៨០លានដុល្លារនេះ សម្រេចការសាងសង់បានប្រមាណជាង២០ភាគរយ និងមានទីតាំងស្ថិតនៅក្នុងគម្រោងអភិវឌ្ឍន៍ អចលទ្រព្យលើផ្ទៃដីទំហំ៤៣ហិកតា នៃគម្រោង លែនម៉ាក ២៧១ របស់ក្រុមហ៊ុន ជីប ម៉ុង លែន៕

រដ្ឋាភិបាលនឹងសាងសង់កំពង់ផែថ្មីមួយនៅខេត្តស្វាយរៀងដើម្បីសម្រួលពាណិជ្ជកម្ម ជាមួយវៀតណាម

ដោយវុត្ថា

ភ្នំពេញៈ រដ្ឋបាលខេត្តស្វាយរៀបាន នឹងកំពុងសាងសង់កំពង់ផែថ្មីមួយ ដើម្បីសម្រួលដល់ការដោះដូរទំនិញតាមផ្លូវទឹក ជាមួយខេត្តឡុងអាន នៃប្រទេសវៀតណាម ខណៈខេត្តជាប់ព្រំដែនមួយនេះ មានសក្តានុពលខ្ពស់លើវិស័យសេដ្ឋកិច្ច និងពាណិជ្ជកម្ម។

យោងតាមការផ្សព្វផ្សាយរបស់រដ្ឋបាលខេត្តស្វាយរៀង កាលពីពេលថ្មីៗនេះបាន ឱ្យដឹងថា បច្ចុប្បន្ននេះ វឌ្ឍនភាព នៃគម្រោងកសាងកំពង់ផែ និងការស្តារទន្លេវ៉ៃគោដោយនាយកដ្ឋានដឹកជញ្ជូនផ្លូវទឹក នៃក្រសួងសាធារណៈការ និងដឹកជញ្ជូនសហការជាមួយរដ្ឋបាលខេត្តស្វាយរៀង គិតមកដល់ថ្ងៃទី៨ ខែមិថុនា ឆ្នាំ២០២០នេះ ការងារបូមស្តារទន្លេវ៉ៃគោសម្រេចបានដូចខាងក្រោម៖

១–អ៊ិចស្កាវទ័រ ជីកស្តារចាប់ដីទន្លេបោះបានប្រវែង ៤,៥០០ម៉ែត្រ។ ២–ម៉ាស៊ីនបូមសំអាតបាតទន្លេ បានប្រវែង៥០០ម៉ែត្រចាប់ពីបង្គោល0+100 ពីកំពង់ផែតាស្អាងឆ្ពោះទៅច្រកទ្វាព្រំដែនយ៉ាំដូងខេត្តស្វាយរៀងកម្ពុជា– យិនហ៊ឹងខេត្តឡុងអានប្រទេសវៀតណាម។

រដ្ឋបាលខេត្តស្វាយរៀងបញ្ជាក់ថា ការកសាងកំពង់ផែ និងស្តារផ្លូវទឹក នៃទន្លេវ៉ៃគោនេះ មានទីតាំងកំពង់ផែស្ថិតនៅភូមិចុងព្រែក សង្កាត់ស្វាយរៀង ក្រុងស្វាយរៀង ខេត្តស្វាយរៀង ដែលកំពុងដំណើរការស្ថាបនានាពេលនេះ និងផ្តល់អត្ថប្រយោជន៍ជាច្រើន ក្នុងការសម្រួល ដល់ការដឹកជញ្ជូនទំនិញតាមផ្លូវទឹក ទៅមករវាងខេត្តស្វាយរៀងប្រទេសកម្ពុជានិងខេត្តឡុងអានប្រទេសវៀតណាមនៅថ្ងៃអនាគត។

ប្រភពដដែលបន្តទៀតថា កន្លងមកការដោះដូរទំនិញ តាមផ្លូវទឹក នៃផែតាស្អាងនេះ គឺមានច្រើនជាពិសេសស្រូវ ក៏ប៉ុន្តែដោយទន្លេវ៉ៃគោ គោករាក់ និងមានកំប្លោកច្រើនពិបាកក្នុងការធ្វើចរាចរណ៍ កាណូត ទើបរដ្ឋបាលខេត្តស្វាយរៀង លើកគម្រោងស្តារទន្លេវ៉ៃគោ ឲ្យបានជ្រៅ និងធំទូលាយងាយស្រួលធ្វើចរាចរណ៍ ទូកកាណូតចេញចូលបានងាយស្រួល និងកសាងកំពង់ផែរឲ្យបានល្អប្រសើរមានស្តង់ដា ដើម្បីអាជីវករចេញចូលរថយន្តដឹកទំនិញបានងាយស្រួល៕