ខេត្តព្រះសីហនុទាក់ទាញសហគ្រាសធុនតូច និងមធ្យមចំនួន ១១៤៩មូលដ្ឋានជាមួយទំហំទុនជិត ២៧លានដុល្លារ

ដោយៈ វុត្ថា

ភ្នំពេញៈ អភិបាលខេត្តព្រះសីហនុលោកគួច ចំរើនបានឱ្យដឹងថា ស្ថិតិសហគ្រាសធុនតូច និងមធ្យម និងសិប្បកម្មនៅក្នុងខេត្ពព្រះសីហនុទាំងមូល មានចំនួន១១៤៩ មូលដ្ឋាន ដែលមានទុនវិនិយោគសរុបមានចំនួន២៦ .៨៩៥ .៨១១ ដុល្លាអាមេរិក និងផ្តល់ពលកម្មសរុបមានចំនួន៥. ២៦១នាក់។

លោកអភិបាលខេត្តព្រះសីហនុ នៅក្នុងសន្និសទីសារព័ត៌មានស្តីពី «វឌ្ឍនភាព និងទិសដៅការងារបន្តរបស់រដ្ឋបាលខេត្តព្រះសីហនុ»នាថ្ងៃទី ៩ ខែមិថុនា ឆ្នាំ ២០២០នេះឱ្យដឹងថា សហគ្រាសធុនតូច និងមធ្យម និងសិប្បកម្ម រួមមាន៖ ១-ក្រុងព្រះសីហនុមានចំនួន ៦៥៩ មូលដ្ឋាន ២-ស្រុកស្ទឹងហាវ មានចំនួន ៩៦មូលដ្ឋាន ៣-ស្រុកព្រៃនប់ មានចំនួន ៣៥៣ មូលដ្ឋាន៤-ស្រុកកំពង់សិលាមានចំនួន៤១មូលដ្ឋាន។

លោកបបន្តថា សម្រាប់ឧស្សាហកម្មធុនធំ មានរោងចក្រសរុបចំនួន២១៧ រោងចក្រ ក្នុងនោះមាន៖ ១-រោងចក្រក្នុងតំបន់សេដ្ឋកិច្ចពិសេសចំនួន១៥១ រោងចក្រ- រោងចក្រក្នុងតំបន់សេដ្ឋកិច្ចពិសេស កំពង់ផែស្វយ័តក្រុងព្រះសីហនុចំនួន៩រោងចក្រ – តំបន់សេដ្ឋកិច្ចពិសេសក្រុងព្រះសីហនុ (បិតត្រាង) ចំនួន១៣៦រោងចក្រ និងតំបន់សេដ្ឋកិច្ចពិសេសចេជាង (ព្រៃនប់) ចំនួន ១២ រោងចក្រ។

២- រោងចក្រក្រៅតំបន់សេដ្ឋកិច្ចពិសេសមានចំនួន ៦៦ រោងចក្រ មានទុនវិនិយោគ សរុបចំនួនជាង១.១៤៥ ពលកម្មសរុបចំនួន១៧.៦៨៤នាក់។

លោកគួច ចំរើនបានបញ្ជាក់ទៀតថា ក្នុងរយៈពេលដែលមានការផ្ទុះឡើងនូវជំងឺ Covid-19 មានតែរោងចក្រប្រមាណ២០ ដែលបានប្រកាសព្យួរការងារ និងមានកម្មករនិងកម្មការិនី ដែលរងផលប៉ះពាល់ប្រមាណ៤០០០នាក់ប៉ុណ្ណោះ តែក៏មានករោងចក្រមួយចំនួនបានប្រកាសបន្ថែមម៉ោងការងារផងដែរ៕

រដ្ឋបាលខេត្តកំពតគ្រោងរៀបចំផែនទីកំណត់តំបន់សួនកសិឧស្សាហកម្ម និងអេកូទេសចរណ៍ ដើម្បីទាក់ទាញការវិនិយោគ

ដោយៈ រ៉ាណេត

កំពតៈ រដ្ឋបាលខេត្ត និងសភាពាណិជ្ជកម្មខេត្តកំពត កំពុងសិក្សារៀបចំគម្រោងបង្កើតផែនទីកំណត់តំបន់សួនកសិឧស្សាហកម្ម និងអេកូទេសចរណ៍ ដើម្បីងាយស្រួលក្នុងការបង្ហាញដល់បណ្តាវិនិយោគិន ក្នុងគោលបំណងបង្កើនភាពទាក់ទាញលើការវិនិយោគនៅក្នុងខេត្ត។

លោកឧកញ៉ា ហាក់ សុវណ្ណា ប្រធានសភាពាណិជ្ជកម្មខេត្តកំពត-កែប បានមានប្រសាសន៍ថា នៅក្នុងឱកាសចូលជួបពិភាក្សាការងារ ជាមួយរដ្ឋបាលខេត្តកំពត នៅថ្ងៃទី៩ ខែមិថុនា ឆ្នាំ២០២០ថា កន្លងមកនេះ មានវិនិយោគគិនជាច្រើន បានចាប់អារម្មណ៍ខេត្តកំពតជាខ្លាំង ដោយឡែកក្នុងខេត្តមួយនេះ នៅមិនទាន់មានផែនទីកំណត់សម្រាប់អនុវត្តជាក់លាក់នៅឡើយថា តំបន់ណាជាតំបន់កសិកម្ម តំបន់ណាជាតំបន់កសិឧស្សាហកម្ម ហើយតំបន់ណា ជាតំបន់អេកូទេសចរណ៍តំបន់ណា។

ដូចនេះ សភាពាណិជ្ជកម្មខេត្ត បានស្នើសុំធ្វើការនេះជាមួយរដ្ឋបាលខេត្ត និងមន្ទីរជំនាញ ដើម្បីងាយស្រួលនាពេលក្រោយ បង្ហាញដល់វិនិយោគគិន។

ជាមួយគ្នានេះ លោកឧកញ៉ា ហាក់ សុវណ្ណា ក៏បានជម្រាបជូនអំពីតួនាទីរបស់សភាពាណិជ្ជកម្មខេត្ត ទៅលើការជួយសម្របសម្រួល ជាមួយវិស័យសាធារណៈ និងវិស័យឯកជន សំដៅធ្វើយ៉ាងណាឱ្យវិស័យទាំង២នេះ មានសុខដុមនីយកម្មជាមួយគ្នា ជាពិសេស អាចកៀរគរវិនិយោគិនទាំងក្នុងស្រុក និងក្រៅស្រុក មកបណ្តាក់ទុនវិនិយោគនៅក្នុងខេត្តឱ្យបានកាន់តែច្រើន។

អភិបាលខេត្តកំពត លោក ជាវ តាយ បានមានប្រសាសន៍ថា សភាពាណិជ្ជកម្មខេត្តកំពត-កែប បានចូលរួមចំណែកយ៉ាងសំខាន់ ក្នុងការអភិវឌ្ឍន៍ប្រទេសឱ្យរីកចម្រើន ពិសេសខេត្តកំពត ហើយពេលបច្ចុប្បន្ននេះ ក្រៅពីកំណើននៃចំនួនគម្រោងវិនិយោគលើគ្រប់វិស័យ កំណើនភ្ញៀវទេសចរក្នុងខេត្ត ក៏បានកើនឡើងជាបន្តបន្ទាប់នៅតាមតំបន់អេកូទេសចរណ៍ ដោយក្នុងនោះភ្ញៀវទេសចរប្រមាណ៥២ភាគរយ បានទៅលេងនៅតំបន់ទឹកឈូ។

លោកបានបញ្ជាក់ថា ពាក់ព័ន្ធទៅនឹងគម្រោងនៃការបង្កើតផែនទី សម្រាប់កំណត់តំបន់សួនកសិកឧស្សាហកម្ម តំបន់អេកូទេសចរណ៍ ក៏ដូចជាតំបន់កសិកម្មជាដើមនេះ តម្រូវមានការសិក្សាឱ្យបានលម្អិត ដើម្បីជៀសវាងមានផលប៉ះពាល់ផ្សេងៗ ដែលអាចកើតមាន៕

សណ្ឋាគារផ្កាយ៤ថ្មីមួយក្រោមការបោះទុនវិនិយោគជាង៣៥លានដុល្លារនឹងបង្ហាញវត្តមាននៅទីក្រុងភ្នំពេញ

ដោយ ប៊ី

ភ្នំពេញៈ គម្រោងសណ្ឋាគារថ្នាក់ផ្កាយ៤ថ្មីមួយ ដែលមានទុនវិនិយោគជាង៣៥លានដុល្លារនឹងបង្ហាញខ្លួននៅទឹកដីក្រុងភ្នំពេញ។ នេះបើយោងតាមក្រុមប្រឹក្សាអភិវឌ្ឍន៍កម្ពុជានៅថ្ងៃទី៩ ខែមិថុនា ឆ្នាំ២០២០ ។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុន SUN & MOON HOTEL CO., LTD. សម្រាប់គម្រោងសាងសង់និងអាជីវកម្មសណ្ឋាគារថ្នាក់ផ្កាយ៤នេះ។

គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៤ មានចំនួន២០០បន្ទប់ ដែលមានទីតាំងវិនិយោគស្ថិតនៅដីឡូតិ៍លេខ២៨៥ មហាវិថីព្រះនរោត្តម ជាប់ស្ពានព្រះមុនីវង្ស កែងផ្លូវលេខ២៣៣ សង្កាត់ទន្លេបាសាក់ ខណ្ឌចំការមន រាជធានីភ្នំពេញ មានទុនវិនិយោគប្រមាណ៣៥,២លានដុល្លារអាមេរិក និងអាចបង្កើតការងារបានចំនួន៥៣៥កន្លែង។

កាលពីមីនា ឆ្នាំ២០២០ កម្ពុជាបានជាប់លំដាប់កំពូល ដោយស្ថិតចំណោម១០ ទិសដៅវិនិយោគសណ្ឋាគារលំដាប់ផ្កាយ៥ ដែលមានតំលៃសមរម្យ និងទទួលបានចំណាត់ថ្នាក់ខ្ពស់បំផុតនៅលើពិភពលោក។

យោងតាមការសិក្សាមួយ ដែលចេញផ្សាយនៅសប្តាហ៍នេះ ដោយគេហទំព័រ The Hotel Guru បានចាត់ចំណាត់ថ្នាក់ព្រះរាជាណាចក្រកម្ពុជា ស្ថិតនៅក្នុងលេខរៀងទី៩ នៅលើពិភពលោក ទាក់ទងនឹងលទ្ធភាព និងរបៀបដែលកម្ពុជាត្រូវបានពិនិត្យមើល និងវាយតម្លៃដោយអតិថិជន។ គេហទំព័រពិពណ៌នាខ្លួនថា ជាគេហទំព័រដែលមានបេសកកម្មស្វែងរក និងពិនិត្យឡើងវិញ នូវកន្លែងល្អបំផុតដើម្បីស្នាក់នៅជុំវិញពិភពលោក។

ការសិក្សានេះ បានគ្របដណ្តប់លើប្រទេសចំនួន៩៩ នៃទ្វីបចំនួន៦នៅលើពិភពលោក។

បណ្តាប្រទេសនៅអឺរ៉ុប បានគ្រប់គ្រងចំណាត់ថ្នាក់ដោយមាន៧ប្រទេស ស្ថិតក្នុងចំណាត់ថ្នាក់កំពូលទាំង១០ ដឹកនាំដោយអាមេនី ដែលឈរនៅចំណាត់ថ្នាក់ទី១ ។ ប្រទេសអឺរ៉ុបចំនួន៦ផ្សេងទៀត ដែលស្ថិតក្នុងចំណាត់ថ្នាក់កំពូលទាំង១០ គឺប្រទេសស៊ែប៊ី ទី២ ប៉ូឡូញ ទី៤ លីទុយអានី ទី៥ រ៉ូម៉ានី ទី ៧ ប៊ុលហ្គារី ទី៨ និងឡាតវីទី១០ ។

ប្រទេសផ្សេងទៀត នៅក្នុងកំពូលទាំង១០ ត្រូវបានកាន់កាប់ដោយបណ្តាប្រទេសអាមេរិកខាង ត្បូងកូឡុំប៊ីជាប់លេខរៀងទី៣ និងប៉ារ៉ាហ្គាយលេខរៀងទី៦ ។

ប្រទេសកម្ពុជា ជាប់ជាប្រទេសតែមួយគត់មកពីអាស៊ី ដែលបានជាប់ចំណាត់ថ្នាក់កំពូលក្នុងចំណោម ១០ប្រទេស។

ក្នុងការបង្កើតចំណាត់ថ្នាក់ គេហទំព័រ Hotel Guru បានចាត់ទុកមិនត្រឹមតែជាតម្លៃទាបជាមធ្យម សម្រាប់ការស្នាក់នៅពេលយប់ប៉ុណ្ណោះទេ ប៉ុន្តែថែមទាំងមតិរបស់អ្នកដំណើរផងដែរ។

ប្រទេសកម្ពុជាមានសណ្ឋាគារលំដាប់ផ្កាយប្រាំ កាន់តែច្រើនឡើង។ ភាគច្រើនសណ្ឋាគារលំដាប់ផ្កាយប្រាំនៅកម្ពុជា មានទីតាំងនៅរាជធានីភ្នំពេញ ខេត្តសៀមរាប និងខេត្តព្រះសីហនុ៕

រដ្ឋាភិបាលជួលកោះរ៉ុងឱ្យវិស័យឯកជនធ្វើការអភិវឌ្ឍន៍

ដោយៈ វុត្ថា

ភ្នំពេញៈ រាជរដ្ឋាភិបាលបានជួលកោះរ៉ុង នៃខេត្តព្រះសីហនុ ឱ្យក្រុមហ៊ុនវិស័យឯកជនអភិវឌ្ឍន៍ ខណៈក្រុមហ៊ុនដែលទទួលបានសិទ្ធិវិនិយោគបាន និងកំពុងរៀបចំហេដ្ឋារចនាសម្ព័ន្ធ និងសាងសង់ជាប្រភេទនៃសណ្ឋាគារផងដែរ។

លោក គួច ចំរើន អភិបាលខេត្តព្រះសីហនុ នៅក្នុងសន្និសទីសារព័ត៌មានស្តីពី «វឌ្ឍនភាព និងទិសដៅការងារបន្តរបស់រដ្ឋបាលខេត្តព្រះសីហនុ» នាថ្ងៃទី៩ ខែមិថុនា ឆ្នាំ ២០២០នេះ បានឱ្យដឹងថា បច្ចុប្បន្នក្រុមហ៊ុនបាន និងកំពុងសាងសង់ផ្លូវនៅក្នុងតំបន់កោះរ៉ុងនេះ តែយ៉ាងណាក៏ដោយតំបន់នេះគ្មានទឹកសាបប្រើប្រាស់ មានតែទឹកប្រៃ ហើយអ្វីដែលត្រូវការគឺទឹកស្អាតប្រើប្រាស់ និងអគ្គិសនីសម្រាប់ជាមូលដ្ឋានក្នុងការវិនិយោគ។

លោកបន្តថា “ឥឡូវយើងមិនទាន់មានស្ថានីយ៍ទឹកស្អាតទេ យើងមិនទាន់មានអគ្គិសនី ឯចំណែកផ្លូវថ្នល់ក៏មិនទាន់ល្អ បើទោះបីភ្ញៀវទេសចរទៅលេងរាល់ថ្ងៃក៏ដោយ ពួកគេមិនទាន់បានទៅមើលការអភិវឌ្ឍជារួមនៅលើកោះនោះទេ។

លោកបន្ថែមថា “ដូច្នេះហើយ យើងកំពុងជំរុញធ្វើយ៉ាងម៉េចឱ្យមានទឹកស្អាត និងអគ្គិសនីប្រើប្រាស់ឱ្យបានគ្រប់គ្រាន់។ ម្យ៉ាងទៀត យើងមិនអាចតបណ្តាញទុយោទឹក ឬបណ្តាញអគ្គិសនីដោយអូសកាត់សមុទ្រនោះទេ ព្រោះមានការចំណាយច្រើនណាស់ យើងត្រូវតែមានការវិនិយោគនៅទីនោះតែម្តង” ។

លោកអភិបាលខេត្តបញ្ជាក់ទៀតថា រហូតមដល់ពេលនេះ រាជរដ្ឋាភិបានឱ្យមានការវិនិយោគអគ្គិសនី តែយើងមិនទាន់បានបញ្ចប់ការសិក្សា ពីផលប៉ះពាល់ចប់ចុងចប់ដើមនោះទេ តែសម្រាប់ទឹកស្អាតវិញ គឺប្រើប្រាស់មិនទាន់មានស្តង់ដារ ពោលគឺមិនទាន់មានឡាបូពិនិត្យ។

លោកអភិបាលខេត្តបញ្ជាក់ថា កន្លងមកនេះរាជរដ្ឋាភិបាលបានបង្កើត ក្រុងមួយ និងសង្កាត់ពីរ សម្រាប់បំរើសេវាជូនដល់ប្រជាពលរដ្ឋ ដែលមានចំនួន១០០០ គ្រួសារ តែអ្វីដែលសំខាន់គឺ ការង្កើតនេះដើម្បីបំរើសេវា និងការពារដល់ភ្ញៀវទេសចរ ដែលទៅលេងកម្សាន្តនៅទីនោះ។

រាជរដ្ឋាភិបាលកម្ពុជាកាលពីដើមឆ្នាំ២០១៩ បានចេញអនុក្រឹត្យលេខ០២ អនក្រ.បក ស្តីពីការបង្កើតក្រុងកោះរ៉ុង នៃខេត្តព្រះសីហនុ ដោយកាត់យកសង្កាត់ចំនួន២ គឺសង្កាត់កោះរ៉ុង និងសង្កាត់កោះរ៉ុងសន្លឹម នៃខេត្តព្រះសីហនុ៕

ចំណេះដឹង! អ្វីជាប្រតិបត្តិការគតិយុត្តិលើមូលនីធិពាណិជ្ជកម្ម?

ដោយៈ វុត្ថា

ភ្នំពេញៈ សមាសភាពនៃមូលនីធិពាណិជ្ជកម្ម ត្រូវបានស្តែងឡើង តាមរយៈសមាសភាពអរូបិយ និងចរិកគតិយុត្តនៃមូលនីធិពាណិជ្ជកម្ម ដែលលើកឡើងអំពីបែបបទដែលជាគោលការណ៍នៃនីតិពាណិជ្ជកម្ម នៅក្នុងវិស័យមូលនីធិពាណិជ្ជកម្ម។

នៅក្នុងក្របខ័ណ្ឌនៃចរិកគតិយុត្ត នៃមូលនីធិពាណិជ្ជកម្ម យើងលើកឡើងអំពីគោលការណ៍នៃលក្ខណៈជាសកលភាព និងគោលការណ៍នៃលក្ខណៈជាចលនទ្រព្យ និងជាអរូបទ្រព្យ។ ដោយឡែកគេបានធ្វើការបែកចែកប្រតិបត្តិការគតិយុត្ត ជាលក្ខណនៃការលក់មូលនីធិពាណិជ្ជកម្ម (ក) និងកាបញ្ចាំមូលនីធិពាណិជ្ជកម្ម (ខ)។

មូលនិធិពាណិជ្ជកម្ម គឺជាវត្ថុមួយទាំងមូល ដែលឋិតនៅក្រោមរបបគតិយុត្តពិសេសមួយខុសពីរបបគតិយុត្ត ដែលអនុវត្តចំពោះសមាសធាតុនីមួយៗ ដូច្នេះវិធានដែលគ្រប់គ្រងការលក់ ឬការបញ្ជាំមូលនីធិពាណិជ្ជកម្មជាទូទៅ ដូចគ្នានឹងវិធានដែលអនុវត្តចំពោះការលក់ និងការបញ្ចាំសមាសធាតុនីមួយៗ ដែលជារូបទ្រព្យឬអរូបទ្រព្យនោះ ដើម្បីបញ្ជាក់ពីធាតុត្រឹមត្រូវនៃអនុភាពវត្ថុនោះ។

គេមិនអាចអះអាងថា មូលនិធិពាណិជ្ជកម្មគឺ ជាសកម្មភាពនៃនិតិទេ មានន័យថាបេតិកភណ្ឌមួយប្រភេទដាច់ដោយឡែក និងផ្សេងពីភាគដែលនៅសល់ នៃបេតិកភណ្ឌរបស់ពាណិជ្ជករ ហើយតាមពិតមូលនីធិពាណិជ្ជកម្ម មិនធានាសងបំណុលពាណិជ្ជកម្មឡើយ និងមានតែសកម្មទ្រព្យប៉ុណ្ណេះជា សមាសភាព ពោលគឺគ្មានអកម្មទ្រព្យទេ។

មូលនីធិនេះចូលរួមជាផ្នែកមួយ នៃបេតិកភណ្ឌទូទៅរបស់ពាណិជ្ជករ និងត្រូវធានាសងគ្រប់ប្រភេទរបស់ពាណិជ្ជករនោះ ទាំងបំណុលរដ្ឋប្បវេណី និងបំណុលពាណិជ្ជកម្ម៕

ក្រាំងធ្នង់ នៅតែមមាញឹកនៅលើការសាងសង់បុរីលំនៅដ្ឋានទាន់សម័យ

ដោយ ហ្សូលី

ភ្នំពេញ៖ សង្កាត់ក្រាំងធ្នង់ ស្ថិតនៅក្នុងខណ្ឌសែនសុខ រាជធានីភ្នំពេញ បានប្រែក្លាយខ្លួនជាតំបន់ស្ថិតនៅកៀកនឹងទីក្រុង ខណៈបច្ចុប្បន្នក្រាំងធ្នង់នៅតែបន្តមានសកម្មភាពមមាញឹកទៅលើការសាងសង់បុរីលំនៅដ្ឋានតាមបែបទាន់សម័យ សម្រាប់មនុស្សជំនាន់ថ្មី។

លោក ខុម មុនីរតន៍ អ្នកជំនាញអចលនទ្រព្យ និងជាស្ថាបនិកក្រុមហ៊ុនអចលនទ្រព្យKing Residence ធ្លាប់បានរៀបរាប់កាលពីថ្មីៗនេះថា ក្រាំងធ្នង់ពិតជាមានការអភិវឌ្ឍខ្លាំងទៅលើវិស័យបុរីលំនៅដ្ឋាន និងមានសកម្មភាពអភិវឌ្ឍជាបន្តបន្ទាប់។

ចំណែកឯប្រធានសមាគមនអ្នកវាយតម្លៃ និងជាភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ថា កាលពីដើមឡើយក្រាំងធ្នង់គ្មានការរីកចម្រើននោះទេ គឺជាដីស្រែតែប៉ុណ្ណោះ ប៉ុន្តែសព្វថ្ងៃនេះសង្កាត់ក្រាំងធ្នង់នៃខណ្ឌសែនសុខ បានក្លាយទៅជាតំបន់មានការអភិវឌ្ឍដោយមិននឹកស្មានដល់ និងជាតំបន់មានភាពរីកចម្រើនខ្លាំង។

លោកបន្ថែមថា សង្កាត់ក្រាំងធ្នង់កំពុងមានការអភិវឌ្ឍច្រើន ទាំងគម្រោងហេដ្ឋារចនាសម្ព័ន្ធ អគារផ្សេងៗ ពិសេសសំណង់លំនៅដ្ឋានមានការកើនឡើងជាហូរហែ។

ជាមួយគ្នានេះ បុរី អូរ៉ូរ៉ា ស៊ីធី ដែលជាក្រុមហ៊ុនអភិវឌ្ឍលំនៅដ្ឋានប្រភេទផ្ទះអាជីវកម្ម ក៏បានលាតសន្ធឹងនៅលើទឹកដីតំបន់ក្រាំងធ្នង់ផងដែរ។ ដោយមើលឃើញពីសក្តានុពលតំបន់ គុណភាពសំណង់រឹងមាំ បានបណ្តាលឱ្យអតិថិជនមានការគាំទ្រឥតឈប់ឈរទៅលើ បុរី អូរ៉ូរ៉ា ស៊ីធី គម្រោងក្រាំងធ្នង់។

លំនៅដ្ឋានប្រកបអាជីវកម្មរបស់បុរី អូរ៉ូរ៉ា ស៊ីធី មានលក្ខណៈពិសេសខុសពីគេជាច្រើនយ៉ាងដូចជា កម្ពស់ផ្ទះមានដល់ទៅ ៣ជាន់កន្លះ ចាក់ប្លង់សេចាប់ពីជាន់ផ្ទាល់ដីដល់ដំបូល រៀបដែកចំនួន ២ស្រទាប់ ព្រមទាំងផ្តល់ជូនទំហំផ្ទះធំទូលាយរួមមាន 4.5×14ម៉ែត្រ 4.5×16ម៉ែត្រ 4.5×18ម៉ែត្រ និង 5.5×16ម៉ែត្រ។ រចនាបថសំណង់សាងសង់តាមបែបប្រទេសអូស្រា្តលី ដែលសាកសមសម្រាប់មនុស្សជំនាន់ថ្មី រស់នៅពោរពេញដោយផាសុកភាពនៅក្នុងលំនៅដ្ឋានដែលអាចប្រកបអាជីវកម្មក៏បាន រស់នៅក៏បានផង។

សក្តានុពលតំបន់ទៀតសោតពិតជាផ្តល់ឱកាសឱ្យអ្នករស់នៅមានភាពងាយស្រួល ចំណាយត្រឹមតែ ១០នាទីអាចទៅដល់ផ្សារទំនើបលំដាប់អន្តរជាតិ Aeon សែនសុខ ផ្សារម៉ាក្រូ និងផ្សារ Global ហើយចំណាយពេលត្រឹម ៥នាទី និងមកដល់គម្រោងផ្សារទំនើប Century Plaza។ ជុំវិញបុរី ហ៊ុមព័ទ្ធទៅដោយសាលារៀន មន្ទីរពេទ្យ ផ្សារទំនើបតូចធំ ជាឱកាសអនុញ្ញាតឱ្យអតិថិជនទទួលបានផលចំណេញខ្ពស់នៅពេលដែលវិនិយោគជាមួយបុរី អូរ៉ូរ៉ា ស៊ីធី។

បុរី អូរ៉ូរ៉ា ស៊ីធី ប្រណិតភាព គុណភាព វឌ្ឍនភាព ឧត្តមភាព៕

ខេត្តព្រះសីហនុត្រៀមស្វាគមន៍តំបន់សេដ្ឋកិច្ចពិសេសចំនួន៦ទៀតដើម្បីពង្រីក សក្តានុពលអភិវឌ្ឍន៍

ដោយៈ រ៉ាណេត

ព្រះសីហនុៈ បន្ថែមពីលើតំបន់សេដ្ឋកិច្ចពិសេសចំនួន៤ ដែលកំពុងធ្វើប្រតិបត្តិការយ៉ាងសកម្ម នៅក្នុងខេត្តព្រះសីហនុពេលបច្ចុប្បន្ននេះ នៅមានតំបន់សេដ្ឋកិច្ចពិសេសចំនួន៦ថ្មីទៀត កំពុងសាងសង់ដែលគ្រោងបញ្ចប់ និងដាក់ឱ្យដំណើរការចូលរួមគាំទ្រដល់វិស័យឧស្សាហកម្ម ជួយជំរុញកំណើនសេដ្ឋកិច្ចនៅកម្ពុជា។

អភិបាលខេត្តព្រះសីហនុ លោក គួច ចំរើន នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្តរបស់រដ្ឋបាលខេត្ត នៅទីស្ដីការគណរដ្ឋមន្ត្រី នាព្រឹកថ្ងៃទី៩ ខែមិថុនា ឆ្នាំ២០២០នេះ បានលើកឡើងថា បច្ចុប្បន្ននេះនៅក្នុងខេត្តព្រះសីហនុ មានតំបន់សេដ្ឋកិច្ចពិសេសចំនួន១០ទីតាំង ស្ថិតនៅលើផ្ទៃដីសរុបប្រមាណ២៥៨៦,២៦ ហិកតា ដែលមានទំហំទុនវិនិយោគសរុបជាង១ ៤៨១លានដុល្លារ។

លោកបន្តទៀតថា “នៅក្នុងចំណោមតំបន់សេដ្ឋកិច្ចពិសេសចំនួន១០ បច្ចុប្បន្ននេះ មានតែ៤ទីតាំងប៉ុណ្ណោះដែលដំណើរប្រតិបត្តិការ ដោយឡែកតំបន់សេដ្ឋ្កិច្ចពិសេសចំនួន៦ទៀត កំពុងតែបន្តដំណើរការសាងសង់ ដែលគ្រោងនឹងបញ្ចប់ និងដាក់ប្រើប្រាស់ក្នុងពេលខាងមុខនេះ”។ លោកបានបញ្ជាក់ទៀតថា “នៅក្នុងតំបន់សេដ្ឋកិច្ចពិសេសដែលមានដំណើរការខាងលើនេះមានវត្តមានរោងចក្រ សហគ្រាសសរុបចំនួន១៥១រោងចក្រ ហើយចំនួន៦៦រោងចក្រផ្សេងទៀត កំពុងដំណើរនៅក្រៅតំបន់សេដ្ឋកិច្ចពិសេស”។

ជាមួយនឹងវត្តមាន នៃតំបន់សេដ្ឋកិច្ចពិសេសទាំងអស់ខាងលើ ដែលគាំទ្រដល់វិស័យឧស្សាហកម្មនៅក្នុងខេត្តព្រះសីហនុ និងជាចំណែកមួយ ក្នុងការជំរុញកំណើនសេដ្ឋកិច្ចកម្ពុជា ប្រមុខរាជរដ្ឋាភិបាល សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានកំណត់គោលដៅ ក្នុងការប្រែក្លាយខេត្តព្រះសីហនុ ឱ្យទៅជាប៉ូលអភិវឌ្ឍន៍ជាតិប្រកបដោយចីរភាពនៅតំបន់ឆ្នេរសមុទ្រកម្ពុជា រួមជាមួយនឹងការអភិវឌ្ឍខ្លួនក្លាយជា ក្រុងពហុបំណងក្នុងល្បឿនដ៏លឿន។

សម្ដេចតេជោ ហ៊ុន សែន បានមានប្រសាសន៍កាលពីសប្ដាហ៍មុននេះថា “ខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង ដែលនឹងទាក់ទាញទេសចរ និងការវិនិយោគថ្មីៗបន្ថែមទៀតពីបរទេស និងបំរើដល់ការរស់នៅដ៏ល្អប្រសើរសម្រាប់ប្រជាពលរដ្ឋខ្មែរយើងផងដែរ”។ សម្ដេចបន្តទៀតថា “រាជរដ្ឋាភិបាលបានកំណត់ផែនការក្នុងការរៀបចំប្លង់គោលប្រើប្រាស់ដីធ្លីក្នុងខេត្តព្រះសីហនុ ជាប៉ូលអភិវឌ្ឍជាតិប្រកបដោយចីរភាពនៅតំបន់ឆ្នេរសមុទ្រកម្ពុជា តាមរយៈការអភិវឌ្ឍទីក្រុងទំនើប ជាមួយរមណីយដ្ឋានឆ្នេរសមុទ្រដែលស្អាតបំផុតលើសកលលោក”៕

ក្រុមហ៊ុនអាកាសចរណ៍ជប៉ុន សម្រេចផ្អាកការហោះហើរមកកាន់កម្ពុជា

ដោយ ៖ រ៉ាណេត

ភ្នំពេញ ៖ ក្រោមឥទ្ធិពលនៃវិបត្តិជំងឺឆ្លង Covid-19 ដែលកំពុងរាតត្បាតនៅក្នុងប្រទេសជប៉ុន ក៏ដូចជានៅតាមបណ្តាប្រទេសនានាលើសាកលលោក ក្រមហ៊ុនអាកាសចរណ៍ដ៏ធំរបស់ជប៉ុនបានសម្រេចផ្អាកការហោះហើរទាំងស្រុងមកកាន់ប្រទេសកម្ពុជារហូតដល់ដំណាច់ខែកក្កដា ឆ្នាំ២០២០ ។

តាមរយៈស្ថានឯកអគ្គរាជទូតកម្ពុជាប្រចាំនៅប្រទេសជប៉ុន បានធ្វើការជូនដំណឹងដល់សាធារណៈជនទូទៅនៅថ្ងៃទី៩ ខែមិថុនា ឆ្នាំ២០២០នេះថា ដោយសារការរីករាលដាលនៃជំងឺឆ្លង Covid-19 ក្រុមហ៊ុនអាកាសចរណ៍ជប៉ុន ដែលមានឈ្មោះថា ALL NIPPON AIRWAY (ANA) បានសម្រេចផ្អាកជើងហោះហើរ ភ្នំពេញ-ណារីតា – ភ្នំពេញ ចាប់ពីថ្ងៃជូនដំណឹងរហូតដល់ថ្ងៃទី៣១ ខែកក្កដា ឆ្នាំ២០២០ខាងមុខនេះ។

ដោយឡែកសម្រាប់កិច្ចដំណើរការហោះហើរឡើងវិញជាក់លាក់នៅពេលសមស្របណាមួយនោះ ក្រុមហ៊ុននឹងប្រកាសជូនដំណឹងនៅពេលក្រោយ។

ពាក្យចចាមអារ៉ាមៈរដ្ឋាភិបាលគ្រោងកាត់ដែនរដ្ឋបាលក្រុងតាខ្មៅ ចូលមកកាន់ រាជធានីភ្នំពេញ

ដោយគង់ សូរិយា និង រ៉ាណេត

ភ្នំពេញៈ យោងតាមប្រភពព៌តមានគួរឲ្យទុកចិត្តបានបង្ហើបឲ្យដឹងថា រដ្ឋាភិបាលគ្រោងកាត់ដែនរដ្ឋបាលនៃក្រុងតាខ្មៅ ដែលស្ថិតក្នុងខេត្តកណ្តាលដាក់បញ្ចូលមកក្នុងរដ្ឋបាលរាជធានីភ្នំពេញនៅឆ្នាំ២០២៥ខាងមុខនេះ។

មន្រ្តីជាន់ខ្ពស់រដ្ឋាភិបាលបាននិយាយក្នុងលក្ខខ័ណ្ឌមិនបញ្ចេញឈ្មោះ ប្រាប់គេហទំព័រPropertyarea.asiaកាលពីសប្តាហ៍មុនថា រដ្ឋាភិបាលបាននិងកំពុងរៀបចំផែនការនិងឯកសារបទដ្ឋានគតិយុត្តិនានា ដើម្បីរើរដ្ឋបាលខេត្តកណ្តាលទៅកាន់ស្រុកស្អាង ខេត្តកណ្តាល ហើយកាត់ដែនរដ្ឋបាលក្រុងតាខ្មៅបច្ចុប្បន្ន មកជាចំណុះឲ្យរាជធានីភ្នំពេញ។លោកបន្តថា ការកាត់ដែនរដ្ឋបាលក្រុងតាខ្មៅ មកចូលរាជធានីភ្នំពេញ ដោយសារការរីកចម្រើននៃទីក្រុងភ្នំពេញ និងកំនើនប្រជាពលរដ្ឋមានការកើនឡើង។

ការកាត់ក្រុងតាខ្មៅមកកាន់រាជធានីភ្នំពេញ នឹងធ្វើឲ្យតម្លៃអចលនទ្រព្យនិងសក្តានុពលនៃការអភិវឌ្ឍនឹងមានការរីកចម្រើនកាន់តែខ្លាំង។

មន្រ្តីមន្ទីររៀបចំដែនដី នគរូបនីយកម្ម ខេត្តកណ្តាលបាននិយាយក្នុងលក្ខខ័ណ្ឌមិនបញ្ចេញឈ្មោះផងដែរថា ពិតជាមានសំណើររបស់ក្រសួងមហាផ្ទៃ បានស្នើសុំកាត់ដែនរដ្ឋបាលក្រុងតាខ្មៅទំហំ៣០៣ហិកតា ស្ថិតក្នុងសង្កាត់តាក្តុល មកចូលក្នុងដែនរដ្ឋបាលរាជធានីភ្នំពេញពិតមែន ប៉ុន្តែសំណើររបស់ក្រសួងមហាផ្ទៃទាំងពីរលើក មិនទាន់សម្រេចនៅឡើយ ដោយសារពាក់ព័ន្ឋនឹងក្រសួងរៀបចំដែនដី នគរូបនីយកម្មនិងសំណង់ ដែលបានអនុម័តប្លង់គោលប្រើប្រាស់់ដីធ្លីលំអិតក្រុងតាខ្មៅរួចហើយ។

មន្រ្តីដដែលបានបន្តថា ការកាត់ដែនរដ្ឋបាលមកកាន់រាជធានី ពិតជាមានមែន ប៉ុន្តែមិនមែនចេះតែធ្វើនោះទេ វាទាមទារឲ្យក្រុងភ្នំពេញរៀបចំ ឯកសាររដ្ឋបាលជាក់លាក់ផងដែរថា តើកាត់ចូលនិងមានផែនការអភិវឌ្ឍន៍ដូចម្តេច”។លោកបន្តថា “តាមព៌តមានខ្ញុំទទួលបាន គឺមិនមានការរើក្រុងតាខ្មៅទៅកាន់ស្រុកស្អាងនោះទេ ព្រោះសំណើរសុំកាត់ដែនរដ្ឋបាលក្រុងតាខ្មៅ ចូលមករាជធានីភ្នំពេញមិនមានទំហំធំននោះទេ”។

អភិបាលខេត្តកណ្តាលលោកគង់ សោភ័ណបានមានប្រសាសន៍ឲ្យដឹងតាមប្រព័ន្ឋទូរស័ព្ទនារសៀលថ្ងៃទី៩ មិថុនានេះថា ទាក់ទងនឹងបញ្ហានេះ គណកម្មការសូរិយោដី និងគណកម្មការខេត្តមមិនទាន់បានជជែកគ្នានៅឡើយទេ ហេតុនេះព៌តមាននេះមិនទាន់ជាផ្លូវការនៅឡើយទេ។

លោកបន្តថា “នេះជាព៌តមានមិនផ្លូវការទេ វាជាព៌តមានរបស់បុគ្គលមួយចំនួនដែលចេះតែស្រមើស្រម័យ និយាយតាមគ្នាប៉ុណ្ណោះ។ សំរាប់មន្រ្តី និងប្រជាពលរដ្ឋខេត្តកណ្តាលពួកគេរស់នៅ ដោយរីករាយហើយនៅក្នុងក្រុងនេះ ដែលមានការធ្វើចរាចរណ៍ប្រកបដោយសណ្តាប់ធ្នាប់ និងរស់នៅដោយសន្តិសុខល្អប្រសើរ”។លោកបន្ថែមថា “នៅទីណាក៏ដោយឲ្យតែមានការអភិវឌ្ឍន៍ សុទ្ឋតែជារឿងល្អប្រសើរ”៕

អភិបាលខេត្តកំពតស្នើឱ្យសភាពាណិជ្ជកម្មខេត្តកំពត-កែបសាងសង់ផ្សារ នៅតាមច្រកទ្វារព្រំដែន

ដោយវុត្ថា

កំពតៈ អភិបាលខេត្តកំពត លោកជាវ តាយបានស្នើទៅសភាពាណិជ្ជកម្មខេត្តកំពត-កែប ជម្រុញដល់ការសាងសង់ផ្សារនៅតាមច្រកទ្វារព្រំដែន ស្របតាមអនុសាសន៍ សម្តេចតេជោ នាយករដ្ឋមន្ត្រី ដើម្បីចរាចរទំនិញបានឆាប់រហ័ស និងស្របច្បាប់។

លោកអភិបាលខេត្តកំពតបានស្នើបែបនេះ ខណៈលោក បានអនុញ្ញាតឲ្យប្រតិភូសភាពាណិជ្ជកម្មខេត្តកំពត-កែប ដែលដឹកនាំដោយ លោកឧកញ៉ាហាក់ សុវណ្ណា ជួប ពិភាក្សាការងារ និងរាយការណ៍អំពីវឌ្ឍនៈភាពការងាររបស់សភាពាណិជ្ជកម្មកំពត-កែបនៅថ្ងៃទី ៩ ខែមិថុនា ឆ្នាំ ២០២០នេះ ។

លោកបបន្តថា “សភាពាណិជ្ជកម្មខេត្តកំពត-កែប កន្លងមកបានរួមចំណែកយ៉ាងសំខាន់ក្នុងការអភិវឌ្ឍន៍ប្រទេសយើងឲ្យរីកចម្រើន ពិសេសខេត្តកំពត ហើយពេលបច្ចុប្បន្ននេះ កំណើនភ្ញៀវទេសចរក្នុងខេត្តបានកើនឡើង ពិសេសតំបន់អេកូទេសចរណ៍ ដែលទាក់ទាញភ្ញៀវទេសចរយ៉ាងច្រើន ក្នុងនោះប្រមាណភ្ញៀវទេសចរ៥២%បានទៅលេងនៅតំបន់ទឹកឈូ”។

លោក ឧកញ៉ា ហាក់ សុវណ្ណា ប្រធានសភាពាណិជ្ជកម្មខេត្តកំពត-កែប បានឱ្យដឹងថា ក្នុងនាមសភាពាណិជ្ជកម្មខេត្ត នឹងរៀបចំផ្សារសម្រាប់ដោះដូរទំនិញ នៅតាមច្រកទ្វារព្រំដែនឲ្យបានឆាប់រហ័ស ស្របតាមផែនការរបស់ប្រមុខនៃរាជរដ្ឋាភិបាល។

លោកបន្តថា “ សភាពាណិជ្ជកម្មខេត្ មានតួនាទី ក្នុងការសម្របសម្រួលជាមួយ វិស័យសាធារណៈ និងវិស័យឯកជន សំដៅធ្វើយ៉ាងណាឲ្យវិស័យទាំង២នេះ មានសុខដុមនីយកម្មជាមួយគ្នា”។

លោកបន្ថែមថា ជាមួយគ្នានេះ សភាពាណិជ្ជកម្មខេត្ត កៀរគរវិនិយោគិនទាំងក្នុងស្រុក និងក្រៅស្រុក មកវិនិយោគទុកក្នុងខេត្ត ដោយកន្លងមក មានវិនិយោគគិនជាច្រើនបានចាប់អារម្មណ៍ខេត្តកំពតខ្លាំង។

លោកហាក់ វណ្ណាបានបន្តថា ដោយឡែកក្នុងខេត្តយើងមិនទាន់មានផែនទី កំណត់សម្រាប់អនុវត្ត តំបន់កសិកម្មតំបន់ណា តំបន់កសិឧស្សាហកម្មតំបន់ណា តំបន់អេកូទេសចរណ៍តំបន់ណា ដូចនេះ សភាពាណិជ្ជកម្មខេត្ត ស្នើសុំធ្វើការនេះជាមួយរដ្ឋបាលខេត្ត និងមន្ទីរជំនាញ ដើម្បីងាយស្រួលនាពេលក្រោយ បង្ហាញដល់វិនិយោគគិន។

សម្តេចតេជោ ហ៊ុន សែន នាយករដ្ឋមន្រ្តីកម្ពុជា កាលពីន្លងមកនេះ បានបញ្ជារឲ្យអភិបាលខេត្តនៃខេត្តកំពត និងខេត្តស្វាយរៀង សិក្សាទីតាំងសាងសង់ផ្សារគំរូព្រំដែន ឲ្យបានសមរម្យ ក្នុងខេត្តនីមួយៗ ដើម្បីផ្តល់ភាពងាយស្រួល ដល់ប្រជាពលរដ្ឋ នៅតាមព្រំដែន។

សម្តេចតេជោថ្លែងថា “ការសាងសង់ផ្សារព្រំដែននេះ នឹងជួយជំរុញសកម្មភាពពាណិជ្ជកម្ម រវាងប្រទេសទាំងពីរ ជាពិសេសនៅតំបន់ខ្សែបន្ទាត់ព្រំដែន ហើយការសាងសង់ដោយប្រើប្រាស់ថវិការបស់រដ្ឋាភភិបាលកម្ពុជា”៕