ដោយ ៖ រ៉ាណេត
ភ្នំពេញ ៖ រដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា បានអនុម័តលើគម្រោងវិនិយោគថ្មីៗចំនួន៦បន្ថែមទៀត ដែលមានទុនសរុបចំនួន ១៥១,៨លានដុល្លារ ឱ្យដំណើរការអាជីវកម្មស្ថិតនៅក្នុងខេត្ត / ក្រុងចំនួន៣ផ្សេងគ្នា។

ក្រុមហ៊ុនដែលទទួលបានអាជ្ញាប័ណ្ណអនុញ្ញាតទាំង៦ រួមមានឈ្មោះដូចខាងក្រោម ៖

១៖ ក្រុមហ៊ុន HUA TE BANG (CAMBODIA) CO., LTD គម្រោងបង្កើតរោងចក្រ ផលិតផលិតផលពីប្លាស្ទីកគ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងត្រប់ សង្កាត់បឹងធំ ខណ្ឌកំបូល រាជធានីភ្នំពេញ មានទុនវិនិយោគប្រមាណ២.៨លានដុល្លារអាមេរិក និងអាចបង្កើតការងារបានចំនួន២១៦កន្លែង។

២៖ ក្រុមហ៊ុន PRINTX GP (CAMBODIA) FACTORY CO., LTD គម្រោងបង្កើតរោងចក្រផលិត កាបូបគ្រប់ប្រភេទ និងគ្រឿងបន្សំកាបូប ដែលមានទីតាំងវិនិយោគស្ថិតនៅផ្លូវជាតិលេខ៥១ ភូមិត្រពាំងផ្លុង ឃុំដំណាក់រាំង ស្រុកឧដុង្គ ខេត្តកំពង់ស្ពឺ មានទុនវិនិយោគប្រមាណ៦.៦លានដុល្លារអាមេរិក និងអាចបង្កើតការងារបានចំនួន ១,៤១៤កន្លែង។

៣៖ ក្រុមហ៊ុន DIZE (CAMBODIA) NONG YE FAZHAN CO., LTD គម្រោងបង្កើតកសិដ្ឋានដាំដំណាំចេក ដែលមានទីតាំងវិនិយោគស្ថិតនៅភូមិមាឃ ឃុំព្រែកកក់ ស្រុកស្ទឹងត្រង់ ខេត្តកំពង់ចាម មានទុនវិនិយោគប្រមាណ១៧.៨លានដុល្លារអាមេរិក និងអាចបង្កើតការងារបានចំនួន១,៩០០កន្លែង។

៤៖ ក្រុមហ៊ុន SUN & MOON HOTEL CO., LTD គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៤ ចំនួន២០០បន្ទប់ ដែលមានទីតាំងវិនិយោគ ស្ថិតនៅដីឡូតិ៍លេខ២៨៥មហាវិថីព្រះនរោត្តម ជាប់ស្ពានព្រះមុនីវង្ស កែងផ្លូវលេខ២៣៣ សង្កាត់ទន្លេបាសាក់ ខណ្ឌចំការមន រាជធានីភ្នំពេញ មានទុនវិនិយោគប្រមាណ ៣៥.២លានដុល្លារអាមេរិក និងអាចបង្កើតការងារបានចំនួន៥៣៥កន្លែង។

៥៖ ក្រុមហ៊ុន BRILLIANT DRAGON (CAMBODIA) ENTERPRISE CO., LTD គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិញរ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ មានទុនវិនិយោគប្រមាណ ២.៤លានដុល្លារអាមេរិក និងអាចបង្កើតការងារបានចំនួន៧០០កន្លែង។

៦៖ ក្រុមហ៊ុន VATTANAC BREWERY CO., LTD គម្រោងបង្កើតរោងចក្រផលិតស្រាបៀរ ដែលមានទីតាំងវិនិយោគស្ថិតនៅភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ មានទុនវិនិយោគចំនួន៨៧លានដុល្លារអាមេរិក និងអាចបង្កើតការងារបានចំនួន ៨៩៩កន្លែង៕

ដោយ ប៊ី

អន្តរជាតិៈ ចិនកំពុងព្យាយាមទាញខ្លួនចេញវិបត្តិសេដ្ឋកិច្ចដ៏ធ្ងន់ធ្ងរ ហើយផ្លូវឆ្ពោះទៅរកការងើបឡើងវិញហាក់ដូចជាយឺត និងរងផលប៉ះពាល់ ខណៈប្រទេសជាច្រើនលើពិភពលោកកំពុងប្រយុទ្ធប្រឆាំងជាមួយនឹងជំងឺរាតត្បាត។

ការនាំចេញរបស់ប្រទេសសេដ្ឋកិច្ចធំជាងគេទី២ លើពិភពលោកបានធ្លាក់ចុះ៣,៣ភាគរយ បើធៀបនឹងកាលពីរយៈពេលដូចគ្នាកាលពីឆ្នាំមុន។

ក្រុមអ្នកវិភាគបានសន្មតថា ការធ្លាក់ចុះនេះ គឺដោយសារតែតម្រូវការខ្សោយនៅក្រៅប្រទេស។ ខណៈដែលប្រទេសចិន បានចាប់ផ្តើមបើកដំណើរការសេដ្ឋកិច្ចរបស់ខ្លួនឡើងវិញកាលពីប៉ុន្មានខែមុន មហាអំណាចជាច្រើនផ្សេងទៀត ទើបតែចាប់ផ្តើមបន្ធូរបន្ថ​យវិធានការណ៍បិទទ្វារប្រទេសមួយចំនួន ក្នុងរយៈពេលប៉ុន្មានសប្តាហ៍ចុងក្រោយនេះ។

ការងើបឡើងវិញសម្រាប់ប្រទេសចិនទេ មិនមានភាពរលូនទាំងស្រុងនោះទេ។ ការនាំចូលកាលពីខែមុនបានធ្លាក់ចុះ១៦,៧ភាគរយ ដែលជាការធ្លាក់ចុះយ៉ាងខ្លាំងចាប់តាំងពីខែមករាឆ្នាំ ២០១៦ ដែលបង្ហាញថា តម្រូវការក្នុងស្រុកនៅតែធ្លាក់ចុះ។

លោក Mitul Kotecha អ្នកយុទ្ធសាស្រ្តទីផ្សារនៅក្រុមហ៊ុន TD Securities បានសរសេរថា “ទិន្នន័យនៃការនាំចូលចង្អុលបង្ហាញ ទិសដៅសេដ្ឋកិច្ចក្នុងស្រុកខ្សោយ សូម្បីតែប្រទេសចិន ចាប់ផ្តើមបង្កើនការចំណាយលើហេដ្ឋារចនាសម្ព័ន្ធក៏ដោយ”។

ប្រទេសចិន ដែលកំពុងពុះពារជាមួយសេដ្ឋកិច្ចដែលកំពុងធ្លាក់ចុះ មុនពេលជំងឺរាតត្បាតវាយលុកក៏ដោយ ក៏បានព្យាយាមចំណាយលុយរបស់ខ្លួន ដើម្បីសង្គ្រោះការធ្លាក់ចុះនេះដែរ។ ប្រទេសចិនបានគ្រោង កាលពីខែមុន ថានឹងដាក់ចេញនូវកញ្ចប់ថវិកា៣,៦ ទ្រីលានយន់ (៥០០ពាន់លានដុល្លារ) ដល់សេដ្ឋកិច្ចរបស់ខ្លួននៅឆ្នាំនេះ ក្នុងការកាត់បន្ថ​យពន្ធ គម្រោងហេដ្ឋារចនាសម្ព័ន្ធ និងវិធានការជំរុញផ្សេងទៀត ដែលជាផ្នែកមួយនៃការបង្កើតការងារចំនួន៩លានកន្លែង និងសង្គ្រោះការធ្លាក់ចុះពីជំងឺរាតត្បាត។

យ៉ាងហោចណាស់មានសញ្ញាខ្លះ នៃការងើបឡើងវិញនៃតម្រូវការ ដែលត្រូវបានលើកទឹកចិត្តដោយការចែកចាយសាច់ប្រាក់កាន់តែច្រើន។ បើយោងតាមទិន្នន័យដែលបានចេញផ្សាយកាលពីថ្ងៃចន្ទ ដោយសមាគមរថយន្តដឹកអ្នកដំណើរចិន ការលក់រថយន្តដឹកអ្នកដំណើរបានកើនឡើងនៅក្នុងខែឧសភា ជាលើកដំបូងក្នុងរយៈពេល១១ខែ។ ប្រ​ទេសនេះ បានលក់រថយន្តដឹកអ្នកដំណើរថ្មីចំនួន១,៦លានគ្រឿង កាលពីខែមុនពោលគឺកើនឡើង ១,៨%បើធៀបនឹងឆ្នាំមុន។

ប៉ុន្តែពាណិជ្ជកម្មនៅតែជាចំណុចរសើបមួយ សម្រាប់ប្រទេសចិន ដែលកំពុងគ្រប់​គ្រងភាពតានតឹង ជាមួយសហរដ្ឋអាមេរិក៕

ដោយវុត្ថា

កំពត៖ ដំណើរការសាងសង់រោងចក្រផលិតឥដ្ឋសំណង់ របស់សហគ្រាស ម្សៅបៀកភ្នំមាស ស្ថិតនៅភូមិត្រពាំងរុន ឃុំតានី ស្រុកអង្គរជ័យ ខេត្តកំពត ដែលកំពុងសាសង់បានប្រមាណជា ៨០% និងត្រូវដាក់ដំណើរនៅឆ្នាំ២០២១ ខាងមុខនេះ ។

នេះ បើយោងតាម លទ្ធផលនៃការចុះពិនិត្យដំណើរការសាងសង់រោងចក្រផលិតឥដ្ឋសំណង់នេះកាលពីថ្ងៃទី៩ខែមិថុនាឆ្នាំ ២០២០ ម្សិលមិញនេះ របស់លោក ជាវ តាយ អភិបាលខេត្ត និងលោក ជឹង ផល្លា ប្រធានក្រុមប្រឹក្សាខេត្ត ព្រមទាំងថ្នាក់ដឹកនាំមន្ទីរពាក់ព័ន្ធ។

លោកជាវ តាយ ថ្លែងថា រោងចក្រផលិតឥដ្ឋសំណង់នេះ ប្រើប្រាស់បច្ចេកវិទ្យាខ្ពស់ ដែលមានសង្វាក់ផលិតកម្មស្វ័យប្រវត្តិមានសមត្ថភាពផលិតឥដ្ឋចំនួន ៨០០.០០០ដុំ (ប៉ែតសិបម៉ឺនដុំ) ក្នុងមួយថ្ងៃ ។ លក្ខណៈពិសេសនៃឥដ្ឋសំណង់ដែលផលិតដោយរោងចក្រនេះ គឺមានទម្ងន់ស្រាលជាងឥដ្ឋធម្មតា ងាយស្រួលក្នុងការប្រើប្រាស់ ។

លោកអភិបាលខេត្តបានកោតសរសើរចំពោះម្ចាស់សហគ្រាសដែលមានគំនិតផ្តួចផ្តើមសាងសង់រោងចក្រនេះឡើងដែលមានលក្ខណៈទំនើប ដែលត្រូវនឹងសភាពការណ៍អភិវឌ្ឍន៍នាពេលបច្ចុប្បន្នលើវិស័យសំណង់ក្នុងខេត្តកំពតកំពុងមានសន្ទុះកើនឡើង ធានានូវការផ្គត់ផ្គង់ឥដ្ឋសម្រាប់ការដ្ឋានសាងសង់នីមួយៗបានគ្រប់គ្រាន់និងទាន់ពេលវេលា ។

ជាមួយគ្នានេះ លោក ជាវ តាយ ក៏បានណែនាំដល់អាជ្ញាធរមូលដ្ឋានពាក់ព័ន្ធជួយសម្របសម្រួល និងបង្កលក្ខណៈងាយស្រួលជូនដល់សហគ្រាសក្នុងការសាងសង់រោងចក្រផលិតឥដ្ឋនេះទទួលបានជោគជ័យ និងដាក់ឱ្យដំណើរការក្នុងពេលឆាប់ៗខាងមុខ។

លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពលធ្លាប់បានឱ្យដឹងកន្លងមកនេះថា ដោយសារមានការគាំទ្ររបស់រាជរដ្ឋាភិបាលកម្ពុជាក្នុងវិស័យរ៉ែ បានបើកចំហរ និងជំរុញឱ្យក្រុមហ៊ុនឯកជននានាបមកធ្វើការសិក្សាស្រាវជ្រាវ និងវិយោគយ៉ាងផុលផុសក្នុងការផលិតសម្ភារៈសំណង់។ជាមួយគ្នានេះ វិស័យរ៉ែបានចូលរួមចំណែកអភិវឌ្ឍន៍វិស័យហេដ្ឋារចនាសម្ព័ន្ធ និងកំណើនសេដ្ឋកិច្ចជាច្រើននៅក្នុងប្រទេសកម្ពុជា ។

លោកបន្ថែមទៀតថា “កន្លងមកនេះ ក្រសួងបានអនុញ្ញាតឱ្យក្រុមហ៊ុន និងអាជីវករ ធ្វើអាជីវកម្មរ៉ែសំណង់ និងផលិតសម្ភារៈសំណង់ ដែលអាចបំពេញបាននូវការប្រើប្រាស់នៅក្នុងវិស័យសំណង់ក្នុងប្រទេសកម្ពុជាដោយពុំមានការខ្វះខាត”។

លោកពន្យល់ថា “រ៉ែសំណង់នេះផ្តោតសំខាន់ៗទៅលើ គ្រួស ខ្សាច់ និងថ្ម រួមជាមួយនឹងការផលិតជាដើមដែលជាវត្ថុធាតុដើមសម្រាប់បំរើឱ្យវិស័យសំណង់ បំពេញបានគ្រប់គ្រាន់តម្រូវតាមសេចក្តីត្រូវការរបស់សេដ្ឋកិច្ច និងសង្គម និងតម្រូវការសម្រាប់ហេដ្ឋារចនាសម្ព័ន្ធរបស់ជាតិ”។

លោកបញ្ជាក់ថា “បច្ចុប្បន្ននេះ ការអភិវឌ្ឍន៍យ៉ាងកំហុកលើវិស័យសំណង់ យើងក៏ត្រូវការធនធានរ៉ែសំណង់យកមកផ្គត់ផ្គង់។ ជាមួយគ្នានេះ យើងបានដាក់ឱ្យដំណើរការរោងចក្រផលិតស៊ីម៉ង់ត៍ ដែលមានសមត្ថភាពផលិតបានជាង ៨ លានតោនក្នុងមួយឆ្នាំ”៕

ដោយ ៖ រ៉ាណេត

ភ្នំពេញ ៖ កិច្ចព្រមព្រៀងពាណិជ្ជកម្មសេរីរវាង កម្ពុជា-ចិន ដែលបាន និងកំពុងចរចាជិតដល់ទីបញ្ចប់ ដែលនឹងនាំមកនូវភាពល្អប្រសើរដល់ការធ្វើពាណិជ្ជកម្មរវាងប្រទេសទាំង២ គ្រោងនឹងចុះហត្ថលេខាលើកិច្ចព្រមព្រៀងនៅត្រឹមចុងឆ្នាំ២០២០ខាងមុខនេះ។

តាមសេចក្តីប្រកាសព័ត៌មានរបស់ក្រសួងពាណិជ្ជកម្ម ស្ដីពីលទ្ធផលនៃការចរចាជុំទី៣ លើកិច្ចព្រមព្រៀងពាណិជ្ជកម្ម កម្ពុជា-ចិន បានឱ្យដឹងទៀតថា នៅល្ងាចថ្ងៃទី៩ ខែមិថុនា ឆ្នាំ២០២០ ក្រុមការងារចរចាលើការធ្វើពាណិជ្ជកម្មសេរីរវាង កម្ពុជា-ចិន បានជួបប្រជុំគ្នាជាថ្មីម្តង តាមរយៈប្រព័ន្ធវីដេអូ។

ក្រនៅក្នុងសេចក្ដីប្រកាសដដែលបានបញ្ជាក់ថា កិច្ចប្រជុំបានពិភាក្សាផ្តោតសំខាន់ ទៅលើការបើកច្រកទីផ្សារ ផ្នែកទំនិញ សេវាកម្ម វិនិយោគ កិច្ចសហប្រតិបត្តិការសេដ្ឋកិច្ច-បច្ចេកទេស និងផ្នែកនីតិកម្ម ដែលនឹងជំរុញការនាំចេញទំនិញពីកម្ពុជា និងទាក់ទាញវិនិយោគបរទេស ឱ្យកាន់តែកើនឡើងថែមទៀត។

ក្នុងកិច្ចពិភាក្សានេះ ក្រុមការងារបច្ចេកទេសទាំង១០ក្រុម ក៏បានរាយការណ៍ពីវឌ្ឍនភាពសម្រេចបាន និងស្នើសុំអនុសាសន៍លើបញ្ហាប្រឈម ផ្នែកបច្ចេកទេសច្បាប់ និងគោលនយោបាយពីប្រធាន ក្រុមអ្នកចរចានៃប្រទេសទាំងពីរ ហើយបានឯកភាពលើគោលការណ៍ សំខាន់ៗ ទាក់ទងនឹងការបើកច្រកទីផ្សារផ្នែកទំនិញ និងសេវាកម្មផងដែរ។ ជាមួយគ្នានេះ ក្រុមការងារទាំង២ភាគី គ្រោងនឹងស្នើសុំគោលការណ៍ ពីរដ្ឋាភិបាលទាំងសងខាង ដើម្បីផ្តល់ការយល់ព្រម លើអត្ថបទកិច្ចព្រមព្រៀង និងសំណើបើកច្រកទីផ្សារ ព្រមទាំងជំពូកផ្សេងៗ ដើម្បីធ្វើការសម្រេចចិត្តប្រកាសបិទបញ្ចប់ការចរចា និងឈានទៅចុះហត្ថលេខា លើកិច្ចព្រមព្រៀងពាណិជ្ជកម្មសេរីទ្វេភាគីនៅចុងឆ្នាំ២០២០នេះ៕

ដោយ ប៊ី

ភ្នំពេញៈ មន្ត្រីជាន់ខ្ពស់​របស់​ក្រុមហ៊ុន KrisEnergy បាន​និយាយថា ការអភិវឌ្ឍន៍​ប្លុក​A នៅក្នុង​តំបន់​ប្រេង​អប្សរា​របស់​អាង​គឺជា​មូលដ្ឋានគ្រឹះ ឬ​ជា​ក្តីសង្ឃឹម​នាពេល​អនាគត​របស់​ក្រុមហ៊ុន KrisEnergy ។ នេះ​បើ​យោងតាម​របាយការណ៍​ប្រចាំឆ្នាំ ២០១៩ ដែល​ចេញផ្សាយ​កាលពី​ចុង​សប្តាហ៍​កន្លងមកនេះ។

លោក Tan Ek Kia ប្រធាន​ប្រតិបត្តិ​ក្រុមហ៊ុន​បាន​និយាយថា អណ្តូងប្រេង​នៅ​ប្លុក​A មាន​សារៈសំខាន់​ខ្លាំងណាស់ សម្រាប់​អាជីវកម្ម​នាពេល​អនាគត​របស់​ក្រុមហ៊ុន ដោយ​កត់សម្គាល់ថា គម្រោង​នេះ​នឹង​ក្លាយជា​ប្រវត្តិសាស្ត្រ សម្រាប់​ព្រះរាជាណាចក្រ​កម្ពុជា។

បច្ចុប្បន្ន មានការ​ងារ​ភូមិសាស្ត្រ និង​ភូគព្ភសាស្ត្រ​ជាច្រើន​ត្រូវបាន​អនុវត្ត​នៅក្នុង​ប្លុក ក៏ដូចជា​ការរុករក​រ៉ែ និង​ការវាយតម្លៃ។

លោក​បាន​កត់សម្គាល់ថា ក្នុងចំណោម​អណ្តូង​ទាំង២៧ ដែល​ខួង​នៅក្នុង​តំបន់​អាជ្ញាប័ណ្ណ ក្នុងនោះ២៣បាន​ជួបប្រទះ​ប្រេង និង​ឧស្ម័ន។

ដោយសារ​ដែនទឹក​កម្ពុ​ជា មិនទាន់​ផលិត​ប្រេង​បាន លោក​មានប្រសាសន៍ថា ក្រុមហ៊ុន កំពុងប្រកាន់យក​នូវ​វិធីសាស្ត្រ​ប្រុងប្រយ័ត្ន និង​អណ្តូងប្រេង​សម្រាប់​ដំណាក់កាល​ដំបូង​នៃ​ការអភិវឌ្ឍន៍។

លោក​បន្តថា “នៅពេល​ដំណើរការ​នៅ​ឆ្នាំនេះ យើង​នឹង​អាច​សង្កេតមើល​ការអនុវត្ត​អាង​ស្តុក​ប្រេង និង​កត់ត្រា​ទិន្នន័យ​មានតម្លៃផ្សេងៗទៀត ដើម្បី​រៀបចំ​ដំណើរ​ឆ្ពោះទៅមុខ​សម្រាប់​ដំណាក់កាល​អភិវឌ្ឍន៍​ប​ន្ទា​ប់” ។ លោក​បន្តថា “សព្វថ្ងៃនេះ​យើង​ជឿជាក់ថា វា​មាន​សក្តានុពល​សម្រាប់​វេទិកា​ចំនួន៣ បន្ថែមទៀត​នៅក្នុង​តំបន់​អប្សរា និង​តំបន់​ប្រេង​អប្សរា ជា​ផ្នែក​មួយ​នៃ​ប្រាំពីរ​នៅក្នុង​ប្រទេស​កម្ពុជា​ប្លុក ​A ដែល​ត្រូវបាន​គេ​រំពឹងថា​ជា​ទ្រព្យ ដែល​រកប្រាក់​ចំណូល​បាន​ខ្ពស់បំផុត នៅក្នុង​ផលប័ត្រ​របស់​ក្រុម​ក្នុង​រយៈពេល​យូរ” ។

លោក Tan បាន​បន្ថែមទៀតថា ការងារ​លើ​គ្រឿង​បរិក្ខារ​អប្សរា កំពុងស្ថិត​ក្នុងដំណាក់កាល​ជឿនលឿន ទោះបីជា​មានការ​ពន្យារ​ពេល​នៃ​ការប្រគល់​សម្ភារៈ និង​ឧបករណ៍ និង​ការរំខាន​ដល់​ចលនា​បុគ្គលិក និង​ការងារ​ក៏ដោយ ដោយសារតែ​ការ​រឹតត្បិត​ពី​ជំងឺ COVID-19 ។

លោក​បាន​មានប្រសាសន៍ថា “ទោះយ៉ាងណា​យើង​នៅតែ​បន្ត​ប្រតិបត្តិការ ដែល​អាចធ្វើ​ទៅបាន ហើយ​កំពុង​សម្របសម្រួល យ៉ាង​ជិតស្និទ្ធ​ជាមួយ​អ្នកផ្គត់ផ្គង់ និង​អ្នកម៉ៅការ​ដើម្បី​កាត់បន្ថយ​ការពន្យារពេល” ។

ក្រុមហ៊ុន KrisEnergy និង​រដ្ឋាភិបាល​កម្ពុជា បាន​ចុះហត្ថលេខា​លើ​កិច្ចព្រមព្រៀង​នេះ​កាលពី​ខែសីហា​ឆ្នាំ២០១៧ ក្រោម​កិច្ចព្រមព្រៀង៩៥ភាគរយ នៃ​ផលប្រយោជន៍​ការងារ​របស់​ក្រុមហ៊ុន និង៥ភាគរយ​ទៀត​ដែល​នៅសល់​របស់​រដ្ឋាភិបាល។

ក្រុមហ៊ុន​ក្នុង​ឆ្នាំ ២០១៩ ចំណាយ​ប្រាក់​ប្រមាណ៤៦,៦លាន​ដុល្លារ ដែល​បាន​ផ្តោត​ជា​ចំបង ទៅលើ​ការអភិវឌ្ឍ​អណ្តូងប្រេង​អប្សរា​របស់​ប្រទេស​កម្ពុជា​ក្នុង​ប្លុក A ៕