ដោយ៖ វុត្ថា
ភ្នំពេញ៖ វិញ្ញាបនប័ត្រសម្គាល់ម្ចាស់កម្មសិទ្ធិ (Strata Title) សំដៅលើការកាន់កាប់កម្មសិទ្ធិប្រភេទលំនៅដា្ឋនខុនដូមួយ ដែលត្រូវបានបែងចែកគ្នាដាច់ដោយឡែកៗ ប៉ុន្តែនៅតែស្ថិតក្នុងអគារខុនដូតែមួយ។ ដូច្នេះវិញ្ញាបនប័ត្រសម្គាល់ម្ចាស់កម្មសិទ្ធិ (Strata Title) ត្រូវបានធ្វើឡើង ដើម្បីធ្វើការសម្គាល់ម្ចាស់កម្មសិទ្ធិនៅក្នុងប្រភេទលំនៅឋានសហកម្មសិទ្ធិ ដែលមានច្រើនជាន់ ជាមួយម្ចាស់សហកម្មសិទ្ធិនៃអគារនោះ។
គោលការណ៍នេះ ត្រូវបានប្រើប្រាស់ដំបូងឡើយ នៅក្នុងរដ្ឋញ៉ូសោតវ៉ែល ប្រទេសអូស្ត្រាលី ហើយចាប់ផ្តើមមានប្រជាប្រិយភាពកាន់តែខ្លាំងឡើង នៅក្នុងប្រទេសកម្ពុជា បន្ទាប់ពីច្បាប់នៃព្រះរាជាណាចក្រកម្ពុជាស្តីពី “សិទ្ធិលើការកាន់កាប់អចលនទ្រព្យរបស់ជនបរទេស” ដែលបានចេញជាផ្លូវការក្នុងខែឧសភាឆ្នាំ២០១០ ។ ច្បាប់មួយនេះត្រូវបានត្រួសត្រាយផ្លូវសម្រាប់កំណើនវិស័យសេដ្ឋកិច្ច ក៏ដូចជាអនុញ្ញាតឲ្យចំណែកទីផ្សារក្នុងតំបន់កាន់តែមានការប្រកួតប្រជែងយ៉ាងច្រើនពីសំណាក់វិនិយោគិននានា។
ត្រលប់ទៅកាលពីប៉ុន្មានឆ្នាំមុនជនបរទេស មានការលំបាកយ៉ាងច្រើនក្នុងការវិនិយោគ ប៉ុន្តែបន្ទាប់ពីចេញច្បាប់ថ្មីនេះមក សំណង់អគារខ្ពស់ៗជាច្រើនចាប់ផ្តើមរីកដុះដាលឡើងគួរឲ្យកត់សម្គាល់។ អ្នកអភិវឌ្ឍន៍គម្រោងអចលនទ្រព្យចាត់ទុកថា នេះជាឱកាសសម្រាប់ទាក់ទាញអ្នកវិនិយោគបរទេសចូលមកក្នុងប្រទេសកម្ពុជា តាមរយៈវិញ្ញាបនប័ត្រសម្គាល់ម្ចាស់កម្មសិទ្ធិ (Strata Title) ។
មុនពេលមានការចេញច្បាប់ថ្មី នៃការគ្រប់គ្រងកម្មសិទ្ធិអចលនទ្រព្យសម្រាប់ជនបរទេស វិញ្ញាបនប័ត្រសម្គាល់ម្ចាស់កម្មសិទ្ធិ (Strata Title) ម្ចាស់កម្មសិទ្ធិអចលនទ្រព្យមិនត្រូវអនុញ្ញាតឲ្យធ្វើការបែងចែកលក់ទៅឲ្យបុគ្គលឯកជនផ្សេងទៀតទេ ជាមួយនឹងប័ណ្ណកម្មសិទ្ធិប្លង់រឹង (Hard Title)។
រហូតដល់ឆ្នាំ២០១០ ទើបវិនិយោគិនបរទេសមានសិទ្ធិគ្រប់គ្រងអចលនទ្រព្យរហូតដល់៧០%ជាមួយសហកម្មសិទ្ធិ ហើយជនបរទេសអាចមានសិទ្ធិជាម្ចាស់អចលនទ្រព្យបានតែអចលនទ្រព្យណាមួយ ដែលមានទីតាំងស្ថិតនៅចាប់ពីជាន់ទី១ឡើងទៅ។
ពីមួយជំហានទៅមួយជំហានលើសពីអគារលំនៅដ្ឋាន តម្រូវការកាន់តែខ្ពស់ឡើងពីអន្តរជាតិ លើបន្ទប់ការិយាល័យសម្រាប់ជួលក្នុងក្រុងភ្នំពេញ ដែលនឹងក្លាយជាបណ្តុំទីផ្សារពាណិជ្ជកម្មរបស់សមាគមអាស៊ាន។ សម្រាប់វិនិយោគិនមួយចំនួនគិតថា ខុនដូហាក់បីដូចជា ត្រូវបានធ្វើការផ្គត់ផ្គង់លើសទីផ្សារមានចំនួនច្រើនពេក ធ្វើឲ្យ ការទិញបន្ទប់ការិយាល័យវាហាក់បីដូចជាប្រឈមមុខនឹងហានិភ័យ ស្របពេលទៅនឹងកំណើនសេដ្ឋកិច្ចដ៏លឿនរបស់ប្រទេសកម្ពុជាផងដែរ៕
