ក្រសួងដែនដីរកឃើញមានការបន្តទិញ លក់ដីចំណីសមុទ្រទំហំ៦០,០០០ម៉ែត្រក្រឡា

ដោយ វុត្ថា

ព្រះសីហនុៈ មន្ត្រីរបស់ក្រសួងរៀបចំដែនដី នគរូបនីយកម្ម និងសំណង់បានចុះពិនិត្យស្ថានភាពឆ្នេរសមុទ្រខេត្តព្រះសីហនុ ដោយរកឃើញមានការបន្តលក់ទិញដីចំណីឆ្នេរសមុទ្រសាធារណៈទំហំ ៦០,៨៧២ ម៉ែត្រក្រឡា ស្ថិតនៅភូមិស្រែចាមលើ ឃុំអូជ្រៅ ស្រុកព្រៃនប់ ខេត្តព្រះសីហនុ។ នេះ បើយោងរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បង្ហាញនៅក្នុងខែឧសភា ឆ្នាំ ២០២០កន្លងមកនេះ។

របាយការណ៍របស់ក្រសួង មិនបានបង្ហាញព័ត៌មានលម្អិត លើបញ្ហាដំណោះស្រាយ និង/ឬពាក់នឹងក្រុមហ៊ុន និងប្រជាពលរដ្ឋ ចំពោះការបន្តលក់ទិញដីចំណីឆ្នេរសមុទ្រសាធារណៈនេះនោះទេ តែយ៉ាងណាសម្តេចតេជោ ហ៊ុន សែន នាយកដ្ឋមន្ត្រីនៃកម្ពុជា នៅក្នុងពិធីសំណេះសំណាល ជាមួយមន្ត្រីរាជការ និងក្រុមការងារបច្ចេកទេស ស្ថាបនាហេដ្ឋារចនាសម្ព័ន្ធផ្លូវ នៅក្រុងខេត្តព្រះសីហនុ ខេត្តព្រះសីហនុ នារសៀលថ្ងៃទី១ ខែមិថុនា ឆ្នាំ២០២០ កន្លងមកនេះ បានប្រកាសចាត់វិធាន ការអ្នកដែល រំលោភដីឆ្នេរ បើទោះបីមានប្លង់ ក៏អាចលុបចោលបានដែរ។

សម្តេចតេជោបានប្រកាសមានវិធានការបែបនេះ ដើម្បីធានាតំបន់ ឆ្នេរនៅតែរក្សា បានភាពបៃតងគ្មានការរំលោភ បំពាន និងកាត់បន្ថយផលប៉ះពាល់ជាអវិជ្ជមាន ដល់និរន្តរភាពនៃធនធាន តំបន់ឆ្នេរសមុទ្រដ៏ស្រស់ស្អាត របស់កម្ពុជា។

សម្តេចតេជោថ្លែងថា “រដ្ឋាភិបាលអាចលុបចោលប្លង់ដីទាំងឡាយ ណាដែលកាន់កាប់ឆ្នេរខុសច្បាប់ នៅខេត្តព្រះសីហនុ មិនថាអ្នកមានអំណាច ឬអ្នកធំ ឬក៏អ្នកកម្រិតណានោះទេ” ។

សម្តេចតេជោបានបញ្ជាក់ថា មិនដឹងព័ត៌មាននៃការសុំគ្រលំធ្វើប្លង់ កម្មសិទ្ធិឲ្យអ្នកធំក្នុងជួររាជការ ដែលមន្ត្រីទើសទាល់ហើយចេញប្លង់កាន់កាប់ឲ្យ។សម្តេចថា រដ្ឋត្រូវយកតំបន់ឆ្នេរ ដែលមានប្រវែង១១០ម៉ែត្រតពីឆ្នេរសមុទ្រ មកកាន់កាប់ឡើងវិញ ដើម្បីរក្សាសោភ័ណភាពនៃឆ្នេរសមុទ្រ ដ៏ស្រស់ស្អាតរបស់កម្ពុជា ក្នុងការបម្រើសាធារណៈ និងវិស័យទេសចរណ៍។

សម្ដេចតេជោបន្តថា “មុននេះយើងមិនអាចតភ្ជាប់រវាងឆ្នេរអូត្រេះ និងឆ្នេរអូលឈើទាលបានទេ ដោយសារតែការកាន់កាប់ខុសច្បាប់ ទៅដីធ្លីតាមចំណីឆ្នេរ ប៉ុន្តែខ្ញុំសូមបញ្ជាក់ខ្ញុំបានជួបជាមួយម្ចាស់ដីមួយកន្លែង ហើយខ្ញុំក៏បានអរគុណគាត់ដែលបាន ចូលរួមសហការជាមួយរាជរដ្ឋាភិបាល” ។ សម្តេចបន្តថា “បើមិនសហការក៏ខ្ញុំយកដែរ ព្រោះនេះជាផលប្រយោជន៍សាធារណៈ ដែលតម្រូវឲ្យធ្វើយ៉ាងដូច្នេះ ព្រោះគេមិនដែលទៅយកដីភ្នំ ទៅយកដីមាត់សមុទ្រ ហើយទៅកាន់កាប់ឆ្នេរ នៅក្នុងសមុទ្រទៅទៀត វាមិនដែលមានទេ” ។

សម្ដេចតេជោបន្ថែមថា ឥលូវនេះខ្ញុំត្រូវធ្វើ ព្រោះទាំងនេះគឺជាដីរបស់រដ្ឋ រដ្ឋត្រូវយក វិញ រឿងយើងចេញប្លង់ឲ្យគេបានលុបចោលក៏បានដែរ អត់មានបញ្ហាអីទេ ជួនកាលមានការទើសទាល់ដីរបស់អ្នកនេះ របស់អ្នកនោះ មកតម្រូវសុំឱ្យគ្នាធ្វើប្លង់ឲ្យ ចឹងគ្នាចេះតែស៊ីញ៉េទៅ តែនាយករដ្ឋមន្ត្រីអត់បានដឹងទេ បើនាយករដ្ឋមន្ត្រីដឹង គឺលើកយោបល់មក ដឹងតែមោឃៈភាពចោលទៅលើដីណា ដែលជាចំណែកដីរបស់រដ្ឋ ក្នុងអនុក្រឹត្យរបស់យើងគឺកំណត់១១០ម៉ែត្រចែងយើងត្រូវធ្វើកិច្ចការងារនេះ៕

ក្រុមហ៊ុន Facebook នឹងចាប់ផ្ដើមរឹតបន្តឹងការផ្ទៀងផ្ទាត់អត្តសញ្ញាណកាន់តែខ្លាំង

ដោយ វុត្ថា

អាមេរិកៈ បន្តិចទៀត ប្រសិនបើការបង្ហោះរបស់លោក អ្នកទទួលបានប្រជាប្រិយភាពខ្លាំងនោះ លោកអ្នកគួរតែត្រៀមបង្ហាញអត្តសញ្ញាណប័ណ្ណឱ្យហើយទៅ។

នាពេលបច្ចុប្បន្ននេះ មានមនុស្សច្រើនរាប់លាននាក់បាន និងកំពុងប្រើប្រាស់កម្មវិធីបណ្តាញសង្គមជាច្រើន ស្របពេលជាមួយគ្នានេះដែរ មានអ្នកខ្លះក៏បានប្រើប្រាស់ព័ត៌មានពិតប្រាកដរបស់ខ្លួន ក្នុងការបង្កើតនិងប្រើប្រាស់កម្មវិធីទាំងអស់នោះ ដូចជា ឈ្មោះ រូបថត អាសយដ្ឋាន ជាដើម ។ល។ ប៉ុន្តែក៏មានមនុស្សជាច្រើន ដែលកំពុងតែប្រើប្រាស់ព័ត៌មានមិនពិតរបស់ខ្លួនផងដែរ។

ដើម្បីកាត់បន្ថយការប្រើប្រាស់ព័ត៌មានមិនពិតនេះ ក្រុមហ៊ុនហ្វេសប៊ុកបានធ្វើការផ្ទៀងផ្ទាត់អត្តសញ្ញាណនេះ តាំងពីឆ្នាំ២០១៨ មកម្លេះ សម្រាប់អ្នកគ្រប់គ្រងផេក ហើយឥឡូវនេះបាន និងកំពុងពង្រីកការផ្ទៀងផ្ទាត់ អ្នកប្រើប្រាស់មួយចំនួនទៀត ដែលមានអ្នកតាមដានច្រើន នៅសហរដ្ឋអាមេរិកផងដែរ។

ក្រុមហ៊ុនក៏បានផ្សព្វផ្សាយថា តទៅមុខទៀតនឹងមានការផ្ទៀងផ្ទាត់ អត្តសញ្ញាណរបស់បុគ្គល ដែលធ្លាប់មានអាកប្បកិរិយាឆបោក នៅលើបណ្តាញសង្គមហ្វេសប៊ុក និងការបង្ហោះរបស់ពួកគេ ត្រូវបានរីករាលដាលយ៉ាងឆាប់រហ័សទៀតផង ព្រោះក្រុមហ៊ុនចង់ឱ្យអ្នកប្រើប្រាស់មានជំនឿទុកចិត្តថា បុគ្គលដែលគេបានឃើញនៅលើហ្វេសប៊ុក ពិតជាមានបំណងផ្សព្វផ្សាយត្រឹមត្រូវប្រាកដមែន។

ប្រសិនបើនរណាម្នាក់ជ្រើសរើស មិនបញ្ជាក់អត្តសញ្ញាណរបស់ពួកគេ ឬអត្តសញ្ញាណប័ណ្ណមិនត្រូវគ្នា នឹងគណនីហ្វេសប៊ុក ដែលបានភ្ជាប់មកជាមួយនោះ ការបង្ហោះចែកចាយរបស់ពួកគេនឹងត្រូវបានកំណត់ ដូច្នេះមានតែចំនួនមនុស្សតិចតួចប៉ុណ្ណោះនឹងបានឃើញ ប៉ុន្តែប្រសិនបើវាជាផេកវិញនោះ អ្នកគ្រប់គ្រងនឹងពុំអាចផ្សព្វផ្សាយបានទៀតឡើយ។

ដំណើរការនៃការផ្ទៀងផ្ទាត់នេះ គឺជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់របស់ក្រុមហ៊ុនហ្វេសប៊ុក ដើម្បីបង្កើតគណនេយ្យភាពកាន់តែច្រើននៅលើហ្វេសប៊ុក និងកែលម្អបទពិសោធន៍ ក្នុងការប្រើប្រាស់របស់មនុស្ស នៅលើកម្មវិធីរបស់ហ្វេសប៊ុក។

ការផ្ទៀងផ្ទាត់អត្តសញ្ញាណនេះ ត្រូវបានអនុវត្តនៅសហរដ្ឋអាមេរិកមុនគេ ហើយអាចនឹងបន្តធ្វើនៅតាមបណ្តារប្រទេសផ្សេងៗទៀតក្នុងពេលអនាគត៕

ផ្លូវជាតិសំខាន់ៗចំនួន៤តភ្ជាប់ពីរាជធានីទាក់ទាញការវិនិយោគលើបុរី និងលំនៅដ្ឋានច្រើនជាងគេ

ដោយ ហ្សូលី

ភ្នំពេញៈ លំនៅដ្ឋានក្លាយផ្នែកសំខាន់និងមានតម្រូវការច្រើនជាងគេ បើប្រៀបធៀបទៅនឹងប្រភេទអចលនវត្ថុដទៃទៀត ដូចជា ដីធ្លី ខុនដូ ជាដើម។

ជាក់ស្តែងការវិនិយោគលើលំនៅដ្ឋានបច្ចុប្បន្ន បានរីកសាយភាយទៅកាន់តំបន់ជាយក្រុង ដោយហេតុថា ទីក្រុងភ្នំពេញមានកំណើនប្រជាជន និងតម្រូវការរស់នៅច្រើន។ នៅក្បែរតំបន់ផ្លូវជាតិចំនួន៣ខ្សែ ដែលកំពុងមានសន្ទុះកំណើននៃលំនៅដ្ឋាន។

ផ្លូវជាតិលេខ១

ផ្លូវជាតិលេខ១បាន និងកំពុងបន្តមានភាពរីកចម្រើនលឿនជាងគេ បន្ទាប់ពីផ្លូវនេះត្រូវបានស្ថាបនា និងពង្រីកចប់ដោយសារជំនួយរបស់ប្រទេសជប៉ុន។

ជាក់ស្តែងបុរីជជាច្រើន ពិសេសបុរីប៉េង ហួតដែលធំជាងគេ និងល្បីល្បាញជាងគេបានពង្រីកអាណាចក្រនៅតំបន់នេះ ជាមួយមជ្ឈមណ្ឌលកំសាន្តលំដាប់អន្តរជាតិយូរ៉ូ ផាក ផ្សារទំនើបPeng Hourt Eco Mall និងបុរីតូចៗជាច្រើនទៀតបាននិងកំពុងពង្រីកខ្លួនយ៉ាងសកម្ម និងបានពង្រីកដល់ទឹកដីស្រុកកៀនស្វាយ។ និន្នាការនៃការអភិវឌ្ឍនេះនឹងរីកសាយភាយដល់ស្ពានអ្នកលឿង នៅរយៈពេល៥ទៅ១០ឆ្នាំខាងមុខទៀត។

ផ្លូវជាតិលេខ ៦

តំបន់ជាប់ផ្លូវជាតិលេខ៦ មានភាពរីកចម្រើនជាគំហុក ទៅលើបុរីលំនៅដ្ឋាន ព្រោះនៅតំបន់នេះ មានស្ថានភាពអំណោយផល ទីតាំងភូមិសាស្ត្រងាយស្រួលចេញចូល មានស្ពានឆ្លងច្រើន និងមិនសូវជាមានការរំខាន់ច្រើនពីរថយន្តដឹកទំនិញធំៗ មានសុវត្ថិភាពសាកសមសម្រាប់ការធ្វើដំណើរ។

នាយិកាក្រុមហ៊ុនអចលនទ្រព្យ Amatak Property Service និងជាអ្នកជំនាញលើវិស័យអចលនទ្រព្យ អស់រយៈពេលជាច្រើនឆ្នាំ បានរៀបរាប់កាលពីពេលថ្មីៗនេះថា តំបន់ជាប់មាត់ផ្លូវជាតិលេខ៦នេះ មានការអភិវឌ្ឍលើវិស័យបុរី លំនៅដ្ឋានមិនតិចជាង ១០គម្រោងឡើយ។ សព្វថ្ងៃកំពុងមានការសាងសង់ជាបន្តបន្ទាប់។ ម្យ៉ាងតំបន់នេះមានគម្រោងអភិវឌ្ឍច្រើន មិនថាជាស្ថាប័នរដ្ឋ មជ្ឈមណ្ឌលពាណិជ្ជកម្ម សំណង់អគារធំៗ និង អគារខុនដូផងដែរ។

ផ្លូវជាតិលេខ ៣

បើតាមឱ្យដឹងពីរដ្ឋមន្ត្រីក្រសួងសាធារណការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល កាលពីពេលកន្លងមកនេះថា ការសាងសង់ពង្រីកកំណាត់ផ្លូវជាតិលេខ៣ បើតាមគម្រោងនឹងត្រូវបញ្ចប់នៅឆ្នាំ ២០២២ ប៉ុន្តែដោយសារការសាងសង់មានភាពរលូនល្អ ទើបអនុញ្ញាតឱ្យបញ្ចប់នៅចុងឆ្នាំ ២០២១ វិញ។

ដោយសារវឌ្ឍនភាពនៃផ្លូវជាតិមួយខ្សែនេះ បានបណ្តាលឱ្យក្រុមហ៊ុនអភិវឌ្ឍលំនៅដ្ឋានមួយចំនួន ចាប់អារម្មណ៍អំពីសក្តានុពលភូមិសាស្ត្រ ងាកមកវិនិយោគលើវិស័យលំនៅដ្ឋានកាន់តែច្រើន។

យោងតាមប្រសាសន៍របស់ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម ឱ្យដឹងថា ការវិនិយោគទាំងអស់នេះ គឺអ្នកអភិវឌ្ឍសុទ្ធតែបានសិក្សា ពីសក្តានុពលតំបន់យ៉ាងលម្អិត ម្យ៉ាងរាប់គិតពីចំនុចចោមចៅមក គឺមានតម្រូវការខ្ពស់ បន្ទាប់ពីផែនការអភិវឌ្ឍនិងពង្រីកក្រុងត្រូវបានអនុវត្ត។

ផ្លូវជាតិលេខ ៤

តំបន់ជាប់ផ្លូវជាតិនេះ កំពុងពង្រីកវិសាលភាពវិស័យ លំនៅដ្ឋានដោយហេតុថាតម្រូវការនៃការរស់នៅកាន់តែច្រើន និងចំនួនប្រជាជនកើនឡើងនៅតាមតំបន់នេះ។

អ្នកជំនាញអចលនទ្រព្យជាច្រើនរូបធ្លាប់បានពន្យល់ថា គ្រប់តំបន់ជាយក្រុងទាំងអស់ ក្នុងនោះតំបន់ក្បែរផ្លូវជាតិលេខ៤ផ្ទាល់ មានភាពលេចធ្លោដែលជាកត្តាទាក់ទាញគម្រោងអភិវឌ្ឍន៍នានា។ ភាគច្រើនលំនៅដ្ឋានក្បែរតំបន់នោះច្រើន តែជាលំនៅដ្ឋានកម្រិតមធ្យម ឬក្រោមមធ្យម សុទ្ធសឹងតែជាការផ្គត់ផ្គង់តាមតម្រូវការទីផ្សារ៕

សម្តេចតេជោអញ្ជើញទស្សនាវិមានស្កឹមស្កៃស្នាក់ការកណ្តាលរបស់បក្សនៅព្រឹកថ្ងៃនេះ

ដោយគង់ សូរិយា

ភ្នំពេញៈ សម្តេចតេជោហ៊ុន សែននាយករដ្ឋមន្ត្រីនៃកម្ពុជានៅព្រឹកថ្ងៃនេះ នឹងអញ្ជើញទស្សនា និងពិនិត្យស្ថានភាពការស្ថាបនា វិមានគណបក្សប្រជាជនកម្ពុជា ដែលមានតម្លៃ ៤០លានដុល្លារអាមេរិកនៅព្រឹកថ្ងៃទី៥ មិថុនានេះ។

អគារដ៏ធំស្កឹមស្កៃដែលមានរចនាបទខ្មែរដ៏ទាក់ទាញ និងប្រចាំទសវត្សរ៍នេះបាននិងកំពិងសាងសង់អស់ទឹកប្រាក់ ប៉ាន់ស្មានប្រហែលពី៣០ ទៅ៤០លានដុល្លារអាមេរិក។ អាគារទីស្នាក់ការកណ្តាលគណបក្សប្រជាជនកម្ពុជា ស្ថិតនៅតាមបណ្តោយវិថីព្រះនរោ ត្តម ក្នុងសង្កាត់ទន្លេបាសាក់ ខណ្ឌចំការមន។

អាគារថ្មីនៃទីស្នាក់កណ្តាលគណបក្សប្រជាជនកម្ពុជា ត្រូវបានសាងសង់ឡើងនៅលើផ្ទៃដីទីតាំងអគារចាស់ ដែលមានទំហំប្រមាណ៥,៤០០ម៉ែត្រក្រឡា និងមានកម្ពស់ចំនួន៦ជាន់។ អគារទីស្នាក់កណ្តាលគណបក្សប្រជាជនកម្ពុជា ដែលជាគណបក្សដឹកនាំរាជរដ្ឋាភិបាល ត្រូវបានសាងសង់ឡើង ជាមួយរចនាបថខ្មែរដ៏ល្អវិចិត្រ និងមានភាពល្អប្រណិត។ ពីខាងក្រៅអគារទាំងមូលត្រូវបានរំលេចទៅដោយពណ៌ស ដែលជានិមិត្តរូបនៃភាពស្មោះសបរិសុទ្ធសម្រាប់ជាតិ និងប្រជាជន។

អគារទីស្នាក់ការកណ្តាលគណបក្សប្រជាជនកម្ពុជា សាងសង់ជិតរួចរាល់ទាំងស្រុងហើយប្រមាណ៩៥ភាគរយ។ វត្តមានដ៏ឧត្តុងឧត្តម និងស្រស់ស្អាតនៃអគារទីស្នាក់ការកណ្តាលគណបក្សប្រជាជនកម្ពុជា ត្រូវបានរំលេចរូបរៀងឡើង ក្នុងគម្រប់ខួប៦៩ឆ្នាំថ្ងៃកំណើតគណបក្សប្រជាជនកម្ពុជា។

គណបក្សប្រជាជនកម្ពុជា ដែលចាប់បដិសន្ធិឡើងនៅថ្ងៃទី២៨ ខែមិថុនា ឆ្នាំ១៩៥១ បានក្លាយទៅជាគណបក្សនយោបាយមួយ ដែលបានបំពេញបេសកកម្មយ៉ាងសកម្មជាទីបំផុត ដើម្បីនាំមកនូវឧត្តមប្រយោជន៍សម្រាប់ជាតិកម្ពុជា។ ចាប់តាំងពីចាប់បដិសន្ធិគណបក្សប្រជាជនកម្ពុជា បានប្រកាន់ខ្ជាប់ជានិច្ចនូវគោលបំណង និងឧត្តមគតិរបស់ខ្លួន ដោយឈរនៅខាងប្រជាជនផ្សារភ្ជាប់រួមសុខទុក្ខជាមួយប្រជាជន ពុះពារជម្នះគ្រប់ឧបសគ្គ ហ៊ានធ្វើពលិកម្មឥតរុញរា ដើម្បីកម្ពុជា ឯករាជ្យ សន្ដិភាព សេរីភាព ប្រជាធិបតេយ្យ អព្យាក្រឹត្យ និងវឌ្ឍនភាពសង្គម។

ក្នុងកាលៈទេសៈដែលប្រទេសជាតិ ត្រូវធ្លាក់ក្នុងគ្រោះមហន្ដរាយប្រល័យពូជសាសន៍ ដែលរបបកម្ពុជាប្រជាធិបតេយ្យ បានបង្កឡើងចាប់ពីខែមេសា ឆ្នាំ១៩៧៥ គណបក្សប្រជាជនកម្ពុជា គឺជាកម្លាំងនយោបាយតែមួយគត់ ដែលបានក្រោកឈរតស៊ូហើយបានប្រមូលផ្ដុំរាល់កម្លាំងស្នេហាជាតិ បង្កើតឡើងរណសិរ្សសាមគ្គីសង្គ្រោះជាតិកម្ពុជា ដើម្បីបំផុស និងដឹកនាំចលនាប្រជាជននៅទូទាំងប្រទេស វាយផ្ដូលរំលំរបបដ៏យង់ឃ្នងនេះ។

ចាប់តាំងពីពេលវាយផ្តួលរំលំរបបប្រល័យពូជសាសន៍មក គណបក្សប្រជាជនកម្ពុជា ដែលមានសម្តេចធម្មពោធិ៍សាល ជា ស៊ីម, សម្តេចពញាចក្រី ហេង សំរិន និងសម្តេចតេជោ ហ៊ុន សែន ជាអគ្គមគ្គុទ្ទេសក៍ដ៏ឆ្នើមនោះ បាននាំមកជូនប្រជាជនវិញនូវសិទ្ធិសេរីភាព លទ្ធិប្រជាធិបតេយ្យ កិត្តិយស និងសេចក្ដីថ្លៃថ្នូររបស់មនុស្ស ដែលត្រូវបានបាត់បង់ទាំងស្រុងក្នុងរបបកម្ពុជាប្រជាធិបតេយ្យ៕

ចំណេះដឹង! តើអ្វីជាមូលនិធិពាណិជ្ជកម្ម?

ដោយៈ វុត្ថា

ភ្នំពេញៈ មូលនិធិពាណិជ្ជកម្ម គឺជាសញ្ញាណគតិយុត្តមួយ នៃការប្រកបពាណិជ្ជកម្ម ដោយសារតែវាជាផ្នែកមួយនៃបេតិកភណ្ឌ ឬស្ថិនៅក្នុងបញ្ជីសារពើភណ្ឌរបស់សហគ្រាស ពាណិជ្ជកម្ម ដែលជាហេតុនាំឱ្យមូលនីធិពាណិជ្ជកម្ម ក្លាយទៅជាកម្មវត្ថុនៅក្នុងការសិក្សានៃវិជ្ជាជីវៈពាណិជ្ជកម្ម។

មូលនិធិពាណិជ្ជកម្ម ត្រូវបានកើតចេញពីពួកពាណិជ្ជករ នៅសតវត្សរ៍ទី១៩ ដែលកាលពីមុនមកគេ បានហៅថាជាហាងទំនិញ ឬមូលនីធិហាងទំនិញ។ មូលនិធិនេះ មានតម្លៃសេដ្ឋកិច្ច និងទ្រព្យកម្មសិទ្ធិជាពិសេស ចាប់តាំងពីសតវត្សទី១៩មកម្ល៉េះ ពីព្រោះ បច្ចុប្បន្នសញ្ញាណនេះ មានធាតុជាចម្បង គឺអតិថិជនសម្រាប់អ្នកបង្កើត ទំនងជាមិនយកលំនាំតាមវិជ្ជាជីវៈមុខរបរនោះទេ ព្រោះដោយហេតុថា មូលនីធិពាណិជ្ជកម្ម ត្រូវបានផ្សំឡើងពីបណ្តាធាតុផ្សេងៗមានចលនវត្ថុ និងអចលនវត្ថុ ដែលពាណិជ្ជករ ក្រុមឧស្សាហករ បានរៀបចំឡើងដើម្បីស្វែងរកអតិថិជន។

តើសញ្ញាណរបស់មូលនិធិពាណិជ្ជកម្មមានអ្វីខ្លះ និងប្រតិបត្តិការគតិយុត្តរបស់មូលនីធិនោះធ្វើឡើងយ៉ាងដូចម្ត៉េច? ។

សញ្ញាណនៃមូលនីធិពាណិជ្ជកម្ម គឺជាសំណុំនៃរូបទ្រព្យ ឬអរូបទ្រព្យដែលពាណិជ្ជករម្នាក់ ឬក្រុមហ៊ុនមួយប្រមូលផ្តុំ និងប្រើប្រាស់ដើម្បីសម្មតិកម្ម នូវសកម្មភាពឧស្សាហកម្ម ឬពាណិជ្ជករ ដើម្បីបំពេញនូវសេចក្តីត្រូវការរបស់អតិថិជនមួយ ក្នុងមូលនីធិពាណិជ្ជកម្ម។ ដោយគ្មាននិយមន័យ ដែលកំណត់ដោយច្បាប់មូលនិធិពាណិជ្ជកម្ម ត្រូវបានកំនត់ដោយ សមាសភាពរបស់ខ្លួន ដែលក្នុងនោះមាន អតិថិតាចម្បង ដូច្នេះមូលនីធិពាណិជ្ជកម្ម ត្រូវបានបង្កើតឡើងដោយចលនទ្រព្យ ដែលពាណិជ្ជករម្នាក់ ឬឧស្សាហករណាម្នាក់រៀបចំឡើង ដើម្បីស្វែរកអតិថិតា។

ក្នុងនោះគេឃើញមានវិបាកមួយចំនួន បានលេចឡើង រួមមាន មូលនីធិពាណិជ្ជកម្មត្រូវជាប់ទាក់ទង និងសកម្មភាពពាណិជ្ជកម្ម ដើម្បីអនុវត្តនៅ សកម្មភាពពាណិជ្ជកម្មមួយបានចាំបាច់ត្រូវមានមូលនីធិពាណិជ្ជកម្មមួយ ហើយសញ្ញាណនេះត្រូវតែខុសប្លែកគ្នា ពីសញ្ញាណសហគ្រាស និងសញ្ញាណរបស់ក្រុមហ៊ុន។

ដោយឡែក សហគ្រាសគឺជាស្ថាប័នស្វយ័តមួយ ដែលប្រមូលផ្តុំដោយកត្តាមនុស្ស និងកត្តាសេដ្ឋកិច្ចដើម្បី ផលិតទ្រព្យ និងសេវាកម្ម។ ដូច្នេះសញ្ញាណនៃសហគ្រាសនេះមានលក្ខណៈទូលំទូលាយជាង សញ្ញាណនៃមូលនីធិពាណិជ្ជកម្ម។ ពាណិជ្ជករដែលដឹកនាំសហគ្រាសឯកបុគ្គល មួយអាចប្រើប្រាស់ បុគ្គលិកបាន ហើយជាញឹកញាប់មានមូលនីធិពាណិជ្ជកម្មតែមួយគត់ និងសហគ្រាសធំៗ អាចមានមូលនីធិពាណិជ្ជកម្មច្រើនខុសៗពីគ្នា។

ចំណែកឯក្រុមហ៊ុនបុគ្គលភាពគតិយុត្ត មានបេតិកភណ្ឌ នាមករណ៍ ទីស្នាក់ការក្រុមហ៊ុន សញ្ជាតិ ដូច្នេះក្រុមហ៊ុនគឺជាប្រធាននៃសិទ្ធិ និងកាតព្វកិច្ច៕

រោងចក្រផលិតអគ្គិសនី កម្លាំង៣០មេហ្គាវ៉ាត់ នៅខេត្តបន្ទាយមានជ័យ នឹងដាក់ប្រើប្រាស់ត្រឹមខែតុលាខាងមុខនេះ

ដោយ ៖ រ៉ាណេត

បន្ទាយមានជ័យ ៖ ដោយទទួលបានការអនុញ្ញាតពីរាជរដ្ឋភិបាល ខេត្តបន្ទាយមានជ័យ ទទួលបានអាជ្ញាប័ណ្ណផលិតប្រភពថាមពលកកើតឡើងវិញ គឺជាថាមពលដើរដោយពន្លឺព្រះអាទិត្យមានអនុភាព ៣០មេហ្គាវ៉ាត់ គ្រោងនឹងដាក់ដំណើរការប្រើប្រាស់នៅត្រឹមអំឡុងខែតុលា ឆ្នាំ២០២០ ខាងមុខនេះ ដែលអាចជួយកាត់បន្ថយការទិញអគ្គិសនីពីប្រទេសថៃ។

អភិបាលខេត្តបន្ទាយមានជ័យ លោក អ៊ុ រាត្រី បានមានប្រសាសន៍នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្ត នៅទីស្ដីការគណៈរដ្ឋមន្ត្រី ថ្ងៃទី៤ ខែមិថុនា ឆ្នាំ២០២០ថា នៅត្រឹមអំឡុងខែតុលា ឆ្នាំ២០២០ខាងមុខ រោងចក្រផលិតថាមពលអគ្គិសនីដើរដោយពន្លឺព្រះអាទិត្យ វិនិយោគដោយក្រុមហ៊ុន Ray Power Supply Co., Ltd ក្នុងទំហំទឹកប្រាក់ចំនួន ២៨,៨លានដុល្លារ ដែលមានទីតាំងស្ថិតនៅភូមិសំរោងធំ ភូមិឬស្សីកណ្តាល ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ នឹងត្រូវដាក់ឱ្យប្រើប្រាស់ជាផ្លូវការ។

លោកបានមានប្រសាសន៍បញ្ជាក់ថា “បច្ចុប្បន្ន បរិមាណថាមពលសម្រាប់ប្រើប្រាស់នៅទូទាំងខេត្តបន្ទាយមានជ័យគឺមានរហូតដល់១០០មេហ្គាវ៉ាត់ ដែលមានការផ្គត់ផ្គង់២ប្រភពផ្សេងគ្នា គឺប្រភពក្នុងស្រុក (បណ្តាញជាតិ) និងប្រភពពីប្រទេសថៃ ដែលមានអាជ្ញាប័ណ្ណអគ្គិសនីចំនួន២៣ ផ្គត់ផ្គង់ចំនួន ៦៤៥ភូមិ ស្មើនឹងប្រមាណ៩៨ភាគរយនៅទូទាំងខេត្ត”។

លោកអភិបាលខេត្តបានបន្តទៀតថា “ជាមួយនឹងការបើកដំណើរការប្រើប្រាស់ និងផ្គត់ផ្គង់ថាមពលអគ្គិសនីរបស់រោងចក្រផលិតថាមពលកើតឡើងវិញនេះ នឹងលក់ទៅឱ្យអាជ្ញាធរអគ្គិសនីកម្ពុជា (EDC) ដើម្បីធ្វើការចែកចាយនៅក្នុងតំបន់តាមរយៈសេវាកររបស់ខ្លួនដែលមានអាជ្ញាប័ណ្ណត្រឹមត្រូវ និងស្ថិតនៅក្នុងលក្ខខណ្ឌនៃច្បាប់ដែលបានកំណត់”។

បច្ចុប្បន្ននេះ នៅក្នុងបរិមាណថាមពលអគ្គិសនីដែលមានតម្រូវការនៅក្នុងខេត្តបន្ទាយមានជ័យសរុបប្រមាណ១០០មេហ្គាវ៉ាត់ បានចែកចាយទៅដល់អតិថិជនគោលដៅដែលកំពុងប្រើប្រាស់មានចំនួន ១៣៧ ៧៣៩ គ្រួសារ ក្នុងចំណោម ១៩១ ៧២៣គ្រួសារសរុបនៅទូទាំងខេត្ត ស្មើនឹងប្រមាណ ៧២ភាគរយ៕

កម្ពុជានឹងបន្តចរចារលើកទី៣ លើកិច្ចព្រមព្រៀងពាណិជ្ជកម្មសេរីកម្ពុជា-ចិន នៅសប្តាហ៍ក្រោយនេះ

ដោយវុត្ថា

ភ្នំពេញៈ តាមការគ្រោងទុក រាជរដ្ឋាភិបាលកម្ពុជា គ្រោងនឹងបន្តចរចារលើកទី៣ លើកិច្ចព្រមព្រៀងពាណិជ្ជកម្មសេរី កម្ពុជា–ចិននាថ្ងៃទី៩ ខែមិថុនា ឆ្នាំ២០២០ នៅសប្តាហ៍ក្រោយនេះ ខណៈតាមផែននការនឹងបញ្ចប់ការចរចា និងចុះហត្ថលេខា នៅដំណាច់ឆ្នាំ ២០២០នេះ។

នេះបើយោងតាមលទ្ធផលនៃកិច្ចប្រជុំពិគ្រោះយោបល់ ផ្តល់ និងទទួលព័ត៌មាន ជាមួយវិស័យឯកជនលើការចរចារ លើការបង្កើតកិច្ចព្រមព្រៀងពាណិជ្ជកម្មសេរីកម្ពុជា–ចិន កាលពីថ្ងៃទី៣ ខែមិថុនា ឆ្នាំ២០២០ នៅទីស្តីការក្រសួងពាណិជ្ជ ដែលដឹកនាំដោយ លោកសុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម។

កិច្ចប្រជុំនេះត្រូវបានរៀបចំឡើង ក្នុងគោលបំណងចម្បងគឺប្រមូលធាតុចូល ពីភាគីពាក់ព័ន្ធនានា ក្នុងវិស័យឯកជន ដើម្បីជាជំនួយស្មារតីនិងគំនិតយោបល់បន្ថែម ដល់ក្រុមការងារចរចារ ក្នុងការរៀបចំត្រៀមលើកឡើង ក្នុងកិច្ចចរចារលើកទី៣ លើកិច្ចព្រមព្រៀងពាណិជ្ជកម្មសេរី កម្ពុជា–ចិន នាថ្ងៃទី០៩ ខែមិថុនា ឆ្នាំ២០២០ នាពេលខាងមុខតាមការគ្រោងទុក។

កិច្ចព្រមព្រៀងពាណិជ្ជកម្មសេរីកម្ពុជា–ចិននេះ ត្រូវបានបង្កើតឡើងក្នុងគោលបំណងពង្រីកការធ្វើពាណិជ្ជកម្ម វិនិយោគ សេវា និងកិច្ចសហប្រតិបត្តិការ កាន់តែស៊ីជម្រៅ រវាង ប្រទេសទាំងពីរ ក្រោមផ្ដួចផ្ដើមគំនិតដោយសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងលោក លី គឺជាំង នាយករដ្ឋមន្ត្រីចិន។

បន្ថែមពីនេះ កិច្ចព្រមព្រៀងនេះ ក៏បានបង្ហាញអំពីការគិតគូរ និងការយកចិត្តទុកខ្ពស់ របស់ថ្នាក់ដឹកនាំទាំងពីរ លើការលើកកម្ពស់ជីវភាពប្រជាពលរដ្ឋ នៃប្រទេសទាំងពីរ តាមរយៈការជំរុញពាណិជ្ជកម្ម និងបង្កើតឱកាសការងារ។ កិច្ចព្រមព្រៀងនេះ នឹងផ្តល់ឲ្យកម្ពុជានូវភាពកាន់តែសំបូរបែប ក្នុងការនាំចេញផលិតផលរបស់ខ្លួន ទៅទីផ្សាររបស់ចិនទាំងបរិមាណ និងមុខទំនិញ តាមរយៈការផ្តល់នូវការអនុគ្រោះពន្ធប្រសើរជាងមុន។

ម្យ៉ាងវិញវិញទៀតកិច្ចព្រមព្រៀងនេះ ក៏នឹងធ្វើឲ្យប្រសើរឡើងនូវកិច្ចសម្រួលពាណិជ្ជកម្ម តាមរយៈការជួយសម្រួល និងកាត់បន្ថយបែបបទ នីតិវិធី និងវិធានការនានា ដែលមិនចាំបាច់ និងធ្វើឲ្យរាំងស្ទះ ដល់លំហូរពាណិជ្ជកម្មទំនិញ។

កិច្ចព្រមព្រៀងនេះ នឹងចូលរួមចំណែកបង្កលក្ខណៈងាយស្រួល ដល់វិនិយោគិនដែលមានស្រាប់ ក្នុងការពង្រឹកប្រតិបត្តិការរបស់ខ្លួន និងទាក់ទាញវិនិយោគថ្មីៗ បន្ថែមទៀតមកកម្ពុជា ដែលនឹងបង្កើតការងារថ្មី បន្ថែមជូនប្រជាពលរដ្ឋ តាមរយៈការកែលម្អ កិច្ចការពាក់ព័ន្ធនឹងការជំរុញ និងសម្រួលវិនិយោគ។

កត្តាទាំងអស់នេះ នឹងចូលរួមចំណែកនៅក្នុងការអភិវឌ្ឍន៍ និងទ្រទ្រង់កំណើនសេដ្ឋកិច្ចជាតិក៏ដូចជាពន្លឿនដំណើរការ នៃការធ្វើសមារហណកម្មសេដ្ឋកិច្ចកម្ពុជា ទៅក្នុងតំបន់ និង សកលលោក។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា និង លោកលី គឺជាំង នាយករដ្ឋម ន្ត្រីចិន ក្នុងជំនួបទ្វេភាគី កាលពីថ្ងៃទី២០–២៣ ខែមករា ឆ្នាំ២០១៩ នៅទីក្រុងប៉េកាំង បានសម្រេចឱ្យមានការសិក្សា ពីលទ្ធភាពបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា–ចិន ដើម្បីពង្រីកការធ្វើពាណិជ្ជកម្មវិនិយោគ សេវា និងកិច្ចសហប្រតិបត្តិការឱ្យកាន់តែស៊ីជម្រៅជាងមុន សំដៅសម្រេចឱ្យបានគោលដៅ ពាណិជ្ជកម្មសរុបចំនួន១០ពាន់លានដុល្លារអាមេរិកនៅឆ្នាំ២០២៣ តាមការកំណត់៕

អាជ្ញាធរកំពុងសិក្សាពីផងប៉ះពាល់លើគម្រោងសាងសង់ផ្លូវតាមបណ្ដោយឆ្នេរ សមុទ្រខេត្តកំពត

ដោយៈ រ៉ាណេត

កំពតៈ គម្រោងសាងសង់ផ្លូវមួយខ្សែ នៅតាមតំបន់បណ្តោយឆ្នេរសមុទ្រខេត្តកំពត នឹងត្រូវចាប់ផ្តើមសាងសង់ក្នុងពេលដ៏ខ្លីខាងមុខនេះ ជាមួយការយកចិត្តទុកដាក់ទៅលើការដោះស្រាយពីផលប៉ះពាល់នានា នៅក្នុងគម្រោងស្ថិតនៅឃុំព្រែកត្នោត ស្រុកទឹកឈូ ខេត្តកំពត។

អភិបាលខេត្តកំពត លោក ជាវ តាយ បានមានប្រសាសន៍នៅព្រឹកថ្ងៃទី៤ ខែមិថុនា ឆ្នាំ២០២០ ក្នុងកិច្ចប្រជុំស្ដីពីការពិនិត្យ ពិភាក្សា និងសិក្សាផលប៉ះពាល់លើគម្រោងការសាងសង់ផ្លូវមួយខ្សែ ដែលមានទីតាំងដូចបានបញ្ជាក់ខាងលើនេះថា គម្រោងសាងសង់ផ្លូវនេះនៅពេលសាងសង់រួច គឺជាផ្លូវមានសារៈសំខាន់ នាំមកផលប្រយោជន៍ដល់សាធារណៈទូទៅជាច្រើន។

លោកបានបញ្ជាក់ថា “តាមរយៈផ្លូវមួយខ្សែនេះ នឹងផ្តល់ផលប្រយោជន៍ដល់ប្រជាពលរដ្ឋក្នុងមូលដ្ឋាន ក៏ដូចជាយុទ្ធសាស្ត្រ នៃរនាំងការពារ ដីឆ្នេរនិងព្រៃកោងកាង មាត់សមុទ្រពីការរំលោភបំពាននានា”។ លោកបន្តថា “មិនតែប៉ុណ្ណោះក៏នាំមកនូវជាហេដ្ឋារចនាសម្ព័ន្ធដែលជាសក្ដសនុពល បម្រើដល់វិស័យទេសចរណ៍ សម្រាប់បង្កើនជីវភាពសេដ្ឋកិច្ចគ្រួសារដល់ប្រជាពលរដ្ឋក្នុងសហគមន៍នេសាទ នៅតំបន់នោះទៀតផង”។

លោកអភិបាលខេត្តបានមានប្រសាសន៍បន្តថា ការងារអភិវឌ្ឍន៍អ្វីមួយ ត្រូវមានការចូលរួមគិត ចូលរួមធ្វើ ចូលរួមទទួលខុសត្រូវ នឹងចូលរួមទទួលផលប្រយោជន៍ទាំងអស់គ្នា ក្នុងនោះគឺការផ្ដល់ផលប្រយោជន៍ដល់សាធារណជនទូទៅ ជាពិសេសប្រជាពលរដ្ឋនៅក្នុងមូលដ្ឋានសហគមន៍នៃតំបន់អភិវឌ្ឍន៍នេះ។ លោកបានបន្តទៀតថា “បញ្ហាផ្លូវ គឺជាការងារអាទិភាព ក្នុងវិស័យអាទិភាពមួយចំនួន នៃគោលនយោបាយរបស់រាជរដ្ឋាភិបាល មានផ្លូវមានក្ដីសង្ឃឹម នេះផ្អែកតាមចក្ខុវិស័យ ដឹកនាំប្រទេសជាតិរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជាយើង។ គម្រោងអភិវឌ្ឍន៍អ្វីមួយ ត្រូវតែមានការចូលរួមមតិយោបល់ពីជំនាញ អាជ្ញាធរនិងប្រជាពលរដ្ឋមូលដ្ឋាន អំពីផលប្រយោជន៍ វិជ្ជមាននិងអវិជ្ជមាន។

នៅក្នុងកិច្ចប្រជុំខាងលើនេះ រដ្ឋបាលខេត្តក៏បានបញ្ជាក់ប្រាប់ក្រុមមន្ត្រីជំនាញ និងអាជ្ញាធរមូលដ្ឋាន មុនពេលចាប់ដំណើរការគម្រោងសាងសង់ផ្លូវនេះ ត្រូវជួបជាមួយប្រជាពលរដ្ឋតាមរយៈអង្គការសាធារណៈ សំដែងការចូលរួមគាំទ្រ ក្នុងការទទួលផលប្រយោជន៍ពីផ្លូវនេះ ហើយក៏ត្រូវលើកជាប៉ាណូផ្សាយឲ្យបានទូលំទូលាយ សាងក្នុងការដ្ឋានសាងសង់ជៀសវាងការយល់ច្រឡំ ពីមតិសាធារណជនវាយតម្លៃពីភាព អវិជ្ជមានណាមួយមកលើអាជ្ញាធរមូលដ្ឋាន និងខេត្តក៏ដូចជាមន្ត្រីជំនាញគ្រប់គ្រងនៃតំបន់នោះផងដែរ៕

តើលោកJoe Bidenជាអ្នកណា? ខណៈលោកត្រូវបានព្យាករណ៍ថានឹងក្លាយជាប្រធានាធិបតីអាមេរិកនៅអាណត្តិក្រោយ

ដោយម៉ាណេត

ភ្នំពេញៈ ការបោះឆ្នោតប្រធានាធិបតីសហរដ្ឋអាមេរិក នឹងធ្វើឡើងនៅកំឡុងខែវិច្ឆិកាខាងមុខនេះ ហើយបេក្ខភាពប្រធានាធិបតីមកពីគណបក្សប្រជាធិបតេយ្យ លោកJoe Bidenត្រូវបានគេមើលឃើញថា ទំនងជាមានលទ្ឋភាពក្លាយជាប្រធានាធិបតីអាមេរិកអាណត្តិក្រោយ បន្ទាប់ពីលោកDonald J Trump ដែលជាប្រជានាធិបតីដ៏ចម្រូងចម្រាស់មួយរូបរបស់អាមេរិក។

តើលោកJoe Bidneជាអ្នកណា? លោក Joe Biden (ឈ្មោះពេញ Joseph Robinette Biden Jr) កើតនៅថ្ងៃទី ២០ ខែវិច្ឆិកាឆ្នាំ ១៩៤២) គឺជាអ្នកនយោបាយអាមេរិក ដែលបានបម្រើការជាអនុប្រធានាធិបតីទី៤៧ របស់សហរដ្ឋអាមេរិកពីឆ្នាំ ២០០៩ ដល់ឆ្នាំ២០១៧ និងបានធ្វើជាតំណាងឱ្យរដ្ឋDelaware រនៅព្រឹទ្ធសភាអាមេរិកពីឆ្នាំ ១៩៧៣ ដល់ ២០០៩។

ជាសមាជិកម្នាក់ នៃគណបក្សប្រជាធិបតេយ្យ លោកBiden គឺជាបេក្ខជនដែលបានតែងតាំងជាអ្នកតំណាងបក្សប្រជាធិបតេយ្យ ដើម្បីឈរឈ្មោះជាប្រធានាធិបតីនៅក្នុងការបោះឆ្នោតឆ្នាំ២០២០។ លោកមិនទទួលបានជោគជ័យ ក្នុងការតែងតាំងប្រធានាធិបតីប្រជាធិបតេយ្យនៅឆ្នាំ១៩៨៨ និងឆ្នាំ ២០០៨ នោះទេ។

លោក Biden ត្រូវបានចិញ្ចឹមបីបាច់នៅទីក្រុង Scranton រដ្ឋ Pennsylvania និងទីក្រុងNew Castle County រដ្ឋ Delaware។ គាត់បានសិក្សានៅសាកលវិទ្យាល័យUniversity of Delaware មុនពេលគាត់បានទទួលសញ្ញាប័ត្រច្បាប់ ពីសាកលវិទ្យាល័យSyracuse University។

លោកបានក្លាយជាមេធាវីនៅឆ្នាំ១៩៦៩ ហើយត្រូវបានជាប់ឆ្នោតជាសមាជិកក្រុមប្រឹក្សាNew Castle County Council នៅឆ្នាំ ១៩៧០។ លោកJoe Biden ត្រូវបានជ្រើសរើសជាថ្មីចំនួន៦ដង និងជាសមាជិកព្រឹទ្ធសភាជាន់ខ្ពស់បំផុតទី៤ នៅពេលដែលគាត់បានលាលែងពីតំណែង ដើម្បីកាន់តំណែងជាអនុប្រធានាធិបតីនៅឆ្នាំ ២០០៩។

ក្នុងឆ្នាំ ២០០៨ លោក Biden ជាដៃគូរបស់បេក្ខជនប្រធានាធិបតី ប្រធានាធិបតេយ្យ លោកបារ៉ាក់ អូបាម៉ា។ ក្នុងនាមជាអនុប្រធានាធិបតី លោកបានត្រួតពិនិត្យការចំណាយហេដ្ឋារចនាសម្ព័ន្ធ ដើម្បីប្រឆាំងនឹងវិបត្តិសេដ្ឋកិច្ចដ៏ធំធេង និងជួយរៀបចំគោលនយោបាយអាមេរិកឆ្ពោះទៅអ៊ីរ៉ាក់ តាមរយៈការដកកងទ័ពអាមេរិកក្នុងឆ្នាំ២០១១។

ការចរចាររបស់លោកជាមួយ សមាជិកសភាសាធារណរដ្ឋ បានជួយរដ្ឋបាល លោក អូបាម៉ា អនុម័តច្បាប់រួមមានការបន្ធូរបន្ថយពន្ធ ការធានារ៉ាប់រងភាពគ្មានការងារធ្វើឡើងវិញនិង ច្បាប់បង្កើតការងារឆ្នាំ២០១០ ដែលបានដោះស្រាយការជាប់ពន្ធ។ ច្បាប់ត្រួតពិនិត្យថវិកាឆ្នាំ២០១១ ដែលបានដោះស្រាយវិបត្តិបំណុលឆ្នាំនោះ និងច្បាប់ផ្តល់ជំនួយដល់អ្នកជាប់ពន្ធអាមេរិកឆ្នាំ២០១២ ដែលបានដោះស្រាយអំពីសារពើពន្ធ ដែលជិតមកដល់។ លោកអូបាម៉ា និងលោក Biden ត្រូវបានជ្រើសរើសជាថ្មីក្នុងឆ្នាំ ២០១២។

នៅខែតុលាឆ្នាំ ២០១៥ បន្ទាប់ពីមានការសង្ស័យជាច្រើនខែ លោក Biden បានប្រកាសថា លោកនឹងមិនស្វែងរកតំណែងប្រធានាធិបតី នៅក្នុងការបោះឆ្នោតឆ្នាំ ២០១៦ ទេ។ នៅខែមករាឆ្នាំ ២០១៧ លោកអូបាម៉ា បានប្រគល់មេដាយសេរីភាពប្រធានាធិបតី ដល់លោក។ បន្ទាប់ពីបញ្ចប់អាណត្តិទីពីររបស់លោក ជាអនុប្រធានាធិបតី លោក Biden បានចូលរួមជាមួយមហាវិទ្យាល័យ នៃសាកលវិទ្យាល័យ Pennsylvania ជាកន្លែងដែលលោក ត្រូវបានគេដាក់ឈ្មោះជាសាស្រ្តាចារ្យបេBenjamin Franklin នៃការអនុវត្តប្រធានាធិបតី។

លោកបានប្រកាសបេក្ខភាពជាប្រធានាធិបតី របស់លោកនៅឆ្នាំ២០២០ នៅថ្ងៃទី ២៥ ខែមេសាឆ្នាំ ២០១៩ ដោយចូលរួមជាមួយបេក្ខជនប្រជាធិបតេយ្យជាច្រើន ដើម្បីស្វែងរកការតែងតាំងគណបក្ស។

ពេញមួយឆ្នាំ ២០១៩ លោកត្រូវបានគេចាត់ទុកជាអ្នកនាំមុខជួរមុខ របស់គណបក្ស។ លោក Biden បានបន្តឈ្នះ១៨ ក្នុងចំណោមការប្រកួតប្រជែងចំនួន ២៦ លើកបន្ទាប់។ លោក Biden បានក្លាយជាបេក្ខជន ដែលមិនគិតទុកជាមុនរបស់គណបក្សប្រជាធិបតេយ្យសម្រាប់ការបោះឆ្នោតប្រធានាធិបតី៕

ប័ណ្ណកម្មសិទ្ឋដីធ្លីជាង១៦ម៉ឺនត្រូវបានផ្តល់ជូនប្រជាពលរដ្ឋខេត្តបន្ទាយមានជ័យ

ដោយ ៖ រ៉ាណេត

បន្ទាយមានជ័យៈ អនុលោមតាមវិធានការ និងគោលនយោបាយរបស់រដ្ឋាភិបាល ដែលបានដាក់ចេញដោយក្រសួងរៀបចំដែនដី នគរូបនីយកម្ម និងសំណង់ សម្រាប់ខេត្តបន្ទាយមានជ័យបានរៀបចំ និងគ្រប់គ្រងលើការចុះបញ្ជីដីធ្លី បានជាង១៦ម៉ឺនប័ណ្ណមានលក្ខណៈជាប្រព័ន្ធ និងការចុះបញ្ជីដីធ្លីដាច់ដោយដុំមានចំនួនជិត៨ពាន់ក្បាលដី។

អភិបាលខេត្តបន្ទាយមានជ័យ លោក អ៊ុំ រាត្រី បានមានប្រសាសន៍នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅបន្ត នៅទីស្ដីការគណរដ្ឋមន្ត្រី កាលពីព្រឹកថ្ងៃទី៤ ខែមិថុនា ឆ្នាំ២០២០ថា ការចុះបញ្ជីដីធ្លីមានលក្ខណៈជាប្រព័ន្ធ រហូតដល់ឆ្នាំ២០១៩ សម្រេចបាន១៦១,៣៣៥ ប័ណ្ណ ហើយការចុះបញ្ជីដីធ្លី មានលក្ខណៈដាច់ដោយដុំរហូតដល់ឆ្នាំ២០១៩ សម្រេចបាន៧ ៩២២ប័ណ្ណ។

លោកបានបញ្ជាក់ទៀតថា “រហូតមកដល់ឆ្នាំ២០២០នេះ ការចុះបញ្ជីដីធ្លីមានលក្ខណៈជាប្រព័ន្ធអនុវត្តលើ៥ស្រុក ក្រុងមានមង្គលបូរី ព្រះនេត្រព្រះ សិរីសោភ័ណ ប៉ោយប៉ែត និងភ្នំស្រុក ប្រមូលបញ្ចូល និងគូសក្បាលដីចំនួន៣៤.៤៣១ក្បាលដី”។

លោកអភិបាលខេត្តបានបញ្ជាក់ទៀតថា ជាមួយនឹងការងារគ្រប់គ្រង និងរៀបចំដែនដីនេះ រដ្ឋបាលខេត្តបានប្រកាសតំបន់វិនិច្ឆ័យចំនួន២៩ភូមិ និងបញ្ចប់ការបិទផ្សាយជាសាធារណៈនូវឯកសារ នៃការវិនិច្ឆ័យ៣៧ភូមិ ស្មើនឹង៤១.១៣៤ក្បាលដី រួមជាមួយនឹងការចែកវិញ្ញាបនប័ត្រសម្គាល់សិទ្ធិអចលនវត្ថុ ជូនប្រជាពលរដ្ឋ២៥.១៦៧ប័ណ្ណ លើ៣១.០៧១ប័ណ្ណដែលបានចុះហត្ថលេខារួច ការចុះបញ្ជីដីធ្លីដាច់ដោយដុំបានចំនួន១.៩២៣ប័ណ្ណ”។

សម្រាប់ករណីវិវាទដីធ្លីមានចំនួន២២៨ករណី ស្ថិតក្នុងដៃគណៈកម្មការសុរិយោដីក្រុង ស្រុក ខេត្ត៨៧ករណីបានបញ្ចប់ ៣ករណ កំពុងដោះស្រាយ៨៤ ។ ដោះស្រាយក្រៅយន្តការសុរិយោដី៨២ករណី ក្នុងនោះបណ្តឹងស្ថិតក្នុងសមត្ថកិច្ច ក្រុមការងារចម្រុះខេត្តកំពុងដោះស្រាយ៥៥ករណី និងផ្ទេរជូនអង្គភាពពាក់ព័ន្ធ២៧ករណី ។

ការដោះស្រាយវិវាទដីធ្លី ក្រៅយន្តការគណៈកម្មការសុរិយោដី ក្នុងរបាយការណ៍ក្រសួងរៀបចំដែនដី នគរូបនីយកម្ម និងសំណង់ ចំនួន៥៩ករណី៕