រាជរដ្ឋាភិបាល ស្នើដល់ក្រសួង និងស្ថាប័នរដ្ឋទាំងអស់កាត់បន្ថយការចំណាយពាក់កណ្តាលសម្រាប់ឆ្នាំ២០២១

ដោយ ៖ គង់ ម៉ាលីន

ភ្នំពេញ ៖ រាជរដ្ឋាភិបាលកម្ពុជា បានស្នើ និងធ្វើការណែនាំដល់បណ្តាក្រសួង ស្ថាប័នរដ្ឋទាំងអស់ត្រូវព្យាយាមកាត់បន្ថយការចំណាយនានាឱ្យបានកាន់តែច្រើននៅក្នុងឆ្នាំ២០២១ ខាងមុខនេះ ពោលគឺឱ្យនៅសល់ត្រឹមពាក់កណ្តាលធៀបទៅនឹងឆ្នាំកន្លងទៅ។

រដ្ឋលេខាធិការប្រចាំការក្រសួងសេដ្ឋកិច្ចនិងហិរញ្ញវត្ថុ លោក វង្សី វិស្សុត បានមានប្រសាសន៍ថា សម្រាប់ការគ្រប់គ្រងថវិការបស់រដ្ឋសភានៅក្នុងឆ្នាំ២០២១ខាងមុខនេះ គឺមានភាពប្រែប្រួលខុសគ្នាកាលពីឆ្នាំកន្លងទៅ។ ជាមួយគ្នានេះ រាជរដ្ឋាភិបាល ក៏បានធ្វើការណែនាំដល់ក្រសួង និងស្ថាប័នរដ្ឋទាំងអស់ ត្រូវធ្វើការកាត់បន្ថយការចំណាយរបស់ខ្លួនឱ្យនៅត្រឹមពាក់កណ្តាលធៀបនឹងឆ្នាំកន្លងទៅ។

ការលើកឡើងខាងលើនេះត្រូវបានធ្វើឡើងនៅក្នុងប្រជុំពិភាក្សាគ្នានាពេលថ្មីៗកន្លងមកអំពីការគ្រប់គ្រងថវិការបស់រដ្ឋសភាសម្រាប់ឆ្នាំ២០២១ របស់គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ដឹកនាំដោយលោកកិត្តិសេដ្ឋាបណ្ឌិត ជាម យៀប ប្រធានគណៈកម្មការ និងមន្ត្រីជំនាញនៃអគ្គលេខាធិការដ្ឋានរដ្ឋសភាដឹកនាំដោយ លោក ឡេង ប៉េងឡុង អគ្គលេខាធិការរដ្ឋសភា។

លោក វង្សី វិស្សុត បានបញ្ជាក់ថា “មូលហេតុដែលតម្រូវឱ្យមានការកាត់បន្ថយការចំណាយនេះ គឺដោយសារការឆ្លងរីករាលដាល នៃជំងឺ Covid-19 បានធ្វើឱ្យ សេដ្ឋកិច្ចកម្ពុជារងផលប៉ះពាល់យ៉ាងខ្លាំងលើការប្រមូលចំណូលចូលថវិកាជាតិ ដូច្នេះរាជរដ្ឋាភិបាល ក៏បានធ្វើការកាត់បន្ថយថវិកាចំណាយតាមបណ្តាក្រសួងស្ថាប័នរដ្ឋនូវការចំណាយមួយចំនួនដែលមិនចាំបាច់ដើម្បីរក្សាស្ថិរភាពសេដ្ឋកិច្ចជាតិ”៕

សម្តេចតេជោ៖ កិច្ចព្រមព្រៀងពាណិជ្ជកម្មសេរីកម្ពុជា-ចិន និងធ្វើឱ្យកម្ពុជាក្លាយជាគោលដៅទីតាំងផលិតកម្មថ្មីរបស់ក្រុមហ៊ុនអាមេរិក

ដោយ ប៊ី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា កិច្ចព្រមព្រៀងពាណិជ្ជកម្មសេរីកម្ពុជា–ចិន នឹងដើរតួជាកត្តាដ៏សំខាន់មួយជួយធ្វើឱ្យកម្ពុជាក្លាយជាគោលដៅ សម្រាប់ក្រុមហ៊ុនអាមេរិក ដែលកំពុងរកទីតាំងផលិតកម្មថ្មី នៅតំបន់អាស៊ីអាគ្នេយ៍។

ការលើកឡើងរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ធ្វើឡើងនៅព្រឹកថ្ងៃទី២១ ខែកញ្ញា ឆ្នាំ២០២០នេះ ក្នុងឱកាសជួបពិភាក្សាការងារមួយចំនួនពាក់ព័ន្ធការវិនិយោគ និងធ្វើធុរកិច្ចជាមួយនឹងក្រុមប្រឹក្សាធុរកិច្ចអាមេរិក–អាស៊ាន តាមរយៈប្រព័ន្ធវីដេអូ។

ជំនួបពិភាក្សានេះភាគីក្រុមប្រឹក្សាធុរកិច្ចអាមេរិក–អាស៊ាន ត្រូវបានដឹកនាំដោយលោក អាឡិចសាន់ដឺ ហ្វែលម៉េន (Alexzander Feldmen) ប្រធាន និងជានាយកប្រតិបត្តិនៃក្រុមប្រឹក្សាធុរកិច្ចអាមេរិក–អាស៊ាន និងមានការចូលរួមពីមន្ត្រីជាន់ខ្ពស់របស់រាជរដ្ឋាភិបាលកម្ពុជា។

ក្នុងជំនួបនេះសម្តេចតេជោ ហ៊ុន សែន បានគូសរំលេចពីវិធានការ និងចំណាត់ការរបស់កម្ពុជាមួយចំនួន ដើម្បីឆ្លើយតបនឹងវិបត្តិបង្កឡើងដោយជំងឺកូវីដ១៩។ សម្តេចតេជោ ហ៊ុន សែន បានលើកឡើងថា រាជរដ្ឋាភិបាលកម្ពុជា បានគ្រប់គ្រងសភាពការណ៍កូវីដ១៩ប្រកបដោយប្រសិទ្ធភាព។ មកដល់ពេលនេះ កម្ពុជាមិនមានការឆ្លងជាសហគមន៍ ហើយក៏មិនបានឈានដល់ការបិទជាតំបន់ ឬ បិទប្រទេសទាំងមូលនោះទេ។ ជាការពិតជំងឺកូវីដ១៩ បាននាំមកនូវបញ្ហាប្រឈមដ៏ស្រួចស្រាល់មួយចំនួនជាអាទិ៍ នៅក្នុងវិស័យវាយនភណ្ឌ, វិស័យទេសចរណ៍, វិស័យអាកាសចរណ៍ និង វិស័យសេវាខ្លះទៀត។

សម្តេចតេជោបានគូសបញ្ជាក់ថា ស្ថិតក្នុងសភាពការណ៍នេះ រាជរដ្ឋាភិបាលកម្ពុជាបានដាក់ចេញនូវវិធានការចំនួន៥ជុំរួចមកហើយមានដូចជា វិធានការជួយដល់វិស័យសេដ្ឋកិច្ច និង វិស័យសង្គមកិច្ច, សំដៅជួយរក្សាលំនឹងផលិតកម្ម និង អាជីវកម្ម ក៏ដូចជាធានាលំនឹងជីវភាពរស់នៅរបស់ប្រជាពលរដ្ឋ ដែលទទួលរងផលប៉ះពាល់ធ្ងន់ធ្ងរ។


ទន្ទឹមនេះ សម្តេចតេជោបានលើកឡើងថា ធុរកិច្ចអាម៉េរិកមួយចំនួន ដែលមានវត្តមាននៅកម្ពុជា ក៏បានទទួលនូវផលប្រយោជន៍ពីវិធានការទាំងនេះ។ ទោះបីជាមានបញ្ហាជំងឺកូវីដក៏ដោយ តែសម្តេចមានមោទនភាពចំពោះកំណើនទំហំពាណិជ្ជកម្មទ្វេភាគីរវាងប្រទេសទាំងពីរ ដែលនៅក្នុងរយៈពេល៨ខែ ឆ្នាំ២០២០នេះ បានកើនឡើងប្រមាណជិត១៧ភាគរយ ធៀបនឹងរយៈពេលដូចគ្នានៃឆ្នាំកន្លងទៅ។

សម្តេចតេជោបានលើកឡើងថា ដើម្បីទាក់ទាញវិនិយោគិនបន្ថែម ជាពិសេសនៅពេលជំងឺកូវីដ–១៩ មានភាពធូរស្រាលនោះ កម្ពុជាកំពុងរៀបចំកែលម្អច្បាប់វិនិយោគ និងប្រព័ន្ធលើកទឹកចិត្តថ្មី ដែលមានលក្ខណៈគ្រប់ជ្រុងជ្រោយ និង មានភាពទាក់ទាញសម្រាប់ឧស្សាហកម្មប្រភេទអេឡិចត្រូនិក, បង្គុំ, កសិ–ឧស្សាហកម្ម, គ្រឿងបន្លាស់, ឧស្សាហកម្មគាំទ្រ និង ឧស្សាហកម្មផ្សេងទៀត។

សម្តេចតេជោ ហ៊ុន សែន ក៏បានលើកឡើងពីការធ្វើកិច្ចព្រមព្រៀងពាណិជ្ជកម្មសេរីរវាងកម្ពុជា និងចិនផងដែរ។ សម្តេចបានបង្ហាញក្តីសង្ឃឹមថា កិច្ចព្រមព្រៀងនេះ នឹងជួយទាក់ទាញអ្នកវិនិយោគរបស់អាមេរិកចូលមកកម្ពុជា។

សម្តេចតេជោ បានគូសបញ្ជាក់ដូច្នេះ «ខ្ញុំសង្ឃឹមថា ច្បាប់ និងកិច្ចព្រមព្រៀងពាណិជ្ជកម្មសេរីកម្ពុជា–ចិន នឹងដើរតួជាកត្តាដ៏សំខាន់មួយជួយធ្វើឱ្យកម្ពុជាក្លាយជាគោលដៅ សម្រាប់ក្រុមហ៊ុនអាម៉េរិក ដែលកំពុងរកទីតាំងផលិតកម្មថ្មី នៅតំបន់អាស៊ីអាគ្នេយ៍។ បន្ថែមលើនេះរាជរដ្ឋាភិបាលក៏បានដាក់ចេញជាបន្តបន្ទាប់នូវវិធានការ កែទម្រង់មុតស្រួចនានា សំដៅដោះស្រាយបញ្ហាប្រឈមសំខាន់ៗ ដែលបណ្ដាវិនិយោគិន និងធុរជន កំពុងជួបប្រទះ ក្នុង គោលបំណងបង្កើនភាពប្រកួតប្រជែងរបស់កម្ពុជា តាមរយៈការបង្កភាពងាយស្រួល និងការបង្កើត បរិយាកាសអំណោយផលដល់ការធ្វើអាជីវកម្ម និង ការវិនិយោគនៅក្នុងប្រទេស»។


សម្តេចតេជោ ក៏បានថ្លែងទៅកាន់ក្រុមប្រឹក្សាធុរកិច្ចអាមេរិក–អាស៊ានដែរថា ជាទិសដៅទៅមុខ កម្ពុជានឹងដាក់ឱ្យអនុវត្តនូវវិធានការអន្តរាគមន៍សមស្រប និងទាន់ពេល គួបផ្សំនឹងការគិតគូរជាយុទ្ធសាស្ត្រ តាមរយៈការដាក់ចេញនូវគោលនយោបាយហិរញ្ញវត្ថុសាធារណៈ, គោលនយោបាយរូបិយវត្ថុ និងវិធានការកែទម្រង់រចនាសម្ព័ន្ធ សំដៅសម្រេចឱ្យបាននូវគោលបំណងជាអាទិភាពចំនួន២ រួមមាន៖ ការរក្សាលំនឹងសេដ្ឋកិច្ច និង សង្គម និងការជំរុញកំណើនសេដ្ឋកិច្ចឡើងវិញ។

សម្តេចតេជោ បានកត់សម្គាល់ថា ជំនួបពិភាក្សានេះ ជាការបង្ហាញអំពីការយកចិត្តទុកដាក់ពីសំណាក់ក្រុមហ៊ុនអាម៉េរិក មកលើកម្ពុជា ក៏ដូចជាបង្ហាញអំពីឆន្ទៈ នៃការចូលរួមចំណែកក្នុងការអភិវឌ្ឍ និងលើកកម្ពស់ជីវភាពប្រជាជនកម្ពុជាទាំងមូល។

សម្តេចតេជោ ហ៊ុន សែន ស្នើឱ្យលោក អាឡិចសាន់ដឺ ហ្វលម៉េន និងតំណាងក្រុមហ៊ុនទាំងអស់ មេត្តាផ្សព្វផ្សាយបន្តអំពីកិច្ចខំប្រឹងប្រែងរបស់រាជរដ្ឋាភិបាល ក្នុងការលើកកម្ពស់ភាពប្រកួតប្រជែងរបស់កម្ពុជា និងសូមជួយទាក់ទាញវិនិយោគិនអាម៉េរិក មកធ្វើការវិនិយោគបន្ថែមនៅកម្ពុជា។


កម្ពុជា និងចិន ទើបនឹងបញ្ចប់ការចរចាលើកិច្ចព្រមព្រៀងពាណិជ្ជកម្មសេរីជាមួយគ្នាកាលពីពេលថ្មីៗនេះ ហើយរំពឹងថា នឹងឈានទៅចុះហត្ថលេខាលើកិច្ចព្រមព្រៀងនេះក្នុងពេលឆាប់ៗខាងមុខរវាងថ្នាក់ដឹកនាំនៃប្រទេសទាំងពីរ។ មន្ត្រីពាណិជ្ជកម្មរបស់កម្ពុជា ធ្លាប់បានឱ្យដឹងថា ផលិតផលជាកសិផលរបស់កម្ពុជាជាច្រើនមុខ នឹងត្រូវបាននាំចូលទៅកាន់ទីផ្សារប្រទេសចិនដោយមិនជាប់ពន្ធតាមរយៈកិច្ចព្រមព្រៀងនេះ។

កិច្ចព្រមព្រៀងនេះត្រូវបានរំពឹងថា ធ្វើឱ្យផលិតផលកម្ពុជាកាន់តែច្រើននឹងមានវត្តមានលើទីផ្សាររបស់ចិន ហើយក៏ជួយទាក់ទាញអ្នកវិនិយោគមកកាន់កម្ពុជាផងដែរ៕

ប្រមុខ​រដ្ឋាភិបាល​អះអាង​នឹង​បន្ត​ប្តេជ្ញា​រក្សា​ស្ថិរភាព​ម៉ាក្រូសេដ្ឋកិច្ច បើ​ទោះ​កំពុងជួប​ព្យុះ​នៃ​វិបត្តិ​កូ​វីដ-១៩

ដោយៈ​ប៊ី

ភ្នំពេញៈ ប្រមុខ​រដ្ឋាភិបាល​សម្ដេច​តេ​ជោ ហ៊ុន សែន​នាយករដ្ឋមន្ត្រី​នៃ​កម្ពុជា បាន​អះអាង​សារជាថ្មី នូវ​ការប្ដេជ្ញាចិត្ត​របស់​រាជ​រដ្ឋាភិបាល ក្នុង​ការបន្ត​ថែរក្សា​ស្ថិរភាព​នយោបាយ និង​ស្ថិរភាព​ម៉ាក្រូសេដ្ឋកិច្ច បើទោះបីជា​កម្ពុជា​កំពុង​ជួប​រលក​ព្យុះ​នៃ​វិបត្តិ​កូ​វីដ-១៩ យ៉ាងណាក៏ដោយ។

យោងតាម​សារលិខិត​របស់ សម្ដេច​តេ​ជោ ក្នុងឱកាស​ទិវា​សន្តិភាព​អន្តរជាតិ ថ្ងៃទី២១ ខែកញ្ញា​ឆ្នាំ២០២០ ដែល​បាន​បង្ហោះ​លើ​បណ្តាញ​ទំនាក់ទំនង​សង្គម ផ្លូវការ​របស់​សម្តេច​ថា រលក​ព្យុះ​នៃ​វិបត្តិ​កូ​វីដ-១៩ បាននិងកំពុង​បក់បោក​មកលើ​សេដ្ឋកិច្ច និង​សង្គម នៅក្នុង​បណ្ដា​ប្រទេស​ស្ទើរ​ទាំ​អស់ នៅ​ទូទាំង​ពិភពលោក រួមទាំង​កម្ពុជា​ផងដែរ។

សម្តេច​បន្តថា “ការរីក​រាលដាល​នៃ​មេរោគ​កូ​វីដ-១៩ និង​វិបត្តិ​សេដ្ឋកិច្ច​នេះ បាន​បង្ក​ការគំរាមកំហែង​យ៉ាងខ្លាំង​ក្លា ដល់​ការអភិវឌ្ឍ​ដែល​កម្ពុជា សម្រេចបាន​ក្នុង​រយៈពេល៣០ឆ្នាំ ចុងក្រោយ​នេះ នៃ​ប្រវត្តិសាស្ត្រ​របស់ខ្លួន” ។

តាម​ការប៉ាន់ប្រមាណរ​បស់​សេដ្ឋវិទូ ក៏ដូចជា​ស្ថាប័ន​អន្តរជាតិធំៗបាន​បង្ហាញថា ភាពប្រាកដប្រជា​នៃ​សេដ្ឋកិច្ច​របស់​កម្ពុជា អាច​នឹង​ធ្លាក់ចុះ​ក្នុង​រង្វង់-១,៩ភាគរយ នៅ​ឆ្នាំ២០២០នេះ។

សម្ដេច​តេ​ជោ​បន្តថា បន្ថែម​លើ​វិបត្តិ​ដែល​បង្កឡើង ដោយ​ជំងឺឆ្លង​កូ​វីដ-១៩ សភា​ការណ៍​ពិភពលោក នៅតែ​បន្ត​ប្រែប្រួល​វិ​វ​ឌ្ឍ​កាន់តែ​តឹងតែង ស្មុគស្មាញ ប្រកបដោយ​គ្រោះថ្នាក់ បង្កឡើង​ដោយ​ការប្រកួតប្រជែង រវាង​ប្រទេស​មហាអំណាច ដើម្បី​ការពារ​ផលប្រយោជន៍ រក្សា​ឥទ្ធិពល​នយោបាយ យោធា​និង​សេដ្ឋកិច្ច​របស់ខ្លួន។

មហិច្ឆតា​ក្ដោប​ក្ដាប់ និង​ដឹកនាំ​ពិភពលោក​របស់​មហាអំណាច​ខ្លះ តាមរយៈ​ការប្រកាន់យក​នយោបាយ​ឯកតោភាគី​និយម និង​គាំពារ​និយម បាន​ជំរុញ​សណ្ដាប់ធ្នាប់​អន្តរជាតិ ដែល​ផ្អែកលើ​ច្បាប់​និង​ប្រព័ន្ធ​ពហុភាគី​និយម ដែល​បាន​ជួយ​រក្សា​សន្តិភាព និង​វិបុលភាព​ដល់​ពិភពលោក អស់​រយៈពេល​ជិត៧៥ឆ្នាំកន្លងមក​នោះ ទទួលរង​សម្ពាធ​ជាងពេលណាៗទាំងអស់។

នៅក្នុង​បរិបទ​នេះ ប្រទេស​មហាអំណាច​លោកខាងលិច​ខ្លះ បាននិងកំពុង​សហកា​រ​ប្រទាក់ក្រឡា​គ្នា​ជា​ប្រព័ន្ធ ក្នុង​ការដាក់​សម្ពាធ​កៀបសង្កត់​ឱ្យ​កម្ពុជា ដើរ​តាម​គន្លង​នយោបាយ​របស់ខ្លួន ដូចដែល​ពួកគេ​ធ្លាប់បាន​ប្រព្រឹត្ត​មកលើ​កម្ពុជា កាលពី​ទសវត្សរ៍​ឆ្នាំ១៩៧០-១៩៨០ ដោយ​រំលោភបំពាន​លើ​គោលការណ៍ សមភាព​អធិបតេយ្យភាព​រវាង​បណ្ដា​រដ្ឋ និង​គោលការណ៍​មិន​ជ្រៀតជ្រែក ចូល​កិច្ចការ​ផ្ទៃក្នុង​ប្រទេស​ដទៃ ដែលមាន​ចែង​នៅក្នុង​រដ្ឋធម្មនុញ្ញ អ.ស.ប និង​នៅក្នុង​ច្បាប់​អន្តរជាតិ។

សម្ដេច​តេ​ជោ​នាយករដ្ឋមន្ត្រី​គូសបញ្ជាក់ថា ទោះជា​ស្ថិត​ក្នុងការ​លៈ​ទេសៈ ណាក៏ដោយ រាជរដ្ឋាភិបាល​អះអាង​សារជាថ្មី​នូវ​ការប្ដេជ្ញាចិត្ត ក្នុងការ​ថែរក្សា​ឱ្យបាន​នូវ​ភាពជា​ម្ចាស់ការ​លើ​ការងារ​ជា​អាទិភាព​ចម្បង​ពីរ គឺ​ទីមួយៈ ការបន្ត​ថែរក្សា​ស្ថិរភាព​នយោបាយ​ដែលជា​មូលដ្ឋានគ្រឹះ សម្រាប់​គ្រប់គ្រង​ស្ថានការណ៍ និង​ទី​ពី​រៈ ការថែរក្សា​ស្ថិរភាព​ម៉ាក្រូសេដ្ឋកិច្ច​ឱ្យបាន​ល្អប្រសើរ ទប់ស្កាត់​អតិផរណា​និង​ការឡើង​ថ្លៃទំនិញ​ក្នុង​ទីផ្សារ និង​ការបន្ត​អនុវត្ត​ឱ្យបាន​ម៉ឺងម៉ាត់​ច្បាស់លាស់ នូវ​ភារកិច្ច​ចំនួន​ប្រាំ ដែល​បាន​ដាក់ចេញ​កាលពី​ថ្ងៃទី១៤ ខែសីហា ឆ្នាំ២០២០កន្លងទៅនេះ ដើម្បី​សន្តិភាព សុវត្ថិភាព សុខមាលភាព​ប្រជាជន និង​ការអភិវឌ្ឍន៍​ប្រទេសជាតិ។

សម្ដេច​តេ​ជោ​សង្កត់ធ្ងន់ថា “កម្ពុជា​ទើបតែ​បាន​សុខសាន្ត រស់នៅក្នុង​សន្តិភាព និង​ឯកភាព​ជាតិ​ពេញលេញ អស់​រយៈពេល​ជាង​ពីរ​ទសវត្សរ៍​កន្លងមក​នេះ ក្រោយពី​ការឆ្លងកាត់​ភ្នក់ភ្លើងសង្គ្រាម ការបែកបាក់​រងទុក្ខវេទនា​ខ្លោចផ្សា​រក​ទីបំផុត​គ្មាន ជាច្រើន​សតវត្សរ៍​កន្ល​ង​មកហើយ​នៅក្នុង​ប្រវត្តិសាស្ត្រ​របស់ខ្លួន” ។

សម្តេច​តេ​ជោ​បាន​បន្ថែមថា បទពិសោធន៍​ដ៏​ជូរចត់​របស់​កម្ពុជា កាលពី​អតីតកាល និង​ការ​អនុវត្តបាន​យ៉ាង​ជោគជ័យ​នូវ «គោលនយោបាយ ឈ្នះ-ឈ្នះ» បានធ្វើឱ្យ​ប្រជាជន​កម្ពុជា​ស្គាល់​ច្បាស់​ពី​តម្លៃ​សន្តិភាព និង​កាន់តែ​យល់​ពី​សារៈសំខាន់ មិនអាច​ខ្វះ​បាន​នៃ​មូលដ្ឋានគ្រឹះ​សម្រាប់​ការអភិវឌ្ឍ គឺ​សន្តិភាព និង​ស្ថិរភាព៕





អ្នកជំនាញៈ ការគ្រប់គ្រង​អចលនទ្រព្យ​ត្រឹមត្រូវ​នឹង​បង្កើន​តម្លៃបន្ថែម​សំរាប់់គម្រោង​អភិវឌ្ឍន៍

ដោយៈ ប៊ី

ភ្នំពេញៈ អ្នកជំនាញ​អចលនទ្រព្យ​ពី​ក្រុមហ៊ុន​អន្តរជាតិ​បានលើកឡើង​ថា ការគ្រប់គ្រង​អចលនទ្រព្យ ឬ Property Management ត្រឹមត្រូវ​ដូចជា អគារ​លំនៅដ្ឋាន អគារ​ពាណិជ្ជកម្ម និង​អគារ​ការិយាល័យ នឹង​ជួយ​រក្សា​តម្លៃ ហើយ​ថែមទាំង​បង្កើន​តម្លៃ​អចលនទ្រព្យ​នៅ​នា​ខាង​អនាគត។

លោក James Hodge នាយក​ក្រុមហ៊ុន CBRE Cambodia បាន​ថ្លែង​ឱ្យដឹង​កាលពីពេលថ្មីៗនេះ​ថា ការចំណាយ​លើ​សេវាកម្ម​គ្រប់គ្រង​អចលនទ្រព្យ នឹង​ជួយ​រក្សាបាន​គុណភាព​អគារ និង​រក្សាបាន​តម្លៃ​អចលនទ្រព្យ​នាពេល​អនាគត។

លោក​បាន​ថ្លែងថា “តើ​អ្នក​ព្យាយាម​ពិនិត្យ​វិធីសាស្ត្រ​អភិវឌ្ឍន៍ របស់​គម្រោង​អចល ន​ទ្រព្យ​ទាំងនេះ​ថា តើ​ពួកគេ​បានគិត​យ៉ាងច្បាស់​អំពី ការគ្រប់គ្រង​អចលនទ្រព្យ (Property Management) ហើយ​តើ​ពួកគេ​កំណត់​ថ្លៃ​សេវាកម្ម​យ៉ាងដូចម្តេច?” ។ លោក បន្ថែមថា “អនាគត​ប្រតិបត្តិការ​ទាំងអស់នេះ គឺ​ការគ្រប់គ្រង​អចលនទ្រព្យ (Property Management) នឹង​ជួយ​រក្សា​គុណភាព​អគារ (ខុន​ដូ) និង​រក្សាបាន​នូវ​តម្លៃ​ខ្ពស់​នៅខាងមុខ” ។

លោក Ross Wheble ប្រធាន​ក្រុមហ៊ុន Knight Frank Cambodia យល់ស្រប​ថា ការគិតថ្លៃ​សេវាកម្ម​លើ​ការគ្រប់គ្រង អចលនទ្រព្យ​គួរតែ​ពិនិត្យ ដោយ​យកចិត្តទុកដាក់ ជាពិសេស​ថា តើ​វា​គ្រប់គ្រាន់​ដើម្បី​គ្រប់គ្រង​អគារ​នេះដែរ​ឬទេ។

លោក​បាន​បន្តថា វិនិយោគិន​ជាច្រើន​យល់ថា ថ្លៃ​សេវាកម្ម​គ្រប់គ្រង​អចលនទ្រព្យ​ទាប​ជាការ​សន្សំ ប៉ុន្តែ​វា​បាន​ក្នុង​រយៈពេល​ខ្លី។ ផលប៉ះពាល់​រយៈពេល​វែង​លើ​ការវិនិយោគ​អាច​នឹង​កើតឡើង ប្រសិនបើ​ថ្លៃ​សេវាកម្ម​មិន​គ្រប់គ្រាន់ សម្រាប់​ចំណាយ​លើ​ត្រួតពិនិត្យ​លើ​គុណភាព និង​សោភ័ណភាព​អគារ​ជាដើម។ ទី​ពីរ តើ​អ្នកណា​នឹង​គ្រប់គ្រង​អចលនទ្រព្យ។

លោក​បន្តថា “កត្តា​ទាំងនេះ(ការចំណាយ​ការគ្រប់គ្រង​អចលនទ្រព្យ​ដូចជា អគារ​ជាដើម និង​ក្រុមហ៊ុន​ជា​អ្នកគ្រប់គ្រង?) ដើរតួនាទី​យ៉ាងសំខាន់ ក្នុងការ​រក្សា​តម្លៃ​នាពេល​អនាគត” ។

លោក​មើលឃើញ​ពី​ការកើនឡើង នៃ​ចំនួន​អ្នកវិនិយោគ​មកពី​ហុងកុង​ឥឡូវនេះ​កំពុង​សម្លឹងមើល​ឱកាស​នៅ​កម្ពុជា​ទាំង​អាជីវកម្ម និង​ការវិនិយោគ​ក្នុង​វិស័យ​អចលនទ្រព្យ ខណៈ​ភាគច្រើន FDI ចូលមក​កម្ពុជា​ត្រូវបាន​គាំទ្រ ដោយ​ការវិនិយោគ​ចិន​អស់​រយៈពេល​ជាច្រើន​ឆ្នាំ​មកហើយ។

ទោះបី​ការជួល​ក្នុង​ការិយាល័យ​លំដាប់​ខ្ពស់ នៅ​រាជធានី​ភ្នំពេញ​បាន​ធ្លាក់ចុះ២៥ភាគរយ​ចាប់តាំងពី​ដើមឆ្នាំ២០១៧ ដោយសារ​ការផ្គត់ផ្គង់ មានការ​កើនឡើង​គួរឱ្យកត់សម្គាល់ ប៉ុន្តែ​លោក Wheble នៅតែមាន​សុទិដ្ឋិនិយម​ថា “កម្ពុជា​នៅតែ​ជាទី​តាំង​ល្អ​សម្រាប់​វិនិយោគិន​បរទេស​ពិចារណា” ៕

វត្តមាន​សំណង់​អគារខ្ពស់ៗនៅ​កម្ពុជា​បង្ហាញ​ពី​សញ្ញា​វិជ្ជមាន​នៃ​វិស័យ​អចលនទ្រព្យនាពេល​អនាគត

ដោយ ហ្សូ​លី

ភ្នំពេញៈ វិស័យ​អចលនទ្រព្យ​នៅ​កម្ពុជា កំពុងមាន​វឌ្ឍនភាព​ពីមួយ​ឆ្នាំ ទៅមួយ​ឆ្នាំ ទោះបី​ជាមាន​វិបត្តិ ឬ​ផលប៉ះពាល់​រាតត្បាត​យ៉ាងណាក្តី។ សញ្ញា​វិជ្ជមាន​នៃ​វិស័យ​អចលនទ្រព្យ​នៅតែ​លោត​ឡើង ដោយសារ​វត្ត​មាននៃ​ការអភិវឌ្ឍ នូវ​គម្រោង​អគារខ្ពស់ៗទាំង​ក្នុង​ទីក្រុង និង​ជាយក្រុង​រាជធានី​ភ្នំពេញ។

រដ្ឋលេខាធិការ​នៃ​ក្រសួង​រៀបចំ​ដែនដី នគរូបនីយកម្ម និង​សំណង់ លោក ឡៅ​ទិព្វ សីហា បាន​មានប្រសាសន៍​ឲ្យ​ដឹង​កាលពីពេលថ្មីៗនេះ​ថា វត្តមាន​សំណង់​អគារ​ខ្ពស់​នៅក្នុង​ទីក្រុង​ភ្នំពេញ​នាពេល​បច្ចុប្បន្ន បាន​ចូល​រួច​ចំណែក​យ៉ាងសកម្ម​ពី​សក្តានុពល​សេដ្ឋកិច្ចកម្ពុជា និង​សកម្មភាព​ទិញ​លក់​ក្នុង​វិស័យ​អចលនទ្រព្យ នៅ​ថ្ងៃ​ខាងមុខ​យ៉ាង​ប្រាកដ។ នេះ​ជា​ភស្តុតាង ដែល​ទាក់ទាញ​វិនិយោគិន​បរទេស ឱ្យ​កាន់​តែមាន​ទំនុកចិត្ត ចំពោះ​ស្ថេរភាព​សេដ្ឋកិច្ចកម្ពុជា​ផងដែរ។

យោងតាម​របាយការណ៍​របស់​ក្រុមប្រឹក្សា រាជធានី​ភ្នំពេញ​បានឱ្យដឹងថា គិត​ត្រឹម​ដើមខែ​កញ្ញា ឆ្នាំ២០២០នេះ ចំនួន​អគារខ្ពស់ៗកម្ពស់​ចាប់ពី៥ជាន់ឡើង បាន​កើន​រហូតដល់​ជិត១៥០០អាគារ នៅក្នុង១៤ខណ្ឌ ទូទាំង​រាជធានី​ភ្នំពេញ ដោយ​ក្នុងនោះ​អគារ​កម្ពស់​ចាប់ពី៥ជាន់ ដល់៩ជាន់ មាន​ចំនួន៨១៥អគារ ។ រីឯ​អគារ​កម្ពស់ ចាប់ពី១០ជាន់ ដល់១៩ជាន់ មាន៤០៦អគារ អគារ​កម្ពស់​ចាប់ពី២០ ដល់២៩ជាន់ មាន១០៧អគារ អគារ​កម្ពស់​ចាប់ពី៣០ដល់៣៩ជាន់ មាន​ចំនួន៥៩អគារ និង​អគារ​កម្ពស់​ចាប់ពី៤០ជាន់​ឡើងទៅ​មាន​ចំនួន៣៧អាគារ ។

ភាគច្រើន​សំណង់​អាគារ គឺជា​ការវិនិយោគ​ទៅលើ​គម្រោង​ខុន​ដូ អា​ផាត​មិន​ជួល មជ្ឈមណ្ឌល​ពាណិជ្ជកម្ម និង​អគារ​ពហុ​បំណង​ជាដើម។

អ្នកជំនាញ​អចលនទ្រព្យ​លើ​វិស័យ​ខុន​ដូ និង​ជា​អគ្គនាយក​ក្រុមហ៊ុន​ភ្នាក់ងារ​អចលនទ្រព្យ​អន្តរជាតិ ERA លោក​ខន គង្គា បាន​ថ្លែងថា ទីផ្សារ​ខុន​ដូ​កំពុងមាន​កំណើន​គួរឱ្យកត់សម្គាល់ ហើយ​វា​បានចាប់ផ្តើម​មាន​សញ្ញា​វិជ្ជមាន​ចាប់តាំងពី​ត្រីមាស​ទី៣ បន្ត​រហូតមកដល់​ត្រីមាស​ទី៤ និង​ទៅ​អនាគត ដោយសារ​ទំនុកចិត្ត​ដែល​ម្ចាស់​គម្រោង​ផ្តល់ជូន​ទៅកាន់​អតិថិជន។

ទន្ទឹមនេះ​លោកស្រី អាន សុធី​តា នាយិកា​ក្រុមហ៊ុន CBRE Cambodia បាន​ព្យាករណ៍​ថា សម្រាប់​ទីផ្សារ និង​គម្រោង​អភិវឌ្ឍ​អចលនទ្រព្យ នៅ​ចុងឆ្នាំ២០២០នេះ នឹងមាន​ភាពល្អប្រសើរ ហើយ​បន្ត​ទៅមុខទៀត​រហូតដល់​ដើមឆ្នាំ២០២១ខាងមុខ៕

រដ្ឋាភិបាល​កំពុង​ចាប់់ផ្តើម​ដាក់​ដេញថ្លៃ​ការពង្រីក និង​កែលំអរ​ផ្លូវជាតិ​លេខ៤

ដោយ វុត្ថា

ភ្នំពេញៈ ក្រសួង​សាធារណការ និង​ដឹកជញ្ជូន​បាន​នឹង​កំពុង​រៀបចំ​ដាក់​ដំណើរការ​ដេញថ្លៃ ដើម្បី​ពង្រីក​ផ្លូវជាតិ​លេខ៤ ពី៧ម៉ែត្រ​ទៅ១១ម៉ែត្រ ដើម្បី​ជំរុញ​ការដឹកជញ្ជូន​ទំនិញ ការធ្វើដំណើរ​ឱ្យមាន​សុវត្ថិភាព និង​កំណើន​សេដ្ឋកិច្ចជាតិ។

លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ប្រាប់​ក្រុម​អ្នកសារព័ត៌មាន កាលពីពេល​ថ្មី​នេះ​ឱ្យដឹងថា កម្ពុជា​កំពុង​ពង្រីក និង​ពង្រឹង​ហេដ្ឋារចនាសម្ព័ន្ធ​របស់​ខ្លួន ដើម្បី​ជំរុញ​ការដឹកជញ្ជូន និង​កំណើនសេដ្ឋកិច្ច ដែល​បច្ចុប្បន្ននេះ​ផ្លូវជាតិ​លេខ៤ កំពុង​ដាក់ឱ្យ​ដេញថ្លៃ។

លោក​បន្តថា “នៅក្នុង​អំឡុងពេល​នៃ​ជំងឺ​កូ​វីដ១៩នេះ គម្រោង​ពង្រីក​និង​សាងសង់​ហេដ្ឋារចនាសម្ព័ន្ធ​ទាំងអស់ មិនត្រូវ​បាន​ផ្អាក​នោះទេ នៅតែ​ដំណើរ​ការធម្មតា ហើយ​ផ្លូវជាតិ​លេខ៤ កំពុង​ដាក់​ដេញថ្លៃ ក្នុងការ​ពង្រីក​ពី៧ ម៉ែត្រ​ទៅ១១ ម៉ែត្រ​នៅ​តំបន់​ដែល​ចាំបាច់​ត្រូវ​ពង្រីក​បន្ថែម” ។

ធនាគារពិភពលោក (World Banks) កាលពី​ចុងឆ្នាំ ២០១៩ បាន​ចុះហត្ថលេខា​កិច្ចព្រមព្រៀង​ប្រគល់​ប្រាក់កម្ចី១១០លាន​ដុល្លារ​ដល់​ប្រទេស​កម្ពុជា ដើម្បី​កែលម្អ​ផ្លូវជាតិ​លេខ៤ នេះ។  ក្រៅពី​ការលើក​កំពស់​ផ្លូវជាតិ​លេខ៤ រដ្ឋាភិបាល​កម្ពុជា​បាន​នឹង​កំពុង​សាងសង់​ផ្លូវ​ល្បឿន​លឿន​ភ្នំពេញ-ខេត្ត​ព្រះសីហនុ​ផងដែរ ដែល​ទុនវិនិយោគ​ប្រមាណ​ជិត២ពាន់​លាន​ដុល្លារ​អាមេរិក។

ផ្លូវជាតិ​លេខ៤នៅតែ​ត្រូវបាន​ចាត់ទុកថា មាន​សក្តានុពល​ខ្លាំង​ជាង​បណ្តា​ផ្លូវផ្សេងៗ ដោយបាន​ភ្ជាប់​មហា​តំបន់​ពាណិជ្ជកម្ម​រាជធានី​ភ្នំពេញ ទៅ​កំពង់ផែ​អន្តរជាតិ​ក្រុងព្រះសីហនុ ដែលជា​កំពង់ផែ​ទឹក​ជ្រៅ ដែល​នេះ​ជា​ចំណុច​ពិសេស​ជាងគេ សម្រាប់​សេដ្ឋកិច្ច។

ផ្លូវជាតិ​លេខ៤ ត្រូវបាន​ចាត់ទុកជា​ផ្លូវ​ហាយវ៉េ និង​ជា​ផ្លូវ​អាស៊ាន ដែល​ត​ភ្ជាប់​ពី​រាជធានី​ភ្នំពេញ ទៅ​ខេត្តកំពង់ស្ពឺ និង​ខេត្ត​ព្រះសីហនុ មាន​រយៈ​ចម្ងាយ ២៣២គីឡូម៉ែត្រ។

ក្នុង​រយៈពេល៥ឆ្នាំ​ចុង​ក្រោយនេះ តំបន់​ស្ថិត​នៅជាប់​ផ្លូវជាតិ​លេខ៤ បាន​លេចឡើង​នូវ​គម្រោង​វិនិយោគ​អចលនទ្រព្យ​ជាច្រើន​ដូចជា គម្រោង​ដីឡូត៍ គម្រោង​លំនៅដ្ឋាន និង​បុរី សម្រាប់​ការរស់នៅ និង​ប្រកប​អាជីវកម្ម គម្រោង​រោងចក្រ ស​សហគ្រាសផ្សេងៗ បាន​រះ​ឡើង​ព្រោងព្រាត​នៅតាម​ដងផ្លូវ​ជាតិ​មួយ​នេះ៕

ពហុ​កីឡដ្ឋាន​ជាតិ​មរតក​តេ​ជោ​តម្លៃ ១៦០លាន​ដុល្លារ​សាងសង់​សម្រេចបានប្រមាណ ៩០ភាគរយ

ដោយៈ រ៉ា​ណេ​ត

ភ្នំពេញៈ ពហុ​កីឡដ្ឋាន​ជាតិ​មរតក​តេ​ជោ ដែលមាន​តម្លៃ​ជិត១៦០លាន​ដុល្លារ ក្រោម​ហិរញ្ញប្បទាន​ឥត​សំណង់​ពី​រដ្ឋាភិបាល​ចិន នៅលើ​ផ្ទៃដី​ទំហំ​ជាង ១៦ហិកតា ត្រូវបាន​ម ន្ត្រី​ជំនាញ​អះអាងថា ការសាងសង់​សម្រេចបាន​ប្រមាណ ៩០ភាគរយ និង​គ្រោង​បញ្ចប់​ទាំងស្រុង​នៅត្រឹម​ចុងខែ​មីនា ឆ្នាំ២០២១ខាងមុខនេះ។

លោក​វ៉ា​ត់ ចំរើន អគ្គលេខាធិការ​គណៈកម្មាធិកា​រ​ជាតិ​អូឡាំពិក​កម្ពុជា (NOCC) បាន​មានប្រសាសន៍​នៅ​ថ្ងៃ​ចុង​សប្ដាហ៍​កន្លងទៅនេះ​ថា មកទល់ពេលនេះ​ដំណើរការ​សាងសង់​ពហុ​កីឡដ្ឋាន​ជាតិ​មរតក​តេ​ជោ សម្រេចបាន​ប្រមាណ ៩០ភាគរយ​ហើយ ហើយ​ការសាងសង់​គ្រោង​បញ្ចប់​ជា​ស្ថាពរ​នៅ​អំឡុង​ខែមីនា​ឆ្នាំ២០២១ ។

សំណង់​ពហុ​កីឡដ្ឋាន​ជាតិ​មរតក​តេ​ជោ​នេះ បាន​បើក​ការដ្ឋាន​សាងសង់ នៅ​ថ្ងៃទី៤ មេសា ឆ្នាំ២០១៧ ក្រោម​អធិបតីភាព​ដ៏​ខ្ពង់ខ្ពស់ របស់​សម្តេច​អគ្គមហាសេនាបតី​តេ​ជោ​ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ក្នុងអំឡុងពេល​សម្ពោធ​ដាក់ឱ្យ​ប្រើប្រាស់​សមិទ្ធផល​ដំណាក់កាល​ទី១ មានដូចជា មជ្ឈមណ្ឌល​អាង​ហែល​ទឹក មជ្ឈមណ្ឌល​កីឡា​ក្នុង​សាល , ទីលាន​បាល់បោះ និង​អគារ​ស្នាក់នៅ​របស់​អត្ត​ព​លិ​ក ជាពិសេស​សម្រាប់​ត្រៀម​បើក​ការប្រកួត​កីឡា​អាស៊ីអាគ្នេយ៍ (Sea Games) លើក​ទី៣២ ឆ្នាំ២០២៣ ក្នុងនាម​ជា​ម្ចាស់ផ្ទះ។

លោក​វ៉ា​ត់ ចំរើន បាន​បញ្ជាក់ថា ពីដំបូង​គណៈកម្មការ​បាន​វាយតម្លៃថា ការសាងសង់​នឹងត្រូវ​បញ្ចប់ ជា​ស្ថាពរ​នៅ​ចុងឆ្នាំ២០២០នេះ។ ប៉ុន្តែ​ដោយសារ​ការ​រាតត្បាត​នៃ​ជំងឺ COVID-19 បានធ្វើឱ្យ​ការសាងសង់ ត្រូវ​អូសបន្លាយ​រហូតដល់​ខែមីនា ឆ្នាំ២០២១ ខណៈដែល​គ្រោង នៃ​សំណង់​ពហុ​កីឡដ្ឋាន​ដ៏​ធំ​ប្រចាំ​ប្រទេសមួយ​នេះ ត្រូវបាន​សាងសង់​រួចរាល់១០០ភាគរយ​ហើយ នៅសល់តែ​ការបំពាក់​សម្ភារ​មួយចំនួន ដូចជា​កៅអី ដំបូល អំពូល ភ្លើង និង​ការធ្វើ​ទីលាន​ខាងក្នុង​តែប៉ុណ្ណោះ។

សម្រាប់តែ​កៅអីអង្គុយ​បេតុង នៅក្នុង​ពហុ​កីឡដ្ឋាន​ជាតិ​ដ៏​ទំនើប​នេះ មាន​ទម្ងន់​ធ្ងន់​ជាងគេ​រហូតដល់​ទៅ៩.៧៤តោន ត្រូវបាន​ផលិតឡើង​យ៉ាង​ផ្ចិតផ្ចង់ និង​បំពាក់​ជាមួយ​ប្រព័ន្ធ​QR Code ដើម្បី​ត្រួតពិនិត្យ​លក្ខណៈ​បច្ចេកទេស​នៃ​កៅអី ពោលគឺ​ដើម្បី​ត្រួតពិនិត្យ​គុណភាព​បេតុង​កៅអី​នេះ ដូចជា ភាព​ស្មើ​ក្នុងការ​លើកដាក់​ជាដើម។ កៅអី​បេតុង​នៅក្នុង​ពហុ​កីឡដ្ឋាន​មាន​ចំនួន៤៦២៤ដុំ កាំជណ្តើរ​ចំនួន២៣៩២កាំ និង​បង្កាន់ដៃ​ចំនួន១៩២ សរុប​ចំនួន ៧.២០៨ដុំ ៕

ប្រធាន​សមាគម​អចលនទ្រព្យ​សកល បង្ហើប​ពី​ឯកសារ​សំខាន់​ដែល​ត្រូវ​ដឹងមុនពេល​ទិញ​ខុន​ដូ

ដោយៈ រ៉ា​ណេ​ត

ភ្នំពេញៈ មិន​ខុសពី​ការទិញ​អចលនទ្រព្យ​ដទៃទៀត​ដូចជា​ទិញ​ដី ទិញ​ផ្ទះ នោះទេ សម្រាប់​ការទិញ​ខុន​ដូ ដែលជា​ប្រភេទ​លំនៅដ្ឋាន​សហកម្មសិទ្ធិ ក៏ត្រូវ​ទាមទារ​ឱ្យមាន​ភាពប្រាកដប្រជា និង​ច្បាស់លាស់​ពី​ស្ថានភាព​ទូទៅ​នៃ​គម្រោង​ផងដែរ ជាពិសេស​ពិនិត្យ​ទៅលើ​រាល់​ឯកសារ​ពាក់ព័ន្ធសំខាន់ៗមួយចំនួន មុនពេល​សម្រេចចិត្ត​ទិញ ជៀសវាង​ជួប​ការខាតបង់​ទ្រព្យ។

ប្រធាន​សមាគម​អចលនទ្រព្យ​សកល ហៅ​កាត់ (GRA) លោក សំ សុខ​នឿន និង​ជា​ប្រធាន​ក្រុមហ៊ុន Kw Sam Sn Realty Co., Ltd បាន​មានប្រសាសន៍​ឲ្យ​ដឹង​កាលពី​ចុង​សប្តាហ៍​មុន​ថា នៅក្នុង​មុខ​អាជីព​ជា​ភ្នាក់ងារ​លក់​អចលនទ្រព្យ គឺមាន​អ្នក​ត្រឹមត្រូវ ស្មោះត្រង់ និង​មាន​វិជ្ជាជីវៈ ហើយក៏​មាន​អ្នក​គ្មាន​ក្រមសីលធម៌​ផងដែរ ដែល​អាចអនុវត្ត​គ្រប់​វិធីសាស្ត្រ ធ​ក​វើ​យ៉ាងណា​អាច​ទទួលបាន​ចំណែក​ទីផ្សារ។

លោក​បញ្ជាក់ថា “សម្រាប់​អ្នក​ដែលមាន​អាជីព​ពិតប្រាកដ មាន​ក្រមសីលធម៌ និង​ភាពស្មោះត្រង់ ត្រឹមត្រូវ​ជាមួយ​អតិថិជន ប៉ុន្តែ​សម្រាប់​អ្នក​ដែល​គ្មាន​វិជ្ជាជីវៈ គឺ​គេ​អាច​ប្រើ​ទ្រឹស្ដី និង​វិធីសាស្ត្រផ្សេងៗជាច្រើន ដែល​ធ្វើយ៉ាងណា​អាច​ទាក់ចិត្ត​អតិថិជន​ទិញ​អចលនវត្ថុ​របស់​ពួកគេ​បាន ដែល​វា​ជា​គ្រោះថ្នាក់​សម្រាប់​អតិថិជន ដែល​មិនបាន​យល់ច្បាស់​ពី​ការទិញ​អចលនវត្ថុ” ។

លោក​សំ សុខ​នឿន បាន​បន្តថា កាលពីពេល​កន្លងទៅ​យើង​ធ្លាប់​បានឃើញ​រួចមកហើយ​នូវ​ការចាញ់បោក​ឈ្មួញ​មិន​ស្មោះត្រង់ ឬ​ភ្នាក់ងារ​គ្មាន​វិជ្ជាជីវៈ ទៅលើ​ការទិញ​គម្រោង​ខុន​ដូ ហើយ​ចុងក្រោយ​អតិថិជន​ទទួលរង​នូវ​ការខាតបង់​ទ្រព្យ ដែល​ទិញ​ប៉ះចំ​គម្រោង​ខ្យល់។ ក្នុងន័យនេះ​ជាការ​បញ្ចៀស​នូវ​ការខាតបង់ មុនពេល​សម្រេចចិត្ត​ទិញ​ខុន​ដូ អ្នក​ដែលជា​អតិថិជន ក៏ត្រូវ​តែ​ដឹង​ច្បាស់​នូវ​គម្រោង​អភិវឌ្ឍន៍​ទាំងមូល តាមរយៈ​ការពិនិត្យ​ទៅលើ​ឯកសារ​សំខាន់​ពាក់ព័ន្ធ​មួយចំនួន​ដូចជា

១. អាជ្ញា​បណ្ណ​អភិវឌ្ឍន៍ ឬ​ការសាងសង់​ខុន​ដូ​ពី​ក្រសួង​សេ្ឋ​កិច្ច និង​ហិរញ្ញវត្ថុ

២. លិខិតអនុញ្ញាត​សាងសង់​ពី​ក្រសួង រៀបចំ​ដែនដី នគរូបនីយកម្ម និង​សំណង់

៣. លិខិត​បើក​ការដ្ឋាន​សាងសង់​ពី​ក្រសួង​រៀបចំ ដែនដី នគរូបនីយកម្ម និង​សំណង់។

៤.  អាជ្ញា​បណ្ណ​បើក​ការលក់ ពី​ក្រសួង​សេដ្ឋកិច្ច និង​ហិរញ្ញវត្ថុ

៥.  លិខិត​បិទ​ឬ​បញ្ចប់​ការសាងសង់​ពី​ក្រសួង រៀបចំ​ដែនដី នគរូបនីយកម្ម និង​សំណង់

៦. ប្លង់ដី​ដែល​កំពុង​សាងសង់ មិនជា​ប់ប​ញ្ជាំ ឬ​ម្ចាស់​ដី​ត្រូវតែ​ជាម​នុស្ស​តែមួយ​នៃ​ម្ចាស់​ក្រុមហ៊ុន​អភិវឌ្ឍន៍។

៧. ឯកសារ​ដែល​បង្ហាញ​ពី​គោលការណ៍ បញ្ជាក់ថា​ជា​ដី​ដែល​ជួល​ពី​រដ្ឋ​រយៈពេល​កំណ​ត់ (Leasehold) ឬ​ជា​ដីឯកជន​កម្មសិទ្ធិ​អចិន្ត្រៃយ៍ (Freehold)។

លោក​សំ សុខ​នឿន បានបញ្ជាក់​ទៀតថា នៅពេល​អ្នក​ដែលជា​អតិថិជន​ពិនិត្យ​ទៅលើ​រាល់​ឯកសារ ដូចដែល​បាន​បញ្ជាក់ជូន​ខាងលើនេះ ភាព​ប្រឈម​នឹង​ការ​ខាត់​បង់ នឹង​ត្រូវបាន​កាត់បន្ថយ ហើយ​ថែមទាំង​មាន​ទំនុកចិត្ត​ខ្ពស់ ទៅលើ​គម្រោង​ដែល​ខ្លួន​បាន​ទិញ​ថែម​ទៀតផង៕

តើ​ប្រជាជន​កម្ពុជា​គួរ​មានទ្រព្យ​សម្បត្តិ​ប៉ុណ្ណា ដើម្បី​អាច​នឹង​អស់​ក្តីបារម្ភពី​បញ្ហា​ហិរញ្ញវត្ថុ

ដោយៈ រ៉ា​ណេ​ត

ភ្នំពេញៈ អ្នកវិភាគ​សេដ្ឋកិច្ច​ឯករាជ្យ​កម្ពុជា លោក ង៉ែត ជូ បានបង្ហាញ​ពី​ការសិក្សា​ស្រាវជ្រាវ​មួយ ទៅលើ​កម្រិត​នៃ​ទ្រព្យសម្បត្តិ ដែល​គ្រួសារ​របស់​ប្រជាពលរដ្ឋ​នៅ​កម្ពុជា​អាច​នឹង​អស់ពី​ក្ដីបារម្ភ​ទៅលើ​បញ្ហា​ហិរញ្ញវត្ថុ ឬ​អាច​និយាយបានថា​អាច​គ្រប់គ្រង និង​មាន​សុវត្ថិភាព​ហិរញ្ញវត្ថុ​បាន។

ជាមួយនឹង​ការវិភាគ តាមរយៈ​បណ្តាញ​ទំនាក់ទំនង​អេឡិចត្រូនិក កាលពី​ថ្ងៃ​ចុង​សប្ដាហ៍​កន្លងទៅនេះ លោក ង៉ែត ជូ ក៏បាន​លើក​សម្មតិកម្ម​សម្រាប់​ជាការ​ស្រាវជ្រាវ​បន្ត ដើម្បី​បញ្ជាក់ថា តើ​សម្មតិ​កម្មពិត​ឬ​មិន​ពិត ដូចដែល​បានបង្ហាញ​ជូន​នៅ​ខាងក្រោម​នេះ ៖

យោងតាម​ការស្រាវជ្រាវ មុនពេល​ការផ្ទុះ​ការរីក​រាលដាល​នៃ​វីរុស Covid-19 បាន​បង្ហាញថា ប្រជាជន​អាមេរិកកាំងម្នាក់ៗយល់ថា ខ្លួន​អស់​បារម្ភ​ពី​បញ្ហា​ហិរញ្ញវត្ថុ ប្រសិនបើ​ខ្លួន​មានទ្រព្យ​សម្បត្តិ (net worth) ចំនួន ៩៣ម៉ឺន​បួន​ពាន់​ដុល្លា​អាមេរិក ឬ​ជាង ១៤ដង​នៃ​ចំណូល​ជា​មធ្យម​ប្រចាំឆ្នាំ​សំរាប់​ប្រជាជន​ម្នាក់ (ចំណូល​ជា​មធ្យម​ប្រចាំឆ្នាំ​គឺ៦៥១១៨ដុល្លា) ។

បើ​ប្រៀបធៀប​លទ្ធផល​នៃ​ការស្រាវជ្រាវ​ខាងលើនេះ ជាមួយនឹង​កំរិត​សេដ្ឋកិច្ច​របស់​កម្ពុជា ប្រជាជន​កម្ពុជាម្នាក់ៗ នឹង​អស់​ក្តីបារម្ភ​ពី​បញ្ហា​ហិរញ្ញវត្ថុ ប្រសិនបើ​មានទ្រព្យ​សប្ប​ត្តិ​ចំនួន ២៣៥៦៥ដុល្លា (ជាង២ម៉ឺន​ដុល្លា) ។

នេះ​ជា​របៀប​គណនា ដែល​ចំណូល​ជា​មធ្យម​ប្រចាំឆ្នាំ របស់​ប្រជាជន​កម្ពុជា១នាក់ (១៦៤៣ដុល្លា) គុណ​នឹង១៤,៣ ។ ១៤,៣ គឺជា​ចំនួន​ដង នៃ​ចំណូល​ជា​មធ្យម​ប្រចាំឆ្នាំ​ដែល​ប្រជាជន​អាមេរិកកាំង​យល់ថា ខ្លួន​អស់​បារម្ភ​ពី​បញ្ហា​ហិរញ្ញវត្ថុ។

យោងតាម​លទ្ធផល​នៃ​ការ​គណនា​ចំនួន​ទ្រព្យសម្បត្តិ ដែល​ទំនងជា​អាចធ្វើអោយ​ប្រជាជន​កម្ពុជា​ម្នាក់់ អស់​បារម្ភ​ពី​បញ្ហា​ហិរញ្ញវត្ថុ យើង​អាច​គណនា​ចំនួន​ទ្រព្យសម្បត្តិ​ដែល​អាចធ្វើអោយ​គ្រួសារ​កម្ពុជា អស់​បារម្ភ​ពី​បញ្ហា​ហិរញ្ញវត្ថុ ទៅតាម​ចំនួន​សមាជិកគ្រួសារ​ដូចខាងក្រោម៖

១) គ្រួសារ​ដែលមាន​សមាជិក២នាក់ ត្រូវមាន​ទ្រព្យសម្បត្តិ​ជាង៤ម៉ឺន៧ពាន់​ដុល្លា (២៣៥៦៥ដុល្លា គុណ​នឹង២) ។ ២) គ្រួសារ​ដែលមាន​សមាជិក៣នាក់ ត្រូវមាន​ទ្រព្យសម្បត្តិ​ជាង៧ម៉ឺន​ដុល្លា (២៣៥៦៥ដុល្លា គុណ​នឹង៣) ។

៣) គ្រួសារ​ដែលមាន​សមាជិក៤នាក់ ត្រូវមាន​ទ្រព្យសម្បត្តិ​ជាង៩ម៉ឺន៤ពាន់​ដុល្លា (២៣៥៦៥ដុល្លា គុណ​នឹង៤) ។ ៤) គ្រួសារ​ដែលមាន​សមាជិក៥នាក់ ត្រូវមាន​ទ្រព្យសម្បត្តិ​ជាង១១ម៉ឺន៧ពាន់​ដុល្លា (២៣៥៦៥ដុល្លា គុណ​នឹង៥) ។

ការ​គណនា​ខាងលើ​គឺជា​សម្មតិកម្ម តាមរយៈ​ការប្រៀបធៀប ដោយ​ផ្អែកលើ​កំរិត​សេដ្ឋកិច្ច​ផ្សេងគ្នា​រវាង​ប្រជាជន​កម្ពុជា និង​ប្រជាជន​អាមេរិកកាំង។ ប្រជាជន​កម្ពុជា​យល់ឃើញ​យ៉ាងណា វា​អាស្រ័យ​លើ​ទម្លាប់​នៃ​ការចាយវាយ និង​កំរិត​នៃ​ការ​គាំពារ​សង្គម​ដែល​ប្រជាជន​កម្ពុជា​ទទួលបាន​ពី​រដ្ឋាភិបាល។

ប្រជាជន​កម្ពុជា​មិនមាន​សេវា​គាំពារ​សង្គម​ល្អ ដូច​អ្វីដែល​ប្រជាជន​អាមេរិកកាំង​ទទួលបាន​នោះទេ។ (ប្រភព​ទិន្នន័យ ៖ ធនាគារពិភពលោក និង CNBC) ៕

ជប៉ុន​គ្រោង​សាងសង់​អគារ​ពាណិជ្ជកម្ម​ខ្ពស់បំផុត ​នៅក្នុង​ប្រទេស​របស់ខ្លួន ​នា​ឆ្នាំ២០២៧

ដោយ វុត្ថា

តូ​ក្យូៈ ជប៉ុន​គ្រោង​សាងសង់​អគារ​កំពស់ ៣៩០ម៉ែត្រ ឬ៦៣ជាន់​នៅក្នុង​ឆ្នាំ២០២៧ នាពេល​ខាងមុខនេះ ដែល​នឹង​ក្លាយជា​អគារ​ខ្ពស់បំផុត​នៅក្នុង​ប្រទេស​ជប៉ុន ខណៈ​បច្ចុប្បន្ននេះ​អគារ​ខ្ពស់បំផុត​មាន​ត្រឹមតែ៣៣០ម៉ែត្រ។

អគារ​នេះ​ត្រូវបាន​គេ​ប្រសិទ្ធិ​នាម​ថា Torch Tower ដែល​គ្រោង​នឹង​សាងសង់​នៅមុខ​ស្ថានីយ៍​តូ​ក្យូ (Tokyo Station) និង​បោះទុន​វិនិយោគ​ដោយ ក្រុមហ៊ុន Mitsubishi Estate Co. ជា​ក្រុមហ៊ុន​វិនិយោគ​អចលនទ្រព្យ​ដ៏​ធំ​បំផុត​របស់​ប្រទេស​ជប៉ុន។

បើតាម​ក្រុមហ៊ុន Mitsubishi Estate Co. អគារ​ខ្ពស់​ជាងគេ​នេះ ត្រូវបាន​ប្រើប្រាស់​ចម្រុះ ដូចជា អគារ​ការិយាល័យ ពាណិជ្ជកម្ម សណ្ឋាគារ​ប្រណីត និង​សាល​ដ៏​ធំ​ដែល​អាច​ផ្ទុក​មនុស្ស​បាន​ប្រមាណ ២០០០នាក់។

ទោះជា​យ៉ាងណាក៏ដោយ​ក្រុមហ៊ុន មិន​បញ្ជាក់​ពី​ទំហំ​ទុន​ដែល​ត្រូវ​វិនិយោគ​នោះទេ ខណៈ​កំពុង​សិក្សា​លើ​ហេដ្ឋារចនាសម្ព័ន្ធ​សំណង់​អគារ។

អាគារ​ខ្ពស់​ជាងគេ​នាពេល​បច្ចុប្បន្ននេះ នៅក្នុង​ប្រទេស​ជប៉ុន​នេះ គឺ​អាគារ Abeno Harukas ដែលមាន​កំពស់៣០០ម៉ែត្រ ស្ថិតនៅ​ភាគ​ខាងលិច​នៃ​ប្រទេស​ជប៉ុន ក្នុង​ទីក្រុង Osaka ។

អាគារ​មួយទៀត គឺ​គម្រោង​អគារ​ខ្ពស់កប់ពពក ដែល​កំពុង​សាងសង់​ដោយ​ក្រុមហ៊ុន Mori Building Co. មាន​កម្ពស់៣៣០ ម៉ែត្រ​គ្រោង​នឹង​បញ្ចប់​នៅក្នុង​ឆ្នាំ ២០២៣ ក្នុង​ទីក្រុង​តូ​ក្យូ៕