ដោយ ៖ ប៊ី

អន្តរជាតិ ៖ មូលនិធិរូបិយវត្ថុអន្តរជាតិ (IMF) បានយល់ព្រមផ្តល់ជំនួយបន្ទាន់ចំនួន ៧៣២លានដុល្លារ សម្រាប់ប្រទេសបង់ក្លាដែស ដើម្បីជួយប្រទេសនេះក្នុងការដោះស្រាយបញ្ហាប្រឈមដែលបានកើតឡើងដោយជំងឺ Covid-19 ដែលបានអនុម័តប្រាក់កម្ចីកាលពីម្សិលមិញ។

នេះគឺជាចំនួនប្រាក់កម្ចីដ៏ធំបំផុតសម្រាប់បង់ក្លាដែសដើម្បីដោះស្រាយជាមួយនឹងការធ្លាក់ចុះសេដ្ឋកិច្ច ដែលរងផលប៉ះពាល់ដោយជំងឺCovid-19។ ជំងឺរាតត្បាតកំពុងជះឥទ្ធិពលយ៉ាងធ្ងន់ធ្ងរដល់សេដ្ឋកិច្ចរបស់ប្រទេសបង់ក្លាដែស។ប្រភពហិរញ្ញប្បទានខាងក្រៅសំខាន់ពីររបស់ប្រទេសនេះគឺការនាំចេញសម្លៀកបំពាក់ និងលំហូរផ្ទេរប្រាក់ត្រូវបានព្យាករថានឹងធ្លាក់ចុះយ៉ាងឆាប់រហ័ស។

IMF បានឱ្យដឹងនៅក្នុងសេចក្តីប្រកាសព័ត៌មានកាលពីម្សិលមិញថា ការឆ្លើយតបគោលនយោបាយចាំបាច់ដើម្បីការពារការរាតត្បាតក្នុងស្រុក រួមទាំងការបិទទីក្រុងសំខាន់ៗ នឹងជះឥទ្ធិពលយ៉ាងខ្លាំងដល់សកម្មភាពសេដ្ឋកិច្ច និងបណ្តាលឱ្យមានកំណើនយឺត។ ដូច្នេះ ដើម្បីឆ្លើយតបទៅនឹងការទូទាត់តុល្យភាព និងតម្រូវការសារពើពន្ធជាបន្ទាន់ IMF បានអនុម័តជំនួយបន្ទាន់ក្រោមមូលនិធិឥណទានរហ័ស និងឧបករណ៍ហិរញ្ញប្បទានរហ័ស។

លោក Antoinette Sayeh អនុប្រធានគ្រប់គ្រង និងជាប្រធានស្តីទីនៃក្រុមប្រឹក្សាប្រតិបត្តិរបស់ IMF បានមានប្រសាសន៍ថា នៅក្នុងជំនួយហិរញ្ញវត្ថុបន្ទាន់របស់ IMF នឹងជួយគ្របដណ្តប់លើគម្លាតហិរញ្ញប្បទាន និងគាំទ្រដល់កិច្ចខិតខំប្រឹងប្រែងរបស់អាជ្ញាធរ ដើម្បីទប់ស្កាត់ផលប៉ះពាល់អវិជ្ជមាននៃការផ្ទុះឡើង និងជំរុញការគាំទ្របន្ថែមពីសហគមន៍អន្តរជាតិ។

ជាមួយគ្នានេះដែរ ធនាគារអភិវឌ្ឍន៍អាស៊ី (ADB) បានផ្តល់ជំនួយចំនួន៥០០លានដុល្លារសម្រាប់ជំនួយថវិកា ដែលត្រូវបានតម្កល់ទុកនៅក្នុងរតនាគាររបស់រដ្ឋាភិបាល។ ជាធម្មតា IMF មិនផ្តល់ប្រាក់កម្ចីដល់បណ្តាប្រទេសជាសមាជិករបស់ខ្លួនដោយគ្មានលក្ខខណ្ឌឡើយ។ ប៉ុន្តែពេលនេះបានយល់ព្រមផ្តល់កម្ចី ដោយគ្មានលក្ខខណ្ឌ៕

ដោយ ៖ វុត្ថា

ភ្នំពេញ ៖ អគារ Chip Mong Tower ដែលកម្ពស់៤៥ជាន់ និង ទុនវិនិយោគប្រមាណជិត ២០០លានដុល្លារ គ្រោងនឹងបញ្ចប់ និងដាក់ឱ្យដំណើរការក្នុងឆ្នាំ២០២២ខាងមុខ ខណៈចាប់តាំងពីការសាងសង់រហូតមដល់ពេលនេះសម្រេចបាន ៣៩ភាគរយ។

លោកឧកញ៉ា លាង ឃុន ប្រធានក្រុមប្រឹក្សាក្រុមហ៊ុន Chip Mong នៅក្នុងពិធីចុះកិច្ចព្រមព្រៀងរវាងអគារពាណិជ្ជកម្មចម្រុះ Chip Mong Tower និងក្រុមហ៊ុនកូមិនខ្មែរ សម្រាប់ការម៉ៅការការងារប្រព័ន្ធមេកានិក ទឹក និងភ្លើង នៅថ្ងៃទី៣ ខែមិថុនា ឆ្នាំ ២០២០នេះ ថា ក្រុមហ៊ុន ជីប ម៉ុង នឹងបន្តរួមចំណែកជាមួយរាជរដ្ឋាភិបាលកម្ពុជាក្នុងការកសាងសេដ្ឋកិច្ចមួយឱ្យរឹងមាំ បើទោះបីស្ថិតក្នុងអំឡុងពេលដែលសេដ្ឋកិច្ចពិភពលោកកំពុងប្រឈមនឹងវិបត្តិដោយសារវីរុស Covid-19 ក៏ដោយ។

លោក Simon Dell អគ្គនាយករងជាន់ខ្ពស់ផ្នែកសណ្ឋាគារ និងបដិសណ្ឋារកិច្ចនៃក្រុមហ៊ុន ជីប ម៉ុង ឱ្យដឹងថា អគារ Chip Mong Tower ត្រូវបានសាងសង់លើផ្ទៃដី ទំហំ៨០០០ម៉ែត្រការ៉េ ដែលមានតម្លៃ៥០លានដុល្លារ និងតួអគារទាំងមូលដែលមាន ផ្ទៃជាង១០ម៉ឺនម៉ែត្រការ៉េ ត្រូវបានវិនិយោគក្នុងទំហំទឹកប្រាក់ប្រមាណ១៥០លានដុល្លារ និងមានចំនួន៤៥ជាន់។

លោកបន្តថា ក្នុងនោះ ២០ជាន់ជាសណ្ឋាគារលំដាប់ផ្កាយ៣ Fairfield by Marriott Phnom Penh, ១០ជាន់សម្រាប់ការិយាល័យ, ៥ជាន់សម្រាប់មណ្ឌលផ្សារទំនើប ជីប ម៉ុង, ៩ជាន់សម្រាប់ចំណតរថយន្ត និងជាន់ក្រោមដី។

លោក Michael Vong នាយកផ្នែកមណ្ឌលផ្សារទំនើបរបស់ក្រុមហ៊ុន Chip Mong Retails បានបញ្ជាក់ថា មណ្ឌលផ្សារទំនើប ជីប ម៉ុង ដែលនឹងមានវត្តមានក្នុងអគារ Chip
Mong Tower នឹងមានផលិតផលផ្សេងៗជាច្រើន ផ្សារទំនើប ភោជនីយដ្ឋាន ហាងកាហ្វេ និងពាណិជ្ជកម្មយីហោល្បីៗថ្មីៗជាច្រើនទៀត ដែលនឹងផ្ដល់បទពិសោធន៍នៃការទិញទំនិញបែបថ្មី និងសម្បូរបែបជូនដល់អតិថិជនផងដែរ។

អគារ Chip Mong Tower កម្ពស់៤៥ជាន់នេះ ត្រូវបានបញ្ចុះបឋមសិលាបើកការសាងសង់ នៅខែមករាឆ្នាំ២០១៩ នឹងក្លាយជាសំណង់អគារប្រវត្តិសាស្ត្រសម័យទំនើបកណ្តាល បេះដូងនៃរាជធានីភ្នំពេញ៕

ដោយ ៖ វុត្ថា

ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បាន និងកំពុងរៀបចំឯកសារស្នើសុំអនុបយោគដីទំហំ ៦០០០ ហិកតា នៅឃុំរយ៉ ស្រុកកោះញ៉ែក ខេត្តមណ្ឌលគិរី សម្រាប់អនុវត្តគម្រោងបែកចែកដីដើម្បីសង្គមកិច្ច និងការអភិវឌ្ឍន៍សេដ្ឋកិច្ចជំហ៊ានទី ៣ (LASED III) ។ នេះ បើតាមរបាយការណ៍របស់ក្រសួងសៀបចំដែនដីគនរូបនីយកម្ម និងសំណង់ដែលបានផ្សព្វផ្សាយកាលពីខែឧសភា ឆ្នាំ២០២០។

ក្រសួងដែនដីបានពន្យល់ថា គម្រោងបែងចែកដីសម្រាប់ការអភិវឌ្ឍសង្គម និងសេដ្ឋកិច្ចជំហាន៣ (LASED-III) នឹងបន្តការគាំទ្រសម្បទានដីសង្គមកិច្ច នៅថ្នាក់ឃុំ របស់រាជរដ្ឋាភិបាលកម្ពុជា ដែលគម្រោងជំហានដំបូង និងជំហាន២ បាន និងកំពុងផ្តល់ជូនគ្រួសារក្រីក្រដែលគ្មានដីសង់លំនៅដ្ឋាន។

គម្រោងជំហាន៣នេះ ក៏នឹងជួយគាំទ្រដល់សហគមន៍ជនជាតិដើមភាគតិច ដែលជាកម្មវិធីរបស់រារដ្ឋាភិបាលផងដែរ តាមរយៈ ការចុះបញ្ជីដីសហគមន៍ជនជាតិដើមភាគតិច (ICLT) និងការផ្តល់សម្បទានដីសង្គមកិច្ច (SLC) ជាមួយនឹងការអភិវឌ្ឍហេដ្ឋារចនាសម្ព័ន្ធសហគមន៍ និងពង្រីកមុខរបរចិញ្ចឹមជីវិត។

គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន៣ នឹងគាំទ្រសកម្មភាពសម្រាប់សម្បទានដីសង្គមកិច្ច (SLC) នៅក្នុងទីតាំង ១៤ កន្លែងដែលមានស្រាប់ និងទីតាំងថ្មីប្រមាណ ១៥ កន្លែងផ្សេងទៀត ។ ដោយទ្បែក សម្រាប់សហគមន៍ជនជាតិដើមភាគតិច គឺសម្រាប់តែសហគមន៍ចំនួន ៣០ ដែលបានទទួលប័ណ្ណកម្មសិទ្ធិដីសហគមន៍រួចហើយ និងសហគមន៍ជនជាតិដើមភាគតិច ចំនួន ១៥ ផ្សេងទៀត បានដាក់ពាក្យសុំមកក្រសួងដែនដី ប៉ុន្តែមិនទាន់បានទទួលទទួលប័ណ្ណកម្មសិទ្ធិដីសហគមន៍នៅឡើយ។

LASED-III ជាគម្រោងថ្នាក់មូលដ្ឋាន នឹងជួយគាំទ្រដល់ការអនុវត្តសកម្មភាពនានា នៅក្នុងបណ្តាខេត្តជាច្រើនក្នុងប្រទេសកម្ពុជា ប៉ុន្តែគេរំពឹងថា ខេត្តទាំងឡាយដែលត្រូវផ្តល់សម្បទានដីសង្គមកិច្ចថ្មី (SLC) និងការចុះបញ្ជីដីសហគមន៍ជនជាតិដើមភាគតិច (ICLT) នឹងត្រូវគ្របដណ្តប់នៅក្នុងខេត្តភូមិភាគឦសាន្តចំនួន៦។ តំបន់ទាំងនោះជាខេត្តដែលមានដង់ស៊ីតេប្រជាជនទាប ក្នុងនោះមានជនជាតិដើមភាគតិចប្រហែល ១៤ភាគរយ ប៉ុន្តែ ៦០ភាគរយ នៅក្នុងខេត្តរតនគិរី និង ៤៦ភាគរយ នៅក្នុងខេត្តមណ្ឌលគីរី ដែលជាតំបន់ខ្ពង់រាបភូមិភាគឦសាន្ត៕

ដោយ ៖ រ៉ាណេត

សៀមរាប ៖ សារមន្ទីរចំនួន៣ ដែលស្ថិតនៅក្រោមការគ្រប់គ្រងដោយអាជ្ញាធរជាតិអប្សរា បានចាប់ផ្តើមបើកទ្វារស្វាគមន៍ការទស្សនារបស់ភ្ញៀវទេសចរឡើងវិញ បន្ទាប់ពីបិទទ្វារមួយរយៈអំឡុងពេលការរាតត្បាតជំងឺ Covid-19 កាលពីពេលកន្លងទៅ។ ការបើកទ្វារឡើងវិញនេះ គឺមានការគិតគូរខ្ពស់ពីសុវត្ថិភាពភ្ញៀវទេសចរដែលអញ្ជើញមកទស្សនា។

អនុប្រធាននាយកអភិវឌ្ឍន៍វប្បធម៌ សារមន្ទីរ និងបទដ្ឋានបេតិកភណ្ឌនៃអាជ្ញាធរជាតិអប្សរា លោក សេង សុធារ៉ា បានមានប្រសាសន៍ឱ្យដឹងថា សារមន្ទីរទាំង៣មានសារមន្ទីរព្រះនរោត្តម សីហនុ-អង្គរ, សារមន្ទីរវាយនភណ្ឌប្រពៃណីអាស៊ី និងសារមន្ទីរកុលាលភាជន៍ឡតានី បានបំពាក់ឧបករណ៍វាស់កម្ដៅ ទឹកអាល់កុល សម្រាប់ត្រួតពិនិត្យ និងការគិតគូរពីសុវត្ថិភាពមិនឱ្យឆ្លងជំងឺ Covid-19 ។ លោកបន្ថែមថា ភ្ញៀវទេសចរទាំងអស់នឹងតម្រូវឱ្យស្ថិតនៅចំណុចគំលាត២ម៉ែត្រពីគ្នា ប្រសិនបើការទស្សនានោះមានចំនួនច្រើន អំឡុងពេលចូលទស្សនាក្នុងសារមន្ទីរ។

ជាមួយគ្នានេះ លោកក៏បានអំពាវនាវដល់សាធារណជន ក៏ដូចជាភ្ញៀវទេសចរជាតិ និងអន្ដរជាតិ សូមអញ្ជើញចូលទស្សនាសារមន្ទីរទាំង៣របស់អាជ្ញាធរជាតិអប្សរា គឺសារមន្ទីរបានត្រៀមខ្លួនរួចរាល់ក្នុងការទទួលស្វាគមន៍ទេសចរគ្រប់ជាតិសាសន៍អំឡុងពេលមានជំងឺ Covid-19 នេះ។ ការការពារនេះ គឺដើម្បីធានាសុវត្ថិភាពទាំងទេសចរ និងបុគ្គលិករបស់សារមន្ទីរ ធ្វើយ៉ាងណាធានាឱ្យបានពីសុវត្ថិភាពនៃការឆ្លងជំងឺ Covid-19។

អាជ្ញាធរជាតិអប្សរា នឹងបន្តការបើកទ្វារទស្សនាដោយឥតគិតថ្លៃ ដើម្បីអបអរខួប២៥ឆ្នាំ ថ្ងៃបង្កើតអាជ្ញាធរជាតិអប្សរា ដែលការប្រកាសនេះចាប់ផ្តើមពីដើមខែ មីនា ឆ្នាំ២០២០ រហូតដល់ចុងខែមករា ឆ្នាំ២០២១ ក្នុងគោលដៅដើម្បីផ្សព្វផ្សាយពីប្រវត្តិសាស្រ្ដ វប្បធម៌ អារ្យធម៌ ទំនៀមទម្លាប់ប្រពៃណីដល់ភ្ញៀវទេសចរគ្រប់ជាតិសាស្រ្ដបានដឹងពីកម្ពុជា។

សារមន្ទីរព្រះនរោត្ដម សីហនុ-អង្គរ និងសារមន្ទីរកុលាលភាជន៍ឡតានី បើកទ្វារពីថ្ងៃអង្គារ ដល់ថ្ងៃអាទិត្យ ចំណែកសារមន្ទីរវាយនភណ្ឌប្រពៃណីអាស៊ី បើកទ្វារពីថ្ងៃពុធ ដល់ថ្ងៃចន្ទ៕

ដោយ ៖ រ៉ាណេត

ភ្នំពេញ ៖ គម្រោងសាងសង់ព្រលានយន្ដហោះអន្តរជាតិភ្នំពេញថ្មី ដែលស្ថិតនៅក្នុងទឹកដីខេត្តកណ្តាល និងខេត្តតាកែវ បច្ចុប្បន្ន កំពុងតែបន្តសកម្មភាពសាងសង់យ៉ាសកម្មជាមួយនឹងការសម្រេចបានលទ្ធផលប្រមាណ៣០ភាគរយ។

ជាមួយនឹងវឌ្ឍនភាពនៃគម្រោងសាងសង់ព្រលានយន្តហោះអន្តរជាតិភ្នំពេញថ្មីនេះ នៅព្រឹកថ្ងៃទី៣ ខែមិថុនា ឆ្នាំ២០២០ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណកម្មការរៀបចំទីតាំងគម្រោងសាងសង់ព្រលានយន្តហោះអន្តរជាតិភ្នំពេញថ្មីបានអញ្ជើញចុះត្រួតពិនិត្យការដ្ឋានសាងសង់ ដោយរួមដំណើរដោយអគ្គនាយកក្រុមហ៊ុន OCIC ពុង ឃាវសែ ដែលជាអ្នកវិនិយោគនៅក្នុងគម្រោងនេះ។

លោក គង់ សោភ័ណ្ឌ អភិបាលខេត្តកណ្តាលបានមានប្រសាសន៍កាលពីពេលកន្លងទៅនេះថា វាជាភព្វសំណាងរបស់ខេត្តកណ្តាលដែលប្រមុខនៃរាជរដ្ឋាភិបាលបានជ្រើសរើសសម្រាប់អភិវឌ្ឍន៍ទៅជាព្រលានយន្តហោះខ្នាតអន្តរជាតិ ដែលធ្វើឱ្យខេត្តមួយនេះកាន់តែទាក់ទាញវិនិយោគិនជាតិ និងអន្តរជាតិឱ្យចូលមកបណ្តាក់ទុនវវិនិយោគនៅក្នុងខេត្តកាន់តែច្រើនក្នុងនាមជាគម្រោងវិនិយោគដ៏ធំលំដាប់ទី១ របស់ខេត្តកណ្តាលផងដែរ ។

លោកបានបញ្ជាក់ថា គម្រោងព្រលានយន្តហោះថ្មីបានសាង់សង់លើផ្ទៃដីទំហំ ២៦០០ ហិកតា ដែលស្ថិតនៅខេត្តកណ្តាល និងតាកែវ។ ទំហំដីនៅខេត្តកណ្ដាល ២២២៧ ក្បាលដី = ២៤៤១ ហិកតា និងខេត្តតាកែវ ៣៦០ ក្បាលដី = ១៥៨ ហិកតា ជាមួយនឹងទុនវិនិយោគ ១៥០០លានដុល្លារ របស់ក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) ដោយដំណាក់កាលទីមួយ នឹងត្រូវបញ្ចប់ការសាងសង់ក្នុងឆ្នាំ២០២៣។

ពាក់ព័ន្ធទៅនឹងផលប៉ះពាល់នៃគម្រោង រដ្ឋបាលខេត្តកណ្តាល បានដោះស្រាយបញ្ហាសំណង់មិនរៀបរយជាមួយប្រជាពលរដ្ឋនៅក្នុងដីព្រលានសរុប ១៧៦ គ្រួសារ ក្នុងនោះ ១១គ្រួសារ ទទួលប្រាក់គោលនយោបាយ ២០០០$ក្នុង១គ្រួសារ និង១៦៥ គ្រួសារទៀត ទទួលយកការដោះដូរដីទៅកន្លែងផ្សេងសម្រាប់សង់លំនៅដ្ឋានរស់នៅ ដោយរាល់ការដោះស្រាយផលប៉ះពាល់ពីគម្រោងព្រលានយន្តហោះនៅក្នុងខេត្តកណ្តាល ឈរលើការយោគយល់ និង ដោះស្រាយដោយសន្តិវិធី ដោយពុំឱ្យប្រជាពលរដ្ឋរូបណាម្នាក់ពិបាកនោះទេ។

ព្រលានយន្តហោះថ្មីនេះ ត្រូវបានរចនាឡើងលំដាប់ថ្នាក់ 4F ជាអាកាសយានដ្ឋានធំបំផុតលំដាប់ទី៩ នៅក្នុងពិភពលោក ដែលស្ថិតនៅលំដាប់ពីក្រោយអាកាសយានដ្ឋាន Chicago O’Hare និងលំដាប់មុខអាកាសយានដ្ឋានអន្តរជាតិ ទីក្រុងប៉េកាំងរបស់ប្រទេសចិន។ នៅពេលសាងសង់ចប់ អាកាសយានដ្ឋានថ្មីនេះ នឹងសមត្ថភាពទទួលយន្តហោះដឹកជញ្ជូនធុនធ្ងន់ផ្លូវឆ្ងាយ៕

ដោយ ៖ រ៉ាណេត

ភ្នំពេញ ៖ រាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច ហិរញ្ញវត្ថុ បានសម្រេចបញ្ចុះពន្ធកាត់ទុកលើការប្រាក់កម្ចីទាំងក្នុង និងក្រៅស្រុកពីអត្រា ១៥ភាគរយ, ១៤ភាគរយ មកនៅត្រឹម ៥ភាគរយសម្រាប់កម្ចីថ្មីរហូតដល់ដំណាច់ឆ្នាំ២០២០។

តបតាមសំណើរបស់ប្រធានសភាពាណិជ្ជកម្មកម្ពុជា អ្នកឧកញ៉ា គិត ម៉េង ក្រសួងសេដ្ឋកិច្ច និងហិរញ្ញវត្ថុ បានសម្រេចបន្ធូរបន្ថយលើការអនុវត្តពន្ធកាត់ទុកលើការប្រាក់សម្រាប់អ្នកផ្តល់កម្ចីក្នុង និងក្រៅស្រុកពីអត្រា ១៥ភាគរយ និង ១៤ភាគរយ មកត្រឹម ៥ភាគរយ សម្រាប់កម្ចីថ្មីដោយអនុវត្តចាប់ពីខែមេសា ឆ្នាំ២០២០។

នៅក្នុងសេចក្ដីសម្រេចបានបញ្ជាក់ថា យោងតាមស្ថានភាពជាក់ស្ដែងនៃការរីករាលដាលនៃវិបត្តិជំងឺឆ្លង Covid-19 ដែលបណ្តាលឱ្យមានផលប៉ះពាល់ដល់គ្រប់វិស័យ ក្រសួងសេដ្ឋកិច្ច និងហិរញ្ញវត្ថុ បានសម្រេចអនុញ្ញាតបន្ថយអត្រាពន្ធកាត់ទុកលើការប្រាក់ចំពោះការទូទាត់ឱ្យបុគ្គលនិវាសនជន និងអនិវាសជន ជូនស្ថាប័នហេរញ្ញវត្ថុ ដោយមានការបែងចែកផ្សេងគ្នា។

នៅក្នុងសេចក្ដីជូនដំណឹងរបស់អគ្គនាយកដ្ឋានពន្ធដារ បានបញ្ជាក់ថា ចំពោះកម្ចីចាស់ កំណត់តាមអត្រា ១០ភាគរយ ដោយអនុវត្តចាប់ពីខែមេសា រហូតដល់ដំណាច់ខែធ្នូ ឆ្នាំ២០២០តែប៉ុណ្ណោះ។ ដោយឡែកចំពោះកម្ចីថ្មី ត្រូវកំណត់អត្រា ៥ភាគរយ ដោយអនុវត្តចាប់ពីខែមេសា រហូតដល់ដំណាច់ឆ្នាំ២០២០ បន្ទាប់មកអត្រា ១០ភាគរយ អនុវត្តចាប់ពីខែមករា ដល់ដំណាច់ខែធ្នូ ឆ្នាំ២០២១ និងចាប់ពីឆ្នាំ២០២២ តទៅ ក្រុមហ៊ុនត្រូវមានកាតព្វកិច្ចពន្ធកាត់ទុកតាមអត្រាធម្មតាស្របតាមច្បាប់ និងបទបញ្ញត្តិស្ដីពីពន្ធដារជាធរមាន។ ប៉ុន្តែក្នុងករណីដែលសហគ្រាសទាំងឡាយណា ដែលធ្វើការទូទាត់សងបំណុលចាស់មុនកិច្ចសន្យាដល់កាលកំណត់ដើម្បីបង្កើតកិច្ចសន្យាថ្មី នឹងមិនទទួលបានការអនុគ្រោះលើកទឹកចិត្តនោះឡើយ។ ប្រសិនបើសហគ្រាសណាបានប្រព្រឹត្តអំពើជៀសវាងពន្ធបែបនេះនឹងត្រូវបង់ពន្ធ និងទទួលរងទោសទណ្ឌស្របតាមច្បាប់ និងបទបញ្ញត្តិស្ដីពីសារពើពន្ធជាធរមាន។

ទីប្រឹក្សាផ្ទាល់ប្រធានសភាពាណិជ្ជកម្មកម្ពុជា លោកឧកញ៉ា នួន រិទ្ធី បានមានប្រសាសន៍ថា ការសម្រេចរបស់រាជរដ្ឋាភិបាលទៅការបន្ធូរបន្ថយលើកអត្រាពន្ធកាត់ទុកលើការប្រាក់ខាងលើនេះ គឺជាការចូលរួមចំណែកក្នុងការស្ដារ និងលើកទឹកចិត្តដ៏ធំធេងរបស់រាជរដ្ឋាភិបាលមកលើវិស័យឯកជន។

លោកឧកញ៉ាបានមានប្រសាសន៍បន្តទៀតថា “ការសម្រេចរបស់រាជរដ្ឋាភិបាល គឺដើម្បីដោះស្រាយផលប៉ះពាល់ពេលកំពុងមានវិបត្តិ និងក្រោយវិបត្តិ Covid-19 ដែលធ្វើឱ្យការកៀងគរជំនួញកម្ចីពីបរទេសដើម្បីទ្រទ្រង់វិស័យឯកជន ក៏ដូចជាវិស័យអចលនទ្រព្យនៅកម្ពុជាឱ្យកាន់តែមានភាពល្អប្រសើរ និងជួយឱ្យវិស័យសេដ្ឋកិច្ចរឹងមាំ ដែលក្នុងករណីនេះគឺរាជរដ្ឋាភិបាលបានគិតគ្រប់ជ្រុងជ្រោយក្នុងការគាំពារលើវិស័យឯកជនយ៉ាងសំខាន់”៕

ដោយៈ រ៉ាណេត

ព្រះសីហនុៈ អនុវត្តយ៉ាងសកម្មទៅតាមផែនការដែលបានកំណត់ និងកិច្ចព្រមព្រៀងទៅលើការពន្លឿនការស្ថាបនា ធ្វើឱ្យប្រសើរឡើងនូវអាកាសយានដ្ឋានអន្តរជាតិខេត្តព្រះសីហនុ ដែលអាចអនុញ្ញាតឱ្យយន្តហោះចុះចត បានច្រើនជាង១៣គ្រឿង ពិសេ​សអាចស្វាគមន៍វត្តមានប្រភេទយន្ដហោះធុនធំបាន ត្រូវបានថ្នាក់ដឹកនាំនៃរដ្ឋលេខាធិការដ្ឋានអាកាសចរស៊ីវិលបានចុះហត្ថលេខា លើរបាយការណ៏ចុងក្រោយផែនការមេជាផ្លូវការ។

រដ្ឋមន្រ្តីប្ថរតិភូអមនាយករដ្ឋមន្រ្តី ទទួលបន្ទុករដ្ឋលេខាធិការដ្ឋានអាកាសចរស៊ីវិល លោកបណ្ឌិត ម៉ៅ ហាវណ្ណាល់ នៅព្រឹកថ្ងៃទី២ ខែមិថុនា ឆ្នាំ២០២០នេះ បានចុះហត្ថលេខាលើរបាយការណ៍ចុងក្រោយ នៃការរៀបចំផែនការមេនៃអាកាសយានដ្ឋានអន្តរជាតិខេត្តព្រះសីហនុ ដែលរៀបចំដោយក្រុមហ៊ុនសម្បទានអាកាសយានដ្ឋាន ( SCA) ។

រដ្ឋាភិបាលតាមរយៈរដ្ឋលេខាធិការដ្ឋានអាកាសចរស៊ីវិល បានជំរុញនិងកំណត់ឱ្យក្រុមហ៊ុនCambodia Airport ពន្លឿនការការសាងសង់ អាកាសយានដ្ឋានអន្តរជាតិក្រុងព្រះសីហនុ ធ្វើយ៉ាងណាឱ្យចប់នៅពាក់កណ្តាលឆ្នាំ២០២២ ខាងមុខនេះ ខណៈក្រុមហ៊ុនមួយនេះ បាននឹងកំពុងសាងសង់យ៉ាងសកម្ម។

នៅក្នុងផែនការមេ ដែលធ្វើឱ្យប្រសើរឡើងនូវអាកាសយានដ្ឋាន អន្តរជាតិខេត្តព្រះសីហនុ ដែលគ្រោងនឹងបញ្ចក់នៅពាក់កណ្តាលឆ្នាំ២០២២ ខាងមុខនេះរួមមាន

១. ការរៀបចំស្ថានីយ៍អ្នកដំណើរថ្មី

– ដំណាក់កាលទី១ សម្រាប់ផែនការឆ្នាំ២០២០ ដល់២០៣០ ដែលអាចទទួលអ្នកដំណើរបា៣, ៦លាននាក់។

– ដំណាក់កាលទី២ សម្រាប់ផែនការឆ្នាំ២០៣០ ដល់២០៤០ សម្រាប់ទទួលអ្នកដំណើរឱ្យបាន៥ លាននាក់ តែប្រសិនបើប្រទេសកម្ពុជាមានការរីកចម្រើន និងមានអ្នកដំណើរច្រើន ក្រុមហ៊ុនអាចនឹងពង្រីកវិសាលភាពរហូតដល់ ១០ លាននាក់(ក្នុងការរំពឹងទុក)។

២. ការពង្រីក និងពង្រឹងផ្លូវរត់ Runway ផ្លូវរត់ពី ចំងាយ ២៥០០ម៉ែត្រ ទៅ៣៣០០ ម៉ែត្រ (ត្រូវបានបញ្ចប់)និងគ្រោងពង្រីកផ្លូវរត់ដល់ប្រវែង៣៨០០ម៉ែត្រ។

៣. ការពង្រីក និងពង្រឹងផ្លូវបរ Taxi ways ចំងាយ៤២០ម៉ែត្រ

៤. ការសាងសង់ចំណតយន្តហោះ សម្រាប់ដំណាក់កាលទី១ អាចមានសមត្ថភាពចតបាន១៣យន្តហោះ និងដំណាក់កាលទី២ អាចចតបាន១៩យន្តហោះ។

កាលពីថ្ងៃទី២២ ខែឧសភា ឆ្នាំ២០២០ កន្លងទៅនេះ ដំណាក់កាលចុងក្រោយនៃការពង្រឹងហេដ្ឋារចនាសម្ព័ន្ធសំខាន់ៗ ដែលនៅសេសសល់គឺការងារ ដាក់តម្លើងភ្លើងបំភ្លឺផ្លូវហោះហើរ ។ នៅពេលឆាប់ៗខាងមុខនេះ អាកាសយានដ្ឋានអន្តរជាតិខេត្តព្រះសីហនុ នឹងអាចទទួលយន្តហោះធំៗ ដូចជា Airbus A350-1000 និង Boeing 777-300ER និងមានជើងហោះហើរត្រង់ ពីបណ្តាប្រទេសមួយចំនួនមកកាន់ពីខេត្តព្រះសីហនុ៕