ចំណេះដឹង! អ្វីជាប្រាក់ចំណូលជាប់ពន្ធ ?

ដោយវុត្ថា

ភ្នំពេញៈចំណូលជាប់ពន្ធជាប្រាក់ចំណូលសុទ្ធបានមកពីលទ្ធផលទាំងអស់នៃប្រតិបត្តិការអារជីវកម្មគ្រប់ប្រភេទរួមបញ្ចូលទាំងចំណូលមូលធនដែលសម្រេចបានក្នុងពេលកំពុងប្រកបអាជីវកម្មឬនៅពេលបញ្ចប់អាជីវកម្មព្រមទាំងប្រាក់ចំណូលពីទ្រព្យសកម្មហិរញ្ញវត្ថុឬទ្រព្យសកម្មវិនិយោគការប្រាក់ថ្លៃឈ្នួលនិងសួយសារផង។

ប្រាក់ចំណូលជាប់ពន្ធក៏រួម បញ្ចូលផងដែរនូវចំណូលមូលធនទាំងអស់ ពីអចលនទ្រព្យ ទ្រព្យហិរញ្ញវត្ថុទ្រព្យវិនិយោគ ដែលសម្រេចបានមកពីប្រតិបត្តិ ការនានាក្រៅពីប្រតិបត្តិការអាជីវកម្ម។

អត្រាពន្ធលើប្រាក់ចំណូលប្រចាំឆ្នាំមានដូចតទៅៈ

១– ២០ភាគរយចំពោះប្រាក់ចំណូលដែលសម្រេចបានដោយនីតិបុគ្គល

២–៣០ភាគរយចំពោះប្រាក់ចំណូល ដែលសម្រេចបានក្រោមកិច្ចសន្យា បែងចែកផលិត​ផលប្រេងកាត និងឧស្ម័ន ធម្មជាតិ ឬសម្រេចបានពីការធ្វើអាជីវកម្ម លើធនធានធម្មជាតិរួមទាំង ព្រៃឈើ រ៉ែ មាស ឬត្បូងថ្មមានតម្លៃនានា។

៣– ០ភាគរយ ចំពោះប្រាក់ចំណូលរបស់គម្រោងវិនិយោគ មានលក្ខណៈសម្បតិ្តគ្រប់គ្រាន់ដែលស្ថិតនៅក្នុងរយៈ ពេលលើកលែងពន្ធ ដែលកំណត់ដោយក្រុមប្រឹក្សាអភិវឌ្ឍន៍កម្ពុជា។

៤– តាមតារាងអត្រាពន្ធកំណើន តាមថ្នាក់ខាងក្រោម ចំពោះប្រាក់ចំណូលដែលសម្រេចបានដោយរូបវន្តបុគ្គល សហគ្រាសឯកបុគ្គល និងចំណែកដែលត្រូវបែងចែកឱ្យសមាជិកម្នាក់ៗរបស់ក្រុមហ៊ុនសហកម្មសិទ្ធិ ដែលមិនត្រូវបានចាត់ទុកជានីតិបុគ្គលៈ។

ភាគនៃប្រាក់ចំណូលជាប់ពន្ធប្រចាំឆ្នាំ  អត្រាពន្ធ

ពី  ០ ៛  ដល់  ១២.០០០.០០០ ៛  ០%

ពី  ១២.០០០.០០១ ៛  ដល់  ១៨.០០០.០០០ ៛  ៥%

ពី  ១៨.០០០.០០១ ៛  ដល់  ១០២.០០០.០០០ ៛  ១០%

ពី  ១០២.០០០.០០១ ៛  ដល់  ១៥០.០០០.០០០ ៛  ១៥%

      លើសពី  ១៥០.០០០.០០០ ៛  ២០%

៥– ចំពោះសហគ្រាសដែលមានសកម្មភាពជាសំខាន់ក្នុងការធានារ៉ាប់រងឬ ធានារ៉ាប់រងបន្តលើជីវិត ទ្រព្យសម្បត្តិ ឬហានិភ័យផ្សេងៗ ពន្ធលើប្រាក់ចំណូលត្រូវបានកំណត់ខាងក្រោមៈ

ក. ៥% នៃបុព្វលាភធានារ៉ាប់រងដុល ដែលទទួលបាននៅក្នុងឆ្នាំជាប់ពន្ធ ចំពោះការធានារ៉ាប់រង ឬធានារ៉ាប់រងបន្តលើទ្រព្យសម្បត្តិ ឬនូវហានិភ័យផ្សេងៗនៅព្រះរាជាណាចក្រកម្ពុជា

ខ. ចំពោះសកម្មភាពធានារ៉ាប់រង ឬធានារ៉ាប់រងបន្តលើជីវិត ដែលមានលក្ខណៈសន្សំ និងសកម្មភាពដទៃទៀតក្រៅពីធានារ៉ាប់រង ឬធានារ៉ាប់រងបន្តលើទ្រព្យសម្បត្តិ ឬហានិភ័យផ្សេងៗ ពន្ធលើប្រាក់ចំណូលត្រូវបានកំណត់តាមមាត្រា ២០ថ្មី(មួយ)៕

ចិននឹងជួយរៀបចំពិធីបើក-បិទស៊ីហ្គេម ឆ្នាំ២០២៣ នៅកម្ពុជា

ដោយ៖ វុត្ថា

ភ្នំពេញ៖ រដ្ឋាភិបាលចិន បានចង្អុលបង្ហាញឲ្យក្រុមហ៊ុនដ៏ធំមួយដែលមានបទពិសោធន៍រៀបចំព្រឹត្តិការណ៍អូឡាំពិក និងព្រឹត្តិការណ៍កីឡាធំៗជាច្រើននៅចិន ពិសេសអ្នកផលិតកម្មវិធីបើក-បិទដ៏មានឥទ្ធិពល ដើម្បីមកជួយដល់កម្ពុជា ក្នុងការត្រៀមរៀបចំពិធីបើក-បិទព្រឹត្តិការណ៍ស៊ីហ្គេម លើកទី៣២ ឆ្នាំ២០២៣។

នេះ បើយោងតាមកិច្ចប្រជុំប្រចាំសប្ដាហ៍របស់គណៈអចិន្ដ្រៃយ៍ នៃគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) កាលពីថ្ងៃទី ១៥ ខែកញ្ញា ឆ្នាំ ២០២០ម្សិលមិញនេះ ក្រោមការដឹកនាំរបស់លោកបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC។

លោក វ៉ាត់ ចំរើន អគ្គលេខាធិការ CAMSOC ឱ្យដឹងថា កិច្ចប្រជុំនេះ ផ្ដោតលើរបៀបវារៈ២ ទី១-ពិភាក្សាពីប្រតិទិនការងារ ដែលគណៈកម្មការជំនាញនីមួយៗ ត្រូវរៀបចំឲ្យហើយ ដើម្បីត្រៀមអនុវត្តចាប់ពីឥលូវ និងនៅដើមឆ្នាំ២០២០ ។ ទី២-ជជែកពីការត្រៀមរៀបចំពិធីបើក-បិទ ដែលជាពិធីដ៏មានសារៈសំខាន់ ដើម្បីបង្ហាញពីសក្ដានុពលជាតិ ទៅលើឆាកអន្ដរជាតិ ក្នុងនោះក៏មានការចូលរួមសហការជួយពីភាគីចិនផងដែរ។

លោកបន្តថា “ពិធីបើក-បិទរបស់យើង នឹងធ្វើការជាមួយភាគីចិន ដែលរដ្ឋាភិបាលចិន និងគណៈកម្មាធិការជាតិអូឡាំពិកចិន បានចង្អុលបង្ហាញឲ្យក្រុមហ៊ុនមួយ ដែលធ្លាប់រៀបចំអូឡាំពិក និងព្រឹត្តិការណ៍កីឡាធំៗ នៅសាធារណរដ្ឋប្រជានិតចិន ពិសេសយើងបានអ្នកផលិតកម្មវិធីបើក-បិទដ៏មានឥទ្ធិពល និងមានបទពិសោធន៍នៅចិន នឹងចូលរួមរៀបចំឲ្យកម្ពុជា ហើយជាអ្នកផលិតកម្មវិធីមួយ ដែលពិភពលោកទទួលស្គាល់ និងល្បីល្បាញនៅចិន”។

លោកបន្ថែមថា “គាត់(អ្នកផលិតកម្មវិធីបើក-បិទ) មិនងាយចេញមកក្រៅប្រទេសទេ ប៉ុន្ដែសម្រាប់កម្ពុជា ខាងភាគីចិន បានផ្ដល់គាត់ឲ្យមកជួយកម្ពុជា ក្នុងការរៀបចំ ប៉ុន្ដែគាត់គ្រាន់តែមក ដើម្បីបញ្ចូលនូវបទពិសោធន៍របស់គាត់ទេ តែអ្នកធ្វើពិតប្រាកដ អ្នកដែលរៀបចំរចនាបថពិតប្រាកដ គឺកម្ពុជាយើង ពិសេសគឺពាក់ព័ន្ធនឹងវប្បធម៌ អរិយធម៌ខ្មែរ គឺយើងត្រូវការជាមួយក្រសួងវប្បធម៌ និងវិចិត្រសិល្បៈរបស់យើង”។ តាមគម្រោងអ្នកជំនាញនេះ នឹងមកកម្ពុជា ចន្លោះខែតុលា ដល់ខែធ្នូខាងមុខ។

ទន្ទឹមជាមួយគ្នា លោកបណ្ឌិត ថោង ខុន ក៏បានជំរុញឲ្យការរៀបចំកម្មវិធីការងារលម្អិត ដើម្បីដាក់ឆ្លងថ្នាក់ដឹកនាំ CAMSOC ក៏ដូចជាការងារត់ភ្លើងគប់ និងពិធីផ្សេងៗ ដែលទាក់ទងជាមួយព្រះបរមរាជវាំង ដើម្បីសុំគោលការណ៍សម្ដេចតេជោនាយករដ្ឋមន្ដ្រី ក្នុងការអនុញ្ញាតឲ្យពាក់ព័ន្ធជាមួយព្រះបរមរាជវាំង ឬក្រសួងការបរទេស និងស្ថានទូតកម្ពុជា តាមបណ្ដាប្រទេសអាស៊ាន ដែលត្រូវត្រៀមជួយក្នុងពិធីរត់ភ្លើងគប់ស៊ីហ្គេម ក៏ដូចជាអាជ្ញាធរគ្រប់រាជធានី-ខេត្ត ដើម្បីគាំទ្រក្នុងការរៀបចំផងដែរ៕

គ្រឹះស្ថាន​មីក្រូហិរញ្ញវត្ថុ ប្រា​សាក់ ម.ក ផ្ញើ​សារ​ជូនពរ​អតិថិជន និង​ភាគី​ពាក់ព័ន្ធ​ក្នុងឱកាស​បុណ្យកាន់បិណ្ឌ​និង​ភ្ជុំបិណ្ឌ

ដោយ ប្រា​សាក់

ភ្នំពេញ៖ នាឱកាស បុណ្យកាន់បិណ្ឌ​និង​ភ្ជុំបិណ្ឌ នេះ គណៈ​គ្រប់គ្រង​នៃ​គ្រឹះស្ថាន​មីក្រូហិរញ្ញវត្ថុ ប្រា​សាក់ ម.ក សូម​ថ្លែងអំណរគុណ​យ៉ាង​ស្មោះ​អស់ពីដួងចិត្ត​ចំពោះ​ភាគី​ពាក់ព័ន្ធ​ទាំងអស់​រួមមាន ភាគ​ទុ​និក ក្រុមប្រឹក្សាភិបាល បុគ្គលិក និយោជិត​គ្រប់លំដាប់​ថ្នាក់ ដែល​បាន​ចូលរួម​អនុវត្ដ​ការងារ​ប្រកបដោយ​ការទទួលខុសត្រូវ​ខ្ពស់ និង​សូម​អរគុណ​ចំពោះ​អតិថិជន​ទាំងអស់​ដែល​តែងតែ​គាំទ្រ​ផលិតផល និង​សេវា​របស់​ប្រា​សាក់ ពិសេស​សូម​គោរព​ថ្លែងអំណរគុណ​ចំពោះ​រាជរដ្ឋាភិបាល​កម្ពុជា ជាពិសេស ធនាគារជាតិ​នៃ​កម្ពុជា និង​អាជ្ញាធរ​ដែនដី ដែល​តែងតែ​គាំទ្រ​ប្រតិបត្តិការ​របស់​ប្រា​សាក់។

ទន្ទឹមគ្នានេះ សូម​ចូលរួម​ប្រារព្ធ​ពិធីបុណ្យ​សាសនា​ដ៏​ធំ​នេះ​ប្រកបដោយ​ការទទួលខុសត្រូវ ស្របតាម វិធានការ​សុវត្ថិភាព​សុខភាព​ដើម្បី​បង្ការ​ការឆ្លង​ជំងឺ​កូ​វីដ-១៩ នៃ​ក្រសួងសុខាភិបាល អង្គការ​សុខភាព​ពិភពលោក និង​សេចក្ដីណែនាំ​របស់​ក្រសួង​ធម្មការ និង​សាសនា និង​សូមឱ្យ​ការធ្វើដំណើរ​កំសាន្ត​ជិត​ឆ្ងាយ​របស់លោក​អ្នក​ប្រកប​តែ​សុខ​សុវត្ថិភាព។

សូម​អនុមោទនា​បុណ្យកាន់បិណ្ឌ និង​ភ្ជុំបិណ្ឌ ឆ្នាំជូត ទោស័ក ព.ស. ២៥៦៤! ក្នុងនាម​គ្រឹះស្ថាន​មីក្រូហិរញ្ញវត្ថុ ប្រា​សាក់ ម.ក គណៈ​គ្រប់គ្រង​ប្រា​សាក់ សូម​គោរព​ជូនពរ​ចំពោះ សម្ដេច ទ្រង់ ឯកឧត្ដម អ្នកឧកញ៉ា លោកជំទាវ លោក លោកស្រី នាង​កញ្ញា ព្រមទាំង​ក្រុមគ្រួសារ ជួបប្រទះ​តែ​បវរ​សួស្ដី សិរី​មង្គល វិបុល​សុខ សុភមង្គល និង​រីកចម្រើន​ជាមួយគ្នា​ជានិច្ច​និរន្តរ៍ និង​សមប្រកប​តែ​នឹង​ពុទ្ធពរ​ទាំង​បួន​ប្រការ​គឺ អាយុ វណ្ណៈ សុ​ខៈ ពលៈ កុំបី​ឃ្លៀងឃ្លាត​ឡើយ ៕

ធនាគារអភិវឌ្ឍន៍អាស៊ីៈ តំបន់អាស៊ីចាប់ផ្តើមងាកចេញពីវិបត្តិសេដ្ឋកិច្ចសកល

ដោយៈម៉ាណេត

ភ្នំពេញៈ សេដ្ឋកិច្ចនៅទូទាំងទ្វីបអាស៊ី(ADB) កំពុងអភិវឌ្ឍនឹងធ្លាក់ចុះជាលើកដំបូងនៅឆ្នាំនេះ ក្នុងរយៈពេលជិត៦ទសវត្សរ៍ ប៉ុន្តែសេដ្ឋកិច្ចនឹងងើបឡើងវិញនៅឆ្នាំក្រោយ ខណៈតំបន់នេះចាប់ផ្តើមងាកចេញពីការវិបត្តិសេដ្ឋកិច្ច ដែលបណ្តាលមកពីជំងឺ COVID-19។ នេះបើយោងតាមរបាយការណ៍ដោយធនាគារអភិវឌ្ឍន៍អាស៊ី (ADB) នៅថ្ងៃទី១៥ ខែកញ្ញា ឆ្នាំ២០២០។

របាយការណ៍ទស្សនវិស័យបច្ចុប្បន្នភាព នៃការអភិវឌ្ឍអាស៊ី (ADO) ឆ្នាំ ២០២០ បានព្យាករណ៍ថា កំណើនផលិតផលសរុបក្នុងស្រុក០.៧ភាគរយ សម្រាប់កំណើននៅអាស៊ីនៅឆ្នាំនេះ ដែលជាកំណើនសេដ្ឋកិច្ចអវិជ្ជមានលើកដំបូង ចាប់តាំងពីដើមទសវត្សរ៍១៩៦០។ កំណើនសេដ្ឋកិច្ចនឹងកើនឡើងដល់ ៦,៨% ក្នុងឆ្នាំ ២០២១។ នេះនឹងនៅតែធ្វើឱ្យសេដ្ឋកិច្ចនៅឆ្នាំក្រោយ ទាបជាងការព្យាករណ៍ ទុកមុនពេលការផ្ទុះឡើងនៃជំងឺCOVID-19 ដែលបង្ហាញថា អក្សរL ជាជាងអក្សរVក្នុងការងើបឡើងវិញ។ ប្រហែល៣ ភាគ៤ នៃសេដ្ឋកិច្ចក្នុងតំបន់រំពឹងថា នឹងមានកំណើនអវិជ្ជមាននៅឆ្នាំ២០២០។

លោកYasuyuki Sawada ប្រធានសេដ្ឋវិទូADBមានប្រសាសន៍ថា “សេដ្ឋកិច្ចភាគច្រើននៅក្នុងតំបន់អាស៊ី និងប៉ាស៊ីហ្វិកអាចរំពឹងថា នឹងមានផ្លូវរីកចម្រើនដ៏លំបាកមួយសម្រាប់ឆ្នាំ ២០២០”។ លោកបន្ថែមថា “ការគំរាមកំហែងផ្នែកសេដ្ឋកិច្ច ដែលបង្កឡើងCOVID-19 គឺនៅតែមានសក្តានុពលនៅឡើយ ខណៈដែលរលកលើកទី១ ឬការផ្ទុះឡើងវិញអាចបណ្តាលឱ្យមានវិធានការទប់ស្កាត់បន្ថែមទៀត”។

លោកបានបន្តថា “ការចាត់វិធានការ និងសម្របសម្រួលជាជំហានៗ ដើម្បីដោះស្រាយជំងឺរាតត្បាត ដែលមានអាទិភាពគោលនយោបាយ ផ្តោតលើការការពារអាយុជីវិត និងជីវភាពរបស់ប្រជាជន ដែលងាយរងគ្រោះបំផុត និងធានាឱ្យមានការវិលត្រឡប់មកធ្វើការវិញដោយសុវត្ថិភាព និងចាប់ផ្តើមសកម្មភាពអាជីវកម្មឡើងវិញ នឹងបន្តមានសារសំខា​ន់ ដើម្បីធានាការងើបឡើងវិញក្នុងរបស់តំបន់ ប្រកបដោយបរិយាប័ន និងមាននិរន្តរភាព”។

ជំងឺរាតត្បាតរីករាលដាលរយៈពេលវែង នៅតែជាហានិភ័យដ៏ធំបំផុតចំពោះទស្សនវិស័យកំណើនក្នុងតំបន់នៅឆ្នាំនេះ និងឆ្នាំក្រោយ។ ដើម្បីកាត់បន្ថយហានិភ័យ រដ្ឋាភិបាលក្នុងតំបន់ បានផ្តល់ការឆ្លើយតបជាគោលនយោបាយជាច្រើន រួមមាន កញ្ចប់ជំនួយគោលនយោបាយ ដែលភាគច្រើនគាំទ្រដល់ប្រាក់ចំណូល ដល់ចំនួន៣,៦ទ្រីលានដុល្លារ ដែលស្មើនឹងប្រមាណ១៥ ភាគរយនៃផលិតផលក្នុងស្រុក។

ហានិភ័យធ្លាក់ចុះផ្សេងទៀត កើតឡើងពីភាពតានតឹង ខាងភូមិសាស្ត្រនយោបាយ រួមទាំងការកើតឡើងនៃជម្លោះពាណិជ្ជកម្ម និងបច្ចេកវិទ្យារវាងសហរដ្ឋអាមេរិក និងសាធា​រណរដ្ឋប្រជាមានិតចិន ក៏ដូចជាភាពងាយរងគ្រោះខាងហិរញ្ញវត្ថុ ដែលអាចបង្កឡើងដោ​យជំងឺរាតត្បាតរយៈពេងវែង។

ចិនគឺជាសេដ្ឋកិច្ចមួយ ក្នុងចំណោមសេដ្ឋកិច្ចមួយចំនួននៅក្នុងតំបន់ ដែលកំពុងឆ្លើយតបនឹងការធ្លាក់ចុះ។

សេដ្ឋកិច្ចប្រទេសនេះត្រូវបានរំពឹងថានឹងកើនឡើង១,៨%នៅឆ្នាំនេះ និង៧,៧% ក្នុងឆ្នាំ២០២១ ជាមួយនឹងវិធានការណ៍សុខភាពសាធារណៈ ដែលទទួលបានជោគជ័យសម្រាប់កំណើន។ នៅក្នុងប្រទេសឥណ្ឌា ដែលបានបិទទ្វារប្រទេស បានរាំងស្ទះដល់ការចំណាយរបស់អតិថិជន និងអាជីវកម្ម ផលិតផលក្នុងស្រុកសរុបបានធ្លាក់ចុះ២៣,៩ ភាគរយនៅក្នុងត្រីមាសទីមួយនៃឆ្នាំនេះ និងសេដ្ឋកិច្ចត្រូវបានព្យាករណ៍ថានឹងធ្លាក់ចុះ៩ភាគរយក្នុងឆ្នាំ២០២០ មុនពេលងើបឡើងវិញ៨ភាគរយនៅឆ្នាំសារពើពន្ធ ២០២១។

អនុតំបន់អាស៊ីកំពុងរំពឹងថា នឹងមានកំណើនអវិជ្ជមាននៅឆ្នាំនេះ លើកលែងតែអាស៊ីបូព៌ា ដែលត្រូវបានព្យាករណ៍ថានឹងកើនឡើង១,៣% និងងើបឡើងវិញយ៉ាងខ្លាំងដល់៧,០ភាគរយក្នុងឆ្នាំ២០២១។សេដ្ឋកិច្ចខ្លះពឹងផ្អែកយ៉ាងខ្លាំងលើពាណិជ្ជកម្មនិងទេសចរណ៍ជាពិសេសនៅប៉ាស៊ីហ្វិកនិងអាស៊ីខាងត្បូងប្រឈមមុខនឹងការធ្លាក់ចុះទ្វេដងនៅឆ្នាំនេះ។

ការព្យាករណ៍បានបង្ហាញថា ភាគច្រើននៃទ្វីបអាស៊ីកំពុងរីកចម្រើន នឹងងើបឡើងវិញនៅឆ្នាំក្រោយ៕

ការសិក្សាៈ ប្រជាជនរស់នៅទីក្រុងនិងទីប្រជុំជននានានៅកម្ពុជានឹងកើនដល់៧លាននាក់

ដោយស៊ីវ ម៉េង

ភ្នំពេញ ការសិក្សាថ្មីមួយដែលធ្វើឡើងដោយក្រសួងរៀបចំដែនដី នគរូបនីយកម្មនិងសំណង់បានរកឃើញថា ប្រជាជនរស់នៅទីក្រុង និងតាមទីប្រជុំជននានានឹងកើនដល់​៧លាននាក់នៅឆ្នាំ២០៣០ខាងមុខ។

តាមរបាយការណ៍របស់ក្រសួងរៀបចំដែនដីនរគរូបនីយកម្ម និងសំណង់ដែលបា​ន​ចេញផ្សាយកាលពីពេលកន្លងមកបានឲ្យដឹងថា បើគិតចាប់ពីឆ្នាំ២០១៥ដល់ឆ្នាំ២០៣០ចំនួនប្រជាជននៅតាមទីប្រជុំជន និងទីក្រុងធំៗ និងកើនពី៤ទៅ៧លាននាក់។​ កំណើនប្រជាសាស្រ្តនេះ នឹងទាមទារឲ្យមានការផ្តត់ផ្គង់លំនៅដ្ឋានដ៏ច្រើន រហូតដល់៨៥ម៉ឺនខ្នងដល់ឆ្នាំ២០៣០ ពោលគឺការផ្គត់ផ្គង់ប្រចាំឆ្នាំត្រូវមានប្រមាណជាង៥​ម៉ឺនខ្នង។

ជាមួយគ្នានេះយោងតាមការសិក្សារបស់ក្រុមហ៊ុនUrban Living Solutionកាលពីឆ្នាំ២០១៨ក៏បានរកឃើញផងដែរថា នៅឆ្នាំ២០២៥ប្រជាពលរដ្ឋរស់នៅក្រុងភ្នំពេញ នឹងកើនដល់៤,៥លាននាក់ ជាពេលវេលាដែលធ្វើឲ្យប្រជាជនកាន់តែច្រើន នឹងរស់នៅតាមខុនដូ ដោយសារទី១ កំនើនប្រជាសាស្រ្តធ្វើឲ្យមានការកកស្ទះចរាចរណ៍ខ្លាំង ទី២ តម្លៃអ​ចលនទ្រព្យ ពិសេសលំនៅដ្ឋាននឹងមានតម្លៃខ្ពស់ ដែលប្រជាពលរដ្ឋថ្នាក់កណ្តាលមិនមាន​លទ្ឋភាពទិញលំនៅដ្ឋាននៅក្នុងទីក្រុងបាន តែពួកគេអាចទិញនៅជាយក្រុង ដែលលំបាកក្នុងការធ្វើដំណើរ។

ទី៣ ការរីកចម្រើនបច្ចេកវិទ្យា នឹងធ្វើឲ្យគុណភាពជីវិតប្រសើរឡើង ដោយអ្នករស់នៅតាមខុនដូ ឬលំនៅដ្ឋាននានាអាចកុំម៉ង់អាហារ ទទួលទានកាន់តែ​ងាយស្រួល និងទី៤ លក្ខខ័ណ្ឌកន្លែងការងារ ដែលប្រជាពលរដ្ឋមិនចង់រស់នៅឆ្ងាយពីការងារ ហើយពួកគេ​ងាកមករស់នៅខុនដូ ដែលស្ថិតនៅជិតកន្លែងការងាររបស់ពួកគេ។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុនCBRE Cambodiaបានមានប្រសាសន៍ថា ប្រជាពលរដ្ឋរស់នៅក្រុងភ្នំពេញ មិនមានចំនួនច្រើននោះទេ គឺមួយគីឡូម៉ែត្រ មានតង់ស៊ីតេត្រឹមជាង២០០០នាក់ ប៉ុន្តែបញ្ហាកកស្ទះចរាចរណ៍មានការកើនឡើងខ្ពស់ ខុសពីបណ្តាប្រទេសក្នុងតំបន់ដូចជាទីក្រុងបាងកក ប្រទេសថៃ ទីក្រុងហូជីម៉ិញ​ប្រទេសវៀតណាម ដែលមានប្រជាជនរស់នៅចន្លោះ៤០០០ ទៅ៥០០០នាក់ក្នុងមួយគីឡូម៉ែត្រ តែបញ្ហាចរាចរណ៍ហាក់មិនអាក្រក់ណាស់ណានោះទេ។

អ្នកនាងបន្តថា “រដ្ឋាភិបាលគួរចាត់វិធានការណ៍ ទៅលើបញ្ហាសណ្តាប់ធ្នាប់ចរាចរ ណ៍ តាមរយៈការដាក់ចេញវិធានការណ៍អប់រំ និងជំរុញឲ្យអ្នកបើកបរគោរពច្បាប់ តាមរយៈការធ្វើយ៉ាងណាឲ្យពួកគេយល់ដឹងពីច្បាប់”៕

រដ្ឋាភិបាលសម្រេចអនុម័តលើគម្រោងវិនិយោគថ្មីចំនួន២មានទុនសរុបជាង៨លានដុល្លារ

ដោយៈ រ៉ាណេត

ភ្នំពេញៈ តបតាមសំណើស្នើសុំវិនិយោគរបស់ក្រុមហ៊ុនចំនួន២ដែលមានទុនវិនិយោគសរុបជាង៨លានដុល្លារស្ថិតនៅក្នុងវិស័យឧស្សាហកម្មគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចចេញវិញ្ញាបនប័ត្រចុះបញ្ជីជាស្ថាពរ។

តាមរយៈបណ្តាញផ្សព្វផ្សាយអេឡិចត្រូនិក ផ្លូវការរបស់ក្រុមប្រឹក្សាអភិវឌ្ឍន៍កម្ពុជាបានបញ្ជាក់ថា ក្រុមហ៊ុនដែលទទួលបានការគាំទ្រ ខាងលើនេះរួមមានដូចខាងក្រោម ៖

ទី១ ក្រុមហ៊ុនJIN XINSHENG (CAMBODIA) CO., LTD.  គម្រោងបង្កើតរោងចក្រផលិតក្រដាសទ្រនាប់ពុម្ព ទ្រនាប់កអាវ ស្កុត និងខារអំបោះ ដែលមានទីតាំងវិនិយោគស្ថិតនៅក្នុងសួនឧស្សាហកម្ម វៀលស៊ុនអគារA ផ្លូវជាតិលេខ៤ ភូមិផ្សារកំបូល សង្កាត់កំបូល ខណ្ឌកំបូល រាជធានីភ្នំពេញ មានទុនវិនិយោគប្រមាណ៥លានដុល្លារអាមេរិក និងអាចបង្កើតការងារបានចំនួន១៩៨នាក់។

ទី២ ក្រុមហ៊ុន G.C.H INTERNATIONAL TRADE CO., LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ៣,២លានដុល្លារអាមេរិក និងអាចបង្កើតការងារបានចំនួន ១.០២៨នាក់៕

រដ្ឋមន្ត្រីក្រសួងការងារៈកម្ពុជាចាំបាច់ត្រូវបង្កើនភាពទាក់ទាញការវិនិយោគថ្មីបន្ថែម

ដោយៈ រ៉ាណេត

ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានលើកឡើងថា កម្ពុជា ចាំបាច់ត្រូវតែខិតខំរិះរកដំណោះស្រាយ និងវិធីសាស្ត្រក្នុងការទាក់ទាញទុនវិនិយោគប្រភេទថ្មីៗបន្ថែមទៀត ដើម្បីផ្តល់ការងារ និងប្រាក់ចំណូលកាន់តែប្រសើរឡើងសម្រាប់ប្រជាពលរដ្ឋ។

លោក អ៊ិត សំហេង រដ្ឋមន្ត្រីក្រសួងការងារ បណ្តុះបណ្តាល និងវិជ្ជាជីរៈ បានមានប្រសាសន៍នៅក្នុងកិច្ចប្រជុំលើកទី២ របស់ក្រុមការងារយន្ដការត្រីភាគីបូក សម្រាប់ពិភា  ​ក្សាការធ្វើវិសោធនកម្មច្បាប់ស្តីពីការងារ នាថ្ងៃទី១៥ ខែកញ្ញា ឆ្នាំ២០២០ នៅទីស្ដីការក្រសួងការងារថា ដើម្បីជីវភាពរបស់ប្រជាពលរដ្ឋ កាន់តែមានភាពល្អប្រសើរ រដ្ឋាភិបាលកម្ពុជា ចាំបាច់ត្រូវតែខិតខំរកវិធីសាស្ត្រអូសទាញធុរជន និងទុនវិនិយោគថ្មីបន្ថែមទៀត។

លោកបន្តថា ស្របតាមវិធានការកែទម្រង់មុតស្រួចរបស់សម្តេចតេជោ ហ៊ុន សែន នាយករដ្ឋមន្ត្រី ក្រសួងការងារបានបង្កើតក្រុមការងារ សិក្សាលទ្ធភាពក្នុងការធ្វើវិសោធនកម្មច្បាប់ស្តីពី ការងារឱ្យស្របតាមបរិបទសេដ្ឋកិច្ច និងសង្គម ដោយបានបញ្ចប់ការសិក្សាជាបឋមលើភាពចាំបាច់ និងអត្ថប្រយោជន៍នៃការធ្វើវិសោធនកម្មច្បាប់ស្តីពី ការងារ ដោ​យបានសហការ ជាមួយអង្គការអន្តរជាតិខាងការងារ រៀបចំសិក្ខាសាលាពិគ្រោះយោបល់ត្រីភាគី កាលពីថ្ងៃទី១៦ ខែមករា ឆ្នាំ២០២០ ដើម្បីពិភាក្សាអំពីលទ្ធភាពលើការធ្វើវិសោ​ធនកម្មច្បាប់ស្តីពីការងារ។

ផ្អែកលើលទ្ធផលនៃសិក្ខាសាលានេះ ក្រុមការងារយន្ដការត្រីភាគីបូក សម្រាប់ពិភា​ក្សាការធ្វើវិសោធនកម្មច្បាប់ស្តីពី ការងារត្រូវបានបង្កើតឡើង និងបានរៀបចំកិច្ចប្រជុំលើកទី១របស់ខ្លួន កាលពីថ្ងៃទី២១ ខែកក្កដា ឆ្នាំ២០២០ ដើម្បីពិនិត្យនិងពិគ្រោះយោ​បល់​លើសេចក្តីព្រាងបឋម នៃច្បាប់ស្តីពីវិសោធនកម្មច្បាប់ស្តីពីការងារ ដោយមានការចូលរួមយ៉ាងសកម្មពីសមាជិកទាំងអស់។

ផ្អែកលើលទ្ធផលនេះ លេខាធិការដ្ឋានគណៈកម្មការកសាងច្បាប់ និងលិខិតបទ   ​ដ្ឋានគតិយុត្តពាក់ព័ន្ធវិស័យការងារ និងបណ្តុះបណ្តាលវិជ្ជាជីវៈ បានរៀបចំនូវសេចក្តីព្រាងច្បាប់ដំបូង ដែលជាកម្មវត្ថុនៃកិច្ចប្រជុំនាថ្ងៃនេះ ដោយបានបញ្ជូនទៅអង្គការអន្តរជាតិខាងការងារ ដើម្បីពិនិត្យផ្តល់យោបល់។

ដើម្បីជំរុញឱ្យកិច្ចប្រជុំនាថ្ងៃនេះ ទទួលបានូវលទ្ធផលដូចការរំពឹងទុក លោករដ្ឋម  ន្ត្រីបានបញ្ជាក់ជូនអង្គប្រជុំសាជាថ្មីលើការងារមួយចំនួនរួមមានទី១ការកែសម្រួលអត្រាប្រាក់ឈ្នួលការងារពេលយប់គឺដើម្បីបង្កើតនិងបង្កើនឱកាសការងារកាន់តែសម្បូរបែបជូនដល់ប្រជាពលរដ្ឋខ្មែរនិងចូលរួមចំណែកអភិវឌ្ឍសេដ្ឋកិច្ចកម្ពុជា។

ចំណុចនៃវិសោធនកម្មនេះ មិនប៉ះពាល់ដល់ផលប្រយោជន៍របស់កម្មករ និយោជិត ដែលកំពុងបម្រើការងារជាការងារពេលយប់ម្តងម្កាល ឬឆ្លាស់វេនគ្នានោះទេ ដោយហេតុថាចំណុចនេះអនុវត្តន៍ ចំពោះតែកម្មករ និយោជិត ដែលបំពេញការងារពេលយប់ជាប្រចាំតែប៉ុណ្ណោះ។ សហគ្រាសដែលនឹងដំណើរការ២៤ម៉ោង ត្រូវតែផ្តល់ជូនកម្មករនិយោជិតធ្វើការងារពេលយប់ជាប្រចាំ នូវអត្ថប្រយោជន៍បន្ថែម ដែលជាលក្ខខណ្ឌអប្បបរមា និងលក្ខខណ្ឌសុវត្ថិភាព និងសុខភាពការងារ ចំពោះប្រភេទកម្មករនិយោជិតនេះ ដូចដែលអនុសញ្ញាអន្តរជាតិខាងការងារលេខ១៧១ ស្តីពីការងារពេលយប់បានកំណត់។

ទី២ ការលុបការឈប់នៅថ្ងៃបន្ទាប់ សម្រាប់ថ្ងៃឈប់សម្រាកបុណ្យចំថ្ងៃអាទិត្យ គឺមិនផ្ទុយនឹងអនុសញ្ញាអន្តរជាតិខាងការងារនោះទេ។ ការវិសោធនកម្មនេះ មានគោលបំណងជំរុញផលិតភាពការងារ និងលើកកម្ពស់ការប្រកួតប្រជែងរបស់កម្ពុជា ក្នុងការសម្រួល ដល់ការធ្វើវិនិយោគនិងការអភិវឌ្ឍប្រទេសជាតិ។ កម្ពុជានៅតែជាប្រទេសមួយដែលមានម៉ោងការងារតិចជាងបណ្តាប្រទេសនៅក្នុងតំបន់។

ទី៣ការពង្រីកវិសាលភាពរបស់ក្រុមប្រឹក្សាអាជ្ញាកណ្ដាលក្នុងការដោះស្រាយវិវាទការងារបុគ្គលគឺជាការចូលរួមពង្រឹងប្រសិទ្ធភាពយន្តការដោះស្រាយវិវាទការងារនៅកម្ពុជាដោយបង្កើតជាជម្រើសដល់ភាគីវិវាទក្នុងការជ្រើសរើសយន្តការដោះស្រាយវិវាទការងារដែលឆ្លើយតបនឹងស្ថានភាពជាក់ស្តែងរបស់ខ្លួន។

ការកែសម្រួលនេះ គឺស្របទៅនឹងគោលការណ៍ជាសកល ក្នុងការធ្វើយ៉ាងណាឱ្យគូភាគីវិវាទឆាប់ទទួលបានយុត្តិធម៌៕

ក្រុមហ៊ុនអាកាសចរណ៍ក្នុងស្រុកចំនួន ២ ចាប់ផ្តើមហោះហើរទៅកាន់ប្រទេសចិន

ដោយ ៖ វុត្ថា

ភ្នំពេញ ៖ ក្រុមហ៊ុនអាកាសចរណ៍ក្នុងស្រុកចំនួន ២ បានប្រកាសពីការចាប់ផ្តើមប្រតិបត្តិការហោះហើរទៅកាន់ប្រទេសចិនឡើងវិញ បន្ទាប់ពីទទួលបានការអនុញ្ញាត និង គោរពបាននូវស្តង់ដារវិធានការពារនៃជំងឺកូវីដCovid-19 ។

ក្រុមហ៊ុន Cambodia Airport នៅថ្ងៃទី១៥ ខែកញ្ញា ឆ្នាំ ២០២០នេះ បានឱ្យដឹងថា ក្រុមហ៊ុនកំពុងតែបន្ថែមជើងហោះហើរពីភ្នំពេញទៅហ្វូចូវនៅថ្ងៃព្រហស្បតិ៍ ខណៈពេលដែលក្រុមហ៊ុនអាកាសចរណ៍ JC Airlines កំពុងបើកជើងហោះហើរទៅកាន់ គុនមីង នៅថ្ងៃពុធនេះ។

ក្រុមហ៊ុន Cambodia Airport ពន្យល់ថា បញ្ជីនេះគឺជាការបង្ហាញអំពីជើងហោះហើរបច្ចុប្បន្នដែលអាចនឹងមានការប្រែប្រួលដោយសារតែការកែប្រែកម្មវិធីហោះហើរពីដៃគូក្រុមហ៊ុនអាកាសចរណ៍។ ដោយឡែក នៅសប្តាហ៍នេះយើងមានជើងហោះហើររបស់ក្រុមហ៊ុនអាកាសចរណ៍ SilkAir ដែលមានការភ្ជាប់ពីភ្នំពេញទៅសិង្ហបុរីនៅថ្ងៃអង្គារ និងថ្ងៃអាទិត្យផងដែរ។

អ្នកនាំពាក្យរដ្ឋលេខាធិការអាកាសចរណ៍ស៊ីវិល លោក ស៊ិន ចាន់សិរីវុត្ថា ធ្លាប់បានឱ្យដឹងថា កន្លងមកនេះ ក្រុមហ៊ុនអាកាសចរណ៍នៅក្នុងស្រុក បានជួបពិភាក្សាជាមួយនឹងរដ្ឋលេខាធិការអាកាសចរណ៍ស៊ីវិលដើម្បីសម្រួលដល់វិធានការការពារ ដើម្បីឱ្យមានលទ្ធភាពដំណើរប្រតិបត្តិការហោះហើរបណ្តើរៗឡើងវិញ ។

លោកបន្តថា អ្នកដំណើរភាគច្រើនដែលធ្វើដំណើរតាមជើងហោះហើរនាពេលនេះ ជាធុរជន និងក្រុមជំនាញការប៉ុណ្ណោះ ខណៈទេសចរធម្មតា មិនទាន់មាននោះទេ ដែលទាមទាពេលវេលាយូរបន្តិចទៀត ឬ ជំងឺកូវីដ១៩ ត្រូវបានគ្រប់គ្រង និងមានថ្នាំវាក់សាំងព្យាលពេញលេញ។

ក្រុមហ៊ុនអាកាសចរណ៍ក្នុងស្រុកកាលពីកន្លងមកថ្មីៗនេះ បានលើកយកបញ្ហាប្រឈមនានា ក្នុងកាលៈទេសៈនៃការរីករាលដាលនៃជំងឺកូវីដ-១៩ និងស្នើសុំដល់រដ្ឋាភិបាលឱ្យមានការហោះហើរជាបណ្តើរៗតាមដែលអាចធ្វើបានក្នុងបណ្តាប្រទេសអាស៊ាន និងប្រទេសមួយចំនួន បន្ទាប់ពីមានការផ្អាកមួយរយៈធំ។

ក្រុមហ៊ុនអាកាសចរណ៍នៅក្នុងស្រុកក៏ដូចក្រុមហ៊ុនអាកាសចរណ៍នានាទទួលរងនូវផលប៉ះពាល់ពីឥទ្ធិពលនៃជំងឺកូវីដ១៩ ផងដែរ តែរហូតមកដល់ពេលនេះ មិនទាន់មានក្រុមហ៊ុនក្នុងស្រុកណាមួយប្រកាសពីក្ស័យធននោះទេ ខណៈមានការជ្រោមជ្រែងពីរដ្ឋាភិបាលកម្ពុជា៕

សម្ដេចតេជោ ស្នើឱ្យអភិបាលខេត្តកំពតសិក្សាលើគម្រោងបង្កើតតំបន់រដ្ឋបាលប្រមូលផ្តុំ និងពហុកីឡាដ្ឋានថ្មី

ដោយ ៖ រ៉ាណេត

កំពត ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានស្នើឱ្យរដ្ឋបាលខេត្តកំពតបើកកិច្ចប្រជុំជាមួយមន្ត្រីជំនាញ សិក្សាទៅលើលទ្ធភាពនៃការបង្កើតតំបន់រដ្ឋបាលប្រមូលផ្តុំ និងគម្រោងសាងសង់ពហុកីឡាដ្ឋានថ្មីប្រចាំនៅក្នុងខេត្តកំពត ដើម្បីចូលរួមលើកកម្ពស់សក្ដានុពល និងសេដ្ឋកិច្ចខេត្តឱ្យកាន់តែរីកចម្រើន។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីចុងសប្ដាហ៍កន្លងទីនេះបានស្នើដល់រដ្ឋបាលខេត្តកំពតសិក្សាទៅលទ្ធភាពនៃការរៀបចំជាតំបន់រដ្ឋបាលប្រមូលផ្តុំ រួមជាមួយគម្រោងសាងសង់ជាពហុកីឡាដ្ឋានថ្មីមួយប្រចាំនៅក្នុងខេត្តបន្ថែមពីលើគម្រោងសិក្សាពីការសាងសង់ ស្ពានចំនួន២ផ្សេងទៀត។

លោក ជាវ តាយ អភិបាលខេត្តកំពត បានមានប្រសាសន៍ថា យោងតាមការណែនាំផ្ទាល់ពីសម្ដេចអគ្គមហាសេនាបតីតេជោ ហ៊ុន សែន ស្នើទៅឱ្យរដ្ឋបាលខេត្តកំពតសិក្សាពីលទ្ធភាពរៀបចំតំបន់រដ្ឋបាលប្រមូលផ្តុំ ដោយមានមន្ទីរអង្គភាពពាក់ព័ន្ធមានទីកន្លែងធ្វើការរួមគ្នា និងសាងសង់ពហុកីឡាដ្ឋានថ្មីមួយទៀត។

លោកអភិបាលខេត្តបានបញ្ជាក់ថា “ក្រៅពីនេះ បច្ចុប្បន្ន គម្រោងសិក្សាស្ពានឆ្លងព្រែកកំពង់បាយចាស់ សិក្សាដោយក្រុមហ៊ុន China Road និងគម្រោងសិក្សាស្ពានថ្មី សិក្សាដោយកងវិស្វកម្មក្រសួងការពារជាតិបានប្រមាណជា៧០ភាគរយ ដោយក្រោយពីសិក្សាចប់សព្វគ្រប់ នឹងដាក់គម្រោងទាំងនេះឆ្លងដល់ថ្នាក់ដឹកនាំមន្ត្រីរាជការខេត្តកំពត រួចហើយនឹងយកសំណើគម្រោងនេះដាក់ស្នើសុំគោលការណ៍ពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាសម្រេច”។

នៅក្នុងឱកាសនោះផងដែរ លោក ជាវ តាយ ក៏បានកោតសរសើរដល់មន្ត្រីរាជការរបស់រដ្ឋបាលខេត្តទាំងអស់ ដែលបានខិតខំអនុវត្តការងារនាពេលកន្លងមកជាច្រើន ដែលធ្វើឱ្យរដ្ឋបាលខេត្តទទួលបាននូវសមិទ្ធផលផ្លែផ្កាជាច្រើន និងទទួលបាននូវការគាំទ្រគ្រប់មជ្ឈដ្ឋាន ដៃគូអភិវឌ្ឍន៍ វិនិយោគិន ពិសេសភ្ញៀវទេសចរជាតិ អន្តរជាតិ ដែលបានជ្រើសខេត្តកំពតជាគោលដៅទេសចរណ៍សម្រាប់ការលម្ហែកម្សាន្តដ៏ពេញនិយម៕

កម្ពុជាជាប់ចំណាត់ថ្នាក់លេខ១ក្នុងចំណោមប្រទេសទាំង១០ដែលមានបដិសណ្ឋារកិច្ចល្អបំផុត

ដោយវុត្ថា

ភ្នំពេញៈ ព្រះរាជាណាចក្រកម្ពុជាបានជាប់ចំណាត់ថ្នាក់លេខ១ ​ក្នុងចំណោម ប្រទេ​សទាំង១០ ដែលមានបដិសណ្ឋារកិច្ចល្អបំផុត ចំពោះជនបរទេស និងភ្ញៀវទេសចរក្នុងឆ្នាំ២០២០នេះ។

ក្រសួងទេសចរណ៍ នៅថ្ងៃទី ១៥ ខែកញ្ញា ឆ្នាំ ២០២០នេះ ឱ្យដឹងថា  យោងតាមវេបសាយអន្តរជាតិ My International Movers មានប្រទេសសរុបចំនួន១០ ត្រូវបានគេចាត់ទុកជាកន្លែង ដែលផ្តល់ភាពស្វាគមន៍យ៉ាងរាក់ទាក់ជាទីបំផុតចំពោះជនបរទេស។ ក្រសួងបញ្ជាក់ទៀតថា ដោយមិនខ្វល់ចំពោះសម្រេចចិត្តចង់ផ្លាស់ទីលំនៅ ឬក៏គ្រាន់តែចង់ចំណាយ ពេលវេលាវិស្សមកាលដ៏ល្អមួយនោះទេ គឺពួកគេគួរតែពិចារណាលើប្រទេសទាំង១០នេះ រួមជាមួយនឹងកកម្ពុជាផងដែរ។

ប្រទេសទំាង១០ រួមមាន៖ ១៖ ព្រះរាជាណាចក្រកម្ពុជា ២៖ នូវែលសេឡង់ ៣៖ កាណាដា ៤៖ ម៉ិចស៊ិកូ ៥៖ ហ្វីលីពីន ៦៖ វៀតណាម ៧៖ អ៉ីសឡង់ ៨៖ កូស្តារីកា ៩៖ អៀរឡង់ និង ១០៖ ព័រទុយហ្គាល់។

ព្រះរាជាណាចក្រកម្ពុជា ត្រូវគេចាត់ទុកជាប្រទេស កំពុងតែប្រែក្លាយជាឋានសួគ៌ សម្រាប់ជនបរទេសដែលមករស់នៅទីនេះ។ បើតាមការស្ទង់មតិភាគច្រើន ប្រជាជនកម្ពុជាគឺមានអត្តចរឹករួសរាយរាក់ទាក់ និងស្វាគមន៍ជាទីបំផុតចំពោះជនបរទេស មិនថាជាភ្ញៀវទេសចរឬមួយក៏អ្នកផ្លាស់មករស់នៅទីនេះឡើយ៕