ដោយ ហ្សូលី

ភ្នំពេញៈ ប្រទេសកម្ពុជាចាប់ផ្តើមមានការអភិវឌ្ឍច្រើន ទៅលើវិស័យសំណង់និងអចលនទ្រព្យ ហើយការអភិវឌ្ឍមិនមែនរីកចម្រើនតែក្នុងក្រុងនោះទេ ប៉ុន្តែបានរីកចម្រើនគ្រប់ខេត្តក្រុង។

តើក្នុងរយៈពេល៥ខែនេះមានខេត្តណាខ្លះ ដែលមានភាពទាក់ទាញលើវិស័យអចលនទ្រព្យ។

ថ្វីត្បិតតែមានភាពរអាក់រអួលបន្តិចបន្តួច ដោយសារការរាតត្បាតនៃមេរោគ Covid-19ក្តី តែខេត្តមួយចំនួននៅក្នុងប្រទេសកម្ពុជា នៅតែបន្តទាក់ទាញគម្រោងវិនិយោគជាច្រើន ជាពិសេសលំនៅដ្ឋានដែលជាតម្រូវការចាំបាច់ សម្រាប់ការរស់នៅរបស់ប្រជាពល​រដ្ឋកម្ពុជា។

ខេត្តកណ្តាល

ហេតុផលដែលបណ្តាលឱ្យខេត្តនេះ មានភាពទាក់ទាញជាធម្មតានោះ ដោយសារតែមានគម្រោងអភិវឌ្ឍធំៗជាច្រើននៅក្នុងខេត្ត រួមបញ្ចូលទាំងគម្រោងបង្កើតរោងចក្រ សហគ្រាស សំណង់បុរីលំនៅដ្ឋានជាដើម។ លើសពីនេះ គឺការស្ថាបនាព្រលានយន្តហោះអន្តរជាតិភ្នំពេញថ្មី ដែលកំពុងមានដំណើរការសាងសង់យ៉ាងសស្រាក់សស្រាំ ក៏ជាផ្នែកមួយនៃការទាក់ទាញការវិនិយោគលើវិស័យនេះផងដែរ។

អភិបាលខេត្តកណ្តាល លោក គង់ សោភណ្ឌ ធ្លាប់មានប្រសាសន៍ថា អ្នករកស៊ីអចលនទ្រព្យជាច្រើន កំពុងសម្រុកទៅកាន់ខេត្តកណ្តាល ព្រោះថាគម្រោងអភិវឌ្ឍធំៗមានសក្តានុពលទាំងនោះ បានទាក់ទាញដល់ការវិនិយោគ នាំឱ្យតម្លៃដីនៅក្នុងខេត្ត ជាពិសេសតំបន់ក្បែរព្រលាន មានតម្លៃខ្ពស់។

ខេត្តកំពង់ស្ពឺ

ខេត្តនេះកំពុងរីកដុះដាលខ្លាំង នៅលើវិស័យអចលនទ្រព្យដូចជា បុរីលំនៅដ្ឋាន ដីឡូតិ៍ និងឃ្លាំងផ្ទុកទំនិញ ព្រោះតំបន់នៅក្នុងខេត្តចាប់ផ្តើមមានភាពអ៊ូអរ ប្រែក្លាយជាទីប្រជុំជនបន្តិចម្តងៗ។ រាជរដ្ឋាភិបាលបានធ្វើការប្រកាស កាលពីពេលកន្លងទៅអំពីការផ្លាស់ប្តូររោងចក្រ សហគ្រាស ពីក្នុងក្រុងទៅកាន់ទីរួមខេត្តកំពង់ស្ពឺនេះ។

ម្យ៉ាងទៀតហេដ្ឋារចនាសម្ព័ន្ធមានភាពរលូនល្អ ងាយស្រួលក្នុងការដឹកជញ្ជូន និងប្រកបមុខរបររកស៊ីបានគ្រប់ប្រភេទ។ សព្វថ្ងៃ កំពង់ស្ពឺត្រូវបានជាប់ឈ្មោះថា ជាគោលដៅខេត្តវិនិយោគក្នុងវិស័យឧស្សាហកម្ម មានរោងចក្រសហគ្រាស កំពុងដំណើរការសរុបជាង២៧០ទីតាំង។

ខេត្តកំពត

ក្នុងនាមជាខេត្តមានតំបន់ទេសចរណ៍ ខេត្តកំពត បានជួបប្រទះនូវវិបត្តិធ្ងន់ធ្ងរលើវិស័យនេះ ដោយសារការធ្លាក់ចុះនៃភ្ញៀវទេសចរជាតិ–អន្តរជាតិ។ យ៉ាងណាមិញ ខេត្តនេះនៅតែបន្តដើរក្នុងផ្លូវផ្សេងនោះគឺ វិស័យអចលនទ្រព្យ ដែលបង្ហាញពីសញ្ញាវិជ្ជមានជាងវិស័យទេសចរណ៍។

នាយិកាគ្រប់គ្រងក្រុមហ៊ុនអចលនទ្រព្យ Amaktak Property Service លោកស្រីតាំង ហួរធ្លាប់បានឱ្យដឹងថា ការអភិវឌ្ឍលំនៅដ្ឋានបែបលំហែរកាយ គឺជាចលករជំរុញឱ្យវិស័យដីធ្លី នៅក្នុងខេត្តកំពតមានភាពល្អប្រសើរ និងកំណើនតម្លៃផងដែរ។ ខេត្តកំពតជាគោលដៅទេសចរណ៍ ដូច្នេះនៅពេលស្ថានភាពជំងឺធូរស្បើយ ច្បាស់ជាមានការអភិវឌ្ឍច្រើនជាងនេះនិងទាក់ទាញច្រើន។

ខេត្តកែប

មិនខុសគ្នាប៉ុន្មានពីខេត្តកំពតទេ បន្ទាប់ពីរាជរដ្ឋាភិបាលបាន ប្រកាសពីគម្រោងអភិវឌ្ឍន៍តំបន់ទេសចរណ៍បន្ថែម ការវិនិយោគលើវិស័យដីធ្លីហាក់បី ដូចជា មានកំណើនសកម្មភាព។

រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន បានមានប្រសាសន៍កាលពីកន្លងទៅថា ខេត្តកែបនឹងក្លាយជាខេត្តគោលដៅទេសចរណ៍ សម្រាកកម្សាន្តប្រណិតកម្រិតខ្ពស់ ហើយបច្ចុប្បន្នកំពុងមានការសិក្សារៀបចំផែនការមេ អភិវឌ្ឍនិងបញ្ចប់នៅខែកក្កដា ឆ្នាំ ២០២០ខាងមុខ។

ហេតុនេះទើបអ្នកជំនាញអចលនទ្រព្យព្យាករណ៍ថា ទោះបីមានការគំរាមកំហែងពីជំងឺ ឬក៏គ្មានការប្រកាសមិនឱ្យមានរោងចក្រ ឬសហគ្រាសពីរដ្ឋាភិបាលកម្ពុជាក៏ដោយ ខេត្តនេះនៅតែមានសកម្មភាពនៃការទិញ–លក់អចលនទ្រព្យដដែល ជាក់ស្តែងវិស័យដីធ្លីតែម្តងគ្រោងនឹងអភិវឌ្ឍឱ្យប្រែទៅជាមណ្ឌលកម្សាន្ត តំបន់ទេសចរណ៍កែច្នៃ ជាដើម។

ខេត្តមណ្ឌលគិរី

ងាកទៅកាន់ភូមិភាគឥសាន្តប្រទេសវិញ ខេត្តមណ្ឌលគិរី ក៏បានទាក់ទាញការវិនិយោគលើវិស័យអចលនទ្រព្យផងដែរ បន្ទាប់ពីរដ្ឋាភិបាលបានប្រកាសពីគម្រោងសាងសង់ព្រលានយន្តហោះនៅខេត្តនេះដំបូងគេ នាភូមិភាគឥសាន្ត និងគ្រោងប្រែក្លាយខេត្តនេះមិនត្រឹមតែសំរាប់ទាក់ទាញទេសចរណ៍ប៉ុណ្ណោះទេ ប៉ុន្តែក៏ដើម្បីដាំផ្កា និងបន្លែដើម្បីផ្គត់ផ្គង់ទីផ្សារនៅរាជធានីភ្នំពេញផងដែរ ដោតសារខេត្តនេះមានដីសម្បូរជីវជាតិ និងលក្ខ​ខ័ណ្ឌអាកាសធាតុល្អប្រសើរ៕

ដោយ ប៊ី

ភ្នំពេញៈ ខណៈស្ថានភាពសេដ្ឋកិច្ចពិភពលោកកំពុងស្ថិតក្នុងភាពមិនច្បាស់លាស់ ដោយវិបត្តិCovid-19 មិនថាតិច ឬច្រើននោះទេវិស័យអចលនទ្រព្យ ដែលជាកាតាលីករជំរុញកម្ពុជាក៏បាននិងកំពុងរងប៉ះពាល់ផងដែរ។

គម្រោងអគារខុនដូ និងមជ្ឈមណ្ឌលពាណិជ្ជកម្មកប់ពពកមួយចំនួន នៅក្នុងទីក្រុងភ្នំពេញ កំពុងមានភាពជាប់គាំងបណ្តើរៗហើយ នៅក្នុងអំឡុងពេលដែលកម្ពុជាបាន និងកំពុងប្រយុទ្ធប្រឆាំងទៅនឹង។ មិនត្រឹមតែសកម្មភាពនៃសាងសង់ ត្រូវជាប់គាំងនោះទេ សកម្មភាពពាណិជ្ជកម្មនានាហាក់មិនដំណើរ និងសេដ្ឋកិច្ចត្រូវបានព្យាករណ៍ថយមកនៅត្រឹមជាង២ភាគរយ ដោយសារតែបង្កឡើងដោយសារជំងឺCovid-19។

មតិជាច្រើនដែលបានលើកឡើង ពីអ្នកជំងឺក្នុងវិស័យអចលនទ្រព្យនៅកម្ពុជាបានអះអាងថា សេដ្ឋកិច្ចសាកលបានធ្លាក់ចុះចូលទៅក្នុងវិបត្តិរួចទៅហើយ ដូច្នេះមិនថាប្រទេសធំ ឬតូចសុទ្ធតែទទួលបានរងប៉ះពាល់។ ការអភិវឌ្ឍអចលនទ្រព្យពឹងផ្អែកប្រភពធនធាន(ទុនវិនិយោគ)ពិតប្រកដ អំឡុងពេលនេះ ដើម្បីទទួលបានជោគជ័យនៅខាងមុខ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានប្រាប់គេហទំព័រ Propertyarea.asia កាលខែមុនថា ២០២០ថា ស្ថិតនៅក្នុងស្ថានភាពនៃវិបត្តិជំងឺសាកល Covid-19 ទោះបីជាទទួលរងនូវឥទ្ធិលអវិជ្ជមានខ្លះ នៅក្នុងវិស័យអចលនទ្រព្យក៏ដោយ ប៉ុន្តែមានការព្យាករណ៍ថា បន្ទាប់ពីការធ្លាក់ចុះទីផ្សារអចលនទ្រព្យនាពេលនេះ កម្ពុជានឹងអាចទទួលបានកំណើនវិនិយោគ ពីបណ្តាក្រុមហ៊ុនអន្តរជាតិជាដៃគូឡើងវិញ។

លោកបានមានប្រសាសន៍បន្តទៀតថា “នៅត្រឹមរយៈពេល៣ឆ្នាំចុងក្រោយនេះ វិស័យសំណង់ និងអចលនទ្រព្យនៅកម្ពុជា គឺមានការកើនឡើងខ្លាំងលើសពីការរំពឹងទុក ប៉ុន្តែដោយសារតែវិបត្តិនៃជំងឺសាកល ដែលកើមានចាប់តាំងពីខែមករា ឆ្នាំ២០២០ រហូតមកភាពអវិជ្ជមានបានចូលមកក្នុងវិស័យនេះ”។ លោកអះអាងថា “នៅឆ្នាំបន្ទាប់នេះ យើងមិនអាចកំណត់ថា នឹងមានកំណើនខ្ពស់ដូចនេះទៀតនោះទេ ដែលវាក៏អាស្រ័យទៅលើបរិបថ និងស្ថានភាពនៃស្ថិរភាពក្នុងសង្គមជាក់ស្ដែង ជាពិសេសឧបសគ្គនៃជំងឺ Covid-19 ប៉ុន្តែយើងននៅតែមានសុទិដ្ឋិនិយមថា នឹងមានសញ្ញាល្អ ខណៈដែលប្រទេសចិន ដែលជាទីផ្សារដ៏ធំរបស់កម្ពុជាមានស្ថានការកាន់តែល្អ”។

តាមរយៈគណនីផ្ទាល់ខ្លួននៃបណ្តាញទំនាក់ទំនងសង្គម Facebook លោកឧកញ៉ា គីម ហ៊ាងអគ្គនាយកក្រុមហ៊ុនKeller Williams Cambodia បានមានប្រសាសន៍ឲ្យដឹងថា ក្នុងនាមជាម្ចាស់អាជីវកម្ម លោក អ្នកត្រូវធ្វើការអោយបានខ្លាំងជាង និងឆ្លាតជាងមុន ព្រោះ​ក្រុមហ៊ុនធំនឹងរួមមកធម្យម ក្រុមហ៊ុនធម្យមនឹងរួមមកតូច ហើយក្រុមហ៊ុនតូចនឹងត្រូវក្ស័យទុន!។

លោកបានបន្តថា “ក្នុងនាមជាបុគ្គលិក លោក អ្នកត្រូវធ្វើការអោយបានច្រើនជាងមុន និងឆ្លាតជាងមុន ដើម្បីរក្សាការងាររបស់ខ្លួន ព្រោះក្រុមហ៊ុននឹងកាត់បន្ថយ ឬផ្អាកការងារបុគ្គលិកមួយចំនួន ដែលមិនសូវចាំបាច់ ដើម្បីបន្ថយបន្ទុកនៃការចំណាយរបស់ខ្លួន! មានតែម្ចាស់អាជីវកម្មខ្លាំង និងបុគ្គលិកឆ្លាត ទើបអាចឈរជើងបានក្នុងសម័យ Covid19 ដ៏សាហាវមួយនេះ!”។

ថ្ងៃនេះគេហទំព័រ Propertyarea.asia នឹងលើកឡើងនូវគម្រោង ដែលត្រូវបានគេមើលទៅហាក់ដូចជាជាប់គាំង នៅក្នុងកំឡុងពេលនៃការរីករាលដាល ជាសាកលនៃជំងឹ Covid-19  ដូចនៅខាងក្រោម៖

១) អគារ Glory International Centre

អាគារពាណិជ្ជកម្មGlory International Centre ក្រោមការវិនិយោគរបស់ក្រុមហ៊ុនចិនវិនិយោគប្រមាណ២០០លានដុល្លារអាមេរិក ស្ថិតនៅក្បែរទីក្រុងរណបកោះពេជ្រ ស្ថិតនៅខាងក្រោយអគារThe Bridge  ហាក់គ្មានសកម្មភាពសងសង់ ហើយត្រូវបានរំពឹងថា នឹងបើកឲ្យដំណើរកានៅឆ្នាំ២០២០។

គំរោងនេះស្ថិតក្នុងសង្កាត់ទន្លេបាសាក់ ខ័ណ្ឌចំការមក រាជធានីភ្នំពេញ។

អគារ Glory International Centre អភិវឌ្ឍន៍ដោយក្រុមហ៊ុនអចលនទ្រព្យ Yuan Chuang Real Estate រួមមាន អគារខុន ផ្សារទំនើប អាផាតមិន សណ្ឋាគារ និងអគារការិយាល័យ។ អគារពាណិជ្ជកម្ម Glory បានចាប់ផ្តើមការងារសាងសង់កាលពីពីឆ្នាំ ២០១៧ ត្រូវការរយៈពេលសាងសង់បួនទៅប្រាំឆ្នាំ ពោលគឺអគារពាណិជ្ជកម្មមួយនេះរំពឹងថា នឹងបើកសម្រាប់ការធ្វើអាជីវកម្មនៅឆ្នាំ២០២៣ ឬឆ្នាំ២០២៤ខាងមុខ។

២) គំរោងខុនដូនិងមជ្ឈមណ្ឌលពាណិជ្ជកម្ម CITY KEY

គំរោងនេះមានឈ្មោះCITY KEY មានចំនួន៥២ជាន់ និងកំពស់២០៨ម៉ែត្រជាគំរោងខុនដូ និងមជ្ឈមណ្ឌលពាណិជ្ជកម្មថ្មីមួយ  ដែលវិនិយោគដោយក្រុមហ៊ុនមកពីប្រទេ​សចិន។

គំរោងដ៏ធំនេះ ស្ថិតនៅក្រោយអាគារ Bali Scenary និងអាគារ The Bridge ដែលស្ថិតក្នុងសង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ។

៣) គម្រោង Sino Plaza

គម្រោងSino Plaza នេះ គឺត្រូវបានសាងសង់ឡើង នៅនៅទល់មុខផ្សារបឹងត្របែក ខណ្ឌចំការមន រាជធានីភ្នំពេញ ដែលមានទំហំ២១៧,០០០ម៉ែត្រការ៉េ ដែលនឹងមានអគារលំនៅឋាន ការិយាល័យ ផ្សារទំនើប ភោជនីយដ្ឋាន រោងភាពយន្ត និងសណ្ឋា គារផ្កាយ៥មួយផងដែរ។

ដើម្បីប្រកួតប្រជែងនឹងគម្រោងវិនិយោគ ដែលមានទំហំយក្សផ្សេងទៀត គម្រោង Sino Plaza នឹងមានអគារចំនួន៤ រួមមានអគារអាផាតមិន៤២ជាន់ចំនួន២ អគារ៣៦ ជាន់ចំនួន១ សម្រាប់ជាសណ្ឋាគារផ្កាយប្រាំ និងរោងភាពយន្ត និងអគារ៤៣ជាន់មួយ សម្រាប់យូនីតការិយាល័យ និងខុនដូ។

៤) អគារ Thai Boon Roong Commercial Centre Twin Towers

អាគារនេះ មានកម្ពស់៥៦៨ម៉ែត្រ ស្ថិតនៅក្នុងទីក្រុងភ្នំពេញប្រទេសកម្ពុជា កំពុងស្ថិតនៅក្នុងដំណើរការសាងសង់។ នៅពេលសាងសង់បញ្ចប់អគារនេះ នឹងក្លាយជាអគារប្រើប្រាស់រួម មានទាំងការិយាល័យធ្វើការ ផ្សារទំនើប អាផាតម៉ិន ខុនដូលំដាប់អន្តរជាតិ សណ្ឋាគារកម្រិតផ្កាយ៦ និងសេវាកម្មកំសាន្តដ៏អស្ចារ្យជាច្រើនទៀត។

អគារភ្លោះមជ្ឈមណ្ឌលពាណិជ្ជកម្ម Thai Boon Roong របស់ប្រទេសកម្ពុជា ជាប់ជាអគារខ្ពស់នៅក្នុងតំបន់អាស៊ាន ក៏ដូចជាខ្ពស់ជាងគេក្នុងពិភពលោក ក្នុងនាមអាគារភ្លោះនៅលើពិភពលោក។ មជ្ឈមណ្ឌលពាណិជ្ជកម្មនេះ ស្ថិតក្នុងចំណោមអគារខ្ពស់កប់ពពកចំនួន៦ផ្សេងទៀត មកពីប្រទេសចំនួន៦នៅក្នុងតំបន់អាស៊ាន ហើយអគារទាំងនេះ នឹងក្លាយជាអគារខ្ពស់កប់ពពកនៅក្នុងតំបន់អាស៊ាន។

យ៉ាងណាសកម្មភាពសាងសង់ជញ្ជាំងទប់ដីរបស់គំរោងនេះ ហាក់ត្រូវបានផ្អាកហើយ និងមិនដឹងពីការបរិច្ឆេទ បើកសម្ភោធបើកការដ្ឋានសាងសង់ នៅពេលណាជាក់លាក់នៅឡើយទេ។

៥) គម្រោង KOWLOON BAY

គម្រោងសាងសង់អគារពាណិជ្ជកម្មចំរុះបែបទំនើប ដែលមានកម្ពស់រហូតដល់៥៩ជាន់ ដែលមានទីតាំងស្ថិតនៅតាមបណ្តោយផ្លូវសុធារស់ ជិតផ្សារទំនើប AEON 1 នៅលើផ្ទៃដីទំហំ១,៥០ហិកតា បានផ្អាកការសាងសង់ជាផ្លូវការហើយ។ គំរោងនេះបានសិក្សាតាំងពីអំឡុងពាក់កណ្តាលឆ្នាំ២០១៧នោះ រហូតមកដល់ពេលនេះ នៅតែមិនទាន់មានសកម្មនៅឡើយ ខណៈដែលធ្លាយដំណឹងមកថាគំរោងនេះ បានប្រកាសផ្អាកសម្រេចផ្អាកមួយរយៈសិន។

៦) គម្រោងអភិវឌ្ឍន៍ចម្រុះ អ & អេហ្វ

គម្រោងអភិវឌ្ឍន៍ចម្រុ អ & អេហ្វ ស៊ីធី មានទីតាំងស្ថិតនៅក្នុងតំបន់មានសក្តានុពលថ្មី លើមហាវិថីព្រះមុន្នីវង្ស និងជិតមហាវិថីសម្តេចហ៊ុនសែន(ផ្លូវ៦០ម៉ែត្រ)។ គម្រោ​ងអ & អេហ្វ ស៊ីធីសាងសង់ឡើងលើផ្ទៃដី ៧៦០,០០០ ម៉ែត្រការ៉េមានសួនច្បារឯកជនដ៏ស្រស់ស្អាត ទំហំរាប់ពាន់ម៉ែត្រការ៉េ ដែលបានរចនាដោយក្រុមហ៊ុនដ៏ល្បីល្បាញរបស់ពិភពលោក  Pierre Landscape។

គម្រោង អ & អេហ្វនៅលើមហាវិថីព្រះមុនីវង្សបានជាប់គាំងហើយ ប៉ុន្តែគំរោងរបស់ក្រុមហ៊ុនយក្ស R&F ស្ថិតនៅលើមហាវិថីសម្តេចតេជោហ៊ុន សែនបាននិងកំពុងដំណើរការសាងសង់នៅឡើយ។

គំរោងYuethai នៅក្រុងកំពង់ចាមជាប់គាំង

គំរោងអភិវឌ្ឍន៍ដ៏ធំដំបូងគេ នៅក្រុងកំពង់ចាម ក្បែរដងទន្លេមេគង្គ ជាគំរោងដ៏ធំជាងគេនៅតំបន់ទំនាបកណ្តាលនេះបានជាប់គាំងរួចទៅហើយ ខណៈគម្រោងរបស់ក្រុមហ៊ុននេះនៅស្របតាមដងទន្លេសាបរាជធានីភ្នំពេញ ក៏កំពុងស្ថិតក្នុងភាពមិនច្បាស់លាស់នៅឡើយ ខណៈសកម្មភាពសាងសង់ហាក់បានផ្អាកសកម្មភាពរួចទៅហើយ។

នៅមានគំរោងធំៗជាច្រើនទៀត កំពុងមានភាពមិនច្បាស់លាស់ផងដែរ ខណៈដំណើរការសាងសង់គំរោងទាំងនោះហាក់បានផ្អាកសកម្មភាព ដោយសារវិបត្តិសេដ្ឋកិច្ចសាកល ដែលមានសភាពអាក្រក់ជាងវិបត្តិសេដ្ឋកិច្ច និងហិរញ្ញវត្ថុសាកលនៅឆ្នាំ២០០៨កន្លងមកនេះ៕

ដោយៈ រ៉ាណេត

ភ្នំពេញៈ ផ្សារទំនើបដ៏ធំលំដាប់អន្តរជាតិថ្មីមួយ កម្ពស់រហូតដល់៦ជាន់ ស្មើនឹងប្រមាណ៤២,០០០ ម៉ែត្រការ៉េ ម្រោងបើកសម្ពោធដាក់ឱ្យដំណើរការជាផ្លូវការ នៅត្រឹមដើមត្រីមាសទី២ នៃឆ្នាំ២០២១ខាងមុខ នៅតំបន់ជ្រោយចង្វារ។

បុគ្គលិកផ្នែកលក់ជាន់ខ្ពស់គម្រោងផ្សារទំនើប New City Walk កញ្ញាណាណា បានឱ្យដឹងកាលពីថ្ងៃទី២ ខែមិថុនា ឆ្នាំ២០២០នេះថា បច្ចុប្បន្នគម្រោងសាងសង់ផ្សារទំនើបដ៏ធំលើកដំបូង ប្រចាំនៅតំបន់ជ្រោយចង្វារ កំពុងតែពន្លឿនសកម្មភាពសាងសង់យ៉ាងមមាញឹក ដើម្បីឈានទៅរកការបញ្ចប់សាងសង់ជាស្ថាពរ និងគ្រោងដាក់ដំណើរការនៅថ្ងៃទី១ខែឧសភា ឆ្នាំ២០២១ខាងមុខនេះ ក្រោមការវិនិយោគដោយក្រុមហ៊ុន Morgan Group ។ 

កញ្ញាបានបន្តទៀតថា “ផ្សារទំនើបលំដាប់អន្តរជាតិ New City Walk មានកម្ពស់៦ជាក់ ស្មើនឹងប្រមាណ៤២,០០០ម៉ែត្រការ៉េ ដោយមានស្តង់លក់ចាប់ពីជាន់ទី១ដល់ជាន់ទី៣ សរុបចំនួន៥០០ស្តង់ ហើយស្ដង់នីមួយៗមានទំហំចាប់ពី៤–២០ម៉ែត្រការ៉េ ក្រោមការចូលរួមពីក្រុមហ៊ុនលំដាប់អន្តរជាតិ អាយខុនស្យាម មកពីប្រទេសថៃ ធ្វើជាដៃគូសហការលក់ផងដែរ ខណៈដែលការលក់ទីតាំង(ស្ដង់) ត្រូវបានសម្រេចប្រមាណ៩០ភាគរយហើយ”។

ផ្សារទំនើបនេះជាអតីតៈផ្សារYoung Commercial ដែលបានបើកដំណើរការ​មួយ  រយៈហើយបានផ្អាកទៅវិញរហូតមកទល់ពេលនេះ។

ប្រធានសមាគមអ្នកជំនាញអចលនទ្រព្យកម្ពុជា លោកស្រី ចេវ សុឃុន បានមានប្រសាសន៍ថា វត្តមាននៃផ្សារទំនើបនេះ នឹងចូលរួមលើកកម្ពស់សោភ័ណភាព រួមជាមួយនឹងបង្កើនបរិយាកាសវិនិយោគ នៅតំបន់ជ្រោយចង្វារកាន់តែខ្លាំង បន្ថែមពីលើពេលបច្ចុប្បន្ន ហើយក៏ជាការបំពេញតម្រូវការទីផ្សារជាក់ស្ដែងនៅក្នុងតំបន់ផងដែរ។

លោកស្រីបន្តថា “ជ្រោយចង្វាជាតំបន់មានសក្តានុពលខ្លាំង ក្នុងការវិនិយោគ ព្រោះ​តំបន់នេះ ចាប់ផ្តើមរីកចម្រើនខ្លាំង ដោយសារស្ថិតនៅជិតកណ្តាល រាជធានី ហើយលក្ខខណ្ឌភូមិសាស្ត្រមានភាពអំណោយផលល្អ ដោយសារនៅជិតទន្លេមេគង្គ និងដងទន្លេសាប អនុគ្រោះដល់ការរស់នៅមានភាពងាយស្រួល” ។លោកស្រីបន្តថា “តំបន់ដែលស្ថិតនៅស្របតាមផ្លូវជាតិលេខ៦អានេះ ជាតំបន់មានសក្តានុពលសំរាប់អភិវឌ្ឍន៍លំនៅដ្ឋាន មជ្ឈមណ្ឌលពាណិជ្ជកម្ម និងសេវាកំសាន្ត មានគម្រោងវិនិយោគធំ ពិសេសមានការសាង់ សង់សាលាអន្តរជាតិធំៗ មានផ្សារទំនើប និងសំណង់ផ្សេងៗដែលប្រមូលផ្តុំនៅកន្លែងនេះ ព្រមទាំងផ្លូវធំទូលាយ”។

ជាមួយនេះ លោកស្រីក៏បានលើកឡើង ពីសក្ដានុពលតំបន់បន្ថែមទៀតថា ជ្រោយចង្វារ ក៏ជាតំបន់ធម្មជាតិ និងពាណិជ្ជកម្មដែលបានតភ្ជាប់តំបន់សំខាន់ផ្សេងៗ ដូចជាតំបន់ពាណិជ្ជកម្មទីក្រុង តំបន់ឧស្សាហកម្មនៅកំពង់ចាម តំបន់ទេសចរណ៍នៅសៀបរាម និងតំបន់កសិកម្មនៅបាត់ដំបង ព្រមទាំងតំបន់សំខាន់ផ្សេងៗជាច្រើន ក្នុងប្រទេសផងដែរ។

អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានមានប្រសាសន៍ថា មូលហេតុដែលជំរុញឱ្យវិនិយោធំៗងាកបណ្តាក់ទុន និងអភិវឌ្ឍន៍នៅតំបន់ជ្រោយចង្វារ ព្រោះតំបន់មួយនេះ មានភាពរីកចម្រើនខ្លាំង ជាទីតាំងដែលមានបរិយាកាសល្អបរិសុទ្ធ ប្រសព្វគ្នារវាងទន្លេមេគង្គ និងទន្លេសាប ដែលមានសណ្ឋា​នដីធំទូលាយ អំណោយផលដ៏ល្អប្រសើរ។ បន្ថែមពីនេះ គួបផ្សំនឹងហេដ្ឋារចនាសម្ព័ន្ធស្ពានថ្នល់ មានលក្ខណៈធំទូលាយមិនកកស្ទះ ជាពិសេសមានគម្រោងអភិវឌ្ឍន៍ធំៗ ដូចជា គម្រោងក្រុងរណបជ្រោយចង្វាររបស់ក្រុមហ៊ុន OCIC គម្រោងក្រុងរណបរបស់ក្រុមហ៊ុន លី យ៉ុងផាត់ គម្រោងអភិវឌ្ឍន៍លំនៅដ្ឋានកម្រិតអភិជនជាច្រើន កំពុងបង្ហាញវត្តមានជាបន្តបន្ទាប់។

លោកឧកញ៉ាបន្តថា “ក្រៅពីការអភិវឌ្ឍលើវិស័យលំនៅដ្ឋានកម្រិតខ្ពស់ នៅមានមជ្ឈមណ្ឌលពាណិជ្ជកម្ម សំណង់អាគារខុនដូកម្រិតអន្តរជាតិជាច្រើនទៀត ហើយសក​ម្មភាពអភិវឌ្ឍន៍ទាំងអស់នេះហើយ ជាកត្តារុញច្រានទំនោរចិត្តរបស់អ្នកវិនិយោគជាតិ និងអន្តរជាតិ ឱ្យងាកទៅធ្វើការវិនិយោគនៅតំបន់នេះ”៕