រដ្ឋបាលខេត្តសៀមរាប អនុញ្ញាតច្បាប់សាងសង់សំណង់បានជាង ១៥០ គម្រោង

ដោយ ៖ រ៉ាណេត

សៀមរាប ៖ ជាមួយនឹងវឌ្ឍនភាពលើផ្នែកហេដ្ឋារចនាសម្ព័ន្ធនានាជាច្រើនដែលបាន និងកំពុងបន្តសកម្មភាពសាងសង់បន្តស្ទើរទូទាំងខេត្ត សម្រាប់តែវិស័យសំណង់ រដ្ឋបាលខេត្តសៀមរាបបានសម្រេចអនុញ្ញាតច្បាប់សាងសង់ជាស្ថាពរជាង ១៥០គម្រោង ខណៈដែលគម្រោងផ្សេងៗមួយចំនួនទៀត កំពុងស្ថិតនៅក្នុងការពិនិត្យ និងកែសម្រួល។

មានប្រសាសន៍នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្ត នៅទីស្ដីការគណៈរដ្ឋមន្ត្រី នាព្រឹកថ្ងៃទី២ ខែមិថុនា ឆ្នាំ២០២០ អភិបាលរងខេត្តសៀមរាប លោក លី សំរិទ្ធ បានមានប្រសាសន៍ថា បច្ចុប្បន្ននេះ គម្រោងសាងសង់សំណង់ជាច្រើននៅទូទាំងខេត្តត្រូវបានរដ្ឋបាលខេត្តសៀមរាប សម្រេចអនុញ្ញាតច្បាប់ជាស្ថាពរលើការសាងសង់។

លោកបានបញ្ជាក់ថា “គម្រោងសំណង់ធំៗសរុបជាង១៥០គម្រោង ត្រូវបានថ្នាក់ខេត្តអនុញ្ញាតច្បាប់ឱ្យសាងសង់ជាស្ថាពរ ដោយឡែកគម្រោងស្នើសុំសាងសង់មួយចំនួនទៀតដែលក្នុងរួមមានដូចជាគម្រោងសាងសង់សណ្ឋាគារ ផ្ទះសំណាក់ ក៏ដូចជាគម្រោងបណ្តុំលំនៅដ្ឋានជាដើម កំពុងតែស្ថិតនៅក្នុងដំណាក់កាលសិក្សា ត្រួតពិនិត្យ និងកែសម្រួល ដើម្បីឈានទៅរកការសម្រេចឱ្យស្របតាមគោលការណ៍ច្បាប់សំណង់។

លោក លី សំរិទ្ធ បានមានប្រសាសន៍បញ្ជាក់ថា “រដ្ឋបាលខេត្ត និងមន្ត្រីមន្ទីរពាក់ព័ន្ធ បានយកចិត្តទុកដាក់យ៉ាងខ្លាំងទៅលើការគ្រប់គ្រង និងតាមដាននូវគុណភាពសំណង់ ជាពិសេស សំណង់ធំៗដូចជា សណ្ឋាគារ ផ្ទះសំណាក់ អាផាតមិន និងគម្រោងខុនដូរជាដើម ដើម្បីប្រាកដថាមានគុណភាព មានសុវត្ថិភាព ស្របតាមគោលការណ៍និងច្បាប់សំណង់ ជៀសវាងកើតមានព្រឹត្តិការណ៍អកុសលដែលធ្លាមមានកាលពីពេលកន្លងទៅនៅក្នុងខេត្តកែប ក្រុងព្រះសីហនុ ក៏ដូចជានៅក្នុងខេត្តសៀមរាបផ្ទាល់ ដែលបាក់រលំអាគារសាលាឆទានក្នុងវត្ត ស្ថិតនៅសង្កាត់ចក ក្រុងសៀមរាប បណ្តាលឱ្យមានរងរបួសនោះទៀតឡើយ”៕

ស្ពានអាកាសនិង ផ្លូវក្រោមដីនៅរង្វង់មូលចោមចៅដំណើរការស្ថាបនាបានជាង ៤០ ភាគរយ

ដោយ ហ្សូលី

ភ្នំពេញ៖ ស្ពានអាកាស និងផ្លូវក្រោមដីនៅរង្វង់មូលចោមចៅបន្តដំណើរការស្ថាបនាជាធម្មតា គិតមកទល់ពេលនេះសម្រេចបានជាង ៤០ ភាគរយហើយ ស្របតាមផែនការដែលបានគ្រោងទុកដដែល។

ការដ្ឋានស្ថាបនាស្ពានអាកាស និងផ្លូវក្រោមដីនៅរង្វង់មូលចោមចៅមកដល់ពេលនេះ សម្រេចបាន ៤១ភាគរយហើយ។ ទន្ទឹមនេះ ដើម្បីសាងសង់ភ្ជាប់ផ្នែកកណ្ដាលនៃផ្លូវក្រោមដីនេះ ក្រោយពីផ្នែកសាងសង់ផ្លូវក្រោមដីបានស្ថាបនារួចរាល់នោះ រដ្ឋបាលរាជធានីភ្នំពេញបានប្រកាសឱ្យប្រជាពលរដ្ឋមេត្តាយោគយល់ពីការពង្វាងចរាចរនៅតំបន់នេះរយៈពេល ២ខែ ដោយចាប់ពីថ្ងៃទី ០២ ខែមិថុនា ឆ្នាំ២០២០ វេលាម៉ោង៨ព្រឹក រហូតដល់ថ្ងៃទី៣១ ខែកក្កដា ឆ្នាំ២០២០ ។

ថ្វីត្បិតតែកម្ពុជាបានជួបប្រទះនឹងការរាតត្បាតជំងឺ Covid-19 ក្តី ប៉ុន្តែការដ្ឋានសាងសង់ស្ពានអាកាសនិងផ្លូវក្រោមដីនេះនៅតែបន្តដំណើរការស្ថាបនាជាធម្មតា។

អ្នកនាំពាក្យសាលារាជធានីភ្នំពេញ លោក ម៉េត មាសភក្តី ធ្លាប់បានមានប្រសាសន៍ថា ការស្ថាបនាស្ពាននេះមានគោលបំណងដើម្បីកាត់បន្ថយការស្ទះចរាចរណ៍ក្នុងរាជធានីភ្នំេពញ ព្រោះនៅចំណុចរង្វង់មូលចោមចៅនេះមានភាពកកស្ទះចរាចរណ៍ស្ទើរតែរាល់ថ្ងៃ ទោះបីជាមានការអន្តរាគមន៍ប្រចាំការពីនគរបាលចរាចរណ៍ក៏ដោយ។ លោកថា ចំណុចរង្វង់មូលមានសារៈសំខាន់ណាស់ ព្រោះវាជាផ្លូវដ៏សមខាន់ក្នុងការជួយទ្រទ្រង់ការដឹកជញ្ជូន និងកំណើនសេដ្ឋកិច្ចកម្ពុជា។

គម្រោងស្ពានអាកាសនិងផ្លូវក្រោមដីចោមចៅ គឺជាគម្រោងអភិវឌ្ឍន៍របស់សាលារាជធានីភ្នំពេញ និងសាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC ដែលគ្រោងនឹងបញ្ចប់ការសាងសង់នៅចុងឆ្នាំ ២០២១ ខាងមុខនេះ។

បច្ចុប្បន្នរាជធានីភ្នំពេញ មានស្ពានអាកាសចំនួន៦កន្លែង រួមមាន ស្ពានអាកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា ស្ពានអាកាសស្តុបផ្សារដីហុយ និងស្ពានអាកាសចោមចៅ ដែលស្ពាននេះក្រុមការងារបាននិងកំពុងសម្រុកដំណើរការសាងសង់យ៉ាងសកម្មផងដែរ៕

វិស័យឯកជនស្នើសុំវិនិយោគស្ទឹងសៀមរាប ដើម្បីទាក់ទាញភ្ញៀវទេសចរ

ដោយ រ៉ាណេត

ភ្នំពេញ ៖ អភិបាលរងខេត្តសៀមរាប បានអះអាងថា មានក្រុមហ៊ុនវិស័យឯកជនមួយបានស្នើសុំវិនិយោគស្ទឹងខេត្តសៀមរាប ដើម្បីរៀបចំឱ្យមានសោភ័ណភាព បម្រើដល់វិស័យទេសចរណ៍ ខណៈដែលស្ទឹងមួយនេះមានបញ្ហាបរិស្ថានមិនល្អ។

លោក លី សំរិទ្ធ អភិបាលរងខេត្តសៀមរាប នៅក្នុងសន្និសទីសារព័ត៌មានស្តីពី «វឌ្ឍនភាព និងទិសដៅការងារបន្តរបស់រដ្ឋបាលខេត្តសៀមរាប» នាថ្ងៃទី២ ខែមិថុនា ឆ្នាំ២០២០នេះ ឱ្យដឹងថា កន្លងមកនេះ មានក្រុមហ៊ុនឯកជនបានស្នើសុំវិនិយោគស្ទឹងសៀមរាប តែរហូតមកដល់ពេលនេះ ខេត្តមិនទាន់បានសម្រេចយ៉ាងណានោះទេ ខណៈកំពុងសិក្សាលើគម្រោងលម្អិត។

លោកបន្តថា តាមរបាយការណ៍របស់ក្រុមហ៊ុនដែលចង់វិនិយោគស្ទឹងនេះ គឺគេចង់សម្អាតស្ទឹងឱ្យមានសោភ័ណភាព រៀបចំកន្លែងអង្គុយលំហែរកាយនៅតាមមាត់ស្ទឹង និងសាងសង់អាគារសម្រាប់កន្លែងទទួលទានអាហារជាដើម សម្រាប់បម្រើដល់ភ្ញៀវទេសចរជាតិ និងអន្តរជាតិ។

ស្ទឹងសៀមរាប ត្រូវបានចាត់ទុកថា ជាស្ទឹងប្រវត្តិសាស្ត្រមួយដ៏សំខាន់សម្រាប់ខេត្តសៀមរាប។ ស្ទឹងនេះ គឺជាស្ទឹងសិប្បនិមិត្ត ដែលកកើតឡើងដោយស្នាដៃរបស់មនុស្ស។ គ្មានឯកសារណាបញ្ជាក់ពីឆ្នាំនៃការបង្កើតស្ទឹងសៀមរាបឱ្យជាក់លាក់នោះទេ ប៉ុន្តែអ្នកស្រាវជ្រាវបានបញ្ជាក់ថា វាត្រូវបានគេបង្កើត និងកែច្នៃជាច្រើនសារ តម្រូវតាមការរៀបចំដែនដីនៅសម័យអង្គរ។

លោក អ៊ឹម សុខរិទ្ធី អនុប្រធាននាយកដ្ឋានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ នៃអាជ្ញាធរជាតិអប្សរា បានសរសេរថា ស្ទឹងសៀមរាប ដែលគេឃើញសព្វថ្ងៃ ចាប់ពីចំណុច «បំពេញរាជ» មក ជាសមិទ្ធផលនៃស្នាដៃមនុស្សបង្កើតក្នុងសម័យអង្គរ។

លោកបន្តថា ស្ទឹងនេះ កើតពីអូរតូចៗ ដែលហូរពីភ្នំផ្សេងៗ ស្ថិតនៅខាងជើងវាលរាបអង្គរ បន្ទាប់មកវាជួបគ្នានៅច្រកមួយមុននឹងហូរធ្លាក់ទៅកាន់វាលរាប។ ក្នុងនោះក៏មានដៃអូរតូចៗជាច្រើន បានហូរមកភ្ជាប់បន្ថែមទៀត ដែលប្រភព២សំខាន់ដែលគេស្គាល់ច្បាស់នោះ គឺអូរធំ និងអូរក្បាលស្ពាន៕

ជប៉ុន ផ្តល់ហិរញ្ញប្បទានឥតសំណង ៣២លានដុល្លារ សម្រាប់គម្រោងពង្រីកប្រព័ន្ធផ្គត់ផ្គង់ទឹកស្អាតនៅក្រុងតាខ្មៅ

ដោយ ៖ ប៊ី

ភ្នំពេញ ៖ រដ្ឋាភិបាលជប៉ុន តាមរយៈអង្គការ JICA ប្រចាំនៅកម្ពុជា បានចុះហត្ថលេខាលើកិច្ចព្រមព្រៀងផ្តល់ហិរញ្ញប្បទានឥតសំណងជាមួយរដ្ឋាភិបាលកម្ពុជាសម្រាប់អនុវត្តគម្រោងពង្រីកប្រព័ន្ធផ្គត់ផ្គង់ទឹកស្អាតនៅក្រុងតាខ្មៅ ដែលមានទឹកប្រាក់សរុបប្រមាណ ៣២ លានដុល្លារអាមេរិក។ នេះបើយោងតាមសេចក្តីប្រកាសពីអង្គការ JICA ចេញផ្សាយមុននេះបន្តិច។

លោកឧបនាយករដ្ឋមន្ដ្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក Yuichi SUGANO ប្រធានតំណាង JICA ប្រចាំនៅកម្ពុជា កាលពីថ្ងៃទី០១ ខែមិថុនា ឆ្នាំ២០២០ បានចុះហត្ថលេខាលើកិច្ចព្រមព្រៀងហិរញ្ញប្បទានឥតសំណងសម្រាប់អនុវត្តគម្រោងពង្រីកប្រព័ន្ធផ្គត់ផ្គង់ទឹកស្អាតនៅក្រុងតាខ្មៅ “Project for the Expansion of Water Supply System in Ta Khmau City”នេះ។

គម្រោងនេះមានគោលបំណងធ្វើឲ្យប្រសើរឡើងនូវការទទួលបានទឹកស្អាតប្រកបដោយសុវត្ថិភាពក្នុងក្រុងតាខ្មៅតាមរយៈការសាងសង់ (១) រោងចក្រប្រព្រឹត្តិកម្មទឹកស្អាតដែលមានសមត្ថភាពផលិតទឹកស្អាតបាន ៣០ ០០០ ម៉ែត្រគូបក្នុងមួយថ្ងៃ (២) ស្ថានីយ៍បូមទឹកឆៅ និងបំពង់មេនាំទឹកឆៅ (៣) បរិក្ខាសម្រាប់ចែកចាយទឹកស្អាត និង (៤) ការបំពាក់ប្រព័ន្ធ SCADA ព្រមទាំងការផ្ទេរបច្ចេកវិទ្យាសម្រាប់ប្រតិបត្តិការ និងការថែទាំដោយប្រើបទពិសោធន៍ និងចំណេះដឹងពីប្រទេសជប៉ុន។

កាលពីពេលថ្មីៗនេះ ពាក់ព័ន្ធទៅនឹងតម្រូវការ និងផ្គត់ផ្គង់ទឹកស្អាតនៅក្នុងក្រុងតាខ្មៅ ខេត្តកណ្តាល មានអ្នកជំនាញមកពីអង្គការភ្នាក់ងារកិច្ចសហប្រតិបត្តិការអន្តរជាតិជប៉ុន JICA ធ្វើការសិក្សាលម្អិតស្តីពីវឌ្ឍនភាពគម្រោងសាងសង់រោងចក្រប្រព្រឹត្តិកម្មទឹកស្អាត ដើម្បីវាយតម្លៃទៅលើស្ថានភាពជាក់ស្ដែង និងលទ្ធភាពក្នុងការអនុវត្តគម្រោងក្រោមជំនួយឥតសំណងរបស់រាជរដ្ឋាភិបាលជប៉ុន។

គម្រោងដែលនឹងត្រូវអនុវត្តន៍ រួមមានគម្រោងការងារផ្សេងៗជាច្រើនដូចជា ប្រព័ន្ធផលិតកម្មថ្មី ស្ថិតនៅទីតាំងរបស់រដ្ឋាករទឹកស្វយ័តក្រុងភ្នំពេញ នៅក្រុងតាខ្មៅ-ស្ថានីយបូមទឹកឆៅពីទន្លេបាសាក់ មានសមត្ថភាពផលិត ៣៣ ០០០ ម៉ែត្រត្រីគុណក្នុងមួយថ្ងៃ -ប្រព័ន្ធប្រព្រឹត្តិកម្មសម្អាតទឹកសមត្ថភាព ៣០ ០០០ ម៉ែត្រត្រីគុណក្នុងមួយថ្ងៃ ដោយកាលបរិច្ឆេទអនុវត្តគម្រោងត្រូវបញ្ចប់នៅខែកញ្ញា ឆ្នាំ២០២៣។

ការពង្រីកប្រព័ន្ធទឹកស្អាតនៅទីក្រុងតាខ្មៅនេះ រដ្ឋាភិបាលកម្ពុជាបានចាត់ទុកជាកត្តាសំខាន់បំផុត ពីព្រោះជាទីតាំងជិតរាជធានីភ្នំពេញ និងមានកំណើនប្រជាពលរដ្ឋរស់នៅច្រើន។ ជាមួយគ្នានេះ ប្រជាពលរដ្ឋក៏កំពុងតែទន្ទឹងរង់ចាំប្រើប្រាស់ទឹកស្អាត ដែលស្របទៅនឹងគោលនយោបាយរបស់រាជរដ្ឋាភិបាល កំណត់យកឆ្នាំ២០២៥ ជាឆ្នាំដែលប្រជាពលរដ្ធនៅតាមទីប្រជុំជនទទួលបានទឹកស្អាតប្រើប្រាស់គ្រប់ៗគ្នា ក្នុងតម្លៃសមរម្យ និងជៀសផុតពីជម្ងឺឆ្លងនានា ដោយសារការប្រើទឹកមិនស្អាត៕

ព្រលានយន្តហោះអន្តរជាតិខេត្តសៀមរាបបានចាប់ផ្តើមនិងកំពុងដំណើរការសាងសង់រយៈពេល១ឆ្នាំមកហើយ

ដោយវុត្ថា

ភ្នំពេញ៖ អភិបាលរខេត្តសៀមរាប បានអះអាងថា ការសាងសង់ព្រលានយន្តហោះអន្តរជាតិខេត្តសៀមរាបរហូតមកដល់ពេលនេះ សម្រេចបានរយៈពេល ១ ឆ្នាំ ហើយ ខណៈនេះខាងក្រុមហ៊ុនបានសាងសង់យ៉ាងសកម្ម និងដំណើរការដោយរលូន។

លោក លី សំរិទ្ធ អភិបាលរងនៃគណៈអភិបាលខេត្តសៀមរាបនៅក្នុងសន្និសទីសារព័ត៌មានស្តីពី «វឌ្ឍនភាព និងទិសដៅការងារបន្តរបស់រដ្ឋបាលខេត្តសៀមរាប» នាថ្ងៃទី ២ ខែមិថុនា ឆ្នាំ ២០២០នេះ បានឱ្យដឹងថា ដើម្បីឆ្លើយតបទៅនឹងដំណើរការសាងសង់ព្រលានយន្តហោះអន្តរជាតិខេត្តសៀមរាបនេះ ឱ្យដំណើរការដោយរលូន រាជរដ្ឋាភិបាលបានសម្រេចបង្កើតគណៈកម្មការតម្រង់ទិសនៃការសាងសង់មួយដើម្បីសម្របសម្រួលឱ្យកាន់តែមានប្រសិទ្ធិភាពនៃការសាងសង់។

លោកបន្តថា ការសាងសង់រហូតមកដល់ពេលនេះ សម្រេចបានលទ្ធផលក្នុងចំនួនច្រើន ហើយនៅពេលសាងសង់បញ្ចប់នៅក្នុងឆ្នាំ ២០២៣ ព្រលានយន្តហោះអន្តរជាតិនេះ នឹងអាចអនុញ្ញាតឱ្យយន្តហោះធុនធំអាចចុះចតបាន និង មានភ្ញៀវទេសចរណ៍ចូលមកលេងកម្សាន្តកាន់តែច្រើនថែមទៀត។

លោកបន្តថា “នៅពេលភ្ញៀវទេសចរណ៍ដែលចង់មកលេង ត្រូវឆ្លងកាត់ជើងយន្តហោះច្រើនលើកច្រើនសារ តែនៅពេលយើងមានព្រលានយន្តហោះថ្មីនេះ នឹងកាន់តែមានភាពងាយស្រួលដល់ភ្ញៀវទេសចរបរទេសមកកាន់ទីក្រុងសៀមរាប”។

លោកស្រីឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជា ធ្លាប់បានឱ្យដឹងថា ការសាងសង់ព្រលានយន្តហោះថ្មីនៅខេត្តសៀមរាប នឹងជាជម្រើសថ្មីមួយសំរាប់ក្រុមហ៊ុនអាកាសចរណ៍នានា អាចចុះចតយន្តហោះខ្នាតធំបាន ដែលវានឹងទាក់ទាញភ្ញៀវទេសចរណ៍ និងក្រុមហ៊ុនអាកាសចរណ៍កាន់តែច្រើនកាន់តែច្រើនចុះចតនៅព្រលានយន្តហោះនេះ។

លោកស្រីបន្តថា ព្រលានយន្តហោះនេះ ក៏អាចជាចំណុចតភ្ជាប់ទៅកាន់បណ្តារប្រទេសក្នុងតំបន់ផងដែរ ដែលវានឹងជំរុញឲ្យវិស័យទេសចរណ៍ និងពាណិជ្ជកម្មកម្ពុជាកាន់តែប្រសើរថែមទៀត។ លោកស្រីបន្តថា “វាជាចំណុចចាប់ផ្តើមដ៏ល្អ វានឹងធ្វើឲ្យវិស័យទេសចរណ៍ និងសេដ្ឋកិច្ចកម្ពុជាកាន់តែរីកចម្រើននាពេលអនាគត”។

ព្រលានយន្តហោះអន្តរជាតិសៀមរាប-អង្គរថ្មី នេះ សាងសង់ដោយក្រុមហ៊ុនចិន YUNAN DEVELOPMENT GROUP គ្រោងវិនិយោគនូវទឹកប្រាក់៩០០លានដុល្លារ អាមេរិក ចំងាយប្រមាណ៤០គីឡូម៉ែត្រ៥ពីក្រុងសៀមរាប នៅស្រុកសូត្រនិគមលើផ្ទៃដី៧០០ហិកតា៕

រយៈពេល ៥ខែ ដើមឆ្នាំ២០២០ កម្ពុជាទទួលបានចំណូលជាង ២៤១លានដុល្លារ ពីការនាំចេញអង្ករទៅកាន់ទីផ្សារអន្តរជាតិ

ដោយ ៖ រ៉ាណេត

ភ្នំពេញ ៖ នៅត្រឹមរយៈពេល៥ខែ ដើមឆ្នាំ២០២០នេះ ប្រទេសកម្ពុជាបានសម្រេចបានការនាំអង្ករចេញទៅកាន់ទីផ្សារអន្តរជាតិបានសរុបជាង ៣៥ម៉ឺនតោន ដែលទទួលបានចំណូលជាង ២៤១លានដុល្លារ ក្នុងនោះទីផ្សារប្រទេសចិនបានទទួលទិញប្រមាណ ៣៨ភាគរយនៃចំណែកទីផ្សារសរុប។

តាមរយៈរបាយការណ៍សង្ខេបរបស់សហព័ន្ធស្រូវអង្ករកម្ពុជា ដែលទើបទទួលបាននៅព្រឹកថ្ងៃទី២ ខែមិថុនា ឆ្នាំ២០២០នេះ បានបង្ហាញថា គិតចាប់តាំងពីដើមខែមករា រហូតដល់ដំណាច់ខែឧសភា កន្លងទៅនេះ ការនាំអង្ករចេញរបស់កម្ពុជាទៅកាន់ទីផ្សារអន្តរជាតិបានសម្រេចរហូតដល់ ៣៥៦ ០៩៧ តោន កើនឡើងប្រមាណ៤២ភាគរយ បើធៀបទៅនឹងរយៈពេលដូចគ្នាកាលពីឆ្នាំកន្លងទៅដែលមានត្រឹម ២៥០ ១៧២ តោន។

នៅក្នុងរបាយការណ៍ដដែលបានបញ្ជាក់ថា នៅក្នុងចំណោមទីផ្សារដែលទទួលយកអង្ករកម្ពុជា ក្នុងនោះប្រទេសចិនស្ថិតនៅលេខរៀងកំពូលដែលមានរហូតដល់ ៣៨ភាគរយនៃចំណែកទីផ្សារសរុប បន្ទាប់មកទីផ្សារអឺរ៉ុប ដែលមានចំនួន ៣៤ភាគរយ បណ្តាប្រទេសក្នុងតំបន់អាស៊ាន ១៣ ភាគរយ និងប្រទេសផ្សេងៗទៀតរួមមានដូចជាសហរដ្ឋអាមេរិក អូស្ត្រាលី និងប្រទេសហ្គាប៉ុង។ល។ មានចំនួន១៥ភាគរយ។

នៅក្នុងចំណោមនៃការនាំចេញអង្ករកម្ពុជាទាំងអស់ខាងលើនេះ សម្រាប់ប្រភេទអង្ករក្រអូបមានប្រមាណ ៧៧ភាគរយ ស្មើនឹង ២៧ម៉ឺនតោន ប្រភេទអង្ករស ចំនួន១៨ភាគរយ ហើយក្រៅពីនេះជាប្រភេទអង្ករសេរីរាង្គ អង្ករចំហុយ និងអង្ករដំណើប សរុបប្រមាណ៥ភាគរយ។ ដោយឡែក សម្រាប់ខែឧសភា កន្លងទៅនេះ ទីផ្សារសហគមន៍អឺរ៉ុប បានទទួលយកអង្ករកម្ពុជារហូតដល់ ៤៤ភាគរយនៃចំនួននាំចេញសរុប ស្មើនឹង ២៤០០០តោន ដែលជាចំនួនមួយបង្ហាញពីពិពីធម្មនៃការនាំចេញឆ្ពោះទៅកាន់ទីផ្សារដ៏សំខាន់មួយនេះ៕

World Bank៖ កម្ពុជាគួរធ្វើពិពិធកម្មទៅកការនាំចេញគ្រឿងអេឡិចត្រូនិច និងបន្លាស់រថយន្តទៅជប៉ុន

ដោយ ប៊ី

ភ្នំពេញៈ ធនាគារពិភពលោកបានលើកឡើងថា ប្រទេសកម្ពុជាគួរតែធ្វើពិពិធកម្មពីការនាំចេញសម្លៀកបំពាក់ ដោយជំរុញបន្ថែមទៀតនូវការនាំចេញ គ្រឿងអេឡិចត្រូនិច និងគ្រឿងបន្លាស់រថយន្តទៅកាន់ប្រទេសជប៉ុន។

ធនាគារនេះបានឱ្យដឹង នៅក្នុងរបាយការណ៍របស់ធនាគារពិភពលោកស្តីពី បច្ចុប្បន្នភាពសេដ្ឋកិច្ចចុងក្រោយ សម្រាប់ប្រទេសកម្ពុជាកាលពីពេលថ្មីៗនេះថា ការនាំចេញសម្លៀកបំពាក់ស្បែកជើង និងទំនិញធ្វើដំណើររបស់កម្ពុជា បានកើនឡើងត្រឹមតែ៧,៥ភាគរយក្នុងរយៈពេល៣ ខែគិតត្រឹមខែមីនា ធ្លាក់ចុះពី១៧,៧ ភាគរយកាលពីឆ្នាំមុន។

នៅក្នុងឆ្នាំ ២០១៩ កំណើននៃការនាំចេញសម្លៀកបំពាក់ ស្បែកជើង និងទំនិញធ្វើដំណើរបានថយចុះមកត្រឹម១៣,៦ ភាគរយ ធ្លាក់ចុះពី១៧,៧ ភាគរយ បើធៀបកាលពីឆ្នាំមុនមួយទៀត។

ការនាំចេញទំនិញទាំងនេះទៅកាន់សហភាពអឺរ៉ុប រួមទាំងចក្រភពអង់គ្លេស បានធ្លាក់ចុះ០,៥ ភាគរយ ដែលជាការធ្លាក់ចុះលើកដំបូង ចាប់តាំងពីមានវិបត្តិហិរញ្ញវត្ថុពិភពលោកក្នុងឆ្នាំ២០០៨-០៩ ។ ប៉ុន្តែការធ្លាក់ចុះនេះ ត្រូវបានទូទាត់ដោយការកើនឡើងនៃការនាំចេញទៅសហរដ្ឋអាមេរិក។

បន្ទាប់ពីទីផ្សារអាមេរិក និងអឺរ៉ុប ធនាគារពិភពលោកបានឱ្យដឹងទៀតថា ទីផ្សារនាំចេញធំជាងគេពីរបន្ទាប់របស់កម្ពុជាគឺជប៉ុន (តម្លៃការនាំចេញ ១,០៥ ពាន់លានដុល្លារ) និងអង់គ្លេស (៩៤៥ លានដុល្លារអាមេរិក) នៅឆ្នាំ២០១៩ ។

ធនាគារពិភពលោកបានឱ្យដឹងថា ខណៈទីផ្សារទាំងពីរចាប់បានប្រហាក់ប្រហែល ៨០០លានដុល្លារ ក្នុងការនាំចេញសម្លៀកបំពាក់ “ទីផ្សារជប៉ុន” ហាក់ដូចជាមានក្តីសង្ឃឹមខ្លាំង ចំពោះការនាំចេញគ្រឿងអេឡិចត្រូនិក និងគ្រឿងបន្លាស់រថយន្តនៅកម្ពុជា” ។

ការនាំចេញគ្រឿងអេឡិចត្រូនិច និងគ្រឿងបន្លាស់រថយន្តនៅកម្ពុជា ទៅកាន់ប្រទេសជប៉ុនបានកើនឡើងដល់៧៧,៨ លានដុល្លារកាលពីឆ្នាំមុន ដែលកើនឡើងពី៣៩,៤ លានដុល្លារអាមេរិកក្នុងឆ្នាំ ២០១៨ ។

ធនាគារនេះបានឱ្យដឹងទៀតថា “ការនាំចេញគ្រឿងអេឡិចត្រូនិច និងគ្រឿងបន្លាស់រថយន្ត គួរតែត្រូវបានជំរុញបន្ថែមទៀត ដើម្បីធ្វើឱ្យមានការធ្វើពិពិធកម្ម ពីលើការនាំចេញសម្លៀកបំពាក់” ៕

តំបន់ផ្លូវជាតិលេខ៣កាន់តែទាក់ទាញការវិនិយោគវិស័យលំនៅដ្ឋាន

ដោយៈ រ៉ាណេត

ភ្នំពេញៈ ស្របពេលដែលគម្រោងសាងសង់ និងពង្រីកផ្លូវជាតិលេខ៣ ជា៤គន្លង ត្រូវបានសម្រេចបានជាង៧៤ភាគរយ បាននិងធ្វើឲ្យតំបន់ស្ថិតនៅតាមផ្លូវដ៏សំខាន់នេះទាក់ទាញការវិនិយោគ និងអភិវឌ្ឍន៍លើវិស័យលំនៅដ្ឋានកាន់តែច្រើន ដែលភាគច្រើនជាប្រភេទលំនៅដ្ឋានតម្លៃសមរម្យចាប់ពី១០ម៉ឺនដុល្លារឡើងទៅ។

ជាមួយនឹងសន្ទុះនៃការវិនិយោគ និងអភិវឌ្ឍន៍លើវិស័យលំនៅដ្ឋាននៅតាមតំបន់ផ្លូវជាតិលេខ៣ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានទទួលស្គាល់ និងមានប្រសាសន៍ប្រាប់តាមទូរស័ព្ទ កាលពីល្ងាចថ្ងៃទី១ ខែមិថុនា ឆ្នាំ២០២០ ថា កំណើននៃការចូលខ្លួនវិនិយោគ និងអភិវឌ្ឍន៍វិស័យលំនៅដ្ឋាននៅតំបន់ផ្លូវជាតិលេខ៣ មិនមែនជារឿងចម្លែកនោះទេ ហើយរាល់ការវិនិយោគទាំងអស់ អ្នកអភិវឌ្ឍន៍សុទ្ធតែបានសិក្សាពីសក្ដានុពលតំបន់យ៉ាងលម្អិត។

លោកបន្តទៀតថា “តំបន់ជាប់ផ្លូវជាតិលេខ៣ រាប់ចាប់គិតពីចំណុចចោមចៅប្រមាណ១៥គីឡូម៉ែត្រ គឺនៅតែមានតម្រូវការខ្ពស់ សម្រាប់អភិវឌ្ឍវិស័យលំនៅដ្ឋាន ជាពិសេសបន្ទាប់ពីផែនការអភិវឌ្ឍន៍ និងពង្រីកក្រុងត្រូវបានអនុវត្តន៍។ លោកបន្តថា “មិនយូរទៀតនោះទេ តំបន់ដែលស្ថិតនៅគៀកក្រុង នឹងត្រូវកាត់បញ្ចូលជាចំណុះរដ្ឋបាលរាជធានីភ្នំពេញ ហើយតម្លៃដីធ្លីក៏មានការកើនឡើង ដូច្នេះសម្រាប់អ្នកវិនិយោគ ក៏ដូចជាអ្នកអភិវឌ្ឍន៍បានចាប់យកឱកាសនៅពេលនេះ គឺជារឿងត្រឹមត្រូវបំផុត” ។

ដោយឡែកសម្រាប់អ្នកទិញក៏ដូចជាគ្នា ពួកគាត់អាចស្វែងរកទិញលំនៅដ្ឋានដែលស្របតាមលទ្ធភាពរបស់ពួកគាត់នៅពេលនេះ ដែលលំនៅដ្ឋានភាគច្រើនមានតម្លៃតម្លៃត្រឹម១០ម៉ឺន ប៉ុន្តែក្នុងរយៈពេល២ឆ្នាំទៅមុខទៀត តម្លៃនឹងឡើងខ្ពស់ជាងនេះ។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century21 Advance Property លោក ឡុង គឹមសួគ៌ បានមានប្រសាសន៍ថា បច្ចុប្បន្ននេះ ក៏ដូចជាពេលខាងមុខនេះ គ្រប់តំបន់នៅជុំវិញក្រុងគឺសុទ្ធតែមានតម្រូវការទីផ្សារ ទាស់តម្លៃដែលវាអាស្រ័យទៅលើកំណើនប្រជាជនរស់នៅ បណ្តាញហេដ្ឋារចនាសម្ព័ន្ធងាយស្រួលចរាចរណ៍ និងអាចប្រកបអាជីវកម្ម ជាពិសេសងាយចេញចូលក្រុង។

លោកបញ្ជាក់ថា “មិនថាចំពោះតំបន់ស្ថិតនៅផ្លូវជាតិលេខ ៣ ,៤, ៥, ៦ នោះទេ គឺសុទ្ធតែមានគម្រោង និងអភិវឌ្ឍន៍វិស័យលំនៅដ្ឋានទាំងអស់ ដោយសារតែតម្លៃដីនៅតាមតំបន់ទាំងអស់នៅមានទាប សមស្របទៅនឹងការអភិវឌ្ឍលំនៅដ្ឋានតម្លៃសមរម្យ។

នៅពេលនេះ តម្លៃដីដែលស្ថិតនៅក្នុងរង្វង់១៥០-២៥០ ក្នុងមួយម៉ែត្រ នៅតែផ្ដល់ឱកាសដល់អ្នកវិនិយោគក្នុងវិស័យនេះ ប៉ុន្តែនៅពេលតម្លៃដីឡើងរហូតដល់ក្នុងចន្លោះចាប់ពី៣០០-៤០០ ការវិនិយោគ និងអភិវឌ្ឍន៍វិស័យលំនៅដ្ឋាន ដែលដាក់លក់ក្នុងតម្លៃត្រឹម១០ម៉ឺនដុល្លារអាចពិបាកនឹងធ្វើ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍កាលពីពេលកន្លងទៅថា ការសាងសង់ពង្រីកកំណាត់ផ្លូវជាតិលេខ៣ ចាប់់ពីចោមចៅ ទៅកាន់ក្រុងកំពត តាមគម្រោងគឺត្រូវបញ្ចប់នៅឆ្នាំ២០២២ ប៉ុន្តែដោយសារវឌ្ឍនភាព នៃការសាងសង់បានដំណើរការដោយភាពរលូន ការសាងសង់អាចនឹងត្រូវបញ្ចប់នៅចុងឆ្នាំ២០២១ ៕

ស្ពានធំៗចំនួន៥ក្នុងខេត្តកណ្តាលកំពុងជំរុញដល់ការដឹកជញ្ជូន និងកំណើនសេដ្ឋកិច្ច

ដោយវុត្ថា

ភ្នំពេញៈ ក្រៅពីការមានហេដ្ឋារចនាសម្ព័ន្ធតភ្ជាប់គ្រប់ច្រកល្ហក គម្រោងស្ពានធំៗចំនួន៥ នៅក្នុងមូលដ្ឋានខេត្តកណ្តាល បាននិងកំពុងជួយជំរុញកំណើនការដឹកជញ្ជូន និងភស្តុភារយ៉ាងសកម្ម និងសេដ្ឋកិច្ចរបស់កម្ពុជា ឱ្យមានសន្ទុះរីកចំរើនទៅមុខឥតឈប់ឈរ ។

អភិបាលខេត្តកណ្តាល លោកគង់ សោភ័ណ កាលពីពេលថ្មីនេះបានសម្តែងមោទនភាព ចំពោះការរីកចំរើនលើហេដ្ឋរចនាសម្ព័ន្ធធំៗ ជាពិសេសស្ពានធំៗទាំង៥ នៅក្នុងខេត្តកណ្តាលនាពេលពេលបច្ចុប្បន្ននេះ ដែលជួយសម្រួលដល់ការដឹកជញ្ជូន និងសេដ្ឋកិច្ចរួមជាមួយនឹង ចរាចរណ៍ឱ្យកាន់តែមានភាពងាយស្រួល។

១) ស្ពានសឹបាហ្សា (ស្ពានអ្នកលឿងមិត្តភាពកម្ពុជា-ជប៉ុន)

ស្ពានមិត្តភាពកម្ពុជា-ជប៉ុន ឆ្លងអ្នកលឿង ដែលបានស្ថាបនាអស់ទឹកប្រាក់ប្រមាណ១០០លានដុល្លារសហរដ្ឋអាមេរិក ជាជំនួយឥតសំណងរបស់ប្រទេសជប៉ុន ជាស្ពានទី២ ដែលជាចំណងដៃរបស់ប្រទេសជប៉ុនជួយដល់កម្ពុជា។ ស្ពាននេះត្រូវបានបើកប្រើប្រាស់ជាផ្លូវការកាលពីខែមេសា២០១៥ ។

ស្ពានអ្នកលឿង មិនមែនបម្រើអោយវិស័យគមនាគមន៍ សម្រាប់តែប្រជាពលរដ្ឋខ្មែរប៉ុណ្ណោះទេ ស្ពាននេះក៏ជាសរសៃឈាមសេដ្ឋកិច្ច របស់បណ្តាប្រទេសសមាជិកអាស៊ានផងដែរ។

២) ស្ពានមិត្តភាពកម្ពុជា-ចិន ព្រែកតាមាក់

ស្ពានមិត្តភាព កម្ពុជា-ចិន ឬស្ពានព្រែកតាមាក់ ដែលស្ថិតនៅភាគខាងកើតឈៀងខាងជើងរាជធានីភ្នំពេញ ដែលបានតភ្ជាប់ផ្លូវជាតិចំនួន២ (គឺផ្លូវជាតិលេខ ៦A និងចំណុចចាប់ផ្តើមនៃផ្លូវជាតិលេខ៨) ដែលបានតភ្ជាប់ចរាចរណ៍រវាងស្រុកមុខកំពូល និងស្រុកខ្សាច់កណ្តាល ខេត្តកណ្តាល។

ស្ពាននេះមានប្រវែង១០៦៦ ម៉ែត្រ ទទឹង១៣.៥ ម៉ែត្រ ដែលបានដាក់ឲ្យប្រើប្រាស់នៅឆ្នាំ ២០១១ ចំណាយថវិកាប្រមាណ៤៣.៥លានដុល្លារ។ ស្ពាននេះគឺជាសរសៃឈាមសេដ្ឋកិច្ចដ៏សំខាន់ ដែលបានកាត់បន្ថយការចំណាយថវិកា និងពេលវេលានៃការធ្វើដំណើរយ៉ាងច្រើនដល់ប្រជាពលរដ្ឋ អាជីវករ ក៏ដូចជាអ្នកវិនិយោគទុននៅកម្ពុជា។

៣) ស្ពានមិត្តភាពកម្ពុជា-ចិនព្រែកក្ដាម

ស្ពានមិត្តភាពកម្ពុជា-ចិនព្រែកក្ដាម ឆ្លងទន្លេមេគង្គ ដែលជាចំណុចប្រសព្វប្រជុំស្រុក៣ គឺស្រុកពញាឮ មុខកំពូល និងខ្សាច់កណ្តាល និងតភ្ជាប់ទៅ កាន់ខេត្តព្រៃវែង រួចហើយឆ្ពោះទៅដល់ប្រទេសវៀតណាម។ ស្ពាននេះ ត្រូវបានបើកឱ្យប្រើប្រាស់កាលពីខែមករា ២០១១ ។

ស្ពានព្រែកតាមាក់នេះ ជាជំនួយប្រាក់កម្ចីរបស់សាធារណរដ្ឋប្រជាមានិតចិន ជួយដល់រដ្ឋាភិបាលកម្ពុជា ដែលចំណាយការកសាងអស់ប្រមាណ៤០លានដុល្លារ ក្នុងទិសដៅអភិវឌ្ឍន៍ហេដ្ឋរចនាសម្ព័ន្ធស្ពាន-ផ្លូវ ឈានទៅបង្កលក្ខណៈងាយស្រួល ដល់ប្រជាពលរដ្ឋធ្វើដំណើរ ដឹកជញ្ជូន ក៏ដូចជាការប្រកបរបរប្រចាំថ្ងៃ ពង្រីកជីវភាពគ្រួសារ ពាណិជ្ជកម្ម និងសេដ្ឋកិច្ច សង្គម ។

៤) ស្ពានមិត្តភាពកម្ពុជា-ចិនកោះធំ

ស្ពានមិត្តភាពកម្ពុជា-ចិនកោះធំដែលមានតម្លៃជិត២០លានដុល្លារអាមេរិក ជាកម្ចី សម្បទានរបស់ រដ្ឋាភិបាលចិន ស្ថិតនៅបណ្តោយផ្លូវជាតិលេខ២១ ក្នុងស្រុកកោះ ធំខេត្តកណ្តាល និងត្រូវសម្ភោធ ដាក់ឱ្យប្រើប្រាស់ជាផ្លូវការនៅថ្ងៃច័ន្ទ ទី១៣ ខែកុម្ភះ ២០១៧ ក្រោមអធិបតី លោកនាយករដ្ឋមន្ត្រី ហ៊ុន សែន។

ស្ពាននេះចំណាយថវិកាសរុប១៩,៣លានដុល្លារអាមេរិក ជាថវិកាកម្ចីឥណទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជាប្រមាណ២ ,៨លានដុល្លារអាមេរិក ។ ការសាងសង់ស្ពានកោះធំ គឺជាគម្រោងយុទ្ធសាស្ត្រមួយយ៉ាងសំខាន់ សម្រាប់តភ្ជាប់ទំនាក់ទំនង និងសម្រួលការធ្វើដំណើររបស់ប្រជាពលរដ្ឋ ដែលរស់នៅយ៉ាងច្រើនកុះករនៅត្រើយខាងកើត និងត្រើយខាងលិចទន្លេបាសាក់ឱ្យបានងាយស្រួលនិងឆាប់រហ័ស។

៥) ស្ពានមិត្តភាពកម្ពុជា-ចិន តាខ្មៅ (ស្ពានព្រែកសំរោង)

ស្ពានមិត្តភាពកម្ពុជា-ចិនតាខ្មៅ ដែលជាស្ពានឆ្លងកាត់ទន្លេបាសាក់ ប្រវែង៨៥៥ម៉ែត្រ ត្រូវបានធ្វើពិធីសម្ពោធដាក់ឲ្យប្រើប្រាស់ជាផ្លូវការ នៅព្រឹកថ្ងៃទី០៣ ខែសីហា ឆ្នាំ២០១៥នេះ ក្រោមអធិបតីភាពសម្តេចតេជោហ៊ុន សែន នាយករដ្ឋមន្ត្រី នៃកម្ពុជា។

ស្ពានមិត្តភាពកម្ពុជា-ចិន តាខ្មៅ ប្រវែង ៨៥៥ ម៉ែត្រ ឆ្លងកាត់ទន្លេបាសាក់ និងផ្លូវតភ្ជាប់ប្រវែង ១១,៩៥ គីឡូម៉ែត្រ ពីផ្លូវជាតិលេខ២ ទៅផ្លូវជាតិលេខ១ ត្រូវបានសម្ពោធបើកឲ្យប្រើប្រាស់ជាផ្លូវការ នាព្រឹកថ្ងៃទី៣សីហានេះ ក្រោមអធិបតីភាពសម្តេចហ៊ុនសែន និងសម្តេចកត្តិព្រឹទ្ធបណ្ឌិត ប៊ុនរ៉ានី ហ៊ុនសែន។

ស្ពាន មិត្តភាពកម្ពុជា-ចិន តាខ្មៅ ឆ្លងទន្លេបាសាក់ ពីក្រុងតាខ្មៅ ទៅសង្កាត់ព្រែកឯង ដែលជាតំណរភ្ជាប់នៃផ្លូវក្រវ៉ាត់រាជធានីភ្នំពេញពីផ្លូវជាតិលេខ២ ទៅកាន់ផ្លូវជាតិលេខ១ ដែលមានតួនាទីជាផ្លូវវៀង និងបញ្ចៀសការដឹកជញ្ជូនទំនិញធន់ធ្ងន់ តាមស្ពានភ្លោះព្រះមុនីវង្ស ហើយវាក៏ជាផ្នែកមួយ នៃការពន្លឿនការអភិវឌ្ឍន៍តំបន់ប៉ែកខាងត្បូង ឆៀងខាងកើតរាជធានីភ្នំពេញ។

ស្ពានមិត្តភាពកម្ពុជា ចិន តាខ្មៅ ឆ្លងកាត់ទន្លេបាសាក់នេះ ចំណាយថវិកាសរុបប្រមាណ៣២,៨៩លានដុល្លារ ដែលជាហិរញ្ញប្បទានពីប្រទេសចិន រួមជាមួយថវិកាបដិភាគមួយចំនួនថែមទៀត សម្រាប់ដោះស្រាយផលប៉ះពាល់ និងបោសសំអាតមីន និងកាកសំណល់សង្គ្រាម៕

តើខេត្តព្រះសីហនុកំពុងឆ្ពោះទៅកាន់ទីក្រុងនៃមជ្ឈមណ្ឌលហិរញ្ញវត្ថុប្រចាំប្រទេសយ៉ាងដូចម្តេច?

ដោយៈ រ៉ាណេត

ព្រះសីហនុៈ វាជសំណួរដែលយើងត្រូវឆ្លើយ និងចាំមើលទាំងអស់គ្នានាពេលអនាគត ខណៈបច្ចុប្បន្នរដ្ឋាភិបាលបាន និងកំពុងដើរស្របគ្នានឹងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ដោយគ្រោងប្រែក្លាយខេត្តនេះជាតំបន់ឧស្សាហកម្ម។

ប៉ុន្តែប៉ុន្មានឆ្នាំចុងក្រោយនេះ គោលនយោបាយនេះត្រូវបានកែខៃឲ្យកាន់តែប្រសើរឡើង តាមរយៈការរៀបចំគោលនយោបាយ និងផែនការអភិវឌ្ឍន៍ ដោយប្រែក្លាយទីក្រុងនេះជាទីក្រុងមានការអភិវឌ្ឍ “ដោយពហុបំណង” ស្របពេលការអភិវឌ្ឍនូវហេដ្ឋារចនាសម្ព័ន្ធនៅទូទាំងខេត្ត សម្រេចបានជាង៩៤ភាគរយ ខណៈពេលដែលកំណើនអាគារពាណិជ្ជកម្មកំពុងកើនឡើងយ៉ាងស្អេកស្កះ។

អភិបាលខេត្តព្រះសីហនុ លោកគួច ចំរើនដែលជាបញ្ញវ័ន្តវ័យក្មេង និងទទួលបានការបណ្តុះបណ្តាលយ៉ាងត្រឹមត្រូវ ហើយត្រូវបានសម្តេចតេជោផ្លាស់ប្តូរពីខេត្តកំពង់ចាម ទៅកាន់ខេត្តដែលមានការរីកចម្រើនយ៉ាងលឿននេះ ពិតជាមិនមែនជារឿងចៃដន្យឡើយ។

មានប្រសាសន៍ស្វាគមន៍សម្តេចតេជោ កាលពីល្ងាចថ្ងៃទី ១មិថុនាកន្លងមក ក្នុងពេលសម្តេចអញ្ជើញពិនិត្យវឌ្ឍនភាពផ្លូវទាំង៣៤ខ្សែ ដែលសមិទ្ឋិផលនេះនឹងផ្លាស់ប្តូរមុខមាត់ខេត្តនេះជាថ្មីម្តងទៀត លោកគួច ចំរើនបានមានប្រសាសន៍ថា រាជរដ្ឋាភិបាលបានកំណត់ផែន ក្នុងការរៀបចំប្លង់គោលប្រើប្រាស់ដីធ្លីក្នុងខេត្តព្រះសីហនុ ជាមួយចក្ខុវិស័យឆ្នាំ២០៣០ គឺរៀបចំនិងអភិវឌ្ឍខេត្តព្រះសីហនុ ជាប៉ូលអភិវឌ្ឍជាតិប្រកបដោយចីរភាពនៅតំបន់ឆ្នេរសមុទ្រកម្ពុជា តាមរយៈការអភិវឌ្ឍទីក្រុងទំនើប ជាមួយរមណីយដ្ឋានឆ្នេរសមុទ្រ ដែលស្អាតបំផុតលើសកលលោក និងជាតំបន់សេដ្ឋកិច្ចពិសេសគំរូពហុបំណង ដែលនឹងទាក់ទាញទេសចរ និងការវិនិយោគថ្មីៗបន្ថែមទៀតពីបរទេស និងបំរើដល់ការរស់នៅដ៏ល្អប្រសើរ សម្រាប់ប្រជាពលរដ្ឋខ្មែរយើងផងដែរ។

លោកបញ្ជាក់ថា គិតចាប់ពីថ្ងៃបើកការដ្ឋានស្ថាបនាផ្លូវកាលពីថ្ងៃទី១៦ ខែវិច្ឆិកា ឆ្នាំ២០១៩ ក្រោមអធិបតីភាពរបស់ សម្ដេចតេជោនាយករដ្ឋមន្ត្រី រហូតមកដល់បច្ចុប្បន្ន ការងារស្ថាបនាផ្លូវក្រុងចំនួន ៣៤ខ្សែ សម្រេចបានប្រមាណ៩៤% ដោយមិនគិតបញ្ចូលការងារអ៊ុត កៅស៊ូ គំនូសសញ្ញាចរាចរណ៍ ដាំដើមឈើ បំពាក់កាមេរ៉ាសុវត្ថិភាព បង្គោលភ្លើងស្តុបចរាចរណ៍ បង្គោលភ្លើងបំភ្លឺផ្លូវ និងការរៀបកម្រាលថ្មក្រានីត។ ចំពោះការងារចាក់បេតុង និងដាក់លូគ្រោងនឹងបញ្ចប់នៅដើម ខែមិថុនា ឆ្នាំ២០២០” ។

ការស្ថាបនាផ្លូវទាំង៣៤ខ្សែក្នុងក្រុងព្រះសីហនុនេះ បានដំណើការទៅតាមផែនការដោយរលូន ទទួលបានការចូលរួមសហការយ៉ាងល្អ ពីប្រជាពលរដ្ឋក្នុងមូលដ្ឋាន និងមានការយកចិត្តទុកដាក់ខ្ពស់ពីក្រុមហ៊ុន និងអង្គភាពទទួលការងារស្ថាបនាផ្លូវ ដោយគោរពទៅតាមប្លង់សុរិយោដី ប្លង់ស្ថាបត្យកម្ម ប្លង់គ្រឿងបង្គុំ និងបទដ្ឋានបច្ចេកទេសផ្លូវ ដែលសិក្សាដោយក្រុមការងារ គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ដើម្បីធានាបានទាំងគុណភាព និងសោភ័ណភាព។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងមន្ត្រីជាន់ខ្ពស់រាជរដ្ឋាភិបាលកម្ពុជា រួមទាំងអាជ្ញាធរខេត្តព្រះសីហនុ នៅថ្ងៃទី០១ ខែមិថុនា ឆ្នាំ២០២០នេះ បានអញ្ជើញពិនិត្យលទ្ធផលដំបូង នៃការស្ថាបនាផ្លូវនៅក្នុងក្រុងព្រះសីហនុ ដែលជាផ្លូវផែនការយុទ្ធសាស្ត្រក្នុងការធ្វើឱ្យក្រុងព្រះសីហនុ ក្លាយជាទីក្រុងទេសចរណ៍ និងពាណិជ្ជកម្មដ៏ស៊ីវិល័យ។

ជាមួយនឹងសក្តានុពលមានស្រាប់ ដោយមានកំពង់ផែទឹកជ្រៅតែមួយគត់របស់ប្រទេស មានផ្លូវរថភ្លើង មានព្រលានយន្តហោះលំដាប់អន្តរជាតិ ដែលនឹងបញ្ចប់ការពង្រីកនាពេលខាងមុខ ដើម្បីឲ្យយន្តហោះធំៗអាចចុះចតបាន និងមានផ្លូវល្បឿនលឿនតភ្ជាប់ពីរាជធានីភ្នំពេញ ពិសេសឆ្នេរខ្សាច់ និងបណ្តាកោះនានាដ៏ស្រស់ស្ងាតដូចឋានសួគ៌ ពិតណាស់ ខេត្តនេះកំពុងដើរទៅមុខដោយរលូន និងកាន់តែមានភាពស័ក្តិសមជាទីក្រុងស៊ីវិល័យមួយ និងជាមជ្ឈមណ្ឌលហិរញ្ញវត្ថុទី១សំរាប់ប្រទេសនាពេលអនាគត៕