ដោយ ហ្សូលី

ប៉េកាំង៖ វិស័យអចលនទ្រព្យចាប់ផ្តើមបង្ហាញភាពវិជ្ជមាននិងមានសកម្មភាពទិញ-លក់ ប៉ុន្តែមិនទាន់ត្រឡប់មកសភាពដើមដូចពេលមិនទាន់ផ្ទុះមេរោគឆ្លងនៅឡើយទេ។

យោងតាមរបាយការណ៍សេវាវិនិយោគិនរបស់ក្រុមហ៊ុន Moody បានបង្ហាញឱ្យដឹងថា ការលក់អចលនទ្រព្យនៅប្រទេសចិនបានធ្លាក់ចុះចំនួន ២,៦ ភាគរយ កាលពីខែមេសា។ នេះបង្ហាញពីស្ថានភាពល្អប្រសើរជាងកាលពីខែមីនា ដែលធ្លាក់ចុះដល់ទៅ ១២,១ ភាគរយ។

បើតាមប្រសាសន៍របស់លោក Danny Chan ជំនួយការអនុប្រធាននិងអ្នកវិភាគរបស់ក្រុមហ៊ុនវិភាគសេដ្ឋកិច្ចអន្តរជាតិ Moody បានឱ្យដឹងថា នេះគឺដោយសារតែការលក់កិច្ចសន្យាទូទាំងប្រទេសលើវិស័យអចលនទ្រព្យបានស្ទុះងើបឡើងវិញបន្តិចម្តង ៗ និងការចេញប័ណ្ណបំណុលនៅឯនាយសមុទ្រ ដែលជាផលប៉ះពាល់នៃជំងឺរាតត្បាតនៅប្រទេសចិន។

អ្នកអភិវឌ្ឍន៍ដែលបានវាយតម្លៃខ្ពស់ជាងទីផ្សារធ្លាក់ចុះដោយមានតែ ១១,៧ ភាគរយនៅក្នុងខែមេសា ទាបជាងការធ្លាក់ចុះ ១២,៩ ភាគរយនៅក្នុងទីផ្សារទូលំទូលាយ។ ការចេញមូលបត្របំណុលនៅឯនាយសមុទ្ររបស់អ្នកអភិវឌ្ឍន៍បានកើនឡើងនៅខែឧសភាដោយក្រុមហ៊ុនអភិវឌ្ឍន៍ចំនួន ៣ បានចេញមូលបត្របំណុលសរុប ៩៤៤ លានដុល្លារធៀបនឹងទឹកប្រាក់ ៨៧ លានដុល្លារ កាលពីខែមេសា។

ក្រុមហ៊ុន Moody’s រំពឹងថា ការចេញមូលបត្របំណុលនៅឯនាយសមុទ្រសម្រាប់ឆ្នាំ ២០២០ នៅតែមានសមរម្យ និងជ្រើសរើសចំអ្នកដែលមានគុណភាពនិងកេរ្តិ៍ឈ្មោះល្អ។

លើសពីនេះទៀត ក្រុមហ៊ុន Moody រំពឹងថា អ្នកអភិវឌ្ឍន៍ដែលទទួលបានទិន្នផលខ្ពស់នឹងដោះស្រាយបំណុលរួចនៅខែឧសភាឆ្នាំ ២០២១ ទោះបីចំណាយលើការកែលម្អឡើងវិញខ្ពស់នៅក្នុងរយៈពេល ១២ ខែបន្ទាប់ក៏ដោយ៕

ដោយ ហ្សូលី

ភ្នំេពញ៖ វិស័យខុនដូនៅក្នុងប្រទេសកម្ពុជាកំពុងមានភាពរីកដុះដាលជាខ្លាំងនៅក្នុងទីក្រុងភ្នំេពញ ដោយហេតុថា ប្រជាពលរដ្ឋកម្ពុជាចាប់ផ្តើមស្វែងយល់ពីការរស់នៅតាមបែបទំនើប និងផ្តល់ភាពងាយស្រួលក្នុងជីវិតរស់នៅប្រចាំថ្ងៃ។ ដូច្នេះមុននឹងទិញខុនដូ អ្នកគួរស្វែងយល់ឱ្យបានច្បាស់លាស់ពីចំនុចវិជ្ជមាន និងអវិជ្ជមានមួយចំនូនសិន។ របាយការណ៍ស្រាវជ្រាវរបស់ក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia បានបង្ហាញថា នៅទូទាំងរាជធានីភ្នំពេញមានគម្រោងខុនដូចំនួន៥ ស្មើនឹង២៨៤៣យូនីត បានចូលទៅក្នុងទីផ្សារក្នុងត្រីមាសទី១នៃឆ្នាំនេះ ដែលបានធ្វើឱ្យខុនដូមានកំនើនរហូតដល់២០,៨៥១យូនីត ក្នុងទីផ្សារទាំងមូល។

១/ចំណុចវិជ្ជមាន
តម្លៃសមរម្យ
បើប្រៀបធៀបរវាងតម្លៃខុនដូនៅក្នុងក្រុង និងលំនៅដ្ឋានក្នុងក្រុង ច្បាស់ណាស់ថាខុនដូមានតម្លៃទាបជាង។ ដូច្នេះសម្រាប់គ្រួសារតូច ដែលមានសមាជិកតិច អាចមានលទ្ធភាពផ្គត់ផ្គង់អចលនវត្ថុប្រភេទនេះបាន។ សូម្បីតែការបង់ពន្ធក៏មានតម្លៃទាបជាងដូចគ្នា បើប្រៀបធៀបជាមួយលំនៅដ្ឋាន។ លើសពីនេះ ម្ចាស់ខុនដូមិនចាំបាច់ព្រួយបារម្ភរឿងជួសជុលនិងថែទាំច្រើនឡើយ ចំនុចនេះបានន័យថា ម្ចាស់ខុនដូមិនត្រូវព្រួយបារម្ភរឿងជួសជុលជណ្តើរ ដំបូល ផ្លូវដើរ នោះទេ ទាំងនោះគឺជាការទទួលខុសត្រូវរបស់ខាងគ្រប់គ្រងអគារតែប៉ុណ្ណោះ។

ការផ្តល់សេវាកម្មពិសេស
ការរស់នៅតាមខុនដូ មានភាពងាយស្រួលត្រង់ចំនុចសេវាកម្មនេះតែម្តង ដោយសារតែមានប្រព័ន្ធរក្សាសន្តិសុខដល់អ្នករស់នៅបាន ២៤ ម៉ោង និងជារៀងរាល់ថ្ងៃ។ ព្រព័ន្ធការពារសុវត្ថិភាពមានភាពទំនើប ដូចជាការដាក់កាមេរ៉ាគ្រប់ផ្លូវចេញចូល ដូច្នេះមិនថារស់នៅម្នាក់ឯង ឬមនុស្សវ័យចំណាស់រស់នៅឡើយ គឺមានសុវត្ថិភាពខ្ពស់ និងផាសុកភាព។ សេវាសម្អាតអនាម័យ ជួសជុលសម្ភាៈក្នុងខុនដូ និង មានក្លឹបហាត់ប្រាណ អាងហែលទឹក ស្ប៉ា ជាដើម។ បើនៅតាមអគារខុនដូខ្លះមានស្កាយបារ Skybar ភោជនីយដ្ឋាន និងមានការរៀបចំពិធីជួបជុំផ្សេងៗ។

ឱកាសផ្សារភ្ជាប់ជាមួយសង្គម និងឱកាសចំណេញការរស់នៅខុនដូមានអាទិភាពត្រង់ថា មានឱកាសស្ថិតនៅចំកណ្តាលក្រុងមានមន្ទីរពទ្យ ផ្សារទំនើប សាលារៀន តំបន់ពាណិជ្ជកម្ម និងកន្លែងប្រកបការងារ។ មិនតែប៉ុណ្ណោះ ឱកាសចំណេញក៏ទទួលបានច្រើនទៅតាមទីតាំងនិងតំបន់ផងដែរ ព្រោះម្ចាស់ខុនដូ អាចរស់នៅក៏បាន អាចដាក់លក់ឬជួលវិញក៏បាន។ គម្រោងខុនដូមានការយោគយល់ដោយសន្យាថា នឹងបង្វិលជួលវិញក្នុងករណីដែលម្ចាស់បន្ទប់ខុនដូ រកអ្នកជួលមិនបាន។ តាមរបាយការណ៍របស់ CBRE Cambodia បានឱ្យឃើញថា ការជួលប្រចាំខែជាមធ្យមក្នុងមួយម៉ែត្រការ៉េ សម្រាប់យូនីតដែលមាន តម្លៃខ្ពស់គឺ១៤,២១ដុល្លារ និង១១,៧៩ដុល្លារ សម្រាប់យូនីតខ្នាតមធ្យម។

២/ចំណុចអវិជ្ជមាន
មានវិនិ័យច្រើន
តាមអគារខុនដូខ្លះមានការដាក់វិន័យតឹងតែងដែលបណ្តាលឱ្យការរស់នៅរបស់ម្ចាស់បន្ទប់ខុនដូមានភាពលំបាកដែរ ជាក់ស្តែងដូចជាការចិញ្ចឹមសត្វ គឺត្រូវរឹតបន្តឹងដើម្បីរក្សាអនាម័យក្នុងបរិវេណអគារខុនដូ។ វិន័យនៃការចោលសម្រាមក៏មានភាពលំបាក តែក៏មានខុនដូខ្លះមានសេវាកម្មឱ្យអ្នកអនាម័យមកប្រមូលសម្រាម ហើយខ្លះទៀតតម្រូវឱ្យយកទៅបោះចោលខ្លួនឯង ដែលបង្កផលវិបាកក្នុងការឡើងចុះផងដែរ។

ទំហំបន្ទប់ខុនដូតូច និងកំណត់ភាពឯកជន
ជាក់ស្តែងបើសិនជាអ្នកដែលមានមុខជំនួញធំៗ ត្រូវការកន្លែងស្តុកទំនិញច្រើន អាចនឹងត្រូវពិចារណាបន្តិច ព្រោះថា ខុនដូបង្កើតឡើងសម្រាប់ការរស់នៅ ដោយមិនមានបន្ទប់សល់សម្រាប់ផ្ទុកឥវ៉ាន់ ឬមានដីសល់ដែលអាចសាងសង់បន្តនោះទេ។ ទន្ទឹមនេះ ភាពឯកជនរបស់ម្ចាស់បន្ទប់ខុនដូនិមួយៗត្រូវកាត់បន្ថយ មិនអាចជប់លៀង បង្កើតសម្លេងលឺៗ នោះឡើយ ព្រោះអាចបង្កការរំខានដល់អ្នកដទៃ។ ការរស់នៅរបស់ខុនដូគឺជាការស់នៅតាមបែបសហគមន៍ ដែលត្រូវក្រែងចិត្ត និងគោរពសិទ្ធអ្នកដទៃ។

ទាំងនេះជាចំណុចវិជ្ជមាននិងអវិជ្ជមានខ្លះដែលអ្នកទិញខុនដូត្រូវស្វែងយល់ស៊ីជម្រៅជាមុនសិន។ យ៉ាងណាមិញ អ្នកជំនាញអចលនទ្រព្យ លោក ខន គង្គារ អគ្គនាយកក្រុមហ៊ុន ERA Cambodia ធ្លាប់បានមានប្រសាសន៍ថា អតិថិជនគួរសិក្សាពីចំណុចសំខាន់ៗនៃខុនដូឱ្យបានច្បាស់លាស់ ឬអាចស្វែងរកជំនួយពីសំណាក់ក្រុមប្រឹក្សាទិញ-លក់ អចលនទ្រព្យ ដែលមានជំនាញពិតប្រាកដ ចៀសវាងការខាត់បង់ធនធាននៅថ្ងៃអនាគត៕ Inquirer

ដោយ ៖ រ៉ាណេត

ប៉ោយប៉ែត ៖ គម្រោងសាងសង់សំណង់អាគារពាណិជ្ជកម្មចម្រុះ ដែលមានកម្ពស់ចាប់ពី៥ជាន់ឡើង សរុបជាង២០គម្រោងនៅក្នុងក្រុងប៉ោយប៉ែត នៅតែបន្តសកម្មភាពសាងសង់យ៉ាងសកម្ម ដើម្បីត្រៀមចាំបំពេញតម្រូវការទីផ្សារក្រោយបញ្ចប់ភាពប្រឈមនៃវិបត្តិសេដ្ឋកិច្ចក្នុងពេលខាងមុខនេះ។

យ៉ាងហោចណាស់មានអាគារពាណិជ្ជកម្មដែលមានកម្ពស់ចាប់ពី៥ជាន់ឡើងទៅជាង ២០គម្រោង ដែលមានទុនវិនិយោគសរុបច្រើនជាង ១៥០លានដុល្លារ កំពុងតែបន្តដំណើរការសាងសង់ ដែលនឹងគ្រោងបញ្ចប់ក្នុងពេលខាងមុខ។ នេះបើតាមការលើកឡើងរបស់លោក សួង សុខហ៊ាង ដែលជាអ្នកជំនួញ និងវិនិយោគក្នុងវិស័យអចលនទ្រព្យនៅក្រុងប៉ោយប៉ែត កាលពីព្រឹកថ្ងៃទី១ ខែមិថុនា ឆ្នាំ២០២០នេះ។

ប្រធានក្រុមប្រឹក្សាភិបាលក្រុមហ៊ុន Four Star Plus Four និងក្រុមហ៊ុន Sg Top Trust លោក សួង សុខហ៊ាង បានមានប្រសាសន៍ថា “ពេលនេះ ចំពោះចរន្តទីផ្សារនៃការទិញ-លក់ អចលនទ្រព្យ ក៏ដូចជាការជួលផងដែរ គឺនៅបន្តភាពស្ងប់ស្ងាត់ ជាពិសេសអគារស្នាក់នៅរួម ដូចជាអាផាតមិន និងខុនដូជាដើម ប៉ុន្តែសម្រាប់ការសាងង់សំណង់ទូទៅ ដូចជាសំណង់លំនៅដ្ឋាន ក៏ដូចជាសំណង់អាគារពាណិជ្ជកម្មផងដែរ គឺនៅតែបន្តមានសកម្មភាពធម្មតា”។

លោកបានបន្តទៀតថា “ក្រៅពីគម្រោងសាងសង់សំណង់អគារកាស៊ីណូធំៗប្រមាណ១៥គម្រោង ដែលស្ថិតនៅតំបន់ផ្លូវផ្កាយ៥ នៅមានគម្រោងសាងសង់អាគារពាណិជ្ជកម្មធំៗ និងមានកម្ពស់ខ្ពស់ៗចាប់ពី៥ជាន់ឡើងទៅមិនតិចជាង២០គម្រោងនោះទេ ក៏កំពុងពន្លឿនការសាងសង់ ដើម្បីបញ្ចប់គម្រោងតាមការគ្រោងទុកផងដែរ ដែលភាគច្រើននឹងអាចបញ្ចប់ត្រឹមពាក់កណ្តាកឆ្នាំ២០២១ខាងនេះ”។

លោក សួង សុខហ៊ាង បានអះអាងថា គម្រោងសំណង់អាគារពាណិជ្ជកម្មទាំងអស់នេះ សុទ្ធតែជាគម្រោងដែលបានបន្សល់កាលពីឆ្នាំចាស់ទាំងអស់ ហើយម្ចាស់គម្រោងមិនមានក្ដីបារម្ភទៅលើហានិភ័យទីផ្សារក្រោយការបញ្ចប់ការសាងសង់ជាស្ថាពរនោះទេ ដោយហេតុថា ទម្រាំដល់ពេលសំណង់បញ្ចប់ការសាងសង់ក៏ត្រូវចំណាយពេល១ឆ្នាំទៀត ដែលសមល្មមនឹងការបញ្ចប់វិបត្តិសេដ្ឋកិច្ចពិភពលោកដែលកំពុងប្រឈមនៅពេលបច្ចុប្បន្ន ជាពិសេស មានគម្រោងគម្រោងកាស៊ីណូជាច្រើនទៀតដែលបានបង្វែរគោលដៅពីក្រុងព្រះសីហនុ មកកាន់ក្រុងប៉ោយប៉ែត ដែលជាចំណែកមួយយ៉ាងសំខាន់ក្នុងការធ្វើឱ្យមានកំណើននៃតម្រូវការទីផ្សារ។

អគ្គនាយកក្រុមហ៊ុនអចលនទ្រព្យ R Investment Group លោកឧកញ៉ា តេង រិទ្ធី បានមានប្រសាសន៍ថា “នៅក្នុងតំណាក់កាលនេះ បើនិយាយពីការទិញ-លក់ អចលនទ្រព្យនៅតំបន់ប៉ោយប៉ែត គឺទាល់តែមានតម្លៃទាបជាងទីផ្សារ ប៉ុន្តែបើរង់ចាំរហូតដល់ឆ្នាំក្រោយ ឬពាក់កណ្តាលឆ្នាំ២០២១ ការទិញ-លក់ ឬជួល អាចនឹងមានភាពល្អប្រសើរឡើងវិញ ជាពិសេសក្រោយពេលដែលវិបត្តិដែលកំពុងប្រឈមត្រូវបានបញ្ចប់”។

លោកឧកញ៉ាបានបន្តទៀតថា “អចលនទ្រព្យនៅកម្ពុជា មិនថាចំពោះតែក្រុងព្រះសីហនុ ក្រុងបាវិត ក៏ដូចជាក្រុងប៉ោយប៉ែតនោះទេ មួយចំណែកធំគឺបានមកពីទីផ្សារក្នុងតំបន់ ដោយក្នុងប្រទេសចិនបានឈរនៅលេងរៀងកំពូល។ ដូច្នេះនៅពេលដែលវិបត្តិនេះត្រូវបានប្រទេសចិនទប់ស្កាត់បានជោគជ័យ នោះទីផ្សារកម្ពុជានឹងមានភាពល្អប្រសើរឡើងវិញ”។

លោកបញ្ជាក់ថា “គ្រប់គម្រោងវិនិយោគធំៗ គឺសុទ្ធតែសំឡឹងមើលក្នុងរយៈពេលយូរ មានន័យថា ប្រសិនបើក្នុងរយៈពេលមួយឆ្នាំ ឬលើសពីនេះ ទើបគម្រោងសាងសង់ត្រូវបញ្ចប់ នោះមានន័យថា ការព្យាករណ៍របស់ក្រុមហ៊ុនដែលជាម្ចាស់គម្រោងគឺជារឿងដែលត្រឹមត្រូវបំផុត និងមិនមានហានិភ័យខ្ពស់នោះទេ។ នៅពេលគម្រោងសាងសង់ត្រូវបានបញ្ចប់ជាស្ថាពរ តម្រូវការទីផ្សារជាក់ស្ដែងក៏ចាប់ផ្តើមមាន” ៕