ក្រុមហ៊ុនផលិតសម្លៀកបំពាក់ដ៏របស់ចិន ពង្រីកផលិតកម្មរបស់ខ្លួនដោយនឹងបង្កើតការងារ ១៧,០០០ នៅតំបន់សេដ្ឋកិច្ចពិសេសភ្នំពេញ

ដោយ ៖ ប៊ី

ភ្នំពេញ៖ ក្រុមហ៊ុនអភិវឌ្ឍន៍តំបន់សេដ្ឋកិច្ចពិសេសភ្នំពេញ បានចុះហត្ថលេខាលើកិច្ចព្រមព្រៀងជួលដីបន្ថែមជាមួយក្រុមហ៊ុន Marvel Garment Co Ltd ដែលជាក្រុមហ៊ុនផលិតសម្លៀកបំពាក់ឈានមុខគេមកពីប្រទេសចិន ខណៈគម្រោងពង្រីករោងចក្រផលិតកម្មនឹងបង្កើតការងារក្នុងស្រុកចំនួន ១៧,០០០កន្លែង។

ប្រធានប្រតិបត្តិរបស់ក្រុមហ៊ុនតំបន់សេដ្ឋកិច្ចពិសេសភ្នំពេញ លោក Tan Kak Khun បានចុះហត្ថលេខាលើកិច្ចព្រមព្រៀងនេះជាមួយនឹងលោក Yan Delin អ្នកគ្រប់គ្រងទូទៅរបស់ក្រុមហ៊ុន Marvel Garment កាលពីចុងសប្តាស៍កន្លងមកនេះ។

លោក Tan Kak Khun បានមានប្រសាសន៍ថាក្រុមហ៊ុន Marvel Garment បានពង្រីកគម្រោងរបស់ខ្លួនជាបន្តបន្ទាប់នៅតំបន់សេដ្ឋកិច្ចពិសេសភ្នំពេញ ហើយបច្ចុប្បន្ន ក្រុមហ៊ុនបានពង្រីកដល់ដំណាក់កាលទី៣ ដែលគ្របដណ្តបលើផ្ទៃដីសរុប ៤៣ ហិកតា។
លោកបានមានប្រសាសន៍ថា គម្រោងនេះត្រូវបានរចនាឡើងជាចង្កោមនៃរោងចក្រផលិតសម្លៀកបំពាក់ ដោយមានកាត់ដេរ ឃ្លាំង និងបោះពុម្ពជាដើម។

លោក Yan បាននិយាយថា ប្រតិបត្តិការនេះពាក់ព័ន្ធនឹងការជួលដីទំហំ ៦,៤ ហិកតាបន្ថែម និងជាសញ្ញានៃកិច្ចសហប្រតិបត្តិការរវាងក្រុមហ៊ុនទាំងពីរ ដើម្បីរួមគ្នាបង្កើតការងារ និងសេដ្ឋកិច្ចដ៏សំខាន់។
លោកបាននិយាយថា ក្រុមហ៊ុនបានចាប់ផ្តើមរៀបចំអន្តេវាសិកដ្ឋានរបស់កម្មករ និងកន្លែងនៅជុំវិញ ហើយលោករំពឹងថា គម្រោងនេះនឹងបង្កើតការងារក្នុងស្រុកចំនួន ១៧,០០០កន្លែង។

លោក Yan បានថ្លែងបន្តថា “ខណៈកំពុងរៀបចំតំបន់ផលិតកម្ម យើងត្រូវរៀបចំកន្លែងរស់នៅជាមុនសម្រាប់កម្មករនាពេលអនាគត”។
តំបន់សេដ្ឋកិច្ចពិសេសភ្នំពេញជាឧទ្យានឧស្សាហកម្ម មានផ្ទៃដី ៣៥៧ ហិកតា នៅជាយក្រុងទីក្រុងភ្នំពេញ។ ក្រុមហ៊ុន Marvel Garment គឺជាបុត្រសម្ព័ន្ធរបស់ក្រុមហ៊ុនផលិតសម្លៀកបំពាក់ឈានមុខគេរបស់ចិនឈ្មោះ Shenzhou International Group Holdings Ltd។

តំណាងក្រុមហ៊ុនតំបន់សេដ្ឋកិច្ចពិសេសភ្នំពេញ ដែលគ្រប់គ្រងលើតំបន់សេដ្ឋកិច្ចពិសេសប៉ោយប៉ែត (PPSEZ) ផងដែរនោះបានឲ្យដឹងថា កាលពីពេលថ្មីៗនេះថា កាលពីឆ្នាំ២០១៩ ទំហំពាណិជ្ជកម្មមានចំនួន ១,១៣ ពាន់លានដុល្លារ កើន ១៣,៨៨ ភាគរយធៀបនឹងឆ្នាំ ២០១៨ ហើយតំបន់សេដ្ឋកិច្ចពិសេសនេះរក្សាបាននូវកំណើនជាប្រចាំនៃសកម្មភាពពាណិជ្ជកម្មក្នុងរយៈពេលច្រើនឆ្នាំមកនេះ។

យោងតាមរដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ការនាំចេញរបស់ប្រទេសកម្ពុជាតាមរយៈតំបន់សេដ្ឋកិច្ចពិសេស (SEZ) កាលពីឆ្នាំមុនបានកើនឡើងប្រហែល ២៧ ភាគរយជាមួយនឹងតម្លៃសរុបការនាំចេញបានកើនឡើង ២ ៦៨៨ លានដុល្លារកាលពីឆ្នាំមុន។ ក្រុមហ៊ុនចំនួន ៤៦៥ ដែលប្រតិបត្តិការនៅក្នុង SEZ ទាំង ៥៤ កន្លែងរបស់ប្រទេសកម្ពុជា ដែលផ្ដល់ការងារជាង ១០០០០០ នាក់៕

ក្រុមហ៊ុនបារំាង គ្រោងបោះទុនរាប់លានដុល្លារវិនិយោគលើវិស័យទេសចរណ៍ក្នុងខេត្តសៀមរាប

ដោយ ៖ វុត្ថា

ភ្នំពេញ ៖ ក្រុមហ៊ុន Fou Du Fou របស់ប្រទេសបារាំងគ្រោងបោះទុនរាប់លានដុល្លារ វិនិយោគលើវិស័យទេសចរណ៍ ដោយការបង្កើត និងរៀបចំធ្វើជាទីកន្លែងសួនកម្សាន្តដ៏ធំប្រចាំនៅក្នុងខេត្តសៀមរាប បើទោះបីពិភពលោកកំពុងប្រឈមវិបត្តិសេដ្ឋកិច្ច និងការធ្លាក់ចុះភ្ញៀវទេសចរយ៉ាងគំហុក។

លោក ង៉ាន់ ភិរុណ អភិបាលរងខេត្តសៀមរាប នៅក្នុងជំនួបពិភាក្សាការងារលើគម្រោងវិនិយោគវិស័យទេសចរណ៍ក្នុងខេត្ត ជាមួយអគ្គនាយកក្រុមហ៊ុន Incubateur Confluences ដែលត្រូវបានផ្សព្វផ្សាយនៅថ្ងៃទី៣១ ខែឧសភា ឆ្នាំ ២០២០ម្សិលមិញនេះថា សក្តានុពលរបស់ខេត្តមួយនេះ គឺពឹងផ្អែកលើវិស័យកសិកម្ម និងទេសចរណ៍ ដែលមានប្រជាពលរដ្ឋប្រមាណ ៨២ភាគរយជាប្រជាកសិករ ។

លោកបន្តថា ក្នុងវិស័យទេសចរណ៍នាឆ្នាំ២០១៨-២០១៩កន្លងទៅ ចំនួនភ្ញៀវទេសចរជាតិ អន្តរជាតិ មានការកើនឡើង ទៅតាមការព្យាករណ៍របស់ក្រសួងទេសចរណ៍ ។ ប៉ុន្តែក្នុងរយៈពេល៤ខែដើមឆ្នាំ២០២០ ដោយសារពិភពលោក ក៏ដូចជានៅកម្ពុជា បានជួបនូវវិបត្តិជម្ងឺឆ្លង Covid-19 ជាពិសេសនៅខេត្តសៀមរាប បានធ្វើឱ្យភ្ញៀវទេចរជាតិ និងអន្តរជាតិមានការធ្លាក់ចុះយ៉ាងគំហុក។

ជាមួយគ្នានេះ លោកក៏បានលើកឡើងអំពីការគាំទ្រលើគម្រោងវិនិយោគបង្កើតតំបន់កម្សាន្តដូចបានបង្ហាញខាងលើនេះ រួមជាមួយនឹងការព្យាយាមធ្វើការសម្របសម្រួលលើឯកសារច្បាប់ពាក់ព័ន្ធនានា ដែលធ្វើយ៉ាងជួយសម្រួល និងជំរុញឱ្យគម្រោងបានដំណើរការរលូន។

លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានថ្លែងថា សៀមរាប គឺជាទីរមណីយដ្ឋានប្រវត្តិសាស្ត្រដ៏ល្បីល្បាញ សម្បូរទៅដោយប្រាង្គប្រាសាទបុរាណជាច្រើន ហើយក៏ត្រូវបានពិភពលោកចាត់ទុកថា ជាតំបន់គោលដៅទេសចរណ៍ដ៏ទាក់ទាញមួយ ហើយថែមទាំងមានលទ្ធភាពក្នុងការអូសទាញការវិនិយោគនៅក្នុងវិស័យនេះផងដែរ។ ក្រៅពីនេះ ខេត្តសៀមរាបត្រូវបានចាត់ទុកជាប៉ូលទេសចរណ៍ទី១ របស់កម្ពុជា និងជាតំបន់ឧស្យាហកម្មគ្មានផ្សែង ដែលជាចំណុចទាក់ទាញភ្ញៀវទេសចរយ៉ាងសំខាន់បំផុត រួមជាមួយនឹងការវិនិយោគលើវិស័យទេសចរណ៍មកពីបណ្តាប្រទេសនានាក្នុងតំបន់ ក៏ដូចជាពិភពលោកផងដែរ៕

ចង់ក្លាយជាអ្នកលក់អចលនទ្រព្យប៉ិនប្រសប់ តើត្រូវហ្វឹកហាត់ដូចម្តេចខ្លះ?

ដោយ ៖ ហ្សូលី

ភ្នំពេញ ៖ ចរន្តទីផ្សារអចលនទ្រព្យអាចមានចរាចរណ៍ជារៀងរាល់ថ្ងៃ គឺបណ្តាលមកពីកត្តាជាច្រើនដូចជា គម្រោងច្បាស់លាស់ ស្ថានភាពនយោបាយ និងការផ្តល់ជូនពិសេសដល់អតិថិជន។ ទាំងអស់នេះត្រូវបានផ្សព្វផ្សាយដល់អតិថិជនដោយសារតែភ្នាក់ងារលក់អចលនទ្រព្យ ដូច្នេះដើម្បីឱ្យក្លាយខ្លួនជាភ្នាក់ងារក្នុងនាមជា អ្នកលក់មានភាពប៉ិនប្រសប់ តើត្រូវហ្វឹកហាត់ទៅលើចំនុចណាខ្លះ?

យោងទៅតាមអ្នកជំនាញអចលនទ្រព្យនៅសហរដ្ឋអាមេរិកវិញ លោក TalBot Sutter បានឱ្យដឹងថា ចំនុចសំខាន់ដែលអ្នកលក់ត្រូវប្រកាន់ខ្ជាប់នោះ គឺត្រូវតែចាត់ទុកអតិថិជនដូចជាមាស។ មិនថាអតិថិជនទិញអចលនទ្រព្យតម្លៃក្រោម ១០ ម៉ឺនដុល្លារក្តី លើ ១០ម៉ឺនដុល្លារក្តី ឬដល់រាប់លានដុល្លារក្តី ចាំបាច់ត្រូវបម្រើពួកគេឱ្យដូចគ្នា។ ត្រូវចាំថា កាលណាអ្នកក្លាយជាអ្នកលក់ដ៏មានទំនុកចិត្ត ពេលដែលអ្នកលក់គម្រោងរាប់លានដុល្លារ ក៏ពួកគេនៅតែហ៊ានចំណាយ និងបន្តរាប់អានក្នុងភាពជាដៃគូយ៉ាងជិតស្និទ្ធ។

ចំណែកលោកស្រី Judy Williams ជាអ្នកលក់អចលនទ្រព្យពោរពេញដោយបទពិសោធន៍ទាំងក្នុងតំបន់អាស៊ី និងអឺរ៉ុប បានចែករំលែកថា ត្រូវចាប់គ្រប់ឱកាសទាំងអស់ ទោះបីជាមានគម្រោង ឬអចលនទ្រព្យច្រើនយ៉ាងណាក៏ដោយ។ ជាពិសេស ត្រូវរាយការណ៍ប្រាប់ភ្ញៀវឱ្យបានល្អិតល្អន់រាល់ពេលដែលពួកគេមានសំណួរ និងចង់ដឹងច្បាស់ពីអ្វីមួយដែលទាក់ទងនឹងគម្រោង។

អ្នកជំនាញរូបនេះបង្ហើបថា ក្នុងសម័យប្រព័ន្ធឌីជីថលនេះ ចាំបាច់ត្រូវចេះប្រើប្រាស់ទិចនិកបង្អួតពីអ្វីដែលអ្នកលក់មាន ដូចជាការបង្កើតវីដេអូខ្លីៗតាមប្រព័ន្ធអនឡាញ និងបណ្តាញសង្គមជាដើម។ មិនថាជាការផុសនៅលើហ្វេសប៊ុក ឬអ៊ីនស្តាក្រោមទេ អ្នកលក់ត្រូវចំណាយពេលខ្លះៗ បង្ហាញពីទិដ្ឋភាពក្នុងផ្ទះ ចែករំលែកពីវិធីសាស្ត្រមួយចំនួនជូនដល់អតិថិជនជាគោលដៅ។

ម្យ៉ាងវិញទៀត ត្រូវប្រុងប្រយ័ត្នអំពីប្រវិត្តរូបឱ្យបានច្បាស់លាស់ ព្រោះមុននឹងអ្នកទិញសម្រេចចិត្តថាទិញ ពួកគេបានឆែកឆេរ ស៊ើបប្រវិត្តនៅលើគណនីបណ្តាញសង្គមរបស់អ្នកជាមុន។ ចៀសវាងការមានជម្លោះ ការបោកបញ្ឆោត ការបន្តុះបង្អាប់លើអ្នករួមអាជីពស្ថិតក្នុងវិស័យតែមួយ។ ប្រការល្អ គួរតែចែកឱ្យដាច់រវាងគណនីសម្រាប់លក់ ឬធ្វើជំនួញ និងគណនីផ្ទាល់ខ្លួនសម្រាប់បង្ហោះព័ត៌មានផ្ទាល់ខ្លួន។

ដោយឡែកអ្នកជំនាញនៅក្នុងប្រទេសកម្ពុជាវិញ លោកអគ្គនាយកក្រុមហ៊ុនភ្នាក់ងារអចលនទ្រព្យ Show Up Real Estate ធ្លាប់បានមានប្រសាសន៍ថា ក្នុងនាមជាអ្នកលក់អចលនទ្រព្យមួយរូប ត្រូវចេះសិក្សាបន្ថែមដើម្បីអភិវឌ្ឍន៍អាជីព។ ក្រៅពីនេះ ត្រូវមានភាពអត់ធ្មត់ ពូកែទំនាក់ទំនង និងចេះស៊ើបសួរលក់នូវគម្រោងល្អៗច្បាស់លាស់មានការទទួលស្គាល់ ដែលទាំងអស់នេះ ចាំបាច់ត្រូវតែចេះតាមដាននូវរាល់ព័ត៌មាននានាពាក់ព័ន្ធនឹងអចលនទ្រព្យកាន់តែប្រសើរ៕

តើអគារខ្ពស់បំផុតនៅតំបន់អាស៊ីអាគ្នេយ៍ស្ថិតក្នុងប្រទេសណា?

ដោយ ៖ ប៊ី

គូឡាឡាំពួរ ៖ អគារខ្ពស់ជាងគេនៅអាស៊ីអាគ្នេយ៍ Exchange 106 ដែលទើបបានបញ្ចប់ការសាងសង់កាលពីពេលកន្លងទៅថ្មីៗនេះស្ថិតនៅក្នុងទីក្រុងគូឡាឡាំពួ ប្រទេសម៉ាឡេស៊ី ហើយគ្រោងនឹងបើកដំណើរការជាផ្លូវការនៅត្រឹមអំឡុងខែធ្នូ ឆ្នាំ២០២០ខាងមុខនេះ។

អាគារដែលមានកម្ពស់ ១០៦ ជាន់ ស្មើនឹង ៤៩២ ម៉ែត្រ បានក្លាយជាអាគារខ្ពស់ជាងគេជាផ្លូវការនៅទំបន់អាស៊ីអាគ្នេយ៍ និងជាអាគារដែលខ្ពស់ជាងគេទី៦ នៅលើពិភពលោក ដែលទីតាំងនៅតំបន់ Tun Razak Exchange ក្នុងក្រុងគូឡាឡាំពួ ប្រទេសម៉ាឡេស៊ី។

សេចក្តីប្រកាសព័ត៌មានរបស់អ្នកគ្រប់គ្រងគម្រោងដែលមានមូលដ្ឋាននៅឥណ្ឌូណេស៊ី Mulia Group បានឱ្យដឹងថា គម្រោងនៃការអភិវឌ្ឍន៍អាគារមួយនេះមានទំហំ ២,៦ លានម៉ែត្រក្រឡា ដោយ Mulia Group ទទួលបានការកាន់កាប់ ២០ ភាគរយ ហើយសង្ឃឹមថានឹងអាចទទួលបានការកាន់កាប់រហូតដល់ ៥០ ភាគរយនៅចុងឆ្នាំ ២០២០ ។

គូឡាឡាំពួរ គឺជារាជធានីនៃសហព័ន្ធ និងជាទីក្រុងដែលមានចំនួនប្រជាជនច្រើនបំផុតក្នុងប្រទេសម៉ាឡេស៊ី។ ទីក្រុងមួយនេះមានផ្ទៃក្រឡាសរុប ២៤៣ គីឡូម៉ែត្រការ៉េ (៩៤ ម៉ាយ ក.) និងមានប្រជាជនប្រហែល ៧,៩ លាននាក់នៅឆ្នាំ២០២០ ៕

អ្នកវិភាគសេដ្ឋកិច្ចគាំទ្រការផ្លាស់ប្ដូរ ១-២-៥ ដុល្លារ ហើយជំនួសដោយប្រាក់រៀលវិញ

ដោយ ៖ រ៉ាណេត

ភ្នំពេញ ៖ លោកបណ្ឌិត ចាន់ សុផល នាយកមជ្ឈមណ្ឌលសិក្សាគោលនយោបាយ និងជាអ្នកវិភាគសេដ្ឋកិច្ច បង្ហាញការគាំទ្រចំពោះការជំនួសក្រដាសប្រាក់ដុល្លារតម្លៃទាបៗ $1 $2 និង $5 ដោយក្រដាសប្រាក់រៀលវិញ។

ពាក់ព័ន្ធទៅនឹងកិច្ចប្រជុំដែលផ្តើមគំនិតដោយធនាគារជាតិនៃកម្ពុជា កាលពីថ្ងៃចុងសប្ដាហ៍កន្លងទៅថ្មីៗ ទៅលើការផ្អាកទទួលយកប្រាក់បញ្ញើនូវក្រដាសប្រាក់ ១-២-៥ ដុល្លារ ដើម្បីជំរុញ និងលើកកម្ពស់តម្លៃប្រាក់រៀល បានធ្វើឱ្យបណ្តាធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុ ដែលតំណាងដោយប្រធានសមាគម CMA រួមជាមួយនឹងអ្នកវិភាគសេដ្ឋកិច្ចមួយចំនួន បង្ហាញពីការគាំទ្រយ៉ាងពេញទំហឹង ។

លោកបណ្ឌិត ចាន់ សុផល បានបញ្ចេញទស្សនៈលើគណនីហ្វេសប៊ុករបស់ខ្លួនៅថ្ងៃចុងសប្ដាហ៍កន្លងទៅនេះថា “ខ្ញុំគាំទ្រការជំនួសក្រដាសប្រាក់ដុល្លារតម្លៃទាបៗទាំងនេះ ដោយក្រដាសប្រាក់រៀល។ ការធ្វើដូចនេះ នាំឱ្យកម្ពុជាចំណេញបានពីការបោះពុម្ពក្រដាសប្រាក់ថ្មី យកមកជំនួសពួកវា។ ជាទូទៅ ប្រទេសណាបោះពុម្ពរូបិយប័ណ្ណបានប្រទេសនោះចំណេញច្រើន។ ឧទាហរណ៍ ប្រទេសអាមេរិកចំណាយតែ២សេន ប៉ុណ្ណោះ សម្រាប់ការបោះពុម្ពក្រដាសប្រាក់១០០ដុល្លារ” ។

លោក ចាន់ សុផល បានពន្យល់ថា “បើតាមខ្ញុំយល់ គេអាចឱ្យអ្នកមានក្រដាសប្រាក់ទាំងនេះដូរតាមកន្លែងប្តូរប្រាក់យកប្រាក់រៀល ហើយឱ្យចំណេញ១០ភាគរយ ថែមទៀតដើម្បីប្រមូលឆាប់បានអស់ពីទីផ្សារ។ ការបោះពុម្ពក្រដាសប្រាក់រៀលជំនួសពួកវា ទំនងជាចំណេញច្រើនជាង ១០ភាគរយឆ្ងាយណាស់។ គេអាចអនុវត្តកម្មវិធីនេះរយ:ពេលពីរ ឬបីខែ ដោយមិនអនុញ្ញាតឱ្យមានការនាំចូលក្រដាសប្រាក់តម្លៃទាបៗនេះតទៅទៀតពីបរទេស។ បន្ទាប់ពីនេះ គេអាចដូរបានតាមកន្លែងប្តូរប្រាក់ និងតាមធនាគារជាតិជាចុងក្រោយ ដោយកាត់តម្លៃ ១០ភាគរយទៅវិញ” ។

ជាមួយគ្នានេះ លោក ង៉ែត ជូ ក៏បានបង្ហាញពីការគាំទ្រទៅនឹងគំនិតផ្តួចផ្តើមរបស់ធនាគារជាតិនៃកម្ពុជា ក្នុងការលើកកម្ពស់ការប្រើប្រាស់ប្រាក់រៀលថា “ខ្ញុំគាំទ្រសេចក្តីសំរេចឈប់ចាយក្រដាសប្រាក់ដុល្លារតូចៗព្រោះយើងអាចជំនួសដោយចាយប្រាក់រៀលបានយ៉ាងងាយ និងជាវិធីសាស្ត្រជំហានៗឈានទៅរកការកាត់បន្ថយការប្រើប្រាក់ដុល្លារក្នុងសេដ្ឋកិច្ចកម្ពុជា” ។

លោកបានបញ្ជាក់ថា “ចាប់ពីថ្ងៃនេះ បើមានក្រដាសប្រាក់ ១ – ២ ឬ ៥ ដុល្លារ អាចយកទៅបង់គ្រឹះស្ថានធនាគារ និងហិរញ្ញវត្ថុដែលលោកអ្នកជំពាក់។ នេះជាពេលវេលាដ៏មមាញឹកដែលគ្រឹះស្ថានទាំងនោះត្រូវទទួលយកក្រដាសប្រាក់ដុល្លារតូច” ៕

គម្រោងស្ថាបនាផ្លូវវាងក្រុងព្រះសីហនុ និងវិថីសុវត្ថិភាពសម្ដេចសង្ឃរាជទេពវង្ស កំពុងពន្លឿនការសាងសង់

ដោយ ៖ រ៉ាណេ

ព្រះសីហនុ ៖ គម្រោងធ្វើឱ្យប្រសើរឡើងនូវវិថីសុវត្ថិភាពសម្ដេចសង្ឃរាជទេពវង្ស និងផ្លូវលេខ១៤៨ បំបែកចេញពីផ្លូវជាតិលេខ៤ ត្រង់គីឡូម៉ែត្រ១៧៨ +១៦៥ រង្វង់មូលសម្ដេចសង្ឃរាជទេពវង្សដល់រង្វង់មូលស្ទឹងហាវ រួចបន្តរហូតដល់កំពង់ផែ ដែលជាផ្លូវវាងក្រុងដ៏សំខាន់ កំពុងត្រូវបានជំរុញ និងពន្លឿនការសាងសង់ និងបញ្ចប់ក្នុងពេលដ៏ខ្លីខាងមុខនេះ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី៣១ ខែឧសភា ឆ្នាំ២០២០ បានចុះមើលវឌ្ឍនភាពសាងសង់ផ្លូវលេខ ១៤៦បេ ឬវិថីសុវត្ថិភាពសម្ដេចសង្ឃរាជទេពវង្ស និងផ្លូវលេខ១៤៨ ដើម្បីពិនិត្យគុណភាពនៃការសាងសង់ សំដៅធានាឱ្យបានតាមស្តង់ដាដែលអាចទទួលយកបាន ពោលគឺធ្វើផ្លូវឱ្យមានគុណភាពរឹងមាំ អាចប្រើប្រាស់ជាប់បានយូរអង្វែង។

លោកទេសរដ្ឋមន្ត្រីបានបញ្ជាក់ថា “កំណាត់ផ្លូវនេះគឺជាផ្លូវវាងក្រុងដ៏មានសក្ដានុពលសម្រាប់បម្រើឱ្យការដឹកជញ្ជូនទំនិញនាំចេញ-ចូលតាមនាវា កសិផល និងជលផលរបស់បងប្អូនប្រជាពលរដ្ឋ នៅស្រុក ស្ទឹងហាវ ក៏ដូចជាបងប្អូនរស់នៅតំបន់ទំនប់រលកចាស់នៃក្រុងព្រះសីហនុ ទៅកាន់ទីផ្សារ កាន់តែមានលក្ខណៈងាយស្រួល ឆាប់រហ័ស និងចំណាយតិច និងបានចូលរួមចំណែកយ៉ាងច្រើនដល់ការកាត់បន្ថយការកកស្ទះចរាចរណ៍តាមផ្លូវជាតិលេខ៤ ចំពោះរថយន្តដឹកជញ្ជូនទំនិញធុនធ្ងន់ដូចជាកុងទីន័រ ជាដើម” ។

គម្រោងធ្វើឱ្យប្រសើរឡើងកំណាត់ផ្លូវខេត្តលេខ១៤៦បេ ឬវិថីសុវត្ថិភាពសម្ដេចសង្ឃរាជ ទេព វង្ស និងផ្លូវលេខ១៤៨ មានប្រវែងសរុប ៤៣,០២៥ គីឡូម៉ែត្រ ចាប់ពីបំបែកផ្លូវជាតិលេខ៤ ត្រង់គីឡូម៉ែត្រលេខ ១៧៨+១៦៥ ស្ថិតនៅភូមិវាលធំ ឃុំវាលរេញ ស្រុកព្រៃនប់ ដល់រង្វង់មូលស្ទឹងហាវ ស្ថិតនៅភូមិ១ ឃុំអូរត្រេះ ស្រុកស្ទឹងហាវ និងបន្តរហូត ដល់កំពង់ផែក្រុងព្រះសីហនុ ខេត្តព្រះសីហនុ។

ផ្លូវទាំងនេះ សាងសង់ដោយចាក់បេតុងកៅស៊ូ AC ទទឹងសរុប ១១ម៉ែត្រកម្រាស់៩សង់ទីម៉ែត្រ និងចិញ្ចើមគ្រួសក្រហម ០,៥០ ម៉ែត្រសងខាង ចាប់ពីរង្វង់មូលសម្ដេចសង្ឃរាជទេពវង្ស PK០+០០០ ដល់ PK២០+៦៧៨ ប្រវែង២០,៦៧៨គីឡូម៉ែត្រ និងចាក់បេតុងសរសៃដែកទទឹង ១១ម៉ែត្រកម្រាស់២៦សង់ទីម៉ែត្រប្រវែង ២២,៣៤៧ គីឡូម៉ែត្រនិងចិញ្ចើមគ្រួសក្រហម ០,៥០ម៉ែត្រ សងខាងចាប់ពី PK២០+៦៧៨ ដល់ PK៤៣+០,២៥។

កំណាត់ផ្លូវនេះសាងសង់ដោយក្រុមហ៊ុនសាជីវកម្មស្ពានថ្នល់ចិន (CRBC) ត្រួតពិនិត្យបច្ចេកទេសដោយនាយកដ្ឋានផ្លូវថ្នល់ នាយកដ្ឋានហេដ្ឋារចនាសម្ព័ន្ធសាធារណ: និងនាយកដ្ឋានបច្ចេកទេសសាធារណការ និងដឹកជញ្ជូន នៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន ប្រើប្រាស់រយ:ពេលសាងសង់ចំនួន ២៨ ខែ ដោយគិតចាប់ពីថ្ងៃបើកការដ្ឋានសាងសង់នាថ្ងៃទី១៧ ខែមេសា ឆ្នាំ២០២០ ដែលជាការចំណាយថវិកាសន្សំរបស់ជាតិ៕

ផ្សារទំនើប FURI Times Square ក្រុងព្រះសីហនុ ប្រមូលផ្តុំផលិតផលល្បីៗ និងចំណីអាហារយ៉ាងសម្បូរបែប

ដោយ ៖ រ៉ាណេត

ព្រះសីហនុ ៖ ជាការអបអរសាទរទៅនឹងស្ថានភាពកាន់តែល្អប្រសើរក្នុងការទប់ស្កាត់ការរីករាលដាលនៃជំងឆ្លងបាននៅទូទាំងប្រទេស ជាពិសេសនៅក្នុងក្រុងព្រះសីហនុ ផ្សារទំនើប FURI Times Square បានប្រមូលផ្តុំ និងនាំមកជូននូវផលិតផលចម្រុះ ម៉ាកល្បីៗ មានគុណភាពខ្ពស់លំដាប់អន្តរជាតិ រួមជាមួយនឹងចំណីអាហារយ៉ាងសម្បូរបែបសម្រាប់ឆ្លើយតបទៅនឹងតម្រូវការរបស់អតិថិជនជាតិ និងអន្តរជាតិ។

បុគ្គលិកផ្នែកទីផ្សារជាន់ខ្ពស់នៃផ្សារទំនើប FURI Times Square កញ្ញា ប៉ែន ម៉ារ៉ា បានប្រាប់ឱ្យដឹងកាលពីល្ងាចថ្ងៃចុងសប្ដាហ៍កន្លងទៅនេះថា បច្ចុប្បន្ននេះ កំណើនអតិថិជនមកកាន់ផ្សារទំនើប FURI Times Square ពីមួយថ្ងៃទៅមួយថ្ងៃ គឺមានកំណើនជាប់ជាប្រចាំ ដែលក្នុងនោះភាគច្រើនជាជនជាតិខ្មែរ និងជាអ្នករស់នៅក្នុងក្រុងព្រះសីហនុ ហើយបន្ទាប់មកជាជនជាតិចិន និងជនបរទេសដែលជាអ្នកទេសចរ។

កញ្ញា ប៉ែន ម៉ារ៉ា បានបន្តទៀតថា “ដោយសារមានការគាំទ្រពីសំណាក់អតិថិជនកាន់តែច្រើន ផ្សារទំនើប FURI Times Square បានកៀងគរ និងនាំមកនូវក្រុមហ៊ុនថ្មីៗបន្ថែមដើម្បីធ្វើការផ្គត់ផ្គង់ផលិតផល និងសម្ភារៈប្រើប្រាស់ម៉ាកល្បីៗលំដាប់អន្តរជាតិជាច្រើន ហើយក៏មានក្រុមហ៊ុនបម្រើសេវាផ្នែកចំណីអាហារផងដែរ” ។

កញ្ញាបញ្ជាក់ថា “បន្ថែមពីលើក្រុមហ៊ុន និងហាងល្បីដែលមានស្រាប់ និងកំពុងដំណើរការ បច្ចុប្បន្នមានក្រុមហ៊ុនថ្មីៗបន្ថែមជាច្រើនទៀតដូចជា ក្រុមហ៊ុនបម្រើសេវាទូរស័ព្ទចល័ត Smart Shop, ធនាគារ BIC, ហាងមីហឹរ សេអ៊ូល , ក្រុមហ៊ុនផ្គត់ផ្គង់សម្ភារៈផ្ទះបាយ Lock and Lock, ក្រុមហ៊ុនចំណីអាហារ Burger King, ក្រុមហ៊ុន Park Café រួមជាមួយនឹងក្រុមហ៊ុនផ្សេងៗមួយចំនួនទៀត ដើម្បីធ្វើយ៉ាងណាផ្តល់ភាពកាន់តែងាយស្រួល និងជម្រើសដ៏ល្អសម្រាប់អតិថិជន។

ផ្សារទំនើប FURI Times Square មានទីតាំងស្ថិតនៅសង្កាត់លេខ៤ ក្រុងព្រះសីហនុ បាននាំមកជូននូវបទពិសោធន៍ថ្មីនៅក្នុងតំបន់ ដោយការនាំយកមកនូវបណ្តាផលិតផល មុខទំនិញចំរុះគ្រប់ប្រភេទយ៉ាងសម្បូរបែប សុទ្ធតែជាម៉ាកយីហោល្បីៗលំដាប់សាកលលោក ដូចជា ក្រុមហ៊ុន KFC , ក្រុមហ៊ុន Starbucks , ក្រុមហ៊ុន Amazone Café ,ក្រុមហ៊ុន KOI , ក្រុមហ៊ុន Dakasi Tea , ហាងអាហារមកពីប្រទេសសាំងហ្គាពួរ ក្រុមហ៊ុនលក់សម្លៀកបំពាក់ LEVI’s , ក្រុមហ៊ុន NIKE ក្រុមហ៊ុន Samsonite , ក្រុមហ៊ុននាឡិកាដ៏ល្បីឈ្មោះ G-Shock ក្រុមហ៊ុនលក់រថយន្ត HGB Group រួមជាមួយក្រុមហ៊ុនល្បីៗជាច្រើនទៀត ដោយរាប់បញ្ចូលទាំងគ្រឿងសំអាងផងដែរ។

សប្បាយទិញ សប្បាយដើរ សប្បាយញាំអាហារឆ្ងាញ់ៗ គឺមាននៅផ្សារទំនើប FURI Times Square ក្រុងព្រះសីហនុ ៕

កម្ពុជាប្រែក្លាយពីដីដែលសម្បូរទៅដោយគ្រាប់មីន និងដីកសិកម្មក្លាយជាព្រលានយន្តហោះអន្តរជាតិ

ដោយ ៖ វុត្ថា

ភ្នំពេញ ៖ កម្ពុជាបាននឹងកំពុងប្រែក្លាយដីកសិកម្ម និងទីតាំងសម្បូរទៅដោយគ្រាប់មីន និងគ្រាប់មិនទាន់ផ្ទុះជាច្រើនតោននៅក្នុងទឹកដីខេត្តកណ្តាល និងតាកែវ ឱ្យទៅជាព្រលានយន្តហោះខ្នាតអន្តរជាតិលំដាប់ទី៩ នៅលើពិភពលោក ខណៈបច្ចុប្បន្នក្រុមការងារសាងសង់របស់ក្រុមហ៊ុន OCIC បាននឹងកំពុងសាងសង់យ៉ាងសកម្ម។

លោក គង់ សោភ័ណ្ឌ អភិបាលខេត្តកណ្តាលបានឱ្យដឹងកាលពីសប្តាហ៍មុននេះថា វាជាភព្វសំណាងរបស់ខេត្តកណ្តាលដែលប្រមុខនៃរាជរដ្ឋាភិបាលបានជ្រើសរើស និងប្រែក្លាយដីសម្បូរគ្រាប់មីន និងដីកសកម្ម ដើម្បីអភិវឌ្ឍន៍ទៅជាព្រលានយន្តហោះខ្នាតអន្តរជាតិ ដែលធ្វើឱ្យខេត្តមួយនេះកាន់តែទាក់ទាញវិនិយោគិនជាតិ និងអន្តរជាតិឱ្យចូលមកបណ្តាក់ទុនវវិនិយោគនៅក្នុងខេត្តកាន់តែច្រើន។

លោកបន្តថា “ទឹកដីដែលត្រូវសាងសង់ព្រលានយន្តហោះអន្តរជាតិថ្មីនេះ សម្បូរទៅដោយគ្រាប់មីន គ្រាប់បែក និងគ្រាប់មិនទាន់ផ្ទុះផ្សេងៗដែលបានទម្លាក់ពីយន្តហោះ និងបន្សល់ទុកពីសម័យសង្គ្រាមរាប់រយឆ្នាំកន្លងមកនេះ ហើយត្រូវបានក្រុមអ្នករាវមីនរបស់អង្គភាពស៊ីម៉ាក់យកចេញមុននឹងធ្វើការអភិវឌ្ឍទៅជាព្រលានយន្តហោះថ្មីនេះ។

លោកបន្តថា ជាមួយគ្នានេះ ទីតាំងដែលត្រូវអភិវឌ្ឍន៍ព្រលានយន្តហោះនេះផងដែរ ក៏ជាដីកសិកម្មរបស់ប្រជាពលរដ្ឋ ដីរបស់ក្រុមហ៊ុន ព្រមទាំងដីរបស់រដ្ឋ ដែលរដ្ឋាភិបាលបានដោះស្រាយគោលនយោបាយជូនគាត់ជាបន្តបន្ទាប់ ដោយឈរលើភាពទន់ភ្លន់ និងម៉ឺងម៉ាត់ ហើយអ្វីៗនឹងសម្រេចទៅតាមផែនការ។ ព្រលានយន្តអន្តរជាតិថ្មីនេះ បានធ្វើឱ្យប្រជាពលរដ្ឋនៅក្នុងស្រុកកណ្តាលស្ទឹង ស្រុកស្អាង និងតាខ្មៅសប្បាយរីករាយ ហើយក៏ជាចំណងដៃដ៏ធំរបស់ខេត្តកណ្តាល និងជាគម្រោងវិនិយោគដ៏ធំលំដាប់ទី១ របស់ខេត្តកណ្តាលផងដែរ ក្នុងចំណោមគម្រោងវិនិយោគជាច្រើនផ្សេងទៀត។

លោកបន្តថា ក្នុងរយៈពេលកន្លងមកនេះ មានអ្នកវិនិយោគលើវិស័យអចលនទ្រព្យ ទេសចរណ៍ សណ្ឋាគារ និងសេវកម្មផ្សេងៗ បានចាប់អារម្មណ៍លើព្រលានយន្តអន្តរជាតិថ្មីនេះ ខណៈខេត្តមានសក្តានុពលខ្ពស់លើវិស័យសេដ្ឋកិច្ច ពាណិជ្ជកម្ម និងមានហេដ្ឋារចនាសម្ព័ន្ធច្រកចេញចូលយ៉ាងល្អប្រសើរដែលជួយក្នុងការដឹកទំនិញបានលឿន និងទាន់ចិត្តកាត់បន្ថយពេលវេលា។

គម្រោងព្រលានយន្តហោះអន្តរជាតិថ្មីនេះ ត្រូវបានសាងសង់នៅលើផ្ទៃដីទំហំ ២៦០០ ហិកតា ស្ថិតនៅខេត្តកណ្តាល និងតាកែវ ដោយក្នុងនោះទំហំដីនៅខេត្តកណ្ដាលមាន ២២២៧ ក្បាលដី ស្មើនឹង ២៤៤១ ហិកតា និងខេត្តតាកែវ ៣៦០ ក្បាលដី ស្មើនឹងប្រមាណ ១៥៨ ហិកតា។ ព្រលានយន្តហោះភ្នំពេញថ្មីនេះ មានទុនវិនយោគ ១៥០០ លានដុល្លារ ជាការវិនិយោគរបស់ក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) ដោយដំណាក់កាលទីមួយ នឹងត្រូវបញ្ចប់ការសាងសង់ក្នុងឆ្នាំ២០២។ ជាមួយគ្នានេះ រដ្ឋាភិបាលបានដោះស្រាយបញ្ហាសំណង់មិនរៀបរយជាមួយប្រជាពលរដ្ឋនៅក្នុងដីព្រលានយន្តហោះថ្មីនេះ សរុប ១៧៦ គ្រួសារ ក្នុងនោះ ១១គ្រួសារទទួលប្រាក់គោលនយោបាយ ២០០០ដុល្លារ ក្នុង១គ្រួសារ និង១៦៥ គ្រួសារទៀត ទទួលយកការដោះដូរដីទៅកន្លែងផ្សេងសម្រាប់សង់លំនៅដ្ឋានរស់នៅ៕

ចំណេះដឹង ! តើមានលក្ខខណ្ឌអ្វីខ្លះក្នុងការចុះបញ្ជីពាណិជ្ជកម្មសម្រាប់ពាណិជ្ជករជានីតិបុគ្គលបរទេស ?

ដោយ ៖ វុត្ថា

ភ្នំពេញ៖ ក្រុមហ៊ុនពាណិជ្ជកម្មបរទេសទាំងអស់ ដែលមានតែសាខា ឬទីភ្នាក់ងារនៅព្រះរាជាណាចក្រកម្ពុជា ត្រូវធ្វើការបំពេញទំរង់ចុះបញ្ជីពាណិជ្ជកម្មតាមមាត្រា១៧ និងមាត្រា១៨ នៃច្បាប់ស្ដីពីវិធានពាណិជ្ជកម្ម និងបញ្ជីពាណិជ្ជកម្ម ដូចគ្នានឹងពាណិជ្ជករជានីតិបុគ្គលដែរ (មាត្រា១៩ កថាខណ្ឌ១ ២ នៃច្បាប់ស្ដីពីវិធានពាណិជ្ជកម្ម និងបញ្ជីពាណិជ្ជកម្ម) ។

ផ្ទុយទៅវិញ ករណីដែលពាណិជ្ជករ និងក្រុមហ៊ុនពាណិជ្ជកម្មទាំងឡាយណា ដែលមិនបានចុះបញ្ជីពាណិជ្ជកម្ម តាមការបញ្ញត្តិរបស់ក្រសួងពាណិជ្ជកម្មទេ ត្រូវផ្ដន្ទាទោសពិន័យជាប្រាក់ចំនួន ៥០,០០០៛ (ប្រាំម៉ឺនរៀល) ទៅ ៥០០,០០០៛ (ប្រាំសែនរៀល) (មាត្រា៤០ ចំណុច១ នៃច្បាប់ស្ដីពីវិធានពាណិជ្ជកម្ម និងបញ្ជីពាណិជ្ជកម្ម) ឬមានទោសនិទ្ធនភាពសាមញ្ញក្នុងករណីធនក្ស័យ (មាត្រា ៤១ នៃច្បាប់ដដែល) ។ ចំពោះករណី ពាណិជ្ជករ ឬរាល់អ្នកដឹកនាំក្រុមហ៊ុនពាណិជ្ជកម្ម ទាំងឡាយណាដែលប្រើឯកសារក្លែងក្លាយនោះ ត្រូវផ្ដន្ទាទោសចាប់ពី ១ (មួយ) ឆ្នាំ ទៅ ៥ (ប្រាំ) ឆ្នាំ និងពិន័យជាប្រាក់ពី ១,០០០,០០០៛ (មួយលានរៀល) ដល់ ១០,០០០,០០០៛ (ដប់លានរៀល)(មាត្រា ៤២ នៃច្បាប់ដដែល) ។

សរុបមកសម្រាប់ពាណិជ្ជករ និងក្រុមហ៊ុនពាណិជ្ជកម្មទាំងឡាយណាដែលបានធ្វើការចុះបញ្ជីពាណិជ្ជកម្ម លើអាជីវកម្មរបស់ខ្លួន ពួកគេនឹងទទួលបាននូវអាជីវកម្មមួយស្របច្បាប់ ហើយទទួលបាននូវការការពារចំពោះឈ្មោះ និងផលិតផលរបស់ក្រុមហ៊ុននោះ ព្រមទាំងដើម្បីធ្វើការបញ្ជៀសការខាតបង់ផលប្រយោជន៍នានា ដែលបណ្ដាលមកពីជនទុច្ចរឹតធ្វើការក្លែងបន្លំឈ្មោះ ឬផលិតផលរបស់ក្រុមហ៊ុននោះផងដែរ ។

ចំពោះករណីនេះ ម្ចាស់អាជីវកម្ម ក៏អាចធ្វើការប្ដឹងទៅក្រសួងពាណិជ្ជកម្មដើម្បីធ្វើការរំលាយអាជីវកម្មរបស់ជនទុច្ចរឹតនោះបានដែរ ប៉ុន្ដែបើអំពើរបស់ជននោះ បានធ្វើឱ្យខាតបង់ផលប្រយោជន៍ធ្ងន់ធ្ងរ នោះម្ចាស់អាជីវកម្មដែលទទួលរងគ្រោះអាចធ្វើការប្ដឹងទាមទារ សំណងតាមផ្លូវតុលាការដែលមានសមត្ថកិច្ចនៃព្រះរាជាណាចក្រកម្ពុជាបាន ៕

ប្រម៉ូសិនពិសេស! ទិញផ្ទះពីបុរី ប៊ុនលី ឥឡូវនេះលោកអ្នកនឹងទទួលបានតម្លៃទាបជាងទីផ្សារ ៥០០០ដុល្លារ ព្រមទាំងបណ្ដោងខ្សែ «ក» ពេជ្រ ១ភ្លាម

ភ្នំពេញ៖ ភាពជោគជ័យនៃជំហានដំបូងនៃការចូលទីផ្សារ ធ្វើអោយ បុរី ប៊ុន លី កាន់តែបង្ហាញនូវភាពអស្ចារ្យរបស់ខ្លួនបន្ថែមទៀត បន្ទាប់ពីទទួលបាន ការគាំទ្រខ្ពស់ពីអតិថិជន កន្លងមកនេះ ហើយជាការលើកទឹកចិត្ដដល់អតិថិជន និងដើម្បីរួមចំណែកលើកកម្ពស់សេដ្ឋកិច្ចក្នុងប្រទេស ស្របពេលប្រទេសមានវិប្បត្តិសុខុមាភាព (Covid-19) បុរី ប៊ុនលី បានរៀបចំកម្មវិធី ថ្ងៃសំណាង (Luck day) ដែលជាកម្មវិធីមួយ ផ្តល់ឱកាសឱ្យអ្នកចង់ទិញផ្ទះទិញបាន ក្នុងតម្លៃទាបជាងទីផ្សាររហូតដល់ទៅ ៥០០០ដុល្លារ ភ្លាមៗដោយគ្មានការចាប់ឆ្នោត ឬផ្សងសំណាង និងបូកបន្ថែមជាមួយកម្មវិធីប្រូម៉ូសិន បណ្តោងខ្សែ «ក» ពេជ្រ ពី បុរី ប៊ុនលី បន្ថែមទៀត។ ការផ្តល់ជូននេះចាប់ពីថ្ងៃជូនដំណឹងនេះរហូតដល់ដំណាច់ខែមិថុនា តែប៉ុន្នោះ។

គួរបញ្ចាក់ ផងដែថា: បុរី ប៊ុនលី គឺជាគម្រោងសំណង់លំនៅដ្ឋានប្រណីត មួយដែលកំពុងសាងសង់នៅលើផ្ទៃដីប្រមាណ ៣ហិកតា មានទីតាំងស្ថិតនៅកណ្តាលរាជធានីភ្នំពេញ នឹងជាតំបន់ដែរប្រមូលផ្តុំដោយ អាជីវកម្ម សាលារៀន ផ្សារទំនើប សហគ្រាស និងសំណង់លំនៅស្ថានជាច្រើន កៀកនឹងផ្លូវធំ ២១៧ (ចំការដូង) ផ្លូវ៣៧១ ផ្លូវសម្តេច តេជោ ហ៊ុនសែន (ផ្លូវ ៦០ម៉ែតត្រ) ។ យើងផ្ដល់ជូនលោកអ្នកនូវគេហដ្ឋានដែរមានគុណភាព ភាពងាយស្រួលរស់នៅ និងទំនុកចិត្ត ហើយជាគេហដ្ឋានដែរអាចធ្វើការិយាល័យ និង ប្រកបអាជីវក្មបានយ៉ាងងាយស្រួល មានទីធ្លាចំណតរថយន្តធំទូលាយ ។

បុរី ប៊ុន លី ក៏មានគម្រោងបើកលក់ប្រភេទផ្ទះ វីឡាកូន(Link House), វីឡាភ្លោះ (Twin Villa) និងប្រភេទវីឡាប្រណិតៗជាច្រើនបន្ថែមទៀត ក្នុងពេលឆាប់ៗខាងមុខនេះ។ ដោយឡែក គម្រោង បុរី ប៊ុន លី បច្ចុប្បន្នមានលក់ប្រភេទ ផ្ទះអាជីវកម្ម (Shop House), និងផ្ទះសម្រាប់ការិយាល័យនិងរស់នៅបែបទំនើប (Town-House) ដែលកំពុងទទួលបានការពេញនិយមនិងគាំទ្រពីសំណាក់ អតិថិជនគ្រប់លំដាប់។

សម្រាប់ព័ត៌មានបន្ថែមសូមទាក់ទងតាមរយៈលេខ៖ 010/068/077 22 77 89 ឬតាមអាស័យដ្ឋាន ផ្លូវបឹងតាម៉ាត សង្កាត់ដង្កោ ខណ្ឌ័ដង្កោ រាជធានីភ្នំពេញ៕