ដោយ ហ្សូលី
ភ្នំពេញ៖ ស្ថានភាពអចលនទ្រព្យ ការវិនិយោគ និងការអភិវឌ្ឍលើគម្រោងនានាក្នុងប្រទេសកម្ពុជា នៅតែបន្តសកម្មភាព បើទោះបីជាមេរោគរាតត្បាតធ្វើឱ្យសេដ្ឋកិច្ចពិភពលោករួមទាំងកម្ពុជាស្ថិតក្នុងភាពស្រពេចស្រពិលក៏ដោយ។
ជាមួយគ្នា អ្នកជំនាញបានបង្ហើបប្រាប់ពីប្រភេទអចលនវត្ថុមួយប្រភេទដែលទទួលបានការគាំទ្រខ្លាំង និងមានចរន្តទិញលក់ជាហូរហែ ជាពិសេសចំណាយលុយវិនិយោគហើយទទួលបានផលចំណេញខ្ពស់។ អ្នកជំនាញអចលនទ្រព្យ និងជាអគ្គនាយកក្រុមហ៊ុន Century 21 Advance មានប្រសាសន៍ប្រាប់គេហទំព័រ Property Area Asia ថា សម្រាប់ទីផ្សារដីធ្លីគឺនៅតែមានលទ្ធភាពលក់ចេញបានគ្រប់ពេល ព្រោះសេដ្ឋកិច្ចកម្ពុជាមានការរីកចម្រើនទៅមុខជាហេតុធ្វើឱ្យមានតម្រូវការខ្ពស់។ លោកបន្តទៀតថា ការបោះទុនវិនិយោគលើវិស័យដីធ្លីគ្រប់ទំហំ សុទ្ធតែទទួលបានផលចំណេញ អាស្រ័យទៅតាមទីតាំង ដោយអ្នកខ្លះអាចអភិវឌ្ឍទៅជាសំណង់លំនៅឋាន ឬក្នុងវិស័យនានា។
ដោយឡែក លោក ច្រឹក សុខនីម ប្រធានសមាគមវាយតម្លៃនិងភ្នាក់ងារអចលនវត្ថុកម្ពុជា ធ្លាប់បានលើកឡើងថា ទីផ្សារអចលនទ្រព្យមិនមានអ្វីប្រែប្រួលនោះឡើយ គឺនៅតែដូចកាលពីដើមឆ្នាំដដែល តែយ៉ាងណា សម្រាប់តម្រូវការគឺដីធ្លី ដូចជាមានសកម្មភាពទិញលក់។ លោកថា ស្ថិតក្នុងដំនាក់កាលស្រពិចស្រពិលបែបនេះ ទីផ្សារដីធ្លីមិនមានការប្រែប្រួលឡើងថ្លៃអ្វីឡើយ ព្រោះអត្រាកំណើនសេដ្ឋកិច្ចមោនទាន់ខ្ពស់គ្រប់គ្រាន់ដែលអនុញ្ញាតឲ្យទីផ្សារអចលនទ្រព្យត្រូវឡើងតម្លៃនោះឡើយ។
បើតាមទស្សនវិស័យរបស់អ្នកជំនាញបង្ហាញថា ការអភិវឌ្ឍលើវិស័យអចលនទ្រព្យមិនមែនជាសកម្មភាពវិនិយោគថ្មីៗមកពីបរទេសឡើយ ភាគច្រើនម្ចាស់គម្រោងអភិវឌ្ឍជាអ្នកនៅក្នុងស្រុក ឬជាគម្រោងចាស់ដែលមិនទាន់បញ្ចប់គម្រោង៕
