តើតំបន់អរិយក្សត្រមានការប្រែប្រួលដូចម្ដេចក្នុងកំឡុងវិបត្តិសេដ្ឋកិច្ចសាកលនៅពេលបច្ចុប្បន្ន?

ដោយ ៖ រ៉ាណេត

ភ្នំពេញ ៖ ស្រដៀងគ្នាទៅនឹងតំបន់ជាយក្រុងនានាដែលនៅតែបន្តមានសកម្មភាពទិញ-លក់ដីធ្លីនៅលើទីផ្សារធម្មតា សម្រាប់តំបន់ត្រើយម្ខាងនៃអរិយក្សត្រត្រូវបានអ្នកជំនាញនៅក្នុងវិស័យនេះអះអាងថាមិនមានការធ្លាក់ចុះនោះទេ ខណៈគម្រោងអភិវឌ្ឍន៍លំនៅដ្ឋានមួយចំនួននៅតែបន្តសាងសង់។

នាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ប្រាប់តាមទូរស័ព្ទនៅព្រឹកថ្ងៃទី៣០ ខែឧសភា ឆ្នាំ២០២០នេះថា ទោះជាស្ថិតនៅក្នុងស្ថានភាពនៃវិបត្តិជំងឺ Covid-19 ដែលកំពុងប្រឈមនៅពេលបច្ចុប្បន្ននេះក្ដី ប៉ុន្តែសម្រាប់ចរន្តទីផ្សារនៃការលក់ដីធ្លី នៅតំបន់ស្វាយជ្រុំ និងអរិយក្សត្រ នៅតែបន្តមានសកម្មភាពធម្មតាមិនមានការប្រែប្រួល ឬធ្លាក់ចុះស្ងប់ស្ងាត់នោះទេ។

លោកស្រី តាំង ហួរ បានមានប្រសាសន៍ថា “មិនថាពីមុន ឬពេលនេះទេ ការទិញ-លក់ ដីធ្លីនៅតំបន់នេះនៅតែមាន ជាពិសេសសម្រាប់អ្នករកស៊ីនៅក្នុងវិស័យនេះនៅតែព្យាយាមស្វែងរកដីដែលមានទីតាំងល្អដែលសមស្របទៅនឹងគម្រោងអភិវឌ្ឍន៍របស់ពួកគេ ប៉ុន្តែបញ្ហាត្រង់ថា ការចរចាតម្លៃមិនត្រូវគ្នាតែប៉ុណ្ណោះ”។ លោកស្រីបន្តថា “អ្នកនិយាយថាទីផ្សារដីធ្លីនៅអរិយក្សត្រគាំង គឺចេះតែថាតាមគ្នាតែប៉ុណ្ណោះ ប៉ុន្តែភាពជាក់ស្ដែងទីផ្សារនៃការទិញ-លក់នៅតែមានធម្មតា ហើយតម្លៃក៏នៅតែថ្លៃមិនការធ្លាក់ចុះនោះទេ លើកលែងតែម្ចាស់ដីមួយចំនួនតូចដែលគាត់មានបញ្ហាថវិកាចាំបាច់ដែលត្រូវបង្ខំចិត្តលក់ក្នុងតម្លៃទាបជាងទីផ្សារ តែក៏មិនចុះច្រើនដែរ គឺក្នុងរង្វង់ប្រមាណ១៥-២០ភាគរយនៃតម្លៃទីផ្សារប៉ុណ្ណោះ”។

ស្រដៀងគ្នានឹងការលើកឡើងខាងលើនេះ លោក ចក់ ស៊ីណាត អគ្គនាយកក្រុមហ៊ុនអចលនទ្រព្យ Kraty Realty Co,.Ltd បានមានប្រសាសន៍ថា “បើមើលតាមភាពជាក់ស្ដែងនាពេលបច្ចុប្បន្ននេះ នៅតំបន់អារិយក្សត្រ និងតំបន់ស្វាយជ្រុំ ហាក់មិនមានសកម្មភាពពុះខ្លាំងដូចកាលពីជាងមួយឆ្នាំ មុននោះទេ ជាពិសេសក្រោយពេលដែលប្រមុខរដ្ឋាភិបាលប្រកាសពីគម្រោងសាងសង់ស្ពាន និងគម្រោងអភិវឌ្ឍន៍ជាក្រុងរណបនោះទេ ដែលជាធម្មតានៅពេលដែលមានគម្រោងអភិវឌ្ឍន៍លើវិស័យហេដ្ឋារចនាសម្ព័ន្ធនៅតំបន់ទីនោះតែងមានភាពពុះកញ្ច្រោល។

លោក ចក់ ស៊ីណាត បានមានប្រសាសន៍បន្តថា “ទោះជាមិនមានភាពពុះកញ្ជ្រោលខ្លាំង ប៉ុន្តែការទិញ-ការទិញលក់ដីធ្លីនៅតំបន់ខាងលើនេះ នៅតែបន្តមាន គ្រាន់តែតម្លៃមិនថ្លៃខ្លាំងនោះទេ។ បច្ចុប្បន្ននេះ តម្លៃដីគឺមិនមានភាពស្មើគ្នានោះទេ ដែលវាអាស្រ័យទៅតាមទីកន្លែង ស្ថានភាពដី និងទំហំ ហើយតម្លៃនឹងនៅតែបន្តឡើងថ្លៃសម្រាប់ថ្ងៃអនាគត ខណៈដែលមានមនុស្សកាន់តែច្រើនចូលទៅរស់នៅ” ៕

រដ្ឋាភិបាលចេញលិខិតអនុញ្ញាតសាងសង់ចំនួនជាង ៥ម៉ឺនគម្រោង មានទុនប្រមាណ ៥៦ពាន់លានដុល្លារ

ដោយវុត្ថា

ភ្នំពេញ៖ គិតចាប់ពីឆ្នាំ ២០០០ ដល់ខែមេសា ឆ្នាំ ២០២០ រដ្ឋាភិបាលកម្ពុជាតាមរយៈក្រសួងរៀបចំដែនដីនគរូបនីយកម្ម និងសំណង់ បានចេញលិខិតអនុញ្ញាតសាងសង់នៅទូទាំងប្រទេសមានចំនួនជាង ៥ម៉ឺនគម្រោងដែលមានផ្ទៃក្រឡាកម្រាលសំណង់ប្រមាណ១៤៣ លានម៉ែត្រការ៉េ និងទុនវិនិយោគសរុបប្រមាណ៥៦ម៉ឺនពាន់លានដុល្លារអាមេរិក។

របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញនៅក្នុងខែឧសភា ឆ្នាំ ២០២០នេះ ថា ក្នុងនោះមានគម្រោងអគារខ្ពស់ចាប់ពី ៥ ជាន់ឡើងនៅទូទាំងប្រទេសមានចំនួន ១៨៦៦ អគារ។ ដោយឡែក អគារខ្ពស់ៗ ចាប់ពី ៥ជាន់ឡើង ដល់ ៩ ជាន់មានចំនួន ៩៨៣ អគារ។

អគារចាប់ពីកំពស់ ១០ ជាន់ឡើងទៅ ១៩ ជាន់ មានចំនួន ៥៤២ អគារ។ អគារដែលមានកំពស់ចាប់ពី ២០ជាន់ទៅ ២៩ ជាន់ មានចំនួន ១៨០ អគារ ។ អគារដែលមានកំពស់ចាប់ពី៣០ ជាន់ឡើងទៅ៣៩ ជាន់ មានចំនួន ១០៨ អគារ ។ និង អគារកម្ពស់ចាប់ពី៤០ ជាន់ឡើងទៅមានចំនួន ៤៣ អគារ។

ដោយឡែកនៅខេត្តព្រះសីហនុ មានអគារកំពស់ចាប់ពី ៥ ជាន់ឡើងទៅចំនួន ៣២៤ អគារ គម្រោងបុរីលំនៅឋាន និងបណ្តុំលំនៅឋានមានលក្ខណៈបុរីមានចំនួន ៣៣៨ គម្រោង។

រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់បានបង្ហាញទៀតថា គិតចាប់ពីឆ្នាំ ២០០០ ដល់ខែមេសា ឆ្នាំ ២០២០ ការចុះបញ្ជីក្រុមហ៊ុនប្រកបអាជីវកម្មសិក្សាគម្រោងប្លង់ និង សាងសង់បានចំនួន ២៧៧៤ ក្រុមហ៊ុន នៅមានសុពលភាពចំនួន ១២០៦ ក្រុមហ៊ុន៕

រោងចក្រផលិតអគ្គិសនីដុតធ្យូងថ្មអនុភាព ២x៣៥០មេហ្គាវ៉ាត់នឹងបញ្ចប់សាងសង់នៅក្នុងឆ្នាំ២០២២

ដោយ វុត្ថា

ព្រះសីហនុៈ គម្រោងអភិវឌ្ឍន៍រោងចក្រផលិតអគ្គិសនីដុតធ្យូងថ្ម មានអនុភាព ២x៣៥០មេហ្គាវ៉ាត់ នៅឃុំកំពេញ ស្រុកស្ទឹងហាវ ខេត្តព្រះសីហនុ នឹងត្រូវបញ្ចប់សាងសង់នៅចុងឆ្នាំ២០២២ខាងមុខ ខណៈក្រុមហ៊ុនបានចាប់ផ្តើមសាងសង់ឡើងវិញ ក្រោយផ្អាកក្នុងរយៈពេលខ្លីដោយសារបញ្ហាជំងឺ Covid-19 ។

លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ ឱ្យដឹងនៅថ្ងៃទី ២៩ ខែឧសភា ឆ្នាំ ២០២០នេះថា តាមតំណាងក្រុមហ៊ុន ខេមបូឌា អ៉ិនធើណេស្យូណល អ៉ិនវេសមែន ឌីវេឡុបមែនគ្រុបបានឱ្យដឹងថា ក្រុមហ៊ុនទទួលសិទ្ធិសាងសង់ គម្រោងអភិវឌ្ឍន៍រោងចក្រផលិតអគ្គិសនី ដុតធ្យូងថ្មមានអនុភាព២x៣៥០មេហ្គាវ៉ាត់ នៅឃុំកំពេញ ស្រុកស្ទឹងហាវ ខេត្តព្រះសីហនុ ហើយគម្រោងសាងសង់នេះ នឹងត្រូវបញ្ចប់នៅចុងឆ្នាំ២០២២ខាងមុខ។

លោកបន្តថា បន្ទាប់ពីទទួលបានការអនុញ្ញាតពីរាជរដ្ឋាភិបាល នៅខែឧសភា ឆ្នាំ២០១៨ ក្រុមហ៊ុនបានបើកការដ្ឋានជាផ្លូវការឆ្នាំ២០១៩ ដោយសារតែការផ្ទុះឡើងនៃជំងឺ Covid-១៩ គួបផ្សំនឹងការខ្វះខាតអគ្គិសនី កាលពីរដូវប្រាំងឆ្នាំកន្លងមក ទើបរាជរដ្ឋាភិបាលបានផ្លាស់ប្តូរពេលវេលា។

លោកបន្ថែមថា “ឯកឧត្តម គួច ចំរើន អភិបាលខេត្តព្រះសីហនុ បានស្វាគមន៍ក្រុមហ៊ុន ខេមបូឌា អ៉ិនធើណេស្យូណល អ៉ិនវេសមែន ឌីវេឡុបមែនគ្រុប ដែលបានមកអភិវឌ្ឍន៍រោងចក្រផលិតអគ្គិសនី ដុតធ្យូងថ្ម ដែលមានអនុភាព ២x៣៥០មេហ្គាវ៉ាត់ ហើយរដ្ឋបាលខេត្ត នឹងចូលរួមសហការ ដើម្បីឱ្យក្រុមហ៊ុនមានលទ្ធភាពក្នុងការសាងសង់ស្ពានជញ្ជូនធ្យូងថ្ម និងឈានទៅសាងសង់រោងចក្រអគ្គិសនីដុតធ្យូងថ្ម នៅស្រុកស្ទឹងហាវប្រកបដោយរលូន” ។

លោក កែវ រតនៈ ប្រតិភូរាជរដ្ឋាភិបាល ទទួលបន្ទុកជាអគ្គនាយកអគ្គិសនីកម្ពុជាធ្លាប់បានឱ្យដឹងថា រោងចក្រផលិតថាមពលអគ្គិសនីដើរដុតធ្យូងថ្មនេះ នឹងត្រូវបានសាងសង់ឡើង ក្នុងគម្រោងទឹកប្រាក់ប្រមាណ១ពាន់លានដុល្លារអាមេរិក ដែលអាចបញ្ចេញថាមពល ផ្គត់ផ្គង់អគ្គិសនីនៅកម្ពុជានៅដើមឆ្នាំ២០២៣ ។

លោកបន្តថា រោងចក្រផលិតថាមពលអគ្គិសនីនេះ ត្រូវបានរំពឹងថាជាផ្នែកមួយដ៏សំខាន់ ក្នុងការផ្គត់ផ្គង់អគ្គិសនីនៅប្រទេសកម្ពុជានារដូវប្រាំង និងចូលរួមចំណែកកាត់បន្ថយតម្លៃអគ្គិសនីនៅកម្ពុជា ដើម្បីរួមចំណែកក្នុងការលើកកម្ពស់សេដ្ឋកិច្ចកម្ពុជា។ ព្រមជាមួយគ្នានេះ ការវិយោគរួមគ្នារវាងក្រុមហ៊ុនដ៏ធំរបស់កម្ពុជា និងចិន នៅពេលនេះក៏ជាការបង្ហាញអំពីកិច្ចសហប្រតិបត្តិការយ៉ាងល្អ រវាងប្រទេសកម្ពុជា និងចិនផងដែរ។

រោងចក្រផលិតថាមពលអគ្គិសនីដុត ធ្យូងថ្ម ដែលមានអានុភាពផលិតថាមពល២x៣៥០មេហ្គាវ៉ាត់ (សរុប៧០០មេហ្គាវ៉ាត់) ត្រូវបានបង្កើតឡើងក្រោមកិច្ចសហប្រតិបត្តិការរវាងក្រុមហ៊ុន ខេមបូឌា អ៊ិនធើណេស្យូណល អ៊ិនវេស្តមែន ឌីវើឡុបមែន គ្រុប ដែលហៅកាត់ថា (CIIDG) របស់កម្ពុជា ជាម្ចាស់គម្រោង និងក្រុមហ៊ុន CHINA HUADIAN HONGKONG COMPANY LIMITED ហៅកាត់ថា (CHDHK) របស់ចិន ជាដៃគូអនុវត្តគម្រោង៕

មុននឹងទិញលំនៅដ្ឋាន ខុនដូ តើអ្នកទិញគួរសម្លឹងមើលលើចំនុចអ្វីខ្លះ?

ដោយ ហ្សូលី

ភ្នំពេញៈ វិស័យលំនៅដ្ឋានមានភាពទាក់ទាញខ្លាំង ទៅលើចំណង់ចំណូលចិត្តនៃការរស់នៅរបស់ប្រជាពលរដ្ឋខ្មែរ ដោយហេតុថាជាតម្រូវការចាំបាច់។ ដូច្នេះមុននឹងទិញលំនៅដ្ឋាននិមួយៗ តើអ្នកទិញចាំបាច់គួរតែសម្លឹងមើលលើចំនុចណាខ្លះ?។

យោងតាមការដកស្រង់សម្តីពីអ្នកជំនាញអចលនទ្រព្យ ក្នុងប្រទេសកម្ពុជាបានបង្ហាញពីគំនិតខុសៗគ្នា ដោយក្នុងនោះពឹងផ្អែកលើកត្តាមួយចំនួនដូចជា៖

ទីតាំងគម្រោង

ទីតាំងជារឿងសំខាន់បំផុត មិនថាជាការទិញទុករស់នៅ ឬវិនិយោគលើផលចំណេញឡើយ។ ព្រោះវាផ្តល់ភាពងាយស្រួលសម្រាប់អ្នករស់នៅ និងផ្តល់ឱកាសឱ្យនៅពេលលក់ចេញវិញទទួលបានតម្លៃខ្ពស់ផងដែរ។ ជាពិសេសពិនិត្យមើលទៅលើហេដ្ឋារចាសម្ព័ន្ធលើទីតាំងនោះថាតើមានប្រព័ន្ធផ្លូវថ្នល់ ឬប្រព័ន្ធធារាសាស្ត្រត្រឹមត្រូវដែរឬយ៉ាងណា?។

អ្នកជំនាញអចលនទ្រព្យលោក ហៃ រ៉ាវី នាយកក្រុមហ៊ុនអចលនទ្រព្យ Daily Realty Group ធ្លាប់មានប្រសាសន៍ថា ហេតុផលដែលគួរទិញលំនៅដ្ឋាននៅតំបន់ណាមួយនោះ ត្រូវពិចារណាថាទីនោះមានប្រជាពលរដ្ឋសម្រុកទៅច្រើន អាចប្រកបអាជីវកម្ម មានរោងចក្រ សហគ្រាស នៅជុំវិញ ជាពិសេសហេដ្ឋារចនាសម្ព័ន្ធមានភាពរលូនស្រួលដែរឬអត់។

តម្លៃ

នេះគឺជារឿងសំខាន់បំផុតមុននឹងចាប់ផ្តើមជ្រើសរើស ពីគម្រោងលំនៅដ្ឋាន ព្រោះថាលុយគឺជាអ្នកកំណត់ថាតើអចលនវត្ថុប្រភេទណា នៅទីតាំងណា ដែលអ្នកទិញអាចមានសមត្ថភាពទិញ។

លោកស្រី តាំង ហ៊ួរ នាយិកាក្រុមហ៊ុនអចលនទ្រព្យ Amatak Property Service បានលើកឡើងថា ចំណុចខ្លាំងរបស់លំនៅដ្ឋានមួយទៀតនោះ គឺលក្ខខណ្ឌបង់ប្រាក់ ព្រោះម្ចាស់លំនៅដ្ឋាន ឬម្ចាស់គម្រោងអភិវឌ្ឍលំនៅដ្ឋានមួយចំនួន ផ្តល់ជូនលក្ខខណ្ឌបង់ប្រាក់ងាយស្រួលដូចជា ការបង់រំលស់ សម្រួលរយៈពេលបង់ឱ្យមានរយៈពេលវែង និងមានការយោគយល់ដល់អតិថិជន ដោយបត់បែនទៅតាមស្ថានភាពអតិថិជន។

ប្រវត្តិម្ចាស់គម្រោង

នៅក្នុងក្រុងក្តី តាមបណ្តារខេត្តក្តី មានក្រុមហ៊ុនអចលនទ្រព្យនៅកម្ពុជាជាច្រើន ដែលខ្លះមានការចុះបញ្ជីត្រឹមត្រូវ ហើយខ្លះទៀតក៏មិនមានការចុះបញ្ជីដែរ។ ដូច្នេះមុននឹងទិញ ត្រូវតែស៊ើបសួរឱ្យបានល្អិតល្អន់ ចៀសវាងការចាញ់បោកខាតថវិកា និងពេលវេលា។

ទន្ទឹមនេះ លោកស្រី តាំង ហ៊ួរ ក៏បានបន្ថែមថា អ្វីដែលសំខាន់គឺគម្រោងនោះមានភាពច្បាស់លាស់ មានក្រុមហ៊ុនអភិវឌ្ឍត្រឹមត្រូវ មានការទទួលស្គាល់ពីអាជ្ញាធរ ជាពិសេសលក់ក្នុងតម្លៃល្អ អ្នកវិនិយោគឬអ្នកចង់ជាវអចលនវត្ថុគួរតែចាប់យកឱកាសនេះ៕

កម្ពុជាគ្រោងបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយបណ្តាប្រទេសដទៃកាន់តែច្រើន

ដោយ វុត្ថា

ភ្នំពេញៈ កម្ពុជាគ្រោងបង្កើតកិច្ចព្រមព្រៀងពាណិជ្ជកម្មសេរីទ្វេភាគី ជាមួយដៃគូដទៃទៀត ក្រៅពីប្រទេសចិន និងបានប្រឹងប្រែងចរចាយ៉ាងសកម្ម ទាំងក្នុងក្របខ័ណ្ឌទ្វេភាគី និងពហុភាគី ជាមួយបណ្តាប្រទេសក្នុងតំបន់ និងពិភពលោក ដើម្បីស្វែងរកទីផ្សារថ្មីៗបន្ថែមជូនវិស័យឯកជនក្នុងការនាំចេញទំនិញ និងផលិតផល។

លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មនៅក្នុងពិធីប្រកាសចូលកាន់មុខតំណែងរបស់លោក ហៀវ វណ្ណា ប្រធានមន្ទីរពាណិជ្ជកម្មខេត្តកំពង់ធំថ្មី ជំនួសលោក ស៊ុន ហេង ដែលចូលនិវត្តន៍នាថ្ងៃទី ២៩ ខែឧសភា ឆ្នាំ ២០២០កន្លងមកឱ្យដឹងថា ថ្មីៗនេះ ក្រសួងពាណិជ្ជកម្ម បានដឹកនាំក្រុមការងារអន្តរក្រសួង ធ្វើការចរចាយ៉ាងសកម្ម លើកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសចិន ហើយការចរចានេះនឹងបញ្ចប់នៅខែមិថុនា ឆ្នាំ២០២០ខាងមុខនេះ។

លោកថ្លែងបន្តថា “កម្ពុជានឹងបង្កើតកិច្ចព្រមព្រៀងជាមួយនឹងប្រទេសកូរ៉េ ក្រុមការងារអន្តរក្រសួងដឹកនាំដោយក្រសួងពាណិជ្ជកម្ម នឹងពិនិត្យបញ្ចប់ការសិក្សារួមលើលទ្ធភាពបង្កើតកិច្ចព្រមព្រៀងទ្វេភាគីកម្ពុជា-កូរ៉េ ហើយត្រៀមចាប់ផ្ដើមការចរចានៅខែកក្កដា ឆ្នាំ២០២០នេះផងដែរ” ។

លោករដ្ឋមន្ត្រីបន្ថែមថា ក្រៅពីនេះ ក្រសួងពាណិជ្ជកម្មក៏បានបង្កើតក្រុមការងារចរចា និងសិក្សាលើលទ្ធភាពបង្កើតកិច្ចព្រមព្រៀងពាណិជ្ជកម្មសេរី ទ្វេភាគីជាមួយដៃគូដទៃទៀត រួមមាន សាធារណរដ្ឋកូរ៉េ ចក្រភពអង់គ្លេស សហភាពសេដ្ឋកិច្ចអឺរ៉ុបអាស៊ី ជប៉ុន ឥណ្ឌា ម៉ុងហ្គោលី និងសហរដ្ឋអាមេរិក។

លោករដ្ឋមន្ត្រីក៏បានបញ្ជាក់ដែរថា ជាមួយគ្នានេះ ក្រសួងពាណិជ្ជកម្ម បានកំពុងអនុវត្តយុទ្ធសាស្ត្រ សមាហរណកម្មពាណិជ្ជកម្មកម្ពុជា២០១៩-២០២៣ ជាផែនទីបង្ហាញផ្លូវដែលមានភាពស៊ីចង្វាក់គ្នា និងប្រទាក់ក្រឡាជាមួយយុទ្ធសាស្ត្រចតុកោណ ផែនការយុទ្ធសាស្ត្រអភិវឌ្ឍន៍ជាតិ គោលនយោបាយអភិវឌ្ឍន៍វិស័យឧស្សាហកម្ម ២០១៥-២០២៥ និងគោលនយោបាយជាតិមួយចំនួនទៀត។

លោករដ្ឋមន្ថែមថា ទន្ទឹមគ្នានេះ ក្រសួងក៏កំពុងរៀបចំលិខិតបទដ្ឋានគតិយុត្តិ និងពិនិត្យលើការធ្វើវិសោធនកម្មច្បាប់មួយចំនួន ដើម្បីបម្រើ និងធានាការពារអត្ថប្រយោជន៍វិស័យជន និងសាធារណជន ជាពិសេសធ្វើទំនើបកម្មឱ្យឆ្លើយតបទៅនឹងបរិបទបច្ចុប្បន្ន៕

តម្រូវការលំនៅដ្ឋាននៅថៃដាំក្បាលចុះក្នុងត្រីមាសទី១ ឆ្នាំនេះ

ដោយ ប៊ី

បាងកកៈ លោក Vichai Viratkapan អធិការធនាគារ និងជាប្រធានមជ្ឈមណ្ឌលព័ត៌មានអចលនទ្រព្យរបស់ប្រទេសថៃ (REIC) បានឱ្យដឹងថា វិបត្តិ Covid-19 បានជះឥទ្ធិពលដល់ទីផ្សារលំនៅដ្ឋាន របស់ប្រទេសថៃនៅក្នុងត្រីមាសទី១នៃឆ្នាំនេះ មិនត្រឹមតែនៅក្នុងការវិនិយោគប៉ុណ្ណោះទេ ប៉ុន្តែថែមទាំងការលក់លំនៅដ្ឋានផងដែរ។

ទោះយ៉ាងណាលោកមានប្រសាសន៍ថា ការធ្លាក់ចុះនៃតម្រូវការ និងការផ្គត់ផ្គង់បានធ្វើឱ្យមានតុល្យភាពទីផ្សារ ដោយកាត់បន្ថយហានិភ័យនៃបញ្ហាពីការផ្គត់ផ្គង់លើស។

នៅក្នុងត្រីមាសទី១ អាគារកម្មសិទ្ធិ៨៩.០២៤យូនីត ត្រូវបានផ្ទេរទូទាំងប្រទេស ដែលធ្លាក់ចុះ១៦,៧ភាគរយ បើប្រៀបធៀបទៅនឹងត្រីមាសទី៤កាលពីឆ្នាំមុន ប៉ុន្តែកើនឡើង២,៥ ភាគរយ បើធៀបនឹងឆ្នាំមុន ដែលមានតម្លៃសរុប២១០ពាន់លានបាត (៦,៦ ពាន់លានដុល្លារ) ។

ការផ្ទេរកម្មសិទ្ធិផ្ទះនៅតំបន់ទីក្រុងបាងកក ក្នុងត្រីមាសទី១ មានចំនួន៤៥.៦៧៨ យូនីត ធ្លាក់ចុះ ១៨.៣ភាគរយ បើធៀបនឹងត្រីមាសទី៤ និង៤,៤ភាគរយ ធៀបនឹងឆ្នាំមុន។ តម្លៃនៃការផ្ទេរកម្មសិទ្ធិផ្ទះមានចំនួន១២៩.៤០៦ ពាន់លានបាត ធ្លាក់ចុះ ២៤,៤ ភាគរយ ធៀនឹងត្រីមាសទី៤ និង២,៧ ភាគរយធៀបនឹងរយៈពេលដូចគ្នាកាលពីឆ្នាំមុន។

តម្លៃផ្ទេរកម្មសិទ្ធិលំនៅឋានក្នុងត្រីមាសទី១ មានចំនួនសរុប៤៣.៣៤៦យូនីត ធ្លាក់ចុះ១៤,៩ ភាគរយពីមួយត្រីមាសទៅមួយត្រីមាស ប៉ុន្តែកើនឡើង១០,៩ភាគរយពីមួយឆ្នាំទៅមួយឆ្នាំ។ តម្លៃនៃការផ្ទេរភាពជាម្ចាស់មានចំនួន៨០,៨៨៨ ពាន់លានបាតធ្លាក់ចុះ ១៣,៥ភាគរយ ពីមួយត្រីមាសទៅមួយត្រីមាស ប៉ុន្តែកើនឡើង២៥,០ភាគរយពីមួយឆ្នាំទៅមួយឆ្នាំ។

REIC រំពឹងថា នឹងមានការផ្ទេរកម្មសិទ្ធិ៣១១.៧១៩ យូនីតនៅទូទាំងប្រទេសនៅឆ្នាំនេះគឺធ្លាក់ចុះ១៦,៧ ភាគរយបើប្រៀបធៀបទៅនឹងឆ្នាំមុន។ តម្លៃសរុបនៃការផ្ទេរកម្មសិទ្ធិនឹងមានចំនួន៧៤៦.២០៦ ពាន់លានបាតធ្លាក់ចុះ១៤,៨ ភាគរយពីមួយឆ្នាំទៅមួយឆ្នាំ៕

មិនធ្លាប់មាន…ព្រឹត្តិការណ៍លក់បញ្ចុះតម្លៃអចលនទ្រព្យដំបូងគេនៅកម្ពុជារហូតដល់ ៤០%

ដោយ ហ្សូលី

ភ្នំពេញៈ តើលោក អ្នកចំណេញចំណាយលុយតិច តែចំណេញច្រើនមកវិញទេ? អ្នកជំនាញអចលនទ្រព្យបានបញ្ជាក់ ជាច្រើនដងមកហើយថា ការវិនិយោគលើវិស័យអចលនទ្រព្យ គឺជាការវិនិយោគដែលមានសុវត្ថិភាពបំផុតក្នុងពេលបច្ចុប្បន្ន ព្រោះលោកអ្នកអាចទិញអចលនវត្ថុបានក្នុងតម្លៃទាប ហើយនាពេលអនាគតអាចទទួលបានផលចំណេញវិញលើសពីការរំពឹងទុក។

ដូច្នេះឱកាសនេះបានមកដល់ហើយ ដែលលោកអ្នកគួរតែចាប់ឱ្យបានមុនគេជាមួយកម្មវិធី Black Friday Property Sale ដែលលោកអ្នកអាចចំណាយថវិកាតិចនិងទទួលបានផលចំណេញច្រើន ជាពិសេសទិញបានពីគម្រោងល្អៗដូចជា The Skyline, Urban Village, The Parkway, តារាសាគរ រំដួលស៊ីធី បុរីវីអាយភី និងគម្រោងជាច្រើនទៀត។ គម្រោងដែលមានការដាក់លក់នៅក្នុងកម្មវិធីសុទ្ធសឹងជាគម្រោងរបស់ក្រុមហ៊ុនអភិវឌ្ឍអចលនទ្រព្យល្បីៗ និងមានការទទួលស្គាល់ច្បាស់លាស់ពីអាជ្ញាធរកម្ពុជា។

ដើម្បីបញ្ចៀសនិងការពារ ព្រមទាំងរួមគ្នាទប់ស្កាត់ជំងឺ Covid-19 អ្នករៀបចំកម្មវិធីបានរៀបចំឱ្យកម្មវិធី មានការបញ្ជាទិញតាមប្រព័ន្ធអនឡាញ ដែលមានភាពងាយស្រួល និងទំនុកចិត្ត។ លក្ខខណ្ឌនៃការបញ្ជាទិញមានភាពងាយស្រួល មិនស្មុគស្មាញ លោកអ្នកគ្រាន់តែធ្វើការចុះឈ្មោះ និងបំពេញព័ត៌មានផ្ទាល់ខ្លួនមួយចំនួន តាមរយៈតំណភ្ជាប់នេះ https://propertysale.realestate.com.kh/property-area តែប៉ុណ្ណោះ។

នៅពេលដល់ថ្ងៃព្រឹត្តការណ៍គឺថ្ងៃទី១២ ខែមិថុនា ឆ្នាំ២០២០ ចាប់ពីម៉ោង ៤ រសៀ លដល់ ម៉ោង៨យប់ នោះលោកអ្នកនឹងទទួលបានការសម្របសម្រួល ការទិញពីក្រុមការងារ។ របៀបនៃការទិញអចលនទ្រព្យក្នុងកម្មវិធី Black Friday Property Sale ងាយស្រួលមែនទែន បើសិនជាលោកអ្នករកឃើញប្រភេទអចលនវត្ថុ ដែលពេញចិត្តបន្ទាប់មកត្រូវតែធ្វើការកក់ប្រាក់ ៥០០ដុល្លារជាមុនសិន។ សូមកុំបារម្ភព្រោះអ្នកមានរយៈពេល ១៤ថ្ងៃ ក្នុងការសម្រេចចិត្តជ្រើសរើស និងពិភាក្សាជាមួយក្រុមគ្រួសារបាន។

លើសពីនេះ មានពេលវេលាសមស្រប ក្នុងការសាកសួរព័ត៌មានលម្អិតអំពីអចលនទ្រព្យជាក់លាក់នោះជាមួយក្រុមហ៊ុនអភិវឌ្ឍ ដើម្បីជួបពិភាក្សានិងចុះកុងត្រាព្រមព្រៀងទិញ។

កាន់តែពិសេស អ្នកក៏មានសិទ្ធដកប្រាក់កក់៥០០ដុល្លារ នោះមកវិញផងដែរ ប្រសិ នបើអ្នកមិនពេញចិត្តឬសម្រេចចិត្តថាមិនចង់ទិញវិញ៕

ការស្ថាបនាផ្លូវក្រវ៉ាត់ក្រុងទី២ សម្រេចបានប្រមាណ ៩៧ភាគរយហើយ

ដោយៈ រ៉ាណេត

ភ្នំពេញៈ មនុស្សជាច្រើននឹកឃើញតែផ្លូវក្រវ៉ាត់ក្រុងទី៣ ដែលជាផ្លូវដ៏សំខាន់ ប៉ុន្តែផ្លូវក្រវ៉ាត់ក្រុងទី២រឹងតែសំខាន់ ព្រោះគ្មានក្រវ៉ាត់ក្រុងទី២ ក៏គ្មានទី៣ដែរ។

យោងតាមរបាយការណ៍របស់មន្ទីរសាធារណការៈ និងដឹកជញ្ជូន រាជធានីភ្នំពេញ បានបញ្ជាក់ថា គិតត្រឹមល្ងាចថ្ងៃទី២៩ ខែឧសភាឆ្នាំ២០២០ ជាលទ្ធផលនៃការសាងសង់ផ្លូវក្រវ៉ាត់ក្រុងទី២ បានសម្រេចប្រមាណ ៩៧ភាគរយ។

ទេសរដ្ឋមន្ត្រី លោក ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន ធ្លាប់បានមានប្រសាសន៍ថា រាជរដ្ឋាភិបាលកម្ពុជាបានស្វះស្វែង ក្នុងការពង្រីកផ្លូវក្រវ៉ាត់ក្រុងដើម្បីធ្វើយ៉ាណា សម្រួលដល់ការធ្វើដំណើរ និងដឹកជញ្ជូនរវាងកំណាត់ទី២ តភ្ជាប់ពីមហាវិថីសហព័ន្ធរុស្សី (ត្រង់ស្តុបផ្សារដីហុយ) ឆ្ពោះទៅផ្លូវជាតិលេខ២(ត្រង់ព្រែកសំរោង តាខ្មៅ)។

បើនិយាយឱ្យងាយយល់ ផ្លូវក្រវ៉ាត់ក្រុងទី២ តភ្ជាប់ពីស្តុបផ្សារដីហុយ ទៅផ្លូវលេខ១០១៩ កាត់តាមផ្លូវ North Bridge ផ្លូវទ្រុងមាន់ ផ្លូវមុខររោងចក្រអគ្គិសនី ផ្លូវមុខសហគមន៍អន្លង់គង ផ្លូវទំនប់៧មករា ដល់ផ្លូវជាតិលេខ២ ភ្ជាប់ស្ពានព្រែកសំរោងតាខ្មៅ។

ផ្លូក្រវ៉ាត់ក្រុងភ្ជាប់ទៅភាគខាងត្បូង នៃរាជាធានីភ្នំពេញនេះ មានប្រវែង១៧ គីឡូម៉ែត្រ គ្រោងចំណាយជិត៦២លានដុល្លារអាមេរិក ក្រោមហិរញ្ញប្បទានរដ្ឋាភិបាលប្រជាមានិតចិន ដោយប្រើរយៈសាងសង់៣៦ខែ ហើយគ្រោងនឹងបញ្ចប់នៅឆ្នាំ២០១៩ខាងមុខ។

ផ្លូវក្រវ៉ាត់ក្រុងកំណាត់ទី២ តម្លៃជិត៦២លានដុល្លារអាមេរិកនេះ ត្រូវបានបើកការ ដ្ឋានសាងសង់នៅថ្ងៃទី៦ ខែមីនា ឆ្នាំ២០១៧ ចំថ្ងៃដែលផ្លូវក្រវ៉ាត់ក្រុងខ្សែទី២ កំណាត់ទី១ បើកសម្ពោធឲ្យប្រើប្រាស់ជាផ្លូវការ ក្រោមអធិបតីភាពសម្តេចតេជោ ហ៊ុន សែននាយករដ្ឋមន្ត្រីនៃកម្ពុជា។

ផ្លូវក្រវ៉ាត់ក្រុងទី២នេះ បែងចែកជាពីរកំណាត់ ដោយកំណាត់ទី១ មានប្រវែង១០ គីឡូម៉ែត្រ ដោយចំណាយថវិកាសាងសង់ប្រមាណជាង១០ លានដុល្លារអាមេរិក ក្រោមជំនួយហិរញ្ញប្បទានពីសាធារណរដ្ឋវៀតណាម ហើយតភ្ជាប់ពីផ្លូវទំនប់កប់ស្រូវ (ឬផ្លូវ១២០K) ឆ្ពោះទៅកាន់មហាវិថីសហព័ន្ធរុស្សី។

រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុលបានឱ្យដឹងថា ផ្លូវក្រវ៉ាត់ក្រុងនេះ នឹងចូលរួមកាត់បន្ថយការកកស្ទះ និងគ្រោះថ្នាក់ចរាចរណ៍ ជម្រុញការដឹកជញ្ជូន ភស្តុភារ និងទំនិញ មានលក្ខណៈកាន់តែងាយស្រួលពីផ្លូវជាតិលេខ៥ ទៅផ្លូវជាតិលេខ២ និងទៅផ្លូវជាតិលេខ១បានឆាប់រហ័ស ជាពិសេសការតភ្ជាប់ទៅកាន់តំបន់ទំនប់កប់ស្រូវ។

លោកបន្តថា “តំបន់ទំនប់កប់ស្រូវកំពុងមានការអភិវឌ្ឍខ្លាំង និងប្រែក្លាយទៅជាមជ្ឈមណ្ឌលស្តុកផ្គត់ផ្គង់ និងចែកចាយទំនិញ នៅតំបន់ភាគខាងលិចរាជធានីភ្នំពេញ តភ្ជាប់ទៅកំពង់ផែស្វយ័តភ្នំពេញ (ផ្លូវជាតិលេខ១) និងទៅក្រុងហូជីមិញប្រទេសវៀតណាមផងដែរ” ៕

ក្រុមហ៊ុន Oxley Holdings ម្ចាស់គំរោង The PeAk បានលក់អាជីវកម្មរបស់ខ្លួនមួយចំនួននៅសឹង្ហបុរី

ដោយ ប៊ី

សឹង្ហបុរី៖ ក្រុមហ៊ុន Oxley Holdings បានឱ្យដឹងនៅក្នុងឯកសារផ្សារហ៊ុនមួយកាលពីថ្មីៗនេះថា អ្នកទិញសក្តានុពលមួយបានឈានការយល់ព្រម ទិញលក់ដំណាក់ដំបូង (EOI) ជាមួយក្រុមហ៊ុន Oxley Beryl ដែលជាម្ចាស់អតីតអគារ Chevron House ដើម្បីទិញយកផ្នែកលក់រាយ និងធនាគារនៅក្នុងតំបន់ Raffles Place នៅក្នុងប្រទេសសឹង្ហបុរី ក្នុងតម្លៃ៣១៥លានដុល្លារសឹង្ហបុរី។

អ្នកអភិវឌ្ឍអចលនទ្រព្យខាងលើ មិនបានកំណត់អត្តសញ្ញាណអ្នកទិញនេះទេ ហើយមិនបានបញ្ជាក់ថា តើវាជាប់ទាក់ទងនឹងក្រុមហ៊ុន Golden Compass (BVI) អ្នកទិញដែលមានឈ្មោះក្នុងសំណើរលក់ អចលនទ្រព្យរបស់ក្រុមហ៊ុន Oxley Holdings ក្នុងទឹកប្រាក់១,០២៥ ពាន់លានដុល្លារសឹង្ហបុរី ដែលត្រូវបានប្រកាសកាលពីខែមេសា។

ក្រុមហ៊ុន Oxley Holdings បានឱ្យដឹងថា នៅក្នុងខែឧសភា ឆ្នាំ២០១៩ ថា ដំណើរផ្នែកលក់រាយ និងធនាគាររបស់ខ្លួននឹងត្រូវធ្វើឡើង តាមរយៈការយល់ព្រមទិញលក់ដំណា ក់ដំបូង (EOI) មួយជុំឬច្រើនជុំ ដែលបើកដំណើរការជាសាធារណៈ ហើយនឹងត្រូវបង់ជាសាច់ប្រាក់។

ក្រុមហ៊ុនបានឱ្យដឹងថា ប្រាក់កក់ ដែលអាចសងវិញបានចំនួន៣,១៥លានដុល្លារសឹង្ហបុរី ត្រូវបានទទួលពីអ្នកទិញ ដែលមិនបញ្ចេញអត្តសញ្ញាណសម្រាប់ សម្រាប់ការទិញខាងលើ។

ក្រោមការយល់ព្រមទិញលក់ដំណាក់ដំបូង (EOI) អ្នកទិញសក្តានុពលខាងលើអាចជ្រើសយកកិច្ចព្រមព្រៀងលក់ និងទិញជាប់ជាមួយក្រុមហ៊ុន Oxley Beryl នៅថ្ងៃទី ១៥ ខែមិថុនាឆ្នាំ ២០២០ ។ បន្ទាប់មក ដំណើរការទិញខាងរំពឹងថា នឹងបញ្ចប់នៅថ្ងៃទី ៣០ ខែមិថុនាឆ្នាំ ២០២០ ។

កាលពីខែមេសាឆ្នាំ២០១៩ Oxley Holdings បានចុះហត្ថលេខាលើកិច្ចព្រមព្រៀងជាមួយមូលនិធិអចលនទ្រព្យអាមេរិកAEW តាមរយៈយានវិនិយោគរបស់ខ្លួន គឺក្រុមហ៊ុន Golden Compass ក្នុងការទិញការវិនិយោគនៅក្នុងក្រុមហ៊ុន Oxley Beryl និងប្រាក់កម្ចីធនាគារដែលមានស្រាប់ ក្នុងតម្លៃសរុបរហូតដល់១.០២៥ ពាន់លានដុល្លារសឹង្ហបុរី។

ក្រុមហ៊ុន Oxley Holdings បានប្រកាសកាលពីខែមិថុនាថា នៅពេលបញ្ចប់ការលក់លើកដំបូង ក្រុមហ៊ុន Golden Compass បានចំណាយប្រាក់២១០ លានដុល្លារសឹង្ហ បុរី និងទទួលបានភាគហ៊ុន ៨២,៣៥ ភាគរយនៅក្នុងក្រុមហ៊ុន Oxley Beryl ។

ក្រុមហ៊ុន Golden Compass ត្រូវទូទាត់សមតុល្យ និងទូទាត់ប្រាក់កម្ចីធនាគាររបស់ Oxley Beryl នៅពេលបញ្ចប់ចុងក្រោយ បន្ទាប់មកភាគហ៊ុននៅសល់ចំនួន ១៧,៦៥ ភាគរយនៃភាគហ៊ុននៅក្នុង Oxley Beryl នឹងត្រូវផ្ទេរទៅឱ្យក្រុមហ៊ុន Golden Compass ។

អគារ Chevron House នៅតំបន់ 30 Raffles Place ជាអគារពាណិជ្ជកម្មកម្ពស់ ៣២ជាន់ ក្នុងនោះ២៧ជាន់ជាការិយាល័យ និង៥ជាន់ផ្សេងទៀតជាកន្លែងផ្តល់សេវាកម្មដទៃទៀត។

ក្រុមហ៊ុន Oxley Holdings បានចំណាយថវិកាចំនួន៦៦០លានដុល្លារ សឹង្ហបុរីសម្រាប់ការទិញយកអគារ Chevron House ពីខែធ្នូឆ្នាំ ២០១៧ ៕ Business Times

ចំណេះដឹង! អ្វីជានីតិពាណិជ្ជកម្ម ?

ដោយ វុត្ថា

ភ្នំពេញៈ នីតិពាណិជ្ជកម្ម ជាបណ្តុំវិធានគតិយុត្តទាំងឡាយ ដែលអនុវត្តន៍ទៅលើពាណិជ្ជករ នៅក្នុងពេលអនុវត្តវិជ្ជាជីវៈរបស់ខ្លួន និងលើពាណិជ្ជកិច្ចដែលធ្វើឡើងដោយពាណិជ្ជករឬជនដែលមិនមែនជាពាណិជ្ជករ។

ម្យ៉ាងទៀតថា នីតិពាណិជ្ជកម្ម ជាបណ្តុំនៃវិធានគតិយុត្តពិសេសមួយ ដែលអនុវត្តន៍លើពាណិជ្ជករ ក្រុមហ៊ុនពាណិជ្ជកម្ម និងពាណិជ្ជកិច្ច។

បន្ថែមពីនេះ នីតិពាណិជ្ជកម្មគឺជាផ្នែកមួយ នៃនីតិឯកជន មានន័យថាវិធាននៃនីតិនេះត្រូវបានអនុវត្តលើ ទំនាក់ទំនងនៃប្រតិបត្តិការគតិយុត្តិទាំងឡាយដែល ត្រូវបានធ្វើឡើងដោយ និងរវាងពាណិជ្ជករ និង ពាណិជ្ជករ ព្រមទាំងរវាងពាណិជ្ជករ និងអតិថិជន។

នីតិពាណិជ្ជកម្ម ជាជានីតិពិសេស ដើម្បីឆ្លើយតបនឹងរាល់ភាពចាំបាច់ទាំងឡាយនៅក្នុងវិស័យពាណិជ្ជកម្ម។ ដែលចក្ខុវិស័យនេះ បានតម្រូវឱ្យនីតិពាណិជ្ជកម្មត្រូវតែស្វែងរកលើដំណោះស្រាយនានា ដែលខុសប្លែកពីដំណោះស្រាយ ដែលមានក្នុងនីតិរដ្ឋប្បវេណី និងត្រូវតែប្រើប្រាស់នូវបច្ចេកទេសពិសេសផ្ទាល់ខ្លួនរបស់វា៕