កម្ពុជាទទួលបានភ្ញៀវទេសចរអន្តរជាតិចំនួន ១,២លាននាក់ ក្នុងរយៈពេល ៧ខែដំបូងឆ្នាំនេះ

ដោយ៖ ប៊ី

ភ្នំពេញ៖ កម្ពុជាទទួលបានភ្ញៀវទេសចរអន្តរជាតិចំនួន ១,២ លាននាក់ក្នុងរយៈពេល ៧ ខែដំបូងនៃឆ្នាំ ២០២០ ធ្លាក់ចុះ ៦៨,៧ ភាគរយពី ៣,៨៤ លាននាក់ក្នុងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍ចុងក្រោយចេញដោយក្រសួងទេសចរណ៍កាលពីថ្ងៃទី១១ ខែកញ្ញា ឆ្នាំ២០២០។

របាយការណ៍បាននិយាយថា ប្រទេសចិន វៀតណាម និងថៃគឺជាប្រភពធំបំផុតនៃអ្នកទេសចរណ៍ដែលមកកាន់កម្ពុជា ក្នុងអំឡុងពេលពីខែមករា ដល់ខែកក្កដា ឆ្នាំនេះ។

របាយការណ៍ បានឱ្យដឹងថា ភ្ញៀវទេសចរណ៍ជនជាតិចិនចំនួន ២៨៣.០៦៣បានមកធ្វើទស្សនាកម្ពុជាក្នុងរយៈពេល ៧ ខែដំបូងនៃឆ្នាំនេះនាក់ ធ្លាក់ចុះ ៨១ ភាគរយ វៀតណាមចំនួន ១៧៩.៧៨៤ នាក់ នាក់ ធ្លាក់ចុះ ៦២ ភាគរយ និងថៃចំនួន ១៧១.៦៧៧ ធ្លាក់ចុះ ១៤ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។

នៅក្នុងខែកក្កដា កម្ពុជាបានទទួលភ្ញៀវទេសចរបរទេសតែ ២០.៦៨៩ នាក់ប៉ុណ្ណោះ ដែលជាការធ្លាក់ចុះ ៩៦ ភាគរយពី ៥០២.៤២១ នាក់ក្នុងរយៈពេលដូចគ្នាកាលពីឆ្នាំមុន។

ការធ្លាក់ចុះដ៏ធំនៃចំនួនភ្ញៀវអន្តរជាតិមកកម្ពុជា គឺដោយសារតែជំងឺរាតត្បាត COVID-19 ដែលបានធ្វើឱ្យ ប្រទេសកម្ពុជាដាក់កម្រិតលើការធ្វើដំណើរអ្នកដំណើរបរទេសទាំងអស់ចាប់តាំងពីខែមីនា។

លោក ថោង ខុន រដ្ឋមន្រ្តីក្រសួងទេសចរណ៍ បានព្យាករណ៍ថា កម្ពុជាអាចខាតបង់ចំណូលពីវិស័យទេសចរណ៍ប្រមាណ ៣ ពាន់លានដុល្លារអាមេរិកនៅឆ្នាំនេះ ដោយសារការធ្លាក់ចុះនៃចំនួនភ្ញៀវអន្តរជាតិ។

លោកបានមានប្រសាសន៍ថា “សម្រាប់ឆ្នាំ ២០២០ ដោយសារវិបត្ដិCOVID-19 ចំនួនភ្ញៀវទេសចរបរទេសមកកម្ពុជាអាចនឹងធ្លាក់ចុះ ៧០ ភាគរយ”៕ Xinhua

អគារជួលលក់រាយ៣ទីតាំងបន្ថែមទៀត នឹងបើកដំណើរការនៅមុនដំណាច់ឆ្នាំ ២០២០

ដោយ៖ ប៊ី

ភ្នំពេញ៖ តាមការព្យាកររបស់ CBRE Cambodia នៅមុនដំណាច់ឆ្នាំ ២០២០ នេះនឹងមានអគារជួលលក់រាយ ៣ ទីតាំងបន្ថែមទៀតបើកដំណើរការដោយនឹងមានផ្ទៃក្រឡាសរុបជិត ៥០ ០០០ ម៉ែត្រការ៉េ ខណៈផ្ទៃក្រឡាកន្លែងជួលលក់រាយក្នុងរាជធានីភ្នំពេញគិតត្រឹមដំណាច់ឆមាសទី ១ ឆ្នាំ ២០២០ មានចំនួន ៣២៦ ០០០ ម៉ែត្រការ៉េ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានថ្លែងប្រាប់គេទំព័រ Propertyarea.asia កាលពីថ្មីៗនេះថា ផ្អែកតាមភាពជាក់ស្ដែងនៅពេលបច្ចុប្បន្ននេះ យើងឃើញថា មនុស្សជាច្រើនចាប់ផ្តើមមានសកម្មភាព និងចេញដើរឡើងវិញ បន្ទាប់ពីការរាតត្បាតនៃជំងឺឆ្លងនៅក្នុងប្រទេសកម្ពុជាមានភាពស្ងប់ស្ងាត់ ជាពិសេស បន្ទាប់ពីរាជរដ្ឋាភិបាលបានសម្រេចអនុញ្ញាតឱ្យអាជីវកម្មកម្សាន្តមួយចំនួនចាប់ដំណើរការឡើងវិញ ប៉ុន្តែស្ថិតក្នុងស្ថានភាពប្រុងប្រយ័ត្នខ្ពស់។

លោកស្រីបានបន្តទៀតថា “នៅក្នុងឆមាសទី១ ក្រៅពីវិស័យឧស្សាហកម្ម គឺវិស័យសណ្ឋាគារ (Hotel) និងវិស័យផ្សារទំនើប (Retail) ទទួលរងនូវផលប៉ះពាល់យ៉ាងខ្លាំង ប៉ុន្តែនៅក្នុងឆមាសទី២នៃឆ្នាំនេះ យើងរំពឹងថានឹងមានកំណើនឡើងវិញបន្តិច”។ លោកស្រីបន្តថា “ការអនុញ្ញាតឱ្យចាប់បើកដំណើរការឡើងវិញនូវអាជីវកម្មផ្នែកកម្សាន្ត និងសេវាកម្មមួយចំនួនរបស់រាជរដ្ឋាភិបាលពិតជាបានចូលរួមជួយធ្វើវិស័យទាំង២ខាងលើនេះមានភាពល្អប្រសើរ ប៉ុន្តែកំណើននៃតម្រូវការទីផ្សារគឺនៅមានកម្រិតនៅឡើយ”។

ជាមួយនឹងការលើកឡើងខាងលើនេះ លោកស្រី អាន សុធីតា បានធ្វើការព្យាករណ៍ថា សម្រាប់វិស័យ Retail នៅក្នុងឆមាសទី២នេះ ការផ្គត់ផ្គង់នឹងមានការកើនឡើង ដោយសារមានការបើកសម្ភោធផ្សារទំនើបបែបសហគមន៍ថ្មីមួយ គឺ Khalandale Mall នៅតំបន់បឹងកក់ ដែលបានបន្ថែមបរិមាណផ្គត់ផ្គង់ក្នុងទីផ្សារសរុបប្រមាណ ៣,៧១ ភាគរយ ឬស្មើនឹងប្រមាណ ២៤ភាគរយ នៃបរិមាណការផ្គត់ផ្គង់លើផ្សារបែបសហគមន៍ ប៉ុន្តែសម្រាប់កំណើននៃតម្រូវការជួលហាក់មានកម្រិតទាប។

លោកស្រី បានបន្តថា ដោយឡែកសម្រាប់វិស័យសណ្ឋាគារ (Hotel) គឺមានភាពល្អប្រសើរជាង ដែលផ្តើមចេញពីតម្រូវការក្នុងស្រុកបន្ទាប់ពីទេសចរណ៍ក្នុងស្រុកចាប់ផ្ដើមចេញដើរកម្សាន្តឡើងវិញនៅតាមតំបន់កម្សាន្តឡើងវិញជាបណ្ដើរៗ។

របាយការណ៍ CBRE Cambodia បានឱ្យដឹងថា ផ្ទៃក្រឡាកន្លែងជួលលក់រាយ (The total areas of retail) ក្នុងរាជធានីភ្នំពេញគិតត្រឹមដំណាច់ឆមាសទី ១ ឆ្នាំ ២០២០ មានចំនួន ៣២៦ ០០០ ម៉ែត្រការ៉េ កើនឡើង ៤ ភាគរយ បើធៀបនឹងដំណាច់ឆ្នាំ ២០១៩ កន្លងមក។

គិតត្រឹមចុងខែមិថុនា ឆ្នាំ ២០២០ នៅរាជធានីភ្នំពេញមានទីតាំងសម្រាប់ជួលលក់ទំនិញនៅតាមផ្សារទំនើប ឬអគារធំៗសរុប ២៣ ដែលស្មើនឹងផ្ទៃក្រឡាសរុប ៣២៦ ០០០ ម៉ែត្រការ៉េ កើនពីចំនួន ៣១៤ ០០០ ម៉ែត្រការ៉េ កាលពីចុងឆ្នាំ ២០១៩។ ក្នុងនោះផ្ទៃក្រឡារបស់ Shopping Mall មានចំនួន ៥១ ភាគរយ Shopping Center មានចំនួន ២៥ ភាគរយ Community Mall មាន ១៤ ភាគរយ និង Retail Podium មាន ១០ ភាគរយ។

សម្រាប់ផ្ទៃក្រឡាមិនប្រើប្រាស់មានប្រមាណ ១០,២ ភាគរយនៅក្នុងឆមាសទី ១ ឆ្នាំ ២០២០ ធ្លាក់ចុះពី ១០,៦៣ ភាគរយកាលពីចុងឆ្នាំ ២០១៩។

ការសិក្សានោះក៏រកឃើញដែរថា ក្នុងឆមាសទី ១ ឆ្នាំ ២០២០ កន្លែងជួលលក់ទំនិញប្រភេទ Prime Shopping Mall មានតម្លៃជួលជាមធ្យម ២៨,៤៦ ដុល្លារក្នុង ១ ម៉ែត្រការ៉េ សម្រាប់រយៈពេល ១ ខែ ធ្លាក់ចុះ ១២ ភាគរយបើធៀបទៅនឹងចុងឆ្នាំ ២០១៩, ប្រភេទ Prime Retail Podium មានតម្លៃ ២៦,០៣ ដុល្លារ ធ្លាក់ ១៣ ភាគរយ និងប្រភេទ Community Mall មានតម្លៃ ២២,២៣ ដុល្លារធ្លាក់ចុះ ៤ ភាគរយ ខណៈប្រភេទ Prime High Street មានតម្លៃ ២៦,២៣ ដុល្លារ កើនឡើង ១ ភាគរយ៕

វិស័យអចលនទ្រព្យនឹងកាន់តែរីកចំរើនខ្លាំងនៅក្នុងក្រុងសៀមរាប ខណៈរដ្ឋាភិបាលដាក់ចេញអភិវឌ្ឍន៍ហេដ្ឋារចនាសម្ព័ន្ធថ្មី

ដោយវុត្ថា

ភ្នំពេញ៖ វិស័យអចលនទ្រព្យនៅក្នុងក្រុងសៀមរាបនឹងកាន់តែរីកចំរើនខ្លាំងបន្ថែមទៀត ខណៈដែលរាជរដ្ឋាភិបាលកម្ពុជាបានដាក់ចេញផែនការអភិវឌ្ឍហេដ្ឋារចនាសម្ព័ន្ធថ្មីនៅក្នុងក្រុងចំនួន ៣៨ខ្សែ ឱ្យមានសោភ័ណភាព និងម្រួលដល់ការធ្វើដំណើរ និងដឹកជញ្ជូន ។

លោក ច្រឹក សុខនីម ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជា បានប្រាប់គេហទំព័រ propertyarea.asia នៅថ្ងៃទី ១១ ខែកញ្ញា ឆ្នាំ ២០២០ នេះ ឱ្យដឹងថា ការដាក់ចេញអភិវឌ្ឍន៍ហេដ្ឋារចនាសម្ព័ន្ធរបស់រដ្ឋាភិបាលនាពេលកន្លងមកនេះ គឺសញ្ញាមួយល្អដែលជំរុញឱ្យមានស័យនានាឱ្យមានការរីកចំរើន រួមជាមួយនឹងវិស័យអចលនទ្រព្យផងដែរ ។
លោកបន្តថា “ដោយឡែកចំពោះការអភិវឌ្ឍន៍ហេដ្ឋារចនាសម្ព័ន្ធនៅក្នុងក្រុងសៀមក៏វានឹងជួយជំរុញឱ្យវិស័យអលចនទ្រព្យរីកចំរើនផងដែរជាពិសេសអចលនទ្រព្យប្រភេទសណ្ឋាគារ ផ្ទះសំណាក់ និងបឹងហ្គាឡូងផងដែរ”។

លោកបន្តថា “បន្ទាប់ពីមានហេដ្ឋារចនាសម្ព័ន្ធល្អច្រើន ហើយមានបន្ថែមផ្លូវថ្មី វានឹងជួយលើកស្ទួយតម្លៃដីធ្លីមានការកើនឡើង និងមានគម្រោងថ្មីៗផ្សេងក៏នឹងកើនឡើងផងដែរ ខណៈបច្ចុប្បន្ននេះ តម្លៃដីនៅតាមតំបន់មួយចំនួននៅក្នុងក្រុងសៀមរាបមានតម្លៃ ចាប់ពី ១៨០០ ទៅជាង ២០០០ ដុល្លារអាមេរិកក្នុងមួយម៉ែត្រការ៉េ”។

លោកបន្ថែមថា “ខេត្តសៀមរាបគឺជាខេត្តទេសចរណ៍វប្បធម៌ដ៏សំខាន់បស់កម្ពុជា ក្រោយពីមានហេដ្ឋារចនាសម្ព័ន្ធល្អហើយនោះ វិស័យអចលនទ្រព្យបែបសណ្ឋាគារ ផ្ទះសំណាក់ និងបឹងហ្គាឡូជាដើម កាន់តែមានការរីកចំរើន ដើម្បីស្វាគមន៍ភ្ញៀវទេសចរណ៍ជាតិ និងអន្តរជាតិ”។

លោក ឡុង គឹមសួគ៌ អគ្គនាយកក្រុមហ៊ុន Century21 Advance បានឱ្យដឹងដែរថា ជាធម្មតា នៅពេលមានការអភិវឌ្ឍន៍គឺមានការរីកចំរើនលើវិស័យអចលនទ្រព្យ ជាមួយគ្នានេះ ការអភិវឌ្ឍន៍ហេដ្ឋារចនាសម្ព័ន្ធនៅក្នុងក្រុងសៀមរាបដែលបានដាក់ចេញកាលពីពេលថ្មីៗនេះ នឹងជួយជំរុញឱ្យវិស័យអចលនទ្រព្យនៅក្នុងក្រុងទាំងមូលកាន់តែមានការរីកចំរើនបន្ថែមទៀត។

លោកបន្តថា បន្ទាប់ពីអភិវឌ្ឍហេដ្ឋារចនាសម្ព័ន្ធរួចរាល់នឹងធ្វើឱ្យតម្លៃដីធ្លីនឹងកើនឡើង តែយ៉ាងណា គ្រាន់តែមានការផ្សាយផ្សាយពីផែនការអភិវឌ្ឍន៍នៅក្នុងក្រុងបច្ចុប្បន្ននេះ វាធ្វើឱ្យតម្លៃដីធ្លី ឬវិស័យអចលនទ្រព្យផ្សេងទៀតមានការកើនឡើងរួចទៅហើយ។

លោកបញ្ជាក់ថា “តម្លៃវិស័យអចលនទ្រព្យនឹងបន្តកើនឡើងកាន់តែខ្លាំងបន្ថែមទៀតនាពេលខាងមុខ ព្រោះថា រដ្ឋាភិបាលមិនមែនអភិឌ្ឍន៍ហេដ្ឋារចនាសម្ព័ន្ធប៉ុណ្ណោះ ព្រមទាំងដាក់ចេញផែនការមេអភិវឌ្ឍន៍វិស័យទេសចរណ៍នៅក្នុងខេត្តសៀមរាបផងដែរដើម្បីបង្កើនចំណូលដល់ពលរដ្ឋ នៅមូលដ្ឋាន និងជាតិ”។

រាជរដ្ឋាភិបាលកម្ពុជាកាលពីពេលថ្មីៗនេះ ចេញសេចក្ដីសម្រេចបង្កើតគណៈកម្មការអន្ដរក្រសួង ដើម្បីសិក្សា និងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវថ្នល ចំនួន៣៨ខ្សែ ក្រោមកញ្ចប់ថវិកាជាតិចន្លោះពី ១០០ ទៅ១៥០លានដុល្លារអាមេរិក នៅក្រុងសៀមរាប ខេត្តសៀមរាប។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងកិច្ចប្រជុំគណៈរដ្ឋមន្ត្រី កាលពីថ្ងៃទី៤ ខែកញ្ញា ឆ្នាំ២០២០កន្លងមកនេះ បានប្រកាសទម្លាក់កញ្ចប់ថវិកាជាតិចន្លោះពី ១០០ ទៅ១៥០លានដុល្លារអាមេរិក ដើម្បីសាងសង់ និងកែលម្អផ្លូវចំនួន ៣៨ខ្សែ នៅទីរួមខេត្តសៀមរាប។

សម្តេចតេជោបានមានប្រសាសន៍ថា “ការសម្រេចសាងសង់ផ្លូវទាំង៣៨ខ្សែនៅទីរួមខេត្តសៀមរាបនេះ មិនត្រឹមតែជាការធ្វើឲ្យប្រសើរឡើងនូវប្រព័ន្ធ ហេដ្ឋារចនាសម្ព័ន្ធ ក្នុងក្រុងសៀមរាប ដែលជាទីក្រុងទេសចរណ៍ដ៏ល្បាញល្បីរបស់កម្ពុជាប៉ុណ្ណោះទេ តែក៏ជាការរួមចំណែកផ្តល់ការងារជូនប្រជាពលរដ្ឋ ក្នុងកំឡុងពេលជួបវិបត្តិកូវីដ១៩នេះផងដែរ”៕

បច្ចុប្បន្នភាពៈ រដ្ឋាភិបាលអនុញ្ញាតឱ្យក្រុមហ៊ុនអាកាសចរណ៍ចំនួន ៥ ភ្ជាប់ជើងហោះនៅកម្ពុជា

ដោយៈ ប៊ី

ភ្នំពេញៈ ក្រុមហ៊ុនអាកាសចរណ៍ចំនួន៥ ដែលប្រតិបត្តិការជើងហោះហើរពីប្រទេ​សហ្វីលីពីន ឥណ្ឌូនេស៊ី និងម៉ាឡេស៊ីទៅកាន់ប្រទេសចិន ត្រូវបានអនុញ្ញាតឱ្យផ្លាស់ប្តូរជើងហោះហើរនៅក្រកម្ពុជា និងបំពេញប្រេងឥន្ធនៈ។

លោកស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានថ្លែងប្រាប់គេទំព័រPropertyarea.asia ថា ការបើកឱ្យមានការផ្លាស់ប្តូរជើងហោះហើរនៅកម្ពុជាសម្រាប់ក្រុមហ៊ុនទាំង៥នេះ នឹងជួយបង្កើនសកម្មភាពហោះហើរបន្ថែម ខណៈភាគច្រើន អ្នកដំណើរតាមជើងហោះហើរជាអ្នកធ្វើការ និងអ្នកធុរកិច្ច។

លោកបានថ្លែងថា “ការបើកឱ្យមានការផ្លាស់ប្តូរជើងហោះហើរ គឺដើម្បីជួយឱ្យក្រុមហ៊ុនអាកាសចរណ៍ និងព្រលានយន្តហោះរបស់យើងមានសកម្ម ដូច្នេះបានជាយើងអនុ​ញ្ញាតឱ្យការចុះចត តែយើងត្រូវដាក់វិធានការតឹងតែង ដើម្បីត្រួតពិនិត្យបញ្ហាសុខភាពសាធារណ”។

លោកបានបន្តថា ស្ថានភាពជើងហោះហើរបច្ចុប្បន្ន នៅតែមានស្ថានភាពដដែល ដោយសារយើងមានវិធានការតឹងតែង។ យើងសង្ឃឹមថា ដំណើរជើងហោះហើរនឹងចាប់ ផ្តើមមានបណ្តើរៗឡើងវិញ ហើយចប្ចុប្បន្នសឹង្ហបុរីបានពាក្យមកកម្ពុជា ដើម្បីភ្ជាប់ជើងហោះហើរនៅខែកញ្ញានេះ ហើយបន្ទាប់ពីវាយតម្លៃការហោះហើរ គាត់ខាតបង់ច្រើន ប៉ុន្តែគាត់បើកជើងហោះហើរបែប Chartered Flight នៅពេលណាមានអ្នកដំណើរទើបគាត់បើកការហោះហើរ។

យោងតាមលិខិតចុះនៅថ្ងៃទី៧ ខែកញ្ញា របស់រដ្ឋលេខាធិការអាកាសចរណ៍ស៊ីវិល ក្រុមហ៊ុនទាំងនោះរួមមាន ក្រុមហ៊ុនCambodia Angkor Air ក្រុមហ៊ុន Cambodia Airways ក្រុមហ៊ុន Lanmei Airlines ក្រុមហ៊ុន JC (Cambodia) International Airlines និងក្រុមហ៊ុន Sky Angkor Airlines។

លិខិតបានឱ្យដឹងថា ក្រុមហ៊ុនអាកាចរណ៍នានា មិនត្រូវអនុញ្ញាតឱ្យអ្នកដំណើរចេញព្រលាន និងចូលមកប្រទេសកម្ពុជាឡើយ។លិខិតដដែលបានឱ្យដឹងថា “ក្រុមហ៊ុនត្រូវឱ្យអ្នកបម្រើ តាមជើងហោះហើរទាំងអស់ពិនិត្យ និងតេស្តរកជំងឺCOVID-19 ដោយអនុវត្តវិធានការណ៍បង្ការរបស់ក្រសួងសុខាភិបាល”។

កាលពីខែមុនរដ្ឋាភិបាល បានចេញសេចក្តីថ្លែងការណ៍ជាផ្លូវការមួយ ដោយប្រកា​សផ្អាកជាបណ្តោះអាសន្ន នូវជើងហោះហើរពីប្រទេសហ្វីលីពីន ដែលមានប្រសិទ្ធិភាពចាប់ពីថ្ងៃទី១៣ ខែសីហាបន្ទាប់ពីជនជាតិចិន១៣នាក់ ត្រូវបានធ្វើតេស្តិ៍វិជ្ជមានសម្រាប់យន្តហោះអាយឌីអាយ១៩ បន្ទាប់ពីបានហោះហើរពីប្រទេសហ្វីលីពីន។

កាលពីដើមខែសីហា រដ្ឋាភិបាលក៏បានហាមឃាត់ជាបណ្តោះអាសន្ន នូវរាល់ជើងហោះហើរពីប្រទេសម៉ាឡេស៊ី និងឥណ្ឌូនេស៊ី ក្នុងគោលបំណងទប់ស្កាត់ការរីករាលដាលនៃជំងឺរាតត្បាតដល់សាធារណជន៕

សម្តេចតេជោៈកម្ពុជា-ឥណ្ឌាមានកិច្ចសហប្រតិបត្តិការស្ទើតែគ្រប់វិស័យ ដើម្បីជំរុញកំណើនសេដ្ឋកិច្ច

ដោយវុត្ថា

ភ្នំពេញៈ សម្ដេចតេជោហ៊ុន សែន ប្រមុខនៃរាជរដ្ឋាភិបាលកម្ពុជា បានមានប្រសា​សន៍ថាកម្ពុជានិងឥណ្ឌាមានកិច្ចសហប្រតិបត្តិការស្ទើតែគ្រប់វិស័យទៅហើយហើយវិស័យនីមួយៗសុទ្ធតែវិស័យសំខាន់ៗក្នុងការជំរុញកំណើនសេដ្ឋកិច្ចនិងលើកកម្ពស់ទំនាក់ទំនងរវាងប្រទេសទាំងពីរ។

សម្តេចតេជោ ហ៊ុន សែន នៅក្នុងជំនួបពិភាក្សាការងារជាមួយលោកជំទាវManika Jain ឯកអគ្គរដ្ឋទូតឥណ្ឌាប្រចាំនៅកម្ពុជា ដែលចប់អាណត្តិបេសកកម្មការទូតនៅថ្ងៃទី ១១ ខែកញ្ញា ឆ្នាំ ២០២០នេះ ឱ្យដឹងថា កម្ពុជា–ឥណ្ឌាគប្បីណាលើកកម្ពស់អនុស្សារណៈដែលយើងបានចុះហត្ថលេខារួចមកឱ្យទៅជាកិច្ចព្រមព្រៀងហើយកិច្ចព្រមព្រៀងដែលបានចុះជាមួយគ្នាគប្បីណាជំរុញការអនុវត្តដើម្បីឈានឆ្ពោះទៅការជោគជ័យលើរាល់កិច្ចព្រមព្រៀងដែលបានចុះហត្ថលេខាហើយនោះ។

សម្តេតេជោថា “អ្វីដែលយើងបានចុះហត្ថលេខា យើងគប្បីណាពិនិត្យមើលបន្ថែមទៀត ក្នុងការពង្រឹងតួនាទី សហប្រតិបត្តិការរវាងប្រទេសទាំងពីរបន្ថែមទៀត ដើម្បីទៅពង្រីកវិសាលភាពទំនាក់ទំនងកិច្ចសហប្រតិបត្តិការរវាងប្រទេស និងប្រទេសឲ្យកាន់តែរឹងមាំថែមមួយកម្រិតទៀត”។

លោកជំទាវManika Jain ឯកអគ្គរដ្ឋទូតឥណ្ឌាប្រចាំនៅកម្ពុជា ដែលចប់អាណត្តិបេ​សកកម្មការទូតបានថ្លែងថា កម្ពុជាបានគ្រប់គ្រងការរាតត្បាតជំងឺកូវីដ១៩ បានយ៉ាងល្អប្រសើរ ដែលរហូតមកដល់ថ្ងៃនេះអ្នកជំងឺកូវីដ១៩នៅកម្ពុជា បានជាសះស្បើយទាំងស្រុង ។

លោកជំទាវបានបន្តថា  លើសពីនេះទៅទៀត ក៏មានការធ្វើដំណើរមកប្រទេសកម្ពុជារបស់រដ្ឋមន្ត្រីក្រសួងពាណិជ្ជកម្មឥណ្ឌា រដ្ឋមន្ត្រីការពារជាតិឥណ្ឌាផងដែរ ដែលសកម្ម​ភាពទាំងអស់នេះ ធ្វើឱ្យទំនាក់ទំនងរវាងប្រទេសទាំងពីរកាន់តែរឹងមាំ និងកិច្ចសហប្រតិ​បត្តិការរវាងប្រទេសទាំងពីរកាន់តែរីកដុះដាលប្រសើរឡើងជាលំដាប់។

លោកជំទាវបន្តទៀតថា ក្នុងដំណើរទស្សនកិច្ចនីមួយៗ មានការចុះហត្ថលេខាលើអនុស្សារណៈ កិច្ចព្រមព្រៀងលើការអភិវឌ្ឍគម្រោងផ្សេងៗផងដែរ ដែលជំរុញទំនាក់ទំនងនៃប្រទេសទាំងពីរអោយកាន់តែល្អបន្ថែមទៀត។

លោកជំទាវបានបន្ថែមថា ជាសាក្ខីភាពទំហំពាណិជ្ជកម្ម នៃប្រទេសទាំងពីរបានកើនឡើងជាលំដាប់ ក្នុងន័យនេះដែរលោកជំទាវ ក៏បានគោរពជម្រាបជូនសម្ដេចតេជោថា តាមអ្វីដែលលោកជំទាវបានកត់សម្គាល់ គឺក្នុងរយៈពេលជាង២ឆ្នាំកន្លះនេះ កម្ពុជា និងឥណ្ឌាបានធ្វើសហប្រតិបត្តិការរវាងគ្នា និងគ្នាស្ទើរតែគ្រប់វិស័យទាំងអស់៕

គំរោងខុនដូតម្លៃ៧០លានដុល្លាររបស់ជប៉ុនបានចាប់ផ្តើមលក់ដំណាក់កាលទី២

ដោយគង់ ម៉ាលីន

ភ្នំពេញៈលំនៅឋានបែបសហកម្មសិទ្ឋអារ៉ាខាវ៉ា (Arakawa Residence) លំនៅឋានស្តង់ដាជប៉ុនទី១នៅកម្ពុជា ដែលមានទីតាំងនៅកណ្ដាលក្រុង និងមានតម្លៃសមរម្យ បានប្រកាសចាប់ផ្តើមបើកលក់ដំណាក់ទី២ហើយ។

គំរោងខុនដូដំណាក់ទី១របស់Arakawa ដែលបានប្រកាសបើកលក់ចំនួន១,៦៨០យូនីត កាលពីចុងឆ្នាំ២០១៩ ត្រូវបានអតិថិជនគាំទ្រយ៉ាងពេញទំហឹង និងបានទិញអស់មុន ផែនការកំណត់ ហើយដំណាក់កាលទី២នេះ មានចំនួនតែ១,២៨០ យូនីតប៉ុណ្ណោះ។

លំនៅឋានអារ៉ាខាវ៉ា (Arakawa Residence) ដែលមានម្ចាស់ភាគហ៊ុនធំជា ជនជាតិជប៉ុន បានចំណាយទុនវិនិយោគប្រមាណ៧០លានដុល្លារ ដើម្បី សាងសង់លំនៅឋានបែបប្រណិត មានគុណភាពខ្ពស់ មានសុវត្ថិភាព ផ្តល់ ភាពងាយស្រួល និងមានបរិស្ថានល្អសម្រាប់ពលរដ្ឋខ្មែរដែលមានចំណូល ទាបនិងមធ្យម ហើយមានបំណងចង់រស់នៅផ្ទះបែបស៊ីវីល័យ ថ្លៃថ្នូរនៅ កណ្ដាលក្រុងភ្នំពេញ។

លោក អាឡិច យ៉ាស៊ូម៉ូតូ (Alex Yasumoto) សហស្ថាបនិកក្រុមហ៊ុនអារ៉ា ខាវ៉ា បានថ្លែងថា “លំនៅឋានបែបខុនដូនេះ ត្រូវបានសាងសង់ឡើងក្នុងគោលបំណង ឲ្យប្រជាជនកម្ពុជា ដែលជាសិស្ស និស្សិត គូស្វាមីភរិយាថ្មី និងបងប្អូនប្រជាពលរដ្ឋក្រីក្រ បើទោះជាពួកគាត់មានចំណូល ទាបនិងមធ្យមក៏ដោយក៏អាចទិញលំនៅឋាន ខុនដូររបស់អារ៉ាខាវ៉ាបាន និងបានទទួលបទពិសោធន៍ជាម្ចាស់កម្មសិទ្ធិ និងរស់នៅសមរម្យ ក្នុងខុនដូរទំនើប កណ្ដាលទីក្រុងភ្នំពេញ”។

ជាមួយគ្នានេះលោកអៀង សុធារ៉ា សហស្ថាបនិកក្រុមហ៊ុនអារ៉ាខាវ៉ាបានថ្លែងថាយើងខិតខំធ្វើយ៉ាងណា ដើម្បីបង្កើតលំនៅឋានមួយដ៏សមរម្យ ប្រកបដោយគុណភាព សុវត្ថិភាព សោភ័ណភាព ផាសុកភាព គុណធម៌ និងបង្កើតឲ្យមានទម្លាប់រស់នៅ ក្នុងអគាររួម និងការថែទាំរួម”។

លោកសុធារ៉ា បានបញ្ជាក់បន្ថែមថា “អតិថិជនដែលទិញយូនីតក្នុងលំនៅឋានអារ៉ាខារ៉ា នឹងទទួលបានបណ្ណកម្មសិទ្ធិតកូនតចៅ”។

Arakawa Residence ជាក្រុមហ៊ុនទី១នៅកម្ពុជា ដែលប្រើទុនវិនិយោគរបស់ក្រុមហ៊ុនក្នុងការសាងសង់ទាំងស្រុង ដោយមិនប្រើថវិការរបស់អតិថិជន យកមកសាងសង់ ហើយក៏ជាក្រុមហ៊ុនដំបូងគេនៅកម្ពុជា ដែលអតិថិជនអាចទិញ ដោយពុំចាំបាច់បង់ប្រាក់កក់ ហើយអាចបង់រំលស់ដោយមិន មានការប្រាក់ពោលគឺអាចបង់ប្រាក់ប្រចាំខែចាប់ពី២៩៧ដុល្លារឡើងទៅ។

Arakawa Residence សាងសង់លើផ្ទៃដីជាង១.៣ហិចតា មានសំណង់ អគារសរុបចំនួន១៦ និងមានកម្ពស់២១ជាន់ស្មើៗគ្នា។

គំរោងនេះបានផ្តោតលើបរិស្ថានធម្មជាតិ ដោយផ្ទះទាំងអស់បែរមុខទៅទិសខាងជើង និងខាងត្បូង ដើម្បីងាយស្រួលក្នុងការស្រូបយកពន្លឺ និងខ្យល់អាកាសគ្រប់រដូវកាល និង បញ្ចៀសកម្ដៅដែលជួយសន្សំសំចៃ ដល់ការប្រើប្រាស់ម៉ាស៊ីនត្រជាក់ និងអគ្គិសនី។

គម្រោងArakawa Residence ត្រូវបានរចនាឡើងសម្រាប់ពលរដ្ឋខ្មែរ ដែលមានសមាជិកគ្រួសារតិច ចង់បានលំនៅឋានប្រណិត មានបរិកាសល្អ តម្លៃសមរម្យ ស្ថិតនៅជាប់ផ្សារទឹកថ្លា ជាប់មន្ទីរពេទ្យអន្តរជាតិ ជិតសាលារៀន និងសាកលវិទ្យាល័យនានា និងនៅក្បែរផ្សារទំនើប ងាយស្រួលក្នុងការធ្វើ ដំណើរឬរកការងារធ្វើ។ ពលរដ្ឋដែលមានចំណូលចាប់ពី៦០០ដុល្លារឡើង ទៅអាចទិញបានផ្ទះមួយ ជាប្រភេទស្ទូឌីយោ ឬផ្ទះមានពីរបន្ទប់៕

រដ្ឋបាលរាជធានីភ្នំពេញកំពុងគិតគូរដាក់ឱ្យដំណើរការឡើងវិញនូវរថយន្តក្រុងសាធារណៈជាថ្មី

ដោយវុត្ថា

ភ្នំពេញ៖ រដ្ឋបាលរាជធានីភ្នំពេញ បាននឹងកំពុងគិតគូរដាក់ឱ្យដំណើរការឡើងវិញនូវរថយន្តក្រុងសេវាសាធារណៈ (City Bus) នាពេលខាងមុខនេះ បន្ទាប់ពីត្រូវបានផ្អាកជាបណ្តោះអាសន្ន ដោយព្រួយបារម្ភពីការចម្លងនូវនូវជំងឺ Covid-19។

លោកម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានប្រាប់គេហទំព័រ Propertyarea.asia នៅថ្ងៃទី  ១១ ខែកញ្ញា ឆ្នាំ ២០២០នេះឱ្យដឹងថា បន្ទាប់ពីក្រសួងអប់រំយុវជន និងកីឡាដាក់ឱ្យមានការដំណើរការ សាលារៀនមួយចំនួនឡើងវិញ នាកន្លងមកថ្មីៗនេះ រដ្ឋបាលរាជធានីភ្នំពេញក៏កំពុងគិតគូរ ដាក់ឱ្យដំណើរឡើងវិញនូវរថយន្តក្រុងសេវាសាធារណៈផងដែរ។

លោកថ្លែងថា “រដ្ឋបាលរាជធានីភ្នំពេញកំពុងគិតបញ្ហានេះ តែមិនទាន់មានការកំណត់ពេលវេលាជាក់លាក់នៅឡើយទេ”។

យោងតាមសេចក្តីជំដំណឹងរបស់រដ្ឋបាលរាជធានីភ្នំពេញ កាលពីថ្ងៃទី២៦ ខែមីនា ឆ្នាំ២០២០ បានឱ្យដឹងថា រដ្ឋបាលរាជធានីភ្នំពេញសម្រេចផ្អាក ការផ្តល់សេវារថយន្តក្រុង (City Bus) និងសេវាកាណូត (Taxi Boat) ជាបណ្តោះអាសន្ន ចាប់ពីថ្ងៃទី២៦ ខែមីនា ឆ្នាំ២០២០ រហូតដល់ស្ថានការណ៍នៃមេរោគកូវីដ ១៩ (Covid-19) បានធូរស្បើយ។

រដ្ឋបាលរាជធានីភ្នំពេញបានបញ្ជាក់ថា បច្ចុប្បន្នមេរោគកូវីដ ១៩ កំពុងរាតត្បាតនៅទូទាំងពិភពលោក ហើយនៅកម្ពុជា ជាពិសេសនៅរាជធានីភ្នំពេញ ក្រសួងសុខាភិបាលបានរកឃើញមានអ្នកផ្ទុកមេរោគកូវីដ១៩មួយចំនួន ហើយរាជរដ្ឋាភិបាលក៏បានចាត់វិធា នការទប់ស្កាត់ការចម្លង និងការរីករាលដាល នៃមេរោគកូវីដ១៩នេះផងដែរ។

រដ្ឋបាលរាជធានីភ្នំពេញបន្ថែមថា ដូចនេះ ដើម្បីរួមចំណែកជាមួយរាជរដ្ឋាភិបាល និងក្រសួងសុខាភិបាលក្នុងការទប់ស្កាត់ការចម្លង និងការរីករាលដាលមេរោគកូវីដ ១៩ នៅរាជធានីភ្នំពេញ រដ្ឋបាលរាជធានីភ្ននំពេញ សម្រេចផ្អាកការផ្តល់សេវារថយន្តក្រុង (City Bus) និងសេវាកាណូត (Taxi Boat) ជាបណ្តោះអាសន្នចាប់ពីថ្ងៃទី២៦ ខែមីនា ឆ្នាំ២០២០ រហូតដល់ស្ថានការណ៍នៃមេរោគកូវីដ ១៩ (Covid-19) បានធូរស្បើយ៕

ក្រុមហ៊ុនយក្សPrinceគ្រោងកសាងទីក្រុងថ្មីមួយនៅលើកោះតាគៀវ ខេត្តព្រះសីហនុ

ដោយៈ ស៊ីវ ម៉េង

ភ្នំពេញ៖ ក្រុមហ៊ុនអចលនទ្រព្យយក្ស Prince Real Estate Group កំពុងរៀបចំផែនការកសាងទីក្រុងថ្មីមូយ នៅលើកោះតាគៀវ ខេត្តព្រះសីហនុ ដែលកោះនេះស្ថិតនៅចម្ងាយប្រមាណ១គីឡូម៉ែត្រពីតំបន់ឧទ្យានជាតតិរាម។

ថ្នាក់ដឹកនាំក្រុមហ៊ុនលំដាប់យក្សនេះ គ្រោងពង្រីកទុនវិនិយោគរហូតដល់២០ពាន់លានដុល្លារអាមេរិក ក្នុងរយៈពេល១០ឆ្នាំខាងមុខ ខណៈបច្ចុប្បន្ន ក្រុមហ៊ុននេះបានបោះទុនវិនិយោគនៅកម្ពុជា លើគម្រោងអចលនទ្រព្យជាង៤ពាន់លាន ដុល្លារអាមេរិករួចហើយ។ 

កោះតាគៀវមានទំហំសរុប៦,៧គីឡួម៉ែត្រក្រឡា មានកំពស់ពីនីវូទឹកសមុទ្រ៤,៤គីឡូម៉ែត្រ វាជាកោះធំមួយក្នុងចំណោមកោះជាច្រើននៅក្រុងព្រះសីហនុ។ កោះនេះមានចម្ងាយប្រមាណ១គីឡូម៉ែត្រពីឧទ្យានជជាតិរាម។

គេហទំព័រPropertyarea.asia មិនអាចទាក់ទងលោកលី មីនដើម្បីអាចបញ្ជាក់ព៌តមានលំអិតថា គំរោងនេះនឹងចំណាយទុនប៉ុន្មានរយលានដុល្លារ និងចាប់ ផ្តើមសាងសង់នៅពេលណានៅឡើយទេ។

ប៉ុន្តែយោងតាមប្រភពជាន់ខ្ពស់ ពីមន្រ្តីរដ្ឋាភិបាលបានឲ្យដឹងថា ក្រុមហ៊ុនPrince Real Estate Groupបានទទួលសិទ្ឋសម្បទានវិនិយោគគំរោងនេះ នៅលើកោះតាគៀវពីរដ្ឋាភិបាលរួចហើយ។

បុគ្គលិកផ្នែកលក់ជាន់ខ្ពស់ ដែលកំពុងលក់គម្រោងPrinceជាច្រើន នៅក្រុងព្រះសីហនុបានបង្ហើបឲ្យដឹងផងដែរថា ក្រុមហ៊ុនPrinceពិតជាកំពុងរៀបចំផែនការ ដើម្បីអភិវឌ្ឈន៍គំរោងថ្មីនៅកោះតាគៀវ ឲ្យក្លាយជាមជ្ឈមណ្ឌលពាណិជ្ជកម្ម តំបន់លំហែរកាយលំដាប់ពិភពលោកនៅពេលខាងមុខនេះពិតប្រាកដមែន។

លោកបន្តថា “តាមអ្វីខ្ញុំដឹងគម្រោងនេះធំណាស់ និងមានសណ្ឋានជាទីក្រុងវិស្សមកាលដ៏ទាក់ទាញមួយសំរាប់តំបន់ និងពិភពលោក”។

លោកលី មីន ថ្លែងនៅក្នុងសន្និសីទកាសែតមួយ បន្ទាប់ពីចុះហត្ថលេខា ជាមួយក្រុមហ៊ុនបី ក្នុងការបើកដំណើរការហាងនៅក្នុងPrince Plaza International កាលពីដើមឆ្នាំមុនថា ក្រុមហ៊ុនព្រីនស៍រៀលអ៊ីស្ទេត នឹងឈរលំដាប់កំពូល ជាក្រុមហ៊ុនអន្តរជាតិវិនិយោគនៅក្នុងប្រទេសកម្ពុជា  ដោយបានវិនិយោគនៅគម្រោងអចលនទ្រ​ព្យធំៗជាច្រើ​ន​នៅកម្ពុជា។

ជាក់ស្ដែងគម្រោងព្រីនស៍ផ្លាហ្សានៅបណ្ដោយផ្លូវព្រះនរោត្តមគម្រោងព្រីនស៍ផ្លាហ្សាអ៊ីនធើណេតសិនណលនៅតាមបណ្ដោយផ្លូវសហព័ន្ធរុស្ស៊ីនិងគម្រោងមួយចំនួនទៀតនៅក្នុងខេត្តព្រះសីហនុជាដើម។

លោកបន្តថា “ចាប់តាំងពីយើងបានមកវិនិយោគនៅក្នុងប្រទេសកម្ពុជា យើងបានបោះទុនវិនិយោគសរុប ជាង៤ពាន់លានដុល្លារអាមេរិកមកហើយ ហើយយើងនឹងបន្ថែមទុនតាមតែអាចធ្វើបាន”។

ដោយមើលឃើញពីសក្ដានុពលទាំងនេះហើយ ក្រុមហ៊ុននឹងបន្ថែមទុនវិនិយោគឲ្យបាន២០ពាន់លានដុល្លារអាមេរិក នៅក្នុងរយៈពេល១០ឆ្នាំខាងមុខទៀត ដោយក្រុមហ៊ុនបានរៀបចំនូវគម្រោងរបស់ខ្លួនរួចស្រេចហើយ ក្នុងនោះខេត្តព្រះសីហនុ  ភ្នំពេញ និងសៀមរាប គឺជាទីតាំងអាទិភាពរបស់ខ្លួន ក្នុងបណ្ដាក់ទុនវិនិយោគបន្ថែម៕

តើការទិញដីឡូតិ៍ប្រភេទលំនៅឋានទុកចោលជាប់ពន្ធដែរទេ?

ដោយវុត្ថា

ភ្នំពេញៈ ឆ្លើយតបទៅនឹងចម្ងល់របស់ពលរដ្ឋ ដែលបានទិញដីឡូតិ៍ប្រភេទលំនៅឋានទុកចោល ដោយមិនបានរស់នៅ ឬមិនមានការអភិវឌ្ឍន៍ដែលកំពុងកើតមាន នៅក្នុងប្រទេសកម្ពុជា ត្រូវបានមន្ត្រីជាន់ខ្ពស់នៃអគ្គនាយកដ្ឋានពន្ធដារកម្ពុជាអះអាងថា  បើជាប្រភេទដីដែលជាប់ពន្ធ ត្រូវតែប្រកាសបង់ពន្ធ តែបើមិនជាប់ពន្ធ គឺមិនត្រូវបង់នោះទេ។

លោករស់ សារ៉ាក់ ប្រធានការិយាល័យពន្ធអចលនទ្រព្យកម្ពុជា នៃអគ្គនាយកដ្ឋារ  នៅក្នុងកម្មវិធីឆ្លើយសំនួររបស់ពលរដ្ឋស្តីពី “ពន្ធដារកម្ពុជា” កាលពីម្សិលមិញនេះបានពន្យល់ថា ចំពោះការទិញដីឡូត៍ប្រភេទ លំនៅឋានទុកចោលនេះ អាចនឹងជាប់ពន្ធក្នុងកម្មវត្ថុទៅលើដីមិនប្រើប្រាស់  ដែលម្ចាស់ដីដែលទិញហើយមិនមានការអភិវឌ្ឍន៍ ឬការបង្កើ​តកម្លាំងសេដ្ឋកិច្ច។

លោកពន្យល់ថា “រដ្ឋាភិបាលប្រមូលពន្ធលើដីមិនបានប្រើប្រាស់ គឺដើម្បីជំរុញឱ្យម្ចាស់ដីទាំងអស់ ធ្វើការអភិវឌ្ឍន៍ដើម្បីបង្កើនសេដ្ឋកិច្ច និងពលកម្មដល់ពលរដ្ឋ។ ជាពិសេ​សការទិញដីប្រភេទលំនៅឋាននេះ ក៏ជាកម្មវត្ថុនៃការជាប់ពន្ធផងដែរ បើសិនជាតម្លៃអលនទ្រព្យទាំងនោះលើស១០០លានរៀល”។

យោតាមច្បាប់ពន្ធដារកម្ពុជាបង្ហាញថា ពន្ធនេះកំណត់លើដីដែលគ្មានសំណង់ និងដីដែលមានសំណង់បោះបង់ ស្ថិតក្នុងទីក្រុងនានា និងក្នុងតំបន់ទាំង ឡាយដែលកំណត់ដោយគណៈកម្មការវាយតម្លៃដីមិនបានប្រើប្រាស់។ពន្ធដីធ្លីលើដីមិនបានប្រើប្រាស់ត្រូវបង់ដោយកម្មសិទ្ធិករ។

មូលដ្ឋានកំណត់ពន្ធ គឺជាថ្លៃដីគិតតាមថ្លៃទីផ្សារតាមទីក្រុង និងតាមតំបន់នីមួយៗដែលវាយតម្លៃទៅតាមតម្លៃគិត ក្នុងមួយម៉ែត្រក្រឡាកំណត់ ដោយគណៈកម្មការវាយតម្លៃដីមិនបានប្រើប្រាស់យ៉ាងយឺតបំផុត នៅថ្ងៃទី៣០ ខែមិថុនា នៃឆ្នាំប្រមូលពន្ធ។

ពន្ធនេះត្រូវកំណត់តាមអត្រា២%លើមូលដ្ឋានកំណត់ពន្ធដែលបានចែងក្នុងមាត្រា ៣០។

កម្មសិទ្ធិករនៃដីធ្លីជាប់ពន្ធមានភារកិច្ច ត្រូវគណនាប្រាក់ពន្ធតាមគំរូលិខិតប្រកាសផ្តល់ដោយអង្គការពន្ធ និងត្រូវបង់ យ៉ាងយឺតបំផុតនៅថ្ងៃទី៣០ ខែកញ្ញា នៃឆ្នាំនីមួយៗជូនទៅផ្នែកពន្ធនៅកន្លែង ដែលដីធ្លីជាប់ពន្ធស្ថិតនៅ។ ដីធ្លីជាប់ពន្ធ នីមួយៗត្រូវធ្វើលិខិតប្រកាស១ច្បាប់៕

ADB ផ្តល់កម្ចី១២៧,៨លានដុល្លារ ដើម្បីជួយពង្រីកបណ្តាញបញ្ជូនថាមពលអគ្គិសនីនៅកម្ពុជា

ដោយៈប៊ី

ភ្នំពេញៈ ធនាគារអភិវឌ្ឍន៍អាស៊ី (ADB) បានអនុម័តផ្តល់ប្រាក់កម្ចី១២៧,៨ លានដុល្លារគាំទ្រការកសាងបណ្តាញបញ្ជូន និងអនុស្ថានីយអគ្គិសនី ដើម្បីជួយឱ្យរាជធានីភ្នំពេ​ញ និងខេត្ត៣ ផ្សេងទៀតនៃប្រទេសកម្ពុជា ទទួលបានការផ្គត់ផ្គង់អគ្គិសនីប្រកបដោយ ស្ថេរភាពនិងអាចទុកចិត្តបាន។ នេះបើយោងតាមសេចក្តីប្រកាសព័ត៌មានរបស់ ADB ដែលចេញផ្សាយនៅព្រឹកថ្ងៃ១១ ខែកញ្ញា ឆ្នាំ២០២០។

គម្រោងនេះ ក៏នឹងសាកល្បងប្រព័ន្ធផ្ទុកថាមពល ដើរដោយអាគុយ ខ្នាតធំដំបូងបង្អ​ស់នៅក្នុងប្រទេសកម្ពុជា ដោយប្រើថវិកាចំនួន៦.៧លានដុល្លារ។ ក្នុងនោះរាប់បញ្ចូលទាំង៤,៧ លានដុល្លារ ពីមូលនិធិអាកាសធាតុជាយុទ្ធសាស្ត្រ(Strategic Climate Fund)នៃការពង្រីកការអនុវត្ត កម្មវិធីថាមពល កកើតឡើងវិញនៅក្នុងប្រទេសដែលមានចំណូលទាប និង២លានដុល្លារពីមូលនិធិថាមពលស្អាត(Clean Energy Fund) នៃគម្រោងដៃគូហិរញ្ញប្បទានសម្រាប់ថាមពលស្អាត (Clean Energy Financing Partnership Facility)។ មូលនិធិទាំងពីរត្រូវបានគ្រប់គ្រងដោយធនាគារអភិវឌ្ឍន៍អាស៊ី។

លោកស្រី Sunniya Durrani-Jamal នាយិកាប្រចាំប្រទេសកម្ពុជា របស់ធនាគារអភិវឌ្ឍន៍អាស៊ីមានប្រសាសន៍ថា “គម្រោងបង្កើនប្រព័ន្ធបញ្ជូនចរន្ត រួមជាមួយជំនួយជាបន្ត របស់ធនាគារអភិវឌ្ឍន៍ អាស៊ីដល់ប្រទេសកម្ពុជា ក្នុងការរៀបចំផែនការបណ្តាញថា​មពល បង្ហាញថាការផ្គត់ផ្គង់ថាមពលគ្រប់គ្រាន់អាចទុកចិត្តបាន និងមាននិរន្តរភាពបរិស្ថាន អាចត្រូវបានផ្តល់ជូន ក្នុងតម្លៃសមរម្យ ដើម្បីគាំទ្រដល់ ការអភិវឌ្ឍប្រកបដោយសមធម៌”។

ប្រព័ន្ធផ្ទុកថាមពលដោយអាគុយ នឹងបង្ហាញពីរបៀប ដែលការអភិវឌ្ឍខ្នាតធំនៃការអនុវត្ត បច្ចេកវិទ្យាច្នៃប្រឌិតថ្មី អាចត្រូវបានប្រើ ដើម្បីដំណើរការបណ្តាញអគ្គិសនី ក្នុង ប្រទេសកម្ពុជានាពេលអនាគត និងដើម្បីបង្កើតថាមពលកកើតឡើងវិញបន្ថែមទៀត។

រាជរដ្ឋាភិបាល បានកំណត់ការអភិវឌ្ឍវិស័យថាមពល ជាអាទិភាពរបស់ជាតិ ព្រោះថាការផ្គត់ផ្គង់អគ្គិសនីកាន់តែរឹងមាំ នឹងជួយជំរុញផលិតភាពសេដ្ឋកិច្ច និងគុណភាពជីវិត។ ខណៈពេលដែលកម្ពុជា មានការរីកចម្រើនគួរឱ្យកត់សម្គាល់ ក្នុងការពង្រីកការផលិតថាមពលតម្លៃទាប ក្នុងរយៈពេល១៥ឆ្នាំកន្លងមកហេដ្ឋារចនាសម្ព័ន្ធបញ្ជូនចរន្ត ដែលមានស្រាប់ កំពុងឈានដល់ការប្រើប្រាស់អស់សមត្ថភាព ហើយត្រូវការ ការពង្រីកនិងពង្រឹងបន្ថែម ដើម្បីចៀសវាងការរំខានដល់ការផ្គត់ផ្គង់។

គម្រោងនេះនឹងជួយដល់ អគ្គិសនីកម្ពុជា (EDC) ដែលស្ថាប័នអគ្គិសនីជាតិ របស់ប្រទេសកម្ពុជា ដើម្បីពង្រឹងហេដ្ឋារចនាសម្ព័ន្ធបញ្ជូនចរន្ត តាមរយៈការផ្តល់ហិរញ្ញប្បទាន ដល់ការសាងសង់បណ្តាញ បញ្ជូន១១៥-២៣០ គីឡូវ៉ាត់ ចំនួន ៤ និងអនុស្ថានីយអគ្គិសនីចំនួន ១០ នៅរាជធានីភ្នំពេញ ខេត្តកំពង់ ឆ្នាំង  កំពង់ចាម និងតាកែវ។

គម្រោងផ្ទុកថាមពលដោយអាគុយ សាកល្បង ដែលមានទីតាំងស្ថិតនៅក្បែរឧទ្យា​នថាមពលព្រះអាទិត្យមានកម្លាំង១០០ មេហ្គាវ៉ាត់ ដែលគាំទ្រដោយ ADB នឹងរួមបញ្ចូល នូវការបណ្តុះបណ្តាល បច្ចេកទេសផងដែរ។ រាជរដ្ឋាភិបាលគ្រោង នឹងបង្កើនសមត្ថភាពផលិតចរន្តអគ្គិសនី ថាមពលព្រះអាទិត្យដល់៤១៥ មេហ្គាវ៉ាត់នៅឆ្នាំ ២០២២ ពោលគឺកើនឡើងពី ១៥៥ មេហ្គាវ៉ាត់ក្នុងឆ្នាំ ២០១៩ ។ ប្រព័ន្ធផ្ទុកថាមពលដោយអាគុយ ដែលគាំទ្រដោយគម្រោងនេះ មានសមត្ថភាពសន្សំថាមពលអគ្គិសនី១៦ មេហ្គាវ៉ាត់ម៉ោង និងផ្តល់លទ្ធភាពដើម្បីជួយរួមបញ្ចូល ថាមពលកកើតឡើងវិញ ការបន្ថយការកកស្ទះ ការបញ្ជូនចរន្ត និងធ្វើតុល្យាការនៃការផ្គត់ផ្គង់និងតម្រូវការផងដែរ។

លោកស្រី Daniela Schmidt អ្នកឯកទេសផ្នែកថាមពលអគ្គិសនីរបស់ ADB មានប្រសាសន៍ថា តាមរយៈការផ្តល់ហិរញ្ញប្បទាន និងការកសាងហេដ្ឋារចនាសម្ព័ន្ធបញ្ជូនចន្តចាំបាច់ សម្រាប់ ការផ្គត់ផ្គង់អគ្គិសនី ប្រកបដោយនិរន្តរភាព នឹងជម្រុញផលិតភាពសេដ្ឋកិច្ចរបស់កម្ពុជា សមត្ថភាព ប្រកួតប្រជែង និងការធ្វើពិពិធកម្មនានា បង្កើតការងារ និងគាំទ្រដល់ការងើបឡើងវិញ របស់ប្រទេស ពីវិបត្តិនៃការរាតត្បាតនៃ COVID-19។ គម្រោងនេះនឹងបង្កើតការងារដោយផ្ទាល់ចំនួន១៣០០ នៅក្នុងវិស័យសំណង់ ជាមួយនឹងការផ្តល់ជាប្រយោជន៍ ក្នុងការបង្កើនប្រាក់ចំណូលក្នុងគ្រួសារ។

វាក៏នឹងគាំទ្រ ដល់កិច្ចខិតខំប្រឹងប្រែងរបស់អគ្គិសនីកម្ពុជា(EDC) ក្នុងការលើកកម្ពស់បរិយាប័ន្ន និងសមភាពយេនឌ័រ នៅកន្លែងធ្វើការនិងលើកទឹកចិត្តឱ្យមានការចូលរួមរបស់ស្ត្រីនៅក្នុងវិស័យថាមពល។

ជំងឺរាតត្បាតCOVID-19 គម្រាមកំហែងកាត់បន្ថយកំណើនសេដ្ឋកិច្ច របស់ប្រទេសកម្ពុជា ដែល មានអត្រាជាមធ្យម៧,១% ជារៀងរាល់ឆ្នាំ ពីឆ្នាំ ២០១០ ដល់ឆ្នាំ ២០១៩ ។ សេដ្ឋកិច្ចកម្ពុជា ត្រូវបានព្យាករថា នឹងធ្លាក់ចុះក្នុងរង្វង់ -៥,៥ ភាគរយនៅឆ្នាំ ២០២០ ដែលអាចជំរុញប្រជាពលរដ្ឋប្រមាណ១,៣ លាននាក់បន្ថែមទៀតឱ្យធ្លាក់ចូលក្នុង ភាពក្រីក្រ។ រាជដ្ឋាភិបាល កំពុងអនុវត្តកម្មវិធីជំនួយ ដើម្បីកាត់ បន្ថយផលប៉ះពាល់អវិជ្ជមានផ្នែកសង្គមនិងសេដ្ឋកិច្ច។

ចាប់តាំងពីឆ្នាំ១៩៩៤ មក ធនាគារអភិវឌ្ឍន៍អាស៊ី បានផ្តល់ប្រាក់កម្ចី និងជំនួយឥតសំណងជិត២០០លានដុល្លារ ដល់វិស័យថាមពលរបស់ប្រទេសកម្ពុជា និងផ្តល់ជំនួ​យបច្ចេកទេសប្រមាណ៦លានដុល្លារ។ ថវិការបស់ធនាគារអភិវឌ្ឍន៍អាស៊ី បានផ្តោតលើការពង្រីកបណ្តាញបញ្ជូន និងចែកចាយចរន្ត និងគាំទ្រដល់កំណែទម្រង់ វិស័យអគ្គិសនី ព្រមទាំងការកសាងសមត្ថភាពស្ថាប័ន។ កាលពីឆ្នាំមុន ធនាគារអភិវឌ្ឍន៍អាស៊ីបានផ្តល់ ៧,៦៤ លានដុល្លារ ដើម្បីគាំទ្រដល់ការសាងសង់ឧទ្យានពន្លឺព្រះអាទិត្យ តាមរយៈភាពជាដៃគូរវាងវិស័យសាធារណៈ និងឯកជន រួមជាមួយការបង្កើតផែនទីបង្ហាញផ្លូវ សម្រាប់ការអភិវឌ្ឍ ថាមពលពន្លឺព្រះអាទិត្យផងដែរ។

ធនាគារអភិវឌ្ឍន៍អាស៊ីប្តេជ្ញាថា នឹងសម្រេចបាននូវ វិបុលភាព បរិយាប័ន្ន ភាពធន់និងនិរន្តរភាព ក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង។ បង្កើតឡើងនៅឆ្នាំ១៩៦៦ ធនាគារនេះគ្រប់គ្រងដោយសមាជិ​កចំនួន៦៨ប្រទេស ដែលក្នុងនោះមាន៤៩ប្រទេសមកពីតំបន់នេះ៕