ADB៖ តំបន់អាស៊ីនិងប៉ាស៊ីហ្វិកបានក្លាយជាតំបន់ចូលរួមធំបំផុតដល់GDPរបស់ពិភពលោក

ដោយ៖ ប៊ី

ភ្នំពេញ៖ ធនាគារអភិវឌ្ឍន៍អាស៊ី (ADB) បានបញ្ជាក់ថា តំបន់អាស៊ីនិងប៉ាស៊ីហ្វិក បានក្លាយជាតំបន់ចូលរួមធំបំផុត ដល់ផលិតផលក្នុងស្រុកសរុប (GDP) របស់ពិភពលោក ហើយក៏បានលើកកម្ពស់ជីវភាពប្រជាជនរាប់លាននាក់ចេញពីភាពក្រីក្រ។

ការបញ្ជាក់របស់ ADB បានធ្វើឡើងនៅថ្ងៃទី១០ ខែកញ្ញា ឆ្នាំ២០២០នេះ ក្នុងការចេញផ្សាយរបាយការណ៍ស្ថិតិប្រចាំឆ្នាំចុងក្រោយបង្អស់របស់ខ្លួន សម្រាប់តំបន់អាស៊ី និងប៉ាស៊ីហ្វិក (ដែលរួមមាន សូចនាករ តំបន់សំខាន់ៗក្នុងឆ្នាំ២០២០) និងការធ្វើបច្ចុប្បន្នភាពលើមូលដ្ឋានទិន្នន័យអនឡាញ ដែលជាមូលដ្ឋានទិន្នន័យសូចនាករសំខាន់ៗ។

សូចនាករសំខាន់ៗឆ្នាំ២០២០ បង្ហាញសូចនាករ សេដ្ឋកិច្ច, ហិរញ្ញវត្ថុ, សង្គម, និងបរិស្ថាន ដែលមានបញ្ចូលគោលដៅអភិវឌ្ឍន៍ប្រកបដោយចីរភាព (SDGs) សម្រាប់សមាជិកក្នុងតំបន់ របស់ធនាគារអភិវឌ្ឍន៍ អាស៊ី ចំនួន៤៩ ដែលឆ្លុះបញ្ចាំងពី ឆ្នាំ២០០០ ដល់ឆ្នាំ២០១៩។ ស្ថិតិសំខាន់មួយនៅក្នុងរបាយការណ៍នេះ បង្ហាញពីរបៀបដែល តំបន់អាស៊ី និងប៉ាស៊ីហ្វិក បានក្លាយជាតំបន់ដែលចូលរួមធំបំផុត ដល់ផលិតផលក្នុងស្រុកសរុប (GDP) ពិភពលោកពោលគឺ ៣៤.៩% ក្នុងឆ្នាំ២០១៩ ពី ២៦.៣% ក្នុងឆ្នាំ២០០០។

លោក Yasuyuki Sawada ប្រធានក្រុមអ្នកសេដ្ឋកិច្ចរបស់ADB បានថ្លែងថា “តំបន់អាស៊ីនិងប៉ាស៊ីហ្វិក មានវឌ្ឍនភាពការអភិវឌ្ឍយ៉ាងខ្លាំង ក្នុងរយៈពេលពីរទសវត្សចុងក្រោយនេះ ដោយបានក្លាយ ជាតំបន់ចូលរួមធំបំផុត ដល់ផលិតផលក្នុងស្រុកសរុបរបស់ពិភពលោក ហើយក៏បានលើកកម្ពស់ជីវភាពប្រជាជនរាប់លាននាក់ចេញពីភាពក្រីក្រ។ ទិន្នន័យទាន់ពេលវេលា និងត្រឹមត្រូវអាចឲ្យយើងតាមដានវឌ្ឍនភាពនេះនិងពិនិត្យមើលផ្នែកដែលត្រូវការការកែលំអបន្ថែមទៀត”។

លោកបន្ដថា “ការទទួលបានទិន្នន័យកាន់តែទូលំទូលាយ ជាពិសេស នៅពេលដែលមានជំងឺរាតត្បាត (COVID-19) នឹងបន្តចូលរួមចំណែកដល់ វឌ្ឍនភាព ក្នុងតំបន់លើមាគ៌ាឆ្ពោះ ទៅរកការអភិវឌ្ឍន៍ប្រកបដោយបរិយាប័ន្ន និងចីរភាព។ សូចនាករសំខាន់ៗឆ្នាំ២០២០ រំលេចឥទ្ធិពលដែលកំពុងកើនឡើង នៃតំបន់អាស៊ី និងប៉ាស៊ីហ្វិក ក្នុងការ វិនិយោគ និងពាណិជ្ជកម្មសកល”។

សេដ្ឋកិច្ចតំបន់ទទួលបានជាងមួយភាគបី នៃការវិនិយោគដោយផ្ទាល់ជាសកលសរុប នៅឆ្នាំ២០១៩ ខណៈដែលការនាំចេញពិភពលោក ក្នុងតំបន់កើនឡើងដល់ ៣៦.៥% ក្នុងឆ្នាំ២០១៩ ពី២៨.៤% ក្នុងឆ្នាំ២០០០។ ជាងពាក់កណ្តាលនៃសេដ្ឋកិច្ចក្នុងតំបន់ដែលបានរាយការណ៍ បានបង្ហាញអត្រាកំណើនផលិតផលក្នុងស្រុកសរុប ៤% ឬខ្ពស់ជាងនេះ ក្នុងឆ្នាំ២០១៩។

ទោះយ៉ាងណាក្តី ការកើនឡើងទាំងនេះ ត្រូវបានគំរាមកំហែង ដោយការរីករាលដាលនៃជំងឺ COVID-19 បង្ករឲ្យភាពអត់ការងារធ្វើកើនឡើង ហើយប្រាក់ចំណូលធ្លាក់ចុះដោយសារការបិទដំណើរការនានាបណ្តាលឲ្យមានការកាត់បន្ថយយ៉ាងខ្លាំងនូវប្រតិបត្តិការអាជីវកម្ម និងសកម្មភាពរបស់ប្រជាជនជាទូទៅ។

របាយការណ៍នេះក៏រួមបញ្ចូលទិន្នន័យបន្ថែមពិសេសបង្ហាញពីរបៀបដែលការប៉ាន់ប្រមាណភាពក្រីក្រ អាចត្រូវបានពង្រឹងតាមរយៈការរួមបញ្ចូលការស្ទង់មតិ និងជំរឿនគ្រួសារជាមួយនឹងទិន្នន័យដែលបាន ដកស្រង់ចេញពីរូបភាពផ្កាយរណប។

របាយការណ៍នេះកំណត់នូវការពិចារណាជាក់ស្តែង និងតំរូវការបច្ចេកទេសសម្រាប់វិធីសាស្រ្តថ្មីនៃការធ្វើផែនទីបែងចែកភាពក្រីក្រនេះ ហើយក៏គូសបញ្ជាក់ការកែលម្អចាំបាច់សម្រាប់ការិយាល័យស្ថិតិជាតិ ដើម្បីទាញយកអត្ថប្រយោជន៍ពេញលេញពីការបញ្ចូលប្រភពទិន្នន័យ ប្រកបដោយភាពច្នៃប្រឌិតទៅក្នុងកម្មវិធីការងារធម្មតា។

សូចនាករសំខាន់ៗឆ្នាំ២០២០ ក៏បង្ហាញផងដែរនូវ៖

* ព័ត៌មានថ្មីៗស្តីពីសូចនាករ SDG នៅអាស៊ីនិងប៉ាស៊ីហ្វិក

* និន្នាការតំបន់ និងតារាង ដែលរួមបញ្ចូលសូចនាករលើប្រធានបទចំនួន ៨ រួមមាន ប្រជាជន, សេដ្ឋកិច្ចនិងលទ្ធផល, លុយកាក់ ហិរញ្ញវត្ថុនិងតម្លៃ, សាកលភាវូបនីយកម្ម, ការដឹកជញ្ជូននិងការទំនាក់ទំនង, ថាមពលនិងអគ្គិសនី, បរិស្ថាន, ព្រមទាំងរដ្ឋាភិបាលនិងអភិបាលកិច្ច។

* ការវិភាគថ្មីស្តីពីនិន្នាការនៃការផ្លាស់ប្តូរនៅក្នុងការប្រកួតប្រជែងជាសកលរបស់អាស៊ីក្នុងការផ្គត់ផ្គង់ផលិតផលផ្សេងៗ និងទិន្នន័យថ្មីៗស្តីពីខ្សែសង្វាក់តម្លៃពិភពលោក។

* និង ការធ្វើបច្ចុប្បន្នភាពតារាងប្រទេសនីមួយៗសម្រាប់សមាជិកក្នុងតំបន់ចំនួន៤៩ របស់ ADB។
មូលដ្ឋានទិន្នន័យសូចនាករសំខាន់ៗ ដែលបានចាប់ផ្តើមដំបូងនៅ ខែកញ្ញា ឆ្នាំ២០១៩ ផ្តល់ព័ត៌មានងាយស្រួលយល់ អំពីសូចនាករស្ថិតិជាង ១,១០០ ចាប់ពីឆ្នាំ ២០០០។

ធនាគារអភិវឌ្ឍន៍អាស៊ី ប្តេជ្ញាថានឹងសម្រេចបាននូវ វិបុលភាព, បរិយាប័ន្ន, ភាពធន់, និង និរន្តរភាពសម្រាប់តំបន់អាស៊ីនិងប៉ាស៊ីហ្វិក រួមជាមួយនិង ការខិតខំប្រឹងប្រែង ដើម្បីលុបបំបាត់ភាពក្រីក្រ។ បង្កើតឡើងនៅឆ្នាំ ១៩៦៦ ធនាគារអភិវឌ្ឍន៍អាស៊ីគ្រប់គ្រងដោយសមាជិកចំនួន ៦៨ ប្រទេស ហើយមាន៤៩ប្រទេស មកពីតំបន់នេះ៕

រដ្ឋាភិបាលកម្ពុជា-សិង្ហបុរីគ្រោងបង្កើតមជ្ឈមណ្ឌលភស្តុភារកម្មនៅភ្នំពេញ

ដោយៈ រ៉ាណេត

ភ្នំពេញៈរដ្ឋាភិបាលកម្ពុជាបានសហការជាមួយរដ្ឋមន្ត្រីនៃប្រទេសសិង្ហបុរីក្នុងការអនុវត្តលើគម្រោងអភិវឌ្ឍន៍បង្កើតមជ្ឈមណ្ឌលភស្តុភានៅរាជធានីភ្នំពេញដើម្បីសម្រេចបាននូវផែនការអភិវឌ្ឍន៍ជាតិនិងប្រែក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០និងប្រទេសចំណូលខ្ពស់នៅឆ្នាំ២០៥០។

នៅទីស្ដីការក្រសួងសាធារណៈការ និងដឹកជញ្ជូន លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូមកពីក្រសួង និងស្ថាប័នពាក់ព័ន្ធចូលរួមកិច្ចប្រជុំពិភាក្សាស្ដីពី កិច្ចសហប្រតិបត្តិការរវាងកម្ពុជា និងសិង្ហបុរី ក្នុងការអភិវឌ្ឍ គម្រោងមជ្ឈមណ្ឌលភស្ដុភារកម្មភ្នំពេញ និងចរចាកិច្ចព្រមព្រៀងជាមួយរដ្ឋមន្ត្រីអមខុទ្ធកាល័យនាយករដ្ឋមន្ត្រី និងជារដ្ឋមន្ត្រីទី២ទទួលបន្ទុកការអភិវឌ្ឍនិងហិរញ្ញវត្ថុសិង្ហបុរី ហេដ្ឋរចនាសម្ព័ន្ធអាស៊ី និងក្រុមហ៊ុន YCH។

កិច្ចប្រជុំនេះធ្វើឡើង តាមរយៈសន្និសីទវីដេអូពីចម្ងាយ និងមានគោលបំណងដើម្បីបង្ហាញទិដ្ឋភាពទូទៅអំពីគម្រោងSuperPort+ ដែលឆ្លើយតបនឹងតម្រូវការរបស់មជ្ឈមណ្ឌ​លភស្តុភារកម្មភ្នំពេញ និងពង្រឹងសមត្ថភាពដឹកជញ្ជូន និងខ្សែសង្វាក់ផ្គត់ផ្គង់របស់កម្ពុជា កំណត់លទ្ធផលនិងគោលដៅសំខាន់ៗ ដែលត្រូវសម្រេចឱ្យបាន តាមរយៈការអនុវត្តគម្រោង Phnom Penh SuperPort+ កំណត់ជំហ៊ានបន្តបន្ទាប់ក្នុងការអភិវឌ្ឍ។

លោកទេសរដ្ឋមន្ត្រីបានបង្ហាញថាមជ្ឈមណ្ឌលភស្តុភារកម្មភ្នំពេញនឹងដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចកម្ពុជាឱ្យកាន់តែរីកចម្រើនថែមទៀតដើម្បីសម្រេចឱ្យបាននូវចក្ខុវិស័យរបស់ខ្លួនក្នុងការអភិវឌ្ឍកម្ពុជាទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០និងប្រទេសចំណូលខ្ពស់នៅឆ្នាំ២០៥០។

ជាមួយគ្នានេះ ដើម្បីឱ្យសម្រេចបាននូវផែនការអភិវឌ្ឍន៍ជាតិនេះ រាជរដ្ឋាភិបាលបាននឹងកំពុងធ្វើទំនើបកម្ម ហេដ្ឋារចនាសម្ព័ន្ធដឹកជញ្ជូន និងគ្រោងបង្កើតមជ្ឈមណ្ឌលភស្តុភារកម្មភ្នំពេញ ដើម្បីឆ្លើយតបទៅនឹងចក្ខុវិស័យខាងលើ។ លើសពីនោះទៀតលោក ទេសរដ្ឋមន្ត្រីបានគូសបញ្ជាក់ថា ក្រសួងក៏ដូចជារាជរដ្ឋាភិបាលចង់ឃើញកម្ពុជា ជាទីផ្សារ និងមជ្ឈមណ្ឌលភស្តុភារកម្ម បម្រើឱ្យវិស័យដឹកជញ្ជូនដល់ប្រទេស ក្នុងតំបន់ជាពិសេសប្រទេសថៃ វៀតណាម ឡាវ និងភូមាជាដើម។

មជ្ឈមណ្ឌលភស្តុភារកម្មភ្នំពេញ ត្រូវបានកំណត់ជាផែនការយុទ្ធសាស្ត្រ ទាំងក្នុងផែនការមេភស្តុភារកម្ម និងផែនការមេអន្តរកាលស្ដីពី ការតភ្ជាប់ប្រពន្ធ័ដឹកជញ្ជូនពហុមធ្យោបាយនិងភស្ដុភារកម្ម ដែលផែនការយុទុ្ធសាស្ត្រនេះ បង្ហាញពីការតភ្ជាប់រវាងផ្លូវគោក ផ្លូវដែក ផ្លូវទឹក និងផ្លូវអាកាស សំដៅធានាបាននូវខ្សែសង្វាក់ដឹកជញ្ជូន ប្រកប​ដោយភាពរលូន និងមានប្រសិទ្ធភាព៕

រដ្ឋាភិបាលកម្ពុជាទទួលបានកញ្ចប់ថវិកាពីធនាគារADB ចំនួន៥៧១លានដុល្លារ

ដោយៈ រ៉ាណេត

ភ្នំពេញៈ កម្ពុជាមានឱកាសទទួលបានកញ្ចប់ថវិកា ពីធនាគារអភិវឌ្ឍន៍អាស៊ី ហៅកាត់ ADB ចំនួន៥៧១លានដុល្លារ សម្រាប់អនុវត្តគម្រោងភាពធន់អាកាសធាតុ ខណៈមានការព្យាករណ៍ថា ផលប៉ះពាល់នៃការប្រែប្រួលអាកាសធាតុ នឹងធ្វើឱ្យ GDPនៅកម្ពុជាធ្លាក់ចុះ០,៤ភាគរយនៅត្រឹមឆ្នាំ២០២០នេះ។

ហិរញ្ញប្បទាននេះ បាននិងកំពុងវិនិយោគ លើគម្រោងចំនួន៧សំខាន់ៗមាន ដូចជា ការកសាងសមត្ថភាពដល់ស្រ្តី ឱ្យមានជំនាញវិជ្ជាជីវៈអាចទទួល បានចំណូលទ្រទ្រង់សេដ្ឋកិច្ចគ្រួសារ វិស័យកសិកម្ម ប្រព័ន្ធ ធារាសាស្ត្រ ការអភិវឌ្ឍ ជនបទ វិស័យសុខាភិបាល វិស័យសាធារណការ និងការបង្កើតមុខរបរដល់ស្ត្រី។

រដ្ឋលេខាធិការក្រសួងបរិស្ថាន លោក សាបូ អូហ្សាណូ បានមានប្រសាសន៍នៅថ្ងៃទី១០ ខែកញ្ញា ឆ្នាំ២០២០កន្លងមកថា កម្ពុជានឹងមានសមត្ថភាពកាន់តែប្រសើរឡើង ក្នុងការគ្រប់គ្រងគ្រោះមហន្តរាយ និងកាត់បន្ថយផលប៉ះពាល់ពីការប្រែប្រួលអាកាសធាតុ ដូចជា គ្រោះទឹកជំនន់ គ្រោះរាំងស្ងួត ខ្យល់ព្យុះ សត្វល្អិតចង្រៃ ការកើនឡើងកម្តៅដែលបង្កផលប៉ះពាល់ និងខូចខាតធ្ងន់ធ្ងរដល់សង្គមជាតិ សេដ្ឋកិច្ច និងជីវភាពរស់នៅរបស់ប្រជាពលរដ្ឋ។

រដ្ឋមន្រ្តីក្រសួងកិច្ចការនារី លោកស្រី អ៊ឹង កន្ថាផាវី បានមានប្រសាសន៍ថា ក្រសួងកិច្ចការនារី បានទទួលថវិកាមួយផ្នែកនៃកញ្ចប់ថវិកាពីADBនេះសម្រាប់អនុវត្តលើគម្រោងដែលជួយដល់ស្ត្រីនិងក្រុមងាយរងគ្រោះទទួលបានចំណេះដឹងនិងមានសមត្ថភាពគ្រប់គ្រងជីវភាពពីការប្រែប្រួលអាកាសធាតុ។

លោកស្រីបានបញ្ជាក់ថា “ស្ត្រីត្រូវបានចាត់ទុកជាក្រុមងាយរងគ្រោះជាងគេ ដោយហេតុថា ស្ត្រីនៅតាមជនបទភាគច្រើន ពឹងផ្អែកលើធនធានធម្មជា តិសម្រាប់ជីវភាពរស់នៅ និងមិនចេះនូវជំនាញ ឬវិធីសាស្រ្តក្នុងការសង្គ្រោះជីវិត ក្នុងពេលមានគ្រោះមហន្តរាយ”៕

ការសាងសង់ផ្លូវជាតិលេខ៣ភ្ជាប់ភ្នំពេញ-កំពតសម្រេចបាន៨០ភាគរយហើយ

ដោយៈរ៉ាណេត

កំពតៈ គម្រោងសាងសង់ និងធ្វើឱ្យប្រសើរឡើងផ្លូវជាតិលេខ៣ រហូតមកដល់ពេលនេះ ជាលទ្ធផលសម្រេចបានប្រមាណ៨០ភាគរយហើយ និងកំពុងបន្តសម្រុកសាងសង់សួនច្បារចែកទ្រូងផ្លូវ ដើម្បីបញ្ចប់ទៅតាមគម្រោង និងផែនការដែលបានកំណត់។

រដ្ឋលេខាធិការក្រសួងសាធារណការនិងដឹកជញ្ជូនលោកខាន់ម៉ាណេតបានមានប្រសាសន៍នៅថ្ងៃទី១០ខែកញ្ញាឆ្នាំ២០២០កន្លងមកថាគម្រោងសាងសង់ផ្លូវជាតិលេខ៣សម្រេចបាន៨០ភាគរយហើយហើយពេលនេះក្រុមហ៊ុនកំពុងសាងសង់សួនចែកទ្រូងផ្លូវនិងស្ពានរំលងផ្លូវ។

ផ្លូវជាតិមួយនេះ ត្រូវបានសាងសង់ឡើងតាមបទដ្ឋានអន្តរជាតិ សម្រាប់ល្បឿនអតិបរមា៨០គីឡូម៉ែត្រក្នុងមួយម៉ោង។

លោកខាន់ ម៉ាណេបានបញ្ជាក់ថា “ការសាងសង់សួនច្បារខណ្ឌទ្រូងផ្លូវនេះ មានសារសំខាន់ណាស់ ក្នុងការកាត់បន្ថយការកកស្ទះ និងគ្រោះថ្នាក់ចរាចរណ៍ ព្រមទាំងបានរំលេចនូវសោភណ្ឌភាពដងផ្លូវផងដែរ ហើយតាមលក្ខណៈបច្ចេកទេសការសាងសង់សួនច្បារចែកទ្រូងផ្លូវ គឺត្រូវរក្សាចន្លោះទ្រូងផ្លូវ ត្រង់ចំណុចដែលមានផ្លូវធំឆ្លងកាត់ និងទីតាំងដែលមានការឆ្លងកាត់ច្រើន តែត្រូវរក្សាគម្លាតពីចន្លោះមួយ ទៅចន្លោះមួយទៀតពី១,៥គីឡូម៉ែត្រ ទៅ២គីឡូម៉ែត្រនៅក្រៅទីប្រជុំជន និងចន្លោះពី៤០០ម៉ែត្រ ទៅ៧០០ម៉ែត្រនៅក្នុងទីប្រជុំជន“។

លោកបានសង្កត់ធ្ងន់ថា ការសាងសង់សួនច្បារខណ្ឌទ្រូងផ្លូវ មិនស្របតាមលក្ខណៈបច្ចេកទេស គឺជាបច្ច័យនាំឱ្យល្បឿននៃការបើកបរថយចុះ បង្កការកកស្ទះចរាចរណ៍ និងគ្រោះថ្នាក់ចរាចរណ៍ ដែលបណ្ដាលឱ្យខាតបង់ទ្រព្យសម្បតិ្ត ពិការ ឬបាត់បង់មនុស្សជាទីស្រឡាញ់របស់គ្រួសារ និងងាយធ្លាក់ចូលទៅក្នុងអន្ទាក់នៃភាពក្រីក្រជាដើម។

បច្ចុប្បន្ន ផ្លូវជាតិលេខ៣ ជាពិសេសកំណាត់ផ្លូវពីចោមចៅ ទៅបែកគុស គឺជាភូមិសាស្ត្រមានការអភិវឌ្ឍខ្លាំង បច្ចុប្បន្នកំណាត់ផ្លូវនេះ អមដោយឧស្សាហកម្មរោងចក្រ សហគ្រាសតូចៗ និងមធ្យម ទីផ្សារ សាលារៀន និងវត្តអារាម ធ្វើឱ្យមានចរាចរណ៍មមា​ញឹកជារៀងរាល់ថ្ងៃ។

តាមរយៈកំណើនសេដ្ឋកិច្ច និងកំណើនប្រជាពលរដ្ឋ នៅថ្ងៃអនាគតតំបន់នេះនឹងក្លាយទៅជាទីប្រជុំជនដ៏ធំមួយ ដែលរាជរដ្ឋាភិបាល ត្រូវតែយកចិត្តទុកដាក់សាងសង់ហេដ្ឋារចនាសម្ព័ន្ធផ្លូវថ្នល់ ឱ្យស្របតាមលក្ខណៈបច្ចេកទេស កំណើនយានយន្ត និងកំណើនប្រជាពលរដ្ឋ និងចក្ខុវិស័យរបស់ខ្លួន ជៀសវាងផលវិបាកនានា ដែលអាចកើតមាននៅពេលកំណើនប្រជាពលរដ្ឋកាន់តែកើនឡើងនៅតំបន់នេះ៕

រដ្ឋាភិបាលចំណាយថវិកាជិត៨០លានដុល្លារឧបត្ថម្ភជនក្រីក្រអំឡុងកូវីដ១៩

ដោយ ហ្សូលី

ភ្នំពេញៈ រាជរដ្ឋាភិបាលបានចំណាយថវិកាជិត ៨០ លានដុល្លារ ក្នុងការជួយឧបត្ថម្ភជូនគ្រួសារក្រីក្រ ដែលរងផលប៉ះពាល់ដោយសារជំងឺរាត្បាត Covid-19 ចំនួន៣វគ្គកន្លងមក។

លោកឧបនាយករដ្ឋមន្រ្តីអូន ព័ទ្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ក្នុងឱកាសទទួលជួប សម្តែងការគួរសមជាមួយ លោក Markus Buerli ប្រធានទីភ្នាក់ងារសម្រាប់កិច្ចអភិវឌ្ឍន៍ និងសហប្រតិបត្តិការស្វីស (SDC) ប្រចាំនៅកម្ពុជា កាលពីថ្ងៃទី១០ កញ្ញា ឆ្នាំ ២០២០កន្លងមកនេះ។

លោករដ្ឋមន្រ្តីមានប្រសាសន៍ថា ចាប់តាំងពីដាក់ឱ្យដំណើរការ កម្មវិធីឧបត្ថម្ភសាច់ប្រាក់ ជូនគ្រួសារក្រីក្រ និងងាយរងគ្រោះ ក្នុងអំទ្បុងពេលប្រយុទ្ធនឹងជំងឺកូវីដ–១៩ រហូតមកដល់ត្រឹមថ្ងៃទី៨ ខែកញ្ញា ឆ្នាំ២០២០នេះ រាជរដ្ឋាភិបាលកម្ពុជាបានចំណាយលើការបើកប្រាក់ឧបត្ថម្ភសរុបចំនួនជាង៧៨លានដុល្លារ ជូនដល់គ្រួសារក្រីក្រ និងជនងាយរងគ្រោះទាំងចំនួន៣វគ្គ ក្នុងអំទ្បុងពេលប្រយុទ្ធនឹងជំងឺកូវីដ–១៩។

ឆ្លៀតក្នុងឪកាសនោះ លោក Markus Buerli ប្រធានទីភ្នាក់ងារសម្រាប់កិច្ចអភិវឌ្ឍន៍ និងសហប្រតិបត្តិការស្វីស (SDC) ប្រចាំនៅកម្ពុជា បានកោតសរសើរ អំពីវិធានការប្រកបដោយប្រសិទ្ធិភាព ដែលដាក់ចេញដោយរាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ក្នុងការទប់ស្កាត់ ការរីករាលដាលនៃជំងឺកូវីដ–១៩៕

ការសាងសង់ច្រកទ្វារអន្តរជាតិព្រំដែនកម្ពុជា-វៀតណាម ម៉ឺនជ័យ សម្រេចបានជាង៩០ភាគរយ

ដោយ ៖ រ៉ាណេត

ព្រៃវែង ៖ ដំណើរការនៃការសាងសង់ច្រកទ្វារអន្តរជាតិព្រំដែនកម្ពុជា-វៀតណាម ម៉ឺនជ័យ ស្ថិតនៅស្រុកកំចាយមារ ខេត្តព្រៃវែង ដែលជាប់នឹងច្រកទ្វារតំបន់ព្រំដែន តឺនណា ខេត្តតៃនិញ ប្រទេសវៀតណាម រហូតមកដល់ពេលនេះសម្រេចលទ្ធផលបានជាង៩០ភាគរយ។

អគ្គនាយកនៃអគ្គនាយកដ្ឋាននគរបាលអន្តោប្រវេសន៍ក្រសួងមហាផ្ទៃ លោក គៀត ច័ន្ទថារិទ្ធ នៅក្នុងដំណើរចុះត្រួតពិនិត្យការសាងសង់នៅថ្ងៃទី៩ ខែកញ្ញា ឆ្នាំ២០២០ បានជំរុញដល់ក្រុមហ៊ុនទទួលម៉ៅការសាងសង់អគារច្រកទ្វារព្រំដែនអន្តរជាតិម៉ឺនជ័យ កម្ពុជា-វៀតណាម ពន្លឿននូវការសាងសង់នេះឱ្យឆាប់រួចរាល់ ព្រោះការសម្ពោធដាក់ឱ្យប្រើប្រាស់ជាផ្លូវការនឹងត្រូវធ្វើឡើងនៅក្នុងឆ្នាំ២០២០នេះហើយ។

លោកបានបញ្ជាក់ថា រដ្ឋាភិបាលតាមរយៈក្រសួងមហាផ្ទៃបានសម្រេចដំឡើងកម្រិតច្រកទ្វារព្រំដែន ម៉ឺនជ័យ ទៅជាច្រកទ្វារព្រំដែនអន្ដរជាតិ (កម្ពុជា-វៀតណាម) និងត្រៀមដាក់ឱ្យដំណើរការជាផ្លូវការនាពេលខាងមុខដ៏ខ្លី ដើម្បីបង្កើនពាណិជ្ជកម្មទ្វេភាគីកម្ពុជា-វៀតណាម និង សម្រួលដល់ពលរដ្ឋធ្វើដំណើរឆ្លងកាត់ ព្រមទាំងដឹកជញ្ជូនទំនិញ។

លោក សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ រាជរដ្ឋាភិបាល នៃប្រទេសទាំងពីរ កម្ពុជា-វៀតណាម បានឯកភាពគ្នាដំឡើងច្រកទ្វារព្រំដែន ម៉ឺនជ័យ ទៅជាច្រកទ្វារអន្ដរជាតិ ដើម្បីបង្កើនកិច្ចសហការជាមួយប្រទេសជិតខាង និងសម្រួលដល់ការធ្វើដំណើរ ក៏ដូចជាការធ្វើពាណិជ្ជកម្មរវាងប្រជាជននៃប្រទេសទាំងពីរឱ្យមានភាពល្អប្រសើរលើគ្រប់វិស័យ។

លោកបន្ដថា ដើម្បីធានាដល់ការសម្ពោធច្រកទ្វារព្រំដែន ម៉ឺនជ័យ នាពេលខាងមុខនេះ ក្រសួមហាផ្ទៃ ក៏បានចាត់ឱ្យមន្ត្រីជាន់ខ្ពស់ក្រសួងមហាផ្ទៃ ដឹកនាំគណៈប្រតិភូ ចុះទៅជួបពិភាក្សាការងារជាមួយភាគីវៀតណាមជាច្រើនលើករួចមកហើយផងដែរ៕

បច្ចុប្បន្នភាព៖ ខេត្តកំពតកាន់តែលេចធ្លោក្នុងការទាក់ទាញការវិនិយោគនិងអភិវឌ្ឍលើវិស័យចំនួន ២

ដោយ ហ្សូលី

ភ្នំពេញ៖ ខេត្តកំពតមានលក្ខណៈពិសេសជាច្រើនចំនុច ដែលបណ្តាលឱ្យក្រុមហ៊ុនអន្តរជាតិទាំងក្នុងស្រុកនិងក្រៅស្រុក សម្រេចចិត្តមកបោះទុនវិនិយោគលើវិស័យចំនួន ២ ផ្សេងគ្នា ដែលជាកាតាលិករជម្រុញឱ្យខេត្តកំពតកាន់តែមានភាពរីកចម្រើនពីមួយឆ្នាំទៅមួយឆ្នាំ។

ក្រុមហ៊ុនអន្តរជាតិមួយចំនួនបានបោះទុនជាច្រើនលានដុល្លារក្នុងការអភិវឌ្ឍមជ្ឈមណ្ឌលពាណិជ្ជកម្ម សណ្ឋាគារកម្រិតផ្កាយ៤ អាគារផ្សារទំនើប មណ្ឌលកំសាន្ត ខុនដូរ និងសេវាទេសចរណ៍នៅជាប់មាត់សមុទ្រ។ ការអភិវឌ្ឍទាំងនេះ ជាឱកាសក្នុងការជ្រោមជ្រែងដល់ទីផ្សារអចលនទ្រព្យក្នុងខេត្តទាំងមូល និងចូលរួមបង្កើនសក្តានុពលទេសចរណ៍យ៉ាងខ្លាំងក្លា។

ជាក់ស្តែង វិនិយោគិនចាប់អារម្មណ៍ទៅលើការវិនិយោគក្នុងវិស័យបដីសណ្ឋារកិច្ចធំៗ ជាហេតុបណ្តាលឱ្យខេត្តកំពតទទួលបានគម្រោងអភិវឌ្ឍលើការសាងសង់សណ្ឋាគារ ផ្ទះសំណាក់ បឹងហ្គាឡូ និងផ្ទះលម្ហែកាយ។ ដើម្បីឆ្លើយតបទៅនឹងសក្តានុពលទេសចរណ៍ ភូមិសាស្រ្ត និងតម្រូវការរបស់ប្រជានជនកម្ពុជា រួមទាំងភ្ញៀវទេសចរអន្តរជាតិ ខេត្តកំពតបច្ចុប្បន្នមានគម្រោងបង្កើតរមណីយដ្ឋានកែច្នៃជាច្រើនទីតាំងផងដែរ។

ក្រឡេកទៅវិស័យហេដ្ឋារចនាសម្ព័ន្ធដែលជាបណ្តាញទ្រទ្រង់សេដ្ឋកិច្ច និងសក្តានុពលរបស់ខេត្ត ក៏មានការអភិវឌ្ឍឆាប់រហ័ស និងកំពុងដំណើរការសាងសង់ជាច្រើនគម្រោងដូចជា កំពង់ផែទឹកជ្រៅ គម្រោងអភិវឌ្ឍតំបន់ឆ្នេរ ស្ពានឆ្លងកាត់ កំពង់ផែទេសចរណ៍ជាដើម។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់បានមានប្រសាសន៍ថា គម្រោងអភិវឌ្ឍកំពង់ផែទឹកជ្រៅគឺជាហេដ្ឋារចនាសម្ព័ន្ធយុទ្ធសាស្រ្តដ៏សំខាន់មួយមានគោលដៅតភ្ជាប់ការដឹកជញ្ជូនតាមរបៀងមាត់សមុទ្រក្នុងតំបន់ គឺតភ្ជាប់ពីប្រទេសវៀតណាម ទៅកាន់ប្រទេសថៃ ដោយឆ្លងកាត់ខេត្តចំនួន ៣ របស់កម្ពុជា ក្នុងនោះមានខេត្តកំពត។

កាលពីថ្មីៗនេះ រដ្ឋបាលខេត្តកំពតបានគោរពអនុវត្តតាមគម្រោងនិងផែនការរបស់រាជរដ្ឋាភិបាល ក្នុងការអភិវឌ្ឍខេត្តកំពតឱ្យក្លាយទៅជាតំបន់ទេសចរណ៍ប្រណីតបែបធម្មជាតិ និងរិះរកមធ្យោបាយក្នុងការបង្កើនកំណើនទេសចរឱ្យបាន ២.៥ លាននាក់ នៅឆ្នាំ ២០២៣៕

ខេត្តព្រះសីហនុ មានលទ្ធភាពផលិតអគ្គិសនីបាន ១០០០មេហ្គាវាត់ សម្រាប់ផ្គត់ផ្គង់ក្នុងតំបន់ និងចែកតាមបណ្តាខេត្ត

ដោយ ៖ រ៉ាណេត

ព្រះសីហនុ ៖ នៅក្នុងខេត្តព្រះសីហនុ មានសមត្ថភាពខ្ពស់ក្នុងការផលិតថាមពលអគ្គិសនីសរុបរហូតដល់ប្រមាណ១០០០មេហ្គាវាត់សម្រាប់ផ្គត់ផ្គង់តម្រូវការប្រើប្រាស់នៅទូទាំងខេត្ត និងចែកចាយបន្តទៅតាមបណ្តាខេត្តផ្សេងតាមរយៈអនុស្ថានីយ៍ និងខ្សែបញ្ជូនអគ្គិសនីតង់ស្យុងខ្ពស់។

លោក គួច ចំរើន អភិបាលខេត្តព្រះសីហនុ បានមានប្រសាសន៍នៅក្នុងកិច្ចប្រជុំស្រាយគន្លងខ្សែកាបកប់ដីតង់ស្យុងខ្ពស់ និងខ្សែបណ្តាញបញ្ជូនអាកាសតង់ស្យុងខ្ពស់នៅព្រឹកថ្ងៃទី១០ ខែសីហា ឆ្នាំ២០២០នេះថា បច្ចុប្បន្នខេត្តព្រះសីហនុ មានតម្រូវការប្រើប្រាស់អគ្គិសនីប្រមាណជាង ១០០មេហ្កាវ៉ាត់ តែខេត្តព្រះសីហនុ តែខេត្តផលិតផលថាមពលអគ្គិសនីបាន ១,០០០មេហ្កាវ៉ាត់។

លោកបន្តថា “ភ្លើងដែលនៅសល់ត្រូវបញ្ជូនតាមបណ្តាញខ្សែមេទៅខ្សែបណ្តាញខ្សែជាតិ ទោះបីការអភិវឌ្ឍផ្លូវ ៣៤ខ្សែក្នុងក្រុងព្រះសីហនុ មានផលប៉ះពាល់ដល់អគ្គិសនី យើងបានរួមគ្នាដោះស្រាយប្រកបដោយតម្លាភាព និងទាន់ពេលវេលា “។

លោកបន្តថា “រាជរដ្ឋាភិបាលផ្តល់ថវិកាសាងសង់ហេដ្ឋារចនាសម្ព័ន្ធផ្លូវ ៣៤ខ្សែ ក្នុងក្រុងព្រះសីហនុ ដោយមានការចូលសហការពីអគ្គិសនីកម្ពុជា ធ្វើឱ្យការសាងសង់ប្រព្រឹត្តទៅដោយរលូន ។ រាជរដ្ឋាភិបាលបានកំណត់អាទិភាពក្នុងការអភិវឌ្ឍប្រទេសគឺកត្តាធនធានមនុស្ស ផ្លូវ ទឹក និងភ្លើង ដើម្បីជាការឆ្លើយតបនឹងសេចក្តីត្រូវការនៃការអភិវឌ្ឍជំុរុញកំណើនសេដ្ឋកិច្ចជាតិ ម្យ៉ាងទៀតអគ្គិសនីក៍បានចូលរួមក្នុងការប្រកួតប្រជែងកំណើនសេដ្ឋកិច្ចស្របតាមគោលនយោបាយរបស់រាជរដ្ឋាភិបាលធ្វើឱ្យប្រជាពលរដ្ឋកម្ពុជា ៩០ភាគរយ មានអគ្គិសនីប្រើប្រាស់។ ខេត្តព្រះសីហនុ មានមោទនភាពជាខេត្តផលិតអគ្គិសនីចែកចាយទៅបណ្ដាញមេរបស់អគ្គិសនីកម្ពុជា និងបញ្ជូនទៅកាន់បណ្តាខេត្តមួយចំនួន។

រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា លោក កែវ រតនៈ បានមានប្រសាសន៍ថា ការអភិវឌ្ឍអគ្គិសនីធ្វើឱ្យភ្លើងចុះថ្លៃនៅទូទាំងប្រទេស។ ខេត្តព្រះសីហនុ មានការអភិវឌ្ឍហេដ្ឋារចនាសម្ព័ន្ធផ្លូវថ្នល់ និងអគារធំៗយ៉ាងគំហុកបរិមាណការប្រើប្រាស់អគ្គិសនីមានការកើនឡើង ចំណុចសំខាន់យើងត្រូវធ្វើការដោះស្រាយអគ្គិសនីបម្រើសេចក្តីត្រូវការរបស់ប្រជាពលរដ្ឋ ក៍ដូចជាអ្នកវិនិយោគ ។

ជាមួយគ្នានេះ លោកក៏បានស្នើសុំឱ្យអាជ្ញាធរខេត្តជួយសម្របសម្រួលក្នុងការតបណ្តាញគន្លងខ្សែកាបកប់ដីតង់ស្យុងខ្ពស់ ១១៥គីឡូវ៉ុល និងខ្សែបណ្ដាញបញ្ជូនអាកាសតង់ ស្យុងខ្ពស់ ១១៥គីឡូវ៉ុល នឹង ២៣០គីឡូវ៉ុល ក្នុងក្របខ័ណ្ឌគម្រោងសាងសង់អនុស្ថានីយ៍ និងខ្សែបណ្ដាញបញ្ជូនអគ្គិសនីតង់ស្យុងខ្ពស់ក្នុងក្រុងព្រះសីហនុ ដើម្បីធានាថាប្រជាជន និងក្រុមហ៊ុនវិនិយោគក្នុងខេត្តព្រះសីហនុ មានភ្លើងប្រើប្រាស់គ្រប់គ្រាន់តាមតម្រូវកានៅពេលខាងមុខ ៕

សមាគម IATA ៖ ការដឹកជញ្ជួនវ៉ាក់សាំង COVID-19 នឹងត្រូវការយន្តហោះខ្នាតធំរហូតដល់ទៅ ៨០០០គ្រឿង

ដោយ ៖ ប៊ី

ភ្នំពេញ ៖ ការដឹកជញ្ចូនវ៉ាក់សាំងជំងឺកូវីដ១៩ (COVID-19) ជុំវិញពិភពលោកនឹងក្លាយជាបញ្ហាប្រឈមនៃការដឹកជញ្ជូនធំបំផុត មិនធ្លាប់មានក្នុងប្រវត្តិសាស្ត្រ។ នេះបើយោងតាមលើកឡើងរបស់សមាគមឧស្សាហកម្មអាកាសចរណ៍អន្តរជាតិ ដែលមានមូលដ្ឋាននៅប្រទេសស្វីស។

សមាគមដឹកអ្នកដំណើរតាមអាកាសអន្តរជាតិ (IATA) បានឱ្យដឹងថា យន្ដហោះប៊ូអ៊ីញប្រភេទ 747s ចំនួន ៨០០០ គ្រឿងនឹងត្រូវការជាចាំបាច់។
បច្ចុប្បន្ន ទោះមិនទាន់មានវ៉ាក់សាំង Covid-19 នៅឡើយក្តី ប៉ុន្តែសមាគម IATA បាននិងកំពុងធ្វើការរួចហើយជាមួយក្រុមហ៊ុនអាកាសចរណ៍ អាកាសយានដ្ឋាន អង្គភាពសុខភាពពិភពលោក និងក្រុមហ៊ុនផលិតថ្នាំពេទ្យជាច្រើន ស្តីពីផែនការដឹកជញ្ជួនវ៉ាក់សាំងតាមហោះហើរជាសកល។
កម្មវិធីចែកចាយវ៉ាក់សាំងនេះត្រូវបានសន្មតថានឹងចែកចាយមួយដូសសំរាប់មនុស្សម្នាក់ប៉ុណ្ណោះ ដែលត្រូវការ។

លោក Alexandre de Juniac ប្រធានប្រតិបត្តិរបស់សមាគម IATA មានថ្លែងថា “ការផ្តល់វ៉ាក់សាំង Covid-19 ប្រកបដោយសុវត្ថិភាពនឹងក្លាយជាបេសកកម្មប្រចាំសតវត្សរ៍ សម្រាប់ឧស្សាហកម្មដឹកជញ្ជួនតាមផ្លូវអាកាសពិភពលោក។
ការដឹកជញ្ជួនវ៉ាក់សាំងកាន់តែមានភាពស្មុគស្មាញច្រើន ខណៈពេលដែលក្រុមហ៊ុនអាកាសចរណ៍បានផ្លាស់ប្តូរពីការដឹកជញ្ជួនមនុស្សមកការរដឹកទំនិញ ដោយសារការធ្លាក់ចុះនៃអ្នកដំណើរ។

មិនមែនយន្តហោះទាំងអស់ ដែលសមស្របសម្រាប់ការដឹកជញ្ជួនវ៉ាក់សាំងទេ ព្រោះយន្តហោះត្រូវការកំរិតសីតុណ្ហភាពធម្មតាចន្លោះពី ២ ទៅ ៨ អង្សាសេសម្រាប់ដឹកជញ្ជូនវ៉ាក់សាំង។ វ៉ាក់សាំងខ្លះអាចត្រូវការសីតុណ្ហរហូតត្រជាក់កក ហើយយន្តហោះភាគច្រើនមិនមានសមត្ថភាព ដើម្បីឆ្លើយតបនឹងការដឹកជញ្ជួននេះទេ។

ប្រធានផ្នែកដឹកទំនិញនៃឧស្សាហកម្មនេះ លោក Glyn Hughes បានបន្ថែមថា “យើងដឹងពីដំណើរការនៃការដឹកជញ្ជួននេះយ៉ាងច្បាស់”។ អ្វីដែលយើងត្រូវធ្វើគឺបង្កើនទំហំដឹកជញ្ជួនទៅតាមទំហំដែលត្រូវការ”។
លោកបានបន្ថែមថា ការហោះហើរទៅកាន់តំបន់មួយចំនួននៃពិភពលោករួមទាំងតំបន់មួយចំនួននៃអាស៊ីអាគ្នេយ៍នឹងជាបញ្ហាសំខាន់ ព្រោះពួកគេខ្វះសមត្ថភាពផលិតវ៉ាក់សាំង៕ BBC

ជើងហោះហើរត្រង់ជប៉ុន-កម្ពុជាបន្តផ្អាករហូតដល់ថ្ងៃទី៣១ ខែតុលា និងរំពឹងចាប់ផ្តើមនៅដើមខែវិច្ឆិកា

ដោយៈ រ៉ាណេត

ភ្នំពេញៈ ស្ថានឯកអគ្គរាជទូតនៃកម្ពុជា ប្រចាំប្រទេសជប៉ុនបានឱ្យដឹងថា ដោយសា​រការរីករាលដាលជំងឺCovid-19 ក្រុមហ៊ុនអាកាសចរណ៍របស់ប្រទេសជប៉ុន  ALL NIPPON AIRWAYS (ANA) បានប្រកាសផ្អាកជើងហោះហើរណារីតា–ភ្នំពេញ–ណារីតា រហូតដល់ថ្ងៃទី៣១ ខែតុលា ឆ្នាំ២០២០ ខាងមុខនេះ។

យោងតាមសេចក្តីជូនដំណឹងរបស់ស្ថានឯកអគ្គរាជទូតកម្ពុជា ប្រចាំនៅប្រទេសជប៉ុននៅថ្ងៃទី១០ ខែកញ្ញា ឆ្នាំ២០២០នេះបានឱ្យដឹងថា ដោយសារតែបញ្ហាដែលកើតមានឡើងក្រោមវិបត្តិនៃជំងឺ Covid-19 ក្រុមហ៊ុនអាកាសចរណ៍ជប៉ុន ANA បានសម្រេចបន្តការពន្យាពេលហោះហើររបស់ខ្លួនមកកាន់កម្ពុជារហូតដល់ថ្ងៃទី៣១ខែតុលាហើយអាចនឹងចាប់ដំណើរការឡើងវិញនៅក្នុងដំណាក់កាលសមស្របនៅដើមខែវិច្ចិការឆ្នាំ២០២០ខាងមុខនេះ។

កាលពីពេលកន្លងទៅថ្មីៗនេះ សមាគមធុរកិច្ចជប៉ុននៅកម្ពុជា និងសភាពាណិជ្ជកម្មកម្ពុជា គ្រោងចុះញ្ញាតិរួមគ្នា ដើម្បីស្នើសុំឱ្យក្រុមហ៊ុនអាកាសចរណ៍ ANA របស់ជប៉ុន បន្តប្រតិបត្តិការនៃជើងហោះហើរត្រង់មកកាន់កម្ពុជា ដែលនឹងផ្ដល់អត្ថប្រយោជន៍យ៉ាងខ្លាំង ដល់វិស័យទេសចរណ៍ វប្បធម៌ និងធុរកិច្ចរវាងប្រទេសកម្ពុជា–ជប៉ុន។ ជាមួយគ្នានេះ សមាគមធុរកិច្ចជប៉ុននៅកម្ពុជា ក៏បានចេញសេចក្តីអំពាវនាវ និងសំណូមពរសុំការគាំទ្រ ពីសំណាក់សមាជិករបស់ខ្លួននៅកម្ពុជា ស្នើដល់ក្រុមហ៊ុនអាកាសចរណ៍ជប៉ុន ANA បន្តធ្វើការហោះហើរត្រង់រវាងភ្នំពេញ –ណារីតាឡើងវិញ មុនពេលកំណត់ បន្ទាប់ពីក្រុមហ៊ុនមួយនេះ បានប្រកាសផ្អាកដំណើរការ។

ក្រុមហ៊ុន ANA បានប្រកាសកាត់បន្ថយទិសដៅហោះហើរ មួយចំនួនដែលមិនសូវទទួលបានផលចំណេញ និងគុណប្រយោជន៍ ដែលតម្រូវការមានការថយចុះយ៉ាងគំហុក ដោយសារការជះឥទ្ធិពលអវិជ្ជមាននៃជំងឺប្រភេទថ្មី COVID-19 ។

នាយករដ្ឋមន្ត្រីជប៉ុន លោកស៊ីនហ្សូ អាបេធ្លាប់បានឱ្យដឹងថា ជប៉ុនមានបំណងចាប់ផ្តើមពិភាក្សាលើការបន្តអាជីវកម្មជើងហោះហើរ ជាមួយប្រទេសចំនួន១០បន្ថែមទៀត រួមមាន ចិនដីគោក កូរ៉េខាងត្បូង នតៃវ៉ាន់ សិង្ហបុរី ម៉ាឡេស៊ី ព្រុយណេ មីយ៉ាន់ម៉ា កម្ពុជា ឡាវ និងម៉ុងហ្គោលីផងដែរ។

ប្រទេសជប៉ុន បានបើកកិច្ចពិភាក្សាស្រដៀងគ្នានេះរួចហើយ ជាមួយប្រទេសវៀតណាម ថៃ អូស្រ្តាលី និងនូវែលហ្សេឡង់ ហើយបានទទួលអ្នកដំណើរជាអ្នកជំនួញជនជាតិជប៉ុនប្រមាណ៤៤០នាក់នៅចុងខែមិថុនា។ ផែនការរបស់ទីក្រុងតូក្យូ សម្រាប់ការបើកឡើងវិញ នូវការធ្វើដំណើរតាមជើងហោះហើរទៅកាន់ប្រទេស ដែលមានទំនាក់ទំនងយ៉ាងល្អជាមួយប្រទេសជប៉ុន ហើយមានការគ្រប់គ្រងបានល្អ ចំពោះការរីករាលដាលនៃជំងឺ Covid-19 ៕