វិស័យសំណង់នៅកម្ពុជានឹងមានសន្ទុះកំណើនឡើងវិញនៅឆ្នាំ ២០២១

ដោយ ហ្សូលី

ភ្នំេពញ៖ វិស័យសំណង់នៅក្នុងប្រទេសកម្ពុជាបានរីកលូតលាស់និងមានកំណើនច្រើនពីមួយឆ្នាំទៅមួយឆ្នាំ។ នៅពេលដែលជំងឺ Covid-19 ចូលមករាតត្បាត ពិភពលោកកំពុងជួបប្រទះនឹងភាពជាប់គាំងលើវិស័យសំណង់។ ជាក់ស្តែងកម្ពុជា មិនបានជាប់គាំងនោះទេ គ្រាន់តែមានកំណើនតិចជាងមុន ដោយសារមូលហេតុ ២ យ៉ាង។

មុនពេលការរីករាលដាលនៃ COVID-19 ឧស្សាហកម្មសំណង់កម្ពុជាគឺជាផ្នែកមួយនៃកត្តាជំរុញកំណើនសេដ្ឋកិច្ចនៅក្នុងប្រទេសដោយបានកត់សំគាល់កំណើនជាមធ្យម ១៨,១% ក្នុងកំឡុងឆ្នាំ ២០១៤-២០១៩ ។ នេះជាលទ្ធផលនៃការកើនឡើងនៃការវិនិយោគបរទេសនៅក្នុងប្រទេសដោយមានសមាជិកអាស៊ានដូចជាថៃ និងវៀតណាមនិងជាមិត្តដែកថែបជាមួយប្រទេសចិន ដែលធ្វើឱ្យកម្ពុជាក្លាយជាគោលដៅទាក់ទាញ។

បើយោងតាម GlobalData (ទិន្នន័យសកលលោក) រំពឹងថា ឧស្សាហកម្មសំណង់នឹងទទួលបានសន្ទុះកំណើនវិញនៅឆ្នាំ ២០២១ ដោយសន្មតថា វិធានការណ៍ទប់ស្កាត់ Covid-19 ទទួលបានជោគជ័យនៅទូទាំងពិភពលោក។ នេះត្រូវបានជំរុញដោយការកើនឡើងនៃការវិនិយោគបរទេស និងការវិនិយោគរបស់រដ្ឋាភិបាលកម្ពុជាក្នុងវិស័យហេដ្ឋារចនាសម្ព័ន្ធ និងថាមពលក្រោម“ ផែនការយុទ្ធសាស្ត្រអភិវឌ្ឍន៍ជាតិឆ្នាំ ២០១៩-២០២៣” ។

ការរីកចម្រើនផ្នែកសំណង់នៅកម្ពុជាត្រូវបានជំរុញដោយការវិនិយោគបរទេសនិងក្រុមហ៊ុនចិន ជាពិសេសនៅក្នុងវិស័យហេដ្ឋារចនាសម្ព័ន្ធ ទីផ្សារអចលនទ្រព្យ ពាណិជ្ជកម្មអចលនទ្រព្យ និងលំនៅដ្ឋាន។

យោងតាមទិន្នន័យពីក្រសួងដែនដី នគរូបនីយកម្ម និងសំណង់ បានឱ្យដឹងថា វិស័យសំណង់របស់កម្ពុជាបានទាក់ទាញទុនវិនិយោគបានជាង ២,៥០០ លានដុល្លារ ពី ១០០០ គម្រោងដែលទទួលបានការអនុញ្ញាតសាងសង់ពីក្រសួងនៅក្នុងត្រីមាសទី១ នៃឆ្នាំនេះ។

ថ្វីបើមើលឃើញពីការធ្លាក់ចុះនៃសេដ្ឋកិច្ចនៅក្នុងប្រទេសកម្ពុជា GlobalData (ទិន្នន័យសកលលោក) រំពឹងថា កំណើនឧស្សាហកម្មសំណង់នឹងធ្លាក់ចុះមកត្រឹម ៤,៩% ក្នុងឆ្នាំ ២០២០ បើប្រៀបធៀបទៅនឹងការព្យាករណ៍ពីមុនដែលមាន ៩,៧%។ ក្រៅពីការធ្លាក់ចុះនេះ សម្រាប់តម្រូវការលំនៅដ្ឋានថ្មី វិបត្តិគ្មានការងារធ្វើ និងការផ្តល់មូលនិធិនានានៅក្នុងឧស្សាហកម្មសំណង់ត្រូវបានបង្កើតឡើងដោយសេចក្តីប្រកាសរបស់រដ្ឋាភិបាលដែលបានបញ្ឈប់ការចាប់ផ្តើមគម្រោងសាងសង់ថ្មីនៅក្នុងកម្ពុជានៅឆ្នាំ ២០២០។ នេះអាចជាការប៉ះពាល់ដល់ទីផ្សារសំណង់ហេដ្ឋារចនាសម្ព័ន្ធ និងថាមពលក្នុងកម្ពុជា។

ចំណែកឯផ្នែកសំណង់ពាណិជ្ជកម្មត្រូវបានរំពឹងថា នឹងទទួលរងផលប៉ះពាល់ខ្លាំងបំផុត ជាពិសេសផ្នែកកម្សាន្ត បដិសណ្ឋារកិច្ចនិងកន្លែងកម្សាន្ត។ នេះដោយសារតែការចូលរួមចំណែកខ្ពស់នៃវិស័យទេសចរណ៍ដល់សេដ្ឋកិច្ច៕

ប្រជាពលរដ្ឋខេត្តកណ្តាលទទួលបានចំណូល ៤២លានដុល្លារ ក្នុងមួយឆ្នាំ ពីវិស័យឧស្សាហកម្ម

ដោយវុត្ថា

ភ្នំពេញ៖ រហូតមកដល់បច្ចុប្បន្ននេះ ខេត្តកណ្តាលមាន រោងចក្រផលិតសម្លៀកបំពាក់ និងស្បែកជើង ចំនួន ១៦៤ រោងចក្រ អាចស្រូបទាញកម្លាំងពលកម្មបានចំនួន ១៤៣,៧៦១ នាក់ (ស្រី ១២២,២៨៥ នាក់) ហើយកម្មករ-និយោជិត ជាមធ្យមទទួលបានប្រាក់ចំណូល ២៤៦ ដុល្លារ ក្នុង១ខែ, កម្មករ-និយោជិតសរុបទទួលបានប្រាក់ចំណូល ៣៥,៣៦៥,២០៦ ដុល្លារ ក្នុង១ខែ និង ក្នុងមួយឆ្នាំអាចទទួលបានប្រាក់ចំណូលសរុប ៤២៤,៣៨២,៤៧៨ ដុល្លារ។

នេះបើតាមការលើកឡើងរបស់លោក គង់ សោភ័ណ អភិបាលខេត្តកណ្តាល នៅក្នុងសន្នីសីទសារព័ត៌មាន ស្តីពីវឌ្ឍនភាព និងទិសដៅបន្តរបស់ខេត្តកណ្តាល នៅថ្ងៃទី ២៨ ខែឧសភា ឆ្នាំ ២០២០ ដែលរៀបចំដោយអង្គភាពអ្នកនាំពាក្យនៃរាជរដ្ឋាភិបាលកម្ពុជា នៅទីស្តីការគណៈរដ្ឋមន្ត្រី ។

លោកបន្តថា ក្នុងចំណោមរោងចក្រប្រមាណចំនួន ១៦៤ មានតែរោងចក្រប្រមាណ ៤៤ រោងចក្រ ដែលត្រូវបានព្យួរប៉ុណ្ណោះ ក្នុងអំឡុងពេលនៃវិបត្តិនៃជំងឺCovid-19 ហើយក្នុងនោះមានកាទាំងការព្យួទាំងស្រុង និងដោយផ្នែក តែយ៉ាងណាក៏ដោយវាមិនប៉ះពាល់ខ្លាំងនោះទេលើវិស័យនេះ ។

លោកបន្ថែមថា ខេត្តកណ្តាលគឺជាខេត្តដែលមានសក្តានុពលខ្ពស់លើវិស័យសេដ្ឋកិច្ច ដោយក្នុងនោះ សម្រាប់ទិន្នផលសរុបរបស់ខេត្តនាឆ្នាំ២០១៨ មានប្រមាណ ៩.៤៩៤.៧៩៥ លានរៀល (ប្រាំបួនពាន់បួនរយកៅសិបបួនប៊ីលាន ប្រាំពីររយកៅសិបប្រាំលានរៀល) គិតជាដុល្លារប្រហែល ២ ៣៤៤ លានដុល្លារ(ពីរពាន់បីរយសែសិបបួនលាន)។

លោកបន្ថែមទៀតថា សម្រាប់ទិន្នផលសរុបប្រចាំឆ្នាំក្នុងមនុស្សម្នាក់ មាន ១ ៨៦០ដុល្លារ កើនឡើង ៧.៧០% ធៀបនឹងឆ្នាំ២០១៧ ។ សក្តានុពលនេះ ហើយបានធ្វើឱ្យអត្រាភាពក្រីក្រថយចុះមកត្រឹម ៥.៣៣% នាឆ្នាំ២០១៨ ដែលស្របទៅនឹងគោលដៅកាត់បន្ថយភាពក្រីក្រ របស់រាជរដ្ឋាភិបាល ឲ្យស្ថិតនៅក្នុងអត្រាទាបជាង ១០%។
លោកបញ្ជាក់ថា ខេត្តកណ្តាលមានកំណើនសេដ្ឋកិច្ចទទួលបានពីវិស័យកសិកម្មមាន ៣៨,៧% ឧស្សាហកម្ម ៣៤,២% សេវាកម្ម ២៧,១% ៕

ប្រទេសនៅអាស៊ីត្រូវកាត់បន្ថយការពឹងផ្អែកលើវិស័យតែមួយដោយត្រូវធ្វើពិពិធកម្មសេដ្ឋកិច្ចខ្លួន

ដោយ ប៊ី

ភ្នំពេញៈ ការកាត់បន្ថយការពឹងផ្អែកលើវិស័យតែមួយ ដូចជាវិស័យទេសចរណ៍ នឹងជាផ្នែកមួយ នៃកិច្ចខិតខំប្រឹងប្រែងធ្វើពិពិធកម្មសេដ្ឋកិច្ចរបស់អាស៊ី បន្ទាប់ពីការរីករាលដាលនៃជំងឺ Covid-19 ។ នេះបើយោងតាមរបាយការណ៍របស់ក្រុមហ៊ុន Fitch Solutions កាលពីថ្ងៃទី ២៦ ខែ ឧសភា។

របាយការណ៍នេះបានឱ្យដឹងថា ដោយមានការរីករាលដាល នៃជំងឺរាតត្បាតសកល ដែលបានបង្ហាញពីភាពងាយរងគ្រោះដល់សង្វាក់ផ្គត់ផ្គង់ និងសេដ្ឋកិច្ច ប្រទេសនានានឹងព្យាយាមកាត់បន្ថយភាពងាយរងគ្រោះទាំងនោះ តាមរយៈការធ្វើពិពិធកម្ម។

ទិដ្ឋភាពមួយគឺវិស័យទេសចរណ៍ ដែលជាវិស័យសំខាន់មួយនៅក្នុងប្រទេសថៃ កម្ពុជា និងហ្វីលីពីន ជាពិសេសដែលវិស័យនេះ មានចំនួនច្រើនជាងមួយភាគប្រាំនៃផលិតផលក្នុងស្រុកសរុបជាមធ្យម និងជាង៣០ភាគរយនៅក្នុងប្រទេសកម្ពុជា។

បើទោះបីជាជំងឺនេះត្រូវបានស្ថិតនៅក្រោមគ្រប់គ្រង វិស័យទេសចរណ៍ត្រូវបានរំពឹងថា នឹងចំណាយពេលជាច្រើនត្រីមាស ដើម្បីត្រលប់ទៅរកសភាពដើមវិញ។ “ដូច្នេះ សេដ្ឋកិច្ច ដែលពឹងផ្អែកខ្លាំងលើវិស័យទេសចរណ៍ ក្នុងការបង្កើតការងារ និងប្រាក់ចំណូលនឹងត្រូវទាមទារជាបន្ទាន់ ដើម្បីធ្វើពិពិធកម្មទីផ្សាររបស់ពួកគេ” ។

របាយការណ៍ដដែលបានបន្តថា ខណៈដែលប្រទេសកម្ពុជា និងហ្វីលីពីនមិនទាន់បានជំរុញការពិពិធកម្មដ៏ខ្លាំងខ្លានៅឡើយ ប្រទេសថៃកំពុងតែឈានទៅមុខ ក្នុងការធ្វើពិពិធកម្ម។

របាយការណ៍បានកត់ថា ការអភិវឌ្ឍន៍គម្រោងហេដ្ឋារចនាសម្ព័ន្ធ និងការផ្លាស់ប្តូរសំខាន់ៗ ដើម្បីទាក់ទាញការវិនិយោគផ្ទាល់ ពីបរទេសសម្រាប់ឧស្សាហកម្ម ដូចជាអេឡិចត្រូ រថយន្ត និងគីមីឥន្ធនៈ។

រោគរាតត្បាតនេះ ក៏ទំនងជាបង្កើននិន្នាការ ដែលមានស្រាប់នៃការផ្លាស់ប្តូរប្រតិបត្តិការផលិតកម្មមួយចំនួនចេញពីប្រទេសចិន។ ការបិទប្រទេសចិនបានបង្អាក់ដល់ការផលិតនៅទូទាំងតំបន់ ដែលបង្ហាញពីគ្រោះថ្នាក់នៃសង្វាក់ផ្គត់ផ្គង់។

របាយការណ៍ខាងលើបានឱ្យដឹងថា “យើងរំពឹងថា នឹងមានការជំរុញឱ្យមានការជំរុញឆ្ពោះទៅរកគំរូមជ្ឈមណ្ឌលផលិតកម្ម “ចិនបូកមួយ” ក្នុងរយៈពេលប៉ុន្មានឆ្នាំខាងមុខ ជាពិសេសសម្រាប់ក្រុមហ៊ុន ផលិតសម្រាប់នាំចេញតម្លៃទាប។ ដូច្នោះខ្សែសង្វាក់ផ្គត់ផ្គង់ក្នុងតំបន់នឹងអភិវឌ្ឍ។

នេះទំនងជាបង្កើនថ្លៃដើមប្រតិបត្តិការ ប៉ុន្តែក៏មានន័យ ថាជាឱកាសកំណើនជាក់លាក់សម្រាប់សេដ្ឋកិច្ចអាស៊ី ដែលកំពុងរីកចម្រើនផងដែរ៕

រដ្ឋាភិបាលកម្ពុជាជ្រើសរើសភ្នំចំនួន៩ជាតំបន់បេតិកភ័ណ្ឌធម្មជាតិ

ដោយ ហ្សូលី

ភ្នំពេញៈ រដ្ឋាភិបាលកម្ពុជា បានកំណត់ដីព្រៃជិត៣.៥០០ហិកតា នៅភាគពាយ័ព្យខេត្តបាត់ដំបង និងខេត្តបន្ទាយមានជ័យ ជាតំបន់បេតិកភណ្ឌធម្មជាតិ។

ការកំណត់នេះ គឺក្នុងគោលបំណងដើម្បីការពារជីវចម្រុះ និងប្រព័ន្ធអេកូឡូស៊ីធម្មជាតិនៅកម្ពុជាសម្រាប់មនុស្សជំនាន់ក្រោយ។

យោងតាមអនុក្រឹត្យចំនួនប្រាំបួន ដែលចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចុះបញ្ជីទីតាំងបេតិកភណ្ឌធម្មជាតិ ដែលទើបនឹងបង្កើតថ្មីចំនួន ៣ នៅក្នុងខេត្តបាត់ដំបងគឺ ភ្នំប្រាំពីរមានផ្ទៃដី៣៥៤ហិកតា ភ្នំទៀត្រិង (៧៩,៨ ហិកតា) និងភ្នំគីរីយ៉ង (៩៨៤,៣ ហិកតា) ។

ចំណែកឯភ្នំចំនួន៦ទៀត នៅខេត្តបន្ទាយមានជ័យ ក៏ត្រូវបានចុះបញ្ជីផងដែររួមមាន៖ ភ្នំព្រះ – ភ្នំវែង (១៥០០ ហិកតា) ភ្នំស្វាយ (១៦ ហិកតា) ភ្នំបាក់ (៣៦ ហិកតា) ភ្នំជុនឆេង (១៩ ហិកតា) ភ្នំព្រះនេត្រព្រះ (១៣ ហិកតា) និងភ្នំយាយសំ (៤១៦ ហិកតា) ។

ការកំណត់តំបន់ភ្នំទាំង៩ ជាតំបន់បេតិកភណ្ឌធម្មជាតិនេះ គឺយោងតាមអនុក្រឹត្យព្យាយាមអភិរក្ស និងការពារធនធានធម្មជាតិដ៏សំបូរបែប របស់កម្ពុជានិងជំរុញការអភិវឌ្ឍប្រកបដោយចីរភាព។

អនុក្រឹត្យនេះបានលើកឡើងថា“ វាលើកទឹកចិត្តឱ្យមានការចូលរួម ពីសហគមន៍មូលដ្ឋាន ក៏ដូចជា សាធារណៈជនក្នុងការចូលរួមចំណែក ក្នុងការគ្រប់គ្រងតំបន់បេតិកភណ្ឌធម្មជាតិនិងវប្បធម៌បែបនេះនៅក្នុងតំបន់” ។

លោក នេត្រ ភក្ត្រា អ្នកនាំពាក្យក្រសួងបរិស្ថានមានប្រសាសន៍ថា ក្រសួងនឹងឃ្លាំមើលការអនុវត្តអនុក្រឹត្យ ជាពិសេសការការពារការទន្ទ្រានយកដី និងបទល្មើសព្រៃឈើដទៃទៀត។

លោកថា“ តំបន់ទាំងនោះមិនត្រឹមតែជាកន្លែង សំបូរទៅដោយសត្វព្រៃ និងធនធានធម្មជាតិដ៏ទៃទៀតប៉ុណ្ណោះទេ វាថែមទាំងតំណាងឱ្យបេតិកភណ្ឌប្រវត្តិសាស្ត្រ និងវប្បធម៌ និងសក្តានុពលទេសចរណ៍របស់ប្រទេសផងដែរ” ។

បច្ចុប្បន្ននេះ ក្រសួងកំពុងត្រួតពិនិត្យនិងគ្រប់គ្រងតំបន់អភិរក្ស និងជីវចម្រុះដែលមានចំនួនជាង៦០កន្លែង ដែលគ្របដណ្តប់លើផ្ទៃដីជាង៧,២លានហិកតា ស្មើនឹងប្រមាណ៤១ភាគរយ នៃផ្ទៃដីសរុបនៅក្នុងប្រទេស។ Xinhua

គម្រោងសាងសង់អគារពាណិជ្ជកម្មភ្លោះកម្ពស់ ៣០ជាន់ នៅក្រុងច្បារមន ខេត្តកំពង់ស្ពឺស្ថិតក្នុងភាពមិនច្បាស់លាស់

ដោយៈ រ៉ាណេត

កំពង់ស្ពឺៈ គម្រោងវិនិយោគ និងអភិវឌ្ឍន៍អគារពាណិជ្ជកម្មភ្លោះ ដែលមានកម្ពស់៣០ជាន់ ស្ថិតនៅក្នុងក្រុងច្បារមន ខេត្តកំពង់ស្ពឺ រហូតមកដល់ពេលនេះស្ថិតនៅក្នុងស្ថានភាពមិនច្បាស់លាស់នៅឡើយទេ។

អភិបាលខេត្តកំពង់ស្ពឺលោកវ៉ី សំណាងបញ្ជាក់ប្រាប់ឲ្យដឹងតាមទូរស័ព្ទកាលពីល្ងាចថ្ងៃទី២៧ ឧសភាកន្លងមកថា គំរោងនេះ ស្ថិតនៅក្នុងភាពមិនច្បាស់លាស់នៅឡើយ ខណៈដែលមានក្រុមហ៊ុនជំនាញមួយចំនួន បានធ្វើការសិក្សាលម្អិតទៅលើគម្រោងបានបង្ហើបថា ក្រុងមួយនេះនៅមិនទាន់ស័ក្ដិសម ទទួលយកអាគារពាណិជ្ជកម្មកម្រិតខ្ពស់បែបនេះនៅឡើយ។

លោកបន្តថា “មកទល់នឹងពេលនេះ គម្រោងនៃការសាងសង់អាគារពាណិជ្ជកម្មភ្លោះលើកដំបូង នៅកណ្តាលក្រុងច្បារមន ខេត្តកំពង់ស្ពឺ ស្ថិតនៅក្នុងភាពមិនច្បាស់លាស់នៅឡើយ។លោក្បន្ថែមថា “រហូតមកទល់ពេលនេះ មិនទាន់មានក្រុមហ៊ុនអភិវឌ្ឍន៍ណាមួយបង្ហាញពីមហិច្ឆតាចង់ធ្វើការវិនិយោគនោះដែរ” ។

លោកអភិបាលខេត្តបានបញ្ជាក់ថា “បើនិយាយពីការចង់បាន ក្នុងនាមជាអជ្ញាធរខេត្ត គឺពិតជាចង់បាននូវគ្រប់គម្រោងអភិវឌ្ឍន៍ទាំងអស់នៅទូទាំងខេត្ត ប៉ុន្តែអ្វីដែសំខាន់ត្រង់ថា មានក្រុមហ៊ុនចូលមកបោះទុនវិនិយោគបានកម្រិតណា” ។

លោកបន្តថា សម្រាប់គម្រោងនៃការសាងសង់ អាគារពាណិជ្ជកម្មភ្លោះលើកដំបូងប្រចាំនៅក្នុងក្រុងច្បារមន ក៏ដូចជាខេត្តផងដែរ ធ្លាប់មានក្រុមហ៊ុនមិនតិចជាង៥នោះទេ ចូលមកសិក្សា ប៉ុន្តែជាលទ្ធផលផ្លែផ្កា ដែលបង្ហាញពីការឈានទៅរកការអភិវឌ្ឍនៅមិនទាន់មានតម្រុយនោះទេ ដោយហេតុថា កម្រិតនៃចំនួនសេដ្ឋកិច្ចក្នុងតំបន់ ក៏ដូចជាការធ្វើពាណិជ្ជកម្ម នៅក្នុងខេត្តហាក់មិនទាន់មានតម្រូវការអគារខ្ពស់បែបនេះនោះទេ។

លោក វ៉ី សំណាង បានបញ្ជាក់ទៀតថា ដំបូងឡើងយើងបានលើកពីគម្រោងសាងសង់អាគារកម្ពស់ជាង៣០ជាន់ ប៉ុន្តែបន្ទាប់ពីមានការសិក្សាលម្អិត ក្រុមហ៊ុនជំនាញបានបញ្ជាក់ថា ត្រូវចំណាយទុនច្រើនក្នុងការសាងសង់ ហើយចំណូលដែលទទួលបានពីការអភិវឌ្ឍន៍អាគារគឺមានកម្រិត ដូច្នេះតម្រូវឱ្យមានការកែប្រែ គម្រោងអភិវឌ្ឍន៍សាជាថ្មីជាចាំបាច់។ លោកថា ពេលនេះគម្រោងអភិវឌ្ឍន៍ពាណិជ្ជកម្មភ្លោះ គឺនៅរក្សាដដែល ប៉ុន្តែកំពុងសិក្សាទៅលើកម្ពស់ ដែលបានកាត់មកនៅត្រឹម១៥ជាន់ ដើម្បីតម្រូវទៅតាមស្ថានភាពជាក់ស្ដែងនៃតម្រូវការប្រើប្រាស់ជាក់ស្ដែង ហើយលទ្ធភាពដែលអាចសាងសង់នៅពេលណា នឹងបង្ហាញក្នុងពេលឆាប់ៗខាងមុខនេះ។

អគ្គនាយក និងជាសហស្ថាបនិកគេហទំព័រអចលនទ្រព្យ Proppertyarea.asia លោក យិន លាងគង់ បានមានប្រសាសន៍ថា ក្រុងច្បារមន ខេត្តកំពង់ស្ពឺ នៅពេលបច្ចុប្បន្ននេះ នៅមិនទាន់មានតម្រូវការចាំបាច់ ប្រើប្រាស់អាគារពាណិជ្ជកម្មដែលមានកម្ពស់ខ្ពស់ៗនៅឡើយនោះទេ ដោយហេតុថា កម្រិតនៃការធ្វើពាណិជ្ជកម្ម នៅក្នុងតំបន់នៅមានកម្រិតនៅឡើយ។

លោកបន្តទៀតថា “តម្រូវការនៃការប្រើប្រាស់អាគារពាណិជ្ជកម្មខ្ពស់ៗ កើតមាននៅតំបន់ពាណិជ្ជកម្មកម្រិតខ្ពស់ មិនសូវមានផ្ទៃដីទំនេរច្រើន ហើយតម្លៃដីមានតម្លៃថ្លៃ ប៉ុន្តែសម្រាប់ខេត្តកំពង់ស្ពឺនៅមានផ្ទៃដីទំនេរច្រើន ដូច្នេះតម្រូវការសាងសង់អាគារភ្លោះ ខ្ពស់ៗ សម្រាប់បម្រើដល់តម្រូវការ គឺនៅសល់ពេលយូរទៀត” ។

កំពង់ស្ពឺត្រូវបានជាប់ឈ្មោះថា ជាខេត្តគោលដៅលើការវិនិយោគក្នុងវិស័យឧស្សាហកម្ម ដោយសារមានភាពអំណោយផលលើកត្តាភូមិសាស្ត្រ ជាពិសេសផ្តល់ភាពងាយស្រួលក្នុងការដឹកជញ្ជូនផលិតផលសម្រេច ឬពាក់កណ្តាលសម្រេចឆ្ពោះទៅកាន់កំពង់ផែទឹកជ្រៅក្រុងព្រះសីហនុ សម្រាប់ធ្វើការនាំចេញ។ ជាក់ស្ដែងបច្ចុប្បន្ននេះ នៅក្នុងខេត្តកំពង់ស្ពឺមានរោងចក្រ សហគ្រាសតូចធំ កំពុងដំណើរការសរុបជាង ២៧០ទីតាំង ដែលផ្តល់ឱកាសការងារជូនប្រជាពលរដ្ឋបានជាង១០ម៉ឺនកន្លែង៕

ខេត្តចំនួន៣នៅតាមតំបន់ឆ្នេរកំពុងប្រជែងគ្នារៀបចំឆ្នេរថ្មីដើម្បីស្រូបយកភ្ញៀវទេសចរណ៍

ដោយ វុត្ថា

ភ្នំពេញៈ នៅក្នុងឆ្នាំ២០២០នេះ ខេត្តនៅជាប់ឆ្នេរសមុទ្រកម្ពុជាចំនួន ៣រួមមាន ខេត្តកំពត កែប និងព្រះសីហនុ បាននឹងកំពុងប្រកួតប្រជែងគ្នា ក្នុងការដាក់ផែនការរៀបចំឆ្នេរថ្មី ដើម្បីស្រូបយកភ្ញៀវទេសចរណ៍ជាតិ និងអន្តរជាតិ។

ការកែលំអរនិងរៀបចំឆ្នេរនេះ ធ្វើឡើងស្របតាមតាមការណែនាំរបស់លោក ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និង ជាប្រធានគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គ.អ.ឆ.ក)។

១) ឆ្នេរនៅតំបន់កែបថ្មី នៃខេត្តកំពត

រដ្ឋបាលខេត្តកំពត បានដាក់ចេញផែនការអភិវឌ្ឍឆ្នេរស្អាតថ្មីមួយ ស្ថិតនៅក្នុងតំបន់កែបថ្មី ជាប់មាត់សមុទ្រប្រមាណ៨០ហិកតា ស្ថិតនៅភូមិកែបថ្មី ឃុំបឹងទូក ស្រុកទឹកឈូ ខេត្តកំពត ដើម្បីបង្កើនផលិតផលទេសចរណ៍ ឲ្យកាន់តែសម្បូរបែបសម្រាប់ឱ្យភ្ញៀវទេសចរ អាចទស្សនាកំសាន្ត និងស្នាក់នៅយូរជាងមុន ខណៈកន្លងមក ខេត្តជាប់មាត់សមុទ្រមួយនេះ មិនមានតំបន់ឆ្នេរសម្រាប់ទទួលភ្ញៀវទេសចរនោះទេ។

លោកសយ ស៊ីណុល ប្រធានមន្ទីរទេសចរណ៍ខេត្តកំពតបានមានប្រសាសន៍ឲ្យដឹងថា រដ្ឋបាលខេត្តកំពតនឹងបន្តអភិវឌ្ឍន៍ឆ្នេរថ្មីស្អាត ដើម្បីលើកកម្ពស់វិស័យទេសចរណ៍ ប្រកបដោយចិរភាព និងគុណភាព ដើម្បីទាក់ទាញភ្ញៀវទេសចរឲ្យចូលមកទស្សនាកម្សាន្តច្រើនក្នុងខេត្ត។

លោកឱ្យដឹងបន្តថា “ខេត្តកំពត ជាខេត្តស្ថិតនៅក្នុងតំបន់ឆ្នេរ ប៉ុន្តែពុំមានឆ្នេរខ្សាច់សម្រាប់បំរើសេចក្តីត្រូវការរបស់ប្រជាពលរដ្ឋ និងភ្ញៀវទេសចរនៅឡើយ ដូច្នេះរដ្ឋបាលខេត្តកំពត បានធ្វើការសិក្សារៀបចំបង្កើត នូវរមណីយដ្ឋានឆ្នេរខ្សាច់ថ្មីមួយ ដែលមានទីតាំងស្ថិតនៅក្នុងតំបន់កែបថ្មី នៅខាងលិចខេត្តកំពត ដើម្បីទាក់ទាញភ្ញៀវទេសចរចូលមកទស្សនាក្នុងខេត្តកំពត” ។

២) ខេត្តកែបគ្រោងពង្រីកឆ្នេរកម្សាន្ត២កន្លែងថ្មីបន្ថែមទៀត

រដ្ឋបាលខេត្តកែប គ្រោងពង្រីកឆ្នេរកម្សាន្ត២កន្លែងថ្មីបន្ថែមទៀត ដើម្បីទាក់ទាញភ្ញៀវទេសចរជាតិនិងអន្តរជាតិ ឱ្យមកលេងកម្សាន្តកាន់តែច្រើនថែមទៀត ខណៈខេត្តជាប់មាត់សមុទ្រមួយនេះ មានការអភិវឌ្ឍខ្លាំងលើវិស័យទេសចរណ៍ ហើយមានភ្ញៀវទេសចរជាតិ អន្តរជាតិ ចូលមកទស្សនាលេងកំសាន្តយ៉ាងច្រើនកុះករ។

លោកកែន សត្ថា អភិបាលខេត្តកែប បានឱ្យដឹងថា បច្ចុប្បន្ននេះ ស្ថានភាពភ្ញៀវទេសចរមកកាន់ខេត្តកែប កាន់កើនឡើងពីមួយឆ្នាំទៅមួយឆ្នា អាជ្ញាធរកំពុងសិក្សាបង្កើតតំបន់ឆ្នរ ២កន្លែងបន្ថែមទៀត ដើម្បីបង្វែរភ្ញៀវទេសចរ ទៅលេងកម្សាន្តកន្លែងថ្មីៗទាំងនោះផងដែរ ។

លោកបន្តថា ខេត្តកែបច្ចុប្បន្ននេះ មានឆ្នេរកម្សាន្តប្រវែង៣៥០ម៉ែត្រ ដែលធ្វើឱ្យមានការកកណែន ដូច្នេះ រដ្ឋបាលខេត្តកំពុងតែខិតខំពង្រីក រៀបចំឆ្នេរ២កន្លែងទៀត គឺឆ្នេរខ្សាច់កម្សាន្តជាសារធារណៈ ដែលមានប្រវែងប្រហែលជា៣គីឡូម៉ែត្រ គឺជាឆ្នេរខ្សាច់ធម្មជាតិ។

៣) ខេត្តកំពង់សោមកំពុងរៀបចំឆ្នេរអូត្រេះ២ និងឆ្នេរជំទាវម៉ៅ

រដ្ឋបាលខេត្តព្រះសីហនុ បាននឹងកំពុងរៀបចំសួនកម្សាន្ត ឆ្នេរអូរត្រេះ២ប្រវែង១,៧៤៦ម៉ែត្រ និង ឈូសឆាយរៀបចំឆ្នេរសមុទ្រថ្មីដែលត្រូវបានប្រសិទ្ធិនាម « ឆ្នេរជំទាវម៉ៅ » ប្រវែងប្រមាណ២៧០០ម៉ែត្រ ជាតំបន់ទេសចរណ៍ដ៏ទាក់ទាញមួយទៀត សម្រាប់បម្រើដល់វិស័យទេសចរណ៍ និងសារធារណៈ។

សម្រាប់ទីតាំងឆ្នេរនឹងត្រូវរៀបចំថ្មី ដែលមានទីតាំងស្របនឹងផ្លូវជំទាវម៉ៅ ដែលទើបតែស្ថាបនាថ្មី (ផ្លូវដែលមានដើមឈើនៅចំកណ្តាល ដើមឈើចាំស្នេហ៍) ស្ថិតក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។ «ឆ្នេរជំទាវម៉ៅ » នឹងបង្ហាញសម្រស់ សោភ័ណភាពស្រស់បំព្រង និងជាឆ្នេរសាធារណៈ បម្រើជូនភ្ញៀវជាតិ អន្ដរជាតិ ទស្សនាកម្សាន្ត និងលេងកម្សាន្តដោយសេរី ។

ចំណែកសួនកម្សាន្តឆ្នេរអូរត្រេះ២ ប្រវែង១,៧៤៦ម៉ែត្រនឹងត្រូវរៀបចំដូចជា ក្រាលការ៉ូឡាកន្លែងចតរថយន្ត រៀបចំកែលំអរសួនច្បារ និងដាំដើមឈើឡើងវិញ ក្រាលការ៉ូឡាសំរាប់ផ្លូវថ្មើជើង តំឡើងបង់អង្គុយលេង សាងសង់បន្ទប់ទឹកថ្មី រៀបចំកន្លែងលេងកីឡានៅលើឆ្នេខ្សាច់ រៀបចំកន្លែងហាត់ប្រាណបែបធម្មជាតិ រៀបចំសួនកុមារ និងឡានម្ហូបចល័តដែលមានស្តង់ដារអន្តរជាតិ។

លោក គួច ចំរើន អភិបាលខេត្តព្រះសីហនុ បានធ្វើការណែនាំដល់ក្រុមហ៊ុនឱ្យបន្តសិក្សាឆ្នេរសមុទ្រ ចាប់ពីកំពង់ផែស្វយ័តក្រុងព្រះសីហនុ រហូតដល់ចុងឆ្នេរជំទាវម៉ៅ មានប្រវែងប្រមាណ១៥គីឡូម៉ែត្រ ដើម្បីកែលម្អឆ្នេរសមុទ្រ ជាលំហរសាធារណ:បម្រើឱ្យសាធារណ:ជន កាលណាបាត់បង់ឆ្នេរ នោះនឹងបាត់បង់ភ្ញៀវទេសចរ៕

ចំណេះដឹង! តើតាវកាលិកហានិភ័យការងារមានអ្វីខ្លះ?

ដោយ វុត្ថា

ភ្នំពេញៈ យោងតាមច្បាប់ស្ដីពី របបសន្ដិសុខសង្គម សម្រាប់ជនទាំងឡាយដែលស្ថិតនៅក្រោមបទបញ្ញត្តិ នៃច្បាប់ស្ដីពីការងារ តាវកាលិកហានិភ័យការងារមាន៖

ការថែទាំនិងព្យាបាលមុខរបួស ដែលបណ្ដាលមកពីគ្រោះថ្នាក់ការងារ ឬគ្រោះថ្នាក់ពេលធ្វើដំណើរឬជម្ងឺវិជ្ជាជីវៈ ទោះបីជាគ្រោះថ្នាក់នោះបណ្ដាលឲ្យមានការ អាក់ខានធ្វើការក្ដី ឬគ្មានក្ដី។
ការផ្ដល់ប្រាក់បំណាច់ប្រចាំថ្ងៃ សម្រាប់គ្រោះថ្នាក់ការងារឬគ្រោះថ្នាក់ ក្នុងការធ្វើដំណើរ ឬជម្ងឺវិជ្ជាជីវៈ ដែលបណ្ដាលឲ្យបាត់បង់ការងារជាបណ្ដោះអាសន្ន។
ការផ្ដល់ធនលាភ(ប្រាក់សោធនបាត់បង់សមត្ថភាពផ្ដល់ជូនអស់មួយជីវិត) ឬប្រាក់វិភាជន៍(ប្រាក់បើកផ្ដាច់តែម្ដងគត់) សម្រាប់ការងារបាត់បង់សមត្ថភាពការងារ ចំពោះគ្រោះថ្នាក់ការងារ ឬគ្រោះថ្នាក់ក្នុងពេលធ្វើដំណើរ ឬជម្ងឺវិជ្ជាជីវៈ ដែលបណ្ដាលឲ្យបាត់បង់សមត្ថភាពការងារជាអចិន្ដ្រៃយ៍។
ការផ្ដល់ប្រាក់វិភាជន៍ ជាសោហ៊ុយសម្រាប់បូជាសព និងធនលាភចំពោះឧត្តរជីវីនៃជនរងគ្រោះ។
ការសម្របសម្រួសមុខងារការអប់រំវិជ្ជាជីវៈឡើងវិញ ការចាត់ថ្នាក់ការងារឡើងវិញតាមលក្ខខណ្ឌដែលបានកំណត់។
ការដឹកជញ្ជូនជនរងគ្រោះពីកន្លែងគ្រោះថ្នាក់ ទៅកាន់កន្លែងព្យាបាលឬលំនៅស្ថាន៕

កំណើនទុនវិនិយោគក្នុងវិស័យសំណង់ខេត្តកំពង់ធំសម្រេចបានជិត៩៣លានដុល្លារ

ដោយៈ រ៉ាណេត

កំពង់ធំៈ ស្របទៅនឹងភាពរីកចម្រើនស្ទើរគ្រប់វិស័យ ក្រោមការអនុវត្តតាមផែនការ និងគោលនយោបាយ ដែលបានដាក់ចេញដោយរដ្ឋាភិបាលកម្ពុជា ក្រៅពីការអភិវឌ្ឍន៍លើហេដ្ឋារចនាសម្ព័ន្ធនានាគួរឱ្យកត់សម្គាល់ សម្រាប់វិស័យសំណង់នៅទូទាំងខេត្តកំពង់ធំក៏មានការកើនឡើងនូវចំនួនទុនវិនិយោគសរុបជិត៩៣លានដុល្លារ។

អភិបាលខេត្តកំពង់ធំ លោក សុខ លូ បានមានប្រសាសន៍នៅក្នុងសន្និសីទសារព័ត៌មានស្ដីពីវឌ្ឍនភាព និងបន្តគោលដៅការងារ នៅទីស្ដីការគណៈរដ្ឋមន្ត្រី កាលពីព្រឹកថ្ងៃទី២៧ ខែឧសភា ឆ្នាំ២០២០នេះថា បច្ចុប្បន្ន ក្រោមការអនុវត្តតាមកម្មវិធីគោលនយោបាយ និងយុទ្ធសាស្ត្រចតុកោណរបស់រាជរដ្ឋាភិបាល នីតិកាលទី៦នៃរដ្ឋសភា ជាលទ្ធផលរដ្ឋបាលខេត្តកំពង់ធំ សម្រេចបានសមិទ្ធផល និងការអភិវឌ្ឍន៍ជាច្រើន។

លោកបញ្ជាក់ថា “ជាមួយនឹងការអភិវឌ្ឍន៍ និងរីកចម្រើនលើវិស័យអចលនទ្រព្យ និងសំណង់ កាលពីពេលកន្លងទៅនេះ រដ្ឋបាលខេត្តកំពង់ធំបានផ្តល់លិខិតអនុញ្ញាតសាងសង់ចំនួន៦៥៦គម្រោង គិតជាទុនវិនិយោគប្រមាណ៩២លានដុល្លារ។ ក្រៅពីនេះ នៅមានគម្រោងសាងសង់លំនៅដ្ឋាន លក្ខណៈបុគ្គលរបស់ប្រជាពលរដ្ឋ ក្នុងមូលដ្ឋានមួយចំនួនទៀត”។

លោកបានបន្តថា “ការចូលរួមសកម្មភាពពីសំណាក់វិស័យឯកជន គឺជាផ្នែកមួយយ៉ាងសំខាន់ក្នុងការពង្រឹង និងជំរុញការអភិវឌ្ឍរបស់ខេត្តទាំងមូល ហើយក៏សូមបន្តលើកទឹកចិត្តឱ្យមានការចូលរួមអភិវឌ្ឍន៍ និងវិនិយោគបន្ថែមទៀត”។

អគ្គនាយិកាក្រុមហ៊ុនអភិវឌ្ឍន៍បុរី សុកគា ស៊ីធី លោកជំទាវឧកញ៉ា ឡេង ចាន់ណា ដែលកំពុងអភិវឌ្ឍន៍ វិស័យលំនៅដ្ឋាននៅក្នុងខេត្តកំពង់ធំ បានមានប្រសាសន៍ប្រាប់តាមទូរស័ព្ទកាលពីថ្ងៃទី២៧ ខែឧសភា ឆ្នាំ២០២០ សក្ដានុពលនៅក្នុងខេត្តកំពង់ធំសម្រាប់វិស័យអចលនទ្រព្យគឺមានច្រើន ហើយនឹងនៅបន្តផ្ដល់ឱកាសវិនិយោគ ទៅថ្ងៃខាងមុខទៀត។

លោកឧកញ៉ាបានបន្តទៀតថា “លំនៅដ្ឋានដែលមានតម្រូវការទីផ្សារខ្ពស់ នៅក្នុងខេត្តកំពង់ធំស្ថិតនៅជាប់ផ្លូវជាតិ និងផ្លូវធំ គឺមានតម្លៃក្នុងរង្វង់ជាង៤ម៉ឺនដុល្លារតែប៉ុណ្ណោះ ប៉ុន្តែសម្រាប់លំនៅដ្ឋាន ដែលស្ថិតនៅជាប់ផ្លូវវាងក្រុង ឬនៅជាយក្រុងគឺមានតម្លៃខ្ពស់ជាងនេះ”។លោកបន្តថា “តម្លៃលំនៅដ្ឋានដែលកំពុងដាក់លក់ពេលនេះ សុទ្ធតែផ្តល់ឱកាសចំណេញសម្រាប់អ្នកទិញទាំងអស់”។

លោកឧកញ៉ាបញ្ជាក់ថា ដោយសារពេលនេះ មានការរំខានពីវិបត្តិជំងឺ Covid-19 បានធ្វើឱ្យលក់មានការធ្លាក់ចុះ ហើយគម្រោងខ្លះបានបញ្ចុះតម្លៃ ប៉ុន្តែក្រោយពេលវិបត្តិនេះត្រូវបានបញ្ចប់ សកម្មភាពនៃការទិញ–លក់ នឹងត្រឡប់ទៅរកភាពសកម្មឡើងវិញ។

ខេត្តកំពង់ធំមានផ្ទៃដីសរុបទំហំ១៥,០៦១គីឡូម៉ែត្រការ៉េ ស្មើនឹងប្រមាណ១ ៥០៦ ១៩៧ ហិកតា ចែកចេញជាក្រុងចំនួន១ ស្រុកចំនួន៨ ឃុំចំនួន៧៣ សង្កាត់ចំនួន៨ និងភូមិចំនួន៧៦៧ មានប្រជាពលរដ្ឋចំនួនសរុប១៧៤.៦៥១គ្រួសារ ស្មើនឹង៨០៤.៤០៩នាក់ ដោយមានដង់ស៊ីតេ៥៣នាក់ក្នុងមួយគីឡូម៉ែត្រការ៉េ។

សម្រាប់ការងារនៃវិស័យរៀបចំដែនដី នគរូបនីយកម្ម សំណង់ និងសូរិយោដី នៅទូទាំងខេត្តបានសម្រេចលទ្ធផលផ្លែផ្កាជាច្រើន ដោយនៅក្នុងនោះសម្រាប់ការងារចុះបញ្ជីដីធ្លីមានលក្ខណៈជាប្រព័ន្ធត្រូវបានអនុវត្តទៅលើស្រុកចំនួន៧ ក្នុងចំណោមស្រុកចំនួន៨ ដោយជាលទ្ធផលបានប្រគល់បណ្ណកម្មសិទ្ធិដល់ប្រជាពលរដ្ឋចំនួន១៨៤ ០៤៧ ប័ណ្ណ។ ដោយឡែក ការងារចុះបញ្ជីដីធ្លី មានលក្ខណៈដាច់ដោយដុំបានចំនួន ២២៩៧ក្បាលដី ការចុះបញ្ជីអំពីការបង្កើតហ៊ីប៉ូតែកបានចំនួន ១៦ ០១៤ ក្បាលដី និងបានចុះបញ្ជីផ្ទេរសិទ្ធិចំនួន ១៩ ៣៨៨ ក្បាលដី៕

ផ្សារហ៊ុនអាមេរិកចាប់ផ្តើមងើបឡើងវិញដោយសារក្តីសង្ឃឹមនៃផលិតវ៉ាក់សាំងការពារជំងឺ COVID-19

ដោយ ប៊ី

អន្តរជាតិៈ ការជួញដូរភាគហ៊ុនបានបើកជាថ្មី នៅផ្សារហ៊ុនញូវយ៉កកាលពីថ្ងៃអង្គារ។ អភិបាលក្រុងញូវយ៉កលោក Andrew Cuomo បានបន្លឺសំឡេងកណ្តឹងដើម្បីបើកការជួញដូរភាគហ៊ុន ហើយពាណិជ្ជករបានស្រែកហ៊ោយ៉ាងរីករាយ។

ផ្សារហ៊ុនបានកើនឡើងនៅសប្តាហ៍នេះ បន្ទាប់ពីទីផ្សារត្រូវបានបិទសម្រាប់ថ្ងៃ Memorial Dayកាលពីថ្ងៃច័ន្ទ ដោយសន្ទស្សន៍របស់ក្រុមហ៊ុនធំៗចំនួនបី ទទួលបានពិន្ទុខ្ពស់ជាងមុនក្នុងការជួញដូរ។

ក្រុមហ៊ុនDow បានបិទការជួញដូរកាលកាលពីម្សិលមិញ ដោយទទួលបាន៥៣០ ពិន្ទុ ឬ២,២ភាគរយ ដែលជម្រុញដោយសុទិដ្ឋិនិយម អំពីការបន្តបើកសេដ្ឋកិច្ចជាបណ្តើរៗ និងវ៉ាក់សាំងការពារជំងឺCOVID-19។ សន្ទស្សន៍ជួញដូរខ្ពស់ជាង៧០០ពិន្ទុ ហើយកើនលើស២៥,០០០ ពិន្ទុដែលជាកំរិតមួយមិនធ្លាប់មានតាំងពីថ្ងៃទី១០ ខែមីនា។

ក្រុមហ៊ុន The S&P 500 បានបិទការជួញដូរដូចគ្នាកាលពីម្សិលមិញ ដោយទទួលបានកំណើនជិត១,២ ភាគរយ។

សន្ទស្សន៍នេះបានឡើងដល់៣,០០០ពិន្ទុ ដែលជាចំណុចមួយដែលវាមិនធ្លាប់មាន ចាប់តាំងពីដើមខែមីនា ប៉ុន្តែវាបានធ្លាក់ចុះបន្តិចវិញ បន្ទាប់បានបិទការជួញដូរ។

ក្រុមហ៊ុនNasdaq Composite បានបិទការជួញដូរ ដោយទទួលការកើនឡើង ០,២ ភាគរយប៉ុណ្ណោះ។ ការស្តុកទុកពាណិជ្ជកម្មតាមប្រព័ន្ធឌីជីថល កំពុងដំណើរការឡើងវិញ បន្ទាប់ពីការឈប់សម្រាករយៈពេលពីរខែ ដែលមិនធ្លាប់មានពីមុនមក ជាសញ្ញាបង្ហាញថា កំពុងវិលមករកភាពធម្មតាវិញ។ ការជួញដូរជាន់ផ្សារភាគហ៊ុនញូវយ៉ក បានបិទកាលថ្ងៃទី១៨ ខែឧសភា ដោយសារទីក្រុងនេះបានបិទទ្វារ ដើម្បីទប់ស្កាត់ការរីករាលដាលនៃជំងឺCOVID-19៕ CNN៕

អភិបាលខេត្តកណ្តាលនឹងបង្ហាញនូវវឌ្ឍភាពនូវគម្រោងធំៗនៅសន្និសីទ សារព័ត៌មានៅថ្ងៃស្អែក

ដោយវុត្ថា

កណ្តាលៈ អភិបាលខេត្តកណ្តាល លោក គង់សោភណ្ឌ័ និងចូលរួមជាវាគ្មិនក្នុងសន្និសីទសារព័ត៌មានស្ដីពី«វឌ្ឍនភាព សមិទ្ធិផលការងារធំៗនិងទិសដៅការងារបន្ដ ដែលរដ្ឋបាលខេត្តកណ្តាល សំរេចបានរយះពេលមួយឆ្នាំ» នៅព្រឹកថ្ងៃទី២៨ឧសភា ស្អែកនេះ នាទីស្ដីការគណៈរដ្ឋមន្ដ្រី។

ក្នុងសន្និសីទនេះ រដ្ឋបាលខេត្តកណ្តាល និងបង្ហាញ ពីវឌ្ឍនភាពនិងសមិទ្ធិផលការងារធំៗដែលសំរេចរយៈពេល១ឆ្នាំ ដូចជា

១-គំរោងសាងសង់ រោងចក្រអគ្គិសនីកម្លាំង៤០០ម៉េហ្គាវ៉ាត់

២- គំរោងសាងសង់ ប្រព្រឹត្តកម្មទឹកកង្វក់ក្រុងតាខ្មៅ

៣-គំរោងសាងសង់ ព្រលានយន្តហោះភ្នំពេញថ្មី នៅស្រុកស្អាង កណ្តាលស្ទឹងនិងក្រុងតាខ្មៅ។

៤-គំរោងសាងសង់មជ្ឈមណ្ឌល ព្យាបាលនិងស្តារនិតិសម្បាទា អ្នកញៀនគ្រឿងញៀន។

៥-គំរោងសាងសង់ ច្រកទ្វារអន្តរជាតិជ្រៃធំ

៦-បញ្ចប់ជួលដីអោយបរទេស និងការបិទច្រករបៀង

៧-ការរៀបចំប្លង់គោលដៅជ្រៃធំ និងក្រុងតាខ្មៅ

៨-ការសាសាងសង់ ក្រវាត់ផ្លូវក្រុងទី២និងទី៣

៩-ការបោះបង្គោលដីរដ្ឋ តាមអនុក្រិត្យរបស់រាជរដ្ឋាភិបាល

១០-ការបង្កើតច្រកចេញចូលតែមួយ និងការិយាលយ័ប្រជាជន

១១-ការធ្វើច្រាំងការពារបង្គោលព្រំដែននិងធ្វើច្រាំងរយៈពេលវែង

១២-ការរៀបចំហេដ្ឋារចនាសម្ពន្ធ័ និងសមិទ្ធិផលនានា នៅតាមព្រំដែន

១៣- ការរៀបចំពិធីបុណ្យអុំទូក និងសង្ក្រាន្តឆ្នាំថ្មី

១៤-សាងសង់សួនកុមារនៅក្រុងតាខ្មៅព្រមទាំងសមិទ្ធិផលជាច្រើនទៀតដែ លរដ្ឋបាលខេត្តសំរេចបានរយះពេលមួយឆ្នាំនេះ។

សន្និសីទនេះ រៀបចំដោយអង្គភាព អ្នកនាំពាក្យរាជរដ្ឋាភិបាល សំរបសំរួលដោយ លោក ផៃស៊ីផាន រដ្ឋមន្ត្រី ប្រតិភូអមនាយករដ្ឋមន្ត្រិ និងជាប្រធានអង្គភាពអ្នកនាំពាក្យរបស់រាជរដ្ឋាភិបាល ក្នុងគោលបំណងបង្ហាញជូនសាធារណៈជន ឲ្យបានយល់ច្បាស់ពីសកម្មភាព សមិទ្ធផល និងទិសដៅការងារបន្ដ របស់រដ្ឋបាលខេត្តកណ្តាល ក្នុងទិសដៅស្នួល ជំរុញគោលនយោបាយ អភិបាលកិច្ចល្អ ឲ្យកាន់តែមានប្រសិទ្ធភាព ឆ្លើយតបទៅ នឹងយុទ្ធសាស្ដ្រចតុកោណ ដំណាក់កាលទី៤ របស់រាជរដ្ឋាភិបាល៕