ដោយវុត្ថា

ភ្នំពេញៈ ស្ថិតក្នុងឱកាសខួបលើកទី៧០ឆ្នាំ នៃទំនាក់ទំនងការទូតរវាងកម្ពុជា និងថៃ  លោក Panyarak Poolthup  ឯកអគ្គរាជទូតថៃ ប្រចាំនៅកម្ពុជា បានផ្តល់ថវិកាចំនួន ២លានបាត ដើម្បីប្រគល់ជូនសម្ដេចតេជោ ក្នុងការចូលរួមចំណែកទប់ស្កាត់ការប្រយុទ្ធប្រឆាំងជំងឺកូវីដ១៩ នៅកម្ពុជា។

លោក Panyarak Poolthup ) ឯកអគ្គរាជទូតថៃ ប្រចាំនៅកម្ពុជា នៅក្នុងជំនួបពិភាក្សាការងារ ជាមួយសម្ដេចតេជោហ៊ុន សែន នាយករដ្ឋមន្ត្រីនៃកម្ពុជានៅថ្ងៃទី  ២៧ ខែឧសភា ឆ្នាំ ២០២០នេះ សម្តែងនូវអំណរសាទរយ៉ាងជ្រាលជ្រៅជាទីបំផុត ចំពោះកម្ពុជាដែលបានដាក់វិធានការយ៉ាងប្រាកដនិយម ក្នុងការទប់ស្កាត់ជំងឺកូវីដ១៩ អំពីការរាតត្បាតនៅកម្ពុជា។

លោកថា “វិធានការដែលរាជរដ្ឋាភិបាលបានដាក់ចេញនេះ គឺមានប្រសិទ្ធភាពខ្ពស់ហើយទប់ស្កាត់ មិនឲ្យមានការរាតត្បាតនៅកម្ពុជាទៀតឡើយ”។

ជាមួយគ្នានេះ ស្ថានទូតថៃប្រចាំកម្ពុជា បានធ្វើការជាមួយនឹង ក្រុមហ៊ុនថៃនៅកម្ពុជាដោយបានធ្វើការណែនាំ ធ្វើយ៉ាងណាមិនឲ្យក្រុមហ៊ុនទាំងនោះ តម្លើងតំលៃទំនិញនៅកម្ពុជា និងបានធ្វើការជាមួយក្រុមហ៊ុនទាំងនោះ ឲ្យមានការចែករំលែកនូវសម្ភារៈដូចជាសម្ភារៈអនាម័យមានម៉ាក ដើម្បីចូលរួមចំណែកទប់ស្កាត់ការរីករាលដាល ជំងឺកូវីដ១៩ នៅកម្ពុជា។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រាសាសន៍ថា ការចូលរួមប្រយុទ្ធប្រឆាំងនឹងជំងឺ covid-19 របស់ស្ថានទូតថៃ ដូចជារបស់ប្រជាជនថៃ និងរាជរដ្ឋាភិបាលថៃជាមួយកម្ពុជា ជាការឆ្លុះបញ្ចាំងនៃការសាមគ្គីភាពរវាងកម្ពុជា នឹងថៃ ក៏ដូចជាប្រជាជនកម្ពុជានិងប្រជាជនថៃផងដែរ។

សម្ដេចតេជោបន្តថា វិធានការទាំងឡាយដែលដាក់ចេញ ដោយរាជរដ្ឋាភិបាលថៃ គឺមានភាពប្រាកដនិយម។ ក្នុងន័យនេះជាសក្ខីភាពប្រជាជនកម្ពុជា បានឆ្លងកាត់ព្រំប្រទ​ល់ថៃមកកម្ពុជាយើងកន្លងមកជាង៩ម៉ឺននាក់ ហើយអ្នកទាំងនោះគ្មានជនណាម្នាក់ឆ្លង ឬនាំយកជំងឺកូវីដ១៩មកកម្ពុជាឡើយ។  សម្តេចតេជោថ្លែងថា នេះជាការឆ្លុះបញ្ចាំងមួយថាប្រទេសថៃ មិនមែនជាប្រទេសចម្លងមេរោគកូវីដនោះទេ។

សម្ដេចតេជោបន្តថា ថ្មីៗនេះអគ្គរាជទូតកម្ពុជាប្រចាំនៅប្រទេសថៃ បានអំពាវនាវនិងធ្វើការជាមួយនឹងប្រជាជនកម្ពុជា ដែលកំពុងរស់នៅប្រទេសថៃ ធ្វើយ៉ាងណាឱ្យអនុវត្តឲ្យខានតែបាន តាមគោលការណ៍របស់រាជរដ្ឋាភិបាលថៃ ដែលបានដាក់ចេញ ដើម្បីទប់ស្កាត់ការរីករាលដាល និងប្រយុទ្ធប្រឆាំងនឹងជំងឺកូវីដ១៩៕

ដោយ ៖ រ៉ាណេត
ភ្នំពេញ ៖ ជាវិធានការបន្ទាន់ និងសម្រួលដល់ផលលំបាករបស់ប្រជាពលរដ្ឋខ្មែរ ដែលកំពុងធ្វើដំណើរ ឬនៅក្រៅប្រទេសមានបំណងត្រឡប់ចូលប្រទសេកម្ពុជាវិញនោះ សម្ដេចតេជោ ហ៊ុន សែន សម្រេចអនុញ្ញាតដោយមិនចាំបាច់មានវិញ្ញាបនបត្របញ្ជាក់ពីសុខភាពនោះឡើយ សម្រាប់ពលរដ្ឋខ្មែរដែលកាន់លិខិតឆ្លងដែនកម្ពុជា។

ជាដំណោះស្រាយ និងសម្រួលដល់ផលលំបាករបស់ប្រជាពលរដ្ឋខ្មែរមួយចំនួនដែលកំពុងធ្វើដំណើរ ក៏ដូចជាអ្នកធ្វើដំណើរនៅក្រៅប្រទេស ហើយវិលត្រឡប់ចូលមកប្រទេសកម្ពុជាវិញ នៅព្រឹកថ្ងៃទី២៧ ឧសភា ឆ្នាំ២០២០ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានសម្រេចវិធានការដោះស្រាយជាផ្លូវការចំពោះពលរដ្ឋខ្មែរដែលកាន់លិខិតឆ្លងដែនកម្ពុជាហេីយដែលកំពុងធ្វេីដំណេីរ ឬមានបំណងធ្វេីដំណេីរពីក្រៅប្រទេសវិលត្រឡប់ចូលមកកម្ពុជាវិញ គឺមិនតម្រូវឱ្យមានវិញ្ញាបនប័ត្របញ្ជាក់សុខភាពថាគ្មានជំងឺឆ្លង Covid-19 ទេ។

វិធានការនេះគឺនឹងជួយសម្រួលដល់ពលរដ្ឋនៅក្រៅប្រទេសឆាប់បានវិលត្រឡប់មកជួបជុំក្រុមគ្រួសារនៅក្នុងប្រទេសខ្លួនវិញ។ ប៉ុន្តែពេលវិលត្រឡប់មកដល់ប្រទេសវិញ គឺតម្រូវឱ្យចូលពិនិត្យសុខភាព និងពិនិត្យសំណាក ហេីយដាក់ឱ្យស្នាក់នៅដាច់ដោយឡែកចំនួន១៤ថ្ងៃរង់ចាំលទ្ធផលសំណាកថា តេីមានរោគឆ្លង ឬអត់រោគឆ្លង ទេីបអនុញ្ញាតឱ្យទៅលំនៅដ្ឋានវិញ។

កាលពីដើមសប្ដាហ៍កន្លងទៅនេះ ជាឆ្លើយតបទៅនឹងសេចក្ដីប្រកាសរបស់គណៈកម្មការអន្តរក្រសួង ដើម្បីប្រយុទ្ធនឹងជំងឺឆ្លង Covid-19 រដ្ឋលេខាធិការដ្ឋានអាកាសចរស៊ីវិលកម្ពុជា បានចេញសេចក្ដីណែនាំ និងដាក់ចេញនូវវិធានការចំនួន៤ចំណុចបន្ថែមទៀត សម្រាប់ក្រុមហ៊ុនអាកាសចរណ៍ទាំងអស់ ដែលកំពុងហោះហើរចេញចូលព្រះរាជាណាចក្រកម្ពុជា។

ទី១- រាល់អ្នកដំណើរតាមផ្លូវអាកាសរបស់ខ្លួនទាំងជនជាតិខ្មែរ និងជនជាតិបរទេស ដែលតម្រូវឱ្យមានវិញ្ញាបនបត្របញ្ជាក់សុខភាព បញ្ជាក់ថាគ្មានមេរោគ Covid-19 ក្នុងរយៈពេល៧២ម៉ោង និងឯកសារធានារ៉ាប់រងសុខភាពក្នុងចំនួនទឹកប្រាក់យ៉ាងតិច ៥ម៉ឺនដុល្លារ ក្នុងកំឡុងពេលស្នាក់នៅកម្ពុជា ត្រូវតែបង្ហាញឯកសារច្បាប់ដើមដល់មន្ត្រីបម្រើសេវាកម្មចុះឈ្មោះឡើងជិះយន្តហោះ នៅតាមបណ្តាអាកាសយានដ្ឋានអន្តរជាតិ។

ទី២- រាល់វិញ្ញាបនបត្របញ្ជាក់ពីសុខភាព និងឯកសារធានារ៉ាប់រងសុខភាព ត្រូវតែចេញដោយមន្ទីរពេទ្យ វិទ្យាស្ថានសុខាភិបាល ស្ថាប័ន ភ្នាក់ងារ ឬក្រុមហ៊ុន ដែលអាចជឿទុកចិត្តបាន និងអាចទំនាក់ទំនងបានគ្រប់ពេលវេលា។

ទី៣- ក្រុមហ៊ុនអាកាសចរណ៍ ពុំអាចដឹកអ្នកដំណើរតាមផ្លូវអាកាសរបស់ខ្លួនមកកាន់ប្រទេសកម្ពុជា ជាដាច់ខាត់ ប្រសិនបើចំណុចទី១ និងទី២ មិនបានបំពេញ។

ទី៤- ក្រុមហ៊ុនអាកាសចរណ៍ក៏ត្រូវមានភារកិច្ចដូចជា ៖
– ថតចម្លងទុកនូវវិញ្ញាបនបត្របញ្ជាក់ពីសុខភាព និងឯកសារធានារ៉ាប់រងសុខភាពរបស់អ្នកដំណើរតាមផ្លូវអាកាសរបស់ខ្លួនទុកជាឯកសារសម្រាប់រយៈពេល២០ថ្ងៃ ដើម្បីឆ្លើយតបរាល់សំណើរកិច្ចសហការស៊ើបអង្កេតណាមួយរបស់អាជ្ញាធរសមត្ថកិច្ចកម្ពុជា ។
– ផ្ញើចំនួនអ្នកដំណើរសរុបលើកទី១ដែលបានកក់សំបុត្រយន្តហោះជារៀងរាល់ម៉ោង១០ព្រឹកឱ្យបានមុនមួយថ្ងៃ មុនពេលចាប់ផ្ដើមធ្វើការហោះហើរជូនដល់រដ្ឋលេខាធិការដ្ឋានអាកាសចរស៊ីវិល ។
– ផ្ញើចំនួនអ្នកដំណើរសរុបចុងក្រោយ និងបញ្ជាក់ពីប្រភពដើមនៃចំណុចចាប់ផ្តើមធ្វើដំណើរ មុនពេលការហោះហើរមកកាន់ប្រទេសកម្ពុជា ជូនដល់រដ្ឋលេខាធិការដ្ឋានអាកាសចរស៊ីវិល ៕

ដោយ ៖ វុត្ថា

ភ្នំពេញ ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា ការស្ថាបនាផ្លូវជាតិលេខ៥ ពីព្រែកក្តាមទៅកាន់ទីប្រជុំជនក្រុងប៉ោយប៉ែត (ផ្លូវហាយវេអាស៊ាន) នឹងបញ្ចប់ជាស្ថាពរនៅក្នុងឆ្នាំ២០២២ ខាងមុខនេះ ខណៈផ្លូវនេះបាននឹងកំពុងពន្លឿនស្ថាបនាដោយក្រុមហ៊ុនជប៉ុន។

លោកទេសរដ្ឋមន្ត្រី ស៊ុន ចាន់ថុល នៅក្នុងពិធីដឹកនាំមន្ត្រីចុះពិនិត្យការដ្ឋានផ្លូវជាតិលេខ៥ នៅថ្ងៃទី២៧ ខែឧសភា ឆ្នាំ២០២០នេះ បានមានប្រសាសន៍ថា ផ្លូវជាតិលេខ៥ នេះ ត្រូវបានបែកចែកជា ៣ផ្នែក គឺផ្លូវខាងជើង កណ្តាល និងខាងត្បូង ។

លោកបន្តថា សម្រាប់គម្រោងទី១នៃផ្លូវនេះ នៅប៉ែកខាងជើង ពីបាត់ដំបងទៅស្វាយស៊ីសុផុន នឹងបញ្ចប់នៅក្នុងខែមីនា ឆ្នាំ ២០២១ ដែលរហូតមកដលពេលនេះ សម្រេចបានជាង ៧០ ភាគរយ។ សម្រាប់ផ្នែកកណ្តាលនឹងបញ្ចប់នៅក្នុងខែឧសភា ឆ្នាំ ២០២២។

លោកបន្ថែមថា “នៅសល់ប្រមាណ ២កន្លែង យើងកំពុងជ្រើសរើសម៉ៅការសាងសង់ ជាមួយគ្នានេះ យើងនឹងធ្វើកន្លែងជញ្ជីង ប្រមាណ៦ ទីតាំង ជារួមនឹងហើយរួចរាលនៅក្នុងឆ្នាំ ២០២២”។
លោកបន្ថែមទៀតថា “ផ្លូវនេះនឹងជួយកាត់បន្ថយគ្រោះថ្នាក់ចរាចរណ៍ និងជាប្រព័ន្ធឡូជីស្ទីកដែលមានតម្លៃដឹកជញ្ជូនសមរម្យ និងការដឹកជញ្ជូនទំនិញចំណាយពេលវេលាតិច ពីកម្ពុជាទៅកាន់ប្រទេសថៃ និង ពីថៃមកកម្ពុជា។ ផ្នែកខាងត្បូង បាន ២៩ ភាគរយ កណ្តាល បានប្រមាណ ១៥ ភាគរយ”។

លោកបញ្ជាក់ថា ការចំណាយថវិកាលើការសាងសង់ផ្លូវជាតិលេខ៥នេះ មានចំនួន ៥០០ លានដុល្លារអាមេរិក ដែលមានចម្ងាយផ្លូវប្រមាណ ៣៦៦ គីឡូម៉ែត្រ ដោយក្នុងនោះ មានផ្លូវវៀងក្រុង ៥កន្លែងប្រវែង ៦២គីឡូម៉ែត្រ ស្ពាន ៨០ កន្លែង និងដាក់លូជាច្រើនរយម៉ែត្រផងដែរ។

គម្រោងធ្វើឱ្យប្រសើរឡើងលេខ៥ (អាស៊ានហាយវេលេខ១) មានប្រវែងសរុបចំនួន ៣៦៦ គីឡូម៉ែត្រ ឋិតក្នុងខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ ជាគម្រោងក្រោមកម្ចីឥណទានសម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា។

ការស្ថាបនាត្រូវបានបែងចែក ជា៣ផ្នែក ធំៗរួមមាន៖ ផ្នែកខាងជើង ផ្នែកកណ្តាល និងផ្នែក ខាងត្បូង ដោយមានការពង្រីកកំណាត់មានស្រាប់ពី២គន្លងទៅ៤គន្លង ទទឹង២៣ម៉ែត្រ ជាប្រភេទបេតុងកៅស៊ូ (AC) និងមានសួរ ច្បារចំកណ្តាល៕

ដោយ៖​រ៉ាណេត

ភ្នំពេញ៖ខេត្តព្រះវិហារសម្បូរទៅដោយធនធានរ៉ែគ្រប់ប្រភេទរួមមាន រ៉ែដែក រ៉ែស្ពាន់ រ៉ែមាស រ៉ែប្រេងកាត និងរ៉ែលោហៈផ្សេងៗទៀត ដែលគ្រប់ដណ្តប់ស្ទើរទូទាំងខេត្ត ហើយមកទល់ពេលនេះ មានក្រុមហ៊ុនចំនួន២១ ដែលបានកំពុងធ្វើអាជីវកម្ម និងសិក្សាស្រាវជ្រាវ។

 លោក គោស៊ុ ប៊ុនស៊ឿត អភិបាលរងខេត្តព្រះវិហារ នៅក្នុងរៀបចំសន្និសទីសារព័ត៌មានស្តីពី «វឌ្ឍនភាព និងទិសដៅការងារបន្តរបស់រដ្ឋបាលខេត្តព្រះវិហារ» នាព្រឹកថ្ងៃទី ២៦ ខែឧសភា ឆ្នាំ ២០២០នេះ បានឱ្យដឹងថាក្រុមហ៊ុនចំនួន២១  ក្នុងនោះមាន  ក្រុមហ៊ុនធ្វើអាជីវកម្មរុករករ៉ែលោហៈចំនួន ២ក្រុមហ៊ុន, អាជីវកម្មថ្មភក់ ០៣ក្រុមហ៊ុន, អាជីវកម្មថ្មសំណង់ ២ក្រុមហ៊ុន និងអាជីវកម្មថ្មអារចំនួន ១ក្រុមហ៊ុន។

លោកបន្តថា ក្រុមហ៊ុនកំពុងសិក្សាស្រាវជ្រាវរ៉ែលោហៈ ១៣ក្រុមហ៊ុន ដោយឡែកចំពោះការផ្គត់ផ្គង់អគ្គីសនី ដោយមានកិច្ចសហប្រតិបត្តិការជាមួយខេត្តចម្ប៉ាសាក់ យើងបានតភ្ជាប់បណ្តាញពីខេត្តស្ទឹងត្រែង និងបានពង្រីកអគ្គីសនីប្រើប្រាស់ទូទាំងខេត្ត។

លោកបន្ថែមថា សម្រាប់កម្មវិធីនយោបាយយុទ្ធសាស្រ្តចតុកោណដំណាក់កាលទី៤ ជាគោល ផែនការអភិវឌ្ឍន៍រយៈពេល ៥ឆ្នាំ និងផែនការវិនិយោគ ៣ឆ្នាំរំកិល ជាត្រីវិស័យរបស់រដ្ឋបាលខេត្តព្រះវិហារដើម្បីសម្រេចបាននូវ សមិទ្ធផលការងារជាច្រើនរួមមាន ការរៀបចំហេដ្ឋារចនាសម្ព័ន្ធ ប្រព័ន្ធធារាសាស្រ្ត ការកែលម្អរ សោភ័ណភាព បរិស្ថាន សន្តិសុខសាធារណៈ និងការផ្តល់សេវាសាធារណៈ ជាដើម ។ល។ ៕

ដោយ ហ្សូ​លី

ភ្នំពេញៈ ការនាំចេញ​គ្រឿង​អេ​ឡិច​ត្រូ​និ​ច និង​គ្រឿងបន្លាស់​ម៉ាស៊ីន​ពី​កម្ពុជា ទៅ​ទីផ្សារ​បរទេស​កើនឡើង៣០ភាគរយ ឬ​ស្មើ​ទឹកប្រាក់​ជាង២៦០លាន​ដុល្លារ នៅ​រយៈពេល ៤ខែ នៃ​ឆ្នាំ ២០២០នេះ ។

យោងតាម​របាយការណ៍​ពី​ក្រសួងពាណិជ្ជកម្ម ដែល​ផ្សព្វផ្សាយ​នៅ​ថ្ងៃទី ២៦ ឧសភា ឆ្នាំ ២០២០ បានឱ្យដឹងថា ប្រទេស​កម្ពុជា​បាន​នាំចេញ​នូវ​គ្រឿងអគ្គិសនី គ្រឿង​ម៉ាស៊ីន និង​ឧបករណ៍​មេកានិច ដែលមាន​តម្លៃ​សរុប២៦៤,៨៩លាន​ដុល្លារ​អាមេរិក ទៅកាន់​ទីផ្សារ​បរទេស​ក្នុង​រយៈពេល៤ ខែ​ដំបូង​នៃ​ឆ្នាំនេះ ។

របាយការណ៍​ដដែល​បាន​បន្ថែមថា តួលេខ​នេះ​តំណាងឱ្យ​ការកើនឡើង​ជាង៣៣ ភាគរយ បើ​ប្រៀបធៀប​នឹង​រយៈពេល​ដូចគ្នា​កាលពី​ឆ្នាំមុន ។

ទន្ទឹមនេះ​ទីផ្សារសំខាន់ៗ សម្រាប់​ការនាំចេញ​ឧបករណ៍​អគ្គិសនី គ្រឿង​ម៉ាស៊ីន និង​គ្រឿងបន្លាស់​ម៉ាស៊ីន ដែល​ផលិត​នៅក្នុង​ប្រទេស​កម្ពុជា ច្រើនតែ​នាំចេញ​ទៅកាន់​ប្រទេស​ចិន​ជប៉ុន ថៃ និង​សហរដ្ឋអាមេរិក។ ឧបករណ៍​អគ្គិសនី​ដែល​ត្រូវបាន​នាំចេញ​រួមមាន ខ្សែកាប​អគ្គិសនី ម៉ា​ស៊ី​ត្បាញ ជញ្ជីង ម៉ាស៊ីន​ខួង និង​ឧបករណ៍ប្រើប្រាស់​ក្នុងផ្ទះ​ជាដើម ។

ក្រៅពី​គ្រឿង​បង្គុំ​អេ​ឡិច​ត្រូ​និ​ចនេះ កម្ពុជា​ក៏​សម្រេចបាន​នូវ​ការនាំចេញ​គ្រឿង​បង្គុំ​រថយន្ត និង​កង់​ជាដើម ដែល​កំពុង​ទទួលបាន​ការចាប់អារម្មណ៍ ពី​សំណាក់​អ្នកទិញ​បរទេស​ផងដែរ។ ដោយឡែក​ការនាំចេញ​វាយនភ័ណ្ឌ បាន​ធ្លាក់ចុះ​គួរ​ឲ្យ​កត់សម្គាល់​ដោយសារតែ​ជំងឺ​រាតត្បាត។ នេះ​បើតាម​ឯកសារ​របស់​រដ្ឋបាល​ព្រះសីហនុ ៕

ដោយៈ រ៉ា​ណេ​ត

ភ្នំពេញៈ រាជរដ្ឋាភិបាល​កម្ពុជា​បាន​ត្រៀម និង​រៀបចំ​កម្មវិធី​មួយចំនួន​សម្រាប់​ជា​វិធានការ​អនុវត្ត ក្នុង​គោលដៅ​ធានា​លំនឹង​នៃ​សេដ្ឋកិច្ច និង​សង្គម ក្រោយ​វិបត្តិ​នៃ​ជំងឺ Covid-19 ជាពិសេស​ចូលរួម​ធ្វើឱ្យមាន​ភាពល្អប្រសើរ ដល់​វិស័យ​ឯកជន​ទាំងអស់​នៅ​កម្ពុជា ជាមួយនឹង​ទំហំ​ថវិកា​ប្រមាណ៥០០លាន​ដុល្លារ ។

នៅក្នុង​ផែនការ និង​វិធានការ​ជុំ​ទី៤របស់​រាជរដ្ឋាភិបាល​កម្ពុជា ដែល​បាន​បញ្ចូល​នូវ​សមាសភាគធំៗចំនួន២ ការបន្ត​នូវ​សុពលភាព​នៃ​វិធានការ​មួយចំនួន ដែល​រាជរដ្ឋាភិបាល​បាន​ដាក់ចេញ​កន្លងមក រួម​ជាមួយនឹង​ការដាក់ចេញ​នូវ​វិធានការ​ថ្មី​បន្ថែម ដែល​ក្នុងនោះ​ក៏មាន​ការរៀបចំ​កម្មវិធី នៃ​កញ្ចប់​ថវិកាបម្រុង​សម្រាប់​ដោះស្រាយ​បញ្ហា និង​ជំនួយ​ដល់​វិស័យ​សេដ្ឋកិច្ចជាតិ ក៏ដូចជា​វិស័យ​ឯកជន​ផងដែរ ។

នៅក្នុង​សេចក្ដីប្រកាស​របស់​រាជ​រដ្ឋាភិបាល​កម្ពុជា ស្ដីពី​ការណែនាំ​នៃ​ការអនុវត្ត​វិធានការ​បន្ថែម​សំដៅ​ជួយ​ដល់​វិស័យ​ឯកជន កម្មករ និយោជិត ដែល​រង​នូវ​ផលប៉ះពាល់​ធ្ងន់ធ្ងរ​ពី​កា​រីក​រាលដាល​នៃ​ជំងឺ​ Covid-19 ដែល​ទើបតែ​ចេញ​កាលពី​ថ្ងៃទី២៦ ខែឧសភា ឆ្នាំ២០២០ បាន​បញ្ជាក់ថា រាជរដ្ឋាភិបាល តាមរយៈ​ក្រសួង​សេដ្ឋកិច្ច និង​ហិរញ្ញវត្ថុ នឹង​រៀបចំ​បង្កើត មូលនិធិ​ធានា​ឥណទាន​ថវិកា​ចំនួន២០០លាន​ដុល្លារ ។

មូលនិធិ​នេះ អាច​ធានា​ឥណទាន​កម្ចី​តាមរយៈ​ធនាគារ និង​មីក្រូហិរញ្ញវត្ថុ​ដោយ​ប្រើ​គោលការណ៍​ទីផ្សារ ដើម្បី​ជួយ​សម្រាល​សម្ពាធ​លំហូរ​សាច់ប្រាក់ និង​ទុន​បង្វិល​របស់​អាជីវក​ម្ម ធុរកិច្ច​ក្នុង​គ្រប់​វិស័យ​បាន​យ៉ាងតិច​ចំនួន ២០០០លាន​ដុល្លារ ។

នៅក្នុង​សេចក្ដីប្រកាស​ដដែល ក៏បាន​បញ្ជាក់​ពី​ការត្រៀម​ឧបករណ៍ ផ្តល់​ហិរញ្ញប្ប​ទាន (Financing Facility) បន្ថែម​ចំនួន​៣០០លាន​ដុល្លារ ដើម្បី​គាំទ្រ និង​ដើរតួ​ជា​កាតាលីករ​ជំរុញ​កំណើន តាម​វិស័យសំខាន់ៗក្នុងអំឡុងពេល​វិបត្តិ និង​ក្រោយ​វិបត្តិ ។

ក្រៅពីនេះ ក៏មាន​វិធានការ​ជំនួយ​សង្គម ដោយ​រាជរដ្ឋាភិបាល​បានសម្រេច​ពង្រីក​វិសាលភាព​គ្របដណ្ដប់ និង​ទំហំ​ថវិកា​សម្រាប់​កម្មវិធី​សាច់ប្រាក់​ពលកម្ម នៅក្នុង​ឆ្នាំ២០២០ឱ្យ​ឡើងដល់១០០លាន​ដុល្លារ ដើម្បី​ស្រូបយក​កម្លាំង​ពលកម្ម ដែល​បាត់បង់​ការងារ​ពី​រោងចក្រ សហគ្រាស និង​ដែល​បាន​វិលត្រឡប់​មកពី​បរទេស មក​ស្រុកកំណើត​វិញ​ផង ព្រមទាំង​ដើម្បី​ជួយ​ទ្រទ្រង់​ដល់​ជីវភាព​រស់នៅ របស់​ប្រជាពលរដ្ឋ​នៅតាម​មូលដ្ឋាន​ជាទូទៅ​ផង និង​ដើម្បី​បង្កើន​នូវ​សមិទ្ធផល​សង្គម​សេដ្ឋកិច្ច តាមរយៈ​ការអនុវត្ត​គម្រោង​កសាង​ហេដ្ឋារចនាសម្ព័ន្ធ​រូបវន្តតូចៗនៅតាម​មូលដ្ឋាន សំដៅ​លើកស្ទួយ​វិស័យ​កសិកម្ម និង​សេដ្ឋកិច្ច​ផងដែរ ។

ក្នុង​វិធានការ​ជំនួយ​សង្គម​នេះ ក៏​នឹង​ប្ដេជ្ញា​បន្ត​អនុវត្តន៍ រាល់​កម្មវិធី​គាំពារ​សង្គម​ទាំងឡាយ​ដែលមាន​ស្រាប់​មិនឱ្យ​ខកខាន។ រាជរដ្ឋាភិបាល នឹង​រៀបចំ​ដាក់ឱ្យអនុវត្ត​នៅក្នុង​ខែមិថុនា ឆ្នាំ២០២០នេះ នូវ​កម្មវិធី​ជំនួយ​សង្គម​សំដៅ​ជួយ​សម្រួល ដល់​ជីវភាព​ប្រចាំថ្ងៃ នៅក្នុង​អ​ឡុង​ពេល​នៃ​វិបត្តិ Covid-19 ជូន​ដល់​គ្រួសារ​ប្រជាពលរដ្ឋ​ក្រីក្រ និង​ក្រុម​ជន​ងាយ​រងគ្រោះ ដែលមាន​ប័ណ្ណ​សមធម៌​ទូទាំងប្រទេស ដោយ​យកចិត្តទុកដាក់​បន្ថែម​ដល់​កុមារ​អាយុ​ក្រោម៥ឆ្នាំ ជន​ព​ការ ជន​ចាស់ជរា ងា​យុ​ចាប់ពី៦០ឆ្នាំ​ឡើងទៅ និង​អ្នក​ផ្ទុកមេរោគ​អេដស៍​នៅក្នុង​គ្រួសារ​ប្រជាពលរដ្ឋ​ក្រីក្រ​ទាំងនោះ​ផងដែរ ៕