ដោយ វុត្ថា
ព្រះសីហនុៈ អ្នកនាំពាក្យរដ្ឋបាលខេត្តព្រះសីហនុបានអះអាងថា ការសាងសង់សំណង់ នៅក្នុងក្រុងព្រះសីហនុ រហូតមកដល់ពេលនេះ មានសកម្មភាពតិចតួច បើទោះបីមានលំហូរនៃវិនិយោគិនចិនមួយចំនួន ចូលមកកាន់ខេត្តជាប់មាត់សមុទ្រមួយនេះ ក្នុងរយៈពេលប៉ុន្មានខែកន្លងមកនេះយ៉ាងណាក្តី។
អ្នកនាំពាក្យរដ្ឋបាលខេត្តព្រះសីហនុលោកឃាង ភារម្យបានប្រាប់គេហទំព័រ Propertyarea.asia នៅថ្ងៃទី 0៩ ខែកញ្ញា ឆ្នាំ ២០២០នេះ ឱ្យដឹងថា ការផ្ទុះឡើងនូវជំងឺកូវីដ-១៩ គឺជាវិបត្តិសកល ដែលធ្វើឱ្យប៉ះពាល់សេដ្ឋកិច្ចនូវទូទាំងពិភពលោក ហើយបើនិយាយដោយឡែកសម្រាប់កម្ពុជា ជាពិសេសនៅក្នុងមូលដ្ឋានខេត្តព្រះសីហនុ ក្នុងនោះវិស័យសំណង់ ក៏ទទួលរងផលប៉ះពាល់ក៏ទទួលរងផលប៉ះពាល់ផងដែរ។
លោកបន្តថា “បើក្រឡេងមើលវិស័យសំណង់ សកម្មភាពនៃការសាងសង់រយៈពេលចុងក្រោយនេះ គឺមានសកម្មភាពបន្តិចបន្តួចប៉ុណ្ណោះ មិនដូចកាលពីមិនទាន់មានការផ្ទុះឡើងនូវជំងឺកូវីដ-១៩ នោះទេ” ។ លោកបន្ថែមថា “សម្រាប់សកម្មភាពសាងសង់សំណង់នៅក្នុងអំឡុងពេលនេះ ភាគច្រើនគឺជាអ្នកនៅក្នុងស្រុក អ្នកវិនិយោគទុនក្នុងឬម្ចាស់សំណង់នៅក្នុងស្រុក” ។
ដោយឡែកសម្រាប់សំណង់ដែលវិនិយោគពីក្រៅស្រុក ក៏មានសកម្មភាពតិចតួចផងដែរពោលមិនច្រើននោះទេ បើទោះបីមានលំហូរជនជាតិចិនខ្លះៗយ៉ាងក្តី។
ប្រធានសមាគមភ្នាក់ងារ និងវាយតម្លៃអចលវត្ថុកម្ពុជា លោក ច្រឹក សុខនីម បានឱ្យដឹងដែរថា តាមស្ថានភាពជាក់ស្តែងរហូតដល់ពេលនេះ ការសាងសង់សំណង់នៅក្នុងខេត្តព្រះសីហនុ ហាក់មានសកម្មភាពតិចតួតនៅឡើយ ទាំងការជួល ឬវិនិយោគលើវិស័យអចលនទ្រព្យក៏មានសកម្មភាពតិចតួចផងដែរ។
លោកបន្តថា “សកម្មភាពនៃការសាងសង់សំណង់ នៅក្នុងខេត្តព្រះសីហនុទាមទារយៈពេលយូបន្ថែមទៀត ទើបមានសកម្មភាពផុលផុសដូចកាលពីលើកមុន ទោះបីមានចរន្តនៃការហូរចូលរបស់ជនជាតិចិន មកាន់ខេត្តព្រះសីហនុ ហើយត្រូវការពេលវេលាយូថែមទៀត” ។
វិស័យសំណង់នៅក្នុងខេត្តព្រះសីហនុ នៅក្នុងរយៈពេលប៉ុន្មានឆ្នាំកន្លងមកនេះ មានសន្ទុះរីកចំរើនគួរឱ្យកត់សម្គាល់ ដោយមានការចូលរួមវិនិយោគពីវិនិយោគិនចិន និងនៅក្នុងស្រុក ដែលជំរុញឱ្យខេត្តជាប់មាត់សមុទ្រមួយនេះ មានការទទួលស្គាល់ទាំងតំបន់ និងពិភពលោ ខណៈដែលរាជរដ្ឋាភិបាលបានប្រែក្លាយខេត្តនេះ ទៅជាខេត្តសេដ្ឋកិច្ចពហុបំណង៕
