អតិថិជនជាង ១៨ ម៉ឺននាក់បានស្នើរៀបចំឥណទានឡើងវិញក្នុងទំហំទឹកប្រាក់ជាង ៨១៧លានដុល្លារ

ដោយ ៖ វុត្ថា

ភ្នំពេញ ៖ គិតត្រឹមដំណាច់ខែឧសភា ឆ្នាំ២០២០ មានអតិថិជនចំនួន ១៩៦ ៣០៧នាក់ ដែលរងផលប៉ះពាល់ដោយជំងឺ Covid-19 បានស្នើសុំគ្រឹះស្ថានមីក្រូហិរញ្ញវត្ថុនៅកម្ពុជា ធ្វើការរៀបចំឥណទាន (កម្ចី)ឡើងវិញ។

នៅក្នុងរបាយការណ៍របស់សមាគម មីក្រូហិរញ្ញវត្ថុកម្ពុជា ដែលគេហទំព័រ propertyarea.asia ទទួលបាននៅថ្ងៃទី៥ ខែមិថុនា ឆ្នាំ២០២០នេះ បានបញ្ជាក់ថា អតិថជនចំនួន ១៨០ ៣០១ (ជាង៩០ភាគរយ) ទទួលបានការអនុម័តរៀបចំឥណទានឡើងវិញ ដែលមានទំហំទឹកប្រាក់សរុបចំនួន ៨១៧ ៧២៥ ៤៣៦ ដុល្លារ ។

ប្រធានក្រុមប្រឹក្សាភិបាលសមាគម មីក្រូហិរញ្ញវត្ថុកម្ពុជា លោក គា បូរាណ បានឱ្យដឹងថា សមាជិករបស់សមាគម ទាំង ១០៣ គ្រឹះស្ថាន បានបង្ហាញការប្តេជ្ញាចិត្ត និងដោះស្រាយបញ្ហាជាមួយអតិថិជនរបស់ខ្លួនប្រកបដោយភាពទន់ភ្លន់ និងឈ្នះ-ឈ្នះ ក្នុងអំឡុងពេលដ៏លំបាកដោយសារជំងឺ Covid-19 ស្របតាមការអំពាវរបស់រាជរដ្ឋាភិបាលក៏ដូចជាធនាគារជាតិនៃកម្ពុជាផងដែរ។

លោកបន្តថា គ្រឹះស្ថានហិរញ្ញវត្ថុ មានទិសដៅរួមមួយ គឺចង់ឃើញអតិថិជនរបស់ខ្លួនទទួលជោគជ័យ និងបន្តប្រើប្រាស់សេវាហិរញ្ញវត្ថុប្រកបដោយប្រសិទ្ធភាព “ភាពជោគជ័យរបស់អតិថិជន ជាភាពជោគជ័យរបស់គ្រឹះស្ថាន” ។ សមាគម មីក្រូហិរញ្ញវត្ថុកម្ពុជា ចាប់ពីខែមីនា ឆ្នាំ២០២០ សមាគម បានប្រមូលទិន្នន័យការរៀបចំឥណទានឡើងវិញជារៀងរាល់សប្ដាហ៍ពីសមាជិករបស់ខ្លួន រួមមាន គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យាហិរញ្ញវត្ថុ និងគ្រឹះស្ថានឥណទានជនបទ។

ទិន្នន័យទាំងនេះត្រូវបានប្រមូលឡើងក្នុងគោលបំណងតាមដានផលប៉ះពាល់ជាក់ស្ដែងពីវិបត្តិជំងឺ Covid-19 ទៅលើអតិថិជន ការគាំពារអតិថិជនរបស់គ្រឹះស្ថានដែលជាសមាជិក និងការវិវត្តទូទៅនៃវិស័យមីក្រូហិរញ្ញវត្ថុទាំងមូល ដើម្បីធ្វើការវាយតម្លៃ និងផ្ញើរបាយការណ៍ជូនភាគីពាក់ព័ន្ធ៕

អគ្គនាយកដ្ឋានពន្ធដារ ជំរុញការធ្វើបច្ចុប្បន្នភាពលើវិស័យអចលទ្រព្យ ដើម្បីជៀសវាងការកក់ស្ទះមិនបានបង់ពន្ធ

ដោយ ៖ ប៊ី

ភ្នំពេញ ៖ ដើម្បីជៀសវាងការកក់ស្ទះ និងការជួបប្រទះលើបញ្ហាការកាត់ឈ្មោះសម្រាប់លក់ ឬការផ្ទេរអចលនទ្រព្យផ្សេងៗ អគ្គនាយកនៃអគ្គនាយកដ្ឋានពន្ធដារជំរុញការធ្វើបច្ចុប្បន្នភាពលើវិស័យអចលទ្រព្យ ដែលជាការប្រមូលផ្តុំទិន្នន័យធ្វើឱ្យទាន់សម័យ និងឈានទៅប្រើប្រាស់ប្រព័ន្ធចុះបញ្ជីតាមអនឡាញ។

ថ្លែងនៅក្នុងកម្មវិធីពិសេសស្តីពីការផ្តល់សេវាពន្ធដារតាមអនឡាញ និងការធ្វើបច្ចុប្បន្នភាពផ្សេងៗ កាលពីថ្ងៃទី៤ ខែមិថុនា ឆ្នាំ២០២០ លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានឱ្យដឹងថា ពាក់ព័ន្ធនឹងវិស័យអចលនទ្រព្យ អគ្គនាយកដ្ឋានពន្ធដារបានកំពុងរៀបចំ ការបង់ពន្ធអចលនទ្រព្យតាមប្រព័ន្ធអនឡាញ (E-Payment) ដែលនឹងអាចដាក់ឱ្យដំណើរការនៅចុងខែមិថុនានេះ ដើម្បីផ្តល់ភាពកាន់តែងាយស្រួលដល់អ្នកជាប់ពន្ធក្នុងវិស័យអចលនទ្រព្យ ក្នុងនោះអគ្គនាយកដ្ឋាននឹងដាក់ចេញនូវសេចក្តីណែនាំអំពីរបៀបចូលទៅប្រើប្រាស់ រួមជាមួយបន្តធ្វើកិច្ចការជាមួយធនាគារដៃគូ ដើម្បីដាក់បញ្ចូលប្រព័ន្ធនេះតែមួយ ។

លោកបានថ្លែងថា ពាក់ព័ន្ធវិស័យអចលនទ្រព្យ កន្លងមកនេះវិស័យអចលនទ្រព្យមួយចំនួនមិនទាន់មានទិន្នន័យបច្ចុប្បន្នភាពនៅឡើយ បច្ចុប្បន្នមន្ត្រីជំនាញពន្ធដារ បានកំពុងចុះធ្វើបច្ចុប្បន្នភាពលើវិស័យនេះ ក្នុងទិសដៅចុះប្រមូលផ្តុំទិន្នន័យជាក់លាក់ និងធ្វើឱ្យទាន់សម័យ ដើម្បីឈានទៅប្រើប្រាស់ប្រព័ន្ធចុះបញ្ជីតាមអនឡាញ (E-Payment) ដែលនឹងដាក់ឱ្យប្រើប្រាស់នៅក្នុងខែមិថុនា នេះ ដើម្បីចៀសវាងការកក់ស្ទះ ឬការយឺតយ៉ាវមិនបានបង់ពន្ធ ជាពិសេស ជៀសវាងលើបញ្ហាជួបប្រទះការកាត់ឈ្មោះ នៅពេលម្ចាស់អចលនទ្រព្យត្រូវការលក់ ឬការផ្ទេរអចលនទ្រព្យផ្សេងៗជាដើម។

លោក បានបញ្ជាក់ទៀតថា ក្រៅពីការដាក់ឱ្យអនុវត្តន៍ប្រើបាស់ប្រព័ន្ធអនឡាញ របស់អគ្គនាយកដ្ឋានពន្ធដារ រាជរដ្ឋាភិបាលបានកំពុងរៀបចំប្រព័ន្ធអនឡាញរបស់ជាតិ ពោលគឺការប្រើប្រាស់ចុះបញ្ជីក្នុងថ្នាលតែមួយ ដោយមានគ្រប់ស្ថាប័នជំនាញពាក់ព័ន្ធទាំងអស់ ដើម្បីផ្តល់ភាពកាន់តែងាយស្រួល ក្នុងការសម្រួលដល់ការធ្វើពាណិជ្ជកម្ម ក្នុង និងក្រៅប្រទេស ដោយអាចប្រើប្រាស់ឯកសារ ឬចុះបញ្ជីនៅក្នុងប្រព័ន្ធនេះតែមួយ ៕

អ្នកជំនាញ បង្ហើបពីវិធីសាស្ត្រទិញអចលនទ្រព្យដោយគ្មានលុយនៅនឹងដៃ

ដោយ ៖ រ៉ាណេត

ភ្នំពេញ ៖ ការធ្វើជំនួញនៅក្នុងវិស័យអចលនទ្រព្យគឺមានច្រើនរូបភាព ដែលក្នុងនោះសម្រាប់តែការវិនិយោគ ទោះបីជាមិនដើមទុនគ្រប់គ្រាន់កាន់នៅក្នុងដៃយ៉ាងណាក៏ដោយ ប៉ុន្តែលោកអ្នកនៅតែមានលទ្ធភាពក្នុងទិញអចលនទ្រព្យសម្រាប់វិនិយោគបន្តយកចំណេញ។

អគ្គនាយកក្រុមហ៊ុនភ្នាក់ងារអចលនទ្រព្យ Kraty Realty Co,.Ltd លោក ចក់ ស៊ីណាត បានមានប្រសាសន៍ថា ទោះជាអ្នកគ្មានលុយដែលជាដើមទុនកាន់នៅក្នុងដៃក៏ដោយ អ្នកក៏អាចមានលទ្ធភាពក្នុងការទិញអចលនទ្រព្យសម្រាប់លក់បន្តយកចំណេញបាន។

លោក ចក់ ស៊ីណាត បានមានប្រសាសន៍បន្តទៀតថា “វិធីសាស្ត្រនៅក្នុងការទិញអចលនទ្រព្យដោយមិនមានលុយគ្រប់គ្រាន់កាន់នៅក្នុងដៃធ្វើជាដើមទុនគឺមានច្រើន ដែលក្នុងនោះបានមកពីភាពវៃឆ្លាតក្នុងការឆក់ឱកាស និងទំនាក់ទំនង ការប្រាស្រ័យទុនលើអ្នកដទៃ ការសហបណ្តាក់ទុនរួមគ្នា ឬកិច្ចសហការជាមួយធនាគារ ឬគ្រឹះស្ថានមីក្រូហិរញ្ញវត្ថុជាដើម”។

លោកបានមានប្រសាសន៍បន្តទៀតថា “មុនពេលឈានចូលការសម្រេចចិត្តធ្វើការវិនិយោគទៅលើអចលនទ្រព្យណាមួយទាំងដែលគ្មានទុនគ្រប់គ្រាន់នៅនឹងដៃ ដោយស្វែងរកប្រភពពីខាងក្រៅនេះ អ្នកត្រូវតែប្រាកដថាអចលនទ្រព្យដែលអ្នកមានបំណងវិនិយោគពិតជាមានសក្ដានុពល មានតម្លៃទាបជាងទីផ្សារ និងមានតម្រូវការទីផ្សារខ្ពស់ និងអាចលក់ចេញវិញបានក្នុងរយៈពេលដ៏ខ្លី ហើយមានអត្រាចំណេញខ្ពស់យ៉ាងពិតប្រាកដ។ នៅពេលអ្នកមានភាពច្បាស់លាស់ទៅលើការវាយតម្លៃអចលនទ្រព្យដែលស្ថិតនៅក្នុងគោលបំណងវិនិយោគ អ្នកអាចស្វែងរកប្រភពសហវិនិយោគពីខាងក្រៅបានយ៉ាងងាយ ដូចជាផ្តល់ឱកាសដល់ដៃគូចូលរួមវិនិយោគដើម្បីប្រមូលទុន ឬអាចពឹងពាក់ទៅលើស្ថាប័នធនាគារ ឬគ្រឹះស្ថានហិរញ្ញវត្ថុ ដើម្បីទទួលបានឥណទានសម្រាប់ទិញអចលនទ្រព្យទុកវិនិយោគបន្តយកចំណេញ ដោយមានការធ្វើផែនការនៃលំហូរសាច់ប្រាក់ផ្ទាល់ខ្លួន ដើម្បីសង់ត្រឡប់ទៅគ្រឹះស្ថានដែលផ្តល់ឥណទានឱ្យបានច្បាស់លាស់ផងដែរ”។

លោក ចក់ ស៊ីណាត បានមានប្រសាសន៍បញ្ជាក់ថា ការលើកឡើងខាងលើនេះ គឺជាវិធីសាស្ត្រមួយចំនួនដែលអាចផ្តល់ឱកាសដល់អ្នកក្នុងការវិនិយោគអចលនទ្រព្យ ខណៈដែលអ្នកមិនមានទុនគ្រប់គ្រាន់នៅក្នុងដៃ ដែលវាក៏នៅមានវិធីសាស្ត្រជាច្រើនទៀត ដែលផ្តល់ឱកាសលើការវិនិយោគអចលនទ្រព្យទាំងដែលខ្លួនគ្មានលុយ៕

រដ្ឋមន្ត្រីទេសចរណ៍៖ កម្ពុជាបាត់បំណូលពីអាជិវកម្មទេសចរណ៍ប្រមាណ ៣០០០ លានដុល្លារ

ដោយវុត្ថា

ភ្នំពេញ៖ រដ្ឋមន្ត្រីក្រសួងទេសចរណ៍អះអាងថា ក្នុងឆ្នាំ ២០២០នេះ កម្ពុជា បានបាត់បង់ចំណូលប្រមាណ ៣០០០ លានដុល្លារអាមេរិក ពីអាជីវកម្មទេសចរណ៍ ដោយសារតែវិបត្តិជំងឺ Covid-19 ដែលបណ្តាលឱ្យចំនួនភ្ញៀវទេសចរណ៍អន្តរជាតិធ្លាក់ចុះក្នុងរង្វង់ ៧០ ភាគរយ និង ភ្ញៀវទេសចរក្នុងស្រុកធ្លាក់ចុះ ប្រមាណ ៥០ ភាគរយ។

លោក ថោង ខុន រដ្ឋមន្ត្រីទេសចរណ៍ នៅក្នុងពិធីផ្សព្វផ្សាយ “បទដ្ឋានគតិយុត្តិដាក់ឱ្យអនុវត្តវិធានសុវត្ថិភាពទេសចរណ៍ (ជំហានទី ១)សម្រាប់ដំណាក់កាលវិបត្តិជំងឺ Covid-19 ដល់រដ្ឋបាលថ្នាក់ក្រោមជាតិ និងផ្នែកឯកជនក្នុងវិស័យទេសចរណ៍ នៅថ្ងៃទី ៥ ខែមិថុនា ឆ្នាំ ២០២០នេះ ឱ្យដឹង ថា គិតត្រឹមថ្ងៃទី ៨ ខែឧសភា ឆ្នាំ ២០២០ ការធ្លាក់ភ្ញៀវទេសចរនៅក្នុងប្រទេសកម្ពុជា បានធ្វើឱ្យប៉ះពាល់ដល់ដំណើរការអាជីវកម្មទេសចរណ៍ បិទទ្វារចំនួន ២៩៥៦ ទីតាំង និងការងារផ្ទាល់ក្នុងវិស័យទេសចរណ៍ ៤៥៤០៤ នាក់។

លោកបន្តថា “ទន្ទឹមនឹងនេះ ទោះបីជាវិស័យទេសចរណ៍កម្ពុជា បាននឹងកំពុងទទួលរងឥទ្ធិពលយ៉ាងខ្លាំងពីវិបត្តិនៃជំងឺ Covid-19 យើងសង្កេតឃើញនូវសញ្ញាវិជ្ជមានមួយចំនួន ពិសេសសម្រាប់ខែឧសភា នាដើមខែសប្តាហ៍ទី ១ ភ្ញៀវទេសចរជាតិ និងបរទេសផ្ទៃក្នុង បានដើរកម្សាន្តនៅតាមគោលដៅទេសចរណ៍នានានៅក្នុងប្រទេស ប្រមាណ ជាង១៥ម៉ឺននាក់ កើនឡើង ៤២ ភាគរយ និងភ្ញៀវអន្តរជាតិមានចំនួនជាង ២ ពាន់នាក់ កើនឡើង ២៦ ភាគរយ”។

លោករដ្ឋមន្ត្រីបន្ថែមថា “ប៉ុន្តែ យ៉ាងណាក៏ដោយ ផលប៉ះពាល់ទាំងនេះ បានដោះស្រាយជាបន្តបន្ទាប់ ដោយរាជរដ្ឋាភិបាល ប្រកបដោយស្មារតីទទួលខុសត្រូវខ្ពស់”។ ជាមួយគ្នានេះ លោក ថោងខុន បានម្តែងការកោតសសើរដល់កិច្ចខិតប្រឹងប្រែងរបស់រាជរដ្ឋាភិបាលដែលបានដាក់ចេញវិធានការជាបន្តបន្ទាប់ សំដៅគាំទ្រដល់វិស័យសេដ្ឋកិច្ច-សង្គម ដូចជាវិស័យទេសចរណ៍ កាត់ដេរ អាកាសចរណ៍ស៊ីវិល និងវិស័យឯកជនផ្សេងៗ ដើម្បីកាត់បន្ថយផលប៉ះពាល់។

យោងតាមការវាយតម្លៃរបស់អង្គការទេសចរណ៍ពិភពលោក (UNWTO)បង្ហាញថា ផលប៉ះពាល់ទេសចរណ៍អន្តរជាតិ នៅត្រីមាសទី ១ ដើមឆ្នាំ ២០២០ នេះ មានការធ្លាក់ចុះក្នុងអត្រា ២២ ភាគយ ខាងបង់ប្រាក់ចំណូលក្នុងវិស័យទេសចរណ៍ ប្រមាណ ៨០ ប៊ីលានដុល្លារស្មើនឹងការបាត់បង់ចំនួនភ្ញៀវទេសចរអន្តរជាតិ ៦៧ លាននាក់ ដោយសារការរីករាលដាលជាសកលនៃជំងឺ Covid-19 ៕

តើDonald Trump កំពុងស្ថិតនៅលើផ្លូវក្នុងការរបូតកៅអីប្រធានាធិបតីអាណត្តិក្រោយ?

ដោយ ប៊ី
ភ្នំពេញ៖ ចំពេលមានការតវ៉ាបន្ទាប់ពីប៉ូលីសបានសម្លាប់បុរសស្បែកខ្មៅលោក George Floyd និងការប្រយុទ្ធប្រឆាំងនឹងជំងឺរាតត្បាត តែអ្វីដែលសំខាន់ត្រូវបានគេមើលរំលង គឺលោកប្រធានាធិបតី Donald Trump ពេលនេះគឺជាអ្នកសម្រេចចិត្តក្នុងការឈានទៅរកការបោះឆ្នោតចំនួន ២៧០ សម្លេង ដែលលោកត្រូវការ ដើម្បីឈ្នះក្នុងអាណត្តិទី ២ នៅពេលខាងមុខនេះ។

ប៉ុន្តែបច្ចុប្បន្ន មានមតិរិះគន់ជាច្រើនចំពោះការដឹកនាំរបស់លោក Trump ដែលមិនមានភាពចាស់ទុំ អំឡុងការផ្ទុះឡើងការតវ៉ាមរណៈភាពបុរសជនជាតិស្បែកខ្មៅខាងលើ ដែលមានរយៈពេល៩ជាប់គ្នារហូតថ្ងៃទី៥ ខែមិថុនា ឆ្នាំ២០២០។ អំឡុងពេល លោក Trump ហាក់ដូចគ្មានចំណាត់ការអ្វីសោះចំពោះការផ្ទុះឡើងការតវ៉ានេះ។

លោក Jim Mattis អតីតប្រធានមន្ទីរប៉ង់តាហ្គោន កាលពីថ្ងៃពុធ ទី៣ ខែមិថុនា បានបន្ទោសថា លោក Donald Trump កំពុងព្យាយាមបំបែកអាមេរិក និងខកខានមិនបានផ្តល់នូវ “ភាពជាអ្នកដឹកនាំប្រកបដោយភាពចាស់ទុំ” ខណៈសហរដ្ឋអាមេរិកកំពុងជួបភាពវឹកវរពីការតវ៉ា។ លោក បានសម្តែងការគាំទ្រដល់ក្រុមបាតុករប្រឆាំងនឹងការរើសអើងជាតិសាសន៍ ។

លោក Mattis បានបង្ហោះលើអ៊ីនធឺណិតថា “លោក Donald Trump គឺជាប្រធានាធិបតីទីមួយនៅក្នុងជីវិតរបស់ខ្ញុំ ដែលមិនបានប្រឹងប្រែងបង្រួបបង្រួមប្រជាជនអាមេរិក” ។ លោក បន្តថា “ផ្ទុយមកវិញគាត់ព្យាយាមបំបែកពួកយើង” ។ លោកបានមានប្រសាសន៍ថា “យើងកំពុងមើលឃើញពីផលវិបាក ក្នុងរយៈពេល ៣ឆ្នាំនៃការដឹកនាំគ្មានភាពចាស់ទុំ” ។

លោក Mattis ថា លោក Donald Trump ជាមនុស្ស “ឆាប់ខឹង និងឆាប់តក់ស្លុត” បន្ទាប់ពីបានឃើញព្រឹត្តិការណ៍កាលពីសប្តាហ៍មុន។
លោក Donald Trump បានគំរាមកំហែងបង្ក្រាបដោយយោធា នៅពេលការតវ៉ាទូទាំងប្រទេសបានក្លាយជាអំពើហិង្សានៅក្នុងទីក្រុងមួយចំនួន ។ ការធ្វើបាតុកម្មភាគច្រើនធ្វើឡើងដោយសន្តិវិធី ប៉ុន្តែអ្នកខ្លះបានប្រែក្លាយទៅជាអំពើហិង្សា និងការលួចប្លន់នៅពេលយប់ជ្រៅ ។

លោក Mattis បានសរសេរថា ការអំពាវនាវរបស់ក្រុមបាតុករ ដើម្បីទទួលបានយុត្តិធម៌ស្មើៗគ្នា គឺជា “ការទាមទារដ៏ល្អ និងមានការបង្រួបបង្រួម ដែលយើងទាំងអស់គ្នាអាចដើរតាមបាន”។
លោក Mattis បាននិយាយថា “នៅពេលខ្ញុំចូលរួមជាមួយយោធា ប្រហែល ៥០ឆ្នាំកន្លងមក ខ្ញុំបានស្បថដើម្បីគាំទ្រ និងការពាររដ្ឋធម្មនុញ្ញ។ ខ្ញុំមិនដែលយល់សប្តិឃើញថា កងទ័ពដែលបានធ្វើសម្បថដូចគ្នានោះ នឹងត្រូវបានបញ្ជាឱ្យស្ថិតក្រោមកាលៈទេសៈណាមួយ ដើម្បីរំលោភលើរដ្ឋធម្មនុញ្ញ និងសិទ្ធិរបស់ពលរដ្ឋនោះទេ ” ។

លោក ត្រាំ បានរងការរិះគន់ចំពោះការប្រើប្រាស់កម្លាំង ដើម្បីបំបែកការជួបជុំដោយសន្តិវិធី ខណៈភាពចលាចលបានវាយប្រហារទីក្រុងរាប់សិបកន្លែង នៅទូទាំងសហរដ្ឋអាមេរិក។
បន្ទាប់ពីមានការផ្កោលទោសចំពោះការដឹកនាំរបស់លោក Donald Trump លោកហាក់ដូចជាអង្គុយលើកៅអីក្តៅសម្រាប់ការបោះឆ្នោតនៅអាណត្តិថ្មីរបស់លោក។

ដៃគូប្រកួតក៏មានសក្តានុពលរបស់លោក Trump
ការបោះឆ្នោតប្រធានាធិបតីសហរដ្ឋអាមេរិក នឹងធ្វើឡើងនៅកំឡុងខែវិច្ឆិកាខាងមុខនេះ ហើយបេក្ខភាពប្រធានាធិបតីមកពីគណបក្សប្រជាធិបតេយ្យ លោកJoe Bidenត្រូវបានគេមើលឃើញថា ទំនងជាមានលទ្ឋភាពក្លាយជាប្រធានាធិបតីអាមេរិកអាណត្តិក្រោយ បន្ទាប់ពីលោកDonald J Trump ដែលជាប្រជានាធិបតីដ៏ចម្រូងចម្រាស់មួយរូបរបស់អាមេរិក។

ជាសមាជិកម្នាក់ នៃគណបក្សប្រជាធិបតេយ្យ លោកBiden គឺជាបេក្ខជនដែលបានតែងតាំងជាអ្នកតំណាងបក្សប្រជាធិបតេយ្យ ដើម្បីឈរឈ្មោះជាប្រធានាធិបតីនៅក្នុងការបោះឆ្នោតឆ្នាំ២០២០។ លោកមិនទទួលបានជោគជ័យ ក្នុងការតែងតាំងប្រធានាធិបតីប្រជាធិបតេយ្យនៅឆ្នាំ១៩៨៨ និងឆ្នាំ ២០០៨ នោះទេ។
លោកបានក្លាយជាមេធាវីនៅឆ្នាំ១៩៦៩ ហើយត្រូវបានជាប់ឆ្នោតជាសមាជិកក្រុមប្រឹក្សាNew Castle County Council នៅឆ្នាំ ១៩៧០។ លោកJoe Biden ត្រូវបានជ្រើសរើសជាថ្មីចំនួន៦ដង និងជាសមាជិកព្រឹទ្ធសភាជាន់ខ្ពស់បំផុតទី៤ នៅពេលដែលគាត់បានលាលែងពីតំណែង ដើម្បីកាន់តំណែងជាអនុប្រធានាធិបតីនៅឆ្នាំ ២០០៩។

ក្នុងឆ្នាំ ២០០៨ លោក Biden ជាដៃគូរបស់បេក្ខជនប្រធានាធិបតី ប្រធានាធិបតេយ្យ លោកបារ៉ាក់ អូបាម៉ា។ ក្នុងនាមជាអនុប្រធានាធិបតី លោកបានត្រួតពិនិត្យការចំណាយហេដ្ឋារចនាសម្ព័ន្ធ ដើម្បីប្រឆាំងនឹងវិបត្តិសេដ្ឋកិច្ចដ៏ធំធេង និងជួយរៀបចំគោលនយោបាយអាមេរិកឆ្ពោះទៅអ៊ីរ៉ាក់ តាមរយៈការដកកងទ័ពអាមេរិកក្នុងឆ្នាំ២០១១។

ការចរចាររបស់លោកជាមួយ សមាជិកសភាសាធារណរដ្ឋ បានជួយរដ្ឋបាល លោក អូបាម៉ា អនុម័តច្បាប់រួមមានការបន្ធូរបន្ថយពន្ធ ការធានារ៉ាប់រងភាពគ្មានការងារធ្វើឡើងវិញនិង ច្បាប់បង្កើតការងារឆ្នាំ២០១០ ដែលបានដោះស្រាយការជាប់ពន្ធ។ ច្បាប់ត្រួតពិនិត្យថវិកាឆ្នាំ២០១១ ដែលបានដោះស្រាយវិបត្តិបំណុលឆ្នាំនោះ និងច្បាប់ផ្តល់ជំនួយដល់អ្នកជាប់ពន្ធអាមេរិកឆ្នាំ២០១២ ដែលបានដោះស្រាយអំពីសារពើពន្ធ ដែលជិតមកដល់។ លោកអូបាម៉ា និងលោក Biden ត្រូវបានជ្រើសរើសជាថ្មីក្នុងឆ្នាំ ២០១២។

នៅខែតុលាឆ្នាំ ២០១៥ បន្ទាប់ពីមានការសង្ស័យជាច្រើនខែ លោក Biden បានប្រកាសថា លោកនឹងមិនស្វែងរកតំណែងប្រធានាធិបតី នៅក្នុងការបោះឆ្នោតឆ្នាំ ២០១៦ ទេ។

លោកបានប្រកាសបេក្ខភាពជាប្រធានាធិបតី របស់លោកនៅឆ្នាំ២០២០ នៅថ្ងៃទី ២៥ ខែមេសាឆ្នាំ ២០១៩ ដោយចូលរួមជាមួយបេក្ខជនប្រជាធិបតេយ្យជាច្រើន ដើម្បីស្វែងរកការតែងតាំងគណបក្ស។
ពេញមួយឆ្នាំ ២០១៩ លោកត្រូវបានគេចាត់ទុកជាអ្នកនាំមុខជួរមុខ របស់គណបក្ស។ លោក Biden បានបន្តឈ្នះ១៨ ក្នុងចំណោមការប្រកួតប្រជែងចំនួន ២៦ លើកបន្ទាប់។ លោក Biden បានក្លាយជាបេក្ខជន ដែលមិនគិតទុកជាមុនរបស់គណបក្សប្រជាធិបតេយ្យសម្រាប់ការបោះឆ្នោតប្រធានាធិបតី៕

អគារការិយាល័យ B2B CENTER នៅខណ្ឌសែនសុខ បានត្រៀមខ្លួនរួចរាល់ក្នុងការទទួលស្វាគមន៍ក្រុមហ៊ុនជាតិ និងអន្តរជាតិ

ដោយ ៖ រ៉ាណេត
ភ្នំពេញ ៖ ទន្ទឹមនឹងការរីកចំរើនគួរឱ្យកត់សំគាល់ទៅលើការអភិវឌ្ឍវិស័យអចលនទ្រព្យនៅខណ្ឌសែនសុខ អគារពាណិជ្ជកម្មចំរុះ B2B CENTER បានរួមចំណែកក្នុងការរំលេច សោភ័ណភាព ខណ្ឌសែនសុខឱ្យកាន់តែសំបូរបែប ផ្នែកពាណិជ្ជកម្ម ជាពិសេសគឺផ្នែកអគារការិយាល័យ កំរិតស្តង់ដារ សំរាប់ទទួល ក្រុមហ៊ុនជាតិ និងអន្តរជាតិ ក្នុងការពង្រីកឱកាសអាជីវកម្មរបស់ខ្លួនក្នុងទីតាំងយុទ្ធសាស្រ្ត ដែលអំណោយផលស្ទើរគ្រប់វិស័យ នៅក្នុងតំបន់អភិវឌ្ឍន៍រហ័សនៃខណ្ឌដែលកំពុងមានសក្តានុពលមួយនេះ ។

បច្ចុប្បន្ន ខណ្ឌសែនសុខ ជាខណ្ឌដែលមានវិសាលភាពខ្ពស់ប្រមូលផ្តុំទៅដោយគំរោងធំៗ ទាំងផ្នែកលំនៅដ្ឋាន ផ្សារទំនើបជាតិនិងអន្តរជាតិ ផ្សារលក់ទំនិញឧបភោគបរិភោគ និងគ្រឿងប្រើប្រាស់សណ្ឋាគារ ខុនដូ គ្រឹះស្ថានសិក្សាជាតិ និងអន្តរជាតិ ជាដើម។
វត្តមាននៃ អគារ B2B CENTER បានបំពេញមុខងារ ដ៏សំខាន់មួយទៀតនៅតំបន់់នេះ គឺអគារការិយាល័យកំរិតស្តង់ដារដែលនាំមកជាមួយនូវលក្ខណៈពិសេស សុទ្ធសឹងជាចំនុចចាំបាច់ ដែលក្រុមហ៊ុនអាជីវកម្មភាគច្រើនត្រូវការជាពិសេស នៅពេលស្វែងរកអគារការិយាល័យសំរាប់ជួល។

អាគារ B2B CENTER ស្ថិតនៅលើផ្លូវមិត្តភាពកម្ពុជា វៀតណាម (ផ្លូវហាណូយ) ត្រង់ស្តុបផ្លូវបំបែកទៅផ្សាទំនើប AEON MALL សែនសុខ ប្រមាណ ៧០០ម៉ែត្រពីធនាគារជាតិសែនសុខ ។ អគារ B2B CENTER លាតសន្ធឹងលើផ្ទៃដីប្រមាណ ១,២ ហិចតា ដែលមានទំហំ ១៨០០ម៉ែត្រក្រឡាក្នុង១ជាន់ និងរក្សានូវផ្ទៃដីជិត១ហិចតាសំរាប់ចំណតរថយន្តដែលផ្ដល់លក្ខណៈងាយស្រួលបំផុតសំរាប់អ្នកប្រើប្រាស់អគារ ។ អគារទាំងមូលបំពាក់ទៅដោយជណ្តើរយន្តប្រអប់ ជណ្តើរយន្តជើង ដ៏ងាយស្រួលបំផុតសំរាប់ដឹកជញ្ចូនអ្នកដំណើរ ព្រមទាំងជណ្តើរថ្មើរជើង ដែលត្រូវបានរៀបចំឡើងក្នុងគោលបំណង លើកកំពស់ការថែរក្សាសុខភាពតាមរយៈការហាត់ប្រាណ ព្រមទាំងប្រព័ន្ធសន្តិសុខទាំងមនុស្ស និងបរិក្ខារជាប្រចាំ ២៤ម៉ោង ។

ជាចំណែកបន្ថែមសំរាប់អ្នកប្រើប្រាស់អគារពាណិជ្ជកម្មចំរុះ B2B CENTER ក៏បានស្ថាបនាឡើងផងដែរនូវគំរោងផ្សារសហគមន៍បែបធម្មជាតិ (COMMUNITY MALL) ប្រមូលផ្តុំទៅដោយហាងកាហ្វេ ភោជនីយដ្ឋាន អាហារដ្ឋានចំរុះ (FOOD PARK) ដែលជាកន្លែងផ្តល់បរិយាកាសប្រកបដោយផាសុខភាពសំរាប់ ការជួបជុំ ការញាំអាហារ និងការលំហែរកម្សាន្ដ ។ ជាចំនុចបន្ថែមសំរាប់អាជីវកម្ម ក៏ដូចជាតម្រូវការនាពេលបច្ចុប្បន្ន ទៅលើសាលប្រជុំខ្នាតមធ្យម អគារ B2B CENTER ក៏បានរៀបចំឡើងផងដែរនូវសេវាកម្មសាលប្រជុំសំរាប់សិក្ខាកាមដល់ទៅ ១០០នាក់ និងទីធ្លាធំទូលាយសំរាប់កម្មវិធីផ្សេងៗ ។

លោកអ្នកអាចស្វែងរកយើងបានកាន់តែងាយស្រួលតាមរយៈក្រុមការងារជំនាញ 066 / 077 / 098 – 979 123
www.b2bcenter.asia
Facebook / Instagram / Twitter – B2B CENTER

អភិបាលខេត្តបន្ទាយមានជ័យ បង្ហើបពីនីតិវិធីស្នើសុំអាជ្ញាប័ណ្ណសាងសង់

ដោយ ៖ វុត្ថា

ភ្នំពេញ ៖ អភិបាលខេត្តបន្ទាយមានជ័យបានឱ្យដឹងថា ប្រជាពលរដ្ឋទូទៅអាចស្នើសុំសិទ្ធិសាងសង់លំនៅឋានរបស់ខ្លួនបាននៅលើដីដែលមានផ្ទៃក្រឡាប្រមាណ ៥០០ ម៉ែត្រការ៉េ និងមានកំពស់ត្រឹម៤ជាន់ នៅត្រឹមថ្នាក់ស្រុកបាន ដោយមិនចាំបាច់ដាក់ពាក្យស្នើសុំដល់ថ្នាក់ខេត្តនោះទេ ។

លោក អ៊ុ រាត្រី អភិបាលខេត្តបន្ទាយមានជ័យ នៅក្នុងសន្និសីទសារព័ត៌មានស្តីពី “វឌ្ឍនភាពឆ្នាំ២០១៩ និងទិសដៅការងារបន្តឆ្នាំ២០២០ កាលពីថ្ងៃទី៤ ខែមិថុនា ឆ្នាំ២០២០ ម្សិលមិញនេះថា ប្រជាពលរដ្ឋដែលរស់នៅតាមបណ្តាខេត្តនាពេលបច្ចុប្បន្ននេះ មានលទ្ធភាពគ្រប់គ្រាន់ និងងាយជាទីបំផុតក្នុងការសាងសង់លំនៅឋានដែលមានកំពស់ ៤ ជាន់ ដោយមិនចាំបាច់ស្នើសុំសាងសង់ដល់ថ្នាក់ខេត្តនោះទេ” ។

លោកអភិបាលខេត្តបានពន្យល់ថា “ក្នុងន័យនេះ ប្រជាពលរដ្ឋត្រូវមានប្លង់កម្មសិទ្ធិ និងមានវិស្វករគូរប្លង់ឱ្យបានត្រឹមត្រូវ ហើយដាក់ស្នើនៅច្រកចេញចូលតែមួយត្រឹមថ្នាក់ស្រុក ជាមួយគ្នានេះ លោកអភិបាលស្រុកនឹងពិនិត្យថាត្រឹមត្រូវហើយ គាត់អាចចុះហត្ថលេខាអនុញ្ញាតឱ្យសាងសង់បានហើយ។ នេះ គឺជាការយកចិត្តទុកដាក់របស់រាជរដ្ឋាភិបាលក្នុងការជំរុញ និងបង្ខិតសេវាឱ្យកាន់តែនៅគៀកនឹងប្រជាពលរដ្ឋ និងធ្វើឱ្យកាន់តែល្អប្រសើរក្នុងការផ្តល់សេវាសាធារណៈជូនដល់ពលរដ្ឋ”។

លោកអភិបាលខេត្ត បញ្ជាក់ទៀតថា ខេត្តបន្ទាយមានជ័យ តាមរយៈពន្ធដារខេត្តបានប្រមូលចំណូលពីសេវាអចលនទ្រព្យ (ដីធ្លី) ជាពិសេស លើការកាត់ប្លង់ដី ផ្ទេរកម្មសិទ្ធិដី និងសំណង់ជាដើម មានការកើនឡើងពីមួយឆ្នាំទៅមួយឆ្នាំ ដែលធ្វើឱ្យសេដ្ឋកិច្ចនៅក្នុងខេត្តមានការរីកចំរើន ។

លោកបន្តថា គិតត្រឹមខែមេសា ឆ្នាំ២០២០ អគ្គនាយកដ្ឋានពន្ធដារខេត្តបន្ទាយមានជ័យបានប្រមូលចំណូលបានជាង ៧០ ភាគរយនៃផែនការពីវិស័យនានា ជាពិសេសពីវិស័យអចលនទ្រព្យនេះ៕

ការសិក្សា៖ ទីផ្សារលំនៅដ្ឋាននៅឥណ្ឌូនេស៊ីរំពឹងថានឹងងើបឡើងវិញនៅឆ្នាំក្រោយ

ដោយ ប៊ី

ហ្សាការតាៈ ខណៈការលក់ផ្ទះនៅក្នុងប្រទេសឥណ្ឌូនេស៊ី ត្រូវបានគេរំពឹងថានឹងមានការធ្លាក់ចុះនៅឆ្នាំនេះ ដោយសារជំងឺរាតត្បាត អ្នកទិញលំនៅដ្ឋានមួយចំនួនកំពុងពន្យារពេលការទិញ និងគ្រោងនឹងទិញលំនៅដ្ឋាននៅឆ្នាំក្រោយ។ នេះបើយោងតាមការស្ទង់មតិរបស់ក្រុមហ៊ុនផ្តល់ប្រឹក្សាទីផ្សារ MarkPlus Inc ដែលមានមូលដ្ឋាននៅទីក្រុង ហ្សាការតា។

ក្រុមហ៊ុន MarkPlus ដែលបានស្ទង់មតិលើអ្នកឆ្លើយសំណួរចំនួន១០០នាក់ ដែលរស់នៅភាគច្រើននៅហ្សាការតាបានរកឃើញថា អតិថិជនកំពុងសន្សំប្រាក់របស់ពួកគេដើម្បីរក្សាស្ថេរភាពហិរញ្ញវត្ថុផ្ទាល់ខ្លួន ចំពេលមានជំងឺរាតត្បាតCovid-19 ដែលជះឥទ្ធិពលដល់សេដ្ឋកិច្ចរបស់ប្រទេសនេះ។

ទោះជាយ៉ាងណាក៏ដោយ ចំនួនពាក់កណ្តាលនៃអ្នកឆ្លើយតប ដែលបានស្ទង់មតិ នៅតែរំពឹងថា នឹងទិញផ្ទះនៅឆ្នាំក្រោយ។

កាលពីសប្តាហ៍មុន សហការីជាន់ខ្ពស់ក្រុមហ៊ុនខាងលើ លោក Irfan Setiawan បាននិយាយថា “តម្រូវការនាពេលអនាគត ប្រហែលជាមិនខ្លាំងទេ ប៉ុន្តែយើងរំពឹងថាតម្រូវការនឹងកើនឡើងវិញនៅឆ្នាំក្រោយ ដោយសារអតិថិជនមានគម្រោងទិញផ្ទះមួយរួចទៅហើយ” ។

លោកIrfan បានមានប្រសាសន៍ថា ដើម្បីរំពឹងពីការងើបឡើងវិញនេះ លោករំពឹងថា ស្ថានភាពបច្ចុប្បន្ននឹងមានផលប៉ះពាល់ សម្រាប់យុទ្ធសាស្ត្រកំណត់តម្លៃ សម្រាប់អ្នកលក់ និងអ្នកអភិវឌ្ឍន៍លំនៅដ្ឋាន។

ការស្ទង់មតិថ្មីមួយទៀត ធ្វើឡើងដោយធនាគារកណ្តាលឥណ្ឌូនេស៊ីបានឱ្យដឹងថា បច្ចុប្បន្នការលក់ផ្ទះតូចៗ មធ្យម និងធំបានធ្លាក់ចុះ៤៣,១៩ភាគរយ ក្នុងរយៈពេល ៣ខែដំបូងនៃឆ្នាំនេះដោយសារជំងឺរាតត្បាតរាលដាល។

ទោះយ៉ាងណា ការស្ទង់មតិរបស់ក្រុមហ៊ុន MarkPlus បានឱ្យដឹងថា អតិថិជន១០ ភាគរយ នៅតែកំពុងស្វែងរកទិញផ្ទះ អំឡុងពេលមានជំងឺរាតត្បាត ទោះបីជាមានវិបត្តិសេដ្ឋកិច្ចក៏ដោយ។

ស្រដៀងគ្នានេះដែរការស្ទង់មតិដោយក្រុមហ៊ុន 99.co និង rumah123.com បានរកឃើញថា ៧៦ភាគរយនៃអ្នកឆ្លើយតបដែលត្រូវបានស្ទង់មតិ នៅតែស្វែងរកអចលនទ្រព្យសម្រាប់រស់នៅក្នុងឆ្នាំនេះ។

លោក Ming H Chong នាយកប្រតិបត្តិក្រុមហ៊ុន 99.co បាននិយាយថា “ឥឡូវនេះ អតិថិជនកំពុងស្វែងរកនិងរុករក [សម្រាប់គេហដ្ឋាន] តាមអ៊ិនធរណេត។ ពួកគេក៏ងាយស្រួលជាងមុនដែរ” ៕

ក្រុមហ៊ុនវវិនិយោគអចលនទ្រព្យដ៏ធំរបស់ចិនគ្រោងសាងសង់កំពង់ផែនិងបង្កើតសេវាកម្មទេសចរណ៍ចរណ៍តាមនាវាធំៗ

ដោយ វុត្ថា

ភ្នំពេញៈ ក្រុមហ៊ុន Prince Real Estate Group ដែលជាក្រុមហ៊ុនលំដាប់យក្សរបស់ចិន និងកំពុងវិនិយោគគំរោង Prince Manor Resort ក្នុងស្រុកកៀនស្វាយខេត្តកណ្តាលគ្រោងសាងសង់លំពង់ផែលំដាប់អន្តរជាតិ និងរៀបចំដំណើរការនាវាទេសចរណ៍នៅតាមដងទន្លេមេគង្គ និងដើម្បីរួមចំណែកដល់ការអភិវឌ្ឍ និងលើកកម្ពស់វិស័យទេសចរណ៍នៅរាធានីភ្នំពេញ។

លោក Xu Zhixing នាយកប្រតិបត្តិក្រុមហ៊ុន Prince Real Estate Group បានមានប្រសាសន៍ក្នុងជំនួបជាមួយលោកថោង ខុនរដ្ឋមន្ត្រីក្រសួងទេសចរណ៍នៅថ្ងៃទី៤ មិថុនានេះថា ក្រុមហ៊ុនគ្រោងរៀបចំពិធធីសម្ភោធគំរោង Prince Manor Resort នៅខែតុលា ឆ្នាំ២០២០ ខាងមុខនេះជាផ្លូវការ។

លោកបានបន្តថា នៅពេលសម្ពោធមជ្ឈមណ្ឌល Prince Manor Resort រួចរាល់ និងបន្ទាប់ពីទទួលបានការគាំទ្រពីក្រសួង-ស្ថាប័នពាក់ព័ន្ធ ក៏ដូចជា រាជរដ្ឋាភិបាលកម្ពុជារួចនោះ ក្រុមហ៊ុននឹងចាប់អនុវត្តគម្រោងនាវាទេសចរណ៍នេះ នៅឆ្នាំ២០២០-២០២៣ ដោយចង់ឱ្យមានកំពង់ផែទេសចរណ៍ស្ដង់ដាមួយ នៅមជ្ឈមណ្ឌលព្រីនម៉ាណ័ររីសតតែម្ដង។

ចំពោះគម្រោងបង្កើតឱ្យមានកំពង់ផែទេសចរណ៍នេះទៀតសោត ត្រូវបានលោករដ្ឋមន្ត្រីថោង ខុនសម្ដែងការគាំទ្រពេញទំហឹង ហើយសន្យាថា នឹងខិតខំសហការជាមួយស្ថាប័នពាក់ពាន់ ដើម្បីសុំការសម្រេចពីរាជរដ្ឋាភិបាលគាំទ្រ ដល់ការចូលចតរបស់នាវាទេសចរណ៍។

លោកថោង ខុន បានបង្ហាញគោលបំណង ចង់ឱ្យមាននាវាទេសចរណ៍ធំៗនៅរាជធានីភ្នំពេញ ដើម្បីនៅពេលមានកិច្ចប្រជុំធំៗលក្ខណៈអន្តរជាតិនានា កម្ពុជានឹងបានអញ្ជើញថ្នាក់ដឹកនាំមកពីអន្តរជាតិ និងរសម្ដេចតេជោហ៊ុន សែន ឡើងជិះលើនាវាទេសចរណ៍ ពិសាភោជនាហារ ទស្សនាទេសភាពល្អឯកតាមដងទន្លេមេគង្គ។

លោករដ្ឋមន្ត្រីក៏បានស្នើឱ្យ Prince Real Estate Group សម្លឹងលើការវិនិយោគទេសចរណ៍នៅខេត្តសៀមរាប ខណៈដែលរាជរដ្ឋាភិបាលកំពុងរៀបចំផែនការមេអភិវឌ្ឍន៍ទេសចរណ៍ខេត្តសៀមរាប ក្នុងនោះក៏មានគម្រោងផែនការ កសាងទីក្រុងសៀមរាបថ្មី គម្រោងទេសចរណ៍នៅខេត្តកំពង់ធំ ពិសេសជុំវិញតំបន់ប្រាសាទសំបូរព្រៃគុកផងដែរ។

លោកបន្តថា “សក្ដានុពលធំនៅទន្លេមេគង្គមានវិស័យកសិកម្ម និងវិស័យទេសចរណ៍ ប៉ុន្តែកម្ពុជាមិនទាន់បានទាញសក្ដានុពល ពីទន្លេមេគង្គបានច្រើននៅឡើយទេ ដូច្នេះហើយទើបក្រសួងទេសចរណ៍បាន ខិតខំជំរុញឱ្យមានការវិនិយោគកាន់តែច្រើន នៅតាមដងទន្លេនេះ” ៕

អ្នកជំនាញ៖ ឆ្នាំ២០២០ ជាពេលវេលាដ៏ល្អ ដែលអ្នកមានលុយគួរតែទិញដីទុក

ដោយៈ រ៉ាណេត

ភ្នំពេញៈ ត្បិតថា រហូតមកដល់ពាក់កណ្តាលឆ្នាំ២០២០នេះ សេដ្ឋកិច្ចពិភពលោកកំពុងដាំក្បាលចុះ ដោយសារឥទ្ធិពលនៃ Covid-19 ប៉ុន្តែសម្រាប់ទីផ្សារដីធ្លីនៅក្នុងប្រទេសកម្ពុជានៅតែរក្សាបាននូវភាពល្អប្រសើរ និងផ្តល់ឱកាសដល់វិនិយោគិននៅក្នុងវិស័យមួយនេះដដែលបើប្រៀប ទៅនឹងបណ្តាប្រទេសមួយចំនួនក្នុងតំបន់។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ប្រាប់តាមទូរស័ព្ទ កាលពីល្ងាចថ្ងៃទី៤ ខែមិថុនា ឆ្នាំ២០២០ថា សេដ្ឋកិច្ចទីផ្សារដីធ្លីស្រុកខ្មែរ នៅតែមានសន្ទុះកើនឡើង ស្របពេលដែលរាជរដ្ឋាភិបាលកំពុងយកចិត្តទុកដាក់ចំពោះវិស័យនេះ ជាពិសេសកំពុងមមាញឹក ជាមួយការអភិវឌ្ឍហេដ្ឋារចនាសម្ព័ន្ធ ផ្សេងៗ ដែលធ្វើឱ្យតម្លៃដីធ្លីកើនឡើង១កម្រិតទៀត។

លោកបានបញ្ជាក់ថា “បច្ចុប្បន្ននេះសេដ្ឋកិច្ចពិភពលោក កំពុងតែស្ថិតក្នុងភាពប្រឈម ប៉ុន្តែសម្រាប់ស្រុកខ្មែរ ហាក់មានភាពធូស្រាលជាងគេបន្តិច បើប្រៀបធៀបទៅនឹងបណ្តាប្រទេសនានាដែលស្ថិតនៅក្នុងតំបន់” ។ លោកបន្តថា “ជាក់ស្ដែងរាជរដ្ឋាភិបាលបានជំនះលើការរាតត្បាតនៃជំងឺឆ្លង ហើយទទួលបានលទ្ធផលល្អក្នុងការទប់ស្កាត់។ យើងឃើញថា ឥឡូវនេះចរន្តទិញ-លក់ក្នុងទីផ្សារដីធ្លី ចាប់ផ្តើមមានសកម្មភាពឡើងវិញ ទោះជានៅមិនទាន់ខ្លាំងក្លាដូចឆ្នាំ២០១៩ក៏ដោយ” ។

លោកបានបន្តថា “ពេលនេះ សម្រាប់អ្នកដែលមានលុយ និងមានលទ្ធភាពគ្រប់គ្រាន់ គួរតែពិចារណាទៅលើការទិញដីទុក សម្រាប់វិនិយោគបន្តយកចំណេញ ជាពិសេសក្រោយពេលបញ្ចប់វិបត្តិនៃជំងឺឆ្លងនេះ ស្ថានភាពអចលនទ្រព្យនៅកម្ពុជាមានភាពល្អប្រសើរឡើងវិញ ហើយសកម្មភាពអភិវឌ្ឍន៍ នៅក្នុងវិស័យសំណង់ចាប់ផ្តើមដំណើរការល្អឡើងវិញ នោះតម្លៃដីក៏នឹងមានការកើនឡើងផងដែរ” ។

អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានមានប្រសាសន៍ផងដែរថា តម្លៃដីធ្លីនៅលើទីផ្សារក្នុងប្រទេសកម្ពុជាបច្ចុប្បន្ន វាមិនថ្លៃដូចកំឡុងឆ្នាំ២០១៨នោះទេ ដោយសារតែការចាកចេញរបស់ជនជាតិចិន កាលពីចុងឆ្នាំ២០១៩ ជាពិសេសសម្ពាធនៃវិបត្តិសេដ្ឋកិច្ចពិភពលោក ដែលបណ្តាលមកពីការផ្ទុះឡើងនូវជំងឺឆ្លង Covid-19 ប៉ុន្តែបើនិយាយពីអនាគត អ្នកដែលមានលទ្ធភាពគ្រប់គ្រាន់គួរតែត្រៀមលុយទិញដីពីបច្ចុប្បន្នឱ្យហើយទៅ។

លោកបានបន្តទៀតថា “តម្លៃដីធ្លីនៅកម្ពុជា ប្រៀបធៀបទៅនឹងប្រទេសផ្សេងៗទៀតក្នុងអាស៊ានគឺនៅខុសគ្នាឆ្ងាយណាស់ ដូចជា ប្រទេសថៃ វៀតណាម សឹង្ហបុរីនិងម៉ាឡេស៊ី ដូច្នេះវាក៏នៅតែជាឱកាសសម្រាប់ វិនិយោគនៅក្នុងវិស័យមួយនេះ ដែលអាចទទួលបានភាគលាភក្នុងអត្រាខ្ពស់” ។ លោកបន្តថា “ជាទូទៅពីមួយឆ្នាំទៅមួយឆ្នាំ តម្លៃដីគឺមានការកើនឡើងជាប់ជាប្រចាំ ក្នុងរង្វង់ប្រមាណ១៥-២០ភាគរយ ឬនៅតំបន់ខ្លះកើនឡើងខ្ពស់ជាងនេះ ជាពិសេសតំបន់ដែលមានការអភិវឌ្ឍន៍ លើវិស័យហេដ្ឋារចនាសម្ព័ន្ធ ក៏ដូចជាវិស័យលំនៅដ្ឋានផងដែរ” ។

អគ្គនាយកក្រុមហ៊ុនអចលនទ្រព្យអន្តរជាតិ Century21 Advance Property លោកឡុង គឹមសួគ៌ បានលើកឡើងថា ស្ថិតក្នុងស្ថានភាពនេះ បើទោះជាតម្លៃទីផ្សារអចលនទ្រព្យ ក៏ដូចជាវិស័យដីធ្លីមិនមានការឡើងថ្លៃ ប៉ុន្តែវាក៏មិនធ្លាក់ចុះនោះដែរ ហើយសម្រាប់អ្នកដែលមានធនធាន និងលំហូរសាច់ប្រាក់គ្រប់គ្រាន់ អាចមានឱកាសច្រើនក្នុងការទិញទុក និងលក់បន្តយកចំណេញក្រោពេលវិបត្តិ នៃជំងឺសាកលមួយនេះ ត្រូវបានផុតរលត់ ជាពិសេសនៅតាមតំបន់សំខាន់ៗ ដែលស្ថិតនៅជាយរាជធានីភ្នំពេញ និងតាមបណ្តាខេត្តដែលមានសក្ដានុពលមួយចំនួន។

លោកបន្តថា “តំបន់ណាដែលមានគម្រោងអភិវឌ្ឍន៍កាន់តែច្រើន និងមានល្បឿនលឿន សន្ទុះនៃការឡើងថ្លៃគឺកាន់តែខ្ពស់ ដូច្នេះសម្រាប់អ្នកដែលមានលុយ ហើយចង់វិនិយោគនៅក្នុងវិស័យនេះ” ។ លោកបន្តថា “មុនពេលសម្រេចចិត្ត ត្រូវសិក្សាទៅលើស្ថានភាពសេដ្ឋកិច្ចនៅក្នុងតំបន់ និងការសិក្សាពីគម្រោងអភិវឌ្ឍន៍ឱ្យបានច្បាស់លាស់ ទើបមិនជួបហានិភ័យលើការវិនិយោគ” ៕

1...2,3782,3792,380...3,254 Page 2,379 of 3,254